رواية ذنوب على قيد الغفران الفصل الثلاثون 30 - بقلم براء
التلاتون
#ذنوب_على_قيد_الغفران
#البارت_الثلاثون
ايمن : اكلك عمر شبي فهد
عمر : اباوعله يشرب وصافن بعيد ولايمنه ... فهد بيك شي
فهد : هاا لا مابيه شي
مهيمن : اليوم السهره بشده شنو رأيكم نحجز مادام راح نلتحق بعد يومين
عمر : يمعود تره جاي نروح للموت وانت تريد تسوي منكر استغفر الله
مهيمن : علساس انت هسه كاعد بالمسجد تصلي صلاه الليل خايب كوم
ايمن : تخيلو شباب عشر تيام راح ننكطع عن هالجنه ونكابل الشرطه الي وجهم ميتسمه بي بسم الله
الولد : هههه
فهد : هذوله يحجون واني احس عيوني كامت تغوش ما اشوف شي فتحت عيوني وسديتهن ما جاي اركز نزلت الكاس وكمت
مهيمن : وين
فهد : تعبان اريد اروح
عمر : اباوعله يحجي ويعقج بوجهه شنو ثكلت بالشرب
فهد : لا لا ما ثكلت بس يمكن لان مانايم الظهر حسيت بتعب يله اني رايح
ايمن : مو علساس تبقه هنا ونحجز اليوم
فهد : لا مالي مزاج
مهيمن : مبين عليك متخربط امشي اني اوديك
فهد : مابيه شي اكدر اسوق يله مع السلامه
الولد : الله وياك
فهد : طلعت حركت سيارتي ومشيت اريد بس اوصل للبيت احس الدنيا تفتر بيه ضليت اسوق مسافه تالي وكفت ما اكدر اكمل كلشي ما اشوف واخاف اسوي حادث وااذي احد اباوع بعد شارعين واصير بالعماره اني شجابني لهنا احتركت عشيرتج غنى ... ضغطت على نفسي وحركت السياره بس خلي اوصل للعماره .... وصلت وكفت السياره ونزلت كوه امشي صعدت بالمصعد ماعولت اوصل طلعت المفاتيح وفتحت الشقه دخلت صارت بوجهي مااشوفها بوضوح عيوني مدري شبيهن اجتي تروح لزمت ايدها بسرعه ... لحظه
غنى : درت وجهي عليه ضلينه واكفين والهدوء سيد المكان شويه ومااحس غير فهد يذب روحه عليه .... لزمته بسررعه فهد شبيك
فهد : مااشوف كدامي احس فقدت السيطره على جسمي
غنى : حاوطت خصره فهد تسمعني يمعود بس فهمني بيك شي
فهد : بخمول دايخ دايخ
غنى : رجعت لوره واني حاضنته يربي ثكله كوه مسيطره عليه احس ظهري انكسر من ورى وصلت للقنفه مددته وكمت اباوعله شبه فاقد .... فهد انت سكران
فهد : هزيت راسي نافي بدون كلام
غنى : مديت ايدي على وجهه حرارته مرتفعه بس مو هواي اباوع لخشمه طك دم ... هاي ليش هيج ضغطه كل ساعه يرتفع هيج كمت خليت قطع ثلج بمي وجبت خاولي واجيت خليتهن على الطبله ... اجيت نزعته حذائه وجواريبه رحت جبت كرسي واجيت كعدت فتحت اول دكمتين من قميصه حتى يتنفس مسحت الدم من خشمه الزم الكطنه لزمها وكعدت اسويله كمادات
فهد : انكمش جسمه من بروده الماي
غنى : فهد انت لازم تراجع دكتور موزين هيج ضغطك كل شويه مرتفع
فهد : ليش هو منو الي يرفع ضغطي غيرج وغير سوالفج
غنى : اني ؟
فهد : بدون وعي اي انتي تعبتيني غنى تعبتيني صار اسبوعين لا ليلي ليل ولا نهاري نهار من وراج كمت اكل بروحي بعد اخر موقف صار بيناتنه صدكيني من كد ماجنت عصبي مااعرف شلون عاملتج بهالطريقه السخيفه هاي
غنى : لزمت ايده اشش خلص سد الموضوع الوقت مو مناسب حتى نتناقش ... ضليت اسويله كمادات ودموعي تنزل من اسمعه يون احس كلبي يوجعني واني اشوفه بهالحاله ... وره نص ساعه وخرت الخاولي وتلمست كصته نزلت حرارته بس خشمه مازال ينزف .... فهد نروح للمستشفى
فهد : همم لالا
غنى : كوم حباب ليروح يرتفع ضغطك اكثر وتتخربط بالزايد
فهد : كوه يحجي .... كومي سويلي ليمون وجيبي حبايه ضغط وتعاي هسه ينزل ضغطي
غنى : هزيت راسي بسرعه كمت ركض سويت الي كلي عليه واجيت شربته الليمون على كيفي وانطيته حبايه ضليت كاعده يم راسه اخاف يحتاج شي من شفته شبه نام اجيت اكوم اشيل الهوسه الي صارت بسرعه لزم ايدي
فهد : بهدوء وين
غنى : اودي ذني للمطبخ
فهد : يهذي .. غنى نامي يمي
غنى : هاا !!؟
فهد : بتعب نامي يمي حبابه
غنى : ضليت صافنه بوجهه لا اكدر اكول اي ولا اكدر اكول لا كعدت يم راسه اباوع القنفه متوسطه وهو ماشاءالله ماخذها كلها
فهد : فتح ايده تعاي
غنى : غطيته ... متكفي القنفه انت نام معليك بيه
فهد : لا تكفي جريتها بتعب نيمتها على صدري وحاوطتها بأيدي
غنى : من صار راسي على صدره حسيت بفراشات و تركص بمعدتي وكلبي كام يدك بسرعه احسه حيطلع من مكانه
فهد : حركت ايدي على شعرها ... شتاقيتلج تدرين
غنى : بفهاوه هااا
فهد : حضنتها بقوه واستنشقت عطرها شتاقيتلج هواي وخفت التحق واموت هناك واني ماشايف...
غنى : خليت ايدي على حلكه اسم الله لتحجي هيج فهد اني من غير شي ميته خوف عليك
فهد : تنهدت وحضنتها اقرب ... جسمج دافي
غنى : مااعرف شلون تجرئت ارفع ايدي واحاوط خصره اخذت نفس من عطره وغمضت عيوني من عطره تغلل لرئاتي ساعتها حسيت جسمي كله سكن .... بيومها خضعت لكلبي وعقلي غلقت عليه الباب ومابقه مسيطر عليه غير كلبي وللاسف بهالليله عرفت نفسي ما اكدر اعيش بدون فهد ابدا
________________________
علي : كاعد اتابع فلم ودخلت امي ... كمت خير يمه
ايمان : ولك يمه راح يأذن الفجر واخوك اخابره ميرد راح اتخبل
علي : على كيفج يمه يجوز بايت عد واحد من جماعته او لسه سهران عدهم وبعدين هو مو اول مره يبات بره فعليش هالخوف
ايمان : يمه اخوك من يبات بره يخابرني واذا ما كدر على الاقل يدزلي رساله مو يغلس
علي : يجوز نسه يا يمه هسه عليمن خابصه روحج شنو فهد طفل عمره سنتين تره رجال ابنج
ايمان : يمه انت ليش هيج لا اُبالي ولا كأن الي احجي عليه اخوك شبيك انت
علي : يمه تره هذا فهد وانتي كلش زين تعرفين شنو فهد بالنسبه الي فليش تحجين هيج اني مو ماخايف عليه بس ادري بي وينه لو يم جماعته سهران لو بايت عدهم فماخايف واني هسه اخابره اذا رد اجي اكلج روحي نامي يمه روحي حبيبتي راح يأذن وانتي بعدج لسه مانمتي
ايمان : هزيت راسي يله تصبح على خير
علي : بستها وانتي بخير حبيبتي
______________________
صباحا
فهد : فتحت عيوني واحس اكو ثكل على صدري اباوع غنى نايمه بحضني ابتسمت خرب يومها شهالبرائه هاي ... ضليت اباوع لوجها ما اتذكر الي صار البارحه بالتفصيل بس الي مفرحني انو انتهت الليله بنوم غنى بحضني وخرت شعرها عن وجها
مشيت اصبع السبابه على خدودها عفيه وجهه لو حرير ذره شائبه مابي يعني هاي هم عدها مسام مثلنه اباوعلها حركت راسها بانزعاج ضليت اضوجها حتى تكعد شويه وفتحت عيونها
غنى : تثاوبت بنعاس صباح الخير
فهد : بهدوء صباح النور
غنى : رفعت ايدي متلمسه كصته ... شلون صرت
فهد : احسن
غنى : باوعت للوضع المشبوه الي احنه بي كمت بسرعه شلون الي مسويله عمله ... احم بيش الساعه هسه
فهد : اعتقد بالدعش
غنى : عززه راح عليه الدوام لزمت راسي اليوم عندي محاضره مهمه وراحت عليه شلون سالفه هاي ... زين اني موقته الموبايل ليش مدك
فهد : الواضح حضني عجبج حتى هيج ارتاحيتي عليه
غنى : باوعتله صفح وتحركت بدون ما اجاوبه عباله اذا ساعدته البارحه يعني سامحته
فهد : كمت وراها دخلت للغرفه دكيت الباب ودخلت لكيتها واكفه تنشف وجها ... تقدمت لزمت ايدها ودرتها عليه ... غنى لازم نحجي
غنى : ما اريد احجي بشي اخاف اكول حجايه وتفهمها غلط
فهد : اسف
غنى : ميفيد الاعتذار انت تجاوزت عليه بطريقه اقل مايقال عنها مقززه اني جنت معتبرتك فدشي جبير بحياتي وصديقي المقرب تكوم تسوي ويايه هيج سوايه بعملتك حسستني انو اني بت شارع وانو انت مو كفو اامن بيك اذا انت الي تعرفني وتعرف شلون افكر سويت هيج لعد الناس الي متعرفني شلون حتفسر كلامي
فهد : بهدوء غنى اني رايح بعد يومين التحق ومااعرف شيصير هناك يجوز اعيش ويجوز استشهد هناك
غنى : ضغطت على ايدي ... باوعتله ميصير بيك شي
فهد : الاقدار بأيد ربج منعرف شيصير هناك مع انو اني حالف ما اموت قبل لا اخليهم يعضون اصابعهم ندم على كلشي سوو بالبلد بس اذا ربج شاء انو استشهد هاي بعد لا اني ولا انتي بأيدنه
غنى : بعصبيه لتحجي هيج ان شاءالله تروح وترجع بالسلامه كافي تفاول على روحك فتهمت
فهد : ابتسمت ... اذا انتي هيج خايفه عليه ليش متسامحيني وتخليني اروح واني مرتاح
غنى : همست فهد انت متنحزر ساعات تمشي ويايه مثل الورد وساعات لا تأذيني وتكرهني بيك بس فهمني انت شنو ارسيلك على بر تره شخصيتك معقده الى درجه تخيلني احسك منفصم
فهد : مسحت على شعرها غنى اني عشت هواي فترات صعبه بحياتي والظروف جبرتني اكون هيج عبالج اني ما اتمنى اكون سبورتي واضحك واتشاقه واعيش حياتي مثلي مثل اي رجال بس الظروف المريت بيها والمسوؤليه اضافه لطبيعه شغلي كل هذا صنع مني شخصيه جديه وصعبه ما اريد امدح بنفسي بس صدكيني لو الي عشته عايشه واحد غيري جان انتحر من زمان ..... فلتحكمين عليه وانتي ماشايفه الجانب المظلم من حياتي
غنى : باوعتله شنو قصتك يافهد انت وراك سالفه جبيره
فهد : لزمت وجها يجي يوم واحجيلج بس مو هسه لان ما مستعد افتح جروحي بعد ماضمدتها وهسه اريدج تكليلي طاح الزعل لو بعده
غنى : برطمت لا بعدني زعلانه
فهد : تقربت عليها وشلون تحبين اراضيج
غنى : انخفظ تنفسها ... عندي شروط اذا تنفذها يطيح الزعل
فهد : صارت بيها شروط هم مو شرط احجي بله خلي نسمع
غنى : اول شي اريدك تروح للدكتور تجيك ضغطتك ووضعك الصحي
فهد : حاضر وبعد
غنى : وثاني شي اريدك تبطل عصبيه وفشار لان عيب وانت مو همجي حتى تكون هيج طريقتك بالحجي
فهد : ضيقت عيوني احاول بس ما اوعدج وبعد
غنى : ابتسمت اريدك تصلي اباوعله كلب عيونه ... فهد انت مكلف من 15 سنه ومطلوب خمس فروض على كد ١٥ سنه يعني عقوبتك جبيره كولش ويرادلك سنين حتى تقضيهن فأذا تريدني صدوك ماازعل منك تكوم تصلي وتبدي تترك المعاصي الي تسويها والعافيه بالتدريج
فهد : لو مبقيج زعلانه احسن
غنى : هاا هيج صار الحجي
فهد : اي وهسه خلصت شروطج
غنى : هزيت راسي وهسه كلي موافق لو لا
فهد : نص موافق
غنى : صحت فهدد
فهد : ابتسمت خلص موافق
غنى : عفيه
فهد : اريد اسألج سؤال
غنى : اسأل
فهد : دنكت خال خشمي بركبتها ليش ريحتج مثل ريحه الاطفال
غنى : كزبر جسمي شلون يعني
فهد : شايفه الطفل الي بالكماط شلون تصير ريحه جسمه
غنى : اي
فهد : اي ريحتج تشبه ريحه الطفل الي بالكماط
غنى : حكيت ركبتي ... اكول تتريك
فهد : لا روحي بدلي خلي نطلع نتغده بره الدنيا صارت ظهر هسه و مادام اني عندي استراحه هاليومين وانتي راح عليج الدوام فخلي نطلع احسن
غنى : باستغراب نتغده اني وياك وبره هم ؟
فهد : اي شكو بيها
غنى : واذا شافنه احد
فهد : طز
غنى : شنو طز داكلك خاف يشوفونه
فهد : طز واذا شافونه اني ما اهتم لاحد تره ... وقبل من جنت ما اطلع واطب وياج حتى ما اجيب الحجايه الج مو لان خايف والا الناس متهز شعره مني ... يله روحي بدلي علما اسبح وابدل اني هم
غنى : بهدوء ماشي ....رحت بدلت لبست جبه سوده كلعاده وياها شال اسود واخذت جنطه بيجيه لبست حذائي وطلعت لكيت فهد ديعدل بقميصه ... انت مو جنت لابس قميص ابيض شو هذا نيلي
فهد : اي بدلته مااعرف ارجع على نفس الملابس تلعب روحي اخذت السويج يله تعاي اخذت ايدها وطلعنه صارت كدامنه ود خرب وكتج هسه
ود : السلام عليكم سيد فهد شلونك
فهد : الحمدلله
ود : شلونج حبيبتي غنى شخبارج
غنى : بهدوء الحمدلله
ود : وينك سيد فهد مدنشوفك هالايام
فهد : والله مشاغل ... يله حبيبتي تعاي ... من رخصتج وسلميلنه على زوجج جريت غنى الي صارت جنها ثوله .... شبيج
غنى : حبيبتي شنو
فهد : امشي لتجفصين قابل ترديني اصيحلج جاسم كدامها اكيد لازم اعاملج معامله خاصه حتى متشك هو اني ما مقتنع شلون صدك رجلها وهي انتي خطيبتي مع انو السالفه مبينه جذب وين اكو واحد يكعد مرته بعماره وهو عنده بيت
غنى : كل لروحك بالاول
فهد : عفوا ؟
غنى : هيج ماكو شي
فهد : فتحت السياره يله صعدي
غنى : وين حنروح هسه
فهد : حركت السياره اكو مطعم بعيد بس اكله كلش طيب دائما اروحله لان الاكل الي ابالي الكاا هناك فحبيت اخذج اله هم تغيير جو وهم حتى متتقيدين وتضلين تاكلين بروحج لتشوفين احد هناك
غنى : والناس متروح لهالمطعم يعني
فهد : لا تروح بس قله لان بعيد مو كل الناس تحب تروح كل هالمسافه على حساب مطعم
غنى : هزيت راسي صحيح .... اباوع للشارع اكول فهد صدوك باجر راح اجي لبيت جدك على حساب الحجيه والبنات يشوفن القياسات ثابته لو لا هاي اني بلغتك حتى متكول طلعتي بدون علمي
فهد : منو يجيبج باجر
غنى : منو يجيبني يعني ... اخذ تكسي مثل كل مره
فهد : رفعت حاجبي ماشاءالله صايره تصعدين تكاسي انتي وبعدين شلها داعي سوالف الخياط هاي
غنى : لا الها داعي ميصير انت تضل تصرف عليه
فهد : ما شاكيلج اني عود من اشكيلج روحي اشتغلي وحسبي حسابج بس هالمره راح تخيطين المره الجايه ممنوع
غنى : شنو هاي فهد ا...
فهد : قاطعتها اعتقد انته النقاش يله سدي الموضوع وخلينه مرتاحين ما اريد يضيك خلكي
غنى : سكتت ودرت وجهي اباوع على الطريق
فهد : تحبين اعلك التبريد
غنى : لا شكرا الجو حلو .... وره فتره وصلنه اباوع للمطعم رغم بعيد بس حلو من بره ومبين غالي
فهد : صفيت السياره بالكراج ... نزلت يله تعاي
غنى : دخلنه والنادلين كلهم سلمو على فهد الواضح يعرفو ... كعدنه على طاوله شويه معزوله
فهد : كعدت ... عاجبتج الكعده لو نغيرها
غنى : ابتسمت لا حلو
فهد : اخذت المنيو يله شوفي شنو تحبين تاكلين
غنى : شتطلب اطلبلي اني كولشي اكل
فهد : دشوفي يجوز اكو شي يعجبج
غنى : لا وياك شتطلب اطلبلي
فهد : طلبت مشاوي وطلبتلها وياي .... تحبين وره الغده وين نروح
غنى : ابتسمت شعندك اليوم
فهد : موزين اريد اونسج
غنى : دتفاجئني بصراحه مداعرفك
فهد : اخذيها طبيعه اني دائما اذا مزاجي عدل اصير هيج
غنى : خليت ايدي على خدي .... عندك هواي اطباع وطبع مناقض لطبع شلون ما ادري
فهد : هاي بعد الله خالقني هيج شسوي
غنى : هزيت راسي .... جابو الاكل وكعدنه ناكل
فهد : اكلي لتضلين صافنه تره اليستحي يضل جوعان اكلي لتخجلين
غنى : اي داكل .....احم اكول فهد ممكن اسألك سؤال بس لتفهمني غلط
فهد : تفضلي اسمعج
غنى : انت هم حبيت بحياتك
فهد : باوعتلها ونتهدت هاز راسي
غنى : صدوك
فهد : اي
غنى : احجيلي عنها طبعا هاي اذا معندك مانع
فهد : تنهدت بصوت عالي ... من دخلت كليه الشرطه اصدقائي الي بالاعداديه راحو غير كليات فكمت بين فتره وفتره اروح اشوفهم وبيوم رحت اشوف صديقي ولن تطلع وحده من القسم مالتهم لابسه ابيض خلتني صافن عليها جانت جميله جدا وشخصيتها اجمل بعد ضليت واكف اباوعلها شلون تحجي وشلون تتصرف حرفياً فصلت عن العالم وماركزت على شي غيرها عبالك بس هي موجوده بالدنيا وره فتره كمت اتردد للكليه بس حتى اشوفها حسيت نفسي حبيتها تجرأت ورحت صارحتها بدون مقدمات بالبدايه رفضت بس بعدين وافقت بقينه على علاقه لمده اربع سنوات وطبعا جنت كلما اريد اتقدملها ترفض وتأجل
غنى : اي وبعدين
فهد : بعدين حسيتها كامت تتغير اسلوبها بارد ويايه صار اذا مو اني اخابر هي متبادر حجيت وياها بس جانت تتهرب من الموضوع لمن مره من المرات حصرتها بزاويه وكتلها اريد اتقدملج بعد ما اصبر وطبعا صدمتني بيومها من كالت ابن عمها ناهي عليها وهي خافت تكلي وتصير مشاكل حاولت احل الموضوع واتواصل ويه ابن عمها وانهي السالفه حتى اتزوجها بس هي ماقبلت لان تخاف من اهلها كتلها صبري وتحملي وياي احاول بدال المره الف حتى ننجمع هي هم وافقت اجاني تدريب للاردن وانجبرت اسافر لمده اربع اشهر والصدمه من رجعت سمعت بيها تزوجت ابن عمها ما اجذب عليج واكلج ما انقهرت بس وره فتره كدرت اتخطاها ومن يومها ماحبيت بعد
غنى : خطيه هاي شوكت الحجي
فهد : جنت طالب مرحله اولى من حبيتها ولحد ماتخرجت بقيت وياها طبعا اني وياها نفس العمر
غنى : زين انت لسه تحبها ؟
فهد : ابد ولا ابالي اصلا هسه ياله تذكرتها مره تزوجت وراحت لحال سبيلها الله وياها
غنى : شربت مي زين محقدت عليها
فهد : لا لان الي صار مو بأيدنه احنه مجتمع تحكمه التقاليد مو القانون للاسف ومادام نهه عليها ابن عمها خلص بعد صارت اله لا اني اكدر اغير شي ولاغيري وعلى فكره الي مريت بي مو حب وانما وهم لان لو احبها صدك جان كلبت الدنيا عاليها واطيها حتى اخذها بس ما صار هيج .... ليش تباوعيلي هيج شوفي اني صريح لابعد درجه ولهالسبب الاغلبيه يكرهوني لان ما اعرف اجامل واجذب كل واحد انطي طينته بخده ... شلت كباب خليته كدامها يله اكلي صار ساعه بس تحجين برد الاكل
غنى : ابتسمت وكمت اكل
_________________
الهام : كاعده ويه خواتي وجهالنه نتغده بالمطعم فزيت على صوت اختي
: بعد كلبي شلون يخلي الاكل كدامها
: دعوفي الاكل باوعيله شلون شخصيه وشلون رزانه عفيه هنيال مرته
الهام : هاي عليمن تحجن
: باوعي للطاوله الي بالاخير وشوفي كميه الاثاره الكاعده هناك
الهام : شلت راسي باوعت على مكان نظر خواتي وانصدمت عززه هذا فهد بس منو هاي الي وياا مغقوله تزوج متعه بهالسرعه ....طلعت موبايلي بسرعه خابرت فرح ردت عليه بصوت تعبان كالعاده
فرح : هاا الهام شتردين
الهام : ولج فرح اني بالمطعم وفهد كاعد كدامي هو ووحده
فرح : كمت شنووو ويامن كاعد
الهام : ماادري والله انصدمت من شفته
فرح : صوريلي ياا وبسرررعه منتظرتج
الهام : خاف ينتبه عليه ولج
فرح : مو مشكلتي هاي مشكلته هسه تصوري الي هو والحيوانه الي كاعده وياا يله بسرعه
الهام : خلص اهدي هسه ادزلج صوره .... سديته منها
: منو هاي وشبيها تصيح
الهام : هيج صديقتي اكول عفيه انتن مو كملتن اكل كومن غسلن للجهال
: اي هسه
الهام : راحن خواتي وشلت موبايلي طكتلهم اكثر من صوره بسرعه ودزيتها لفرح ماكو دقايق وخابرتني
فرح : لج انتي خبله هاي اخته
الهام : اخته !!؟ ... والله انتي الي خبله وين اكو واحد يطلع بس هو واخته لا ووحدهم يطلعون ولج خاف هذا يضحك عليج
فرح : لاشنو يضحك عليه
الهام : بشرفج اخذيها بالعقل فهد وهالبنيه بيناتهم شبه ولو واحد بالميه اكيد لا لعد شلون اخوان واكو تناقض شاسع باشكالهم
فرح : تذكرت كلامها بالسوك وشلون انصدمت كتلها انتي اخت فهد معقوله مو اخته هاي .... زين اكلج اني كتلها اني اعرف فهد يعني لو عدها شي وياا اكيد جان اخذت موقف منه مو تطلع تضحك هي وياا
الهام : والله ماادري بعد بس انتي حاولي تتقربيله تره لو ما يدري بوضعج ميخليج كاعده ببيته لحد ما تلكين بيت فحاولي تسحبي ولو على الموقف الي شفته ما اعتقد يباوع بوجهج بعد لان اكو من شاغله باله
فرح : انجبي حقيره حسابج من نلتقي مو هسه سديته منها وطلعت الصوره ودموعي تنزل اباوعله شلون حلكه مشروك ويضحك عمري ماشفته هيج يضحك كلبت الصوره الثانيه اشوفه شايل اكل يخلي كدامها وهي مبين عليها الفرح ... عمره فهد ماسوه وياي هيج دومه كالب وجهه واذا مزاجه عالي يبتسم مو يضحك حتى من جنت اتمرض ماجان يهتم ... يربي معقوله هاي مو اخته ياخوفي تطلع حبيبته والله العظيم اطلعها من جوه الكاع واطلع بروحها لو طلع هالشي صح ... بسيطه يا ساقطه اني اعلمج دخلي اتأكد وساعتها اذا طلعت مو اخته والله لخليها تصيح الويل وين ترحين الكفج الكفج
____________________________
غنى : وكفت السياره كدام العماره .... ابتسمت شكرا على هالطلعه الحلوه عاشت ايدك مقصرت
فهد : ابتسمت تدللين
غنى : بعد يومين تلتحق
فهد : ان شاءالله
غنى : اخاف باجر من اجي ما الكاك حباب ما اوصيك ديربالك على روحك وخابرني من تصيرلك فرصه وطمني عنك مو تعوفني قلقه حباب
فهد : صار
غنى : يله باي
فهد : باي خاليه ؟
غنى : لعد ؟
فهد : تقدمت حضنتها هيج الواحد يودع
غنى : بادلته واخذت نفس من عطره ابتعد باسني براسي ....نزلت مع السلامه
فهد : الله وياج يله روحي ومن توصلين للشقه رمشيلي حتى اروح
غنى : اوك .... رحت بسرعه صعدت للشقه رمشتله وهو راح .... بيومها من السعاده جبت اليوم كله بس مبتسمه جني هبله
___________________
اروى : شبيج يمه
ايمان : اخوج راح
يخبلني خابرني الساعه بالدعش كال معزوم ادري ميكول عندي امي تريد تشوفني الها حق عليه ادري شبي هالولد والله راح يخبلني
ورده : ادري يمه تردين فهد يكابلنه ويكعد تره هو رجال ومكانه مو بالبيت همست واضافه حتى لو يريد يكعد قابل يكابل سعود وسعاليها
ايمان : همست سعاليها شنو ولج
ورده : اقصد جناينها هههه ... هسه عوفج منهن لتضلين تضغطين على فهد تره مااقبل تنزعين مزاج اخويه حبيبي الي يمطر علينه فلوس اقصد حنان وعطف
علي : ضربتها ولج انتي عليمن طالعه تموتين على الفلوس
ورده : عليك شلون انت ابو فليس والربع كوه يطلع منك مو مثل فهودي يمشي وينطيني حمرات
ساره : طلعت من المطبخ شنو قصدج حمرات
ورده : خمسه وعشرينات حتى هاي متعرفيها ولازم واحد يوضحلج بيها
علي : خزرتها تأدبي
سعاد : لعد فهد اذا هالكد ينطيج فلوس ميذكر اخته المكروده المشموره بكربلاء لا يخابر ولا يسأل عليها اذكرها بلبسه بأكله بمبلغ بسيط
ورده : ليلى مزوجه اني مامزوجه
آلاء : هاا ولج ترديلج رجل
ورده : خليت الرجوله الج ولساره اني ما اريد مكتفيه بألي عندي وراضيه
فيصل : جريت اذنها شنو قصدج ولج
ورده : بخوف شبيك والله اشاقه ماقصدي شي
علي : جريت شعرها ... لعد شنو مكتفيه احجي لج شعندج
ورده : ااخ لزمت ايده والله العظيم مو قصدي شي جنت اتلاطف والله
فيصل : دوخر تعاي ولج منين متعلمه هالسوالف شنو مكتفيه بالي عندج
ورده : اااخ اذني ... بجيت شبيك فيصل والله ماعندي شي عفيه اذاني راح تنشلع عوفني
ايمان : ولكم تخبلتوو صحت وخروووو عنها يله ... اباوع لورده كامت تبجي لان كلهم تجمعو عليها طاحظ كبرتكم اي والله ولكم شوكت تعقلون شو واحدكم انكس من الثاني
اروى : والله عيب عليكم الواحد يكفر يحجيله حجايه بهالبيت عسى ينهجم هالبيت الاكشر حتى نخلص منكم
فيصل : انتي اكلي تبن ولتضلين تطمطمين محد هيلكها غيرج
منذر : انتو صدك تحجون عمي طفله وتشاقت شبيكم تخبلتو عليها شنو كفرت خوما كفرت ... اباوع لفهد طب مبين مرتاح بس شافنه عقج حواجبه
فهد : خير شكو شبيكم
ورده : ركضت حضنته وبجيت فهد فيصل ضربني وعلي هم جرني من شعري
فهد : لتبجين شو باوعيلي ليش ضربوج
ورده : حجيتله الي صار .... والله فهد مو قصدي شي بس جنت اتشاقه ويه آلاء
فهد : مسحت دموعها روحي لغرفتج حبيبتي .... يله عفيه بالحبابه ... صعدت ورده لفوك باوعتلهم ولكم انتو ماعدكم عقل طفله وتشاقت كدامكم ترحون تحورون كلامها وتضربوها بدال ما تغلسون اغبياء انتو بتصرفكم هذا راح تفتحون عيونها على اشياء هي جاهله بيها الى متى ابقه اعلم بيكم الى متى تبقون حمير بله فيصل هو اصلا فاصل من الرئيسي اله انت يالدكتور مو انت المثقف والدارس والواعي تتصرف بهالهمجيه لعد شخليت لابن الشوارع
علي : يمعود طفله هاطولها تحجي بالزلم تريد واحد يسكتلها
فهد : وانت علساس معصوم متحجي بالنسوان ومن تسمع سيرتهن تتغطى بلحاف من الخجل شوف ولك خاف عبالك كبرت وصرت دكتور تره انت بالنسبه الي زعطوط الزمك ازوعك العافيه هسه فتهمت ... كتلكم تعاملو بوعي هذني بنات يرادلهن معامله خاصه تعليم وتفهيم مو بالضرب الضرب مامنه نتيجه بالعكس يخلي الواحد يتمرد بالزايد .... فهاي اول واخر مره احجيها ورده ستوها بدت تكبر وحاليا هي بفتره مراهقه وهالعمر حساس ويرادله معامله خاصه لتدمروها وتخلوها تتمرد من هسه بسبب اسلوبكم فتهمتو هالمره راح امشيها بمزاجي المره الثانيه تره الي غير تصرف وياكم وانتي ام فيصل شنو حلتلج الكعده يله تفضلي لغرفتج انتي ممنوعه من التجول اثناء وجودي يييله .... عفتهم وصعدت ينعل ابو شكلكم حتى مزاجي خربتو
بتول : اكول خاله فهد مو جان لابس قميص ابيض
سعاد : ماشفته من طلع
بتول : همست آلاء فهد البارحه شجان لابس
آلاء : اعتقد قميص ابيض ليش تسألين
بتول : هيج ... باوعت لخالتي الي بادلتني نفس نظرات الحيره والتعجب
____________________
نسرين : هاك الدوه يمه
مرتضى : اخذته ... عاشت ايدج
نسرين : يعل بأيدك الكسر يافهيدان شمسوي بوليدي ولك يمه شلون تخلي يضربك الزمه اطيح حظه وانعل ساسه
مرتضى : يمه فهد ضخم ولتنسين جان داخل معهد مال ملاكمه وضل سنه يتدرب هاي من غير التدريب الي بشغله وين اكدرله لخاطر ربج
نسرين : طبعا متكدرله اذا هو جنه غول ... بس عبالك امشيها اله اني اعلمه دباره عندي
مرتضى : يمه كعدي وسكتي مالي خلك المشاكل خلي اصير زين واني اعرف شسوي بي
نسرين : غميت روحي اهمده حظي اني جايبه بنات ثنين مو ولد وبنيه ولك اني لو منك اطلع بروحه انت شلون رجال وتقبل واحد يضربك
مرتضى : دخلي اصير زين والله ضامله ضمه بس خلي اطيب
نسرين : هزيت ايدي وطلعت
________________________
صباحا
غنى : وصلت للكليه رحت للحديقه ما لكيتهن وينهن ذني درت وجهي لكيتهن كاعدات على صفحه رحت يمهن لكيتهن كالبات وجوهن ... صباح الخير
البنات : بضجر صباح النور
غنى : خليت جنطتي وكعدت خير شبيجن كالبات الوجوه
اروى : البارحه صارت مشكله بالبيت
نرجس : جعفر راح يخطب
غنى : اول شي احنه تعودنه مشاكلكم متخلص وثاني شي ست نرجس النفروض تفرحين بان اخوج حيتزوج ليش كالبه وجهج
نرجس : جعفر ما فرحان وامي غصبته على البنيه وهاي صار فتره احنه داخلين انذار بسبب هالشي تالي جعفر خضع للامر الواقع ووافق بس احسه ما فرحان ... وكله بسببج
غنى : فتحت عيوني اني !!؟ لج اني شعليه
نرجس : جعفر جان رايدج بس انتي تتعززين
غنى : شنو اتعزز نرجس هاي عود انتي صديقتي تحجين هيج
اروى : ماعليج بيها متعرفيها من تطنكر تضل تجفص
نرجس : اسفه نونه بس والله مقهوره على جعفر وعلى البنيه اكثر شايفه البارحه من رحنه شفناها ولجن مو بنيه ورده العيون خضر والوجهه يجنن وفد حبابه ولطيفه والله حرامات هاي تاخذ جعفر ابو طنكوره
اروى : ههه هسه اصفيلج على رأي معقوله عليه لو على البنيه
نرجس : مقهوره عليهم ثنينهم صعبه واحد يحب شي تالي ميحصله هالشعور صعب تخيلي انتي تحبين واحد وبالمقابل هو ميحبج ويعتبرج اخت لا اكثر والله شعور صعب
غنى : مدري ليش اجه على بالي فهد
اروى : وانتي من شوكت تتفلسفين
نرجس : مو اتفلسف بس داشرح وضع جعفر هو يحب غنى ومن زمان او نكدر نكول مو يحبها بس يشوفها مناسبه اله من كل النواحي لان همه نفس الطبيعه المهم جعفر يكن مشاعر لغنى وبالمقابل غنى تعتبره مثل اخوها ومن تقدملها رفضت بأدب
غنى : اني مجان قصدي انو افشله او ااذي بس الحقيقه لازم تنكال شلون ترديني اوافق عليه واني معتبرته اخويه اكو وحده تزوج واحد معتبرته اخوها
اروى : هسه عوفجن من هالحجي جعفر شافها
نرجس : اي شافها وعجبته يكول هاي شلون قبلت بيه وهي جماره
اروى : شكو بعد مادام اخوج عجبته بطلي تتفستقين
غنى : هههه تتفستقين شنو
اروى : والله ماادري حجايه سمعتها من ورده
غنى : ضلينه كاعدين وبعدها كمنه وطبعا حديث اليوم هو خطوبه الاستاذ جعفر وشراح يصير بيها ... خلص الدوام وطلعنه وكالعاده رحت للبيت ومر اليوم صار العصر بدلت ورحت لبيت الحجيه انطيتها الدشاديش تشكرت مني وانطتني الفلوس وطلعت رحت لبيت فهد شفت سيارته بره ابتسمت يعني موجود دكيت الجرس ... انفتحت الباب طلعت انغام
انغام : اهلا حبيبتي بوستها شلونج
غنى : الحمدلله وانتي
انغام : تمام تعاي تفضلي البنات منتظراتج
غنى : دخلت جوه لكيت البنات كاعدات اجتي ورده تركض شبكتني
ورده : نونه شلونج
غنى : حضنتها حبيبتي الحمدلله انتي شلونج ماشفتج بأخر مره اجيت بيها
ورده : جان عندي امتحان ثاني يوم وفهد ماخلاني اجي بقاني بالبيت
غنى : كعدت وهي كعدت يمي اجتي اروى هم بوستني وكعدت يمي ولا كأن جنه الصبح سوه
ملك : كملتي كل الملابس
غنى : اي كملتهن بس بقه تشوفنهن وتقيسنهن
عبير : بهالسرعه كملتيهن
غنى : الحمدلله اي
سعاد : عندي جم قماشه اريدج تخيطيهن
غنى : تذكرت حجي فهد ... اني اسفه اني خطيت بس هالوجبه بعد ما اخيط لان عندي دراسه وما الحك
سعاد : تره بفلوس مو بلاش
غنى : مو على الفلوس والله بس معندي مجال اخيط
سعاد : ديله عاد علساس هو شلونه خياطج
ايمان : لا اله الا الله اللهم طولج ياروح
غنى : فتحت الجنطه تفضلن كلمن اخذت فستانها
شهد : الله والله حلو
مروه : لابأس بس القماش مو شي
غنى : على فكره تره القماش انتي جبتي واني بس فصلت
ورده : طنن
مروه : تره كله على بعضه مو كلش عجبني خياطج متراجع لو اعرف جان خيطت عد غير وحده
غنى : اذا تحبين لتاخذي خلي ارجعه مو مشكله
اروى : اني اخذه لان كلش عجبني
مروه : ما كلت مااريده بعد خيطته مجبوره اخذه
غنى : كامن البنات يشوفن الملابس واني اباوعلهن شفت طفل طلع من المطبخ اوي فدوه شهالجمال اجه يمي اباوعله ااشر لخاله ايمان
سالم : منو
ايمان : حبيبي صديقه عمه اروى
غنى : اوي كزكزت عليه لوحتله هلوو
سالم : بضحكه هلوو
غنى : شلته كعدته بحضني بسته شلونك
سالم : سين
غنى : ضحكت حجيه مكسر بس يخبل اروى ابن منو هذا
انغام : هذا ابني سالم
غنى : الله يحفظه ويكومج اله بالسلامه
انغام : بعد عمري تسلمين على هالدعوه شوكت اجيب واخلص
سعاد : طبيتي بشهرج مابقه شي
فهد : نزلت من فوك لكيت نسوان العشيره كلها كاعده عبالك عدنه حمام نسوان شفت غنى كاعده بيناتهن هنه شحالهن ووجهن مخربطه من المكياج وهي تضوي بيناتهن .... السلام عليكم
الكل : وعليكم السلام
غنى : رفعت راسي باوعتله جان لابس بنطرون وتشيرت اسود ساده حاضن عضلاته شفته ابتسملي وطلع دنكت راسي مبتسمه باوعت لاروى الي تحاجيني درت وجهي شفت مروه تخزر بيه معقوله انتبهت .... كملت كولشي سلمت وكمت اخذت تكاليف الفساتين و طلعت ... اجتني رساله من فهد " اذا كملتي طلعي يم الفرع الثاني واكفلج هناك " ... ابتسمت ومشيت للفرع لكيته واكف اشري اجيت بسرعه صعدت وهو حرك
: والله وطلعت تلعب على السكيتي يافهد غنى هاا بس خوش صيده ضحكت ... اني اعلمك ماكو شي ينضم القدر ووكعك
بأيدي يافهد الله بلاك بيه وخلاني اشوفك هله عيد وجابه العباس
غنى : وصلني فهد حضنته ووصيته على نفسه واني دموعي تنزل عشره عشره ودعته ونزلت يارب باجر يلتحق ودي ورجعه بالف سلامه واحفظ كل امة محمد وفهد منهم .... صعدت للشقه فتحتها ودخلت ذبيت ملابسي وسمعت صوت موبايلي شفتها خالتي شلته الووو
سحر : بفرحه الوو حبيبتي غنى انطيني البشاره عمج صار زين وبعد خمس تيام احنه بالعراق بعد ما راح تنجبرين تبقين عد الضابط فهد راح ترجعين يمي ما مصدكه ياربي والله ميته على شوفتج حبيبتي بلشي حضري كل غراضج مابقه شي وارجع
غنى : بصدمه هاا
***
يتبع
- يتبع الفصل التالي اضغط على (ذنوب على قيد الغفران) اسم الرواية