رواية رواسي الدهر الفصل الرابع و العشرون 24 - بقلم روح الدليمي

 

➰➰➰➰➰➰➰➰➰➰➰

بقيت صافنه و الصينيه وكعت من ايدي العصير 

و الكزاز صار بكل مكان، وحده من الكزازات جرحت رجلي، كام من مكانه و اجه عليه سحبني من ايدي كعدني 

و گال..

رسيم:بيج شي روسيه، باوعيلي 

رفعت عيوني باوعت عليه، بدون اي تفكير رفعت ايدي 

ضربته راشدي و كمت من مكاني عطت بي.. 

رواسي:أنتَ واحد نذل، صارلك شهرين تلعب عليه و ماخذ دور المجهول حتى تخليني ارجع اتعلق بيك و اتزوجك؟ 

راشد:رواسي عيب عليج! 

رديت عليه بنفس النبره.. 

رواسي:كلكم متفقين وياه و انتو تعرفون شكد اذاني هوَ 

و بعدكم مُصرين تجمعونا سوه 

رسيم:اريدج اني روسيه والله احبج 

رواسي:و اني اكرهك رسيم 

عفتهم و طلعت من الاستقبال صعدت لغرفتي، كعدت على الجربايه اهز برجلي و اباوع للجرح شلون يذب دم 

معصبه منهم كلهم، كلهم يضحكون عليه كلهم يريدون سعاده رسيم و بس! اني محد يفكر بيه

انفتح باب الغرفه و دخل عليه، عطت بي

رواسي:اطلع بَره ما اريد اشوفك اطلع! 

رسيم:روسيه خلي نحجي 

رواسي:ماكو شي نحجي بي، صدكني رسيم لو جايني بدون كذب و خداع چان ممكن تكون اكو فرصه النا 

بس أنتَ بقيت تخدع بيه طول الفتره الفاتت 

رسيم:متقبلين تنطيني فرصه حرت شسوي وياج! 

رواسي:تطلكنا احنه ماكو امل نرجع خلاص انساني 

رسيم:مره وحده شغلي عقلج و فكري عدل ابوس ايدج 

رواسي:مو طلكتني! 

رسيم:كلتها الج مره وحده و كلتها بس لان أنتِ ردتي تأذين روحج اكدر اعقد عليج من جديد  

اشرت على الباب و نترت بعصبيه.. 

رواسي:اطلع بَره ما اريد اشوفك 

رسيم:خلي نتفق اتفاق 

رواسي:ماكو شي نتفق عليه 

رسيم:بس اسمعيني ممكن؟ 

                                      

 

                

رواسي:احجي اسمعك 

كمت من مكاني نزعت الكعب شمرته و نزعت الستره 

فتحت الكنتور طلعت ملابس و رجعت كعدت كدامه 

رواسي:فضني احجي 

رسيم:خلي نبلش من البدايه، بدايه جديده كأن هسه دنتعرف ثنينه نستحق هاي الفرصه و صدكيني ما اسوي اي شي يزعلج 

رواسي:ماعندي ثقه بيك 

رسيم:نبني الثقه، روسيه فكري لخاطر مسك 

ركزت نظراتي بعيونه و حجيت بقلق.. 

رواسي:رسيم أنتَ متتغير اخاف انطيك فرصه و ترجع تأذيني مثل قبل 

رسيم:والله و غلاتج عندي ميبدر مني اي تصرف يزعجج 

رواسي:و اذا انعاد كلشي صار قبل؟ 

رسيم:مينعاد والله و مينذكر من الاساس 

رواسي:اذا كدرت تكسب گلبي بدون كذب و خداع 

مستعده انسى كلشي و نبلش بدايه جديده 

رسيم:خلي بس نرجع نعقد قبل لتخلص العده 

رواسي:ما اعرف 

اخذ ايدي بين ايده طبع بوسه عليها و گال

رسيم:ما اريد اخسرج روسيتي، بس نعقد و هاهيه 

تذكرت خطيبته سحبت ايدي منه و نترت..

رواسي:لحظه لحظه أنتَ شلون تريدني ارجعلك و أنتَ خاطب! 

رسيم:مو خاطب والله 

رواسي:لعد و نور؟ 

ضحك و گال

رسيم:بنت خالتي 

رواسي:اي يعني عادي تكدر تتزوجها! 

رسيم:لا ما اكدر لانها اختي بالرضاعه

رواسي:انطيني وقتي افكر 

رسيم:ماعدنا وقت اقل من شهر باقي و تخلص العده 

رواسي:اسبوع بس افكر عدل 

رفع اصابعه بوجهي و گال 

رسيم:يومين بس ميصيرن ٣ 

رواسي:تمام بس عوفني افكر براحتي لتحجي ويايه و لتضغط عليه بليز

رسيم:بليز؟ 

رواسي:اي بليز لتضغط عليه 

رسيم:امج ابوج من ذاك الصوب، احجي عدل 

رواسي:متعوده عادي أنتَ هم تتعود 

هز راسه معاجبه و مد ايده على رجلي يتفحص بالجرح

كام فتح المجر الي حاطه بي شغلات التعقيم و الاسعافات الاوليه، طلع معقم و شاش و لاصق طبي، كعد بالگاع و حط رجلي بحضنه 

        

          

                

رواسي:رسيم عوفها اني اعقمها 

رسيم:لا اني، هسه تحرگج شوي تحملي 

فتح علبه المعقم دار منها على الشاش و صار يمسح على الجرح بخفه، عصرت رجلي من الالم و عضيت على شفتي بقوه.. لف رجلي بالشاش و حط عليه لاصق حتى مينفتح 

كام من مكانه اخذ ايدي بيده سحبني عليه و بدون مقدمات 

طبع بوسه عميقه على شفايفي، دفعته عني و عطت بي

رواسي:حرام تبوسني مو مرتك اني! 

رسيم:تخبل بعد وحده 

رواسي:اطلع بَره اخذت راحتك أنتَ 

سحبني من خصري و گال بهدوء

رسيم:يا راحتي أنتِ احبج 

نزل راسه على رگبتي سحب نفس قوي، كل جسمي 

قشعر بسبب انفاسه الحاره، توترت و بوخت من الخجل 

باسني من رگبتي بخفه و همس ب اذني

رسيم:گلبي يرجف عليج روسيه 

حجيت بتوتر

رواسي:فدوه وخر عني ميصير 

رسيم:لتحرميني منج، ارجعيلي روسيه خلي روحج بروحي. ميت اني ميت بدونج الدنيا كلها متسوه اذا أنتِ مو يمي 

رواسي:فدوه روح خاف احد يجي 

رسيم:محد يجي يعرفوني يمج 

رواسي:اريد ابدل عوفني 

وخر راسه عن رگبتي و بقه محاوط خصري بيده 

باسني من راسي و گال 

رسيم:اجيب الشيخ يعقدلنا من جديد؟ 

رواسي:گتلك خليني افكر فدوه رسيم عوفني 

رسيم:و اذا ماعفتج شتسوين 

رواسي:اصيح و الم عليك العالم، اكلهم يريد يغتصبني 

ضحك بخفه و قرب عليه باسني من خدودي، على كل خد طبع بوسه هادئه.. 

رسيم:احبج 

رواسي:اكرهك

رسيم:احبج 

رواسي:اكرهك 

رسيم:احبج 

رواسي:احبك

رفع حاجبه و ابتسم بمكر، هزيت راسي و اردفت.. 

رواسي:لا لا اقصد اكرهك من وراك غلطت 

رسيم:اصدكج؟ 

رواسي:اي طبعاً ما احبك اني 

        

          

                

رسيم:زين ليش حاضنتني عوفيني اريد اروح 

انتبهت على روحي فعلاً حاضنته وخرت ايدي و ابتعدت 

عنه حطيت شعري وره اذني و گلت.. 

رواسي:روح يلا و لتجي بعد 

رسيم:يومين بس و تلكيني فوك راسج اني و الشيخ 

رواسي:يجوز ما اقبل؟ 

رسيم:مو بكيفج حَبيبتي 

دخل ابويه باوع لرسيم خزره و گال بعصبيه

راشد:روح جيب الشيخ و تعال 

رواسي:خلوني افكر شبيكم! 

راشد:ثنينكم ادبسزيه صار ساعه واكف بالباب محد بيكم انتبهلي حايرين واحد يبوس باللاخ 

رسيم:عادي مرتي و ابوسها أنتَ شعليك

راشد:من ترجع تعقد عليها عود گول مرتي 

باوعلي و نتر بيه.. 

راشد:هسه تنطيني قرارج لو ترجعيله لو كل واحد بطريقه 

باوعت لرسيم گال

رسيم:دوافقي يا عيني 

رواسي:عندي شروط 

راشد:احجي يا بنتي مو فتيتي گلبي 

رواسي:انزلوا جوه هسه اعدل روحي و اجيكم 

رسيم:انزل أنتَ هسه تعدل روحها و نجي

عاط بي ابويه و هوَ يضحك 

راشد:امشي كدامي سرسري امشي 

رسيم:غير اساعدها شنو اعوفها وحدها خاف تريد تبدل 

ابدللها اني 

تقرب عليه ابويه سحبه من ياخه القميص و طلعه كدامه 

و هوَ يضحك على ابويه، سديت الباب و اني اضحك عليهم واحد يتناكر ويه الثاني عبالك جهال 

بدلت ملابسي لان صارن كلهن عصير لبست فستان 

و نزلت دخلت عليهم سلمت و رحت بوست البنات 

و كعدت بين ابويه و امي، باوعلي رسيم و گال..

رسيم:روسيه 

رواسي:نعم؟

رسيم:موافقه ترجعيلي؟

رواسي:ما اعرف، و اذا اوافق ف عندي هوايه شروط 

غسان:شروطج يتنفذن كلهن و اخذيها كلمه مني 

رواسي:و النعم منك بس رسيم ماعندي ثقه بي 

رسيم:حلفتلج باغلى شي عندي كلشي صار قبل لا ينعاد و لا ينذكر 

جميله:و اذا ما كدرت تكون كد كلمتك؟ 

محمد:مستحيل يكسرها او يزعلها ب اي شي محد شافه شلون صار بفراكها 

        

          

                

رواسي:يستاهل حتى يتعلم شلون يلزم اعصابه و يعوف النسوان 

رسيم:يا طلابه النسوان 

رواسي:شنو كذب؟ مو تزوجتني و أنتَ متزوج بدون متكلي و من اجيت لاهلي أنتَ سافرت ويه هدى؟ 

رسيم:سافرت ويه هدى صح بس ما شفتها بعد و لا شافتني 

رواسي:و هيا؟ من كذبت عليه كتلي طلكتها و طلعت ممطلكها و مكعدها وحدها

رسيم:گتلج ما كدرت اطلكها خفت عليها من اهلها 

قاطعني ابويه و گال بجديه.. 

راشد:هسه عوفوا كلشي قديم و ركزوا على حياتكم الجديده، كلتي عندي شروط احجي شروطج خلي يفهم شنو تردين 

رسيم:موافق عليهن كلهن بدون ما اسمع 

رواسي:بس هم احجيهن حتى تشوف روحك كدها لو لا 

رسيم:اسمعج بكل ممنونيه 

ركزت نظراتي بعيونه و حجيت بجديه.. 

رواسي:اول شي تجيب مشيه جبيره تسد الشارع كله و تجي تخطبني من ابويه على حسب الاصول، ثاني شي تسويلي كل مراسيم الزواج من الخطوبه للعرس، ثالث شي تترك شغلك مال مافيات، رابع شي عصبيتك تسيطر عليها و ايدك ممنوع ترفعها عليه صوتك ممنوع يعلى عليه كدام اي بشر، من تريد تتعارك ويايه تتنظر لليل من نكون بغرفتنه و بابنه مسدود تحجيلي شنو التصرف السويته و زعجك مني بدون صياح  

رسيم:تم تأمرين امر 

رواسي:اذا تحس عقلك صار يفكر بغيري بنفس اللحظه تطلكني ما ابقى وياك و أنتَ تفكيرك يم غير وحده 

رسيم:ما صارت قبل حتى تصير 

رواسي:و شغلي ارجع اشتغل و ممنوع تمنعني منه 

رسيم:ما امنعج هذا حقج درستي و تعبتي مو حتى تكعدين بالبيت 

رواسي:هذا الي عندي اذا تشوف نفسك كفو و كدها اني موافقه بس اذا تحس بروحك متكدر على شرط منهن ف اطلع من حياتي للابد 

رسيم:انفذ كل شرط بكل حب و ممنونيه 

رواسي:تمام 

كمت من مكاني و اردفت بهدوء.. 

رواسي:اترخص منكم اروح اشوف مسك 

طلعت من يمهم و رحت للصاله شفت مسك بعدها نايمه 

كعدت يمها و نزلت دموعي.. 

رواسي:كله يهون لخاطرج المهم اشوفج فرحانه

دخلن البنات عليه و امي وياهن، مسحت دموعي 

و ابتسمت بوجههم.. 

        

          

                

عذراء:والله فرحانه الكم من كل گلبي الله يسعدكم 

رواسي:اني مو فرحانه 

رشا:ليش ولج؟ 

رواسي:ماعندي ثقه بي للاسف خايفه لا يعيد كلشي 

نور:ابني الثقه من جديد، رسيم يحبج هوايه والله 

٢٤ ساعه يسولف بيج و يتمنى بس ترجعون 

عذراء:بيوم الي طلگج ارتفع السكر عنده و الليل كله هوَ بالمستشفى فد مره تعب 

رواسي:و ثاني يوم يكلكم اريد تخطبولي 

ضحكت نور و گالت .. 

نور:صراحه اني اقترحت عليه هاي الفكره كتله اني راح اجي و عرفها عليه بصفتي خطيبتك، حتى تغارين عليه و ترجعيله 

رشا:و أنتِ تحبي رواسي واضح بعيونج 

رواسي:الحب مو كلشي والله 

بقو كاعدين يمنه ساعه و بعدها طلعوا، رسيم و ابويه اتفقوا على كل شي و كله بعد يومين يجون مشيه و يخطبوني من جديد.. التهينا بالبيت و التحضيرات امي 

سوت حمله تنظيف على كل البيت ما اعرف منو كايللها 

الزلم راح يفترون بالبيت و يشوفوا نظيف لو لا..

قبل يوم المشيه بليل گاعده بغرفتي و فاتحه كام ويه البنات، اندك الباب و دخل ابويه البنات كلهن سكتن 

عفت تلفوني و كمت عليه.. 

رواسي:هاا حَبيبي شو منايم 

راشد:رسيم خابرني 

رواسي:شيريد 

راشد:يكول باجر تعقدون راد انطيج خبر لان أنتِ متردين عليه 

رواسي:شبي مستعجل يجوز ارفض؟ 

رفع اصبعه بوجهي و حجه بجديه..

راشد:اذا ناويه ترفضين گولي من هسه حتى ليش يجون و تخجلين العالم! شيوخ و ناس واصلين كلهم راح يجون 

اذا ببالج هيج فكره شيليها احسن لو گولي ما اريده حتى اخابره و محد بيهم يجي، عيب علينا نرفض و العالم كلها جايه علمودج أنتِ 

رواسي:لا خلص بكيفكم انتو شنو تشوفوا مناسب اني وياكم 

اخذني بحضنه و باسني من راسي

راشد:اذا متردي گولي بنتي منجبرج احنه، بس شفتي هوَ شلون رايدج و صار هوايه يحاول وياج حتى ترجعيله 

رواسي:اذا ارجعله ف علمود مسك لان متعلقه بي هوايه 

راشد:اذا هيج مترتاحون يا بنتي، أنتِ تحبي لو لا؟ 

نزلت راسي خجلانه من عنده رفع راسي بيده ضحك عليه و اردف

راشد:احجي ليش خجلانه قبل يومين شبعج بوس و أنتِ متسرسحه بين ايده 

        

          

                

رواسي:هوَ ادبسز اني معليه 

راشد:اي والله سرسري مسقط فد مره 

رواسي:خايفه بابا 

راشد:لتخافين روسيه، اني متأكد رسيم راح يحافظ عليج 

يحبج و يخاف عليج و على زعلج، قبل الانتقام عامي عيونه بس هسه كلشي تغير 

رواسي:ما اعرف 

راشد:ارجع اسئلج تحبي أنتِ ؟ 

رواسي:يمكن 

ضحك بخفه و گال.. 

راشد:عيونج هيَ تحجي الجواب وصلني 

باسني من راسي و اردف..

راشد:نامي حَبيبتي و لتفكرين بشي 

رواسي:ان شاء الله تصبح على خير حَبيبي 

راشد:و أنتِ بخير 

طلع من الغرفه و سد الباب رجعت لمكاني شلت التلفون

لكيت البنات بعدهن على الخط حجيت وياهن شويه 

و بعدها سديته و نمت.. 

كعدت الصبح على صوت امي خبصتني خبص 

جميله:روسيه كومي امي وراج كومه تحضير 

فركت عيوني و رديت عليها بصوت ناعس

رواسي:شبيج امي من صبح الله عوفيني انام شوي 

جميله:كومي راح يحجون بعد شوي و أنتِ بعدج 

شلت تلفوني باوعت للساعه، گمزت من فراشي و عطت

رواسي:ساعه ب ٢ ليش ما كعدتيني من وكت 

جميله:عجزت اكعدج و أنتِ نايمه، مسك اجتج كلتيلها روحي هسه اجي و رجعتي نمتي 

رواسي:خلي افوت اسبح و اجهز روحي 

دخلت للحمام سبحت بسرعه و طلعت مخبوصه خبص، لبست قفطان مغربي ابيض و مطرز بذهبي علمود الصور يطلعن حلوات من نعقد 

نشفت شعري بالشسوار و مشطته بقيت حايره شنو اسوي شعري، اندكت باب غرفتي و دخلن البنات يهلهلن 

ضحكت عليهن و گلت.. 

رواسي:جنت انتظر الهلهوله حتى اعيش الاجواء 

نارين:رواسي عوفي رسيم و تعالي ازوجج لابويه 

مغرمه بجمالج ما اريد تضيعين من ايدنه 

ضربتها ماري على ظهرها و عاطت بيها.. 

ماريا:هيَ تريدلها حجه حتى تعوف رسيم، مو زين وافقت ترجعله 

رواسي:خايفه والله 

نرجس:لتخافين و انسي كلشي قديم فكري بالحاضر و المستقبل 

        

          

                

اجت نارين وكفت ورايه حضنتني و گالت بتوتر.. 

نارين:روسيه اريد اعترفلج بفد شي صغيروني

درت روحي عليها و رديت متسائله

رواسي:شنو شمسويه اعترفي! 

ضحكت و گالت 

نارين:اني جنت اعرف المجهول هوَ نفسه رسيم 

نرجس:كذابه! 

نارين:مو باعي خلي احجيلج 

رواسي:احجي حتى اعرف بشنو اضربج 

نارين:خابرني گال يريد نلتقي اتفقنا و رحنا سوه لمطعم 

و طلب مني اساعده حتى يخليج تحبي مره ثانيه 

ماريا:يا حقيره ليش ما كلتيلنه؟ 

نارين:أنتِ متثبت حجايه بحلگج رأساً تجفصين و تكولين لرواسي و نرجس متحب رسيم ف ما حجيت 

رواسي:بشنو ساعدتي أنتِ؟

بعدت عني وكفت يم الجربايه و گالت 

نارين:اقترحت عليه شخصيه المجهول و حجيتله شنو الشغلات الي عاجبتج و هوَ صار يدزهن الج هدايا 

بقيت اباوع عليها حايره افرح لو ازعل، مشيت عليها و گلت

رواسي:تعاي انطيني حضن يلا 

حضنتها و مديت ايدي على خصرها كرصتها بقوه 

ابتعدت عني تفرك بخصرها و مغمضه عيونها من الوجع 

نارين:مو هيج يا حقيره! 

رواسي:تستاهلين حَبيبي 

ضحكت عليها و رجعت كدام المرايا 

رواسي:شسوي شعري 

ماري:سوي بالفير خصلات ناعمه تعاي اني اسويلج 

سحبت الكرسي كعدت عليه و هيَ صارت ورايه تسويلي بشعري، نرجس طلعتلي صبغ اظافر و كعدت تصبغلي ب اظافري و نارين تگلب بتلفونها تختارلي مكياج مناسب 

سمعت صوت سيارات بَره عطت بتوتر.. 

رواسي:اجو ولكم اجو! 

بكل فضول وكفنه بالشباك نباوع عليهم، فتحت تلفوني 

و صرت اصور لحظه وصولهم.. السيارات ترسن الشارع ترس كل سياره ينزل منها ٤ او ٥ اشخاص 

و اخيراً طبگت سيارته نزل منها هوَ و اخوانه و وياهم 

ثنين ما عرفتهم 

رفع عيونه يباوع على شباك غرفتي شافني واكفه 

ضحك و غمزلي رفعتله ايدي و سويتله "اوكي"، طلع ابويه من البيت يرحب بيهم و دخلهم للاستقبال.. 

نرجس:يعني سوري كلش بس رسيم غثيث 

رواسي:اتفق 

        

          

                

نارين:انجبي أنتِ وياها و أنتِ تعالي يلا خلي نكملج بسرعه بقالج شوي

رجعت كعدت ونارين وكفت تسويلي مكياجي وماري تعدل بشعري كملت كلشي وصعدت امي

جميله: روسيه ماما يلا انزلو أنتِ والبنات 

رواسي: تمام امي فد شوي ننزل

طلعت امي باوعت على البنات وكلتلهم 

رواسي: بنات متوترة

ماري: ماكو داعي تتوترين بالعكس تونسي وضحكي انطي نفسج فرصة تعيش كل هاي اللحظات الحلوة وامشوا ننزل يلا

 نزلت واني احاول اتصنع ضحكتي سمعت صوت هلاهل ويه نزلتي باوعت مرت عمي و نسوان ولدها و عذراء ورشا ونور وباقي اقاربهم كلهم موجودين كعدت بمكاني والبنات بلشوا يركصون، نص ساعه و اجت امي گالت 

جميله: يلا ماما راح يعقدلكم الشيخ

 گمت كعدت يم باب الأستقبال ورجلي حطيتهم بمي و ورد اجت عذراء حطت بحضني قرآن واسمع صوت الشيخ و هوَ يردد آيات من القرآن صفنت واحس بضربه من امي و هيَ تكلي

جميله: ردي موافقة وأنتَ وكيلي

رديت الموافقة واعتلت صوت الهلاهل رجعت كعدت بمكاني وصاحت نارين

نارين: راح يدخل العريس بنات

توترت وعيني على الباب دخل رسيم يمشي بخطوات ثابته، نظراته متركزه عليه و ينظرلي بكل حب تقرب باسني من راسي كعد يمي و همسلي..  

رسيم: مو كلتي تعال تزوجني اريد انكد هاي اني اجيت حبيبتي

رواسي: اني طلبت من المجهول مو منك 

ضحك وسكت عني جابو الحلقات ولبسني الحلقة باس ايدي اندار اخذه العقد من رشا وصعد ايده يلبسني ياه  قرب روحه عليه بحجه يسد بالعقد، انفاسه الحاره تضرب 

برگبتي لبسني ياه و طبع بوسه بدون ما احد ينتبه عليه

سيطرت على نفسي وحجيت بهدوء

رواسي: رسيم لا تصير ادبسزز

ضحك و كال بمكر.. 

رسيم: بعدج ما شفتي الادبسزز الحقيقي 

اجت رشا گومتني وصاحت رسيم حتى نركص ركصنه شوي، وكف وصاح على امي وحجه وياها بصوت ناصي، هزت راسها امي و هوَ اخذ ايدي و سحبني من بينهم صعدنا لغرفتي دخلني وسد الباب

رواسي: قنادر عليك رسيم اذا تصير ادبسزز

ما مهتم لكلامي يتقرب واني ارجع اخر شي لزمني من خصري باسني براسي و نطق كلامه بخدر .. 

        

          

                

رسيم: احبج روسيتي ومستحيل ارجع اضيعج من ايدي او أذيج 

طبع بوسه على شفتي وتعمق بيها شلت ايدي ادفع بي و هوَ ما مهتم ومستمر يبوس ابتعد وخله كصته على كصتي دفعته ارزل بي

رواسي: شكد سرسري و ما تستحي

رسيم: شرأيك نعيدها حبيبي

ادفع بي حتى يطلع وارزل بي وهو يضحك نزل جوه قبلي عدلت روحي نزلت وراه، كعدت يم البنات غمزلتي نارين وهي تكول

نارين: شصار احجي ما اكول لاحد

رواسي: من تتزوجين تعرفين شيصير

نارين: لو متزوجه ابويه جان هو كال شصار

ضحكو عليها واجو غسان ومحمد حتى يباركولي وطلعوا كلهم بقينه اني والبنات كعدنه نسولف ونضحك اتصل دِلهَام على ماري حتى ياخذها وياه طلعوا وطلعت وراهم شفته نزل واجه باتجاهي ابتسملي و گال 

دِلهَام: مبروك رواسي يارب اشوفج دائماً سعيدة

رواسي: الله يبارك بيك دِلهَام يوم الالك 

طلعوا واني صعدت لغرفتي تعبانه بدلت ونمت بسريري سمعت صوت تلفوني يدك شلته واني اشوف المتصل رسيم جاوبت

رواسي: نعم استاذ رسيم

رسيم: الله ينعم عليج خطيبتي شلونج

رواسي: الحمدلله اريد انام

رسيم: رواسي اذا لهسه زعلانه وعد مني الج راح ارجع ازرع الثقه بيناتنه واحبج مثل قبل واكثر

رواسي: اتمنى هذا الشي رسيم الي سويته خلاني افقد ثقتي بيك

رسيم: صدكيني راح يتغير كلشي روحي نامي حبيبتي واني اجي اشوفج الصبح تصبحين على خير احبج

رواسي:تمام وانتَ من اهله

كعدت الصبح مسك نايمه بصفي دخلت للحمام سبحت ونشفت شعري ونزلت امي وابويه كاعدين

رواسي: صباح الخير 

ردوا وصاحني ابويه

راشد: تعالي بنتي اكعدي تريكي

كعدت بصفه وهو يسألني

راشد: شلونج اليوم نمتي زين؟

رواسي: الحمدلله زينة اي 

دك تلفوني باوعت رسيم ديتصل عليه، كمت من يمهم و رديت عليه 

رواسي:نعم 

        

          

                

رسيم:شبيج حَبيبي 

رواسي:مابيه شي، شكو متصل؟ 

سمعت صوت ضربه و گال 

رسيم:هاا اجه دور النكد من هسه؟ 

نترت بي.. 

رواسي:شقصدك اني نكديه؟ 

ضحك و رد عليه

رسيم:لا حَبيبي اني انكد عليج مو أنتِ 

رواسي:خوش 

رسيم:وصلت اني فتحيلي الباب اريد اصبح بوجهج 

رحت على الباب وكفت يمه و حجيت

رواسي:شعندك جاي خير يابه؟ 

رسيم:من اشوفج اگلج شعندي 

سده من عندي و سمعت صوته، فتحت الباب دخل 

سحبني من خصري باسني و گال 

رسيم:هسه اكدر اگول صباح الراحه يا راحتي 

ابتعدت عنه و رديت عليه و اني امشي كدامه

رواسي:صباح الخير 

دخلنا للصاله فتحت عيوني مصدومه لما تقدم على ابويه 

باس راسه و سوه نفس الشي ويه امي كعد و كاللهم 

رسيم:شلونك عمي، شلونج عمتي 

ضحك ابويه و رد عليه 

راشد:بخير الحمدلله 

جميله:الحمدلله ابني أنتَ شلونك 

رسيم:طول ما روسيه ويايه اني بخير و نعمه 

سويت حركه بحلگي تدل على عدم اهتمامي اردف 

رسيم:روسيه حظري روحج الاسبوع الجاي حفله المهر 

و هل يومين نعقد بالمحكمه ان شاء الله 

عطت بصدمه.. 

رواسي:شنو شبيك مضروب على راسك؟ 

حط ايده على راسه يتفحصه و گال 

رسيم:لا مابيه شي 

رواسي:ترا لا عبالك عقدنا و هيج يعني اني سامحتك 

راشد:روسيتي مو كلنه ننسى كلشي قديم و نركز على الجديد؟ 

رواسي:كل ما اشوفه ارجع احس بنفس الالم و القهر الي عشته بسببه 

رسيم:يمكن ابوج و امج يزعلون من كلامي، بس اني تناسيت كلشي لخاطرج امي ماتت على ايد ابوج 

و امج تكتمت على الموضوع بس كل حقد بداخلي 

مابقه تجاههم والله يشهد على كلامي 

رواسي:مابقيت شي ما سويته بس حتى انسى تعذيبك الي 

حاولت بس ما كدرت، نسيت كلشي سويته بيه و نسيت خداعك الي و كذبك عليه الا تعذيبك ماكدرت انساه 

و ما اتوقع راح انساه بيوم و يبقى عندي خوف منك لا هم ترجع تعذبني مره ثانيه 

        

          

                

كام من مكانه و گال 

رسيم:من رخصتكم بس اتوضى و ارجع 

طلع من الصاله راح على الحمام، باوعلي ابويه و گال 

راشد:انطي اخر فرصه و اذا غلط بحقج غلط صغير 

يحلم ترجعيله بعد و حتى بالعراق ما ابقيج 

ردت امي مأيده كلامه 

جميله:يا حَبيبتي فكري عدل و خلي بنتج كدامج قبل كلشي 

دتشوفيها شلون متعلقه ب ابوها مع انو ما صارله هوايه 

من دخل حياتها و عرفته، و مثل ما گال ابوج 

بس يفكر يغلط بحقج او يأذيج راح يلگانه احنه بوجهه 

صفنت عليهم لثواني و حجيت 

رواسي:هيج رأيكم؟ 

راشد:اي و صدكيني رسيم يحبج و مثل ما متأكد من وجودج كدامي متأكد رسيم مستحيل يأذيج بعد و لا يزعلج 

ردت احجي بس قاطعني رسيم گال و هوَ ينزل برداناته

رسيم:عمه وين القرآن الكريم

كامت من مكانها و گالت 

جميله:عفته بالمطبخ هسه اجيبه 

راحت جابته و رجعت اخذه من ايدها باسه و حطه على راسه، لزمه ب ايد وحده و الايد الثانيه حطها فوكاه

وكف كدامي باوع بعيوني و گال 

رسيم:اقسملج بكتاب الله ما ااذيج بيوم ابد، و لا ازعلج 

احبج و راح ابقى احبج لحد اخر شهگة نفس تطلع مني 

اقسم بكتاب عيني متنظر لغيرج ابد و لا اخونج بيوم من الايام راح ابقى محافظ عليج طول عُمري و اسعى لسعادتج أنتِ و مسك و ان شاء الله اطفالنه البقيه 

رجع باس القرآن و حطه على الرف فوك التلفزيون 

كعد بمكانه و اردف.. 

رسيم:اتمنى تسامحيني على كلشي و تنسين الفات كله 

ابويه كام من مكانه اشر لامي و گال 

راشد:كومي نعوفهم وحدهم يتفاهمون بيناتهم 

باوعله رسيم و گال 

رسيم:عمي اخذها و اطلعوا جيبوا مسواك للبيت اكيد عدكم نقص 

ضحكت امي و كالتله

جميله:لا كلشي موجود اول بارحه جاب مسواك 

رسيم:شوفي تأكدي لازم تلكين نقص منا منا 

راشد:تطردنه من بيتنه سرسري 

رسيم:حقك عليه عمي الغالي بس افهموا عاد مو شلعتوا گلبي 

ضحكوا امي و ابويه و طلعوا من الصاله و طبكوا الباب وراهم، كام من مكانه وكف كدامي كومني و اخذني بحضنه، حضني بكل قوته حتى نفسي انكتم ضربته على ظهره ابتعد عني شوي و گال 

رسيم:صايره عنيفه روسيه ايدج و الضرب 

رواسي:تريد قنادر لو ضرب بكيفك ثنينهن متوفرات

        

          

                

مد ايده صار يمشي اصابعه بكل خفه على وجهي 

و استقر على شفتي صار يمسح عليها بطرف اصبعه 

غمضت عيوني لما شفتي صارت بين شفته 

و ايده تمشي على ظهري بهدوء.. اختفيت عن العالم كله 

صرنا بعالم بس اني وياه وحدنا 

ابتعد عني حط گصته على گصتي يضبط انفاسه السريعه

رجع يطبع بوسات متفرقه على كامل وجهي ويه كل بوسه يهمس بكلمه "احبج" دفعته بخفه ابعده عني 

و گلت.. 

رواسي:كافي لتصير ادبسز 

رسيم:تحبيني روسيه؟ 

رواسي:لا 

ابتسم ابتسامه خفيفه 

رسيم:يلا عندي وقت اخليج تحبيني 

رواسي:ما احبك، احب المجهول الرومانسي ابو الهدايا 

رسيم:و المجهول يموت عليج روسيته 

رواسي:اعرف، بس يا ترى راح يعوضني عن كلشي فات؟ 

رسيم:يعوضج شوي شوي، و بلش ب اول شغله 

رواسي:شنو هيَ؟ 

باسني بهدوء و گال 

رسيم:اعيشج كل مشاعر الخطوبه كل شي تتمني اسوي الج، اصيرلج مصباح سحري أنتِ اطلبي و اني انفذلج 

ضحكت و كتله 

رواسي:قصدك تصير المارد السحري؟ 

رسيم:مو چان جني شوكت صار مارد 

رواسي:الجني مالتي أنتَ 

كعد على القنفه و سحبني كعدني بحضنه، باسني من رگبتي و گال بجديه.. 

رسيم:اني وعدتج انفذلج كلشي تطلبي بس شغله وحده ما اكدرلها و اتمنى تعذريني منها 

رفعت حاجبي و حجيت متسائله

رواسي:شنو تريد تتزوج؟ 

رسيم:عندي أنتِ تسوين كل بنات العالم روسيتي ما ابدلج ب اي وحده 

رواسي:شنو لعد! 

رجع باسني بهدوء و رد عليه

رسيم:شغلي 

كمت من حضنه و ضحكت مستهزئه

رواسي:مو گتلك أنتَ متتغير و فوكاها حلفت بالقرآن

رسيم:والله و غلاتج عندي مو سهل اتركه هيج، روسيه شغلي صعب و خطر كله ويه العصابات اذا اسحب روحي منهم يخلصون عليه و على عائلتي و گتلج هل شي من قبل 

رواسي:و تالي شلون لعد؟ 

رسيم:ما اوعدج بس احاول علمودج، صدكيني لو الاذيه بس الي تصير اعوفهم اليوم قبل باجر بس انتو هم تتأذون 

و تنتهي حياتكم بسببي و مستحيل اسمح بهذا الشي

        

          

                

كعدت يمه و صرت اباوعله حايره، استسلمت و حجيت

رواسي:خلص عوف الموضوع هذا و لا كأن شرطت عليك هذا الشرط 

اخذ ايدي قربها من شفايفه طبع بوسه عليها و گال 

رسيم:هسه موافقه علمود الحفله؟ 

رواسي:ما الحك ب اسبوع واحد 

رسيم:تلحكين لتصعبيها حَبيبي 

رواسي:بس مو هسه العرس بعد اريد استمتع بفتره الخطوبه 

رسيم:طك گلبي عليج والله اريد نرجع ببيت واحد و بغرفه وحده 

رواسي:عادي هسه احنه ببيت واحد و بغرفه وحده 

قرب عليه عضني من خدي و گال مستسلم

رسيم:اويلي منج روسيه اويلي، بس مو اكثر من شهرين 

رواسي:لا ٦ شهور اقل شي 

رسيم:رواسي وصلت حدها عندي بعد ما اتحمل 

بسته من شفته بوسه سريعه، و حجيت بدلع 

رواسي:الجني مالتي يمكن بعد ميريد يحقق امنياتي 

تجرأت و كعدت بحضنه وجهي بوجهه، بكل هدوء 

نزلت راسي على ركبته طبعت عليها بوسات ممتتاليه 

حضني من خصري و گلبني على القنفه و صار فوكايه 

رسيم:ليش تعذبيني و أنتِ بعيده عني 

رواسي:و أنتَ ليش تعذبني و متحقق امنياتي؟ 

رسيم:صايرين يابه صايرين هاهيه مثل ما تردين أنتِ 

قرب روحه يريد يبوسني و انفتح الباب علينه، ابتعد عني رأساً عدلت كعدتي و گلت 

رواسي:مسوكه ماما صح النوم تعالي 

فتحتلها ايدي اجت تركض اخذتها بحضني و صرت ابوس بيها و هيَ حضنتني بقوه و باستني بقوه 

رسيم:و اني مالي بوسه و حضن؟ 

شمرت روحها بحضن رسيم و صارت تبوس بي و حضنتنه، صفنت عليهم و الابتسامه ما فاركتني 

مر الاسبوع بسرعه بين عقد المحكمه و تحظيرات 

لحفله المهر، حجزت صالون و اشتريت فستان 

بسيط، ماري و البنات اهتموا بحجز القاعه و التزيين 

مهتمين ب ادق التفاصيل.. كلش اثق بذوقهم جنت مطمئنه كلشي راح يكون من احلى و احسن شي 

اجه يوم الحفله كعدت من الصبح اخذت اغراضي 

و اجاني رسيم وياه رشا و عذراء و نور و اخذنا للمركز 

ماري و البنات اجو سوه، بلشوا بيه اول شي 

و البنات بقوا ينتظرون يخلصون الزبائهن القبلهم 

        

          

                

سويت شعري ويفي بسيط و مرفوع نص شعر، مكياجي 

الوان ترابيه ترهم لفستاني الذهبي، كملت و وكفت كدام المرايا اباوع على روحي و الفرحه غامرتني 

البنات هم خلصوا وحده تكول للثانيه اني احلى منج، اخذنا صور هوايه لحد ما خابر رسيم يبلغني بوصوله.. طلعنا من المركز لكيته واكف منتجي على سياره و الجكاره بيده 

بس شافني شمرها بعيد و اجه يمشي ب اتجاهي 

و عيونه متشوف غيري 

صار كدامي لزم ايدي قربني عليه و طبع بوسه 

على راسي و گال بصوت بي رجفه.. 

رسيم:روسيتي جمالج يذبح خفي علينه شوي 

رواسي:و أنتَ طالع صاك مصكصك، اووف بويه اتسرسح على الصاكين 

عاطت نارين من يمها

نارين:هيوو ترا احنه هنا شبيكم بنص الشارع 

رد عليها بدون ميرفع نظراته عني 

رسيم:لا عيني تشوف غيرها و لا اذني تسمع لغيرها 

صار بصفي مديت ايدي حضنت ايده و مشينه للسياره 

و اصوات الهلاهل و هوسات البنات ورانه 

صعدن كلهن ويه ماري بسيارتها و اني و رسيم بسيارته 

شغل اغاني و ايده بيدي طول الطريق كل شوي يرفعها يبوسها و يبقه حاضنها يم گلبه.. 

بعد مده وصلنا للقاعه لكينه الكل واصل قبلنا، بقينه ننتظر 

خمس دقايق و دخلنا اني وياه الابتسامه مرسومه على وجهنا و الفرحه واضحه بعيونه 

توسطنا القاعه و المصوره كدامنه تصور بينه، صرنه نركص اني وياه على اغنيه "ع بالي حبيبي" لاليسا، اردد بكلمات الاغنيه و هوَ مبتسملي بحب 

رواسي:ع بالي حبيبي، ع بالي حبيبي، إغمرك ما إتركك إسرقك ما رجعك، إحبسك ما طلعك، من قلبي ولا يوم

أخطفلك نظراتك، ضحكاتك، حركاتك، علقهن بغرفتي

نيمهن ع فرشتي، إحلمهن بغفوتي، تَيحلى بعيني النوم

ع بالي حبيبي

رفع ايدي ليفوك و افتريت و سحبني حاوطني من خصري و اني حاوطت رگبته بيدي و كملت الاغنيه 

رواسي:ليلة اللي إلبسلك الأبيض، وصير ملكك والدنيّ تشهد، وجيب منك إنت، طفلك إنت متلك إنت، ع بالي حبيبي، أعيش حدك عمر أو أكتر، وحبي يكبر كل ما نكبر

وشيب لما تشيب، عمري يغيب لما تغيب، ع بالي حبيبي

بكل جرئه طبع بوسه عميقه على شفايفي و ابتعد عني كملنا رگصتنا لحد نهايه الاغنيه، اشتغلت اغاني 

عراقيه و اخوان رسيم دخلوا بيناتنه يركصون

سحبوا مني يركصون وياه اجن البنات كابلني و صرنا نركص 

خلصت حفلتنا بين الركص و الاكل و الكيكه 

و الفرحه ماليتنا كلنا.. 

مرت فتره سافرت بيها لاحد الدول بس حتى اختار بدله عرسي مناك، امي و ماري شاركوني رحله البحث.. 

بعد اسبوع من البحث المستمر و فره السوك اختاريت بدله سحرتني من اول لحظه عيني صارت عليها 

فخمه كلش حسيتها تكول اخذيني اني الي راح اخليج 

مثل الاميرات بعرسج 

و اثناء سفرتي صارت مظاهرات تشرين ببغداد بالبدايه 

الوضع طبيعي، بعد فتره رجعت العالم تتظاهر و هنا كلشي انگلب 

بدت اعمال الشغب و قتلهم للشعب بكل دم بارد 

العالم صارت تموت بس لان طلعت تطالب بحقها 

قررنا اني و دِلهَام و كم شخص من زملائنه نطلع نقدم مساعدات و نساعد الناس الي تتصاوب او يصير بيهم اي شي، هذا ابسط شي نكدر نقدمه لشباب و بنات بلدنا 

حتى رسيم و ادم و اخوانهم جانو طول الوقت همَّ بساحه التظاهرات، تواصلنا قليل بحكم اماكنه المتباعده  

صرنه كل يوم احنه نتواجد بساحه التظاهرات 

الوضع مخيف بشكل مو طبيعي، الحكومه حارت شلون تأذي الشعب، استخدمت ابشع الانواع 

طلق حي، دخانيات، قناصين، خطف و تعذيب 

و غيرها و غيرها.. 

بكل مره نفشل ب انقاذ حياه شخص انهار من البجي 

و احط ايدي على گلبي خايفه لا احد من عدنا يصير بي شي.. 

واكفه دااسعف بنيه متصاوبه، رجع الطلق بشكل مخيف 

وكع واحد من الولد كدامنه ركض عليه دِلهَام حتى يساعده 

قبل ليوصل يمه 

وكف بمكانه لثواني معدوده، و فجأه وكع بالگاع 

و الدم معبي التيشيرت مالته.. 

يتبع...