رواية ذنوب على قيد الغفران الفصل الخمسون 50 - بقلم براء

 

فهد : كاعد اقره وسمعت غنى تصرخ كمت ركض ... اباوعلها واكعه بالكاع وتبجي 

غنى : بصوت عالي فهد وييينك تعااال حباب 

فهد : اجيت بسرعه شلتها من الكاع خليتها على الجربايه ... شبيج شوكعج هالوكعه وليش تبجين شنو تعورتي  

غنى : بدموع خايفه 

فهد : لزمت وجها ... من شنو خايفه حبيبي اني يمج شنو شفتي 

غنى : بدموع حلم موزين 

فهد : شنو شفتي احجيلي 

غنى : بدموع شفت روحي بغرفه ضلمه كولش مبيها ولا ذره ضوه واصوات عاليه بس بعيده عني تنشغ فهد الغرفه تخوف ضلمه ضلمه وهيج بيها رهبه لحد الان احس بيها وشي احسه ياكل بجسمي وما اكدر اوخره واحس جسمي ينزف بس ما اكدر اشول الدم ... لهناك وشفت بيبي زكيه هاي اول مره تزورني بأحلامي ... جانت لابسه ابيض بحيث نورت الغرفه صحتلها بيبي اني هنا اجتي واول ما مسحت على راسي حسيت جسمي هدئ حاولت اتقربلها مخلتني دارت وجها وراحت بس قبل لتروح كالت  "تحملي وصبري ، ديربالج من الحواليج وقرآنج لتعوفي بعد صبرج راح تنولين " وعافتني وراحت ومن كعدت كدما خايفه ردت اكوم ووكعت 

فهد : مسحت دموعها هاي لان تعبانه او يجوز نومتج مو عدله وكوبستي ماكو داعي لهالخوف اني يمج حبيبي 

غنى : فهد هاي اول مره اكوبس بحياتي ولامره شفت حلم موزين لهالدرجه

فهد : مسحت على راسها خلص اهدي واقري آيه الكرسي هسه ترتاح نفسيتج اذكري الله واهدي اني يمج شوفي اخذت ايدها خليتها على جسمي شوفي اني يمج وكاعد كبالج لتخافين حبيبتي مجرد حلم لتهتميله عادي كلنه نشوف احلام مو زينه موشي جديد علينه 

غنى : غمضت عيوني لتعوفني فهد حباب اخاف وحدي 

فهد : ما اعوفج لو روحي تطلع ... تعاي شلتها خليتها بحضني وحاوطتها على كيفي بديت اقره قران بهدوء وامسح على راسها .... من وكعتي تأذيتي  

غنى : خليت راسي بركبته شويه متني اذاني 

فهد : هاي لان مخلوع وانتي وكعتي عليه ... بست راسها خوفتيني عبالي وكعتي على رجلج شفتي جني طلع مجرد كابوس سخيف 

غنى : فهد رهبه رهبه فضيعه مااكدر اوصفها الك 

فهد : خلص انسي حلم سخيف لتعيريله اي اهميه ولتنسين هذا حلم ميمت للواقع بأي صله مجرد ما كعدتي انتهى شوفي انتي هسه صاحيه ونايمه بحضني واني حاضنج صح لو لا 

غنى : هزيت راسي 

فهد : خلص لعد احنه العلينه بالواقع الاحلام نخليها وره ظهرنه لانها اصلا متأثر على حياتنه قيد شعره مو 

غنى : اي ... ستنشقت عطره اني اسفه ضوجتك كل شويه طالعتلك بسالفه  

فهد : وخرت راسها من ركبتي رفعت ايدي لتمست خدودها ... لو اضوج من الدنيا كلها منج ما اضوج اكو واحد يضوج من روحه 

      

غنى : لا 

فهد : خلص لعد يله تعاي خلي ننتظر بعد ساعه يأذن حتى نصلي ونام زين 

غنى : امم 

فهد : مسحت على شعرها 

غنى : فهد انت هم تكوبس 

فهد : بهدوء الكوابيس مو مهمه ولا حتى تخوف الي يخوف انك تشوف احقر مواقف مرت عليك بحياتي بأحلامك وعلى مدار سنين طويله والاتعس تكون اكو ادله بكل مكان تذكرت بذيج الايام هذا يسمو كابوس حقيقي لان يلاحكك بالواقع وبالاحلام 

غنى : كلامه كله مبهم مفهمت شي 

فهد : تدرين شنو احقر شي بالعالم 

غنى : شنو 

فهد : يكون سبب دمارك واذيتك ودموعك عايش بتعبك ويطلع ويطب ويتونس بفلوسك بكل حقاره بعد ما جان هو سبب اذيتك والمك بطفولتك 

غنى : فهد اكو شي يخص حياتك اني ما اعرفه 

فهد : شنو لزومه هالسؤال

غنى : عندي احساس انو شخصيتك الصعبه والمبهمه هاي والي لو شكد ما الواحد يحاول يدرسها ميكدر صارت بسبب شي مو من عدم صرت انت هيج 

فهد : تنهدت اكو هواي امور عن حياتي امي نفسها متعرفها ولا حتى تدري عنها .... تدرين واني طفل يتراوح عمري بين سبع لتسع سنين جانت شخصيتي  جدا ركيكه ما اعرف احجي اغلب مخارج الحروف عندي غلط ابو دميعه بسرعه ابجي عسى لا واحد كل بز بجيت بس ماابجي كدام احد دائما جنت ابجي جوه بطانيتي ... لمن مره من المرات رحنه زياره لبيت جدي بالبصره وبيومها هم بجيت مدري على شنو وشافني جدي جان يلزمني ويكتلني واتذكر كلي فنك تنزل دمعه وحده من عينك والله اطلع بروحك المهم جدي طلب من امي ابقه عدهم وبقيت بس شنو شفت الويل 

غنى : ليش 

فهد : جان يكعدني الفجر ياخذني وياا للبستان رغم هو صاحب البستان وعنده فلاليح جوه ايده بس هو جان يزرع وياهم علمني شلون ازرع وكمت ازرع ويا جان يخليني اشيل المحاصيل ويه العمال واسحل بالكواني واني جنت ابجي ما اريد اشتغل وهو من يشوفني ابجي يلعب الخيزرانه على رجليه بقيت شهر اكثر على هالوضع لمن صدك بطلت ابجي 

غنى : وشنو الجابرك تبقى هناك 

فهد : هواي اشياء حسيت روحي بديت اتغير وبنفس الوقت جنت شارد من البيت ما اريده لسبب مااحب احجي عنه ... وخوالي رغم ما جان جدي يأذيني اجي انام من التعب واحس بيهم يجون يطبون يبوسون بيه ويشجعوني انت رجال انت سبع انت انت والحجيه ام امي هم جانت لو سويت شغله بسيطه تطبخلي فاصوليه لو تاخذني لشط العرب تونسني رغم جانت هالاشياء بسيطه بس هواي تأثر بيه كمت كل شهر والثاني اروح للبصره

غنى : حلو مبين عليك تحبها 

فهد : كلش جنت كلما احس نفسي صرت انضج كلما احب البصره اكثر لمن عشقت هالمحافظه بكل تفاصيلها حبيت ناسها حبيت كرمها حبيت لمت اهلها كلشي بيها اثر بيه وسوه انقلاب بحياتي وضليت هيج لمن كبرت وصرت رجال 

        

          

                

غنى : لعد اذا تحبها هيج ليش مستقر ببغداد 

فهد : وصيت الوالد قبل لا يموت انو ما اعوف بغداد ابد ولا استقر بغير مكان فانجبرت اكمل كليه ببغداد وبعدها كمت اسافر بحكم شغلي للاردن لغيرها بس بقت بغداد مكان استقراري والبصره لحد قبل جم شهر اني بيها 

غنى : اني اشكر ابوك الله يرحمه 

فهد : ليش 

غنى : لوما كاتب بوصيته انو تستقر ببغداد جان بقيت بالبصره ومشفتك 

فهد : بهدوء هاي لهالدرجه عاجبتج شوفتي 

غنى : بهمس واكثر  

فهد : باوعتلها ونمت ابتسامه على شفايفي غصب عني دنكت رايد ارتوي بيها وسمعت ... اشرب الماء هنياً قبل ان يأتي الصباح ... حجه مخرب اللحظات السعيده 

غنى : بتعب كوم اشرب مي بسرعه وجيبلي وياك بلا زحمه عليك لان اريد اصوم 

فهد : ماكو صيام 

غنى : لا حبيبي استحقيت الصوم جنت بالبدايه تعبانه وما اكدر اما هسه لا اكدر احجي طبيعي وجسمي وضعه ممتاز واكدر اكمل صيام واذا على الادويه فكلهن وره الساعه سبعه فأكدر اصوم وهالشي لا بكيفك ولا بكيفي خلص بعد استحقيت 

فهد : بكيفج اني على حساب صحتج والا اني صايم بكل الاحوال ... كمت جبتلها كاسه ماي 

غنى : اكو دولكه متروسه وبيها كلاص ليش تشرب من الكاسات 

فهد : ما استنظف 

غنى : خاف لان اني شربت من الكلاص 

فهد : لالا مو هيج بهدوء اني طبيعتي شويه مزعجه عندي وسواس وما احب اشرب من احد حتى لو امي احس جسمي يضل ياكلني اذا تقربت لشي ما متأكد من نظافته لهسبب مبتعد وخال لروحي كلشي خاص 

غنى : يعني هم تقرف مني 

فهد : بهدوء لا ممكن اشرب من كلاصج 

غنى : تنهدت هاي اقصى شي عنده يربي شهالوسواس هذا بس رغم هذا اموت عليه ... الله يساعدني 

فهد : على شنو 

غنى : هيج كومني خلي نتحضر للصلاة 

فهد : شلتها ورحت للحمام ... دخلت كعدتها على كرسي خاله الها حتى تتيمم ... رحت غسلت و وكفت اتوضه باوعت لروحي بالمرايه وصفنت توسلات سنين من امي حتى اصلي ما فادت ومحاوله اشهر قليله من غنى خلتني التزم واصلي ... شهالتأثير الشايلته هالبنيه عليه ما ادري ... درت وجهي عليها اباوعلها تتيمم على كيفها وتغمص عيونها متألمه لو بأيدي اني اتوضى بدالها بس ميصير اباوع للشعر واكع بالكاع مناقض لبياض بشرتها 

غنى : رفعت راسي لكيته فوك راسي ... كملت 

فهد : اي يله شلتها كعدتها بالصاله ورحت فرشت سجادتي ... اباوعلها لبست الجادر وكعدت منتظره الاذان .... اذن كمنه صلينه وكعدنه نقره قران كملنه وكمنه نمنه 

        

          

                

غنى : تصبح على خير 

فهد : حضنت ايدها لان مااكدر احضنها وانام خاف تتاذه ... وانتي بخير دنكت ابوسها 

غنى : خليت اصابعي على شفايفه ... صيام 

فهد : بس وحده 

غنى : حتى اذا صيام ... بست خده يله نام غمضت عيوني 

فهد : بسيطه تحتاجيني  

غنى : ابتسمت 

________________________

بعد مرور اسبوع 

غانم : كدرت تلاكي شي وره هاي المره

: لا سيدي من لحكتها شفتها راحت لمشتمل صغير وتطلع كل يوم لامكان متفرقه متثبت بمكان واحد 

غانم : ماعرفت شسمها 

: لا والله سيدي سألت عليها وماحصلت اسمها بس الاعرفه هي مؤجره جديده ما صارلها حتى شهرين 

غانم : ماحسيت تصرفاتها غريبه 

: لا بس شفتها تروح لملهى (......)

غانم : هذا الملهى الريحوله الشباب ... هالبنيه وراها شي هالملهى ميطبوله غير بس الطبقات الراقيه بالمجمتع شلون كدرت تدخله ... تحرالي عنها واذا لزم الامر تقرب منها اعرف شبيها  

: حاضر 

غانم : روح لشغلك ... منين طلعتلي سالفه هاي المره وشتريد من فهد ياخوفي لو دازتها جهه معينه يردون فهد ... الله لا يكولها غير اذا وصلوله نقره عليه السلام والمشكله ما اكدر اكله ادري بي متهور  وميسكت ... شكول عليك سالم خلفت هالولد هذا 

_________________________ 

اروى : طلعت بالعربانه وضعي الصحي تحسن نوعا ما ... بعد اسبوع العيد وعلى اساس سامر يخطبني بأول يوم العيد بس اجلت كلشي علما اصير زينه لان سامر مستعجل يريد يتقدم ويعقد ويعرس بأشهر قليله واني هم وياا ما اريد اماطل بس طلعلي الحادث صفح ... اباوع لبتول نزلت تركض .. الله الله شبيج راح توكعين 

بتول : ما عليج انتي وين امج 

اروى : بغرفتها وين يعني 

بتول : دخلت بسرعه للغرفه خاله شنو الحجي السمعته من خالتي ليش ترديني اترك البيت 

ايمان : عندج مهله منا لتلث ايام اذا ما حجيتيلي كلشي عن علاقه فهد وغنى وشلون عرفتي بعلاقتهم تطلعين من البيت واني اطلعج من البيت وتدرين بيه اسويها 

بتول : همه تزوجو وكلشي انتهى بعد عليمن ندور دفاتر عتك 

ايمان : دافتر عتك بالنسبه الج اني هالسالفه تاكل وتشرب وياي من قبل عرس فهد واني ليلي ونهاري افكر بالموضوع مره على مره سألتج وتتهربين ولتكولين لا ... وهاي صارلي فتره ما مرتاحه لا بأكله ولابنومه بسبب هالسالفه 

        

          

                

بتول : اني ما اتهرب يا خاله اني محلفه ما احجي وبالنسبه لفهد وغنى فماكو داعي تفكرين زياده عن اللزوم همه هسه متزوجين ومو بعيده هي تحمل بعد جم يوم 

ايمان : ميخالف احجيلي التفاصيل حتى افتهم اصلا ما ادري شلون تسرعت بذيج الفتره بدون ما افتهم شي واني كلشي ولا واحد يشتغفلني ويستغبيني فأحجيلي منو كلج وشلون عرفتي ... اريد ابري ذمتي وما اقبل اتحمل اثم من وراج انتي اجيتي وكلتلي كلشي ودليتيني على مكان العماره الي محد يندلها غير فهد فشلون عرفتي احجي لو لمي هدومج وطلعي 

بتول : ما من حقج تطلعيني هذا مو بيتج 

ايمان : هههه ولج هذا بيت ابني والي مطلق الحريه اطرد الاريده وابقي الاريده فلتسوين روحج قويه كدامي 

بتول : اذا حجيت انتي التتأذين مو اني 

ايمان : بحده انتي مو تهدديني لا انتي ولا عشره بكدج يكدرولي 

بتول : زين انطيني مهله احاجي السولفولي واقنعهم لان اخاف يأذوني اذا احجيلج 

ايمان : يعني مو انتي الشفتيهم 

بتول : هااا لا اني هم شفتهم بس سالفه العماره وانو وغيرها حجوها الي واني ما اكدر اتصرف من كيفي 

ايمان : يعني ماراح تحجين اذا متحجين والله هسه اروح لفهد وهو يتصرف وياج وانتي تعرفين فهد شيسوي فأحجي احسن الج 

بتول : تحلفين متوصلين الحجي لفهد 

ايمان : لو اريد من البدايه اكله انتي الحجيتي بس اني حلفتلج ما اجيب طاريج بس اريدج تحجيلي التفاصيل حتى افتهم وما اضل بشك 

بتول : شوفي من الاخير فيصل هو الدلاني لان شاف  غنى تصعد ويه فهد وتروح للعماره واجه كلي حتى اكلج وانتي رحتي خطبتي غنى اله وهذا الفاجئنه لان توقعنه ترزليها تفضحيها مو تخطبيها بس انتي خطبتيها لفهد وهاي هي صارت مرته اني حجيتلج هسه عادي اروح 

ايمان : لحظه وفيصل شيستفاد اذا كلي عن علاقات فهد 

بتول : يمكن خاف لا تجينه فضيحه بسبب غنى تدرين هي تكدر تسوي فضيحه بين الناس وتكول عنده علاقه بيه اشو هي لا اهل ولا شي سايبه من الشارع وان تدمرت سمعتها او لا ماراح يأثر بشي عليها 

ايمان : احترمي نفسج ولتحجين على جنتي هيج شي انتو ما فاهمي لتحللو من يمكم 

بتول : ليش شتفسرين وجود وحده ويه واحد لا هو رجلها ولا خطيبها ولا يصير منها شي تصعد وياا بالسياره وتروح ويا للشقه 

ايمان : ردت احجي بس اكو شي سد حلكي مانعني احجي عن السبب الحقيقي من وجود غنى عد فهد بذيج الفتره ... حتى اذا البشر خطاء والحمدلله همه صححو غلطهم وتزوجو وخلصت السالفه 

بتول : اني ميهمني هذا كله اني هالبيت ما اريد اطلع منه وحجيتلج كلشي حتى متطلعيني منا وهاي اني كلشي حجيتلج 

        

          

                

ايمان : ماشي يله روحي 

بتول : راح تبقيني هنا 

ايمان : اي 

بتول : طلعت ركض صعدت فوك دكيت الباب على خالتي دخلت وقفلت الباب ... لكيتها واكفه تتميكج خاله خاله 

سعاد : ذبيت الحمره هاا خاله 

بتول : جنت يم ايمان 

سعاد : اي صدك ليش كلتلي اكلج لازم تطلعين منا بت الفكر نرفزتني بس ماكدرت احجي ... شرادت منج 

بتول : راد احجيلها تفاصيل معرفتي بعلاقه غنى وفهد 

سعاد : وبس لا حجيتيلها 

بتول : للاسف انجبرت احجي بس لتخافين ماجبت طاريج كتلها فيصل الكال 

سعاد : صخام بوجهج شلون تذبيها براس ابني الله يطيح حظج 

بتول : والله خفت لا تسويها صدك وتطردني وهي حلفت ماراح تكل لفهد فأطمئني 

سعاد : لا هاي وحده حقيره وهسه تضل تبتز فيصل او تهدده لو يعوف البيت لو تكل لفهد وهي تدري اذا فهد دره ينهي فيصل ... اني لازم اصم حلكها رحت فتحت الكنتور هاج 

بتول : اخذت العلبه شنو هذا 

سعاد : جنت مأجله الموضوع وخايفه اخطي هيج خطوه بس اجه الوقت صارلي فتره ساكته عنهم وخاصه هالايمان وحده حقيره وحاقده ومتأكده راح تأذي ابني .... شوفي الي راح اكوله تسوي بالحرف 

بتول : خاله هذا سحر ذبيته لالا ما اسوي هالشغلات اني 

سعاد : هذا مو سحر يغبره اني عفت هالسوالف بعد مالي بهالطريق هذا دوه مو سحر 

بتول : وشيسوي هالدوه وشعنده عندج

سعاد : ابتسمت هالدوه مال ..... شرحتلها ومشتريته من زمان بس كتلج صار وكته هسه 

بتول : بخوف واذا ماتت 

سعاد : لتخافين متموت انتي العليج تخلي ويه ادويتها مال الضغط وغيرها وهاا تخبطي وياهن لان هي مو غيشمه اكيد تنتبه على العلبه 

بتول : بس هيج نوع من الادويه موزينه 

سعاد : اعرف هو اني ليش وصيت عليه وذبيت كومه فلوس عليه هذا يخليها لا ايد ولا رجل خاصه هي عدها سكر وضغط وهالدوه يخليها تلتهي بروحها 

بتول : سؤال انتي ليش هيج حاقده على خاله ايمان والي راح تسوي ممكن يموتها خاصه هي مره جبيره

سعاد : والله لبجيها دم على كل دمعه نزلت من عيني وعلى كل شماته سمعتها من العالم لان ما خلفت غير ولد واحد والله لطلع راحه 12 سنه من خشمها هي وجهالها جنت قبل مستلمه فهد بس فهد كبر وماكدرلن بعد واروى سكت عليها سوك المطايه وما فاخ كلبي هذا عمري كله اخلق المشكله خلق حتى ااذيهم اني بسببهم خسرت رجلي وخسرت شبابي وحتى زواج ماكدرت اتزوج لا يرحون ياكلون كل الورث وحدهم وتربصتلهم من مات سالم  ولليوم 

        

          

                

بتول : جان كلام خالتي مليان حقد وكرهه اني نفسي تفاجئت بي ... عفتها وطلعت زين هالدوه شلون اخلي بين ادويتها افف كلشي بركبه بتول 

سعاد : الوو عمه ليث شلونك ... شسويت بالكتلك عليه من بطن عيني انت سوي الكتلك عليه والك مني المبلغ التريده بس كون كله والله شتريد اني حاضره بس هاا ما اريد اثر الك حبيبي اخاف عليك ماشي منتظره الاخبار الحلوه ... سديته شكد الحلو المشاكل كلها اجت سوه عليهم تحملو اذا كدرتو تتحملون 

________________________ 

غنى : كاعده بغرفتي وفهد بالمعمل وسمعت الباب يندك منوو ... ماكو صوت ... غلست ورجعت حديث الكساء .. سمعت الباب يرجع يندك هم صحت محد جاوب رجع اندك كمت ... اخذت العكازه الحمدلله رجليه بدو يطيبون حتى اصابعي كمت اكدر احركم بدون الم ... اخذت العكازات وكمت مشيت على كيفي احاول ما اضغط على رجلي فتحت الباب مالكيت احد منو جان ديدك الباب سديتها اجيت ارجع سمعت الباب بسرعه فتحتها شفت جهال ليلى يركضون بعيد عنها ... هاي ليش هيج تنهدت ياربي شلون وياهم رجعت كعدت على القنفه اباوع الساعه بالوحده وين صار فهد 

شويه وانفتحت الباب دخل فهد بكل هدوء اباوعله شلون وجهه منكع ويمسح كصته بالكلينس سوده عليه من الصبح طلع ... الله يساعدك حبيبي 

فهد : بست خدودها ويساعدج حبيبتي 

غنى : شو تأخرت 

فهد : اي عدنه بضاعه جديده جاي نحظر الها لان الكميه كلش جبيره وتأخرنه 

غنى : الله يساعدكم ... يله روح اسبح لبين ما احضرلك ملابس 

فهد : لا كعدي شحجينه حتى لو كدرتي تحركين رجليج بدون الم متتحركين اله يشيلون الجبيره

غنى : كمت كدامه والله كولشي مابيه كافي مليت من الكعده اريد اتحرك 

فهد : فتحت قميصي ميخالف حبيبي هسه انتي متنج على التدليك والادويه صار زين بقن رجليج وعود شتردين تسوين سوي قابل اني ما اكيف تصيرين زينه وافطر وياج وارتاح صار شهر منقطع على حسابج غير الادويه الكح.... تطيبج وتخلصني 

غنى : احنه صايمين لسانك

فهد : اللهم اني صائم ... يله اروح اسبح وانتي ممنوع تلبسين تراكات كدامي بعد هم صايم وهو زنود وزرور كدامي وترديني اكمل صيامي ماصارت هاي 

غنى : ابتسمت خلص البس عبايه كدامك انوب 

فهد : حاوطت خصرها واذا حتى العبايه مغريه عليج شسوي اني بهالحاله 

غنى : تتعوذ من الشيطان وتروح تسبح وتجي تنام يله حبيبي يله لتنسى اني غنى ام وجه الفاهي يله امشي اسبح 

فهد : هو محد خربط احوالي غير هالوجهه الفاهي هذا ابتعدت عنها داخل للحمام  

غنى : ابتسمت اروح فدوه لهالطول ... رجعت كعدت اكمل الدعاء طبعا هالاسبوع تلث مرات احلم موزينه ودائما اشوف اشخاص اشكالهم مو واضحه يجون ينبهوني من شي مجهول واني لازمه كلبي وموكله امري لله وهو يحل شكو شي يريد يصير .... طلع فهد واجه حتى يصلي ليش مصليت هناك 

        

          

                

فهد : ما لحكت من الصبح لسه احنه على فرد وكفه راسنه ما لحكنه نحكه ... يله خلي اصلي وبعدين نسولف 

غنى : وكف يصلي واني كمت نصيت السبلت خاف يتمرض وهو معايز اباوعله كمل وكعد يسبح شكد حلو شكله وهو يصلي 

فهد : حسبي حسابج اليوم وره صلاة الفجر التحق 

غنى : ليش انت مو كلت ماخذ اجازه 

فهد : صارلي فوك العشر تيام نازل وهي اقصى عطله عشر تيام واني ضربت الوضع وبقيت ما اكدر بعد لازن ارجع لشغلي 

غنى : لا فهد حباب بعد اسبوع العيد شلون تروح يعني اول ايام العيد ما اشوفك 

فهد : لا ليش اسبوع وينزلونه على حساب العيد واكو غيرنه يجون لتخافين منا للعيد اني يمج وهاا ذكرتيني وره العيد اخذج للدكتور لان صارلج فتره

لابأس بيها من طلعتي من المستشفى فحتى نشوف شلون صار وضعج نراجع 

غنى : اعتقد هسه يشيلون الجبيره لان رجليه صارن زينات 

فهد : كمت لام السجاده ياريت لان بعد ما اتحمل وجماله انتي تلبسين الوان تحرك الحايط 

غنى : باوعت لروحي جنت لابسه منامه سوده و ورديه برموده لان ما اكدر البس بجامه ... ليش شبي لبسي  

فهد : نزعت التشيرت وتمددت استوعبي اني رجال صايم من زمان ومن اجي تعبان والكه جنابج لابسه تراك مطلع زرورج وزنودج راح يروح صيامي اني مو حجاره بشر يالكائنات  

غنى : باوعتله تحسسني وكأنو ملكه جمال كدامك 

فهد : بهدوء هنا المشكله انتي وجهج فاهي وبيضه فاهيه شنو السر الي يخليج مغريه هيج ما ادري اني نفسي ما اعرف شلون اشتهيج هيج 

غنى : كمت تمشيت نمت بصفه على الاقل اني بيضه مو مثلك مزنجر 

فهد : درت جسمي عليها ... صدك تشوفيني مزنجر 

غنى : اي 

فهد : رفعت حاجبي حتى لو مزنجر غصباً ما عليج ترضين بقسمج وتاكلين تبن فوكها 

غنى : اشكرك 

فهد : رجعت نمت ... تدللين 

غنى : اباوله دار وجهه عني تقربت حضنته من ظهره حبيبي ... مرد عليه دنكت بست ركبته حبيبي المزنجر  

فهد : اللهم اني صائم 

غنى : ابتسمت تره اشاقه وياك حتى اذا انت مزنجر وناسيك بالفرن اني قابله 

فهد : هم عوزج متقبلين 

غنى : عود صدوك حبيبي ضجت مني 

فهد : بهدوء ... لا شنو طفل واضوج بس رحمه لاهلج بهالظهر وخري عني وخليني محافظ على صيامي  وايدج عن صدري ونفسج وخري عن ركبتي تره اكثر مكانين اتحسس منهن هذني لتخليني افطر وخري عني 

        

          

                

غنى : ابتسمت ساحبه ايدي يله نام 

فهد : لعبي بشعري 

غنى : مو تكول لتلزميني خاف افطر  

فهد : تقربيلي بس مو تبوسيني وتتلمسيني وترديني احافظ على صيامي آااخ بختج برجليج وصيامي والله ... بأمر يله اشتغلي اريد انام 

غنى : حاضر سيدي 

فهد : احسنت 

غنى : ابتسمت 

____________________________ 

ياسمين : يمه مهدي شوكت تعرس بتك صحيح الخاطبها ابن عمها بس ميصير يطب ويطلع علينه وهي حلاله والناس الها الظاهر 

مهدي : والله يمه كلامج صحيح بس الشهاده لله حارث منتظرها تكمل وهي تماطل 

ياسمين : وانت مالك حجايه عليها شنو بكيفها هي 

مهدي : لا طبعا الي بس انتي تدرين بيه مالي بالضرب ولا الصياح اكتفي بالتحذير وجهالي الحمدلله كلهم يسمعون الكلام ومافديوم كسرو حجايتي وشهد اني حاجيتها كلتلي بابا اني جاي اجهز للعرس على راحتي ما اريد استعجل يعني اذا هي تحجي بأدب وتطلب بكل احترام اروح اغصبها وهنا المشكله اني جهالي ما اكدر افرض عليهم شي همه ميردو الله ميرضه 

ياسمين : والنعم منك بعد كلبي ربيت ونعم التربيه بس ميخالف الشده مطلوبه 

مهدي : بالغلط اكيد 

نسرين : السلام عليكم 

الكل : وعليكم السلام 

ياسمين : هاا ولج شو مختفيه هالايام وينج 

نسرين : جنت ادور لمرتضى على مره بس مالكيت 

مهدي : وانتي شلون تتصرفين من كيفج شنو تدوريله على مره لعبه هي 

نسرين : اريد اعرسه ياخويه صارله اشهر معتكف على نفسه جنه مطلكه كلت اخطبله بلكي يلتهي ويه بنيه بت حلال ويطلع من هالحاله 

ياسمين : وبت العالم شنو ذنبها تجي تلكه ابنج بهالحاله تره حرام الجاي تسوي ابنج جان يحب وحده عوفي ينساها على راحته ومن يتعافه منها عود يرجع لوضعه الطبيعي 

نسرين : ماكو هاي ملازمته للموت مينساها اله تدخل غير مره لحياته 

مهدي : ينسى منو 

ياسمين : خزرتها 

نسرين : وحده جان رايدها وعرست منعرفها ... سمعي يمه اريد اخطب لمرتضى واكو ابالي وحده بس متردده واريدكم تنطوني رأيكم 

مهدي : نعرفها 

نسرين : عز المعرفه 

ياسمين : منو هي 

نسرين : مروه بت عباس 

مهدي : والنعم منها بس مروه اكبر من مرتضى 

        

          

                

نسرين : لا مرتضى اكبر منها نسيتو مرتضى رسب مرتين بالسادس وبعدين ياله نجح فأكبر من مروه 

ياسمين : والله ورده مروه بس لتتسرعين خلي ابنج يصير ادمي وخطبيها

مهدي : اني هم هيج اكول 

نسرين : ابتسمت انتظر انتظر شعندي اهم شي ابني ياخذ وحده مثل مروه 

__________________________ 

انغام : ساره خالتي تكول روحي صعدي كعدي فهد خلي ينزل هو ومرته مابقه شي على الاذان 

ساره : مابيه حيل اصعد واني زعلانه من مرته مااريد اصعد 

انغام : شهالتصرفات شنو طفله انتي لو ما جاي اطبخ اني اصعد بس ملتهيه 

بتول : عوفيها كليلي شتردين 

انغام : فتحي الثلاجه شوفي اكو ثلج لو لا واذا ماكو صعدي جيبي من غنى وهم كعديهم خلي ينزلون خالتي وصتني والتهيت  

ساره : بس همه يفطرون فوك شينزلهم اليوم 

انغام : لا فهد كال اليوم يفطرون جوه اشو مرته وكامت تكدر تتحرك بفضل الله ... يله روحي صيحيلهم خلي نشوفهم من بده رمضان لسه ماتجمعنه على الفطور غير بس جم مره 

بتول : عدلت شعري وصعدت مالي ... دكيت الباب سمعت صوتها متعرف تكوم تفتح الباب تصيح من جوه بت الفكر  ... اني 

غنى : اخذت العكازه وكمت على كيفي فتحت الباب ... هلو بتول  

بتول : هله دخلت للغرفه ... خالتي تكول كعدو ونزلو جوه حتى تفطرون مابقه شي للاذان  

غنى : اي هسه ننزل 

بتول : باوعتلها ببرود لحظه 

غنى : نعم 

بتول : انغام تكول عدج ثلج ماكو جوه  

غنى : اي يمكن اكو بالفيرز خلي اشوف تحركت اشوفلها اكو 

بتول : صارت عيني على الجربايه اباوع لفهد نايم على بطنه ومالابس شي هاي اول مره اشوفه هيج ظهره مبين صلب ولون بشرته برونزي حلو ضليت واكفه اتأمله شكله شكد هادئ حتى وهو نايم يعني سبحان الله من جنه صغار لهاليوم هو نفسه ما تغير نفس الرزانه والهدوء حتى بنومته ياخذ العقل 

غنى : بهدوء تعالي اخذيهن ما اكدر اجيبهن واني مستنده على العكازه ... اباوعلها عينها على فهد ولا يمي ... ضوجتني نظراتها مو وياج 

بتول : ليش صوتج عالي راح يكعد 

غنى : بضوجه صار ساعه احاجيج ولا يمج ... تعاي اخذي الثلج 

بتول : بختها بفهد والله لو وحدها بالنص بت الكلب ترفع صوتها عليه 

فهد : بنعاس حبيبي شهالصوت مو كلتج اريد انام  

بتول : خزرتها حبيبي هي هاي وجهه حبيبي جنها وصله مسح .... رحت اخذت علبه الثلج مو تتاخرون 

        

          

                

غنى : كلنه اي لتلحين 

بتول : كبر اي والله 

غنى : اباوعلها طلعت تمشيت لفهد لكيته راجع نايم ... فهد كوم اكعد بالخمسه العصر صارت كوم يله خلي ننزل 

فهد : عوفيني نعسان 

غنى : كوم حبيبي خاله تصيحلنه 

فهد : فتحت عيوني باوعتلها خو تعلعت نومتي من وراج حسابج وره الفطور 

غنى : انت خو ابد متستغل الفرص يله انطيني ايدك وكوم 

فهد : كعدت دوخري لتنكسر ايدج هالمره كمت بست خدها 

غنى : بهدوء مو صايم 

فهد : غمزتلها تصبيره لوره الفطور 

غنى : ابتسمت رحت لبست دشداشه رصاصيه وياها شال رصاصي خليت عطر وانتظرته يطلع طلع بدل واجه سندني 

فهد : اشيلج 

غنى : لا حبيبي اكدر امشي ولتنسى منا لسبوع عشر تيام اني اشيل الجبيره واكدر امشي بعدها ... نزلنه اني وياا درجه درجه لكيناهم كاعدين بالصاله كالعاده 

فهد : السلام عليكم 

الكل : وعليكم السلام 

فهد : كعدتها وكعدت بصفها 

اروى : اشرقت وانورت نورتي 

غنى : حبيبتي بوجودج 

منذر : اي هسه كملت الكعده والله مكانكم خالي 

غنى : ابتسمت تسلم ميخلى مكانك 

ورده : فهد 

فهد : نعم 

ورده : شوكت نطلع حتى اشتري ملابس عيد 

فهد : اني بالنسبه الي باجر التحق شوفي واحد من الكاعدين ياخذوج وهاا تكسي ممنوع على ايد واحد بيكم يصعده بدون رجال من البيت فلو علي لو منذر يرحون وياكم ويرجعون وياكم غير هيج ماكو طلعه 

ورده : منذر عنده محاضرات وعلي افندي ميقبل ياخذني شسوي اني 

فهد : مشكلتج هاي اذا يعجبج شي خلي واحد من الولد يوصيلج عليه من الانترنت وكافي طلعه ماكو مامستعد اضحي بواحد منكم بعد 

ورده : بس

ايمان : خزرتها كافيي اخوج شحجه لتناقشين 

غنى : اباوعلها برطمت وضاجت ... همستلها البارحه شفت بالفيس مول عدهم ملابس تجنن شنو رأيج تشوفين اني متأكده حيعجبج احسن ما تضلين بدون ملابس 

ورده : بس اني اريد اطلع واشتري مااحب اوصي من النت اضوج اريد اله اشوفه بعيني واكدره ياله اشتري 

غنى : حبيبتي لوما فهد حيلتحق جان اخذج مو واذا مصره احاجي علي باجر واخلي ياخذج انتي وخاله 

ورده : صدك 

غنى : هزيت راسي لعد اجذب عليج 

ورده : حضنتها يممممه فدوه شكد احبج اني وجماله صديقاتي يكولن نسوان اخوتهن عكارب خلي يجن يشوفن الفراشه العدنه  

        

          

                

سعاد : اللواكه وراثه بهالعائله 

غنى : سمعتها بس مجاوبت وفهد همزين منتبه .. ابتسمت مباوعه لورده احبها لان اشوف مروان بيها 

فيصل : فهد انت باجر تلتحق مو 

فهد : اي 

فيصل : وشوكت ترجع 

فهد : ما اعرف ليش تسأل 

فيصل : لا هيج فضول 

ايمان : يله بنات راح تصير بالسبعه كومن يله ساره لتضربين تغليسه كومي  

ساره : اني نفسه 

ايمان : ماراح تموتين اذا تحركتي يله كومي 

غنى : اجيت اكوم كعدتني خاله 

ايمان : انتي كعدي وينج وين جوالاتج تردين تكومين .. صيح بمرتك فهد 

فهد : اشرتلها كعدي 

ساره : اي هي حظوظ هي كاعده واحنه نشتغل ..ولو 

هذا حظ النحسات 

غنى : اجت ليلى كعدت يمي 

ليلى : همستلها حاجيتي فهد 

غنى : هزيت راسي لا 

ليلى : وليش اني شوصيتج 

غنى : مصارلي مجال احاجي 

ليلى : شنو ما صارلج مجال صار فوك الاسبوع على السالفه وانتي كلشي ما سويتي هو هذا اليعتمد عليج 

غنى : فهد هالايام مشغول ومن يجي ينام ووراها يفطر ويرتاح مديصيرلي مجال احاجي واكدر اجذب و اكلج كتله ورفض بس اني مكتله ومااريد اجذب 

ليلى : حاجي اليوم 

غنى : اذا كدرت 

ليلى : تحاجي اليوم يعني اليوم منتظره منج خبر باجر 

غنى : ماشي .... صار وقت الاذان واجو البنات فرشو سفره بالكاع وبدو ينقلون الاكل طلعت خاله بأيدها صينيه خلتها كدامي 

ايمان : ادري بيج متكدرين تطبكين رجليج خليج هنا فطري انتي واروى وانت هم يمه 

فهد : لا يمه وياكم الحمدلله قابل ما اكدر اكعد 

غنى : عرفت فهد سوه هيج حتى يتجنب الحجي والتعليقات المالها داعي ... اذن الاذان وبدينه نفطر همه بالكاع واني واروى كاعدين بدينه نفطر اباوع لاروى كوه ترفع ايدها لان مجبسيها كلها رفعت ايدي وكلتها حسيتها حتبجي صدوك صعبه هيج مواقف لا تكدر تتحرك لا تكدر تكوم بس الحمدلله على كل حال ... كملنه فطور وكامن شالن الفطور 

انغام : غنى حسبي حسابج بس تصيرين زينه تاخذين كل الشغل

غنى : خلي اشيل الجبيره ومن عيوني 

آلاء : لا شنو تشتغل اني اخذ شغلها غنى انتي خليج مرتاحه اني اشتغل 

غنى : باوعت لورده الي تضحك وفهد الي انرسم على ملامحه التعجب 

        

          

                

انغام : تره جاي اشاقه وياها على كيفج حتى هي تدري جنت اشاقه 

آلاء : عبالي تحجين جد 

سعاد : انتي شبيج صايره كريمه هالايام 

ساره : تخاف من فهد 

فيصل : شنو تخاف من فهد انعل امه وابو اليخوف نسواني وجهالي 

ساره : تره حتى انت تخاف منه 

غنى : اباوع لفهد ابتسمت وعيونه بموبايله 

فيصل : اشرتلها اني اعلمج 

غنى : شرب فهد جايه وكمنه صلينه بغرفه خاله وضلينه كاعدين جوه ... للعشره بالليل واندك الجرس بشكل فضيع طلعو الولد يركضون 

ايمان : خير يا ستار شصاير 

انغام : اكيد جهال لو شو شنو لتخافين خاله 

ايمان : اطلع بيبي احمد شوف شبيهم عمامك 

غنى : طلع احمد شويه ودخل 

احمد : ماهمه عمامي 

آلاء : هاي وين راحو ... دكو عليهم 

غنى : فهد عاف موبايله هياته هنا 

ايمان : دكيت عليهم كلهم منذر عايف موبايله وفيصل وعلي ميردون ... يعني لازم يخلون واحد يغلط ياله يرتاحون خو كولو شبيكم وين ولو 

سعاد : لتغلطين على ولدي فتهمتي 

ايمان : شو سكتي انتي فايخه 

غنى : ضلت خاله تدك محد يرد رجعت خابرت حارث ومحسن هم محد يرد عرفنه صاير شي يمه فهد ربي دخيلك كون ماكو شي ... للدعش همه ماكو خاله كامت تلوج رايحه جايه وتاكل بروحها خاله الله يخليج اهدي لتتخربطين ويرتفع سكرج 

ايمان : ليش العدها ولد ترتاح لا والله ويكلك خلفه البنات متنراد هاييي خلفه الولد شحصلنه منها غير شلاع الكلب ... اللهم صبرك ما طلع رمضان علينه 

سعاد : دكعدي حلكج صار ابيض كومي بتول جيبي دواها من جوه خزرتهاا كووومي 

غنى : راحت بتول وخاله شحالها صارت صار ساعه من طلعو ولسه مارجعو وينهم 

بتول : تفضلي خاله 

ايمان : رحم الله والديج اخذت الحبايه سميت بسم الله وخذتها يمه اطرافي يرجفن من الخوف شلون بيج ايمان تاليتج تموتين من وره واحد بيهم 

سعاد : شلون فكر كله من وره اختيارج 

ايمان : اختياري شنو 

سعاد : خليني ساكته هاي التاخذ فكر 

غنى : عفواً منج ام فيصل بس ماكو داعي لهالحجي واذا عندج حجايه احجيها كدام فهد وبطلي سالفه دس السم من جوه لجوه 

سعاد : هاي عليمن ولج 

غنى : عليج اني متجاوزت بكلامي ولايمج ولا كرباج ليش متبطلين تسميع حجي ما اعتقد سابقاً جان عندي عداوه وياج 

        

          

                

سعاد : من اكول عليج لسانج لسان كح... محد يصدك مسويتلي روحج حمل وديع كدام رجلج ولسانج بطول القندره من رجلج ماهو 

غنى : بهدوء كلمن يعكس تربيته واخلاقه بالفاظه 

سعاد : كمت ولج هاي وياي اليوم انعل والديج هديت عليها بت الفكر ام الشوارع بيج خير 

ليلى : كافي يمه عوفي البنيه بيا حال احنه فتحت عيوني لتخربين شغلي لخاطر محمد وتخليها تطنكر عليه كعدي 

سعاد : كعدت بسيطه اعلمج هاي لخاطر ليلى راح اعوفج 

غنى : مجاوبتها اصلا بالي يم فهد ضلينه للوحده لازمين كلوبنه والولد ماكو وره شويه اندك الجرس كامو الجهال فتحو الباب ودخلو الولد اباوعلهم كلهم وجوهم مصخمه وملابسهم هم دخل فهد اخر واحد اباوعله وجهه كله صخام واديه هم وصاير بارود 

ايمان : وينكمممم من العشره ادك عليكم وانتو ماكو احجوو ليش هيج وجوهكم مصخمه احجووو 

علي : كعدنه المعمل احترك 

الكل : ياا 

ليلى : شلون احترك ومنو حركه 

منذر : منعرف ستونه ياله كدرنه نطفي احنه والولد والاطفاء وحتى عمامي صار تلث ساعات نطفي بي 

آلاء : خاف تماس كهربائي 

غنى : اي يمكن تماس 

فهد : بهدوء لا الحادث مفتعل المعمل محروك ببانزين 

سعاد : شلون عرفت ببانزين 

منذر : يمه اكو جلكانات جانت جوه محروكه مبينه مال بانزين الحادث مفتعل وحسب كلام فهد فهو ضابط ويعرف لو تماس جان بين من انفجار القاطع بس لا المعمل سابح ببانزين 

علي : بس لو اعرف منو اله مصلحه 

منذر : المشكله احنه معروفين بالسوك لا مأذين احد ولا النه علاقه بأحد ليش العالم تحاربنه 

ايمان : ولد حرام الله لايوفقهم 

غنى : اباوع لفهد كام صعد فوك بدون ميحجي كلام زايد 

ساره : هذا شبي 

علي : شنو هذا احترمي نفسج 

فيصل : اكلك لتطلع حركتك بمرتي ولتخبصنه المعمل لفهد وعمامك عليمن خبصت روحك 

علي : هذا حلال اخويه اكيد اخبص روحي 

غنى : كمت انغام بلا امر عليج تعاي ساعديني اصعد 

انغام : صار 

غنى : ساعدتني انغام اصعد فوك فتت للغرفه لكيت فهد كاعد على القنفه ومنطيني ظهره تقدمت ردت احاجي وتذكرت كلامه "اذا صرت عصبي ابد للتقربيلي"  .... خلي يهدئ واحاجي رحت طلعت جنطته بديت احضرله ملابسه مال الدوام تأكدت من كولشي ما اريد اثير اعصابه ... البدله مكويه ومعكره الملابس نظيفه الخاولي مالتي ادوات الحلاقه والشامبو والغسولات وهالسوالف كلها جهزتها خليت الجنطه على جهه ورحت كعدت يمه بس ماجيته ضليت فتره طويله كاعده هو ساكت وماحجه ولاحرف ولا اني حجيت لمن مكدرت اتحمل تقربت حضنته ... ماهديت 

        

          

                

فهد : بهدوء شلون ترديني اهدئ ... راح كلشي غنى راح تعب عمامي التعبو عليه سنين من زمن جدي لليوم وراح تعب 12 سنه اني تعبت واشتغلت بي على المعمل كلشي  راح بغمضه عين 

غنى : فدوه الكم اهم شي سلامتك على كولتهم بالمال ولا بالعيال لتنقهر 

فهد : باوعتلها انتي ماشفتي عمي مهدي شلون يبجي وحقه غنى المعمل صار رماد كلشي احترك مابقه ولا شي لا سجلات لا فلوس لا حلال كلشي ماكو 

غنى : بست كتفه ... العوض على الله حبيبي لتهتم اهم شي سلامتك ومحد تأذه بيكم العافيه تسوه الدنيا   

فهد : المعمل جان يدر علينه مليارات تعرفين شنو مليارات عمامي بنو بيوتهم وامنو مستقبلهم من المعمل ابويه حط وسوه العماره والبساتين من وره هالمعمل .... ناس كومه بالميت عامل يشتغلون بهالمعمل ومعيشين عوائلهم على راتب نهايه الشهر الياخذو من المعمل كليلي شلون يدبرون امرهم وهمه معتمدين على المعمل واني منين انطيهم رواتب صحيح عندي بس حسبي ميت عامل جم مليون اريد اذب عليهم 

غنى : زين ماكدرتو تعرفون منو الحركه 

فهد : ماادري بس اني متأكد الحادث مفتعل ريحه البانزين مبينه بالحياطين المالايحها نار والسوه هيج متقصد والدوريه الدزيت عليها اجت وجاي تاخذ الاجراءات اللازمه ولو بيه حيل اني احقق وياهم بس ماعندي قابليه حتى اوكف حيلي انهد واني اطفي وياهم وهم ما لحكنه على شي الفلوس احتركت والسجلات راحن ردنه كونيه كونيه وحده ماطلعت من المعمل الرزق كله احترك 

غنى : حضنت ايده ماسحه عليها لتهتم حبيبي يجوز جان اكو راح يصير بيكم والله دفع البلاء عنكم بالمعمل 

فهد : الله ميدفع البلاء برزق العالم كولي اكو ابن كح... متقصد يأذينه ... تنهدت تعاي كليلي شسوي اني يوم 5 بالشهر متفق ويه التجار يجون ياخذون بضايعهم وهسه كلشي احترك وحاير شسوي 

غنى : خابرهم وكللهم المعمل احترك 

فهد : والدفعات المسبقه الماخذها منهن راح انجن اقسم بالله راح انجن حاير شسوي وحتى لو اريد اسحب المبالغ من البنك شكد اريد اسحب مليون عشر ميه 

غنى : مشفتو الكامرات 

فهد : اكلها كلشي محترك تكلي كامرات 

غنى : خلص اهدئ اهدئ مو انت كلت جماعتك اجو وكامو يحققون بالموضوع ان شاء الله يلكون دليل 

فهد : يلكون يلكون اني متأكد مليون بالميه يلكون اي واحد يرتكب جريمه لازم يترك دليل ورا وهذا المنتهين منه 

غنى : توكل على الله حبيبي 

فهد : حاوطتها بأيدي ونعم بالله 

غنى : همست حتلتحق باجر مو 

فهد : اي وره الاذان اطلع 

غنى : حضرتلك ملابسك بس كوم اسبح وجهك واديك كلهن صخام مال حرك روح اسبح وناملك هالكم ساعه حتى تكدر تسوق 

فهد : اي هسه كايم كمت دخلت للحمام 

غنى : دخل للحمام واني كمت افف والله جزعت روحي من العكازه الله يساعد كلب الميكدر يمشي هسه عرفت نعمه الرجلين شلون مهمه طلعتله تراك خليته على جهه وكعدت على الجربايه رجليه كامن يونن عليه لان ضغطت عليهن اليوم اباوعله طلع من الحمام بالمنشفه اجه اخذ ملابسه بدل واجه 

فهد : نمت بحضنها حضنت خصرها وغمضت عيوني 

غنى : تلمست خصلات شعره هديت هسه 

فهد : لتشوفيني ساكت تره غادي نار بس مااعرف شسوي 

غنى : كبرها تكبر صغرها تصغر انت توكل على الله وصدكني تنول الي تريده 

فهد : بست ركبتها ونعم بالله 

غنى : اسويلك سحور 

فهد : ما اشتهي العسل بس اريد انام 

غنى : ماضغطت عليه عفته براحته ضليت العب بشعره اباوعله رسن غفه سوده عليه شلون مهدود حيله يربي هالرجال شوكت يرتاح كل يوم طالعتله مشكله شكل تلمست الشيب المنتشر بشكل متفرق بشعره واكول ليش مشيب الله يساعده .... ضليت العب بشعره وهو نايم لتلاثه كعدته يشرب مي كام شرب وكعد من وحده يقره قران حتى ما كتله ... اذن كمنه صلينه وهو راح يبدل حيطلع للموصل ... متكدر تبقه موزين عليك وانت تعبان تسوق 

فهد : سديت قميصي مو بكيفي هو لازم التحق وين بسطالي 

غنى : يم الباب اجيبه الك 

فهد : لا شنو انتي تجيبي رحت لبسته واخذت جنطتي وغراضي يله اني رايح ديربالج على روحج وشيصير وياج خابريني خوش 

غنى : تقدمت حضنته بقوه مااعرف شلون حتمر هالايام بدونه كل ما يريد يلتحق يجيني هيج احساس اضوج كولش ديربالك على نفسك حبيبي 

فهد : الله الحافظ ... مع السلامه 

غنى : بست خده الله وياك تروح وترجع بالسلامه 

فهد : اخذت شفايفها بستها ... امين يله سدي الباب ونامي 

غنى : صار ... سديتها يارب بجاه هاي الفجريه تحفظ كل امه محمد وفهد من عرضهم 

____________________ 

بعد مرور يومين 

  

ايمان : كاعده الكط بالتمن وما اشوف غير الدنيا تغوش ... فتحت عيوني استغفر الله هاي شبيه تعاي يمه انغام انتي كملي التمن ... كمت على حيلي يا الله اجيت اطب لغرفتي وما احس غير رجليه يصيرن خيوط واوكع 

ورده : يممممممه 

***********

يتبع