رواية ذنوب على قيد الغفران الفصل التاسع و الخمسون 59 - بقلم براء
التاسع والخمسون
غنى : الطريق كله ابجي اريد بس اسكت ما اكدر منظره مديروح من بالي وكلما استرجع الموقف اتمنى روحي ميته والله ماخذني ولا اشوف حب حياتي بهالموقف
سامح : بس فهميني يابويه ليش تبجين كطعتي كلبي اكو شي صاير منو مأذيج احجي يا بنتي والله انعل والديه
غنى : بدموع لتسألني رجاءاً ولتدخل
سامح : غير اعرف شبيج ياعمي خوما اضل اباوعلج وانتي تبجين واسكت
غنى : كتلك لتسألنيييي مااريد احجييي بشي ورجاءاً لتدخل
سامح : ماشي ما اتدخل بس كليلي وين اخذج هسه تجين لبيتي ترتاحيلج جم يوم
غنى : اخذني لاي مكان عسى ما تشمرني من الجسر وتخلصني من هالحياة هم ميخالف
سامح : اسم الله عمي لتحجين هيج عمرج طويل ان شاءالله هسه اخذج يم امي هي تعرف شلون تهدئج
غنى : بدموع شتهدئ واني بداخلي براكين تفور شيطفيها وصلنه لبيت جدي نزلت ونزل عمو جنطتي دك الجرس طلع ولد
ايهم : هاا عمي شنو عرست وجايب مرتك تضمها عدنه تخاف من ام مخلد
سامح : طاحظك هاي بت عمك صالح غنى غنى بويه هذا ايهم ابن عمج فالح عايش ويه بيبيتج بس جان عنده شغل بالوكت الي اجيتي بي وماشافج وخر ولك تعاي طبي هسه تلكين امي كاعده
غنى : دخلت لجوه البيت صنته وهدوء رحت بسرعه لغرفه بيبي دكيت الباب
ام صالح : اني مو كلتتتت ارييييد انام ليش تدكووون الباب ولددد الكلب
غنى : فتحت الباب ودخلت اباوعلها تفاجئت من شافتني وكامت بسرعه على حيلها
ام صالح : غنى ولج حبيبه خير شبيج وشبي وجهج
غنى : متحملت بس شفتها اجت على بالي بيبي زكيه حسيت كولشي تجمع عليه بجيت بحركه كلب تذكرت كولشي اريد بس ابجيي
ام صالح : كامت تركض باتجاهه ... يااا سوده بوجهي ولج يمه شبيج
غنى : آاااااه بيبي آاااه ناااار نااار بكلبييي بيبي راااح اموووت
ام صالح : حضنتها اسم الله اسم الله الموت لليكرهوج شبيج بعد كلبي منو بجاج يا نظر عيني احجييي والله لمسح بي الكاع واني فليحه وحجايتي سيف
غنى : اني انيييي الي انمسسسحت بيه وبكرامتييي الكاااع يا بيبي ... بييي والله ماغلطت ولا قصرت ليش هيج سوووه بيه ليييش
ام صالح : منوه هذا المكموع احجييي ولج فتيتي كلبي
سامح : هاا يمه شبيها كاعده بالكاع شنو تخربطت اخذها للمستشفى
ام صالح : انت ماعلييييك امشيييي اطلع بره ابوو عين الصلفه جماللللله جايني تحجييي وياي امشييي ولي
سامح : بحزن العفو يمه اني غير لخاطرها احجي
ام صالح : عود ميخالف يله اطلع وسددد الباب ... وانتي شو مسحت دموعها كافيي بجي عيونج اذا انمردن منو يفيدج كافي يله تره اضربج وهسه احجيلي شبيج ولتخافين سرج ببير ميطلع لاحد احجي بت صالح لتفتين كلبي
غنى : لارد بس تبجي
ام صالح : زين بس فهميني شطلعج من بيتج بهالوكت و رجلج وين وشلون خلاج تطلعين
غنى : تنشغ لتجيبييين طاري كددداامي
ام صالح : هاا هيج السالفه كولي متعاركين
غنى : باوعتلها وشهكت ياريت بيبي ياريت لو متعارك ويايه ياريت لو ضاربني ياريت لو ذابحني والله ما اكله لا بس مو يخونييي بهاي عيني بيبي شفته بهاي عيني شفت الانسان الوحيد الي حبيته بحياتي واعتبرته سند الي ويه غيري
ام صالح : لطمت على وجها عمى العما الله لايبارك بي على هالعمله لا يا ابن الكلب ادرييي شيطيكم الله بعد اشو انطاكم الجمال والاخلاق والنظافه والدلال وهم عيونكم متشبع شنووو من مله هالزللللم الهي زبن خاف انتي مقصره وياا مامداريته
غنى : بدموع والله يا بيبي مقصرت بشي وياا والله بيبي بعز تعبي وظهري مكسور من الصبح للظهر اني اكرب ... تنظيف ، طبخ ، تعزيل كولشي عليه ومع هذا قبل جيته اركض احضرله الملابس واعزل الغرفه وشيريد اسويله وحتى مرات كلبي يضل يموتني من الالم وجسمي كله يون عليه بس ما اكله اخاف لا اقلقه عليه تالي هيج جازاني
ام صالح : سوده عليه يامن عمى بعينك يالماتسمى الله لايوفقك ان شاءالله
غنى : تنشغ والله لو مقصره اكول حقه يخوني والله لو مأذيته او مضوجته انطي عذر بس والله وداعه مروان ماصدر مني تقصير مداريته مثل المي الي بالصينيه واخاف عليه اكثر ما اخاف على نفسي تالي بعد كل هذا يروح يخوني ويدوس على مشاعري وكرامتي بدون حتى ميهتم
ام صالح : ااااخ زلم متملي عينهم بس التراب وحق ربج شايفتهم ذوله متفيد وياهم المعدله يحبون التهينهم وتخليهم نعال برجلها وتدوس عليهم وين ما الجايفه والوصخه تلكين راحتهم
ربي لا اعتراض على حكمك يعنيي امهات الشوارع والي لاعبات جقه شبر الرجوله عبيد لرجليهن والمعدله الشريفه الصاينه نفسها هاي قسمتها كافي ولج لتبجين ميستاهل دموعج والله
غنى : مدابجي عليه ابجيي على روحيي ابجي على الاشهر الكضيتها بواجي وخوف عليه ابجي لان رفضت الدنيا و وافقت عليه رغم كل عيوبه بيبي اني حتى عيوبه حبيتها وصارت حسنات بعيني كد ما احبه بس تالييي باعني بالرخيص وراح لوين ماكو وحده قذره ليييش بس خلي واحد يكلي ليييييش آاااه والله مااريد شي بس كلولي ليش شنو الي بدر مني حتى هيج يسوي بيه
ام صالح : كافي ولج ليوكف كلبج خلي يولي يروح واحد يجي عشره غيره والله لطلكج وازوجج لواحد يسوه راسه لهالحقير ابو النسوان لو بي ميخلي سلاحه كل طلقه تركب عليه مسحت على راسها كومي نامي بعد كلبي والصباح رباح ليروح يصير بيج شي بيمن الربح بازهار
غنى : ياريتني انام نومه بلا كعده
ام صالح : اششش لج اسم الله من عمري على عمرج غير الحكج
غنى : بدموع حتى هو جان يكلي هيج يكلي لتجيبين طاري الموت اذا متي الحكج الجذااااب
ام صالح : حجي زلم شلج بي ذوله على حساب راحتهم يركعون للنسوان كومي كومي الميشتريني بالغالي ابيعه بالبلاش مو حتى بالرخيص كمت وكومتها نزعي حجابج وطبي سبحي خلي الماي يبردج كومي وياي وانطيني موبايلج خاف يدك عليج عليج حتى اني احاجي و واوكله تبن
غنى : جرتني كوه دخلتني للحمام وسدت الباب فتحت الدوش وكعدت نزل الماي ونزلت دموعي وياا صرخت من كل كلبي اريد النار البداخلي تطلع ضربت وجهي وخرمشت خدودي ساااااعه السوووده الحبيتك بيها ساااااعه السوده الي شفتك بيها لك ليييش ليششششش شمسويتتتتتلك انيييي ورحت بعتنييي شنوووو بيهن ذنييي وفضلتن عليه ليييييش لك فهد لبيييييش ولج يمه لحكيلي بتج مابقه واحد ماغدر بيها حتى سندها ذبها وباعها بجيت بحركه كلب فهد كسرني كسره ما اطيب منها لو مر عليه دهر ضليت كاعده جوه الدوش لمن حسيت نفسي فرغت من الي بداخلي شويه كمت لبست وطلعت لكيت بيبتي كاعده
ام صالح : وللللج هاي شمسويييه بروحج الله يطيح حظج ياغبررره ارتاحيتي هسه من هيج سويتي بروحج ولج ليش
غنى : بجيت الله ياخذنييي حتى ربييي غضبته من وراا بيبي فقدت والله ماقصدي اغضب الله محسيت على نفسي بس ردت اهدئ
ام صالح : تعاي نامي تعاي الله لا يوفقك يالبالي
غنى : نمت بحضنها ... بيبي اذا خابركم لتكلوله اني هنا
ام صالح : ليش
غنى : ما اريد يعرف وبس
ام صالح : خلص براحتج هسه اكل لعمج لتشيلين هم يله نامي
غنى : دموعي مانشفت اريد عيوني تغمض بس مااكدر من بعد موت مروان اوحش ليله مرت عليه هالليله
______________________________
ايمان : الساعه بال١٢ بالليل وغنى لسه ماهي خابرت منذر وعلي طلعو يدورون عليها من ساعتين فهد ميرد اصلا كسرنه الموبايل عليه وهم ميرد خابرت ابو حوراء يكول غنى مو يمنه والله راح اتخبل
اروى : يربي غير يجاوب
آلاء : يمعودات خاف معتدين عليها وكت الي راحت لخالتها ورجعت منهاره شفتن ملابسها شلون متربه وحتى نظارتها ماهي
ايمان : استغفر الله فال الله ولا فالج سكتي يمعوووده من غييير شي اني كلبي نار هسسسه غير يجاوب هالابن الحيوانه هذا
اروى : اباوع دخلو منذر وعلي ... اجو اجو
ايمان : هااا لكيتوها
علي : كلبنه بغداد وماهي خابرت فهد ميرد عليه شسوي يعني
منذر : واني رحت لبيت خالتها كلتلي ما اجت ولا وصلت والمره تخبلت اخر شي كتلها طلعت رايحه ويه الحجيه لكرايبنه مااعرف شلون جذبت هالجذبه بس خفت لتنجلط المره
ايمان : ياربي وين راحت البنيه اباوع لفهد دخل بسرعه وصعد بوجهه فوك حتى سلام ماسلم يا الهي العالمين وتالي مالحكنه نصعد ورا نزل يركض
فهد : وين غنى
الكل : لارد
فهد : هسسسسسه غييير يحجووون وينهاااا
ايمان : انتتت الي وينك من التسعه ندك عليككك وانت ماكووو مرتك طلعت كالتت رايحه لخالتها ورجعت مبنده من البجييي وصعدت اخذت غراضهاا وطلعت
فهد : وشلوووووون تخللليها تطللللع صدك تحجييين انتيييي وانتووو يالبهايم شلون تخلوها تطلع
علي : منذر ببيته واني جنت بالعياده ومن رجعت لسه افتر ادور عليها وماهي فص ملح وذاااب نخابرك مترد الصوج منك ليش ماجاوبت علينه
فهد : مسحت على شعري وطلعت موبايلي
منذر : اذا راح تتصل على خالتها لتحاول لان جنت يمهم وكالت مو عدها
فهد : ايده ترجف اروى خخ خابري نرجس بسرعه
اروى : خابرتها ماراحتلها
فهد : لعدددد وين ولت ... طلعت بره اخابرها جهازها مغلق ياربي دخيلك طيح حظي كلشي سوي بيه بس كون الكاها ..... الوووو لللللك نعاااال انت شلووون تكليييي رجعت للبيت ابن القندررره غيرررر تتأكد هايييي اني رجعتتتت ومالكيتها
: والله العظيم شفتها بعيني دخلت للبيت ياله رجعت
فهد : وحق من نزل القسم اذا ما الكاهاااا اطلللع بروحككك والله غلقته بسرعه واخذت سيارتي وطلعت ادور عليها بكل مكان شجاك بس فهمنييي شجاك وماحسبتهااا صح بس بسيطه خلي الكاج اذا ما ازوعج العافيه وابجيج دم ما اتسمى بسمي .... كلبت بغداد كلاب ماكو ماهي فتريت على كل المستشفيات ماهي بقالي اخر مكان خابرت عمها على امل الكاها عدهم ... خابرته طلعلي الوو
سامح : بنعاس الوو منو
فهد : بهدوء اني زوج غنى
سامح : هاا يا غنى
فهد : غنى بت اخوك
سامح : هاا اي شبيها
فهد : غنى عدكم
سامح : هاا لا عمي شجابها عدنه ليش هي وينها هسه
فهد : صارت مشكله بيناتنه وطلعت يمكن راحت لخالتها رجاءاً اذا تواصلت وياك بلغني بنفس اللحظه
سامح : ماشي تدلل من عيوني بس تخابرني اكلك .. سديته منه واتصلت بأمي الوو يمه خابرني رجلها وسأل عليها كتله مثل ماكتيلي
ام صالح : اي بعد وكت ستوه تذكر ... اسمع ولك والله اذا تكله غنى عندي اطلع بروحك فتهمت
سامح : زين ليش خطيه ماسمعتي صوته شلون خايف عليها
ام صالح : اكل تبن ونفذ الي اكوله ونقاش لا تناقش يسألك سوي روحك اثول وحتى كله اذا ما مصدك تعال اخذك لبيتنه وتأكد حتى يروح الشك منه خلي ينشوي ويضل ياكل بروحه عسى نار جهنم تاكله ان شاء الله .. يله روح
فهد : وين ولت رحت لاطراف بغداد نزلت ادور عليها واسأل هم ماكو فص ملح وذاب ياربي وين راحت ... اخذت جهازي دكيت عليها هم مغلق تنهدت وتالي ضليت ادور عليها للخمسه الصبح نبشت بغداد نبش وهم ما لكيتها والله دنعل ابوج لابووو حتى اليطلعلج شلوون بيه لو تعرضلها احد وين انطي وجهي مليت كد ما دورت وبدون اي نتيجه .... لفيت ورجعت للبيت لكيت امي واروى كاعدات
ايمان : هاا لكيتها
فهد : كلبت بغداد ومالكيتها
اروى : بدموع زين هي ليش عافت البيت
فهد : بارتباك ما ادري علمي علمكم مافهمتوو منها انتو ليش طلعت من البدايه
ايمان : نزلت مستعجله سألتها وين رايحه كالت خالتها متخربطه وابو حوراء منتظرها براس الشارع امنت على حجيها وكتلها روحي راحت ورجعت وره حوالي ساعه ساعتين مبنده وهدومها متربه وبس تبجي شحالها صعدت لمت ملابسها وتنشغ احاجيها اني والبنات نريد مترد علينه حاولنه نخابرك بس مارديت وهي طلعت حاولنه نمنعها ماكدرنه والله حتى اني طلعت وراها اركض بس هي تركض وبأيدها الجنطه حتى مالحكت عليها
فهد : مسحت على وجهي بس اريد اعرف وين راحت بهالليل وهي ماعدها احد
ايمان : شراح تسوي هسه
فهد : ماادري ماادري خلي يطلع الصبح وارجع ادور عليها
اروى : فهد انت ليش هيج بارد شو احسك مامهتم
فهد : شنوووو مامهتممم كاعددده بكلبيييي انتييي لتضلييين تمسلتيييين من وحدج
عفتهن وصعدت لغرفتي فتحت الباب ودخلت اباوع للغرفه الكنتور مفتوح وهدومها ماهي شريد اسوي هسه وين الكاها وهي حتى جهازها مغلق وييييين ولت وين كلبت الغرفه ادورلي على شي رقم صخام يدليني بيهااا بس ماكووو ... لحظه الكامرات ركضت فتحت اللابتوب اباوع للبيت ماكوو شي حولت على المطبخ اباوعلها هاي وياها واكفه تشتغل دخلت ساره تحجي وياها شويه وصعدن سوه لغرفه ساره وره فتره طلعت غنى من غرفتها بس وضعها مو طبيعي تمسح بوجها دخلت للغرفه معقوله ساره كلتلها بس ساره شدراها قابل ... كلبت على اليوم الثاني ضليت اتباعها وره ماطلعت طلعت وراي خررررب الك..... شطلعهاااا وراي شطلعهااا وره فتره رجعت للبيت اباوعلها مو غنى الي اعرفها منهاره وشحالها صعدت فوك تركض والكل وراها دخلت للغرفه واختفه كلشي شويه وطلعت تركض وبأيدها الجنطه وطلعت من البيت خررررب الجابججججج ركعت اللابتوب بالكااع كلبت الطبله بتتتت الكلللب شودااااج ورايه شوداااج وويين وليتييييي كلبت الغرفه كلاب وين راحت على الاقل كوووووليييي كوليييي وين رحتيييي حتى الكااااج ياربي دخيلك كون مابيها شي بس خلييي الكاهااااا اباوع للغرفه متفلشه كعدت واحس اكو الم بأديه اباوع الدم يطفر منهن تنهدت ياربي اني غلطان لتعاقبني بيها دخيلك
_________________________
صباحا
غنى : بين الوعي والا وعي اسمع اصوات حواليه
ايهم : حجيه ادخل
ام صالح : تعال
ايهم : صباح الخير هاا شو كاعده من وكت
ام صالح : صباح النور حبيبي اي والله بت عمك مصخنه من الفجر ولسه واني كاعده اسويلها كمادات وهسه نزلت حرارتها شويه
ايهم : احجيلي شبيها هاي وضعها مو طبيعي
ام صالح : والله بت عمك سالفتها سالفه سوده عليه
ايهم : خير شبيها احجيلي
ام صالح : مابيها شي امشي روح سويلي ريوك يله لان عمتك والبنات نايمات وتعبانات من الشغل واني مابيه حيل اكوم
ايهم : حجيه تره عرسي بعد جم يوم وهم تردين تكربيني
ام صالح : كوم ولك لاتجادل
غنى : فتحت عيوني اباوع هاي بيبي واني بغرفتها نزلت دموعي والله جان عبالي داحلم وهسه اكعد والكه نفسي بحضن فهد مثل كل مره بس للاسف طلع كولشي صاير حقيقي ومو حلم كعدت واحس راسي صاير طبل
ام صالح : هاا حبيبه شلون صرتي
غنى : راسي يوجعني بيبي
ام صالح : بيه ولابيج بعد كلبي هاي لان مصخنه تحسين بنحول كومي غسلي وهسه نكعد نتريك اني وياج ونتفاهم خوش
غنى : اجيت احجي ودخلن جوكه مال بنات والي هنه بنات عمامي وعماتي ... سها وبلسم بنات عمه زمرد .... هديل وهاشم اولاد عمه ازهار والي لحد الان مشفتها .... غسق ويسار وايهم اولاد عمو فالح .... غدير وجمار وكرم اولاد عمو كفاح ... مخلد ومسلم و تبارك اولاد عمو سامح
البنات : صباح الخير حجيه
ام صالح : هله صباح النور شعجب كاعدات من وكت
سها : ياا غنى عدنه شلونج ياحلوووه
غنى : بهدوء الحمدلله
غسق : العفو لتفهمين قصدي غلط بس شعجب اجيتي لهنا لا وبايته عدنه هم
ام صالح : اني عزمتها على عرس ايهم وهم رجلها ملتحق كلت اكلها تجي تبقى يمنه فتره هم تتونس وهم تتعرف عليكم باعتبارها صارت منه وبينه
بلسم : يا اهلا وسهلا بيها نخليها بعيونه
غسق : اي والله همزين اجيتي حتى نتعرف عليج اكثر لان ذاك اليوم مالحكنه نتعرف اني غسق بت عمج فالح متزوجه وعندي ولدين
سها : انتي تعرفينه اني مخطوبه وراح اتزوج بعد سنه وبلسم حرباء اقصد عزباء
هديل : اني هديل بت ازهار صيدلانيه ومامزوجه وما اشبه امي
بلسم : بقت بس تبارك وغدير وجمار من يجن نعرفج عليهن وهسه تكومين ترحين ويانه للسوك
غنى : بهدوء لا شكرا
غسق : ليش تعاي تونسي اني راح اخذهن بسيارتي
غنى : لا تسلمين مااكدر
غسق : خلص براحتج يله بنات امشن بدلن خلي نطلع من وكت
غنى : اباوع كلهن طلعن ودخل هذا ايهم الي على اساس حيعرس ... خله صينيه ريوك وباس بيبي وطلع مبين عليهم حبابين عكس اهلهم
ام صالح : يله سمي بسم الله ومدي ايدج تريكي حتى انطيج حبايه مسكن
غنى : ليش ما كلتي للبنات على الي صار وياي
ام صالح : لان انتي وراج عدو ومتشمت ما اريد عمتج ونسوان عمامج يتشمتن بيج فكتلهن رجلج ملتحق واجيتي هنا حتى انتي تبردين ورجلج يشلوط وهو يدور عليج
والاهم من هذا اني اريدج ترتاحين هالفتره بدون ما واحد يزعج واريد رجلج هذا الشايب يضل ياكل بروحه وهو يدور عليج اريد هيج تضربه جلطه مرتبه لو يموت ياله اكله انتي عدنه ابو شيبات فوك ما ماخذه جوريه يروح يدور وراها السافل
غنى : مو وصخ
ام صالح : شنو
غنى : هو مو وصخ
ام صالح : الوصاخه مو وصاخه جسم مو مبارك جسمه يبرك وداخله قذر يله حبيبتي اكلي ورمي عضمج تره محد يفيدج وداعه عيونج الحلوه هاي
_________________________
اروى : هاا يمه بعدج كاعده
ايمان : ليش هو اني كدرت انام من جه مرت اخوج الي اختفت ومن جه ثانيه اخوج
اروى : ليش شبي
ايمان : عادي بكل بساطه نزل الصبح مبدل وراح داوم ولا كأن مرته ماهي ومحد يعرف وين هوه دارها
اروى : اني متأكده صاير شي فهد تصرفاته مو طبيعيه ماخذ الامور ولا كأن صاير شي
ايمان : مااعرف والله
_________________________
فهد : دخلت للمستشفى ... عفوا اكو مريضه هنا اسمها غنى صالح
: لا ما اجه مريض بهالاسم
فهد : انطيته اوصافها هم ماكو تنهدت من الصبح طالع ادور عليها وهسه بالعشره الصبح وهم ماهي رجعت فتريت على نفس المستشفيات وهم ماكو دك موبايلي شلته
: الوو صباحوو
فهد : ياصباح النور
: شبي صوتك
فهد : تعبان من ليله البارحه
: الواضح تعبتك المهره الطلبتها
فهد : فتحت باب السياره لا ماعيب اني ما اتعب
: لعد متجي تراويني شطارتك
فهد : ههه انتي مهره جامحه يرادلج خيال قوي واني مو بالقوه المطلوبه ومااريد اتفشل وياج
: هههه ماكتلي تونست البارحه
فهد : كلش عاشت ايدج والشباب يسلمون عليج
: فديتهم مووواح الكم شلون زلم تنكرطون اكلك اليوم تجي
فهد : يجوز مااكدر
: بس اليوم الوجبه المطلوبه تجي غير ردت تشوفها و تحجزلك منها شي
فهد : لعد خوش بنفس الموعد اني يمج
: ماشي منتظرتك مو تتاخر
فهد : لا ما اتأخر يله باي سديته وشمرت الجهاز متنهد حركت السياره وطلعت وين اروح وين اولي خابرت اروى ... الوو اروى دزيلي رقم نرجس بسرعه بسرررعه لتناقشين
اروى : اي هسه
فهد : دزته الي خابرتها بسرعه الووو السلام عليكم
نرجس : وعليكم السلام منو
فهد : اني فهد اخو اروى
نرجس : فهد اذا مخابرني على حساب علي فلتحاول الف مره كلت ماارج..
فهد : قاطعتها هسه نعااال شجابه بالسيره اني اريد اسألج جم سؤال وجاوبيني عليه
نرجس : خرب فشلني احم اي اسأل
فهد : غنى خابرتج البارحه قبل يومين اليوم الصبح
نرجس : لا حتى دكيت عليها البارحه جهازها مغلق
فهد : زين غنى عدها معارف خارج بغداد بأي محافظه حتى لو اقارب من بعيد او تعرف احد من خارج بغداد كليلي
نرجس : لا ما اعتقد عدها هي كل اهلها منا بس اتذكر كرايب امها من بعيد كلش ساكنين بالنجف
فهد : زين تعرفين عنوانهم
نرجس : لا والله مااعرف بس ليش تسأل
فهد : بعدين نتناقش بالموضوع هسه كليلي انتي متأكده
نرجس : اي متأكده
فهد : زين متعرفين اسم المنطقه الي كاعدين بيها ولو حتى اقرب نقطه داله عليهم
نرجس : لا
فهد : ماشي شكرا ... سديته منها وخابرت غانم الوو غانم اريد اجازه
غانم : صدك تحجييي مو عدنه صخام
فهد : صخااام على راسكم عوفوني بحالي عندي شغل يله سجلي اجازه زمنيه حتى لو تزورها مو مشكلتي يله باي ... طلعت كبل للنجف وادعي بلكي الكاها كاعده بمرقد كاعده بشارع بصخام بالطام توقعت سهل الكاها لان ماعدها معارف بس طلع الموضوع اصعب من ما متخيل
وره تلث ساعات دخلت للنجف الساعه بالوحده الظهر توجهت للامام علي صفيت سيارتي بكراج ونزلت امشي اسأل منو و وين ادور خلي ادخل اصلي واشوف رحت توضيت ودخلت صليت باوعت للقبه وكلبي متروس هم شريد احجي واكول زرت وطلعت ادور بالنجف واوصي النسوان شفتن بنيه بيضه تلبس نظارات وكصيره وحده كلتلي اي شفت وحده هيج شكلها وضليت مكابل باب خروج النساء وكاعد
طلعت وياها بنيه من شفتها تمنيت اخنك روحي شجاب لشجاب كمت طلعت من الامام ودورت بباقي النجف سألت على المستشفيات ورحت دورت عليها اخر مستشفى الزهراء وكفت سيارتي ونزلت اسأل وهم ماكو الهي دخيلك وين اختفت اباوع للساعه بالاربعه العصر يادوب الحك ارجع رجعت لبغداد وامالي خايبه توقعت الكاها بس ماكو فص ملح وذاب
مرت يومين ونفس الحال ماخليت مكان ما سألت عليها بي حتى شغلي عفته بس في سبيل الكاها وهم ماكو خالتها درت وكلبت الدنيا وحارت شسوت بس ماكو نتيجه جهازها من يوم الي اختفت طلعت دوريه تدور عليها بس ولحد الان ماكو اخبار عنها
____________________________
ام صالح : وتالي وياج الى متى تبقين نايمه وبس تبجين صارلج يومين الزاد مادخل حلكج وبس تبجين صبحج ليلج حاضنه هالبطانيه وتبجين
غنى : بدموع عوفيني بيبي حبابه
ام صالح : ولج بيبي فتيتي كلبي والكل لاحظ وضعج مو طبيعي ليش هيج حبيبتي منو يفيدج لو صار عليج شي ذاك رجلج نايم بالعسل وانتي تاكلين بروحج
غنى : بدموع مو بأيدي بيبي احبه وما اكدر اتقبل الي سوا ولا حتى انسى الصار
ام صالح : يروحلج الف فدوه ليش تهتميله خلي يولي خلي يخلص عرس ابن عمج والله لطلكج منه وانعل ابو اليبقيج عنده
غنى : تنشغ ما اكدر ما اهتم انتي متعرفين احساسي ولا مريتي بالموقف الي مرت بي تعرفين شنو يعني الوحده تشوف رجلها يخونها لا وبعيونها بهاي عيني شفت قذاره غيري على ركبته اني الي جنت مستعده اعوف الدنيا كلها لأجله يجي يخلي غيري تلمسه تدرين من اتخيل اكو وحده دتنام بحضنه او تبوسه او تتقربله اموت الف موته هاي ايدي متغفه عينه اذا ميلزمها تالي هسه دينيم غيري بحضنه
ام صالح : خلي انطيج مثل خلي ترجيه بأذنج المايريدني ما اريده مادام هو باعج خلي باجر يجي متندم ويعض اصابعه ندم صدكي يا بيبي لو مهما لف ودار الرجال ونام ويه نسوان الدنيا كلها يجي يوم وذني اصابعه يعضهن ندم لحد ما ينزفن لان ضيع مره شريفه وصدكي واعتقدي بالله الرجال العراقي ينام ويه كل اصناف النسوان بس ميرتاح ولا ينام رغد غير ويه المره الشريفه الي متأكد ماراح تغدره وهذا مجتمعنا الحقير يحث المره حتى ترجع تسامحه من يرجعلها بس عد فليحه ماكو هيج شي اليرجع ندكه بالنعال ونصلخه ونطلع عريان بالشارع وبنيتنه تبقه عدنه
غنى : ضحكت من بين دموعي وبجيت وياها سوالفها تشبه سوالفه
ام صالح : هم بجت ولج غنيوان وتالي وياج تعاي هذا رجلج المسموم شسمه
غنى : لتكولين رجلج
ام صالح : ادري اطلكج منه بس صبريلي المهم كليلي شسمه
غنى : بهدوء فهد
ام صالح : سبحان الله اسم على مسمى اسمه اسم حيوان وهو حيوان ... اي ابتسمي اروحلج سبع فدوات يا من عسا عافيتي ولا عافيتج تعاي اطيني حبه
غنى : شنو حبه
ام صالح : يعني بوسه تعاي ابوسج بعد كلبي شلون كيمر عرب اصلي تعال صويلح شوف كيمر السده الي عندك
غنى : حضنتها وبستها يا الله شكد حنينه هالمره رغم قاسيه بس كلبها طيب
_____________________________
بعد مرور ايام
ايمان : هاا شو نزلتي
اروى : ميقبل ياكل
ايمان : استغفر الله امشي صعدي كليله امي تكول اكل
اروى : رجعت صعدت دخلت للغرفه اباوع للغرفه مكلوبه ومكسره ... اباوع لفهد كاعد وصافن بالفراغ خليت الصينيه كدامه حباب اكل
فهد : شيلي الصينيه وطلعي بره
اروى : ميصير فهد كوم اكل صار ايام نتوسل بيك باوع لوجهك كله هالات جوه عيونك وشاحب لا اكل ولا شرب ان شاءالله نلكاها ليش متشائم
فهد : ما اريد ازقنب امشيييي طلعيي بره ليش تخليني اطلع من طوريييييي
اروى : تره حرام عليك الله يحاسبك باجر عكبه فهد انت حتى الماي كاطعه صارلك اربع ايام تاخذلك كمعه ماي وتنام ليش هيج ليش اعرف مرتك وانت مو مهتم اكثر مني اني صديقتها واحبها امووت عليها بس املي بالله جبير ومتأكده راح ترجع
فهد : لتكعديييين تتفلسفين عليه تره روحي كامززه تردين الصينيه تفرغ من عيوني الاثنين كلبت الصينيه بالكاع يلللله امشيييي طلعي بررره ولحدددد يجييي يمي فتهموووو انييي واحد طايح حظييي يا اخييي لحد يدناليييي ما استاهل تاكلون تبن على حسابي بس فكوووو عني دنعل ابوكم لابو غنى لابو الساعه السوده الي الله خلقني بيها
اروى : اباوع اخذ مفاتيحه وطلع انتبهت لعيونه مليانه دموع ياربي دخيلك شجاي يصير بينه اخوتي كل مابيهم ديرجعون لوره علي فصخ وفهد مرته اختفت ورده طلعت اكمال بعد ماجانت من الاوائل وامي شحالها على وضع البيت ابد مو طبيعي الله يستر من الي جاي
__________________________
غنى : كاعده اصلي ودخلن البنات والي ديحاولن يسحبني الهن بس اني مالي واهس ومااريد اختلط بأحد
بلسم : عفيه شكد تصلين
غسق : احسن منجن
سها : اكول عيوني غنى تره ميصير كضيتها علينه بس مريضه لا كعدنه لا حجينه لا تعرفنه
هديل : خاف هذا كله على حساب رجلها
بلسم : عبالج هي سهله رجلها بنص الموت اكيد تخاف عليه
غسق : صدك غنى شو ما راويتينه رجلج
غنى : هاا
هديل : اي خلي نشوفه حلو لو يخزي مثل ضباط المنطقه
غسق : هسه احلى شي يطلع يشبه ايهم حتى ننتحر بيج
سها : ههه والله ايهم عار على الشرطه
بلسم : يله غنى شبيج
غنى : فتحت موبايلي والرسائل والاشعارات كامت تمطر عليه مكالمات ورسائل كومه 250مكالمه من فهد وعشرين مكالمه بين خالتي والبنات فتحت رسائل فهد
"وينج"
"رجعي للبيت"
"بت الكلب وين وليتي"
"بس تفتحين جهازج خابريني"
"غنى الله يخليج جاوبيني"
"وين رحتي "
"بس خلي الزمج اذا ما اطلعلج جلد جديد ما اتسمه فهد "
"كح.... ساقطه وييييينج"
"والله لنعنع ضلوعج بس خلي الزمج "
"اذا مترجعين اطلكج غيابي وانعل والديج وما ارجعج لو تموتين كدام عيني "
غنى : اقره بالرسائل وكلبي محروك كل حرف سهم وينبت بكلبي ولا رساله معتذر بيها كلهن اوامر وتهديد .... اباوع اخر رساله دازها اليوم الفجر بيها كلمه وحده "تعبت"
تبارك : نونه وين صفنتي
بلسم : عوفنها يجوز تقره مسجات الحب
غنى : احم تنهدت داخله للستوديو اباوع جهازي مليان صور اله وهو نايم وهو ديسوق وهو يدخن وينركل وهو بحضني حسيت الدموع تجمع بعيوني دخلت على صوره اله لابس قاط اسود واكف يم سيارته وجكارته بأيده قدمت الجهاز تجاه البنات
غسق : الله يخبل احلى من رجلي
هديل : والله عمي حقج تنامين بالفراش على حسابه
تبارك : الله يحفظه الج حبيبتي يخبل ماشاءالله عليه يجنن جعلته اخويه
سها : ولجن يشبه بالي بيك الي يطلع بحريم السلطان
غسق : خو كولي كمال كولي بوراك رحتي على بالي
سهاد : دسكتي سكتي لحظه خلي اصيح امي تشوف حبيبها يمه ييييمه
غنى : اباوع لعمتي دخلت هي وبيبي
ام صالح : شنوو هالصياااح
زمرد : وسم شبيجن خرعتنه
سها : يمه تعاي شوفي رجل غنى المن يشبه
زمرد : شو ولجن هذا بخبل يشبه بالي بيك
بلسم : يبوو شيخلصج غنى هسه امي تخطف رجلج
زمرد : لحظه لحظه غنى عمتج ام رجلج اسمها ايمان
غنى : اي بس شمعرفج بيها
زمرد : ابتسمت عرفت هذا فهد ابنها جانت خاله صورته على الواتساب شوفي حبيبتي زواجي الاول جان من محمد خال رجلج الله يرحمه
غنى : زواجج الاول
زمرد : اي حبيبتي اني تزوجت محمد اخو ايمان من جان عمري ١٣ سنه وانتقلت للبصره وعشت وياا تلث سنين واستشهد بالحرب فرجعت لاهلي وماعندي جهال ومن صار عمري ١٨ خطبني واحد وتزوجت وجبت سها وبلسم وانكطعت علاقتي بأهل محمد من انتقلت وتزوجت بس ايمان لان عايشه ببغداد اتواصل وياها بين فتره والثانيه لان احبها وعلاقتي طيبه بيها
غنى : هاا يعني خاله ايمان عدها اخو متوفي
زمرد : اي بس من زمان ويجوز حتى رجلج ما ملحك عليه
غنى : صفنت سبحان الله كولشي بيني وبين فهد اله علاقه بالصدفه ... تنهدت وشلون صدفه مصخمه هي
___________________
: لهنا ويكون كلشي تمام
: عفيه تقريبا كملنه كلشي وبفضلك
: الفضل لله بقه بس اخر خطوه راح تبقه عليكم
: اعرف بس لازم نتأكد من المنطقه على حساب التفجير
: من ينطوني الموعد ابلغكم
: شراح تسوي هسه
: لهنا و يتوقف كلشي لان الوضع خطر لازم نهدي اللعب شويه ويوم ٢٦ الشهر كلشي يتنفذ مستعدين
على اتم استعداد
: وانت لتنسى تواكب الاحداث
: حاضر
: يله تطشرو
______________________
الساعه العاشره مسائاً
غنى : نايمه بحضن بيبي بعد وتحجيلي عن اهلي محاوله تطلعني من الحاله الي دامر بيها متدري ويه كل رمشه عين اتذكر الصار ودموعي خلصت صار خمس تيام ليلي نهاري ابجي حتى عيوني راحن ومع هذا مابردت
ام صالح : تسمعيني
غنى : امم اي وبعدين بابا تزوج ماما مو
ام صالح : اي كال لو هي لو ما اتزوج وفعلا تزوجها وسبحانه ربج من حبهم لبعض واحد لحك الثاني بدموع مات صالح ولحكته ختام بساعات قليله وعافت هالورود الي انحرمت منهم بسبب عمامج وراس الحيه عمتج الله لا يرضى عليها
غنى : بله عمامي على مود الفلوس سوو هيج بس عمه ازهار ليش سوت هيج بينه
ام صالح : ازهار من زمان تكرهه امج وتحاول قدر الامكان تأذيها بأي طريقه كانت بس ابوج جان يوكف بوجها ومتكدر تحجي
غنى : زين ليش تكرهه امي حسب الي اسمعه امي جانت انسانه مسالمه
ام صالح : جانت تكرهه امج لان رجلها جان صديق صالح و يحب امج بذاك الوكت ورايدها ودز خمس مشيات عليها على اهلها وماقبلو لان امج جانت تريد ابوج ومتفقه وياا بس تتخرج يتزوجون المهم بيت جدج اهل امج جانو خوش ناس خاصه جدج ماضغط على امج وكال بنص الكعده بتي متريد تتزوج والزواج مو جبر المهم وره سنين عمتج تزوجت هذا وابوج هم تخرج وراد امج وعمتج تخبلت كلبت الدنيا وحاولت تنهي هالزواج بس ماكدرت
المهم سوت العمايل وحارت شسوت حتى مره سوتلها مشكله شكبرها اتذكر من جابتج امج راحت كلت لرجلها انت تقربت لختام بالحرام مو لان بت صالح تشبهلك متشبه صالح
وكبت العيطه وصارت مشاكل يابو مشاكل وطلعت عمتج سمعه موزينه على امج على ابو هي موشريفه استغفر الله وابوج شال وكعد بغير مكان حتى يخلص من المشاكل المهم ما اطول عليج عمتج عمت عيونها الغيره والحقد وانتقل هال
شي الكم وطلعت حقدها عليكم واذتني واذتكم الله لا يسامحها وذوله عمامج الدثوه شدو على ايدها على حساب الفلوس
غنى : عجيب البني ادم شكد اناني
ام صالح : الانسان يحب نفسه ومسوي روحه هو ولا غيره وهو نعال مايسوه هاي الذبانه احسن منه ههه ضحكي بعد كلبي فدوه اروح لهالرصعات
غنى : تدرين بيبي احس نفسي اعرفج من زمان
ام صالح : بعد كلبي الدم يحن غير وبعدين اني احبج على حب امج حتى قبل لا اشوفج
غنى : تنهدت مااعتقد اكو حب بهالدنيا كلها اوهام
ام صالح : لوماكو حب ما جنه احنه هسه عايشين وبعدين الحجي بيناتنه رجلج طلع مو شايب حلو ولج واكول عليمن تبجين
غنى : هزيت راسي شنو فائده الجمال وهو خاين
ام صالح : تره رجلج مبين داهيه والرجال اذا حلو وداهيه ينلكف بسرعه خاصه ذني امهات الشوارع يموتن على الباشاوات
غنى : يا باشاوات شكلج متعرفين ماضي تنهدت بالعكس هو هادئ ودومه ساكت
ام صالح : ما سامعه من السكوتي موتي ومن التكتك فوتي خوفج من الساكت
على العموم ماعلينه بي هالوصخ كومي خلي ناكل كرزات نقوي جسمنه احسن ما نسولف على هذا اسد مدري فهد والله يا الله هاي الاسماء شكثرها يسمون اسماء حيوانات هذا اسم جاسم شحلاته يخبل يسمولي فهد ونمر والله يالعراقيين وسوالفهم
________________________
بعد مرور عشر ايام
المكان : المستشفى
ايمان : دخلت لغرفته اباوع خاليله مغذي ونايم ضغطه ارتفع الصبح وكع من طوله نقلنا للمستشفى من يوم الي راحت غنى وهو شحاله لا يقبل ياكل لايقبل يشرب بس ساكت حتى الفلوس من جابتهن سعاد اخذهن انطانهن لعمامه يباشرون وراح سحب الدعوه بدون اي ردة فعل بس لو اعرف شصاير بيناتهم
علي : هذا صدك يحجي عايف الاكل والشرب على حساب شي ميسوه
ايمان : ميسووه شنو تره الضايعه مدري الرايحه مدري المخطوفه مرته وعرضه مو وحده من الشارع
علي : ميخالف بس مو هيج اسبوعين صارله بدون اكل وشحاله وتلكين مرته رايحه شو وين ومرتاحه
ايمان : انت شنو من دكتور لا احساس ولا ضمير هي هاي الدراسه الدرستها علمتك تصير مطي لو دكتور
علي : يووو الى متى تضل تحكمكم مشاعركم ماادري
ايمان : وخر من يمي لا انزعلك الي برجليي امشييي اطلع يم عمامك وديربالك تجيب سيره مرت اخوك بالموضوع لان الكل يدري بيها عد خالاتها فهمت
علي : ماشي
ايمان : كعدت يم فهد اوف يا يمه دومه كلبك مشلوع اباوعله فتح عيونه بجيت ولك يمه ليش تسوي هيج بروحك زين هيج ضليت تكبت تكبت لمن ارتفع ضغطك ورادت تصير بيك جلطه وانت بهالعمر ليش يمه ليش خلي املك بالله جبير مريتك تنلكه اشو البلاغ الطلعته مشه وجاي يدورون عليها
فهد : بخفوت يمه غنى مو ضايعه غنى شارده وموجوده بس ما اندل مكانها
ايمان : شنوو شنو شارده وليش تشرد
فهد : سمعي يمه الي راح احجي هسه ميطلع لجنس مخلوق فهمتي وحتى ويه روحج متسولفلي
ايمان : خير يا ستار احجي
فهد : بديت احجيلها كلشي
ايمان : صخام الصخمنيي وللللك انت صدك تحجييي شلوون تسووي هيج عزه العزاج ايمان ولك انت شنو هالصلافه العندك لا وتحجيها كدامي
فهد : لتخليني اتندم حجيتلج
ايمان : ولك انت ماخذ الدنيا لعب الى متى تبقه هيج والله حقها البنيه تعوفك تستاهل اي وحده بمكانها جان سوت الاتعس ولك اني ما اتذكر تنسيت بيك صلافه ولاجنت صلفه عليمن طالع انت مااعرف
فهد : لتوكفين بصفها لتخليني اغلط مو جماله عليه انتووووو
ايمان : متصيرلك جاره انت من عرست كون تبطل بعد وتحط الله بين عيونك وتفكر بعقلك شويه متخاف من احد انت مالك رداد
فهد : تنهدت لاااا مالييي رداد والي براسيييي اسوي يعنييي اسوييي لا انتي ولا غنى ولا اي واااحد يمنعني عن شي اني مقتنع بي زيييين ... كحيت اريد اطلع مافارغلكم انييي وذيج الكح... خلي الزمها وشوفي شسوي بيها
ايمان : اكو واحد يكول على مرته كح.... ولك من يا مله انت
فهد : كح.... تي اني ارتاحيتي هسه
ايمان : اني لازم احاجي عمامك
فهد : اذا حجيتي لأي احد تحلمين تشوفين وجهي بعد والله العظيم
ايمان : لا اله الا الله
_____________________
بلسم : البنفسجي لو الاسود اختاري
غنى : بهدوء كتلج ما اريد احضر
سها : يمعوده ندري فوفو ملتحق بس مو هيج تموتين نفسج
غنى : مو هيج بس مالي خلك
غسق : اني اسفه بس انجبي غير تجين حتى تتعرفين على اقاربنه شبيج
هديل : ولتخافين امي ماراح تجي والقاعه حجزها ايهم مو خوالي فليش هالتردد حبابه لتخربين واهسنه واحنه حاسبيج وحده منه واذا تضوجين تخربين مود الكل
ام صالح : بخزره اختاري
غنى : بيبي
ام صالح : اختااااااري واحد لا اكوملج بالعصا تره
غنى : تنهدت بيا حال اني ويردني احضر حفلات الاسود
غسق : لا عيني متلبسين اسود تاخذين البنفسجي شنو حزينه وبعدين انتي بيضه شنو تردين تفشلينه واحنه جلح ملح لا بيبي البنفسجي حلو خاصه هو غامق فحلو
غنى : ماكو داعي والله
سها : ام داعي كعدي وسكتي ماقبلتي تحضرين الحنه وكلنه ميخالف بس مال العرس متحضري لا لهنا حدج يله هاج
وبلسم راح تاخذ الاسود ولتنسين الحفله مختلطه حبيبتي لازمج كشخه مرتبه
هديل : هي مزوجه شلها بالكشخه خلي الكشخه الي بلكي واحد يخطبني هناك وكون براسه خير يطلع
ام صالح : ضربتها بالعصا شهالجيل الهيلك جماله تحجي كبالي امشيييي طلعي لابارك الله بيج
غسق : هههه حيل ام الزلم تريد تعرس
ام صالح : على اساس انتي كلش
زمرد : والله عاشت ايدج يستاهلن
غنى : اخذت الفستان البنفسجي جان فصاله كولش حلو لونه غامق بس بي ضيق شويه خاصه اني البس اكبر من قياسي بقياس لان مااريد جسمي يبين ... خليته بكنتور بيبي ونمت او بالاصح تمددت لان النوم مجافيني
ثاني يوم الصبح سحلني البنات سحل وياهن كعدن يحضرن للعرس طبعا عمامي وعمتي مشفتهم ابد بيبي متقبل يدخلون بس ولدهم يدخلون
غسق : تعاي شراح تخلين مكياج
غنى : بهدوء ما اخلي
بلسم : مو هو بكيفج دنجبي اكول غنى مو تزعلين مني تره احنه كلمه انجبي عدنه يعني حبيبتي مو قصدنه الاسائه يعني لان نحبج نكلج انجبي
غنى : ابتسمت اول مره احس عندي بنات عمام لا ويحبني ويقربني منهن هم تذكرت اروى ونرجس حبيباتي شتاقيتلهن بس مااكدر افتح موبايلي بعد اخاف فهد يلكه مكاني واني مااريد اشوف وجهه .... ضلينه كاعدين نحضر للعرس اني اساعدهن بس حتى التهي واكفه انزل الاغاني الي مسجلاتهن بورقه على موبايل غسق وحسيت بدوخه غمضت عيوني وانسندت على المحجر
تبارك : شبيج غناوي
غنى : هيج ماكو شي ... رجعت اكمل واحس الدوخه سطرتني صارت السبعه رحنه بدلنه واني بدلت بدون اي واهس البيت انخبص بالعالم والولد هم رغم ذبو لحم بس محد تدنالي كولش مؤدبين ولا جن اهلهم عاملين البلاوي طلعنه للقاعه وبيبي تقره ايات
ام صالح : قل اعوذ برب الفلق الهي احمي حفيداتي من العين ولجن هاي شلابسات الله يطيح حظجن راح تنضربن عين وتتمرضن يبووو على حظج يافليحه وانتي غنيوان ولج طالعه تخبلين هسه يركعنج باشعاع نووي يسكتنج اكووو واحد يلبس هاللون ااااخ هاي الفلفل غسق وسوالفها
غسق : هههه بيبي هاي حجايه رجلي ميقبل تكوليها
ام صالح : من اكول عليج سايبه تزعلين خو رجلج اسيب منج
غسق : هههه رحم الله والديج
غنى : وصلنه للقاعه وبدت بيبي تعرفني على الكل تقريبا الكل عرف اني بت صالح لحد ماشفنه مره اجت تجاهنه
ازهار : شلونج يمه
ام صالح : نونه بيبي تعاي ساعديني خلي اكوم خنكني الهوه هنا
ازهار : هاي بت صالح مو
ام صالح : غنننننى مو وياج
ازهار : اوكفي انتي شو اشوفج ماشاءالله طالعه علينه مو على امج المسمومه ... اي غنى شعندج ظهرتي هسه شنو محتاجه فلوس
هديل : يييمه ليش تسويلج مشكله
ازهار : اكلييي تبن انتي .... غنى نصيحه روحي سوي فحص وتأكدي من نسبج
ام صالح : استغفر الله الف استغفر الله كوميييي غنى
غنى : كمت بسرعه ويه بيبي وبالي يم كلام عمتي استغفر الله شكد حاقده ولا كأن هديل بتها كعدت بيبي بغير مكان وبدت الحفله زلم ونسوان وهوسه اول مره احضر عرس مختلط بالعاده اعراسنه منفصله بس همه عادي مختلط ركص ايهم وذب لحم ومرته وياا جانت لابسه بدله وياها حجاب مال عرس حلوه اجواء العرس خلصت الحفله وبده الكل يطلع على مود الزفه طلعت ويه بيبي والبنات وكفنه على جهه لان جماعته ديزفو بره القاعه ويهوسون
هديل : خررررب شوفن وللللجن جماعه ايهم غنى باعي
غنى : شلت راسي على اشاره ايدها وانصدمت هاي شنو معقوله
***
يتبع
- يتبع الفصل التالي اضغط على (ذنوب على قيد الغفران) اسم الرواية