رواية رواسي الدهر الفصل الخامس و العشرون 25 - بقلم روح الدليمي
➰➰➰➰➰➰➰➰➰➰➰
واكفه دااسعف بنيه متصاوبه، رجع الطلق بشكل مخيف
وكع واحد من الولد كدامنه ركض عليه دِلهَام حتى يساعده
قبل ليوصل يمه
وكف بمكانه لثواني معدوده، و فجأه وكع بالگاع
و الدم معبي التيشيرت مالته..
عفت البنيه استلمها عني غير شاب و ركضت على
دِلهَام و اصرخ ب اسمه بصوت عالي.. وصلت يمه
شمرت روحي شمر بالگاع و سحبت راسه بحضني
دموعي صارع تنزل بدون توقف، ايدي ترجف
و صوتي بالگوه صار يطلع..
رواسي:دِلهَام، دِلهَام تسمعني افتح عيونك فدوه باوعلي
فتح عيونه ببطئ باوعلي و ابتسم بألم، راد يحجي
حطيت ايدي على حلگه امنعه و حجيت بشهكه..
رواسي:لتحجي اشش بس خليك ويايه هسه ننقلك للمستشفى
درت راسي صحت على واحد بصوت عالي..
رواسي:تعال ساعدني بسرعه اضغط على الجرح
اجاني يركض و صار يضغط على مكان الجرح و صديقه راح يجيبلنه توك توك حتى نكدر ناخذه للمستشفى، رجعت اباوعله و عيوني كلها دموع، نسيت كلشي
بعد ما اعرف اتصرف و لا اساعده.. نطق بحروف متقطعه و صوت خافت..
دِلهَام:اني احبج روسيه
اقل من ثانيتين صار يطلع دم من حلگه، سحب نفس
و شخط، عيوني تنظرله بخوف انتظره يسحب نفس
بس ماكو عيونه بقت مفتوحه و تنظرلي
صرخت بصوت عالي اردد بنفس الكلمه
رواسي:لتموت لتموت
الولد الي يمي غمض عيونه و گال بصوت مسموع
_ الدكتور دِلهَام استشهد
عطت بي و رفعت راسه اكثر اطبطب على وجهه
رواسي:لا دِلهَام ما مات لا مستحيل هسه يكوم
ما اعرف شلون سحبوني من عنده، و شالوا ٤ شباب
نقلوا للمستشفى بقيت گاعده بمكاني و دموعي تنزل
اريد استوعب الي صار اريد اصدك انو دِلهَام مات
و بعد ما موجود بيناتنه
طلعت تلفوني من جيبي و اتصلت على رسيم، بالگوه حصلته اول ما رد عليه حجيت كلمتين و انفجرت بالبجي
رواسي:دِلهَام استشهد
حطيت ايدي على وجهي و بقيت اصرخ، اريد
النار الي صارت بداخلي تطفه، و كل بالي يم ماري
شنو يصير بيها اذا تعرف اخوها و سندها الوحيد استشهد
و تركها
ما اعرف شكد مر وقت، سمعت صوت رسيم يصيح ب
اسمي، ركضت عليه حضنته و بقيت ابجي بحضنه
و كل جسمي يرجف
رسيم:اهدي حَبيبتي شوفي شلون دترجفين ليصير
بيج شي فدوه اروحلج
رواسي:مات رسيم مات، مات بين ايدي ماكدرت اساعده
رسيم:راح شهيد الف هنياله، امشي خلي نروح
حتى تكونين يم صديقتج
ابتعدت عن حضنه و اني اهز براسي
رواسي:لا ما اكدر شلون اواجهها شلون اكوللها اخوج مات
رسيم:امشي حَبيبتي ادم راح قبلنه يبلغها
لزمت ايده تمسكت بي بقوه حسيت روحي راح اغيب
عن الوعي، انتبهلي و سحبني لحضنه تمسك بيه و صار يمشيني حتى نوصل للسياره.. رجلي صارت متشيلني بعد
قوتي و طاقتي نفذت، وكعت بالگاع فاقده الوعي..
"ماريا"
طلعت من الحمام و الفرحه غامرتني، بيدي اختبار الحمل
و عيوني متركزه على الخطين الحمر الي بي.. رحت
لغرفتي ضميته و فتحت الكنتور اريد ارتب روحي
حتى اسوي مفاجئه لادم
بعدني اختارلي فستان حتى البسه، سمعت صوته
ينادي ب اسمي
ادم:ماري وينج حَبيبي
طلعت من الغرفه و الابتسامه على وجهي، رحتله حضنته بقوه مشتاقتله صار فتره ما اشوفه عدل بسبب تواجده بالمظاهرات
ماريا:حَبيبي مشتاقتلك
حسيت شي حار نزل على رگبتي ابتعدت عنه انصدمت
بي ديبجي، حضنت وجهه بكفوف ايدي مسحت دموعه
و حجيت بقلق
ماريا:شبيك ادم ليش دتبجي
رد عليه و العبره خانكته
ادم:بدلي و تعالي حتى نروح
ماريا:وين نروح، شبيك احجيلي
ما كدر يلزم روحه اكثر صار يبجي بحرگه گلب واضحه
و يردد بكلمه "مات"، گلبي نغزني و الخوف سيطر عليه
اريد اعرف منو الي مات، كعد بالگاع و سند ظهره
على الحايط رفع تك رجل و ثبت ايده عليها و مستمر يبجي.. كعدت مقابيله لزمت ايده و حجيت بخوف
ماريا:منو مات ادم؟
رفع عيونه باوعلي و هز راسه بقهر، اردفت و الرجفه
واضحه
ماريا:واحد من اصدقائك مو؟
بقه ساكت بس ينظرلي و الحزن بعيونه عطت بي
ماريا:ادم احجي گول منو الي مات!
اندك جرس البيت، عفته و رحت اشوف منو
فتحت الباب صارت بوجهي رواسي و رسيم ساندها
واضح عليها حيلها مهدود و عيونها مورمه من البجي
ماريا:شبيكم فهموني، أنتِ تبجين و ادم يبجي شصار؟
احد من اهله مات؟
دخلت للبيت و حضنتني بقوه و تبجي بقهر، كل شهگه
تشهگها احس گلبي يتگطع الى اشلاء.. بعدتها عن حضني و حجيت ب انفعال
ماريا:حَبيبتي شبيج بس فهموني راح اتخبل والله
رسيم:خلي ندخل جوه و نحجي
دخلتهم للصاله و ادم دخل وراهم، تقدم عليه رسيم
حضنه و حجه وياه بصوت خافت ما سمعته شكال
رجعوا كعدوا و يباوعون عليه و نظراتهم كلها حزن
و حيره
ماريا:احجوا شبيكم
ادم:تعالي هنا يمي
رحت كعدت يمه لزم ايدي و باوع بعيوني و گال
ادم:ماري أنتِ قويه و مؤمنه برب العالمين، و تعرفين
انو المؤمن مبتلى
الخنگه لزمتني و عيوني دمعت گلبي ينغزني
ماريا:گلبي خلص احجي شصار دِلهَام وينه؟ ليش ما رجع وياكم ؟
بقه يباوعلي بتردد، و اخيراً نطق بس ياريته
باقي ساكت و لا گال كلامه الي مثل السجين و نبتت بنص گلبي
ادم:دِلهَام استشهد ماري
ضحكت مستهزئه بكلامه و حجيت بعدم تصديق
ماريا:شدتكول أنتَ؟ سامع روحك لو لا! ليش تفاول على اخويه بالموت
رسيم:البقيه بحياتج الله يرحمه و يصبرج
عطت بصوت عالي و ضربت على وجهي بكل قوتي
ماريا:لا لا ما مات ما عافني لااااا
فقدت فد مره اضرب بروحي و اهلس بشعري
حضني ادم يمنعني و كلهم يبجون ويايه
صرت الوب بين ايده و اصرخ فرفرحت روحي
ماريا:دِلهَام وين جيبوا رجعولي اخويه رجعوا
"رواسي"
من بين صياحها و لطمها، تخربطت علينه ادم شالها
و ركض بيها و صاح على رسيم
ادم:رسيم شغل السياره
طلع رسيم و اني وراه صعد ادم وره و حطها يمه
حرك رسيم السياره و طول الطريق دموعي ما وكفت ابد
و ادم يحاول يصحيها بس لا تصد و لا ترد..
وصلنا للمستشفى نزلها ركض ما انتظر يجيبوله سديه
دخلها للطوارئ، رسيم حضني يسكت بيه و گال
رسيم:روسيه بويه كافي بجي
حجيت و الشهكه واضحه
رواسي:ما اكدر رسيم دِلهَام عزيز عليه حيل و مات كدام عيوني ما كدرت اساعده ما كدرت مات بسببي ما ساعدته
رسيم:هذا يومه حتى لو ساعدتي چان حيموت لتحسين بالذنب ابد لان مو بيدج
بقه حاضني و يهدأ بيه، طلع ادم من يم ماري رحتله
و سئلته عليها گال
ادم:انهيار عصبي و سوولها تحاليل
رسيم:دِلهَام ب اي مستشفى؟
ادم:هنا
رواسي:اريد اشوفه
باوعلي رسيم هز راسه رافض الفكره و گال
رسيم:لا ميصير
ادم:اي حتى ماري ما اخليها تشوفه راح اكمل باقي الاجراءات حتى ندفنه الصبح
بقيت الح عليهم اريد بس اشوفه اخر مره، بس محد خلاني.. مر وقت مو قليل صحت ماري بس بالها مو ويانه بس دموعها تنزل و القهر واضحه على ملامح وجهها.. صعدنا السياره گالت بهدوء
ماريا:ادم اخذني لبيت اخويه
ادم:خلي نروح لبيتنه هسه
عاطت بي بحرگه
ماريا:گلت وديني لبيت اخويه
رسيم ساق ب اتجاه بيت دِلهَام الطريق كله هيَ تبجي
و بس صوت شهكاتها ينسمع، و اني ابجي على بجيها
وصلنا البيت نزلنا من السياره فتحت الباب و دخلنا
راحت لغرفه دِلهَام بدون متحجي اي شي
ردت اصعد وراها رسيم منعني گال
رسيم:خليها وحدها شوي
مسحت دموعي باوعت لادم و گلت
رواسي:الفاتحه وين حتصير هنا لو ببيتكم؟
ادم:على الاكثر هنا، رسيم بلغتهم مو؟
رسيم:اي خابرتهم كالو ب ٦ يجون
رواسي:اريد اروح ابدل ملابسي و ارجع لماري
ادم:روحي بس لتتأخرين محتاجتج هيَ أنتِ و البنات
رواسي:ما اتأخر بس البس شي مناسب و انطي خبر لاهلي
ضرب على راسه كأن ذكرته و گال
ادم:نسيت اگول لاهلي
رسيم:احنه رايحين و أنتَ خابرهم اي شي تحتاجه بتلفون واحد تلگاني يمك راح ادز رشا و عذراء هم يساعدوكم
ادم:متقصر حَبيبي
رحت على ادم حضنته و حجيت بحزن
رواسي:بالك على ماري ادم لتعوفها علما ارجع
ادم:بروحي هيَ ميحتاج توصيني عليها
ابتعدت عنه و رديت
رواسي:اذا تحجي اي شي ف لتاخذ بحجيها من حرگه گلبها على اخوها و لتخليها وحدها خاف تسوي بروحها شي
ادم:يمها ما اعوفها مستحيل
طلعنه اني و رسيم الطريق كله ساكتين و الحزن مخيم
بملامحنه، ذبني يم البيت و گال
رسيم:ابدل و اجي اخذج ما اتأخر
رواسي:راح ياخذون دِلهَام للبيت؟
رسيم:اي الفجر نطلع للدفن
برطمت شفايفي مقهوره روحي محترگه عليه، الاحساس
بالذنب ما فارگني ولا ثانيه، يمكن لو مستعجله و اسعفته چان ممكن يكون بيناتنه هسه
فهمني من نظرات عيوني و گال بكل هدوء
رسيم:لتحسين بالذنب قضاء و قدر الله كاتبله بهل يوم يموت، دِلهَام ما مات دِلهَام يبقى عايش بگلوبنا
راح شهيد يم ربه من هاي اسحبي رب العالمين شكد يحبه و اختاره من بين ملايين الناس، لتعبين عيونج الحلوه
بالبجي ادعيله بالرحمه
رواسي:الله يصبر گلب ماري على فراگه، احنه صار فتره من دخل لحياتنه و هيج تأذينه هيَ شلون راح
تكدر تكمل بدونه و هوَ چان الها كلشي بحياتها
نزلت من السياره و دخلت للبيت لكيت امي گاعده
توكل مسك و تغنيلها، بقيت واكفه اباوع عليهن و دموعي
تنزل على الصامت، انتبهتلي مسك و صاحت بفرح
مسك:اجت ماما حَبيبتي
رواسي:روح امج أنتِ اشتاقيتلج تعالي
اجت تركض عليه اخذتها بحضني و صرت ابجي
امي باوعتلي مستغربه من بيجتي و حجت متسائله
جميله:شبيج روسيه ليش تبجين؟
بعدت مسك عن حضني بستها و گلت
رواسي:مسكه تنتظريني بالغرفه هسه اجيج
هزت راسها و صعدت على الدرج، كمت كعدت
يم امي و حجيت بكسره و حزن..
رواسي:ماما دِلهَام استشهد
شهگت و لطمت على صدرها عاطت بعدم تصديق
جميله:عزا بعيني صدك تحجين!
حطيت ايدي على وجهي و شهكت بصوت عالي
رواسي:مات بين ايدي امي، ما كدرت انقذه ما كدرت اسويله شي، مات و هوَ يكلي احبج، نار بداخلي محد يحس بيها..
دموعها صارت تنزل بغزاره و تهز براسها ممصدكه
كمت من يمها صعدت فوك وكفت بباب الغرفه مسحت دموعي و دخلت، لكيت مسك گاعده على الجربايه و ماخذه صورتنا اني وياها و رسيم بعد ما عقدنا بالمحكمه
تسولف وياها كلام ما مفهوم، ابتسمت بكسره
و حجيت
رواسي:شتسولفين ويه الصوره؟
مسك:اروح يم بابا
رواسي:بابا مشغول هسه ميكدر ياخذج بعد كم يوم عود تروحين
هزت راسها باست الصوره و رجعتها مكانها، رحت فتحت كنتوري طلعتلي فستان اسود مستور و فتت سبحت
بسرعه و طلعت بدلت ملابسي و نشفت شعري و ضفرته
طلعت جنطه صغيره حطيت بيها اغراض الي و ملابس
و شاحن التلفون و خابرت رسيم
رسيم:روسيتي
رواسي:خلصت اني تجي تاخذني؟
رسيم:نص ساعه و اكون يمج ازدحام
رواسي:انتظرك
سديته من عنده و اخذت اغراضي و نزلت، لكيت امي
مبدله هيَ و مسك و كاعدات بالصاله و ابويه راجع من الشغل، كاعدين و الحزن و القهر واضح عليهم
امي و ابويه راحو قبلي و اني بقيت انتظر رسيم
و مسك ويايه، دك تلفوني باوعت نارين تتصل
رواسي:نارو
ردت بصدمه
نارين:رواسي صدك دِلهَام مات؟
رواسي:اي خابري نرجس و تعالو لبيت دِلهَام ماري محتاجتنه يمها
نارين:مدااصدك ولج شلون مات شوكت ليش محد گال !
رواسي:هسه خلي كلنا نكون يم ماري و لازم نبقى قويات حتى نكدر نسندها
سديتها منها بعد ما اتصل عليه رسيم، اخذت اغراضي
و لزمت ايد مسك و طلعنه صعدنا بالسياره، مسك بقت
تبجي تريد تكعد بحضن رسيم وكف السياره اخذها بحضنه و كمل سياقته بصمت
وصلنا للبيت لكيت كومه سيارات واكفه بَره، و نساوين
ديدخلون للبيت، نزلنا من السياره و رأساً دخلنا
مسك خافت من صوت البجي و النحيب شلتها بحضني
و صعدت فوك لغرفه ماري حطيت اغراضي بيها
و قفلت غرفتها و غرفه دِلهَام و حطيت المفاتيح
بجنطتي، جنطه صغيره كلش على كد التلفون و بيها سحاب للفلوس حطيت المفاتيح بي
رحت للمطبخ لكيت نارين و نرجس جايات قبلي، كعدت مسك على الكرسي و خليت تلفوني بيدها تلعب بي
وكفت يم البنات ثنينهن حضنوني و صرنه نبجي
هنَّ علاقتهن بدِلهَام قويه كلش، لان صديقات ماري من
ايام المتوسطه، حزنهن و قهرهن ميقل عن ماري
العالم صارت تجي ما اعرف منين بحيث الصاله و الاستقبال انترسن ترس، ماري فاصله عن العالم كله
بس دموعها تنزل على الصامت
فتحت عيونها على وسعها لما سمعت صوت الشباب
بَره يرددون "لا اله الا الله الشهيد حبيب الله" گامت
من مكانها ركضت على الباب تريد تطلع بَره
لزمناها اني و البنات نمنعها و هيَ فرحفت بين ايدنه
تصيح و تصرخ
ماريا:هذا دِلهَامي خلوني اشوفه حبيب روحي
ابويه هوَ
حضنتها بكل قوتي و ابجي على بجيها، احاول اهديها
رواسي:ماري على كيفج ويه روحج عُمري أنتِ، هسه يجيبوا بس لتسوين بروحج هيج
انفتح باب البيت و دخل ادم، عيونه حمر و وجهه حزين
ادم:رواسي راح ندخله
بالگوه سحبت ماري رجعتها بالصاله، وره شوي
دخلوا ادم و اخوانه شايلين التابوت و حاطين عليه
علم العراق، نزلوا بوسط الصاله و طلعوا همَّ بقه بس ادم
بقت واكفه مصدومه و تباوع
شمرت روحها على التابوت و صرخت بصوت قشعر الابدان، رجت البيت رج بصرختها، خلت الكبار و الصغار يبجون على بجيها
بقت تحجي بصوت عالي و گلب محروك، و تعاتب بي
لان عافها، كعد يمها ادم و سحبها لحضنه يهدي بيها
فقدت فد مره.. دفعته و عاطت بي
ماريا:أنتَ أنتَ السبب، أنتَ من دخلت حياتنه دمرتناا
أنتَ دخلت حياتي و فگرتني، اخويه مات بسببك
امشي اطلع بَره امشي ما اريد اشوف وجهك بعد
رفعت عيونها شافتني واكفه اشرت عليها و عاطت
ماريا:و أنتِ هم ما اريد اشوفكم بعد اطلعوا من حياتي
لعبتي على اخويه حتى تنسين رسيم، خليتي يتعلق بيج و يحبج تالي رجعتي للشخص الي دمرج و دمر حياتج
حجت نرجس منفعله
نرجس:ماري سكتي گلبج محترك على اخوج حقج، بس عيب عليج تحجين هيج
ادم اشرلها تسكت و سوه حركه بيده يعني عوفيها
رجعت حطت راسها على التابوت و صارت تسولف وياه
بصوت ناصي و بس صوت شهگاتها ينسمع
مر شهرين ماري حالتها يرثى لها، لا تقبل تاكل و لا تشرب و حابسه روحها بغرفه دِلهَام متقبل تطلع منها
اني متريد تشوفني ابد بكل مره اروحلها تكلي
"اخويه مات و نفسه بيج ما اريد اشوفج بعد"
انقهر فوك قهرتي اضعاف، شعور الاحساس
بالذنب ما فارگني، عزلت روحي بغرفتي ليل نهار ابجي
مثل عادتي نايمه بفراشي
اندك باب غرفتي ما اهتميت و بقيت نايمه بفراشي
و مغطيه راسي، انفتح الباب و سمعت صوت خطواته
يتقدم عليه، مد ايده سحب الغطه عني و گال
رسيم:روسيتي شبيج حَبيبي
نزلت دمعتي و حجيت
رواسي:ما اكدر انسه، حاولت ماكدرت
كعد يمي على الجربايه و سحبني من ايدي كعدني
و اخذني بحضنه، مسح على راسي بهدوء و گال
رسيم:روسيه صعبه اعرف، بس لازم تنسين حتى تكملين طريقج متكدرين تخطين اي خطوه اذا ما ساعدتي روحج
رواسي:مات بسببي اني ما ساعدته ما اسعفته حتى يعيش
بعدني عن حضنه حاوط وجهي بيده و طبع بوسه على
كل عين و على گصتي و گال
رسيم:قضاء و قدر هذا، اني كم مره تصاوبت على ايدج؟
و قبلها هم متصاوب ب٥ مرات بس بعدني عايش
لان ما اجه يومي رب العالمين ما كاتبلي اموت هسه
اما دِلهَام هذا يومه لا بيدج و لا بيد اي شخص ثاني انو يساعده و ينقذ حياته الله كاتبله يموت بهذا اليوم و بهاي الطريقه
صفنت على كلامه كله صحيح، شي مو بيدي حتى لو
حاولت اسوي شي هم چان مات، مد ايده مسحلي دموعي
و اردف
رسيم:خلي يمر انوب شهر و تبلشين بتحضيرات العرس
لو بطلتي متريدين
هزيتله راسي رافضه و گلت
رواسي:لا ما اريد عرس و لا اريد اتزوج عوفني هيج
رسيم:امشي ويايه لبيتنه لعد
رواسي:لا ما اريد خليني هنا
رسيم:رواسي
رواسي:هاا
رسيم:احبج
رواسي:اوكي
تقرب عليه يريد يبوسني، دفعته و نترت بي
رواسي:مو وكت هل سوالف رسيم!
رفع حاجبه مستغرب رد عليه
رسيم:شبيج؟
رواسي:مابيه شي بس مو وكت بوساتك و رومانسيتك
مصار بس شهرين على موت دِلهَام، و أنتَ جايني تدور عرس و ما اعرف شنو
رسيم:دِلهَام شنو يقربلج؟
رواسي:اخو صديقتي و زميلي بالشغل
رسيم:اخوج؟
رواسي:لا
رسيم:حبيبج؟ خطيبج؟ زوجج؟
رواسي:لا بس
قاطعني و هوَ يكمل اسئلته
رسيم:ابن عمج لو عمتج
هزيتله راسي ب "لا" اردف
رسيم:ابن خالج لو خالتج
رواسي:هم لا
رسيم:و تعرفين كلهن لا شكو هيج تتصرفين؟
صار شهرين مقدر وضعج و اگول مات كدام عينها
مو سهل تنسى، بس تصرفاتج توضح غير شي رواسي!
تقربت عليه حضنته بهدوء و گلت
رواسي:مو هيج بس عزيز عليه هوَ، بفتره غيابك عني
هوَ چان ويايه و سوه كلشي حتى يطلعني من حالتي الي وصلتها
رسيم:تحبي أنتِ
ابتعدت عن حضنه ركزت نظراتي بعيونه و حجيت
رواسي:لا والله، حاسبته اخ الي مو اكثر من هيج ابد
كام من يمي و گال
رسيم:تمام اني رايح من تكونين جاهزه و مستعده
ترجعين لبيتج خابريني، اذا تردين عرس بعدني عند كلمتي احلى عرس اسويلج و اذا متردين براحتج
رواسي:خليك يمي لتروح
رسيم:شنو الفايده ابقى يمج و أنتِ هيج تتصرفين؟
رواسي:اسفه اذا زعلتك، بس حاول تفهمني أنتَ هم
رسيم:فاهمج و مقدر حالتج و وضعج
لزمت ايده و كمت وكفت كدامه، طبعت بوسه على شفته
و حاوطت رگبته بيدي و حجيت بهدوء
رواسي:صعبه كلش اترك صديقتي تعاني وحدها و اني احير بتجهيز عرسي و اسوي عرس و افرح، هيَ شنو راح تكون ردة فعلها؟ اكيد تزعل مني
حاوطني من خصري و رد عليه
رسيم:بعد ما اتحمل بعدج عني روسيتي، اريد نرجع
ببيت واحد و غرفه وحده ننام و نكعد سوه، من اكعد على السفره اشوفج كدامي، اول ما افتح عيوني الصبح اريد
اشوف عيونج
رواسي:تحمل بعد شوي بس خلي تمر فتره بعد
و ماري ترجع لوضعها و تتحسن نفسيتها
رسيم:الي يريحج حَبيبي، اني نازل جوه أنتِ بدلي
و تعالي اليوم اريد اتغده وياج
رواسي:تمام عُمري اسبح و اجي ما اتأخر
باسني و طلع من الغرفه، فتحت كنتوري طلعت ملابس
و فتت سبحت بسرعه، بدلت و نزلت جوه لكيت ادم
هم جاي كاعدين يسولفون هوَ و رسيم و ابويه
سلمت عليه و دخلت للمطبخ يم امي
رواسي:شمسويه اكل ترا جوعانه؟
جميله:لو نعرف رسيم يطلعج من غرفتج چان من زمان خليناه يجيج
رواسي:يوميه يجي شنو الجديد
جميله:كل مره ميحجي وياج هالمره مبين حجيه جاب نتيجه
رواسي:اهوو امي هسه ارجع ترا
جميله:دروحي كعدي هسه بعد الاكل مو جاهز
رواسي:شسويتي اريد اشوف
جميله:برياني
رواسي:تمام عاشت ايدج
طلعت من المطبخ رجعت كعدت يمهم
رواسي:ادوميز شلونك؟
رسيم:اندومي؟
ضحك ادم و گال
ادم:خلف الله عليك سويتني اندومي
رسيم:غير هيَ تكول اني شعليه
رواسي:ادوميز دلع مميز معليك أنتَ
ادم:اندومي الحمدلله عايش
رواسي:ماري مارجعت؟
ادم:متقبل ترجع، و البارحه يلا عرفت هيَ حامل صارلها شهرين
راشد:لتضغط عليها و بنفس الوكت لتعوفها حتى متكول
عافني و اني محتاجته
رواسي:اي لتصير مثل رسيم ديربالك
باوعلي و رفع حاجبه معاجبه
رسيم:شبي رسيم مو عاجبج؟
رواسي:قبل لا مجنت تعجبني بس هسه تعجبني اني و عشيرتي كلها
راشد:لتحجين عن غيرج، رسيم ميعجبني
رسيم:افاا بس افاا ليش هيج عمي جرحتني جرح جبير
باوعلي ابويه و گال ب استعجال
راشد:روسيه بسرعه اركضي جيبيله لزگه جروح، يلزك جرحه ليموت
ضحك ادم و گال
ادم:لا عار ميصيرله شي
بقينه نسولف و واحد يذب حجي للثاني، انبتهت عليهم
ديسوون هيج حتى يطلعوني من المود و نجحوا بهذا الشي
غيرت جو وياهم و حسيت روحي استعدلت
صاحتني امي كمت وياها صبينه الغده و نقلناه للصاله
كعدنا كلنا نتغده سوه، اكلت اول لگمه رفعت عيوني على
رسيم يباوعلي مبتسم
رواسي:أنتَ سويته مو؟
رسيم:لا امج
رواسي:لا أنتَ والله أنتَ هذا طبخك، امي متسوي هيج
ضحكت امي و گالت
جميله:مو گتلك راح تعرف مو اني سويته
ادم:مبين ذاك هوَ مو طبخج عمه
راشد:صح طيب بس ماكو شي يعلى على طبخ جميلتي
رسيم:لتتغزل بيها جميلتك يمك، بس وين احنه نساوينه
كل وحده بصوب
ضربه ابويه على ظهره و نتر بي
راشد:شوكت تتأدب سرسري، ابوها اني
رسيم:اي اني زوجها عادي
ادم:اني مرتي حاله خاصه لتدخلها رجاءً، احجي على مرتك
رسيم:مرتي شلت حالي متقبل تجي يمي
ادم:أنتَ تعال يمها
عاط بي ابويه
راشد:خير شو صاير تنطي افكار؟ هوَ من غير شي
مو گاعد راحه
رواسي:كافي خلونا ناكل شبيكم اوي
رسيم:وجعوي حَبيبتي
رواسي:بسيطه رسيم اني اعلمك، بس مو هسه خلي اكمل اكل
كملنا اكل كمت غسلت المواعين و رتبت المطبخ، خدرت جاي و اخذته.. اندمجوا يسولفون سوه و اني حاطه مسك بحضني العب بيها و نصور اني وياها
دك تلفوني و انصدمت لما شفت اسم ماري على الشاشه
رديت عليها و كمت من يمهم
رواسي:ماري حَبيبي شلونج
ماريا:تكدرين تجيني؟
رواسي:اي طبعاً بس شبيج؟
ماريا:اريد احجي وياج
رواسي:هسه اخلي ادم يجيبني
ماريا:شلونه؟
رواسي:مو زين والله تعبان كلش
ماريا:سوده عليه، مو قصدي حجيت وياه هيج
محترك گلبي على اخويه ما جنت اعرف شنو احجي
رواسي:هسه نجيج و نحجي
سديته منها و دخلت للصاله باوعت لادم مندمج يسولف ويه رسيم، رحت يمه سحبته من ايده و گلت
رواسي:يلا كوم مرتك تريدك اقصد تريدنا
ادم:منو ماري؟
رسيم:ليش عندك غيرها اذا عندك اعترف
ادم:انجب أنتَ، امشي بسرعه
رواسي:رسيم مو تروح ابقه هنا بس اجي اريد اعاقبك
رسيم:راح اخذ مسك للبيت و ارجعها بعدين
رواسي:تمام باي
طلعت بسرعه وره ادم و رحنا لماري، الطريق كله
متوتر ميعرف شنو تريد و يسوق بسرعه حتى يوصل
وصلنا و نزل قبلي من السياره بعدين رجع تذكر ما طفاها
ضحكت عليه و كتله
رواسي:شبيك مستعجل اصبر شوي
ادم:ميت عليها ميت فضيني نزلي
نزلت من السياره قفلها و دك الجرس، بقينه ننتظر شوي
و انفتح الباب صارت بوجهنا خالتها ام عماد سلمنا عليها و دخلنا
رواسي:ماري وين؟
ام عماد:بغرفه دِلهَام تنتظرج
رواسي:روح أنتَ قبلي
هز راسه و راح كعدت اني بالصاله و الدموع تجمعت
بعيوني، رجعتلي كل الذكريات صرت اتذكر سوالف دِلهَام و اتخيل صورته بكل زاويه بالبيت
ام عماد:اقنعوها ترجع لبيت رجلها اذا تبقى هنا
نفسيتها تتعب اكثر
رواسي:ان شاء الله ترجع، مو سهل ترجع تعيش حياتها طبيعي اخوها الي مات مو شخص عادي
ام عماد:والله گلوبنه مشتعله بغيابه بس شنسوي هذا امر الله
رواسي:الله يرحمه و يصبركم
سمعت صوت ادم يصيح ب اسمي، كمت رحت يمهم
وكفت بالباب اباوع لماري و هيَ تباوعلي و دموعها تنزل
اجت حضنتني و زادت بالبجي و اني ابجي على بجيها
ماريا:اسفه رواسي جرحتج بالكلام هوايه و طردتج من البيت
ابتعدت عنها مديت ايدي امسح دموعها و حجيت
رواسي:ما زعلت منج ابد، و جنت متوقعه هيج تكون ردة فعلج
ماريا:مو بس أنتِ حتى البنات نفس الشي بس
بعدني ما حجيت وياهن
رواسي:روحي لبيتج ارتاحي و نجيج كلنا عود، احنه خوات مابيناتنه زعل
مرت فتره و ماري بلشت تجهز لطفلها، بيها ولد و طايره من الفرحه و تكول "اسم دِلهَام راح يبقى على طول ينذكر"، اني و رسيم طيور حب
عوضني عن كل اذيه و كل دمعه نزلت من عيني بسببه
ماليني بحبه و حنانه، طاير بينه اني و مسك و يحير شنو
يجيب و شنو ياخذ
بس يضوج مني و يتعارك كل ما يجيب موضوع العرس
و اني ارفض اسوي هسه، قرب موعد ولاده ماري
تجمعنا كلنا يمها نساعدها بتنظيف البيت
و تجهيز اغراض البيبي
نارين:رواسي عرسج شوكت؟
ذبت ماري الوصله من ايدها و كعدت فحطانه
ماريا:اي صدك صارلكم سنه مخطوبين
رواسي:بعد مو هسه
نارين:اذا خانج الرجال عود تعاي اشكي و ابجي
و گولي رسيم خاني رسيم ميحبني
نرجس:لو يحبها صدك ينتظر عسى ما عشر سنين
رواسي:اخر فتره متوترين ثنينه بس يجيب موضوع العرس نتعارك و يسد التلفون و اذا يمي رأساً يعوفني و يطلع
ماريا:شمنتظره؟
باوعتلها و حجيت بتردد
رواسي:على الاقل تمر سنه على موت دِلهَام
حجت منفعله
ماريا:ليش تنتظرين؟ لا هوَ اخوج و لا واحد من عائلتج
و اذا علمودي ف اني دااكلج سوي عرسج و افرحي
نرجس:كلنا حجينه نفس الحجي بس جيب الي يسمع و يفهم
رواسي:ما اكدر اسوي عرس و افرح، و أنتِ حزينه
ماريا:معليج بيه هسه تخابري كدامي و تكوليله تحددون موعد العرس
رواسي:بس ما..
قاطعتني و هيَ تمدلي بالتلفون
ماريا:خابري گلت بلا بسبسه، مو زين لكيتيلج رجل
تردي ينهزم منج
دكيت على رسيم بقيت انتظره يرد عليه بس
زعلان مني ميقبل يجاوب، كتبتله رساله
رواسي:حَبيبي شوكت نسوي عرسنا ؟
ثواني و اتصل عليه، رديت عليه و ضحكت
رواسي:مو زعلان مني
رسيم:زعلان لان طك گلبي عليج، روحي تريدج
رواسي:ديلا خوش
رسيم:شوكت تردين العرس؟
رواسي:يوم ١/٧
رسيم:بعد شهر!
رواسي:اي حَبيبي غير حتى نلحك ننطي خبر للعالم، و احجز مركز و سوالف و هيج
رسيم:بعد ما اكدر اصبر
رواسي:صبرت هوايه بقه بس شوي اصبر لخاطري
رسيم:بليل اجيج و نتفاهم هسه عندي شغل
سديته من عنده ماري گالت
ماريا:رواسي سوي العرس قبل لا اجيب
رواسي:تجين؟
ماريا:طبعاً مستحيل اعوفج وحدج بهيج يوم
كملنا البيت ويه ماري البنات اخو نارين اخذهن
و اني رسيم اجاني، صعدت السياره رأساً حرك
بدون ميحجي شي لزمت ايده و حجيت متسائله
رواسي:شبيك حَبيبي
رسيم:مابيه شي عُمري بس تعبان شوي
وصلنا للبيت و نزلنا سوه، كعدنا ويه امي و ابويه
حتى نتفق علمود العرس
رسيم:يعني نثبت على ١/٧؟
رواسي:اي تاريخ حلو
جميله:تلحگين تكملين تجهيز بهذا الشهر؟
رواسي:كلشي عندي اخذ شغلات قليله و البدله اشتريتها من زمان ماعندي شي بس نحجز القاعه و الصالون
و نعزم العالم
راشد:و الحنه شوكت تسويها؟
رواسي:ما اسوي حفله اريد نجتمع اني و البنات
و بس
رسيم:هاهيه مثل متردين تدللين
بقه گاعد شوي يمنه و بعدها اخذ مسك وياه و راح،
من ثاني يوم التهينه بالتجهيز سوينه كروت الدعوه
و التوزيعات مال عرس، ما حسينه شلون و شوكت خلص الشهر و اجه موعد العرس
من الصبح اخذنا ابويه للمركز، و البنات هم اجو
و رشا و عذراء رأساً استلموني يجهزوني
اختاريت مكياج بسيط و الوان هادئه، و الحمره
ورديه على حمار بلون الورد الي بالمسكه
تسريحه شعري كله مرفوع و من كدام بي تكسرات متفرقه و خصل نازله، و التاج ضخم ملكي
لبست البدله كد ما ضخمه و جبيره، اكتافي وجعتني
منها
خلصنا من الصالون رسيم خابرني
رسيم:حَبيبي خلصتي؟
رواسي:اي و أنتَ
رسيم:اني بَره انتظرج
اجتني مسك تركض ببدلتها الحمره، فرحانه
و تفتر كدامي تشوفني روحها
رواسي:لك شنو هذا الجمال مسوكتي طالعه اميره
مسك:اريد اصير عروسه
رواسي:و احلى عروسه أنتِ
طلعت يم البنات و استلموني هلاهل و هوسات
امي واكفه تباوع عليه و تبجي، رحت يمها بستها من راسها و حضنتها
رواسي:ماما لتبجين شنو هاي
جميله:اسم الله عليج تخبلين حَبيبتي
رواسي:لتبجين و تبجيني وياج
كامت ماري من مكانها بالكوه بطنها جبيره، صارت تهوس و البنات و ياها
ماريا:چان صاحبها و خذاها، منين دورها ولگاها
رواسي:لا مو هيج، گولي چان خاطفها
ضحكت و اجت حضنتني و گالت
ماريا:الله يسعدج روسيه تستاهلين السعاده
اخذولي صور و طلعت ماري كدامي تبلغ رسيم
ساعدوني البنات اطلع، للحظه تندمت على هاي البدله
لان ثكيله كلش بالگوه اتحرك بيها
طلعت من الباب شفته واكف و المسكه بيده
اجه اتجاهي يمشي بهدوء و عيونه عليه ما شالهن عني
طبع بوسه على راسي و قدملي المسكه
رسيم:اميرة گلبي و روحي، جاهزه نبلش حياتنه
من جديد نبلش حياة كلها حب و سعاده
رواسي:كل يوم و كل لحظه احبك رسيمي
لزم ايدي و صعدنا بالسياره نروح قبلهم للقاعه
علمود التصوير، الطريق كله ايدي بيده ما تركها ثانيه
و الفرحه واضحه علينا وصلنا للقاعه و بلشنا ويه المصوره تصوير
العالم كلها اجت و صار موعد دخلتنا، حبينا تكون مختلفه
عن المعتاد اختارينه اغنيه "C'est la vie" للشاب خالد
دخلنا نركص بحماس ويه كلمات الاغنيه لحد ما وصلنا
نص القاعه و تغيرت الاغنيه لاغنيه حسام الرسام
"عرس المرجله"
محمد و غسان و اصدقاء رسيم سووا هجوم
البنات اجن يمي و صرنا كلنا نركص و الفرحه ماليتنه
خلص عرسنا بعد رگص دام ٦ ساعات متواصله
و ملاعيب العيد يعني الكيك و الاكل و السوالف هاي
كلشي چان من احسنه
و دعنا اهلنا و طلعنا للفندق الصبح طيارتنه لاحدى
الدول نروح شهر عسل.. نزلنا من السياره
تقدم واحد من الولد نزل الجنط من الصندوك
دخلنا انطونه مفتاح الغرفه و صعدنا فوك و ويانه نفس الولد يسحب بالجنط كدامنه
حط الاغراض بالغرفه و طلع هوَ بقينه بس اني
و رسيم، قفل الباب و تقدم عليه حاوط خصري بيده
و همس بخدر
رسيم:اميرتي من حق الاشتياق قبله وعناق
رواسي:اذا تصير ادبسز ارجع لبيتنه
رسيم:جاا شني ماخذج مزهريه
شدني عليه اكثر طبع بوسه على شفايفي و اردف
رسيم:روحج بروحي خليها، طفيلي نار گلبي الشتعلت بغيابج روسيتي
ابتعدت عنه و اشرت على البدله حجيت بجرأة
رواسي:اني و بدلتي لو بدون؟
رسيم:شسوي بالبدله بدونها حَبيبي
انداريت انطيته ظهري و حجيت بهدوء
رواسي:افتحها حَبيبي
مد ايده على الحبل المربوط فتحه و فتح السحاب
لزمت البدله من كدام و طفرت للحمام و قفلت الباب عليه
دك الباب بخفه و گال
رسيم:عرفت وره جرأتج هاي طفره غير متوقعه
رواسي:متستحي ماعندك خوات
رسيم:لا ماعندي افتحي الباب رواسي
رواسي:خليني اسبح شبيك بعد الليل طويل
رسيم:اسبحج اني خاف تعبتي؟
عطت بي
رواسي:لتصير ادبسز ترا اطلگك
رسيم:اسبحي و اشوفج الادبسز على اصوله
فتحت المي و وكفت كدام المرايا افتح بشعري، بعد معاناة
فتحته كله و دخلت اسبح احس كل جسمي تكسر من
الركص ما كعدت ابد
كملت سبح لبست البرنص شلت بدلتي طلعت من
الحمام، حطيتها على جهه و دورت لرسيم مالكيته
صحت ب اسمه اجاني صوته من البلكون، نفخ الدخان
و طفه الجگاره و دخل للغرفه
مشه ب اتجاهي و هوَ يفتح بدگم القميص، انداريت و مشيت عنه رحت فتحت الجنطه طلعتلي بجامه ستن لون ابيض و بيها ريش من الردان، رفع حاجبه يباوع مو عاجبه و گال ب امر
رسيم:ممنوع تلبسيها
رواسي:ليش؟
رسيم:رواسي اليوم عرسنا و لحد هسه بالگوه لازم روحي عنج، امشي طلعيلج غير شي
رواسي:ماجبت
رسيم:و الاخذتيهن كلهن وينهن؟
رواسي:عفتهن بالبيت شسوي بيهن
تقرب على الجنطه گلبها كلها يدور لسيت النوم، عطت بي
رواسي:هاي شسويت رسيم! منو بي حيل يلمهن انوب
رسيم:اذا تلبسين الي بيدج اشگها عليج
صار عصبي من كل عقله رجع طلع للبلكون
الجكاره بيده و يسحب نفسه بقوه و يزفره متعصب
بقيت حايره شسوي اني ما جبت اي شي من الي بباله
شلت تلفوني و دكيت على ماري رأساً جاوبتني بقلق
ماريا:رواسي بيج شي ؟
رواسي:سوري قلقتج مابيه شي بس
ماريا:شنو لعد وينه رسيم ليش عايفته
رواسي:ادبسز ميستحي
ماريا:عادي ثنينكم نفس الشي تتوالمون
رواسي:ماري صدك دااحجي مو شقه! تعصب و زعل
لان مجايبه من سيتات النوم
ضحكت و گالت
ماريا:لا موجودات اعرف بيج تدكين الناقصه بالرجال
حطيتهن بالسحاب الفوك البسي منهن
رواسي:كلكم ادبسزيه والله
ماريا:روحي يلا استمتعوا
رواسي:اخخ لساني اسكت اسكت لتغلط خليك محترم
سديته من عدها و فتحت السحاب الفوك فعلاً حاطتلي
اكثر من واحد، طلعت الابيض و دخلت للحمام لبسته
طلعت رأساً تمددت بالفراش و عفته
دخل للغرفه فتح جنطته طلع ملابس اله و فات يسبح
شوي و اجه تمدد بالفراش، حاول يتقرب مني ابتعدت عنه
سحبني من خصري و لزگني بي
رسيم:جنت احسب يوم يوم حتى نوصل لهذا اليوم، روسيه اني عطشان و اريد ارتوي بيج
انداريت عليه صرنه وجه بوجه
رواسي:عصبيتك اذا تطلعها عليه ميصير خير رسيم!
رسيم:ما تطلع وداعتج، عفتج و طلعت بَره حتى ما ازعلج
رواسي:أنتَ ادبسز و ما تستحي
رسيم:شهاده اعتز بيها
رواسي:تبوسني لو ابوسك؟
رسيم:اسمحيلي ابلش ليلتنا
گلبني و صار فوگي يطبع بوساته على وجهي..
(معلينه بيهم امشوا نطلع بَره)
كعدت الصبح على بوساته و صوته يهمس ب اذني
رسيم:روسيتي يلا كومي راح نتأخر
فتحت عيوني باوعتله و رجعت غفيت
رسيم:بعدنا بالبدايه و تعبتي شبيج متتحملين
رديت عليه بصوت ناعس
رواسي:ابويه ما غلط من گال عليك سرسري
رسيم:اذا متكومين اعيد السويته البارحه
فتحت ايدي و حجيت
رواسي:تعال ننام بعدني نعسانه
رسيم:اذا متكومين لو شما تسوين ما اخذج شهر عسل
رواسي:بس بوسني خليني اصحصح
طبع بوسه عميقه على شفايفي، ابتعد عني جريته من شعره و بسته اني و كمت من مكاني
رواسي:جوعانه اني نلحك نتريك؟
رسيم:لا اخذلج شي تاكلي بالطريق
رواسي:تمام
طلعت ملابس و فتت سبحت بسرعه، كملت اني و دخل هوَ يسبح لميت اغراضنه كلها و البدله مالتي علگتها بالتعلاگه و بالگوه حطيتها بالجنطه مالتها
طلع من الحمام مبدل ساعدني بباقي الاغراض، سد الجنط
و سحب ثنين و اني اخذت وحده اسحب بيها
طلعنا من الغرفه نزلنا جوه، لكينه محمد و غسان ينتظرونه سلمنا عليهم اخذوا الاغراض من عدنه
و طلعنا سوه
رسيم:محمد البدله و القاط اخذهن وياك للبيت، و مثل ما وصيتك غرفتي تنقفل و المفتاح بس يمك ممنوع تنطي لبشر
محمد:بدون متوصيني، تونس ويه مرتك و لتشغل بالك بشي
غسان:يلا راح تتأخرون
اخذ محمد الاغراض الي تروح للبيت صعد سياره رسيم
و راح هوَ و احنه صعدنا بسياره غسان اخذنا للمطار
من بين الاجراءات مال سفر و تسليم الجنط
صعدنا الطياره كعدنا ب اماكنا المخصصه النا و ربطنا الاحزمه، بعد انتظار عشر دقايق طارت الطياره
بعد كم ساعه وصلنا، كملنا الاجراءات و اخذنا اغراضنه
صعدنا بالسياره الي رسيم اجرها قبل وصولونا، و اتجهنا للفندق الحاجزين بي..
بقينه اسبوعين عشت احلى ايام حياتي، رسيم و لا كأنو
نفسه رسيم الي خطفني و عذبني، شخص ثاني
رومانسي حنين يحبني و يخاف عليه، دللني
و عوضني عن كل لحظه عذاب بحياتي
رجعنا للعراق اول ما طلعنا من المطار دك تلفوني
نرجس تتصل عليه، رديت عليها
رواسي:هلا گلبي
نرجس:الحمدلله على السلامه عروستنا
رواسي:الله يسلمج حَبيبي
نرجس:بوجهج تعالي للمستشفى ماري جابت اليوم الصبح
عطت بفرح..
رواسي:گولي والله!
نرجس:والله جابتلنا ملاك صغيروني تعالي و شوفي
رواسي:هسه نجي
انطتني اسم المستشفى سديته منها و گلت
رواسي:حَبيبي ماري ولدت اخذني الها
رسيم:اعرف ادم بلغني الصبح
رواسي:شو محجيت !
رسيم:جايين لهنا اول و تالي و تعرفين حَبيبي
اخذني للمستشفى نزلنا اني وياه و صعدنا للطابق الي
بي غرفه ماري، دكيت الباب و دخلت
رواسي:ماري حَبيبي الحمدلله على سلامتج
بستها من راسها ردت عليه
ماريا:الله يسلمج عُمري، انتو هم الحمدلله على سلامتكم
رسيم:مبارك ما اجاكم يربى بعزكم و دلالكم يارب
ادم:يبارك بيك يوم الكم
تهربت من نظرات رسيم و سئلت
رواسي:وينه البيبي اريد اشوفه
نارين:الدكتور ديفحصه هسه يجيبوا
نرجس:لج كيوت كلش صغيروني و اشگر ما شاء الله عليه
ماريا:ننو جيبي العلبه الحمره الي بجنطتي
كامت نرجس من مكانها طلعت العلبه و انطتها لماري
باوعتلي و گالت بعيون دامعه
ماريا:دِلهَام چان ناوي ينطيها الج بيوم عرسج، و اني نسيت اجيبها ويايه ف هسه اريد انطيج هديته
مدتلي العلبه فتحتها گلاده على شكل فراشه ملونه
و بداخل الفراشه مكتوب اسمي بخط مزخرف
دمعت عيوني برطمت شفايفي بقهر
رواسي:دِلهَام يبقى عايش بداخلنا لو تمر سنين
راح ابقه محافظه على هديته لاخر يوم بعمري و مستحيل اخلي يصير بيها شي
اندكت الباب و دخلت الممرضه شايله بيدها طفل
اخذه من عدها ادم تشكرها و راحت، رفعه قريب من وجهه و كبر ب اذنه و گال
ادم:اسميتك دِلهَام
باسه بهدوء من راسه و تقرب عليه انطاني ياه
رواسي:رسيم شوفه ما شاء الله شكد حلو
تقرب عليه همسلي
رسيم:بس نرجع للبيت نسوي واحد احلى
خزرته و اني احاول اخفي ضحكتي، بسته و انطيته
لماري رسيم گال
رسيم:احنه نترخص نروح للبيت نرتاح و بليل نجيكم
ادم:براحتكم احنه الصبح نطلع، عود تعالو للبيت لتجون هنا
رواسي:ماري ابقه يمج اني خاف تحتاجين شي
ماريا:لا حَبيبي متقصرين، عمه حتجي فد شوي بس راحت للبيت تبدل و ترجع
رواسي:اذا احتاجيتي اي شي خابريني لو بنص الليل
ماريا:تمام گلبي روحي ارتاحي أنتِ
سلمنا عليهم و طلعنا من المستشفى، ايدي بيده
صعدنا السياره گال
رسيم:روسيه اريد طفل بعد
رواسي:اي يلا هسه تعال
رسيم:اصبري نوصل البيت شبيج مستعجله
ضحكت عليه و فتحت اغاني، وصلنا البيت
بس سلمنا عليهم و بوجهنا للغرفه ميتين تعب، بدلنا و نمنا نومه عميقه..
مرت الايام، الاسابيع، و الشهور
مرت علينا بحلاوتها و مرارتها، اليوم يصادف ميلاد
مسك الثالث، عزمنا الكل ببيتنه و رتبنا الزينه
و وصينه كيكه عليها شخصيات دزني المفضله عدها
احتفلنا بيها و كلنا فرحانين، لمتنا الحلوه الحب و التفاهم
بين الكل، بغض النظر عن كلشي مرينه بي
بس العوض من رب العالمين نسانه كل مُر ضكناه
و كل الم عشناه
كمت من يمهم رحت لغرفتي و نزلت بيدي
بوكسات هدايه ثنين، انطيت لمسك واحد فتحته
طلعت من داخله لعبه على شكل حوريه بحر
شخصيه "اريل" فرحت بيها اكثر من باقي الهدايا
مديت البوكس الثاني لرسيم و حجيت بحماس
رواسي:افتحه هاي هديتي الك
همسلي بصوت ناصي
رسيم:هديتي اخذها منج بعدين مو هسه حَبيبي
رواسي:بطل ادبسزلوغيتك و افتح الهديه ترا ابطل
فتح البوكس طلع اوفر الاطفال لون ابيض
صار يباوع عليه و گال
رسيم:ماكو اصغر منه شوي جبير عليه هذا
عاط بي محمد
محمد:لتستغبي بعد روحي
رسيم:جايبتلي هذا مال جهال وين احطه حتى ب اصبع رجلي ميفوت
صفن علينه لثواني و گال بعدم تصديق
رسيم:حامل؟
هزيتله راسي ب "اي" عاط بصوت عالي
رسيم:الحمدلله يارب تطمنت على مستقبلي
استلمه ابويه رزايل و هوَ يقهر بي فشلني كدامهم
رسيم:حتى متحجي عليه، خاف عبالك نسيت قبل العرس
من تكلي شايب أنتَ، شوف الشايب بنتك حامل منه للمره الثانيه
غطيت وجهي بيدي من الخجل، قندره عليك رسيم
ادبسز ماعنده ستوب ابد، سحب ايدي عن وجهي
و گال
رسيم:لتفشليني و خليهم يطلعون توأم
الكل يضحك خربانين من الضحك علينا و اني
تمنيت الگاع تنشك و تبلعني
رواسي:لك كافي اسكت شوي فضحتنا
باوع لابويه و گال
رسيم:اذا اشد حيلي هسه ميصيرون توأم ؟
راشد:هسه اني راح اشد حيلي و اكطع القندره على راسك اذا متسكت
رواسي:اي بابا عفيه خلي يتأدب
رسيم:مو اذا اتأدب أنتِ تندمين و بكيفج بعد
حاولت اكتم ضحكتي شكد ما اكدر، بس ما سيطرت
على روحي غصيت و اختنكت على كد ما ضحكت
رفعت ايدي و دعيت
رواسي:يارب تدوم علينه اللمه و الضحكه و الفرح
باسني من راسي و گال
رسيم:و وجودج يمي هوَ الفرح بحد ذاته، احبج روسيتي
رواسي:احبك رسيمي الحلو
النهايه...
- يتبع الفصل التالي اضغط على (رواية رواسي الدهر) اسم الرواية