رواية ذنوب على قيد الغفران الفصل السادس و الاربعون 46 - بقلم براء
فهالسادس والاربعون
اروى : يله حبي مابقه شي وانتي يمنه
نرجس : هاا شنو قصدج
اروى : قصدي انتي تعرفي يامرات اخويه ياحبيبت البي (بالمصري) غمزتلها خاف عبالج ما ادري تره ادري ومطنشه بمزاجي
غنى : باوعتلها تعالن تعالن شو كولشي مدافهم اجت اروى تحجي ودك الموبايل طلع اسم فهد على الشاشه عفت الكدر وجريت الموبايل ناهيه مكالمه نرجس حتى السالفه نسيتها
اروى : ولج وين
غنى : بعدين بعدين اخذت الموبايل وطلعت بسرعه للحديقه حتى اسمع زين .... فتحت الخط الوووو
فهد : الوو هاا نونه
غنى : وينك فهد وكعت كلبي عليك صار فوك الساعتين مكابله الموبايل ومنتظره مكالمه منك
فهد : اسف موبايلي ماجان بي شحن وانتظرته يشحن واخابرج اني قبل ساعه وصلت
غنى : طمنتني الحمدلله على سلامتك تدري ضل بالي يمك من طلعت لحد الان
فهد : ادري بيج
غنى : شكد حتبقى هناك مكلولك
فهد : والله لحد الان ما انطونه اي معلومه عن الالتحاق المفاجئ هذا ... وبعد ربع ساعه عدنه اجتماع كلت اخابرج قبل لا اروح
غنى : من يكلولك كلي حباب
فهد : صار اكو شي ثاني
غنى : اي صليت صلاة الظهر
فهد : اي اول ما وصلت توضيت وصليت حتى ما انساها
غنى : وفطرت لو لا
فهد : لا مافطرت
غنى : لا شلون انت تعتبر على طريق سفر ولازم تفطر
فهد : اعرف بس شو ماهانلي افطر وكملت الصيام عود اذا بقيت لعشر تيام اكثر انوي اقامه واصوم بشكل طبيعي
غنى : عفيه عاشت ايدك
فهد : يله تردين شي
غنى : لا سلامتك .. مع السلامه
فهد : مع السلامه حبيبي ديربالج على روحج وعلى امي هم ما اوصيج
غنى : هاا شكلت
فهد : باي باي
غنى : سديته منه واني صافنه كزبر جسمي من سترجعت نبره حبيبي بصوته ... ابتسمت اروحلك فدوه اني ... دخلت جوه صارت ليلى بوجهي
ليلى : اني مو كلت لفهد اريده بشغله مهمه ليش عافني وراح
غنى : اجا امر مستعجل وانجبر يطلع بسرعه
ليلى : والامر المستعجل ماطلع اله لمن اني ردت احاجي
غنى : هاي بعد شغل وصارله شيسوي
ليلى : وليش تحجيها بثكل
غنى : لا ابد بس اني هيج نبرتي
ليلى : صدك لا كالو ... وافق شنن طبقه انتي وفهد نفس الطريقه بالكلام تفتون الكلب والله ... روحي عني شوفي شغلج
غنى : مجاوبتها اصلا مابيه حيل روحي وانوب فهد راح زاد الطين بله ... رجعت للمطبخ هاا كملتي
اروى : اي بس ينشف الماي ويه الشكر واصبها
غنى : خليتي هيل
اروى : اي خليت ما كتيلي فهد شكلج
غنى : ابتسمت وصل قبل ساعه بس موبايله مبي شحن وانتظره يشحن ويخابرني وكلي اطمنكم عنه
اروى : الحمدلله شفتي من الظهر لسه تفترين رايحه جايه وتاكلين بروحج تالي طلع كلشي ماكو
غنى : الحمدلله يمعوده اهم شي وصل بخير شفت بتول دخلت يله اني حصعد لغرفتي اذا احتاجيتو شي صيحيوني
بتول : ليش من شفتيني طلعتي شنو شايفه جني
غنى : من رخصتج وخري شويه عبرتها وطلعت راح فهد وبدت سوالفهن التافها ويايه صعدت فوك فتحت غرفتي ودخلت ذبيت حجابي وملابسي لزمت القران ستوني فتحته واندكت الباب بس لا ساره اني ماعندي مشكله وياها بس فهد ميقبل احد يدخل وهمه من يجون يحرجوني واضل بين نارين .... كمت منو
آلاء : اني
غنى : فتحت الباب شفت آلاء
آلاء : شنو راح تخليني واكفه
غنى : هاا لا تفضلي ... اباوعلها طبت وراحت كعدت
آلاء : اي شلونج شخبارج
غنى : اباوعلها مرتبكه و وضعها مو تمام ... الحمدلله خير اكو شي
آلاء : لزمت ايدها اني اجيت اعتذر على الصار قبل فتره والله بعد ما اسويلج شي بس لتخلين فهد يطلعنه من البيت والله لو طردنه نصفه بالشارع
غنى : اهدي اهدي لتبجين حبابه وفهميني
آلاء : بدموع شلون مترديني ابجي واني وجهالي راح نصفى بالشارع ومتأكده فيصل مو بحالنه ولا يكلبنه حتى امه يذبها لو طلعنه فهد من البيت
غنى : منو كلج حتصفون بالشارع ومنو كال اصلا فهد حيطردكم من البيت
آلاء : ورده كلتلي عود فهد كايل مادام يأذون مرتي ما الهم كعده ببيتي وبس ارجع اطردهم بالشارع
غنى : خليت ايدي على حلكي هاي ورده كلتلج هيج
آلاء : اي والله قبل شويه كلتلي واني تخبلت واجيت احاجيج الله يخليج والله بعد كلشي ما اسويلج ومالي علاقه بيج بس لتخلين فهد يطلعنه من البيت ابوس ايدج والله اني اسفه حتى شغل لتستغلين بعد بس عوفينه هنا
غنى : اباوعلها بندت من البجي قهرتني مسحت على ظهرها اهدي اهدي والله فهد محجه ولا كال راح اطلعهم يجوز ورده فاهمه غلط فهد ميسويها خاصه انتو تبقون اهله وهذا الواكف بعينه لتخافين والله ميطلعكم من البيت
آلاء : بدموع الله عليج يعني ماراح يطلعنه منا
غنى : لا والله
آلاء : الحمدلله والله وكع كلبي واجيت اتخبل اني جدا اشكرج واسفه بعد ما اسويلج شي
غنى : مصار شي
آلاء : يعني انتب متأكده ماراح يطردنه
غنى : اي متأكده
آلاء : ابتسمت الله يبشرج بالخير ... كمت يله من رخصتج اروح اسوي الفطور انتي كلشي لتسوين
غنى : اباوعلها طلعت اخذت شالي وطلعت وراها رحت لغرفه ورده لكيتها لازمه الايباد لان اليوم خلصت الامتحانات ومن الصبح لسه مكابله النت وكاعده ... جيبي الايباد
ورده : ليش
غنى : جيبي اريد احجي وياج اخذته منها خليته على صفحه ... انتي شكايله لآلاء
ورده : ببراءه شكايله
غنى : ضميت اديه ورده هاي سوالفج مشيها على الكل مو عليه ... اني اعرفج زين احجي ليش كايله لآلاء بس يرجع فهد يطردكم
ورده : ههههه بس لا اجتج تتوسل
غنى : اي وبندت من البجي ليش هيج سويتي مو انتي صايمه شلون تجذبين
ورده : شوفي اني خلصت امتحانات اليوم وتفرغتلهن والله لخليهن يتخبلن عبالكم اذا عندي امتحانات وملتهيه ما اعرف شيصير بالبيت تره رمضان كله شفت اسلوبهم وياج واخر شي البارحه خلن فهد يصير عصبي وكلبن اليوم على راسنه فكلت اسويلهن جرة اذن ورحت بوست احمد وزينه وكتلهم راح اشتاقلكم وهي سألتني واني كتلها فهد كال بس ارجع اطردهم وهي شاطت وصار المطلوب
غنى : هزيت راسي انتي شنو ولج مصيبه خليتي البنيه تدك وتلطم
ورده : يطبها ستين مرض محد كلها تصير سخيفه وتعيش دور الاميره بالبيت تستاهل خلي تضوك اللوعه حتى تبطل خباثه سموميه وهسه جيبي ايبادي يامرت اخويه العزيزه لان كاعده اشوف حبيبي وانتي قاطعتي كعدتنه
غنى : فتحت عيوني حبيبج شنو ...فتحت الايباد وباوعتلها عود صدوك تحجين النمر الوردي ؟!
ورده : هههه لعد شعبالج طبعا اني كلش احب الكارتون وخاصه كارتونات سبيستون اعشقها ماكو مثلها
غنى : دهاج عبالي عدج سالفه يله اعوفج وعفيه ورده فدوه اروحلج لتعيديها بعد ما اريد تصير مشكله وتدرين فيصل شيسوي بيج وفهد ماهو حتى يكدرله فسمعي الكلام حبابه
ورده : بستها من عيوني على هالاسلوب الحلو شتردين اسوي
غنى : ابتسمت ورجعت بستها عفيه بالورده
_________________________
صباح : مثل ماتعرفون راح تصير مداهمه شامله على كل مقرات الارهاب وهالخطوه صار فتره نخططلها ومترددين على تنفيذها لخطورتها علينه وعلى الشباب الويانه ولافتقارنه للعدد المطلوب تم الامر بجمع كل القوات سوه حتى تصير دخلتنه دخله وحده
فهد : العفو منك بس هذا غباء اذا دخلنه كلنه ماكو اي دعم النه لو افرض متنه بقمبله بمدفع او وصلتهم اخبار عن هالمخطط بكل بساطه يكدرون يدمرونه بالاسلحه والقنابل والمعدات العدهم وساعتها كلنه بلحظه وحده نطير فكرو شويه الراح تحاربو جيش غدار ميجيك من كدامك ويقاتلك لا يتختل ويطعنك بظهرك
صباح : نكدرلهم مو فد.شي صعب
فهد : شنو مو شي صعب ... افهموووو يا مسلمين الله انو احنه ماراح نحارب الجيران وكلمن توثيته بأيده احنه داخلين نرجع بلدنه وناخذ حق اهالينه وعرضنه حاولو تستوعبون الفكره لو وصلهم خبر بمخططكم ياترى راح نكدر نسيطر على الوضع ... الجواب اكيد لا
فشلون تخطون هيج خطوه وغانم شلون يقبل وكل الموجودين ما موافقين وكل الرتب الحاضره هسه ماموافقه على قراركم
الكل : اي صح كلامك
صباح : ضابط فهد انت لازم تعترض على كلشي يعني هاي اوامر واجت من فوك لازم تكعد تدقق وتعلق عليها
فهد : وشعليهم المسوؤلين الفوك بس ينطون قرارات وهمه بمكاتبهم واحنه الصايرين بوجه المدفع تره الجاي تروح ارواح مو لعبه شغلو مخكم شويه احنه نريد نقضي عليهم بأقل خسائر ممكنه وانتو جاي تذبونه بالنار بسوايتكم هاي
مهيمن : كلام الضابط فهد صحيح هيج خطوه خطره وغير مدروسه والمفروض انتو متخاطرون بحياتنه هيج وكأنها شي عادي
: فعلا هالخطه ابد مو ناجحه وما بالمثل احنه عدنه اسلحه حديثه ومجهزين بشكل كافي من كل النواحي حتى نكدر نسيطر ..... رجاءاً حاولو تراعون انو الاسلحه العدنه مقارنه بالموجوده عدهم لا شيئ صحيح احنه مدربين بشكل ممتاز بس هالشي مو كافي واحنه ماعدنه كفائه الاسلحه العدهم ... المفروض بكل خطه تخلوها تحذروهم لان كلشي يتوقع منهم وهمه ملازمين ابليس بالتفكير والغدر
فهد : لعد اني شجاي اكول ... اكو مثل سامعه ؤكول .... بعدوك لا تستهزء تاليته يغلبك لازم نكون نبهين حتى بالخطط النخليها و فكره انو ندخل دخله وحده هاي مليون بالميه مفكرين بيها ومتحضريلها
ايمن : واذا انتو ما خايفين علينه خافو على هالشباب ذوله شنو شافو من الدنيا وتضحون بيهم هيج خلو خططكم مدروسه حتى نكدر نسيطر على الوضع
حيدر : والله محد عتب عليهم هالشباب وكلهم تطوعو
فهد : انت تشاقه لو تحجي صدك ... شنو محد عتب عليهم هذا بلدهم وجهادهم واجب ومسوؤليه عليهم بس مو معناها نضحي بيهم ومنخاف على حياتهم وارجع واكول احنه جايين حتى نحرر بلدنه مو حتى نموت كلنه عدنه حياة وبيت وعائله منريد نخسرهم واذا انت سبع وبراسك خير روح وحدك مو كاعد بمكتب واحنه النشتغل ... كمت صباح رجاءاً حاول تتواصل ويه المسوؤلين وتتناقشون بالموضوع هالمره لازم تفكر بشكل حذر والا انت اولنه التموت لان مستحيل اذا عددنه جبير نكدر نغلبهم
صباح : بعصبيه شلون منكدر نغلبهم اذا دخلنه بعدد جبير ودخله وحده نكدر نسيطر عليهم
فهد : لتنسى النبي محمد(ص) بمعركه من معاركه جان جيشه اقل من جيش الكفره وبهواي هم وتالي انتصر عليهم فالفوز مو بالعدد بالاداء يا سيد صباح وهذا شي درسنا بالكليه واذا ناسي اذكرك بمحاضرات الاستاذ خليل وشجان يكول بيها من رخصتك عفتهم وطلعت
ايمن : عود كل عقلهم يردونه نطب عليهم طبه وحده
فهد : هذا بس حجي ما اعتقد ينفذو ميكدرون يخاطرون هيج مخاطره شنو تردون مجزره سبايكر تنعاد آلالاف الشباب راحو ولحد الان جثثهم جاي تنلكه تردوهم يعيدون نفس الفلم لا ميسووها هسه يقسمونه وندخل على شكل دفعات
عمر : هذا احسن قرار بس منو كال
فهد : اني اكلك هسه يتراجعون عن هالخطه لتنسون الاشتباكات الصارت بيناتنه جاي تخلينه ننتصر عليهم بسبب كفاءه الشباب الله يخليهم صحيح انطينه هواي ولد بس بالمقابل كدرنه نوصل لهدفنه وان شاءالله مابقه شي وتتحرر الموصل ومن بعدها كل واحد بينه يرجع لشغله الاساسي
مهيمن : ان شاءالله تفض على خير والله هالبلد تعب
فهد : مره واحد كلي ... اذا احب الله عبداً ابتلاه ويحوز الله من حبه لبلدنه يبتلي شعبه بمصائب يختبرهم بيها
عمر : منين سامع هالحديث
فهد : اولا هاي ايه مو حديث وبالنسبه للي كلي تنهدت واحد عزيز عليه دائما يكوله الي
مهيمن : عزيز وعليك انت هاي من شوكت عدك عزاز انت
فهد : تنهدت من فتره صار عندي اشخاص اكثر من عزاز على كلبي بحيث الحجايه لو طلعت من حلكهم تكلبني ميه وثمانين درجه
ايمن : هاا هاا عرفته الواضح الزواج هواي مغيرك لا وشفتك صليت اول ما اجيت ... حركت حواجبي الواضح المدام هواي ماثره عليك
فهد : كوا.... متصيرلكم جاره وطار صيامك يافهد خرب يا ولد الكلب راح صيامي من وراكم
الولد : ههه صيام مقبول
____________________
غنى : واكفه اساعدهم بالفطور وهاي ليلى صرعت راسنه ولا جنها صايمه استلملتك العالم واحد واحد فلان سوه هيج وعلان سوه هيج
ليلى : خاله شفتي مرت عمي حياة شمسويه بروحها شفتيها صابغتلي الشعر ومخصلته بله مو عيب على
ايمان : يا امي احنه شعلينه كلمن حر بنفسه اللهم اني صائم بنتي لتشيلين غيبه احد صيامج يروح
ليلى : اني ماصايمه عليه الشهريه
غنى : باوعتلها هاي صدوك تحجي جهال كاعدين ويلكفون الحجايه بسرعه وحتى لو احنه بس نسوان هم عيب واحد يحجي بهالمواضيع
سالم : ماما ثنو ثهريه
انغام : هاا حبيبي شهريه يعني يعني
ايمان : تعال بيبي سويتلك حليب شربه انت مو جوعان هاك حبيبي يله روح شربه بالصاله
ساره : هاا شمسويات فطور
اروى : ليش انتي صايمه حتى تسألين
ساره : لا نفسه ميصير اصوم ... اكول شمسويات صبلي لان ميته من الجوع
آلاء : هذا الاكل للفطور ما طبخنا لحلكج
ساره : والله الاكل مو من جيبج من جيب حمايه فهد فما عليج ... غنى صبيلي حبابه تدرين بيه نفسه وما اكدر
ايمان : شسالفه لو كل نفسه مثلج جان بطلت النسوان تحبل كافي صارلج فوك الاسبوعين من جايبه تكدرين تكومين على حيلج وتتحركين يابنتي كافي اكل ونوم اكل ونوم مو والله موزين عليج
ساره : خاله اضل سهرانه ويه محمد وانام متأخره غير هيج دائما جاي اجوع شسوي شنو لكمتي ثكيله عليكم انطوني صبر خلي يطلع الاربعين واكوم
ايمان : خلي نشوف وره الاربعين وره الاربعين يمه غنى صبيلها
غنى : اخذت ماعون وطاسه صبيتلها جنه مسوين مركه لوبيه
ساره : كثريلي مركه لازمني تغذيه
ليلى : هذا الياخذله فكر لو شكد ما ينطيها تبقى عينها ضيكه
ساره : ماراح اجاوبج لان مالي مزاج
غنى : تفضلي
ساره : عاشت ايدج يامرت الغالي يله اعوفجن مااريد اكل كبالجن وانتن صايمات ميجوز
غنى : كملنه كولشي واذن الاذان فرشنه السفره وكعدنه نفطر
علي : وين فهد
غنى : التحق الصبح
علي : ليش مو المفروض تخلص عطلته بعد يومين
غنى : هذا المفروض بس اجا امر
فيصل : هسه يطلع جذاب ومعرس عليج ورايح يم مرته سوالف الزلم متخلص
ورده : اي مو هو فيصل ابو الوصخ عود يشاقه
اروى : انجبي ليسمعج
فيصل : شو ساكته مرت فهد
غنى : فهد ميجذب لتكول جذاب
سعاد : شدعواج عيني شكلج ونطيتي
غنى : منطيت بس سألني وجاوبته
ايمان : اكلي عوفي الشوربه هاج رمي عظمج مابيج كل لحمه
فيصل : خاله فهد شبع باللحم خلي يتونس بالعظام
غنى : لبسته ولا جاوبته عرفته مومال واحد ينطي وجهه .... كملنه اكل وكفت اغسل مواعين الفطور والاء كالت هي تغسل السحور والله سوالفج يا ورده خلت البنيه تمشي مثل الساعه ... انغام حبيبتي بلا امر عليج فدوه صبي جاي خلي اكف المواعين
انغام : ياا صدك جذب تدللين
غنى : راحت انغام تصب الجاي واني اغسل بالمواعين وبالي يم فهد ياترى هسه فطر لو لا وشأكل بالفطور سوده عليه مقابل يفطر ... يربي بجاه حبيبك محمد كون تتحرر الموصل ويرجعون ولدنه سالمين ونرتاح ... واكفه امسح الطباخ وسمعت صوت فيصل درت وجهي
فيصل : غنى خوما زعلتي مني تره جنت اشاقه وياج
غنى : لا عليمن ازعل منك انت اخو زوجي وبمقام اخويه
فيصل : وكفت يمها اكول على طاري اخويه متعرفين بأي بنك حاط فلوسه لان اريد اخلي فلوسي بنفس البنك واامن عليهن
غنى : هاا لا ما اعرف اسمه
فيصل : معقوله يعني فهد ميحجيلج وين خال فلوسه والملايين العنده
غنى : لالا كولشي ميحجيلي اصلا ولا عندي كل علم
فيصل : ليش مو المفروض انتي مرته وكلشي تعرفين عن حياته
غنى : اكو اشياء اني ميخصني بيها وفلوس فهد مكانهن ونسبتهن مو شغلي
فيصل : تدرين اني انقهر عليج
غنى : ابتعدت عنه ليش
فيصل : يعني تزوجتي واحد مخبل وانضحك عليج
غنى : احترم نفسك رجاءاً وديربالك تحجي عليه نص حجايه لا عبالك اني ساكته اسمحلك تجاوز على زوجي
فيصل : ول يابه فديت الشراسه على كيفج اني ماكلت شي غلط رجلج صدك مخبل ... وماصار هيج من وحده وانما من التعذيب طك عنده فيوز
غنى : تعذيب شنو
فيصل : ليش ما حاجيلج عن طفولته
غنى : درت وجهي عليه ليش منو كلك هو محاجيلي شي تره متوهم فهد مسولفلي ابسط تفاصيل حياته واعرف عنه كولشي وبالنسبه للي عاشه فاني ما اهتمله واحبه واحترمه واقدس كل لحظه مرت بحياته سواء جانت زينه او لا عن اذنك عفته ورحت فهد كولشي ما حجالي عن طفولته ودائما يتجنب يسولف عن هالفتره وحتى ابو من يذكره يتحسر بس مع هذا مردت ابين لفيصل انو اني مااعرف شي بس لازم استفسر عن الموضوع ... دخلت لغرفتي تمددت واخذت موبايلي داكه عليه
فهد : الوو
غنى : الوو الله يساعدك.
فهد : ويساعدج شلونج
غنى : الحمدلله فطرت لو لا
فهد : اي قبل فنره فطرت وهسه كاعد على السجاده ستوني خلصت فرض المغرب
غنى : امم شوكت ترجع
فهد : مطول اقل شي عشر تيام
غنى : ليش
فهد : هاي بعد غير شغل
غنى : شوكت ترجع تشتغل بالمركز
فهد : الله كريم مابقه شي
غنى : ان شاءالله خير
فهد : غنى
غنى : همم
فهد : اريد انام بحضنج وتلعبين بشعري نعسان وتعبان من الظهر لسه على فرد وكفه
غنى : سوده عليه عفيه لتضغط على روحك لتنسى انت صايم وهستوك فطرت
فهد : تنهدت شلون فطور هو شوربه ذره ملح مابيها وهم مركه شجر
غنى : هههه شعدكم ويه مركه الشجر
فهد : ما اعرف يجوز عدهم كطين زايد كالو نسوي مرك ونذبه براس المكاريد ذوله
غنى : منو مكرود انت
فهد : تره اني فقير
غنى : ههه اي كولش
فهد : استهزئي استهزئي اعلمج من اجي
غنى : ابتسمت ميخالف
فهد : خو محد ضوجتج اليوم
غنى : لا ابد بس سؤال فهد فيصل سألني عن اسم البنك الخال بي فلوسك على اساس يريد يودع مبالغ هناك ويكول عود امن وهيج شي اني اعرفه بنك (....) بس مكتله كلت خاف متقبل
فهد : عفيه عاشت ايدج ديربالج تكليله ... هذا جذاب لاعنده فلوس ولابطيخ بس جاي يسحب لسانج
غنى : لعد همزين ما كتله ... زين انت شلون وضعك هناك خو متعبك الصيام
فهد : الحر صمط ابو ابويه وهناك لا سبالت ولا بطيخ مروحه كهربائيه ومبرده صغيره واحنه بالصيف الله وكيلج هاي رابع مره اسبح كتلني الحر من وره هالكو....
غنى : وتالي وياك عود هاي انت صايم
فهد : ما اكدر غنى لساني متعود وهالالفاظ ملازمتني ولتحاولين تخليني اعوفها ابد
غنى : مو كاعد على السجاده انت عيب من الله
فهد : الله بكل مكان مو بس على السجاده على العموم عوفج من هالموضوع شلونه اليوم بدوني
غنى : ضوجه وكولش هم
فهد : يله حسبي سبوع سبوعين اني يمج
غنى : ان شاءالله الله يردك سالم انت وكل الوياك بجاه محمد واله
فهد : آمين يله اكوم اخلص صلا اخابرج بعدين باي
غنى : باي ... سديته كمت صليت وكعدت اقره قران رغم فهد خابرني ومبي شي بس كلبي يلعب وممرتاحه كملت وكمت نمت مرن اول ست ايام على خير البيت هدوء نوعاً ما آلاء فكت ياخه عني وليلى حتبقه للعيد عدنه زوجها مدري شلون يقبل تعوفه كل هالفتره
وفهد سوده عليه كل وقت ماعنده اول ايام جان يخابر يكدر يحجي اله هسه وره الفطور يخابرني نحجي شويه ويروح وهكذا .... كاعده بغرفه خاله ايمان اني والبنات نشوف فلم تقريباً عازلين احنه همه يكعدون بمكان واحنه بمكان
علي : دكيت الباب ... يمه كاعده
غنى : لبست حجابي بسرعه
ايمان : تعال يمه تعال
علي : السلام عليكم دخلت لكيتهن كاعدات هاا شو متجمعات هنا
اروى : ليش حبيبي عندك مانع
علي : لا ليش عندي مانع خاصه انتي تنورين بكل وقت ... اكول يمه اريدج بسالفه من رخصتج
ورده : عليمن من رخصتج يمه علي يريد يتزوج هاي اني خلصتك من الاحراجات ادخل بالمفيد خويه
علي : لج انتي شنو شعللليييج تنطين من مكانج
ورده : خاف عبالك ما سمعتكم انت واروى من جنت تقنعها تنطيك رقم نرجس ورشيتها بخمسه وعشرين واخذت الرقم يا ابو فليس
علي : باحراج اكلي تبن عيب الجذب
ورده : كل لروحك
ايمان : لحظه لحظه شبيكم خبصتوني ... ومنو يريد يتزوج وشنو نرجس فهموني شكو
علي : يمه اني قررت اتزوج
ايمان : اي بالمبارك يمه والله احسن قرار بس منو تريد
علي : حكيت راسي نرجس صديقه غنى
اروى : خو كول صديقه اروى
علي : نفس الشي حبيبتي اروى خليني محترمج .... هاا يمه شكلتي
ايمان : صدك تحجي تسألني هالسؤال طبعا اخطبها الك وين الاكي مثل نرجس ورده و
ورده : اني شعليه
ايمان : انتي انجبي اي وين جنه اي خوش بنيه واهلها ناس دره بس شوكت نروحلهم
علي : شنو رأيج من يرجع فهد
ايمان : خليها بالعيد حتى هم نعايدهم وهم نخطبها الك
علي : خوش على حجايتج يله من رخصتكم
غنى : ابتسمت هسه نرجس تركص بجفيه لو تدري
______________________
فرح : السلام عليكم
: وعليكم السلام تفضلي
فرح : اني جنت مؤجره بهذا البيت اليمكم
: هاا اهلا وسهلا تفضلي
فرح : اريد اعرف صاحب البيت وين سكنه الاصلي لان موبايلي ضاع واريد انطي الايجار الاخير فكلت اسأل على بيته وادزه اله تعرفين بعد حرام ويصير بركبتي
: قصدج الضابط فهد والله ما اندل بيته وهو هم ميختلط بأحد من الحي وحتى لهالبيت ميجي غير نادرا ماشايفي قبل بفتره جاي
فرح : يعني ماعندج اي معلومه عنه ولو حتى صغيره
: لا والله كل الي نعرفه عنه ضابط واسمه فهد بس اذا مصره توصليله سألي عليه بالمراكز اكيد يعرفو لان رتبته جبيره حسب كلام زوجي
فرح : اي والله المركز راح عن بالي ... تسلمين حبيبتي الله يوفقج متتوقعين شكد ساعدتيني
: بخدمتج حبيبتي
فرح : طلعت منها بسيطه يافهد اوصل لعنوانك اوصل لو ادري افتر على كل مراكز بغداد بس حتى احصلك ما اكول لا .... وهاي الكح... الماخذها والله ما اخليج تتهنين بي واني رايدته اله اخلي مرته تطلب الطلاك منه وتعوفه اله اخلي يعيش نفس العشته ... الوو الهام وينج عرفت شسوي ويه فهد
________________________
نرجس : كاعده واجتني رساله من علي
علي : حضري نفسج بالعيد احنه يمكم
نرجس : طفرت شنو بالعيد كتبتله شعدكم جايين
علي : ههه غير نخطبج شنو متستقبلون ضيوف ؟
نرجس : شنو منستقبل والله نبوسهم من الباب ... بس لحظه ميصير ابين ميته عليه ... كتبت اهلا وسهلا بيكم
علي : وبيج اكثر حبيبتي
نرجس : احترم نفسك عيب حبيبتي
علي : لعد شكلج
نرجس : كلشي لتكول استحي شويه
علي : ههههه خلص حبيبتي وحياتي وعمري شتردين بعد
نرجس : وكلبي نسيتها
علي : وكلبي بعد شتردين
نرجس : ابتسمت اوي مامصدكه عود صدك طلعت انحب حالي حال البنات باوعت لروحي بالمرايه اني سمره وعيوني جوزيه جنت سمينه بس ضعفت من كبرت ماكو شي بشكلي مميز غير شخصيتي الجان الكل يحبني بسببها بطبيعتي احب اتصرف مثل ما اني متعوده لا اتقيد بأحد ولا اهتم لاحد غير بس غنى لانها صديقتي المقربه والي مستحيل ياثر بيه احد غيرها ما انكر سابقا جنت اضوج من اشوف الكل يمدح جمالها وشطارتها من غير مقارنه اهلي بيني وبين غنى غنى احسن منج غنى اشطر منج غنى عاقله وووو صحيح جنت اضوج بس اول ما اشوف غنى اتغير وارجع مثل ماجنت علاقتي بيها تتجاوز الصداقه بحيث اني اغار عليها ما اقبل تصادق وحده غيري وحالياً من حبني علي واعترفلي حسيت بنفس الشعور شعور التملك او الغيره شتسموها سموها ابتسمت اني راح اتزوج يعني ماراح اعنس ياييييييي ههههه راح اتزوج واخلص من جعفر واروح ابقه ويه اروى وغنى واعيش ببيتهم هله هله كمت اركص كد ما فرحانه .
_____________________
اروى : وينكم ... خابرتني مروه باجر عيد ميلاد شهد ومسويلها حفله وره الفطور
منذر : ليش مو سوولها عيد ميلاد قبل جم شهر
اروى : وين قبل سنه بس انت منعس ... المهم باجر احنه معزومين وره الفطور على عيد ميلادها والحجيه تريد الكل يجي وهاا تره شهد متدري حارث مسويلها مفاجئه
ايمان : اروى يمه اختصري شتردين انتي
اروى : اريد نطلع نشتريلها هديه حبابه
ايمان : اي بس منو ياخذج ومترحين وحدج
اروى : غنى تروح ويايه حتى تشتريلها هديه حبابه تدرين بشهد انتي كل مناسبه تذكر الكل مو عاد بعيد ميلادها ننساها وبعدين غنى راح تروح ويايه هاا غنى
غنى : اكل لفهد اذا قبل اروح
سعاد : ولا تكعد راحه الطالبه المواضبه
غنى : استغفر الله
ايمان : يمه ماكو روحه وحدجن اخاف عليجن وانتن بنات شابات مومال تروحن وحدجن
منذر : خليها تروح خاله اني اخذها اليوم وره الفطور عندي محاضره ويه طالب سادس جاي يحضر للامتحانات ... عندي حصه يمه اذبهن بالسوك وعود من اكمل محاضره امر عليهن
اروى : يعني شيصير لو الله يخلق منك كم نسخه بس كم نسخه
انغام : لا عيني هي نسخه وحده وصارت من نصيبي
منذر : تره استحي وهسه اسيح عليكم
الكل : ههه
غنى : ابتسمت فدوه انغام ومنذر شكد لطيفين ... انغام ليش متجين ويانه
انغام : مابيه حيل اني انطيجن فلوس و انتن اشترن شي مرتب الها
ليلى : واحنه شو محد عرض علينه نروح
آلاء : عود نطلع باجر الصبح نشتريلها هديه خلي غنى واروى ياخذن راحتهن ما انكلبت الدنيا
بتول : هاي شنو ماعرفتج من شوكت انتي هيج وديعه
غنى : كمت عن اذنكم صعدت فوك حتى اخابر فهد دكيت عليه جاوبني بسرعه كالعاده
فهد : الوو
غنى : الوو هلو فهد شلونك
فهد : هله بيج الحمدلله انتي شلونج
غنى : الحمدلله
فهد : خير محتاجه شي
غنى : لا بس وره الفطور منذر ياخذنه اني واروى نشتري هديه لشهد بت عمك لان باجر عيد ميلادها عادي اروح
فهد : ابتسمت اي روحي واخذي فلوس من الكنتور عايفلج مبلغ بكنتورج واذا احتاجيتي الخزنه يمج
غنى : لا شكرا عندي بس حبيت اكلك قبل لا اروح خاف متقبل كلت اخابرك واستأذن منك
فهد : تنهدت اروح فدوه لليستأذن
غنى : بفهاوه اني اني حروح انام
فهد : نوم العوافي تدرين شتهيت هسه على بروده الغرفه واشبكج وانام
غنى : هذا معقوله فهد ... بارتباك باي
فهد : ابتسمت باي ... سديته منها
عمر : شبيك تضحك
ايمن : اكيد مرته مخابرته
عمر : ادري مرتك شعدها كل شويه مخابرتك متمل
فهد : وانت شعليك لو دو... الغيره تنبش بيك متكدر متحجي
عمر : مو علساس تبت وكمت تصلي وتصوم مو عيب عليك تتلفظ هالالفاظ
فهد : بهدوء تره كمت اصلي واصوم ماصرت داعي اسلامي شبيكم
مهيمن : اعذرنه خويه بعدنه مصدومين بيك ما مستقبلين الوضع بس نتعود
ايمن : هاي النسوان الحوك شوف غيرتك
فهد : امك هم حوك شلون ضبت ابوك من جان صايع
ايمن : هسه ابويه شعليه
فهد : مادام جاب عار مثلك خلص لعد بي انه
الولد : متصيرلك جاره
فهد : ابتسمت ابد
____________________________
غنى : كملنه فطور وكمنه بدلنه وطلعنه ويه منذر
منذر : وين تردن ترحن
اروى : للسوك نشتري جم جاحه النه ونجيب هدايا لشهد
منذر : اي وين صاير بالضبط واني اخذجن ولتكللي سوك وبس بغداد بيها مية سوك
اروى : اخذنه ل...(......)
منذر : خوش
غنى : ذبنه منذر وراح وكال ساعه ساعه ونص هو يمنه .... نزلنه
اروى : شتردين تشتريلها
غنى : جنطه وشال اشوفه انسب شي لان مااعرف هي شتفضل
اروى : صحيح يله تعاي
غنى : دخلنه لمحل عجبتني جنطه بيضه ونيليه شكلها يجنن وبيها فيونكه بالجانب كولش نازكه وهالون جدا مناسب ... شنو رأيج
اروى : تخبل راح اخذ وحده مثلها بس غير لون
غنى : تره احنه اجينه حتى نشتري الها مو الج
اروى : لا بله بس لا عبالج هاي الطلعه على حساب شهد افندي
غنى : لعد
اروى : لا حبيبتي اني محتاجه جم حاجه وسويتها وحده بوحده حتى هم اشتري لشهد هديه وهم اشتري لروحي الاريده
غنى : يمه منج واني عبالي كتلتي نفسج على مودها
اروى : ديله خلي نشتري ونخلص بسرعه امي كالت حدجن للتسعه ونص تسعه وخمسه وتلاثين دقيقه متفوتنه للبيت
غنى : اخذت الجنطه واخذتلها شال من محل شالات واحجبه واروى اخذتلها فستان رسمي بس حلو واخذت كلاده فضه على شكل ملاك الها ... هاا خلصتي
اروى : اي يله عندج شي بعد
غنى : لا كولشي ماعندي خلي نرجع ما اريد نتأخر
اروى : طلعنه وكفنه على جهه خابرت منذر ... الوو هاا منذر وينك هسه جاي بالطريق ماشي احنه منتظريك ... يكول بالطريق
غنى : هزيت راسي ... باوعت على محل يبيع تجهيزات مال عرايس ... صارت عيني على سيت نوم لونه احمر تذكرت بكنتوري اكو فوك العشر سيتات وملابسه ولا واحد منهم حتى استحي اباوعلهم
اروى : هاا عجبج
غنى : شنوه
اروى : السيت الاحمر تردين تشتري
غنى : لا عيب شنو اشتري
اروى : لعد شتلبسين لاخويه بالغرفه ازار صلاه
غنى : انجبي عيب هالحجي
اروى : بس تدرين اذا تلبسين لفهد هالسيت الاحمر يمكن تضربه جلطه لان اخويه ضعيف كدام هالكتله من الانوثه والدلع
غنى : الله يطيح حظج صدوك متستحين اله اكل لفهد اروى العبالك فقيره طلعت متستحي
اروى : فنج والله جذابه لا تحجين ولا تكولين همزين جنج فاره كدامه
غنى : اجيت اجاوبها وسمعت موبايلها اروى موبايلج .
اروى : اوكفي هذا منذر يمكن اجه ... الوو هاا منذر ياا ليش وهسه شلون
منذر : والله السياره بنجرت بالطريق مااعرف شبيها ... اكلج خابري علي خلي يجيجن لترجعن وحدجن خوش اني ما اكدر اعوف السياره لو اكدر جان جبت تكسي واجيتجن بس هاي المشكله السياره وين اعوفها
اروى : خليك يم سيارتك وهسه اخابر علي يجينه
غنى : خير شكو
اروى : سياره منذر بنجرت وميكدر يجينه خلي اخابر علي ... خابرته دك دك وماجاوب اكيد يمه مراجعين رجعت دكيت عليه مره وثنين وعشره وهم ما جاوب ... شلون هسه
غنى : خلي نرجع مشي
اروى : انتي خبله شلون تردينه نمشي كل هالمسافه امشي ناخذ تكسي ونرجع شنسوي يعني
غنى : لا اروى الدنيا ليل هسه ومو مال نصعد بتكسي وحدنه انتي متعرفين الدنيا مو امان وبعدين الولد ميقبلون وبالاخص فهد يتعقد من سالفه التكاسي
اروى : يمعوده قابل شنسوي الضرورات تبيح المحظورات خلي ناخذ تكسي ونرجع احسن ما نصفى بس احنه بالسوك وساعتها صدك تصير مشكله ... جريت ايدها تعال تمشينه شفت سياره
صفره اشرتلها اجت يمنه
غنى : وكفت السياره يمنه اباوع السايق شكله غريب ... اروى حبابه اني ممرتاحه خلي نرجع مشي او نخابر ولد عمج او اي واحد يجينه حبابه
اروى : سكتي سكتي ... تكسي
: اي
اروى : تاخذنه لمنطقه....( ..... )
: اي صعدو
اروى : جريتها دتعاي لتخافين قابل راح ياكلنه
غنى : صعدنه بالتكسي واني ابد مامرتاحه وكلبي يدك سريع ما اعرف ليش
اروى : شبيج غنى وجهج اصفر
غنى : همست ما شفتي شكله شلون تصعدينه وياا
اروى : واحنه شعلينه بشكله قابل نريد نخطبه
: وين تردون اوصلكم
اروى : هذا شبي صوته ... احم لمنطقه (......)
: وين صايره هاي
غنى : اديها يرجفن اروى الرجال وضعه مو طبيعي شوفي طريقه كلامه عبالك واحد سكران وحتى سواقته رايحه يمنه يسره حبابه خلي ننزل
اروى : بخوف اخويه نزلنه هنا
: مو تردن لمنطقه( ....) هسه اخذجن
اروى : عفيه انتبه على الطريق
غنى : اباوعله يريد يوكع على الستيرن حباب ركز بالسياقه
: م م هه مركز مركز
اروى : صرخت يمعود عينك على الطريق غنى حبابه اهدي لترجفين
غنى : شلون مترديني ارجف وهذا ميعرف يسوق ... حسيت السياره طارت بينه بجيت ولج هذا شبي
اروى : وكف السياره وكفهااا ... احاجيك اخويييه حباب وكف السياره
: هممم شتكولين هسه اوصلكم انتو بالحارثيه مو
اروى : بدموع لالا بس وكفنه حباب الله يخليك راح تنكلب السياره من سرعتك الله يخليك اوكف والله انطيك كل الفلوس
: تشتريلي عرك
غنى : عززه هذا شيحجي والله عرفته بي شي ...حباب قلل سرعه .... اباوعله ولا كأن يزيد مينقص ومبين شارب وضعه مو طبيعي وكام يدخل بفروع من وحده واني واروى نبجي اباوع داس بانزين وتوجهه على الرصيف
اروى : لا لا لا حباب لاااااا
غنى : هنا واجاني اشعار انو حنموت شويه وما احس غير السياره تنكلب بينه واخر شي سمعته هو صوت اروى تصرخ وماحسيت على شي بعد
________________________
الساعه العاشره والنصف مسائاً
علي : دخلت للبيت ... السلام عليكم
الكل : وعليكم السلام
ايمان : جا وين البنات
علي : يا بنات
ايمان : اروى وغنى راحن للسوك خذاهن منذر ورجع خابرني كال بنجرت سيارتي وكلي علي راح يجيبهن من السوك
علي : لا محد كلي ... طلعت موبايلي لكيت عشر مكالمات من اروى دكيت عليها مترد ... رجعت دكيت على غنى هم مترد
ايمان : يمه شبيك وجهك صار اصفر
علي : ميردن
ليلى : اهدو اكيد هوسه يمهن تعرفون سوك وكومه ناس تطلع برمضان .... ارجع خابرهن
علي : رجعت دكيت عليهن ميردن ... خابرت منذر الوو منذر ... لا مارحت جبتهن صحت شمدرينييي اني غير تكلولي اصلا شلون تعوف بنات وحدهن بالسوك خبل انت ... جاي اخابرهن ثنينهن ميردن ... شسوييي هسه .... هسه ارجع اخابرهن ... رجعت دكيت هم ماكو
ايمان : اللهم صلِ على محمد وال محمد ياربي دخيلك
سعاد : والله صوجكم اكو واحد يعوف بنيات وحدهن يطلعن لو فهد هنا جان خلاهن اكيد لا بس ااخ منجن
علي : رحمه لابوج سكتي ... دك موبايلي شفتها غني هاي غنى جاوبتها الووو اجاني صوت رجال
ايمان : يا الله لزمت كلبي الي وجعني
فجئه
: انت تعرف صاحبه هالرقم
علي : اي اي مرت اخويه
: صاحبه الرقم تعرضت لحادث هي و وحده وياها وهسه بمستشفى (........) ياريت تجي بسرعه
علي : فتحت عيوني شنووووو هسه هسه جاي
ايمان : خير يمه شبيك
علي : غنى واروى سون حادث وهسه بالمستشفى
ايمان : لطمت يمه سوده بوجهي يمه بناتي راحن
آلاء : خطيه عفيه علي استعجل الله يخلللليك روحلهن
ايمان : جايه وياك اوكف طلعت اركض ورا حتى عبايه ماخليت على راسي طلعت ليلى انطتني عبايه وطلعنه ... بدموع يمه سوده بوجهي شلون خليتهن يطلعن شلوون شجايه وقبلت
علي : اهدي يمه ان شاء الله مابيهن شي
ايمان : بدموع ان شاء الله ان شاءالله ... وصلنه للمستشفى ونزلنه بسرعه
علي : قبل شويه جابو بنات ثنين مسويات حادث
: قصدك على طريق (.......)
علي : اي اي
: اي وحده بالطابق الاول غرفه .... والثانيه بالعمليات
علي : رحنه ركض للطابق الاول شفنه الدكتور طلع من الغرفه ... يارب احفظهن دخيلك هااا دكتور
الدكتور : انتو اهل البنات
علي : اي احنه
الدكتور : البنيه الاسمها اروى تعدت مرحله الخطر عدها كسور ومجرد رضوض مو خطره بس
ايمان : بس شنو دكتور
الدكتور : البنيه الثانيه وضعها جداً خطر وصارلها ساعه ونص بالعمليات وحيل متأذيه اضافه انو كلبها موزين فيكون استقبال جسمها جدا ضعيف
علي : دكتور ممكن تشرحلي الوضع
الدكتور : صاحب التكسي جان متعاطي ومو بوعيه جاي بسرعته وصاعد على الرصيف منكلبه بي السياره هو البنات وحسب كلام الجابوهن لهنا يكولون البنيه الثانيه طبعا احنه منعرف اسمها لان مالكينه بجنطتها لا هويه ولا شي بس البنيه الاولى لكينه بجنطتها هويه فعرفنه اسمها اروى المهم البنيه جانت قريبه على الرصيف ومحشوره بين السياره والرصيف وماكدرو يطلعوها غير بالكوه ومن جابوها صايره قطعه حمره وكلشي ما مبين منها
علي : دكتور احجي بمختصر وضع مرت اخويه شلونه ولتحاول تخفي شي اني دكتور واعرف سوالف الدكاتره
الدكتور : صراحه وضعها جدا سيئ وهاي الحقيقه
ايمان : بدموع صخام الصخمني راحت البنيه ولك يمه فهد تعال شوف مريتك شصار بحالها
*****
يتبع
- يتبع الفصل التالي اضغط على (ذنوب على قيد الغفران) اسم الرواية