رواية ذنوب على قيد الغفران الفصل السادس و الثلاثون 36 - بقلم براء

ذنوب على قيد الغفران

                                        

                                              

#ذنوب_على_قيد_الغفران 

#البارت_السادس_والثلاثون 

فهد : فتحت الباب وانصدمت تبسمرت بمكاني باوعت لغنى بسرعه 

غنى : بصدمه .... خاله ايمان 

ايمان : دخلت جوه وسديت الباب .... باوعتلها بهدوء طبعا كلشي توقعت ابني وادري بي واحد طايح حظه ربه دينه النسوان وشهواته فوك كلشي بس انتي انتي ياغنى صدمتيني واني الجنت اشوفج قدوه اتمنى كل البنات تصير مثلج واكول ياريت كلها تصير مثل اخلاقها وادبها تالي طلع هذا وجهج الحقيقي تتختلين بالشقق وترتكبين محارم 

فهد : بتحذير يمه ليروح بالج لبعيد وانتي كلشي متدرين تره انتي فاهمه غلط بس كعدي واني افهم...

ايمان : قاطعته اشششش ولا كلمه ابو عين الصلفه وهم الك عين وتحجيييي وبعديييين شتريد تفهمنييي هاااا بنيه حديثه(شابه) ويه رجال جبير بشقه وحدهم شيسوون مثلا يلعبوووون طاوليييي لو شيسوون مثلا 

غنى : بدموع خاله والله العظيم الموضوع مو مثل الي ابالج 

وايمان : ولج يالمتخافين بعدج هاطولج وتلعبين على الحبلين ليش ولج تجيبين العار لاهلج وهمه بكبرهم ليش ولج مافكررررتييييي لا يطلع ابني ابن كلب و يتونس ويااااج وتالييي يعوفج ماخفتي لا يوسوسلكم ابليس وتسوون مكسوره وتحبلييين وتالي يشمرج بالشارع ولج هذا رجال وميتعيب اله انتيييي يغبررره منو ياخذج بعدددد ما ابنييي حار شلعب بيج 

فهد : بعصبيه ياديييييين محمد لتضلين تفسرين من   كيفج العلاقه البيني وبين غنى مابيها ذره حرام بس انتي غير تنطيني مجاااااال اصخخخخم واحجي 

ايمان : شلون مابيناتكم حرام جااا شتفسر وجودها وياك بنفس الشقه حلال لو لبسها هذا كدامك حلال احجي 

فهد : تنهدت ماسح على وجهي ... اي يمه حلال لان غنى مرتييييي 

ايمان : شنو شنو ولك شنو مرتك احجيييي شلون صارت مرتك ولك لتخبلنيييي غضب الله عليك 

فهد : يمه اني وغنى صارلنه اشهر مزوجين و وجودها ويايه هسه مابي كل حرام لان عاقد عليها سيد يعني شرعا هي مرتي 

ايمان : لطمت على وجهي صخام الصخمج ايمان ولك غلطت وياها مو حبلت منك مووو احجييي حبلت منك وتزوجتهاااا حتى تستر الفضيحه مووو عزه العزاج ايمان شكل للعالم وين اودي وجهي ياكبرها عد الله 

فهد : لزمت ايدها بسرعه لان كامت تملخ وجها ... اهدي يمه شبييبيج انطيني مجال واني افهمج اني وغنى مابيناتنه اي شي والله ماعندي وياها كل علاقه وحتى ما متقربلها 

ايمان : ولك لتخبلنيييي ستوك تكول مرتك وهسه ماعندك شي وياهااااا شنوووو ماخذينيييي على كد عقلييييي انتو شلون متزوجها وشلون ماعندك شي وياها 

غنى : خاله بس افهمي السالفه انطي مجال لفهد يفهمج والله مابيناتنه شي من الي ابالج  

ايمان : انتي بالذااات صوتج ما اسمعه ولج حقيره رحتي بعتي روحج وخليتي رجال شكبره شكده ينام ويااااج على حساب الفلوس يا ادبسززز واني عبالي البينكم علاقه عابره تالي طلعت السالفه بيها زواج و اكبر من مجرد.علاقه مو مثل ما وصلني 

 

فهد : لحظه لحظه صدك انتي شدراج بكل هذا ومكان العماره شمدريج بي 

ايمان : فاعل خير الله يخلي كلي استلاحكي ابنج جاي يلعب بالنار وجاي ينضحك على عقله مسوي زوج ويسحبون فلوس براسه لو شتكولين غنى 

غنى : شنو قصدج 

ايمان : قصدي واضح ياشريفه صدك لا كالو جيبلك حيه ولا تجيبلك فكريه  

فهد : شهالحجي هذااا يمه لتضلين تذبين حجي وانتي كلشي ما فاهمه من السالفه احجيلي منو خرطلج السالفه من ...... وجايتني حاميه  

غنى : اسأل الكح.... مالتك شوف كدامن حاجيه وتريد تلبسك بيها 

غنى : باوعت لفهد بدموع لا والله العظيم لادزيت احد ولا حجيت الله شاهد هاي منو كلج اقسم يالله معندي شي ويه فهد 

فهد : لحظه لحظه صبر يمه منين جايه هالحجي انتي وشنو تلبسني بيها شهالخريط هذا   

ايمان : كتلك فاعل خير واجه كلي بالبدايه ماصدكت وخشيت بعينهم تالي دلوني لهنا واجيت جان انصدم طلعت البين ابني وصديقة بتي علاقه مره ورجال لا واني الاجيت لهنا بكل ثقه لان ادري ابني ميسويها تالي انصدمت بابني الي تعبت وضيعت عمري اربي بي تطلع من هالسوايه وصدمتي الجبيره بيج انتي ياغنى شكد جنت احترمج واعزج وحده من بناتي بس هسه نزلتي من عيني وصرتي جوه رجلي 

غنى : والله العظيم وروح اخويه الماعندي اعز منه معندي شي ويه فهد واصلا مااعرف شنو واصلج بالضبط بس صدكيني كل البيناتنه اني وفهد هي علاقة حبر على ورق ونتعامل حالنه حال الاخوان وحتى جيتي ويه فهد اليوم حتى ننفصل والله العظيم يا خاله اني مو مثل البالج وداعه اخويه المرحوم الي مستحيل احلف بي جذب 

ايمان : تنفصلون ؟!!! 

فهد : اي جنه ناوين ننهي كلشي لوما اجيتي انتي 

ايمان : لزمت راسي ولكم راسي راح ينفجر ساعه تكولون مابيناتنه شي وساعه تكولون متزوجين وساعه راح تنفصلون شهالتناقض هذا ولكم عاد جذبولكم جذبه عدله حتى اصدكهااااا مو كل ساعه الكم حجايه 

فهد : بعيدا عن الموضوع والسالفه الي جابتج لهنا والي راح نتحاسب عليها بعدين تعاي كعدي واني افهمج السالفه من البدايه وانتي حكمي 

ايمان : وهاي اثبرت كعدت غردلي يا سالم هو الله خذا وزرع غيره من امده حظي الطايح حظه لا من الرجل ولا من البزر  

فهد : اباوع لغنى واكفه على جهه وتبجي غنى تعاي كعدي ولتخافين محلوله السالفه وامي هسه عصبيه لان مافاهمه السالفه هسه من احجيلها تبرد 

ايمان : عوفها عساها لاسكتت ام البلاوي ساس الطلايب هي الكح.... ام الزلم ولج عمري وحياتي لا فشرت ولا غلطت ولاطلعت مني العيبه تالي تجين انتي تخليني انزل لهالمستوى يمن الله لايوفقج وعساج تلحكين اهلج يسايبه   

        

          

                

غنى : ما اكدر انطق حرف واحد احس لساني اربط يربي منين طلعتلي هالسالفه شكول عليكم يالي ببالي الله لايوفقكم وصلتوني لهالمواصيل الله لايوفقج ياسهاد كل الي ديصير بيه من وراج 

فهد : يمه لخاطر محمد لتحجين هيج وياها 

ايمان : دافعلها ليش متدافعلها قابل بيش حكه امك البركه بالتنام وياك 

فهد : ممكن تنطيني مجال احجي شويه حتى اكل تبن عدل 

ايمان : لطمت على حلكي وهاي سكتنه يله اكل تبن  

فهد : بديت احجيلها لامي الصار من البدايه لحد ما تزوجت غنى بالمختصر سولفتلها كلشي اباوع لوجها ماكو اي تعبير 

ايمان : بس اسألك سؤال انت من شوكت صرت مصلح اجتماعي وتساعد الناس 

فهد : يمه كل عقلج تحجين بنيه غريبه ماكو كل صله بيني وبينتها شلون ترديني ابقيها عدي وحتى لو لنفرض مخليها عندي الي حق احجي وافتح حلكي لو اهلها رادوها بس انجبرت اعقد عليها حتى تصير تحت مسؤوليتي حتى محد يدنالها وانتظرت فتره  لحد ماترجع خالتها وكلشي ينتهي 

ايمان : وانت اذا هيج حنين ما كتلي واني اساعدك على الاقل يكون عندي علم او اني وخواتك نساعدها وانت تضل بعيد عن السالفه 

فهد : اذا اكلج واكل لخواتي المن ضام السالفه بعد خو اسوي نشره ضوئيه واخلص كتلج ماردت احد يدري ... زواجنه صار لسبب وهو خوفاً عليها من اهلها ومن رجعت خالتها كلشي انتهى ولو متأخره ساعه جان هسه كلشي منتهي 

ايمان : واني المفروض اصدك هالفلم الهندي هذا واصفكلكم واسد الموضوع 

غنى : خاله والله كل الي كاله فهد هو الصار وماكو شي بيناتنه ولو اكو شي بيناتنه تتوقعين نتطلك  

ايمان : واذا ماكو شي بيناتكم تلبسيله وتتعدليله لا وتطلعين وياا للشقه لج هاي السوالف مشيها على وحده غبره عوبه مو بت شيوخ وشبعت طن تجارب من الدنيا 

غنى : بدموع شمتعدلتله يا خاله والله العظيم اجيت بهدوم البيت بس ردت اعرف شريد لان ماقبل يحجيلي اله نجي لهنا وهذا كدامج وسألي 

فهد : مسحت على وجهي يمه كلامها كله صحيح ماكدرت احاجيها بهيج موضوع بالموبايل وردت من افاتحها بالموضوع ننهي الموضوع بنفس اليوم بس حاولي تفهمين كلامي وقبل كلشي بس اسألج سؤال منو كلج على كل هذا وسوالج سيناريو معدل 

ايمان : اسألك سؤال منو يدري بعلاقتكم 

فهد : كلبت عيوني يمه مابيناتنه علاقه بس ميخالف اسايرج محد يدري بس اني وغنى 

ايمان : عفيه انت كلتها ...محد يعرف بالسالفه غيرك وغير هاي 

فهد : يمه خلاصاً للحجي المن تردين توصلين بهذا كلامج 

        

          

                

ايمان : اني اعرفك ذكي ومن يومك تلكطها على الطايره موضوع علاقتكم محد يدري غيرك وغيرها وانت تكول اني ماحاجي لاحد اذاً منو المطلع السالفه ورايح مسولف كدام العصفوره غير الشفيه 

فهد : باستنكار غنى مستحيل تسويها اشك بروحي وما اشك بيها صدك تحجين انتي 

ايمان : ليش مستحيل تسويها اجتها السالفه على طبق من ذهب فلوس وسلطه ورتبه وشكل وسمعه هاي من غير الشغلات الثانويه تتوقع هي غبيه حتى تضيع هيج فرصه وابسط مثال سلمتك نفسها وهي بعدها بنيه وبالباكيت منو تسوي هيج غير بس الراسمه لبعيد 

فهد : بعصبيه ودييييين الكحا...... ما مسلمتني شي وشرف كل كح..... ماعدها شرف ما طاخها احجيلي من الكوا... الموصلج الحجي واني اعرف شلون ان.... الجابه واخلي يتندم على هالحجي   

ايمان : ما اكدر اكول ومو مهم منو كلي اني محلفه ما احجي الله ينطي لو ما كايلي جان بقيت على عمى عيوني لحد ما يصير عدك طفل منها واني ما ادري على الاقل دريت حتى استلاحك الوضع مرتك 

فهد : جاي اكلللللج ماكو اي زواج فعليييي بيناتنه ليش متصدكين يايمه 

ايمان : بعصبيه بعد سوايتك ما اصدك بيك منا لهنا وهذا فلمكم الهندي نكعو وشربو ميته فتهموووو 

فهد : ماشي خليج على موقفج اني رايح اجيب الشيخ واجي وعلى فكره اني ما مضطر ابرر لاحد لان هاي حياتي واني حر بيها 

ايمان : تصرفاتك من تقتصر عليك انت بس ساعتها اكول انت حر بس من تجيبلك وحده وتلعب وياها شاطي باطي وبالحرام لا حبيبي ادخل واطيح حظ كلمن يعترض فتهمت وبالنسبه لسالفه الشيخ تتكنسل وطلاك ماكو  

فهد : شلون يعني طلاك ماكو ممكن توضحيلي 

ايمان : طلاك متطلكها انت مو غلطت وياها اذاً تتحمل نتيجه غلطك وتزوجها علني هم مادام هي هم مادام سلمتك نفسها يعني تريدك فخلي زواجكم يصير علني ودائمي خلاصا للفضايح والمشاكل انت عندك خوات خاف الله 

فهد : استغفر الله يمه جاي احجي هندي اني اكلج ماكو كل علاقه بيناتنه ونريد ننفصل شنو نزوج دائمي شنو بطيخ 

ايمان : اني مامستعده انتظر جنابك اكثر انت مو تزوجت على مرامك خلص بعد مالك حق تحجي تزوجها كدام العالم واسمك متزوج حتى لو نايم وياها تحمل مشكلتك هاي مو مشكلتي 

غنى : مسحت دموعي شو انتو تقررون بكيفكم اني مستحيل اقبل شنو زواج دائمي شنو يتحمل نتيجه غلطه داكلج ماكو اي علاقه بيني وبينه ومن سابع المستحيلات تكون اكو علاقه بيناتنه واني ما اقبل بهالزواج وهسه فهد يروح يجيب الشيخ وننفصل اني وياا وكلمن يروح لحال سبيله وحتى من المنطقه اشيل وما اريد اشوفكم بعد بس فكوني من هالمشاكل  

ايمان : اني ماجاي اخذ اذنج اني جاي اكلج طلاك ماكو انتو مو تزوجتو متعه مدري شتسمو انتو وخليتي يلعب بيج تحملي نتيجه اخطائج وسوالف الثكل هاي بطليها وظهري على حقيقتج احسن 

        

          

                

فهد : يمه كلامج هذا من المستحيل يتنفذ لا اني اريد غنى كزوجه ولاهي تريدني واني مستحيل اخطي هيج خطوه واتزوج وحده ما اريدها لا وعلني هم 

ايمان : اذا ما علنت زواجك اعتبرني متبريه منك وليوم الدين واحسبني غضبانه عليك لحد ما اموت ووصيتي بفاتحتي متوكف يا فهد 

غنى : لبست صايتي بسرعه هي وحجابي اني اكول خلي ننهي هالمهزله فهد انت طلكني يم السيد ولا اريد اشوف احد ولا اتواصل ويه احد لهنا ووصلت حدها مال امك تطعن بشرفي والي مابقالي غيره لا هنا افكس عينه اليدنالي عن اذنكم اخذت جنطتي واجيت اطلع بس وكفني صوتها 

ايمان : اقسم بالله ياغنى لو خطت رجلج باب الشقه اعتبري السالفه واصله لاهلج والله العظيم اروح هسه لخالتج وكلشي احجيلها و اوصل الحجي لخالتج واني متاكده السالفه تروح تحطها بحلك عمامج والسالفه سالفه شرف والله اخليج تعضين اصابيعج ندم لو فكرتي تلعبين بذيلج وياي كمت وكفت كدامها شوفي خلي اكلج شغله صحيح اني حبابه وكافيه خيري شري بس اليدوسلي على طرف واليستغبيني اراوي وجه بحياته ماشايفه فسمعي كلامي وامشي عدل احسلج 

فهد : لا اله الا الله يمه السالفه البالج لو يطلع جدي من الكبر ما اسويها انتي بكلامج هذا جاي تكولين راح ادمر حياتكم 

ايمان : محد كلكم تنامون سوه بالحرام اني مامستعده اتحمل عقاب من ربي من وراكم لان دريت وسكتت رجعت باوعت لغنى لزمت وجها وهمست خليج ذكيه واسمعي كلامي حتى تحافظين على سمعتج لان زواجج من فهد فرصه وانتي موغبيه حتى تضيعين هيج فرصه 

غنى : بدموع حرام عليج الي دتسوي 

ايمان : حرمت عليج عيشتج اصلا انتي بالذات مالج حق تحجين بالحرام وانتي وحده زانيه بايعه روحها على حساب فلس فلسين باوعت لفهد باجر العصر اروح لخالتها واطلبها الك رسمي وانتي راح توافقين وبعدها نمشي باجراءات العرس وكأن شيئاً لم يكن  ومن تلتحق تروح تاخذ اجازه حتى نسوي العرس ونطمطم السالفه  

غنى : رحت يم فهد الله يخليك فهد حاجيها اني ما اريدك يا اخييي حلوو عني لخاطر الله كولشي مااريد منكم بس عوفوني بحالي 

ايمان : طلعت القران من جنطتي وحق كلام الله يافهد اذا رفضت اعتبر نفسك متت بالنسبه الي وحق الحق اخذ هدومي واطلع من البيت وما اراويك وجهي طول العمر اقسم بعزه جلاله الله وانتي ياغنى افضحج فضيحه واخلي سيرتج على كل لسان لو فكرتي ترفضين 

غنى : باوعت لفهد الي علامات الحيره بانت على وجهه بسبب كلام امه وعرفته راح يخضع للامر الواقع  

___________________ 

سعاد : كافي كعدي دوختينه 

بتول : اكل باظفاري خاله خايفه لا تحجي خاله ايمان لفهد وفهد يطيح حظي   

        

          

                

فيصل : انتي شكتيلها قبل يومين 

بتول : رحتلها للغرفه كتلها خاله عندي موضوع وياج وحجيتلها الي كتلي عليه كتلها غنى عدها علاقه ويه فهد وجاي تستغله وتسحب منه فلوس وكتلها شايفتهم بعيني اكثر من مره بوضع محرج وهم سمعت فهد يتفق وياها حتى تروح وياا للشقه وهاي مو اول مره يرحون للشقق وهي شبه مسلمته نفسها واني من خوفي على سمعتكم اجيت كتلج وو

سعاد : وشنو كملي

بتول : وحلفتها متجيب طاري لاي احد بالبدايه هي ماصدكتني وضلت تصيح عليه وكالت مستحيل فهد يسويها وغنى خوش بنيه ومتطلع منها هالسوالف كتلها مثل ما وصاني فيصل تنتظر لحد ما اجيبلها دليل وانتظرت لحد ما فيصل خابرني اليوم الصبح وكلي خلي ايمان تروح لهالعنوان وللشقه الفلانيه ورحت بلغتها بحجه سمعت فهد يدليها على العنوان وهاي اني نفذت كل الي كلتولي عليه   

سعاد : عفيه عليج هو هذا الاريده وهسه هي وصلت للشقه اكيد ولزمتهم بالجرم المشهود واني متأكده بعد ماشافت غنى ويه فهد من سابع المستحيلات حتى تفكر تخطبها اله وهذا الاريده اريدها تنزل من عينها حتى تنزاح من طريقنه بعد عليه غنى تخطيط وتعب سنين تالي تجي تاخذه الخدامه هاي 

بتول : زين وبعدين شراح يصير 

فيصل : الباقي عليجن اني العليه سويته بلغتجن وانطيتجن كلشي اعرفه والباقي يمجن 

سعاد : صدك ولك تعال انت شمدريك بكل هالتفاصيل 

فيصل : بيوم الي جنه عد بيت جدي واجت هاي غنى حتى تخيط للحجيه بيومها جنت طالع بره اخابر وشفتها طلعت هي وفهد من بيت جدي وضلو يمشون بس وضعهم ما عجبني لان فهد جان متنرفز وشكله مدري شلون المهم خليت علامه عليهم وما شلتهم من بالي وبعدها من اجتنه مره ثانيه شفتها طلعت من الفرع الثاني وصعدت ويه فهد والابتسامه شاكه حلوكهم ثنينهم ولسوء حظهم اني شفتهم ومن يومها كمت اراقب غنى بدون متنتبه عليه 

بتول : وشمعنى غنى مو فهد 

فيصل : مو اني غبي حتى اراقب فهد وحق ربج يلزمني بلحظتها ويحير شيسوي بيه اللعب ويه فهد صعب فالتجئت لغنى احسن اندليت مكان سكنها وكمت اشوف فهد يترددلها سألت البواب وكلي هو وزوجته كاعدين بالطابق الرابع الشقه ..(...).. وبديت اخطط من يومها حتى اكشفها حتى على الموبايل خابرتها وحظرتني 

سعاد : منين جبت رقمها 

فيصل : من موبايل اروى منين يعني المهم وهذا الي صار ومن سولفتلي انتن قبل يومين كتيت العندي وصار الي صار 

بتول : عززه فيصل انت تخوف 

فيصل : لتنسين اني وفهد اخوان وتابعين لنفس الابو سالم علي اكبر ماكر بهالدنيا الثعلب ميوصل لمكره وهالجينات ماراحت بس لفهد لا وصلني منها شويه 

        

          

                

بتول : وانت شنو تستفاد من كل هذا لابد اني استفاد لان غنى حجاره تعيق زواجي من فهد اله انت بشنو تأثر عليك غنى 

فيصل : خلي اكلها الج من الاخير تره فهد يحبها ويخاف عليها ولو تعوفي فتره بعد وياها يتزوجها واني متأكد من هالشي لان انتي ماشايفته من يباوعلها شلون عيونه تلمع وهالنظرات بحياتي ماشفتها بعيون فهد غير من ظهرت غنى واني ما اريد فهد يتهنى بحياته املاك وفلوس ورتبه ومكانه مرموقه بالمجتمع لا وانوب ياخذ اليتمناها كلبه هذا مو عدل ومستحيل اخلي يتهنى اضافه انو وجود هاي بحياته يضرب مصالحي لتنسين انتي لو تزوجتي فهد احنه اول المستفادين 

بتول : شلون يعني مافهمت قصدك 

سعاد : خزرته ... ههه ماعليج بي حبيبتي اكلج توته انتي ماتعبتي روحي ارتاحي بغرفتج وبعدين نتناقش بخصوص هالموضوع يله حبيبتي روحي السالفه وانتهت وتلكين ايمان فضت كلشي وطيحت حظ هالسايبه 

بتول : اي يله من رخصتكم 

سعاد : براحتج.يمه ... باوعتله لك انت غبي شلون تجفص هيج جفصه كدامها 

فيصل : ما انتبهت شبيج يمه 

سعاد : تنهدت اكلك بصراحه اني خايفه من اخوك لو دره ذاك اليوم ذبني بالشارع هالمره شيسوي يمكن يشنقني 

فيصل : لتخافين لعد اني ليش خليت بتول تحجي حتى تصير هي بوجه المدفع واحنه ماعلينه لامن شاف ولامن دره وبالاول وبالتالي هي ماعدها دليل علينه 

سعاد : لتنسى تره هاي بت اختي واحبها وما اقبل عليها 

فيصل : يمه كلنه ندري انتي متحبين غير بس مصلحتج وكلشي يضرب مصالحج تنهي حتى لو كان ابن بطنج فعن الحنيه الزايده رجاءاً و الله يخليج يله من رخصتج عفتها وطلعت 

____________________ 

فهد : وكفت السياره 

ايمان : يله نزلي ومثل ما اتفقت وياج سوي روحج كلشي متدرين ولتبينين شي لخالتج وان شاءالله باجر العصر اني والحجيه والبنات يمكم وانت فهد امشينه لبيت جدك 

غنى : هزيت راسي نازله واحس الدنيا طالعه من عيني هي هاي تاليتي انذل هالذله واتزوج واحد لايريدني ولا حتى يباوع بوجهي لا والمفروض عليه انجب واوافق والا تدمر سمعتي واصير على كل لسان بعد يادنيا شنو الماسويتي بيه دكيت الباب طلعتلي خالتي فتت جوه 

سحر : وعليكم السلام خير شبيج وجهج مكلوب وحتى ما تأخرتي 

غنى : بهدوء تخربط هناك خاله وكلت ارجع 

سحر : لزمتها سوده عليه ليش خاف ضايقج شي هناك خوما كلبج يوجعج احجي ولج  

غنى : كعدت بالطرمه ودموعي تنزل تعبت خاله تعبت والله بعد ما اتحمل 

سحر : حضنتها شبيج حبيبتي شنو المتعبج اكو شي يوجعج احجي 

غنى : اااااااه كولشي يوجعني خاله والوجع الاكبر بروحي احس روحي تنزف من جوه لزمت ركبتي احس واحد خانكني مناا نفس ما اكدر اتنفس اريد امووت واخلص روحي دتطلع على البطيئ خاله 

        

          

                

سحر : سمِ بسم الله وصلِ على محمد هاي حاله نفسيه يمكن لان جاي تنامين المغرب واضافه لضغوط الدراسه عليج اكيد تتعب نفسيتج مسحت على راسها خلص ياعمري تنفسي بعمق لتغيبين عن الوعي راعي وضعج يا امي يله سوي الكتلج عليه 

غنى : اخذت نفس بعمق احاول اهدئ بس ما اكدر 

سحر : بيج حيل تكومين 

غنى : هزيت راسي وكمت على كيفي طبيت جوه 

سحر : وين رايحه تعاي عمج راح يجيب برتقال ويجي خليج كاعده خلي اسويلج عصير بلكي تهدئ اعصابج شويه 

غنى : نزعت شالي كولشي مااريد اريد انام لتكعديني ابد 

سحر : صليتي ؟؟ 

غنى : هزيت راسي نافيه هسه اصلي .... صعدت لغرفتي ذبيت ملابسي ودخلت للحمام حتى اتوضه لكيت الشهريه جايتني تنهدت حتى موعدها نسيته سويت اللازم وطلعت تغطيت ونمت منتظره المجهول 

_____________________ 

ايمان : اكول حجيه مادام كلكم كاعدين حبيت ابلغكم اني نويت اخطب لفهد 

فهد : جنت اكلب بالموبايل ووكفت شلت راسي عود صدك تحجي سوتها صدك 

ياسمين : ياا صدك تحجين كلللووووش وجان تنفك عقدتك وتريد تعرس يوم المنى جان هذا فهيدان 

مهدي : والله عاشت ايدك على هالقرار كافي بعد كبرت وصار لازم تكون حياتك الخاصه 

ياسمين : ومنو ناويه تخطبيله 

ايمان : غنى 

محسن : غصيت بالجاي منو منو

ايمان : غنى جوارينه عاجبتني واريدها لفهد وفهد هم عاجبته وموافق مو فهد 

فهد : ضغطت على ايدي 

حتى بين بياضها هزيت راسي 

علا : بهدوء بس خاله مو علساس عمتي نسرين جانت ناو..

ياسمين : قاطعتها والله عاشت ايدج يا زين ما اختاريتي خوش بنيه حبابه وحلوه وخلوقه شيريد الواحد من الله بعد 

ايمان : كتيلي خلوقه اي حقج 

محسن : اكول حارث شعجب فهد قبل بهاي وهو يدري عدها علاقه ويه مرتضى وتريده 

حارث : مرتضى جذاب البنيه كلشي ماعدها وياا والحجي كله تلفيق 

محسن : صدك تحجي 

حارث : اسكت بعدين افهمك السالفه  

عباس : عمي فهد شو ساكت 

فهد : بهدوء الوالده جاي تحجي ومادامها قررت خلص بعد صار الوكت حتى اتزوج واستقر 

مهدي : احسن قرار وليدي 

علا : لعد فهد انت مو تعيب عليها وتكول فاهيه وتوغف على الكلب شلون تخطبها 

        

          

                

ياسمين : خايبه متسكتين غير هي جنها جماره شتوغف على الكلب بس هذا ابن عمج جان مغمض وستوه صحصح 

ايمان : عوفج من هالحجي حجيه اني اجيت ابلغكم وماردت اتصرف من كيفي لان انتو اهله ومهما يكن لازم تدرون 

عباس : خويه الي يناسبج سوي احسن خطوه خطيتيها هسه انو تخطبين لفهد 

ياسمين : اي والله 

ايمان : حجيه ان شاءالله باجر نروح اني وياج ونسرين وام حارث وام محسن نخطبها من خالتها وحتى من يردولنه خبر نباشر 

حياة : ليش مستعجله هالكد 

ايمان : اريد امشي بكلشي بسرعه ما اريد اماطل بالسالفه 

حارث : والله عاشت ايدج خاله استعجلي بكلشي خوما مثلي صارلي سنتين منتظر وولسه كاعد وساكت منتظر الافنديه تكمل جهازها  

محسن : طبعا يزيدك شرف وغصباً عنك تنتظر غير راح تاخذ احسن البنات 

حارث : بله اكل تبن ولتحمه علينه تره صيف 

عباس : شبيك عمي فهد شو احسك مو على بعضك صاير شي   

فهد : بهدوء لا متوهم بس تعبان شويه كمت يله يمه امشينه 

ايمان : اي يله 

ياسمين : بعد وكت حتى جايكم ما شربتو 

ايمان : الجايات هواي ان شاءالله مو تنسون باجر كون انتو يمي الساعه بالاربعه 

النسوان : ان شاءالله 

فهد : طلعت اني وامي والدنيا كامزه من عيني بس ما اكدر احجي من البدايه ردت انفصل عن غنى حتى ما اسببلها مشاكل خاصه من خابرتني فرح كمت احس غنى راح توكع بمشاكل بسببي ففضلت انو تنفصل لان ما اريد شي يصيبها نهائيا وهسه هالسالفه طلعتلي صفح اني ويني وين الزواج وهالصخام غير هيج غنى ما اشوفها غير اخت وصديقه ما اكدر اتقبلها كزوجه اصلا تشمئز نفسي لمجرد تفكيري بهالشي 

ايمان : لتضل كالب وجهك وتخلي الكل يشك اكو شي ابتسم وحاول تبين انت فرحان بهالزواج مو مجبور 

فهد : انتي تعرفين كلش زين اني ما انجبر على شي و راح اوافق على هالزواج مو لان مجبور وانما حتى ما اكسر بخاطرج ولا اعرض البنيه لمشاكل بسببي لان ادري بيج تسويها صدك وتدمرين سمعتها امي واعرفج على كد ما انتي طيبه بس اذا كرهتي احد تدمري واني من حرصي وخوفي عليها قبلت والا لو تثالث الدنيا ما اخضع لاي بشر كائن من يكون 

ايمان : شكد تمنيت تجي تكلي يمه خطبيها عاجبتني اريدها غلطت وياها والله ما اتردد اروح اخطبها واني الممنونه بس سوايتك اليوم دمرتني ماشفت بيك غير سالم للحظه كلت عساني لا جبتك وسوايتي اليوم حتى ما اخلي الغلط يزيد اني عندي بنات واخاف الله وكلت اخطبها الك لان ادري لو انت ما اخذتها ياخذها غيرك واني ما اقبل ولد العالم ياخذون شي مضروب وملموس واني ام وما اقبل اخذ وحده لولدي لاعبين بيها هذا السبب الخلاني انوي هيج نيه اريدك تتحمل غلطك بنفسك فتحت الباب ودخلت لكيتهم كاعدين يشربون جاي 

        

          

                

اروى : وينج يمه ضليت قلقه عليج وين جنتي انتي وفهد 

ايمان : كعدت يم الحجيه 

سعاد : خير شعندج 

اروى : اي يمه شعندج من الصبح لسه 

ايمان : رحت اتفق وياها وويه نسوان عمج اريد نروح نخطب لفهد 

بتول : غصيت احم احم باوعت لخالتي وفيصل شن شنو 

وردة : ذبيت الكتاب لحظه لحظه تردين تخطبين المن ؟!!!

ايمان : لفهد شبيجن 

علي : باوعت لفهد وانت قابل 

فهد : باوعتله صفح شتكول انت 

اروى : بكلبي سوده عليه غنى والله تدري تتخبل 

سارة : ومنو سعيدة الحظ 

ايمان : غنى صديقة اروى 

اروى : بصدمه عليج الزهره حلفييي 

وردة : هزيت جتف ياييييي وهله هله هم راح يصير عدنه عرس وهم راح تصير غنى مرت اخويه والله فهد هنيالك راح تاخذ غنى يممممممه فرحااااانه 

فهد : ضربتها شوييه ثكليييي مو طفله انتي الى متى اضل اعلم بيج اني 

منذر : شبيك فهد عوفها فرحانه 

فهد : شو دوخرو عن وجهي عفتهم وصعدت لغرفتي فتحت الباب ودخلت ذبيت روحي على الجربايه هي هاي تاليتي اتزوج بهالطريقه تنهدت بصوت عالي ياربي ما اكدر اتخيلها مره الي يلعن ابو الساعه السوده الفكرت بيها اكلها امشي للشقه لو كاعد ومنجب ومخليها على ذمتي لبين متهدئ الاوضاع احسن 

منذر : هذا شبي مطنكر 

علي : وجهه ولا جنه وجهه واحد يريد يعرس 

اروى : بالعكس يجوز خجلان منكم يربي ما مصدكه نونه راح تصير مرت فهد لا وتعيش ويانه بنفس البيت 

آلاء : ليش منو كال راح ينطوكم 

ايمان : وليش مينطونه المفروض يبوسون ايدهم وجهه وكفه من اجتهم هيج قسمه 

اروى : يمه ليش تحجين هيج 

ايمان : سكتي عني اروى تره مالي خلك احجي 

اروى : شبيهم اليوم يله ماعليه بيهم كومييي ورده خلي نخابر نرجس نفجر هالخبر يمها 

ورده : اي يله وعريسنه جكليته حامض حلو بباكيته وغناوي يافاهيه على كولت فهد وينننج مرت اخوويه الفاهيه باجر جايين نخطبج  

اروى : ههههه 

__________________

سحر : دخلت للغرفه هاي من الظهر لسه نايمه تدنيت يمها اباوع اكو دموع ناشفه على خدودها مسحت على شعرها هي فزت 

غنى : هاا خاله رايده شي 

سحر : غربت الدنيا يمه ميصير تضلين نايمه لسه كومي اكليلج لكمه غسلي كعدي عوفي النوم هو يضيك خلكج 

        

          

                

غنى : تنهدت نعسانه خاله عوفيني حبابه 

سحر : كومي كومي ماكو نوم هسه يضيك خلكج الدنيا مغرب كومي نزلي وياي شربي جاي وكعدي ويانه وعود من تصير الدنيا ليل نامي كومي يله 

غنى : كمت كوه من الفراش فوك تعبي انوب الشهريه نزلت جوه غسلت وجهي وكعدت اني بطبيعتي من تجيني الشهريه تنقطع شهيتي وكولشي ما اكل لان الالم يسيطر عليه 

سحر : هاج شربي عصير احسلج من الجاي بلكي تصحصحين 

غنى : تنهدت موخره الكلاص عني نفسي تلعب ومالي خلك روحي فتحت موبايلي لكيت كومه مكالمات من البنات طفيت النت ومجاوبت على احد معندي واهس لاي شي شويه واجتني رساله على الخط من فهد فتحتها 

فهد : "بيج شي"

غنى : كتبتله شتريد فهد ؟ 

فهد : كومي اذا يمج احد راح اخابرج 

غنى : كمت 

سحر : وين 

غنى : ابدل ملابسي واجي ... صعدت فوك طبيت للغرفه وسديت الباب ... دكيت عليه جاوبني بسرعه 

فهد : الوو 

غنى : خير شتريد 

فهد : شنو هالاسلوب هذا 

غنى : نملت عيوني دموع فهد ما اريدك افهمني مااريدك ومستحيل اقبل بيك 

فهد : علساس اني الكاتل روحي عليج شعور متبادل بيناتنه بس شسوي اذا امي فرضت فرض عليه 

غنى : مو علساس انت رجال ومينفرض عليك شي شو خضعت لامك مثل الجهال وقبلت على شي انت متريده 

فهد : بحده رجال وغصباً ماعليج وعلى عشيرتج واحد واحد عرفي شلون تحجين لتخليني اتعامل وياج بغير اسلوب مو اني الي انجبر بس بنفس الوقت مو اني الي اصير رجال براس امي لتنسين هاي امي وما اكدر اوكف بوجها خاصه بهيج مواقف 

غنى : شنو تسايرها الشغله لعبه عندك هذا زواج تعرف شنو يعني زواج مابي كل تراجع بدال ما تحاول تقنعها تبطل على هالسالفه رحت وافقتها 

فهد : وعلى حساب من وافقت اني مو على حسابج خفن لا تدمر سمعتج بدون سبب مو دست على روحي لخاطرج انتي ليش ماعندج تقدير لاي شي خاف عبالج كاتل روحي عليج تره انتي اخر مره ممكن افكر بيها فتهمتي 

غنى : واني مستحيل اقبل بيك فهد لو تبقى اخر واحد بهالدنيا هم ما اقبل اعيش تحت رحمتك ورحمة اهلك 

فهد : عنج ما عشتي ولا قبلتي يطبج طوب خفتاً وراحه و عود باجر من يجون ردي خبر برفضج وانعل امه وابو اليكلج ليش اصلا تسوين فضل لو رفضتي  سديته بوجها 

غنى : شمرت الموبايل وغطيت وجهي باجيه شكد تمنيت اصير مره لفهد ويصير اسمه رجلي من صدوك بس بعد ماعرفت بمشاعره تجاهي مستحيل اقبل بي لو يصوغو ذهب كرامتي فوك كولشي ولايمكن اقبل بواحد ميريدني اصلا ما اعرف للحظه شلون ضعفت كدام كلام وتهديدات خاله ايمان وخضعتلها لالا اني مستحيل اوافق وخلي شتريد تسوي خلي تسوي مخايفه من شي اني صحيح احبه لفهد وروحي بي بس لايمكن افرض نفسي عليه  

        

          

                

_______________________   

بتول : هااا ارتاحيتووو هاي سويت الكلتولي عليه شو ما نزلت غنى من عينها وهاي رايحه تخطبهااا باجر 

سعاد : شلون بس اريد افتهم شلون راح تخطبها بعد مادرت بيها عدها مكسرات 

فيصل : ماكو بس شغله وحده تخليها تخطي هالخطوه 

بتول : شنو شنو اليجبرها تقبل تاخذ لابنها هيج وحده 

فيصل : اعتقد لزمتهم بوضع غير اخلاقي فحتى تطمطم الفضحيه خاصه هي بت شيوخ وهالشغله جبيره عدهم 

سعاد : لا مااعتقد فهد ذكي ومستحيل يفكر يكسرله بنيه ويعوفها لا لا السالفه اكبر من هيج 

بتول : بدموع كله من وراكم لو ساكتين وماحاجيلها ماجان صار الي صار 

سعاد : والله العظيم راح انجن شلون صار هيج الجنت مخططتله صار كلشي عكسه يمه غير لو صارت هاي مرت فهد اموت بمكاني 

فيصل : اكو انه بالموضوع  

سعاد : وانه جبيره هم ايمان متخطبها لو ما صاير شي جبير 

بتول : بدموع انتو ضلو حللو واني ضاع عليه كلشي من وراكم وفهد طار من ايدي 

فيصل : شو سكتي انتي تره خبصتينه الي يسمعج يكول جان مواعدج بزواج 

بتول : والله العظيم وهاي اني كتلكم اشرب من دمها والله ولا اخليها تصير لفهد وعفتهم وطلعت ونار واجه تغلي بيه 

____________________ 

صباحا 

فهد : صباح الخير 

الكل : صباح النور 

اروى : يمه شوكت نروح لبيت غنى 

ايمان : بهدوء قصدج ترحن ... العصر 

اروى : ليش اني ما اجي وياجن 

ايمان : لا ماعدنه بنات مامزوجات يحضرن 

آلاء : ليش شكو بيها وين الغلط 

ايمان : كل عائله والها تقاليدها 

ساره : خاله عادي اروح وياكم 

ايمان : باوعت لفهد طبعا غير حماج الراح يعرس غير ترحين بصفتج جنه من الجناين وانغام حبيبتي متكدر تروح لان عدها طفله 

سعاد : اني ما اروح 

ايمان : بكيفج ... كمت فهد كوم اريدك دخلت لغرفتي 

فهد : نعم 

ايمان : ليش كالب وجهك 

فهد : علساس متدرين يعني 

ايمان : يعني مصر بالرفض 

فهد : اي طبعا هاي حياتي واني اريد اعيشها مثل ما اني اريد ومثل ما اختار مو انتو تقرروها 

ايمان : اني كتلك تختار يا تسوي الي ببالك وتنسى عندك ام واضل غضبانه عليك طول العمر يا اما تنفذ كلامي وتبدي حياتك ويه الانسانه الي اختارها غريزتك وكمل وياها باقي حياتك وتتحمل نتائج اخطائك 

فهد : خلص يمه يجرالج الي تردي بس صدكيني راح تتندمين واحسبي حسابج مثل ما فرضتي عليه هالشي اني هم اعرف شافرض عليج وبكل الاحوال غنى راح ترفض وراح تفشلون رواحكم  

ايمان : ابتسمت ولا بأحلامها 

_________________ 

اروى : كاعده بغرفه ورده واكلب بالتلفزيون منتظرتهم يرجعون حتى اعرف شصار وماحسيت غير الباب تندفع بسرعه وتدخل مروه تصرخ 

مروه : وللللج اروووى صدك السمعته 

اروى : 

****

يتبع