رواية رواسي الدهر الفصل الثالث و العشرون 23 - بقلم روح الدليمي

 

➰➰➰➰➰➰➰➰➰➰➰

درت عيوني باوعت دِلهَام واكف يحجي ويه المصوره الثانيه، ابتعدت عن رسيم و صحتله.. 

رواسي:حَبيبي تعال نصور سوه

باوعلي مستغرب و اجه عليه رفعتله حواجبي حتى ليسئل 

هوَ فهمني ابتسملي و گال.. 

دِلهَام:يلا تعاي 

وكفنه قريب من رسيم و اخذنه صوره على المرايا 

اني وياه، رسيم بقه واكف بمكانه مصدوم شوي شوي ملامحه تحولت للعصبيه راح من يمنه يمشي بسرعه 

باوعت لدِلهَام و حجيت بخجل.. 

رواسي:كلش كلش اسفه بس

قاطعني و گال.. 

دِلهَام:لتعتذرين اعرف أنتِ تحبي بعدج 

رواسي:لا ما احبه بس ردت اثبتله انو حياتي متوكف عليه هوَ و بس 

دِلهَام:تعرفين هذا غلط؟ 

رواسي:اعرف و متأكده رأساً يوصلها لابويه و يطيحون حظي 

دِلهَام:سايرتج ما ردت اخجلج بس لتعيديها، اذا حَبيبتي تسمع تزعل مني 

رواسي:يوو نسيت اني سوري والله 

دِلهَام:خليج طبيعيه حتى ميحس بيج واكف وراج يباوع علينه 

اشرت على باب الغرفه الي بيها ماري و ادم و حجيت..

رواسي:راح ادخل اشوفهم خلصو

دِلهَام:تمام

دكيت الباب و دخلت عليهم جانو مخلصين تصوير 

طلعنا سوه من الغرفه و دخلنا اني و دِلهَام و اجه ورانه رسيم شفت البنات كاعدات و محمد و غسان و وياهم وحده ما عرفتها منو كعد يمها رسيم قرب روحه عليها 

ما اعرف شنو حجه وياها و هيَ باوعتلي و ابتسمت 

رديتلها الابتسامه و وكفت يم البنات سلمت عليهن و على الولد، باوعلي رسيم و گال 

رسيم:اعرفج على خطيبتي نور 

رواسي:يا هلا، اني رواسي 

نور:تشرفت بيج گلبي 

رواسي:بنات اني گاعده هناك اذا احتاجيتوا شي صيحوني 

رشا:روحي گلبي 

رحت امشي بسرعه لان راح يدخلون العرسان 

كعدت بمكاني اجتني رساله من "المجهول" دز صورتي و كاتب.. 

                                      

 

                

_ذايب بحلاتج، سطرتيني سطر 

فتحت الصوره هاي هسه مصورني، رفعت عيوني اباوع 

اريد اشوف منو تلفونه بيده كلهم تلفوناتهم بيدهم هسه شلون اعرفه منو! 

عفت تلفوني لما اشتغلت اغنيه وصلوا العرسان لفارس كرم انفتح الباب و دخلوا ثنينهم اعتلت اصوات الهلاهل 

وصلوا لنص القاعه و صاروا يركصون سوه و الفرحه ماليتهم، باوعت لدِلهَام يمسح بدموعه و يباوع عليهم 

قربت روحي عليه و حجيت بصوت مسموع حتى يسمعني.. 

رواسي:لتبجي هسه اختك تبطل 

دِلهَام:ما اتحمل ابقى هنا اكثر رايح اني 

لزمته من ايده امنعه يكوم و حجيت.. 

رواسي:اذا تكوم ازعل عليك والله شنو تعوف عرس اختك و تروح! 

دِلهَام:ليش دخل حياتها و اخذها مني؟ 

رواسي:دِلهَام شبيك صدك تحجي بدل ما تفرحلها 

دِلهَام:فرحان والله بس بنفس الوكت مخنوك على فراگها

باوعت لادم و اشرتله على دِلهَام، لزم ايد ماري و اجو علينه ادم لزم ايدي كومني و ماري لزمت ايد دِلهَام و سحبته من مكانه.. مشينه وياهم توسطنا القاعه و صرنا نركص اربعتنه شوي شوي و البنات و البقيه كلهم اجو يركصون 

ردحنا ردح مو طبيعي فرحانين كلنا، رجعنا كلنا لاماكنا لما اشتغلت اغنيه رومانسيه هادئه حتى يركصون عليها سلو، خلصت الاغنيه و اشتغلت الثانيه هنا كل المتزوجين كاموا يركصون.. لا ارادي عيوني صارت على رسيم 

كام من مكانه و تقرب على نور مدلها ايده و كومها وياه 

و صاروا يركصون سوه 

عيوني بقت متركزه عليهم يحجي وياها و هيَ تضحكله 

شلت تلفوني و دخلت لمحادثه الشخص المجهول كتبتله 

رواسي:وينك أنتَ اريد اشوفك

ما رد عليه عفته و لهيت روحي بالتصوير ويه البنات.. 

اريد بس يخلص العرس ضجت كلش.. رفعت عيوني عن التلفون شفت مسك جايه تمشي ب اتجاهي كمت عليها 

شلتها بحضني و دخلت وياهم اردح و مسوكه بحضني تصفك فرحانه، اخذها ادم مني و صار يركص بيها 

و دِلهَام يركص ويه ماري.. تكابلنا اني و ماري لما اشتغلت اغنيه لساجده عبيد، صرنه نهز جتف سويه 

انضمن النا نارين و نرجس و بنات خالاتها لماري 

و صرنه نركص سويه، عافتنه ماري و راحت تحجي ويه ام الديجي شوي و رجعت گالت .. 

ماريا:روسيه اريد هديه لعرسي منج 

رواسي:عيوني الج گولي 

        

          

                

ماريا:نرجس جيبي الوصيتج عليه 

رواسي:شنو؟ 

نارين:الله تحمست بس خاف عيب 

ماريا:ماكو احد غريب عادي 

رواسي:ممكن تفهموني شنو؟ 

اجت نرجس تركض و بيدها وصله الرقص الشرقي 

هزيتلها راسي ب "لا" و گلت 

رواسي:لا ولكم استحي 

ماريا:تزعليني منج؟ اول مره اطلب منج شي لترديني عفيه 

نارين:شبيج قابل كل يوم ماري تتزوج 

رواسي:ما اكدر عيب! 

اندارت على ادم و صاحته اجه يركص هوَ و مسك 

وكف يمنه گال 

ادم:هاا حَبيبي 

ماريا:رواسي متقبل تركص 

ادم:صارلها ساعه تركص 

ماريا:لا شرقي 

ادم:عيب! 

رواسي:كلتلها عيب متقبل 

بقت تلح عليه هيَ و البنات و ادم سحب روحه من يمنه 

و رجع يركص ويه امه و اخوانه و عمي 

باوعتلي ماري و گالت 

ماريا:والله اذا متركصين ازعل منج و بعد ما احجي وياج 

رواسي:اووي ماري شبيج 

نرجس:عادي مو دائماً تركصين و كلتي مره ركصتي بعرس اخو ادم شنو راح يفرق

نارين:يلا رواسي حبابه 

رواسي:اذا اترزل من امي لو ابويه اطيح حظجن خوش! 

ماريا:لا حصلت الموافقه منهم متترزلين 

اشرت بيدها لام الديجي شالت المايك و طلبت من الكل يكعدون، اخذها ادم و كعدوا بمكانهم بقيت بس اني وحدي جني قرده بنص القاعه 

تشجعت و شديت الوصله على خصري باوعت لماري و ادم و حجيت بصوت عالي.. 

رواسي:لعيونك حبيب ئلبي 

اشتغلت اغنيه شيك شاك شوك و صرت اركص ويه الاغنيه، حسيت روحي راقصه و جايه تحيي العرس

انظار الكل عليه، اجت عيني على رسيم صافن عليه بتركيز و يخزر بيه ما اهتميت اله و كملت رگصي و البنات يصورون بيه 

خلصت الاغنيه وكفت ماري من مكانها و كافت تصفك 

و الكل صار يصفكلي وياها و گالت بصوت عالي.. 

        

          

                

ماريا:عاشووو روسيه عاشووو 

رفعتلها ايدي سويتلها قلب و رحت كعدت مكاني 

اخذت تلفوني من نارين ثواني و اجتني رساله من المجهول 

_عجبني ركصج من نتزوج اريدج تركصيلي هيج 

صار عندي فضول اعرفه منو، كتبتله.. 

رواسي:شوكت نتزوج؟ 

_تردين هسه باجر بكيفج 

رواسي:شلون اتزوج شخص لا شايفته و لا اعرفه حتى اسمه ما اعرف؟ 

_اخليج تشوفيني بس مو هسه انتظري بعد 

رواسي:منين تعرفني أنتَ

_كومي اكلي من الصبح بلا اكل أنتِ، خوش بوفيه يفوتج 

رواسي:صورلي شنو موجود رجلي تأذيني مابيه اكوم بعد 

بقيت انتظر يرد عليه ما كتب شي، القاعه نصها فرغت 

كاموا يتعشون، البنات هم راحن بقيت اني گاعده 

اجت عليه امي و بحضنها مسك نايمه گالت .. 

جميله:اني راح ارجع للبيت 

رواسي:ليش بعد ما خلص العرس

جميله:خطيه بنتج تعبت نامت هيَ گاعده ابوج ينتظرني بَره 

رواسي:اجي وياكم اني هم 

جميله:لا خليج ويه صديقتج من يخلص العرس 

عود رجعي ويه بيت عمج 

رواسي:تمام بس اخذي اغراضي وياج 

جميله:اي اخذهم ابوج بالسياره 

راحت هيَ و بقيت اني گاعده رجعت شلت تلفوني 

لكيته دازلي فيديو للاكل الي بالبوفيه، من شفت الاكل جعت كلش كمت طلعت بَره اخذت صحن و حطيتلي اكل و رجعت كعدت بمكاني ويه البنات.. 

كملنا اكل و رجعنا للركص بقينا نركص لحد نهايه الحفله 

تكسرت تكسر صرت اريد امشي بعد ما اكدر..العالم كلها راحت بقينه بس الكرايب.. بقه دِلهَام يوصي ادم على ماري و بالگوه لازم روحه حتى ميبجي حضنته ماري و صارت توصي بي على روحه..  و دعنا ماري و ادم لان من الصبح يسافرون شهر عسل 

البنات راحو ويه اهلهم و دِلهَام اخذ ماري و ادم للفندق بسيارته، اخذت جنطتي و تلفوني و طلعت بالكوه امشي 

من التعب انلوت رجلي و ردت اوكع 

انلزمت من خصري و اجاني صوته گال.. 

رسيم:الله خوما تأذيتي؟ 

غمضت عيوني بقوه من الوجع و حجيت بالم مكتوم.. 

رواسي:رجلي ما اكدر امشي 

        

          

                

رسيم:طبيعي من الهز ما كعدتي 

رواسي:شعليك أنتَ! 

رسيم:اي صح معليه اني 

ابتعد عني و اردف... 

رسيم:حيري بروحج 

مشه بعيد عني حاولت ادوس على رجلي عطت من الالم 

رجع عليه شالني و گال.. 

رسيم:اخذج للمستشفى 

رواسي:نزلني عيب 

رسيم:من تاخذين صور ويه حبيبج مو عيب؟ و من صرتي راقصه كدام الكل مو عيب؟ بس من شلتج اني صار عيب! 

درت وجهي عنه وهمست بهدوء.. 

رواسي:وديني للبيت 

مشه بيه طلعنا من القاعه تقدم واحد من الولد فتحله باب 

السياره حطني على الكرسي الامامي و سد الباب 

اندار من جهته صعد و حرك السياره 

رواسي:خطيبتك خاف تضوج من وجودي وياك 

رسيم:لا متضوج 

رواسي:وينها ما شفتها من وقت الاكل 

رسيم:اخوها اجه اخذها 

رواسي:اممم 

باوعت على الطريق مو طريق بيتنه

رواسي:مو منا البيت! 

رسيم:اخذج للمستشفى يشوفون رجلج 

رواسي:مابيها شي منا لباجر تصير احسن 

رسيم:خوش 

نترت بي.. 

رواسي:وديني للبيت رسيم! 

بقه ساكت ما رد عليه وصلنا يم مستشفى اهليه طبك السياره و دخل جوه شوي و رجع وياه كرسي متحرك فتحلي الباب و مدلي ايده گال.. 

رسيم:اسندي روحج عليه يلا 

رواسي:گتلك ما بيه شي ليش تعاند؟ 

رسيم:تنزلين لو اشيلج؟ 

سحبت نفس قوي زفرته بعصبيه حطيت ايدي بيده 

سندني و كعدني على الكرسي، نزع سترته حطها على رجلي و دخلني جوه، شرحلهم وضعي و اخذتني الممرضه يسوولي اشعه، بقينه ننتظر بالنص ساعه 

و تلفوني ماسكت كل شوي يتصلون عليه بس من الوجع الي بيه مو كادره ارد على بشر 

مجانت تأذيني لهاي الدرجه على غفله صرت الوب من الوجع، حسيت نفسي انكتم.. اجه الدكتور و صار يدقق بصوره الاشعه، رفع قلمه اشر على المكان الي جوه الاصابع و گال.. 

_عندج كسر لازم تتجبر رجلج 

قرب روحه عليه و همس بصوت بس اني اسمعه.. رسيم:حقها تنكسر اذا صايرتلي اوكسانا الرقاصه 

        

          

                

رفعت عيوني على الدكتور و حجيت بالم.. 

رواسي:موتتني من الوجع اريد مسكن 

_هسه نجبر رجلج و بعدها انطيج الوصفه مال علاج، بس لازم متدوسين عليها الا للضروره و ابقي رافعتها 

راح الدكتور باوعت لرسيم و گلت.. 

رواسي:خابر ابويه يجي ياخذني 

رسيم:اني اخذج 

رواسي:مشغول بالهم لان ما ارد 

رسيم:خابرت ابوج بلغته معليج أنتِ 

سكتنا لما دخل الدكتور و وياه ممرض، جبرولي رجلي 

و كتبلي على مسكن، طلعنا من المستشفى اخذني للبيت 

طبك سيارته و نزل عليه ما خلاني امشي شالني شيل 

و دك الباب، رفعت عيوني باوعتله بادلني النظرات 

ابتسم و غمزلي 

رسيم:اعرف حلو حقج تصفنين 

طبكت حواجبي معاجبني و درت وجهي انتظر يفتحون 

الباب، رجع دك الباب و بنفس اللحظه انفتح الباب امي صارت بوجهنه.. باوعتلي و شهكت گالت بقلق 

جميله:هاي شبيج ولج!

رسيم:انكسرت رجلها 

رواسي:يمه وخري خلي يصعدني لغرفتي 

نزلني بالباب و گال.. 

رسيم:حمال لحضرتج؟ 

رواسي:كمل معروفك و صعدني لغرفتي شلون اصعد بتك رجل

نزل ابويه من فوك و اجه يمنه گال متسائل.. 

راشد:شكسرها رجلج؟ 

رواسي:التوت رجلي 

قرب عليه سندني و گال.. 

راشد:امشي اخذج لغرفتج ارتاحي 

بالكوه مشيت خطوتين استوقفنا رسيم 

رسيم:لحظه عمي اني اصعدها الدكتور گال ميصير تدوس على رجلها 

ابتعد ابويه عني و تقدم رسيم شالني بحضنه صعدني فوك 

كعدني على الجربايه و همسلي.. 

رسيم:حبيبج طالع ويه صاحبته و عايفج، و اني عفت خطيبتي و بقيت وياج 

رواسي:دِلهَام اخذ ماري و ادم للفندق شوكت طلع ويه صاحبته 

رسيم:بكيفج لتصدكيني بس عندي دليل 

حاولت ابين روحي عصبيه نترت بي.. 

رواسي:لتكذب رسيم! دِلهَام ميسويها 

ابتعد عني و هوَ يضحك مستهزء طلع تلفونه من جيبه 

فتحه و فره عليه يشوفني الصوره، دِلهَام و وياه وحده 

بالسياره و ديحجون سوه.. رفعت عيوني باوعتله و حجيت

        

          

                

رواسي:كلكم نفس الطينه كلكم خونه، قنادر تتراگع عليكم 

راح على الكنتور بدون ميحجي شي بقه صافن على الملابس طلعلي دشداشه قصيره للركبه و كعد يفتح بالمجرات مال كنتور و اني صافنه عليه مستغربه تصرفاته، فتحت عيوني بصدمه لما طلع داخليات من الجراره و حطهن كدامي 

رسيم:بدلي ملابسج 

رواسي:أنتَ شبيك؟ 

رسيم:شبيه ما بيه شي 

رواسي:امشي ولي منا اخذت راحتك زياده عن اللزوم 

نسيت احنه متطلكين لو لا؟ 

رسيم:اي صح هسه اصيح امج تبدلج و اذا تردين ابدلج اني ماعندي مانع احب اساعد 

شلت علبه المرطب من الكومدي و شمرتها عليه 

و عطت بي.. 

رواسي:امشي ولي ادبسز سرسري 

صحت بصوت عالي على امي، شوي و دخلت للغرفه 

و گالت .. 

جميله:ولج صوتج بنتج نايمه 

باوعت لرسيم و اردفت .. 

جميله:هاي بعدك هنا متروح شمنتظر؟ 

رسيم:بدل ما تشكروني حتى شيل شلتها ظهري كام يوجعني 

نترت بي.. 

جميله:ماقصرت يلا روح هيَ مو مرتك حتى باقي وياها 

و ماخذ راحتك 

رواسي:ادبسز 

رسيم:روسيه انجبي 

رزلته امي طلع من الغرفه متعصب، شوي و صار صوته هوَ و ابويه عالي واحد يصيح على اللاخ 

باوعت لامي و گلت.. 

رواسي:ماما اريد اسبح 

جميله:وين تسبحين أنتِ و رجلج 

رواسي:عادي البس كيس و اربطها عدل ميدخللها مي 

فد مره صرت و شعري كله سبريه مال شعر مو مال ابقى هيج 

جميله:اوكفي اجيبلج و اساعدج تسبحين 

راحت جابتلي اكياس كبار ثنين دخلت رجلي بيهم 

و شدتهم بقوه على رجلي حتى ميدخل مي، سندتني و دخلتني للحمام طلبت منها تجيبلي ستول ارفع رجلي عليه 

جابتلي و طلعت مثل ما طلبت منها، سبحت عسريع 

سحبت البرنص لبسته و طلعت اعرج احاول شكد ما اكدر ما ادوس على رجلي 

دخلت لغرفتي بدلت ملابسي و تمددت على الجربايه 

شلت تلفوني بيدي لكيت المجهول دازلي رساله 

_نمتي؟

صورتله رجلي و دزيتها كتبتله

رواسي:تكسرت و كعدت 

        

          

                

رأساً شافها و رد.. 

_اووف ليش؟ 

رواسي:اكو واحد طگني بعين 

شافها و رأساً اتصل عليه، رديت عليه 

_يا هوَ هذا الي طگج بعين 

رواسي:واحد من يحجي ويايه تجيني الضحكه بسبب صوته جنه روبوت و يحجي ويايه 

ضحك و گال.. 

_اريد تتحمسين عدل حتى تشوفيني و تسمعين صوتي 

رواسي:و اذا ما تحمست؟ 

_احمسج اني ولا يهمج 

رواسي:زين انطيني طرف الخيط خلي احاول احزر منو أنتَ 

_مو هسه روسيتي مو هسه 

رواسي:أنتَ رسيم والله رسيم 

بقه ساكت ما حجه شي، عدلت كعدتي و اردفت.. 

رواسي:اذا أنتَ رسيم گول و خليني اعرف، ليش ماخذ دور المتصل المجهول 

_يعني اذا اني رسيم راح تحجين ويايه؟ 

رواسي:لا 

_ليش؟ 

رواسي:لان ما احبه واحد نذل و حقير ابو نسوان، يخطف بالعالم و يخليهم مدمنين مافيا سايكو رسيم 

_حبيني اني و عوفي هوَ 

رواسي:شكد بطران أنتَ هوَ شعرف عنك بس صوتك و مغيره مسوي روبوت صيني يسولف ويايه كل شوي يعلس و ما افتهم عليه 

_لسانج مال دلالات شوي شوي 

رواسي:تعال تزوجني مليت اريد انكد عليك

اسمع صوته يضحك اردفت..

رواسي:ما حجيت نكته شكو تضحك وجع 

_كومي اوكفي بالشباك اريد اشوفج 

رواسي:ما اكدر رجلي 

_يلا نامي لعد ما تعبتي من الركص؟ 

رواسي:لا رياضه 

_نامي حَبيبتي لتسهرين 

رواسي:سم بگلبك منين صرت حبيبتك 

بقه يسولف و يتغزل و اني اخذت وضع الصامت بس 

اسمع، لحد ما غفيت بدون ما احس على روحي و الخط مفتوح.. 

مر شهرين و المتصل المجهول مستمر بالتواصل 

الهدايا كل يوم شكل، بكل مره يصدمني بهديه احلى من القبلها، صار يومي ميكمل اذا ما احجي وياه 

لا ارادي صرت احجيله كلشي يصير بيومي، و اشاركه 

و اخذ رأيه بكلشي.. بيوم دزلي رساله كاتب 

        

          

                

_اليوم جاي اخطبج ما اتحمل تبقين بعيده عني اكثر 

بقيت شايله التلفون و اعيد قراءه الرساله اريد استوعب 

نزلت اركض على امي و اصيح باسمها بصوت عالي.. 

رواسي:يمااا وينج ماما 

جميله:شكو ولج شبيج! 

رواسي:راح يجي يخطبني شسوي شسوي 

بقيت اروح و اجي بمكاني متوتره لزمتني من ايدي 

ثبتتني و عاطت بيه.. 

جميله:اثبتي بمكانج و احجي منو جاي يخطبج 

رواسي:ابو الهدايا المجهول 

جميله:مدام يريد يخطبج يعني يحبج و ميريد يخسرج شكو بيها؟ 

رواسي:ماما صدك تحجين؟ 

جميله:اي عادي يحبج و جاي يخطبج 

رواسي:كلشي ما اعرف عنه ترا شلون اقبل بي! 

جميله:خلي يجي هم راح تشوفي و هم تتعرفين عليه، اذا شفتي يناسبج وافقي و اذا لا خلص يروح بطريقه 

رواسي:و ابويه شنو اكله؟ 

جميله:اني اكله خابرتني وحده تريد تخطب رواسي لابنها 

بقيت حايره ما اعرف شسوي، حبيت اهتمامه بيه و لان كل يوم نحجي تعلقت بي صرت احب احجي وياه 

و اسمع صوته مال الروبوت و ابقى اضحك عليه 

استسلمت و كمت اجهز روحي، خابرت ماري و كالعاده ردت عليه رأساً.. 

ماريا:سوسي الحب شلونج گليبي 

رواسي:يريد يجي يخطبني اليوم 

ماريا:منو 

رواسي:المجهول 

عاطت بصدمه.. 

ماريا:كذابه! 

رواسي:والله 

اجاني صوت اشعار وخرت التلفون عن اذني و فتحت سبيكر لكيته دازلي " ب ٤ احنه يمكم" 

رواسي:ولج هذا يكلي ب٤ يجون 

ماريا:گتلج سويله بلوك بس أنتِ بقيتي وره فضولج 

رواسي:هسه شسوي؟ 

ماريا:جهزي روحج و رتبي نفسج بس مو بشكل مبالغ بي 

لا خليج بسيطه و لتلبسين قصير لبسي شي طويل و مرتب و شعرج بقي مفتوح 

رواسي:تعالي أنتِ هم 

ماريا:ما اكدر والله بعدني بالشغل ما خلصت 

        

          

                

رواسي:يلا خلي اجهز روحي و اذا كدرتي تجين تعالي 

ماريا:اكيد گلبي صوريلي عود 

سديته من عدها و فتحت كنتوري اختار شي البسه، طلعتلي سوت لون وردي و لبست جواه توب اسود 

لبست اكسسوارات باللون الفضي و كعب اسود 

شسورت شعري سويته عدل و بقيته مفتوح، رشيت عطر 

هادئ و صورت كم صوره دزيتهن بالكروب 

و كتبت.. 

رواسي:حلوه لو اخبل؟ 

ماريا:نار نار تموتين 

نرجس:لك شنو هذا كيك والله 

رواسي:اي والله كيكه ناريه تشك شك ادري بروحي 

نارين:تتزوجين ابويه؟ 

رواسي:لا ما اتزوج متزوجين الا اذا يطلك ميخالف اقبل

نارين:هسه اخلي يطلك امي و ازوجكم و المهر على ماري و نرجس 

ضحكت عليها و عفت التلفون نزلت جوه لكيت امي مجهزه كلشي من ضيافه و غيرها و مبدله هيَ و مسك 

و ابويه هم مبدل و گاعد، باوعتلهم شاكه بيهم 

رواسي:شبسرعه لحكتي تجهزين كل هذا؟ 

جميله:شغلات بسيطه بسرعه تجهز 

كعدت على القنفه و اخذت مسك بحضني 

رواسي:مسوكتي شنو هذا الجمال 

مسك:مثلج 

باستني من خدودي و حضنتني بقوه، بعدتها عني 

باوعت عليها مبين ضايجه من شي، حجيت متسائله 

رواسي:حَبيبي منو مضوجج؟ 

مسك:محد 

رواسي:لعد شبيج امي ليش هيج ضايجه 

برطمت شفايفها و گالت بزعل.. 

مسك:اريد بابا احبه 

رواسي:مو كل يوم تشوفي و تروحين تبقين يمه؟ 

مسك:اي 

رواسي:اخابره يجي ياخذج؟ 

مسك:اي 

كعدتها بصفي باوعت لابويه و گلت.. 

رواسي:خابر رسيم خلي يجي ياخذها 

راشد:بس يروحون العالم اخابره 

باوعت للساعه ب ٤ الا ربع، بقينه كاعدين و العب بمسك 

اريد الهيها حتى متبقى ضايجه، امي و ابويه يتهامسون بيناتهم احس يخططون لشي بس ما اعرف شنو 

قاطعنا صوت الباب يندك كام ابويه و گال

راشد:رواسي لتجين الا نصيحج 

رواسي:ولو مافهمت ليش بس تمام گاعده هنا 

راح هوَ و امي و سدو باب الصاله علينه اني و مسك 

اسمع صوت ابويه يرحب بيهم و امي دخلوهم للاستقبال 

عايفينه بس للخطار المهمين لو من يكون هوايه 

بقيت گاعده و حاطه مسك بحضني العب بشعرها و انتظر 

اريد اشوف منو هذا المجهول فضولي ذبحني ذبح.. 

انتبهت لمسك نامت بحضني نومتها على القنفه و سحبت 

ازار الصلاه مال امي و غطيتها بي.. 

كمت من مكاني رحت للمطبخ اجت امي عليه گالت .. 

جميله:العصير بالثلاجه جيبي و تعالي 

رواسي:كم واحد؟ 

جميله:همَّ ٦ و اني و ابوج 

رواسي:تمام 

طلعت گلاصات على عددهم و صبيت العصير، صفنت 

على الگلاصات و حجيت ويه روحي بصوت مسموع.. 

رواسي:عود ليش عصير؟ ليش مو گهوه چان حطيتله ملح بيها مثل الاتراك 

هزيت راسي معاجبني و شلت الصينيه، ايدي ترجف 

متوتره كلش.. مشيت بكل هدوء و عيني على الصينيه 

خايفه لا توكع من ايدي، دخلت يمهم سلمت و رفعت راسي اباوع عليهم 

بقيت صافنه و الصينيه وكعت من ايدي العصير 

و الكزاز صار بكل مكان، وحده من الكزازات جرحت رجلي، كام من مكانه و اجه عليه سحبني من ايدي كعدني 

و گال.. 

يتبع...