رواية ذنوب على قيد الغفران التاسع و الاربعون 49 - بقلم براء
فهد : كمت هذا يا ماعنده ذوق هيج يدك الباب
غنى : اباوع لفهد صار عصبي لان يكرهه واحد يدك الباب حيل وهو اساساً يكرهه الاصوات العاليه
فهد : فتحت الباب ... صارت بوجهي خاله غنى اهلا ام حوراء تفضلي
سحر : بدموع صدك غنى سوت حادث ووينها
فهد : دتفضلي هاي وياها كاعده جوه لتخافين
سحر : دخلت ركض شفتها كاعده على القنفه يمه سوده عليه هاي شصاير بحالج حضنتها ولكم ليش محد خابرني وكلي
غنى : حضنتها حبيبتي خاله والله كولشي مابيه وماكو داعي اكلج عايزه قهر انتي
سحر : ولج شنو متكليلي يعني يصير اني اخر من يعلم ولو ما عمج شايف ابو جعفر ومسولفله ماجان دريت والله من هسه كلي حتى دربي ماشفته خليت شالي على راسي واجيتج ركض حتى نسيت وكت فطور هسه
غنى : خاله والله مبيه شي الحمدلله قبل يومين كعدت و ضعي الصحي بخير فليش انتي هسه تبجين فدوه اروحلج كافي بجي والله مبيه شي
سحر : ولج شنو مابيج دباوعي لرجليج وايدج ولج انتي الى متى تضلين قليله حظ هيج يعني ماخلصتي من الناس طلعتلج الحوداث انوب .. لزمت وجها ولج يمه سوده عليه هاي شصاير بيج
غنى : الحمدلله على كل حال مسحت دموعها وبستها عوفج من البجي تدرين شتاقيتلج هواي
سحر : بعد كلبي اني الاشوق والله اجه كلبي يطك عليج ... سولفيلي شلون صار الحادث
غنى : حجيتلها مختصر من الحادث وهي تهز راسها
سحر : عدج العافيه يابعد كلبي بيه ولابيج
غنى : اسم الله عليج لتكولين هيج
فهد : اباوعلها شلون تحجي ويه خالتها عود هاي خالتها وتعاملها بهالاسلوب لعد لو امها عايشه شلون تعاملها ..... هالبنيه منين مخلوقه
سحر : خاله فهد ليش ماخابرتني وكتلي هو يصير
فهد : هو اني بيا حال يا ام حوراء نزلت من شغلي ركض وصلت للمستشفى وشفتها بالي وتفكيري كله صار يمها ما اجه على بالي لا اخابر ولا حتى اسال منو يدري ومنو لا
سحر : زين هي هسه شلونها
فهد : الحمدلله وضعها زين بقه على العلاج والجبيره وتتحسن ان شاءالله
سحر : ان شاء الله ... باوعت للصينيه تعذرني يمه اجيت بوكت الفطور بس والله من خوفي عليها ماشفت دربي
فهد : صدك تحجين ام حوراء بيتج هذا تجين بالوقت الي يعجبج مابيناتنه رسميات احنه اهل
سحر : الله يخليك ويحفظك بحق الحبيب محمد
فهد : الله يخليج ... تفضلي مدي ايدج فطري ويانه
سحر : لا تسلم بعد كلبي سبقتكم فطرنه اني وابو حوراء ركض ركض واجينه لهنا
غنى : ضلت خالتي كاعده شويه وكامت
سحر : يله اني من رخصتكم لازم اروح تأخرت
فهد : بعد وكت خليج براحتج اني اوصلج
سحر : لا خاله عمك منتظرني بره
فهد : صدك تحجين غير تكليلي حتى انزله شلون تعوفي بره مو عيب شنو غربه انتو عفتهن ونزلت للرجال ... تلكي ستلك ابو بهالحر
غنى : شويه وصعد فهد يصيحلها
فهد : ام حوراء الحجي يصيحلج
سحر : اي ... كمت بوستها يله حبيبتي اني اروح وبين فتره وفتره اخابرج واجي اشوفج وباجر اروح لكربلاء ادعيلج بالشفاء
غنى : حبيبتي خاله فدوه اروحلج
سحر : عفيه ديربالك عليها تره هاي عنيده وتكابر لو توجعت وتأذت تكبت بروحها ومتحجي ما اوصيك عليها
فهد : باوعتلها لتوصين حريص بعيونها اخليها مريتي هاي
غنى : ابتسمت .... نزلت خالتي و وياها فهد رجعت ظهري على القنفه متنهده براحه
___________________________
ايمان : دبقي افطرو هنا والله هاي مو طلعه
سحر : بعد كلبي نزورج بالافراح ان شاءالله ... بس تعرفين ابو حوراء رجال جبير ومابي حيل الطلعات وفوك هذا رمضان وصيام مابي حتى يطلع للحديقه مكضي اليوم كله كاعد لو يقره قران لو يتابع تلفزيون ولوما وضع غنى اصلا ميطلع
ايمان : اي والله وضع غنى هدلي حيلي اول العالم الله شاهد خفت عليها عبالك بتي
سحر : الله يخليج ياحنيه وربي ينولج الي ابالج
ايمان : اللهم امين
فهد : تره جيتكم هاي مو جيه ميصير نص ساعه وتطلعون حتى ما قمنه بواجبكم
سيف : والله ياسيد واجبك واصل بس تعرف انت رمضان وبغداد ازدحام تصير وره الفطور وفنه اليكدر يرجع من وكت ... وام حوراء خبصتني من سمعت بحادث غنى حتى فطور مثل العالم ماخلتني افطر اخر شي كلت اجيبها تشوف غنى ومن تصير زينه وتكدر تتحرك اني هم اجي اشوفها لان كلبي عدها
فهد : اني اسمي فهد مو سيد وانت بمقام عمامي فماكو داعي للتكليف بالكلام وبالنسبه للازدحامات بيا يوم بغداد ماجانت مزدحمه وعادي بأتصال بسيط انتو تطلعون مو فد مشكله واطلبكم زياره بعد
سيف : ان شاء الله ابني يله ام حوراء امشينه
سحر : يله مع السلامه
فهد : الله وياكم ... تعاي يمه
ايمان : اي يمه اجيت
فهد : دخلت جوه لكيت كرايب ابليس متجمعين
سعاد : بله مو عيب اكو واحد يجي بوقت فطور
ايمان : المره اجت حلكها يابس على بت اختها ولو احنه بمكانها هم نسوي هيج
سعاد : اي بس مو نطب على العالم وهي تفطر والله يا الله ناس نازعه الخجل فرد مره
فهد : خلصتي
سعاد : شنو
فهد : خلصتي كلام
سعاد : اي
فهد : خوش ... سمعوني زين ما اريد هوسه اريد هدوووء بالبيت الابره اذا اذبها كون اسمع صوتها هوسه ومشاكل وتعليق على فلان وعلان هم مااريد عدنه مرضى بالبيت ويحتاجون راحه فكلمن يحتفظ بتعليقاته السخيفه لنفسه وميعلق كدامي حتى ما اسمعه حجايه تسمه بهالشهر مفهوم
الكل : مفهوم
فهد : عفيه بالحبابين يله كلمن يشرب جايه ويروح لغرفته مااريد صوت عالي عفتهم وصعدت ... فتحت باب الغرفه ودخلت لكيت غنى كاعده
غنى : دخل فهد بس شو كام يدخن وهو حتى مفاطر ... مكملت فطور
فهد : شبعت
غنى : ششبعت هو اكلت بس شوربه وكلاص مي فدوه فهد باوع لوجهك شلون صاير ليش مدتاكل
فهد : حبيبي والله شبعت اكلي انتي
غنى : فهد
فهد : هاا
غنى : لزمت ايده ... اكو شي
فهد : باوعتلها لا حبيبي ماكو شي بس راسي شويه يوجعني
غنى : لان مافطرت عدل جسمك ما اخذ كفايته
...تلمست وجهه شوف وجهك صاير اصفر
فهد : ليش بهالبيت يكدر يتسمم لو يكعد مثل الاودام
غنى : شنو تعاركت جوه
فهد : لا بعد ماعندي كل قابليه حتى اتعارك .. تدرين شمشتهي هسه
غنى : شنو
فهد : انام بحضنج بس وضعج ميساعد للاسف
غنى : فتحت ايدي السليمه تعال
فهد : لا ايدج
غنى : مبيها شي تعال يله اني اريد
فهد : تقربت على جهتها السليمه خليت راسي على صدرها وحاوطت خصرها على كيفي
غنى : حضنته ... احجيلي شبيك
فهد : تنهدت اكو فكره ببالي بس متردد
غنى : شنو هي
فهد : جاي افكر اكل لفيصل ياخذ امه ونسوانه ويطلع من البيت تعبت من المشاكل المتخلص كل يوم عرس شكل واني مليت
غنى : لا ديربالك تسوي هيج لو مهما يكن يبقون اهلك ومن لحمك ودمك ميصير هيج تفكر اذا انت هيج تسوي بيهم لعد الغريب شيسوي
فهد : ومشاكلهم
غنى : تكدر تتغاضى عنهم تغلس تسوي اي شي بس مو تطلعهم وهالبيت ساترهم وعلى فكره الثواب بالاول والاخير راجعلك واجرك عد ربنه جبير لان متحملهم ومخلي مشاكلهم على عاتقكك بس لانهم اهلك
فهد : يعني متردين اطلعهم وتبقين بس انتي وامي وخواتي
غنى : اكيد لا قابل شمأثرين عليه همه ..يضوجوني؟! عادي اكدر اغلس عنهم بس متوصل بيه اريدهم يطلعون
فهد : بهدوء انتي شنو بشر ... عود اكو بطيبه كلبج بهالزمن
غنى : اكو وهواي هم وصدكني كل واحد فاقد اهله راح يتمنى اظفر من اظافر اهلك حتى لو جانو يسوون مشاكل المهم الك عزوه وسند بهالدنيا مو مثلي صفيت وحدي لا اب ولا ام ولا اخ ولا شي
فهد : لتكولين ماعندي اهل ... لعد اني شنو
غنى : تلمست لحيته انت روحي مو بس اهلي
فهد : باوعت لعيونها ونزلت اخذت شفايفها بستها بقوه ... بهمس احتركو واشتعلو بكاز شهالشفه هاي جريت شفايفها بسنوني واحس بيها تنجر عبالك مطاط وناعمه تسوي واهس مصيت شفتها الجوه وابتعدت مباوع لعيونها ... ما اكول غير بس الله يساعد كلبك يا ابو قاسم
غنى : بخجل احم ليش شبي ابو قاسم
فهد : خطيه جاي يتعذب ومحد يحس صارله اشهر صايم واجه رمضان كمل السبحه عليه وخطيه بقه لسه مكمل صيام وكل يوم طالعتله سالفه صفح الله يساعده
غنى : خطيه هاي اني هم جنت مثله اصوم قبل رمضان بس هالسنه مكدرت
فهد : اي
غنى : تدري احس هذا صديقك كولش ملتزم مبين عليه حباب ويخاف الله
فهد : ابتسمت اي كلش ملتزم وخوش رجال عليه الاعتماد لو ما هو اني بخبر كان
غنى : فهد خلي اشوفه
فهد : باستنكار شتسوفين!!!!
غنى : ابو قاسم صديقك اني شايفه كل اصدقائك مهيمن وعمر وايمن شفتهم بالعرس بس هذا ابو قاسم ولامره شايفته
فهد : حكيت ركبتي تردين تشوفي
غنى : اي .... فهد مكلت شي يضحك ليش تضحك
فهد : هزيت راسي هيج هيج .... ماشي اخليج تشوفي بس مو هسه صيري زينه
غنى : زين ماعندك صوره اله ... يوو فهد هسه عليمن هالضحك
فهد : هههه والله سوالفج تونس تعاي شلتها وكمت ابو قاسم ما اخذله صور اخاف عليه
غنى : ليش
فهد : سكتي لخاطر محمد ما اريد اصدمج خليتها على الجربايه .... تلمست شعرها صار شكد ما مشطه شعرج
غنى : من يوم الحادث
فهد : امشطله الج
غنى : تكدر
فهد : اي ليش ما اكدر بس وين مشاطتج
غنى : بالمجر الاول اكو مشط خشب جيبه بلا امر عليك
فهد : كمت فتحت المجر اخذت المشط واجيت كعدت وراها اخذت شعرها ... تدرين لسه حاقد عليج لان كصيتي
غنى : ابتسمت والله جان يضوجني تخيل لو اجي مستعجله اكعد عليه لو بالسبح يشلع الكلب ياله ينغسل موتني كمت كصيت منه حتى ارتاح
فهد : مشطته على كيفي ... خوما اكو ضربه براسج
غنى : لا الحمدلله ماكو ضربه قويه براسي ... أخ فهد على كيفك
فهد : هو على كيفي بس شعرج متعكد ذكريني اغسله الج مادام مابي شي
غنى : خاله ايمان كالت خلي يلتأم جرح كصتي حتى ميلتهب لو اجه عليه مي
فهد : ماشي مشطته الها ووخرت المشط تلمسته صار يجنن
غنى : شكرا حبيبي
فهد : بست شفايفها روح حبيبج
غنى : شنو رأيك نقره قران شويه
فهد : اي ليش لا .... كمت جبت القرائين واجيت هاج
غنى : فتحت القران ... خلي نقره سوره ياسين
فهد : بهدوء ماشي
... فتحت القران على سوره ياسين وكعدت اني وياها هي كملت قبلي لان اني بطيئ بالقراءه واتمعن هواي بالكلام حتى افهمه ... كملنه وشلنه القرائين
غنى : ابتسمت تدري متوقعت بيوم من الايام حكعد وياك هيج كعده ... اصلا ما جنت متوقعه انو انت حتحبني
فهد : ورثت جكاره ... تدرين اني عمري ما انغصبت على شي اله حبج اني حبيتج غصب عني وبغير ارادتي اصلا مااعرف شلون وشوكت ويمتى حسيت بكل هالمشاعر تجاهج بس سمعيني غنى مادام صار كلشي مباح بيناتنه ... شوفي صحيح اني اختلف وياج اضحك اسولف ممكن اتولدن شويه واني وياج وبالمستقبل القريب اذا تممنه زواجنه ما اريد جنس مخلوق يعرف اني شلون اتعامل وياج بالغرفه واتذكر ذكرتلج هالشي بعقدنه
غنى : اي اتذكر بس ليش ما اشوف عيب الناس تدري شلون تعاملني
فهد : اكو جانب بالرجال ميطلع غير بس ويه مرته واني افضل شخصيتي وياج متطلع وتجاوز باب الغرفه احب تكون بيناتنه خصوصيه
غنى : شلون يعني
فهد : يعني فهد اليحضن ويبوس ويتشاقه وياج هنا يختلف عن البره
غنى : ليش انت مو كتلي اني عندي شخصيه وحده فشلون هنا شي وبره شي
فهد : لزمت ايدها شوفي حبيبي اني شخصيتي هي هي نفسها بس هذا ميمنع انو اكو جوانب كثيره بشخصيتي مثلا اني ويه كل الناس رسمي حتى ويه اهلي اجي يم امي اخفف شويه احجي اسولف اتشاقه وياها ومرات ويه خواتي هاي نادراً اما ويه مرتي التعتبر ستر وغطه عليه خاصه اذا مرتي صديقتي المقربه فلا اختلف
وما مجبور اتقيد كدامها اليجي على بالي اسوي ابوسج احضنج اشاقه وياج وبعد هواي اشياء تعرفيها بعدين اما بره ما مسموحلي لا اني ولا انتي نحجي عن الي يصير بيناتنه هاي الكعده النكعدها سوه مااحب احد من اهلي او معارفي يعرف عنها ولو تفصيل بسيط وارجع واكلج اني شخص احب الخصوصيه وخاصه علاقتي الزوجيه اكرهه اي واحد يعرف عنها شي ونصيحه الج بالمستقبل اذا سمعت شي دار بيناتنه امي اختي اي احد يدري بي حسبي حسابج تاكلين رزاله ام الراشدي وصدكي بكلمات بسيطه اكدر ابجيج دم
غنى : بهدوء انت تدري بيه كولشي ما احجي فماله داعي هالاسلوب
فهد : بست اديها حبيبي اني مو قصدي اخوفج وانما اوضحلج كم نقطه حتى تتجنبيها بعدين
غنى : هزيت راسي
فهد : زعل الحلو
غنى : لا
فهد : شو اشوف غمازاتج
غنى : ابتسمت
فهد : لزمت وجها وبوست خدودها ما اريدج تزعلين مني اني كل كلامي هذا احجي حتى ميصير اكو سوء تفاهم بيناتنه مستقبلا فهمتي
غنى : حضنته هازه راسي ... اعرف
فهد : بست راسها وحضنتها
___________________________
اروى : كاعده ودك موبايلي ... ورده ياورده
ورده : هاا
اروى : روحي جيبي موبايلي وشوفي منو
ورده : جبت الموبايل سمسم يتصل بك .... منو سمسم
اروى :هاي صديقتي روحي جيبي الهيتفونات وتعاي حبابه ليروح الاتصال
ورده : بشك والله جذابه مو صديقتها ... ركبت الهيتفونات وخليتهن بأذنها فتحت الخط وطلعت اني اعلمج اله اعرف منو هاي مدري هذا سمسم
اروى : الوو
سامر : ياهلا بهالصوت الحمدلله على سلامتج حبيبتي
اروى : ابتسمت الله يسلمك
سامر : تدرين من طلعتي لسه واني بالي يمج واكل بروحي كل ساعه اريد اجيج بس ما اكدر اجي وحدي اله ويه اهلي حتى محد يشك خاصه اخوج الله يسلمه بس يحس بشي يحكم علينه بالموت
اروى : اي فهد مينضم عليه شي
سامر : اي اكلج احنه باجر وره الفطور نجي حتى نشوفج ونشوف مرت فهد فحسبي منا لباجر اجي واكحل عيوني بشوفه عيونج
اروى : فدوه اروحلك سمسم
سامر : يروحلج فدوه سمسم يله اني اروح ديربالج على روحج
اروى : ماشي مع السلامه
سامر : مع السلامه حبيبتي
اروى : انطفه الجهاز دفعته يمي ... اباوع طبت امي تنافخ ... شبيج يمه
ايمان : بتول
اروى : شبيها
ايمان : مريت من فوك لكيتها واكفه يم غرفه اخوج وحلكها يتحرك مدري شتسوي وياخوفي تسوي اعمال
اروى : اعوذ بالله لا ما اتوقع هاي خوفيه ماعدها هالسوالف
ايمان : لعد شتفسرين تصرفها
اروى : يمكن تتصنت مااعتقد تسوي عمل لان تخاف من فهد ولتنسين فهد شسوه بسعاد وهي مو غبيه وتعيد الغلط
ايمان : ما اعرف كلبي مقبوض واني اعرف مادام كلبي وجعني يعني راح يصير شي
اروى : استغفري الله وتعوذي من الشيطان هاي ضيكه خلك يمكن بسبب اجواء البيت المتوتره
ايمان : يمكن
_________________________
ساره : اكلك فيصل
فيصل : خير
ساره : اريد فلوس
فيصل : شتسوين بيهن
ساره : اريد اشتريلي جم حاجه
فيصل : مثل شنو يعني
ساره : مكياج ملابس سيتات نوم عطور هيج شي
فيصل : ماعندي فلوس كعدي وسكتي
ساره : شنو ماعندك يعني مرت فهد وحد ميز تواليتها متروس ترس مكياج وعطور والله فتحت الكنتور كدامي ذاك اليوم تحير شتباوع اشكال والوان عدها هاي من غير سيتات النوم الي اشترتهن بعرسها كومه كومه واني عندي بس خمسه وجاي اداور بيهن
فيصل : ليش مرت فهد هم تلبس سيتات نوم ههه عبالي تستحرم متلبس
ساره : ليش مو عدها رجال اكيد تلبسله خوما ينام وياها بالدشداشه .... وشلون رجال هي عدها كومه فلوس عنده وما مقصر وياها شتريد وشتشتهي يجيبلها وبنفس اليوم
فيصل : انتي كلتيها رجلها عده كومه فلوس مو مثلي
ساره : تره انت عندك معارض سيارات والسياره عندك تنباع بالملايين فليش تكول ماعندي لا عندك ومو قاصر بس كول فهد ميبخل على مرته مو مثلك امده حظي وقسمتي قابل مثل حظي
فيصل : فهد زنكين دك فلوس نايمه على كلبه يكدر هسه يشتريله قصر وهم متخلص فلوسه اما اني رجال عملي اجمع بالفلوس حتى افتح معارض اكثر واستفاد من فلوس السيارات بأشياء مهمه مو اصرفهن على المكياج والملابس ... وعلى فكره لو ما فهد ماخذ كل الورث جان احنه هسه فوك النخل فوك بس ابويه الله لايرحمه سجله كلشي
ساره : كمت شبعت من هالاسطوانه التعبانه هاي كمت كعدت اباوع على ميز التواليت جريت قلم الكحله مال غنى .. حتى كحلتها اصليه قابل مثلي هاي من الصبح خالتها لسه وما راحت كلشي عدها اصلي وحلو ومن احسنه ليش بس اني افف شكد اكرهه حياتي لا عد الرجل تهنيت ولا عد الاهل
_____________________
الساعه الرابعه عصراً
فهد : نزلت جوه سلام
الكل : وعليكم
فهد : يمه طالع للسوك اني سجليلي شتردن بالضبط حتى اجيبه
سعاد : جيب بطيخ
فهد : شجاي احجي اني هندي ... شتردون سجلولي بورقه واني اجيبه
ايمان : بعد وكت يمه هسه الدنيا ظهر
فهد : لا هم ياله الحك منا لساعه ماكو محط رجل بالسوك
بتول : راح تروح للسوك هيج ... اقصد يعني تروح للسوك لابس قميص وبنطرون
فهد : ليش المفروض البس قاط لو اطلع مصلخ لو شنو
سعاد : قصدها ليش كاشخ ماكو داعي تروح تنضرب عين غير تخاف عليك
فهد : اي الله يسلمها حنينه طالعه عليج ... يله يمه لخاطر ربج
ايمان : اوكف غير اتأكد شناقصنه واكتبلك
ورده : فهد حبيبي عمري
فهد : اختصري ورده شتردين
ورده : اريد اجباس ونساتل وهالسوالف حباب تعرف رمضان وهالسوالف تونس
فهد : ماشي وبعد
ورده : سلامتك اخويه الغالي
فهد : باوعت للجهال شتردون اجيبلكم ويايه
احمد : منريد عمو
فهد : لا تردون الي تشتهو كلولي واني اجيبه ليلى تردين شي
ليلى : تسلم بعد كلبي خيرك سابق
فهد : كملتي يمه
ايمان : هاك هاي الورقه سجلتلك بيها كلشي
فهد : ماشي
________________________
غنى : طلع فهد واني كعدت اكلب بالموبايل ملانه صلاه وصلينه وقران وقرينه بس مليت ومااعرف شسوي شوكت اخلص من هذني المقيداتني وارجع امشي واحرك ايدي .... خلي ادك على نرجس البارحه اجتني وراحت بسرعه ما تأخرت اجيت اخابرها ولفت نظري رقم مكتوب عليه سامح ... اتذكر سجلته اول مارجعت بيوم الاجاني ... ضغطت على الرقم داكه عليه
سامح : الوو منو
غنى : السلام عليكم
سامح : وعليكم السلام منو
غنى : اني غنى
سامح : يا هله بهالصوت شلونج عمي حبيبتي شخبارج صار فتره طويله منتظر اتصالج
غنى : الحمدلله بخير ... حاجيت بيبيتي
سامح : لا والله هالايام وضعها كلش تعبان كل يوم جاي توكع وكلنه خايفين عليها واخاف لا اكللها وتتخربط بالزايد
غنى : زين شلون هسه اني كتلك اريد اشوفها ومو مشكلتي اذا ماكدرت تحاجيها هاي مشكلتك ...اذا متكدر انطيني عنوانها واني اجي ممحتاجه منك شي
سامح : والله ياعمي وضعها موزين واذا ظهرتيلها فجئه احتمال جبير توكع وتموت من الصدمه خليني احاول امهدلها السالفه
غنى : تنهدت وشوكت تمهدلها السالفه تره طولت هواي
سامح : انطيني مجال للعيد ووعد اخليج تشوفيها
غنى : ماشي حدي وياك للعيد واذا ماحاجيتها اني ادور عليكم والكاها
سامح : ماشي للعيد للعيد خلص
غنى : يله مع السلامه
سامح : لحظه عمي
غنى : نعم تفضل
سامح : هاا لالا هيج يله مع السلامه
غنى : سديته منه ... افف إلهي يا مسهل الامور سهلها عليه ... سمعت الباب يندك عفيه باب ميسكت ابد ... صحت منووو
ساره : هاي اني ساره
غنى : تفضلي
ساره : دخلت وينج
غنى : هياتني هنا على الجربايه
ساره : هاا شلونج
غنى : الحمدلله تفضلي كعدي
ساره : كعدت جاييتج بطلب ولترديني
غنى : اذا اكدر عليه من عيوني
ساره : سهل وتكدرين عليه ... عفيه اريد سيت نوم منج
غنى : باستنكار عفواً
ساره : شبيج سيت او يجوز انتي تسمي قميص نوم اريد استعير واحد منج وارجعه الج بعدين
غنى : بس ميصير تلبسين من سيتاتي
ساره : ليش يمه بيه جرب
غنى : لا العفو مو هيج قصدي بس احم انتي تعرفين قمصان النوم المن تلبس فميصير اني البس شي لزوجي وتجين انتي تلبسي وياي خاصه اذا ملبوس ويلبس للزوج مو حلوه لا اخذ منج ولا انطيج واصلا هو ميجوز يعني شلون تلبسين لفيصل شي هو ملبوس لغير رجال زحمه
ساره : هسه عليمن سويتيها قصه كولي مااريد انطيج
غنى : باوعتلها والله مو هيج وتره لو ما اريد انطيج اكلج بس هو ميصير اخذيها بالعقل يصير اخذ سيت نوم منج انتي تلبسي لفيصل واجي اني البسه لفهد ميصير
ساره : والله يصير قابل اني كتلج خلي نتبادل وانام ويه فهد هو سيت نوم مااعرف ليش تبالغين انتي
غنى :استغفر الله شنو هالحجي ساره وبعدين اني ما ابالغ كلمن يفكر بطريقه معينه
ساره : يعني ما راح تنطيني
غنى : تعذريني هيج شي ما اكدر انطي
ساره : شكل الحادث خلاج نحسه جنتي حبابه مدري شبيج هسه
غنى : اباوعلها عافتني وراحت طبكت الباب حيل وراها كون فهد يشوفها هيج تطبك الباب جان لعب بيها جوله ... تنهدت هسه اني شسويتلها وانهدت عليه ... سمعت الباب رجع اندك معقوله رجعت صحت منو
ليلى : اني ... فتحت الباب ودخلت هاا حبيبه شلونج
غنى : الحمدلله ... استريحي
ليلى : كعدت اي شلونه فهد وياج
غنى : الحمدلله ... اباوعلها تباوع داير مدايرها وكلما تريد تحجي تسكت ... الواضح عندج كلام
ليلى : اي والله اريدج بسالفه بس كون تبقه بيني وبينج
غنى : اي ميخالف
ليلى : شوفي حبيبتي اني واكعه بمشكله وماعندي واحد يساعدني غيرج
غنى : خير ياستار احجي
ليلى : اني محتاجه فلوس ومحتاجتها مو شلون ما كان واريد اطلب من فهد بس اخاف لا يردني
غنى : لا ليش فهد ابد ميرد احد خاصه اذا محتاج الفلوس لشي ضروري
ليلى : ادري بس خاف من يسمع بالمبلغ يرفض يسلفني
غنى : ليش شكد المبلغ الي تردي
ليلى : تسع ملايين
غنى : فتحت عيوني تسع ملايين تردين
ليلى : اي وفهد عنده يعني التسع ملايين متشكل فرق عنده حالهن حال التسعين الف
غنى : ليش عندج التسعين الف قليله حتى تقارنيهن بتسع ملايين
ليلى : هاي انتي لان جانو اهلج فقره عندج هيج مبلغ جبير بس فهد لا هالمبلغ لاشيئ كدام ثروته
غنى : تنهدت واني شنو المطلوب مني هسه وليش دتكليلي
ليلى : اريدج تقنعي
غنى : وشلون اقنعه شكله يعني
ليلى : كليله اختك معتازه فلوس وتريدك تنطيها المبلغ الي تريده سلفه انتي بعد مرته وعرفي شلون تقنعي حتى لو عصب حاولي وياا
غنى : واني شنو استفاد لو صار عصبي
ليلى : تكسبين اجر انتي مو تدورين هالسوالف وتخافين الله وملتزمه اذاً اكيد تعرفين انو لو باستطاعتنه نساعد شخص ميصير نتردد هذي مو حكمج ومواعضج المخبوصه بيها
غنى : تنهدت افاتحه بالموضوع واشوف شيكول
ليلى : بستها بعد كلبي يا طيبه شلون حبابه انتي
غنى : ااااه على كيفج حبابه كتفي
ليلى : اسفه اسفه يله اعوفج ترتاحين كرصت خدها يمه فدوه شلون وجهه جنه كيمر نيالك يا اخويه صبرت ونلت
غنى : لزمت خدي ... توقعت وره اسلوبها اللطيف هذا اكو شي وفعلا طلع اكو شي
________________________
فهد : خلي هنا ... اي عاشت ايدك تفضل
: رحم الله والديك
فهد : و والديك بالرحمه ... سديت الجنطه وصعدت دك موبايلي "غانم" ...الوو
غانم : السلام عليكم
فهد : حركت وعليكم السلام شلونك
غانم : ليش نازل بدون اذن صار ايام اخابرك ومترد ليش
فهد : ليش يايوم اني نازل بدون ما اخذ اذن ومنو كلك ما ماخذ اذن صباح سجل اسمي قبل لا اطلع ولوما صارلتي شغله طارئه ما انزل
غانم : هو صباح الي مبلغ عليك والمشكله مو هنا صباح مبلغ المسوؤلين الفوك واجتك عقوبه يا سيادة الضابط
فهد : لحظه لحظه صباح هو الرفع شكوه عليه للوزاره
غانم : اي نعم واني كل هذا ماادري بي لحد ماخابرني المسوؤل البارحه وكام يحجي عليك يكول عود هذا المعتمدين عليه هيج مستهتر بالوضع لعد باقي الضباط شلون
فهد : لا يا م... سكتت استغفر الله ... اسمع اني ما خايف من شي ولو اريد انزل وحدي ما خايف لا منك ولا من صباح الوصخ ولا من المسوؤل الفوك بس اني مانزلت وحدي اخذت اجازه وسجل اسمي كدامي ياله نزلت واصلا على اي اساس المسوؤل يصدكه بدون ميتأكد مني
غانم : المسوؤل رايح حتى يتأكد ومالاكي اسمك بسجل الحضور ومن شايف الغياب لاكيك بي وتأكد وخابرني لعب لعب ... وقدم بيك عقوبه
فهد : شنو العقوبه
غانم : اجه امر بقطع 600الف دينار عراقي من راتبك
فهد : طز بيهم وبالراتب اهم شي متمس العقوبه شغلي واني اعرف شلون اتصرف ويه صباح والله لطلع هال600من عينه هالاخ الكح... لا اله الا الله اللهم اني صائم
غانم : اهدئ لتصير عصبي انت التزم بموعد الالتحاق وحاجي وشوف شيكلك
فهد : انعل ابو لابو اليحاجي
غانم : مو يشد وياك
فهد : طز بي وبعشره من امثاله ... دخلي التحق واعرف شتصرف وياهم عباله الكو... من يقدم بيه عقوبه راح اخاف منه اي والله رجف ....
غانم : لا واصل صيامك ... اكلك اني خلي اروح لا يروح صيامي وانت قبل لاتلتحق خابرني حتى اروح وياك
فهد : ماشي ... سديته يسويها وحده بوحده الم.... شلون اني قدمت بي عقوبه وكت الدز خبر وكال استشهدو عود طلعها وحده بوحده عباله اني جلب فلوس مثله واهتم لو كطعو من الراتب ... بس بسيطه انت جبتها لروحك والله لخليك تصيح الويل وراتبك اذا ما اطيره اطلع كلب ابن كلب ... وصلت للبيت صفيت السياره ونزلت فتحت الباب ونزلت المسواك دكيت الجرس فتحوها
بتول : الله يساعدك
فهد : وخري عن وجهي دخلت جوه خليت الغراض بالصاله متكومن تاخذن المسواك للمطبخ شبييييجن صافنااات
آلاء : اي اي صار
ساره : اباوعله شكد شايل مسواك وغراض ... صارت عيني على جسمه ماعنده كرش مثل فيصل حلو جسمه ومعضل ... تخيلت شكله هو وغنى وهمه بفراشهم وقارنتهم بوضعي اني وفيصل ... استغفر الله ساره شهالتفكير هذا اعوذ بالله من ابليس
فهد : دخلت باقي المسواك وسديت السياره ... هاكم هاي علاكه الجهال وهاي علاكه ورده
ايمان : عاشت ايدك بعد كلبي ربي يخليك خيمه على راسي
فهد : بوجودج ان شاءالله
ساره : هاي العلاكه البأيدك المن
فهد : لمرتي
ساره : هذا كله الها
فهد : لعد الي شهالاسئله السخيفه هاي على كلشي تسألين بطلي هالعاده ...عفتهم وصعدت
ايمان : هذا شبي صاير عصبي ... يمه فهد
فهد : درت وجهي عليها ها يمه
ايمان : بيت جدك يجونه وره الفطور
فهد : صعدت اي هله بيهم ... وصلت للغرفه فتحتها ودخلت لكيت غنى كاعده
غنى : الله يساعدك
فهد : ويساعدج
غنى : اباوعله كالب وجهه وضايج ... بيك شي حبيبي
فهد : لا
غنى : لا بيك شي ليش ضايج
فهد : بهدوء ... مابيه شي
غنى : علينه سيدي تعلمني بيك احج...
فهد : قاطعتها بعصبيه مو كلتتتتت مابييييه قزرقط لييييش تلحييييين كوه تطلعيني ضايج شهالالحاح هذااا كافيييي سكتي
غنى : بهدوء اسفه بعد ما اسألك .... اخذت موبايلي بس حتى ما اصفن وابجي كولش استهضمت من كام يغلط ويصيح يعني اني مكتله شي مجرد شفته مو على بعضه وسألته ماكو داعي لهالصياح
فهد : كمت طلعت ملابس الي ... دخلت للحمام اسبح دبكت من الحر سبحت وطلعت اباوع الساعه بالسته بعد ساعه وشي يأذن ... اعلي السبلت لو بردانه
غنى : بكيفك
فهد : باوعتلها ورجعت عليته كلعت التلفزيون وكعدت اكلب ... قرب الاذان كمت نزلت جوه
ايمان : هاك يمه راح يأذن هذا فطوركم انتظر جاي اشوي معلاك لمرتك لازمها تغذيه خلي اكمله واخذه الها
فهد : ماشي
منذر : شبيك فهد
فهد : شبيه يعني مرسوم على كصتي بسطال ومستغربين
منذر : هسه شكتلك اني وانهديت عليه شدعوه عليك
فهد : ما اجاوبته مالي خلكه بالي كله يم ابن الكح... صباح .... سمعت الاذان
ورده : بعد وكت ابو حلك الفاهي لو مخلي الاذان على باجر
علي : حيوووانه ميصير تحجين هيج
ورده : حجه ايه الله علي
منذر : خزرتها كافي ورده بطلي مناكر عيب مو بكدج هو
ورده : دنكت راسي يمه خفت منكم ... احم احم اسفه
فهد : اخذت الصينيه عاشت ايدج
ايمان : سبع عافيات بعد كلبي
فهد : صعدت فوك فتحت الباب ودخلت خليت الصينيه فوك النايلونه ورحت اشيلها يله عوفي الموبايل و تعاي حتى نفطر
غنى : بهدوء ما اشتهي
فهد : مو بكيفج هو وراج علاج اباوعلها ولا كأن ... جريت الموبايل مو احجيييي وياج
غنى : كتلك مااريد
فهد : مو بمزاجج يله تعاي ... شلتها كعدتها على القنفه ... مرتاحه هيج
غنى : لارد
فهد : هسسسسسه غير تحجيي
غنى : اي مرتاحه
فهد : تنهدت خال الشوربه كدامها يله اكلي
غنى : اباوعله بده ياكل ولا كأن
فهد : ليش ما جاي تاكلين هو عناد لو شنو اكلي يله
غنى : اخذت الخاشوكه ودموعي نزلت اني ما متعوده واحد هيج يعاملني
فهد : اباوعلها دايره وجها عني وحتى متاكل ... اكلي معلاك سوته الج امي يووووه تسمميييي ولتكلبين الفطور عليه زقوم تره روحي طالعه
غنى : بدون ما اجاوبه اخذته مالي خلك المشاكل
فهد : انتبهت عليها كامت تبجي تنهدت اعرف روحي دست بالحجي خرب الك.... اني شجفصت و وياها مسحت ايدي شو حبيبي باوعيلي ليش تبجين
غنى : دفعت ايده ومسحت عيوني مبيه شي
فهد : كمت كعدت كدامها ... لزمت وجها ومسحت عيونها اني اسف لان صيحت عليج بس انتي لحيتي عليه واني صاير عصبي ماعندي قابليه احجي فطلعت حركتي بيج الف مره كايلج من اصير عصبي لتحاجيني لحد ما اهدئ ليش متسمعين الكلام
غنى : بدموع هو هذا اسلوب اني شسويتلك غير من خوفي عليك اسأل حتى اطمئن اكدر اغلس وحتى ما اسألك وبالاول وبالتالي انت تحجيلي بس اني صوجي اصلا ليش ادخل من اكون اني ولاشيى بالنسبه الك حتى اتجرى واسألك
فهد : بست راسها حقج عليه وشتكولين اني وياج بس اني من اعصب افقد وانتي تعرفيني اكوم اخبص يله حبيبي كافي بجي
غنى : مجاوبته مسحت دموعي
فهد : يله اكلي
غنى : ما اريد ولتلح عليه ما اشتهي
فهد : خلص اني هم ما اريد اخذت الموبايل ورجعت جسمي على القنفه
غنى : اباوعله صدوك عاف الاكل وهو كولشي ما ماكل كوم اكل انت صايم
فهد : بهدوء ما اريد انسدت نفسي
غنى : اخذت بالخاشوكه وقربتها عليه يله اكل ... بهدوء خلص مزعلانه بس اكل لتضل جوعان
فهد : رجعت الخاشوكه ... بهدوء سمعي اجتني عقوبه وامر بقطع قسم من راتبي لان نزلت وبسبب واحد حقير محه اسمي من الاجازه وقدم شكوه بيه للمسوؤلين وصار الصار
غنى : وليش سوه هيج
فهد : م... ابن كح... غير
غنى : احتقن وجها متصيرله جاره وميتوب من الفشار .... وبعدين
فهد : صرت عصبي لان تعاقبت بدون سبب واني ما مسوي شي لا اكثر وانتي اجيتي حاجيتني واني عصبي ماكدرت طلعت حركتي بيج وصرتي بوجهه الدفع وصدكيني كلشي كلته لتاخذي بعين الاعتبار لان اني نفسي مااعرف شخبصت وياج
غنى : جنت تكدر تكول موضوع خاص مااريد احجي بي
فهد : بوقت العصبيه ما اكدر اسيطر على نفسي فأفضل اضل ساكت لحد ما اهدئ وهاي اني من حجيت شفتي شخصبت حبيبي غنى روحي انتي مره ثانيه من تشوفيني عصبي اصلا لتحاجيني لحد ما اهدئ
غنى : بهدوء اصلا بعد ما ادخل يله كمل فطورك صار ايام اشوفك متاكل بشكل صحيح
فهد : اني ما اريدج متدخلين انتي ليش تحورين كلامي اني اريدج تدخلين وتحجين بس من اهدئ ومو واني عصبي
غنى : تنهدت فهد انت مدتفهم انو اني مرتك مو وحده من الجنت وياهن ولازم اسألك واعرف شبيك مابيك مو تدخل او شي وانما احنه متزوجين واسمنه روح وحده وميصير نضم على بعضنه شي واني من حرصي وخوفي عليك لحيت عليك لا اكثر مجنت متوقعه حضايقك هيج ولو ادري حتى ما اسألك
فهد : ليش منو كلج الجنت وياهن جان مسموحلهن يسألني عن اي شي يخصني مااريد اتطرق لمواضيع تضوجج بس اني جنت ماخذهن ادوات اشبع رجولتي بيها لا جنت اقبل يسألني وينك وشبيك او ماشبه هنه جم اخت واخو عدي ميدرن مو احجيلهن عن حياتي وعن البيه واني اقدر حرصج وحبج الي بس كتلج اني وكت الي اضوج من شي لحد يتقربلي لحد ما ابرد واني اجي انام بحضنج واحجيلج وعلى فكره انتي الوحيده الي اسمحلها تكعد وتتناقش ويايه لو وحده غيرج ما جان بررت ولا حتى حجيت تزعل تزعل هي واللابسه برجلي اله انتي ... انتي روحي اكو واحد يكدر يزعل روحه جاوبيني
غنى : هزيت راسي ... لا
فهد : خلص لعد ياروحي اني مااريدج تزعلين مني وعسى بالموت الي يضوجج وينزل دمعه من عيونج الحلوات حتى لو جنت اني زين
غنى : اسم الله لتحجي هيج
فهد : متقبلين
غنى : طبعا ما اقبل لتدعي على روحك
فهد : اروح فدوه للي ميقبل عليه ... يله خلي نتصاحب على كولتج
غنى : مديت اصبعي
فهد : لا حبيبي صلح الاصبع هذا من جنتي ما متزوجه اما هسه اني ما اقبل بمشابكه الاصابع
غنى : لعد
فهد : شنو رأيج نسوي صلح جديد بيناتنه اني وياج اسمه صلح الشفايف ... نشابك شفايفه سوه ونكدر نعتبر هذا لغز نتصالح بي لو تعاركنه ... يله انتي بادري لان بردتي الاكل وحرمتيني من الفطور
غنى : اباوعله يأشر على شفايفه ... مستحيل
فهد : اذا ما بستيني باجر التحق واعوفج والله
غنى : فهد رجاءاً مالها داعي هالسوالف
فهد : الموضوع غير قابل للنقاش تبوسيني ما اروح متبوسيني منا للوحده التحق والخلقج واني عد حجايتي وانتي تعرفين
غنى : خلص التحق بكيفك
فهد : ماشي لعد خلي اخابر جماعتي اكلهم يجوني
غنى : اباوعله دك صدوك ... جريت الموبايل منه خلص لتدك عليهم
فهد : سديته يله
غنى : باوعتله زين خلي ابوسك بخدك
فهد : بوست الخد هاي خليها للنسوان اليجن يزورنج اما اني مترويني غير من الحلك
غنى : تقربت عليه ... يعني مصر
فهد : مليار بالميه
غنى : اباوع لشفايفه هسه لو محترمه نفسي ومزعلانه من البدايه مو احسن
فهد : يله استعجلي
غنى : غمض عيونك
فهد : كلبت عيوني الله يساعد كلبي عليج بعد جم يوم غمضت عيوني .... يله
غنى : اباوعله غمض عيونه ... تقربت عليه غالقه كل مسافه بينه حسيت بأيده على خصري ... قربت شفايفي على شفايفي بسته بشفته بسرعه وابتعدت بس ايده مقيدني
فهد : بخفوت بعد وحده
غنى : كافي فهد مو كل شويه متشبع انت
فهد : بهمس ب ع د و ح ده (بعد وحده ) سويها برضاج احسن ما اخذها غصباً عنج
غنى : باوعتله بعد مغمض رجعت بسته على كيفي حسيت بي حرك شفايفه رجفت جسمي اجيت ابتعدت بس مكدرت مااعرف شنو الخلاني ابادله واني اصلا ما اعرف شلون يبادلون البوسه حسيت بالسانه يطخ بالساني كزبر جسمي وحسيت على نفسي وابتعدت بسرعه
فهد : سندت راسي على راسها ... ورب العزه اجمل صلح مر عليه من انولدت بهاليوم فتحت عيوني شسويتي بيه دمرتيني انتي اول مره اجرب شي واريد اعيده مره وثنين وعشره وما امل ولا اريد ابتعد ابد ... اعترف اني اعلن نفسي اسير لشفايفج ومن هاللحظه هاي
غنى : كلامه خله كلبي يرفرف ويدك بسرعه ... انت تحبني ؟!
فهد : حضنتها الحب كلمه سخيفه برأيي متعبر عن شعوري
غنى : ابتسمت بحضنه احس دفو الدنيا كلها بضلوعه ... ابتعدت يله حبيبي انسى الصار واكعد افطر
فهد : اني فطرت اطيب فطور تردين فطري انتي
غنى : بخجل خلص يله خلي ناكل ... كعدنه نفطر وهو تغير مزاجه ورجع يبتسم وكل شويه يوكلني حتى ما اكل ... اكتشفت شغله بفهد انو لو مزاجه حلو ومرتاح حتى صوته مينسمع اما اذا صار عصبي فعيونه تصير جمر عبالك حمم بركان ويضل ساكت وشرايينه تبين بالاضافه الي يتقربله يكون يومه اسود وهذا الشفته بي اليوم فعلا شخصيه فهد غريبه عجيبه وما جذبت من كلت شخصيته صعبه الفهم
كملنه فطور وهو كام غسل واجه اخذني للحمام غسلي وخلاني اتوضه عبالك طفله كدامه شالني كعدني على الكرسي حتى نصلي وراح نزل الصينيه وشرب جاي واجه فرش سجادته وكف بدينه نصلي كملنه وكعدنه نقره قران بحدود التسعه كملنه اندكت الباب طلع فهد يفتحها
فهد : هاا ليلى
ليلى : اجو بيت جدي خلي مرتك تبدل راح يصعدون فوك
فهد : ماشي ... دخلت تعاي شلتها كعدتها على الجربايه اباوعلها جانت لابسه دشداشه سمائيه ... بدليها
غنى : ليش
فهد : طالعه حلوه بيها
غنى : لعد اذا حلوه ليش تريدني انزعها
فهد : هاا خليج لابستها ... اندكت الباب طلعت فتحتها شفت كل نسوانه كبالي
النسوان : السلام عليكم
فهد : وعليكم السلام نورتو تفضلو ... شلونج حجيه
ياسمين : هله بيك بعد كلبي
غنى : طبن نسوان عم فهد وبنات عمه والحجيه وعمته وباقي البيت بوسني وتحمدلي بالسلامه ماعدى ام مرتضى و مروه الي اصلا مسلمت كالعاده واني ما احاجيها
ياسمين : اللهم صلِ على محمد ... وجهج منور ومبينه متحسنه عيني بارده عليج
نسرين : يعني هذا شكل وحده مسويه حادث والله عمي انتي اصحى مني
ورده : قل اعوذ برب الفلق راحت البنيه
ايمان : خزرتها صوتج
ملك : حبيبتي الف سلامه متشوفين شر
غنى : الله يسلمج حبيبتي
شهد : بشقه شفتي انتي وذيج الغبره خربتن حفله عيد ميلادي
غنى : حقج
شهد : اشاقه وياج حبيبتي فدوتج العيد ميلاد ولا يهمج
مروه : شلونك فهد
فهد : هله ... اجو الولد لو لا
ياسمين : لا بيبي اجينه مشي
فهد : كعدت هاا
نسرين : اكول عمه ليش غرفتك وصخه هاي عود انت ابو النظافه هيج
فهد : باوعت وين الوصاخه بالموضوع
نسرين : الغرفه بيها تراب وانت تشيرتك املح شنو فلوسك قليله عمه لو مرتك بس تتكشخ ولابستلي قصير ومطلعه زرورها
حياه : ام مرتضى شجاج
فهد : لحظه من رخصتج اولا الغرفه لونها ترابي وجوزي يعني مو وصخه هذا لونها وثانياً التشيرت لونه كحلي مو املح او وصخ حسب كلامج وثالثا مرتي مطلعه رجليها مو زرورها واكو فرق الزر هو الفخذ مو الرجل .... حقيقه انتي معلوماتج جداً ضعيفه انصحج تقرين معلومات عامه
نسرين : معلوماتي مابيها شي مرتك مطلعه جسمها بدال ما تحاسبها تدافعلها
فهد : بهاي صدكتي صدك المفروض متطلع رجليها لان رجليها مرايه ومو كل واحد يستحق يشوفها فاني وياج ... غطي رجليها المجبسات يمه
غنى : اشرتله كافي لتدوس بالحجي .... بقو للوحده وطلعو .... اباوع لفهد كعد يقره قران عفته براحته تمددت ونمت
فهد : ضليت للفجر اقره قران وصلت للجزء 25 مابقه شي واختمه لان بكل صلاه كمت اقره جزء ... كاعد اقره وسمعت غنى تصرخ كمت ركض
**********
يتبع
- يتبع الفصل التالي اضغط على (ذنوب على قيد الغفران) اسم الرواية