رواية ذنوب على قيد الغفران الفصل الثاني 2 - بقلم براء
ذنوب على قيد الغفران
البـــــــــارت الثانــــــــي
مرحبا حبايبي العسل شلونكم ❤❤
#ذنوب على قيد الغفران
#للكاتبه براء الموسوي
صفق بحراره لمن علمك القسوه ثم اصفعه ليتذكر انك تعلمت
......................
فهد : دخلت للبيت اني وعلي بعد ما حلينه من الدوام
علي : ركضت للمطبخ بست امي شلونج يمه
ايمان : بسته هله وليدي بشر شلونك بالدراسه
علي : اخذت درجه كامله بالعربي
ايمان : عفيه بالبطل اخوك وين
علي : كاعد بالصاله
ايمان : طلعت من المطبخ هاا يمه الله يساعدك
فهد : جوعان حبابه صبي الغده لبين ما ابدل
ايمان : وعليكم السلام والرحمه ... ولك ليش ما تسلم شلون بيك اني
فهد : كلب عيونه ... السلام عليكم
ايمان : وعليكم السلام ولتكلب عيونه لا احط اصابيعي بيهن واعميك
فهد : صار اكو اوامر ثانيه
ايمان : فهد شبيك شهالاسلوب تره انت ماجاي تحجي ويه اخوك الصغير لا تنسى الى كدامك امك راعي كلامك ويايه احسن الك انت
فهد : ابتسمت وتقربت بستها العفو يمه لتضوجين مني اني تعبان ومالي خلك حبييتي انتي تروحلج فدوه سعاد
ايمان : ضحكت هسه شجاب سعاد بالنص يله روح بدل وتعال تغده انت واخوك
فهد : طبيت للغرفه سبحت وبدلت وطلعت ... اباوع اجتي اروى تركض علينه بستها شلونها الحلوه
اروى : زينه ... انت شلونك
فهد : باوعتلها ليش خدج احمر وين متعوره
اروى : باوعت ورايه دنكت هامستله ليلى صفكتني راشدي
فهد : بعصبيه ليش الحقيره ضربتج
اروى : لان جنت العب ويه بتول ووكعتها
فهد : تنهد ... استغفر الله وتالي ويه هالعائله الزفته هاي بس بسيطه اله اطيح حظها هاليلى حتى تبطل تمشي على سوالف امها
ايمان : فرشت السفره يله تعالو كعدو وانتي اروى تعاي خلي نجيب الاكل ... رحت نقلت الاكل وكعدنه نتغده بالصاله
فهد : علي اكل عدل لتلعب رواحنه
علي : ليش شبي اكلي
فهد : اكل على كيفك واكعد عدل لتحدب
ايمان : بحده فهد
فهد : ها ؟
ايمان : بطل تدقيق بكلشي
فهد : زفرت ضايج ... رجعنه نكمل اكلنه سمعت الباب ينفتح شلت راسي شفت ابويه دخل علينه شعجب مو بالعاده
سالم : السلام عليكم
الكل ماعدى فهد : وعليكم السلام
اروى : كامت باسته شلونك بابا
سالم : هله هله بحلوة ابوها شلونها ضوه البيت
اروى : ضحكت زينه
سالم : ضحك بايسها
ايمان : كامت اصبلك غده
سالم : لا سعاد منتظرتني على الغده اجيت انطيكم المصرف واجيب المسواك وعود اصعد فوك حيلل تعبان
فهد : ضغطت على ايدي حسيتها راح تطك يستنكف حظرته ياكل ويانه
ايمان : بهدوء براحتك
سالم : كوم ولك تعال نزعني جواريبي
فهد : غلست ولا شلت راسي
سالم : ويامن احجي اني ابن الكلب
فهد : ذبيت الخاشوكه وكمت دنكت يم رجليه نزعته جواريبه ميبطل يعاملنه هالمعامله عبالك خدم احنه ميكدر يمد ايده ينزعهن هو خاف يتعبن اصابيعه نزعته وكمت رحت للحمام غسلت اديه ورجعت لان تلعب روحي
سالم : كمت هاج هذا المصرف والمسواك بالباب خلي واحد يطببه واذا اعتازيتي شي بعد كليلي واني اجيبه يله اني صاعد
ايمان : اباوع لفهد كالب وجهه ... رجعو كملو اكل وكامو
فهد : يمه اني طاب انام كعديني بالاربعه عدي دراسه وشلون دراسه هي والله كد ماصعبه المواد حاس روحي راح ارسب
ايمان : ميخالف يمه هي بقتلك بس هالكم سنه وتدخل كليه حاول تضغط على نفسك شوف اخوك فيصل كضاها لعب بالسادس وحتى طلع اكمال وتالي طلع معدل يفشل وبطل على الكليه شد حيلك حبيبي مابقالك شي
فهد : لا ليش مو ابو سلمه الشغل وهسه صار اسمه السيد فيصل وعنده معارض سيارات وغركان بالفلوس شيريد بعد
ايمان : الانسان الواعي والمثقف ماينقاس بفلوسه ينقاس باخلاقه بوعيه بشهادته اني تعبت عليكم لاتضيعون تعبي وهذا الحجي ما موجهه بس الك حتى لأخوتك علي انت هسه سادس يعني بكلوريا احسب حسابك اذا هالسنه مو من الاوائل تتعاقب وانتي هم اروى انتي هسه ثالث اذا ماتطلعين الاولى ابطلج فهمتي مثل ما اني درست وتعبت وتخرجت باتعس الظروف انتو هم تدرسون وتعبون على نفسكم اريد شهادات عاليه وهسه روحو نامو بدون هوسه اختكم نايمه ما اريدها تكعد يله روحو حتى اكعدكم العصر تقرون
الكل : صار
ايمان : اباوعلهم كلمن راح لغرفته واني دخلت لغرفتي اباوع لبنتي الثانيه نايمه مثل الورده ورده واسمها عليها ... صار عمرها سنه ونص وسالم يجي يبوسها لو ينطيها حاجات ويطلع مافديوم شفته لعبها لو طلعها ما انسى بيوم جبتها شلون سعاد اجتي تتشمت لان جبت بنيه متدري اني طرت من الفرح لان طلعت صحتها زينه ومابيها نقص عمري مافكرت انو هذا ولد وهاي بنيه ولازم الهم معامله خاصه او لازم ادلل الولد واقسى على البنات دائما اني حديه بالتعامل ويه جهالي ما اضربهم بس دائما اعاقبهم اذا سوو شي غلط واحاول باستمرار انمي قدراتهم واخليهم يكتشفون نفسهم والحمدلله اروى وعلي ماشين وياي مثل الساعه الى فهد مزعج ومعقد الى درجه متمرد ويسوي الي براسه لو الدنيا تنكلب ... غير هيج صاير بي مرض التدقيق على كلشي يدقق ويحجي اذا شاف ابسط تصرف يكعد يحلل ويخبص روحه وعنده كلشي اله سبب كل الناس تتصرف بدافع او عدها شي ماعنده شي اسمه فطاريه ابد والله راح يموتني هالفهد كلما يكبر سنه يكبرني وياه الف سنه
_______________
زكيه : كاعده اللبس مروان والي صار عمره سنتين وماشاء الله يخبل سمين وابيض احمر حتى اخاف اطلعه كد ماحلو ... ندكت الباب كمت فتحتها طبت غنى شعرها مكفش و تبجي شبيج يمه ليش تبجين
غنى : بدموع بيبي هاي طالبه ويايه بسطتني وجرتني من شعري واكلت اللفه مالتي
زكيه : هاي منيه مكسورة الركبه
غنى : بدموع بت ام جعفر شوفي بيبي كسرت قراصاتي الجدد
زكيه : رحت لبست عباتي شلت مروان تعاي ويايه اليوم انعل والديها مصختها صار اكثر من مره تكتلج وانتي مثل الثوله تجيني تتبكبكين
غنى : راح تبسطيها
زكيه : يمه تضرب غناتي واسكتلها احرك اهلها اليوم تعاي يمه تعاي طلعت شايله مروان وغنى تمشي وياي وصلت لبيت ام جعفر طلعلي جعفر
جعفر : هاا خاله شلونج
زكيه : روح صيح لامك
جعفر : شتردين منها
زكيه : ماعليك انت لتدخل بسوالف النسوان روح صيح لامك
جعفر : تفضلي دخلي خاله هسه اصيحها
زكيه : دخلت للطرمه تعاي اوكفي هنا وكافي بجي اباوع شويه وطلعتلي ام جعفر
ام جعفر : اهلا وسهلا حجيه تفضلي
زكيه : اكلج عيوني يعني ميصير بتكم كل يوم تضرب حفيدتي وتجيني شعرها منتف من الجر
ام جعفر : ياا هاي منو من بناتي مسويه بيج هيج
غنى : بدموع نرجس
ام جعفر : اني اعلمها بس خاف متدري بيج
زكيه : شنو متدري بيها مره وثنين وتلاثه تجيني تبجي واني اغلس واكول اطفال بيناتهن بس لا الشغله صارت بلا ملح سيطرو على بتكم يا يمه ميصير كل ساعه ضاربتلها واحد
ام جعفر : مسحيها بوجهي داده والله هالبنيه شلعت كلبي جنها مطي حشاج ياهو الي تشوفه تزكطه
زكيه : حصرتني الضحكه ... ميخالف صيحيها خلي احجي وياها
ام جعفر : نرجس ولج نرجس تعاي
زكيه : اباوع طلعت وحده سمينه بكد غنى تلث مرلت وشعرها ملفلف كوه تمشي بس تخبل
نرجس : باوعت لغنى هاي شعدها هنا
ام جعفر : خزرتها ولج
زكيه : بحده تعاي ولج ليش تضربين بنتي
نرجس : بتج حقيره خاله
ام جعفر : ادبسزز لتغلطين
زكيه : لحظه لحظه شبيها بنتي ليش تغلطين عليها
نرجس : متقبل تنطيني من لفتها اكلها ولج جوعانه انطيني متقبل تكول ماا شنو ما اني جوعانه
ام جعفر : ضربتها ولج مقصره وياج اني اشو مصرف ولفتين اخليلج تالي نفسج صايره بلفت هالمكروده شوف الفشله هسه الي يسمعها شيكول
نرجس : ما اريد لفه لحم لو جبن اريد لفه مخلمه لو بيض مثل غنى اطيب من لفاتج
زكيه : ابتسمت هاي الخبصه على اللفه عمي كل يوم ادز لفه الج ويه غنى بس بعد لتضربيها خطيه هي ماعدها خوات غير انتي تصيرين مثل اختها وتديرين بالج عليها مو تضربيها
نرجس : تقربت واكفه كبالها يعني تسويلي لفه كل يوم مثل غنى
زكيه : اي طبعا وكل يوم اسويلجن شغله شكل شتكولين بس كون تتصالحين ويه غنى وبعد متضربيها شوفيها شلون حبابه وانتي اليوم شلعتي شعرها
نرجس : ابتسمت اي شعرها حلو وطويل نكشت شعرها بس مو مثل شعري
زكيه : هههه يله تصالحن
نرجس : تعاي طلعي ما اسويلج شي
غنى : طلعت من وره بيبي
نرجس : مديت اصبعي يله نتصاحب ونصير صديقات
غنى : مدت اصبعها مشابكته ويه اصبعها
نرجس : شبكتها العفو بعد ما اضربج
غنى : ابتسمت
زكيه : اباوعلها من حضنت غنى ضمتها ضم ... يله تعاي بيبي وانتي نرجس باجر تعاي الصبح حتى انطيج لفتج ويه غنى
نرجس : صار
زكيه : يله من رخصتج ام جعفر
ام جعفر : كل الهلا بيج عيوني نورتينه
زكيه : اخذت غنى ورجعت للبيت غديتها ونيمتها سوده عليه هالبنيه مالها احد ودومها مكسوره خاطر اااخ الك الله ياليتيم
__________________
فهد : كاعد ادخن ويه حارث ومحسن
حارث : فهد ملاحظ روحك متغير هواي
فهد : بهدوء شلون يعني
حارث : يعني مو مثل قبل صاير تصفن هواي ومتحجي اغلب الوقت ساكت وغير هيج صاير تنعثل علينه
محسن : ولك هو يا يوم حجه دومه مستمع وهو ساكت
فهد : اخذت نفس من الجكاره اولا احنه جاي نكبر والواحد كلما يكبر كلما يتغير وثانيا اذا جنت هادئ يعني انعثل ليش تاكل تبن انت
حارث : اني خايف عليك فهد ادري بيك دائما ضايج بس متحجي شي مكضيها على الصامت
فهد : ابتسم لا متوهم
محسن : هسه عوفونه من هالسالفه ولكم البارحه شفت فيصل ورحمان واكفين بحله البنات يصجموهن والله ووكعو بيد من لا يرحم
فهد : وانت شوداك يم مدارس البنات
حارث : اكيد لنفس السبب الي راحو على موده فيصل ورحمان
فهد : والله لو تدري بيك حجيه ياسمين اله توكلك تبن اكلك تره احنه بعدنه صغار حتى بالسن القانوني بعدنه ما داخلين اثكل شويه
حارث : والله محد هيلكنه غير هالسايب من ورا كمت مدمن مال جكاير وكل يوم ابويه يكتلني من وره ريحه الجكاير
محسن : انت مطي الف مره كتلك من تشرب جكاره روح تسمم جاي واعلج حتى تروح ريحته
حارث : ولك حتى صابون كلت وماراحت الريحه تبقه لازكه بيه
فهد : انتو من شنو خايفين اذا مابيكم خير وتخافون المن تدخنون
محسن : وانت متخاف يعني
فهد : اكيد لا عليمن اخاف قابل مرتكب جريمه
حارث : متخاف من عمي سالم ؟
فهد : ليش هو وينه عمك حتى يحاسبني
محسن : شكلت
فهد : اكول ماله حق يحاسبني وهو يدخن قبلي اكو مقوله تكول ذاك الشبل من هذا الاسد ميحقله يعاقبني ويكلي ليش لان اني جاي اقلده فهمت ياذكي
حارث : اتمنى اصير مثلك مااخاف اني من اشوف السيد عباس والله اصير جني اثول من الخوف
فهد : ابتسم بهدوء اني فهد والفهد ميخاف يله مع السلامه اروح اشوف امي باجر عندي دوام ومالي خلك الحجي
الولد : الله وياك سلمنه عليهم
فهد : وصلت للبيت اجيت ادخل صار بوجهي منذر
منذر : فهد ابويه يريدك
فهد : شيريد
منذر : والله ما ادري
فهد : صعدت فوك لكيتهم كاعدين بالصاله يمكن هاي ثالث مره اصعد فوك ابد مااوصل لهالطابق ... اباوعله كاعد على القنفه بصف سعاد وعلى جهته الثانيه فيصل ومنذر وليلى وبتول بت اخت سعاد كاعدين سوه شكد حلوه جمعتهم اله احنه اسرتنه متفككه ... خير صحتلي
سعاد : تعال يمه فهودي اسلم عليك
فهد : اسمي فهد وبعدين احنه كاعدين بنفس البيت ماكو داعي نتسالم بيناتنه باوعت لابويه احجي يابه اريد اروح اقره حتى امتحن واطلع لخوالي
سالم : تعال اكعد
فهد : لا شكرا مرتاح
سالم : حبيت ابلغك انو من باجر تطلع للمعمل ويه اخوك وعمامك
فهد : عفوا ؟
سالم : مثل ما سمعت
فهد : بس منو كلك اني اريد اشتغل وياكم اني طالب وعندي دراسه وغير هيج ملتزم ويه خوالي لازم اروح كل نهايه اسبوع يمهم
سالم : كمت وكفت كباله اسمع ولك من باجر تنسى شي اسمه خوالك رجلك اذا توصل للبصره اكسرها ولك صير خوش ولد واطلع ويه اخوك واشتغل بحلالنه احسن ما مكضيها تشتغل لخوالك وياريت لو يسوون اما بالنسبه لدراستك تكدر تقره من ترجع والعصر تطلع ويه اخوك للمعمل او المعارض وطبعا راح اجرلك راتب بمبلغ مرتب انت جاي تكبر مو تصغر
فهد : العفو منك يابه احد كلك اني حيوان اجي من الدوام انوب اطلع لشغل اذا نجح واذا فشل اني ما خسران ولا كسبان تريد واحد يفيدك بخصوص هالموضوع هذا ابنك البكر الشاطر صاحب الشهادات العليا يكدر يمشيلك الشغل يا سيادة اللواء سالم
فيصل : لك انت شكد غبي يعني فوك ما راح تكسب فلوس جاي ترفس النعمه
فهد : صحيح اني غبي لدرجه انو ارسب بالجغرافيه والوطنيه والاسلاميه وباقي المواد نازلات بدفتري صفر شفت الغباء
سعاد : انت شنو تتشمت بأخوك هسه على اساس انت راح تطلع معدل
فهد : باستهزاء والله كل واحد يطلع على امه مثل ما انتي لاتقرين ولاتكتبين ولدج طالعين عليج ومثل ما امي خريجه وعدها شهاده احنه طالعين عليها معادله جدا بسيطه هاي اذا كدرتو تستوعبوها
سالم : جريته من هدومه وتالي وياك فهد ليش تخليني اجرم بيك هنا واخلي راسك جوه بسطالي (عفوا)
فهد : همست شتريد تسوي يعني تجويني مثل قبل جم سنه لو تزيني صفر مثل قبل كم شهر لو تكتل امي حتى تعاقبني لو توصي المدرس يضربني صدكني كل هالسوالف متنفع وياي بعد ولتنسى اني بشر واذا اضل انضرب وانضرب راح افقد الشعور والانسان اذا فقد الشعور راح يصير حيوان واذا صرت حيوان بسببك ماراح اكون مسؤل عن تصرفاتي او الي يطلع مني يا سياده اللواء نزلت ايده من ملابسي ... اتمنى تكون فهمت كلامي وبالنسبه للشغل اني راح اشتغل بالمعمل بس بوقت فراغي قبلتو كان بها ما قبلتو والله هاي بعد مشكلتكم مو مشكلتي يله من رخصتكم عفتهم ونزلت
سعاد : ججج هالفهد صاير كلش ما مؤدب يعني ابد ميحترم بله اني يطبتي مرض لابد يكون حاقد عليه بسبب امه لان تحرضه علينه بس شلون يكدر يتجاوز ويه ابو بهالطريقه لو مهما يكن يبقه ابو وسبب وجوده بهالدنيا
ليلى : اي خطيه بابا وياريت لو مقصر وياهم اشو شايلهم بالصلوات
فيصل : همه ذوله مو مال نعمه وين لاكين ابو يحبهم ويقدرهم ويصرف عليهم دم كلبه صدك قليلين ادب
سالم : ابتسم ويكلولي ليش تحب سعاد وجهالها اذا اسمع مثل هالبلسم كل يوم شلون مااحبهم الله يحفظكم الي
___________________
غنى : كملت حفظ المحفوضه كمت دخلت للغرفه شفت بيبي لابسه حجاب وكاعده تقره بكتاب ... شدتسوين بيبي
زكيه : صدقت وشلت راسي تعاي حبيبتي كعدي يمي اباوعلها كعدت وعيونها على القران
غنى : شنو هذا
زكيه : متعرفين ؟
غنى : لا
زكيه : حبيبتي هذا كتاب رب العالمين اسمه القران والسور الي جاي تحفظيهن بالاسلاميه من القران ماخذيهن اني وياج مو قرينه قبل كم يوم موضوع عن الاسلام واركان الاسلام تذكرين
غنى : اي اتذكر
زكيه : اي هو كله ماخذي منا
غنى : الله شكد حلو يعني هذا الكتاب ربنه سوى
زكيه : اي
غنى : خلي نقره بي اني وياج بيبي
زكيه : مسحت على شعرها كومي لبسي شيلتي وتعالي بسرعه حتى اسمعج اباوعلها كامت تركض شويه واجتي لافه شيلتي السوده على وجها بعد كلبي طالعه تخبل بالشيله جنها عجيزه اجتي كعدت يمي سميت بسم الله وبديت اقره وهي تستمعلي بكل تركيز كلبي واجعني عليج يابيبي مادري ليش احسج راح تعبين هواي بحياتج
____________________
محسن : طبيت للبيت امشي على اطراف اصابعي حتى محد يلكفني همزين كلهم بالمعمل هسه حتى اخذ راحتي
ياسمين : وين رايح ولك
محسن : خرب نكمشت درت وجهي عليها هاا حجيه الله يساعدج
ياسمين : تعال تعال وين رايح
محسن : هاا رايح انام
ياسمين : تعال يمي اباوعله اجه ... ضربته ادبسزز ريحه الجكاير تعط منك هسه بوجهك تولي تسبح والله اذا يلكفك مهدي يشوي البصل على اذانك
محسن : حجيه قابل بس اني حتى حارث وفهد يشربون جكاير
ياسمين : باوعتله على طاري ولد عمك فهد شلونه صاير ميجي غير نادراً
محسن : اي هالايام صاير يشتغل بالمعمل ويه فيصل يجي ينام ساعه ويكعد يقره وانوب يطلع للمعمل
ياسمين : ليش قله عمال عدنه ومطلعين فهد انتو شبيكم
محسن : اني شعليه يا حجيه غير عمي الي كال
ياسمين : طاحظه لعمك هالخنيوه هذا صاير محبس بيد سعاد
محسن : اي والله يربج شكد مكروهه تنكط سم وجها يسوي حموضه بالمعده
ياسمين : ابتسمت امشي ولي اصعد فوك اسبح واكل شي حتى تروح ريحة الجكاير ووصي ولد عمك هم تره اذا نلزمتو تنكتلون وكولو بيبيتنه ماكالت
محسن : بستها اروحلج فدوه سوسو صايره تدستريلنه
ياسمين : ضربته امشي ولي انعل ابو امك
محسن : ههه
_________________
فهد : جاي اشيل الكواني اني والعمال وسمعت فيصل يصيحلي مسحت اديه وطلعت لكيته كاعد ويه جماعته وعايشلي دور المدير ابو الوصخ ... هاا
فيصل : روح جيبلي جاي ومو تتاخر
فهد : شلون ما سمعت ؟
فيصل : روح جيبلي جاي وجيب للشباب عصير ولتتاخر تره اخلي ابويه يخصم من يوميتك
فهد : شو كوم اوكف وامشي شويه
فيصل : شبيك لك
فهد : دكوم اوكف شبيك
فيصل : كمت خير
فهد : زفرت مستهزء الحمدلله يعني طلع عندك رجلين ومو مكسح تره ابو الجاي هذا وياا كم متر وتوصله مو بالمريخ مكانه حتى اروح اني واذا تريد اخدمك فإن شاء الله من تتكسح بالمستقبل اخدمك بعيوني
رحمان : انت شكد ماعندك ذوق
فهد : شبيك انت احد دايس على ذيلك ليش تنبح ؟
فيصل : ركعته بالمفاتيح امشي ولي طب جوه غبيي
فهد : اذتني المفاتيح لان صارت بوجهي ... واضح الغباء وين صاير لو بيك خير جان متمشي ويه هذوله الفشله الي مسويك زوج ويتونسون براسك
فيصل : اباوع الشباب زعلو وطلعو ... بسيطه يافهد اذا ما ابجيك دم ما اسمه فيصل
فهد : شتريد تسوي سوي واذا انت رجال وكد حجايتك بجيني دم عفته طبيت جوه اكمل شغل عايزني اني اخدم هالفشله ذوله شهاده اعداديه ماعدهم اهل الوصخ ... وره شويه عفت كلشي وطلعت رحت بوجهي للبيت هلكان من التعب هسه الي يسبني اكله رحم الله والديك كد ماتعبان وكفت يم ابو الاسواق اشتريت جم حاجه لاخواني ادري الوالد اذا محد يطلب منه ميفكر اصلا يجيب شي يفرحهم اصلا ماادري ليش يحبو وصلت فتحت الباب وطبيت تلكتني امي بالباب
ايمان : حضنته الله يساعدك يمه شو جاي من وكت
فهد : ابتسمت بتعب ويساعدج يمه والله مالي خلك فرجعت من وكت وين اخواني
ايمان : كاعدين بغرفتي
فهد : طبيت بوستهم وانطيتهم العلاكه رحت بست ورده اختنه الحلوه والصغيره ... يمه حبابه طلعيلي هدوم اريد اسبح و انام
ايمان : سوده عليه صاير شحاله من الشغل هاي صارله فتره يشتغل بالمعمل ويه اخو ادري هاي سوالف سعاد حتى تخلي ابنها يذله سوت هيج طبيت لغرفته طلعتله ملابس هو هم طب سبح وطلع بدل اسويلك اكل جوعان يمه
فهد : لا كلشي ما اريد بس انام ولحد يكعدني ماعندي شي باجر
ايمان : تنهدت براحتك يمه عفته وطلعت
فهد : بس حطيت جسمي على الفراش ظهري كام يون عليه ااخ والله لعبت روحي من هالشغل ادري هسه اني مجبور اشتغل بهالمعمل من عسى يحترك بيهم اني شكو ... غمضت عيوني اريد انام ماكو بس خليت راسي على المخده نمت ... ضليت فتره طويله نايم مااحس روحي غير نجريت فتحت عيوني اباوع اجه سالم خير ان شاء الله
سالم : كوم ولك كوم
فهد : كعدت هاا
سالم : وين الخمس ملايين مال وارد هالاسبوع
فهد : واني شمدريني
سالم : اخوك شايفك تفتر يم الخزنه اليوم يكول شفته رايح جاي ولك وصل بيك الحقد تبوك حلال ابوك وعمامك حتى تروح تدور مكسراتك خاف عبالك ماادري بيك وتالي وياك وصلت بيك تصير حرتمي
فهد : هاي شلكم بيها اني شوكت واصل للخزنه اشو الوكت كله اشتغل ويه العمال لو هو تلفيق
سالم : انجب شنو اخوك يجذب قابل شعنده وياك وليش يتهمك قابل راح اعلكله وسام اذا اعترف عليك ... لك شايف شصار بيه اليوم من ندور على وارد هالسبوع ماكو اختفى كمنه نشك برواحنه تالي هددت العمال واخوك لان يخاف الله وماراد العمال ينطردون انجبر يعترف ويكول انت الي ماخذهن ولك شايف شصار بيه كدام عمامك كمت لا اخذ ولا انطي ولك اني اللواء سالم علي اني الي الزم الحراميه يطلع ابني حرامي ولك الى متى تبقى مفشلني وين ما اروح اسمع شكاوي منك ولك حتى كمت استحي اكول هذا ابني ولك زلم مشوربه كل واحد شطوله خليتهم يمشون على الصراط المستقيم انت هاطولك ما اكدرلك
فهد : بهدوء اول شي اني ما محتاج فلوس الحمدلله عايش احسن عيشه ولو اريد ابوك محد يكدر يمنعني ولا حتى انت بس اني عيني متروسه وامي ماعلمتنه تصير ايدنه طويله كل ما بالموضوع ابنك واحد حقير ولفق هالتهمه عليه واني لا بيها ولا عليها وتكدر تسأل العمال اني حتى ماكملت شغل لان تعاركت ويه فيصل عفت الشغل ورجعت
سالم : ضحكت واذا اكلك واحد من العمال شهد عليك ويه فيصل لان عمامك جذبو فيصل تالي اجه العامل وكال شايفك اكثر من مره تدخل للمكتب فتره وتطلع شنو حتى العامل عنده عداوه وياك
فهد : فتحت عيوني والله العظيم جذابين
سالم : زفر لك تعبتني وحق هو الله تعبتني ساعه السوده الي خلفتك بيها لو ميت ببطن امك لو ماخذك مرض ومخلصني منك ولا هالمشاكل والخزي هذا الي جاي يصيبني من وراك ولك اعقل مو صرت مطي شكبرك باوع لروحك ولك انت اطول مني صير ادمي
فهد : بعصبيه اذا تكرهني المن جبتني منو عتب عليك وكلك خلف منو لزم سيف على ركبتك وكلك اله تزوج على مرتك مابقيت على سعاد وخلصتنه وخلصت روحك تره جزعنه مو حياة هاي كافي لعبت رواحنه
سالم : صفكته راشدي ولك حقير هم الك عين وتحجي ولك حرامي ابو ايد الطويله اتفل بيها تربيتك السزز هاي
فهد : اقسم وداعه امي ماابقه بعد هنا لحظه واحد مادام اني حرامي خلي اروح لخوالي وما اراويك وجهي طول العمر وانسى عندي ابو وحق هو محمد كافي فك ياخه عني تره تعبت من اسلوبك ويايه اني مو حيوان ولا عبد عندك كتلك الف مره لتجي عليه وتذب الصوج بيه وتصدك حجي مرتك وجهالك تعال حاجيني افهم مني حاول ولو مره تفهم انو هذا كله تلفيق من مرتك وابنك اني عمري وحياتي مافكرت انو امد ايدي ولو على خبزه مو الي مو انوب ابوك ملايين شنو لهدرجه حقير وماشايف اني حتى اصير حرامي .... يابه شوكت تحس انو فهد كبر بعد مو الطفل الي يكوم ويكعد دموعه على خده اني بشر يا اخي كمت استحي حتى اطب لبيت جدي من وراك لان الكل ميحترموني تعرف ليش لان ابويه كل مره يهيني ويفشلني كدامهم حس بيه لخاطر دينك كمت اشوف روحي حيوان بلا اي مشاعر اكوم بكتله واكعد بكتله بعد جم يوم ادخل كليه منو يحترمني بعد اذا اني شابع مغمه
سالم : لو انت محترم نفسك محد يتجاوز عليك بس انت ما مخلي احترام لنفسك
فهد : توقعته بعد الكلام الي كلته راح يتندم او يراجع نفسه بخصوص الي كاله ويسحب التهمه عني ... بهدوء الواضح الكلام بيناتنه منعدم يستحسن اني اعوف هالبيت وياريت تحسسني انت فعلا ابويه وتحاول تنقلني هناك اني بعد ما اكدر اتحمل هالوضع لا انت تصدكني ولا اني ممكن اخضعلك واضل ساكت خليني اعوفكم وارتاح واريحكم مني كمت طلعت جنطه خليت بيها هدوم واجيت اطلع
سالم : وين مولي ماكو روحه
فهد : احلفك بمعزة سعاد عندك تعوفني اروح ابوس ايدك عوفني بحالي اعتبرني ميت اعتبرني ماموجود اساساً خلص انت مو تكول عليه حرامي هاهي اني رايح حتى متتفشل بسببي .... خليني اروح هناك احسن الي اني اتوالم ويه اهل امي وهمه هناك يحبوني ويكيفون من ابقه عدهم رجاءا يابه لتضغط عليه
سالم : تنهدت خلص روح وباجر اروح لمدرستك وانقل اوراقك مادام بعد ببدايه السنه بس خلصني من شرك
فهد : عفته وطلعت شفت امي واكفه بالباب تبجي ... عفيه دموع عندج يايمه ميخلصن
ايمان : بدموع ولك وين رايح
فهد : يم خوالي يعني وين
ايمان : صدك تحجي انت وتعوفني اني واخوانك
فهد : تنهدت يمه مادام سعاد تبقه شاده وياي وكل يوم مسويتلي مشكله هي وجهالها اني ما راح ارتاح ولاحتى اكدر ادرس بشكل صحيح وفوك هذا التهمه الجديده الي طلعتلي صفح بعد مااكدر ابقه هنا واشوف عيون الكل مليانه احتقار واتهام خليني هناك احسن الي واني اجي بين فتره وفتره اشوفج انتي واخواني وحتى شغل راح اشتغل حتى ادزلكم مصرف اعتمدي عليه اني ان شاء الله اكون كد المسؤليه
ايمان : ولك يمه اني ما اكدر ابقه بلياك
فهد : ولا اني اكدر ابقه بليه كرامه اني كرامتي انمسحت بالكاع يمه كافي 17 سنه اني كرامتي صايره جوه بسطال ابويه كافي بعد لهنا وكافي صار وكت انو اشيل نفسي من هالتهلكه وابني لنفسي كيان وشخصيه براسها خير اذا ضليت هنا كل كرامه متبقه عندي بست راسها اريدج دائما تدعيلي واني اوعدج اذا ما ارجع واخلي الكل يحسبون لابنج الف حساب ما اطلع رجال وهذا وجهي تفلي بي اذا ما انفذ الي كتلج عليه والسنين تذكرج بكلامي بستها وحضنتها حيلل ابتعدت عنها سلمت على اخواني وطلعت حتى على ولد عمي ما سلمت طلعت للكراج اخذت تكسي وطلعت متوجه للبصره والي راح تصير مدينتي الجديده تحرم عليه النومه بعد ببغداد اذا ما احقق كل الي ابالي
ايمان : طلع فهد واني احس طلعت روحي ادري بي بعد ماطلع ماله رجعه درت وجهي على سالم هاا ارتاحيت
سالم : ساكت مااعرف شجاوبها ... بهدوء اني شعليه وعليمن ارتاح ابنج كتل روحه على خواله خلي يروح هناك ويفضنه
ايمان : قصدك راح من وراك من الضرب والاهاين جزعت روحه وشرد بعيد عنك بس حتى يخلص قصدك تلاحك نفسه وكرامته فضل يترك بيته حتى الكل ينسى شجان ابو يسوي وياه ... اني عمري وحياتي ماراح اسامحك اخذتني طالبه صغيره بعمر الورد رسمتلي احلام واشكال والوان وبس وافقي وبس وافقي واني كتلك انت رجال ومزوج من سابع المستحيلات اوافق عليك رحت حاجيت اهلي وبيومها نضربت وانجبرت عليك وكلت يله هي هاي قسمتي وافقت وتزوجتك تالي طلعت متزوجني على حساب يصير عندك ولد ثاني هم كلت ميخالف رجال ومن حقه شبعت ضيم وقهر تلث سنوات اني اكوم واكعد على حجايه الفلاحه العاكر وهم كلت ميخالف مو سهله عليك يكلولك مرتك عاكر ... بعد كل تضحيتي ردت تطلكني كيفت وكلت اجاني الفرج بس شاء القدر انو احمل وهاي جبتلك ولدين مو بس ولد يله وينك عنهم شتعرف عنهم بيا صف همه شيحبون شيكرهون شيردون يصيرون شنو مستوائهم الدراسي من ينامون شيتمنون من يكعدون شيكولون بالعيد شيلبسون كلشي متعرف مو طبعا ليش تعرف منو ذوله من يكونون اصلا حتى تهتملهم بس هسه خلي اسألك على بيتك الثاني مو تطلع حافظه على ظهر خاطرك حتى بتول بت اخت سعاد انت مداريها اكثر من جهالك زفرت ومسحت دموعي صدكني لو اكعد منا لسنه اشرحلك عن اسلوبك الزفت وتقصيرك ويه جهالك و ويايه اني هاي راح يصير عمري اربعين شنو شفت منك لاحنان ولادلال حتى كلمه حلوه انت بخيل بيها عليه .... اصفن ياسالم بكلامي شويه وعود تعال بعدها كول اني شعليه عفته وطبيت لغرفتي
اروى : شبيج ماما ليش تبجين
ايمان : ماكو شي رجعي كملي دراستج
علي : ابويه تعارك ويه فهد مو
ايمان : بحده لاتدخل انت التهي بدراستك
علي : تره خطيه فهد شفته من طلع قبل شويه حتى جان يبجي
ايمان : خليت اديه على عيوني ابجي على حظي وعلى حظ ابني الي اتعس من حظي
اروى : حضنتها لتبجين ماما والله احنه نحبج
ايمان : شكد جنت بوكتها محتاجه هيج حجايه جا شكد تعبانه اني بحيث حجايه طفله هيج اثرت بيه اباوع لعلي يباوعلنه فتحت ايدي اجه حضنه ... حضنتهم ذوله جهالي الي طلعت بيهم من هالدنيا اااااه يايمه محد مصبرني على هالدنيا غيركم والله لو ماعيونكم اني لحظه ماابقه هنا
زكيه : كاعده وكدامي ام صالح الله يرحمه صارلها سنتين مختفيه واليوم ظهرت فجأءه مدري ليش متخوفه منها
ام صالح : وين جهال ابني
زكيه : مروان نايم وغنى جاي تلعب بالطرمه ويه جهال خوالها
ام صالح : صيحيها خلي اشوفها
زكيه : اشرت لسحر تصيحها عود اليوم مسيره يمي هي واخوتها تالي اكلنه خوش هبطه
غنى : طبيت جوه هاا بيبي
ام صالح : تعاي حبيبتي ابوسج
زكيه : اباوعلها اجتي ورايه ولاتبطل هالحاله تخاف من ذيالها ... يمه غنى هاي بيبي ام بابا
غنى : باوعتلها هاي ام بابا صالح
زكيه : اي حبيبتي روحي سلمي عليها
ام صالح : اباوعلها اجتي يمي ما شاء الله شكد امها حلوه هي احلى من امها ناعمه كلش وعيونها كبار وسود يلمعن وكل عين هالكبرها وشعرها بطولها بوستها شلونج حبيبتي عرفتيني اني بيبي ام بابا
غنى : بابتسامه الحمدلله انتي شلونج بيبي
ام صالح : حضنتها بعد كلبي شلون شايله لسان حلو وين جنتي عني هالمده يابيبي
غنى : يم بيبي زكيه وخرت منها ورحت كعدت يم بيبي زكيه
ام صالح : اكلج ام كامل اني جايه اليوم اخذ غنى وياي هي صارلها سنتين عندج وصار وقت انو ترجع لاهل ابوها همه احق بيها وحتى مروان بس مو هسه اخذه خلي يكبر شويه
سحر : شنو هو بكيفج شنو احنه نتعب ونربي وانتو تجون تاخذون على الجاهز بت اختي متطلع من هالبيت
زكيه : لحظه لحظه اذا انتي هيج حريصه عليهم وين جنتي قبل سنتين انتي حتى سؤال ما سئلتي عليهم وجايه هسه تردين تاخذيهم والمفروض اكلج تفضلي اني صار سنتين ماانام اذا مو همه بحضني ترديني بكل بساطه اسلمهم الج
ام صالح : محد كلج خليهم يمج جان لازم تعرفين انو مرجعهم لاهل ابوهم واني اجيت اليوم اخذ غنى وياي قبلتي وان ماقبلتي
سحر : يعني فوك ما لحكتوهم على المشتمل الي جانو كاعدين بي واخذتو ورثهم بكل عين صلفه وكلنه ميخالف عدنه همه يسوون البيت خلي يولي المهم يكونون همه سالمين جايين هسه تاخذوهم بكل صلافه
ام صالح : منو اخذ البيت
زكيه : عمامها تنازلو عنهم مقابل البيت واني كلت ميخالف اهم شي جهال بنتي يبقون يمي فما من حقج تجين تداعين بيهم هسه تردين تشوفيهم على عيني وراسي البيت الج وعتبته النه بس مال تاخذيهم لا تعذريني اخر احلامج هاي
ام صالح : كمت بعصبيه بسيطه اني اعلمك اذا مااخذهم بالحسنى اخذهم بالقانون بوست غنى وعفتهم وطلعت
سحر : يعني اني ماشايفه هيج عالم بله مستحه وين جانو قبل سنتين هستوهم تذكرو عدهم احفاد
زكيه : مو تعلميني بيهم اكيد اكو غايه من جيتهم اليوم واصرارهم على الجهال
كامل : ليش شكو بيها اهل ابوها والهم حق بيها خو احنه منكعد نصرف عليها احنه رواحنه كوه حامليها
سحر : هسه الي يسمعك يكول مكطع نفسك همزين مو يمك السالفه ولاكأن هذوله اطفال اختك همزين امي الي جاي تصرف عليهم على كد متكدر فوك راتب ابوهم .... فنصيحه شي انت مو تعبان بي لتكعد تفلسف بي
كامل : ملاحظه روحج تجاوزتي لزمي حدج الي كلته مابي اي غلط والي جاي احجي لخاطر امي .. امنه مره جبيره مو مال تتحمل مسؤليه طفلين يرادلهم اكل ومصرف وملابس وعنايه هي عايزه على الاقل نكول عدهم اهل غصباً ماعليهم يتحملون مسؤليتهم مو جماله علينه همه
زكيه : اني ماشكيتلك حتى تحجي انطيها الك من الاخير ولد اختك مااعوفهم لحد ما انام بالكبر وعود تصرفو بكيفكم
كامل : اسم الله عليج يمه عمرج طويل ان شاء الله
زكيه : ان شاء الله عمري طويل حتى اربي هالايتام احسن ما يوكعون بايدكم
سحر : بعد كلبي يمه لتضوجون ليرتفع ضغطج كافي اهدي كمت جبلتها كلاص مي هاج شربي واهدي كافي سدي الموضوع
زكيه : وين غنى روحي شوفيها سحر تره هي تخاف من الصوت العالي
سحر : كمت صار ... دورت عليها بالبيت ماهي طبيت للغرفه لكيتها حاضنه مروان ونايمه ما اعرف ليش منظرهم بجاني ااخ يا ختام تعاي شوفي جهالج كد ما معتازين حنان واحد حاضن الثاني ونايم سوده عليه مروان رغم صغير بس كلش متعلق باخته كعدت يمهم اباوع لغنى شابكه مروان حيلل اعرفها من تخاف تسوي هيجي اروحلج فدوه يخاله شكد حنينه غطيتهم وطفيت الضوه وطلعت يم امي الي كاعده وتاكل بروحها لتخافين يمه كلشي ميكدرون يسوون لتنسين همه تنازلو بالمحكمه عنهم
زكيه : هو اني شخوفني غير ورقه التنازل لتطلع جذب وممتنازلين عنهم
سحر : لتخافين المحامي تأكد من كلشي بالمعامله
زكيه : متاكده
سحر : اي يمه شفتها بعيني قابل اجذب عليج
زكيه : ضحكت تعاي ابوسك ريحتي كلبي
سحر : هههه
ايمان : كاعده وخاله ايدي على خدي فهد من يوم الي راح ولسه ماكو اخبار عنه ولاحتى خابرني اخابر على بيت اهلي يكلولي طالع ويه ابويه لو عنده امتحان وكاعد على الشط يقره طبعا عمتي ياسمين من درت فهد انتقل للبصره لعبت بينه جوله وكلبت الدنيا على سالم لان حيل تحب فهد وتعزه واذكر بيومها حتى كامت تبجي وهالفتره سعاد شاده ويه اروى يا تصعدها للسطح تشر هدوم يا تصيحها تنظف وياها واذا حجيت لو فتحت حلكي اطلع وحده مشرانيه ونحسه فزيت على صوت هبد اباوع نزلت اروى من الدرج وتركع رجليها حيلل صحت بيها ... ولج امشي عدل ليش تهبدين
اروى : بعصبيه شنو هاي ماما كل ساعه صايحتلي صخام حتى انظف شنو خدامه اني تره ضجت والله انوب اكل لبابا مرتك الحقيره بس تشغلني
ايمان : خزرتها ولج لسانج لزمي لا اكوم اطيح حظج هاي من شوكت تتلفظين هالالفاظ تره اكوم اكص لسانج والله اذا سمعتج بعد تغلطين
اروى : كعدت ماما والله تعبت شوفي اديناتي شلون صارن من التنظيف
ايمان : بوست اديها ميخالف هاي اخر مره اخليج تروحين يمها اذا صاحتلج بعد كوليلها عندي دراسه خوش
اروى : خوش
_________________
سالم : كاعد ببيت عباس كلي يردني بشغله شويه ودخل بايده صينيه الجاي اخذت ستكان الجاي خير احجي شصاير
عباس : كعدت دشرب جايك واني اسولفلك
سالم : احجي اسمعك
عباس : تذكر المبلغ الي انباك قبل فتره من الخزنه
سالم : تنهدت قصدك الي فهد باكه
عباس : لا مو فهد الي باكه ... اني هالايام جاي اللاحظ المبالغ الموجوده بالسجلات تختلف عن الموجوده بالخزنه
سالم : بتفاجئ معقوله لعد اذا مو فهد بايكهن منو الي مسوي هيج احنه حتى ماعنده واحد غريب كلها عرف بس العمال غربه ومع هذا همه امان
عباس : لتفهم غلط خويه بس الي جاي يتلاعب بالشغل ابنك .... فيصل
سالم : مستحيل فيصل ميسويها انت مو تعلمني بأبني صارله سنين يشتغل ويانه كلشي ماسوه
عباس : تنهد سالم ابنك بذيج السنين جان بعده ستوه شباب وعنده خوف مو مثل هسه صار رجال خاصه صاحب معارض ويلعب بالفلوس لعب وماخذ مكانك بالمعمل اكيد يطمع اعرف ماراح تصدكني بس روح سأله عن وارد هالشهر اني اكلك الوارد هالشهر تلاثه و ..... روح سأله اذا انطاك نفس المبلغ الي كلته اني يعني هو حقاني واني اسحب كلامي
سالم : انت تعرف شجاي تحجي ياعباس انت جاي تطلع ابني حرامي
عباس : لعد ما انتفضت من اتهم ابنك اخو ليش فيصل ابنك وفهد مو ابنك
سالم : هاا لا بس اني فيصل صارله هواي يشتغل وياي اكيد ميسويها
عباس : شمدريك يجوز فيصل اخذ الخمس ملايين قبل فتره وذبها براس اخو اني مو قصدي اطلعه حرامي قابل اني اكرهه شعندي وياا بس مجرد انطيك رايي على العموم هسه انت روح تأكد منه وشوف
سالم : كمت ماشي
عباس : طلع سالم سديت الباب ورا ودخلت جوه
ضحى : شعجب سالم عدنه اليوم
عباس : ضايجين وين نروح كلنه نكعد شويه وين الجهال
ضحى : حارث ومرتضى بغرفهم وعلا بالمطبخ تريد منهم شي
عباس : لا بس اسأل عليهم
سالم : طلعت من بيت عباس ورحت كبل للبيت سعاد سعاد
سعاد : ها ها شتريد
سالم : وين فيصل ؟
سعاد : معزوم عد رحمان شتريد منه
سالم : ما اريد منه شي بس اريد احجي وياه بالشغل من يرجع بلغيني
سعاد : ليش وين رايح انت
سالم : نازل جوه شويه
سعاد : بعصبيه ليش
سالم : بحده هو شنوه الليش شنو اخذ اذنج انوب
سعاد : لا براحتك
سالم : عفتها ونزلت لكيتهم كاعدين بالصاله يقرون وايمان كاعده توكل ورده ... السلام عليكم
الكل : وعليكم السلام
سالم : اجو سلمو عليه ماعدى ايمان ضلت كاعده تقربت شلت ورده الي صايره جنها ورده حمره بوستها هاا وردة البيت شلونج ولج تعرفين ابوج هاا هههه صدقه لهالضحكه كعدت تعالو بابا شلونكم بابا علي شلونك شلون الرابع وياك وانتي اروى حبيبتي اباوع لايمان ضحكت باستهزاء شبيج عليمن هالضحك السخيف
علي : بابا اني بالسادس مو بالرابع واروى بالثالث
سالم : هاا اي اي هو اني قصدي بالسادس شلونك
علي : الحمدلله مابقه شي للبكلوريا وان شاء الله اطلع اول مثل ما ماما رادت
سالم : ابتسمت اول مره وحده
ايمان : بأستهزاء ليش متدري جهالك كل سنه يطلعون من الاوائل حتى فهد
سالم : لا والله ماادري
ايمان : طبعا ليش تدري من همه اصلا
سالم : حاولت اغير الموضوع ما كتيلي فهد شخباره هم يخابرج راح تخلص السنه وهو لسه ما اجه
ايمان : مابقه شي للامتحانات وجاي يدرس
سالم : هزيت راسي ... شلونكم انتو انتي شلونج
ايمان : الجهال زينين بس اني ام وابني بعيد عني شتتوقع وضعي يكون
سالم : تنهدت كومي اريد احجي وياج
ايمان : كمت دخلت للغرفه شويه واجه ورايه خير
سالم : طلعت فلوس هاج هاي فلوس لفهد انطيهن اله من يجي بس لتكليله مني
ايمان : ابتسمت صدكني مياخذهن لزمت ايده سالم فهد ما محتاج فلوس محتاج حنان منك كلمه حلوه نصيحه اسلوب حلو بوسه على الراس كعده بين ابو وابنه سالفه حلوه ... صدك واعتقد بالله الفلوس كلشي متسوي صحيح تسد حاجه بس متجيب سعاده هاي اني ابسط مثال خو عايشه بقصر بس هالقصر خنكه عليه وعمري ماشفت الراحه بي فخلي فلوسك عندك واذا تريد تهتم بفهد روح شوفه هنا راح يبين اهتمامك
سالم : ان شاء الله بس خلي اخلص شغلي هالكم يوم واروح اشوفه
ايمان : هزيت راسي الله يهديك ويبرد كلبك على جهالك ... بيومها سالم بقه يمنه حتى تعشه عدنه وراح بالليل كلش يم سعاد
__________________
ليلى : شبيج ماما رايحه جايه كعدي
سعاد : بس اريد افتهم شعنده يم بيت ايمان اليوم
ليلى : هسه يجي يسولفلج شبيج ماما
فيصل : السلام عليكم
سعاد : وعليكم اي همزين اجيت روح منذر ركض كل لابوك اجه فيصل انت مو تريده خلي يصعد ... اباوعله نزل ماكو عشر دقايق وصعد
سالم : فيصل تعال ويايه اريد احجي وياك
فيصل : باوعت لامي اشرتلها شكو
سعاد : علمي علمك
فيصل : دخلت لغرفتهم لكيت ابويه كاعد خير يابه شرايد
سالم : تعال اكعد
فيصل : كعدت اسمعك
سالم : شكد وارد هالشهر
فيصل : هاا
سالم : ليش مرتبك جاي اكلك شكد وارد هالشهر مو انت الي مستلم الاداره وكلشي تنزله بالسجلات
فيصل : اي بس لحظه اتذكر هاا الوارد هالشهر خمسه و.....
سالم : هاا هزيت راسي كوم روح
فيصل : ليش تسأل يابه
سالم : هيج اسأل على الشغل كوم اخذ راحتك انت ستوك اجيت من بره
فيصل : يله من رخصتك تصبح على خير
سالم : اجمعين ... اباوعله طلع والضحكه على وجهه ولا كأن مسوي شي .... من يومها اني كمت اراقبه واشوف الشغل اول بأول ولا مره نزل رقم بالسجل واجه انطه مبلغ صحيح ينطي نص المبلغ وياخذ نص اني متهمني الفلوس بس اكرهه والطماعين والي يستغفلون الناس ومن شفته هيج غسلت ايدها منه انجبرت قبل فتره اعوف الشغل واروح اشوف فهد والي جان متغير 180 درجه سلم عليه بكل برود وراح حاولت احجي وياه بس ماكو يتهرب مني من قهري عليه بس رجعت لبغداد طلعت حركتي بفيصل كل ساعه اطلع حجه عليه كمت اشوفه يلعب بكيفه كام ياخذ بهالفلوس ويرجع لورده تالي طلع يصرفهن على المكسرات والكح.... والمشكله شفته بعيني وبيومها تخربطت ونقلوني للمستشفى اني اصلا كلاتي مو زينه وتعبانه ومن زمان بدلت كلى وهسه وكعت من القهر ولسه اني بالمستشفى وضعي ما جاي يستقر ومن ساعتها حسيت ايامي صارت قليله مااعرف ليش هالاحساس الي جاي يجيني اجت على بالي شغله وبدون سابق انذار دزيت على عباس وسولفتله الي ابالي
عباس : بصدمه انت صدك تحجي الي جاي تسوي حرام
سالم : بتعب لا عباس انت تعرف شي واني اعرف شي تعبي وكَدي اذا اعوفه بأيد فيصل يكعد اخوته وامه وايمان على الحديده وياخذ كلشي ويطردهم اذا متت من بعد الي شفته كمت اخاف على ايمان وجهالي غير هيج سعاد افندي طلعت مشتريه كاع هي والمصون ابنها بدون علمي خليها الهم بس بسيطه اني اعلمهم
عباس : زين شتتوقع راح يصير لو عرفو
سالم : الموضوع يبقه بيني وبينك لحد ما الله ياخذ امانته ياله تحجي بي فتهمت
عباس : اسم الله خويه الك طوله العمر
سالم : مااعرف بس عندي احساس انو هاي ايامي الاخيره خاصه الدكتور كال الماي عندي صاعد على الرئه ... يجوز الله جاي يعاقبني على الي سويته بفهد
عباس : لا لتكول هيج انت ابو لو شمايصير تبقه ابو وتمون
سالم : اباوع لايمان دخلت اشرت لعباس يسكت
ايمان : محتاج شي سالم اجيبلك شي
سالم : لا رحم الله والديج
ايمان : اباوعله صحته حيلل منكسه ... ياربي دخيلك كومه بالسلامه اذا مو لخاطره لخاطر جهاله اباوعله وجهه اصفر كركم وشرايين وجهه مبينه بشكل مخيف ولا كأن قبل شهر هو بكامل صحته خابرت فهد البارحه حتى يجي يشوفه ما قبل اااخ يا يمه مالكيت غير قساوه ابوك تاخذها
سالم : ثاني يوم كال الدكتور لازم نسحب الماي الي على الرئه ... جنت متخوف من العمليه طلبت من الكل يتجمع حتى احجي وياهم بوست ولدي واحد واحد عبالك بعد ما اشوفهم اباوع بالوجوه ادور على فهد مالكيته ... يمه وين فهد
ياسمين : ابتسمت هسه يجي يمه البارحه خابرته واصريت عليه يجي ... اباوع نفتحت الباب ودخل فهيدان
فهد : بهدوء السلام عليكم
الكل : وعليكم السلام
فهد : تقدمت بست راس ابويه عندك العافيه ان شاء الله
سالم : ابتسمت الله يعافيك وليدي
سعاد : شلونك يمه فهودي
فهد : باوعتلها صفح ورحت سلمت على الكل ماعداها شويه واجو اخذو ابويه اباوعله بس ادين حجيه ياسمين وراح
فيصل : لتبجين يمه ان شاء الله يكول بالسلامه
سعاد : ان شاء الله
فهد : اباوع لامي تروح وتجي اهدي يمه
ايمان : لزمت ايده هاديه هاديه
فهد : ماكو شويه وطلعو الدكاتره يركضون منعرف شكو ومحد يقبل يحجي
مهدي : خويه كليلي شكو شبيكم تركضون
الممرضه : المريض صار عنده مضاعفات
ياسمين : ياربي دخيلك بجاه حبيبك محمد تكومه بالسلامه لخاطر وليداته
فهد : ضلينه رايحين جايين من جهه خايفين ومن جهه نطمن الحجيه ماكو شي شويه وطلع الدكتور الكل ركض عليه
الدكتور : للاسف فقدنه المريض البقيه بحياتكم
ايمان : انصدمت صدمه عمري .... سالم راح مستحيل ... اباوع لعمتي وحمويني بندو من البجي وسعاد كامت تلطم لا لا مااصدك
ياسمين : خاله شيلتي على وجهي وابجي الحمدلله على كل حال الهي لا اعتراض على حكمك الهي
فهد : اباوع الكل كام يبجي اني لسه مصدوم مااصدك ابويه مات معذبي مات .... ماانكر حسيت روحي نقبضت من حسيت بعد مااشوفه بس مابجيت اني حلفت ماابجي بعد ... ماكو فتره وطلعوه استلمو عمامي الجثه وباشرو بمراسم الفاتحه
عباس : اااخ يا سالم والله وجنت تدري راح تموت ... باشرنه بمراسم الدفن اخذنا للمغيسل غسلنا ورحنه نزوره وبعدها ندفنه
ايمان : كاعده ببيت عمي وماكو اي ردة فعل عليه ابجي بهدوء عكس النار الي جوايه ليش الهي اخذته بعد ماتغير ويانه ... ليش يربي ليش
سعاد : بصياح راح ابو طله الحلوه راح ابو بيتييي راح راح تاج راسي وحبيبي ولكم راح امووووت سالم لك سالم وين عفتني ورحت .... فكروك الناس بعيونهم خلصت عمرك بالمشاكل ويه الي ميستاهلون الله ياخذج يا ايمان الفكر من شفناج ما شفنه الخير
نسرين : انتي شبيج كافي بنص فاتحه احنه وانتي تدورين مشاكل
سعاد : ولج نسرين سكتي نار وواجه بصدري نار
ايمان : ضليت ساكته ولا جاوبتها ... مرن تلث ايام الفاتحه وبدت الناس تقل كلمن اعتكف على نفسه هدوئ تام بالبيت ماكو اي صوت فهد بقه مارجع لان كمل السادس وهسه عنده عطله وشلون عطله هي ... ماكو مرن عشر تيام وسعاد كل ساعه مسويتلها مشكله ... لمن فد يوم نزلت
سعاد : كومي لمي هدومج وجه الفكر كرضتي رجلي وموتي مااخليج لحظه وحده كاعده هنا تردين تكرضيني اني وجهالي يله يله لمي هدومج وولي
ايمان : روحي حبابه روحي مالي خلكج احترمي نفسج وصعدي لطابقج احسن الج
سعاد : جريتها شو دتعاي
ايمان : اجتي تطلعني مااشوف غير وكعت بالكاع اباوع فهد دفعها
فهد : بعصبيه دير بالج تفكرين تندكين بأمي والله العظيم الزمج هنا اكسرج والله
سعاد : ولك ساقط سايب ابن الكح..... ام الزلم انت تضربني ولكككم لحكولللللللي وتعالو شوفو شسوه بيه ابنننن ايمااااااان الكح......
ايمان : اباوع الكل اجه حمويني وحماتي اجت تركض على صوت الصياح
مهدي : شكو شكو
سعاد : تقبلوها ابن ايمان يضربني
فيصل : هديت عليه لك ابن الفلاحه شلون تمد ايدك على امي
حارث : لزمته داوكف شبيك كمت تزاكط خلي نسمع
سعاد : شتسمع قسم بالله ميبقون بالبيت لحظه وحده فتهمتوو
ياسمين : ولج اكلي تبن وانجبي ام المشاكل بعده تراب رجلج بعده مانشف وانتي جايه تردين تطردين مرته وجهاله شهالصلافه هاي
سعاد : هذا بيت جهالي وحقهم من سابع المستحيلات اخلي ايمان تاخذ منه شي وبعدين ليش تضوجون هذا حق وماكو خوف من الحق اني مااقبل تعب رجلي يروح لايمان وجهالها خلي تولي لاهلها وتخلصنه من شرها وتعوفنه بحالنه هي مالها اي حق بالملك
ياسمين : منو كال مالها حق مثل ماانتي مرته هي هم مرته فانجبي وثكلي عيب عليج الي بكدج صارت بيبيات
عباس : لحظه يمه ... ام فيصل سمعيني انتي مالج اي حق تطردين اي احد من هالبيت وخاصتاً ايمان وجهالها
سعاد : ليش يمه
عباس : لان ببساطه كل املاك سالم مسجله بأسم فهد وطبعا هذا بطلب منه وكدر بنفوثه يكمل كلشي يظرف شهر صارت ممتلكات سالم بأسم فهد وبما انو فهد دخل بالسن القانوني قبل تلث اشهر اذا اله كامل الحق يتصرف بالاملاك وحتى يكدر يطردج انتي وجهالج بره
سعاد : فتحت عيوني معقوله سالم ميسويها مستحيل هذا تلفيق
عباس : ان شاء الله باجر نفتح الوصيه وتتاكدين بوجود المحامي
ايمان : شهالصدمات الي جاي تنزل عليه ياالهي اباوع عيون الكل صارت على فهد الي واكف وماصدر ولا صوت
فيصل : جريته من قميصه جنت تعرف ياحقير
فهد : بابتسامه خبيثه ... همست بكل هدوء والله ووكعتو بأيدي دشوفو شراح اسوي بيكم
**************************
يتبع
- يتبع الفصل التالي اضغط على (ذنوب على قيد الغفران) اسم الرواية