رواية ذنوب على قيد الغفران الفصل السابع و الاربعون 47 - بقلم براء
السابع والاربعون
ايمان : كاعده وخاله ايدي على خدي ... شكل لفهد لو رجع مرتك الوصيتني عليها الله العالم بحالها ولسه بالعمليات ... فزيت على صوت ونه اباوع لاروى بدت تكعد سوده عليه وجها مورم ورجليها مكسرات وضعها يبجي
اروى : بالم ااه يمه
ايمان : بدموع سوده عليه يايمه حبيبتي اروى شتحسين جسمج يوجعج هسه يجي الدكتور ويشوفج بعد كلبي عسى الالم بيه ولا بيج
اروى : فتحت عيوني اباوع غرفه بيضه عرفت روحي بالمستشفى حركت رجلي كامت تون علينه كمت اصيح من الالم ودموعي تنزل تذكرت الحادث وشلون انكلبت بيه السياره وغنى غنى وينها ... يم يمه وي وين غنى
ايمان : بالعمليات ولج يمه مو كتلج لترحين شفتي شصار بيجن السايق مات وانتي هذا حالج ومرت اخوج الله العالم بحالها
اروى : بدموع كل كله بسببي اني السويت هيج بيها كله من ورايه جبرتها تصعددد بالتكسييي كالت مااريد مارريد كلبي ما مرتااااح بس جبرتهااا راحت غننننى بسببي ااااخ يمه
ايمان : كمت بسرعه طلعت لكيت علي واكف ويه الدكتور ... دكتور عفيه بتي كعدت بس كامت تصرخ
علي : رحنه بسرعه للغرفه اجه الدكتور انطاها ابره مسكن
ايمان : دكتور الله عليك شبيها
الدكتور : مابيها شي لتخافون بس هاي لان استرجعت الصار وياها ارتعبت اضافه لالم جسمها مابيها غير العافيه ان شاءالله
ايمان : طلع الدكتور باوعت لعلي يمه ماشفت مرت اخوك طلعت من العمليات لا
علي : تنهدت جنت هناك قبل دقايق وضعها ابد موزين وعدها نزيف حاد كوه كدرو يسيطرون عليه بس
ايمان : بس شنو
علي : بوضعها هذا صعب تعيش واني دكتور واعرف خاصه انو الناس من مطلعها بدون مايدرون خالعين كتفها هاي من غير الاذى مال الحادث بالمختصر غنى مالها كعده يمه وعلى الاكثر تموت بس الدكاتره جاي يحاولون بلكي ينقذوها
ايمان : بجيت لا علي لتكولها بنيه بعمر الورد تموت والله هسه اخوك يتخبل دخيلك ربي بجاه النبي عندك عديها سلامات ربي
علي : اباوع اجه منذر وعمامي والحجيه وياا
عباس : هااا شلونهم البنات ليش تبجين ام فهد
ايمان : خليت حجابي على وجهي ودرت عنهم انكسر كلبي ولو جان عندي امل واحد بالميه فمن سمعت كلام علي طار كل امل عندي
ياسمين : ولكم احجو مو فتيتو كلبي
علي : حجيه اروى عدها كسور وعدت سلامات بس العله بمرت فهد صار فوك الساعتين بالعمليات ولسه ماطلعت وضعها كلش خطر
ياسمين : لطمت على صدري يمه سوده عليه
منذر : الدمعه صايره بطرف عيني كله من ورايه اني شلون اعوفهم كل الصار بسببي لو ما ماخذهن ماجان صار الصار
عباس : هذا قضاء وقدر بويه لا اعتراض على حكم الله
مهدي : زين خابرتو فهد
علي : لا
عباس : غير تخابرو مو مرته الي بالعمليات شلون متكلوله
منذر : هسه اني اخابره حتى افهمه السالفه
ايمان : صحت لا ديربالكم تخابرو هسه يجي والله
ياسمين : لعد شلون لازم تكلوله
ايمان : لا عفيه لحد يكله هو من غير شي اعصابه تلافنه واذا عرف ما اعرف شراح يسوي فالله يخليكم لحد يكله لحدما يستقر وضع غنى
ياسمين : وين جانتلك هاي يا بيبي شجاها الدنيا وياك كل يوم لاطشتك لطشه
منذر : ضلينه كاعدين لفتره طويله دك موبايلي اباوع فهد ... جاوبته الوو
فهد : الوو منذر غنى يمك
منذر : هاا لا مو يمي ليش
فهد : صار ساعه اخابرها مترد لاهي ولا امي مو علساس انت تاخذهم للسوك يتسوكون وهسه راح تصير بالوحده وهي لسه ماخابرتني وكالت رجعت ولا حتى من ادك عليها ترد
منذر : بارتباك اي رجعنه من السوك هاك هاي خالتي تحاجيك
ايمان : بهدوء احم هاا يمه الله يساعدك شلونك
فهد : الحمدلله اكلج يمه غنى يمج صار ساعتين اخابرها مترد وهي مو بالعاده تتاخر عليه ياله ترد
ايمان : يجوز نايمه يمه هي قبل جم ساعه اجت ويه اروى واكيد تعبت ونامت
فهد : يمه شبي صوتج
ايمان : غمضت عيوني ياربي دخيلك مااريده يدري ... لا يمه مابيه شي يمكن هاي الصوت يشوش من يمك
فهد : بعدم تصديق ... ماشي عود اذا كعدت خلي تخابرني ضروري اريد احاجيها
ايمان : ان شاءالله سديته ودموعي تنزل ... سوده عليه كلبه حسه على مرته وخابرني يتأكد الهي وان جاهي كوم مرته بسلامه اذا مو لخاطره لخاطر كلب ام لايب على ابنها ربي
ياسمين : وكلي امرج لله وان شاءالله ماكو غير العافيه
ايمان : ونعم بالله
منذر : علي خاف مرت فهد تموت شلون اباوع بوجهه بعد
علي : انت مالك ذنب الصوج صوجهن هنه الي راحن صعدن بتكسي وحدهن فالغلط منهن مو منه وادعي لربك مرت فهد تصحى والا فهد يطلع برواحنه
منذر : ميهمني يطلع بروحي لو لا يطبني مرض المهم عندي تكوم مرته بسلامه خطيه شنو ذنبها وبسبب واحد غبي وسافل يضيع عمرها
علي : هو هذا اليقهر انو هي فعلا متستاهل ... اباوع للدكتور طلع من غرفه العمليات رحنه كلنه ركض عليه ... هاا بشر دكتور
الدكتور : نجحت العمليه بس وضعها لحد الان ما مستقر وراح نخليها بالعنايه المركزه احنه سوينه العلينه والباقي على الله عن اذنكم
ياسمين : ولج حبيبه سوده عليه عليج متستاهلين ياطيبه الكلب متستاهلين
علي : يمه كافي بجي عليج العباس مو انمردت عيونج
ايمان : ولك شكل لاخوك لو صار عليها شي لا سامح الله شحجي وشكول اكله مرتك راحت
مهدي : اهدي خويه وصلي على محمد وتفائلي هي عمليتها نجحت وبقت بالعنايه بسبب وضعها ادعي لله كون تكعد وتكوم بسلامه
ايمان : الله يكومها بالسلامه بحق الحبيب محمد
________________________
صباحاً
اروى : فتحت عيوني مالكيت احد يمي ... اباوع للممرضه وين اهلي
الممرضه : هسه اصيحلهم
اروى : راحت الممرضه واني بالي يم غنى ياترى كعدت لولا ... اباوع طبت الحجيه هي وعلي
ياسمين : بستها الحمدلله على سلامتج بعد كلبي شلون صرتي
اروى : الحمدلله احسن ... حجيه شلون صارت غنى
ياسمين : والله يا يمه بعدها ماطلعت من العنايه المركزه من البارحه خلوها ولليوم ماطلعت
اروى : بدموع يعني وضعها حرج مو
ياسمين : ماكو وضع حرج عد ربج يكدر بلحظه يكعدها وبلحظه يموتها ولتخافين ربج رب رحمه وان شاء الله مرت اخوج تصحه ومابيها غير العافيه
اروى : حجيه اني خايفه عليها حيل شلون اباوع بوجه فهد بعد واني السويت هيج بمرته
ياسمين : مسحت على راسها لتكولين هيج حبيبه هذا مكتوب والمكتوب ما منه مهروب يايمه
اروى : يعني غنى راح تعيش
ياسمين : باذن الله
اروى : زين امي وين
ياسمين : كاعده يم العنايه المركزه وبأيدها قران عسى ولعل الله بلحظه يستجاب الها
اروى : ونعم بالله
_____________________
ليلى : هاا ما خابرج منذر
انغام : خابرني اروى صحت ومرت فهد وضعها خطر
ليلى : شوف خطيه متستاهل شلون سالفه هاي
بتول : يطبها مرض احد كلها روحي سيبي
ساره : انتي صدك تحجين البنيه بين الحياة والموت وانتي تحجين هيج ولج خافي الله انتي كاعده ببيتها وتحجين عليها يعني ماكو هيج حقد وحقاره والله
ليلى : صحيح اني ما احبها بس لو مهما يكن ما اكول يطبها مرض عاد لتمصخوها تبقى بنيه وبعدها شابه وحتى ماصارلها سنه من متزوجه بدال ما نندعيلها تكوم بالسلامه نتشمت بيها
سعاد : والله محد كلهن صعدن بتكسي ورجعن وحدجن اليجي من ايده الله يزيده
ليلى : لا اله الا الله
ورده : بدموع حبابه ليلى الله عليج امشيته للمستشفى
ليلى : والله العظيم هستوني خابرت منذر كلي لحد توصل ولا تجي همه الحجيه وامج جاي يقنعون بيهن يرجعن وميقبلن لان صايمات مو عاد نروح احنه خلينه هنا من يصير شي اكيد منذر يخابرنه
بتول : اكلجن اذا ماتت غنى لو تكسحت شلون بيها وهي ماعدها احد واكيد فهد ميبقيها عنده
ورده : انجبي الله ياخذج لج انتي شنووو من بشررر ليش هيج حاقده عليها حرررام عليج ... والله العظيم اله اكل لفهد على حجيج والله لصير خبيثه مثلجن وانكس منجن ... صعدت فوك وعفتهن دك موبايل امي شفتها نرجس جاوبتها الووو نرجس
نرجس : ولج ورده صدك الكاله علي لجعفر صدك اروى وغنى مسويات حادث
ورده : بدموع اي وغنى مو زينه سمعت آلاء تكول راح تموت لان ماجاي تكعد
نرجس : لزمت كلبي يمه لتكولين هيج حبابه ... هسه اني رايحه للمستشفى ركضت كعدت جعفر جعفر جعفر الله يخليك كوم وديني للمستشفى
جعفر : كلها زلم هناك شلون ترحين
نرجس : بدموع جعفررر تاخذني للمستشفى لو اروح وحديييي والقررران واني صايمه والله واسويها كووووم اخذني للمستشفى صديقاتي بين الحياة والمووووت كوووووووووم
جعفر : اباوعلها انهارت ماشي ماشي هسه اخذج كمت اخذت مفاتيحي وطلعنه ... بس اهدي عليمن هالبجي
نرجس : لك ورده تكول غنى راح تموت
جعفر : انخمط كلبي شش شنو شنو راح تموت
نرجس : وضعها موزين يربي هالبنيه شوكت ترتاح من جانت صغيره لليوم وهي مشلوعه كلب لان عاشت حالها حال الجهال ولا حالها حال الشباب الي بعمرها ربي مو كافي متعوفها بحالها مو طلعت روحها
جعفر : استغفر الله شلون تحجين هيييج ميجوز هذا التحجين عليه الله مو كرايبج لزمي لسانج
نرجس : كلبي عليها جعفر خطيه وتالي ويه المشاكل ماناويه تعوفها بحالها من موت اهلها لموت مروان وبيبيتها وطردتها بالشارع كلت اتزوجت والدنيا ضحكتلها كالت الدنيا صبرولي زززين ليش مو خطيه هي
جعفر : كافي نرجوسه كافي حبيبتي هسه يطلع كلشي مابيها وتدلل علينه يله وصلنه نزلي ... خابرت علي الوو علي احنه اجينه للمستشفى تعال دلينه عليكم حباب
علي : طلعت بسرعه شفتهم واكفين شعدكم اجيتو
نرجس : وين غرفه البنات
جعفر : تعال دلينه رحم لوالديك راح تتخبل
علي : غنى بالعنايه واروى بغرفه (....)
نرجس : رحنه بسرعه للعنايه لكيت اهل رجلها هناك تقربت اباوعلها صدك بجيت بحركه كلب ماكو كلشي ما مبين منها لافيها لف سوده عليه يا نونه ياعمري متستاهلين ... خاله شلونها حبابه
ايمان : يم ربج امرها يمه
نرجس : رحت اشوف اروى فتحت الغرفه ودخلت اباوع لافين راسها ورجليها اول ماشافتني صاحت
اروى : بدموع شفتي غنى مو
نرجس : حضنتها وبجيت ولج شفتها شفتها بس مو غنى صديقتي ولج كلشي مامبين منها لا ايد ولا رجل ولاشي ولاشي والاجهزه داير مدايرها هاي ام ضحكه الحلوه هيج يصير بيها
اروى : اااااخ بسببي بسببي كله بسببي اني الجبرتها على الروحه واني الصعدتها بالتكسي كلتلي ولج اروى اني ممرتاحه لنصعد بس اني عاندت وصعدت وهاي تاليته عنادي والله لو اني ولا هي كافيي شبعت ضيم واجيت اني فوكها
نرجس : ابتعدت ماسحه دموعها لتكولين هيج انتي ماعليج ... بس كليلي الدكتور شكال عليها
اروى : هي من البارحه طلعت من العمليات وخلوها بالعنايه المركزه لان جسمها تعبان وفوك هذا كلبها ولج نرجس كلبها ماجاي يستقبل ونبضها ضعيف جداً اذا يوقفون الاجهزه تموت لان حتى نبض ماعدها ويقاوم كلبها
نرجس : هي تحجي واني ابجي شريد اسوي ماعندي غير الدموع تشرح وضعي .... مرن يومين وغنى بالعنايه المركزه ماكو اي تحسن بحالتها والدكاتره ماخلو شي ما سوو ومع هذا ماجاي يستقبل جسمها كل علاج وكلبها كلما بي جاي يصير بالنازل وحسب الفهمته فهد لسه ميدري واني كمت اجي الصبح واروح وكت الاذان والوضع مستمر
_________________________
فهد : صار ايام اخابر على غنى متجاوبني للحظه حسيت روحي مسوي شي كمت اراجع روحي خاف حجيت شي خاف سويتلها شي ... بس ماكو ما مسويلها شي اخابر على امي تكلي موبايلها احترك زين انطيني احجي وياها تكلي مو يمي لو نايمه لو بغرفتنه لو تشتغل لووووو الخ كل يوم حجه شكل واني حتى شغل مااعرف اشتغل كل ساعه صافن حتى كمت اراجع تصرفاتي من اول ما نزلت لحد ما التحقت خاف ضوجتها كلمه حبيبي او يجوز تهربت مني لان ضاجت من تغزلت بيها هواي افكار فرت راسي فر
يومين اني غنى ما سامع صوتها لا هي ترد ولا اروى ترد ولا حتى امي حرت شسوي لا اكدر انزل ولا اكدر اسوي شي والمشكله ويه حظي من ثاني يوم انكطعت التغطيه لا نكدر نخابر ولا نتواصل ويه احد واني كمت الوب جني سمجه اريد بس دقيقه وحده ترجع التغطيه حتى اطمن عليهم بس ماكو اليوم الصبح رجعت التغطيه من الفجر اخابر لحد ما اذن وماكو ولا واحد يرد لا علي ولا امي ولا اروى ولا غنى تخبلت وعقل ماضل براسي لابد علي جان يرد هسه ماكو محد يجاوب وعرفت صاير شي خابرت فيصل بسرعه هم ميرد وين الساعه بثمانيه بالليل ياله جاوب
فيصل : هاا فهد الله يساعدك خير داك عليه
فهد : بعصبيه وينكم من الصبح ادددك ولا كو.... بيكم يجااوووب وينكم عن موبايلاتكم .... لييييش متجاوبون
فيصل : مو الكل بالمستشفى والضيم واصل لروسهم وحتى فراغ ماعدهم يحكون راسهم مو عاد يلزمون موبايلاتهم
فهد : شنو مستشفى شعدهم بالمستشفى احجي فيصل
فيصل : ليش متدري مرتك سوت حادث هي واروى وهسه بمستشفى (.......)والدنيا مكلوبه يمها
فهد : كمت بخوف شوكت سون حادث احجيييي
فيصل : من اربع ايام اروى كعدت بس مرتك بالعنايه المركزه ليش محد كلك
فهد : سديته وطلعت اركض لصباح غنى مسويه حادث اكول ليش كلبي ما مرتاح صار ايام اثاري غنى متأذيه ... وصلت لمكتبه دفعت الباب ودخلت حتى مادكيتها
صباح : خير شبيك فهد
فهد : صباح سجل اسمي لازم انزل هسه
صباح : انت كل دوام تطلعلي سالفه مره انت مره ذاك الولد وهسه رجعتلي ماكو متنزل الوضع مو امان واحنه نحتاجك
فهد : بصوت عالي كلتتتتت اريييييييييد انززززل
صباح : واني ما امشي بمزاجك
فهد : طلعت سلاحي تنزلني لو لا
صباح : صاح شبيك فهد تخبلت
فهد : اقسم بالله اذا ما خليتني انزل افرغ المسدس براسك وداعه عافيتي اسويها وميرفلي جفن نزللللللني كلت
صباح : اهدئ وخلي نتفاهم احنه محتاجيك ما اكدر اخليك تنزل العمليه صعبه وبس انت تكدر تقودها
فهد : اننننننعل ابوووكم لابووو حتى العملللليه كتلك اريييييد انزززل ماعندي مجالل انقاشششك سجليييي نزول احسن الك
صباح : اقدم بيك عقوبه يم المسوؤل والله
فهد : ضربته بوكس طززز بيك وبالمسوؤل كتلك اريييد انزل خليت السلاح على صدره وسحبت اقسام وحق هذا شهر رمضان اذا متنزلنييي هسه اضربك والله العظييييم وداعه مرتييي الي بشده هسه
صباح : بخوف خلص خلص راح انزلك بس ابتعد لتتهور فهد انت ساحب اقسام بس تضغط ترمي عليه والله العظيم انزلك بس ابتعد
فهد : يله كوم سجل اسمي ييييييييله
صباح : سجلت اسمه بسرعه ... خلص روح
فهد : طلعت اركض واحس روحي جاي تطلع
صباح : شكيت الورقه ... الووو سيدي الضابط فهد ترك العمليه وراح ينزل اعرف كتله ميصير بس اصر ينزل اني حبيت ابلغكم وانتو تصرفو ويا تره هواي تمرد ..... ما ماشي ماشي سيدي
______________________
علي : يمه كومي رجعي للبيت الله يخليج صارلج اربع تيام هنا موزين عليج وانتي صايمه
ايمان : شلون تريدني اعوف مرت اخوك واروح لابد اختك يمها بنات عمك والحجيه اله هالمسكينه لا ابو لا اخو ولا احد يمها شلون تريدني اعوفها
علي : يمه لتتأملين مادامها ماكعدت من اول يوم بعد متكعد
ايمان : ولك انجب فال الله ولا فالك شبيك تحجي هيج كول يا الله مابيها شي ان شاءالله ... كمت اباوعلها يايمه الله يكومج بالسلامه والله احطج بعيوني بس كعدي الله يشهد احس بتي النايمه جوه ومن وكعت بتي عفتها وبقيت يمج لخاطر فهد كعدي اباوع مجبسين رجلها ومضمدين جسمها المشكله امرها كله متعلق بكلبها اذا كلبها يستجيب تكدر تكعد ووضعها طبيعي لان العمليات نجحت بس كلبها الي نبضه ضعيف واستجابه للحوافز اضعف
منذر : خاله ماراح نكل لفهد تره هاي سادس مره يدك عليه واتجنب اجاوبه وحتى علي كام ميجاوبه ليفلت بحجايه ويدري
ايمان : مثل ما كتلكم لحد يجاوبه مااريده يجي والوضع خطر هسه مو مال يرجع والطريق مو امان خلي يرجع ويه جماعته ولا وحده
منذر : بس مصيره اول وتالي يعرف
ايمان : بلكت والله تكعد كبل جيته هو كال ابقه اسبوعين بلكي منا لاربع تيام هي كاعده
منذر : بلكت والله
_______________________
فهد : طلعت بالليل تحت صياح جماعتي بسبب خطوره الرجعه هسه بس ميهمني الي يهمني هسه غنى وبس اسوق وكلبي يدك بسرعه احس روحي راح تطلع .... يارب دخيلك احفظها الهي عسى الاذى بيه ولا بيها ضليت اسوق بسرعه واريد بس اوصل بالي يمها ياترى شلون وضعها هسه .... وليش كال فيصل وضعها موزين وبالعنايه ... وصلت الساعه 12 بالليل لبغداد وبسبب هويتي تسهل دخولي لكل السيطرات دخلت لبغداد وتوجهت للمستشفى فوراً ذبيت سيارتي بسرعه ونزلت اركض بالممرات سألت ... اكو مريضه اسمها غنى صالح هنا
: اي نعم بس بالعنايه المركزه متكدر تشوفها
فهد : زين اهلها وين
: بالطابق الاول بالممر الخامس تلكاهم يم غرفه البنيه الوياها اروى
فهد : ماشي رحت امشي بسرعه بس اريد اوصل
علي : كاعدين نحجي اني ومنذر وما اشوف غير فهد ببدلته العسكريه كدامنه
فهد : جريتهم عليه ليش محد كلي بيكمممم مرتي مسويه حادثث اربع تياااام اربع تيااام هي ناييييمه هنااا واني اخر من يعلم لييييييش
علي : صوتك فهد والله خفنه عليك ترجع بهالوضع وما كنالك
فهد : وانتووو احرص مني عليهاااا لو على نفسييي ... احجوليييي شلون صار الحادث
منذر : جان عيد ميلاد شهد ورادن يرحن للسوك وان.... سولفتله كلشي
فهد : وانتوووو شلون تخلوهن يرجعن بتكسيييي اني شكايل الكم مو كايل نسوانه ميطلعن وحدهن حميييير انتو
منذر : والله رجعن وحدهن محد يدري بيهن ماخذات تكسي
فهد : مسحت على وجهي وهسه وينهن هنه
علي : اروى بهاي الغرفه وغنى بذاك الممر بالعنايه المركزه متكدر تشوفها
فهد : دخلت للغرفه البيها اروى ... اباوع كلهم كامو
عباس : هاا عمي الحمدلله على سلامتك شجابك بهالوقت
فهد : الله يسلمك طلعت قبل جم ساعه وهسه وصلت تقدمت بست راس اروى الحمدلله على سلامتج حبيبتي
اروى : بدموع فهد اني اسفه والله مو قصدي
فهد : قاطعتها اشش مو وكت هالحجي المهم هسه صحتج بعدين نتناقش
ايمان : حضنته بعد كلبي يمه ليش هسه اجيت والطريق مو امان شلون تنزل
فهد : روحي بين الحياة والموت وترديني اعوفها صدك تحجين ... عفتها وطلعت رحت للعنايه وكفت يم الجامه بس صارت عيني عليها حسيت الدنيا ضاكت بيه ... منظرها ميسر لا عدو ولا صديق .. ابتعدت اني لازم ادخل يمها رحت للدكتور اعرفه معرفه بعيده
الدكتور : اهلا وسهلا سيد فهد شلونك وين هالغيبه صار فتره طويله ما شايفيك
فهد : بهدوء تسلم دكتور والله مشاغل
الدكتور : احجي خيرك
فهد : مرتي بالعنايه المركزه واريد اشوفها وضروري هم
الدكتور : بس ميصير
فهد : دبرها دكتور فلوس بطيخ اي شي المهم اريد اشوفها
الدكتور : ماشي تعال وياي
فهد : كمت بدلت ودخلت للعنايه ويه الدكتور ... شلونه وضعها
الدكتور : اني سوينه كل العلينه سوينالها العمليات اللازمه وضمدنه كل جروحها والباقي يعتمد على كلبها لازم هو يستقبل حتى الجسم يرجع لوضعه الطبيعي فما بالك اذا هي كلبها موزين ... يله اعوفك يمها ورجاءاً للتأخر
فهد : كعدت وعيوني عليها اباوع وجها ما متأذي مثل اروى بس رجلها مجبسيها هي وايدها ... لزمت ايدها على كيفي اباوع للايد الجانت تضوي من البياض والجمال هسه مزينتها اثار الحادث دنكت بستها بهدوء
هو هذا الوعد مو كلتي ادير بالي على روحي تالي اروح عشر تيام اجي الكاج هيج صار بيج باوعتلها ... يعني شيصير هسه لو اني النايم هنا وانتي كلشي مابيج وزينه .... بهدوء غنى كعدي حبيبي لتعوفيني وحدي ما اكدر بدونج اني منو احجيله اسراري وافضفضله كل البكلبي اذا عفتيني كعدي ياعمري
احسيت بصوتي بده يروح ويشحرج تنهدت بصوت عالي غنى احبج لتعوفيني وحدي ما اكدر اعيش بدونج لحظه وحده هاي الدقيقه لو مرت وانتي ما اجيتي على بالي احس ناقصني شي صدكيني هاي اول مره كلبي يدك لمره واحبها لهالدرجه تلمست وجها الله يخليج لتعوفيني تره شفت ضيم وقهر بحياتي ماعندي قابليه اتحمل بعد وبالاخص فراكج انتي صدكي لو فاركتيني الحكج والله شسوي بهالدنيا وانتي مو بيها
بوست ايدها بعمق تدرين ماعرفت روحي احبج غير لمن صوتي تشحرج على مودج كومي غنى اني تعبان اريد احضنج وتلعبين بشعري كومي حبيبي اريد اتمم زواجنه واخلف منج كومي ياعمر فهد كله اني لاشيئ بدونج .... اباوعلها ماكو اي ردة فعل عليها كل الي ينسمع صوته بهالغرفه هو صوت الاجهزه المحاوطتها
ضليت كاعد يمها ما اعرف شحجي وياها ولاول مره يخوني التعبير وما اعرف شكول سمعت صوت الممرضه تكلي اطلع طلعت كعدت بره وبالي يمها صار اربع ايام من نجحت عمليتها بس ليش لسه ما كعدت وليش كلبها ماجاي يستقبل اي شي
ياسمين : كعدت يمه شبيك
فهد : مابيه
ياسمين : تحبها
فهد : روحي بيها مو بس احبها
ياسمين : اول مره اشوفك بهالحاله الاعرفه عنك قوي وميهزك ريح
فهد : اله هي الوحيده الي مستعد اسوي كلشي على مودها .... الانسانه الوحيده التكدر ترجعني مثل الطفل بحضنها .... الوحيده الي اظهر ضعفي وقوتي وكلشي بيه كدامها بدون ما اخاف هاي صندوق اسراري وحبيبتي احبها لدرجه مستعد اضحي بروحي على مودها والله لو هسه يخيروني بينها وبين نفسي اختارها هي .... ابتسمت تدرين من حسيت روحي راح ابجي عليها عرفت نفسي احبها من حركتني عيني تذكرت قبل 12 سنه من بجيت يوم الابويه جواني وجع كلبي بذاك اليوم اهون من وجع كلبي هسه
ياسمين : مسحت دمعتي حبيبي لتخاف و وكل امرك لله ومرتك مابيها غير كل العافيه
فهد : حجيه اني مو امي ولا اخوتي وتكدرين تقنعيهم بكلامج ... اني اعرف وضعها موزين وكلبها ماجاي يستقبل فلتحاولين تضحكين على عقلي
ياسمين : لتستهزء بكلامي الكادر ينقذ بشر من وسط نار ميكدر يحميلك مرتك ... توكل على الله وشوف شلون مرتك تكوم مثل الورده المفتحه
فهد : هزيت راسي مستعد كلشي اسوي حتى لو كلبي انطي الها بس كون تكعد
ياسمين : اول مره اشوف فهد هيج ... اباوعله وجهه مطعون والعيون حمر ميقبلن يبجن حتى وانت بهالوضع حاصر دمعتك بعينك ... عرفت حفيدي عابر الحب ويه مرته لوما يحبها ماتدمع عينه عليها واني اعرف فهد تربيه ايدي متدمع عينه غير لمن تنهان كرامته وينكسر كلبه تنهدت مطبطبه على ايده مواسيته شريد اسوي غير اواسي
_________________________
ايمان : طلع الفجر وبده يوم جديد وفهد من البارحه على كعدته مكابل مرته وكاعد وحتى سحور ماقبل يتحسر جر صيام يوم وره يوم ... حاجو اخوكم خلي يرجع للبيت يبدل يغسل من البارحه لليوم هو نفس وضعه
علي : حاجيته اني وحارث ماقبل
محسن : فهد كوم شوف حالك بالبدله العسكريه من البارحه ارجع بدل وتعال
فهد : بهدوء ما عليكم بيه التهو برواحكم
محسن : فهد تره انتظارك هنا وضغطك على روحك لا يزيد ولا ينقص على الوضع روح بدل اسبح انت صايم وروحك الها حق عليك ميجوز التسوي بروحك
فهد : فكو ياخه عني رحمه لدينكم ... كمت رحت يم العنايه شفت مرتضى عيونه حمر ماعندي قابليه حتى احجي وكفت يم الشباك ... هاا ياروحي ماناويه تكعدين هذا خامس يوم ما اشتقايتي للصلاه صار خمس تيام انتي ما مصليه ميجوز الله يحاسبج كومي حبيبي خلي نصلي اني وياج مشتاق اكعد واقره قران وياج
عباس : لزمت متنه عمي انت تؤمن بالله
فهد : اكيد
عباس : توكل على الله وروح بدل وتعال اذا تعبت وتخربطت منو يبقى ويه مرتك على الاقل مادام انت بصحه زينه تكدر تبقى وياها اذا تعبت وهي هم تعبانه راح تأذي نفسك وتأذيها روح عمي ارتاح وكلنه يمها الله يشهد حالها من حال بناتنه
فهد : هزيت راسي وطلعت اخذت سيارتي وطلعت راجع للبيت وصلت وكفت السياره ونزلت دكيت الباب حتى خلك ماعندي اطلع مفاتيح البيت فتحو الباب جهال فيصل سلمو عليه رديت عليهم بهدوء حتى مابوستهم دخلت لكيت الكل كاعدين
الكل : الحمدلله على سلامتك
فهد : هزيت راسي وصعدت ما حجيت ويه احد فتحت باب الغرفه ودخلت غمضت عيوني من داعبتني ريحتها اول مادخلت .... افيييش اذا بس ريحتج هيج تسكن روحي لعد جسمج وصوتج شيسوي بحالي نزعت بدلتي ودخلت للحمام سبحت وطلعت بدلت اباوع بالوحده الظهر فرشت السجاده ووكفت اصلي بكل هدوء .... كملت صلاة رفعت ايدي للسما .... إلهي دخيلك كومها بالسلامه ولتحرمني منها ما اكدر اعيش بدونها هاي روحي من هالدنيا يارب مثل ما زرعت حبها بكلبي ازرع العافيه بيها هاي اول مره اتوجه وادعي لتردني إلهي طلبت عافيتها منك ونذر عليه لو طابت اعوف الشرب واعوف الملاهي وكلشي جنت اسوي بس خليها تكعد ويحرم عليه كل شرب وتحرم عيني تشوف شكو شي انت محرمه
إلهي احلفك بأعز ماعندك تحفظ اعز ماعندي لتردني خايب ربي هاي اول مره ادعيك عمري ماطلبت شي لنفسي وهاي اول مره اطلب شي لروحي اريد غنى منك ربي اريد صحتها ترجع ومحد يكدر يرجع صعتها غيرك .... تنهدت مغمض عيوني وصوتي تشحرج مره ثانيه ربي اذا هذا اختبار فأختبارك صعب الهي واني اعترف مو كد هالاختبار اختبرني بكلشي اله بيها وما اكدر كلشي ولاهي احبها ربي احبها مااكدر بلاها وانتهي لو عافتني .... سمعت صوت الباب كمت غسلت وجهي وطلعت شفت ورده ... هاا ورده
ورده : بدموع شلون صارت غنى
فهد : مسحت على راسها ان شاءالله تكون بخير ادعيلها ورده
ورده : والله جاي ادعيلها بكل صلاه تره اني احبها هواي
فهد : مستحيل واحد يحبها بكدي وخرتها عن طريقي وطلعت راجع للمستشفى وصلت لكيتهم متجمعين يم العنايه .... خير شبيكم
منذر : الدكاتره طبو للعنايه ... باوعتله وماكدرت احجي
فهد : بهدوء احجو لتبلعمون
علي : مرتك وكف كلبها وجاي يسعفوها
فهد : غمضت عيوني وحسيت حيلي انهد
حارث : اباوعله انكلب وجها وخشمه طك دم فهد خشمك طك دم
فهد : لزمت خشمي عرفت صعد ضغطي كعدت بسرعه
علي : كوم خلي اخذك يقيسون ضغطك
فهد : خليت كلينسه على خشمي ... ماكو داعي وخرو عني
منذر : فهد كوم افطر حباب متشوف حالتك شلون صارت
فهد : صحت مالللللللكم علاااقه بيييه ... ضليت كاعد ولساني يلهج بالايات الحافظهن ماعندي اي شي اسوي غير بس اقره ايات اريد اهدئ واكدر اسيطر على نفسي اهدئ فهد اهدئ ماراح يصير عليها شي هي متعوفني مستحيل تسويها .... طلعو الدكاتره وره نص ساعه كمت بسرعه هاا
الدكاتره : عدنه مجال منا لخمس ساعات اذا ماكعدت نعلن دخولها بغيبوبه اشبه الموت السريري لان كلبها ماجاي يرجع لنبضه الطبيعي وصارله خمس ايام ينبض بشكل ضعيف لحد ماوكف كبل ساعه وكدرنه بالصدمات نرجعه للنبض الضعيف وهالكم ساعه الجايه هي التحدد مصير حياتها واذا مارجع نبض كلبها منتظم منا لخمس ساعات يؤسفني ابلغكم حياتها تنتهي لان كل اجهزه جسمها تتوقف ويبقى بس العقل
ايمان : لا دكتور لا لتكولهاااا
الدكتور : اني اسف بس هاي الحقيقه من رختصكم
ياسمين : فهد يمه احجي شي لتضل ساكت
فهد : اكو مصلى هنا
ياسمين : شنو
فهد : بهدوء اكو مصلى هنا
علي : اعتقد اي اكو
فهد : وينه
علي : بذاك الممر شفت مكتوبه قطعه
فهد : عفتهم ومشيت شفت الغرفه اعتقد مصلى مال نساء فتحته مالكيت احد دخلت بسرعه ذبيت حذائي (تكرمون) وفرشت سجادتي ووكفت اصلي احس هذا اخر امل بقالي هالخمس ساعات لو راح تحييني لو تموتني وللابد هم كمت اصلي ووره كل صلاه قضاء حاجه اكعد اقره قران واصلي واقره وماحاس على روحي .... تذكرت حجايتها " اذا تعبت اركع " ركعت واني اناجي ربي ينجيها مرت الساعات وكلما اشوف قرب الوقت كلبي يدك بسرعه بعد عشر دقايق وتنتهي الساعه .... اذا انت صدك الله اريدك تبين قدرتك بيها وتنقذها .... خمس ساعات متواصله اني اصلي وادعي بس حتى تكعد ... كمت طلعت من الغرفه مشيت شفت محسن كبالي وسمعت صياح خله الدنيا تفتر بيه
: لاااااا دكتوووو لاا
****
يتبع
- يتبع الفصل التالي اضغط على (ذنوب على قيد الغفران) اسم الرواية