رواية ذنوب على قيد الغفران الفصل الثاني و الاربعون 42 - بقلم براء
ذنوب على قيد الغفران
#ذنوب_على_قيد_الغفران
#البارت_الثاني_والاربعون
انتي غنى صالح
غنى : اي نعم عمو تفضل
: ما عرفتيني
غنى : لا صغراً بيك عمو بس ما اعرفك منو انت
: اني عمج سامح اخو ابوج صالح
غنى : مابدرت اي ردة فعل باوعتله ردت اعوفه وامشي بس وكف بعيني موقفهم وياي بيوم عمليه مروان .... تفضل شتريد
سامح : اريد احجي وياج
غنى : بهدوء بعد وكت هستوكم تذكرتو عدكم ولد اخو وجايين تسألون عليهم تعذرني ماكو حجي بيناتنه
سامح : لحظه بويه تره عمامج ميدرون بيه جاي لهنا اني اجيت من ذاتي اريد احجي وياج اكو هواي امور لازم نحجي بيها فاذا مو لخاطري لخاطر ابوج خلينه نكعد بمكان ونحجي
غنى : تكدر تحجي واحنه واكفين
سامح : الحجي مو مال واحنه واكفين خلي نكعد احتراماً لابوج واني اخو انطيني مجال بس ابري ذمتي و اوضحلج جم شغله منعرف ربج شوكت ياخذ امانته على الاقل اكون مبري ذمتي امام الله
غنى : ماشي تفضل اكعد بس خلي اكل لصديقتي واجي رحت حاجيت نرجس
نرجس : وشيريد منج
غنى : علمي علمج
نرجس : دروحي شوفي شيريد منج
غنى : رحت لكيته كاعد كعدت ... احجي اسمعك
سامح : بالبدايه عرفيني عليج شلونج شخبارج وين صرتي طمنيني عنج
غنى : ابتسمت باستهزاء تدري لو اني بمكانك استحي اسأل هالسؤال جايني وره واحد وعشرين سنه تسألني شلونج وشخبارج ... والله ياعمي اني بالف خير عشت عد الغريب وانتو موجودين واشتغلت خياطه وعمري ميتجاوز ١٧ سنه بس حتى اكدر اعيش اخويه واني عندي عمام واهل ياكلون الطفه من كثرهم لا واحد فكر يسأل عني يكول ولد اخويه شلونهم وينهم شلون عايشيين بت اخويه منين جاي تجيب فلوس ياترى شغلها شريف لو لا ياترى وين صارت شجاي تسوي متسوي كل هذا انتو مافكرتو بي
سامح : دنكت راسي حقج بويه حقج لو شما تحجين وشما تكولين حقج وابن امه اليكلج غلطانه بس ياعمي لتضلميني اني جنت صغير بذاك الوكت شباب وطايش وجنت كوه متحمل مسوؤليه نفسي مو عاد اتحمل غيري هي مرتي وجهالي ماجنت بحالهم وعايش بس لروحي وغراني الشيطان وطمعني بالحلال وحصه ابوج المرحوم كامت تتوزع علينه وهذا الشي طمعني اكثر بس من كمت كلما اكبر احس بغلطي وبالكارثه الي سويتها وصدكي ياعمي اني ابد مو مثل عمامج حتى بذيج الفتره ما جان عندي السلطه حتى اوكف بوجه واحد منهم
غنى : كلامك هذا ماله داعي احنه ماجنه بحال فلوسك ردنه الي يسأل علينه ردنه نروح نعيد يم بيت جدنه حالنه حال الجهال ردنه نبات عد بيت عمامنه ونتونس ويه اهلنه مثلنه مثل غيرنه انتو وامكم حرمتونه من كلشي وخليتونه كدام الناس مكطوعين من شجره واحنه عدنه كومه اهل فأي ندم جاي تحجي بي هسه
سامح : شوفي يابويه احنه اذيناكم صحيح بس الله يشهد امي متدري بكل هذا من جان عمرج ست سنوات ولليوم هي تبجي على حسج وحس مروان وحتى متدري بمروان مات
غنى : باستغراب شلون يعني متدري
سامح : اذا تذكرين من جنتي صغيره اجت امي تريد تاخذكم وبيبيتج ماقبلت وطردتها من البيت وكلتلها عود انطتنه بيت ابوكم حتى نتنازل عنكم وامي ماصدكتها بس هذا الي صار فعلا ام كامل انطتنه البيت واحنه تنازلنه عنكم وعمامج فهمو امي انو الحجيه تتبلى عليهم وهمه كلشي ما ماخذين فبيبتج حلفت متطب لبيت جدج بعد المهم ما اطول عليج كامت امي دائما تسأل عليكم وتدز فلوس بأيد واحد من عمامج بس ماجانو يودوهن الكم وياخذوهن الهم وضل هالشي مستمر لحد البارحه هو نفسه
غنى : شنو الحقاره والدنائه الي انتو واصليلها شنو هالقابليه على الجذب معقوله الفلوس مهمه لدرجه انو تكذبون على امكم طول هالسنين شنو من بشر انتو سوايتكم هاي حتى ابليس مافكر بيها
سامح : سكت .. لارد
غنى : زين هي مافكرت فد يوم تجينه تشوفه ماحبت تلتقي بينه
سامح : بلي مره كسرت حلفانها وكالت اخذوني اشوفهم ومن بدلت وكملت واجينه نطلع كللها عمج غنى تكول اذا توصلين اطردج من الباب ومن ذاك اليوم هي تعبانه وحال الضيم حالها على حسابكم
غنى : بدموع الله لاينطيكم عساكم بكل دمعه نزلت من عيني وعساكم بأعز ماعدكم على الي سويتو بيه وببيبي حرمتوها منه وحرمتونه منها
سامح : وداعه جهالي اني ماجنت قابل ودومي اتعارك وياهم وحتى هالسالفه مادريت بيها غير قبل فتره قصيره الله يشهد عليه اني مالي اي سلطه كلشي بأيد عمتج وعمامج واني وعمتج زمرد كلشي ما النه وعمتج زمرد حالها حال امي كلشي متدري
غنى : زين البيت شلون اخذتو وهو لابويه يعني قانونا مستحيل تكدرون تتصرفون بي واحنه موجودين
سامح : البيت موجود ماكدرنه نبيعه لان بأسم ابوج ولازم يروح الكم فعمامج اجرو لناس وبقو بي فتره طويله تالي طلعو المؤجرين وبقه البيت فارغ
غنى : وبيبي زكيه ماحجت
سامح : اي انجبرت تسكت خوفاً لا ناخذكم منها
غنى : هزيت راسي شكد جنت اكرهكم بس هسه اكتشفت انو انت متستاهلون حتى واحد يكنلكم مشاعر سواء كرهه او حب لان مابقيتو شي زين ينذكر الكم لا والله خلي اكون صريحه ما سويتو شي يذكر غير دفعكم لتكاليف عمليه مروان رغم دفعوتها متأخر ومروان مات
بس الحق ينكال
سامح : باستنكار احنه كلشي مادفعنه عن اي تكاليف تحجين
غنى : تكاليف عمليه مروان اخويه ... مو انتو الي دفعتوها ؟
سامح : لاعمي ما انطينه ولاربع دينار وتره وره ماتوفه اخوج ياله حجه عمح كفاح وعمتج لعبت بي جوله
غنى : صفنت لعد اذا مو انتو منو دفع التكاليف
سامح : والله ياعمي ما ادري علمي علمج
غنى : هزيت راسي وكمت اعتقد خلص الكلام بيناتنه عندك شي بعد
سامح : لا بنتي بس ردت ابري ذمتي واكلج اني حاضر حتى لو تجين ويايه هسه واني مستعد اتحمل مسوؤليتج وكل فلس احمر اخذته وهو من حقج ارجعه الج وبالضعف هم
غنى : لحظه انت شلون تريدني اجي وياك وانتو حالفين لو لكيتوني تذبحوني اصلا انت شلون دخلت للكليه
سامح : خابر خالج كامل قبل فتره وكل لعمامج طلعو غلطانين و رجل خالتج متبلي عليج
غنى : رفعت حاجبي شعجب حجو الصدوك من شوكت اصلا همه يعرفون الله لا ويخافون منه اصلا اني متاكده انتو ما درتو بال ولا اهتميتو من دريتو بجذبه خالتي ورجلها لان من البدايه اجتكم هالسالفه على الحاضر حتى تخلصون مني بعد
سامح : كتلج عمامج كلشي ميعرفون عنج حتى ما سألو ولا استفسرو عن الموضوع واني خابرت خالج خالد وطلبت منه يكلي بياا كليه تداومين وربج طلعت مرته تدري وانطاني اسم الجامعه و لحسن حظي بتي طلعت تداوم بنفس الجامعه وكدرت اجي واسأل عليج بقسمج ولكيتج الحمدلله
غنى : ببرود هذا كله الحجي مو مهم عندي اريد اشوف بيبيتي
سامح : حاليا ما اكدر احنه لسه ما كايليلها شي واذا اجيت حجيتلها كلشي دفعه وحده يجوز يصير بيها شي فشنو رأيج تعوفين خالتج وتجين تبقين عد بتي بتي ارمله وكاعده هي وجهالها ببيت وحدها روحي كعدي وياها لبين ما امهد لامي الموضوع واخليج تشوفيها
غنى : ابتسمت للمعلومه تره اني متزوجه هسه وهاي الحلقه بأيدي يعني ما احتاجكم بعد والي اريده منك هسه بس تخليني اشوف بيبيتي
سامح : من هالعين قبل هالعين صدكيني مستعد كلشي اسوي بس حتى اكفر عن ذنبي و بالمبارك زواجج رجلج زين وياج لا شيشتغل
غنى : ببرود ضابط وزين وياي احسن منكم ... عن اذنك تأخرت درت وجهي اروح وكفني صوته
سامح : هاج هذا رقمي شوكت ما احتاجيتي شي ليردج اله لسانج واني موجود اعتبريني ابوج ولتترددين لحظه وحده
غنى : ما اعرف شنو الي خلاني اخذه مديت ايدي اخذته ورحت اشوف محاضراتي اكيد هسه فاتتني محاضره من ورا .... خلص الدوام وطلعنه اني ونرجس
نرجس : حماج الصاك اجه الدكتور علي اكلج بس شكله مو راحه رغم صاك
غنى : والله انتي بطرانه وبعدين شبي مو راحه بالعكس كولش حباب
نرجس : طبعا تدافعيله غير اخو ابو العيشه وعلى طاري ابو العيشه متكسبين بيه ثواب وتخطبيني لرجلج ونصير اني وياج ضراير ونعيش على حبه الله ونتساعد على شغل البيت هم شتكولين
غنى : باوعتلها دنجبي انجبي يله امشي روحي لاهلج الاستاذ منتظرج
نرجس : هههه تغارين عليه يله عيني بطلت باي
غنى : باي .... اباوع لعلي واكف منتظرني خطيه هسه ابتله بيه فتحت الباب السلام عليكم
علي : وعليكم السلام شلونج
غنى : صعدت الحمدلله اسفه تأخرت بس جنت احجي ويه نرجس
علي : عادي عليمن تتأسفين وبعدين لتتكلفين بالكلام احنه صرنه اخوان لو متقبلين نصير اخوانج
غنى : ابتسمت بالعكس اتشرف
علي : حركت اكول غنى راح اسألج سؤال بس لتفهميني غلط
غنى : تفضل اسأل
علي : احم هاي نرجس صديقتج يعني عدها اقصد مرتبطه اكو ببالها احد
غنى : لا ابد رغم هي سبورتيه وكولش مرحه والكل يحبها بس معدها اي علاقه ويه اي احد وحتى تكدر تسأل اروى وحتكلك نفس كلامي
علي : لالا يمعوده كلشي ولا اروى مالي خلكها تروح تسويلي سالفه
غنى : زين اكدر اعرف ليش تسأل
علي : هاا هيج مجرد استفسار لا اكثر
غنى : ابتسمت ودرت وجهي فتهمت السالفه ... وصلنه للبيت نزلت دكيت الباب فتحها احمد وزينه بوستهن شلونكم
زينه : شجبيلنه وياج
غنى : ذبيت ملازمي ونزلت لمستواها سوده عليه حبيبتي ما ادري بيج تردين اجيبلج شي بس وعد باجر اجيبلكم كولشي تردو
احمد : شكرا باجي
غنى : ابتسمت عفواً حبيبي ... كمت دخلت اخذت ملازمي ودخلت جوه علي صعد فوك خطيه الله يساعده اني رحت اسلم واصعد شفتهن بالمطبخ طبعا خاله ايمان واروى ماموجودات معزومات عد صديقه خاله ايمان كللي اروح وياهن بس مارحت لا اني ولا ورده ... السلام عليكم
الكل : وعليكم السلام
انغام : هاي شبي وجهج
غنى : سكتي حاره الدنيا تكتل بره هاي عود بعدنه ما دخلنه لتموز وهيج الجو لعد منا لتموز نموع من الحر
انغام : اي والله دبكنه من الحر وحتى الكهرباء مابيها حظ كل ساعه فاصله ... دروحي غسلي بماي بارد وجهج صاير نار وخلي واقعي بردي وجهي بي
غنى : اي هسه
آلاء : تعاي حبيبتي وين رايحه والغده منو يصبه امي مو كافي من الصبح طالعه وهسه اجيتي على الحاضر تردين غده
غنى : تره جنت بالدوام مو طالعه اتونس من رخصتجن ابدل واجي طلعت من المطبخ صارت ام فيصل بوجهي
سعاد : هاا اجيتي يالمسعده
غنى : تفضلي ام فيصل محتاجه شي
سعاد : ما اريد شي انكلعي لغرفتج ولتتاخرين كتلنه الجوع
غنى : صعدت فوك والله يا الله الساعه مصايره حتى بالثنتين وهي كاتلها الجوع يربي لامن الاهل ولامن العيال دخلت لغرفتي ذبيت ملابسي بسرعه ودخلت للحمام همزين المي بارد سبحت وطلعت بسرعه بدلت ووكفت اصلي حتى قران ماقريت مالي خلك لسانهن لبست صايتي فوك الدشداشه القصيره ولفيت شعري سمعت الباب يندك رحت فتحتها شفن ساره
ساره : هاا الله يساعدج
غنى : تسلمين ويساعدج محتاجه شي
ساره : اي حبابه كحلتي خلصت والبارحه شفت الكحله الخالتها بعيونج تخبل عادي تنطيني القلم مالتج استخدمه
غنى : تذكرت كلام اروى " ساره متنعطى وجهه " تنهدت ماشي رحت طلعته تفضلي
ساره : شكرا يله اعوفج
غنى : نزلت جوه لكيتهن كاعدات بالصاله رحت بوست ورده شوكت اجيتي
ورده : بتعب قبل شويه
غنى : شبيج
ورده : تعبت والله انهد حيلي
غنى : يله هانت مابقه شي شهر شهرين بالهواي وتمتحنين سمعت امتحاناتكم برمضان مو
ورده : على الاكثر اي
بتول : كتلنه الجوع يمعوده عوفي الحنيه وروحي صبي
ورده : انتي لتدخلين وخليج بروحج
بتول : هاي عليه ورده
ورده : لا على الحايط شو دسكتي مالنه خلكج تره
انغام : عينجن على سالم كومي حبيبتي خلي نصب
غنى : رحنه صبينه واجينه نكعد
فيصل : وين دولكه الماي
غنى : اباوع وحده كامت تباوع للثانيه استغفر الله يعني ماكو هيج ... اجتي ورده تكوم كعدتها كمت جبت الدولكه من الثلاجه واجيت خليتها بالسفره ... تغدينه ما اكلت مدري شلونه الاكل كملنه غده كمنه اني وورده وانغام لمينه السفره والرباعي المرح كاعد على صفحه وخامستهن راحت اليوم ويه رجلها ورجعت لبيتها ( ليلى )
سعاد : غننننى غسلي المواعين وصبيلنه جاييي
علي : لا عاد لهنا وكافي مصختنها شنو حضرت جنابجن خالات رجل على رجل والبنيه هي صبت الغده وكل شويه مكوميها حتى ماخليتوها تتغده من الاوادم وهسه تردنها تغسل المواعين وتصبلكم سم ماطلعت هاي ادري بت العالم تشتغل عدجن لو لان حبابه وساكته تستغلنها يعني لو فهد هنا متفتحن حلكجن وياها
سعاد : شبيك انفتكت علينه هسه هي قابل شسوت على المواعين والجاي قابل شيرادله شنو انكلبت الدنيا
علي : بعصبيه اذا ما انكلبت الدنيا ما غسلتي المواعين انتي وما كومتي جنتج لو بت اختج تصب لو مكسحات
منذر : طلعت من الاستقبال شبيكم ليش صوتكم عالي
فيصل : ماكو شي اخوك جاي يلقي محاضره بالمساعده تعال اسمع
علي : ماراح اجاوبك لان لو بيك خير جان حجيت حق الله ولو الياكل حق العالم شمعرفه بحق الله
فيصل : كمت شنو قصدك ولك
علي : قصدي الي فهمته يا امين يا كد الاعتماد ... باوعتلهن اني ما احب اتدخل بسوالف النسوان بس مادام اشوفجن تستغلن البنيه وهي حرام اذا ينسمع صوتها تشتغل وهي ساكته ومن اول ما طبتلنه عرفت راح تستغلنها بس اذا ناسيات اذكرجن هي مرت منو وهالبيت لمنو والي يفكر يندك بيها شيسويله رجلها ... الله ينطي مرت منذر لو ماهي جان البنيه وكعت من الكد والتعب بس صدك بنات الاصول يبقن بنات اصول سواء عد اهلهن لو عد العيال والوصخات والقذرات هنه هنه ميتغيرن عفتهم ورحت
بتول : خرب يومه شبي انفتك علينه
فيصل : ابتسمت الواضح مرت فهد عزيزه عليه ولو هي كل حاجه لفهد تصير محط اعجاب لكل الزلم
سعاد : باوعتله شنو قصدك ولك
فيصل : هيج ماقصدي شي
_________________
غنى : خلصت غسل مواعين وصبيت جاي انطيته لانغام هي تودي وهنه كاعدات ماوحده كلفت نفسها حتى تجامل وتكول خلي اساعدجن حتى ورده ماخليتها تشتغل خطيه فوك تعب الدوام اجي اني عليها ... كملت كولشي وطلعت من المطبخ حتى اروح انام الساعه راح تصير بالاربعه واني راح اوكع على وجهي
سعاد : مرت فهد وين رايجه
غنى : انام
سعاد : والجاي
غنى : هسه تجيبه انغام عفتهم وصعدت لغرفتي فتحت الباب ودخلت نزعت ملابسي وبقيت بالدشداشه تمددت واحس جسمي متكسر لان من الصبح كضيتها افتر شي للمحاضره شي وره نرجس ورجعت ماارتاحيت مباشرةً استلمني ذني الحبابات يبوو نسيت موبايلي بالجنطه ما طلعته رحت طلعته لكيت رساله من فهد ومكالمه فائته ورساله هم من خالتي ... شفت رساله فهد من زمان شيخلصني منه هسه
" اني وصلت "
"علي يجي عليج لترحين منا منا "
مكياج ممنوع ومالج علاقه بمرتضى "
اوامر بس اوامر حتى اسلوب بالكلام ماكو رحت شفت رساله خالتي تريدني اروحلها العصر سوده عليه صايره متجي بس تخابرني تسألني عن اخباري متقبل تجي لان الجماعه مضوجيها بالصبحه وحالفه متجي وهنه موجودات ... طفيت الموبايل ونمت
________________________
فهد : فتحت موبايلي لكيتها شافت الرساله بس ما جاوبت اكيد بعدها ماخذه موقف مني خاصه انو بعدين عفتها ورحت للملهى تنهدت ااووف من البدايه ماجان لازم اعقد عليها ادري بروحي ما اناسب انسانه مثلها لو مسوي مثل ما كالت امي ومخليها تتحمل المسوؤليه بدالي واضل اني من بعيد اساعدها بس اني مطي رحت عقدت
عليها ودمرتها ودمرت نفسي ... صفنت بس لو اروح لغير زوايه ياترى لو ما متزوج غنى الي راح اخذها راح تصير مثل غنى لو لا وهل اني راح اقبل بوحده ماعدها اخلاق وشخصيه غنى وفرضاً لو متزوج هسه غير غنى هم راح تطلع شريفه وملتزمه مثلها والاهم من هذا كله بهالوكت اكو بنات مثل غنى اسأله هواي تدور ببالي وما الها جواب ولو نجي للواقع غنى انسانه شبه كامله حلو ومثقفه وعاقله وفوك هذا شريفه وبريئه الى درجه متنوصف بس اني ما اعرف شبيه اكو خوف فضيع بداخلي تجاها احسها متناسبني واخاف بلحظه شهوه اتقربلها وتالي اضلمها وياي غمضت عيوني راسي راح ينفجر عمري كله مافكرت بأحد اقصى حد ممكن اوصل بي للتفكير بشخص تلث دقايق مو اكثر اله هي اكعد ساعات افسر واحلل بيها وبحياتي وياها وتالي ما اوصل لنتيجه
ايمن : هاا ابو الفود شبيك
فهد : دايخ شويه
عمر : دايخ لو ضايج لان عفت المره
مهيمن : تلكيها مدللته خوش دلال وصايج لان بعده ماشبع منها
فهد : رجاءاً لتطرقون لهالمواضيع خلي النسوان بعيده عن الشقه
مهيمن : ههه بس لا متقبل
فهد : ورثت جكارتي مو ما اقبل بس خلي نسوانه بعيده عن شقانه وانتو تعرفون احنه شلون نتشاقه كله فشار وغلط
ايمن : والله كلامك صح خلينه نفشر بس على الامهات احسن
عمر : هههه لعد شكد عارات انتو على امهاتكم اي على نسوانكم لا
فهد : انجب اني حتى على امي ما اقبل
مهيمن : اشو ذاك اليوم نزلت امهاتنه وغسلتهن خوش غسله بسوالفك
فهد : اخذت نفس من الجكاره مو امي شريفه ومهاتكم هشك بشك وانتو اعرف
الولد : هههه طاحظك
ايمن : صدك شباب على طاري النسوان احب ابشركم اني خطبت
عمر : عليك العباس
ايمن : والعباس خطبت شبيكم
مهيمن : خطبت منو ولك
ايمن : خطبت بت صديقه امي صيدلانيه وحلوه تخبل حتى انصدمت من شفتها صدك بعد ماتبت الله فتحها بوجهي
عمر : لحظه لحظه صيدلانيه وقبلت بيك انت
ايمن : ليش شبيه قابل وصخ ومتقبل بيه وبعدين البنيه وافقت بعد ماشافتني
فهد : اي مبروك منك المال ومنها العيال
ايمن : رحم الله والديك هو هذا الحجي مو مثل ذوله البغول
فهد : دك موبايلي شفتها غنى كمت طلعت ... جاوبتها الوو
غنى : الوو فهد حروح لخالتي وكلت خلي اكلك
فهد : خالتج سحر ؟
غنى : اي لعد جم خاله عندي اني
فهد : بس هي حايط على حايط ويانه عليمن تكليلي
غنى : بهدوء ميخالف ميصير اطلع وما اكلك ... مو هذا المفروض ؟!
فهد : هاا اي اي هو المفروض هيج عاشت ايدج همزين كلتيلي اخذي راحتج بس لتتاخرين
غنى : ماشي يله باي
فهد : لحظه
غنى : نعم
فهد : بارتباك .. ااا شلونج ما سألت عليج
غنى : الحمدلله
فهد : خوما محتاجه شي
غنى : لا شكراً ... يله صار لازم اروح مع السلامه سديته منه ونزلت
فهد : اكو شي بداخلي فرح من خابرتني واستأذنت مني رغم هي ماخذه موقف مني بس مع هذا ماتصرفت بكيفها .... عندي احساس انو غنى الانسانه الوحيده الي لو اعوفها بدال اليوم سنه تبقى نفس ماهي للحظه حمدت ربي من الله خلاها مرتي زين والحجي الحجيته قبل كم دقيقه وين راح شهالتناقص هذا يافهد
________________________
غنى : حضنت خالتي شلونج
سحر : بعد كلبي مشتاقتلج هواي وماكدرت اجي واشوفج من وره المسمومه مرت ابو رجلج
غنى : ليش شسوتلج
سحر : تعاي خلي نطب نحجي جوه
غنى : طبيت وياها شفت عمو سيف كاعد ابتسمت شلونك عمو
سيف : هله بويه شلونج والله مكانج خالي بالبيت لابد جنه نكعد اني وياج بالحديقه نحجي نشرب جاي نتابع اخبار اله خالتج من يوم تزوجتي وهي عايفتني
سحر : ياا اني
غنى : ههه يشاقه وياج خاله
سحر : كعدي
غنى : كعدت خير شعجب دازه عليه ... اباوعلها باوعت لعمو وباوعتلي حسيت اكو شي ... احجي خاله
سحر : شوفي بنتي اني وعمج راح نشيل منا واشترينه بيت يم اهل عمج وراح نكعد هناك
غنى : ليش ... شنو السبب حتى تردون تشيلون اكو احد ضايقكم
سيف : لا بويه كل الجوارين ورود وناس تنحط بنص الكلب بس هذا بيتج انتي واحنه ما النه بي وزحمه نبقه كاعدين بي وانتي تزوجتي
غنى : ليش عمو هو اكو فرق بيني وبيكم انتو اهلي والبيت هذا يروح فدوه لرجليكم صدوك تحجون تردون تعوفوني وترحون على حساب البيت خلص اني احوله بأسمك عمو بس لترحون
سحر : شنو تحولي باسم عمج كعدي وسكتي هذا حقج وبيتج انتي
غنى : اني ميهمني البيت الي يهمني انتو
سيف : لا بويه مال اكلج اي واصفكلج لا اني عندي والف الحمدلله الله رازقني واكدر اشتري بيت وما اكدر ابقه كاعد ببيت مو الي ومستحيل اقبل بالنقاش هذا بيتج ويبقه الج وحتى ما اقبل تبيعي عوفي متعرفين الزمن شضاملج
غنى : زين ابقو بي اني ما اريدكم ترحون
سحر : حبيبتي تره ماراح نطلع خارج بغداد راح نشيل لمنطقه ...(....) وهالمنطقه مو بعيده بالسياره ربع ساعه انتي يمنه واكيد راح تجين تشوفينه وبالوقت الي يعجبج بس مال نبقه هنا لا عمج يقبل ولا اني اقبلها
غنى : تنهدت خلص براحتكم اهم شي موجودين يمي واشوفكم ولو ضايجه لان حترحون بس قابل اكدر اجبركم
سحر : لا حبيبتي ماكو داعي تضوجين وكتلج شوكت ماتحبين تجين البيت بيتج واني امج وسيف ابوج ماكو حاجه اكلج هذا شي انتي تعرفي
غنى : هزيت راسي ضليت كاعده فتره وكمت رجعت للبيت تلكتني سعاد الي ما ادري ليش حاقده عليه وشمسويتلها حتى هيج تكرهني ما ادري ... لكيت خاله ايمان والبنات كاعدات سلمت
سعاد : وين جنتي
غنى : يم خالتي
سعاد : شو بكيفج تطلعين وتطبين انتي
غنى : تره خابرت رجلي واخذت اذن منه قبل لا اطلع والعفو منج بهالبيت محد اله حق يحاسبني غير ام زوجي وزوجي وبس اباوع لخاله ايمان ابتسمت ماردت اتجاوز بالكلام بس هي طلعتها من ماعونها وهواي دتدوس ببطني وعبالها اني بوز مهانه وبكل مره اسكتلها
سعاد : شفتي جنتج شطول لسانها
ايمان : ما كالت اله الصدك رجلها ويدري انتي شعليج
سعاد : هااا هيجي صار الحجي
ايمان : اي
اروى : مكانج خالي فد تونسنه وخالتي سألت عليج ليش ما اجيتي
غنى : مو تدرين عندي دوام
آلاء : صدك انتي ليش لسه ماكعدتي بالبيت مو هالسنه تتخرجين
غنى : هاي اخر سنه مابقه شي ونخلص ان شاءالله
ساره : صدك غنى شعجب رحتي لغات مو تربيه انكليزي وهي نفس الدراسه
غنى : لا شلون الي يتخرج من قسم تربيه انكليزي تعيينه يختلف ودراسته هم تختلف اهل التربيه يدرسون اساسيات التدريس اضافه انو يدرسون مواد عربيه يصيحولها ثانويه ويه موادهم الاساسيه والي يتخرج من كليه التربيه يشتغل مدرس اما احنه لا دراسته تتعمق بكل اللغه من ناحيه الكلام الكتابه اللفظ حتى مخارج الحروف نركز عليها اضافه انو اني اختاريت هالمجال لان بي هواي فرص اكدر اشتغل مترجمه واكدر اصير مدرسه واكدر اشتغل باحثه هم بس هاي يرادلها دراسه هواي وللاسف بالوقت الحالي ماكو ذيج الشركات بالعراق فنتجهه للتدريس اكثر بس بالمختصر كليه اللغات بيها فرص تعيين اكثر من التربيه
بتول : نفس الشي ونفس الخرط ماكو اي اختلاف بكلامج هو مدرس انكليزي وخلصت السالفه
غنى : انتي خريجه شنو
بتول : هاا
غنى : انتي خريجه اي كليه
بتول : تربيه تاريخ
غنى : بهدوء خلص لعد اذا ما الج بالانكليزي لتحجين بي
ورده : لزميها اروى لزميها
اروى : شنو هي
ورده : جبهه بتول قبل لتطير
اروى : ههههه طاحظج
________________________
فهد : صار تلث تيام بالدوام والحمدلله ماكو شي بحيث حتى نفسيتنه ارتاحت ... كاعد اشوف جدول الحضور واتاكد من الاسماء طب واحد من الولد اباوعله عيونه حمر
: سيدي اريدك بموضوع
فهد : تعال تفضل استريح ... اسمعك
: سيدي الله يخليك حاجي المسوؤل اريد انزل هسه
فهد : خير خو ماكو شي
: الله يحفظلك الوالده امي توفت البارحه وهسه خابروني واريد انزل رحت حاجيت صباح ميقبل واني لازم اروح مال انتظر منا لست تيام ما اسويها بدموع ابوس ايدك سيدي حاجي
فهد : لا اله الا الله الله يرحمها خلص عوف الشغله عليه اني احاجي
: ممنون سيدي
فهد : كمت رحت لصباح اني منا احبه بس الولد نخاني وما اكدر ارده دكيت الباب ودخلت .. سلام
صباح : وعليكم ... هاا شعجب منورني وجاي شنو تريد تنزل عريسنه
فهد : ببرود مو اني اريد انزل اكو واحد من الولد امه توفت ولازم ينزل وانت ماقابل تنزله اكدر اعرف ليش
صباح : بعد ست ايام تنزلون خلي يصبر
فهد : عود صدك تحجي الولد امه توفت يامسلممممم الله ااااااامه ماتتت شلون تريده ينتظر قابل الميته دجادجته لو امه انت ماعندك احساس يا اخي لو امك الميته البارحه متعوف الشغل وتنزل اسمع صباح اذا متنزله اقسم بشرفي اقدم بيك شكوى للمسوؤلين شلون ذيج المره وخليتهم يكصون من راتبك وكت الي ما قبلت تدزلنه قوات دعم تذكر شكد كطعو من راتبك لو اذكرك ... انصحك تخلي الولد ينزل والا وعافيتي بس انزل اروح اقدم عليك شكوى واكلهم الولد امه ميته وميقبل ينزله واعرف شلون استغل عواطفهم والله واخليهم يعاقبوك لا عبالك اني هين تره كلشي يطلع مني
صباح : الله يطول بعمر امي ... خلص لتخبصنه هسه اخلي ينزل .... الله يساعد كلب مرتك شلون قبلت بيك ما ادري
فهد : باوعتله صفح راح اروح اذا مانزلته اخابر غانم وهو يتصرف وياك
صباح : عمي والعباس راح انزله بس روح عبالهم هسه شو شبيك نصي صوتك
فهد : طلعت لكيت الولد بره ... يله روح جهز غراضك وارجع لصباح خلي يسجل اسمك وانزل
الولد : رحم الله والديك سيدي زحمتك
فهد : تدلل ماسويت شي
_________________________
غنى : مرن الايام ركض ركض واليوم خميس وباجر يرجع فهد واليوم البنات كلهن يمنه شنو المناسبه ماادري اني كاعده بغرفتي بس نزلت سلمت وصعدت ... سمعت الباب يندك عفيه باب ميسكت ابد خو ساره كل ساعه ناطتلي كمت فتحتها شفتهن كلهن بالباب
ساره : الدنيا حاره بالصاله كتلهن خلي نروح نكعد ب بغرفه مرت فهد لان ثلج وبارررده
غنى : ابتسمت بتصنع هلوو والله لو فهد يدري بيه مفوته كل هذني للغرفه يشنقني هي ساره وميدري بيها تفوت لهنا وعود هو محذرني ... تفضلن اهلا وسهلا
مروه: ريحه الغرفه مو طيبه شنو هالعطر الي راشته
شهد : دروحي انتي تتحسسيين من ريحه النظافه
ملك : هههه تره صدوك الغرفه ريحتها طيبه انتي متوهمه
مروه : كعدت ما ادري ما عجبتني
غنى : كعدن كل البنات اباوع لاروى الي تطبطب على ايدي بمعنى سكتي واني ساكته
مروه : فهد شوكت يرجع
غنى : باجر
مروه : حرامات لو ادري جان اجينه باجر حتى نشوف فهد اكول بنات لعد بتول ما اجت لهنا ليش
ساره : صحتلها تكول ما اجي يم هاي بت الفكر عود تقصد غنى
غنى : باوعت لاروى بودي اكوم انفجر عليها واراويها بت الفكر شلون تصير
ملك : على حسب علمي ميعرف ابن الفكر غير ابن الفكر نفسه وبعدين ابن الفكر عايش بالفكر مو عايش عاله على العالم ومحد يسأل عليه ولا يكلبه وكللمي هذا يوصلها ويتعداها فخلي تحترم نفسها وتعرف شلون تحجي على اسيادها
مروه : اسيادها ؟ غنى اسيادها
ملك : من تسمت بأسم فهد وصار اسمها بظهر جنسيته صارت وحده منه وبينه ومادامها منه وبينه يعني صارت اسيادها لبتول لان بتول غريبه عنه ومالها اي علاقه بينه حي الله بت اختك مرت عمنه وغنى مرت ابن عمنه واخونه
اروى : يمه من لسانج يمه
ملك : شعبالج الكدامج دكتوره مو حي الله بنيه
مروه : بعدج ماصرتي دكتوره ستوج هاي اول سنه
شهد : انتن ملاحظات احنه عائله كلشي وكلاشي
غنى : شلون يعني
شهد : اذا تدورين بينه تلكين الدكتور العام ودكتور الاسنان والمهندس والمحامي والمحلل والمدرس والمترجم والضابط والمعلم وووو فكلشي عدنه فصار اسمنه مو بيت حجي علي بيت كلشي وكلاشي
البنات : هههه
غنى : ضلن البنات شويه وراحن واني كمت نمت حتى اكعد من وكت لان فهد كايل لخاله ايمان يوصل الفجر
__________________________
الساعه الخامسه صباحا
فهد : وصلت للبيت صفيت السياره ونزلت فتحت الباب ودخلت البيت هدووء اكيد جمعه وكلها رايحه بسابع نومه فتحت الباب على امي لكيتها كاعده كالعاده تقره قران وتنتظرني ... صباح الخير
ايمان : صدقت ... هله يمه هله حبيبي صباح الانوار كمت شبكته بعد كلبي شلونك
فهد : بهدوء الحمدلله انتي شلونج
ايمان : شلوني وانت مثكل وجهك عليه وتالي فهد هاي انت تزوجت وخلصت السالفه
فهد : كتلج نتيجه اجبارج واصرارج على هالزواج راح تكون اله نتائج مو مفرحه الج وهاي اولها
ايمان : عساني بالموت يافهد واخلص وارتاح من هالدنيا لامن البزر ولا من الرجل ولامن هالدنيا الغبره هاي روح لغرفتك روح
فهد : من شفتها بجت حسيت روحي واحد حقير حضنتها خلص يمه اسف يروح فدوه لتراب رجلج فهد وعشيرته صدك تحجين تبجين من ورايه من تراب يطمني لو انزل دموعي خلص ياروحي انتي لتبجين حقج عليه واني الغلطان
ايمان : غلطان وابن كلبه
فهد : ضحكت حشاج يمه بست اديها وراسها
ايمان : الله يرضى عليك يمي اتجه لحياتك وبيتك الي صار صار وانتهى واحنه ولد اليوم
فهد : هزيت راسي وصعدت فوك فتحت باب الغرفه ودخلت افيييش ما ارتاح غير بس بغرفتي لو انام بالجنه هم ما احس هالاحساس صارت عيني عليها شفتها متغطيه ونايمه تقربت وكفت كبالها حركت ايدي متلمس بروده خدودها نزعت ملابسي طبيت سبحت واجيت نمت بصفها تقربت عليها كلش بحيث لزكت بيها رفعت ايدي محاوط خصرها خليت راسي بركبتها اخذت نفس بقوه بستها هناك ودفنت راسي بجسمها ونمت مااعرف ليش سويت هيج بس اكو صوت بداخلي راد هالشي
_________________________
صباحا
غنى : فتحت عيوني واحس ركبتي تحكني واكو حراره عليها تحركت اباوع اكو ادين محاوطتني عرفتهن ادين فهد المزنجرات من كبرهن جريت ايده اريد اوخرها ما اكدر شادها شد هذا شبي اول تالي تطلع منه هالسوالف سمعت صوته
فهد : بصوت مكتوم مو منطمر ليش تحوصين
غنى : بارتباك اريد اكوم
فهد : حرك خشمه على ركبتها ... بعد وكت رجعي نامي
غنى : شبعت نوم وخر
فهد : وخرت راسي عنها دارت وجها عليه
غنى : جريت ايده من خصري ماكو مجلب ... احم فهد ايدك
فهد : شابكت اديه على خصرها مقربها عليه .... همست شبيها
غنى : اباوع لعيونه عوزي شويه والزك بوجهه وخرها اريد اكوم
فهد : بالبدايه ماكو الحمدلله على السلامه
غنى : بهدوء اسفه الحمدلله على سلامتك
فهد : بست خدها بعمق الله يسلمج شلونج
غنى : انخفظ تنفسها ... الحمدلله
فهد : حركت خشمي على خدها ... دومج
غنى : بخجل شكرا ممكن اكوم
فهد : ليش ما مرتاحه هيج
غنى : باوعتله شبيك فهد
فهد : همست علمي علمك شنو رأيج تفحصيني وتشوفين
غنى : بفهاوه هاا
فهد : باوعت لعيونها قربت شفايفي بستها بصف شفايفها احجي شبيج صافته
غنى : بارتباك فه فهد وخر شنو هالتصرفات هاي شبيك اليوم ..... فهد بداعه ابو قاسم وخرر عنيييي
فهد : ههههههههه عفتها .... تره حلفتيني بالغالي ... يله كومي
غنى : كمت بسرعه ... عدلت ملابسي بهدوء اكدر اعرف شبيك اليوم
فهد : وكفت كدامها صدكيني ما اعرف غنى اني نفسي ما جاي الكه تفسير لتصرفاتي المتناقضه هاي للحظه جاي احس عندي انفصام
غنى : حكيت ر اسي الساعه بالتسعه هسه وبالعاده محد يكعد بهيج وقت خاصه الجمعه ....حاولت اغير الموضوع جوعان ننزل نتريك
فهد : ولو بعدني نعسان بس بعد كعدت لبسي صايتج وحجابج خلي ننزل تلكيهم هسه كلهم نايمين
غنى : هزيت راسي .... رحنه غسلنه ونزلنه
فهد : شدعي عليج كمتي تحوصين ما خليتينه ننام مثل الاوادم
غنى : همست اني
فهد : لا امي
غنى : دخلنه اني وفهد للمطبخ وتصنمنه بمكانه عززه هاي شنو
****
يتبع
- يتبع الفصل التالي اضغط على (ذنوب على قيد الغفران) اسم الرواية