رواية ذنوب على قيد الغفران الفصل الثاني و الستون 62 - بقلم براء

فهد : خابرني منذر 

غنى : خير شبي 

فهد : باوعتلها فيصل كاتل سعاد وماخذها لاهلها واخوتها ذابيها بالشارع 

غنى : يااا ... ليش 

فهد : حسب الي فهمته من منذر فيصل ما جان يدري بيها باعت قطعه الارض مالتها ومن دره تعارك وياها كايمه تافله عليه وضاربته مرجعلها الضربه وكد ما مأذيها مكسر سنونها تالي من شافها تخربطت اخذها لاهلها ومن شافوها اخوتها طردوها وما استقبلوها كلولها جفينه شرج ومالج علاقه بينه مالنه خلك ابن رجلج 

غنى : عززه بعينه وكسر بأيده كون اكو واحد يرفع ايده على امه لو مهما تسوي وتفعل تبقه هي الي جابته وتعبت عليه خاصه هو من دون الكل مخليته من اهم اولوياتها تالي يضربها ويطردها على حساب شي هو اصلا ماله حق يتدخل بي 

فهد : مو قطعه الارض هاي هي مشتريتها من ايام ابويه ولحد الان تدر عليها فلوس تالي اجيت اني خليتها تبيعها غصباً ماعليها 

غنى : ليش سويت هيج 

فهد : حتى اخليها تتندم لان لعبت وياي كعده العشاير الي سويتها مو على حساب الفلوس لا على حساب اخليها تبيع الكاع الي تعبت عليها سنين وتحس بأحساسنه من احترك المعمل وهسه صفت خاليه لا بيت ولا ملك ولا فلوس خلي يفيدها حقدها هسه صفت بالشوارع 

غنى : لهالدرجه حاقد عليها 

فهد : واكثر غنى واكثر الشخص الوحيد الي اكرهه لدرجه انو اتمنى الراحه متزوره ولا تدك بابه هي سعاد على القهر والضيم الي شفته منها من فتحت عيوني على هالدنيا ولليوم 

غنى : كعدت بحضنه مسحت على لحيته لتتشمت بيها حبيبي سلمها لله وكول حسبي الله ونعم الوكيل وهو ياخذ حقك منها تره الشماته متجوز وترجع عليك 

فهد : حضنتها مو مشمت ومسلمها لله من زمان ومنتظر اشوف شراح يصير بيها 

غنى : ونعم بالله ... زين منذر ليش خابرك 

فهد : يريدني استقبلها ورفضت بعد سوايتها لو تموت متعتب باب بيبتي 

غنى : لعد ليش منذر مياخذها لبيته 

فهد : ماموجود ببيته ذاب مرته وجهاله عد اهلها وكاعد يرمم بالبيت وصايره ليصه يمه بناء وعمال وين تكعد 

غنى : تنهدت وهسه شلون وين راح تروح خوما تبقه بالشارع 

فهد : لا خذاها منذر لبيت جدي علما يكمل بيته ويجيبها يمه 

غنى : بيت جدك ؟! ومعقوله استقبلوها 

فهد : للاسف اي اهل ابويه ناس فطر وكلبهم صافي ابد ميحقدون على احد وتلكيهم من شافوها صفت بالشارع خلوها عدهم وهاي سوالف عمامي الحجيه اكيد ماقابله بس يكلك عمامي تبقه مره خوما ننيمها بالشارع 

 

                

غنى : الله ينطيهم على كد نيتهم النظيفه وكلوبهم الصافيه هاي لو واحد غيرهم ميقبل حتى يستقبلها بس عمامك بينو شكد همه ناس طيبين 

فهد : هزيت راسي اي 

غنى : تلمست شعره شبيك حبيبي ليش احسك ضجت 

فهد : كلما اكول خلص سعاد ورقه واحتركت وطارت من حياتي اكتشف بعده رمادها ملاحكني كلما اكول انمحى من حياتي شي اسمه سعاد ترجع تظهر مره ثانيه شكلي ماراح ارتاح منها 

غنى : بس هي هسه مو يمنه وبعيده عنه ليش شايللها هم 

فهد : قندرتيش واشيللها هم بس ضايج لان جنت مرتاح وبالي صافي تالي طلعتلي نعال خربت كل مزاجي 

غنى : وهو كل الي يخرب مزاجهم يصيرون هيج ياخذون العقل 

فهد : ابتسم بهدوء ... شتكولين انتي 

غنى : اكول محد يطلع يجنن بكل حالاته غيرك 

فهد : بست ركبتها اموت عليج 

غنى : شديت على حضنه اني الي اموت عليك ياعمري انت ... سمعت صوت موبايله ابتعدت اباوعلها جاوب وصوت مره بالموبايل 

فهد : صوتج لتعلي واحجي عدل لا افرك حلكج بالنعال (عفوا) 

ليلى : ارتاحيييت هسه من خلييييت خوالييي يستعرون من امييي ويذبوهااا بالشارررع فختتت هسه بررررد كلبك وطاب حقدك لو بعددده هاي امي راااح تنجلط وتموووت من وراك 

فهد : يطبج مرض انتي وامج وعساكم بنار جهنم اني شكو شنو مخلفكم وناسيكم ولسانج لزمي لا انعل والديج بيج خير وزود جان استقبلتيها انتي مو جايه تصيرين قندره جبيره براسي 

ليلى : لو بأيدي استقبلهاااا واحطها ببطن عينييي بس بيتييي ميكفينيي يادوب مكفيني اني وجهالي وعمتييي 

فهد : هاي الاعذار قنعي بيها روحج اني مالي خلكم الموضوع ميخصني تخليها عندج عد منذر بالشارع بالحمام اني شعليه شنو امكم لو امي نقطه راس سطر مشاكلكم الشخصيه ويه امكم خلوني بعيد عنها لتخلوني حتى الاخوه الي بيناتنه انساها وانعل الساعه السوده الي فكر بيها ابويه يخلفكم 

ليلى : شنو شعليك مو انت الي طردتها وفضحتها بالعشيره من ورااااك امي رايحه لاقاربها وطارديها من الباب من وراك بعد محددد يريدها وصارت منبوذه وفوك هذا فيصل السافل كاتلها وكاسر سنونها يعل بأيده الكسر وبتول تزوجت بدون عرس وتفشلت كدام اهل رجلها كل هذا صار بسببك انت الله لا يسامح لا انت ولا مرررتك هاي الحيه ام راسين تمشي وتذب سم علينه 

غنى : كاعده واسمع حجيها لان الصوت عالي وهي تصيح كلبت الدنيا وفهد طكن عروكه عالنات عن عصبيته بس الفاجئني رده البارد 

فهد : اولا مو اني الي كلت لامج تحرك المعمل ولا اني الي كلتلها لعبي بذيلج وياي هاي نقطه نقطه ثانيه بتول راحت عرست شسويلها اذا هي مفلفله على ال*** خلي تشبع بي اني شكو ونقطه ثالثه ديربالج تجيبين طاري مرتي على لسانج لان راح يكون الي تصرف ثاني وياج خوش ... وهسه يله روحي لان مشغول ومافارغلج 

        

          

                

غنى : اباوعله سده .. شمر الموبايل ووجهه مكلوب ... ليش جاوبتها هيج 

فهد : تعلمي شغله تردين تموتين واحد بعز عصبيته جاوبي باسلوب بارد ومستفز راح تخلي يشيط للسمى وهسه كومي من حضني وللتتقربيلي ابد راح اروح انام خوش لحد ما اهدئ ياله 

غنى : لزمت ايده والى متى تضل كلما تصير عصبي تقفل على نفسك وتكعد 

فهد : مسحت على ظهرها حبيبي هاي احسن طريقه تخيلي محافظ على هدوئي ما اريد اصيح واتعصب وتصيرين انتي بوجه المدفع خلي اهدئ واجي انام بحضنج ونكمل يومنه مرتاحين ما اريد اخرب هالايام لان حيل مستعز بيها ومو دائما يصحلي ارتاح هيج 

بست شفايفها وشلتها موخرها من حضني كمت دخلت للغرفه ذبيت روحي على الجربايه حتى انام 

غنى : عفته براحته يمكن فعلا هذا احسن حل حتى لتنتلف اعصابه يعتزل شويه حتى يهدئ كمت دخلت للمطبخ نصيت النار على الدولمه حتى تستوي براحتها طلعت للصاله اخذت موبايلي داكه على انغام صار هواي ممخابرتها جاوبتني من اول رنه 

انغام : الوو هذا رقم غنى لو اني غلطانه 

غنى : ابتسمت اي هاي اني 

انغام : اليوم الشمس منين طالعه ولج بذاته هيج شهر متفكرين تسألين عليه او حتى تكولين مرت حمايه واختي اسأل عليها 

غنى : حبيبتي والله حقج عليه بس تعرفين الي صار التهيت وماكدرت اخابر اي احد 

انغام : اشاقه وياج حبيبتي قابل شريد منج اني والله لان احبج واعتبرج مثل اختي اعتب عليج 

غنى : حبيبتي فدوه لكلبج والله حتى اني احبج والعتب على كد المحبه

انغام : اي والله 

غنى : شلونه سالم وشلونها رفوله والله مشتاقتلهم 

انغام : والله موتوني هاي اني صارلي خمس تيام عد اهلي خبلو الوادم سالم كل ساعه كاتل جهال اخواني وهاي رفل كلما تشوف ابويه تتفل عليه والرجال يمسح وجهه ويسكت 

غنى : ضحكت هههه ليش 

انغام : علمي علمج تتخبل منه وهو سوده عليه مداريها ويموت عليها بس هذا حظه وهي ولاجنها فصمه حتى سنه بعدها ماصايره ووكحه شلعت كلبي 

غنى : بعد كلبي والله مشتاقتلها هي وسالم صار هواي مشايفتهم .. زين منذر شلونه 

انغام : منذر سالفته سالفه سوده عليه شحاله من ترميم البيت للمحاضرات ملاته تدرين بي ياخذ سادس ويدرسهم هاي من غير المشاكل اكيد حجالج فهد 

غنى : اي سولفلي وتفاجئت بصراحه متوقعت فيصل هيج يسوي 

انغام : حقير وسافل ولج ماشفتها سنونها متكسره وحلكها ملتهب كوه تحجي لان هالحقير مو غالط عليها كايمه ضاربته وتافله عليه كوم اركع راسها بميز الطعام والميز خشب مكسر سنونها وشاك حلكها خطيه خذاها منذر للمستشفى مضمدلها لثتها ومنطيها مسكنات

        

          

                

غنى : زين انتي وين شفتيها 

انغام : من ذبوها اخوانها مخابره منذر جاي عليها ركض جابها لبيت اهلي لان وين يوديها خلاها عدنه وراح لبيت الحجي علي يحاجي الحجيه تبقيها عدها بس مده حتى يكمل البيت ويجيبها تعيش يمنه ومن حركت كلبه خابر فهد يحجيله لان مات من القهر والمن يفضفض سوده عليه 

غنى : تنهدت رغم كل سواياتها بس والله انقهرت عليها يعني مو سهله واحد يضرب امه خاصه هو تحبه من دون الكل 

انغام : من عبنه حقير جانت تشيل بهالفلوس والذهب وتبيع وتنطي عادت حتى اختها لان ماقبلت تنطي بتها اله تالي خوش جازاها ولو هذا عقاب من الله جانت بطرانه على فهد وعيشته كلها الله اوكفيلي خلي احطج عد فيصل وشوفي 

غنى : هي عمت على نفسها فهد جان مداريهم مثل المي الي بالصينيه ومو لان رجلي احجي هيج بس مافديوم سمعته حاسب على شي لا على اكل لا على شرب لا على لبس عايفها براحتها تتصرف بس تالي اذته برزقه وحركت شي معيش عوائل كومه وكل هالعوائل خطيتهم بركبتها

انغام : اي والله فهد ماقصر ويانه كلنه كد شعرايه والله اتذكر بيوم الي جان يجي نهايه الشهر ومنذر يخلص راتبه ويضل ياكل بروحه يشيل فهد اوراق وينطي من غير الالعاب والملابس الي بكل طلعه يطلعها يذكر جهالي وجهال فيصل حتى جهال ليلى مينساهم بس همه الله يهديهم مدري شبيهم 

غنى : تنهدت الحمدلله والشكر على كل حال اهم شي الصحه

انغام : اي والله 

غنى : ضلينه نحجي شويه وسديته مسحت على وجهي سوده عليه فهد دومه مشلوع كلب من وره سعاد وجماعتها على كوله ورده 

حبيبتي ورده تكسر الخاطر طلعو ضالميها بالتصحيح وطلعت اكمال بالاحياء وتكول اروى شحالها صارت خاصه هي كولش شاطره صحيح تبين ممهتمه بس هي شاطره وهالشي لاحظته من درستها بس فهد مسكت قدم اعتراض للتربيه ورجعو صححو دفترها وطلعو فعلا خطأنين بالتصحيح خاليها 35 وهي ماخذه 97 شوف الفرق بغبائهم هذا وعدم مسوؤليتهم هاي دمرت مستقبل كومه طلاب

تنهدت داخله للمطيخ طفيت الكدر حتى واهس للاكل بعد ماكو وكفت اسوي مقبلات من الملل كملت اباوع للساعه ب8:30 خلي اكعده يصلي حتى نتعشه لان حتى صلاه مصله ... غسلت اديه ورحت للغرفه فتحت الباب ودخلت اباوعله غافي ميهونلي اكعده بس اذا ضل نايم يضل كاعد للصبح وتتعلعل نومته تقربت منه نمت بصفه وحضنته من وره احب احضنه هيج حبيبي اكعد صارت حتصير التسعه وانت نايم 

فهد : همم 

غنى : حشكت راسي بركبتها جريت نفس وبسته كوم يروحي اذن الاذان من زمان وانت مصليت وحتى العشه جهز كوم حتى تصلي ونتعشه 

فهد : ما اشتهي 

غنى : وخرت منه مباوعتله شنو متشتهي يعني اني كاعده من الظهر احضر بالدولمه وسويتها مثل ما انت تحبها تالي تكلي متريد 

        

          

                

فهد : باوعتلها حبيبي والله مو جوعان 

غنى : بهدوء خلص براحتك 

فهد : اجتي تكوم جريتها عليه ... كرصت خدها هسه اكوم كلشي ولا الكيمر يضوج 

غنى : ابتسمت كايمه يله انطيني ايدك 

فهد : تكدرين تكوميني 

غنى : طبعا 

فهد : انطيتها ايدي يله فنج 

غنى : لزمت اديه اجر بي شو هذا مينجر سحبته حيل وهم ماكو على نومته هاي شنو ليش مدتنجر 

فهد : ههه كتلج متكدرين 

غنى : لا اكدر بس انت سمنان اي سمنان تعال شكد وزنك وطولك حتى اسويلك رجيم شثكلك 

فهد : ضحكت طولي 185 و وزني 85 جسمي مثالي يفاهيه 

غنى : لحظه مستحيل انت 85 ممبين عليك 

فهد : كعدت اي صحيح مو وزني ماخذه بطولي واني طبيعتي عضمي خشن مو ناعم اضافه انو شغلي بنه جسمي ... باوعتلها يله بيج خير كوميني 

غنى : لزمت عضلات ايده يعني الشرطه هيج تسوي 

فهد : لا حبيبي الملاكمه 

غنى : فتحت عيوني ملاكمه 

فهد : اي قبل فتره مو قصيره جنت داخل معهد ملاكمه على حساب شغلي وهالشي ضاف لجسمي بنيه عضليه اكبر 

غنى : اكول ليش انفصخت ايدي هذاك اليوم ... باوعتله اني انسحب يله كوم انت 

فهد : ضحكت كايم بست خدودها يله تعاي 

غنى : اباوعله فعلا من هدئ رجع مثل الاول ابتسمت ماشيه وهو ورايه دخلت للمطبخ وهو راح يتوضه ويصلي .... حضرت الزلاطه والمقبلات وطلعت دولكه خليت بي مي ادري شكد يدقق و اذا لكه شي ناقص يزفني خوش زفه جهزت كولشي واخذت سفره فرشتها بالصاله لان حاره الدنيا مو مال نكعد بالمطبخ نقلت كولشي بقه بس يكمل حتى اصب الدولمه انتظرته يكمل حتى نتعشه كمل واجه للمطبخ 

فهد : شهالريحه خرب يومج تدوخ 

غنى : ابتسمت يله هسه اصب اخذت صينيه صغيره لان احس الدولمه متطلع طيبه اذا متنصب كلها بصينيه والبخار هيج يطلع منها يصير منظرها يجنن .. اخذت صينيه خليتها على الكدر 

فهد : تدبريها لو راح تفشلين روحج 

غنى : باوعتله ماعيب كلبت الكدر بالصينيه ... شوف 

فهد : عفيه عفيه بمريتي النادره الفاهيه 

غنى : شلت الصينيه ومشيت بسيطه اني اعلمك مادامي فاهيه بعد ممنوع تبوستي ولا تحضني اشبك المخده ونام 

فهد : كرصت خلفيتها نزت ام ال..... همزين بس الزمج تخدرين وراسج من رجليج متندلي بعد ممنوع ام الممنوع 

        

          

                

غنى : يمه والله فزيت فزه عززه فهد شهاللفظه هاي 

فهد : ماكلت شي هاي الحقيقه 

غنى : عيب يا حبيبي عيب انت شنو لسانك وبعدين لو واكعه الصينيه هسه من ايدي ومتبدي الاكل شنتعشى 

فهد : غمزتلها كل الي يحبه كلبج 

غنى : سكتت ولا يتوب ... طلعنه كعدنه بالصاله تربعت وبدينه نتعشه ... اباوعله مد ايده رافع دشداشتي هاي شنو ؟! 

فهد : حبيبي حاره الدنيا كلت ارفع دشداشتج حتى تتهوه زرورج 

غنى : ضحكت بصوت عالي وهاي اول مره اضحك هيج بس سوالفه تجبرني اضحك .... ههههههههههه 

فهد : هاي ضحكه الكح.... منين تعلمتيها 

غنى : هههههه عززه فهد شهالسوالف هاي مو كاعدين على النعمه متبطل انت 

فهد : بهدوء لا ما ابطل وانتي تعرفين ... ضكت الدولمه غمضت عيوني احتركو واشتعلو بكاز 

غنى : عجبتك 

فهد : كلش .. شوفي اني من سافرت لتركيا اكلت دولمه عدهم بس شنو من دولمه خيال بيومها جزمت انو اطيب دولمه بالعالم تتسوه هناك بس اليوم لا اسحب كلامي 

غنى : سبع عوافي حبيبي 

فهد : وكلتها على كلبج حبيبتي صدك عاشت ايدج نفسيتج بالاكل تجنن 

غنى : ابتسمت تعشينه بهدوء وكالعاده لازم نتناقش احلى ما بعلاقتنه اني وفهد انو احنه اصدقاء ومبيناتنه قيود وهذا الي يريحني انو فهد ميتقيد كدامي ويتصرف على طبيعته ومثل ميحب بحيث الي يشوفه هسه ميصدك انو هذا نفسه الضابط الشايف نفسه والي رافع خشمه وميتحاجه هيج طبيعته بالحقيقه ... اكول حبيبي 

فهد : بهدوء هاا حبيبي 

غنى : شوكت نرجع لبيتنه 

فهد : بيتنه؟!

غنى : اي بيتنه ليش 

فهد : ابتسمت عجبتني هالحجايه ... وبالنسبه للرجعه بس نكمل عشه اخابر غانم وان شاءالله يطلع كلشي تمام وانزال الخطر عنه حتى نرجع لحياتنه الطبيعيه 

غنى : ان شاءالله والله اني لازمه كلبي وخايفه عليك من يوم الي سولفتلي اخاف يعرفوك او يشكون بيك 

فهد : لتخافين كتلج سابقاً اني اكثر ورقه رابحه بقسم الاستخبارات كله مو بسهوله يفرطون بيه اني والي ويايه 

غنى : شمعنى انت بالذات 

فهد : لان ما اخاف وكلها تعرفني اي قضيه توكع بأيدي ما اعوفها اله اكملها عكس بعض الضباط الي وياي يحاولون مرتين تلاثه بعدين يأيسون ويقدمون على انسحاب ويسلمون القضيه لغير ضابط اني لا الابدي بي اكمله ولهالسبب كدرت بفتره مو كلش طويله اثبت جدارتي بشغلي 

        

          

                

غنى : ابتسمت اني فخوره بيك وهووواي هم 

فهد : خلي نكمل عشه واسويلج شي يخليج تفتخرين بيه اكثر 

غنى : يمه منك توبه بعد مااحجي 

فهد : ههه دعوفي النومي واكلي

غنى : ماشي تعشينه وكملنه كمت شلت المواعين سويت جاي ووكفت اغسلهن كملت وعزلت المطبخ صبيت جاي النه وطلعت انطيته جايه وكعدت شربنه جاي وكعدنه لل12 وكمنه للغرفه فتحت كنتور فهد لان معندي ملابس لبست قميص نوم من الي جابهن فهد مستور نوعاً ما واجيت تمددت 



فهد : ورثت جكارتي ماشرت على صدري تعاي هنا 

غنى : ذبيت الروب واجيت نمت على صدره وحضنته 

فهد : بست كصتها طبعا شفتج اليوم كلشي ما اكلتي كضيتيها تنتقش لازم اركز على اكلج اريدج تسمنين

غنى : باوعتله ليش انت مو تحجي على الي يحبون السمان 

فهد : اخذت نفس من الجكاره نافخه بوجها ...حبيبي اكو فرق بين انو اريد صحتج تصير زينه وبين انو اسمنج وبعدين انتي ماعايزج شي بس يرادلج شويه صحه لان كلش ضعيفه خصرج محبس ايدي تلتف عليه ميصير هيج صحياً مو زين هيج 

غنى : والله خطيه المرأه العراقيه حارت تسمن كلتو ضعفي ضعفت كلتو سمني شلون بله هسه نسمن لو نضعف 

فهد : ضحكت ... حبيبتي الناس اذواق اكو زلم يحبون الضعيفه واكو زلم يحبون السمينه والاغلبيه يحبون السمن لغرص احجيلج عنه بعد شويه 

غنى : زين انت شتحب 

فهد : اني ما احب لا هذا ولاهذا كلشي معقول احبه ومااعرف اذا لحسن او لسوء حظي مريتي كلشي عدها يتجاوز المعقول 

غنى : بهدوء شلون يعني 

فهد : يعني انتي هسه كلشي عندج عابر الشي المعقول بياضج ، حدت وسواد عيونج ، طول شعرج ، نظافتج ، ترافتج ، فهاوتج ، برائتج ، جمالج ، حجم اذاناتج كلشي زايد عندج ماكو شي معقول

غنى : يعني شسوي قابل اني خلقت نفسي 

فهد : لزمت ايدها تعاي نتفاهم هذا لون جسم انسان طبيعي 

غنى : ليش شبي 

فهد : وين اكو واحد هيج لون بشرته 

غنى : والله اني اشوفها عاديه بس الناس بس تنتقد وتعيب ساعه يكولون جنج بيضه سلك ساعه يكولون جنج كطنه مع انو اني مخالقه نفسي والحمدلله على الصحه قابل اروح اكل لله ليش خلقتني هيج 

فهد : خليت ايدي بصف ايدها تصدكين مع انو اني مو اسود بس من الزمج لو احضنج احس روحي اسود 

غنى : شابكت ايدي ويه ايده وبستها صحيح مزنجر بس احبك 

فهد : خو انتي الي تحارشتي دشوفي هالمزنجر شراح يسوي بيج كلبتها ونمت فوكها 

        

          

                

غنى : توبه اسفه والله توبه 

فهد : دخلي اعاقبج حتى تبطلين جماله لابستلي احمر دتحملي ابو قاسم كعد من وره سوالفج مديت ايدي جوه هدومها كرصتها 

غنى : كام يكرص ااه فهد والله جسمي يوجعني ههههه لااااااا فهدددد اييييدك والله العظيم متستحيييي انت 

فهد : ههههه 

____________________ 

صباحا

محسن : صباح الخير 

ياسمين : وخفه لهالوجه شبيك ولك 

محسن : عود شنو معناها ابويه وعمي جابو سعاد لهنا 

ياسمين : اسكت ولك كلبي مجمر وما اكدر احجي واكسر بحجايه ابوك وعمك 

محسن : يعني ماكو هيج صلافه فوك ماحركت المعمل وخلتنه نتلاطش اشهر وحلكنه يابس هسه جايه تبقه يمنه 

ياسمين : كضت عمرها تكتل الواحد وتمشي بجنازته ولا كأن مسويه شي متشوفها قبل شويه نزلت ويه امك ومسويه الوضه عادي 

محسن : عجيب والله عجيب اني لو منها بعد هالسوايه وجهي بعد ما اراوي بس هي ذره مستحه ماعدها جماله ابنها ملخها تملخ بالبارحه واخوتها طردوها وهي ولا كأن 

ياسمين : ان لم تستحي افعل ما شئت .... هاي بايعه ومخلصه لا تحس ولا تهتم 

سامر : صباح الخير 

ياسمين : شبيكم كالبين وجهكم اللهم صباح خير 

سامر : حجيه مو وضعيه هاي تره 

ياسمين : شكو ومرض بوجهه العدو شبيك مطنكر بس لا حساب سعاد 

سامر : لا مو بس على حساب سعاد 

محسن : لعد شبيك جنك نعال مكلوب على وجهه 

سامر : اسكت عنيي انت متزوج ومرتاح سمعي حجيه اني بعد ما اتحمل اريد اعرس ولتكليلي وره عرس شهد هاي تتعزز ووجها جنه مداس وتريدني انتظرها 

ياسمين : هوب هوب ولك منيه الوجها جنه مداس شهد اذا تحجي عليها اشكك شك خاف عبالك وبعدين منو لازمك متعرس 

سامر : وهالمشاكل هاي 

محسن : شعليك بالمشاكل عرس يمعود تره اذا طولت فهد يفركش تدري بي يكرهه الجر والعر 

سامر : هي هاي العايزه فهد يفركش حتى انتحر هو اني ماعولت 

ياسمين : هاي منو كلكم فهد يفركش لا بالعكس اصلا من حاجيته كال براحته وبعدين ياريت يطولون مااريد اختي تروح بهالسرعه قابل مثلكم عوزكم شويه وتركعون شهد جلاق وتنطوها لحارث 

محسن : لا والله حجيه بس شهد عمت عليهم كلهم خطبو و زواجهم متوقف على عرسها هي وذاك المطي 

سامر : اني والله تعذروني اتفقت اني وعلي منا لشهر نتمم كلشي ونعرس سوه واليوم اذا رجعو من البصره نروحلهم حتى احاجي فهد اني وعلي على هالموضوع 

        

          

                

ياسمين : ليش علي مو فاصخ 

سامر : لا حجيه يا فاصخ حاجه البنيه وراح يبدون يجهزون للعرس وين نايمه انتي 

ياسمين : والله يايمه على هالمشاكل راسي من رجليه ماكمت اندله ... تنهدت بالخير ان شاءالله استعجلو وعرسو لتطلعلنه سعيدان بشغله ثانيه 

سامر :حتى اسمها واخلص العالم من شرها كافيي جزعتنه ... يله من رخصتكم اروح للمستشفى

ياسمين : الله وياك ديربالك على روحك يمه .... وانت ليش كاعد متكوم 

محسن : كايم والله كلما اشوف حال المعمل اموت قهر بس مجبور اوكف بي اني تدرين فهد ماهو وابويه وعمي كبرو وميكدرون ... يله في امان الله 

ياسمين : في امان الله بعد كلبي ربي برد كلوبهم ورجعهم بالسوق مثل قبل دخيلك 

_________________________ 

غنى : واكفه انشف شعري وفهد يفتر بطرك الشورت الاسود وشعره المنكع يخابر المسوؤل مالته ويفشر ويغلط جماله ميستحي من مسوؤله ... بقيت شعري رطب وعفته مفتوح اباوع هم طال لازم اكصه بس خلي تصحلي فرصه كون فهد ماموجود 

فهد : خوش خوش دخلي اداوم اذا ما ا....... الخلفهم اطلع ابن كلب صبرولي من عيوني يدللون ماشي ماشي يله مع السلامه سديته 

غنى : شبيك حبيبي ليش تصيح 

فهد : ذوله الكوا...... الشرطه 

غنى : شبيهم 

فهد : سالفه طايح حظها مالج بيها ... باوعتلها صدك باجر الصبح نرجع للبيت لان امي وخواتي يرجعن اليوم 

غنى : اي همزين خلي نرجع والله شتاقيت للبيت رغم هالشقه اموووت عليها بس ماكو مثل غرفتي ارتاح بيها اكثر 

فهد : حتى اني ما ارتاح اذا مو بغرفتي صحيح هنا هم بيتي بس هالغرفه تخنك رغم واسعه بس ذيج متعود عليها 

غنى : اي صحيح .... باوعتله حبيبي شتريد اسوي غده 

فهد : فاصوليه 

غنى : ممنكعتها غير تكلي من البارحه هسه اذا انكعها متلحك 

فهد : خلص سوي الي تردي 

غنى : خوش لعد حسوي مركه شجر 

فهد : بهدوء حتى اديرها على راسج والله هذا الاكل شكثره مالكيتي غير الشجر 

غنى : والله طيبه بس انت لازك بالفاصوليه 

فهد : تره المقارنه بين الفاصوليه والشجر نفس المقارنه بينج وبين آلاء مرت فيصل 

غنى : شهالتشبيه هذا حبيبي اشكرك طلعتني فاصوليه

فهد : تدللين حبيبي اقل واجب هذا 

غنى : ابتسمت داخله للمطبخ حسوي تبسي لان حرت ... جهزت الغده والتهيت بين البيت والصلاه والقران وفهد هم مكضيها على التلفزيون لو يتمرن بالبيت كد ما ضايج خلص اليوم ركض ركض وماحسينه عليه ثاني يوم الصبح لبست فستاني الي لبسته بعرس ايهم وفهد رجع لبس ملابس جديده لان يتعقد يلبس شي ويرجع عليه مدري منيله هالسالفه .... كملت 

        

          

                

فهد : فتحي الحزام 

غنى : مضابته 

فهد : ميخالف حبيبتي خصرج مبين ما اريد واحد ينتبه لتقاسيم جسمج لان ميجوز يله فتحي 

غنى : صار ... فتحت الحزام وشلته اصلا ضميته بجنطتي واخذت كل الغراض راح فهد تأكد من كولشي بالشفه وفصل السبالت عن الكهرباء و الغاز عن الطباخ وطلعنه راجعين للبيت شفنه حجيه اشواق كالعاده جايه هي والحجي ... تقربت منها شلونج حجيه 

اشواق : حضنتها ياا نونه بعد كلبي شلونج 

غنى : بابتسامه حبيبتي حجيه الحمدلله انتي شلونج والله مشتاقتلج 

اشواق : تشتاقتلج العافيه والله دائما بسيرتج اني والحجي وكلما اريد اسأل عليج انسى 

غنى : ابتسمت ... شلونك عمو 

: هله بيج بنيتي ربي يحفظج شلونك ابني فهد 

فهد : اهلا بيك حجي شلونج حجيه 

اشواق : هله بيك وليدي تعالو تغدو يمنه 

فهد : رحم الله والديكم متقصرون يله من رخصتكم اخذت ايدها وطلعت ... تذكرين من دره سوت بيج دكه ناقصه ومثلنه 

غنى : اي اتذكر بيومها جذبت وسويتني حبيبتك واني ضربني ثول 

فهد : شديت على ايدها بس هسه انتي فعلا حبيبتي مو 

غنى : ابتسمت ... صعدنه راجعين للبيت الطريق كله اباوع للشوارع وكأني اشوفها اول مره يمكن محد يصدكني بس من الراحه الي اني بيها اشوف الدنيا ورديه وتجنن وصلنه للبيت وره ساعه لان العماره بعيده صف فهد السياره ونزلنه .... دك الباب توقعت الجهال يفتحون الباب مثل كل مره بس هالمره فتحتها ورده الي اول ماشافت فهد حضنته 

ورده : شلونك 

فهد : هله بالسبعه هله الي بيضت وجهي وطلعت معدل عالي 

ورده : لعد شعبالك ورده اني ... نونه ياعمري شلونج 

غنى : حضنتها بقوه هالبنيه احس روح مروان بيها فأحبها هواي بوستها شلونج 

ورده : والله مشتاقتلج وكمت ابجي عليج من رحتي 

فهد : سديت الباب عن اللواكه يله خلي انطب 

ورده : تعال منطيتني هديه 

فهد : طاحظج خلي اطب واطيج التردي 

غنى : دخلنه جوه وخاله واروى طلعن بسرعه 

ايمان : هله هله يمه بنيتي ستوه نور البيت والله 

غنى : بوستها منوره بوجودج خاله ... ابتعدت حاضنه اروى يربي شكد مشتاقتلها هي و ورده ونرجس 

اروى : ام وجه الفاهي على كوله فهد هيج تسوين بينه 

غنى : ابتسمت مقبوله منج 

        

          

                

اروى : حقيره والله دمعتي مانشفت عليج عبالي صاير بيج شي 

غنى : بهدوء اسفه 

فهد : تره اني صارلي خمس تيام غايب 

اروى : هههه انت نور البيت حبيبي 

غنى : اباوعله شلون يحضن ويبوس بأمه وخواته احب حنيته عليهن واعتقد لهالسبب هنه يموتن عليه ويعزنه هو ومنذر اكثر من علي وفيصل 

ايمان : روحو يمه بدلو وارتاحو حتى نتغده سوه والله صار هواي ما ملتمين 

غنى : صعدنه فوك فتحت باب الغرفه ودخلنه اباوع للغرفه اكو شي بيها ناقص باوعت لفهد الطبله الزجاج وين 

فهد : فتحت قميصي من وره وحده كسرتها 

غنى : لتكلي جروح ايدك من وراها 

فهد : هزيت راسي 

غنى : صدوك تحجي اكو واحد يفلش شي بأيده 

فهد : جنت محتاج افرغ الي بداخلي وماكو غير هالطريقه عوفج من هالموضوع لان ينرفزني خلي نبدل وننزل مشتاق للحديقه وصار هواي مامعتني بيها خلي اطلع اشوف ورداتي وشجراتي شخبارهن 

غنى : بهالحر 

فهد : اي ضايج وين اروح 

غنى : رحت بدلت لبست دشداشه ورديه وزركه واخذت شالي ونزلت البيت وحشه بدون الجهال متعوده على صوت احمد وزينه وسالم 

ايمان : تعاي احجيلي شسويتي ماسويتي بذيج الفتره 

غنى : كعدت بالمطبخ اني وخاله واجن البنات بديت احجيلهن على بيت جدو وخاله ايمان فهمت انو فهد ميقبل نتطرق للموضوع الاساسي 

اروى : يعني اهل ابوج طلعو حبابين 

غنى : ورده ورده 

ورده : ها هااا 

غنى : دمغتها ضاحكه ولج بطلي سوالفج 

ايمان : كعدي ولج ... زين الحمدلله من طلعو خوش ناس بس الي فاجئني زمرد طلعت عمتج 

غنى : اني هم تفاجئت من دريت متوقعت يصادفني هيج شي

ايمان : ذكرتيني بأخويه محمد سوده عليه جان يموت على عمتج ومدللها دلال لان جابوها اله صغيره عمرها يمن بحدود ١٤، ١٣ سنه وهي بطبعها هادئه وصوتها مينسمع المهم بقه وياها مدري جم سنه واستشهد بالحرب بعد كلبي مات وهو عمره ٢٣ سنه كلشي ما شاف من هالدنيا بعز شبابه و ودعنه حتى طفل ماصار عنده حتى يشيل اسمه مات وانطفه اسمه وياا 

غنى : اباوع لخاله ايمان بجت خطيه شكد حساسه 

اروى : ليش البجي يمه الله يرحمه 

ايمان : بدموع تذكرته حبيبي جانت ضحكته رنانه وشحلاتها المنطقه كلها تعرف بمحمد ابو كلب الطيب ابو ضحكه الحلوه تالي هالوجهه الحلو خذا التراب

        

          

                

غنى : الله يرحمه خاله هم السابقون ونحن اللاحقون شكد بجينه على امواتنه ومارجعو 

ورده : اوي يمه شبيجن كلبتنها مناحه هاي عود احنه فرحانين لان خلصنه من سعاد وشلتها 

اروى : حبيبتي وراج وراج متخلصين منها 

ورده : والله حتى اني ما مرتاحه احس راح يصير شي 

غنى : اسم الله لتحجن هيج .... كمت اساعد خاله بالغده والبنات راحن يعزلن البيت واكفه اثرم البصل حتى احمسه واخلي فوك التمن باكله وهم حسيت بدوخه لزمت الطباخ 

ايمان : شبيج يمه 

غنى : دخت 

ايمان : شجاج يمه دتعاي كعدتها وانطيتها كلاص ماي

غنى : شربت كلاص مي واحس بدوخه فضيعه بحيث راسي ينبض من الالم 

ايمان : شبيج يمه شجاج 

غنى : ما اعرف خاله هاي رابع مره ادوخ اباوعلها صفنت شبيج خاله 

ايمان : بس لحظه انتي الشهريه شوكت اخر مره اجتج 

غنى : من زمان 

ايمان : ولج خاف حامل 

غنى : باوعتلها هاا حامل 

ايمان : اي ولج خاف حامل خلي نسوي تحليل ونتأكد 

غنى : لزمت بطني معقوله اطلع اني حامل 

ايمان : لتصفين يمه فهد قبل لترحين لبيت جدج تقربلج قبلها بمده 

غنى : هزيت راسي 

ايمان : ومن ذاك اليوم لليوم ما تقربلج بعد 

غنى : ابنج ميتقرب صدوك تحجين والله شكلج متدرين السيد فهد باليوم جم مره يريد لا والاسطوانه الجديده كل شويه وكال ابو قاسم يكول يله 

ايمان : شبيج صفتني عذريني يمه لان تدخلت بخصوصيتكم بس غرضي اتأكد من حملج والله 

غنى : احم لا خاله تقرب 

ايمان : خوش لعد هسه اخابر علي يجيبلي اختبار 

غنى : لا خاله فشله 

ايمان : لا مو فشله قابل هو شمدري الج اوكفي هسه ادزله رساله وهو يفهم 

غنى : دزتله رساله شويه وخابرها 

ايمان : الووو

علي : شتسوين بي يمه تره ما مرتاحلج 

ايمان : شنو ولك 

علي : احجي يمه ويامن غلطانه 

ايمان : اكل تبن ابو حلك الفاهي غلطانه شنو جيب الاختبار وانت ساكت 

علي : هسه غير اعرف المن يمه دخيلج بس لا انتي الي حامل 

ايمان : الله يطيح حظك وتف على كتصك ويني وين الحباله اني من خلقتكم بطلت مااريد البزر والاختبار اريده لوحده ماعليك منيه جيبه وتعال يله 

علي : بس 

ايمان : عليووووي 

علي : خلص جايبه وجاي 

غنى : انتظرت علي اجه انطه الاختبار لخاله اخذته انطته الي علمتني شلون استخدمه وكالت وره الغده نسوي صبينه وكعدنه نتغده بطني ماغصتني حتى غده متغديت كد ممتوتره 

فهد : بهمس شبيج حبيبي ليش متاكلين 

غنى : لا مبيه شي ما اشتهي اكلت فواكه قبل شويه كمت اسوي الجاي معولت يكملون غده صبيتلهم جاي ودخلت ويه خاله لغرفتها 

ايمان : شوفي يمه اذا خطين يعني حامل واذا واحد يعني مو حامل هذا الاختبار اصلي جربته مرت منذر ومن اول ما استخدمته انطاها النتيجه مضبوطه يله طبي وكولي يا الله قبل لا تدخلين 

غنى : يا الله ... دخلت للحمام سويت الاختبار وانتظرت تطلع النتيجه كلبي يدك بسرعه وكأني بأمتحان اباوع طلع اخذته مباوعتله احس بروده سرت بأطرافي ... خطين معقوله صدوك حامل 

ايمان : هاا 

غنى : خطين 

ايمان : ياا كللللووووش الف مبروك بعد كلبي ربي ينطيج الفرحه مثل مافرحتي كلبي 

غنى : ابتسمت واحس راودني شعور غريب انو اكون اني حامل شي لحد الان مداستوعبه 

ايمان : شبيج يمه 

غنى : فرحانه 

ايمان : يبعد كلبي كلبج ربي يسعدج ويحفظج يايمه يله

امشي كلي فهد بسرررعه خلي ابشر البنات 

غنى : طلعت ملكيت فهد وين فهد 

علي : صعد فوك 

غنى : صعدت ورا دخلت للغرفه لكيته كاعد على اللابتوب مدري شيسوي 

فهد : هاا شبيج حبيبي تعاي 

غنى : نزعت حجابي واجيت كعدت بحضنه 

فهد : حضنتها شبيج حبيبي شو حتى ماتغديتي 

غنى : فهد انت تحبني 

فهد : ابتسمت اعشكج مو بس احبج 

غنى : اريد اكلك شي 

فهد : كولي يروحي 

غنى : باوعتله فهد اني حامل ... اباوع لابتسامه اختفت وتبدلت ملامحه وهالشي فاجئني 

فهد : 

*********

يتبع