رواية ذنوب على قيد الغفران الفصل الثامن و الخمسون 58 - بقلم براء
الثامن والخمسون
فهد : بهدوء اختكم الي هي مرت ابويه هي الي حركت المعمل بتعاون ويه ابنكم
اخو سعاد : شنووو ويه ابنه شهالجذب هذا
حارث : لعد شتفسر اختفاء ابنكم ليث هاي الايام
الشيخ : ليش ليث مختفي
ابو ليث : اي طالع بسفر
فهد : قصدك بالسجن
الكل : شنوو
حارث : اي نعم ابنكم حالياً محتجز بالمركز بتهمه حرق المعمل وطبعا والده يعرف بس يحرف
ابو ليث : لااا مااعرف وانتووو بأي حق تقبضون على ابني بعني اذا ابنكم عنده مركز بالدوله يذل العالم ويسجن فلان ويقبض على علان من كيفه ما طلع قانون هذا
فهد : اولا اني ماقبصت على ابنكم من كيفي وثانيا احنه قبضه عليه استناداً على المفكره الي صدرت بعد ماتوضحت الادله والاعترافات الي ضده اضافه لشهاده صديقه عليه وشهادته هو ايضا بابتسامه جانبيه وثالثا اذا تحبون اسحب الشكوى ويتعاقب عشائرياً ماعندي مانع خاصه انو شيخكم والنعم منه مافديوم سمعنه بي قبل بالظلم حتى لو الظالم من جهته
شيخهم : والنعم منكم ابني وفعلا اذا ابنه الغلطان وبتنه هي الي حاركه المعمل تاخذ حقكم من هاي الركبه
فهد : اباوعلهم كامو يبلعمون بعد وبعد ... ونعم من اصلك شيخ
ابو ليث : شيخ انت مصدك الحجيي معقوله ابني يحرك معمل وبأمر من منو من اختي ام فيصل هاي العاقله الدره ام كلب الطيب يطلع منها هيج
اخو سعاد : اي والله كلامكم ابد مو منطقي
محسن : قابل احنه جايين نتبلى عليكم اكو ادله ضدهم واذا ميتحاسبون اليوم نعرف احنه شلون نحاسبهم
ابو ليث : اشو الكبار ساكته وعايفه الزعاطيط تحجي
محسن : هد عليه لك منو الزعطوط
فهد : لزمته اكعد ميقصدك انت يقصد اخو .... اسمع ابو ليث لف ودوران لتدور تره الكدامك مو طفل ولا زوج تره شغلتي علمتني شغلات انت بنفسك متعرفها فلتحاول ويايه ابد كلنه نعرف انت تدري بأبنك مسجون من ايام وجنت تحاول تطلعه بأي طريقه كانت وماكدرت لان لسه ماخلص التحقيق وقبل ايام قليله ابن جنابك اعترف بعد ما انغسل غسله عدله ومستعد اراوي الكل التصوير الي اعترف بي ابن حضرتك ماخايف من شي اني وبس الي يخاف يتهرب ... حارث راويهم التصوير مديت ايدي بجيبي وتفضل هاي هم الادله الي تثبت ابنك الي حرك المعمل وبمساعده ام فيصل اكو كامرات واكو اقوال هم
الشيخ : الله لا يبارك بيهم لك ليش بس فهموني ليش اكو وحده تحرك حلال ابن رجلها والي بمقام ولدها وين وصلت بينه ونريد الله يرحم هالبلد شلون يرحمنه وهالنماذج عايشه بهالبلد
الشيخ الواسطه : اهدئ شيخ احنه جايين نحلها بالهدوء وان شاء الله منطلع منا اله وكل الاطراف راضيه
مهدي : بالنسبه النه كلشي منريد منكم غير حق العالم الراح لابد لوما عوائل معتمده وعايشه بوارد المعمل ماجان اهتمينه بس همه دمرو معمل جان يشتغل من احنه نزحف ومعيش عوائل يابو عوائل وفوك هذا انكسر اسمنه بالسوك بسبب الصار بعد ما جنه رقم واحد بين التجار
عباس : اضافه لحلالنه الي ضاع كله البضاعه والفلوس والسجلات والمعاملات وغيرها وغيرها كله راحت بسبب حقد وغل بت جنابكم واحنه ما لجئنه للقانون لان نعرف راح تنحكم سنين وميهينلنه مرت المرحوم تطب للسجون ففضلنه نسوي كعده ناخذ حقنه بالهدوء وبدون مشاكل افضل
الشخ : رحم الله والديكم ولد اجاويد والله واني وشرفي لخليهم يعضون اصابعهم ندم خاصه بعد ماشفت الادله الى عليهم
اخو سعاد : شيخ انت صدك تحجي
الشيخ : اي نعم ابن اخوك واختك غلطانين ولازم يتحملون نتيجه اخطائهم وشيطلون العالم احنه سدادين
ابو ليث : ميخالف اني مستعد انفذ كل طلباتهم بس خلي يطلعون ابني ويعوفون اختي بحالها
الشيخ الواسطه : وهذا عين العقل يا ابو ليث كولو ياجماعه شنو طلباتكم
محسن : المعمل بس بنائه من جديد يحتاج فوك الميت مليون بالاضافه للفلوس الي جانت بي والي تتجاوز ميت مليون ايضا هاي لهنا المبالغ الي ممكن تحيي المعمل نرجع على الفصل هذا انتو يمكم تحبون تفصلونه راس ليث راس ام فيصل شيجي من ايدكم انعم الله
الشيخ الواسطه : لا ابني احنه جايين نحلها بالتفاهم مو بالعرك المبالغ الي طلبتها هواي وهمه ناس بسطاء وشنو تريد راس ابنهم مو هجي التفاهم ابني
فهد : اشرت لمحسن يسكت ... المبالغ جداً قليله واحنه عدنه اضعافه ومامحتاجين ربع دينار من احد بس هذا مو بس حقنه هذا حق العمال الي صارلهم فتره طويله عوائلهم جوعانه بسبب ابنكم وبتكم هاي نقطه نقطه ثانيه اذا ما انطه المجلس قرار منصف بحق ام فيصل وليث اني راح اتصرف وبالطريقه الي تناسبني
ابو ليث : انت شنو تتتتتتتتتهددنه
فهد : بهدوء اني مو جبان حتى اهدد اني انفذ وحجايتي سيف على ركبه الجبير قبل الصغير
اخو سعاد : تره انتو جاي تقللون من قيمتنه
عباس : حشاكم احنه منقلل من قيمه احد بس هذا حق والحق لازم ينكال لو على كص الركاب
ابو ليث : بس مو هيج خويه يعني انتو مطالبكم كلش مبالغ بيها منين اجيبلكم٢٠٠ مليون
فهد : بهدوء والله عاد هاي مشكلتكم مو مشكلتنه وتره موضوع الخسائر مو مهم الي يهمني هسه اعرف شنو مصير الحثاله الي حركو المعمل
اخو ليث : بعصبيه اشووو انت من اجيت وكل ساعه ذابلك حجاييييه اكبر من الثانيييه لا احترمت مجلس لا احترمت الشيوووخ وتباوعلنه بالعين الصغيره عبالك نشتغل عندك شنو يعني واذا ضابط تدوس العالم برجليك
فهد : ببرود وشدراك اني ضابط وادوس على العالم شنو دايس عليك سابقاً ؟
اخو ليث : هد عليه احترررم نفسك ابن امه وابو اليدنالي بس انتتتت مبين وجهكككك مو رحماني وذره نور مابي عرفتتتتتك بالدوله من وجهك
فهد : شربت من كاسه الماي بهدوء ماشاءالله عليك طلعت سونار مامبين عليك
اخو ليث : انجببببب
فهد : ضغطت على ايدي اهدئ فهد اهدئ .... اني ماراح اجاوبك احتراماً للمجلس ولو هو الصوج مو بيك الصوج بأهلك وبكل الي حاضر من طرفكم ماعرفو يردوك وانت تهد على عالم انتو غلطانين بحقهم ما اعتقد هاي الاصول ياشيخ
شيخهم : اكعددد لك ماعندك احتررررام انت ... مسحوها بوجهي اني اعتذر بالنيابه عنه والي تصرف ثاني وياا
الشيخ : شيخ ماكو داعي ندخل بغير تفاصيل احنه اجينه نحل هاي المشكله بوجود هاي الناس الطيبه
شيخهم : اني ما اعرف شكول سوايه ام فيصل وليث متسولف ولو شكد ما احجي واكول مااكدر اعبر عن فشلتي وخجلي من وره عملتهم
اخو سعاد : صدك تحجي شيخ
سامر : حجي لخاطر دينك من كعدنه لسه وانت ماكو على لسانك غير صدك تحجي شيخ؟ صدك تحجي شيخ ؟ ادري قابل الموضوع مال شقه وكاعدين ننكت
عباس : بحده سامررر
الشيخ : استغفر الله تفضل شيخ كمل
شيخهم : اريد تنطونه عطوه نبدر الفلوس وبالنسبه لام فيصل هي وابو ليث راح تدفع الفلوس وليث بس يطلع من السجن يطلع من بغداد كلها وام فيصل يمنع كل نسوان العشيره يقاطعنها لان سوايتها هاي مينسكت عليها دمرت مورد معيش عوائل وهجمت بيت شكبره وفوك كل هذا رادت تموت مره بسبب غلها وحقدها وهالشي اذا انسكت عليه راح يصير الاتعس منه
فهد : بخبث عاشت ايدك شيخ بس تعذرني اني عندي مهله منا لاسبوع اذا الفلوس ما صارت ببابي يوم السبت الجاي ارفع ابنكم للمحكمه هي تتصرف وياا وسعاد كذلك ليغركم كلام عمامي تره ما اعترف بيها مره ولا رجال القانون قانون ويطبق على الجميع .... اباوع للمضيف ضج وحتى عمامي ماقبلو
عباس : منين تجيبلك ٢٠٠مليون باسبوعين وهي على الحديده
فهد : اني ماعليه السبت الجاي اريد الفلوس عندي انتو اهدو والكم الصافي اباوعلهم ناس كامت تباوع لناس ويتوسلون انطيهم مهله ولو شهر واني رافض والله لخليج تبوسين القنادر بسيطه ياسعاد مو اني الي ينلعب وياي .... ضلو ناس تجر وناس تعر وماكو اي نتيجه عمامي ميكدرون يحجون لان متفق وياهم والولد كذلك من شافونه ايد وحده ماكدرو يحجون
شيخهم : ابني انت ما طالب مليون وله عشره وتريدهن بأسبوع المبلغ الي تريده مو قليل والمره منين تجيب
فهد : ليش منين تجيب عدها كاع بمنطقه(.....) وعدها مشتمل وابو ليث نجار على ما اعتقد فيكدرون يدبرون المبلغ
الشيخ : ابني المده كلش قصيره انطيهم مهله ولو اسبوعين لخاطري لو مهما يكن تبقى مره
فهد : بس شيخ..
الشيخ : لخاطري مالي خاطر عندك
فهد : خلص الهم اسبوعين مو اكثر اتفقنه على كلشي .... كمنه هاي كدام كل الموجودين اذا اندفعت كل الخسائر وسحبت الدعوه عن ابنكم ولمحته ولو لمحه ببغداد اقسم بأغلى ماعندي ما اخلي لحظه وحده عايش
ابو ليث : لا عمي والله اطلعه من بغداد كلها بس اسحب الدعوه
فهد : يجي يوم وتنسحب لتخاف ... طلعنه واشتغل الحجي
مهدي : فهد ليش هيج بينه كدامهم كاتلين نفسنه على الفلوس وما اجينه حتى ناخذ حقنه
عباس : وغير هيج شلون تنطيهم عنوان الكاع مالتها انت طاردها هسه من البيت وين تروح اذا طردوها اهلها
فهد : ميهمنى شلون منضرنه كدامهم وبالنسبه لسعاد يطبها ستين الف مرض المعمل الحركته يسوه راسها وبكل عين صلفه رادت تموت امي لو خسران امي هسه منو يفيدني سعاد لو الفلوس لو المعمل لو شنو لتتوقعون سوايتي هاي كلها على حساب الفلوس
تدرون بيه انتو اني عمري ماجنت طماع ولا عيني ضيكه واهتم للفلوس اصلا الفلوس وعدمها نفس الشي عندي والفلس اليروح مني اكدر اجيب الف مثله بس المسئله تخص امي هي رادت تموت امي تردوني اسكتلها بكل حقاره راحت خلت حبوب اشبه بالسم ويه ادويتها وبسببها امي سائت حالتها وسكرها كل ساعه هابط اني امي ايام متنام من الالم وسعاد نايمه ومرتاحه ولا كأن مسويتلها عمله شكبرها
عباس : ميخالف ابني مو هيج انت بطلبك هذا دمرتها
محسن : يطبها مرض عمي لعد هي مافكرت بالناس الاذتها قبل لا تسوي هيج اليجي من ايده الله يزيده
فهد : احسنت وهذا الي راح يصير هي الي بدت خلص لعد هي تتحمل
حارث : خاف عبالكم الفلوس الي راح ناخذها منهم تفيد تره كرزات للمعمل حضرو رواحكم راح ندفع دم كلبنه على المعمل ياله يرجع
فهد : مو قحط الفلوس اذا رجع المعمل نجيب عدال الخسرنا بس خلي يصير الي بالي
عباس : راح تسحب الدعوه
فهد : بخبث اسحبها بس من سعاد تدفعلي
مهدي : هاي بعد سالم ونواله على شر
فهد : تنهدت هو منو طيح حظنه غير المرحوم لامن جان عايش ارتاحيت ولا من مات ارتاحيت الحمدلله على كل حال .... وصلتهم للبيت ورحت لبيتنه اخواني ولا واحد اجه علي بالعياده وذوله يستحون يجون وحقهم لو امي مسويه سوايه سعاد من الباب ما اطلع
___________________________
غنى : كاعدين بالصاله على اعصابه كلنه خايفين ومتوترين ختمت القران بس كون متصير مشكله اعرف فهد ميسيطر على نفسه
آلاء : خاله احنه راح نطلع منا صدك
ايمان : والله يايمه ماادري
ساره : يعني خاله احنه شنو ذنبنه اذا سعاد هيج سوت
ايمان : خاله اني مالي علاقه بالموضوع كلشي بأيد فهد لتورطيني مشاكل ويا ما اريد
ورده : اني افضل تطلعون منا كافي مشاكل تره فهد بعدله شويه ويطك ويموت من وره سوالف عمتجن ام الادب والاخلاق
ساره : اني افضل انتي الي متدخلين سوالف كبار ماعليج بيها والمفروض بس بتول الي تطلع
ايمان : كافي لتجادلن وانتي ورده لتدخلين كعدي وسكتي تره مالنه خلك المشاكل بتول طلعت من البيت وراحت لبيت هذا خطيبها لا سداد ولا رداد اكل لفيصل يكلي خليها كومي يمه غنى خابري فهد شوفي وين صارو شو تأخرو
غنى : اي خاله اخذت موبايلي دكيت على فهد رفضه يعني جاي .... هسه جاي خاله ماكو شويه واندك الجرس طلعو الجهال فتحو الباب ودخل فهد
فهد : السلام عليكم
الكل : وعليكم السلام
ايمان : هاا يمه شصار
فهد : كعدت شصار يعني راح يدفعون الخسائر ويشيلوهم من بغداد
ايمان : يعني سعاد راح تعوف بغداد مستحيل ما اصدك
فهد : لا بس ابن اخوها راح يطلعو من بغداد ... هسه اني اريد ارتاح عود من اكعد اسولفلج التفاصيل من رخصتج كمت صعدت فوك
غنى : صعدت ورا ... لزمت ايده فهد
فهد : دخلنه للغرفه حبيبي ماعندي كل خلك احجي خلي الحجي بعدين
غنى : خلص براحتك رحت للكنتور اطلعله ملابس حتى يسبح شو هذا راح نزع قميصه وكعد كدام السبلت حتى مابدل ملابسه ولا سبح .... متبدل ؟
فهد : رجعت نفسي على القنفه مغمض عيوني عوفيني شويه اريد يضرب جسمي الهوه هتكني الحر
غنى : اباوعله مغمض عيونه وكل حسره يجرها شكبرها مبين عليها حيل مغثوث كعدت يمه حجيت وياا مابدر ولا حركه لزمت متنه تأوهه بصوت عالي .... يوجعك
فهد : جسمي كله متشنج
غنى : كوم اسبح بمي دافي هسه يسترخي جسمك
فهد : بس دلكيلي كتفي مااكدر اتحرك من التعب
غنى : اباوعله شحاله الله لينطيج العافيه ياسعاد كضه عمره فهد مشلوع كلبه من وراج ... كوم تمدد حبيبي خلي اجيب الزيت واجي
فهد : نزعت ملابسي بقيت بالشورت وتمددت على الجربايه اااخ يابت الكلب ياسعاد حتى بأستراحتي الهث من وراج بت الكح....
غنى : جبت الزيت وكعدت يمه خليت شويه على ايدي ولزمت متونه تنهد براحه حركت ايدي على ظهره ومتونه بشكل دائري وعلى كيفي
فهد : اااه اي عاشت ايدج شدي ايدج شويه
غنى : دلكت جسمه بقوه شويه اباوعله شلون كام يغفي حبيبي شلون تعبان نزلت لرجلي اباوع لرجله شكبرها الحمدلله مافديوم فكر يدفرني لان حي على الصلاه يكسرلي عظم
فهد : ليش وكفتي
غنى : حبيبي رجلك جبيره
فهد : كلبت جسمي نمت على ظهري باوعتلها طبعا عدج سوالف تجبرني اضحك ... واذا جبيره يعني
غنى : اباوعله ابتسم ابتسمت لابتسامته صارله ايام معبس وضايج .... تدنيت بسته بخده لو ادري من البدايه اشاقيك حتى تضحك لتضل ضايج والله موزين عليك
فهد : حاوطتها بحيث صارت فوكي .... بست شفتها حبيبي ما اكدر ما اضوج الموضوع مو هين صعبه تأمنين بواحد ومتقصرين وياا كد شعره تالي ينكر الخبز والملح والعشره ويروح يغدرج ويأذيج بأعز ماعندج
غنى : ميخالف حبيبي بس انت هيج دتضر نفسك مو تضرها هي شكو على كلبها حتكعد ببيت ابنها معززه مكرمه وانت التعب والقلق عليك وهي المستفاده بالحالتين
فهد : لا وداعتج هسه تضل تعض اصابعها ندم وتتمنى لو مافكرت تسوي هيج مو تعلميني بيها هاي وحده كح.... ام...... تبيع امها وابوها على حساب مصلحتها
غنى : تنهدت ولا يتوب ماحاجيته مااريده يضوج خليت راسي على صدره متهمني سعاد ولا يهمني احد الي يهمني هو انت ما اريدك تضوج وتتعب لان اذا تعبت هالبيت كله يتعب من خاله لخواتك لعلي والي اني فهد اني اضيع لو صارلك شي وصدكني مادام اذتك وانت ممسويلها شي الله ميسكتلها وكول غنى كالت
فهد : حضنتها الشي الوحيد الي مصبرني على هالعيشه انتو انتي وامي وخواتي النفس اليصعد وينزل عندي لو ما وجودجن جان هجيت من زمان
غنى : بست صدره وحضنته بقوه وابتعد يله اعوفك تنام
فهد : بهدوء لا خليج اريد احضنج وانام بس ذبي الي عليج
غنى : بس..
فهد : غنى لتناقشين تره تعبان ذبي الي عليج وريحيني
غنى : تنهدت نازعه الدشداشه بقيت بالداخليات كعدت يم راسه واجه نام على بطني حاوطت جسمه وكمت ادلك ظهره حتى ينام ماكو شويه وغفه اخذت ايده بوستها ياعمري شلون تعبان جريت الغطه غطيته وتغطيت وياا اخذني الواهس ونمت اني هم
____________________________
نرجس : الوو هاا علي شلونك
علي : هله جوج الحمدلله انتي شلونج
نرجس : الحمدلله ... اكلك وينك انت
علي : بالعياده ليش محتاجه شي
نرجس : بالعياده ؟! مو المفروض تروح ويه اخوك بالكعده
علي : عندي مراجعين مااكدر اعوفهم وبعدين تعاي شدراج بيتنه صايره بي مشكله
نرجس : ادري سولفتلي اروى البارحه
علي : لعد شلها داعي تسأليني
نرجس : ردت اطمئن منك لان باعتبارك راح تصير زوجي بس اروى الي تسولفلي على العموم مو هذا موضوعنه شلون تعوف اخوك وتبقه بشغلك مو تصرف اناني منك
علي : اناني شنو اني شعليه عندي دوام خوما اعوفه وانتي تدرين اني دكتور مو صانع فليش هاللغوه الزايده
نرجس : ادري بيك دكتور وماله داعي تنتقص من الصانع تره انت مو احسن منه واي انت واحد اناني ياريتك مثل اخوانك منذر ماكو واحد بأخلاقه ولباقته حتى لو تريد تضوجه اخلاقه تجبرك تبطل وفهد خو فنه الي يفتح حلكه وياا اله اني لا حضيت بهاي ولا حضيت بهاي وعسى لا احجيلي حجايه تخبصني شبيك انت من يا مله جايبك
علي : بت الكلب الف مره كتلج لتقارنيني بأخواني اني شي وهمه شي ليش تخليني اتجاوز عليج
نرجس : احترررم نفسك انعل والديه الي يجيب طاري ابويه ابويه رجال جبير ومريض واله حوبه لتجيب طاري لا تطلع حوبته بيك ومادام انت ما محترم اهلي يعني ما محترمني وهيج ارتباط كله مشاكل اني ما اريده
علي : شنو قصدج ؟!
نرجس : قصدي مادام بعدنه على البر ولا انت كادر تحترمني ولا اني كادره اصيرلك وصله مسح فالاحسن ننفصل وكل واحد يشوف حال سبيله اني ميشرفني ارتبط بانسان ماعنده احترام مثلك
علي : طزز بيج ترحين اكو ميه غيرج يا مكثر الزبايل
نرجس : صحيح يامكثرك وخاصه بالعراق نلكه منك بكل منطقه طبكت الموبايل واحد حقير عباله اذا اشاقه واضحك اسمحله يتجاوز على اهلي انعل ابو الزواج لابو الحب الي يمس اهلي
________________________
غنى : كعدت المغرب اباوع الدنيا ضلمه والغرفه ثلج والله مالي واهس اكوم بس وقت اذان وميصلح النوم بهيج وقت يضيك الخلك واحنه معايزين مديت ايدي علكت التيبلمب اباوع لفهد رايح بسابع نومه حركت ايدي على شعره حبيبي اكعد حيأذن
فهد : همم
غنى : كوم غسل واكعد اكلك شي ماخليت شي بحلكك من الصبح لزمت وجهه يله كوم صار ايام لا شفتك لزمت قران ولا شفتك قريتلك دعاء كوم حبيبي الله هم اله حق عليك
فهد : اي كايم كمت طكيت ركبتي دنكت بست ركبتها عاشت ايدج حبيبي حيل ريحتني ايدج
غنى : ابتسمت .... كمت اخذت دشداشتي لبستها ودخلت للحمام توضيت وطلعت ... اسويلك شي تاكله
فهد : ما اشتهي
غنى : ميصير فهد صارلك ايام على وجبه وحده ... حنزل اصبلك غده انت متغديت وبعدين اني مسويه مركه فاصوليه وانت تحبها نزلت جوه طلعت الكدور لكيتها فارغه تنهدت استغفر الله رحت طلعت كبه كليتها وكليت وياها بتيته وطماطه وسويت جاي صبيته
ايمان : هاا يمه شبي فهد
غنى : ساكت كالعاده ونار واجه بداخله جديد عليج
ايمان : هذا الاكل اله
غنى : اي شفتي من اجه ما اتغده رسن نام وهستوه كعد نزلت اسويله اكل حتى لو متأخر المهم ياكله شي سوده عليه كولش ماله خلك
ايمان : بعد كلبي الله يكملج بعقلج ويجعل كل البنات دره مثلج
غنى : حبيبتي خاله ... اخذت الصينيه وصعدت فوك لاكاني فيصل عبرته ومشيت
فيصل : انتيي هيي اوكفي
غنى : عفوا اني الي اسم مو اشتغل عندك عيب تكول هي
فيصل : عمي اسفين شدعوه مديتي لسانج شطوله المهم رجلج كاعد لو نايم
غنى : لا كاعد
فيصل : خوش لعد تعاي اريد احاجي
غنى : اي هسه رحت للغرفه فتحت الباب فهد فيصل يريدك
فهد : خلي يدخل
غنى : خليت الصينيه كباله وكعدت على القنفه الثانيه اجه فيصل كعد
فيصل : كعد اريدك بموضوع ولو جاي تاكل
فهد : بعدني مابديت تفضل مد ايدك
فيصل : لا تغديت بالمطعم شلون غده مرتب خله الكبه الك
فهد : اي شنو الموضوع
فيصل : بعدني ما لكيت بيت
فهد : اي واني شنو علاقتي
فيصل : اريد مهله ما اكدر اطلع اليوم بعدني لا مأثث البيت لا دافع فلوسه كلشي مامسوي
فهد : والمطلوب مني اخليك هنا لحد ما تلكه لو انطيك فلوس البيت لو شنو بالضبط
فيصل : شوف فهد انت مشكلتك ويه امي تردون تتعاركون تتصالحون تتذابحون هذا شي ميهمني الي يهمني نسواني وجهالي واني وبس امي ماعليه بيها مو اني الي كتلها حركي المعمل ولا عندي علم بسالفه تبديل ادويه امك فشنو علاقتي اني وتطلعني
فهد : علاقتك لان سعاد امك ولان انت كبرت مو مال تضل معتمد عليه طول العمر بالعكس كون اني الكاعد عندك مو العكس لان انت الجبير بس انت جبير بالاسم بس واني ماخذ دورك على العموم مو هذا موضوعنه اني لخاطر جهالك ما اريدهن يتمرمطون راح اخليك هنا منا لاسبوعين من يطلع ابن خالك وامك تدفعلي ما اشوفك هنا مفهوم
فيصل : اسبوعين ؟!
فهد : اي اسبوعين مو هذا منذر اخذ مرته وجهاله اليوم الصبح وطلعله ببيت وحده مع انو اني ماردته يطلع بس هو اصر فليش تدور حجج انت
فيصل : خلص اسبوعين اسبوعين اني البيت دبرته بس الاثاث بلكي الحكااثثه منا لاسبوعين يله اعوفك تاكل اكلك برد
فهد : تنهدت ماسح على وجهي عمري مافكرت انو ممكن اخلي اخواني يعوفون هالبيت ويطلعون وخاصه منذر احبه كلش وميهينلي يعوفنه ويروح بس شنسوي مرات الضروف تجبرنه نشتري راحه بالنه وهذا الي سوا منذر اشترى راحه باله واخذ مرته وجهاله وعزل
غنى : حبيبي لتنغث اكل فدوه
فهد : باوعت للصينيه مو علساس فاصوليه
غنى : هاا اي مو احنه اليوم كلمن اكل على حده ماكعدنه سوه والجهال خطيه يلعبون ويجوعون فيجوز اكلو وميدرون اكو قسم ممتغدين
فهد : بالعافيه سبع عافيات المن متسوك لعد خليهم براحتهم
غنى : نزعت حجابي شعجب معلقت مثل ماتعلق على ساره
فهد : ساره تتصنع مسويه روحها رقيقه واثنى وهي لا فكتلها ذاك اليوم ركعتي صينيه مخلمه وراس بصل حتى تبطل تسوي روحها كلش والا اني عيني مو ضيكه الي يريد ياكل خلي ياكل الف عافيه قابل المن جاي ينطبخ هالاكل غير حتى ينوكل وبالمناسبه رغم اني اكرهه فيصل واشوف دم سنوني ولا اشوفه بس احب جهاله كلش وحتى نسوانه ماعندي شي وياهن بس مرات افشلهن حتى اسويلهن جره اذن لا اكثر ..... شبيج ؟!
غنى : نيالي عليك
فهد : تنهدت اوووف اتمنى لو اكدر الزمج هسه بس ما اكدر
غنى : ليش؟
فهد : اذا لزمتج هسه راح ااذيج وادري بروحي لذلك ارد ابرد تماما ياله افكر الزمج
غنى : بسته بخده اكثر شي احبه بيك انك متفكر بس بنفسك وحاط الله بين عيونك بعلاقتك وياي
فهد : بعد وحده من الحلك حتى احطج بنص روحي مو بس عيوني
غنى : ابتسمت بسته بشفته
فهد : بهدوء شعجب سويتيها بدون عناد
غنى : بهدووووء انت حلالي لو شما اسوي وياك.تبقى حلالي زوجي وصديقي وحبيبي وعمري وحياتي وكل دنيتي
فهد : جريت شفتها بسنوني ومصيتها اطيب حلال شفته بحياتي
غنى : بخجل اني اكوم اتحضر للصلاه انت اكل
فهد : ابتسمت إلهي دخيلك اختبرني بكلشي بس بيها لتختبرني ... اكلت شويه وكمت توضيت وكعدت اكلب بالتلفزيون
غنى : هاا حبيبي شو كعدت متصلي
فهد : اي غير يأذن
غنى : اذن عندي بحقيبه المؤمن شنو مسمعته
فهد : لا هذا المؤمن مالتج صوته ميطلع بس الفجر وبعز نومتي يضل يصيح الله اكبرررررر ، الله اكبر على راسه
غنى : هههه حتى هالرجال مخلص منك ... يله نصلي كمت فرشت السجاده ووكفنه نصلي كملت قبل فهد وكعدت اباوعله شكد ما لسانه باذر ويغلط بس من يوكف على القبله يتغير ميه وثمانين درجه يصلي بكل خشوع ولا كأن جان قبل دقايق جان يغلط عجيب امرك يافهد
فهد : كملت صلاه وكعدت اسبح
غنى : كمت انطيته القران حبيبي اقره سوره الشرح
فهد : شمعنى؟
غنى : انت مو تحس نفسك ضايك صدرك وتعبان هاي السوره تشرح الصدر وتريح النفسيه تقراها وكررها فد عشر مرات وشوف شلون ترتاح
فهد : شمدريج بكل هذا
غنى : جنت ومازلت كولشي يصير وياي اول ما اروح للقران لان الكه بي الحل لكل مشاكلي وعلاج لكل مرض عندي وتنبيه لكل خطوه اخطيها لزمت القران صدكني هالكتاب مو شي عادي شي غير قابل للوصف تلكه بي النصيحه والتحذير تلكه بي طمئنانيه وخوف بنفس الوقت
كولشي يخص حياتنه وعالمنه موجود بهالكتاب ويا حسافه على الي ميعرف قيمه هالكتاب والي موجود بي تدري فهد مرات الدنيا احسها تختنكي اريد اموت اركض اقره سوره الشرح مرات اتعب احس جسمي خامل ومابيه اسوي اي شي اركض اقره سوره يس احس بطاقه ونشاط فضيع ومرات احتاج نصيحه او فد رساله اروح على سوره المؤمنون اخذ نصيحه وعبره من هاي السوره ومرات تخطر ببالي اسوي شي غلط تدري وين اروح
فهد : بهدوء وين
غنى : اروح لسوره القيامه اشوف شمكتوب بيها تجيني رهبه وذعر بحيث اخاف ارتكب شي خطأ والله يحاسني حساب عسير كولشي جنت احس بي اروح لسوره من سور القران الكه الجواب
فهد : ومن شوكت صرتي تهتمين بهالشي
غنى : من صار عمري تسع سنوات ولبست حجاب كمت احب دينه واتعمق بي والفضل لبيبي جانت دائما تكعد تشرحلي وتفسرلي القران وتحجيلي عن دينه وربنه لمن صار ربنه اكثر شي الجئ اله بحياتي الله يرحمج يابيبي لو اكعد عمري كله اشكرها على تربيتها وتعبها عليه ما اجازيها
فهد : بهدوء الله يرحمها ربت ونعم التربيه تنباس من ثنين اديها على اصدار هيج جوهره ومن حضي هالجوهره صارت من نصيبي تدرين غنى اني لو متت راح اكون مأمن على جهالي ويه انسانه مثلج بسن ايدها عسى ربي يحفظج الي ويجعل يومي قبل يومج
غنى : حضنته لتجيب طاري الموت فدوه فهد تره كلبي يوجعني من سيرته
فهد : بعدتها عني استحي يامره كلام الله بيدي وكاعده تشبكين بيه عايزج بعد تنزعيني وتغتصبيني
غنى : ابتعدت عنه يعني بعز ضوجتك وتنكت والله لو واحد غيري يشوفك يضل صافن ماكو هيج واحد مطنكر وينكت
فهد : اكول ام وجه الفاهي خلي نقره قران احسن واذا تكولين مزنجر اجيبج براشدي افر وجهج
غنى : ابتسمت فاتحه قراني كعدنه نقره قران بهدوء اباوع لفهد ركز على سوره الشرح والمعوذات حقه كام يخاف من الناس اذا الواحد اهله ميأمن بيهم لعد الغريب شلون ولو بوقتنه صار الغريب احن علينه من القريب كملنه وكمنه هو كعد على التلفزيون واني شلت الصينيه ونزلت اسوي العشه لان اعرف هنه كولشي ميسون دخلت للصاله شفت نسوان عم فهد وبناتهن سلمت عليهن ...
ضحى : شلونج حبيبتي
غنى : الحمدلله خاله الله يسلمج ... شلونج خاله
حياة : هله بيج كلبي انتي شلونج
شهد : حضري روحج منا لمن تخلص هالسالفه اريد بدله العرس انتي تضبطيها
ايمان : هي وينها عيونها متشوفيها تلبس نظارات سوده عليه شكد حلوات عيونها بس سكرابه ميشتغلن
غنى : ابتسمت لا تدلل من عيوني سلمت على كل البنات ماعدى مروه الي جانن عيونها حمر مااعرف شبيها وديت الصينيه للمطبخ وسويت جاي وطلعت
مروه : لعد ورده وين
اروى : اعتقد نايمه
مروه : خلي اصعد اكعدها صار هواي ما شايفتها من رخصتكم
غنى : اباوعلها صعدت فوك بس وضعها مو طبيعي عيونها حمر وصوتها مبحوح اباوع لنسوان عم فهد مبين جايات لسبب كمت اهدر جاي وبالي يمها مااعرف ليش هدرت وطلعت
حياة : لعد فهد وينه شو ماهو
غنى : بالغرفه كاعد تردين اصيحه
حياة : اي بعد كلبي بلا امر عليج لان محسن كاعد بالحديقه يريده
غنى : اروى خليج يم الجاي خلي اصيح لفهد واجي صعدت فوك وصلت لغرفتي فتحت الباب اجاني صوت بجي وكفت بمكاني هذا صوت مروه ... غرفتي صاير تصمميها اول ماتدخلين اكو مثل الحاجزين على جهتين الباب واحد كبال الثاني وبنصهن الباب وانوب تعبرين وتدخلين لنص الغرفه فمن اوكف بالطرف ما ابين للجوه لان مداخله جوه (اتمنى تكونون فهمتو) .... وكفت اسمها وهاي اول مره بحياتي اتصنت بس صابني فضول
فهد : مروه ليش تبجين صارلج ساعه واكفه كدامي وتبجين لا اخذت منج باطل ولا حق غير اعرف عليمن هالبجي
مروه : اكو واحد متقدملي واهلي موافقين عليه من زمان ويردوني اني هم اوافق
فهد : منو متقدملج
مروه : عمه نسرين خطبتني لمرتضى
فهد : بهدوء وانتي جاي تبجين لان ماموافقه
مروه : بدموع مو بس لان ماموافقه بس لان تعبت تعبت واني احب واحد واتخيله بأحلامي واريده واتمنا امنيه وهو ولا كأن لا يحس بمشاعري ولا حتى راح يحس عايفني اموت واني اباوعله سعيد بحياته واني القهر والتعساه مدمرتني عرفت هسه ليش ابجي
فهد : الي فهمته انتي تحبين واحد وماموافقه على مرتضى بس اني شعليه عفوا قصدي شمعنى اجيتي الي بالذات
مروه : لان اريدك تساعدني
فهد : شلون ترديني اساعدج احاجي عمي قصدج لو احاجي مرتضى لو شنو
مروه : بدموع اني ما شي منك فهد
فهد : لا اله الا الله لعد شتردين مني يامروه تره دوختيني
مروه : فهد اني اريدك الك
فهد : باستغراب شنو
مروه : بدموع اعرف تصرفي غلط وعيب ويمكن تكول عليه هاي قليله ادب بس فهد اني احبك واريدك اقسم بالله عمري وحياتي ماحبيت رجال غيرك ولا راح احب غيرك من جنت صغيره واني بانيه امال عليك وحتى من تزوجت حاولت انساك بس ماكدرت ومن خطبني مرتضى كلت لازم اعترفلك بعد ما اكدر فهد اني باليوم جاي اموت الف موته على مودتك
فهد : بهدوء تدرين اني شايف نسوان بعدد شعر راسي بس عمرها وحياتها ماوكفت مره وكلتلي احبك واريدك غير بس الساقطات وبنات الشوارع حشاج طبعا
مروه : بدموع كتلك اعرف تصرفي غبي واكبر غلط بس ما اكدر بعد لازم اعترفلك على الاقل اريح نفسي واكول عرفت مشاعري ولا اضل ضامتها بداخلي
غنى : كلامها صدمني ماتوقعتها بهالجرائه بس الي صدمني اكثر فهد جدا طبيعي كلامه وياها حتى مارزلها
فهد : تنهدت شوفي مروه اني ما راح اسويلج اي شي واحترم مشاعرج انتي خوش بنيه وحبابه صحيح بأخر فتره تصرفتي بولدنه بس هذا ميمنع انج بنيه والنعم منها بس صدكيني اني ما اعتبرج غير اخت حالج من حال اروى و ورده
عمري وحياتي مافكرت بيج غير تفكير ولو عندي ولو نسبه واحد بالميه حب الج جان خطبتج بس ماعندي تجاهج اي مشاعر غير الاخوه اضافه انو اني رجال متزوج واحب مرتي ومستحيل بيوم من الايام ابدلها بكنوز الدنيا والله لو يخلون كدامي حوريه منزله من الجنه بوجها ما اباوع تعرفين شنو يعني بوجها ما اباوع مروه اني ما اريد اجرح مشاعرج بس صدكيني اني مكتفي بغنى واحبها كلش وهي بدون متسوي شي عاميه عيوني عن كل النسوان واتحدى عيني هاي لو انعجبت بغيرها
مروه : بدموع بهالدرجه تحبها
فهد : واكثر مروه واكثر تدرين هاي اول مره احجي لواحد عن مشاعري والي بداخلي غنى نفسها متدري اني احبها هالكد وصدكي هذا كلامي كله حجيته حتى اكلج اني ماعندي اي شي وياج وانتي هم متحبيني بس تكدرين تكولين جنتي متعوده انو تفكرين بيه فأنطبع هالشي بعقلج على انه حب بس لا الحب يجي من العشره والمواقف يامروه واني متأكد بيوم من الايام راح تلاكين هالحب ويه الانسان الي يناسبج سواء كان هالشخص مرتضى او غيره
مروه : هزت راسها
فهد : وهسه هذا الموضوع ينسد هنا وبعد مينفتح وتحاولين تنسي ويموت هنا والتفتي لمستقبلج لان محد يفيدح غيره لا فهد ولا اي احد يفيدج
مروه : شكراً فهد لان تفهمتني وماكسرت بخاطري
فهد : لو وحده غيرج امسح بيها الكاع بس انتي بت عمي واختي وتضلين عرضي اعتبري الموضوع اصلا ما صار وانسي وهسه تكدرين تطلعين لان موحلوه وكفتج هنا كدامي وانتي تبجين نزلي لتجيج حجايه
مروه : مسحت دموعها اوك رايحه
غنى : ما اعرف شكول من جه طايره بكلام فهد ومن جه ثانيه ضوجني كلام مروه للحظه تمنيت اكطعها واني اسمها شلون توصفه وتعبرله عن حبها اباوعلها صار بوجهي تلبكت وخزرتني ونزلت بسرعه طبكت الباب بسرعه ودخلت اباوع لفهد واكف بنص الصاله ومدنك ركضت حضنته
فهد : لعلعله ابيج خرعتيني
غنى : مرديت عليه اخذت اديه لفيتها عليه وحضنته بقوه وابوس بركبته واشتمه افيش افيش
فهد : هاي شبيج تخبلتي
غنى : ابتعدت مباوعتله اني احبك هواي
فهد : سمعتي كلام مروه مو
غنى : هزيت راسي
فهد : تنهدت سمعي غنى تره....
غنى : خليت اصبعي على شفته كولشي لتحجي اعرف وسمعت شكتلها صحيح ضوجني كلامها بس ردك المحترم الها والي ماجرحها ولا جرحني خلاني احترمك اكثر لو واحد غيرك لو ينطيها مجال لو يلعب جوله بس انت رفضتها بدون متجرحها وهالشي كبرك بعيني
فهد : توقعتج تضوجين وتسحليها
غنى : حاوطت ركبته لو اي وحده تفكر تتقربلك اموتها بس مروه حاله خاصه واني اقدر انها جانت بانيه امال عليك من وهي صغيره بسبب بيت جدك على ابو فهد لفلانه وفلانه لفهد فممكن انطيها مبرر لتصرفاتها اما وحده ثانيه لا اكلها بسنوني
فهد : هاي انتي مرتي صارت شرسه
غنى : اني صحيح حبابه ويه الكل بس الي تفكر تتقرب لرجلي لمزنجر انكلب عليها لبوه
فهد : زين شنو رأيج تنكلبين لبوه على الجربايه اليوم ونشوف شلونها شراستج
غنى : احم صدوك نسيت محسن منتظرك جوه
فهد : هاا شو فشت اللبوه
غنى : روح لا انكلب عليك حيه واعضك
فهد : نزلت ايدي لجوه خصرها بهمس وين تعضيني
غنى : بخجل فهد
فهد : زين ممكن بوسه من الحلك
غنى : اسمها شفه
فهد : لا اني اقصد الحلك كله مو بس الشفه
غنى : احم حبيبي انزل جديات فشله الولد منتظرك
فهد : رفعت وجها ودنكت شو اشوف وين شفايفج اباوعلها برزت شفايفها معترضه ابتسمت ماخذهن بشفايفي مزجتهن سوه بايسهن اووف
غنى : بادلته كالعاده اجذب اذا اكول ممكن اكدر اقاومه خاصه هو يعرف نقطه ضعفي شنو
فهد : لزمت ركبتها مقربها اكثر جريت شفتها الجوه مصيتها عجيب شهالطعم مديت ايدي لازم ماتوسط جسمها ( اهدي يحسنيه وعلى كيفج )
غنى : شديت على شعره وابادله احس طعم زنجار صار بشفتي ابتعد حاسه بشفايفه تمشي على ركبتي
فهد : اويلي الله
غنى : حسيت بحركه بركبتي فهد محسن منتظرك
فهد : ...... ا.... محسن شسويله
غنى : وخرته مني بس فهد يوخر بأحلامي ... بخدر عيب فهد حتى ولد عمك مسلمو منك
فهد : مديت ايدي بدشداشتها لازم صدرها بأديه طز
غنى : لزمت اديه آااه حبيبي وخر اااه فهد لتكرص طلعت اديه كوه ليش هيج اذيتني
فهد : اوي اذيتج لعد ابو قاسم ميأذيج
غنى : دفعت ايده كرهت حتى اسم قاسم من وراك يله انزل
فهد : ضربت خلفيتها بقوه اوف الله دشوفي .... جنه .... كح.....
غنى : انووووب درت عليه وتالي وياك
فهد : هههه خرب يومج شكد جنت ضايج سوالفج ضحكتني من كل كلبي
غنى : اباوعله نزل ابتسمت ابو لسان الباذر فدوه لضحكته تردلي روحي شكد اتعارك وياا بس اموت على سوالفه
_______________________
بعد مرور فتره من الزمن
غنى : واكفه اسوي زلاطه وبالي يم اوضاع البيت نرجس فصخت الخطبه وعلي متخبل ويتعارك ويه ذبان وجهه واروى على سالفه نرجس وعلي بطل واهسها وحتى العقد اجلته خاله ايمان الحمدلله وضعها الصحي ممتاز بس فهد ... فهد هالايام مدري شبي اعتكف فجأءه على نفسه حتى ويايه ميحجي كلما احاجي واكله شبيك يكلي عندي شغل لتحاجيني
بعد يومين المفروض سعاد واخوها يدفعون كل الخسائر حتى فهد يسحب الدعوه عن ابن اخو سعاد بيت فيصل ميقبلون يطلعون وفيصل ديماطل طبعا ساره الي تحجيلي تكول بتول اشترت ذهب بكل فلوس المهر وحتى عرس ماسوت راحت لبيت رجلها بدون اي حفله و منذر اخذ بيت براس الشارع وكل يوم العصريات يمنه همه وميطلعون غير بالليل وهالشي ريح فهد بس اني الي مدارتاح بسبب جفاف فهد وياي هالايام فزيت من صفنتي على صوت ساره
ساره : تعاي غنى اريدج بشغله
غنى : خير ان شاء الله احجي
ساره : مااكدر احجي هنا حبابه تعاي بغرفتي
غنى : كلبي وجعني ذبيت السجينه رحت غسلت وصعدت وياها طبينه لغرفتها خير حبابه ساره احجي تره كلبي ميتحمل
ساره : شوفي اني راح احجي بس عليج الله لتكولين اني الي كتلج واريدج تسيطيرين على اعصابج
غنى : يمعوده احجي هبطتيني
ساره : شوفي اني جنت ما متأكده بس من اتأكدت كلت اكلج وصدكيني مو غرضي اخرب لو شي بس ماكدرت اسكت
غنى : اي احجي الله يخليج
ساره : شوفي غنى فهد جاي يخونج
غنى : شنوووو شنو يخوني ساره خبله انتي ضحكت كل عقلج تحجين
ساره : وداعه حمودي ماجاي اجذب واعدم وليدي لو اجذب عليج فهد جاي يخونج وبهاي اذاني سمعته
غنى : حسيت اطرافي ترجف ... شسمعتي
ساره : جان طالع بالحديقه يحجي ميدري بيه مطلعه محمد اشممه هوه حتى يرتاح ... سمعته يحجي ويه وحده يكلها حضري نفسج اريدج على اخر حبه جايج
غنى : مس مستحيل فهد ميسويها
ساره : شوفي اني ماعندي شي وياج ولاحتى ويه فهد حتى اجذب واقسم بالله ماجاي اجذب بالعلامه سمعته يكلها ما اريد تقصير ابد اريدج خوش تدلليني وهاا اتفق وياها يروحلها للشقه باجر
غنى : بدموع لا ساره حبابه لتكوليها والله مستحيل فهد يسويها اقسم بالله كلبي حيوكف لا ساره فدوه لكولين فهد ديخوني اني اثق بي ميسويها
ساره : انتي صبري سمعته يحاجيها وفاتح مايك هذا الحجي نص الليل عباله كلنه نايمين سمعت صوتها مبين صوت وحده مو زينه كلتله تعال لنفس المكان فهو جان لازم موبايل ثاني مااعرف ليش كلها نسيت العنوان رجعي ذكري كلتله تعال لمنطقه (...) عماره (....) شقه رقم (......) تلكاني جاهزه
غنى : برجفه مسمعتي ببيش الساعه
ساره : كلها بثمانيه اني يمج حتى اليوم افترسج انتي والي وياج
غنى : حسيت العنوان انطبع بعقلي طلعت لغرفتي اركض وابجي لالا فهد ميسويها ... دكيت عليه وجسمي كله يختض ... جاوبني اخذت نفس الوو فهد
فهد : الوو هاا غنى تردين شي
غنى : شوكت ترجع
فهد : اتأخر
غنى : ضغطت على ايدي بس اني متحضرتلك هاي اول مره اتجرئ واحجيها بس اريده يكلي اجي يكلي ثواني واني يمج بس صدمني
فهد : كتلج مااكدر بدلي ونامي حبيبتي مااجي من وكت يله باي
غنى : سديته وبجيت لة الهي دخيلك كولشي ولا الخيانه ربي فدوه اروحلك مو فهد لتصدمني بي ضليت كاعده للوحده بالليل ودمعتي مانشفت دخل هو
فهد : شبيييج ؟!!
غنى : اباوعله شكله غريب كمت حضنته بسرعه بلكي اشم بي ريحه شرب و واجهه ماشميت بي شي حسيت بي دفعني
فهد : غنى تعبان اجليها
غنى : من دفعني حسيت بي مسوي شي رحت تمددت ودموعي عشره عشره اباوعله طلع من الحمام وكعد على اللابتوب كالعاده ... بجيت لمن طحت على صفحه ماعولت يجي الصبح طلع هو للدوام واني النوم مجافيني ما اكدر انام كمت دورت بغراضه ماكو شي فتحت اللابتوب شفت ملف فتحه ميقبل يفتح اله ادخل رمز ياااربييييي شهالعذاب مر اليوم بالكوه اجه ونفس الشي ... فهد بيك شي
فهد : هاا لالا مابيه شي
غنى : اربد اروح لخالتي
فهد : مااكدر عندي طلعه ولتناقشين
غنى : عافني وراح نام العصر طلع رحت حاجيت ساره واتفقت وياها تروح وياي ماقبلت توسلت ردت هم ماقبلت انجبرت اروح وحدي ورحت بدلت واديه يرجفن كعدت منتظره الساعه تصير ثمانيه بالتسعه حتى اروح اتأكد .... بالف يا ويلاه ياله صارت الثمانيه طلعت بسرعه
ايمان : وين يمه
غنى : خاله خاله سحر متخربطه اريد اروح اشوفها من رخصتج
ايمان : زين خلي علي يجي وياخذج
غنى : ماكو حاجه عمو سيف اجه عليه طلعت اركض وكفت تكسي انطيته العنوان وصعدت ولاول مره مااخاف من التكسي اباوعله باوعلي مستغرب
: بويه انتي متأكده تردين ترحين لهالمكان
غنى : اي عمو رجاءاً استعجل باوعلي بنظره غريبه وطلع الطريق كله ادعي الله كون ميطلع الي ابالي صحيح يارب كون يطلع فهد رايح لجماعته مو لوحده يارب يارب .... ضل الرجال يسوق فوك الساعه اباوع دخل لمنطقه اقل ما يقال عنها شعبيه
مو راحه
: هذا المكان الي ردتي
غنى : اباوع فعلا هذيج عماره اي هو هذا ... نزلت اوكف هنا هسه اجي عمو انتظرني .... رحت واسناني تضارب ماعولت اوصل يارب سياره فهد ماهي بلكي ميطلع هنا دخلت للعماره مشيت وارجف يارب دخيلك كون يطلع فهد مو هنا وصلت لرقم الشقه الي كالت عليها ساره دكيت الجرس وايدي على كلبي عمري وحياتي ماتخيلت تكون عندي كل هالصلافه الي تخليني اطلع وحدي .... انفتحت الباب صار بوجهي منظر اتمنى لو ميته ولا شايفته فهد قميصه مفتوح على النص وشعره مكفش وجوه اكو كومه زلم البيت يشبه بيوت الدعاره الي نشوفها بالتلفزيون ماسويت شي بس كتله ليش بشنو قصرت وياك شنو القصور الي بدر مني ليش هيج يافهد اباوعله مانطق
فهد : لارد
غنى : حريمه بنيت عليك امال وانت متستاهل عفته ونزلت اركض وكعت على وجهي وانكسرت نظارتي آاااه لييييش الهي لييييش كمت بسرعه طلعت لكيت الرجال واكفلي صعدت واني اشهك
: شبيج عمو صاير شي
غنى : بدموع اطلع عمو اطلع الله يخليك ... يمشي الرجال واني اضرب صدري اااااااخ يمه احس روحي دتطلع الله ياخذك يا حقيييير كلكممممم نفس الطييينه كلكممممم ليييش هيج يافهد ليييش شمسويتلك وتأذيني هيج شمسويتلك ... ماعولت اوصل دفعت الكروه ونزلت دكيت الباب طلعولي الجهال صعدت ركض لغرفتي صعدت وراي خاله والبنات
ايمان : شبيج يمه شبيج خير شبيها خالتج
غنى : وخرووووووو عنييييي ركضت طلعت جنطتي خليت ملابسي بيهااا وهنه يصيحن ما ابقه عنده لحظه وحده والخلقني
اروى : ولج شبيج تخبلتيييي
ايمان : دكي على اخوج بسرعه
اروى : دكيت عليه .... يمه ميرد
غنى : تنشغ ليش يرد خلو براحته لتزعجو اخذت جنطتي وطلعت وهنه يجرن بيه
ايمان : بس فهميني شبيج يايمه شكووو شصايرررر
غنى : تنشغ خاله عوفيني لخاطر الله بروح امج عوفينييييي جريت الجنطه وطلعت بسرعه فتحت موبايلي على امل الكه مكالمه منه تمنعني توضحلي بس مااااكووو شكله ميهمه ان دريت او لا ولييييش يهتم منو اني ويهتمليييي مشيت واسحل بجنطتي ماعولت اوصل لمنطقه بعيده عن البيت .... دكيت على اول شخص اجه على بالي الووو تعااال عليه بسررررررررعه
: خيرر شصاير
غنى : بدموع تجينييييي لو لااااااااا لتحجيييي حجي زاااايد
سامح : خلص جايج جايج بس دزيلي العنوان
*****
يتبع
- يتبع الفصل التالي اضغط على (ذنوب على قيد الغفران) اسم الرواية