رواية ذنوب على قيد الغفران الفصل الخامس و الثلاثون 35 - بقلم براء

الخامس والتلاتون

                                        

                                              

#ذنوب_على_قيد_الغفران 

#البارت_الخامس_والثلاثون

 سحر : طبيت ذبيت عباتي وحجابي 

سيف : هاا اجيتي 

سحر : اي يمه والله متت من التعب بس الحمدلله طلع الولد عايش ورجع لحضن اهله 

سيف : اي والله الضنه عزيز لو شمايكون 

سحر : لعد غنى وين 

سيف : اجتي قبل نص ساعه وصعدت لغرفتها 

سحر : هاا لعد خلي اصعد اشوفها واروح اناملي شويه ... عفته وصعدت فتحت باب غرفتها اباوعلها كاعده وصافنه اصلا ماحست عليه من فتت اباوع للوجه يضحك والابتسامه شاكه الحلك هاي البنيه ابد ماعاجبني وضعها ... غنى ماكو الانسه مستمره بخيالها يمعودددده 

غنى : فزيت هااا خاله 

سحر : صار ساعه واكفه احجي وياج وانتي ماكو صافنه وشاركتلي الحلك 

غنى : هاا اسفه شردت شويه كليلي شردتي مني 

سحر : ماردت شي حبيبتي اسأل عليج يله اني اروح انام لحد يكعدني لان تعبانه 

غنى : ماشي براحتج طلعت خالتي واني رجعت احس مي بارد ودينزل على كلبي راحه فضيعه الحمدلله ربي من رجعته بخير وسلامه ونقذته من بين الالاف الشباب تذكرت كلامه 

غنى : يله صار لازم اروح 

فهد : وين رايحه تعاي ماكو روحه ابقي هنا 

غنى : لا ميصير اصلا اني كد ماجنت خايفه ومرعوبه عليك مشفت دربي معولت تصعد حتى اشوفك خلي انزل احسن ليشوفني احد وتصير مشكله واني مالي خلك المشاكل  

فهد : دروحي قفلي الباب وتعاي ليطب احد 

غنى : لا اني اروح ميصير ابقه هنا عود غير وقت نحجي يله باي 

فهد : لزمت ايدها بتعب لتخافين كلها ملتهيه ويه الخطار الي جايين يتغدون شايلين كروشهم حتى يتغدون يله روحي قفليها اريد احجي وياج مخنوك وعود اني اطلعج بطريقتي دفعتها بخفه يله روحي 

غنى : رحت قفلت الباب واجيت كعدت اباوعله نام بحضني مسحت على شعره سوده عليه راسه متعور وملفوف وكتفه مصوب تلمست وجهه هاي ليش هيج صاير بوجهك 

فهد : تنهدت من شفت واحد من الولد الي ويانه استشهد كدامي فقدت السيطره على نفسي خاصه هو بعده عريس وقبل لا تصير مواجهه بيناتنه مرته خابرته وبلغته بحملها فمن شفته واكع وغركان بدمه تذكرت موقفه شلون فرحان ويركص والشباب يباركوله تالي من استشهد وشفته هيج ماكدرت اسيطر على نفسي اخذت سلاحي تقدمت وكمت اصوب عليهم وهالشي كان خطر جماعتي صيحو رادو ولا يمهم كمت اضربهم وكلبي محروك تالي تقدمو الكل ويايه كدرنه نكتل عدد جبير منهم بنفس اللحظه اجانه انذار راح يرمون مدفع علينه انسحبنه بسرعه واثناء ما درت وجهي اجتني طلقه بكتفي بس ما اهتميت ركضنه ركض ماصاير بس نريد نبتعد جانت روحي تطلع واني اشوف الشباب يموتون كدامي ولان الروح عزيزه ماكدرنه نوكف نحس رواحنه نطير وصلنه لمنطقه بعيده ومنسمع بس صوت الانفجارات كلنه وكعنه وماحسينه على شي 

  

غنى : وبعدين 

فهد : ضلينه فتره طويله غايبين عن الوعي ولمن كعدت شفت كل الشباب ميتين والباقين عدلين ينعدون على الاصابع جماعتي متصوبين واني وياهم وثمن شباب عايشين بس احنه الي بقينه كمنه نجر برواحنه جر بس نريد نوصل وطبعا كل هذا بسبب المسؤولين لان رفضو يدزولنه قوات دعم وحتى مدافع رفضو نرمي لان جانو معتمدين علينه ميدرون انو داعش عدهم كادر قتالي جبير واسلحه حديثه جدا واحنه مامجهزبن باسلحه كافيه ولا عددنه بكدهم بس مع هذا بفضل الله كدرنه ندمرهم صحيح تأذينه بس كلشي يهون حتى تتحقق غايتنه 

غنى : بدموع زين شلون وصل خبر استشهادكم وانتو عايشين 

فهد : مسحت دموعها واخذت ايدها بايسها ... المسؤولين ميدرون بينه انسحبنه عبالهم اول ما وصلنه الامر انضرب المدفع وكلنه متنه فبلغو اهل كل الولد واني من ضمنهم باستشهادنه ... ميدرون احنه ضلينه نركض ساعات لحد ما وصلنه لبستان واستقبلته رجال جبير هو ومرته وربج طلع ممرض وكدر يعالجنه وره تلث تيام تحسن وضعنه وطبعا كان الاتعس بينه ايمن لان نزف هواي وهو جان متصاوب من البدايه ما اطول عليج جنت حافظ رقم غانم واتصلت عليه بلغته ودزولنه سيارات تستقبلنه خارج حدود الموصل والله ينطي الرجال وصلنه الهم وراح الله يحفظه مستحيل انسى فضله علينه وهذا يا ستي الي صار وهاي اني يمج حيً ارزق 

غنى : بست راسه الف الحمدلله من رجعت سالم 

فهد : تنهدت صحيح رجعت سالم بس اكو بداخلي مكسور شباب بعمر الورد اشهر ادرب واعلم بيهم احجي واسولف وياهم ماتو كدام عيني وشلون موته هي هذا الي تطشر راسه وهذا الي انضرب بمدفع وووو الخ 

غنى : الحمدلله على كل حال الله يصبر اهلهم ومصيرهم الجنه ان شاءالله 

فهد : كمت من حضنها باوعت لوجها البياض الناصع مكلوب دم هاي هيج اني عزيز عندج ومسويه بروحج هيج 

غنى : ليش عندك شك بمعزتك عندي 

فهد : لزمت وجها طبعا لا ويله كافي لتبجين هاي اني يمج وما اعوفج شوفي روحج شحالج صرتي يعني هم وجهج فاهي وهم من تبجين تصيرين شحالج 

غنى : دفعت ايده والله مو صوجك صوج اليبجي عليك 

فهد : ابتسمت جارها عليه واشاقه وياج 

غنى : تلمست مكان الجرح يوجعك 

فهد : شويه لتخافين على المسكنات يصير مثل الورد 

غنى : حضنته وغمضت عيوني هامسه فهد ديربالك على نفسك اني مو يمك واضل اركض وراك على الادويه والكمادات التزم وسبح لتسبح لان كتفك وراسك متأذيات لتخوفني عليك حباب لان بعد موقف واحد واتخبل ويدخلوني مصح والله  تعوفني

فهد : بست كتفها حيل لتخافين اعرف شلون ادير بالي على روحي  

غنى : ابتعدت من حسيت بجسمه عززه شكد عيب حضنته وهو ملابس شي ... احم يله صار لازم اروح 

        

          

                

فهد : اوكفي خلي اشوف اكو احد لو لا انوب طلعي كمت فتحت الباب ماشفت احد الطابق فارغ يله تعاي بسرعه 

غنى : يله مع السلامه والحمدلله على سلامتك مره ثانيه 

فهد : ابتسمت الله يسلمج من تطلعين ديربالج اكو زلم دنكي راسج وامشي 

غنى : صار ... عفته ونزلت بسرعه صارت بوجهي مروه 

مروه : وين جنتي وشعندج صاعده فوك 

غنى : بارتباك جنت ادور على اروى 

مروه : اروى جوه بالمطبخ تساعد النسوان 

غنى : مشفتها فصعدت ادور عليها 

مروه : هاا دنزلي ويله روحي لبيتكم اشو فاتحه وماكو والحمدلله فهودي رجع سالم لحضن اهله واحبابه 

غنى : باوعتلها بهدوء ونزلت بدون ما اجاوبها هاي شبيها الحمدلله والشكر 

تنهدت مرجعه نفسي على الفراش متنهده اكو تناقض فضيع بداخلي شي بيه فرحان لان فهد رجع وشي ثاني خايف من مشاعري تجاه فهد والي لسوء حظي من طرف واحد ومتاكده مليون بالميه فهد ميفكر بيه غير كأخت وبس غمضت عيوني مستقبله الضلام صار ايام منايمه 

____________________ 

بتول : اني خايفه خاله 

سعاد : من شنو تخافين 

بتول : اخاف من فهد 

فيصل : لتخافين انتي نفذي الي كتلج عليه وماعليج بالباقي اصلا الي راح يصير يخلي يلتهي بمصيبته وبعدين كتلج انتي مالج كل علاقه والمشاكل بالاول والاخير بعيده عنه 

بتول : واذا انكشفت 

فيصل : بهالركبه اذا احد عرف شتردين بعد 

سعاد : باوعيلي بتول المفروض بعد السمعنا من فيصل نصير اكثر جرئه باعتبار الورقه الرابحه عدنه انتي مو تحبين فهد وتردي خليج جريئه شويه وحاولي تسعين حتى تاخذي  

بتول : هيج كولتج 

سعاد : اكيد 

بتول : ماشي منتظره اشاره منكم حتى انفذ الي اتفقنه عليه 

سعاد : خوش يله روحي لغرفتج طلعت بتول ودرت وجهي على فيصل انت هيي ليش ما كتلي من البدايه 

فيصل : غير ردت الزملي دليل ياله احجي 

سعاد : بس والله عاشت ايدك خوش عرفت تتصرف اول مره تعجبني 

فيصل : من عاشر القوم 

سعاد : ابتسمت تربيتي 

______________________ 

ياسمين : اكلج ايمان شو فهد لسه نايم الدنيا غربت وهو بعده شوفي خاف بي شي 

ايمان : اي هسه اشوفه 

علي : كعدي يمه شجاج عوفي خلي يرتاح صار اشهر هو مصموط بليسه هناك عوفو 

ايمان : مو هو متصوب اخاف مرتفعه حرارته ماله خلك لان من الصبح لسه هو نايم 

        

          

                

اروى : فد ساعه واني اروح اشوفه عوفي هسه 

منذر : همست اكلك شو العالم لسه هنا ادري اخونه ورجع وغده وغديناهم جاي وشربناهم ميرحون لبيوتهم لطشو خوما لطشو 

علي : اسكت ولك راح اوكع على وجهي من التعب وصارلي ساعه اتثاوب واصيح تعبت بلكي يحسون على دمهم ويكومون بس ماكو لزكو 

منذر : اني راح اروح انام بعد مابيه اجامل وابقه راح انجفي على وجهي 

علي : هو انت دومك عايف كلشي على راسي ... باوعت للعالم عفيه نسوان ولايكعدن بكاع الله كومن روحن لبيوتجن لا بارك الله بيجن 

اروى : وره ساعه فرغ البيت وطلعو الكل بقت بس الحجيه وبنات عمامي نزعت حجابي ونمت على متن امي 

ايمان : كومي يمه ارتاحي صارلج ايام على فرد وكفه 

اروى : هسه شويه واكوم 

عبير : اروى لعد وين غنى 

اروى : اووو وين انتي راحت من زمان 

مروه : هاي البنيه السمره الي جانت كاعده وياجن صديقتج هم 

اروى : اي هاي نرجس 

ملك : كلش حلوه 

مروه : اي حتى احلى من غنى 

فهد : السلام عليكم 

الكل : وعليكم السلام 

ياسمين : تعال بعد كلبي تعال يمي 

فهد : كعدت يم الحجيه 

ايمان : شلونك حبيبي خوما بيك شي خوفتني عليك من الصبح لسه نايم 

فهد : جريت ايدها بستها لتخافين هاي لان تعبان وصارلي ايام مانايم ذبيت روحي هالذبه 

علي : والله العظيم كلوبه وكفت من وصلنه الخبر من صباح 

فهد : صباح مطي بس سمع المدفع جزم انو احنه كلنه متنه لا دز قوات تتاكد لا سوه صخام براسه بس يريد يخلص بس اني اعلمه اذا ما اطلع بي عقوبه ما اتسمى فهد 

ايمان : حرام يمه هاي ارزاق ميصير تحارب الناس برزقها 

فهد : ارزاق شنو يمه بنص الموصل نتوسل نريد يدزلنه قوات دعم ميقبل اله يصير الوضع حرج يمعود يا ابو المروه الشباب جاي تموت ماكو ولا يهتم 

منذر : بس اريد افتهم هذا يامطي خلا مسوؤل 

فهد : انت كلتها مطي 

مروه : شلون صرت هسه فهد 

فهد : الحمدلله مابيه شي 

فيصل : اشو احس مزاجك مخربط 

فهد : ليش بالعاده اذا مزاجي عدل اكوم اخذلي هزه مثلا 

فيصل : بخبث قصدك ياخذولك هزه 

فهد : باوعتله صفح 

سعاد : تدري ستوه كلبي ارتاح من شفتك حسيت واحد من ولدي رجع الحمدلله طلعت سالم ومابيك شي 

        

          

                

فهد : الحمدلله لتخافين ميصير بيه شي محمض على كلوبكم ما اموت 

ورده : طن وطن وطن طنننننن كمت حضنته هههه اروحلك فدوه حبيبي والله لو هسه تسحب الايباد والموبايل وتخلي فيصل يضربني ما اهتم كد ما فرحانه 

فهد : ابتسمت لعد روحي جيبيهن وتعاي 

ورده : داجاملك فهودي شبيك صدكت بسرعه 

فهد : ضحكت والله هالبنيه سوالفها كارثه  

علي : عوفو الشقه شويه فهد احجيلنه شصار هناك اني كلشي ما فتهمت بس المسؤول طلع مخربط وانتو عدلين باقي التفاصيل كلها مجهوله 

اروى : بده فهد يحجيلنه على الي صار بالموصل واحنه دموعنه صارت عشره عشره لان ضكنه هاللوعه لتلث تيام بسبب فهد الله يساعد الامهات الي جابو اجسام ولدهم للباب يمه كزبر جلدنه من الكلام وامي حبيبتي بجت عبالك الراحو ولدها 

فهد : وهذا كل الي صار 

ياسمين : لا اله الا الله حسبنا الله ونعم الوكيل عليكم عساكم بحركه كلب كل دمعه نزلت من ام وابو على ابنهم شنو من بشر ذوله الله لايوفقهم وين الانسانيه شلون يكدرون يسوون هيج 

فهد : حجيه الي يكتل امه وابو والي يبيع بلده هذا هم يتسمى انسان تره كلامج جريمه بحق البشريه 

مروه : تدرون المفروض هاللحظه تسجل بالتاريخ لان احنه اول الناس درينه بالي صار ويه فهد 

فهد : ليش منو كال انتو اول من احجيله 

بتول : ليش انت لحكت تحجي لغيرنه 

فهد : اعتقد الكلام كان بيني وبين بت عمي ليش تتطفلين 

مروه : ابتسمت يمه فدوه اروحله ميقبل واحد يكطع حديثنه اي فهد وين جنه 

فهد : هنا كاعدين وخلص النقاش 

اروى : ضحكت على سوالفه يله من رخصتكم اني اروح انام شويه تعبت تصبحون على خير 

الكل : اجمعين 

شهد : يله مروه عبير ملك امشنه تأخرنه 

فهد : علي كوم وصلهن 

علي : كمت يله امشن 

ياسمين : مسحت على شعره تنام 

فهد : نمت بحضنها وخليت ايدها على راسي 

ياسمين : هاا ولك مبين بعدك نعسان 

فهد : على المشي المشيته لو انام اسبوع مااشبع 

ايمان : نام نوم العوافي بعد كلبي 

_____________________ 

غنى : كاعده اقره قران ودخلت خالتي 

سحر :هااا يمه كملتي 

غنى : صدقت اي خاله 

سحر : خابرو خوالج هسه 

        

          

                

غنى : خير شيردون 

سحر : يردون يجون يعتذرون منج تفاجئت بصراحه لا والفكره فكرة سهاد 

غنى : نزعت نظارتي اني ما مرتاحه لجيتهم واعتذارهم ما مقبول وصليلهم كلامي ايالهم يجون لهنا 

سحر : ادري راح تحجين هيج بس اني كلت خلي اسايرهم واعرف شنو الغايه من هالسالفه 

غنى : اني وياج نعرف غايتهم دائما مو نظيفه ومصالحهم لو جانت باقذر بقعه بالدنيا يركضون عليها فكليلهم لا يجون ولا يوصلون جفيني شر المشاكل خاله الله يخليج خليني عايشه مرتاحه لا ارى القرد ولا القرد يراني 

سحر : خلص براحتج يمه اني ابلغهم بجوابج 

غنى : عاشت ايدج ... اكول خاله اني جوعانه ونمت بدون غده شسويتي غده 

سحر : ضيقت عيوني مركه بتيته وانتي مو صارلج ايام متشتهين شعجب هسه انفتحت شهيتج 

غنى : ابتسمت ببساطه لان مرتاحه كولش وفرحانه الى درجه بودي اوزع من سعادتي على الدنيا كلها 

سحر : ربي يجعل ايامج كلها سعاده يايمه يله اني كايمه احميلج الاكل علما تنزلين 

غنى : طلعت خالتي واني كمت طلعت الجفيه واخذت نفس منها افيييش رجعتها ونزلت اكلت وصعدت لكيت مكالمه من نرجس خابرتها 

نرجس : شلونها جوارين بيت الصكوك 

غنى : ابتسمت والله زينه  

نرجس : عندي الج اخبار حلوه 

غنى : خير اللهم اجعله خير 

نرجس : بعد اسبوع او اكثر نطبق 

غنى : صدوك والله منو كلج 

نرجس : جعفر كلي وكال راح يوزعون قسم على شركات الترجمه وقسم على المدارس واني وياج طبعا بالمدارس والاحلى بنفس المدرسه 

غنى : حلو بس شوكت نباشر 

نرجس : احنه قبل فتره استلمنه النتائج وهسه راح يبلش الجد تخيلي ولج بعد اربع اشهر ونخلص ونكعد بالبيت 

غنى : شنو الفائده وماراح نتعين 

نرجس : يمعوده يا تعيين يابطيخ همه المهندسين محد يعينيهم ترديهم يعينونه احنه صدك بطرانه 

غنى : اي والله صحيح 

نرجس : اكلج شفتي هذا اخو اروى السخيف 

غنى : ياهو منهم 

نرجس : هذا الجبير واكف بالباب ساد الطريق على النسوان لا نكدر نطلع ولانكدر نطب صدك واحد ميستحي 

غنى : قصدج فيصل 

نرجس : اي ولج جماله عيونه زايغه ويخلي عينه بعينج بكل صلافه ولا كأن اخو فهد الي راسه ميرفعه علينه 

        

          

                

غنى : تنهدت وانتي تجيبين هذا على فهد 

نرجس : وشبيج تحجيها بحسره 

غنى : لا متوهمه عليمن اتحسر 

نرجس : ديله اني اروح زعفران معزومه يمنه ولازم اتكشخ حتى استقبلها 

غنى : زعفران منو ؟ 

نرجس : ههه غفران خطيبه جعفر يله باي 

غنى : ابتسمت باي سديت الموبايل كل عقلها تشبه فيصل الي ذره شخصيه معنده بفهد العاقل ولو فهد هم ابو نسوان بس عنده طريقته الخاصه مو مثل الباقين 

___________________ 

ازهار : السلام عليكم 

الكل : وعليكم السلام 

كفاح : هاا خيرج 

ازهار : كعدت مابيه شي جنت بواجب كضيته واجيت خير شبيكم انتو 

فالح : خابرونه خوال بنت اخوج وكالو صاير بيها قلب ويخافون لاتوكع على ساعه وتطيح بركبتهم 

ازهار : واحنه شعلينه عرفه ولفه 

سامح : مو صار الوقت حتى نجيب البنيه يمنه كافي بعد صار سنين طويله والبنيه كبرت خلي نجيبها تبقه بين اهلها 

ازهار : بحزم احنه مو اهلها وبت ختام متدخل لبيت ابويه لو على كص ركبتي 

كفاح : واني وياج اني ما اكد واتعب واشتغل بالكيعان تالي تجينه بت صالح تاخذ ورث 

سامح : هسه لننطيها ورث خلي بس نجيبها يمنه على الاقل بين اهلها وناسها 

فالح : ولك هاي مثل خوالها اكيد ربها دينها الفلوس

سامح : مو شرط 

ازهار : اني اكول التهي بابنك المتصاوب واكعد واسكت 

سامح : هو الي صار بابني صحاني لا يكون هالشي عقاب من الله واني بعد مالي علاقه بيكم سوالف الاملاك وحقدكم على بت صالح الي امي لحد الان متدري بأحوالها ولا تدري بابن صالح الي مات بسببكم لان ماقبلتو تنطون فلوس الها 

ازهار : بهاي الصوج صوج كفاح لان راح تصرف من كيفه ومارجع الي اني لو ادري ادزلها فلوس حتى تعالجه لو شكد ما يكلف العلاج و مو حباً بيها بس مهما يكن يبقه طفل 

سامح : ليش علساس غنى مو طفله هسه تره كل عمرها عشرين سنه مو اكثر يعني بعدها صغيره 

فالح : اهووووه انت لزكت بنعال كافي سد الموضوع ولتعكر كعدتنه 

ازهار : يله ابدو انطوني الجرد مال الشغل هالاسبوع 

كفاح : تفضلي هذا كلشي مسجل هنا 

ازهار : شوكت يرجع ابني واخلص من هالهوسه هاي راح وعافني اتابع الشغل ورى اوف 

________________________ 

        

          

                

صباحا 

فهد : صباح الخير 

الكل : صباح النور 

ايمان : ياصباح الورد على هالوجه الجنه ورد تعال بعد امك تريك 

فهد : ابتسمت وكعدت 

منذر : اي عمي هنيالك الدلال بس الك 

فهد : هاا حطيت عينك 

سالم : امووو اوووا

فهد : هاا ابن الكلب وينك ماشفتك البارحه 

منذر : رحم الله والديك 

سالم : ايب امو تغلت على بابا (عيب عمو تغلط ...) 

فهد : دكعد اكعد هاك اكل هالفله و وره الريوك نتفاهم 

سالم : اوتي 

فهد : شنو ؟ 

انغام : ههه يكلك اوك 

فهد : ماشاءالله ابن المشعول يحجي انكليزي 

منذر : كافي فهد مسحت بيه الكاع ميصير هيج العالم كاعده

فهد : انطيت لفه لسالم اني اكول اكل وانت ساكت وانت هي هاي اللفه كلها تاكلها تره اشيلك فلقه لو اعلكك بالمروحه مفهوم 

سالم : بخوف ثار ثار (صار) 

ايمان : اباوعله شلون يوكل سالم وكل شويه يسويله لفه ااه ربي يهديك ويخليك تعرس واشوف جهالك 

ساره : فهد انت تحب الجهال 

فهد : مو كلش مرات اي ومرات لا 

ساره : اذا ترغبلهم ليش متزوج 

فهد : الله كريم 

ايمان : هاا يمه شو الله كريم شنو نويت 

ورده : يمه انتي تدرين الله كريم يعني شبه لا عد فهد فليش تسألين 

فهد : كمت احسنتي هو هذا الي اريد اوصله كمت غسلت واجيت راح اطلع اتمشى محتاجين شي

ايمان : جيب وياك لبن وجاي من الاسواق 

ورده : اوكف فهد خلي اكتبلك جم حاجه جيبها الي 

فهد : اخذت جكايري وموبايلي ماشي بس استعجلي اخذت الورقه طلعت تمشيت بالمنطقه كلما اباوع لبيوتنه اتذكر بيوت الموصل الجانت جنه وصارت رماد هسه تنهدت داخل للمحل السلام عليكم 

: وعليكم السلام سيدنا الحمدلله على سلامتك 

فهد : الله يسلمك يارب ... بلا امر عليك حجي هاي الورقه شمكتوب بيها انطيني 

: حاضر 

فهد : تمشيت بالمحل اخذ جكاير شفت وحده دايره وجها مدري شتاخذ عرفتها من جسمها غنى ... هاي شمطلعها بهيج وقت و منو سمحلها تطلع 

غنى : اخذت معجون طماطه ودرت وجهي شفت فهد ورايه والله فزيت فزه باوعلي بخزره 

فهد : اشرتلها بسيطه ورحت ... خلص 

        

          

                

: اي تفضل 

غنى : عمو اخذت هذني شكد الحساب 

: (...) 

غنى : تفضل شكرا زحمتك 

: ماكو زحمه بنيتي اهلا وسهلا 

غنى : اخذت العلاكه وطلعت شفت فهد يمشي كدامي صحت بصوت ناصي صباح الخير 

فهد : بحده صباح الهيلكه و السيابه شمطلعج من الصبح انتي 

غنى : شنو الالفاظ هاي فهد متشوف رحت اجيب كم حاجه 

فهد : ليش رجل خالتج مو موجود 

غنى : خطيه ماله خلك اني طلعت اجيب الغراض بداله وبعدين شكو 

فهد : انتي بنيه شعندج بالاسواق خاصه العفطيه والشباب كلها تجمع هناك وانتي طالعتلي الصبح مسويه اناره بالمحل 

غنى : اعصابك تره مسويت شي عليمن هالعصبيه لو اله نتعارك ياله ترتاح 

فهد : بيج زود وتتعاركين ينفخون عليج تطيرين وينج وين العرك روحي لاهلج روحي 

غنى : طبعا انت لازم تغثني متكدر ... وصلت للبيت درت وجهي لكيته ورايه 

فهد : اوكفي طلعت كيكه هاج 

غنى : شنو هاي 

فهد : عربون صلح اني اسف وصباح الخير شتردين بعد 

غنى : هزيت راسي مبتسمه والله عندك سوالف شكرا ما اريدها مزعلانه منك حتى تجي تصالحني يله باي فتحت الباب ودخلت مبتسمه تفضلي خاله 

سحر : باوعتلها الحمدلله والشكر شبيج يمه حبيبتي تتبسمين جنج خبله 

غنى : هيج تذكرت شغله من رخصتج 

______________________ 

فهد : كاعد ويه اهلي ودك موبايلي باوعت للرقم "فرح" هاي شعدها متصله رفضته رجعت اتصلت كمت صعدت لغرفتي وفتحت الخط الوو 

فرح : الوو هاا فهد شلونك 

فهد : الحمدلله بخير تفضلي شتردين 

فرح : مشتاقتلك 

فهد : وبعدين 

فرح : فهد لازم اشوفك صار اشهر لا ليلي ليل ولا نهاري نهار من وراك 

فهد : ليش شنو امج واني ما ادري 

فرح : فهد انت اعز حتى من امي الله يخليك رجعني والله اصير خدامه جوه رجليك بس لتعوفني اني ما اكدر بلاك 

فهد : اولا اني مو اكسجين ومتكدرين بلايه وثانيا لو اريد ارجعج جان رجعتج وثالثا والاهم انتي الي عميتي على روحج ووصلتي نفسج لهالمواصيل رحتي سويتيلج سالفه لا وبكل عين صلفه تجذبين وفوك كل هذا ما هانلي اطردج بالشارع خليتج ببيتي وضليت ساكت فشعندج مخابرتني 

فرح : فهد انت ليش متفهم اني احبك 

فهد : الي يحب ميأذي ولا يلعب بذيله ويه الي يحبه كولي انتي ما لكيتي واحد عنده فلوس وخبره وخوش يعرف يريح مثل فهد فكلتي احاول اتوسله يرجعني وهالشي من سابع المستحيلات رجعه ما ارجعج لو يرجع ابليس للجنه فتهمتي 

        

          

                

فرح : اني مستعده اخابر اختك واعتذرلها على الموقف الي صار والله كلشي اسوي بس رجعني اني محد يقدر قيمتي غيرك 

فهد : انسي من المستحيل اخلي حرف من لسانج يوصل لاختي وايالج وبالج تتقربيلها لو تحاوين مجرد محاوله تحجين وياها اقسم بالله اخليج تعضين اصابعج ندم كلشي ولا هاي 

فرح : انت متاكد هاي اختك 

فهد : فرح فضيني تره روحي طالعه 

فرح : احبك 

فهد : واني ما احبج تدرين زواجنه على حساب شنو جان واني هسه شبعت ما اشتهيج بعد كافي حلي عني لخاطر الله يله مع السلامه سديته منها يعني لازم يجي شي يعكر مزاجي وعلى طاري فرح اني لازم الكالي وحده لان تعبانه نفسيتي واريد افرغ الطاقه العندي خو ما اخليها هيج يله خلي ارتاحلي جم يوم واباشر بالبحث عن اداة متعه جديده 

_________________ 

فرح : الوو الهام سويت الي كلتي عليه 

الهام : وشكلج 

فرح : رفض يرجعني 

الهام : شوفي عوفي انتي هسه ورجعي خابري وره يومين وحاولي تتقربين منه ايالج تعوفي 

فرح : ولج والله راح اتخبل تفكيري كله يم هاي اخته وكلامج ماجاي يطلع من بالي 

الهام : اني متأكده هاي مو اخته لان كعدتهم ونظراتهم وكلامهم مو مال اخ واخته تعاي ناخذها بالعقل اكو اخو واخته يطلعون يتغدون بمكان بعيد لا ووحدهم بدون اهلهم ما اعتقد صايره 

فرح : اني شفتهم مره هم بالمول وحدهم وحتى جانو لابسين نفس اللون ماادري الهام راح انجن اخاف تطلع هاي مرته 

الهام : لتخافين ما اعتقد زواج دائمي اكيد ماخذها متعه 

فرح : بس هاي بعدها صغيره مو مال متعه 

الهام : يجوز متطلكه او ترملت وهي صغيره واجه فهدج خذاها وهي ماشاءالله تبرك برك وفهد غبي لو رفضها 

فرح : فهد يتعقد من البيض ابد ميحبهن يكول جامدات يحب السمر ولو يحب البيضات ما جان تزوجني 

الهام : ما اعرف بعد بس كتلج فهد شغلته مو خاليه بس انتي حاولي تتقربين منه ولتملين لحد ما يحن كلبه ويشتاقلج ويرجع 

فرح : هو هذا الي راح اسوي ادري بي يحتاجني يحتاجني اذا مو اليوم بتجر 

______________________ 

بعد مرور يومين

غنى : اقره قران واجتني رساله فتحتها لكيتها من فهد 

فهد : مشتهي فاصوليه 

غنى : باستغراب .... شنو ؟ 

فهد : كلامي واضح مشتهي فاصوليه واريدج تسويلي 

غنى : تدلل بس وين انطيها الك وما اكدر ادزلك لبيتكم لان ماكو مناسبه 

فهد : عندي موضوع وياج باجر خلي نروح للعماره هم نحجي وهم نتغده ونرجع 

        

          

                

غنى : دكيت عليه فتح الخط ... خير فهد صاير شي 

فهد : لتخافين ماكو شي بس اكو موضوع مااكدر احجي بي بالموبايل ولا اكدر التقي بيج بأي مكان غير العماره فالافضل نروح باجر ونتفاهم 

غنى : وشلون اطلع اني 

فهد : كلي لخالتج معزومه عد صديقتج واني اوكفلج براس الشارع ونروح 

غنى : واني الى متى اضل اجذب هيج 

فهد : هو بس هالمره وكلشي ينتهي ضغطي على نفسج بس هالمره 

غنى : ماشي 

فهد : موتنسين اريد فاصوليه لان محد يعرف يطبخها مثلج 

غنى : ابتسمت صار ... سديته منه ونمت كعدت الصبح كلت لخالتي 

سحر : منو هاي العازمتج عدها 

غنى : احم هاي زميله ويانه عرسها بعد كم يوم ومسويتلنه جمعه بنات يمها 

سحر : شعجب راح ترحين الاعرفه انتي تكرهين التجمعات 

غنى : مو مو البنيه اصرت عليه ومكدرت افشلها 

سحر : خوش لعد خلي البس عباتي واوصلج 

غنى : لالا اني اروح اخذ عبريه لتشيلين هم 

سحر : براحتج 

غنى : رحت بدلت لبست صايه فوك تراكي وفوكها شال اخذت جنطتي وموبايلي وطلعت 

سيف : هاا بويه وين رايحه

غنى : معزومه عمو 

سيف : الله وياج بويه تونسي وديربالج على روحج 

غنى : ان شاءالله يله مع السلامه طلعت من البيت رمشت لفهد وطلعت للشارع العام شفت سيارته فتحتها وصعدت ... صباح الخير  

فهد : صباح الورد شلونج 

غنى : الحمدلله 

فهد : حركت ... شو كاشخه خير 

غنى : وين الكشخه جايه بالصايه 

فهد : هزيت راسي وسكتت وصلنه للعماره صفيت السياره ونزلنه 

غنى : صار فوك الشهر مجايه لهنا 

فهد : وهاي اجيتي صعدنه للطابق الرابع فتحت الشقه ودخلنه 

غنى : ذبيت الجنطه اباوع الشقه نظيفه تلمع فهد شو الشقه نظيفه 

فهد : ام ماجد نظفتها البارحه 

غنى : عاشت ايدها رحت للمطبخ فتحت المجمده طلعت فاصوليه سالكتها وخالتها بجياسه حتى بسرعه اطبخهاطلعتها وبديت اطبخها 

فهد : عوفيها وتعاي خلي نحجي لاحكين على الغده بعد وكت 

غنى : عفتها واجيت كعدت بالصاله 

فهد : نزعي حجابج وصايتج الدنيا حاره وانتي موزين عليج

غنى : ذبيت الصايه والحجاب وبقيت بالتراك وهاي نزعتهن ممكن تحجي بالموضوع الي مكدرت تجي بالموبايل 

فهد : شوفي غنى احنه من تزوجنه قبل كم شهر جان سبب زواجنه شنو ؟ 

غنى : انو تحميني من خوالي وعمامي لبين مترجع خالتي 

فهد : وشتفقنه 

غنى : بهدوء ننفصل اول ماترجع خالتي 

فهد : عفيه عليج ... باوعتلها شوفي غنى بالبدايه اني تزوجتج على حساب الاسباب الي ذكرتيهن هسه ومن رجعت خالتج اجلت موضوع الانفصال لان جنت خايف عليج وما مأمن بخالتج ورجلها وخفت لا يأذوج كلت على الاقل انتي على ذمتي ولو صار شي اسمج مرتي .... بس بعدين من تحريت عنهم وشفت اسلوب رجل خالتج واخلاقه بالمنطقه وشكد هو انسان محترم شبه تطمنت عليج واعتقد انتي هسه تقريبا خلصتي السنه الرابعه ومابقه شي وتتخرجين فقررت انو ننفصل وكل واحد يشوف حال سبيله 

غنى : بهدوء وشمعنى دتحجي بالموضوع هسه بالذات 

فهد : لان ناوي اجيب الشيخ اليوم واطلكج رسمياً كدامه حتى تكونين شرعا طالعه من مسوؤليتي وهذا افضل قرار للطرفين خوما نضل واحد مربوط بالثاني طول العمر  

غنى : نملت عيوني دموع بهمس اي صحيح الى متى ابقه مقيده بيك اني هم لازم اشوف حياتي ويه الانسان الي يناسبني 

فهد : بحده احترمي نفسج ولترحين زايد تره انتي بعدج على ذمتي 

غنى : اعتذر سيد فهد موبقصدي 

فهد : سيد فهد ؟!! ...شبيج غنى تره انفصالنه ماراح ياثر على علاقته كاصدقاء 

غنى : واني اعتذر بس اني ما اصادق اشخاص غريبين عني وبذيج الفتره من صار تقارب بيناتنه وسمحتلك تدخل لحياتي فالسبب واحد وانو هو انت مجنت محرم عليه ومسموحلي اكعد واخذ وانطي وياك بس بعد دقايق كولشي بيناتنه ينتهي سواء علاقه اخوه او صداقه او اي شي ثاني 

فهد : كمت شبيج غنى ليش تحجين هيج تره اني مستحيل اعوفج حتى لو انفصلنه تبقين صديقتي واختي الصغيره 

غنى : بعصبيه اني مو اختك خواتك اروى وورده وليلى وبس اني ويااااك مو اخوووان وهسه روح جيب الشيخ خلي ننهي هالمهزله وارجع للبيت 

فهد : اباوعلها كامت ترجف هسه عليمن هالرجيف خلص اهدي لتتخربطين خلي نتغده ونكعد شويه واروح اجيبه 

غنى : للحظه حسيت كرامتي صارت بالحضيض ومشاعري خانتني من البدايه ماكان لازم انجرف تجاه فهد هيج .... فهد لا غده ولا بطيخ روح جيب الشيخ وخلي ننهي كولشي الله يخليك 

فهد : بعصبيه هسه غير افتهم شبييييج 

غنى : بيه مرض معليك انت روح جيب الصخام وطلكني اريد ارجع للبيت 

فهد : لسانج حيوا.... قاطعني صوت الجرس هاي اكيد ام ماجد وصيتها على خبز مال بيت واكيد جابته 

غنى : وين رايح 

فهد : افتح الصخام 

غنى : راح يفتح الباب واني رحت ورا 

فهد : فتحت الباب وانصدمت تبسمرت بمكاني باوعت لغنى بسرعه 

غنى : بصدمه .... خاله ايمان 

*******

يتبع