رواية ذنوب على قيد الغفران الفصل الخامس و العشرون 25 - بقلم براء
الخامس والعشرون
#ذنوب_على_قيد_الغفران
#البارت_الخامس_والعشرون
ايمان : واكفه ستوني اريد اصلي صلاه المغرب وما اشوف غير اروى طبيت تركض وترجف ... ركضت عليها بخوف شبيج يمه
اروى : حضنت امي بسرعه
ايمان : جسمها يختض بين اديه ... ولج يمه ليش ترجفين يمه بتي بسم الله الرحمن الرحيم اروى حبيبتي احجيلي شنو شفتي ليش تختضين هيج
اروى : بخوف يم يمه سمعت سعاد وفيصل يحجون يحجون باشياء مو زينه سعاد جاي تسوي اعمال حتى تموتين
ايمان : كلشي مافتهمت منها ... جريتها كعدتها على الجربايه كعدي يمه وصل على محمد ... صبيتلها ماي هاج شربي وبطلي رجف حتى افهمج شبيها سعاد
اروى : نملت عيوني دموع وبديت احجي لأمي الي سمعته
فيصل : يمه راسي راح ينفجر اريد بندول اي شي
سعاد : بكنتوري اكو كومدي بي ادويه شوف اكو بي بندول
فيصل : رحت فتحت الكنتور دورت على ادويه ماهي ماكو وينهن ... رفعت ايدي للخانه الفوك شفت صندوك فتحته وانصدمت صحت يمه شنو هذا
سعاد : اجيت ركض سحبته جيب لك ليش تبحوش بغراضي
فيصل : بصدمه يمه ليش ضامه هالسوالف بكنتورج راس الطير شعنده هنا وشهالشعر هذا ... فتحت عيوني شنو كمتي تشتغلين سحاره
سعاد : صوتك فضحتنه سد حلكك ابن الكلب
فيصل : بعصبيه شنو اسد حلكي شهالقرف الي وصلنالنه احنه مو لهالدرجه يمه كمتي تسوين سحوره
سعاد : انجب واسمعني زين هالسحر مو مؤذي
فيصل : لا بله وين اكو سحر مو مؤذي شنو كدامج طفل وتضحكين عليه
سعاد : دسمعني ولتخبصني ... هالعمل مو لواحد غريب اني ردت اسوي لفهد دسمع للتخبل عليه ... هذا العمل حتى اخلي ايمان تكلب على فهد وتجبره يتزوج بتول فهمت ياغبي
فيصل : فهد ينجبر صدك تحجين انتي
سعاد : مو هالعمل راح يخلي ايمان تتمرض وتصير طريحه الفراش واكيد فهد من يشوف امه هيج ماراح يرفضلها طلب كلنه ندري بي شلون متعلق بأمه فمستحيل وهي بهيج وضع يبطل غير هيج هالعمل راح يخمد رجوله فهد لفتره معينه وهالشي راح يخلي يتزوج بتول غصب عنه لان اذا رجولته ماتت بعد محد تقبل بي فينجبر يخضع للامر الواقع وياخذ بتول لان محد تقبل بي غيرها فهمتني هسه
فيصل : انتي شنو ابليس شيطان بس فهميني شلون تنزلين لهالمستوى يمه لو مهما يكن تبقه هاي ارواح وربج ميقبل واحد ياذيها
سعاد : ماراح ااذيهم كتلك بس لفتره وابطل العمل بأيدي
فيصل : يمه كلنه ندري الي يسووله عمل لو يموت لو يصير بي شي ويفقد عقله ... تردين الله يطيح حظنه فوك ماهو طايح ... هالشغله عوفيها يا يمه اني كلشي اسوي واحط ايدي بأيدج لو شما تسوين بس مال توصل بيج تسلكين هيج طريق لا وداعه جهالييي انسى عدي ام وامحيج من حياتي
سعاد : صحت لك غبي انت قابل اني شعندي مو كل الي داسوي لخاطركم صار 12 سنه ما خليت شي ماسويته حتى اكدر ارجع كلشي الكم بس مليت ماكو شي يكدر يخلي فهد ينفذ الي اريده غير هالطريقه عبالك اني فرحانه بألي جاي اسوي بس اخوك متمرد وجبرني الجئ لهالطريق
فيصل : الي ابالج تلغي لا قسم بالله اروح اكله ... لتلعبين بالنار يمه هذا فهد الي يدوسله على طرف يجيب اجله واحنه ماعايزين
سعاد : هذا الحجي بس هسه باجر عكبه فهد لو تزوج بتول وكام يدر علينه فلوس تجي انت اول واحد تكلي اريد حقي
فيصل : اني ما متخلي عن حقي بس مستحيل اخذه بهيج طريقه خاصه انو هالطريقه راح تدمر بيت كامل
سعاد : اووف منكم ولكم عليمن طالعين اغبياء انتو شصارلي ساعه احجي اني كتلك هالعمل يبقى فتره وابطله اني بس خلي فهد يتزوج بتول
فيصل : شو يمه انتي الحجي وياج وعدمه نفس الشي
اروى : بدموع وهذا الي صار ... يمه تريد تسوي اشياء موزينه الج ولفهد ... بأذني هاي سمعت فيصل يكلها ليش ضامه راس طير وشعر وبعد اشياء مقززه مااكدر اذكرها
ايمان : انخمط كلبي كلشي توقعت من سعاد بس تنزل لمستوى انو تضر ابني برجولته وتخلي عاجز حتى تنفذ الي تريده هذا الي ما جنت متوقعته ... مسحت على شعر اروى الي متهستره من الي سمعته خاصه اروى فقيره وتخاف مو مثل ورده .... اروى يمه بسرعه كومي صيحي لاخوج تلكي بغرفته
اروى : راح تكليله
ايمان : طبعا لازم اكله كومي يمه كومي
اروى : صعدت لغرفه فهد دكيت الباب طلعلي
فهد : طلعت لكيت اروى عيونها كلها دموع .... بخوف شبيج
اروى : جريت ايده تعال بسرعه امي تريدك
فهد : نزلت وياها خير شصاير شنو امي متخربطه
اروى : تعال وانت تفهم
فهد : دخلت لغرفه امي لكيتها كاعده خير يمه
ايمان : سد الباب عندي سالفه وياك
فهد : سديت الباب ودخلت ... احجي يمه
ايمان : اروى سولفي لاخوج الي سمعتي
فهد : باستغراب تره وضعجن ما عاجبني احجن لتخبلني
اروى : بديت احجي لفهد على السمعته احس اكو رهبه فضيعه بداخلي يمكن يكول البعض هاي جاي تبالغ بس اني طبيعتي اخاف خاصه انو احنه مامتورجين على هيج اشياء وماعدنه معلومات عمرها امي ماجابت سيره هيج اشياء كدامنه .... اخذت نفس بعد ما كملت السالفه لفهد اباوعله ضل ساكت ماكو اي ردة فعل على وجهه
ايمان : اباوع لفهد كام طلع بسرعه
... ولك يمه تعال طلعنه ورى البنات شافنه نركض هم اجن ورانه
فهد : عفتهن وطلعت صعدت فوك اركض لا لهنا وكافي بعد وصلت حدها .... وصلت لغرفتها فتحت الباب ودخلت هي من شافتني فزت .... باوعت للكنتور فتحته بسرعه
سعاد : جريته شجاي تسوي لتفتح الكنتوررررر بي شغلات نسوووان اكعددد فهد
فهد : دفعتها بسرعه كلبت الكنتور تحت صياحها وجرها الي .... جريت صندوك فتحت ودرته كدامها ..... بصيااااااح شنووووو هذاااا وصلللللللت بييييج تسويييين سحورررره
سعاد : هذا منو جابه مو مالتي
فهد : جريتها كتيلي مو مالتججججج مووو فيصللل صحت يااااا فيييييييصل
فيصل : طلعت من غرفتي على صوت فهد طبيت لغرفه امي شفته ذاب الصندوك بالكاع ويصيح ... انصدمت معقوله دره بهالسرعه
فهد : فيصل هذااا العمل اممممك مسويته لو لاااا احجيييي
ساره : اباوع لفهد صاير نار وصياحه وين واصل احنه واكفين على صفحه وسعاد واكفه وهي واثقه
فيصل : بارتباك لا مو لأمي
فهد : فيصل الك منييي خمس سيارات حديثه مال هالسنه اشيلهن انطيهن الك حلال زلال بس احجييي الصدك امككك الي مسويه هالعملل لو لا
سعاد : باوعت لفيصل محذرته
فيصل : باوعت لامي ما ادري فهد يمكن الها مااعرف اني
انغام : كلنه انصدمنه من حجه فيصل معقوله عمتي تسويها
فهد : جريتها لللللج انتييي ويامن جااااايه تلعبيييين تعرفييييين شكدر اسوييييي بيج انييي لجججج لو السالفه علييييه يطبنيييي مرض لججج تردين تمرضين امييي انتيييييي شنوووو من بشرررر وصلتتتت بيج تضرينييي بأمييي ياحقيررره بس
سعاد : فهد بس اسمعنيي
فهد : جريتها ونزلت ادفع بيها امي ونسوان اخواني يجرن بيه واني ولا يمهن فتحت الباب مال الشارع وذبيتهااااا امشيييي شوفيلجججج واحد يلفييييج اني ما الفييي ببيتي وحده كح.....
فيصل : لزمته من هدومه ما من حقك تطرد امييي
فهد : الييييي يدخلللللل اطررررده وياهاااا ورب العزززززه فتهمتووووووووو الي يريد يروح وياهاااا الباب يفوت مليون جمل مو جمل واحدددد .... وانت هيي الك مهله لاسبوع وتترك البيت فتهمتتتتت
سعاد : دكيت الباب فهد افتح الباب خلي افهمك السالفه .... ولك فهد عيب على شيباتي تذبني بالشارع اني بمقام امك
فهد : فيصل طلع لامه صحت طببببن جوووه .... طبيت كعدت بالصاله احس ضغطي ارتفع كلشي توقعتها تسوي بس هاي ولا اجت ابالي لعد شكد حقيره وحاقده
ايمان : يمه اشرب ماي باوع وجهك
فهد : ما اريد سم ... طلعت جكاره هاي اول مره بحياتي ادخن كدام امي بس ماكو غير الجكاره تهدئني بهالوقت هذا
آلاء : هاي عمتي صدك تحجي وصلت بيها تسوي اعمال شيطانيه
انغام : شنو موقف رجولتنه هسه والله عيب الي بكدها مخلصه حياتها عباده مو تدور هالسوالف
ساره : عفيه انت خايفه ليروح فهد يطردنه من البيت
فهد : صحت اقسم بالله اذا ما سكتن وبطلتن تبسبس اركعجن بمبييييييت نعاااال واطردجن فتهمتن
آلاء : كافي سكتن هذا طنكر
ساره : وين منذر وعلي
انغام : طالعين
ايمان : ضلينه كاعدين فتره لحد ما طبو الحجيه ياسمين وحمويني ونسرين هله كملت السبحه
نسرين : عمه فهد صدك تحجي تطرد مرت ابوك بالشارع بهالليل هذا
فهد : باوعتلها رجاءا الي ما مفتهم السالفه ليضل يطفر جنه كنغر اكعدو واني اكل تبن وافهمكم لحد يصير شيخ براسي
نسرين : شهالاسلوب هذا نسيت اني عمتك
ياسمين : اشرتلهم لحد يجاوبه ادري بي اذا صار عصبي ينسى روحه ... كعدت كدامه احجي ولك ليش طردت سعاد اجتني تنحب وتبجي حتى عبايه على راسها ماكو بطرك الشيله عفتها هناك واجيت اني وعمامك نفهم السالفه
مهدي : عمي فهد احجي مو يبست ريكنه حتى مرت ابوك ماقبلت تحجي
فهد : عمي اني ميشرفني استقبل وحده سحاره ببيتي
عباس : استغفر الله عمي شهالحجي
فهد : مثل ماسمعت وهاي كدامكم الكل شاهد الصندوك منين طلعته مو من كنتورها وحتى فيصل شهد ضدها وبصوره غير مباشره واني مستحيل اقبل تبقه عندي بالبيت هيج وحده
ياسمين : بهدوء العمل مال شنو
فهد : مسحت على وجهي ماادري حجيه حسب الي فهمته مال مرض وعجز رجوله الي ولأمي
نسرين : لطمت على صدري لا ياكح....
عباس : لسانج ام مرتضى ... عمي فهد صل على محمد يجوز انت متوهم يجوز اكو احد حطه لمرت ابوك
فهد : عمي لخاطر دينك وين كاعدين احنه بمسلسل وواحد يخلي سحر للثاني وبعدين منو الي يخلي سحر بكنتورها امي الفقيره لو خواتي الي لا يحلن ولا يربطن ... عمي السالفه واضحه واني كلت وارجع اكول سعاد مالها رجعه لهالبيت قبلتو وان ماقبلتو
ياسمين : وينها روح حارث جيبها وتعال
فهد : كلت سعاد متطب لهالبيت بعد
ياسمين : واني ماكو حجايه تمشي على حجايتي فتهمتتتت خاف عبالك كبرررت ... روووح حارث واستعجلها بسرعه
نسرين : اعوذ بالله شنو من بشر هاي شهالقابليه هاي وانتي يا ايمان يافاهيه معقوله ما انتبهتي
ايمان : الله شاهد ماتوقعت تسويها قبل فتره شفتها تصعد بالسطح وتشغل بخور وحرمل كلت لعمتي وكلتلي التزمي بالقران ولتخلين غرف ولدج مفتوحه
وهذا الي سويته كمت غرف ولدي وبناتي اقفلهن من يطلعن ومن يرجعن انطيهن الهن ... بس مااعرف شلون كدرت تسوي بدون اثر
ياسمين : ضربت على رجليه الله يرحمك ياسالم تعال شوف الي جنت تدافعلها وواكف بصفها شجاي تسوي
مهدي : يمه صل على محمد تره ضغطج موزين
فهد : ضليت كاعد شويه وطبت سعاد تبجي اجتي تركض يم الحجيه
سعاد : حجيه شفتي ابن ابنج شسوه بيه ذبني بالشارع وخلاني فرجه لليسوه والي ميسوه ... اتهمني مسويتله سحر واني لا مسويه ولا ابد
ياسمين : ولج تعلميني بسوالفج عبالج ماادري لو غشيمه ...ااااخ منج ولج ميغزر بيج صار سنين عايشه بكده وبفلوسه وتلعبين بذيلج وياااا عضيت ايدي اااااخ ولج ولج كون اشرب من دمججج .... جريتها احجي ولج العمل بديتي بي لو لا احجيييي
سعاد : والله العظيم كلشي ماسويت لابديت بعمل ولاشي
ياسمين : تدرين اني هسه اكدر اخابر اخوانج واخليهم يتورجون على سوالفج والله سيرتج تصير على كل لسااان وياهو الي يشوفج يتفل بوجهج
سعاد : بدموع ابوس ايدج عمه والله من قهري خطيت هيج خطوه اني شنو ذنبي صار سنين عايشه عيشه الخدم اني الي جنت الامر الناهي تالي صرت مالي قيمه كلشي راح لفهد من قهري ردت اسويله سحر مو غرضي ااذي بس ردته شويه يضوك لوعتي
فهد : ركعت النفاضه بالكاع والله دنعل ابو ابو الي يطلعلج لج خدامتيش انتييي وين اكوووو خدامه تكعد بالدعش الصبح وين اكو خدامه كل سنه تسافررر وين اكوووو خدامه مدندشه بالذهببب خدامتيششش هااااي ... هاي من غير الصرف الي اصرفه عليج لعد شكدددد عينج فارررغه انتيييي
ياسمين : يمه فهد اهدئ لو صار بيك شي منو يفيدك اهدئ بيبي اهدئ
اروى : البيت كله دخل انذار عمامي حاولو يقنعون فهد حتى يخلي سعاد بالبيت بس فهد قافل
فهد : اني افضل اجيب كح... واعيشها بهالبيت ولا ابقي هاي هنا لان لابد الكح.... ادري بيها شنو هي وكلشي اتوقع منها بس هاي الي ملفيها ببيتي واصرف عليها وعلى بزرتها واني مامجبور تعض الايد الي نمدتلها والي يعض مره يعض الف مره
عباس : لخاطر ابوك المرحوم رجعها للبيت مو لخاطرها مهما يكن تبقه ام اخوانك وفشله من الناس
فهد : ارجعها حتى تبديلي بعمل جديد هالمره ابالها تاذي امي المره الجايه يجوز تسوي عمل تكلبنه بي حمير شتكولين سعوده اكو سحر يسوي هيج بما انو انتي عندج خبره وتعرفين تحفينه ييييييله
ياسمين : اني لو بأيدي اقسم وداعه حجي علي اشمرها بالشارع واخليها عبره لمن اعتبر بس واكف بعيني سالم وامها المرحومه الي وصتني عليها يفلا ادخل واخلي فهد يسوي الي براسه ... باوعت لفهد حبيبي فهد اسمع كلامي وخليها ترجع لأجل عيني
فهد : حجيه كلامج على راسي بس مال اخلي سعاد ترجع بعد ماسوت سوايه حتى الموشريفه تخاف منها ما اخليها
عباس : سعاد راح ترجع للبيت وبموافقتك انت اول شي
فهد : عمي سع..
عباس : اني مو بمقام ابوك لا شنو اني ابوك اكو واحد يكسر حجايه ابو ... فهد اذا تعزني وتعز عمك خليها هنا مالنه خلك القال والقلت وانت تدري الناس بس تريدلها علج تعلج بي
مهدي : اني عن نفسي اكول عوفو الولد براحته وسعاد خلي تجي عندي بالبيت وتبقه شكد متريد لتضغطون على فهد اذا ما متقبل وجودها
ياسمين : مرت اخوك تبقه ببيت ابن رجلها طلعه منا ماكو انت تدري ناسنه شلون طايحظها وتدور الزله على بيت حجي علي تريد بعد هالعمر تجيني ام سرمد تعيب عليه وتكول جناينج سحارات غير اطك واموت
عباس : خويه ام فهد انتي شتكولين
ايمان : اني وره ابني شيقرر اني وياا وبالنسبه لسعاد بعد عملتها هاي سدت كل باب احترام وتقدير جان مفتوحلها ....واذا لنفرض رجعت منو كال ماراح تسويها مره ثانيه
ياسمين : والله العظيم اذا عادتها اذبحها بأيدي وهسه تكوم تحلف على كلام الله وباجر اخذها للعباس هم تحلف بعد متسوي هالسوالف التعبانه هاي ... احجي سعاد تحلفين لو
سعاد : احلف والله احلف بس لتكلون لاحد وتفضحوني
نسرين : كالو للحرامي احلف كال اجاني الفرج
ياسمين : نسرين اسكتييييي انتي
مهدي : باوعت لسعاد ... شنو نفضحج لو نريد نسويها سالفه جان وديناج لاهلج وانتي بهالعمر بس وكف بعيونه اخونه المرحوم ومجبورين ناكل تبن ونسكت
سعاد : رحم الله والديك خويه
نسرين : انتن هييي امشن جيبن القران وتعالن
آلاء : استغفر الله هاي شبيها هسه من واحد يجيبها بنعال هم يكلك ليش ... رحت جبت القران واجيت
ياسمين : اذا نظيفه حلفي على كلام الله بعد متسوين سحوره وباجر الصبح بأيدي اخذج لكربلاء احلفج بالعباس ( عليه السلام ) حتى يصطرج اذا تجذبين
ايمان : قبل لتحلف باوعتلها انتي مسويه عمل قبل بوقت احجي الصدك
سعاد : بدموع اي بس مانجح وانكلب عليه الله شاهد عليه بس هالعمل سويته وجنت ناويه على هالعمل بس صار الي صار والله ما مسويه غير عمل وداعه جهالي
فهد : بهدوء بريئ منج الله انتي
اروى : اباوع لفهد عيونه حمر دم وشرايين ايده بارزات من العصبيه بس المشكله يحجي بكل هدوء .... ما اعرف ليش الحجيه اصرت سعاد تبقه وليش اصلا رجعوها والله العظيم اني بعد الي سمعته كامت نفسي تلعب منها لا وامي كل عقلها تريد سعاد تحلف علساس يعني ماراح تسويها بعد .... اباوعلها خلت ايدها على القران واتفقت وياها الحجيه باجر تاخذها لكربلاء
ايمان : شتسوالج هاي كدام الكل انفضحتي وصغرتي بعيون الكل ليش هيج سويتي ليش
سعاد : لارد
فهد : اني راح ارجعج هنا بس مو لخاطرج ولا بحالج اني بس تقديراً لعمامي والحجيه ... بس هاي كدام الكل وجها ما اشوفه ابد تبقه بغرفتها لاتنزل يمنه ولاتدنالنه واذا لكفتها قريبه علينه والله العظيم اسوي بيها سوايه ابن الشارع ميفكر بيها
ياسمين : لا متنزل تبقه مزروعه بغرفتها بس خليها هنا .... يمه عباس مهدي نسرين الموضوع هذا مينفتح كدام اي احد حتى نسوانكم ما اريدهن يدرن .... عباس يمه وصي حارث مو يحجي شي وانتو الي هنا هالموضوع متفتحو حتى بيناتكم مفهموم السالفه تنسد وانتي يا سعاد وروح حجي علي اذا صاب بيت ايمان شي حتى لو خدش اجي اذبها براسج واخلي كتلج عمل شعبي والله وهاي اني حلفت
سعاد : والله كلشي ما اسوي واصلا اني مااعرف بالاعمال بس وحده ضحكت عليه وقنعتني اسويهن والله مالي بهالطريق اني
ياسمين : منيه هاي احجي نعرفها
سعاد : ام حميد
ياسمين : لطمت على صدري ام حميد مرت جاسم ابو العرك ... ولج يمعزايه شجابج عليها لا بارك الله بيج هاي هجامت بيوت ولكم شسوي هسه اكطع كصايبي من وراج شسويلج كليلي
سعاد : سكتت
ياسمين : كومو يمه رجعوني لبيتي اذا ابقه هنا يمكن اطك واموت
نسرين : عود صدك راح تبقيها هنا عمه فهد قبلت على حجيهم انت تريد تبقي حيه ببيتك
فهد : باوعتلها وسكتت المشكله مااكدر اكسر حجايه الحجيه لو مهما يكن تبقه هي الجبيره وحجايتها الي تمشي
اروى : اباوع لفهد خشمه طك دم ... يااا فهد
ياسمين : ركضت عليه شبيك يمه شجاك
عباس : حارث روح ركض جيب جهاز الضغط يمكن ارتفع ضغط ابن عمك اركض
فهد : اوكف ماكو داعي اخذت كلينس خليته على خشمي .... يجوز صار خلل بضغطي ماكو شي كمت احس روحي دايخ
ايمان : وين رايح يمه لتروح تتخربط
فهد : مخنوك يمه اريد اطلع ... من رخصتكم عفتهم وطلعت ... اخذت سيارتي وطلعت خشمي ماوكف نزف لعبت روحي .... مشيت ومالكيت روحي غير يم العماره اباوع للساعه بالوحده هاي هالكد مر وقت ولا حسيت نزلت شافني ابو ماجد
ابو ماجد : شلونك سيد فهد ... خير شبيك عسى ماكو شي
فهد : هله بيك ... لا ماكو شي تعور خشمي من رخصتك عفته وصعدت للشقه
________________
غنى : كاعده ادرس وسمعت الباب تندك حسيت عضامي يبست ... منو يجي بهالساعه يربي خاف ابو الرساله هذا ... كمت دكيت على فهد بسرعه ماكو ميجاوب رجعت دكيت هم ماكو .... رجعت الباب اندكت تمشيت ورجليه وحده تطك بالثانيه ... باوعت بالعين هذا فهد واكف فتحت الباب دخل بسرعه .... باوعتله خال كلينس على خشمه ... بخوف شبيك فهد
فهد : بدون مقدمات تقدمت حضنتها بقوه
غنى : فتحت عيوني شبيك فهد
فهد : دفنت راسي بركبتها ... بصوت مكتوم تعبان غنى تعبان
غنى : حضنته ومسحت على ظهره خير صاير شي شبيك فهد فهمني مو حموت من الخوف
فهد : بتعب لتسأليني غنى اني تعبان واجيت يمج لان محد يفهمني غيرج بس انتي تفهميني وتعرفيني غنى
غنى : بعدته عني لزمت وجهه دتعال اكعد خلي اشوف شبيك .... كعدته وكعدت بصفه شلت الكلينسه اباوع خشمه يجري دم .... هاي يمكن صار عندك ارتفاع بالضغط ... بس همزين طك خشمك دم والا جان صارت بيك جلطه اسم الله .... رجع جسمك على القنفه وارفع راسك هي ثواني واجي .... كمت ركض جبت كطن ومي دافي .... اجيت كعدت يمه مسحت الدم
فهد : هاي شجاي تسوين وخري غنى
غنى : فهد وجهك كله دم ... وخر ايدك مسحت خشمه وخليتله كطنه نظيفه تمدد هسه اجي كمت سويتله عصير ليمون بسرعه واجيت لكيته خال ايده على راسه ومغمض ... فهد اكعد
فهد : همهم ... هاا
غنى : اكعد اشرب العصير حتى ضغطك يهبط حباب ... كعدته شربه بالكوه اخذت الكلاص خليته على الطبله .... احجيلي شبيك
فهد : بتعب غنى ماعندي قابليه احجي ابد اني اجيت حتى ارتاح لتلحين عليه
غنى : خلص براحتك
فهد : انام بحضنج ؟
غنى : ابتعدت لوره فتحت اديه تعال
فهد : تمددت بحضنها حضنت خصرها وغمضت عيوني
غنى : دخلت اصابعي بشعره يعني تسوه على مود اسباب تافه تتعصب ومن وره العصبيه يرتفع ضغطك منو يفيدك لو صار بيك شي
فهد : مو بأيدي غنى ما اكدر ما اصير عصبي خاصه هالمره الموضوع يستوجب العصبيه اصلا احمد الله ما خطيت خطوه غلط تالي اندم عليها
غنى : بهدوء اذا تحب تحجي اني اسمعك
فهد : تنهدت بادي احجيلها الي صار بشكل مختصر .... انتي هسه كليلي حقي اصير عصبي لو لا
غنى : مسحت على ظهره اتعجب على هيج بشر شلون يكدرون يسوون هيج شي ميخافون من الله عوفك من خوفهم من الله ميخافون هالاعمال تنكلب عليهم مو اول وتالي الانسان شيسوي يرجع عليه
فهد : عبالج كلها مثلج تخاف الله ومتأذي احد هذني كح..... كلشي يسون حتى يحصلن الي يردنه واني والله لو ما الحجيه جان طلعت بروحها والله
غنى : همزين الحجيه تدخلت لو مهما يكن تبقه ام اخوانك واحترامهم من احترامها ... هي مادام حلفت على القران خلصت بعد والله يهديها
فهد : سامعه المثل الي يكول الكح... اذا تابت تصير كوا.... وهذا المثل ينطبق على سعاد متوب لو تقوم القيامه
غنى : هسه عوفك منها الله قبيلها يعني اليوم لو صاير بيك شي تفيدك سعاد لو يفيدك فيصل
فهد : المفروض تكيفين حتى تخلصين مني
غنى : بسرعه اسم الله فهد لتكول هيج
فهد : شلت راسي باوعتلها ... تخافين عليه
غنى : بدون وعي ...اذا عليك ما اخاف عليمن اخاف
فهد : بهدوء ... يمكن انتي الانسانه الوحيده الي عمري وحياتي ماراح اتندم انو فتحتلها كلبي
غنى : فهيت بوجهه مااعرف شرد
فهد : رجعت نفسي لحضنها
غنى : لعبت بشعره ... حتبات هنا
فهد : هزيت راسي احتاج شويه هدوء وما اريد ارجع للبيت خو ما عندج مانع
غنى : سوي الي يعجبك واني ايدي بأيدك
فهد : غمضت عيوني متألم
غنى : شبيك
فهد : بتعب ... نعسان بس راسي يوجعني مااكدر انام
غنى : هسه اقرالك قران ويصير راسك زين بديت اقره قران وامسح على شعره لمن حسيت انفاسه انتظمت عرفته نام ... تنهدت جسمه صايره فوك جسمي وراسه على صدري شلون اكوم ماادري ... ماهانلي اكعده لان سوده عليه نص ساعه ياله نام حاوطته ونمت اني هم
________________________
انغام : كاعده واباوع لمنذر الي راح يتخبل ... كافي منذر لخاطر الله دباوع لوجهك
منذر : لج بيا وجهه اباوع لاخويه وامه بعد يعني فوك ما مفضل علينه ومخلينه كاعدين معززين مكرمين ببيته نجي نسوي هالسوايه وياا لا وجماله عمتي نسرين درت هسه تشرنه على الحبل
انغام : حبيبي انت شعليك امك غلطت انت ليش تتحاسب
منذر : انتي كلتيها لانها امي لازم الي يصيبها يصيبني .... راح اتخبل يعني امي وين واصل بيها الحقد حتى تسوي هيج
انغام : احمد ربك طلعت ما مسويته جان فهد ذبحها والله
منذر : مو ربج راد يفضحها الله مو غافل وعبالج راح يفوتها الها وياخوفج من ضربات الله .... انغام اني خايف منها وعليها اخاف تسوي شي اقوى والله يعاقبها عقاب عسير
انغام : اباوعله عيونه مدمعه كافي حبيبي شجاك الموضوع انسد ومحد يدري بي بس بيتنه وعمامك الاثنين محد يدري غيرهم
منذر : تعبنه انغام تعبت من جنت صغير اعاني من عداوة امي وايمان جنت لو لعبت ويه علي لو فهد الخاشوكه تنطبع على رجلي حتى اتوب .... شايفه جم مره امي كتلتني بالصونده لان انطيت من مصروفي لعلي شايفه جم مره انحرمت من الغده لان اكل حنونه من ايمان ساعة الي تخبز .... متشوفيني ما اخليج تدخلين من الضيم الي شفته والله كمت استحي انسب روحي لامي واخواني تدرين ساعات اتمنى لو ايمان امي وساعات اتعوذ الشيطان واكول سعاد امي ما ابدلها بالدنيا كلها
انغام : سوده عليه اباوعله يفرفح هذا منذر طول عمره عازل روحه وميدخل ولو صارت مشكله يطب ويسد الباب .... اااخ ياربي وتالي ويه مشاكل هالعائله احنه الى متى تبقى عمتي مفشلتنه كدام الناس والله لعبت رواحنه .... سمعت صوت سالم ابني اني عندي طفل واحد من منذر وهسه البنوته بالطريق بقه شهر وتنور ..... رحت شلته شبيك ماما شبيك حبيبي
سالم : جوعان
انغام : سوده عليه نسيت اوكلك يله هسه اسويلك اكل اخذته ونزلت جوه لكيتهم بعدهم كاعدين وحاطين ايدهم على خدهم عمتي وبتول ماهنه بغرفهن والباقين كاعدين على غير العاده كل يوم بهيج وقت الكل نايم لان الساعه فوك الثنتين هسه
ايمان : خير شبيك بيبي
انغام : يبجي جوعان
ايمان : روحي سويله اكل وجيبي بحضني اخذته منها كافي حبيبي كافي بعد كلبي
سالم : بيبي جوعان
ايمان : يخسى الجوع هسه ماما تسويلك اكل
اروى : اباوع لامي رغم احمد وزينه وسالم احفاد ضرتها بس امي تموت عليهم وهمه هم يحبوها وميصيحولها غير بيبي ... فدوه لكلبج يمه شكد حنينه انتي
آلاء : خاله يعني انتي هسه ما ضايجه لان عمتي رجعت
ايمان : حبيبتي آلاء هالموضوع لحد يفتحه وياي رجاءا تره روحي طالعه وما اريد اغرد
ساره : زين خاله انتي شدراج بسالفه العمل معقوله تتنبأين
ايمان : باوعت لاروى الي رادت تحجي خزرتها بسرعه ما اريد واحد يعرف اروى الي حجت اخاف تدري سعاد وتروح تسويلها شي .... مادريت فهد سمعها بالصدفه تحجي ويه فيصل
ساره : زين انتي ما حقدتي علينه بعد سوايته ام فيصل
ايمان : وانتن شعليجن ربنه يكول (( ولا تزر وازرة وزر أخرى )) كل شخص يتحاسب على اعماله الله ميحاسب فلان بسبب فلان كما تدين تدان شتسوي يرجع عليك الله ميأذي عباده ظلم وحشاه من الظلم .... فاني ليش احقد عليجن قابل انتن الي سويتن لو هي .... صحت وين صرتي يا انغام الطفل مات من الجوع
انغام : اجيت اجيت .... جبت الاكل وكعدت اوكله
ايمان : يله اني اروح انام اروى صيحي لاختج وتعالن نامن يمي
اروى : وفهد
ايمان : راح يبات بره اعرفه مادام تجاوزت ال2 يعني يبات بره
ورده : كمت جبت مخدتي ورحت لغرفه
امي طبيت لكيت اروى نايمه بصفها خليت مخدتي وحضنت امي يمه
ايمان : هاا
ورده : ريحتج طيبه
ايمان : ابتسمت هاي سوالفج مثل سوالف اخوج هم يكلي ريحتج طيبه
اروى : يمه ليش خليتينه ننام يمج
ايمان : مسحت على شعرهن .... كمت اخاف اخليجن وحدجن يمه والله العظيم لوما الحجيه وعمامجن طاحو بعيوني تحلم اخليها تطب عتبه باب البيت
ورده : ماما لتزعلين مني بس مرات احس شخصيتج ضعيفه
ايمان : اني جنت بعمرجن متمرده ووكحه بس من تزوجت ابوجن وحبلت بيكم كمت اقدم تنازلات لخاطركم انجبرت اخضغ للامر الواقع حتى ما اخلي ابوكم يأذيني بيكم هذا الاحساس ماراح تفهمنه هسه من تصيرن امهات راح تحسن باحساسي وتعذرني
اروى : لو شما تكونين تبقين احسن واعظم ام بهالدنيا
ورده : اي والله بس لو تبطلين عصبيه تصيرين عسل
ايمان : ابتسمت بستهن وقربتهن عليه حتى انام
___________________
صباحا ... الساعه 8
فهد : كعدت الصبح صحت غنى ما اجاني صوتها اكيد طلعت للكليه بس الثوله مو تدري عندي دوام غير تكعدني ... كمت غسلت ودخلت للمطبخ لكيت ريوك على الميز بصفه ورقه اخذتها
غنى : صباح الخير ... اسفه اعرف عندك دوام بس مهانلي اكعدك لان شفتك تعبان
ملاحظه /سويتلك ريوك تريك واكو جاي هم حمي وتريك قبل لا تطلع اوك ... يله باي
فهد : ابتسمت كعدت تريكت وكمت غسلت المواعين بسرعه لان خطيه هي ترجع تعبانه ... رحت عدلت شعري واخذت مفاتيحي اجيت اطلع تذكرت خاف ماعدها مصرف طلعت فلوس بس وين اخليهن خلي احطهن بغرفتها فتحت الباب ودخلت خليتهن على الطبله شفت ملابسها على القنفه محطوطات بسله مبينات ستوهن مغسولات مديت ايدي شفت داخليات رفعتهن ... تفاجئت عبالي غنى خشبه كلشي ماكو طلع بيها لحمه ماتوقعت .... لكيت سجل وفوكه قلم كتبتلها رساله وطلعت .... رحت بسرعه للبيت بدلت ملابسي وطلعت ... وصلت للمركز متاخر ربع ساعه ... خليت غراضي على مكتبي وكمت حتى ابدي شغلي
: احنه اذا نتاخر عشر دقايق يحير شيسوي بينه بس من هو يتاخر ميحاسب روحه
: ليسمعك يمعود مالنه خلكه تره شوفه شلون كالب وجهه وهسه يطلع حركته بينه
: ليش هو يايوم ما اجه كالب وجهه يمعود
فهد : اخذت الملف من الشرطي اني اكول بدال ما كاعدين تحجون بمواضيع مالها داعي وتتناقشون على وجهي المكلوب شلون صاير الصبح التهو بشغلكم هم احسن وافيد الكم
: بارتباك حاضر سيدي
فهد : باوعتلهم صفح ورحت يم الشباب حتى نكمل شغلنه
____________________
نرجس : اكول غنى شبيها اروى شو احسها مو على بعضها
غنى : بهدوء علمي علمج
نرجس : معقوله ما كلتلج
غنى : لا والله كولشي ماحجت
نرجس : هاي اجتي ... اروى حبيبتي بيج شي
اروى : مشاكل بالبيت مو شي جديد
نرجس : واذا انتي تدرين مشاكلكم مو شي جديد ليش كالبه وجهج هاا ... سوالف سعاد تعلمتي عليها انتي
اروى : سعاد كل مابيها جاي تتمادى
نرجس : والله لو منج اضل اخبث عليها لمن اهججها من البيت
اروى : ضحكتيني والله عبالج هاي تكترث ولج هاج حوصلتها حوصله مطي متتعب ولا تمل
غنى : مسحت على ايدها حبيبتي اروى كولشي يهون وكلي امرج لله وكولشي يسهل
اروى : ونعم بالله
غنى : ضلينه كاعدين وبعدها كمنه للمحاضرات لحد ما طلعنه .... وصلت للبيت دخلت للشقه ملكيت فهد عرفته طالع ... دخلت للمطبخ لكيت المواعين مغسوله ومكلوبه على السنك ... ابتسمت فهد اول رجال اشوفه يغسل مواعين نزعت حجابي وجبتي ودخلت للغرفه لفت نظري فلوس على الميز شلتهن تنهدت اكيد هو عافهن .... افف منه الف مره كتله مامعتازه فلوس بس ميبطل ينطيني بكل جيه ... خليتهن بجنطتي باوعت اكو ورقه فوك سجلي اباوع هذا مو خطي شلتها
فهد : اسف لان دخلت لغرفتج بس ماعرفت وين اخلي المصرف وغرفتج انسب مكان بالمناسبه شكرا على الريوك عاشت ايدج
ملاحظه / نصيحه انوب من تشترين ملابس داخليه لتشترين لون ابيض لان مو حلو ويطلع باهت عليج اشتري اسود لان انتي بيضه فيطلع حلو ويبرز بياضج وللمعلومه الموديلات الي تلبسيها مو مال بنات مال متزوجات ..... فهد
غنى : ضليت صافنه احس وجهي اشتعل نار ... عززه اكيد شاف السله يمه شكد فشله هسه شجابك عليها بس كلي .... صحت قسم بالله هالفهد واحد ذره خجل ماعنده زايعها فرد مره .... رحت توضيت وصليت وكمت تغديت وكعدت اقره قران شويه .... سمعت الباب يندك طلعت فتحته شفت ود
ود : السلام عليكم
غنى : وعليكم السلام
ود : ممكن ادخل احجي وياج
غنى : اكيد تفضلي ...اباوعلها دخلت تتفحص البيت بعيونها .... تفضلي استريحي
ود : كعدت تعالي كعدي اريد احجي وياج
غنى : كعدت
ود : اكو براسي سؤال واريدج تجاوبيني عليه بكل صراحه
غنى : سألي
ود : سيد فهد صاحب العماره خوش يريح لو لا
غنى : باستنكار عفوا
ود : لتسوين نفسج شريفه .... تره كل العماره تدري انتي الكح.... مالته ودومه يجيج يكمل حاجته يمج مقابل اقامتج هنا ببلاش
غنى : فتحت عيوني .... شنوووو
*************
يتبع
- يتبع الفصل التالي اضغط على (ذنوب على قيد الغفران) اسم الرواية