رواية سر بين السطور الفصل التاسع و الاربعون 49 - بقلم ريو الطائي

 

(واصبر على ما يقولون واهجرهم هجراً جميلاً)

........... 

نيران....... 

ما خلّيت شي ما كسرته حسّيت روحي راح تطلع رحت أركض لغرفة النوم وكسّرتها كلها شيل وشمر كلشي صار فوضى آخر شي شفت الكريكوت مال إلياس قربت علي ودفّرته برجلي صرت أملخ بكلشي كدامي وعيوني نار

كعدت بنص الغرفة وبجيت بصوت عالي 

:  ليش ليش هيچ سويت بيّه ليش كسرتني شنو سويتلك؟ ماجنت أستاهل تعاقبني بهالطريقة

فجأة حسّيت باب البيت ينفتح مسحت دموعي بسرعة وطلعت من الغرفة شفته واكف يم الباب شايل إلياس بإيده وعيونه على الصالة المكسّرة وعلى كلشي

رفع راسه باوعلي وعلى حالتي وسأل ببرود

:: نيران شكو شنو صاير هنا

صرخت بوجهه 

نيران: إنتَه ما تخاف من الله هيچ تسوي بيّه شنو سويتلك ليش خدعتني ليشششش

صفن عليه وكال 

:: شنو سويت 

نيران: كافي جذب أني عرفت كلشي كلشي ليش هيچ خدعتني ليش جذبت عليه إنتَ واحد جبان وحقير الله ياخذك

عيونه نطت،صاح على وحده من المساعدات 

أجت ركض نطاها إلياس وكال

:: نزلي جوه

أخذته وركضت جوه وهو سد الباب تقدّم عليه كال بعصبية

:: عيدي شنو گلتِ

دفعته من صدره وصرخت

نيران: هسه تطلّگني يا صخر مستحيل أبقى وياك بعد

ظل يباوعلي ساكت ضحكت بقهرة وگلت

نيران: هسه حققت كلشي تريده تزوجتني غصب وجبت طفل مني غصب وفرغت شهواتك  إنت شهواني ومريض... 

ما كملت كلامي رفع إيده وضربني راشدي بكل قوته وكعت على الأرض باوعتله وعيوني مفتوحه مصدومه جسمي رتجف بدون تفاهم، سحبني من شعري، وكال من بين سنونه

 

:: گلت بيوم مهما سويت مستحيل أمد إيدي عليها بس لهنا كافي تحملتچ هواي 

صرخت وأني أحاول أبعده

نيران: وخر عني عوفني منو إنت حتى تضربني ثقيت بيك صخر وبالأخير تطلع مزوّج وعندك ولد ليش ما گلتلي حيوان عندك شنو

وكف لحظة مصدوم وكال

:: شنو جاي تحچين

دفعته وعيوني تدمع صوتي يرتجف

نيران: لا تسوي نفسك ما تعرف أني عرفت كلشي ليش سويت بيّه هيچ جنت تكدر تحچي تكلي الحقيقة بس إنتَ فضّلت تستغفلني كل هاي السنين

:: منو جان يمج

دفعته بقوة وگلت

نيران: هاذه الهامك إحچي صخر إذا إنت مزوّج وعندك طفل ليش تزوجتني ليش دمّرت حياتي فوگ دمارها

سحبني للغرفة وگمت أدفعه بيدي بس ما اهتم. شاف الغرفة شلون مگلوبه باوعلي وكال

:: خلي أفهمچ نيران وأحچي لج كلشي

دفعته عني واني الشرار يطاير من عيوني شفت گزّازة عالأرض شلتها بسرعة وردت أضربه بيها  بس لزم إيدي ولوّاها ورا ظهري وشمرها وكال

:: كافي خلينا نحچي مثل البشر شبيچ تخبلتي

نيران: وخر عني صخر أكرهك تعرف شنو يعني أكرهك

ما أريد أسمع منك ولا كلمة وهسه تطلكني

ما رد تركني وراح وگف يم الشباچ وكال ببرود

:: هدي هسه وبعدين نحچي وأفهمچ كلشي

من شفته هيچ يحچي ببرود، لو تخبلت جنت أريد أستفزه بأي شي وخلي يعصب ويحجيلي كلشي بس ما جنت أعرف إنّه راح يكلّفني هواي

رجعت  كلت واني أمسح دموعي

نيران: قبل سألتني إذا أحب علي لو لا إي أحبه ومستحيل يجي يوم وأنساه ولو يرجع الزمن بيه شرد منك وأتزوجه جاي تفهم شنو أحچي أني أكرهك وحبه يسوى راسك يا حقير

دار وجهه باوعلي وبدون تفاهم إجه وضربني براشدي

بكل قوته وكعت على حافة الجرباية وحسيت بدوخة قوية

رجع سحبني من شعري وضربني راشدي مرة ثانيه قوه من القبله وكال

:: تحبينه مو يسوّه راسي 

        

          

                

ما گدرت أحچي بس دموعي نزلت وشهگتي تطلع بوجع سحبني من شعري وشمرني على الجرباية وهو عروگة ناطّة من العصبية وگال

:: بعدج تحجين بي بعد كلشي سواه بيج  ومتندمة لأن ماشردتي وتزوجتي متندمة لأن بقيتي وياي مو

ما حجيت بس دموعي نزلت بغصة ما أعرف شنو جاي يصير وليش هيچ حجيت أول مرة أخاف منه لهالدرجة

تقدم عليه ولزم فكي بقوة وكال

:: احچي نيران كمّلي كلامج طلّعي كلشي بكلبج لا تسكتين

نيران: وخر عني صخر الله ياخذك

ضحك باستهزاء وكال

:: على هاي سوالفج نيران خليتيني ما انحسب على الزلم كدامي وتحجين بصوت عالي تحبين واحد غيري كومي وشدّيلي گرون والله أحسن

ما حجيت بس گعدت أبچي بصوت عالي وهوه تخبّل فوگ ما غرفه كسرته رجع يكسر بيها عيونه ناطّه من العصبية

خفت يرجع وضربني ندمت لأني حجيت وياه بهالشكل

رجع باوعلي وعاط بصوت عالي

:: اششش لا تبچين اسكتييي

هزّيت راسي بسرعة وهوه إجه عندي لزم إيدي ودفعني على ظهري شمر قميصه على الأرض ونام عليه وأني حاول أدفع بي وأعيط بصوت عالي

نيران: وخر  لا صخر لا تسوي هيچ جاي أكرهك أكثر 

ضربني وسحبني من شعري وكال

:: أني أريدج تكرهيني

حاولت أرجع أدفعه أو أسوي أي شي بس ماكو فايدة حسّيت روحي راح تطلع من جسمي..... 

ابتعد بعد فترة دفعني عنه بقوة وكام من مكانه وراح للحمّام لمّيت الشرشف عليه  ودموعي تنزل 

كمت من مكاني واني لافه الشرشف رحت خذت ملابسي وطلعت للحمام البره دخلت وسديت الباب

كعدت جوه الماي ودموعي تنزل بغصة 

ماعرف الصوج بيه لو بي يمكن تصرفاتي غلط يمكن من الغيرة أو من العصبية هيج سويت أدري غلطت ومجان لأزم كول أسم علي كدامه ماعرف بشنو جنت أفكر

سديت الماي لبست وطلعت كعدت على الكرويته بالصالة ودموعي بعدهن ينزلن بهدوء لمّيت رجليه على صدري فجأة نفتح الباب ودخل الأكبر ماحسّيت بي  من طلع شفته شايل إلياس بإيده ويبوس بي 

تذكرت ابنه  تذكرت ضحكته وياه

        

          

                

إجه عليه وكال بحده

:: كومي رضّعي وغيّري ملابسه

ما رديت ولا حتى تحركت عتني من زندي وكال بصوت أعلى

:: شنو جاي أحچي؟ يلّا كومي

عيوني امتلين دموع ما متعودة أبد يعاملني بهالشكل

گلت بصوت مكسور

نيران: ما أعرف أغيرله

:: تعلّمي مو صغيرة صرتي بگد الزمال

ما گدرت أرد تركني ودخل الغرفة بعدني حتى ما أخذت نفس سمعت صوته يعّيط عليه

كمت بسرعة دخلت وراه للغرفة شفته مخلي على الجرباية باوعلي وكال

:: نزلي جوه جيبي غراضه من غرفة العاملة

سكتت نزلت خذت الغراض وصعدت

دخلت للغرفة شفته گاعد يباوع بالفراغ

من شافني مسح على وجهه

گلت بهدوء

نيران: هاي غراضه

أخذهن مني وبلش يغيّر ملابسه لبّسه شورت بدون بلوزة

گلت 

نيران: باردة ترى ليش ما لبسته شي

رد بحدّة وهو ما يباوعلي

::  مالازم يلبس شي ثگيل لو إنتِ صدگ أم چان عرفتي من وحدچ

ما رديت سحبني من إيدي وكعدني يمه وكال

:: يلّا خذي ورضّعي

همست وأني أبعد وجهي عنه

نيران: لا ما أريد خلّي يرضع حليب بالممه

:: وصله وياچ لهنا نيران حتى صوتچ ما طايق أسمعه

خذي ورضّعي لا والله لزمچ وسحل البيت كله بيچ سمعتيي

آخر كلمة كالها بصوت عالي وخلى إلياس بحضني وعدّل ملابسي وخلاه يرضع وهو بسرعة ستقبله لأنه يمكن جوعان

بس حسّيت كأن مخليّة نار بين إيديه مو طفل باوعت على الأكبر شفته يباوع عليه وعاگد حواجبه حسّيت إن بأي لحظة راح يضربني

دنّكت راسي وگلت بغصّة

نيران: عليك الله خذه والله مجاي أتحمل جسمي جاي يحرگي

:: اشش نيران اشش بس تنزلي من حضنج وهو مو شبعان أطلع روحج بإيدي

        

          

                

دنّكت راسي ورجعت أبچي حاسّة أريد شمره علي وشرد بس خفت منه لأنه مبين يريد يضربني

ما تحمّلت أبقى أكثر حسّيت بنفسي راح أتقيأ وخرّته عني بسرعة سحبت البلوزة مالتي ودخلت الحمام وتقيّأت حسّيت روحي راح تطلع

غسلت وجهي وطلعت من الحمّام شفته مخلي بالكريكوت مالته صحيح دفرته أني بس ما انكسر كلشي ما بي شفته غطّاه وباسه من خدّه رجع رفع راسه وباوعلي إجه عليه وگال

:: ليش هيچ رميتي من حضنج

نيران:  ما أگدر أكون قريبة منه ليش مجاي تفهم عليه حسّيت نفسي راح أموت

عصر زندي بقوة وكال

:: طِبچ مرض همّ شي عندي إبني نيران يمكن انتي مافرحانه لأن ألياس من عندي لو من غير واحد چان حبيتي مو

ما حجيت شي عصر زندي مرّة ثانية بقوة دفّعني وراح تمدد على الجرباية

وخلى إيده على عيونه ونام ما سويت شي رحت وتمددت على الجهة الثانية وغطّيت وجهي وبقَت بس دموعي تنزل بهدوء ما أعرف بعدها شوكت نمت

كعدت ورا فترة على صوت بجي إلياس فتحت عيوني شفت الأكبر شايله ويحاول يسكته

رجعت غطّيت راسي مو طايقة أسمع صوت البچي مالته

غمضت عيوني بقوة وسديت أذاني بإيديا ورجعت نمت

كعدت الصبح جان البيت هدوء ماكو لا إلياس ولا الأكبر.

گمت من مكاني ورحت للحمّام غسلت وجهي ولمّيت شعري وطلعت

رحت للمطبخ سويت ريوك وكعدت أتريك

كلت شويّة ما جان إلي نفس آكل ذبّيت نفس وخليت راسي على الطاولة

حسّيت الباب نفتح درت وجهي شفته ملاك

أجت وكعدت مقابلي وكالت

ملاك: صباح الخير

رديت عليها بهدوء ونزلت عيوني عنها رجعت كالت

ملاك: شبيج نيران صاير شي الأكبر هم مو على بعضه جان معصب من طلع من البيت

باوعت إلها وعيوني تدمع اخذت نفس وحجيتلها كلشي صار وهي فاتحة عيونها ومصدومة

كملت كلامي وذبّيت نفس بقهر وهي كالت

ملاك: مجاي صدك بكلام ليلى ومع  كلشي صار نيران بس ما يصير هيچ تحجين كدامه يبقى زوجچ وحرام تذكرين اسم شخص ثاني بحضوره جان لازم تكعدون وتتفاهمون

        

          

                

ما حجيت شي وهي نزلت نظراتها على ركبتي ورجعت تباوعلي

ملاك: ما أتوقع كلام ليلى صحيح الأكبر يحبچ وما أتوقع يكون مزوّج قبلچ أريد افهم انتي شلون تصدكين بيها بعد كلشي سوته بيج قبل

نيران:  لو ما مزوّج جان يگدر يحچي يگول بس ما حچى

ملاك أخلص آني أخذت قراري مستحيل أبقى وياه ماكو حل كدامنا غير الطلاك

ملاك: شنو جاي تحچين إنتي تخبلتي هسه صار بينكم طفل إنتي تگدرين تعوفي وتروحين ونفترض تطلّگتو ترى الأكبر مستحيل ينطيچ إلياس

نيران: خلي عنده آني ما أريده أصلًا

بقت تباوعلي وهي ساكتة حسّيتها مصدومة من كلامي رجعت كالت

ملاك: أول مرة أشوف أم ما تحب طفلها

ما حجيت شي كامت هي من مكانها واني كلت

نيران: وين رايحة ابقي يمي

ملاك: لا ما أگدر أخاف يكعد إلياس خليته نايم بغرفتي

نيران: الأكبر خلاه يمچ

ملاك:  إي نطانيّاه وراح للدوام هو وماجد

هزّيت راسي وهي راحت أجت العاملة وبدت تنظف بالبيت الي صاير عبارة عن دمار

كمت ودخلت للغرفة رحت تمددت على الجرباية وصفنت بالفراغ يا ترى صدگ كلام ليلى الأكبر مزوّج بس إذا صدگ مزوّج وين مرته وين مخلي ابنه كل هاي الفترة أو السنين؟ حسّيت عقلي راح يوقف من كثر التفكير

مر وقت طويل وحسّيت الباب نفتح درت وجهي شفته الأكبر جان يحچي بالجهاز ومن خلال كلامه عرفت إنه جاي يحچي ويا وهب شوي وسدّه باوعلي وكال

:: وين إلياس

نيران: شسمه مو انتِ مخلي يم ملاك

::  وإذا خليته يمها ما تروحين وتجيبي شنو من عقل عندچ إنتِ

ما حجيت شي عتني بقوة من إيدي وكومني لف شعري على إيده وكال بحدّة

:: روحي جيبي وانتبهِي علي بس أشوف نازلت دموعه أطلع روحچ بإيدي

نيران: وخّر إيدك تره مو عبده عندك فوكك غلطك إنت تحچي ومعصب

        

          

                

:: بشنو غلطت؟ فهميني ذكرت اسم وحدة ثانية كدامچ؟ لو گتّلچ ما أريدچ؟ لو گلت أريد أطلكچ أحجيييي

دفعت إيده عني وكلت

نيران: لا ما سويت هيچ  بس طلعت مزوّج قبلي وعندك طفل وأني طول هاي السنين ما أعرف إنت شنو من بشر؟ لو مو ليلى چان لهسه ما أعرف

مسح وجهه بعصبية وكال

:: حلو ليلى كالتلچ هالكلام مو

هزّيت راسي والدموع ترسَت عيوني أخذ الجهاز مالته ودزّ رسالة، ما عرفت لمّن بقينا ساكتين ثواني وانفتح الباب ودخلت ليلى كَال الأكبر

::  تعالي ليلى

إجت وكالت وهي متعجبة

ليلى: اها الأكبر شنو تريد مني

ما حچى بس سحب الجهاز من إيدها وفتحه وما أدري شلون عرف الرمز دار الجهاز وگال بحدّة

:: منو هذا ليلى تعرفينه

كالت وهي مستغربة

ليلى:  أكيد هذا مقتبس ليش

سأله بهدوء بس عيونه عليه رجع باوعله 

::  حلو ابن منو هوه

كالت بثقة

ليلى: ابن صديقك عماد بس ما فهمت شبي صاير شي

دار وجهه إلي وباوعلي بنظرة خلّت جسمي يرجف. رحت عتّيت ليلى عتة قوي من إيدها وگلت

نيران: ليششش تجذبين مو انتييي گلتِيي هذا ابن الأكبر ليش تجذبييين ليلى

دفعت إيدي عنها وكالت وهي مسوية نفسها مستغربة

ليلى: شنو جاي تحجين شوكت حجيت وياج أني ليش

نيران:  لا لا أكيد انتي تخبلتي ليش جاي تجذبيين منو كال الأكبر عنده طفل منو شوفني الصور وكلشي

الأكبر باوع إلها وهي بسرعة كالت

ليلى: إي صحيح شوفتج بس گتلج هذا ابن عماد صديق الأكبر ليش جاي تگلّبين الحچي إنت جاي تتهمني بشي ما مسويته بس حتى تطلعيني من البيت جاي تشوف طول هاي الفترة أني ما أطلع من الغرفة أو حتى أخليكم تشوفوني

كملت كلامها ونزلت دموعها  خلتني أشك بنفسي بقيت مصدومة لا آخد ولا نطي إجت تطلع من الغرفة بس الأكبر لزمها من إيدها وكال

::  أنتظري ليلى

مسحت دموعها، وكالت

ليلى: ليش والله ما مسويه شي عفية ما أريد أطلع من هاذه البيت و.. 

        

          

                

جت تكمل بس هو ضغط على إيدها وكال

:: مو حتى تطلعين جاي أحچي علمود تصيرين إنتي صاحبة البيت

ليلى: ش... شنو قصدك الأكبر

::  زواجنا راح يكون هذا الأسبوع ليلى

فتحت عيوني من الصدمة وهو شكله جدي بالكلام

هي فاتحة حلكها وتباوعله عطت بصوت عالي

نيران: إنتهههه شنوو جاي تحچي صخرر

ما رد عليه رجع يحچي ويا ليلى كال

:: نزلي جوه شوي جاي وراج ونتفق على زواجنه

هزت راسها بسرعة بالموفقة بدون اعتراض ونزلت جوه وطايرة من الفرح

ما حچى وياي شي تركني ودخل للحمّام يغسل وأني حايرة شنو أسوي حاسّة الدخان طلع ويا أذاني من العصبية

دخلت وراه وگلت

نيران: إنتههه شنو تحچي صدگ راح تتزوج ليلى

ما رد مسح وجهه بالمنشفه وطلع من الحمام وهو ينزع القميص مالته سحبته من إيده وگلت

نيران: مو جاي أحچي وياك ليش ما ترد

رفع حاجبه وكلّه ببرود واستخفاف

:: خير شنو تردين

گلت بعصبية

نيران: وبكل برود جاي تحچي مستحيل قبل تتزوج ليلى جاي تفهم أدري غلطت بس والله العظيم هيه گالت ابنه وداعت طـ...

قاطعني وكال

:: أشش لا تجيبين طاري إلياس لأنه مو ابنچ راح يصير ابن ليلى وكل هالكلام ما يهمني منه ورايح أني غلطت من الأول بزواجي منچ وهسه راح أُصلّح الغلط

نيران:  شنو قصدك يعني جاي تحچي صدگ راح تزوجها

رد بهدوء وبكل دم بارد

:: إي وكلامي ما يصير اثنين وانتي تعرفين

كمل كلامه وداير وجهه يريد يروح لزمت إيده بقوة وگلت

نيران: ماشي تزوجها براحتك بس مو قبل ما تطلكني

باوعلي وضحك باستهزاء وكال

:: طلاك ماكو تحلمين أطلكچ جاي تفهمين

ما تحملت، انفجرت بي وگلت

نيران: كافي ليش هيچ جاي تسوي أنت مو تريد تعيش حياتك أخلص أني ما عندي اعتراض سوي اللي تريده بس قبل كلشي طلكني صخر أني ما أريدك بعد

        

          

                

ضحك بخبث وكال

:: حلو وأني هم ما أريدچ بس مستحيل أطلكچ راح أخليچ هنا خدامة جوه رجلين ليلى

من العصبية رفعت إيدي أريد أضربه بس لزمها وخزّرني وكال

:: إيدچ أكسرها وخليها معلگة بركبتچ حيوانه

دفعني بقوة وراح

گعدت على الجرباية واني أغلي من العصبية وبنفس الوقت لحد هسه ممصدگة اللي جاي يصير

شلون ضحكت عليه ليلى وخلتني أصدگ إن الأكبر مزوّج وعنده طفل اني غبية شلون أصدگت بهالسرعة حتى بدون لا أفهم منه

خلّص تحقق اللي تريده وراح يزوّجها أعرف الأكبر أذا كال راح أسوي هيج يعني راح يسوي 

بس أني أبقى هيچ صحيح أني غلطت بس چان لحك عليها شلون فرّته بيه وخلّته يصدگها وطلعت هي البريئة

واني الچذابه 

ما تحملت أكثر كمت من مكاني ونزلت جوه جان البيت هدوء ماكو أحد استغربت وين الكل

رحت لغرفة ملاك فتحت الباب شفتها مخليّة إلياس بحضنها وتحچي وياه وتضحك سديت الباب ورحت لغرفة ليلى

فتحت الباب بقوة شفتها متمددة على الجرباية وتلعب بتلفونها، الأكبر ماكو گلت بعصبية

نيران: وين الأكبر

عدلت گعدتها وكالت ببرود

ليلى: أمم قصدچ خطيبي قبل شويه طلع من هنا

سديت الباب وتقربت منها گلت

نيران:  ليش هيچ سويتي ليلى

كالت وهي تتأفأف

ليلى: شنو سويت ليش يلا طلعي من غرفتي أحسـ...

قاطعتها وكلت

نيران: أطلع ليش لا بس مو قبل ما أسوي اللي أريده

چانت تريد تحچي بس رفعت إيدي وضربته براشدي بكل قوتي حسّيت إيدي نكسرت من الضربة هيه بقت مصدومة لازمه خدها چانت فاتحه عيونها

ليلى: أنتييي شلون تمدين إيدچ عليّه

ابتسمت ببرود گلت

نيران: لا والله

خزرتني بحقد چانت راح ترفع إيدها تضربني بس لزمتها بسرعة دفعتها على الجرباية سحبتها من شعرها وضربتها راشدي مره ثانية وگلت

        

          

                

نيران:ما أگدر كول ذني بردن گلبي بس هون شويّه تردين تزوجين الأكبر مو سهلا

تركتها وطلعت من الغرفة وهي ضلت تعيط وتسب بصوت عالي أخذت نفس عميق وزفرته بتعب 

بليل جنت واكفه على البلكون أفكر بكلشي صار اليوم حسّيت الباب نفتح ما دِرت وجهي لأن عرفته من عطره

سمعت صوته وهو يكول

:: هيي تعالي رضّعي إلياس

درت وجهي وباوعتله شفته كاعد على الكرويته وبحضنه إلياس بس شكله ما يتفاهم حيل معصّب

لحد هسه تذكّر راشديات أمس أحس بعدهن يلسعن بخدّي

رحت علي وگلت

نيران: النهار كله يشرب حليب بالممه وتعلّم عليها ماله داعي أرضّعه

:: جاااي أگول رضّعي

أخذته منه وكعدت أرضّعه بس الدموع ترست عيوني

إحساس البارحة رجع مثل النار بين إيديّ أحس جاي تلسع بيه 

نزلت دموعي باوعت على الأكبر جان يباوعلي وعيونه ناطّه گلت

نيران:  أخلّص صخر أخذه والله مجاي أگدر...

رد بسرعة

:: اششش اسكتي

مد إيده ومسح دموعي بس مو بلطُف بقوّة وكال

::  كمّلي ونومي لا تتركينه مراح يااخذ روحج

ما رديت تركني وراح للحمّام يسبح بس أول ما سد الباب وخرته بسرعة وخليته على الكركوت مالته وطلعت للحمام اللي برا

استفرغت كلشي مسحت دموعي وغسلت وأكفت شويّة أرتاح بعدين طلعت

شفته واكف باب الغرفة لابس بس البيجامة تقدّم عليه ولزمني من إيدي وكال

::  أنييي مو گلت لاتتركينه

ما حجيت شيحسّيت بدوخة قوية كأن راح يغمى عليه

سحبني من شعري قرّبني اله صار وجهي بوجهه وعيوني بعيونه

ما جنت أشوف بعيونه غير الحقد والكره عكس قبل

::  كرهج نيران حيل كرهج ومن هسه راح تشوفين مدى كرهي إلج

لزمت إيده اللي جانت لازمه شعري وكِلت بعصبية

نيران:  هيه بقت عليك وخر صخر روحي ما متحملته

        

          

                

ابتسم نص خد وكال

::  بعدنا بالبداية نيران جهزي نفسچ لمفاجآت الجايه

چنت أريد أحچي بس سحبني ودخلني الغرفة باوعت على إلياس نايم چان بعدني ما حچيّت شي شالني الأكبر وشمرني عالچرباية يعرف إني ما راغبته وراح يزيد كرهي إلَه من ورا اللي جاي يسوي

گلت بصوت مختنك

نيران:  شنو تريد وخر صخر والله أموت نفسي مو عيشة هاي

ما رد تقدم ونام عليه وسحبني إله أكثر گام يبوس بركبتي چنت أخرمش بظهره وأصيح

نيران:  صخرر شبيك وخرر

ما أوخر ولا تحرك ولا كأنه جاي أحچي ويا بشر سحبني من شعري وأخذ شفايفي بين شفايفه...

كمت ورا فترة وأني لافة المنشفة على جسمي ودموعي تنزل جيت أروح للحمام بس لزمني من إيدي وكال

::  أني كلت روحي

نيران:  وخر صخر الله ياخذك إن شاء الله

خزرني وكام من مكانه لزمني من كتافي بقوة وكال

::  إبقي دعي لحد ماالله  يستچيب دعائج لأن إذا بقيت راح أدمّرج نيران

نيران:  شنو بعد تريد تسوي

:: لحد هسه كلشي ما مسوي بس عن قريب إي

ما رديت مسحت دموعي وچنت ريدة أروح بس رجع لزم إيدي وكال

::  ماكو روحه أريدج

نيران: الله ياخذني إن شاء الله وخرر

بس كملت كلامي عتني بقوة وجان راح يضربني راشدي بس لزم نفسه ودفعني باتجاه الباب

أخذت نفس بغصه ورحت للحمام سبحت وطلعت واني أحس ما لي طاقه لأي شي بعد

رحت تمددت على الكرويته ونمت مكاني من التعب والتفكير

مرت أربع أيام نفس الوضع ما تغيّر شي

بس چنت أشوف الكره والحقد بعيونه دوم، إلي

وصار يوميه ياخذ حقوقه مني برضاي أو بالغصب مو مهتم

إلياس جان طول النهار يم ملاك وبالّيل الأكبر ينتبه له ويغصبني أبدله ملابسه أو أرضّعه واني مو طايقته حتى ما أباوع بوجهه رغم جماله وجمال عيونه الزرك وهدوءه بس ما رفل له كلبي

        

          

                

ليلى چانت الدنيا مو سايعتها من الفرحه

لأن راح تتزوج الأكبر ويتحقق إللي تريده

واني لحد هسه ممصدگه معقوله صدگ راح يتزوجها

وين راح كلامه حبه الي

نظراته الي هسه كلها راحت

ماكو غير نظرات الكره بعيونه

كلها راحت من ورا غلطه وحده؟ 

مسحت على وجهي ولمّيت رجليه لصدري

محتارة شلون أخلي يطلگني مستحيل أقبل على نفسي أبقى وياه وهو يريد يزوج غيري

نفتح الباب ودخل الأكبر استغربت لأن هو ما يجي بهالوقت چانت الساعة 11 الصبح

نزع القميص مالته ودخل الحمام بدون ولا كلمة

ما تحملت أكثر  لازم أحچي وياه وينتهي كلشي اليوم

بقيت واگفه أنتظره يطلع شوي وطلع

وهو ينشّف بشعره رفع راسه وباوعلي وكال بصوته البارد

:: يا ستّار من هاي وگفتج شنو تردين

كضيت أعصابي وگلت

نيران: طلّگني صخر

رد بهدوء

:: لا

نيران: ليش شنو السبب

:: بكيفي

قربت من عنده وگلت

نيران: ماكو شي بكيفك هسه لازم ينتهي كلشي

يا أخي ما أحبك ولا أريد أكمّل وياك

:: آه أخوج  وجايبة منّه طفل منين جبتي هالحچي نار؟

مسحت على وجهي بيأس وهو بعده يحچي بكل برود ومبتسم

نيران:  يعني مراح تطلّگني

هز راسه بـ "لا" بكل برود وراح يمشط شعره

أخذت نفس طويل وكلت بصوت واضح

نيران: ماشي بس مراح أخليك تزوّج ليلى

لف وجهه ناحيتي وضحك بخفة

:: صحيح ذكرتيني نزل أشوفها حيل مشتاقلها دخيل الله مو بنت ترد الروح هلكد مو ترفه مو مثل اللي عندي جَبّار 

باوعتله بعصبية چنت راح أحچي بس هوه تركني ونزل جوه وهو يصفر 

رحت كعدت بالصالة واني هز برجليه من العصبيه 

ما لحگت آخذ نفس ودخلت ملاك وهيه تلهث گمت من مكاني وكلت

نيران: شبيج شنو صاير شكو

ردت ملاك وهيه تلهث جانت فحطانه 

        

          

                

ملاك: ولج الأكبر..... 

....................... 

جيلان...... 

شفتها كدامي الجلب نايم عليها وهيه تعيط بصوت عالي

راح شيت يركض طرده وشالها جانت تبجي 

وايدها تخر دم ركضت عليها واني اخايفه

جيلان:  صخامم الصخمنيييي يمهه بنتيييي

شيت:  اششش لاتخوفينهااا مابيهاا شيي

كال هيج وراح للسياره

يركض ركضت ورا وصعدت واخذته من ايده خليته بحضني وهيه تبجي بصوت وتصيح

:  واوا

اني شوف شلون دم يجري من أيدها حسيت راح يغمه عليه شمرلي شيت كارتون الكلينس وكال بصوت عالي 

شيت: بسرعههه ضغطيي على جرحح

اخذت منها هواي كلينس وخيته على ايدهاا وهيه تبجي واني ابجي

كال وهو يحاول يهديني

شيت: اخلص اهدي مابيها شي هسه راح نوصل للمستشفى

صحت علي بصوت 

جيلان: كلههه بسببك شلون تخليها وحدها بره بعدها طفله ماتعرف شي لو الجلب ما أكَلها شنوووو راح أسوي وقتهااا

مد إيده ويمسح وجهه بعصبيه وكال

شيت:  مادري شلون خليتها جنت معصب حتى ماأفكرت بشي

صرخت بوجهه بقهر

جيلان: هاي الـ "مادري" مالتككك ما راح تسكتلي بنتي الحك عليه شلون خليهاا تطلع وياك شلون

شيت: كافي اسكتي خوفتي البنت من ورا صوتج العالي

بعدين نتفاهم

سكتت ما حجيت شي عملود بنتي جانت خايفه بس النار جوه صدري جانت مشتعله لو صاير إلها شي؟ لو عضّه من ركبتها؟ شنو چنت راح أسوي

وصلنه للمستشفى وهيه على بجيت الوحده

هوه نزل بسرعه من السياره أخذها من حضني وركض بيها للداخل

واني رحت ورا  حتى ماكو عبايه تسترني 

أخذوها بسرعه ودخلوها للغرفه ركضت وراهم فتحت الباب شفتهه تبچي بصوت عالي وجانت حضنته وهو يحاول يهديها صوته يرجف من الخوف

شيت: هدي بابا لاتبچين ينور عيوني ماكو شي بنيتي 

: ـ شنو صاير وياها؟

شيت: جانت بره وجلب عضّها من إيدها خاف الجرح مالها عميق 

        

          

                

الدكتور كال وهو يباوع الجرح

:ـ لا الحمدلله هسه بس نعقّمه ماكو شي خطر لاتخافون بس لزمها عدل بين ما نعقّم الجرح

ركضت يمها لزمتها ويا شيت چانت تصرخ صوتها يقطع كلبي كل صرخة منها چانت خنجر بصدري

چانوا يعقّمون الجرح واني دموعي تنزل على خدودي 

بين مااكملو حسّيت روحها طلعت كملو  واني شلتها أسكت بيها ودموعي تنزل وياها

كال الدكتور

:ـ لاتبچين كدامه هيچ تخاف أكثر هدي بنتي ما بيها شي إن شاءالله جرح صغير

ما حجيت شي مسحت دموعي ورجعت أسكت بيها هدأت وخلّت راسها على صدري بس الشهگه تطلع منها

شيت:  راح أجيب إلها علاج وأجي روحي للسيارة

هزّيت راسي وطلعت من المستشفى فتحت باب السيارة صعدت وسديت الباب

بستها من خدها وگلت بغصة

جيلان: سوده عليه يروح أمچ يدچ توجعچ

كالت بشهگه

:ـ عو... واواو...

حضنتها بقوة وگلت

جيلان: الجلب عضچ خلي يولي هسه نكول لبابا شيت وهو يموته إلنه

: ـ ماامااا...

جيلان:  اهاا يروح ماما إنتي نظر عيني وكل حياتي

بقيت أحچي وياها لحد ما نامت بستها من گصّتها وشفت شيت إجه فتح باب السيارة وخلى العلاج كدامي وكال

شيت: نامت

هزّيت راسي ودرّت وجهي عنه  ماريد احجي وياه لأن كلشي صار بسببه

وهو هم بقه ساكت الطريق كله محد حچى بينه وصلني للبيت وگمت اريد  أنزل بس هو كال

شيت: جيلان.. 

بعده ما كمّل گلّت أني 

جيلان: لا تحچي أي شي شيت ما أريد أسمع منك ولا كلمة أول شي ما إلك حق تدخل لبيتي ولغرفتي بهالطريقة لا تنسى إنّو انت طليقي وحرام تدخل للبيت وما بي أحد غيري ثاني شي ما إلك حق تدخل بحياتي ولا تسألني ويا منو ومااحجي 

خزرني،وجان يريد يحچي بس فتحت باب السيارة ونزلت وركعت الباب بقوة وتركته ودخلت للبيت وقفلت الباب وراي

        

          

                

سمعت صوت السيارة شخطت بقوة بس ما اهتمّيت  ومالازم بعد أحچي وياه ولا أنطي وجه كافي الي صار لبنتي اليوم بسببه

دخلت للغرفة وخليت لازان على الجرباية غطّيته وبسته من خدّه وجهه صاير أحمر من البچي

حضنته على كيفي ودموعي نزلت واني أفكر لو ما لحگنا عليها جان هسه هي مو يمي مجرد التفكير رعبني

تركتها ورحت أخذت ملابس غيرت ملابسي ولمّيت شعري وكعدت أدرس بس بالي أبد مو يم الدراسة تفكيري كله باللي صار اليوم.

ليش هيچ سوه شيت؟ معقولة صار عنده مشاعر تجاهي؟ لو غيران من سدار؟ أو شنو بالضبط جاي يصير؟ وسدار شنو ورا ياترى

مر الوقت واني التفكير جاي يموتني باوعت ع الساعة صارت 5 العصر رحت على لازان شفته كاعده وحاضنه حجابي

ابتسمت ورحت حضنته وشلّته بين إيدي وكلت

جيلان: يمّه كعدت الأميره مالتي زوزو حبيبتي ماما

ضحكت واني أخذته ورحت غسلت له وغيرت ملابسها وسويت أكل وكعدت آكل بيها

سمعت صوت جهازي يرن مسحت إيدي من الأكل وكمت

أخذته شفته الرقم شيت

أخذت نفس بضوجه ورديت جاني صوته

شيت: ألو جيلان  لازان شلونها بعدها متوجعة

جيلان:  لا أحسن شويّة وأن شاءلله منه لباجر تتحسن أكثر 

أخذ نفس وكال

شيت: ماشي إذا صار شي اتصلي عليّه

ما كلت شي بس سديت الاتصال بكل صلافة يريد اتصل علي وجان ماتت بنتي اليوم من وراه

رجعت كعدت يم بنتي ما أريد أتركها أبد

مرت الأيام والوضع نفسه لازان تحسنت إيدها الحمد لله صارت أحسن بس بقى أثر بسيط

بيوم جانـت الدنيا صبح كعدت مثل كل يوم سبحت وغيرت ملابسي وجهزت الريوك وكعدت لازان

غيرت إلها وامشطت شعرها وكعدت تريك وأكلته وياي وعيوني على الساعة خايفة أتأخر على الدوام

سمعت صوت الباب يندك وخرت لازان وعدلت حجابي ورحت فتحت الباب وانصدمت 

فتحت عيوني على وسعها وهو ابتسم وكال

سدار:  السلام عليكم

خزرته بسرعة وكلت

جيلان: إنتَ شتسوي هنا شعندك جاي للبيت

        

          

                

أخذ نفس وكال

سدار: ماكدر أتحمل بعد  جيلان

عكدت حواجبي وعيوني على الشارع خايفة لا يجي صُدفة شيت أو أحد ويشوفني واكفة وياه كلت

جيلان: شنو قصدك سدار ترى والله راح تسويلي مشاكل شتريد مني بالضبط؟ شلون عرفت مكان بيتي

رد بهدوء

سدار: ماكو أسهل منها من رجعتِي من الدوام لحكتج وعرفته

جيلان: ليش تسوي هيج

سدار:  لأن أريدج جيلان أريد تقدملج

فتحت عيوني على وسعها من الصدمة وهو بعده يباوعلي كلت برجفه

جيلان:  شنو؟ شنو كلت

سدار: أريد أتزوجج جيلان لا تكولين جوابج هسه فكّري وبعدين ردّي خذي وقتج كله وأتمنى تكونين موافقة

لف حتى يروح بس أني كلت بعصبية

جيلان: لا ماكو لا فكر ولا شي أني مموافقة يمكن انت أخذت راحتك بالكلام وياي وجاي تحلم زيادة أني مستحيل أتزوج صحيح أنت خوش رجال والنعم منك ومأانسى وأكفتكم وياي بس مستحيل قبل

دار وجهه وباوعلي وكال

سدار: لا تكولين هيج جيلان وحگ علَيّ مجاي تطلعين من بالي من أول مرة شفتج بيها إنتي دخلتي گلبي حياتي كلّها ممسوي هيج ولا لاحگ بنيه ولا رافع عيوني على وحدة بس إنتي من شفتج ماعرف شنو صارلي

أخذت نفس حاولت أهدأ نفسي وأحچي وياه، كلت

جيلان: أني ما أفيـدك أني عايشة حياتي علْمود بنتي وبس أترجاك تروح واتمنى ما ترجع تجي ولا أشوفك

كلت هيج وسديت الباب حتى ما انتظرت رده

خليت إيدي على كلبي جان يدك بسرعة ما أعرف من التوتر أو من الخوف مسحت على وجهي عركت

فتحت حجابي ورحت على البوري غسلت وجهي وكعدت على البلوكة أفكر بكلامه

هوه من جنت يمهم عينه ما رفعها عليّه هسه ليش هيچ تغير شنو جان يقصد بكلامه من كال  مالاحك بنيه يعني جان يلحكنيوالمواقف اللي صارت بينه أبد مو صُدفة

فززني من التفكير لازان وهي تجي يمي شلتها وخليتها بحضني

قبل تزوجت شيت وتندمت وعضيت أصابيعي ندم مستحيل أرجع أعيد الغلطة وأتزوج

أخلص أعيش حياتي علمود بنتي ومستقبلها وبس

        

          

                

سمعت صوت السيارة عرفت إجه السايق

كمت بسرعة لبست عبايتي أخذت أغراضي وطلعت

سلّمت علي وصعدت ولازان راحت كعدت يما

وهوه تعوّد عليها صارت يوميًا تكعد يما

وصلني وراح شلت لازان وبستها من خدها وهي تلوّح بإيدها للسايق ضحكت على حركاتها ودخلت خليتها يم زهراء ورحت للمحاضرة مالتي 

وآني بالمحاظره طول الوقت بالي يم لازان أخاف تتعب أو تبچي أبقى لازمة كلبي بإيدي لحد ما يكمّل الدوامي وأروح آخذها

لمّيت كل غراضي وطلعت للكافتريا شفت زهراء كاعدة ومخليّة لازان يمها وجانت تاكل كيك

ابتسمت براحة ورحت أخذتها منها وشكرتها وشلت لازان وطلعت برّه أنتظر السايق يجي

فجأة وكفت كدامي سيارة نزلت الجام، شفته سدار

كلبت عيوني وهو كال

سدار: اصعدي جيلان خلّي أوصلچ ع طريقي

رفعت عيوني إله خزرته وكلت

جيلان: لا شكرًا هسه يجي السايق تگدر تروح

چان يريد يحچي بس شفت السايق وصل تركته ورحت صعدت وآني غلي منه ومن ورا تصرفاته

كلت للسايق

جيلان:عمو وكف على صفحة أريد أنزل أجيب خبز

رد عليّ بابتسامة

: تدللين عمو

وكف السيارة على صفحة نزلت ورحت جبت خبز واشتريت حلويات إلي ولازان واشتريت عصير برتقال ورجعت صعدت

طلع العصر، قدمتليه وكلت

جيلان: تفضل عمو

كالي باستغراب

: ليش تعبتي نفسچ بنيتي

ابتسمت وأخذت لازان وشربتها العصير وصلني للبيت وراح دخلت للحمّام سبحت وسبّحت لازان وطلعت

لبست ملابس خفيفة لأن الجو جان زين مو بارد

رحت سويت غدا وكعدت أتغده ولازان مخليتها بحضني ترضع

كملت وأخذته ورحت للغرفة حضنته ونمت جفي على وجهي من التعب

كعدت العصر على صوت دك الباب فتحت عيوني وباوعت على الساعة جانت 6 العصر وما جان عندي شغل اليوم بالمحل

شفت لازان نايمة وخرّته عني وكمت عدلت ملابسي وسحبت حجابي ولبسته وطلعت وأني أفرك بعيوني رحت غسلت وجهي

        

          

                

ورجعت فتحت الباب شفتهم مروان وشيت

جان صار له شكم يوم ما جاي بس يحچي ويا لازان بالجهاز وهي تعيط "بابا!" وكلشي ما نفهم منها غيرها

سلّموا وكال مروان

مروان: وين حبيبة عمها شو ماكو أم البوس

ابتسمت وگلت

جيلان: نايمة بعدها  تفضلو دخلو

دخلو بس خلو الباب مفتوح راح مروان راح كبل داخ عليها عاط ورا شيت وكال

شيت:لا تخرب نومتها خليها نايمة حيوان

رد عليه مروان من داخل

مروان: دروح ما راح أشوفها بعد أسبوع وتريد ما أكعدها بعدين تنام

إجه يروح إلها بس أني گلت

جيلان: خلي يكعدها عادي من زمان نايمة

سكت ما كال شي شغل جكارة ودار وجهه يشرب وأني بقيت على وكفتيطلع مروان وهو شايلها وهيه معبسة وجهها وشعرها واكف

ضحك شيت على شكلها كال مروان

مروان: وروح أبوي الكوّاد هاي جنتي

أخذها منه وكال

شيت: امشي لك كواد نطيك نعال

هيه حضنت شيت وهو باسها من خدها وكال

شيت: يبويي مشتاقلج

كالها ورجع يبوس بيها كال مروان وهو معبّس وجهه

مروان: شو أني ما تبوسني هيج لعد

شيت:شعندك بعدك واكف روح نزل الغراض

هز راسه وسحب إيد لازان عضها على خفيف وطلع يركض وشيت بقه يسب بي

جان جايب هواي غراض مروان خلاهن بالحوش باوعت لشيت وكلت

جيلان: تره ممحتاجين شي ليش كل هاي الغراض

كال مروان وهو يخلي الغراض على الأرض

مروان: هاي مو إلج هاي لبنتنه

شيت: ما إلج شغل بي عدنه شغل بغير محافظة أني ومروان ونطوّل يمكن أسبوع يلا نرجع كلت أخاف تحتاجين شي جبتلج كلشي حتى لا تطلعين

جيلان: بس هذا هواي وأنه كتلك ما أريد شي

ما رد رجع يبوس بلازان وهو ولا مهتم نزل كل الغراض وكال مروان

مروان: يلا كملت امشي خل نروح للحلاق قبل لا يشقونه شقتين باجر أذا شافونه هيج

باس لازان بقوة وخلّاها بحضني وكال

شيت: يلا امشي انتبهي عليها جيلان أخاف يصير شي وتتصلين وماتلگيني تره التغطية مو زينة هناك

هزّيت راسي وگلت بأي وهمه طلعو بره يم الباب إجه مروان باس لازان من خدها بقوة وكال

مروان:  أوف جنتي الصاكة

سحبه شيت من بلوزته وشمره على السيارة وكال

شيت: نطم وصعد لا أخليك جوه السيارة وادوسك

مروان:  لا يمعود وداعت لباس أمي صاعد

ما كدرت ألزم نفسي ضحكت هز إيده شيت وصعدو وراحو

سديت الباب وراهم وخليت لازان على الأرض شفت بيدها فلوس ذبيت نفس بضوجه  هذا أكيد شيت خلاهن بأيدها

دخلت المسواك للبيت ورتبت كلشي ورحت توضّيت ورحت أصلي جنت حيل متحمسة لأن رمضان قرب هذا أول رمضان إلي واني وبنتي سوه وحدنا

كملت الصلاة وجبت القرآن وكعدت شويه أقرأ إجت لازان وخلّت راسها بحضني ابتسمت بكلبي

قريت شويه وخليته على صفحة رفعت إيدي خليته على راسها وقريت هذا الدعاء

"اللهم إني أستودعتك بنتي لازان قطعةً من قلبي فأحفظها لي بعينك التي لا تنام وبارك لي فيها، وقرّ عيني بصلاحها اللهم اجعلها من عبادك الصالحين ومن حفظة كتابك ومن الهداة المهتدين وارزقها طيب السيرة ونقاء القلب وحلاوة الإيمان اللهم احمها من كل شر ووفّقني في تربيتها وامنحني الصبر والحكمة والحنان واجعلها سندي وفرحتي في هذه الدنيا وسببًا لرضاك عني يا أرحم الراحمين

كملت وبسته من خدها وكلت

جيلان: الله يحفظج إلي يا بعد روحي

كمت نزعت الجادر وگمت للمطبخ قصقصت شوي فواكه وشغلت التلفزيون على أفلام الكارتون

طفيت الضوء وكعدنا أني وبنتي ناكل ونباوع

بعدين گمت وجبت غراضي  وكعدت أدرس

مر وقت طويل وشفت لازان نامت فخليت راسي على المخدة وغمضت عيوني ونمت

كعدت ورا فترة على صوت دگ الباب قوي نفجعت من صوته باوعت عالساعة جانت ٣ بالليل

گمت أخذت حجابي وطلعت وگلبی يدگ خايفة ومرعوبة

سميت باسم الله وفتحت الباب

نصدمت من شفت كدامي  الأكبر....... 

........................ 

 

في حفظ ربي🖤