رواية ذنوب على قيد الغفران الفصل الرابع و الاربعون 44 - بقلم براء
ذنوب على قيد الغفران
#ذنوب_على_قيد_الغفران
#البارت_الثالث_والاربعون
غنى : دخلنه اني وفهد للمطبخ وتصنمنه بمكانه عززه هاي شنو .... فيصل وساره بالمطبخ بوضع استغفر الله عود صدوك يحجون خلصت المكانات اجو بالمطبخ
فهد : باوعتلها غمضي عيونج ... دكيت الباب يمعودييين صبحكم الله بالخير موهنا موهنا
ساره : سديت الروب صخام الصخمني شافونه
فيصل : احم هاا الحمدلله على سلامتك شعجب كاعدين بهيج وقت
فهد : الله يسلمك ... والله نزلنه نتريك بس من شفناكم بطلنه
ساره : ان اني راح اصعد فوك تعال فيصل تعااال
فهد : اباوعلهم صعدو بسرعه ومبين عليهم متفشلين يعني ماكو هيج كلنه مرته بس مو بالمطبخ شهالعبان نفس هذا ناس زاعيتها كلش
غنى : همست فهد صوتك حباب فشله ليكعدون
فهد : شلون ترديني انصي صوتي يعني ميصير اكو شي اسمه عيب عدهم غرفه شيردون يسوون بيها خلي يسوون المن سموها غرفه نوم غير حتى الواحد يمارس خصوصياته بيها وبراحته مو ينزل كدام العالم شفتي هذا الاكرهه هالسوالف الطايح حظها هاي مطايه ميفتهمون انو العلاقه بين المره والرجال لازم تكون خاصه بيناتهم ومحد يتطلع عليها
غنى : دخلت للمطبخ ... بهدوء صراحه توقعت هالشي عادي عندك
فهد : كعدت لا شنو عادي صحيح اني لساني متبري مني واشرب وعدي مكسرات بس من توصل لعلاقتي الجسديه وخاصه ويه مرتي عيب وزحمه واحد يشوفني او يعرف شيصير بيني وبين مرتي تدرين مرات اتعجب على الزلم الي يحجون تفاصيل علاقاتهم ويه نسوانهم او يتحارشون بيهم لو يبوسها لو يكرصها كدام العالم هذا غلط لو مهما يكن لازم تبقه علاقتهم الزوجيه مثل السر بيناتهم محد يعرف شيصير بيها غيرهم يعني هسه حلوه بحقهم شفناهم بهيج وضع .... عدكم غرفه اكلو تبن بيها
غنى : هو يحجي واني اهز راسي كلامه كله صحيح عجبني تفكيره .... طكيت بيض عيون وصبيت جاي جبت الصينيه خليتها على الميز بالمطبخ وكعدنه نتريك
فهد : باوعتلها ليش ساكته ما علقتي على كلامي
غنى : بهدوء شحجي يعني وكلامك صح ماكو داعي اعلق عليه
فهد : بعدج ماخذه موقف مني مو
غنى : نزلت ستكان الجاي ... فهد شنو لزومه نحجي بهالموضوع مو كلنه سده
فهد : لازم نحجي بي شلون ترديني اسكت واني اشوف كل هالبرود منج
غنى : بهدوء ماكو داعي نفتح هالموضوع وبالنسبه اليه صدكني متوهم لا بارده ولا شي وانت اكثر واحد تعرف اني هاي طبيعتي مو بمعناها اذا ساكته يعني اكو شي
فهد : اي اكو شي قبل جنتي تحجين تتناقشين وياي اما هسه بس ساكته
غنى : انت كلتها قبل مو هسه وحسب كلامك احنه قبل جنه اصدقاء اما هسه لا احنه مجرد زوجين مجبورين يعيشون سوه لا اكثر
فهد : اسألج سؤال انتي جاي تحاولين تغيريني حتى اصير مثل ما انتي جنتي تتمنين وتردين مو
غنى : اي صحيح اني مجنت رايده اتزوج واحد مثلك وشكو شي جنت متمنيته ما صار ردت رجال يحبني وانت متحبني وردت رجال ملتزم يخاف الله يحب الصلاه والصوم وانت بعيد كل البعد عن الالتزام اضافه انو ردته حنين حباب هادئ وانت معندك ولا صفه من الي اني احلم بيها
فهد : ضرب على الميز واذا اني مو مثل ماتردين ليش وافقتي عليه من البدايه
غنى : انت تعرف شنو السبب ماكو حاجه نعيد ونسقل بالحجي وبالنسبه لكلامك الثاني فلا متوهم اني ما ردتك تتغير حتى تناسبني وانما ردتك تتغير لنفسك تره محد يفيدك يافهد غير بس صحتك وربك المشروب الي تشربه ممكن يسببلك مشاكل بالكبد او بالقلب وغيرها والملهى الي تروحله شايف كم ذنب يجيك بسببه لو شلون عرش الرحمان يهتز من تروح ترتكب محرمات لو انت تباوع لاجسام الله محرمها عليك اضافه للشغلات الثانيه الي ممكن تنقلك امراض ولو تمرضت منو يفيدك يفيدك الشرب ؟! لو تفيدك الملاهي ؟! صدكني محد يفيدك غير صحتك وصَدك لوما هالاشياء مضره بينه احنه كبشر ما جان ربنه حرمها ومنعنه عنها اصفن بكلامي شويه وفكر بي
فهد : اجيت اجاوبها وشفت آلاء وسعاد طبن حمحمت واشرتلها تسكت
سعاد : صباح الخير شو كاع.. هاا يمه فهد شلونك شوكت اجيت
فهد : الفجر
سعاد : لعد ليش كاعد هسه وانت ستوك راجع
فهد : نزلت اتريك ويه مرتي اكو مشكله
سعاد : لا اكيد بيتك هذا وبراحتك
آلاء : اكول غناوي بلا زحمه عليج غسلي المواعين المتوصخه لان اني جاي اسوي ريوك النه
غنى : ضليت صافنه اسلوبها تغير ويايه 180 درجه ... كمت شلت الصينيه
فهد : غنى صبيلي جاي وجيبي للاستقبال
غنى : صار ... غسلت ستكانه بمي حار واجيت اصبله جاي بس شويه
آلاء : افف لاحكتني وين ما اروح تعاي خلصيني
غنى : إلهي الصبر ... صبيتله الجاي وطلعت شفت الكل كاعدين صبحت عليهم ورحت للاستقبال فتحت البال ودخلت تفضل
فهد : عاشت ايدج ... صدك حضري روحج تره بالدعش نروح
غنى : وين ؟!
فهد : لبيت جدي وين يعني
غنى : شعدنه
فهد : اخذيها قاعده كل يوم جمعه احنه نتجمع عد بيت جدي واذا ما رحنه الحجيه تزعل
غنى : هاا اي لعد بعد ساعه كون نروح
فهد : اي روحي انتي حضري روحج واني بس اكمل الجاي اجي وراج
غنى : هزيت راسي وطلعت
اروى : هاا ياحلو صباحوو
غنى : ابتسمت صباح النور وينج البارحه ليش ما داومتي
اروى : انتي تدرين اني محاضراتي قليله وجيتي للجامعه جانت على حسابجن وهسه هالتشوفين اني كاعده اشتغل على الرساله وتالي فوك تعب سنتين اللجنه متقتنع بالرساله حتى انتحر بيهم
غنى : لتحجين هيج ان شاءالله يقبلوها وتاخذين الماجستير وترتاحين انتي شاطره وكدها
اروى : هذا الحجي اروحلج فدوه
آلاء : شكو اليوم صاعده جرعه الحنان والمحبه عدكم
اروى : انتي لتضلين على كلشي تعلقين التهي بنفسج رحمه لاهلج
غنى : خلي اصعد احسن مالي خلك الحجي الماصخ ... صعدت لغرفتي طلعت جبه زيتونيه خلي اغير شويه اخذت شال بيجي رحت ابدل سمعت باب الغرفه انفتح عرفته فهد
فهد : وينج غنى
غنى : بالحمام دابدل
فهد : اندكت الباب رحت فتحتها شفت ساره ... خير
ساره : وين غنى
فهد : جاي تبدل شتردين منها
ساره : اريدها بشغله سويلي مجال اريد ادخل
فهد : تنهدت طبي
غنى : طلعت هااا فهد شنو ردت
فهد : تعاي شوفي ساره شتريد
غنى : لفيت شعري هاا ساره تفضلي
ساره : اريد الحمره الترابيه مالتج
فهد : شتردين ؟
غنى : باوعت لفهد بتحذير ليروح يركعها بحجايه ثكيله ... معندي حمره ترابيه
ساره : لا عدج ذاك اليوم شفتها من اجيت عدج حتى شوفي فتحت الجراره مو هاي
غنى : باوعت لفهد الي خزرني ... هاي مو ترابيه جوزيه
ساره : هو نفس الشي عادي اخذها
غنى : ها ... اي
ساره : شكراً يله خلي اروح ابدل
فهد : سديت الباب وراها انتي شلون تتطببيها لهنا اني شكايل
غنى : شسوي فهد قابل اطردها زحمه والله
فهد : مو تطرديها بس لتنطيها وجه ثكلي عليها وبعد من تدك الباب لتفتحيها الف مره كتلج ما احب واحد يطب لغرفتي
غنى : ماشي
فهد : باوعتلها لايكلج هالون
غنى : شكرا
فهد : عفواً ..... يله فضيها لبسي صايتج خلي نروح
غنى : رحت لبست الصايه والشال تعطرت وهو بدل ونزلنه حتى نروح وصلنه لبيت جده دخلنه فهد راح يم الولد واني دخلت جوه
النسوان : السلام عليكم
الكل : وعليكم السلام
غنى : كامو الكل بوسو اهل فهد واني الحجيه تلكتني ذاك الملكه ما اعرف ليش هيج تتعامل ويايه والبنات هم حبابات بس نسرين سلمت من وره خشمها و مروه مثكله وجها واني هم لبستها وحتى متقربت منها اكتفيت بسلام من بعيد
حياة : نزعي صايتج يمه ماعدنه احد
غنى : فتحت صايتي صفطتها وخليتها بالجنطه
ياسمين : اخذي راحتج حبيبتي بيت جدج هذا
غنى : ابتسمت تسلمين حجيه
ايمان : شاورتها خليج ويه اروى واي شي تحجي سعاد وجناينها غلسي عليهن خوش
غنى : صار
ايمان : عفيه
شهد : بنات امشنه نروح لغرفتي عليمن كاعدين هنا عود من يردون يصبون الغده خلي يصيحولنه
غنى : كامن البنات واني ضليت كاعده
شهد : غنى شو كاعده كومي يله
اروى : غنى تستحي اله واحد يعزمها شخصياً ياله تكوم
شهد : دكومي كومي ماعدنه مستحه احنه الله وكيلج ذني يطبن لغرفتي اكثر مني ويندلن حتى بالمطبخ جم خاشوكه وانتي بعدج عايشه بذاك الزمن مال الخجل دكومي
غنى : لا شكراً مرتاحه بمكاني انتو اخذو راحتكم ضليت كاعده يم خاله ايمان واسمع كلام واني ساكته شويه واجت مروه
مروه : اكول غنى عندي فستان اريدج تخيطي الي انشك البارحه واني اجربه
غنى : بس اني بطلت اخيط
مروه : لا مو بالمكينه بأيدج قصدي كومي حبابه خلي نصعد فوك حتى تخيطي
غنى : كمت وياها صعدت فوك دخلت لغرفه شهد ... شفت البنات علا ، عبير ،شهد ، ملك ، اروى ورده بتول ، ساره ماشاءالله كومه .... سلام
البنات : يا هلا
مروه : كعدي خلي البس البدله واراويج وين الفتك صاير
شهد : يعني صدك تحجين البنيه جايه تتونس تردين تكربيها
غنى : لا عادي ماكو مشكله بس اريد ابره وخيط بلون البدله حتى اسويها
مروه : كومي ملك جيبيها من غرفه الحجيه
غنى : راحت بدلت واجت صاير الفتك يم الخصر هذا شلون انشك هيج .... نزعيها خلي اسويها ولو ما تضبط لازم اله مكينه
ملك : طبيت تدرن فتحت جراره الحجيه شفت علبه حلويات كيفت تالي افتحها تطلع بيها ابر وخيوط شفتن بله
البنات : هههه
غنى : كعدت اخيط بالبدله وهنه يسولفن حلوه لمتهن يونسن
عبير : عفيه شهد استعجلي بالعرس نريد نركص
ملك : اي والله غير تستعجل وتفضها اريد اخذ غرفتها
شهد : يعني ماكو هيج صلافه طمعانه بغرفتي واني بعدني هنا وعناد بيج الغرفه تبقى الي
علا : والله كله جذب هم حجيت مثل حجيج تالي اول ما تزوجت كعدو مرتضى افندي بغرفتي
غنى : باستغراب ليش انتي مو بت ابو حارث شلون مرتضى يكعد بغرفتج
علا : هههه لا حبيبتي احنه عدنه ثنين مرتضى واحد ابن عمتي نسرين وهذا الي يداوم وياج والثاني اخويه هذا صغير بعده بالرابع اعدادي ومكضي حياته بس يدرس حتى ميطلع
غنى : تذكرت مروان ياعمري هو هم جان بس يقره وماله شغله باحد سوده عليه حبيبي تنهدت .... الله يحفظه ويخلي الكم
ملك : غنى عندي سؤال فضولي بس رجاءاً لتفهمين قصدي غلط
غنى : تفضلي
سألي
ملك : فهد شلون يتعامل وياج اقصد هم عنده جانب رومانسي هم يضحك ويشاقه لو لا تعذريني على التدخل بس الفضول اكلني يعني ما اصدك فهد المطنكر والي اربعه وعشرين ساعه ساكت وينافخ عنده جانب حنين ورمانسي يطلعه عليج
مروه : ما اعتقد فهد طبيعته هي هي سواء وياها او ويه غيرها
غنى : باوعتلها مااعرف شنو الي خلاني احجي هيج لا بالعكس فهد كولش حنين ويحبني ومدللني دلال وممقصر وياي ابد وحتى الضحكه متروح من وجهه وكت الي نكون سوه بس هو حدي شويه ويه الناس عامه وبس ويه المقربين لا طبيعته تختلف
بتول : بس شو يعاملج برسميه كدامنه لا شفنه حنيه ولا شفنه رومانسيه تدرين انتو حتى ميبين عليكم متزوجين
غنى : فهد يحب الخصوصيه واذا هو زين ويايه مو شرط العالم كلها تدري هذا شي بيناتنه
مروه : تنفست ما اريد اكوم اسحلها وحده جذابه اصلا فهد ميحبها ولا بحالها .... كملتي البدله
غنى : اي تفضلي بس ما اعتقد ضبطت يرادلها دقه بالخياط حتى ترجع مثل قبل
مروه : رحت لبستها بسرعه انفتك الخيط وانشكت البدله بالزايد ... يعني انتي ثوله حتى خياط مادبرتي خياطه جيس حب انتي
شهد : شبيج البنيه كلتلج اله مكينه ياله تضبط
مروه : دختروح يمعوده خياطه وبالك عني متكدر تبدر فتك صغير بس هي الثواله وراثه
غنى : بهدوء لزمي لسانج ولتجاوزين حدودج
مروه : لزمني بنات لزمني خفت يعني فوك ثوالتج لا وتحجين هم
غنى : طبعا احجي مادام لسانج زفر وتجاوزين ومو بمعناها اني ساكتتلج تجاوزين
مروه : دنجبي بت الفكر هم الها لسان وتحجي لو منح اطم روحي وحده سايبه
غنى : بهدوء ليش قابل اني قليله ادب مثلج حتى اطم روحي
مروه : هاي منو القليله ادب ولج
شهد : بنات شجاجن
علا : كافي مروه تخبلتي هي بدله وانمزكت عادي شصار شبيج كلبتي الدنيا
مروه : لج متعرفيها هاي متعمده وحده حاقده وطماعه شافتنه نلبس احسن نلبس وعايشين احسن عيشه وهي جانت تلكط بالزبايل وتاكل فنترس كلبها حقد علينه لان نلبس احسن منها ومرتاحات
اروى : لا عاد تره مصختيها كافي احترمي نفسج وبطلي تتعالين على خلق الله انتي مو احسن منها وعيب عليج تحجين بالمستويات الاجتماعيه احنه مو احسن من احد ولا اكو احد ادنى منه وبالنسبه لغنى فالبنيه مو بت فكر انتي الفكر والي تفكيرها مريض هم
ورده : على كوله فهد اهلج انطوج خبز ما انطوج تربيه
مروه : انجبييي ادبسز بعد عليه الزعاطيط تحجي براسي هي هاي العايزه بنات الفكر والجهال يصيرن براسي ويتفزلكن
غنى : اخذت جنطتي واديه يرجفن اني محرد عليج لان اذا رديت حنزل لمستواج وهذا الي ما اريده خليج باخلاقج وتفكيرج السز وحده سخيفه وتافها
بتول : يااا غنى شلون تكولين على مروه هيج انتي تعرفين شنو مروه
مروه : حسيت نار ووجت بيه عود اسكتلها لا والله ركضت جريتها من شالها تعاي ولج حقيييره منووو اخلاقها سزز
غنى : انتي وحده اخلاقها سز وما مؤدبه شتردين بعد
مروه : صفكتها راشدي ولج انتييي بت الفكر تكولين اخلاقي سززز انيييي اخلاقيييي سزز يا ام العلاقاااات اذكرج بمرتضى اذا ناسيه اذكرج شلووون شبع بيج
عبير : انجبييي مروه اخوييه شعليه خليتي بالوسطه
اروى : نجر بيها وهي مجبله بغنى متقبل تعوفهااااا وللللللج عوفيهاااا
ملك : بعصبيه عود صدك تحجين هذا اسلوب وحده مثقفه وخريجه لعد شخليتي لبنات الشارع الله يطيح حظج
مروه : عوفنييييي اريد اراويها الاخلاقها سز شتسوي
شهد : ولج عوفي البنيه الله بغضب عليج ... اباوع للبنيه صار وجها ازرك جرينها كوه والبنيه وكعت بالكاع ياااا البنيه راحت
مروه : باوعتلها وكعت بخوف والل والله هي وكعت وحدها ماسويتلها شي
ساره : كمنه نرجف واحنه نشوفها لا ايد ولا رجل كامن البنات يصرخن
ورده : ماتت ماتتت مووو اروووى وجهاااا صار ازركككك رووووحي صيحي لفهدددد
اروى : نزلت اركض صارو الولد كداميي ... بدموع فهد فهد غنى
فهد : بخوف شكو شبيها
اروى : غنى وكعت فهد ووو بعدني مامكمله صعد ركض فوك
ملك : وخرن وخرن فتحت جبتها بسرعه يربي اني يادوب مرحله اولى كلشي ما اعرف بخوف هي بيها شي
ورده : اي بيها خفقان بالقلب
ملك : فتحت حجابها روووووحن خلي ياخذوها للمستشفى اباوع لمروه وجها صار اصفررر فختيييي ارتاحيتيييي هسه ... انفتح الباب وطب فهد يركض
فهد : طبيت للغرفه واشوفها واكعه بالكاع وداير مدايرها البنات ركضت خليتها بحضني فتحت جبتها وكمت افرك بصدرها جيبين مايييي بسرعه اخذت الدولكه نكعتها اريدها بس تصحى ضربت خدها غنى غنى بس اصحي اباوعلها كعدت بس كامت تختض بشكل غريب حضنتها بقوه حتى اكدر اسيطر عليها ماهتميت للولد ولا لأي احد احس كلبي راح يوكف واني اشوفها تصارع مثل السمجه حتى تاخذ نفس الكل صعد فوك والبيت كله انخبص كل طاقه ماعندي بعد اريد اشيلها اخذها للمستشفى ما اكدر احس روحي فصلت .... همست تنفسي تنفسي حبيبتي الله يخليج بس حاول تاخذين نفس
ياسمين : عين الماصلت على النبي ولكم شبيها ايمان شبيها جنتج
ايمان : فركت اديها ويه فهد والله خاله ماادري يمكن كلبها تعب هي عدها خفقان
ياسمين : يايمه سوده عليه
مرتضى : اباوع لفهد انخبص بيها .... دعوفهااا وكوم اخذهااا للمستشفى حضنك بشنوووو يفيدها
فهد : لارد ... ضليت افرك صدرها مكان كلبها .... اباوعلها بدت تتنفس بشكل طبيعي وبده يرجع وجها للونه الطبيعي اول مافتحت عيونها حضنتها واحس روحي سكنت حسيت بدموعها تنزل على ركبتي كامت تبجي بحركه .... بهدوء احجلي شسويتلنها وليش وكعت وهي متوكع غير بس وكت التتعب .... اباوعلهن وحده كامت تباوع للثانيه .... صحت احجججججنن حسيت بغنى تفز مسحت على راسها تحجن لا قسم بالله اكوم اغسلجن كلجن وميوكف بعيني احد
ورده : بدموع فهد هاي مروه تعاركت ويه غنى وضربتها وكامت تجر بشالها بحيث اختنكت وماعت روحها
مروه : والله جذابه ما خنكتها اني
ساره : انتي الجذابه صحيح كلام ورده واسمع شسوتلها بعد حجيتله كلشي صار من البدايه
بتول : بس غنى هي الغلطانه شكت بدلتها
ياسمين : واذا شكت البدله تروح تضربها شهالهيلكه هاي وين كاعدات انتن ولج مروه ما استحيتي تضربين مرت ابن عمج على حساب بدله صدك تحجين ادري فكور احنه بحياتج مامشتريه بدله وهيج تتصرفين
مروه : بدموع شبيكم عليه مو على حساب البدله لان غلطت عليه
حارث : واذا غلطت عليج حيوانه ترحين تضربيها ما استحيتي على كبرتج وعمرج المفروض من تجاوز عليج تغلسين عليها مو تعتدين عليها هي هاي اخلاقنه
ضحى : اي والله يمه لاعاب حلكك
نسرين : شبيكم على البنيه دفهمو السالفه من الطرفين
ايمان : كوم يمه شيلها خليها على الجربايه خلي اروح اسويلها عصير واجي
فهد : كمت وشلتها خليتها على الجربايه اباوعلها ساكته ومبين عليها التعب لفت نظري خدها الي مطبوعه عليه اثر ايد وصاير احمر ... شلون صالخه خدها البر... تقربت وكفت كبال مروه ... بهدوء شلون تجرئين ترفعين ايدج على مرتي عسى بأيدج الكسر
مروه : بارتباك تجاوزت عليه وكالت اخلاقج سزز
فهد : حتى لو انتي اخلاقج مو سز بتصرفج هذا ثبتي انج فعلا عديمه اخلاق واخلاقج انكس من السز
ساره : تره كل الصار بسبب بتول هي دفعت مروه على غنى
نسرين : فهد لتنسى روحك ويامن جاي تحجي هاي بت عمك
فهد : لو مو بت عمي اطيح حظها اني ما امد ايدي على مرتي تالي تجي هاي تضربها هسه لو صاير بيها شي منو يفيدني انتي لو واكف كلبها وخسرتها الربح بيمن بيج لو ببتول الغبره .... تدرين اني اكدر هسه اجيبج براشدي اكسرلج سنونج بحلكج بس انتي بنيه وهذا الواكف بعيني
ياسمين : اهدئ يمه مو هيج شوف وجهك
فهد : اني ماراح اسوي شي هسه احتراماً للكبار بس اقسم بالله لو اجيت ولكيت مرتي انخدشت مجرد خدش بسبب اي احد كأئن من يكون اهجم البيت على راسه وإن سمععععت واحد يكلها انتي بت فكر لو من مستوانه والله العظيم وحلفي براسي ازوعه دم سواء كان رجال لو مره واني نغ... من النغ... اذا ما اسويها وانتي ست مروه من شوكت صايره تحجين بالمستويات وعايشه دور الاميره ديانا تره انتي خلك محلله بزبانه محد يعبرج
ياسمين : عوفها يمه لتفرفح وياها اني اعرف شلون اادبها .... دفعتها امشي اعتذري من البنيه يله
مروه : ما اعتذر اني مو غلطانه ومرت فهد هي الغلطانه
مرتضى : دنجبي انتي التعتذرين وغصباً ما عليج مو زين ماصار بيها شي من وراج
فهد : انت لتدخل وخليك بروحك محد وكلك محامي لمرتي وبالنسبه لمروه فسواء اعتذرتي او لا اعتذارج مرفوض وايالج تحاولين تتقربين منها بعد لتخليني اخلي عقلي بعقلج وساعتها تصير موخوش وياج
... رحت يم غنى دنكت سديت جبتها وعدلت ملابسها همست تكدرين تكومين
غنى : هزيت راسي
فهد : كومتها حجيه من رخصتج راح نرجع للبيت حتى ترتاح
ياسمين : براحتك يمه براحتك وطمني عليها الله يخليك
ايمان : هاك يمه شربها عصير قبل لترحون
فهد : اخذت الكلاص قربته منها
غنى : بتعب كولشي مااريد نفسي تلعب
فهد : خلص براحتج محسن اطيني مفتاح سيارتك ما اكدر اخذها مشي العصر اجيب السياره الك
محسن : هاك خويه هاك شسوي بيها
فهد : نزلتها من الدرج على كيفي ماقبلت اشيلها كدامهم مو شلتها قبل شويه والله مو صاحيه هالبنيه فتحت السياره صعدتها ... وحركت ... نروح للمستسفى
غنى : بخفوت لا هالشي طبيعي
فهد : وصلت للبيت نزلتها دخلنه للصاله اباوعلها كوه تمشي ... شلتها لتكابرين ادري بيج تعبانه
غنى : خليت راسي على صدره وغمضت
فهد : فتحت الباب ودخلت خليتها على الجربايه ... بهدوء اطلعلج ملابس تبدلين
غنى : ملابسي على الكرسي انطيني ياهن
فهد : انطيتها البجامه والتشيرت ودخلت للحمام غسلت وطلعت لكيتها متمدده كعدت يم راسها ... تلمست خدها اذتج مروه
غنى : هزيت راسي ودموعي نزلت
فهد : صوجج مثل ماضربتج ضربيها ليش تسكتيلها مرات لازم ننزل لمستوى غيرنه حتى نأدبه
غنى : بدموع فهد منطتني مجال حتى احجي اني ميهمني انو ضربتني انت مشفتها شحجت لو الاتهمات الي اتهمتني بيها تكلي انتي واهلج تاكلون من الزباله ... والله جذابه رغم احنه وضعنه المادي ضعيف بس ممدينه ايدنه لاحد والله يافهد اني الربع جنت اضمه وما اصرفه على روحي اكول يجوز احتاجه ويفيدني احسن ما امد ايدي لاحد عمري ما مديت ايدي لاحد ولا كلت من الزباله صحيح اني فقيره بس مواصله بيه اكل من الزبل لا اني ولا اهلي
فهد : حضنتها خلي تولي صدكيني هاي الخبصه كلها لان شافت عندج شي ما موجود عدها هاي اسمهل غيره لا اكثر والمعروف الي يغار يضل يسقط بالكدامه بس حتى يثبت انو هو الاحسن
غنى : ليش شعندي اني وتغار مني
فهد : يمكن تغار من اخلاقج تغار من حب الكل الج هواي اشياء ممكن تكون تافها بينه بس غيرنه يريدها وبشده فلتستغربين
غنى : شريد اكله لان تحبك شاده ويايه ... باوعتله ما اعتقد تغار الي يغار ميضرب ويخنك حتى شوف من وراها انجرح بلعومي بالندبوس
فهد : شو اشوف
غنى : رفعت راسي شوف شلون انشخط بلعومي
فهد : دنكت بست ركبتها بمكان الدنبوس نمت بصفها ورفعتها خليتها على صدري بدون ما احجي
غنى : احتقن وجها ...فهد انت ليش دافعتلي جان تكدر تسكت
فهد : مسحت على شعرها انتي مرتي وكرامتج واحترامج من احترامي والي يفكر يدنالج انعل والديه .... زائد انتي تخصيني ومالتي واني كلشي ولا واحد يمس شي يخصني صحيح علاقتنه كزوجين مو تامه تماما بس تبقين مرتي والي يضرج يضرني فهمتي قصدي
غنى : هزيت راسي
فهد : العب بشعرج حتى تنامين
غنى : اي
فهد : بديت العب بشعرها ... نصيحه دائما خليج قويه
غنى : اني قويه بس مو وقحه
فهد : وهذا الحلو بيج
غنى : شكرا لان دافعتلي اليوم
فهد : هذا واجبي يا مرتي ... كرصت خشمها يله نامي وارتاحي حتى اشوف بلكي العصر اسألي على دكتور قلبيه زين حتى نحجز عنده ونروح باجر
غنى : كتلك ماكو داعي كولشي مابيه
فهد : ميخالف نطمئن احسن
غنى : غفيت بحضنه وماحسيت على شي بعد
_________________________
العصر
ايمان : مرت اخوجن شلون صارت
اروى : ما صعدتلها اكيد تلكيها نايمه هسه والله يايمه من اتذكر وجها شلون صار ازرك كلبي ينمرد
ايمان : زين متعرفين شنو سبب خفقان القلب مالتها ومزمن لو لا
اروى : لا مزمن شنو بس الدكتور كلها ابتعدي عن التوتر والضغط تجنبي العصبيه والتعب النفسي اي جهد نفسي يأثر على وضعج وكلما كانت حالتج النفسيه مرتاحه كلما كلبج سليم
ايمان : زين همه عدهم القلب وراثه
اروى : ما اعتقد لان هي عدها خفقان واخوها الله يرحمه من البدايه عضله القلب مالته تعبانه فما اعتقد وراثه
ايمان : اروى غنى كلشي تحجيلج مو
اروى : اي ليش
ايمان : زين اذا كلشي تحجيلج هم جانت تشكيلج من خالتها
اروى : يوو خطيه شبعت ضيم هناك والحجي بيناتنه جانت تجي تبجي من تصرفات رجل خالتها النذل خطيه مره على مره يمد ايده عليها لو يتحارش بيها وهي تدك وتلطم لمن الله رحم بحالها ورجع خالتها سحر ورجعن استقرت هنا
ايمان : معقوله كلامهم صح وفعلا ما جان اكو شي بيناتهم وبتول جذابه .... اني لازم اتحرى عن الموضوع
__________________________
غنى : كعدت المغرب كمت على كيفي توضيت وصليت وكعدت اقره ادعيه بلكي الله يفرجها عني ... كملت وكمت مر اليوم وتوالت ايام حياتي بشكل طبيعي وروتيني ومضى الشهر بين مشاكل البيت الي مدتخلص وكل يوم عركه ومصيبه شكل وبين امتحاناتي الي صارت ويه امتحانات ورده وفوك هذا التحاق فهد والي كام يطول بالموصل بحكم شغله بحيث منشوفه غير بس وقت جيته وهو هناك حتى اتصال معنده وقت يتصل بينه وللاسف بهالفتره مشاعري لفهد كل مابيها دتزيد تقريبا عزلت نفسي عن الكل والتهيت بنفسي وبورده لان دادرسها للامتحانات خطيه بدت قبل رمضان باسبوع وحتخلص يوم سبعه برمضان وطبعا باجر رمضان بالمختصر مر شهر شعبان بدون منحس بي .... باوعت لورده هاا حبيبتي خلصتي
ورده : اي كل الاسئله حليتها بس الماضي البسيط ماجاي افهمه ولا اكدر احل الاسئله العليه
غنى : شو انطيني شوفي حبيبتي احنه مو شرحنا سابقاً كتلج الماضي مثل المضارع بالضبط الاختلاف بس تحولين الفعل من مضارع لماضي لو تضيفين (ed) هاي اذا الفعل منتظم واذا شاذ تكتبين الحاله الشاذه مالته اضافه انو لازم تحذفين شكو ضرف موجود بالمضارع وخلصت السالفه وبالسؤال والنفي اني شرحته الج واذا تردين اعيده
ورده : لا لا فاهمتهن بس الجمله المثبته ما فاهمتها ... هاج صلحيلي ورقتي
غنى : للتصحيح اسمها صححيها مو صليحها ... شو باوعت للورقه عفيه صدوك ورده انتي ان شاءالله تطلعين الاولى
ورده : تدرين شكد احبج اني والقران اموت عليج
غنى : يعمري والله حتى اني اموت عليج ... هسه ضبطنه الماده عندج شي بعد
ورده : لا اصلا راح اروح انام الماده وحفظتها وبقت بس المراجعه واكعد بالليل كلش اراجع
غنى : كمت نصيحه خلي مراجعتج الفجر لان العقل بالليل يحتاج راحه ... يله اعوفج طلعت وعفتها نزلت جوه شفت خاله ايمان
ايمان : تعاي غنى اريدج
غنى : طبيت للغرفه هاا خاله
ايمان : صار شهر اني لا ليلي ليل ولا نهاري نهار كمت ادور وره بتول اريد شي يثبت انو كلامها غلط وكلامكم صح من جهه اكو شي بداخلي يحثني حتى اصدكج ومن جهه كلبي ملجوم منج وما لكيت غير حل واحد
غنى : اني صارلي شهر ونص احاول اثبتلج انو الفكره الماخذتها عني غلط والمفروض من كعدتي عدكم تعرفين اني شنو من خلال اسلوبي وتصرفاتي تحكمين عليه عليه بس على العموم خاله شنو الي تردي واني حاضره
ايمان : تحلفين على كلام الله كل كلامج انتي وفهد جان صحيح
غنى : ابتسمت عندج قران هنا لو اروح اجيب
ايمان : يعني راح تحلفين
غنى : اكيد وليش ما احلف واني ممجذبه
ايمان : رحت طلعت القران تعاي حلفي كول وحق هذا كلام الله كل الجحينا اني وفهد صحيح
غنى : خليت ايدي على القران وحق هذا كلام كل الجحينا اني وفهد صحيح ومجذبنه عليج بأي شي وهذا كلام الله يشهد عليه واذا جذبت بكلامي عسى هالايام الفضيله متمر عليه واني عايشه ... هيج كافي لو احلف بعد
ايمان : بهدوء لا كافي تكدرين ترحين
غنى : بست راسها وهمست حاولي تفكرين بالموضوع وحتعرفين الصدوك من الجذب عن اذنج .. طلعت ورحت سويت العشه ويه الاء لان ساره جابت صارلها عشر تيام بغرفتها حتى الاكل يصعدلها فوك ... اني كملت تردين شي
آلاء : هاا لالا روحي روحي
غنى : صعدت لغرفتها فتحت الباب شفت فهد كاعد على التلفزيون
فهد : وين جنتي من العصر لسه مختفيه
غنى : نزعت حجابي جنت ادرس ورده باجر عدها انكليزي
فهد : شوكت تخلص صارلها اسبوع من بدت
غنى : مو همه يختلفون المفروض يوم امتحان ويوم عطله وهكذا يله هانت بقالها اسبوع وتخلص
فهد : وانتي شوكت تخلصين
غنى : قبلها بيومين اخلص .... رحت توضيت ووكفت اصلي كملت وكعدت اسبح ... فهد باجر رمضان انت تصوم
فهد : ذبيت الريمون ... صراحه لا
غنى : ولا مره ولامره
فهد : ولا مره
غنى : بس ميجوز واجب عليك الصيام
فهد : باوعت لوجها الطالع من الجادر والسبحه بأيدها منظرها تحفه ... يعني اني صلاه ما اصلي ترديني اصوم
غنى : كمت وكفت كباله باوعلي
فهد : ليش اني شايل عيني عنج
غنى : احم باوعلي زين فهد حاول تصوم باجر لخاطري
فهد : خاطرج على عيني وراسي بس ما اكدر اصلا اكره رمضان
غنى : استغفر الله شهر فضيل الناس تنتظره انتظار وانت تكول اكرهه ميجوز ... زين جرب تصوم واني وياك والله حيعجبك الصيام وتكمل بأرادتك شتكول
فهد : كلت لا يعني لا
غنى : باوعتله ... خليك بلي انت بي وشوف الله شحيسوي بيك مو بعيده هسه غضبان عليك افهم يافهد الحياه مره وحده نعيشها ومنعرف شوكت نموت فعلى الاقل نكون مأدين واجباتنه امام الله لان اصلا هو خلقنه حتى نعبده مو حتى نعيش لنفسنه وبس اني حجيت الي عليه وانت حر رجعت اسبح واسوي صلوات منتظره الساعه ب12 حتى اصلي صلاه اول الشهر همزين قريت من الظهر حتى نوم مانمت حتى اخلي نومتي لليل .... سمعت الباب يندك كام فهد يفتحها درت وجهي على الباب شفت سعاد خير هاي اول مره تجينه
فهد : نعم
سعاد : اخوك لسه مارجع للبيت خابره شوف وينه
فهد : ياهو منهم
سعاد : فيصل منو يعني اجيت اخابره لكيت موبايلي مطفي ونسوانه ماادري وينهن
فهد : تعاي دخلي هسه اخابره دكيت عليه جاوبني الوو وين انت ... شعدك بالبصره انت تعرف الوضع شلونه وبعدين باجر رمضان شلون راح تصوم هناك ترجع اليوم ليش انت شوكت رحت من الفجر طالع غير تكل لامك لوحده من نسوانك ... ماشي ماشي سديته .... يكول راح يجيب سيارات من البصره وهسه شويه ويطب لبغداد لتخافين عليه
سعاد : هاا زين اكلك اختك ليلى تريد تجيلها يومين هنا تتونس هي وجهالها
فهد : اي هله بيها شنو المطلوب مني
سعاد : دزلها فلوس كروه ومصرف تدري رجلها كلشي ماعنده
غنى : اني كاعده وخاله ايدي على خدي واسمع حجيها والي فاجئني اسلوب فهد الفظ وياها
فهد : شكد ادزلها يعني
سعاد : يعني فد مليون
فهد : مليون ؟! تضربين بالعالي الله يسلمج
سعاد : ياا هو مليون
فهد : شو تحسسيني وكأن الطلبتي عشر تالاف تره مليون مو قليل واني ما فاتح البنك المركزي واوزع فلوس تردين ادزلها مصرف من عيوني بس مبلغ معقول مو مليون
سعاد : ميخالف وتره اخوك فيصل هم محتاج مساعده ياريت متقصر وياا هو هم يبقه اخوك
فهد : بعد انزع هدومي خاف بتول ماعدها هدوم تلبسهن مرت ابويه اذا صاحبك لتاكله كله ... سامعه هالمثل
سعاد : سامعته بس مو كلشي لمرتك خواتك واخوانك هم الهم حق عليك
فهد : ليش مرتي شايفه مني كون احمد ربي من باقيه ويايه بعد ما عاشت وياكم
سعاد : ليش شو عايشه عيشه كل البنات تتمناها
فهد : طبعا لان تستاهل ولو شما انطيها مقصر وياها ... عوفج مني مرت ابويه اكو شي ثاني نريد انام
سعاد : هاا يله تصبحون على خير
فهد : هله بيج سديت الباب
غنى : فهد ليش تعاملها هيج مو عيب
فهد : ما احبها اكرها ولو بأيدي اطلع بروحها ما اقصر ولتسأليني ليش
غنى : خلص براحتك رجعت اكمل صلاه صارت الساعه ب12 كمت حتى اسبح واصلي صلاه اول الشهر (السبح مستحب) كمت اخذت ملابسي ودخلت للحمام
سبحت وطلعت ... فهد طفي السبلت حباب
فهد : اي هسه
غنى : طلعت انت شلون بدون تشيرت متبرد
فهد : صيف وابرد صدك تحجين الله وكيلج بتموز تلكيني حاضن قالب ثلج ونايم هاي اذا ما طكطكت نعالاتي (عفوا) واطفر لدوله اوروبيه اخلص تموز بيها وارجع
غنى : وشغلك
فهد : اقدم على اجازه هاي اذا انطوني
غنى : على طاري شغلك صدوك حتصير مقدم
فهد : هاي يامطي كلج وين اكو مقدم عمره تلاثين شنو بس اني يخلوني مقدم بهالعمر والله عدكم سوالف
غنى : هاا يعني بعدك مصاير مقدم
فهد : لا بعد فد خمس سنين لكدام ياله
غنى : هاا زين ... كمت صليت صلاه اول الشهر عسى ربي يجعل هالشهر شهر خير على كل امه محمد واني من عرضهم ... كملت وكمت حتى انزل اساعدهن بالسحور
فهد : اكول غنى
غنى : نعم باوعتله
فهد : اني قررت اصوم باجر
غنى : صدوك
فهد : اي
غنى : بفرح اي عاشت ايدك بس لازم تصلي هم
فهد : اي بس
غنى : بس شنو
فهد : حكيت راسي احم بس اني ما اعرف اتوضه فشلون اصلي
غنى : ابتسمت بهدوء اي عادي مو فد مشكله لزمت ايده تعال خلي اعلمك شلون تتوضى حتى من يأذن الفجر نصلي سوه
فهد : دخلت وياها للحمام اباوعلها رفعت ردانات الدشداشه مطلعه اديها
غنى : شوف بالبدايه تسمي بسم الله وانوب تاخذ مي بأيد.... وشرحتله الوضوء بالتفصيل وتوضيت كدامه اكثر من مره .... يله توضه
فهد : بسم الله ... بديت اتوضه كدامها وهي شاركتلي الحلك ما اعرف شبيها ... هااا صحيح
غنى : بابتسامه اي ... عفيه
فهد : اخذت الخاولي نشفت شكرا شوفي اني باجر راح اصوم بس هاي كدامج اذا صعدت ريحه اكل لفوك افطر
غنى : ههه لا بله خوش سالفه هاي لا حبيبي ماكو تصوم يعني تصوم
فهد : شكلتي
غنى : شكلت ؟
فهد : حبيبي ؟
غنى : اني كلت
فهد : ما اعرف يجوز اني متوهم يله تعاي خلي ننزل يراد اخزن هواي طاقه حتى اصوم
غنى : اي بس البس تشيرتك خو متنزل هيج
فهد : ليش نازل فديوم سفردح حتى انزل هسه هيج
غنى : ابتسمت انت شتحجي اليوم ما اعلق لان فرحانه بهالخطوه الحلوه الي خطيتها
فهد : غمزتلها اني خطواتي دومها حلوه
غنى : ديله همزين مزنجر
فهد : ام وجه الفاهي هم تحجي
غنى : ابتسمت نزلنه جوه لكيناهم كاعدين رحت سويت ويه البنات سحور تفاجئت لكيت ساره كاعده
ساره : هاا غنى وين جنتي بس لا تنطين لفهد جرعه طاقه تصبره منا لباجر
غنى : باوعتلها بله هاي شجاوبها
بتول : تلكيها هي طلبت الجرعه مو هو نسوان متستحي
غنى : استغفر الله ... اروى حبيبتي وين الزيتون
اروى : لج مو زين مالح ويعطشج وانتي صايمه
غنى : مو الي لفهد تدرين بي مياكل جبن عرب اله ويه الزيتون
بتول : هو شهر ونص انتي وياا شوكت لحكتي تتعلمين طباعه
غنى : سمعت خالتج تصيحلج روحي شوفيها شتريد احسن ... شلت الاكل ويه البنات وديته
فهد : وين الزيتون
غنى : انت حتصوم باجر موزين تعطش
ايمان : شلت راسي منوه اليصوم
غنى : فهد
ايمان : بتفاجئ انت تصوم
فهد : ليش وحد قابل ملحد
ايمان : الله يهديك يمه
غنى : كعدنه تسحرنه وكملنه كلمن طب لغرفته واني غسلن المواعين لان حضرتهن ميكدرن ... كملتهن واجيت اطلع صار فيصل بوجهي
فيصل : شلونج مرت اخويه العزيزه
غنى : الحمدلله اخويه بس من رخصتك شويه
فيصل : متطلعين منو لازمج
غنى : ما اكدر اطلع بس شويه انطيني مجال
فيصل : لحظه شبيج مستعجله خلي نحجي ليش دائما ساكته
غنى : هاا
فيصل : تدرين لو كل الزلم الله يطيهم مره مثلج تنتهي الدنيا
غنى : بارتباك ليش
فيصل : لان راح يضلون مكابليهن وكاعدين ومحد راح يطلع لشغله وبالتالي تنتهي الدنيا لان محد يشتغل ولا يطلع خاصه الزلم يفقدون على الترافه
غنى : بخوف دفعته بسرعه وصعدت اركض فتحت الباب ودخلت
فهد : شبيج وجهج اصفر
غنى : لزمت وجهي هاا
فهد : كمت وكفت كبالها شبيج غنى شنو تعبتي يوجعج شي
غنى : لالا مبيه شي بس جنت اغسل المواعين وشفت بزونه واخترعت
فهد : عبالي شو شبيج هي بزونه لو شايفه اسد شتسوين
غنى : ما اسوي شي لان شايفه فهد سابقا
فهد : تقربت عليها وشنو رأيج بالفهد العندج
غنى : باوعت لعيونه الفهد العندي شالع كلبي
فهد : حاوطت خصرها ليش تره حباب وميسوي وكاحه مثل باقي الفهود
غنى : بخجل عاد شلونه هو فهد مزنجر
فهد : قربتها عليه اراويج المزنجر شيسوي
غنى : بلعت ريكي ... هاا
فهد : دنكت عليها هاا شنو اراويج لو لا
غنى : غمضت عيوني من انفاسه لفحتني ... رفعت اديه ادفعه عني فهد فهد وخر
فهد : اشش خليج هادئه رفعت ايدي لزمت وجها وعيوني على شفايفها ... غنى اني بحاجه اسوي شي وضروري
غنى : شنو هو
فهد : دنكت اريد ابوسها وسمعت الباب اندك ... ابتعدت لا ربحنه الواضح هواي راح نبوس
غنى : باوعتله نبوس ؟ ... رحت فتحت الباب هااا خاله
ايمان : كاعد يقره قران شربو ماي قبل ليمسك
فهد : رحم الله والديج يمه
ايمان : عليمن يمه
فهد : رحم الله والديج وبس ... روحي جيبي ماي خلي نتسمم قبل ليأذن
غنى : طلعت خاله ورحت جبتله مي شرب واني شربت اذن كمنه توضينه اني وياا ووكفنه بديت اصلي بصوت عالي حتى يفهمني همزين طلع حافظ سور من القران وعنده معلومات ... اجه فرش سجادته وكبر وبده يصلي لو شكد ما احجي ما اكدر اوصف المنظر الكدامي ولا حتى اكدر اوصف شعوري فهد ديصلي ولاول مره كدامي احس بشعور حلو وسعاده بداخلي ما اكدر اوصفها ... كملنه صلاه الفجر وكعدنه ... هاك هذا الكتاب طلع هالدعاء واقرا
فهد : ادري اول ما شطح نطح وحده وحده مو صلا وصوم وادعيه جره وحده
غنى : غير واجب ولازم تأدي
فهد : اخذت الكتاب والله شكلج منا لنهايه رمضان تكلبيني داعي اسلامي ومو بعيده تلبسيني عمامه
غنى : عن الاستهزاء يله اقره واقره بخشوع وتركيز حتى ترتاح نفسيتك ويوصل دعائك ... اباوعله كام يقره بتركيز وتمعن اروحله فدوه بس لو يستعدل يبقى مثل الورد .... كملنه وكمنه نمنه ... تصبح على خير
فهد : كرصت خدها وانتي بخير
_____________
ظهراً
غنى : طلعت من الكليه وره ممتحنت لكيت فهد بره صعدت الله يساعدك
فهد : راح افطر
غنى : شنو شنو
فهد : جوعان وعطشان جيبي العلاكه الوراج راح افطر
غنى : ماكو والله متنفطر لعد شحجينه البارحه
فهد : غنى بعد ما اتحمل حلكي يابس
غنى : لزمت ايده فدوه فهد لتخرب كولشي كول يا الله وكمل صيامك
فهد : استغفر الله تره اذا استمر الوضع هيج والله افطر
غنى : لا تتعود منا ليومين تتعود بس فدوه لتفطر ... وصلنه للبيت صعد كبل فوك واني رحت سلمت على اروى جانت بس هي كاعده .... هاا
اروى : الله يساعدج ربج كملت الرساله وارتاحيت همزين ماعندي دوام
غنى : انتي بله كملتي الرساله بس بتول تركت والتركه تركه
اروى : غير بطلت
غنى : ياا ليش
اروى : تكول مالي واهس بطلت وكعدت من عبنها غبره
غنى : صيام صيام يمعوده
اروى : اللهم اني صائم
غنى : ابتسمت وصعدت فوك سمعت صوت الدوش سوده عليه طلع بهالحر حتى يجيبني ... سمعت صوت موبايله صحت فهد موبايلك
فهد : شوفي منووو
غنى : لزمت موبايله انتهت المكالمه شفت اسم فرح فتحت الجهاز لكيت رساله صوره ... فتحتها وشفت صوره وكفت الدم بعروكي
- يتبع الفصل التالي اضغط على (ذنوب على قيد الغفران) اسم الرواية