رواية ذنوب على قيد الغفران الفصل السادس و العشرون 26 - بقلم براء
السادس العشرون
#ذنوب_على_قيد_الغفران
#البارت_السادس_والعشرون
ود : لتسوين نفسج شريفه .... تره كل العماره تدري انتي الكح.... مالته ودومه يجيج يكمل حاجته يمج مقابل اقامتج هنا ببلاش
غنى : فتحت عيوني .... شنوووو
ود : اوي شنو علساس متعرفين
غنى : كمت بعصبيه احترمي نفسج ولزمي لسانج مو وحده سايبه كدامج وتحاجيها هيج
ود : ليش الي تخلي رجال غريب يجي يبات وياها والله العالم شمسوي وشلاعب بعد وياها شتسمى هاي بله
غنى : انتي ماشفتيني بعينج بايته وياا حتى تحجين هيج
ود : بهاي عيني شفته اجاج نصاص الليالي وطلع اكثر من مره من عندج شيسمى هذا احجي يله ... بنيه شابه عايشه ويه واحد وحدها يطب ويطلع عليها شنو يجي يصليلها صلاه الايات مثلا لو يكعدون يلعبون دومنه والله عرفتج مو راحه لان من البدايه شكيت بمصداقيه كلامج وين اكو اهل يتركون بتهم عايشه بعماره لا ووحدها هاي من غير سعر الشقق الي تكسر الظهر
غنى : بعصبيه مامن حقج تتهميني هيج اتهام فتهمتي وعلاقتي بفهد انتي مالج حق تدخلين بيها اني مجايه بصوبج فلتدنيلي وكلمن يلتهي بنفسه احسن اله
ود : ضحكت ولج اني ورجلي سنين كاعدين هنا ولا مره صحناله بأسمه وانتي تجين هسه تصيحيله فهد حاف
غنى : بدون وعي اي لان فهد رجلي
ود : هههه خرب يومج شكد جذابه رجلج شنو انتي مو ستوج كلتي ماعندي شي وياا وبعدين لو انتي صدك مرته ليش يجيج بالخفيه خو كدام الكل يطب ويطلع عليج مو يتسحب مثل الحراميه واصلا لو هو متزوج يعيش مرته بشقه لا وبعماره هم انتي صاحيه لو خبله
غنى : علاقتي بفهد لتدخلين بيها واسباب وجودي هنا ما الج حق تحشرين نفسج بيها
ود : لا احشر نفسي ونص انتي هنا كاعده بعماره كل الي بيها ناس مثقفين والهم اسمهم بالمجتمع مال تجي وحده طولها شبر تخلي الحجي علينه لا والله نطيح حظج
غنى : امشي طلعي بره
ود : تقدمت لفيت شعرها بايدي جريتها حيل سمعي ولج الج مهله اسبوع بالهواي والله وجهج اذا اشوفه ابلغ ولد العماره اكو وحده تشتغل كح... بالطابق الرابع واخليهم يتوالون عليج كلهم فسمعي كلامي ونفذي مفهووووم دفعتها وطلعت
غنى : حجت الي عدها وطلعت ... حسيت توازني يختل احس روحي كوه واكفه كعدت والهوه كوه كمت اجره ... مسحت على صدري احس روحي حتطلع جانت عايزه والتمت عليه ....دموعي كامت تجري احس روحي راح اموت جريت الموبايل بسرعه دكيت على فهد واديه يرجفن
فهد : ستونه كاعدين نتغده وسمعت موبايلي يدك ... شلته شفتها غنى جاوبتها الوو
غنى : بصوت مخنوك ... ف فهد تع تعالي حباب
فهد : كمت بسرعه شبيج
ايمان : كلنه صفنه عليه
فهد : الوو ؟ يله جاي جاي اخذت سويجي
ايمان : وين رايح يمه اكعد تغده
فهد : ما اريد ... طلعت وهي على الخط غنى لتسدين الخط خليج ويايه صحت ركزي على كلامي اني ثواني ويمج
ساره : اكلجن اني مو سمعته يكول شبيج لو اني غلطانه
آلاء : حتى اني سمعت
انغام : ماعلينه لحد تدخل
فهد : مشيت بكل سرعتي اريد بس اوصل ماعولت اوصل صوتها مدري شبي احسها تصارع من جانت تحجي .... نزلت من السياره وصعدت للشقه فتحت الباب ودخلت لكيتها كاعده على القنفه ووجها ازرك ... ركضت لزمتها غنى غنى اباوعلها كلبت عيونها شلون الي فقدت
غنى : اريد اجر النفس ما اكدر كل الي اتذكره شفت فهد وغبت عن الوعي
فهد : ضربت وجها غنى غنى يمعوده احجي شبيج ... اخذت شالها لبسته الها وشلتها وطلعت اركض كدام عيون بعض الي بالعماره ولا اهتمت صحت ابو ماجد افتحلي السياره بسررررررعه
ابو ماجد : حاضر حاضر
فهد : خليتها وره وصعدت بسرعه سقت للمستشفى .... احس كلبي راح يطلع من مكانه كد ما دكاته سريعه ياربي شبيها اول مره اشوفها بهيج وضع .... وصلت للمستشفى نزلت بسرعه شلتها ودخلت صحت عليهم يجيبون السديه .... اجو خذوها
الدكتور : خير شبيها
فهد : ما ادري على ساعه وكعت
الدكتور : اهدئ هسه نشوفها
فهد : مسحت على وجهي ياربي كون مابيها شي كلما اتذكر منظرها شلون صارت زركه احس روحي تطلع ... هالبنيه شكد مشلوعه كلب ... ضليت كاعد بره فوك النص ساعه وطلع الدكتور
الدكتور : انت شتصير منها
فهد : اني زوجها
الدكتور : اتمنى تهدئ وتسمعني زين سوينه تحاليل وفحص لزوجتك واكتشفنه انو كلبها تعبان جدا
فهد : فتحت عيوني شنو دكتور
الدكتور : اي نعم بس وين جنتو عنها صارلها فتره من صاير عدها خفقان بالقلب وكلبها تعبان هسه بس الحمدلله بعده بالبدايه وما واصل مرحله صعبه
فهد : دكتور اذا حالتها تعبانه سوو اللازم وياها واني مستعد ادفع المبلغ الي تردو بس كلشي ولا يصير عليها شي
الدكتور : ابني مدامتك كلبها تعبان وهالشي صار بسبب صدمه تعرضتلها سببتلها هالشي والحمدلله وضعها مو سيئ لدرجه نسوي عمليه الها بس مجرد تبتعد عن التعب والتفكير ونفسيتها تتحسن تصير زينه ومبين الي صار بسبب موقف صار وياها لان هالحاله تجيها بس من تتعب او تنقهر فحاولو تبعدون عنها كلشي يضوجها لان كلما تتعب يتعب كلبها اكثر وساعتها راح توصل لمرحله ينتهي بيها كلبها لا سامح الله
فهد : بعصبيه لتحجي هيج هي كلشي مابيها
الدكتور : ماكلت غير الحقيقه ابني قابل اجذب عليك ...على العموم هي هسه كعدت تكدر تدخل تشوفها
فهد : طبيت للغرفه شفتها كاعده وصافنه بالفراغ كعدت يمها .... لزمت ايدها فزت .. هذا اني اهدي
غنى : بدموع فهد
فهد : اشش لتحجين شي هسه ارتاحي وبعدين نحجي
غنى : ما اكدر اتنفس فهد واحس كلبي يوجعني
فهد : مابيج شي تتنعوصين
غنى : تره اني سمعت الدكتور يكول كلبي تعبان يعني مثل مروان اني هم راح امو...
فهد : خليت اصابعي على شفتها مقاطعها .... لتكملين غنى انتي كلشي مابيج والدكتور يبالغ تعرفين سوالف الدكاتره انتي .... حركت اصبعي على شفايفها غنى انتي مابيج شي بس هاي مجرد حاله تجيج من تعبين وتنقهرين كلبج يأذيج ويصير صعب عليج التنفس وكل هذا بسبب الحاله النفسيه اخذت ايدها ضاغط عليها .... وهسه اذا عندج القدره تحجين اني اسمعج
غنى : اوعدني متنفعل
فهد : وعد ما انفعل ... يله نونه احجيلي اريد اسمع شنو الي خلاج توصلين لهالمرحله
غنى : رجعت من الكليه وسمعت الباب ..... اجت ود ووو.... شرحتله كولشي صار ... واخر شي كالت الج مهله اسبوع اذا ما طلعتي ابلغ الشباب اكو وحده موزينه بالطابق الرابع واخليهم سكتت
فهد : اي مو عماره ابوها وتنطيج مهله بت الك....
غنى :اباوعله يحجي وعاكد حواجبه وضغط على ايدي حيل ... شبيك فهد
فهد : هزيت راسي مابيه باوعتلها ....كلتيلي ود حجت وياج هيج وهي سببتلج الي صار
غنى : هزيت راسي
فهد : يعني انتي تعبتي اليوم وبسببها دشوفي شراح اسويلج بيها مو فهد الي يسمح لواحد يأذي شي يخصه
غنى : يخصك ؟
فهد : دنكت بست ايدها الي بيها كانونه بهدوء ... انتي صديقتي السريه حورية الاحلام الي جنت اسولف وياها من انام واني صغير وتالي ومن كبرت شفتها بالواقع .... تتوقعين ممكن اسمح لأحد ياذيج غنى
غنى : فهد اني تعبت
فهد : والله دنعل والديه الي يتعبج .... دشوفي وجهج الفاهي صاير شحاله صدك تحجين يغثوج هيج زبايل
غنى : بهدوء اني ما اريد ابقه بالشقه بعد
فهد : وين ترحين يعني مال تكليلي ارجع يم سهاد هاي كطنه وشيليها من اذنج اخليج ترجعين لذاك المستنقع النكس بعد
غنى : لا اريد ارجع لبيتي
فهد : صار بس خلي اتحرى عن الوضع واشوف اهلج بردو عليج لو بعدهم واني ارجعج ما اكيف تبقين كبال عيني دائما
غنى : اخاف خالتي متقبل
فهد : طز بيها قبلت لا قبلت مادام سافرت طلعتي من مسوؤليتها انتي وصرتي مسوؤليتي ... بس انتي ابقي هالفتره بالشقه لبين ما ارتب الوضع وهم اادب ود وساعتها اخليج تطلعين من العماره وانتي رافعه راسج
غنى : دمعت عيوني مو بعيده طلعت عليه سمعه موزينه هسه من جهه خالتي وخوالي وعمامي وبالكليه وانوب بالعماره اني نخلت عليه علامه اكس يا فهد
فهد : شحده الي يمسج بحرف قسم ورب العزه احط رجلي ب..... لتخافين من شي غنى مادام اني بصفج ووياج ما اعوفج صدكي حتى مستعد اشتريلج بيت بالمكان الي تردي وبالمحافظه الي ترديها بس المهم عندي ترتاحين
غنى : شكرا فهد لو ما انت ما اعرف شسوي او وين اروح
فهد : اني الي اشكرج لان جنتيلي مكان الجئ اله بوقت تعبي .... مسحت على ايدها وهي غمضت عيونها عرفتها راح تنام رحت جبت الادويه واجيت .... ضليت فتره لمن خلص المغذي كعتها واخذتها رجعتها للشقه ورحت اسوي اللازم
________________________
فالح : السلام عليكم
الكل : وعليكم السلام
فالح : كعدت اكلكم اليوم خابرني كامل يسألني عن اخبار غنى يريد يستفسر وين وصلنه واحنه ندور عليها
كفاح : يمعود يا ندور يا بطيخ كل عقلك صدكت راح ندور عليها دخلي تولي
سامح : بس مهما يكن تبقه الشغله شغله شرف شلون تريدنه نسكت وبت اخونه لكفوها ويه واحد
كفاح : يلكفوها ويه واحد ويه عشره احنه ماعلينه نسيتو لو اذكركم احنه تنازلنه عنها هي واخوها المرحوم لبيبيتها يعني ميخصنه بيها بعد
فالح : هسه شسوي اني خوالها خبصوني كل ساعه داكين
كفاح : البسهم وطنش
سامح : زين انتو مافكرتو هي هسه وين
فالح : حسب الي فهمته من خالها طلعت ويه الرجال الي لزمو وياها ويكلك رجال جبير الشيب تارس راسه بس لان عنده فلوس بت اخوك انطته نفسها
سامح : استغفر الله لتحجي هيج نسيت احنه شيوخ وعيبه علينه هالحجايه .... اصلا المفروض منتركها من البدايه بس انتو الله يهديكم مدري شبيكم
كفاح : اني ما شتغلت وكديت وتعبت حتى اصرف على بزرة صالح موضوع غنى ينسد وما اقبل ينفتح مره ثانيه وامي ما اوصيكم كلما تجيب طاري غنى تكلولهه زينه ومابيها شي او انقطعت اخبارها وحسكم عينكم اسمع بواحد بيكم يسولف اي شي لأمي وخاصه انت سامح ياويلك مني اذا سمعت بيك فالت بحجايه كدام امي لتنسون توصيات ازهار شنو
سامح : هو شطيح حظنه غير ازهار وافكارها الي ابليس ميفكر بيها
_____________________
ايمان : كاعده وخاله ايدي على خدي
اروى : شبيج يمه
ايمان : مشتاقه لبيت جدج صار اشهر مارايحه اشوفهم
وخوالج عتبوني لان همه دائما يجوني واني ماجاي ازورهم
اروى : اي والله حقهم صار فتره طويله مارايحيلهم
ايمان : شسوي يمه هالتشوفين المشاكل ما جاي تخلص بالبيت وين اكو واهس حتى واحد يطلع خاصه بعد الي صار كمت اخاف اعوف البيت واطلع لتروح سعاد شو شتسوي
اروى : صدك على طاري سعاد اليوم راحت ويه الحجيه لكربلاء مو
ايمان : اي من الفجر ورجعو الظهر خابرتني الحجيه كالت هناك حلفتها على كلام الله مره ثانيه بنص ضريح العباس (عليه السلام )وكايمه تحلف وتبجي بعد متسويها .... خلصو الزياره ورجعهم عمج مهدي
اروى : اااخ يمه والله تعبنه من المشاكل شوكت نصير حالنه حال العوائل ما ادري
ايمان : الحمدلله على كل حال ... طبت ورده اجتي نامت بحضني
ورده : كملن ليش سكتن ... انطلقي مدام ايمان
ايمان : ابتسمت مباوعه لاروى .... يابنتي اكو ناس عايشه اتعس من عيشتنه لابد احنه ناكل ونشرب وعدنه فهد صاير خيمه على راسنه الله يخلي ويبعد عنه كل شر
ورده : يمه تدرين مرات احسج تحبين فهد اكثر واحد بينه
ايمان : لا والله كلكم نفس المعزه عندي وما افرق بينكم كد شعره .... بس هالتشوفن انتن اولجن وتاليجن تزوجن وعلي جان ومازال ميهتم لاي شي غير نفسه وين ما تشوفي تلكي يصيح ياروحي عمره ما تحمل مسوؤلية احد غير نفسه اله فهد سوده عليه من عمره عشر سنين ولهذا اليوم الحمل فوك كتافه ومتحملنه كلنه بدون استثناء ومخلينه اولويه بحياته وحاط نفسه اخر شي لهسبب تشوفني هيج عليه
اروى : اي والله صحيح فهد شمعه بهالبيت
ورده : شكد حلو ... عندي اربع اخوان فهد الشمعه مال البيت ... وفيصل الخيخه مال البيت ... منذر الفاهي المايع مال البيت ... واخيرا علي الاناني مال البيت
ايمان : تأدبي عيب تحجين على اخوتج الكبار
ورده : تره اني بزر الكعده يعني شأت ام ابيت الصغير والجبير اكبر مني
اروى : ههه بوز مهانه
___________________
فهد : دخلت للغرفه شفتها نايمه كعدت يمها اباوعلها ... اول مره اركز بملامحها غنى صاحبه عيون جبيره ومسحوبه لونهن اسود ليل اباوع رموشها مفروشات على عيونها نزلت عيوني على انفها ... خشمها صغير اول مره اشوف عراقيه ماعدها خشم ... اباوع لوجها ابيض مثل الكطن وصافي مرمر ذره شائبه مابي نزلت عيوني لشفايفها ... شفتها حمره دم الي يشوفها يكول خاله حمره بس هي من الله طبيعيه هيج ... شكد معانيها حلوه بس اني ما اعرف ليش اشوفها مو حلوه ... شفتها تحرك وهي نايمه وتأذت ايدها فتحت عيونها متألمه ... لزمت ايدها شجاج
غنى : بألم ما ادري ... باوعتله انت ليش بعدك هنا من الظهر لسه مكابلني وكاعد
فهد : شعدي غيرج احبل اجيب
غنى : ابتسمت بهدوء لا جديات ليش لسه مرحت
فهد : شلون اعوفج وحدج وانتي مريضه
غنى : تره كولشي مابيه شويه تعب لا اكثر
فهد : حتى اذا اني يمج
غنى : لا فهد حباب روح ما الي خلك الحجي وانت اصلا باجر عندك دوام وجاي بالتراك لهنا
فهد : شلون اعوفج تخربطتي بالليل
غنى : لتخاف اخذ دوايه وحتى دوام باجر ما اداوم لان مالي خلك ... فلتشيل هم اني من احتاج شي اخابرك يله روح الساعه ب11 هسه اكيد خاله ايمان ضل بالها عليك وخطيه تلكاها منتظرتك هسه
فهد : كمت ماشي اني راح اروح وانتي اذا احتاجيتي شي وبأي وقت عسى ما بالخمسه الصبح خابريني اجيج اصلا اني لو عندي ملابس بالسياره ما ارجع
غنى : بهدوء شكرا الك واذا احتاجيت ما اتردد اخابرك
فهد : شربتها ادويتها واخذت مفاتيحي دنكت بست راسها ديربالج على روحج اني باجر خفاره للاسف صعب اطلع بس ميخالف اذا ردتي شي لترددين خابريني
غنى : قشعر جسمي من ملمس شفايفه ... هزيت راسي
فهد : طلعت من غنى خابرتني فرح ... استغفر الله مو وكتج هسه ... جاوبتها الووو
فرح : الووو هاا حبيبي شلونك
فهد : الحمدلله خير محتاجه شي
فرح : لا بس ضايجه وكلت اتصل عليك بلكي تكدر تجيني نتونس شويه
فهد : مالي خلك
فرح : بس اني متجهزه الك معقوله تردني وتفشلني
فهد : تنهدت مسافه الطريق سديته ورحتلها
____________________
نرجس : جعفر يا جعفر وينك
جعفر : كاعد اصحح اوراق امتحان الشعبه الثانيه ... نعم
نرجس : تكدر تأجل الامتحان اليومي مال باجر
جعفر : ماكو تأجيل كعدي اقري وانجبي
نرجس : والله اني قاريته بس غنى مريضه وباجر متجي لهذا كتلك اجله
جعفر : عفت الورقه ... خير شبيها
نرجس : تكول مصخنه وفلاونزه متكدر تجي وبلغتني اعتذر منك لان ماراح تكدر تمتحن
جعفر : عدها العافيه شجاها غير تدير بالها على نفسها
نرجس : شتسوي بعد ... هسه كل راح تأجل الامتحان
جعفر : لا
نرجس : وغنى ؟
جعفر : عود اعيده الها
نرجس : خطيه مو يجوز اكو طلاب ماقرو زين اجله حتى يقرون عدل ويستوعبون الماده
جعفر : عود الله كريم
نرجس : انت مينوخذ منك لا حق ولا باطل
جعفر : اي بس استكي
نرجس : افف سكتنه
___________________
فرح : ااااه فهد افتح ايدي كافي راح اموت
فهد : فتحتهن وكمت كعدت
فرح : كمت .... رجعنه على سالفه الضرب والتعنيف فهد مو كلت بعد ما اضرب وعفت التعنيف
فهد : تره تعبان مالي خلك الدوخه
فرح : كمت سبحت وطلعت خليت دهن على اديه وجسمي الي صار قطعه حمره ويون عليه من الالم ... اسويلك نركيله
فهد : هزيت راسي
فرح : صار من عيوني .... رحت سويتله النركيله واجيت شكد يأذيني بس ابقه احبه .... تفضل
فهد : اخذتها ... غنى روحي سويلي جاي وقللي الشكر ما اوصيج
فرح : باستنكار غنى ؟
فهد : رفعت راسي شكلتي
فرح : منو غنى
فهد : منو كال غنى ؟
فرح : انت
فهد : اني ؟
فرح : اي انت
فهد : شكلت
فرح : تنهدت كلت غنى
فهد : شوكت
فرح : يوووه فهد كلشي ماكلت اني اشتبهت ... كعدت يمه اليوم انت صاير عصبي شنو السبب
فهد : لا مابيه شي
فرح : فهد انت متضرب وتأذي بس وقت الي تصير عصبي
فهد : لا مو معصب بس صار فتره تارك العنف واليوم حبيت اعيد التجربه لا اكثر
فرح : تبات هنا
فهد : اخذت نفس من النركيله لا هسه شويه واروح
فرح : ليش متبات هنا
فهد : عندي دوام مافارغ اني
فرح : شلونها اختك
فهد : غمضت عيوني متنهد ... ماشي حالها
فرح : مبين عليك تحبها
فهد : اكيد احبها غير اختي كمت يله اني لازم اروح تعاي سدي الباب والمصرف عفته فوك ... بطاله الشرب ذبيهن بالزبل مفهموم
فرح : صار
فهد : طلعت منها ورحت للبيت ... وصلت لكيت البيت هدوء رحت دكيت الباب على امي ودخلت لكيت خواتي نايمات وهي كاعده تصلي صلاه الليل اعتقد
ايمان : الله يساعدك يمه وينك من الظهر لسه طالع وباجر خفارتك كلشي ماشفت منك
فهد : بست راسها حقج عليه بس شسوي اذا كل ساعه طالعتلي شغله
ايمان : خير شصاير وياك
فهد : واحد من الشباب تخربط ورحتله لان ماعنده احد
ايمان : الله يقويك على فعل الخير حبيبي ... متعشي لو اسويلك
فهد : وين اكو عشه الساعه بالوحده خليج مرتاحه كلشي ما اريد بس ارتاح يله من رخصتج تصبحين على خير
ايمان : وانت من اهل الخير يمه
______________________
الساعه ال9:00 صباحا
غنى : نايمه وفزيت على صوت الجرس مابيه حيل اكوم يربي منو اجه بهالساعه كمت على كيفي اخذت شالي وطلعت شفت بالعين السحريه ود ... هاي شتريد ... فتحت الباب .. نعم
ود : صباح الخير
غنى : بتعب شتردين
ود : دخلت وكعدت تعالي غنى اريد احجي وياج
غنى : مبيناتنه كلام رجاءا كومي روحي تره كولش مالي خلك اتناقش وياج
ود : دتعاي كعدي شبيج
غنى : كعدت وباوعتلها
ود : غنى اني اجيت اعتذر على الي سويته البارحه مجنت ادري انتي خطيبه السيد فهد واهلج من غير محافظه و اجرولج شقه عنده لان خطيبج ويأمنون عليج يمه ... اني ما ادري خاصه انتي كلتي انو جايه تدرسين و ماكلتي فهد خطيبج وعاقد عليج وهالسنه تزوجون ... لو كايلتلي من البدايه ماجان اخذت عنج نظره مو حلوه
غنى : وانتي منو من تكونين انتي وتاخذين او متاخذين عني نظره تره رأيج بيه ميهمني بس الي قهرني انتي طعنتي بيه بكون متتاكدين ... اذا انتي مؤمنه وتعرفين الله المفروض حافظه حديت الرسول (ص) الي يكول ... التمس لاخيك الف عذر
ود : حبيبتي الناس الها الظاهر ومتفكر ... يعني خلي نفسج بمكاني لو تشوفين رجال طالع من شقه بنيه ويترددلها دائما ماراح تحجين
غنى : واني شعليه نارها تاكل حطبها ربج الي يحاسبها سواء عدها شي او لا
ود : هسه احنه مو هذا موضوعنه اني اجيت اعتذر على سوء التفاهم الي صار واتمنى متزعلين مني ... ورجاءا اعتذريلي من السيد فهد ما اريده يزعل مني والله من اجه وكل لزوجي صرت بنص هدومي من الفشله واصريت اجي اعتذر منج
غنى : واعتذارج ما مقبول لو لنفرض فهد محاجي وخلص الاسبوع مو جان سويتيلنه فضيحه واني تدمر سمعتي وبسببج
ود : حقج عليه واني والله جنت بس اهددج ومستحيل اسويها لو مهما يكن اني مو وحده همجيه واسوي هيج ... اسفه وهاي راسج ابوسه
غنى : ضلت تتعذر .... بهدوء اعتذارج مقبول
ود : بست راسها حبيبتي الله يخليج وامانه اي شي تردي امري شعدنه غيرج مرت الغالي انتي
غنى : باوعتلها يعني مو لسواد عيوني لو لان غلطانه اجت اعتذرت وانما فهد شو شمسوي الها وهيج متخبله وجايه تتوسل ... كامت راحت سديت الباب وراها ورحت تمددت دك موبايلي شلته ... الوو صباح الخير
فهد : صباح النور ... حبيت اذكرج بموعد دواج خاف ناسيته
غنى : اي والله نسيته هسه اخذه ... اكول فهد ود اجت الصبح وضلت تعتذر على الي سوته
فهد : ابتسمت والله هالناس مصيبه تحترميها تمشي اعوج دوسي عليها تمشي مثل الساعه
غنى : كالت انت محاجي زوجها شكتله
فهد : مو مهم شكتله المهم وكفتها عد حدها حتى تبطل وللمعلومه تره مازن ابو الورد يصير كرايبها وهي كلتله يسوي هيج بس لتشيلين هم سويتله جره اذن
غنى : زين انت كتلهم اني خطيبتك متخاف يوصل الحجي لاهلك
فهد : العماره محد يندل مكانها غير عمي عباس كل الي يعرفو اهلي العماره موقعها ببغداد بس وين ميندلون وهذا الي خلاني احجي بدون ما اتردد
غنى: رجعت جسمي على الجربايه ... زين فهد لو اهلك درو شتسوي
فهد : لتخافين ميدرون واصلا قبل لا يوصلهم خبر احنه راح نكون منفصلين وكل واحد بينه يروح لحال سبيله انتي تتخرجين وتكملين حياتج مثل قبل ويه خالتج او ويه الانسان الي يناسبج واني هم اشوف حياتي الي هي اصلا ماشيه وما اثر عليها شي
غنى : بهدوء اني مثقله عليك مو
فهد : لا طبعا قابل شايلج على ظهري بس حبيت اوضحلج واطمنج شنو نهايه هالهوسه هاي اول تالي كل واحد بينه يشوف حياته حسب الاتفاق
غنى : تنهدت ... اي صحيح كلامك
فهد : يله عندي شغل وما اوصيج ديربالج على روحج واخذي ادويتج بانتظام وام ماجد بعد شويه تصعدلج تطبخلج وتساعدج اني طلبت منها
غنى : اوك باي
فهد : باي
غنى : سديته وغمضت عيوني ... احس فهد ديحسسني بطريقه غير مباشره انو لا اروح زايد بتفكيري مصيرنه اول وتالي الانفصال ... حسيت بشي بلل وجهي لمستها هاي شوكت نزلت دموعي اصلا عليمن ضجت كلامه صحيح ومابي ذره غلط الرجال تزوجني حتى يحميني قابل عليمن تزوجني وغلط مني اروح زايد بتفكيري ... مسحت دموعي لج غنى نسيتي شروطج انتي تردين واحد شريف وملتزم وفهد لا هاي ولا هاي يشرب ويدور نسوان هاي من غير هو لا صلاه ولا تعلى حياته عباره عن لهو وبس شلون سمحت لنفسي افكر هيج تفكير ما ادري ... يمكن تصرفاته وقربه مني خلاني احس هيج لان اني عمري ما دخل رجال حياتي جان بس مروان بهالقرب مني ويمكن فهد من تقرب مني حسيته مثل مروان لا اكثر كمت اي اي هو هيج رحت توضيت وكعدت اقره قران بدل هالافكار المالها داعي هاي
________________________
اروى : اكول نرجس غنى ليش ماداومت اليوم
نرجس : وهي تاكل ... مريضه
بتول : شبيها
نرجس : والله علمي علمجن البارحه خابرتني كلتلي اني ما اجي باجر لان عندي صخونه وما اكدر اداوم اصلا همزين ما اجت غنى بطبيعتها مزعجه من تتمرض لان بصعوبه ياله تكوم مثل قبل
اروى : سوده عليه ليش
نرجس : والله ما ادري اني ناويه اليوم اروح لخالتها حتى اشوفها
اروى : اروح وياج
بتول : شعدجن رايحات وبعدين اروى فهد ماهو ويامن ترحين
اروى : اي والله صحيح شلون سالفه هاي
نرجس : عود نمر عليج اني وجعفر بس بالاول خلي نرجع واخابر غنى اشوف موجوده
اروى : لا خلي نسويها مفاجئه الها
نرجس : اي والله خوش فكره ... بس شلون اني ما اندل بيتها
اروى : اني اخابر فهد اسأله لان هذاك اليوم هو راح وصلها
نرجس : اي عفيه
____________________
ايمان : كاعده الكط تمن ونزلت سعاد عفيه عين شلون صلفه
سعاد : صباح الخير
البنات : صباح النور
سعاد : آلاء كومي سويلي ريوك
آلاء : بعد ساعتين ويجون الولد انتظري علما يجون ونتغده
سعاد : ما اكدر انتظر ساعتين سويلي ريوك يله
آلاء : صار
سالم : سباح الحير
الكل : بضحكه صباح النور
ايمان : يا صباح الورد تعال حبيبي خلي ابوسك
سالم : احبج بيبي
ايمان : ابتسمت بعد كلب بيبيتك
سعاد : هاي شمعلمه ابنج انغام شنو ميدري اني بيبيته شلون تعلمي يصيح لغيري بيبي
انغام : خاله شجاج طفل ومتعلم وبعدين انتي ولا يوم كعدتي بحضنج بستي ناغيتي اكيد ميتقرب منج على عكس خاله ايمان تلعبه وتنيمه بحضنها اكيد يحبها
سعاد : صعدت لغرفتي والدمعه مغرغره بعيني حتى احفادي ميحبوني ويحبون ايمان اكثر مني ... حتى على هاي لاحكتني ايمان روحي عساج بالموت سرطان بكلبج ويخلصني من شرج
ايمان : تنهدت ... انغام تعالي ريكي سالم
انغام : اي ... خليت الصينيه
سالم : بيبي جوعانه
ايمان : الك حبيبي
______________________
فهد : كاعد اشتغل .... ودخلو جماعتي
عمر : باجر راح نطلع لاربيل نتونس تروح
فهد : ليش منو انطاكم اجازه
ايمن : اني صار شهرين ما ماخذ اجازه كلت اخذلي تلث تيام اروح اتونس بيهن والشباب هم
فهد : اني ما اكدر اروح
مهيمن : ليش
فهد : اول شي اني ممنوع عليه السفر لاي مكان بعيد وهاي اوامر من فوك وثاني شي اني احتاج الاجازه بشي اهم وحاليا عندي شغل ما اكدر اعوفه
عمر : واحنه كلما كنالك على شغله طلعت سالفه
فهد : مو بكيفي هذا شغل مو لعبه
مهيمن : ابو الفود صار هواي ما جاي للملهى انت خيرك
فهد : اجي اجي شتدري انت اكدر اعوف شي متولع بي
ايمن : قسم بالله لو ما الركص يفهد ميدخل للملهى اصلا
فهد : زين تعرف يله امشو طلعو عندي شغل
عمر : وهاا قد تم طردنا خلونه نطلع بكرامتنه احسن
فهد : ههه احسنت
_______________________
غنى : كاعده واباوع على ام ماجد الي واكفه تعزل ردت اساعدها بس هي متقبل
ام ماجد : اكول حبيبه مشتهيه شي اجيبلج شي
غنى : بهدوء حبيبتي ام ماجد كولشي ما اريد وعوفي الشغل وتعالي كعدي يمي البيت نظيف ماكو داعي تنظفين
ام ماجد : بعد كلبي اول مره اسمع كلمه حبيبتي حتى ابو ماجد ميكلي حبيبتي فدوه طالعه عسل منج
غنى : هههه دتعالي كعدي
ام ماجد : تدرين حبيبه هنيالج على السيد فهد احسدج عليه والله
غنى : ابتسمت ليش
ا م ماجد : كعدت شوفي يا ستي احنه جنه كاعدين ببيت تجاوز غرفه وحده صايره هي للنوم والطبخ والكعده وحمام شبه واكع بس الحمدلله كعدنه بي وسكتنه ... لحد ما يوم من الايام اجو شيلونه الحكومه لان رادت تهدم البيوت المهم ضلينه بالشارع وابو ماجد اهله كلهم بذي قار وعلى كد حالهم المهم ابو ماجد كام يدور على شغل لحد ما مل ومالكه والعيشه صعبه يا بنتي خاصه احنه عدنه سبع جهال وين نوديهم
غنى : خليت ايدي على خدي اي وبعدين
ام ماجد : وبعدين رجلي فتح بسطيه صغيره مال ماي وعصير جاي وهالسوالف قريب على المركز وكامو الشرطه يشترون منه ... وتعرف هناك على الشرطه وطلب منهم يساعدو والخبر وصل لرجلج بذاك الوقت جان ستوه صاير بعده صغير المهم من سمع عرض عليه يصير حارس بالبنايه مالته وكال يجرلنه راتب واحنه ما صدكنه كبل وافقنه
غنى : اي
ام ماجد : اي وكام ابو ماجد يشتغل واحنه كاعدين عد اختي الارمله لان ماعدنه احد وره فتره السيد فهد كال ليش متجون تبقون بشقه هنا بدال الروحه والرجعه وابو ماجد ماقبل لان على اي اساس نبقه ببيت احنه مادافعين بي شي المهم رجلج كال اقطع من الراتب جزء واعتبره ايجار وصدك اجينه كعدنه بشقه صغيره هنا واني كمت اشتغل اساعد النسوان الي هنا اذا عدهن طفل عدهن طبخ واخذ فلوس وهاي صارلنه سنين عايشين بأحسن ما يكون وولدنه صارو كبار وبناتي تزوجن وراحن وكل هذا بفضل رجلج
غنى : ابتسمت فهد دومه يحب يساعد غيره
ام ماجد : متشوفين الله موفقه واكبر مثال خلا ياخذ وحده تكل للكمر غيب اني بمكانك
غنى : ضحكت لا مو لهدرجه
ام ماجد : لا حبيبه مو مجامله صدك انتي ماشاءالله تخبلين وتلكين لك الله يساعد كلبه شلون يروح خفارات ويفارك هالحسن ... اصلا تلكي هسه نايم ويتحسر على حضنج
غنى : تنهدت يتحسر مره وحده
ام ماجد : شكلتي حبيبه
غنى : هيج ماكو شي ... كومي خلي نسوي عشه ونتعشه اني وياج
ام ماجد : اي يله اصلا اني كتلني الجوع بس مستحيه منج
غنى : عليمن هالمستحه اعتبري البيت بيتج
ام ماجد : فدوه لهالحجي الجنه بلسم بعد كلبي
غنى : ابتسمت
__________________________
ثاني يوم الساعه 3 ظهرا
اروى : فهد اريد اروح لغنى
فهد : باستغراب وين ترحيلها
اروى : للبيت البارحه ما اجت ولا اليوم وفكرنه نروح لبيت خالتها نشوفها اليوم لان البارحه انت خفر وماكو واحد ياخذني
فهد : كعدي وسكتي البنيه مريضه وحالتها تعبانه ماكو داعي ترحن تزعجنها
اروى : باستغراب وانت شدراك غنى مريضه
فهد : غمضت عيوني خرب ال.. شلون جفصه .... احم بهدوء خمنت لان انتي كايله شاطره فاكيد ماراح تغيب اله لسبب مرضي
اروى : اي ... هسه كلي توديني
فهد : اي اي اوديج قابل شعندي بس خابريها تأكدي منها موجوده او لا
اروى : لا نريد نسويها الها مفاجئه
فهد : ما اخذج اذا متخابريها يجوز البنيه ماموجوده او مالها خلك تستقبل زيارات ليش تحرجنها
اروى : ماشي اتصل عليها واتأكد
فهد : كمت دزيتلها رساله صديقاتج يردن يرحن لبيت خالتج اذا خابرنج كليلهن اني ماموجوده رحت للدكتور رحت للبطيخ اهم شي تزحلكهن فتهمتي شفتها شافتها سديته ورحت نمت
_______________________
بعد مرور اسبوع
فهد : رجعت من الدوام هلكان من التعب سلمت وصعدت لغرفتي اجيت افتح الباب لكيتها مفتوحه .... دخلت لكيت وحده متمدده على الجربايه .... صحت كوميييي فزت بسرعه وكامت
.... باوعتلها باستغراب انتي شعندج هنا
*****************
يتبع
- يتبع الفصل التالي اضغط على (ذنوب على قيد الغفران) اسم الرواية