رواية ذنوب على قيد الغفران الفصل السابع و الثلاثون 37 - بقلم براء

السابع التلاتون

                                        

                                              

#ذنوب_على_قيد_الغفران 

#البارت_السابع_والثلاثون 

سيف : سمعت صوت الجرس كمت فتحت الباب شفت جوكه مال نسوان 

ايمان : شلونك ابو حوراء 

سيف : هله بيج خويه ام فهد تفضلو تفضلو اهلا وسهلا 

ياسمين : دخلنه زاد فضلك وليدي 

سيف : يا ام حوررراء وييينج 

سحر : طلعت على صوت سيف شفت مجموعه مال نسوان الاعرفها انتبهت على الحجيه وام فهد تفاجئت من جيتهن بس مابينت .... يا اهلا وسهلا نورتونه والله سلمت عليهن كلهن 

ياسمين : بعد كلبي ربي يحفظج 

سحر : فتحت الاستقبال تفضلو تفضلو استريحو بس من رخصتكم ثواني طلعت بسرعه صاعده اصيح لغنى 

غنى : كاعده بغرفتي وسمعت الجرس يندك غمضت عيوني عرفتهم اجو شويه واجت خالتي 

سحر : كومي يمه غنى اجونه خطار نزلي جيبي ماي وسوي جاي وضيافه واني نازله اكعد يم النسوان فشله اعوفهن وحدهن 

غنى : هزيت راسي وكمت نزلت 

حياة : خالتها مبينه حبابه خوش استقبال استقبلتنه 

ياسمين : سبحان الله نفس طبيعة امها بالضبط هم جانت هيج صاحبه ملكه ووجها دومه يضحك الله يرحمج يا ام كامل 

نسرين : ذوله شلون كاعدين شهالبيت هذا 

ساره : ليش شبي بيتهم شو يلك من النظافه والترتيب 

نسرين : من تحجي الكبار الجنانين تسد حلكها وتسكت 

ايمان : لا اله الا الله ام مرتضى رحمه لابو مرتضى لتحجين ولا تنتقدين اي شي ما اريد الجماعه ياخذون على خاطرهم منه وانتي يمه ساره مسحيها بوجهي 

نسرين : انتي بالذات اني ماخذه موقف منج اجيتي تخطبين لابنج وحده اني رايدتها قبلج بس ميخالف فهد مثل ابني وما احقد عليه لان خذه وحده هاويها ابني 

ياسمين : خليني ساكته كلنه ندري انتي بس حجي لاجنتي تردين تخطبيها ولاشي 

نسرين : اجيت اجاوبها ودخلت خالتها 

سحر : عذروني تاخرت 

ايمان : براحتج حبيبتي ام حوراء 

ضحى : لتتقيدين عيوني اهل احنه 

سحر : والله انتو اكثر من اهل الله يخليكم

ياسمين : اكول حبيبه جمارتكم وينها 

سحر : جمارتنه ؟!! هاا قصدج غنى هسه تجي 

غنى : دكيت الباب ودخلت بهدوء السلام عليكم 

الكل ماعدى ايمان : وعليكم السلام 

غنى : قدمتلهم المي 

ياسمين : عوفي الماي شاربين ..تعاي خلي ابوسج شلونج حبيبه 

 

                

غنى : الحمدلله حجيه انتي شلونج 

ياسمين : ليش هو اليشوف مرت الغالي شلون يصير لونه 

سحر : بكلبها ... شنو مرت الغالي طخت عندي بس لاجيتهم على حساب هالشغله 

غنى : سلمت على الكل كلهن بوسني واسلوبهن جان حلو ماعدى ام مرتضى وخاله ايمان ... خليت الصينيه واجيت اطلع 

حياة : وين طالعه حبيبتي كعدي خلي نشوفج نسولف وياج كلشي ماشفنه منج 

غنى : كعدت وجريت ضفيرتي من وره ظهري وعدلتها 

ضحى : اللهم صلِ على محمد هذا شعرج طبيعي 

غنى : هزيت راسي  

ساره : ما شاءالله يخبل 

غنى : بابتسامه صغيره شكرا 

ياسمين : ام حوراء شلونها غناوي 

سحر : والله ورده وهاي الحجي مو كدامها صدك ورده 

ياسمين : شكد عمرج حبيبه 

غنى : واحد وعشرين 

ضحى : ليش حسب علمي مو مرحله رابعه انتي المفروض 22 

غنى : بعدني مكملت الواحد وعشرين 

حياة : شنو تدرسين 

غنى : لغات قسم انكليزي 

نسرين : ميرادلها سؤال هي ومرتضى سوه 

غنى : تنهدت من رخصتكم عفتهم وطلعت احس جبل نايم على صدري ماردت زواجي يصير جبر لا وبهيج طريقه رحت للمطبخ اهدر جاي 

ياسمين : اكول ام حوراء خلي ندخل بالمفيد ونحجي بدون لف ودوران جيتنه هاي اليوم حتى نطلب ايد غنى 

سحر : نتشرف بيكم والنعم بس المن 

ايمان : لابني فهد 

سحر : هاا بس مو الفرق هواي بيناتهم 

ايمان : عمره تلاثين وهي واحد وعشرين تسع سنوات مو ذاك الفرق الجبير وبعدين اساس نجاح كل علاقه هو التفاهم مو العمر 

سحر : اي والله صحيح كلامج 

ياسمين : شوفي ام حوراء اني مو امدحلج بحفيدي لا والله كلها تدري بيه احجيها طك بطك وما اخاف واني اكلج متلكين احسن من فهد واخذيها مني غير غنى متناسب فهد لان هو بارود واعصاب يرادله وحده عاقله وفاهمه مثل غنى حتى تريحه وتدير بالها عليه واني متأكده فهد لو حبها يعلكلها العشره شمع 

سحر : والنعم منه حجيه ربي يشهد اني احبه واحترمه انسان خلوق وحباب ومبين عليه صايم ومصلي وملتزم شيريد الواحد بعد 

ياسمين : هاا فهد وصايم ومصلي وملتزم هم  

ايمان : ندست عمتي احم رحم الله والديج بعد كلبي هذا من طيب اصلج

        

          

                

سحر : على العموم اني عن نفسي موافقه لان ما الكه احسن من بيت حجي علي بس القرار بالاول والاخير راجع لغنى وانتو انطونه مهله ونردلكم خبر 

ضحى : كل الوقت الكم حبيبتي اهم شي تردولنه اخبار حلوه 

نسرين : بس لا ناوين ترفضون شوفي ام حوراء بت اختج لو تزحف على ركباتها متلكه مثل ابن اخويه ولا تحصل مثله فخلي تتئنى باختيارها وتفكر بالموضوع زين تره ابن اخويه فرصه 

سحر : وبنت اختي ما ناقصها شي ادب وجمال وشهاده ويتمناها الف واحد واذا على وضعنه المادي فالحمدلله عايشين من تعبنه ونام جوعانين ولانمد ايدنه لاحد وعزة نفسنه فوك كلشي فثمني كلامج الله يخليج 

نسرين : شدعواج عيني شكلنه 

ياسمين : اخزر اريد ولا كأن 

غنى : دخلت خليت الجاي والكيك 

حياة : حاولت اسد الموضوع ... عاشت ايدج حبيبتي 

غنى : بالعافيه .... طلعت بره وعفتهم الواضح مطولين وخالتي كيفت عليهم 

____________________ 

اروى : كاعده بغرفه ورده واكلب بالتلفزيون منتظرتهم يرجعون حتى اعرف شصار وماحسيت غير الباب تندفع بسرعه وتدخل مروه تصرخ 

مروه : وللللج اروووى صدك السمعته 

اروى : خير ياستار شسمعتي 

مروه : صدددك فهد راح يخطب غنى والنسوووان هسه ببيتهم يطلبوهااا رسمي 

اروى : ركضت سديت الباب ولج صوتج فضحتينه ليسمعنه احد 

مروه : لج اروى شلووون تقبلين فهد يخطب هااااي وتدررررين بيه احبببه واريده شلوووون هانلكم كلبكم تسوون هيج بيه مو علساس اني لفهد 

اروى : مروه خلي نكون واقعيين انتي حبج لفهد من طرف واحد وكلنه ندري فهد ميعتبرج غير اخت وبت عم وعمره مافكر بيج بغير طريقه وانتي الي رسمتي عليه احلام مالها اي صحه من البدايه 

مروه : بدموع حرام عليج اروى اني اتنفسه لفهد واضيع لو صار لغيري تالي ترحون تخطبوله هاي الي متناسبه لا بالمستوى ولا بالشهاده ولا بأي شي 

اروى : ما اسمحلج تحجين عليها لتنسين هاي صديقتي المقربه وبعدين بطلي تفكرين بالمستويات 

مروه : وصديقتج احسن من بت عمج حتى تدافعيلها لزمت كلبي لج اروى نار واجه بيه فهد حب طفولتي من اني وصغيره واني اشوفه غير عن كل الولد من واني طفله متوقعته يصير هو ابو جهالي تالي ترحون تخطبوله غنى الي ما صارلها حتى سنه من ظهرت بحياتنه 

اروى : لزمت ايدها مروه الزواج قسمه وفهد مو قسمتج 

مروه : دفعتها وخرررري عني انتي من البدايه متحبيني ولو تحبيني جان سعيتيلي حتى اتزوج فهد بس انتي من البدايه مترديني لفهد وصدكي واعتقدي فهد ماراح يتهنى لان اني نافسته واريده وكولي مروه كالت فتحت الباب وطلعت صار فهد بوجهي 

        

          

                

فهد : اجيت اصعد فوك وشفت مروه تنزل وتبجي ... ستوقفتها شبيج مروه ليش تبجين 

مروه : بدموع حرام عليك ليش سويت هيج 

فهد : باستغراب شسويت ؟ 

مروه : عفته وطلعت 

فهد : باوعت لاروى هاي شبيها شنو حرام عليك ليش سويت هيج 

اروى : ما عليك بيها تمسلت 

فهد : هزيت ايدي هي بقت بس هاي عليه 

اروى : صعد فهد وشويه اجن كمت هااا بشرن شكالو 

ايمان : كعدت كالو يردون مهله يفكرون 

ضحى : بس مبين من كلامهم راح يوافقون 

اروى : صدك خاله 

ضحى : اي حبيبتي 

ياسمين : هاا ولج شو مكيفه لو لان صديقتج 

اروى : طبعا اكيف وافرح اخويه وراح ياخذ اقرب صديقه الي وعلى طاريها صارلي يومين ادك عليها مترد وفهد ميقبل اروح يكول عدهم رجال 

نسرين : عمه هذا يسمو داء الجلوبيه هاي لان انخطبت انجلبت عليجن 

ياسمين : انتي وتالي وياج كافي كل ساعه مدهديتلج حجايه شكبرها 

حياة : هاا عريسنه شلونك مبروك مقدماً 

فهد : ليش وافقو؟!

نسرين : وانت ليش مستعجل هيج 

فهد : استغفر الله يله من رخصتكم عفتهم وطلعت خابرت الشباب محد يقبل يطلع اخذت سيارتي ورحت افتر اختنكت 

____________________ 

غنى : كاعده اقره مقاله تحفيزيه بالموبايل هالفتره كمت هواي الجئ لهيج اشياء احسها تنطيني دافع وترفع من معنوياتي الهابطه

سحر : هاا ياحلوو تستقبل ضيوف 

غنى : تذكرت فهد هاي حجايته تنهدت اكيد تعاي خاله 

سحر : كعدت يمها شلون تحسين نفسج هسه بعده مودج مخربط 

غنى : لا الحمدلله احسن 

سحر : اكول حبيبتي غنى انتي تعرفين انو مصير كل بنيه بالاول والتالي تتزوج وتستقر وتكون عائله الها كيانها الخاص صح كلامي لو لا 

غنى : عرفتها راح تحجي بهالموضوع لا خاله مو شرط البنيه تزوج تكدر تبني كيانها وهي وحيده ولا شرط تكون عائله ياله تصير سعيده 

سحر : هذا حجي مسلسلات وروايات ماعليج منه المره راحتها تصير من تزوج صحيح ممكن تواجه مشاكل لان تصير عليها مسؤوليه بيت وعائله بس من تجين للجانب الايجابي تشوفين انو يصيرلج زوج بس الج انتي يحبج يحترمج يقدرج ويصيرلج اطفال يملون عليج هالدنيا هاي كل الاشياء الذكرتها يسموها ايجابيات الزواج 

        

          

                

غنى : خاله دخلي بالموضوع وعوفي المقدمات 

سحر : اليوم اجو بيت حجي علي وخطبوج لفهد اباوعلها ضلت ساكته مابدرت اي ردة فعل انتي سمعتيني شكلت ؟!!

غنى : اي سمعتج 

سحر : شو ما احسج تفاجئتي او حتى علقتي على الموضوع 

غنى : خاله اني ما موافقه 

سحر : اكدر اعرف ليش اشو الولد مبعيبه شي اخلاق وادب وشهاده وجمال ومنصب وفلوس وفوك هذا ملتزم مثل ما انتي تردين 

غنى : ضحكت هازه راسي 

سحر : ما اعتقد كلت شي يضحك 

غنى : العفو خاله بس هيج ضحكت ... كتلج اني ما موافقه ورديلهم خبر بهالشي 

سحر : هسه غير اعرف ليش اشو عريس ولكطه وين تلكين واحد بهالمواصفات 

غنى : خاله ما اريده اني وياا ماكو اي تناسب بيناتنه واني ممقتنعه بي خوما كوه هي 

سحر : اخذيها نصيحه مني انتي وحيده يايمه واني وعمج مادايمين باجر عكبه ماخذنه التراب وانتي لامن عم براسه خير ولامن خال براسه خير ويتحملج فأنصحج توافقين عليه انتي تحتاجين واحد مثل فهد يدافع عنج ويصونج

 واخذيها مني الي يكدر يعيش عوائل على كتافه ويتحمل مسوؤليتهم يكدر يصون بيت ومره 

غنى : خاله اني ما سقطت منه الله يخلي زيحفظه لاهله بس مجرد كتلج ما موافقه لان احسه ميناسبني 

وانتي شدراج ميناسبج قابل كاعده وياا هو بفتره الخطوبه راح تتعرفين عليه وعلى طباعه وبعدين المفروض انتي تعرفي اكثر مني لان بقاج عنده شهرين لا وماتقرب ولا وصل يمج كل مواقفه هاي وتكولين ميناسبني وهاا احب اكلج شغله اني مصره بالذات على فهد لانه رجال وحوك مو مثل زلم هالوكت محفحفين والبناطير نازله والوجه مينعرف وجه رجال لو مره صدكيني فهد فرصه ايالج تضيعيها 

غنى : تنهدت خاله يعني هم جبر 

سحر : لا مو جبر بس انتي دتكبرين والوحده مو كل مره تجيها هيج فرصه ففكري زين بكلامي وكعدي ويه نفسج واني راح اخذلج استخاره بالقران حتى يطمئن كلبج مسحت على راسها خوش

غنى : ان شاء الله .... طلعت خالتي واني تمددت افكر بكلامها كل عقلها خالتي عبالها فهد ملاك متدري بي لا صلاه ولا تعلا وجماله يشرب ويدور نسوان والمشكله مو هنا المشكله اني شلون كدرت اتقبله واحبه ما ادري اتذكر نفسي سابقاً جانت تلعب نفسي من هيج زلم بس من اجيت لهنا اختلفت هالنظريه عندي اااااه ربي رحمتك تعبت رسيني على بر 

_____________________

شهد : كافي حبيبتي مردتي روحج 

مروه : بدموع شهد نار نار جوايه راح اموت ولج احبه تعرفين شنو يعني احبه ما اكدر اتخيل خلص راح يتزوج وحده غيري لا وفضلها عليه وخطبها الها 

        

          

                

شهد : ياعمري كل واحد ياكل نصيبه وفهد مو نصيبج باجر عكبه الله يرزقج بواحد احسن منه 

مروه : بس اني ما اريد احسن منه اني اريده هو 

شهد : والله مردت كلبي حضنتها كافي ولج كطعتي روحج كليلي شسوي والله لو بأيدي اروح اسحل فهد واجيبه يمج هسه انتي ليش تيأسين يجوز غنى متقبل او اهلها يرفضون 

مروه : هه والله ضحكتيني غنى ترفض انتي خبله ولج اذا ما طلعت هي جاي تحوم حواليه وتريد تسحبه اطلع كلشي ما افتهم والواضح فهد غرته ببياضها ونعوصتها وراح يخطبها 

شهد : تره الاختيار اختيار خاله ايمان مو اختياره يجوز الولد كال خلص بعد لازم اتزوج و وافق امه 

مروه : لتخليني اسب حتى الجاب ايمان هسه 

شهد : ردت احجي وطبت خاله ضحى 

ضحى : فتحت الباب ودخلت اباوعلهن سكتن صارت عيني على مروه شبيج تبجين 

مروه : مسحت دموعي بسرعه لا هيج ماكو شي 

ضحى : اكو واحد يبجي بدون سبب خير شهد صاير شي و وجوهجن متتفسر احجن لتخوفني 

شهد : لا خاله بس جنه نحجي على الشهداء ومروه بجت 

ضحى : اووف سوده عليه الله يساعد كلوب امهاتهم هاجن سويتلجن عصير

شهد : عاشت ايدج خاله 

ضحى : ايدج العايشه جنتي تلحلحي تره فهد منا لشهر معرس وانتي وحارث بعدكم 

شهد : ان شاءالله بس خلي اطبق واباشر بكلشي 

ضحى : ان شاءالله يله اعوفجن 

_______________________ 

فهد : صبيت كاس ثاني شلت راسي شفت وحده من الراقصات تقربت يمي 

: سلام ياحلو شنو شو جاي وحدك اليوم 

فهد : ليش عندج مانع 

: بالعكس اصلا انت دومك منور بدونهم او وياهم 

فهد : حسيت بأيدها على فخذي دفعت ايدها بهدوء ايدج وين 

: تحب نطلع وره ماتخلص السهره 

فهد : بهدوء مالي مزاج كومي من يمي 

: والله اكلبك المزاج على البطانه بس لو توافقني وتكوم وتعوف السهره ونطلعنه بفندق خمس نجوم ونتونس بس هاا الليله تكلفك 

فهد : محد كلج اني مكحف بفلوس اجيب اغاتج وكتلج كومي من يمي لتخليني اصيح للكو... مالتجن واخلي يطردج يييييييله كووومي 

: كايمه كايمه شبيك عابتلك شلون حلو 

فهد : باوعتلها صفح عايزني اني هسه لو حوريه كدامي هم ما ادنالها تنهدت اشتعلتي بكاز ياغنى صبيت بعد كاس السرسريه صارو براسي شرفاء وميردون يطلعون صدك الموت يخوف والله شكلهم تابو رفعت راسي وانت يا فهد شوكت تتوب شوكت تشوف الجاي تسوي غلط شوكت تحس روحك لازم تتغير هاي انت راح تزوج ولسه ما حسيت انك تريد تتغير كمت دفعت الحساب وطلعت رجعت للبيت فتحت الباب ودخلت كالعاده لكيت مرت فيصل مزروعه كدامي ادري هاي متقصدتني 

        

          

                

ساره : الله يساعدك 

فهد : ساره انتي تتعمدين تطلعين بوجهي وين ما اروح تره ما صايره هاي كل شويه مكنبصه بوجهي جنج سكتت استغفر الله 

ساره : شلون يعني ابطل ما افتر بالبيت وبعدين حاجي اخوك كل ساعه منزلني على شغله 

فهد : غلست عليها واجيت اصعد 

ساره : اكول فهد سؤال 

فهد : بنفاذ صبر خير 

ساره : شنو رأيك بعرسك البس اني ومرتك نفس البدلات 

فهد : عود هاي فطيره لو تتعمد تحجي هيج باوعتلها ما اكول غير الله يشافيج 

ساره : هذا شبي هسه اني شكتله معقوله زعل لان حجيت على مرته هله هاي بعدها ما اجت شدلها صدر من هسه 

فهد : طبيت لغرفتي شفت امي كبالي جانت عايزه والتمت 

ايمان : وين جنت الساعه بال 2 هسه 

فهد : ببرود طالع 

ايمان : ادري طالع بس وين 

فهد : رفعت حاجبي طالع وبس حجيه 

ايمان : حجيه شنو ولك 

فهد : كعدت فتحت قميصي شتردين يمه 

ايمان : انت راح تتزوج طلعاتك هاي خففها واكعد وكابل زواجك وشوف شلون راح تعيش وتكون عائله من تكضيها طلعات 

فهد : ليش المفروض اضل كاعد بالبيت واسوي خلطات لو اكلج اروح اجيب كريمات تببيض حتى بالعرس متنصدم غنى من جسمي وتنذهل من بياضي وانوثتي الطاغيه لو لالا اكعد اخذ خيط لحواجبي حتى يبينن حلوات 

ايمان : استهزء استهزء طبعا شوراك انت اشو المضموم وشايفه انت وبالنسبه للكريمات فميحتاج هي شايفه ولاعبه وملخصه 

فهد : لا وداعتج لا شايفه ولا لاعبه بس ان شاءالله منا للزواج راح تشوف وتخترع هم وحتى ... راح  تشبع شتردين بعد 

ايمان : دومي اكول الشرطه هيلكتك ابو لسان الزفر اني مو هذا قصدي بس انت دماغك رايح يسره اسمعني زين هذا روتينك يتغير وسوالف العزوبيه تنساها فهمت التفت لحياتك الجديده احسن الك 

فهد : بعد اوامر ثانيه تحبين اتحجب على الواهس 

ايمان : فهييييدان لتستفزني كلامي واضح ومفهموم ويتنفذ غصباً ما عليك فتهمت 

فهد : الله كريم 

ايمان : احد كلك الله بخيل ندري كريم واكرم منك كلامي يتنفذ وغير قابل للنقاش يله اعوفك تنام 

فهد : غمضت عيوني يلعن يوم النسوان شكد ينكنكن والله يا الله تكلي شايفه ولاعبه يمكن هاي اذا شافتني بدون قميص تريد توكع على وجها مو عاد اتصلخ كدامها 

______________________ 

صباحا 

غنى : ضليت للصبح كاعده عيني ما اخذت نوم كمت فتحت موبايلي شفت مكالمات من البنات شكد عيب هنه صار ايام يخابرني واني ما اجاوب عدلت شعري واتصلت مكالمه جماعيه شويه وفتحن ... صباح الخير 

        

          

                

اروى : صباح الورد على مرت اخويه الكيكه 

نرجس : لج جلبه صار ايام ادك عليج ليش متردين لو لان انخطبتي

غنى : ابتسمت والله اسفه جنت تعبانه شويه وحتى موبايلي مفتحته كد ما مالي خلك اسفه حبيباتي 

اروى : عادي مرت اخويه ولا يهمج هو حب اخويه يسهر فديته اكيد ما نمتي الليل تفكرين شلون راح تتوسدين صدره بعد كم يوم 

نرجس : اي والله اني اشهد اول من فكر بصدر وعضلات فهد اني ههه 

غنى : ابتسمت 

اروى : شبيج نونه شو احسج ضايجه شنو احد ضوجج من النسوان 

غنى : لا بالعكس كلهن حبابات بس كتلج اني تعبانه شويه 

نرجس : اكول غنى خوما راح تغيرين اسمج 

غنى : اغيره ليش 

نرجس : عبالي راح تسوين مثل البنات وتسمين نفسج المخطوبه المخطوبه 

اروى : هههه خرب يومج نرجس والله عدج سوالف 

غنى : تره بعدني دافكر ومصرت مخطوبه 

اروى : شتفكرين ولج مو دافنيها سوه وبس لا ناويه ترفضين يبعد كلبي 

غنى : يجوز شمدريج 

نرجس : صدك لا كالو هم صحلها رجل وهم كالت اعور لج بابا حمدي ربج طحتيلج بواحد مثل فهد واذا متردي اني موافقه بدالج خلي يجي ياخذني فلاحه ملاجه حتى مهر ما اريد واذا تردون اني ادفعله مهر واحنه حاضرين من المليون للميه احنه مشترين رجال 

غنى : ههههه صدوك ضحكتني والله مالي خلك 

اروى : الله يساعد كلبك يا رجل نرجس راح تشبع طز نعل 

نرجس : عن السخافه اصلا حبيبي راح ادلله دلال حتى ريوك اسويله 

اروى : لا هواي متعبه نفسج 

غنى : ضليت احجي ويه البنات شويه وسديت الموبايل حسيت نفسيتي ارتاحت شويه صدوك الاصدقاء نعمه بالحياة اذا احسنت اختيارهم ... كمت نزلت جوه صباح الخير 

: صباح النور 

سيف : تعاي بويه يله تريكي 

غنى : صبيت جاي واجيت كعدت اكلت شويه وكمت اساعد خالتي 

سحر : هاا فكرتي بالموضوع 

غنى : اي بس بعدني ماقررت 

سحر : تره اليوم الفجر اخذتلج خيره بالقران وطلعت زينه وكلش هم 

غنى : هزيت راسي

سحر : غنى يمه ادري بيج فكرتي وهواي بالموضوع كليلي موافقه لو لا 

غنى : تنهدت موافقه بس عندي شروط 

سحر : والي هي ؟ 

غنى : عرس ماكو والاسود ما اذبه عرس على الساكت 

سحر : انت مخبله شهالحجي اكو بنيه تشرط هيج شروط بزواجها 

غنى : لتنسين اني حزينه وما اريد لا طنه ولارنه بزواجي وحتى اذا ميسوون عرس يفضلون عليه لان بكل الاحوال الاسود ما اذبه 

سحر : لج امي صار سنه سنه كامله على الي صار وكل الناس تذب الاسود وره دورة السنه مو انوب عروس 

غنى : خاله اني هذا شرطي قبلو قبلو مقبلو براحتهم عفتها وكمت انجبرت اوافق لان فكرت بكلام خالتي صحيح اني منو دايملي خاصه لو خاله ايمان سوتها صدوك وراحت حجت بالسالفه اول شي تدمر سمعتي وثاني شي موبعيده عمامي بذبحوني ويطعنون بتربيه اهلي واني افضل اموت ولا ينمسون اهلي ولو بحجايه بسببي واذا كان زواجي الدائمي من فهد يبقي سمعه اهلي طيبه اني مستعده اضل طول عمري تحت رحمتهم ولا ااذي اهلي وهمه بكبرهم .... مر اليوم بكل بطئ احس عقارب الساعه تتحداني وتكلي لو تضلين اليوم كله تتهربين من التفكير هم تنحصرين بزاويه الافكار تالي الليل ...ثاني يوم خالتي ردتلهم الخبر والفاجئني وافقو على شروطي ومن يومها بدت خالتي وخاله ايمان يخططن للمشيه مال الزلم والي راح تصير مشيه وعقد سيد هم ماحسيت بأي شعور لان لاعندي بنات عمام ولاخوال ويجن ويحضرلي بهيج مناسبه بيومها اجتني نرجس وخاله ام جعفر الدمعه بعينها تبوس بيه عبالك العقد لبتها .... كامت خالتي تجهز للمشيه هي وام جعفر نزلن وصن محل حلويات على ضيافه وزينه وهالسوالف مال المشيه 

نرجس : سويتي جسمج 

غنى : شهالاسئله نرجس 

نرجس : اي الولد يريد.يشوف حرير ابيض مو غابات الامزون فاذا ما مسويه جسمج كليلي حتى اساعدج 

غنى : رفعت ايدي تره اني مو مشعره وتدرين بيه بمناسبه او بدون اني معتنيه بنظافتي الشخصيه ومو لفهد لنفسي 

نرجس : باجر عكبه حتى عينج تسويلها عنايه خاف السيد فهد يلمحله رمشايه مكانها مو صح 

غنى : انتي شعندج ويايه 

نرجس : لزمت ايدها غنى ليش احسج مو فرحانه حتى اروى حست بس ماحجت شي 

غنى : تنهدت شريد احجي يعني اكول نرجس تعاي اراويج الفستان الجابته خالتي اني لسه ماشفته كلت اشوفه وياج 

نرجس : اي يله ... لج ليش اسود 

غنى : اني ردته هيج 

نرجس : بس ليش غنى عفتي الالوان كلها خليتيها تجيبلج اسود 

غنى : لتنسين اني حزينه 

نرجس : باوعتلها وهزيت راسي بسيطه اله اخليج تذبين الاسود وكولي نرجس كالت 

غنى : مر اليوم بسرعه وتوالت الايام واني ما شايفه فهد ولا حتى سامعه صوته وهاي اطول فتره بعد صارت بيني وبينه واجه اليوم الجنت اتمنى لو يصير واني وفهد موافقين عليه اجوي هواي ناس ماشاءالله ترسو البيت وحتى ماكو مكان كعده اباوع لخالتي حبيبتي تركض ركض مقصرت ابد لا هي ولاعمو الي استقبل الزلم والمشيه الجبيره الي جابوها عبالك ابويه مشت مراسم العقد لحد ما نطق الشيخ وسألني على موافقتي 

: اذا موافقه على فهد ابن سالم قولي نعم وانت وكيلي 

غنى : غمضت عيوني وجاوبته نعم وانت وكيلي سمعت الهلاهل وكالو فهد راح يدخل واني حسيت الدنيا تدور بيه 

****

يتبع