رواية ذنوب على قيد الغفران الفصل الرابع 4 - بقلم براء
البارت الرابع
البـــــــــارت الرابع
مرحبا حبايبي العسل شلونكم ❤❤
علقو على الفقرات وصوتو على البارت عسلاتي ❤😊
#ذنوب على قيد الغفران
#للكاتبه براء
فهد : صعدت ركض فوك شفته واكف يم السطح جريته من هدومه لللللللك انت وتالييييييييي وياككككككككك
فيصل : ووووخرر عني محد خربهن غيرك وغير دلالك والله انت لو بيدك تصير كو.... متكول لا
فهد : دخلي اراويك الكو... شيسوي انطيته لطمه على وجهه وركعته كله براسي اباوعله وكع .. لك سافل حتى الطفله ما خلصت من شرك وشر مرتك
آلاء : يمه راح يموووت رجليييي لحكولييييييي
فهد : قزرقط ومرض صوتجججج
علي : كاعدين اني ومنذر نحجي بغرفتي ومنسمع غير كبت العيطه طلعنه ركض لكينه فهد ساحل فيصل ويعيط ... شبيك فهد
منذر : جريت فهد شبيك صدك تحجي
فهد : وخررر
علي : بس فهمنه شكو
فهد : بصوت عالي انيييي شكلتتت مو كلتتت وخرووو
علي : هديته حاضر
فهد : شوف فيصل ايالك وبالك تفكر مجرد تفكير تضرب ورده ... طفله وبعدها صغيره لتعلمها على التعنيف من هسه هاي طفله ومتتحمل اسلوبك هذا راح يدمر شخصيتها ويخليها ضعيفه وتالي ضربه من ضرباتك تكسرلها ايد لو رجل فألزم حدك واعقل
فيصل : لا شو اضربها واطيح حظها لسانها بطول النعال(عفوا) ولا جني اخوها الجبير والي حجايه عليها احاجيها حجايه تردهن عشره
فهد : هي لو مسويه شي غلط طيح حظها وكسر راسها وابن كلب الي يكلك ليش بس مال تضربها لان ما قابله تنظف قذارتك وقذاره مرتك لا هنا اوكلك تبن ايالك وبالك تدنه يم خواتي اكسر ايدك ومااخليها توصل لحلكك وحق الي خلقك
آلاء : هسه هاي الخبصه كلها لان كتلها نظفي الغرفه شصار انكلبت الدنيا
فهد : باوعتلها وانتي شبيج مكسحه لو ايدج مشلوله كلمن يخدم نفسه بنفسه مو ملكه انتي ولا جبناج من القصر الملكي حتى نكول معلمه على الدلال ومتكدر تنظف بنفسها
فيصل : شسالفه مرت اخوها وتمون عليها لتسويلك سالفه وتضل تشمر بالحجي هاي مرت اخوك الجبير وغصباً ما عليك تحترمها كافي تره زودتها
فهد : على حسب علمي الاحترام يكُتسب مينطلب الواحد هو يجيب الاحترام لنفسه ميطلبه
فيصل : يعني انت ماجنت محترم نفسك حتى ابويه جان يكومك بكتله ويكعدك بكتله
فهد : ضغطت على ايدي ... اني وانت نعرف شنو جان سبب ضرب ابويه اليه لتسوي نفسك غشيم شتكولين ام فيصل
سعاد : هاا ... اني شعليه
فهد : اني مو غشيم ولا غافل عن سوالفكم على العموم هذا موضوع انتهى وراح ... كلامي موجهه لكل اخواني فيصل منذر وعلي ... اي وحده من خواتكم تتصرف تصرف مو زين ايدكم الكم وشتردون تسوون سوو واني وياكم بس مال اسمع بيكم ضاربيهن على سبب تافه وماله داعي استعمل وياكم ايدي واعتقد فهمتو قصدي ... عفتهم ورحت لغرفه ورده فتحت الباب ودخلت لكيتها كاعده على التلفزيون ... بحده كومي اوكفي
ورده : بخوف هاا
فهد : بهدوء فيصل ضربج بس لان ما قبلتي تنظفين لو شنو
ورده : لا
فهد : لعد ليش ضربج
ورده : صاحتلي مرته انظف الغرفه مالتها واني جنت كاعده اشوف فلم غلست عليها راحت كلت لفيصل واجاني يغلط ويصيح كمت راددته فضربني راشديات
فهد : شكتيله ؟
ورده : كتله امشي ولي فيصل الخيخه
فهد : باستغراب شنو يعني خيخه ولج شهالمصطلحات
ورده : بارتباك .. يعني جبان ومبي حظ
فهد : بحده وانتي شلون تجاوزين على اخوج الجبير مو عيب متستحين انتي هسه من انطيج لطمه على وجهج هم واحد يكلي ليش جم مره كلنه لسانج لزمي وبطلي تجاوزين على احد
ورده : يعني شنو يكلي غصباً ماعليج تنظفين غرفتنه شنو اني خدامه
فهد : يعني تجاوزين عليه ... ضربج مو تجاوبي تعاي كليلي مو تمدين لسانج بطول النعال الي المفروض اضربج بي هسه حتى توبين غبيه
ورده : اسفه بعد ما اعيدها
فهد : عقاب الج حجي ما احجي وياج والآيباد ينسحب منج ووممنوع عليج تستخدمين اي جهاز لمده تلث تيام حتى تتأدبين
ورده : انتحبت لا فهد حباب لتزعل مني والله توبه اخذ الايباد بس لتزاعلني
فهد : من تتأدبين احاجيج عود وخرت عنها وطلعت من الغرفه ... شلون بيه ويه هالعائله المخربطه هاي
غنى : طلعت صينيه الجاي للحديقه جانت كاعده بيها بيبي وام نرجس طبعا بيبي جدا اجتماعيه والجوارين كلهم يحبوها وهي ما شاء الله عليها وجها بشوش وتنحب بسرعه عكسي يكلولي شلونج اضل صافنه
ام جعفر : بعد كلبي يوم الي نشوفج عروس ان شاء الله
بيبي : يوم المنى واضل عايشه واشوفها ببيت رجلها
غنى : ابتسمت الج طول العمر بيبي لتحجين هيج
ام جعفر : لتخافين راح تشوفيها ببيت رجلها وعن قريب ان شاء الله
غنى : احم يله من رخصتجن ... والله عدها سوالف ام نرجس رجعت للمطبخ خليت الصينيه وكعدت خاله ايدي على خدي صافنه على نرجس الي ما سكتت من رجعنه لسه بس تحجي على هالرجال الي هناك بعد نرجس وشافتلها رجال شيسكتها .... طبعا احنه علاقته كلش قويه باهل نرجس بحيث مرات يصير نص الليل وهمه عدنه ميتقيدون يمنه ابد ... بله ما مليتي لخاطر الله والله لو ادري بيج هيج تخبصيني اعوف الفلوس ومااروح انطيهن للرجال
نرجس : ولج انتي صدك تحجين شفتي شلون جمال
غنى : تره شكله جدا عادي وانتي مو جنتي بعيده شدعوه مركزه وياا هلكد
نرجس : تدرين بعيوني تتحرك تلقائياُ على كل واحد حلو وتاخذله صوره وتدز تسختين وحده لكلبي والثانيه لعقلي
غنى : اتمنى استاذ جعفر يسمعج والله العظيم يمسح بيج الكاع
نرجس : لتخافين عيني قابل اني ذيج الوحده ويركز وياي
غنى : كلبت عيوني هاا نرجس بدينه
نرجس : هسه عوفينه من جعفر وتعالي نسولف على هذا الحلو ابو الزيتوني
غنى : يبوو شكد تلحين
نرجس : انجبي وسولفيلي شلون شكله عن قريب وشكلج من انطيتي الفلوس
غنى : صفت ... مكلي شي اخذ الفلوس وكال شكرا اما شكله فكتلج شكله عادي مابي شي ملفت للنظر غير انو نظيف كلش
نرجس : يعني عفتي كلشي وركزتي على نظافته
غنى : لج لا بس اقصد انو نظيف يعني من لبسه وستايله مبين نظيف على العموم كافي سدي الموضوع رجال راح لتضلين تعيدين بالسالفه
نرجس : اي عيني ديربالج تره استاذ جعفر ومرتضى ميقبلون
غنى : ضربتها كافييي
نرجس : هههه
__________________
صباحاً
فهد : اليوم عندي استراحه وطلعت للمعمل اشوف الشغل ويه حارث ومحسن لان عمامي كبرو بعد مالهم خلك دائما يطلعون
محسن : اي شلونك شخبارك شو مختفي هالايام
فهد : الشغل لفوك راسي ماعندي مجال لأي شي
حارث : والله حتى اني لعبت روحي من الشغل اريد اطلع تقاعد بس ميصير اله خدمه لسنوات طويله
محسن : ليش ولك هو انت ما عولت تلكه تعيين جاي هسه تريد تتقاعد
حارث : شايفين شغل المحامي شكد صعب ولكم اكو قضايا على اشياء تافهه وسخيفه لا وانوب البارحه اجاني واحد على سالفه خلتني فاهي
فهد : ليش جاييتك قضيه اغتصاب لو قتل حتى هيج حاير
حارث : اذا اكلك متصدك ... ولكم اجاني واحد البارحه يريد يطلك مرته حاولت افهم منه السبب طلع حضرته يريد يطلك مرته لان متطبخ لا ومتمسك برأيه ميريدهه
محسن : هههه والله شكلي راح اسوي هيج انوب اذا مرتي كالت ما اطبخ اطلكها واخلص منها
فهد : بيك خير احجي كدامها مو تجي جنك فاره تبسبس يمنه
محسن : يمعود ام العيشه هاي غير تكطع عليه الماي والكهرباء واخوك تدري بي روحه بهالشغله
حارث : انت ملاحظ روحك دتحجي على اختي لو اني غلطان احترم وجودي يااخي
محسن : على طاري اختك تدري البارحه شسوينه اني وياها البارحه
حارث : ضربته بالسبحه تأدب حيوان ولو هو مو صوجك صوجنه احنه انطيناك مره
فهد : ضحكت والله انتو بطرانين ... اباوع اجه منذر
منذر : السلام عليكم
الكل : وعليكم السلام
فهد : اباوعله مامرتاح ومبين عنده شي حتى الولد انتبهو
حارث : تعال محسن نشوف العمال وين وصلو
محسن : اي يله
فهد : تعال اكعد
منذر : كعدت اكلك فهد اريد اطلب منك طلب
فهد : بهدوء تفضل
منذر : محتاج فلوس
فهد : رفعتله حاجبي شتسوي بيهن
منذر : احم باجر عيد ميلاد انغام واريد اشتريها هديه عجبني اسوار ذهب واريد اشتري الها وبعد اسبوعين على راتب المعلمين من استلم راتبي انطيك الفلوس
فهد : شكد تريد
منذر : 500 الف
فهد : طلعت محفظتي هاك
منذر : ابتسمت تسلم بعد اسبوعين ارجعهن
فهد : خليهن ماكو مشكله من احتاج اخذهن منك
منذر : كمت واني من استلم راتب اضمهن الك شوكت متريدهن اخذهن يله من رخصتك
فهد : براحتك ما محتاجهن اني ... طلع واني رحت اكمل شغلي اجتني مكالمه اباوع فرح خير ... الوو
فرح : الوو حبيبي شلونك
فهد : بخير شتردين
فرح : متجي والله شتاقيتلك
فهد : مو البارحه جنت يمج وبعدين اني جم مره كايل لتتصلين عليه اني من اريد اجي اخابرج غبيه انتي
فرح : شبيك غير رجلي اني مريضه وتعبانه واريدك يمي
فهد : منو لازمج هاي الدكاتره شكدها روحي شوفي شبيج فلوس ومنطيج
فرح : يعني متغار عليه
فهد : وليش اغار عليج يعني قابل راح ياكلج الدكتور
فرح : يله باي اني زعلت
فهد : وزعلتهم ... سديته وكمت
________________
ايمان : كاعده الكط خضره ويه البنات وسعاد كاعده كبالي هالايام صايره هادئه و ودوده مو مثل قبل
سعاد : اكلج عيوني ايمان ما ناويه تزوجين فهد صار عمره تلاثين وهو لسه ماتزوج
ايمان : اااخ هالفهد موتني مايقبل يتزوج
سعاد : خاف عنده مشكله ورافض يزوج ... ما سألتي خاف يعاني من شي حتى يتعالج مو عيب هذا مرض ولازم يتعالج
ايمان : شهالحجي ام فيصل ابني كلشي مابي صحته عال العال بس هو مايريد يزوج لان مالكه وحده تعجبه لسه
سعاد : زين شنو رأيج ببتول بنت اختي اشو حلوه ونادره ومؤدبه ماناقصها شي واني متأكده راح تخلي فهد ميشوف غيرها شايفتها انتي شلون دلوعه وحلوه
ايمان : باوعتلها فهد ياخذ بتول
سعاد : اي شكو بيها شنو بس لا ماعاجبتج
ايمان : لا مو قصه ما عاجبتني ونعم منها بس ما اعتقد فهد يقبل بيها لان صارلها سنين عايشه ويانه لو يريدها وعاجبتنه جان كلي
سعاد : هسه انتي جسي نبضه وشوفي شيكلج ... بلكت يستر على هاليتيمه واله اجر بيها
ايمان : الزواج مابي اجر ام فيصل هاي حياة وعشره
سعاد : لا يختي مالها علاقه العشره هاي اني عاشرت المرحوم وداريته مثل الماي البصينيه تالي راح عرس عليه وياريت لو ناقصني شي شو جنت ومازلت مثل الورد اصغر ما اكبر
ايمان : اباوع لعلامات الكبر بوجها واضحك والله ياالله الى متى تبقين هيج يا سعاد ... سعاد طول عمرها معتنيه بنفسها ولحد هاليوم هي مهووسه باللبس والذهب والفلوس حتى بالبيت تفتر وذهبها وياها تحب الفخفخه والكشخه رغم اكبر مني بس ما مبين عليها ... خليج انتي يأيمان اندفتي بالحياة قبل 12 سنه
_____________
غنى : كاعده بالحديقه اني ونرجس نراجع المحاضرات حسيت على صوت يمي شلت راسي شفت مرتضى
مرتضى : صباح الخير
نرجس : صباح النور شلونك مرتضى
مرتضى : تمام ... ليش متردين غنى مو صبحت عليج شنو زعلانه مني
غنى : هاا العفو صباح النور لا على شنو ازعل
نرجس : كول مرتضى شتريد اختصر بدون مقدمات
مرتضى : حشه مو بنيه مصيبه انتي ... اجيت اعزمجن تكعدن ويانه لان مجمع كروب شعبتنه كله سوه وكاعدين نسولف بما انو بعد هواي على المحاضره
غنى : اجيت اكله منروح بس سبقتني نرجس
نرجس : اي ماعدنه شي كومي نونه نروح
غنى : خزرتها ... لا مرتضى شكرا نريد نقره
مرتضى : يعني يصير ترديني هي هاي الاصول
غنى : عدلت نظارتي لا مو قصه اصول بس والله دنقر..
نرجس : قاطعتها روح مرتضى معليك بيها احنه جايين وراك كمت يله كومي
غنى : نرجس ليش تحرجيني مو كتلج مااريد اخزر بيج اريد ماكو انتي مو تدرين بيه مااحب اختلط بالطلاب
نرجس : بلا لغوه زايده يله كوميي
غنى : كمت اخذت الملازم حسبي حسابج عشر دقايق ربع ساعه ونكوم فتهمتي
نرجس : دمشي ... وصلنه للمكان الكاعدين بي سلام
الكل : وعليكم
فادي : هله باخت الاستاذ سوولها مكان ولكم
نرجس : ههه اي عفيه صاكركم اخويه ... كعدت اني وغنى
فادي : اي شلونج يالساكته
غنى : ابتسمت الحمدلله
فاطمه : شباب اكو شغله متغيره بغنى فنكم شنو
مرتضى : باوعتلها شنو ممتغير بيها شي
فارس : اي ماكو شي
نسمه : ضحكت ولكم قصدها مغيره جبتها ولابسه جبه جديده مو مثل ملات العام مدري ليش تلبسهن اشو حتى ذوق مابيهن
فاطمه : مستعزه بيهن ولج وهنه ذوقهن من زمن التسعينات
ميسم : على طاري الملابس اني سمعت بيج خياطه عندي قماشات اريد اخيطهن للعامله مالتنه هم خطيه تحتاج ملابس وهي فقيره هم افيدج وافيدها
فادي : غنى صدك انتي تشتغلين خياطه
نرجس : اباوعلها شلون ضاجت من كلامهم بس مابينت شجايه اني جبتها واجيت ..... ليش شبيها الخياطه قابل انتن احسن منها
فاطمه : هسه سألنه سؤال جاوبي
غنى : بهدوء اي اشتغل خياطه
فلوس : اكول ليش كمتي تلبسين نظارات طلعن عيونج مطفيات من المكينه مال الخياطه
مرتضى : اي شكو بيها الشغل مو عيب على الاقل معتمده على نفسها مو مثل الي معتمد ويريد كلشي جاهز
ميسم : هسه اسكت انت ماكتيلي تقبلين تخيطين الي
غنى : هزيت راسي
فاطمه : يمعوده عليمن تخيطين عدها وانتي متعرفين شغلها شلونه اروح للمول اخذلي اربع دشاديش وافض السالفه عليمن تعبين نفسج
ميسم : اي والله كلامج صحيح اسفه غنى ما اريدج تخيطلي بطلت
غنى : ماكو داعي للاعتذار كمت من رخصتكم حتبدي المحاضره رحت بوجهي للحمامات اسمع صوت نرجس ورايه بس موكفت كله من وراها خلتنه نكعد ويه هالشله التعبانه هاي الف مره كتلها لتحرجيني وتكعديني وياهم بس شلون لازم تسم بدني بسوالفها .. دخلت للمغاسل ذبيت الملازم وفتحت المي اغسل اباوع لاديه يرجف اني بطبيعتي بس اصير عصبيه اديه يضلن يرجفن
نرجس : غنى والله اني اسفه ماادري بيهن راح يسخفن بالحجي وياج والله وراح تضوجين اسفه
غنى : باوعت بالمرايه بس شفت روحي بجيت شكد اني قويه كدام الكل بس اني ضعيفه وهشه من الداخل ... كلامهن ماضوجني بس القهرني هنه يحجن ويعلقن بكيفهن وهنه ميعرفن ضروفي شنو ولا اني شلون عايشه ... ليش هالتنمر لبسي واكلي وحياتي متخصهن اني حره مدام مماستهن ما من حقهن يدخلن بهالطريقه السخيفه والجارحه هاي
نرجس : من شفت دموعها كلبي انمرد غنى والله اسفه
غنى : مسحت دموعي نرجس رجاءاً بعد لاي تجمع ممسموحلج تاخذيني جبر ... تردين تكعدين وياهم بلغيني واني اعوفج وعود انتي روحي الله وياج
نرجس : حضنتها انعل ابوهن خلي يولن يروحلج فدوه امهات اللبخ وجهن مينعرف من المكياج ... والله بعد ما احاجيهن واله اخلي جعفر يرسبهن يمه نونايتي زعلت ام عيون الحلوه بجت خلي يطيرن اني ازعل نونايتي على حسابهن اسمط ابهاتهن غير
غنى : ابتسمت بهدوء يله امشينه نروح للقاعه ليجي الاستاذ
____________
بتول : واكفه اعدل روحي كدام المرايه مابقه شي ويجي فهد واني احب اطلع كدامه دائما بأبهى صوره حتى الفت نظره نزلت جوه اساعد البنات ... هلوو بنات تحبن اساعدجن بشي
اروى : باوعتلها لابسه تراك يريد يطك عليها بتول روحي نزعي هالتراك شنو هاي
بتول : ليش شبي يخبل
انغام : حبيبتي بتول اروى قصدها جسمج مبين واكو ولد بالبيت وكلهم يحلون عليج ميجوز يشوفوج هيج
بتول : شنو قصدج يعني اني مو بت هالبيت ومستثقله عليكم مو احجيها لتخجلين
اروى : اوي عيني اوي على كيفج شدعوه شكلتلج هي جاي تكلج لبسج ضيك روحي بدلي عيب اكو زلم بالبيت مامزوجين وحتى لو مزوجين ميجوز يشوفج بهالمنظر انتي غريبه عن اخواني فهد وعلي اصلا حتى حجاب لازم تلبسين منهم ... اباوعلها عافتنه وطلعت تركض عاد هاي كلش متحب الدراما وانوب واحد انطاها مجال ... رجعنه نكمل تحضير الغده اليوم كل الولد موجودين لان سبت ومعطلين وفهد بعد شويه ويجي من المعمل ... ماكو ربع ساعه واجتي سعاد تركض مااشوفها غير سحلت انغام ... يااا خاله شبيج
سعاد : ولج انتي تبجين بنت اختي وتعيريها لان يتيمه ولج بت الفكر موزين منه نفكناج وخذناج لابنه انوب جايه تتشيخين علينه بت الكلب
انغام : اااخ عمه هدي شعري والله ماسويتلها شي والله جذابه لا عيرتها ولاشي بس كتلها تراكج ضيك بدلي
سعاد : شديت على شعرها وانتي منو نعاليش انتي وتأمريها تلبس لو تنزع ماعليج بيها عسى ما تمشي عريانه بالبيت لتدخلين فتهمتيييي
ايمان : طبيت جريت البنيه من ايدها وخري ام فيصل صدك تحجين جنتج حامل شلون تضربيها هيج اذا ما خايفه عليها خافي على حفيدج
سعاد : والله انعل ابوها لابو حفيدي لتدخلين انتيي التهي بروحج احسلجججج
اروى : انتيي هيي مو جنج رحتي زايد امي شعليها كبيتي بوجها
سعاد : ضربتها على حلكها هييي بعينج ادبسززز كلبه خاف عبالج كبرتي اشعل الجابج والله
اروى : دوخري كافيي مشاكل جوزي منه لخاطر الله جزعتينه كل يوم مسويتلنه عرس كل ساعه متعاركتلج ويه واحد ادري شنو من بشر انتي متملين من المشاكل شهالجبروت العندج خافي الله يامره الي بكدج زايرين بيت الله ومكضين حياتهم عباده كافييي مو انتي وجهالج كرهتونه بأم العطله كمنه حتى منجمع من وراكم
ايمان : اباوع الولد اجو يركضون وكبت العيطه مثل كل يوم بين جهالي وسعاد وجهالها ياربي ما نخلص من هالمشاكل احنه وتالي يعني نكضي الحياة هيج بس مشاكل ... انوب منذر وكف ويه مرته وحجه على بتول كومي يسعاد صفكي راشدي وتفلي عليه كدام الكل ... شكد شايفه صلافه هيج ماشايفه انوب آلاء كتلت بتول وهم كبت العيطه نريد نجر آلاء من سعاد منكدر ... تالي فزينه على صوت فهد اباوعلهم كلهم سكتو
فهد : بعصبيه شهالصووووت العالييييي هذااا وين كاعديييين انتووو بشارررع ادبسززززيه متستحوووون صوتكم واصل لبيت جدي موعيب شيكولون علينه هسه وانتن عركجن وصياحن واصل لراس الشارع من الزمجن واركع راس براس هم واحد يكلي لييييش بنات ال... استغفر الله فهموني شكوووو عليمن هالهووووسه
اروى : كل ما بالموضوع بتول جانت لابسه ملابس ضيكه كلتلها انغام نزعيهن شو هاي مدري شراحت كلت لخاله سعاد واجتي هداده علينه وحتى ضربت منذر وهو رجال مزوج هايي عيشه هاااي شنو نكفررر نحجييي حجايه بهالبيت
فهد : باوعت لسعاد وتالي وياج مرت ابويه كل يوم مسويتلنه عرس
سعاد : هو انت تروح تروح وترجع عليه من عبنك حاقد دشوف الادبسزيات شمسويات بهاليتيمه المسكينه وشلون مستقويات عليها الله لا يوفقهن عساهن بالمرض
فهد : باوعت لبتول لابسه تراك صاير جيس عليها ... عيني ست بتول ليش لابسه تراك لو تنزعي استرلج والله
سعاد : انوب لحكتووو بت اختي المكروده على اللبس الله اكبر عليكم
فهد : على حسب علمي هي بت اختج وبت خاله ولدج اما احنه متقربلنه يعني غريبه والمفروض تحتشم بلبسها ما كاعده ويه بنات هي اربع زلم وياها بالبيت البس لبس مناسب حتى مااسمع حجايه واتجنب الحجي وبعدين انغام شكلتلها لبسج ضيك بدلي قابل فجرت عبوه براسها ... باوعت لامي وتكليلي ليش متبقه بالبيت هاي بقيت شصار هم سويتلوكم عرس
ايمان : صبيتله كلاص ماي هاك يمه انت ستوك جاي من الشغل عوف البيت يطبه طوب لتفرفح يمه
فهد : اخذت الكلاص منها شربت .... بهدوء انوب الي يتعارك اسويله ترحيل منا وداعه عافيتي فتهمتوو الي ميتحمل حجايه وحساس خلي يفاركنه احسن عفتهم وهسه يله حضرن الغده اروح ابدل واجي وخلي اسمع بوحده متعاركه بعد اباوعلهن صافنات صح ييييييييييييله
ايمان : اباوعلهن كامن يتراكضن خليت ايدي على حلكي خرب يومك فهد بس والله حيل بيهن مو مال احترام
اروى : خو ما تأذيتي
انغام : ولج شلعت شعري
ورده : شبيج واسحلها من شعرها هنه هالشعرايتين براسها اسلتهن واخلصها منهن
اروى : ههه دتعالن خلي نطلع لينزلنه فهد ويلعب الحزام على ظهورنه
________________
غنى : طلعت الخبز من التنور اليوم خوالي وخالاتي جايين يتغدون يمنه ... صحت بمروان ... ولك مروان حتنجوي لتوكف يم التنور
مروان : منتظر الحنونه
غنى : ابتسمت ولك عيب كبرت بعد صرت رجال شوف شواربك خطت وانت تدور حنونات
مروان : معليج بيه اني بعدني صغير واريد حنونه يله استعجلي جوعان
غنى : بست خده صار ... طلعت الوجبه الثانيه لان متكفي وجبه وحده همه هواي الله يحفظهم .... دخلت للمطبخ تعال مروان اخذت حنونتك بس دير بالك حاره
مروان : اخذتها شكرا نونه حبيبتي
غنى : عوافي ياعمر نونه ... فتحت الطباخ اشوف السمج يله مبقه شي ويستوي ... طلعت كعدت بالصاله
زكيه : يمه كملتي لو اكوم اساعدج
غنى : لا بيبي كملت ماعندي شي
سهاد : خاله ليش خبزتي جان جبتي من بره اسرع واحسن
غنى : لا خاله خبز البيت اطيب
كريمه (زوجه كامل) وانتي تخبزين كل يوم
غنى : لا مو كل يوم يعني بوقت فراغي اخبز كميه متوسطه نبقه بيها يومين لان احنه قليلين
وفاء : وانتي متخافين تنجوين لو يحترك وجهج
غنى : فتحت شعري لا ليش اخاف اشتغلي على كيفج ومتنجوين
خالد : والله خالي عاشت ايدج
نورس (زوجه خالد) سمعتي يمه بت عمتج تخبز مو مثل بعض الناس معتمده والاكل يجيها للغرفه
وفاء : والله ماما كل واحد والبيئه الي عايش بيها وبعدين غنى معدها احد فتنجبر تعتمد على نفسها اما اني ميحتاج اعتمد على نفسي وانتي وبابا تشمون الهوه
غنى : حزت بصدري حجايتها ااااه يا بابا لو عايش انت وماما جان عشت اسعد وحده بهالدنيا يكفي اشوفكم كدام عيوني
كمت اجيب السفره حتى نتغده ... هذوله اهل امي والي علاقتي بيهم اقل مايقال عنها سطحيه يجون بالسنه حسنه يشوفون بيبي ويبقون شويه ويرحون ... ماما عدها اخوان ثنين خالو كامل الجبير عنده ولد ثنين وخالو خالد عنده تلث بنات ثنين مزوجات وبقت وفاء وولد وخالاتي الجبيره سهاد عدها خمس بنات وكلهن متزوجات وباقيه بس هي وزوجها وانوب امي الله يرحمها وبعدها خالتي الصغيره سحر حبيبتي اموت عليها دارتنه اني ومروان مثل المي بالصينيه وكبرنه بحسها بس زوجها اجاا شغل بالاردن وراحت هي وبتها حوراء وعافتنه بس مع هذا مكطعت بينه ... طلعت السمج من الفرن خليتهن على الميز رحت ركض صبيت التمن الاحمر و طلعت الزلاطه والطرشي والبصل رحت بسرعه جبت السفره فرشتها وبديت انقل الاكل طبعا محد منهن زحمت نفسها وكالت خلي اساعدها كملت كلشي واجو يتغدون رحت جبت دوه بيبي ومروان حتى من يكملون ياخذو ااااه تعبت والله
فهد : نايم بغرفتي وافكر بحياتي والي صايره متخلو من المشاكل اروح لدوامي مشاكل وهوسه ارجع للبيت الكاهم مسوين عرس اشرد للملهى ارتاحلي كم ساعه وهم ارجع لنفس الاسطوانه تعبتني هالحياه ساعات افكر اهج من هالدنيا واخلص مااعرف شوكت اعيش لنفسي دومي شايل هم الكل وخال نفسي اخر شي .... اااخ يا يابه الحمل الي ذبيته عليه فوق طاقتي شكد ما احاول اكون صارم وقاسي تمر عليه فترات اتمنى ارجع بيها طفل والعب بالشارع لو ارجع انام بحضن امي اشكيلها الي بداخلي صرت اخاف من كل واحد بهالدنيا ماعندي ثقه وايمان بأي احد حتى صداقاتي صداقه عابره بداخلي شي عميق محد مكتشفه ولا راح يكتشفو .... اني طفل من الداخل احتاج كلمه حلوه احتاج واحد يسألني شبيك شمحتاج شنو الي متعبك انت شنو الي تريده مرتاح اليوم اكلت نمت تنهدت بصوت عالي اااه يالنوم الي صاير للكل سكينة روح اله الي كوابيس ورعب صار 13 سنه من يوم الي طلعت من بيت اهلي واني هالكوابيس ملاحكتني كل يوم اشوف نفسي محبوس بالمخزن والحزام وقايش المبرده والصونده يلعبن على جسمي والمشكله اكعد الكه جسمي كله يون عليه مع انو هو حلم بس الالام نفسها ... ليش يابه سويت بيه هيج دمرتني ومحيت كل ذره احساس بيه .... سمعت الباب يندك صحت تفضل ... اباوع دخلت زينه بت فيصل عمرها ثمن سنوات ... هاا عمو تردين شي
زينه : عمو صيح باحمد ميخليني اكعد يمه واخاف اروح اكل لبابا ويبسطني
فهد : كليله يكول عمي فهد اثكل وتأدب وكعدني يمك لا اجي اطيح حظك يله امشي روحي كعدي وياه واذا كلج لا تعاليلي حتى اسلك ابو
زينه : صار عمو هسه اكله شكرا عمو
فهد : عفوا حبيبتي .... فيصل عنده ولد وبنيه احمد عمره دعش سنه وزينه عمرها ثمانيه رغم اني اكرهه فيصل بس ماعندي حقد على جهاله بالعكس احبهم ... ستوني مغمض عيوني واندكت الباب والله دنعل ابوكم يابو الي جابكم .... منوو
ايمان : اني طبيت كعدت يمه
فهد : هاا يمه اكو شي
ايمان : بحده يعني اطلع
فهد : كعدت لا العفو يمه تفضلي رايده شي
ايمان : اي
فهد : شنو هو
ايمان : شوكت تتزوج
فهد : شنو يمه حلمانه اليوم شجاب هالموضوع على بالج مو سدينا
ايمان : ولك يمه صرت جبير شوكت تزوج الي بكدك هسه جهالهم بالمدرسه
فهد : اني مو كتلج حالياً شايل فكرة الزواج من بالي
ايمان : بس فهمني انت ليش رافض فكرة الزواج مو حتى ولد عمك واصدقاء طفولتك تزوجو وبنو اسره الا انت باقي اعزب شوكت تفكر تكون عائله ماتريد تصير اب ماتريد مره شليت كلبي فهيدان
فهد : يمه اني مو رافض فكره الزواج بس هسه مااريد ازوج مااحس نفسي مستعد التزم بمره وبيت عود من اشوف وحده تنطبق عليها المواصفات المطلوبه واحس نفسي جاهز اخطي هيج خطوه ماراح اتردد واتزوج
ايمان : وشنيه المواصفات الي ابالك يبعد كلبي
فهد : تنهدت ... اريدها رزنه وبسيطه ، محبوبه تحبني لشخصي تحب روح فهد متهتم لفلوسي او سلطتي او خبرتي او اي شي بيه غير شخصي ، اريد احس كياني يهتز من المح عيونها بحيث احسها مغناطيس تجذبني الها لو وين مااروح ، اريدها قبل ما تكون مرتي تكون صديقه مقربه الي الجئ الها بكلشي بحيث اصير كتاب مفتوح كبالها ، اريد احس بسعاده لمجرد تفكيري انو هي موجوده بحياتي اريد اتلهف برجعتي للبيت بس حتى انام بحضنها
ايمان : خاله ايدي على خدي واسمعه وبعد
فهد : اريدها جريئه وياي مااحب الخجولات اريد تحسسني برجولتي وتبهرني بافكارها اعتقد فهمتي قصدي مو ، اريدها مؤدبه وما ماره بولا علاقه قبلي اريد اكون اني اول رجال بحياتها اريدها مثقفه و واعيه تعرف تصرف ، بعيده كل البعد عن المشاكل والقال والقلت اهم شي عدها اني وهي وطز بالناس
ايمان : وشكلها شعجب ما مدقق بي فاجئتني
فهد : ابتسمت لا طبعا مدقق بي ، اريدها جميله شكلها جذاب سمار خفيف بمعاني حاده ، نظيفه جدا ، مهتمه بنفسها الى ابعد درجه ، انيقه و مغريه جدا بحيث تسحرني بجمال جسمها وشكلها ،تحسيني انو اني فعلا رجال بوجودها
ايمان : وانت هاي وين تلكاها امي بطل تدقق على حسب كلامك انت حتى اظفر رجلها تريده بشكل معين ... صدكني ماراح تلكه هيج وحده مادام انت راسمها ابالك من ناحيه الشكل والشخصيه تريدها فت وين الكالك وحده هيج اني
فهد : ضحكت وانتي كل عقلج اخذتي كلامي بعين الاعتبار وتردين تدوريلي على وحده هيج ... ريحي راسج يمه اني ما اخليج تخطبيلي وحده اذا ما اتاكد منها مليون بالميه جايه على مرامي ومثل مااريد
ايمان : واذا ما لكيت هيج وحده شتسوي
فهد : شسوي يعني اضل منتظر ماعندي شي شيريد يصير اموت واني ما مزوج طز افضل ابقه اعزب طول عمري ولا اخذ وحده تعيشني بتعاسه فوك الي اني عايشها هسه
ايمان : زين شنو رايك ببتول بيها المواصفات الي انت تريدها ... سمره وحلوه نظيفه ومعتينه بروحها وتدلع ودارسه مو هاي المواصفات الي ابالك
فهد : بهدوء انتي سمعتي اني شكلت كتلج اريدها مؤدبه وبتول هي والادب ماكو ذره صله بينهن
ايمان : حرام يمه مايجوز تحجي باخلاق البنيه وانت ماتعرفها شنو هي عندك خوات لتطعن باعراض العالم
فهد : يمه خليني ساكت البنيه الي تمشي كدام زلم غربه عنها بتراك برموده يريد يطك عليها ومبين اكثر ما ساتر لا وتسوي حركات سخيفه كدام الكل حتى تلفت النظر ... هاي تسمه مؤدبه انتي جاوبيني
ايمان : يمه بعدها صغيره وطايشه
فهد : يا طايشه يمه بكد اروى هي لعد متصير اروى مثلها ... هاي تربيه سعاد اكيد تطلع طايح حظها وخلي اكلج شغله خليها ابالج ... اني عندي رقم واحد الاخلاق طز بكلشي اهم شي الاخلاق والشخصيه صحيح الشكل مطلوب وبشده بس ميجي كدام الادب صدكيني لو الكه حوريه وكلشي اشتهي بيها وتطلع اخلاقها مو شي ادوسها ب الي لابسه برجلي واعبر
ايمان : اشوفك راح توكع وكعه تكسرلك هالخشم العالي مالتك ... ضل تشرط تشرط تالي تاخذلك وحده الله العالم بحالها ... كمت على العموم اني جنت جاييتك وكلي امل تكلي يمه خلص اريد ازوج اريدلي مره بس بعد ما سمعت شروطك التعجيزيه غسلت ايدي منك ... عفته وطلعت
غنى : كاعده بالحديقه مال الجامعه والي صارت ملجئ الي اليوم نرجس ممداومه ... احس اكو جبل نايم على صدري صار اسبوعين مروان ماله خلك ونحلان واني كلبي ممرود عليه اريد اخذه للدكتور بس معندي ولا فلس جنطتي مبيها غير عشر تالاف وهسه حايره من جهه خايفه على مروان ومن جهه معندي فلوس اخذه للدكتور ياربي ضاكت بيه الدنيا ومعندي غيرك الجئ اله اااه يعني لو عندي فلوس مو جان سفرت مروان بره وسويتله العمليه وارتاح كلبي هنا اله يعبر ال18 ميقبلون يخاطرون .... طلعت موبايلي اباوع اليوم عشرين بالشهر شيجيب نهايه الشهر واستلم راتب ابويه واخذ مروان للدكتور
مرتضى : هلوو غنى شلونج
غنى : رفعت راسي هلو مرتضى الحمدلله
مرتضى : خير شو كاعده وحدج
غنى : نرجس مجايه اليوم
مرتضى : هاا عادي اكعد يمج
غنى : اعتذر اني كاعده وحدي زحمه تكعد وياي مااريد اسمع حجايه
مرتضى : بس احجي وياج والله وبعدين احنه نفس القسم اكيد محد راح يحجي على العموم اني راح اضل واكف واحجي حتى ما اسببلج احراج
غنى : تفضل اسمعك
مرتضى : احم غنى انتي صارلج تلث سنوات ويايه واكيد ملاحظه اني .. يعني شلون اوصلها الج
غنى : بهدوء مفهمت تكدر تحجي على كيفك
مرتضى : غنى اني جدا معجب بيج وصار فتره احاول اوصلج اعجابي بس من اوصل يمج لساني يعجز واضل اخرس ... صدكيني غنى اني احبج ورايدج بالحلال مالي اي نيه موزينه وياج واتمنى تنطيني فرصه وتخلينه نتعرف على بعض واني اوعدج وره التخرج اتقدملج رسمي
غنى : صفت بوجهه مااعرف شكله متوقعته يتجرئ يحجي هيج بوجهي ... ماطلعت مني غير كلمه هاا ؟
مرتضى : غنى رجاءاً حاولي تنطيني فرصه صدكيني ما راح تتندمين واني كد حجايتي
غنى : اعتذر مرتضى اني ممفكره بالارتباط او الحب او اي حالياً اني جايه هنا حتى ادرس مو حتى اسوي علاقات واحب وانحب
مرتضى : الحب مو عيب ولا غلط هاي كل الطلاب يحبون انتي ليش هيج مصعبه الموضوع
غنى : رجاءاً مرتضى لتضغط عليه كتلك اني هالموضوع بعيده كل البعد عنه اني جايه هنا حتى ادرس واكون لنفسي كيان مستقل وبعدها عود ممكن افكر انو ارتبط ... اعتذر اني ما انسابك عفته واجيت اروح
مرتضى : بس فهميني انتي ليش رفضتي شنو المشكله بيه لو ابالج احد
غنى : شنو الحجي هذا مرتضى اكيد المشكله مو بيك بس اني كتلك رافضه موضوع العلاقات والحب رفض قطعي وحتى لو كان اكو شخص بحياتي جان كلت مخايفه من احد
مرتضى : لتفهميني غلط مو قصدي شي بس عبالي اكو شخص بحياتج او انتي رافضتني الي بالذات
غنى : ارجع واكلك المشكله مو بيك ولا بأي احد المشكله اني رافضه هالاشياء ومااتقبلها من رخصتك عفته ومشيت ياربي ابعد عني هالسوالف الي بيه مكفيني
__________________
فهد : كاعد بمكتبي وكبالي الملف صافن بي ... هالايام منتشره عصابات ببغداد يخطفون الجهال لو يبوكون البيوت وطبعا يرحون على اساس همه مجاديه وبحجه يردون فلوس يجرولهم طفل لو يطبون يكتلون الي بالبيت وياخذون فلوس والمشكله مو هنا المشكله منعرف وين اراضيهم كلبنه بغداد عليهم وهمه ماكو فص ملح وذاب ... يا إلهي شهالنفوس المريضه هاي الي عايشه بمجتمعنه معقوله الفلوس تخلي الانسان ينزل لهالمستوى الحقير والدنيئ ... اوف والله لو الزمهم اله اسويلهم عاهه ميطيبون منها لو يموتون ... هسه كمنه منعرف نفرق بين الفقير صدك والمحتاج وبين الي يجذب واله غير نيه .... سمعت صوت صياح كمت طلعت من المكتب هذا ياحيوان هيج معلي صوته ... اباوع جايبين مجموعه مال شباب ... شكو
الشرطي : سيدي ذوله متعاركين بالجامعه ومسوين هوسه وجابوهم الامن لهنا لان ماكدرو يسيطرون عليهم
فهد : جيبهم وتعال ... رجعت للمكتب اباوع طبو همه ووياهم واحد كلب الدنيا بالصياح .... صوتتتتتتتتك لللللللك وين كااعد انت
شرطي : سيدي خبصنه ماسكت من جبناهم لهنا ولسه
فهد : احترمو نفسكم واوكفو عدل يييييله ... اباوعلهم وكفو صف واحد ... سولفلولي عليمن هالعركه متستحون هذا شكل طلاب هذا
.. سيدي صديقي كلشي ما سوه اجه الولد من وكت و صف سيارته بمكان قريب ميدري هذا الولد دائما يصف سيارته بهذا المكان .... ومن اجه الولد تهجم عليه غلط وصياح واكيد صديقي من شافه يتأمر ويجاوز عاند وماقبل يطلع السياره وكبت العركه والهوسه انوب هذا راح جاب جماعته وكسرولك الولد تكسر نريد نجرهم عنه منكدر ... اصلا على اي اساس يضربو بهالطريقه وين عايشين احنه روح سيادتك شوف الولد شلون مدمه بالمستشفى واذا تريد اسأل الطلاب الي جايين ويانه
.. احنه ما تعدينه عليه هو الي تجاوز لتضل تجذب سوالف الفكور هاي بطلوها عود تسوولكم سالفه حتى تطلعون بجم فلس لك بطلوو جداوه ياريت لو سياراتكم تسوه همزين مطعطعات ومااشتريهن لو ببلاش
فهد : سألت كل الشباب الي جايين وكلها اعترفت عليه
... بصيياح ليش تجذبون بس بسيطه اني اعلمكم سفللللله
فهد : اولا الشارع مو شارع ابوك ولا حتى الجامعه راجعه لسياده الوالد حتى تامر بكيفك على الطلاب فتهمت وثانيا اعتدائك على هذا الطالب راح يخليك تتندم على عدد شعر راسك وهسه تشوف
.. مو هيج بس اني الكل يعرفني بالجامعه ابن منو اني ام...
فهد : قاطعته اسمع ولك هاي السوالف مال المسلسلات بطلوهن عود انت الجنتل مان والمسيطر بالجامعه وعود كلشي يمشي بأمرك ... احترم نفسك واثكل شويه وهاي اللطلطله بطلها تره البنات ماراح يصيرن جوه رجلك اذا شافنك هيج تسوي ولا الشباب راح يحترموك اذا شافوك تتعامل بهالاسلوب .... وبالنسبه لموضوعكم طلع من ايدي صار بأيد الطالب الي ضربتو اذا تنازل تطلعون ما تنازل تنحجزون وبما انو الولد بالمستشفى هسه راح نفتح محظر و تنحجزون لحد ما يكعد وعود تفاهمو وياه وهو يقرر يتنازل لو لا
... على اي اساس تحجزني
فهد : حضرتك مدمي الولد وهو هسه بالمستشفى وامرك كله بايده مو بأيدي قبل يتنازل اطلعك ماقبل هاي بعد تبقه بالحجز ... يله اخذهم واذا سمعت بيك مسويلك هرجه اجي اعيد تربيتك فتهمت ... يله شوف شغلك ... اباوعلهم طلعو ويه الشرطي رجعت كعدت ... شلون اشكال والله حرام يتسمون زلم واحدهم محفحف ولابسلي بنطرون خارط ومطلعلي جسمه استغفر الله اشكالهم تجيب الشبه
الشرطي : سيدي تره هذا الولد ابن المقدم ((.....)) وانت هسه حجزته
فهد : واذا ابن المنعل شسويله اطكله تحيه يعني مادام ابنه غلطان ياكل تبن ويسكت اصلا لو اني بمكانه اعيد تربيته مو افزعله .... يله اطلع
الشرطي : حاضر سيدي
فهد : يلعن ابو اشكالكم جماله ابو مقدم وهو صوته انعم من صوت الكح....
___________________
غنى : واكفه اسوي حلاوه حليب لان مروان يحبها واني وعدته اذا ختم نص القران اسويها اله
مروان : نونه نونه
غنى : هاا حبيبي
مروان : خلي اطلع العب ويه اولاد الجوارين طوبه حبابه والله ضايج
غنى : لا ماكو طلعه
مروان : نونه حبابه انتي مو وعدتيني اذا خلصت امتحانات راح تخليني براحتي هاي اني صارلي اسبوع مخلص امتحانات تره صرت جبير راح اروح للثالث متوسط وانتي متخليني العب واختلط ويه الولد
غنى : غير اخاف عليك ياحبيبي قابل اني شأريد منك بس انت تتعب بسرعه يعمري واني اموت لو شفتك تعبان
مروان : حضنتها لتخافين عليه اني صرت رجال شوفي صرت بطولج
غنى : نصيت النار وحضنته اروح فدوه للرجال ... بوست خدوده يله روح العب وياهم بس مو تتاخر نص ساعه واصيحلك تدخل ماشي
مروان : يييييس شكرا نونه
غنى : ابتسمت ورجعت اكمل الحلاوه
زكيه : ولج بيبي لتضغطين عليه كافيي حابسه على نفسه للطفل خلي يطلع يتعلم يختلط هو ولد مو بنيه هو
غنى : بيبي شسوي تدرين بوضعه شنو خاصه هالايام ماادري شبي هذا الدرج اذا يصعدنه يتعب ويوكع وهالتشوفين ولا فلس عندي حتى اخذه للدكتور وحتى فلوس الي اخذهن من الخياطه قبل فتره تسوكت للبيت بيهم
زكيه : والله يا بيبي خابرت خوالج وشرحتلهم الحال بس كلهم كلولي ماعدنه شسوي بهالحاله اني شوفيلج واحد عرف يداينج
غنى : تنهدت اذا ردت اتداين من احد قابل شكد حيدايني وهو بس الدوه مالته 200 الف هاي من غير الكشفيه مال الدكتور والفحوصات والهوسه ... يعني من يدايني هيج مبلغ يابيبي ... متشوفيني منتظره هالتلث تيام يخلصن حتى اجيب الراتب واخذه للدكتور بأسرع وقت
زكيه : ان شاء الله خير لتخافين يمه توكلي على الله
غنى : والنعم بالله
______________________
فهد : رجعت للبيت دخلت لكيت البنات كاعدات
البنات : الله يساعدك
فهد : ويساعدجن شو صنته وينهم
اروى : بيت جدي الحجيه متخربطه راحو كلهم هناك واني بقيت منتظرتك خاف تجي ومتلكه احد
فهد : دكومي حطي شي على راسج وتعاي ورايه بسرررعه ... رحت بسرعه لبيت جدي اني حييل متعلق بالحجيه احبها كلش من بعد معزه امي تجي هي ... دفعت الباب ودخلت لكيتهم ملتمين عليها خير شبيها
حارث : والله مندري جانت كلشي مابيها بس داخت على ساعه
فهد : كومي اخذج للمستشفى يله
ياسمين : لا يمه كلشي مابيه هسه شويه واصير زينه هاي لان صايمه هيج
فهد : صدك تحجين انتي عندج سكر ولازم تاخذين ادويتج بانتظام ... كومن لبسنها خلي اخذها للمستشفى
مروه : فهد والله متقبل صار ساعه اتوسل بيها
ملك : اي والله حتى كوه فطرناها
فهد : دكومي حجيه وانتي يمه تعالي ويانه ... كامن لبسنها واني اخذتها ورحت للمستشفى اشوف شبيها
_____________
غنى : كاعده اقره واسمع هبد على الباب كمت بسرعه فتحت الباب طلع ولد كبالي بس يبجي ... باستغراب منو انت
... بدموع يبنيه جنه نلعب واخوج وكع بالكاع نكعد بي ميكعد منعرف شبي حبابه تعاي شوفي
غنى : شنووو
*********************************
- يتبع الفصل التالي اضغط على (ذنوب على قيد الغفران) اسم الرواية