رواية ذنوب على قيد الغفران الفصل الحادي و الثلاثون 31 - بقلم براء
ذنوب على قيد الغفران
#ذنوب_على_قيد_الغفران
#البارت_الواحد_والثلاثون
غنى : كاعده وخاله ايدي على خدي افكر بكلام خالتي صار من البارحه لليوم احس بضوجه فضيعه اضافه اليوم فهد الصبح التحق وكلبي ضل يمه كل ساعه تجي حسبه ابالي من جهه اريد خالتي ترجع ومن جهه ثانيه ضايجه لان حترجع اكو تناقض بداخي مااعرف شنو اريد .... جماله فهد ماهو وما اكدر اخابره لان عنده شغل ومو فارغ اصلا .. فزيت على صوت الاستاذ
: بابا وين مسافره انتي صار ساعه اشرح وانتي مو يمي اكو شي
غنى : العفو استاذ شردت شويه
: ركزي رجاءا مو تجوني بعدين تكولون الصوج منك متوصل فكره تره جاي اتعب وياكم تعبو انتو هم
نرجس : هسه غير يكعد راحه رأفت الهجان كام بتفلسف
غنى : اسفه استاذ ان شاءالله متتكرر
: استريحي بنتي
غنى : كعدت ورجعت مثل ماجنت
نرجس : هم صفنت صفنه المطي ولج شبيج
غنى : تنهدت مالي خلك
نرجس : خلصت المحاضره وطلعنه تعاي ولج شبيج هالايام وضعج ما عاجبني صايره تتصفنين هواي وحتى للمحاضرات متهتمين مثل قبل احجي ولج خاف عاشكه
غنى : عاشكه شنو لا حبيبتي متوهمه لا عاشكه ولا شي بس تعبانه هالفتره شويه
نرجس : يعني صارلج هالشهرين تصفنين لان تعبانه بس
غنى : اي اكيد لعد عليمن
نرجس : اذا ما طلعتي عاشكه وسايحه وواكعه على وجهج اطلع كلشي ما افتهم وتعاي كليلي انتي كلبه بت كلب
غنى : دعوفي هالسوالف وتعاي كليلي وين اروى
نرجس : مدري شبي فايلها كالت راح تروح للعميد وتشوف يمكن طلعت اكو مشكله وكعدت تحلها
غنى : هزيت راسي
______________________
انغام : خاله شبيج
ايمان : كلبي على فهد صاير نار طلع من الصبح والمفروض هسه واصل للموصل بس شو ما خابرني وطمني عنه
انغام : يجوز ماكو تغطيه او بعده ما وصل لتخافين خاله
ايمان : ولج يمه شلون مااخاف هذا وليدي ورايح برجلي للموت
انغام : الكادر ينقذ شخص وهو ببطن حوت ميكدر ينصر شخص على عدوه لتخافين خاله فهد وكل الشباب بحفظ الرحمن الي احسن مني ومنج
ايمان : ونعم بالله
انغام : كاعده احجي ويه خاله وجان تنزل ساره ... ياا هاي صدك تحجي اباوعلها نازله بثوب النوم جسمها كله مبين وحتى روب مالابسه
ساره : فتحت الثلاجه صباح الخير
ايمان : باستنكار شنو هاي ولج وين كاعدين بكاوليه احنه شهالبس هذاا انتييي ماعندج حشمه لاحد بهالبيت
ساره : صبحكم الله بالخير خير شكو خاله شسويت اني
ايمان : شنو هذا لبسج مو عيب عليج صدرج ورجليج طالعات حتى اذا احنه نسوان ميجوز نشوف مفاتنج
ساره : خاله غير نسوان بيناتنه وبعدين اني متعوده اخذ راحتي باللبس
ايمان : هاي متسمى اخذان راحه هاي تسمى هيلكه واستهار انتي كاعده ببيت عيال وعندج حموين وبنات ما متزوجات كاعدات وياج عيب احتشمي تره طلعتيها من ماعونها تردين تتعرين روحي خلي رجلج يأجرلج بيت ونزعي هناك براحتج هنا غصباً ماعليج تحترمين المكان الي عايشه بي
ساره : خاله شجاج ويايه هاي عود انتي الحبابه لعد شخليتي لعمتي ام فيصل
ايمان : تستاهلين هالاسلوب لان مصختيها وطلعتي مو مال واحد ينطيج وجهه مال اهانه وضب حتى تمشين عدل وهسه بدون نقاش ترحين تبدلين ملابسج اني عندي طفله وكاعده بالبيت عدها مراجعه ما اريدها تشوف هالسوالف و هالاثار عيب واحد يشوفهن لبسيلج شال صحيح هو رجلج بس الخجل حلو للبنيه خاصه بهالامور
ساره : بضجر صار تأمرين
انغام : صدمتيني بصراحه
ايمان : احسن حتى تتادب
____________________
غنى : دخلت للشقه ذبيت غراضي وفتحت موبايلي للمره الميه وماكو رساله منه افف يربي ليش لسه ما خابرني ... كلت خلي اتصل اني خابرته طلع الجهاز مغلق او خارج منطقه التغطيه ... يا إلهي وين صار معقوله لسه ماوصل للموصل ... ذبيت الموبايل وكمت سبحت وطلعت صليت وكعدت اقره قران هستوني فتحت القران وسمعت صوت الموبايل كمت اركض لزمته شفته فهد جاوبت بلهفه ... الوو فهد وينك
فهد : الوو هاا نونه وصلت من زمان بس جان عندي شغل وماصارلي مجال الزم موبايلي غير هيج التغطيه رديئه كوه الواحد يحصل شبكه ويتصل وهسه كملت شغلي وكلت خلي اخابر امي اطمنها واطمنج انتي هم
غنى : زفرت براحه الحمدلله على سلامتك
فهد : الله يسلمج شلونج
غنى : لا الحمدلله بس ضل بالي يمك والله حتى بدوامي ماركزت
فهد : ابتسمت لتشيلين هم ماكو شي تسع تيام وتلكيني مزروع كدامج
غنى : بهدوء فهد خالتي راح ترجع بعد كم يوم
فهد : كمت شلون ماسمعت
غنى : البارحه خالتي خابرتني وكالت زوجها صار زين وراح ترجع بعد خمس تيام
فهد : وانتي ليش جاي تكليلي
غنى : مو انت هسه ملتحق واحنه المفروض حسيت بغصه ماكدرت احجي ... تنهدت والمفروض اول ماترجع خالتي ننفصل
فهد : ببرود بالوقت الحالي ماعندي وقت اطلك والله خليها لفد جم شهر والله كريم
غنى : بصدمه جم شهر ؟
فهد : اي ليش عندج مانع مستعجله على شي انتي
غنى : هاا لا ممستعجله على شي بس ليش تأخر الموضوع
فهد : هيج مو حاب اطلكج بالوقت الحالي عندج اشكال
غنى: لابله
فهد : وجعه من الله ... سمعيني زين اذا خالتج رجعت قبل لا انزل لترحين وياها لبيتها رجعي للبيت القديم
غنى : لعد هو بكيفي غير وين متروح اني وياها
فهد : ماكو هيج شي مو رجلج هي وترحين وين ميروح سوي مثل ما كتلج هناك ما اامن عليج على الاقل يم بيتي انتي موجوده واكدر اطمئن عليج
غنى : تنهدت احاول
فهد : ماكو شي اسمه تحاولين اسمها صار
غنى : شكد متسلط انت ياربي
فهد : لعد ستوج تعرفيني .... تعاي اكلج
غنى : كول
فهد : شمسويه غده
غنى : ابتسمت مركه فاصوليه
فهد : احتركو واشتعلو بكاز
غنى : ههههه منو همه
فهد : الطباخين الي هنا مسوين مركه شجر واني شلون احبها
غنى : ابتسمت كول الحمدلله ديطبخولكم هناك احسن ما تبقون بدون اكل لو تاكلون خبز يابس
فهد : عمي انعم الله عليهم من يطبخون لكل هالعدد الهائل هذا
غنى : ربي يحفظكم وترجعون كلكم سالمين غانمين لتخاف من شي انتو كدها
فهد : صدكيني اني متهمني حياتي بكد ميهمني الشباب الي هنا يرجعون عدلين اغلبهم ابهات وستوهن متزوجين هذا من غير وحيدين اهلهم تعاي شوفي وكت الروحه الامهات شلون يخابرن ولدهن ويبجن شي يكسر الكلب
غنى : الله يساعد كلبهن ويرجعهم لاحضانهن سالمين
فهد : امين يله غنى اني تعبان واريد اروح انام من وصلت لسه على فرد وكفه
غنى : بكلبها سوده عليه ... روح وديربالك على نفسك ما اوصيك
فهد : الله الحافظ يله مع السلامه
غنى : الله وياك
فهد : سديته منها ورحت نمت كعدت بالليل كلش وكمت طلعت اشم هوه لكيت واحد من المتطوعين اسمه مهدي كاعد وينافخ ... خير شبيك
مهدي : العفو سيدي تفضل محتاج شي
فهد : استريح شبيك نزيت
مهدي : والله سيدي انت تخوف
فهد : ابتسمت مو لهدرجه اني بس صارم وياكم بالشغل لان اخاف عليكم ... اكعد كلي شبيك كاعد وتنافخ بنص الليل
مهدي : الحجي بيناتنه سيدي واني اعتبرك اخويه الجبير اني قبل اسبوع عرست واليوم التحقت والله ما لحكت اتونس واحس روحي معرس
فهد : ورثت الجكاره ... لعد ليش ما اخذت اجازه
مهدي : رجولتي متسمحلي ابقه بالبيت اضحك واتونس واشبع من مرتي وغيري شباب تركو عوائلهم واطفالهم واجو التحقو احس روحي حقير لو سويتها
فهد : ان شاءالله فتره وتعدي وترجع لبيتك ومرتك وكلشي ينتهي
مهدي : تتوقع راح نكدر نطلع داعش
فهد : شي اكيد
مهدي : واذا استشهدنه
فهد : الامهات جابت زلم لو متنه احنه اكو زلم غيرنه لتخاف احنه محصنين بدعوات امهاتنه ميصيرلنه شي ولو صار هاي بعد اجه يومنه
مهدي : ماتوقعت هيج جنت اشوفك شايل خشمك ومتتحاجه طلعت خوش ادمي
فهد : بحده ليش اني جنت مو خوش ادمي
مهدي : بارتباك لا العفو سيدي حشاك اعذرني خاني التعبير مو قصدي
فهد : اخذت نفس من الجكاره دكوم روح خابر مرتك واحجي وياها احسن ما كاعد ومكابلني
مهدي : كمت ضربتله تحيه حاضر سيدي تصبح على خير
فهد : وانت بخير ... اباوعله راح يركض خطيه ماتهنه بعرسه طلعتله سالفه الالتحاق صفح ضليت كاعد فتره طويله لان نمت هواي اباوع داير مدايري شوكت نبدي نهاجم عندي حقد عليهم يخليني احرك الاخظر واليابس شنو ذنبهم اهل الموصل تشردو بين المحافظات والدول وسموهم نازحين ... عفيه بلد بلدنه بخيراته يغطي الدنيا وشعبه طايح حظه من كل النواحي
______________________
صباحا ... يوم الجمعه
علي : اكول يمه فهد ماخابرج وصل لا
ايمان : بعد وكت ستوك تذكرت اي وصل من البارحه وخابرني
علي : والله ملتهي وماعندي وقت
ايمان : اي حقك قابل اني حجيت شي
منذر : البارحه خابرته جان كوه يحجي مبين عليه نايم ماطولت وياا بشري ما كلج شلونها الاوضاع هناك
ايمان : يكول عادي ماكو شي
انغام : الله يحفظه
ايمان : اللهم امين ... صدك يمه ورده وين
اروى : نايمه
ايمان : كمت لا اله الا الله شلون بيه ويه هالبنيه متقدر هي ثالث ثالث متوسط وهالسنه بكلوريا وعدها بس هالشهر مراجعه ومكضيتها نوم ... فتحت الباب ولج كومي طيح الله حظج عايفه الدراسه ومكضيتها نوم
ورده : يمه عليج الله عوفيني نعسانه البارحه لتلاثه كاعده اقره
ايمان : ومكيفه انتي دكومي يله هسه الكاج مزروعه بالصاله تتريكين وتطلعين بالحديقه تقرين وصوتج ما اسمعه والله يا ورده اذا اخذتي بماده تسعين اطيح حظج اقل درجه اريدها خمسه وتسعين وصاعد فهمتي يله كومي
ورده : افف الله يساعد كلبك يافهد وعلي واروى شلون تحملتو كل هذا من جنتو صغار لحد ماتخرجتو ماادري لبست نعالي (تكرمون) وكمت استغفر الله ينعل ابو الدراسه يابو الثالث اكو واحد يدرس الجمعه يالكائنات الناس تكعد الجمعه تتريك تكعد تسولف تضحك قابل مثلي اكعد على كفخات ست ايمان
ايمان : صوتج ادبسزز
ورده : خرب مو اذن ادري فاتحه بلوتوث ويايه انتي شحجي تسمعين رحت غسلت وطلعت تركت وكعدت اصخم اقره
__________________
غنى : كاعده الم بملابسي بملل اعترف مااريد اروح ويه خالتي اريد ابقه هنا يم فهد احس نفسي واكعه باكبر غلط بحياتي جنت اريد و احد كولشي ماشايف شخص ملتزم متدين يختلف عن كل الشباب بس للاسف حبيت واحد شايف وعايف ومامبقي وحده تعتب عليه اضافه انو هو لا صلاه لا صيام لا التزام ولاشي من الي اريده حتى اشكالنه اني وياا متناقضه بشكل فضيع ما انكر شخصيته مختلفه عن كل الشباب وفعلا هو قاعده شاذه بس اختلافه جان بالنسبه الي مو مرغوب ابدا .... تنهدت سبحان الي خلاني احبك واكرهه كولشي بيك كمت واخذتني رجليه لغرفته فتحت الباب ولفحني عطره غمضت عيوني ودخلت مديت ايدي فاتحه كنتوره لكيته خال حوالي سبع قمصان وكم بنطرون وتراك جريت قميصه الابيض صعدته لخشمي اخذت نفس من مقدمته اووف ياربي رغم هو عطره موذاك العطر الخرافي بس اني احسه هيج ... رجعت القميص لمكانه وطلعت
____________________
حارث : طبيت لبيت جدي سألت على الحجيه كلولي بغرفتها دخلت لكيتها كاعده هي وعمتي نسرين بس شو الحجيه تبجي ... بخوف شبيج حجيه
نسرين : والله ياعمه كالبتها مناحه علينه قبل شويه طلعو بالاخبار راح تصير اشتباكات عنيفه بين داعش وجيشنه وبيبيتك ملخت روحها على حساب فهد
ياسمين : ولج انتي متحسين ابن اخوج رايح للموت ولكم خايفه عليه ومكابله الاخبار وكاعده والله لو صارله شي الحكه والله هذا حفيدي الغالي تربيتي شلون متردوني اخاف عليه
حارث : صلِ على محمد حجيه لفاولوله لخاطر الله يعني اخلص من ابويه الي كاعد وياكل بروحه اجي الكاج اتعس منه شجاكم تره مابي غير العافيه وان شاءالله ايام ويرجع وهالتشوفون جاي نتواصل وياا كل يوم
ياسمين : بس اريد اعرف شودى للموصل هو مو ضابط بالمركز شعنده هناك
حارث : حجيه الحجي بيناتنه تره فهد ضابط استخبارات بشريه يعني هذا شغله
ياسمين : شنو يعني استخبارات بشريه
حارث : يعني هو ضابط استخبارات بجهاز مكافحه الارهاب وشغله انو يلقي القبض على الارهابيين والعصابات والخلايا النائمه بالمجمل كلشي يخص الارهاب شغل فهد مرتبط بي ومو بعيده بعد سنه او اقل يصير فهد مقدم هاي حسب اعتقادي الشخصي ما متاكد فزيت على صوت عمتي
نسرين : صخام الصخمني عزززه هذا ابن سالم طلع يلعب بالموت هذا صدك يحجي وامه الغبره شلون تخلي الله يطيح حظها
ياسمين : دكيت على رجليه شلون بيه بسالم الثاني ولك يمه سالم تعال شوف ابنك وين كاطف روحه سوده عليه احجي ولك حارث شراح يصير بي
حارث : ميصير شي تره فهد صارله سنين بهالشغل مو اول مره وتره محد يعرفه ولا شايفي اصلا الجهات العليا متسترين على الموضوع حفاظا على حياته وحياة زملائه لتخافين حجيه كلها جم يوم وينزل وبعدين همه لسه ناهجمو لعد لو صار هجوم شتسوين
ياسمين : رفعت ايدي الهي وانت جاهي احفظ ولدنه ورد كيدهم بنحرهم هالولد الحرام هذوله نزل عليهم عذابك الهي راوينه قدرتك بتعذيبهم ربي
حارث : اباوع للحجيه شحالها على فهد هي وابويه وعمي مهدي كلش يحبون فهد ولو مو بس همه خايفين حتى احنه لان كلنه نعرف شنو داعش وشنو اساليبه بالقتل بس فهد سبع وميكدروله وهذا الي مطمني
_________________________
بعد مرور يومين
غنى : باجر تجي خالتي هي وزوجها خابرتها واتفقت وياها انو نبقه بذاك البيت استغربت من طلبي بس طبعا ما اكدر اكلها هاي اوامر سياده الضابط فهد وطبعا صار يومين يخابرني فهد مره وحده باليوم والمكالمه عباره عن شلونج شخبارج يله لازم اروح سوده عليه عاذرته لان الشغل لفوك راسه يادوب يلحك يحك راسه .... كمت اخذت جنطي وطلعت تلاكيت ويه ود والحجيه اشواق
ود : هاا وين شنو راح تركين العماره
غنى : احم لا بس رايحه زياره لاهلي
اشواق : حبيبتي ترحين وترجعين بالسلامه الله ومحمد وعلي وياج
غنى : بستها فدوه لكلبج حبيبتي حجيه يله مع السلامه طلعت واخذت تكسي ورحت للبيت لازم انظفه واحضر لجيتهم اتفقت ويه البنات يجن ينظفن وياي وفعلا اول ماوصلت دكيت على اروى طلعتلي هي ونرجس الي جانت جايتها قبل بوقت ... دخلنه للبيت ذبيت جنطتي والمسواك الي تسوكته قبل لا اجي حتى اطبخ باجر .... نزعنه الي علينه وبقينه بالتراكات وبدينه ننظف البيت
نرجس : واكفه اسعف الشباك ... اكول نونه خالتج المسمومه سهاد ليش ما اجت تساعدج
غنى : بكلبها هو اني صارلي شهرين ماشايفتها ... متكدر عدها انزلاق
اروى : عساها بعمى قزرقط مابيها بس كولي تتعاجز عفيه لخاطر الله شنو من خاله هاي
غنى : ديربالج المروحه لتتعورين ... لج اني من جنت صغيره ما دارتني ترديها تداريني واني جبيره صدوك تحجين انتي
اروى : كون تشوفين خالاتي بعد كلبي ماكو منهن والله يحبنه عبالك بناتهن مو بنات اختهن وحتى خوالي دره مال الله عود مثل خوالج العارات
نرجس : هي هالعائله كلها مابيها خير طلعي منها الحجيه زكيه الله يرحمها ومروان وخاله سحر وغنى واهلها الباقين كلهم غسلي ايدج منهم
اروى : ولهسبب يكولون العار ميموت
غنى : بسجن حجي خلي نكمل حتى نكعد
نرجس : انتي شجاي تسوين
غنى : متشوفين يعني اجلف الحيطان
نرجس : على كوله امي خايبه كعدي بكاع الله عوفي الحيطان وروحي شوفي البيتزا استوت تره رحيتها وصلت لهنا
غنى : هستوني خليتها صبري شبيج
اروى : همزين نظفنه المطبخ اول شي حتى نكدر نطبخ
نرجس : اااخ خرب انكسر اظفري والله دنعل ابو هالعنكبوت الابن الكلب انكسر اظفري من ورا غنى اطلبج فصل جدر دولمه
غنى : هههه صار .... كملنه تنظيف وكعدنه تعشينه وهنه راحن واني من التعب بسرعه نمت ... ثاني يوم اخذت اجازه ماداومت على حسابهم كعدت الصبح طبخت وحضرتلهم كولشي وضليت منتظرتهم شويه واندك الجرس ... طلعت ركض فتحت الباب صارت خالتي بوجهي انملت عيوني دموع صار شهرين ما شايفتها
سحر : تعاي بعد كلبي يمه كلبي طك عليج
غنى : ركضت حضنتها بقوه يمه احس روحي حضنت بيبي زكيه بقت خالتي تبوس بيه وتحضني صدوك حسيتها جانت مجبوره تعوفني
سحر : شلونج يمه شخبارج طمنيني عنج
غنى : الحمدلله .... تعالي تفضلي شلت راسي شفت رجال جبيره وجهه بشوش واكف على جهه
سيف : هي هاي غنى
سحر : اي تعال سيف شوف شلون صايره انت اخر مره شفتها جانت طفله
غنى : تقدم رجل خالتي وكف كدامي وعلى وجهه ابتسامه حنونه
سيف : مسحت على راسها شكد جنت اكول مستحيل تجي مره تظاهي سحر بالجمال بس اليوم انتي كسرتي هاي القاعده سبحان الي خلقج شكلج يريح النفس عيني بارده عليج بنيتي
غنى : ابتسمت من التمست الطيبه بصوته تسلم عمو والحمدلله على سلامتك نورت العراق
سيف : منور بوجدكم بنيتي
غنى : يله خاله تعالي نفوت .... دخلنه جوه ومر اليوم بأحسن مايكون خالتي كل ساعه تبوسني وتحضني احسها ممصدكه رجعت مرت الايام واكتشفت عمو سيف دره مال الله رجال يخاف ربه وملتزم بشكل يعاملني عبالك اني بنته يكعد الصبح هو يسويلنه ريوك اني وخاله من اصفن اكول حقها خاله تحبه على هالاخلاق الي شايلها رغم هو متمكن وغني بس ابد مو متكبر بالعكس متواضع لابعد درجعه وعنده عاده حلوه دائما يكعدنه الفجر كلنه حتى نصلي هو يوكف بالبدايه واحنه ورا نصلي سوه للحظه تمنيت بابا موجود ونسوي هيج احنه وياا
سحر : غنى يمه بذور النباتات خليتهن بالسطح صعدي جيبيهن
سيف : الدنيا عصر هسه وكل الوادم تكعد بسطوحها بهيج جو لتخليها تصعد للسطوح ميصير صعدي انتي
سحر : والله انت قديم منو بهالزمن يكعد بالسطح عبالك كلشي بقه نفسه على ايامنه صعدي يمه اني لوما الدرج يتعبني ما ازحمجز
غنى : لا خاله شنو السالفه صار هسه اجيبهن .... صعدت فوك عدلت حجابي و فتحت السطح ودخلت ادور على علاكه البذور وينها هاي رحت ادور يم الخزان لكيتها بس يابذور تريدهن واكفه ادور على صوت يحاجيني درت وجهي بسرعه
: سلام ياحلو
غنى : صعدت فوك عدلت حجابي و فتحت السطح ودخلت ادور على علاكه البذور وينها هاي رحت ادور يم الخزان لكيتها بس يابذور تريدهن واكفه ادور على البذور وسمعت صوت يحاجيني درت وجهي بسرعه
: سلام ياحلو
غنى : لزمت كلبي شكول عليج وكعتي كلبي
ورده : هههه اسفه شفتج مخبوصه وتدورين كلت خلي اخرعها
غنى : ضحكت دخلي الزمج اله اشلع اذاناتج
ورده : متكدرين لان تحبيني
غنى : ابتسمت بله شعندج هنا
ورده : رفعت الكتاب مثل متشوفين اقره لان الحديقه كاعدين بيها جهال فيصل ومااكدر اقره وغرفتي اضوج اقره بيها كلت لامي واجيت اقره هنا وشفتج
غنى : تدنيت وكفت كدامها الحايط كولش ناصي بحيث اكدر اعبر عليهم .... باوعتلها تره هي نص السنه شبيج متخوفه
ورده : مو اني للاسف بمدرسه اهليه ومعروفه هم فيرادلي تعب هواي هالتشوفين هي نص السنه بس امي خابصتني من انطونه عطله لليوم هي محاربتني تريدني اقره
غنى : غير لخطار مستقبلج ياحبيبتي
ورده : اعرف بس والله تعبت هاج اول يوم عندي اسلاميه وامي تلث تيام تقريني بيها يمعوده والله فاهمه الماده تكلي ماكو تحفظيها مثل اسمج والله مرات احس روحي صف سادس من وراها شدعوه هو كله ثالث منو يكلبه لو ماجبت درجات بي هو نجاح والح ربعك
غنى : هههه صدوك خاله ايمان شتشتغل
ورده : امي خريجه علوم كيمياء بس ما توظفت بس تخرجت تزوجت ابويه وكعدت بالبيت يله اني اروح اقره مااريد اعطلج تقربت بستها اسفه لان خوفتج جنت اشاقه
غنى : ابتسمت عادي حبيبتي ماصار شي يله روحي اقري واني حجيبلج كيك وجاي هستوني سويته
ورده : بشرفج هسه وكتها مو اريد اقره وانتي جبتي طاري الاكل اويلي مسحتي كل المعلومات المختزنه
غنى : هههه والله عندج سوالف يله اعوفج اخذت علاليك البذور ونزلت انطيتهن لخالتي ورحت كصيت قطعتين من الكيكه وصبيت استكان جاي خليتهن بصينيه وطلعت
سحر : وين رايحه يمه
غنى : ورده كاعده بسطحهم تقره كلت اوديلها كيكه
سحر : براحتج حبيبتي وسلميلي عليها
غنى : ماشي صعدت فوك انطيتها الصينيه ونزلت اساعد خالتي وبالي يم فهد المفروض باجر ينزل مرن هالعشر تيام مثل السم عليه الصبح اكعد شحلاتني بس من اتذكر هو وين هسه احس الدنيا تضيك بعيني حتى اكل ما اشتهي اكل خاصه من اسوي شي هو يحبه بسرعه يجي على بالي
سيف : بويه غنى ولو زحمه عليج صبيلي استكان جاي
غنى : صار عمو ... اخذت الاستكان وصبيتله تفضل
سيف : عاشت ايدج بويه
غنى : بالعافيه .... صعدت لغرفتي ادرس وسمعت صوت صياح كمت ركض نزلت سمعت الصياح جاي من الاستقبال دخلت وجان انصدم خوالي وخالتي جايين
كامل : هلا هلا ببت اختنه الشريفه جريتها تعاي اجيتي والله جابج عبالج ماراح نلكفج احجي ولج وينج كل هالفتره مختفيه ماخلينه مكان مادورنه عليج بي احجي صارلج شهرين وين باقيه وعدمن
سحر : جريتها منه وخليتها وره ظهري ايالكم وبالكم تدنولها فتهمتوووو اصلا شعدكم جاييييين منو كلكم اني رجعت اصلا
سهاد : خابرت حوراء وهي كلتلي وكلت اجي اشوفج مهما يكن نبقه خوات وصله الرحم واجبه
سحر : باستنكار شعندج جايه انتي مو عتب عليج وكلج تعاي احيي صله الرحم
سهاد : هيج تستقبلين اختج بعد اشهر غياب
سحر : الاخت الي مثلج الواحد يستحي يعترف بيها ولج انتي شنو من بشر بكل صلافه بعد الي سويتي ببت اختنه جايه لبيتها يعني كلشي شايفه بس هيج صلافه ماشايفه ولج رحتي شوهتي سمعت البنيه كدام خوالها وكدام اهل ابوها وانتي تعرفين شنو رجلج وهسه جايتني لهنا من شنو مصنوعه انتي
سهاد : هوب هوب شبيج انفتكتي عليه كليلي شمفهمتج هالسايبه اكيد كلتلج رجلي معتدي عليها مو .... لا حبيبتي خلي افهمج السالفه رجلي راجع من شغله استغفر الله العفو ابو حوراء سمحلي انت مثل اخويه مااستحي منك اني ولج لاكيها ربي كما خلقتني هي وواحد ومن لازمهم اجه الشفيه الي وياها ملخلج رجلي تملخ حتى متنه خلعه من الضرب
غنى : ضليت مصدومه لا اخذ ولا انطي كولشي توقعت بس هيج تهمه تتلفق عليه هاي الي جنت محاسبه حسابها كامت اسناني تضارب ... صرخت ولج خافي الله عندج بنات شلون تألفين عليه هيج تهمه وينج باجر من الله شتكليله وانتي شوهتي سمعتي ودمرتيني صفيت بالشارع من وراج و وره رجلج اصلا بأي عين جايه لهنا لو منج على سوايه رجلي وجهي ما اراوي وجهي بعد لو خوالي الي حرام حتى اسميهم خوال صدكوج بسرعه وبدون اي دليل وراحو خابرو عمامي وخلوني اتلطش اشهر مااعرف وين راسي من رجليه حتى مفتاح بيتي ماقبلتو تسلمو الي خليتوني بالشوارع ولوما ابن الحلال ساعدني وجابلي المفتاح قبل اسابيع ابقه حايره بزماني ولكم سوايتكم هاي حتى ولد الحرام ما سووها
كريمه : صفكتها راشدي ولج ادبسزز صخمتي وجوهنه الله لايوفقج خالج راد يموت بسببج ولج شنو من بنيه انتي الله خذه منج اهلج وحرمج من نعمه الام والاب وهم ما اتعضتي وربيتي الاخو وكبرتي ومات كدام عينج وهم ما اتعضتي اخذ بيبيتج وصفيتي وحيده لا ام ولا اب ولا اخ ولا احد وهم ماتبتي
غنى : بجيت بحركه كلب مو لان ضربتني لان عيرتني بموت اهلي ومروان ماكو اصعب من هيج موقف لو مكطعتني ولا حاجيه هيج
سحر : دفعتها عسى بأيدج الكسر ياحقيره شلون تمدين ايدج عليها امشوووو يله طلعووو بره يله اني ميشرفنيييي وجودكم ببيت بنتي يييله ولووووو
خالد : منطلع لحد ما ناخذ هالسايبه نوديها لبيت اهل ابوها ونخلص منها لتروح تسويلها سوايه اكشر من هاي وتنزل روسنه كدام معارفنه واحنه عدنه بنات
نورس : انتو شجاكم كعدو وافتهمو السالفه يجوز رجل سهاد جذاب ميصير تخطون هيج خطوه
سهاد : انجبي انتي انجبي شنو رجلي جذاب لا والله كلامه كله صحيح ومستعده احلف على كلام الله عنه
خالد : باوعت لنورس خليج انتي طيبه وضلي طلعي اعذار للعالم
سحر : تفهمون عربي لو شنو انتو جاي اكول طلعو بررره بيت بنتي يله ولوووو واعلى مابخيلكم اركبو واذا صار لغنى شي اقسم بالله العظيم احملكم الكم المسوؤليه فتهمتووو
كامل : اذا منتأكد منها والله العظيم منعوفها اله نطلع بروحها
سحر : واني جاي اكلك هي ما مسويه شي واني متاكده من برائتها صدكت انت او ماصدكت يطبك مرض فتهمت
سهاد : خلاصاً للمشاكل اكو حل واحد يخلينه نثبت برائتها
سحر : اباوع لغنى خاتله ورايه ودموعها تنزل سوده عليه خايفه لا يسوولها شي .... باوعت لسهاد والي هو
سهاد : ناخذ غنى للدكتوره ونسويلها فحص عذريه
سحر : شنووووو
كريمه : برأيي هذا انسب حل خلي ناخذها هسه ونسويلها فحص ونتاكد من طهارتها
خالد : عاشت ايدج احسن حل هذا وحتى نكطع الشك من اليقين
غنى : حجه عمو سيف بعد ما كان ساكت طول الوقت
سيف : والله عيب عليكم انتو تسمون زلم انتو والله عار على الزلم انتو ... جان استحيتو تحجوها كدامي واني رجال غريب عنكم ولكم لو بيكم خير جان احتويتوها وحافظتو عليها حتى لو كانت موزينه تتغير من تشوفكم زينين وياها بس اااخ هاي الدنيا الغبره من تحط البشر تحت رحمه انكس خلق الله ... يله امشو طلعو بررره يله يله وجهكم مااشوفه بعد لا اقاضيكم بالقانون .... يردون ياخذون البنيه للفحص الزمايل اكسر ايدكم والله لا عبالكم رجال جبير واسكتلكم
كامل : ابو حوراء لتدخل انت يله كريمه سهاد جيبنها خلي نطلع مادام الدكتورات مفتحات هسه حتى اذا طلعت مابيها شي نسلمها لعمامها همه يتولون امرها ماعلينه احنه بعد
سحر : على كص ركبتي اخليها تروح وياك.... بعدني ما مكمله كلامي وحسيت بغنى وكعت التمينه عليها ولج يمه غنى شبيج .... الله لا يوفقكم ان شاءالله عسى حركت كلبي تطلع بجهالكم
سيف : وخري وخري غسلت وجها بويه غنى تسمعيني احرك البنيه متتحرك .... سحر البنيه نبضها كلش ضعيف
سحر : لطمت على وجهي صخام الصخمني ولكم راحت البنيه الله لا ينطيكم سيف اتصل على الاسعاف بسرعه الله يخليك .... كمت افرك ركبتها بدموع يمه غنى لتسوين سوايه امي بعد كلبي حبيبتي غنى بس حاجيني
____________________
ايمان : كاعدين نشرب جاي وسمعنه صوت الاسعاف خير ياستار شصاير
علي : كمت بسرعه خاف هاي لبيت جدي سترك الهي طلعنه كلنه نركض لان صوت السياره كلش قريب علينه عبالك ببابنه واكفين ... طلعت اني واخواني اباوع ام حوراء تدك على راسها وتبجي ووياها جماعه واكفين على صفحه من شافونه بسرعه راحو خير شبيهم ذوله باوعت لام حوراء كل عبالي زوجها متخربط بس صدمتنه
ايمان : خير ام حوراء شبيج عسى ماكو شر
سحر : بدموع غنى ام فهد غنى تخربطت
اروى : عزززه بعيني شبيها
سحر : فقدت الوعي اكعدها متكعد نكعتها بالماي والعطر هم ماكعدت ونبضها ضعيف سوده عليه لا ايد ولا رجل مااعرف شبيها
ايمان : سوده عليه دهدئي وصلِ على محمد ان شاءالله مابيها شي
علي : اخذوها الاسعاف وراحت خالتها ورجل خالتها وياهم اني هم اخذت سيارتي ورحت وراهم خطيه رجال جبير هو مرته ميصير ينعافون وحدهم
ايمان : حضنت اروى الي بندت على غنى تعاي يمه ان شاءالله مابيها
اروى : بدموع خلي اروح وياهم حبابه
ايمان : وين ترحين يمه متشوفين شلونه الوضع تعاي علي راح وياهم وهو يطمنه عنها يمه منذر سد بابهم خاف يطب عليهم احد
منذر : صار خاله
ايمان :اخذتها طبينه جوه لكينه البنات بالطرمه
سعاد : خير منو مات شبيها بنتج تنحب وتبجي
ايمان : خطيه غنى طايحه واجوي الاسعاف خذوها
انغام : ياا خطيه متستاهل
ساره : اي والله شلون بنيه ورده متستاهل
آلاء : خاف من الخدمه بالبيوت وكعت
بتول : لا اعتقد تفيك حتى تلفت الانتباه
اروى : صحت بيها اكلي تبن وانجبي لا اجي اطيح حظج فتهمتييي بنيه واكعه وحال الضيم حالها بدال ماتدعيلها تكوم وهي بخير كاعده تستهزئين لعد وين واصله بيج التفاهه
آلاء : وانتي منو خالج محامي ولو هو رافق شنن طبقه ثنينجن تبيعن اخلاق براس العالم
اروى : شنو من بشر انتو حتى الموت متهابون منه طبيت لغرفتي خابرت نرجس واني ابجي منظر غنى وهمه يطلعوها من البيت وهي فاقده ميروح من بالي سولفت لنرجس كامت تدك وتلطم اني ونرجس كلش نحب غنى ومتعلقين بيها الله يشهد رغم صارلي اشهر اعرفها بس حسيتها اختي والله ضلينه على تواصل وكل شويه اخابر علي يكلي الدكاتره لسه ماطلعو ومحد يعرف شبيها سوده عليه ياغنى دموج تعبانه
__________________
سحر : اللهم لا اسألك رد القضاء لكني اسألك اللطف فيه يارب دخيلك كلشي ولاغنى ربي اخذ من عافيتي وانطيها
علي : خاله اهدي ان شاءالله مابيها شي تلكيها جانت تعبانه وما انطت راحه لنفسها لذلك تخربطت
سيف : سمعتي الولد شيكول اهدي مابيها غير العافيه
سحر : امين يارب كون مابيها شي
علي : طلع الدكتور كمنه كلنه
سحر : هاا دكتور شلونها
الدكتور : انتو اهلها
سحر : اي
الدكتور : وين جنتو عنها تره البنيه عدها خفقان بالقلب ومن اقل موقف تتعب وخاصه اذا شي نفسي غير تديرون بالكم على نفسيتها شلون تتركوها هيج
سحر : لا دكتور لتكولها كلبها موزين
الدكتور : اي نعم ومن زمان حمدو ربكم كدرنه نسيطر على وضعها لو متاخرين اكثر جان وكف كلبها لان نبضها جدا ضعيف ووحالتها تعبانه
سحر : سوده بوجهي عليج يمه غنى كلبج تعبان يابعد كلبي شكول عليكم يالجنتو السبب ولج ختام تعاي شوفي بنيتج شصار بحالها المن عفتيها ولج لهالجلاب الي تنهش بلحمها
سيف : استغفر الله زين دكتور شلونه وضعها هسه اكو شي نكدر نسوي نسفرها بره اي شي اني حاضر
الدكتور : يا حجي بتكم متحتاج عمليه الي تحتاجه انو تلتزم بدوه لمده معينه وتبتعد كل البعد عن اي اذى نفسي انتو دوركم كأهل لازم تديرون بالكم عليها وتمنعون كلشي ياذيها عنها هنا يتحسن وضعها وترجع طبيعيه
سيف : ان شاءالله اهم شي يتحسن وضعها
سحر : بدموع دكتور نكدر نشوفها
الدكتور : حاليا لا خلوها ترتاح ومن تصحى تكدرون تشوفها يله عن اذنكم
سيف : اشكرك دكتور زحمناك
الدكتور : لا ماسويت شي شغلي هذا
_______________________
فهد : الوو يمه وينج صار ساعه ادك خو ماكو شي
ايمان : هاا يمه وياك جنت ملتهيه ويه الجوارين حالتهم حاله خطيه
فهد : خير ياجوارين ذوله
ايمان : والله يايمه كاعدين العصريات وجان نسمع صوت الاسعاف طلعنه نركض وجان نشوفلك هالمكروده غنى شايليها على السديه لا حس ولا نفس
فهد : كمت بخوف شبيها احجي يمه
ايمان : خالتها تكول على ساعه واكعه لا من ايد ولارجل حايرين شمسوين وياها ماكاعده انوب نبضاتها صارت ضعيفه تخبلو الجماعه كامو خابرو على الاسعاف بس يمه كون تشوفها تكسر باب الكلب بنيه مثل الورده توكع هالوكعه والله كلبي مردني عليها
فهد : انخفظ تنفسه وهسه شلون صارت احجي يايمه لتسكتين
ايمان : ماادري والله بعدهم بالمستشفى واخوك علي وياهم خطيه اهلها كبار بالعمر مينعافون وحدهم تنهدت الله يكومها بالسلامه متستاهل هالبنيه ... صدك تعال كلي شردت مني
فهد : هاا ماردت شي يله يمه من رخصتج عندي واجب ... سديته ورحت ركض لمكان المسوؤل دكيت الباب ودخلت .... بدون مقدمات لازم انزل وفورا
صباح : ليش
فهد : صارلتي شغله مهمه وضروري انزل وهسه هم
صباح : ميصير تنزل انتظر باجر يخلص دوامك وانزل
فهد : بعصبيه جاي اكلك عندي ظرف طارئ ومااكدر انزل باجر متفهم انت
صباح : انتقي الفاظك سياده الضابط لتنسه انت جاي تحجي ويه المسوؤل
فهد : ضربت على الميز انت مسوؤل هنا بس ولتنسه اني منو وشنو شغلي صحيح انت مسوؤل بس موعليه لو خلونه سوه ياخذوني ويطلعوك فهمت اني اجيت و كتلك بكل احترام اريد انزل اكتبلي ورقه خلي انزل مستعجل وماعندي وقت للنقاش رجاءاً فضني
صباح : بعصبيه ضابط فهد كلت نزله متنزل التزم بالقوانين لو اقدم بيك عقوبه
فهد : تريد تسجل عليه عقوبه سجل ميهمني اني رايح
صباح : قسم بالله يا فهد اذا نزلت تتمدد الخفاره خمس تيام لكل الشباب الموجودين هنا ومااخليهم ينزلون يشوفون اهلهم وخطيتهم بركبتك لان انت المسوؤل عنهم
فهد : غمضت عيوني وضغطت على ايدي .... تنهدت بهدوء خلص ماراح انزل بس سوايتك هاي اردها وهذا شاربي مو عليه واطلع ناقص من الزلم اذا ما احاسبك على هالدكه هاي عفته وطلعت .... نار تشعل بيه شبيها هسه خاف تحتاج عمليه وماعدهم فلوس يسوولها ياربي شلون سالفه هاي مسحت على وجهي ... والمشكله ما اكدر اخابر امي واطمن عليها ااااخ اكيد صاير شي مو معقوله تعبت بدون سبب الدكتور كلي بس من تتاذه نفسياً توكع بس لو اعرف يا ابن كح... غاثها وصاير هيج بيها والله لو الزمه ان.....
عمر : شبي فهد طلع يفشر
ايمن : راد ينزل وصباح الكوا... ماخلا
مهيمن : ليش هي بقت على باجر لو مخلي ينزل
عمر : علساس انت متدري هو مغثوث لان اذا نجحت هالعمليه هو وفهد يصيرون نفس المركز لتنسون صحيح فهد ترقه بس بعده مابده شغله كمسوؤل من بعد هالعمليه راح يستلم كلشي هو متشوفو مغثوث ميريده يصير مثله
مهيمن : دخلي تجي ترقيتنه وشوفو اني شسوي بي على اسلوبه الطايح حظه ويه المتطوعين عبالك يشتغلون عد ابو ولا جن همه المتفضلين علينه واجو تطوعو
ايمن : خلي يولي وين غانم عنه يشكه بالنص كومو خلي نشوف هذا شبي طنكر جنه وحده ارمله مات رجلها وانكطعت الكهرباء عليها وصفت الدنيا ضلمه بيها
الولد : ههه طيح الله حظك
مهيمن : شبيك فهد
فهد : هالابن الك... ماخلاني انزل
عمر : خير خو ماصاير وياك شي
فهد : صار عندي ظرف طارئ جبرني اطلب انزل فورا بس هذا الم.... ابن الم.... ماخلاني انزل تدرون ليش لان بي دو.... تضل تنبش بي ومتهدئ هالد... اله من ينرفزني
عمر : ياجماعه فهد مثعول هسه
الولد : مبين
ايمن : المفروض من شفنه عروك ايده ووجهه نطت نبتعد لا ناكل بوكس يسويلنه فوتوكس طبيعي
مهيمن : بوتكس يا مطي
ايمن : نفس الشي هو هذا
_______________________
غنى : فتحت عيوني على ريحه المعقمات المركزه المحاوطتني ... اباوع خاليلي كانونه وشاديلي مغذي تنفست بهدوء احاول انظم انفاسي احس جسمي كله يون عليه ... اباوع دخلت خالتي تبوس بيه
سحر : من عمري على عمرج بعد عمري شلون صرتي
غنى : بخفوت الحمدلله
سيف : خوفتينه عليج بويه غنى والله حسيت حوراء الي وكعت كلبي لزمني عليج يصير موقف تافه مثل هذا هيج يسوي بيج انتي قويه وسباعيه الي كدرت تتحمل مسوؤليه بيت وتعيش اخوها وبيبيتها بالحلال كلشي تكدر تتحمل ميصير يا بنتي حجي اليسوه والميسوه ياثر عليج هيج
غنى : لارد بس دموعي تنزل ... باوعت لخالتي بهمس خاله لتاخذيني للفحص حبابه
سحر : يمه صدك تحجين عساني اموت ولا اسوي بيج هيج سوايه شنو ما واثقه من تربيتج واخذج افحصج انتي خلفة ختام المره الصايمه المصليه محبوبه الكل وتربيه امي تربيه الايد الحنينه الطيبه الي للاسف جابت هيج شكول مسحت على راسها لتخافين حبيبتي الي بمسج بمي امسه بنار انتي بنيتي مستحيل افكر ولو تفكير انو اشك بيج اني عفتج شهرين ببيت رجال غريب واني مأمنه بيج صدك تحجين انتي
غنى : بست ايدها فدوه خاله طمنتيني الله يطمنج
سحر : ابتسمت بايسه راسها بعد كلبي ارتاحي ضلينه بالمستسفى فتره وسجللها الدكتور خروج وطلعنه الله يوفقه هالولد علي شلون وليد دره مال الله ماعافنه ولا لحظه صدك شهم مثل اخو الجبير الله يرده بالسلامه ... رجعنه للبيت دخلت غنى لغرفتها كوه صعدتها لان متكدر خليتها تنام وطلعت كعدت بالصاله خليت ايدي على راسي الله لايوفقكم عساني شفتكم بالموت اول مره اكرهه احد لهلدرجه جماله اخواني واختي بس والله حرام يتسمون اخوان على هالسفاله هاي
_________________________
صباحا
ايمان : يمه ورده غرفه اخوج نظفتيها مثل ماكتلج تره على جيه هو
ورده : نظفتها بس وين اروى حتى تصعد تتاكد كلشي عدل لان اذا فهد لكه الغرفه بيها ترابه وحده يطيح حظنه
ايمان : اروى يم غنى من الصبح راحت تشوفها هسه شويه وتجي
ورده : خلي نروح اني وياج نشوفها
ايمان : خلي ترتاح البنيه واروح اجيب هديه لسلامتها واخذج واروح اشوفها بس روحي كملي الشغل حتى تنزلين ونكعد نراجع الكيمياء علما يجي اخوج
ورده : يبووو على حظي لو ساكته احسن
ايمان : امشي لج
ساره : خاله شبيج مخبوصه
ايمان : يمه فهد ابني موسوس بالنظافه وكلش يدقق بهالسالفه اذا شاف اقل شغله تلعب روحه حتى الخاشوكه يباوعلها كبل لا ياكل فكلنه دايرين بالنه على هالسالفه لان اذا شاف شي ميعجبه يكلب البيت عزه على روس الكل فهمتي
ساره : اي فهمت بس كلش حلو هالشي يعني احلى شي الرجال يكون نظيف ومعتني بنفسه مو وصخ ومعتمد على مرته ... بهمس مثل العندي طبعا
ايمان : وره فتره سمعنه صوت الجرس كمنه كلنه اكيد اجه فهد
علي : فتحت الباب مبتسم الحمدلله على السلامه
فهد : بهدوء الله يسلمك
فيصل : هاا شلونك
فهد : هله طبيت اجه منذر حضني
منذر : الف الحمدلله على سلامتك
فهد : ابتسم بخفوت الله يسلمك ابو سالم ... رحت حضنت امي الي كامت تبجي شبيج يمه عليمن هالبجي
ايمان : بدموع كلبي ضل عدك حبيبي عشر تيام اني ماشايفتك مامتعوده عليك تختفي هالكد
فهد : هاي بعد شغل وصار ... فتحت اديه لخواتي اجن بوستهن وسلمت على نسوان اخواني
ايمان : يله يمه نصب الغده
فهد : اي بس اسبح واجي .... صعدت سبحت وبدلت ونزلت تغديت على اعصابي كمت بسرعه غسلت وصعدت فوك اني راح انام لحد يفتح عليه باب الغرفه صعدت بسرعه طبيت لغرفتي وضايت كاعد منتظرهم يرحون لغرفهم وره ساعتين طلعت لكيت البيت صنته رجعت اخذت موبايلي
____________________
غنى : متمدده بالغرفه احس روحي احسن من البارحه الحمدلله كلام خالتي طمني هواي من سمعت بيها مأيدتني وواثقه مني بعز تفكيري وصحاني صوت اشعار اجاني فتحت الرساله بسرعه من شفت اسمه
فهد : " اذا تكدرين صعدي للسطح وفورا "
***********
يتبع
- يتبع الفصل التالي اضغط على (ذنوب على قيد الغفران) اسم الرواية