رواية ذنوب على قيد الغفران الفصل الرابع و الخمسون 54 - بقلم براء
الرابع والخمسون
غنى : طلعنه رايحين لبيت نرجس بعد ما طلعو الناس الجايين على بتول فهد اخذنه لان طولنه وعلي راح لعيادته والحجيه ونسوان عمامهم راح يجيبهم واحد من الولد ... لحد الان اني مذهوله من الي صار
اروى : انتي مستوعبه الموضوع لو بعدج ماخذتج الصفنه مقلي
غنى : خاله تحجي ويه فهد على الخطبه واني واروى وره ... باوعتلها حالي حالج هاي متعجبه بتول شلون قبلت وهي تعرف هو شنو جماله اكبر من بسبعه وعشرين ماكو اي توافق بيناتهم لا فكري ولا عمري
اروى : والله لو يبقه اخر واحد ما افكر حتى اباوع لوجهه هالحقير السافل هذا نسيتي موقفه ويه نرجس السافل
غنى : اي والله ... تذكرت استاذ كريم ياخذنه محاضره من سنتين انسان حقير الى درجه يبيع مثاليات واخلاق على الطلاب وهذا عيب وهذا ميصير وهو حتى ابليس يهز ايده من سوالفه شاوي البصل على اذان الولد اما البنات لا يصير وياهن انعم من الدخن مره من المرات جان عدنه امتحان وكلنه جاوبنه حتى نرجس تالي خلالها درجه قليله وهي مجاوبه راحت تحاجي وهو الحقير تحارش بيها وبصريح العباره طلب منها اشياء قذره مثله وطبعا نرجس مو اول وحده هواي بنات الكليه عانو من ورا سوالفه المكسره وتقريبا كلها تعرف منو الاستاذ كريم بس محد يكدر يحجي لان العميد مدري شيصير منه فساكتين وللاسف عباله نرجس مثل كل البنات وراح تسكتله ميدري هي فضحته فصيحه طيحت حظخ وخلته عبره لمن اعتبر بس خطيه بنهايه السنه طلعت دور ثاني بالماده مالته الحقير رسبها وهذا الشي المعروف عليه اذا متنطي الي يريده يرسبج فأحنه كلنه نتجنه ونكرهه وهاي الثوله بتول كل عقلها موافقه عليه
اروى : جماله رجال جبيره الشيب تارس راسه وعابر الخمسين سنه ويراهق
غنى : هو اكو زلم من يوصلون بهالعمر يستخفون عابتلهم حتى احترام لعمرهم ماكو
فهد : الله يثخن لبنجن من شوكت انتن هيج حبايب وكاعدات وتتهامسن
ايمان : ضحكت عوفهن شعليك المهم هذا الصار
فهد : والله يمه شريد اكلج يعني هذا اختيارها يطبها مرض قابل احد كلها روحي ذبي روحج بهالتهلكه رجال بكد ابوها صدك تحجي
ايمان : والله احنه ضلينه صافنين حتى سعاد ضلت لا تأخذ ولا تنطي الرجال جبير وفوك هذا متزوج ومرته ميته عليمن ولشنو متنازله وموافقه وهي بعدها صغيره ما ادري
فهد : بله كتيلي شيشتغل
ايمان : استاذ بالجامعه
فهد : هاا كولي هيج من البدايه خلص وضحت السالفه ... ست الحسن موافقه مو لسواد عيونه على حساب المُني (الفلوس)
ايمان : والله ما اعرف يمه صدك تعال رديت جواب لعمامك على موافقه اختك
فهد : ليش هي موافقه باوعتلها من المرايه هاا ولج تردين رجل
غنى : اباوع لاروى كامت تبلعم
اروى : لا لاوالله ماعدي هالسوالف
فهد : هم عوزج ... بس جد انتي موافقه لو لا تره هذا زواج مو لعبه مسوؤليه واذا تلبستي بي بعد ماكو مهرب فخليج حذره بقرارج
ايمان : البنيه حتى لو جانت موافقه هسه بطلت من وراك لتخوفها يمه ابن عمج دره مال الله والقريب الي نعرفه احسن من الغريب المانعرفه
اروى : بخجل بكيفكم الي تشوفو مناسب سوو
فهد : على بركت الله يمه رديلهم خبر زحمه اني ابلغ عمامي انتي بلغي النسوان وعود بعدين نتفاهم
غنى : ابتسمت الله يتمملها على خير خطيه سامر من زمان رايدها ومنتظر تالي نال وصلنه لمنطقي القديمه ذاك وينه بيتنه اول ماشفته ظهرت عليه ابتسامه تسبقها دمعه هنا تربيت هنا عشت هنا اول مره شفت بيها مروان بحياتي هنا بجيت هنا انذليت كولشي شفته هنا هالمنطقه جانت شاهده على هواي امور بحياتي حزينه وسعيده بنفس الوقت بس رغم هذا تبقى اكثر مكان احبه لان بي ريحه احبابي وكف فهد السياره و ورا اجه سامر ويه النسوان ونزلنه
فهد : بيش الساعه اجي عليكم
ايمان : عود قبل لا نريد نروح ارمش عليك وتعال
فهد : خوش لحظه غنى
غنى : اباوعلهن سبقني ها
فهد : هذا الاسمه جعفر ما عليج بي والله اذا سمعت بيج مسلمه عليه يا ويلج
غنى : فهد استاذي شلون ما اسلم عليه والله عيب
فهد : طز بيج وبأستاذج سلام متسلمين عليه وثكلي وجهج
غنى : بس
فهد : نقاش ماكو يله روحي وعود كسري حجايتي وشوفي
غنى : تنهدت افف افف درت وجهي ومشيت يمهن
فهد : سمعتها تره وحسابج بالبيت حركت سيارتي وطلعت
غنى : رحت سلمت على الحجيه ونسوان عم فهد بس ام مرتضى سلامي من بعيد وياها
نسرين : المنطقه فقيره بس هادئه جنتي كاعده هنا انتي
غنى : اي هذاك بيتنه
نسرين : ايي ماشي حاله طلعتو مو كلش فقره
حياة : ام مرتضى رجاءاً جايين زياره ثمني كلامج
نسرين : اني اكول خليج بنفسج
ياسمين : كافيي نسرين لتزهكينه
غنى : اباوع فتحت الباب خاله ام جعفر
ام جعفر : يا اهلا وسهلا تفضلو بوست ام فهد شلونج حبيبتي شخباج ان شاء الله بخير
ايمان : بعد كلبي الله يسلمج بخير انتو شلونكم
ام جعفر : الحمدلله شلونج حجيه عساج سالمه
ياسمين : الله يحفظج يمه
ام جعفر : بوست النسوان تفضلو تفضلو ليش واكفين شلونج يمه اروى
الف الحمدلله رجعتي شحلاتج مثل قبل الله يلعن هالحادث
اروى : حبيبتي خاله اي والله دمرني هالحادث
غنى : جنت واكفه اخر شي بس شافتني حضنتني حضنها يشبه حضن بيبي
ام جعفر : شلونها بنيتي الورده
غنى : الحمدلله خاله انتي شلونج
ام جعفر : مشتاقتلج بعد كلبي وتعذريني ما جاي ازورج بس هالتشوفين مريضه وما اكدر دائما اطلع
غنى : حبيبتي خاله عاذرتج ... دخلنه كعدنه بالاستقبال ابتسمت هالبيت شكد لعبت بي وشكد انكتلت بي شبعت طن بوكسات من نرجس اتذكر من جنه صغار جنت من اتعارك ويها تجي تكعد عليه وهي كولش سمينه والله جانت تخليني اصرخ وفوك هذا تطيحلي راشديات لا و وره دقايق تجيبلي لفه وتجي عربون صلح ههه والله ايام
ايمان : اكول حبيبه جاا وين نرجس
ام جعفر : جاي تبدل عروس السبعه هسه تجي شلت حالي هالبنيه
ضحى : كل البنات هيج تعاي شوفي بتي مروه كل يوم متعاركه ويه اخوانها على اللبس والمكياج ومع هذا مستمره بنات هالوكت يشلعن الكلب
حياة : اي والله هاي هسه ملك ام نص لسان كل ما احاجيها تكلي اني دكتوره وانسانه واعيه ومسوؤله رجاءاً لحد يتدخل بحياتي وقراراتي شفتو باله
ام جعفر : لعد الحمدلله اذا هيج واني عبالي بس بتي
اروى : ام نرجس جاي تكللنه بتي مو وجهه زواج بصوره غير مباشره وهي متدري
غنى : ابتسمت شويه واجت نرجس جايبه مي وتمشي بهدوء لابسه ثوب بنفسجي بيتي وخاله مكياج خفيف طالعه كولش حلوه وهي اساساً تنطي شبه جبير من ممثله اجنبيه اسمها نينا دوبريف
نرجس : بهدوء السلام عليكم
الكل : وعليكم السلام
نرجس : بوست خاله ايمان .... بصوت ناصي ومياعه شلونج خاله
اروى : همست لغنى .. سؤال مين دي
غنى : ضميت حلكي طاحظج اروى
ايمان : هله بعد كلبي شهالجمال هذا يحرسج الرحمان
نرجس : فدوه شهالحمايه هاي ... احم من ذوقج خاله تقربت بوست النسوان وهاي ام مرتضى الحيه ادري بيها متحب غنى وعابت لهالخلقه جنها ساسوكي .... شلونج خاله
ياسمين : وج خاله شنو مره شكبرني كولي بيبي حجيه
نرجس : بعدج شباب خاله ميهينلي اكلج بيبي لان مبينه بكد امي
ياسمين : بعد كلبي شلون لسان حلو ينكط شكر
نسرين : عمت عينج اي والله شلون داهيه
نرجس : شلونجن بنات
اروى : اوي تره ماعرفتج
نرجس : خزرتها انجبي ... كعدت يم غنى اباوع لامي مصدومه حقها اول مره تشوفني اتصرف مثل البنات كل يوم بجامتي تك صاعد وتك نازل والتشيرت يصيح الغوث هو وشعري المكفش
ياسمين : اكول نرجوسه شكد عمرج يمه
نرجس : بكد غنى
حياة : هاا العمر كله حبيبتي
غنى : ضلت خاله ايمان والنسوان يسولفن ويحجين ويه نرجس وامها واحنه نشارك بالحديث وياهم خو نرجس صوتها ما سمعنا وكل شويه كايمه جايبه شغله شكل ساعه فواكهه ساعه حلويات ماكعدت لا وتتصرف بأنوثه وكل شويه خازه اروى الي تجفص ضلت الحجيه تاخذ وتنطي بالكلام لحد مادخلت بالموضوع الاساسي كلنه سكتنه
ياسمين : حبيبه ام جعفر ربي بشهد احنه اليوم جاييج مرتاحين وفرحانين لان نعرف شنو انتو خاصه وكفتكم ويانه يوم الكالو وليدنه استشهد الله يحفظه ويبعد الشر عنه شفناج شلون وكفتي ويانه وكفه اقرب الناس متوكفها
ضحى : اي والله ماقصرتي لا انتي ولا ابنج لو من صار حادث البنات صدك بين معدنكم بيومها
ام جعفر : بعد كلبي الناس لبعضها وهذا الي تربينه مثل ما اني وكفت وحاولت اساعد يجي يوم والله يدزلي اليساعدني لو احتاجيت
ايمان : والنعم بالله
ياسمين : حبيبه احنه جايين اليوم حتى نطلب القرب منكم ونوطد العلاقه البيناتنه اكثر احنه نريد نرجس لابنه علي
ام جعفر : نتشرف بيكم حجيه بس يا علي ابن منو
نرجس : صديق جعفر يمه
ام جعفر : خزرتها امشي طلعي بره يربي شلون بيه ويه هالبنيه
اروى : صارلها ساعه محافظه على انوثتها ومن وصلنه للموضوع الرئيسي جفصت
غنى : ابتسمت
ايمان : ابني علي يصير صديق ابنج جعفر عمره خمسه وعشرين طبيب اسنان
ام جعفر : والنعم منه ورده علي دائما جعفر يحجي بي ماعبالي هو والله ياحبيبتي احنه النه الشرف نناسب ناس مثلكم اسمكم علم وسمعتك مسك بين الناس واني عن نفسي اتمنى بتي تصير جنتكم بس القرار بالاول والاخير لابوها والها
حياة : حبيبتي اكيد كل الوقت الكم بس مو تطولون علينه نريد نسمع الاخبار الحلوه منكم
ام جعفر : ان شاءالله
غنى : ضلينه كاعدين شويه وخابرو الولد يجون عليته وهمه ماطولو ربع ساعه واجو كمنه اني واروى نسلم على نرجس ونطلع
نرجس : هاا شصار
اروى : امج قابله بس كالت الرأي راجع لابوها واخوها
نرجس : عشتو اخويه شعليه القرار الي وبس ماعليكم احنه موافقين بس اهلي راح يبيعون ثكل عليكم اسبوع اسبوعين وينطوكم الخبر
غنى : ههه ولج انتي شنو وبعدين تعاي شهالانوثه الي ظهرت فجئه
نرجس : سكتي ولج من البارحه ادرب نفسي حتى اعرف شحجي اليوم تالي الحظ الاغبر جفصت بأخر لحظه
غنى : ميخالف همه ميدققون
نرجس : اي صدك حبابين بس هاي ساسوكي غثتني كل شويه تذبلها حجايه عليه
اروى : منيه ساسوكي
نرجس : عمتج الغثيثه
اروى : ههههه خرب يومج ولج صدك تشبه ساسوكي
نرجس : ادري
غنى : اجو الولد طلعنه
فهد : هاا شصار وياكم
ايمان : والله اني كلبي مطمئن لان الموافقه مبينه عليهم خاصه علي صديق ابنهم
فهد : خوش همزين لعد حتى مينشلع كلبه اسمه ماخذ اخت صديقه
ايمان : رجعت للبيت لو جنت طالع
فهد : لا اخذت سيارتي للغسل نظفتها واجيت ليش مامبينه
اروى : والله انت سيارتك دومها تلمع وريحه الورد تعط بيها فما استغرب ابد حتى لو غسلتها تبقه نفسها
فهد : عن الصبغ ما اروح لمكان راجعين لمكان
اروى : لا والله احجي جديات
فهد : خوش شكراً وصلت للبيت يله كروتجن وخلصت الله وياجن
غنى : نزلت حتطلع
فهد : ما ادري خلي اصلي وعود اشوف
غنى : دخلنه جوه كعدت خاله تحجيلهم على الصار واني وفهد صعدنه فوك
ساره : لحظه غنى وين رايحه
غنى : فوك
ساره : جايه وراج اريدج بشغله
فهد : شتريد هاي
غنى : هزيت كتافي بمعنى مااعرف وصلنه للغرفه دخلنه رحت بدلت وفهد راح كعد وكابل اللابتوب يشوف شصار من طلعنه ولحد الان ما اعرف ليش اندكت الباب كمت فتحتها ... هلو ساره
ساره : باوعت لفهد ... هلو بيج اريدج بموضوع
فهد : رفعت راسي اكو شي
ساره : لا اقصد اي اريد اكلك شي بس كون توعدني متجيب طاريي
فهد : تعاي كعدي واحجيلي شكو
غنى : كعدت يم فهد اباوعلها تريد تحجي بس متردده
فهد : راح تكضيها صفنات احجي تره ما فارغلج
ساره : اني ردت احاجي غنى وهي تكلك بس فضلت انو انت تسمع مني شوف فهد من طلعو الخطابه الجايين على بتول تعاركت وياها سعاد واخذتها وصعدت فوك اني كتلني الفضول رحت اتصنت عليهن
فهد : اي وشسمعتي
ساره : سمعت سعاد تكلها اني عليمن تعبت وخاطرت بحياتي واجيت اموت المره مو على نسيتي شسويت بايمان على حسابج نزلت من نفسي مره وثنين وعشره على حساب تخطبج تالي ما خطبتج لولا واحد منهم ومع هذا استمريت احاول بأديه ورجليه على حسابج تالي ترحين تاخذين هالشايب هذا
فهد : كملي
ساره : تريد الصدك اني من سمعتها هيج تحجي خفت على خاله ايمان واجيت كتلك مو لان خايفه لا تطلعنه بس اني احب خاله ايمان من اجيت لهنا ماقصرت وياي ابد وحسستني هي امي فما اكدر اتغاضى عن هالشي حباب ديربالك من سعاد لتروح تسوي شي بأمك لان مبين عليها كلشي ما مسويه
فهد : كلشي مامسويه لا مسويه وواصله مرحله هم .... رحم الله والديج ماقصرتي تكدرين ترحين الموضوع محلول
ساره : زين ماراح تطردنه من البيت
فهد : لا تفضلي طلعي ولتبينين لأحد
غنى : ضليت صافنه معقوله سعاد تسوي هيج رسن طخت براسي ... فهد سبب تعب خالتي بذيج الفتره هي سعاد مو
فهد : بهدوء تعجبيني تلكفيها وهي طايره سعاد مبدله دوه الضغط مالت امي بدوه موزين ويسبب عجز بالكلى من غير السوالف الثانيه وبسبب هالدوه امي دخلت مرحله ثانيه من مراحل السكر فهمتي ليش البارحه متنرفز لان متأكد هي بس ماعندي دليل
غنى : عزه العزاها عود صدوك اكو بشر عدهم قابليه يأذون احد هيج
فهد : اكو شغلات لو احجيها الج شعر راسج يشيب ... فتحت اللابتوب اباوع هاي ساره فعلا واكفه تتصنت على بابها فتره وراحت تركض حولت على الكامره الموجوده يم غرفتي ... تعاي شوفي
غنى : اباوع هاي آلاء وكفت يم الباب جرت اليده تريد تفتحها لكتها مقفوله حاولت تفتحها ماكدرت اخر شي ملت وراحت ... شنو هاي
فهد : مو اول مره سوتها مره وثنين وعشره وكشفتها بس عينها صلفه ورجعت تسويها
غنى : زين ليش كاتلين نفسهم على هالغرفه وانت ليش متقبل سعاد وجماعتها يدخلون لهنا
فهد : سديت اللابتوب ولزمت ايدها تعاي وياي
غنى : كمت وياا رحنه للمكان البي الخزنه اباوع لفهد كتب رمز وفتحها بمفتاح
فهد : فتحتها هذا سبب خبصتهم ومحاولتهم المستمره حتى يدخلون لهالغرفه
غنى : اباوع الخزنه عباره اوراق وفلوس عراقيه مسطره وتارسه الخزنه بحياتي مشايفه هيج فلوس وهاي الحقيقه .... باوعتله فهد انت غني
فهد : ابتسمت ستوج تدرين
غنى : بس ماتوقعتك هيج يعني عبالي حالتك الماديه زينه بس مو لهالدرجه
فهد : الشي الوحيد الزين والي ممكن ينذكر لابويه اضافه هاي الاملاك والفلوس مو كلها الي
غنى : لعد
فهد : امي وخواتي عدهن حسابات حاط بيهن ورث كامل ومحد يدري ولا حتى هنه وهالشي من اول ما استلمت الورث
غنى : ابوك عافه الهم
فهد : لا اني من ذاتي هذني بنات وما الهن سند من بعدي واذا تردين الصدك فكرت لو باجر عكبه اتزوج هل ياترى مرتي راح تطلع بت عالم وتخاف الله بأمي وخواتي ولو لنفرض متت تمرضت صار عليه شي منو كال ماراح تذب امي وخواتي بالشارع ففضلت اخليلهن مبالغ اشبه بالورث بأسمائهن حتى اامن مستقبلهن واني
غنى : لزمت اديه واحد من الاسباب الي تخلي الله يرزقك وميقصر وياك هو عدم اناينتك باوعت لعيونه تدري اجمل مابيك انك متصالح ويه نفسك وتخاف الله بأمك وخواتك ولهالسبب اني مأمنه على نفسي وياك لان البي خير بأمه وخواته بي خير بمرته
فهد : حاوطت خصرها ... مرته التتأفئف عليه موغنى : اممم اسفه بس حبيبي انت كولش مبالغ متقبل اسلم على مرتضى متقبل اختلط بولد عمامك متقبل اصدقائك يشوفوني متقبل احجي ويه اخوانك غير برسميه واليوم ماقبلت اسلم على استاذي وبمثابه اخ جبير اليه
فهد : بهدوء اغار عليج تعرفين شنو يعني اغار ما اقبل تختلطين بواحد غيري لو بأيدي اخفيج عن جنس ادم كله بحيث محد يشوفج غيري هذا اني وهاي طبيعتي شسوي
غنى : واذا ما اريدك اني شتسوي
فهد : اذبحج واحجي جد عندي استعداد اموتج ولا اشوفج تصيرين لواحد غيري وتره ماجاي اشاقه
غنى : حاوطت ركبته وينطيك كلبك
فهد : ينطيني اكيد اموتج واموت وراج ولا تبقين لغيري
غنى : زين اذا اني متت تتزوج عليه
فهد : اسم عليج الحكج والله دنيا وانتي نفسج ميدور حواليها شعندي ضال بيها
غنى : يعني متزوج غيري
فهد : من سابع المستحيلات لو غنى صالح ام وجه الفاهي القوقازيه لو ما اريد
غنى : واني هم لو فهد المزنجر المطنكر لو ما اريد
فهد : دنكت عليها طخ خشمي بخشمها يروحلج فدوه فهد هو وعشيرته بست شفتها بخفه ااااخ المفروض احنه عابرين مرحله بس هاي الانسه خربت ام مخططاتي
غنى : باستغراب يا انسه
فهد : الانسه شهريه صدك على طاريها انتي جم يوم تطول عندج وتغادرنه
غنى : بخجل جماله خاللها اسم فدوه فهد بطل هالسوالف اكو اشياء عيب تحجيها كدام البنات لان تفشل
فهد : بس وياج لان احبج ما اتقيد بوجودج
غنى : ابتسمت ... يله روح صلي حتى متتأخر على جماعتك
فهد : بعد بوسه
غنى : ماكو يله روح
فهد : بس وحده
غنى : فهد
فهد : شبيج ادري البوسه بالاقساط عندج
غنى : ابتسمت بسته بخده
فهد : لابله
غنى : هههه امشي فهد وراك صلا
فهد : بست شفتها بقوه وابتعدت شفتي اني احاول اكون لطيف وياج بس انتي تردين تتعنفين
غنى : ماكو عنف انسى هالشي يله روح
فهد : ماشي رحت توضيت وطلعت صليت رحت ابدل حتى اطلع
غنى : اباوعله طلع بنطرون اسود جينز وياا تشيرت اسود وستره سوده كمت دخلت للحمام علما يبدل لان ادري بي معنده مانع ينزع كدامي طلعت لكيته واكف يتعطر اباوعله طالع يخبل وهو اصلا حلو مو سمين ابد ومو ضعيف هم ماعنده كرش بطنه مصفوطه وكتافه عراض جسمه حلو عنده عضلات بس ما مبالغ بيهن مجرد مرتبات جسمه وانتبهتله كل يوم الصبح يسوي ضغط لربع ساعه اكثر وانوب يبلش يومه فزيت على صوته
فهد : وين صافن الكيمر
غنى : ابتسمت هيج .... صدوك شدعوه هالكد تسبح بالعطر
فهد : اذا تردين تخلين المقابل ياخذ انطباع حلو عنج خلي النظافه والعطر جزء منج
غنى : شمعنى ياخذ انطباع حلو
فهد : ما اعتقد اذا شمينه عطر مو طيب بجسم احد راح نتقرب منه بالعكس راح تأخذين نظره عليه انه قذر وهذا واقع ؟
غنى : احييك على تفكرك بس الاعرفه عنك انت متهتم لاحد سواء عجبهم عطرك او لا
فهد : اخذت المشط اذا تردين احجيلج الصدك اني احس عطري يزيدني ثقه وما احب واحد يستخدم نفسه ابداً فأوصي عليه من بره
غنى : يعني ماكو من عطرك بالعراق
فهد : اكو بس غمزلتها مو الاصلي .... زائد اني اقرف من نفسي اذا ما اسبح واتعطر بأستمرار فما بالج بالناس الحواليه اعرف وسوسه وتدقيق تسموها بس هاي طبيعتي ... لبست ساعتي يله حبيبي اني اروح لجماعتي واحاول ما اتأخر
غنى : هالكشخه كلها حتى تطلع ويه جماعتك
فهد : ليش اكو يوم طلعت مبهذل ؟!!
غنى : لا حشاك حبيبي اصل الترتيب انت
فهد : ابتسمت تعاي ام نص لسان سدي الباب .. طلعت من الغرفه اريد انزل صارت عيني على غرفه سعاد رجعت داك الباب عليها
سعاد : تفضل
فهد : دخلت للغرفه لكيتها كاعده تاخذ صور الحمدلله والشكر هاي المره جاي تراهق بهالعمر
سعاد : هله فهد حبيبي نورت اول تالي تجي لهنا
فهد : كعدت هذا بيتي انور بأي وقت ... طلعت علبه جكايري ... اي شلونج
سعاد : انت موجود خيمه على راسي وتريدني ما اصير بخير
فهد : ورثت الجكاره اخذت نفس منها بهدوء وذبيته خلي نكون صريحين وننزع الاقنعه الي لابسيها اني وانتي نعرف لا اني احبج واطيقج ولا انتي تحبيبني وممكن تتندمين على الي سويتي بيه ولو يرجع بيج الزمن تسوين الاسوء ... فخلي نعوف اقنعتنا على جهه ولو لدقايق وندخل بالمفيد
سعاد : اباوعله شلون يدخن احس سالم كاعد كدامي بس ذاك ماجنت اخاف منه هذا لشتي ترجف من هدوئه قبل عصبيته لان ادري بي مريض وكلشي يطلع منه .... ادخل بالمفيد ليش متدخل وهاي قناعي ونزعته احجي يا ابن ايمان بت الفكر
شتريد
فهد : من يوم الي عرفت بيج تسوين سحر وذبيتج بالشارع ولليوم هم سويتي شي موزين النه
سعاد : هاا لا طبعا اني حالفه بالعباس قابل اجذب
فهد : تنهدت طاح دخان الجكاره ... بتحذير سعااد هاي شلج بيها الي يروح للكبور ويسوي سحر على اشياء نكسه اني وانتي نعرف شنو هي يخاف من الله من اهل البيت هو انتي تعاملتي ويه ابليس ليش تخلينه نحجي حجي ماله داعي
سعاد : بعصبيه منو كلك اني رايحه للكبور ومسويه سحور
فهد : لعد شعندج قبل فتره تترددين للنجف ووتوسلين بمنذر ياخذج يبيتج بفندق يم الامام حتى بالغبشه تطلعين للكبور بس هو ميقبل تباتون هناك شنو عبالج الناس زواج ومتدري بسوالفج لا متوهمه اني متربصلج ومن زمان بس مغلس بمزاجي على العموم اني مو هذا شغلي اريدج تجاوبيني بصراحه واني اوعدج اذا حجيتي بصراحه راح اسامحج
سعاد : شحجي
فهد : بهدوء انتي سويتي شي خلال هالفتره يأذيني او يأذي امي او واحد يخصني
سعاد : لا طبعا
فهد : انتي سويتي شي خلال هالفتره يأذيني احجي بسرعه
سعاد : كتلك لا
فهد : ماسمعت ارجع اعيد السؤال ....انتي سويتي شي خلال هالفتره يأذيني او يأذي امي جاوبي
سعاد : مو كلت لا لا
فهد : سويتي شي خلال هالفتره يأذي امي
سعاد : ولللللك لا
فهد : جذابه
سعاد : ماسويت
فهد : لاسويتي ... اباوعله كامت تضرب على رجليها وتصيح كدرت استفزها وهذا المطلوب
سعاد : ماسووويت ماسوويت شبيك انت كلشييي ماسويتلهااا ومن تخربطتتت مو انييي السبب
فهد : ابتسمت ... بس اني ما جبت طاري مرض امي
سعاد : هاا اني اني خمنت هالشي وعرفت عبالك اني شو شمسويتها
فهد : اباوعلها كامت تفرك بأديها وتدور عيونها بالمكان عرفتها جاي تجذب كل هالحركات تدل انو الكدامك جذاب ... ماشي اني راح اصدكج بس بشرط
سعاد : شنو هو
فهد : قبل ما اكلج شنوه .... عندج قران
سعاد : هاا
فهد : جاي اكول عندج قران بالغرفه لو لا متعرفين شنو يعني قران اصيحلج مرتي تنطيج معلومات عنه هي خبيره بهالسوالف
سعاد : وراك
فهد : كمت اخذته من ميز التواليت جريت الطبله وخليته عليه حلفي على كلام الله وكولي ماسويت الك ولا لامك اي شي من يوم الي انكشف بي سحري ولهاليوم
سعاد : انت صدك تحجي اني ما احلف
فهد : يعني انتي جذابه
سعاد : مو جذااااابه
فهد : بهدوء هسه انتي ليش عصبيه خليج هادئه ليطكلج عرك
سعاد : لان انت جاي تتهمني بشيييي اني ما مسويته
فهد : خلص لعد برئي نفسج من اتهاماتي وحلفي على القران انتي مامسويه شي لامي ولا الي ولاحتى لبيت ايمان كله
سعاد : القران مو لعبه واحلف بي ج .. سكتت
فهد : اكو مثل يكول حرامي لتصير من السلطان لتخاف ... انتي مامسويه خلص لعد حلفي واكيد اذا كلامج صح وانتي فعلا بريئه ماراح يأثر عليج بشي
الا اذا انتي جذابه وطبعا اذا ماحجيتي الصدك ثواني وانتي بره هالبيت وما ارجعج لهالبيت لو امي تموت اسم الله عليها ورجعتج تحييها ... تحجين الصدك لو
سعاد : لارد
فهد : خلص خليج اني نازل ابلغ ولدج وبتج يفرغون غرفهم درت وجهي وطلعت
سعاد : لحظه اوكف اوكف اني ما مسويه شي وراح احلف على كلام الله
فهد : ضميت اديه يله
سعاد : مدت ايدها برهبه على القران خلتها عليه
فهد : كولي اقسم بالقران مامسويه اي شي يجيب الضرر لا ايمان ولا لجهالها ولا لجنتها من يوم الطردتج ولليوم يله حلفي
سعاد : بصوت يرجف ... اقسم بالقران من يوم الي كشفت بي سحري ول حد ولحد هه هذا اليو اليوم اني ممم ما اذيت اايمان وجهالها وجن وجنتها بأي شي
فهد : خلص اني مصدكج عفتها وطلعت .... وحقه لكتاب الله جذابه وحلفت جذب عجيب شهالجرائه كلام مقدس تحلف بي جذب هالقباحه الواصلتلها هاي
سعاد : جريت ايدي بسرعه مباوعتلها معقوله يصير بيه مثل القصص النسمعها تنكطم ايدي او الله يمسخني لالا اني احلف بألله هواي ولامره صارلي شي هاي اشياء مو صحيحه باجر اطلع للنجف اسوي حرز يحصني اي اي هو هذا الراح اسوي
________________________________
غنى : كاعده اكلب بالتلفزيون وشفت بطايق فهد على الميز ... يعني سلاحه مينسى بس بطايقه وجنسيته ناسيها اوف بله وقفو شلون بس هو ضابط ميوقفو باوعت لصوره حتى بالجنسيه صورته حلوه بس مغندب كالعاده قريت اسمه فهد سالم علي محمد .... الرتبه ضابط استخبارات ... ياا هاي شنو اباوع لمواليده يوم 14بالشهر عيد ميلاده يعني بعد اسبوع واني ماادري همزين شفته بس اروى السخيفه ليش مكلتلي لبست حجابي بسرعه ورحت لغرفه اروى اركض فتحت الباب ودخلت
اروى : والله مامسويه شي شبيج جايه هاده عليه
غنى : فهد بعد اسبوووع عيد ميلاده لييش مكتيلي
اروى : ومرض اي والله اكو وحده متعرف رجلها شوكت عيد ميلاده
غنى : اي اني مجنت اعرف شوكت عيد ميلاده اصلا لوما بطاقته مال الدوام والجنسيه ولا اعرف
اروى : حتى لو عرفتي فهد اصلا ميحب سالفه اعياد الميلاد وهالسوالف كل سنه بهيج يوم يسافر اسبوع اكثر لأي دوله تعجبه يونس روحه ويرجع طبيعي ولو عايدنا يكتفي بكلمه شكراً ويروح ينام ولا كأن اليوم ميلاده
غنى : صفنت بس اني اريد اسويله حفله شلون
اروى : انتي انطي خوش هديه وهو راح يعشق اعياد الميلاد
غنى : هاا
اروى : اي حبي هو الفهمتي شوفي حبيبتي مره من المرات سمعت سعاد تسولف ويه ليلى تكلها الزلم مثل الزعاطيط شلون الطفل يتخبل على الحلويات والمصاص همه عدهم ذيج الشغله مثل الحلويات يفقدون عليها وانتي بنظافتج وانوثتج ودلعج عليه وبمديحج لرجولته خاصه بالفراش تخلي محبس بأيدي تودي يمنه يجي يأيدج تودي يسره هم يجي بأيدج
غنى : بهدوء انتي متستحين
اروى : ولج والله هذا مو حجيي حجي سعاد ولج والله والله جان ابويه لو طب يمها بالغرفه ميطلع غير الصبح وهي جانت تميشلج الشعر واربعه وعشرين ساعه المكياج وبوجها خو المخلع والمزلع ميوكع من جسمها وماشايفتها شلون جانت تدلع على ابويه والله العظيم بهاي عيني شايفه ابويه شلون يبوس بأيدها ويتغزل بيها وهي تدفعه بحجه تستحي وهو يتخبل
غنى : هي مبين عليها تحب تعتني بروحها بهالعمر هي والكحله متطيح من عينها بس تعاي انتي شكد عمرج وعرفتي بهالسوالف
اروى : جنت بالابتدائيه من جنت اشوفهم ماجنت افهم بس من كبرت تفسرلي كلشي
غنى : هزيت ايدي واني بالسادس عدادي من وره الاحياء كمت اعرف شنو مره وشنو رجال ومن وره البنات عرفت شلون تصير العلاقه بين المره والرجال وبيومها كمت ابجي ليش ما اعرف بس خفت ... رجعت لغرفتي لازم اسوي عيد ميلاد لفهد وفعلا هذا الصار بديت احظر للعيد ميلاد فهد بده يداوم بالمركز والحمدلله رجع لشغله الاساسي وهالشغله لصالحي صارت حتى ميبتعد عني .... وصيت على الكيكه وشموع معطره واضويه خافته وفرشه بيضه ونفاخ ونشرات كل هذا اني اسجله وانغام تطلع تجيبه هي ومنذر وطبعا منذر لا يسأل ولا يحجي وحتى ميكول لا .... حابه اخلي اول يوم بسنه فهد الجديده بدايه جديده لعلاقتنه واله هو بالذات اريد اولد فهد جديد واحاول امحي كل جزء مر بحياته والله بقدرني على هالشي كملت كولشي تقريبا صارلي اسبوع اخطط واحضر والحمدلله اليوم الساعه١٢ عيد ميلاده وهو لسه ماحس لان ملتهي بشغله بس طبعا ماخلصت منه كل يوم يسألني نفس السؤال
"ماخلصتي" ... "شوكت تخلصين " ... شلون بيه راح اموت" وهكذا سوالف فهد المعتاده والي متخلص ابد
________________________________
فهد : كاعدين بغرفه غانم نتناقش بالقضيه الجديده او المسماة بمهتمته الجديده
غانم : مهمتكم الجديده تتعلق بواحد ارهابي صارله ست اشهر هربان من العداله والدنيا كلها تدور عليه بس ما اله اثر فص ملح وذاب ولا واحد كدر يوصله تعاونت جهات الاستخبارات بكل انحاء محافظات العراق وهم ماكدرنه نصيده لان مثل الحربايه كل مره يظهر بشكل مختلف وبأسلوب مختلف ايضاً معروف عند الكل بأسم ... المعلم
فهد : معلم بالحمام مو علينه
غانم : يعني لازم تعلق متكدر
فهد : توضيح فكره لا اكثر احنه ماكو معلم علينه ولو اكو مو زباله مثل هذا نسمي معلم هذا حشره مااسمي ... كمل كلامك
غانم : ايمن : اريدك تحبث بحث دقيق مثل ما احنه متعودين عليك وتجيب ابسط التفاصيل الي تخصه
ايمن : حاضر من اليوم ابلش بس اريد اتواصل ويه قسم الاستخبارات بباقي المحافضات واخذ اسماء ومواقع العمليات القام بيهن ووين حتى اكدر ابحث وادور ورا
غانم : هذا شغلك شتريد تسوي سوي ... المهم عندي بعد ما تكمل تسلم التقرير لفهد والي كل الشغل راح يعتمد عليه بأعتباره المنفذ مالتها ومهيمن وعمر وياك
حيدر : واني
غانم : انت اريدك تراقب حدود بغداد لان هسه جاي يدخل عدد جبير من الوافدين والسائحين لبغداد وممكن ينزرع هو بيناتهم
حيدر : حاضر سيدي
غانم : وهسه كدامكم ملفات بيها معلومات مبسطه عنه حتى تتعرفون عليه
فهد : فتحت التقرير ... الاسم مجهول ...اللقب المعلم القضايا المتهم بيها اربعه ارهاب ، تجاره الاطفال والنساء ، تنفيذ عمليات انتحاريه بواسطه نساء واطفال في عموم العراق .... شمرت التقرير هذا مدعوم من الدوله
حيدر : شهالحجي هذا فهد
فهد : محد يكدر يسوي كل هذا ويبقى عايش اذا ما مدعوم من جه جبيره و واصله صارلنه شكد بالاستخبارات ماكمتو تعرفون شلون تفكرون هذا منفذ عمليات هواي وفوك هذا عنده عصابه جبيره ولحد الان ماكدرت الدوله تلزمه برأيك ليش اكيد اكو سبب
غانم : فهد كلامك هذا ممكن يسببلك مشاكل والدوله لو داعمته جان هسه تدور عليه
فهد : اني اقصد جه معينه بالدوله مو كلها يعني القوات الامنيه و وزاره الداخليه مو كلها فاسده اني اقصد فئه معينه
ايمن : كلامك صحيح بس لتخافون جرذ حاله حال الجرذان القبله نلزمه نلزمه
فهد : اني بالنسبه الي مليت من الجرذان اريد اسود تواجهه مو تختل بالدرابين مثل الجرذان
عمر : هاي اجاك المعلم
فهد : بهدوء قندره جوه رجلي ما اخلي ولو قندرتي نظيفه انظف من وجهه فأقلل من قيمتها كمت ايمن استعجلي بالتقرير فركت اديه ايدي تحكني تريد تشتغل
مهيمن : ما اكول غير اجاك الموت ياتارك الصلاة وين الله راح يذبه وبأيد من
فهد : كل جبير فوكه جبير هاي قاعده لو مهما صعدو اكو اليكسر جناحهم وينزلهم يله من رخصتكم طلعت بوجهي لكرار ..... هاا كرار شصار بشغله السياره
كرار : خابرت كل السيطرات وانطيتهم امر اذا لكو مواصفات السياره و رقمها مطابق يوفقون صاحبها ولحد الان منتظرين
فهد : ماشي ... رجعت لمكتبي كملت شغلي انتهى دوامي كمت طلعت من المركز راجع للبيت يلعن يوم هالشمس صمطت ابويه وصلت للبيت صفيت السياره ونزلت ... فتحت الباب ودخلت جوه شفتهم كاعدين
السلام عليكم
الكل : وعليكم السلام
ايمان : الله يساعدك يمه
فهد : بست راسها ويساعدج ... طبيت للمطبخ اشرب ماي لكيت غنى واكفه تخلي الكدور على النار وترجع تكمل المواعين وذني واكفات يتمضحكن ... سلام
غنى : سمعت صوت فهد درت وجهي بابتسامه الله يساعدك حب ... الله يساعدك
فهد : ويساعدج عوفي البيدج وتعاي حضريلي ملابسي
غنى : اي ثواني بنات كملن شطف المواعين علما اطلع ملابس لفهد واجي صعدت ورا
آلاء : شفتن شكد جاف وياها حتى حجايه حلوه ماسمعها
بتول : اي احسه ميحبها
ساره : هو جاف ويه الكل بقت على مرته
بتول : بس هي مرته المفروض اسلوبه وياها غير بس اني اكلجن هذا ميحبها
ساره : انتي شايفته شلون يدافعلها شنو ميحبها
بتول : شكليات هاي كدام العالم يمعوده
غنى : دخلت للغرفه لكيته دينزع قميصه رحت للكنتور اطلعله ملابس
فهد : شو اليوم ماكو الله يساعدك
غنى : باوعتله مو سلمت عليك بالمطبخ
فهد : واحنه هيج نسلم
غنى : ذبيت الملابس واجيت حضنته وشميته اوف الله يساعدك حبيبي
فهد : حضنتها بقوه ويساعدج ياروحي ابتعدت بايس خدها هذا اسمه سلام يله انطيني ملابسي خلي اطب اسبح فاحط من التعب
غنى : سوده عليه يله لعد روح اسبح وتعال صلي حتى تتغده وتنام
فهد : اي
غنى : راح سبح واني نزلت اكمل الغده فرشت السفره و وكفت اصب وانغام واروى وياي كملنه صب وطلعنه ننقل المواعين ... نزل فهد تغده وصعد رحت غسلت المواعين وصعدت لكيته متمدد
فهد : وين جنتي
غنى : اغسل المواعين ... نمت بصفه اكول حبيبي
فهد : كولي
غنى : اليوم ماناوي تطلع
فهد : اي بالليل معزوم على عرس
غنى : بفرح صدوك والله
فهد : وشبيج نطيتي هيج
غنى : هاا لالا هيج بس فرحانتك حتغير جو
فهد : كتيلي ... ديله لعبي بشعري اريد انام
غنى : كعدت العب بشعره ماكو دقايق ونام حبيبي شلون تعبان بسته بخده وكمت اتأكد من كولشي العصر كعد بدل لبس قاط اسود وطلع
فهد : محتاجه شي
غنى : سلامتك حبيبي
فهد : يله مع السلامه
غنى : الله وياك هو طلع واني نزلت طياره حاجيت انغام راحت هي ومنذر جاوبو الكيكه والغراض الاريدها بديت اجهز الغرفه بس النفاخ اخذ مني ساعه بس شنو الغرفه انترست نفاخ صارت تجنن رحت بدلت الفرشه وخليت بدالها فرشه بيضه وبيها ستن تجنن .... نزلت جوه طلعت البيتزا والمعجنات الباقيه من الفرن واركض فوك مااريد واحد يشوفني فشله و ويه حظي الحمدلله كلها بغرفها صارت وقت الاذان رحت سبحت بسرعه وطلعت صليت وقريت قران شويه حتى اهدئ كملت وكمت اتأكد رحت برمت شعري صار يجنن والحمدلله اخذ من وقتي هواي حتى يضيع الوقت تمكيجت مكياج بسيط بس غمقت الحمره ب12 دزيتله رساله حبيبي شوكت تجي .... جاوبني " مسافه الطريق " رحت ركض لبست سيت النوم المشتريته من زمان بس ملابسته ولا مره لونه ابيض وقصير كولش منفوش شويه وبي حمالات رفيعه وفوكه روب قصير كملت كولشي وطلعت الكيكه خليتها بنص الصاله وشعلت الشموع مديتهن من باب الغرفه لميز الي عليه الكيكه والعشه وهالسوالف اجتني رساله من انغام كالت فهد ستوني شفته صعد تنفست اهدي لتخافين اهدي
فهد : رجعت من العرس وصلت للبيت لكيت بس مرت منذر جاي توكل سالم سلمت عليها وصعدت فتحت باب الغرفه .... وكفت بدون اي ردة فعل حرفيا انصدمت
*****
يتبع
- يتبع الفصل التالي اضغط على (ذنوب على قيد الغفران) اسم الرواية