رواية رواسي الدهر الفصل الثاني و العشرون 22 - بقلم روح الدليمي

➰➰➰➰➰➰➰➰➰➰➰

مشيت اريد اطلع استوقفني لما گال.. 

رسيم:حظروا نفسكم الاسبوع الجاي تروحون تخطبولي

اخذت اغراضي وكملت طريقي و طلعت لغسان ينتظرني بالسياره، صعدت اخذني للبيت نزلت بسرعه حظرت اغراض مسك و كل احتياجاتها رتبتهم بالجنطه و رجعت انطيتها لغسان تشكرته و راح.. رجعت دخلت للبيت صار بوجهي ابويه 

راشد:هاا بابا منو جابج؟ 

رواسي:غسان و انطيته اغراض مسك اليوم تبات يمهم 

راشد:چان كلتي اطلع اسلم عليه 

رواسي:ما اعرف ما اجه ببالي 

دخلت للصاله سلمت على امي و كعدت 

جميله:شوفيني شنو اخذتي 

رواسي:اي هسه 

رجعت كمت من مكاني و فتحت الكيس القماش مال فساتين و شوفتهم لامي و ابويه 

رواسي:هاا شنو رأيكم؟ 

راشد:كلشي تلبسي يطلع حلو عليج بالعافيه حَبيبتي 

تقربت عليه بسته و گلت 

رواسي:الله يعافيك حَبيبي

جميله:كلش حلوات بس الطويل احلى من القصير مبين فخم اكثر 

رواسي:اي علمود هيج خليته للعرس 

جميله:يوم الي نفرح بعرسج 

تغيرت ملامح وجهي للعصبيه و حجيت بنتر.. 

رواسي:اذا حاطين ببالكم تزوجوني ف شيلوا هل فكره من بالكم ما اتزوج بعد 

راشد:ليش بعدج صغيره و الحياة كدامج 

رواسي:مو الا اتزوج اريد اربي بنتي و بس 

شلت اغراضي و صعدت فوك بدون ما احجي شي

مر الاسبوع ركض بركض هوسه التجهيزات 

و ترتيب بيت ادم و ماري.. اجه يوم الحنه و العرس 

اتفقوا يسووهن بنفس اليوم، كعدنا من الصبح فتت سبحت حتى الحك اجهز روحي طلعت من الحمام شفت تلفوني يدك 

استغربت منو يدك عليه هيج وقت رحت شلته باوعت رقم غريب رديت اجاني صوت ولد گال.. 

_السلام عليكم بس عدكم طلبيه 

رفعت حاجبي مستغربه و گلت.. 

رواسي:اني ما طالبه شي خاف غلطان؟ 

                                      

 

_لا رقمج مكتوب على الوصل و العنوان *** 

رواسي:اي هذا عنوانه صح، بَره أنتَ؟

_قربت عليكم خمس دقايق و اكون بَره 

رواسي:شكد فلوس التوصيل؟ 

_مدفوع بس تستلموا 

رواسي:تمام 

سديته منه و اني مستغربه منين اجتني هاي الطلبيه 

و انوب مدفوعه.. بدلت بسرعه و نزلت جوه دك تلفوني باوعت نفس الرقم رديت عليه.. 

_بيتكم وين صاير بالضبط 

رواسي:من تتعده الاسواق اول فرع يمين ثالث بيت على اليمين اني راح انتظرك بَره 

_تمام 

صحت على امي.. 

رواسي:ماما اني راح اطلع استلم الطلب هسه اجي 

جميله:تمام 

طلعت بَره انتظره يجي شوي و صارت سياره بيضه كدامي نزل منها و اجه عليه انطاني كيس لونه احمر و مكتوب عليه كارتير و وياها بوكيه ورد تشكرته و دخلت للبيت و ملامحي تدل على الصدمه.. دخلت للصاله يم امي گالت .. 

جميله:شطالبه 

رواسي:تؤ مو اني احد دازلي ياها بس ما اعرف منو 

كعدت على القنفه حطيت بوكيه الورد على الطبله 

و فتحت الكيس طلعت العلبه منه، فتحتها و انصدمت بيها 

بداخلها گلاده تموت من جمالها گلاده كارتير ذهبيه و بيها 

حجر اخضر.. فريتها على امي فتحت عيونها مصدومه بيها لان سعرها غالي هاي الگلاده 

جميله:منو جابلج ياها؟ 

رواسي:علمي علمج والله 

حطيت العلبه على القنفه و شلت البوكيه مال ورد چان 

اكو كارت عليها اخذته طلعته من الظرف و قريته.. 

"هديه بسيطه لاجمل بنيه شافتها عيني اتمنى تعجبج"

و كاتب جواها "مجهول" 

رواسي:ما كاتب اسمه بس مجهول هسه شلون اعرف منو دازها و ليش؟ 

جميله:خاف رسيم؟

هزيت راسي ما مأيدتها و گلت.. 

رواسي:لا ابد ما اتوقع البارحه كاللهم يريد يخطب 

بقينه وحده تباوع بوجه الثانيه، شلت تلفوني صورت الگلاده و الورد و دزيتها لرسيم و كتبتله.. 

رواسي:أنتَ دزيتهم؟

ما شافها و مارد عليه مع انو متصل بالواتس.. 

دك تلفوني ماري تتصل جاوبتها اجاني صوتها تبجي... 

        

          

                

رواسي:ماري حبي شبيج؟ 

ماريا:ما اريده بطلت ما اتزوجه 

رواسي:شبيكم شصاير 

تبجي و تشهك بالكوه تسولف.. 

ماريا:ادم واحد خاين، رواسي راح اموت گلبي محترك والله 

اشرتلي امي تسأل شكو رفعت اكتافي بمعنى ما اعرف

رواسي:اهدي حَبيبتي هسه اجيج بس ابدل 

ماريا:اي فدوه تعالي 

سديته منها كمت من مكاني اخذت الهديه و الورد 

و صعدت فوك حطيتهم على الميز و بدلت ملابسي بدون 

صوت حتى متكعد مسك.. اخذت اغراضي و طلعت

اخذت تكسي من الشارع و رحت لبيت ماري 

بعد مده قليله وصلت دفعت الاجره و نزلت مستعجله، دكيت الباب و بقيت انتظر يفتحوا الي.. انداريت على صوت ادم صاح ب اسمي.. 

ادم:رواسي 

رواسي:شبيك وياها؟ 

ادم:والله ما مسوي شي خابرتني الصبح تغلط و تصيح

و تلكي طلكني ما اريدك بعد أنتَ خاين 

رجعت دكيت الجرس ثواني و انفتح الباب شمرت روحها بحضني و صارت تبجي بحرگه واضحه و تشهك بصوت عالي.. دخلتها للصاله و ادم دخل ورانه 

رواسي:ماري حَبيبتي كافي بجي و فهميني شصار 

ماريا:ادم يخوني 

ادم:والله ما خاينج شبيج أنتِ 

عاطت بي.. 

ماريا:أنتَ كذاب اني شفتك بعيوني شلون تبوسها 

باوعت لادم مصدومه و هوَ هم مصدوم مثلي.. رجعت عاطت.. 

ماريا:شفتك واكف أنتَ وياها يم البيت و جانت زعلانه منك و أنتَ تريد تراضيها و بكل عين صلفه بستها كدامي ! 

ادم:والله ماكو هيج شي شتحجين ماري! 

رواسي:وين شفتيهم؟ 

ماريا:بالحلم 

رديت عليها بصدمه واضحه.. 

رواسي:بالحلم؟ 

ماريا:اي 

ادم صار يضحك من كل گلبه و اني ما تحملت انفجرت بالضحك، و هيَ تباوع علينه بغضب كام ادم من مكانه و اجه كعد يمها اخذها بحضنه ضربته راشدي و عاطت بي.. 

ماريا:خاين حقير امشي منا 

باسها من راسها و گال.. 

ادم:حَبيبي كل عقلج أنتِ؟ طلعتيني خاين لان حلمانه! 

        

          

                

ماريا:اي لان لو مو خاين مجان حلمت هل حلم 

رواسي:قندره عليج و على حلمج، هاي تأثير التوتر مال عرس يلا ميخالف نعذرج 

ماريا:والله گلبي محترك شنو يخوني 

ادم:ولج حلم هذا حلم مو حقيقيه! 

ماريا:حتى لو المفروض حتى بالحلم متخوني 

رواسي:امشي كدامي جيبي اغراضج حتى نروح للمركز راح نتأخر 

ماريا:ما اتزوج واحد خاين 

ادم:بس اني ما خنتج عُمري أنتِ 

مد ايده يمسح دموعها و طبع بوسه على كل عين 

اخذت تلفوني و طلعت من الصاله عفتهم براحتهم

رحت للمطبخ و عيوني بالتلفون فتحت الواتس لكيت رسيم راد عليه.. 

رسيم:لا مو اني ليش اجيبلج؟ 

دزيتله ايموجي مال اوكي و سديت التلفون رفعت راسي 

شفت دِلهَام واكف و يباوع عليه، ابتسمت بوجه و گلت.. 

رواسي:سوري ماشفتك 

دِلهَام:بيج شي؟ 

رواسي:لا بس اجيت علمود ماري  

دِلهَام:تشربين گهوه؟ 

رواسي:اي ليش لا 

سحبت كرسي و كعدت اجتني رساله على الواتس 

رقم غريب دخلت للمحادثه كاتب.. 

_ان شاء الله عجبتج هديتي 

رفعت عيوني على دِلهَام واكف يسوي گهوه تلفونه مو بيده يعني مو هوَ، رأساً كتبت 

رواسي:منو أنتَ و ليش تدزلي هدايا ؟ 

_المجهول.. 

رواسي:احجي منو خلصني احسن من ما انطيك بلوك! 

_خليني هسه مجهول من يجي الوقت المناسب راح تعرفيني 

رواسي:نشوف اخرتها شنو 

سديت تلفوني و حطيته على الميز اجه يمي دِلهَام حط فنجان گهوه كدامي و كعد يمي 

رواسي:شلونها معنوياتك؟ 

دِلهَام:صفر ما متعود بدونها ما اعرف شلون راح اكدر اعيش و هيَ مو ويايه 

رواسي:قابل وين رايحه هيَ هياته بيتها عشر دقايق ربع ساعه بالزايد و أنتَ يمها 

دِلهَام:هيَ الوحيده الي بقتلي بهاي الدنيا بعد موت امي و ابويه، احس راح تلتهي بحياتها و تنساني 

        

          

                

رواسي:اختك هاي مثل ما أنتَ ماعندك غيرها هيَ مثلك 

مستحيل تگطع بيك و تعوفك لتفكر بهاي الطريقه 

حط ايده على الميز و صار يرسم دوائر عشوائيه و مركز على حركه اصبعه شلون يدور بنفس المكان، حطيت ايدي على ايده امنعه يكمل و گلت.. 

رواسي:لتشغل تفكيرك بهيج سوالف شبيك، اتزوج أنتَ هم! 

بقه صافن عليه لثواني و كال.. 

دِلهَام:رواسي تتزوجيني؟ 

فتحت عيوني مصدومه من طلبه و جرئته نترت بي.. 

رواسي:سامع روحك شدتحجي! 

دِلهَام:ستوب ستوب شبيج اشاقه وياج 

رواسي:مو شقه هذا ادبسز 

كمت من مكاني اريد اطلع گال.. 

دِلهَام:أنتِ مثل اختي، و اني عندي حبيبة عن قريب راح اخطبها 

رواسي:تمام 

عفته و طلعت من المطبخ رحت للصاله اشوف ماري 

طيور الحب ناسين روحهم و ماخذين راحتهم زياده عن اللزوم، كحيت بخفه حتى يحسون عليه.. ابتعد عنها ادم 

حط ايده على رگبته ضحك و گال.. 

ادم:انتظركم بالسياره اني اخذكم 

رواسي:لو داخل عليكم دِلهَام؟ شكد متستحون 

ماريا:عادي زوجي هوَ قابل بالحرام 

رواسي:قبل شوي متردي و تبجين و تصيحين خاين ما اريده هسه صار زوجج 

ادم:الله عليج سكتي هسه ترجع تتعارك بالكوه راضيتها لان خنتها بالحلم 

عاطت بي.. 

ماريا:يعني تعترف أنتَ خنتي! 

ضرب على راسه و گال.. 

ادم:يلا استلم 

دخل دِلهَام سلم على ادم و گال.. 

دِلهَام:شبيكم 

ادم:اختك زعلانه لان خنتها بالحلم 

ضحك و گال.. 

دِلهَام:اي حقها لو تحبها متخونها 

شال تلفونه و سويج السياره و گال بنفاذ صبر.. 

ادم:اولي احسن 

دِلهَام باوع لماري و گال بخبث.. 

دِلهَام:شوفي شوفي يريد يخلص منج طلكي لتتزوجي ابقي يمي احسن 

نترت بي.. 

رواسي:دِلهَام صدك تحجي! تعرف اختك خبله هسه تتفاعل زياده 

ماريا:شقصدج؟ 

رواسي:ماري كومي لا ادفرج هسه بعد ربع ساعه موعدنا و أنتِ بعدج گاعده 

باوعت لادم و گالت .. 

ماريا:ما اريدك أنتَ واحد خاين، أنتَ طالك 

        

          

                

مشه ب اتجاه الباب و عاط.. 

ادم:مو گلت اولي احسن الاخ و اخته ناوين يجلطوني 

كامت من مكانها و صاحت عليه.. 

ماريا:يلا خلص سامحتك، رجعتك على ذمتي 

حطيت ايدي على حلگي امنع ضحكتي تطلع بس ما سيطرت على روحي، متت من الضحك انتهيت

ادم:خاف صارت زحمه؟ 

ماريا:ماعجبك؟ عادي ارجع اطلكك 

ادم:امشي حَبيبتي امشي راح تندفرين 

دِلهَام:طلكها متاخذها وياك 

ادم:جلدك يحكك 

رواسي:اي والله يرادله كتله معدله غسل و لبس 

باوعلي ادم و ضحك.. 

ادم:لازم اللوندري مال رسيم صارت الج 

اختفت ضحكتي مجرد ما ذكر اسمه 

رواسي:يلا تأخرنا هوايه خلي نروح 

ادم:زعلتي مني؟ مو قصدي 

رواسي:لا بس تأخرنا 

ماريا:اخذي سويج السياره معلك يم الباب شغليها علما اجي بس اجيب اغراضي و البدلات

هزيتلها راسي و طلعت شغلت السياره و كعدت انتظرها 

دك تلفوني نفس الرقم مال مجهول رديت عليه.. 

رواسي:منو أنتَ؟ 

رد عليه بصوت غريب كلش واضح مستخدم برنامج حتى يغير صوته.. 

_المجهول الي راح يلون حياتج 

رواسي:شكد بطران أنتَ 

_لتسوقين السياره أنتِ 

نزلت من السياره و صرت اباوع حواليه ماكو احد الشارع فارغ، نترت بي.. 

رواسي:وينك أنتَ تعال خليني اشوفك اريد اعرف أنتَ منو! 

_مو هسه بعد وكت، ديري بالج على نفسج حَبيبتي 

ضحكت ب استهزاء

رواسي:حبيبتك؟ أنتَ الظاهر سكران 

_بعمري ما حاط الشرب بحلكي شلون اسكر 

رواسي:تكول أنتَ منو لو يجيك بلوك! 

_خليج صبوره كلشي بوقته حلو عُمري أنتِ 

رواسي:دطير قندره 

سديت التلفون بوجهه ردت اسويله بلوك بس فضولي منعني اريد اعرفه منو هوَ و شيريد مني! 

رجعت صعدت بالسياره و دكيت هورن حتى تجي ماري 

ثواني و انفتح الباب و طلعت تركض اغراضها بيدها و دِلهَام شايل البدلات ، فتح الباب الوره حطهن على الكشن 

و هيَ صعدت بالصدر.. 

        

          

                

رواسي:شطول روحج أنتِ صار ساعه انتظر! 

ماريا:شبيج غير علما طلعت الاغراض 

رواسي:فضيني سدي الباب 

سدت الباب و حركت السياره متجهه للمركز، وصلنا لكينه نرجس و نارين واصلات قبلنا و مبلشات بالمكياج 

ماري رأساً راحت و بلشوا يجهزوها حتى تخلص على الموعد.. بقيت گاعده انتظر نص ساعه علما وحده من الزبائن خلصت و كعدت مكانها، خلصت مكياج و بلشت بشعري امي دكت عليه.. 

رواسي:نعم ماما 

جميله:رحتوا للمركز؟ 

رواسي:اي هسه خلصت مكياج و بلشت بالشعر 

جميله:اگلج أنتِ مطلعه فساتين ثنين لمسوكه يا واحد البسها؟ 

رواسي:السمائي حتى نطلع نفس الشي اني وياها و الثاني البسها من يصير وقت العرس

جميله:تمام تجين لهنا لو تروحين للقاعه؟

رواسي:لا ما الحك اجي للبيت بوجهنا للقاعه 

جميله:ماشي حَبيبتي 

سديته منها و كعدت اگلب بالانستا لحد ما كملتني ما خلصنا لحد ال ٣ العصر 

طلعت ماري من غرفه التبديل لابسه بدلتها طالعه تخبل 

اميره، بدلتها لونها احمر و بيها نفشه بسيطه 

مسويه مكياج سموكي و حُمره حَمره، التسريحه 

شعرها مرفوع بطريقه كلش حلوه و بسيطه و نازل منه خصل كيرلي و لابسه تاج بسيط، طالعه تموت 

رجينه المركز رج بصوت الهلاهل اني و البنات، فتحولنا اغاني و صرنه نرگص كلنا، شلت تلفوني صورتها فيديو و صور و اني و البنات هم اخذنه صور.. دك تلفوني ادم ابتعدت عنهم و رديت..

رواسي:هاا وصلت؟ 

ادم:اي بَره 

رواسي:انزل انتظرنا يم الباب 

سديته من عنده و رحت على البنات بلغتهم بوصول ادم، نارين و نرجس ساعدوها حتى تطلع من التوتر صارت متعرف تمشي.. طلعت قبلهم خليت ادم يبقه داير روحه و فتحت التلفون اصور فيديو، طلعت هيَ مبتسمه وكفت كدام الباب و گالت بهدوء.. 

ماريا:حَبيبي 

اندار عليها و ضحك مشه بخطوات رزنه يباوع بعيونها 

و الابتسامه ما فارگت وجهه، وگف كدامها لزم وجهها بيده و طبع بوسه على راسها نزل ايده عن وجهها لزم ايدها و قرب روحه همس ب اذنها و هيَ ضحكت خجلانه 

مشوا ثنينهم للسياره و البنات يهلهلن، ساعدها تصعد و اندار عليه گال.. 

        

          

                

ادم:اذا احد يسئل علينه كوليلهم خطفها ما تحمل 

ضحكت ورديت عليه.. 

رواسي:يلا عادي حلالك 

راح من جهته و صعد السياره فتح الجامه و گال.. 

ادم:ماعدنا شي بعد نروح للقاعه مو؟ 

رواسي:اي هسه نجي وراكم احنه 

صعدنا بسيارة ماري اني و البنات فتحت نارين المسجل و علت الصوت فتحت كامره تلفونها و صارت تصور بينه 

و احنه نركص و كلشي تنزله اول ب اول ويه منشن لكل وحده بينه.. وصلنا للقاعه قبل ادم و ماري بقينه واكفين بَره ننتظرهم علما وصلوا نزلوا من السياره و دخلنا اخذنه ماري لغرفه الانتظار مال عرسان و بقينه وياها 

اندكت الباب كمت فتحتها صار بوجهي دِلهَام لابس قاط 

و كاشخ على اخر حبه، باوعلي من فوك ليجوه و گال.. 

دِلهَام:شنو هل جمال و الاناقه 

حجيت بثقه.. 

رواسي:اعرف طالعه اشك شك 

ابتعدت عن الباب و اردفت.. 

رواسي:فوت شوف عروستنا 

دخل للغرفه صار يباوع عليها و عيونه تجمعت بيها الدموع يتنفس بسرعه كأنو ديحاول يضبط نفسه و ميخلي دموعه تنزل، مشه ب اتجاه ماري ركع كدامها على رجل وحده و لزم ايدها باسها و گال بنبره حزن.. 

دِلهَام:بنتي الحلوه كبرت و صارت عروس، متتخيلين شكد جنت احلم بهذا اليوم و اشوفج سعيده بحياتج ويه شخص يحبج و يخاف على زعلج و يكون الج سند بعد ما الله ياخذ امانته 

نزلت دموعها باسته من راسه و گالت بعبره.. 

ماريا:دِلهَام لتحجي هيج و تقهرني أنتَ كلشي بدنيتي ماعندي غيرك 

دِلهَام:ما اتحمل فكره عدم وجودج ويايه بنفس البيت صار فتره مخنوگ و كل ما يقرب موعد عرسج تزيد الخنگه 

رفعت عيونها باوعتلي و گالت 

ماريا:صيحي ادم خلي يجي 

نارين:هسه اني اصيحه 

طلعت من الغرفه شوي و رجعت هيَ و ادم 

كامت من مكانها وكفت كبال ادم و گالت بقهر.. 

ماريا:بطلت ما اريد اتزوج طلكني 

وزع نظراته علينه مستغرب شبيها كام دِلهَام من مكانه 

مسح دموعه ابتسملها و گال.. 

دِلهَام:ازعل عليج والله 

ماريا:ما اريد اعوفك 

ادم:شكو؟ 

ماريا:ما اريد اتزوج اريد ابقى ويه اخويه 

        

          

                

ادم:وين رايحه أنتِ ترا كلها كم دقيقه و تكونين يمه و هوَ يجيج بكل وقت 

عاطت ب ادم كلتنا كلنا مصدومين من ردة فعلها.. 

ماريا:ما اريد الغي كلشي روح كوللهم العرس انلغى 

دِلهَام:ماري مو هيج حَبيبتي يوميه اجيج و تجيني 

ماريا:ماا ما اريد اعوفك دِلهَام 

نتر بيها ادم.. 

ادم:لعب هوَ؟ 

دِلهَام:عوفونه وحدنه احجي وياها 

طلعنا كلنا من الغرفه بقه هوَ وياها و ادم توترنا كلش 

و خفنه لا صدك تخرب كلشي و ينغلي العرس 

رواسي:تتوقعون راح تعوف العناد؟ 

نرجس:طبعاً هيَ تحب ادم بس دِلهَام غير هوَ رباها 

و كبرها صارلها اب و ام مو بس اخ 

نارين:دِلهَام قهرني كلش بس لو باقي ساكت و عايف مشاعره بداخله احسن

رواسي:ميعرف اخته طگه و نص اليوم الصبح خابرتني تبجي و تصيح ادم يخوني تالي طلعت شايفته بالحلم 

نرجس:خايفه هيَ و تدور حجه حتى تبطل 

رواسي:من شنو تخاف والله ادم ورده مو لان ابن عمي 

بس هوَ فعلاً كلش خوش رجال و ميت عليها يحسب ساعه ساعه لليوم الي يتزوجها و يصيرون ببيت واحد 

نارين:العالم كلها اجت و باقي شوي على وقت دخوليتها 

يارب ما تسوي شي غبي مثلها 

انفتح باب الغرفه و طلع دِلهَام و وياه ادم و شكله معصب 

كلش حتى الفرحه اختفت من ملامحه رحت على ادم 

رواسي:هاا؟ 

ادم:كلشي التغى خلص متريدني و تريد تتطلك 

رواسي:يااا صدك تحجي! 

ادم:روحي بلغي الكل اني رايح 

ابتعد عني و الكسره واضحه عليه مشه مسافه 

و طلعت ماري من الغرفه صاحت ب اسمه.. 

ماريا:ادم! 

التفت عليها اشرلها بيده بمعنى "شكو" لزمت بدلتها 

و راحت تمشي عليه لزمته من ايده و صارت تحجي وياه 

منكدر نسمعهم لان بعيدين علينه بس واضح من شكل ادم 

منفعل هوايه عاف ايدها و رفع اصبعه تجاها ما اعرف شنو كاللها و هيَ هزت راسها "اي" تقرب عليها 

باسها من راسها و لزم ايدها و اجو يمشون ب اتجاهنا 

رواسي:هسه نركص لو نرجع لبيوتنه؟ 

ماريا:اليوم ردح للصبح 

        

          

                

ضحكت و حطت راسها على كتف ادم و گالت 

ماريا:ابن عمج يريد يخلص مني حتى ما حاول يقنعني رأساً گال مثل ما تريدين و عافني 

ادم:لا والله؟ 

ماريا:اي 

دِلهَام:اذا تقهرين روحج ازعل عليج والله  

ادم:هسه تبطل اسكت

اخذنا ماري للغرفه و رتبنالها المكياج دخلنا احنه للقاعه ويه المعازيم حتى تصير دخوليتها.. دقايق و انطفت الاضويه و اشتغلت اضويه خافته المصوره وكفت كدام الباب هيَ و المساعده مالتها و كل وحده بيهن شايله كامره 

وحده للفيديو و وحده للصور.. اشتغلت الاغنيه و انفتح الباب مال قاعه 

طلت علينا تتمايل ويه الاغنيه و الابتسامه على وجهها 

وصلت لنص القاعه و المصوارت كدامها يصورون بيها 

صارت تركص بخجل واضح عليها متوتره لان وحدها 

باوعت للبنات و گلتلهم.. 

رواسي:خلي نكوم وياها يلا 

كمنا اني و نرجس و نارين صرنه يمها متوسطين القاعه 

دارت وجهها لام الديجي و اشرت علينه رفعتلها ايدها و سوت "اوكي" شوي و تغيرت الاغنيه حطت

 "اجدع صحاب" صارت تغني ويه الاغنيه و تأشر علينه 

ماريا:اجدع صحاب صحابي من صغري، دول اللي يمشوا معايا دغري.. دول اغلى ناس همَّ الاساس و اقولكوا ايه.. 

فتحت ايدها و حضنتنه كلنا سوه ابتعدنا عنها و لزمنه ايد بعض و صرنه نغني ويه الاغنيه و نركص لحد ما خلصت.. انظارنه توجهت على الباب لما دخلن نسوان ثنين و وياهن بنات ٤، دخلن كلهن يهلهل بعلو صوتهن 

اجن يمنا تقدمن على ماري هيَ تباوع عليهن مصدومه 

حضنتهن ثنينهن و صاروا يبجون، باوعت على البنات 

و حجيت متسائله.. 

رواسي:منو هذول؟ 

نرجس:اتوقع خالاتها 

ابتعدت عن عنهن و گالت بعبره.. 

ماريا:ما توقعت احد بيكم يجي 

_شلون نعوفج بهيج يوم بنت الغاليه أنتِ 

تقدمن عليها البنات بوسنها و وحده منهن صاحت على ام الديجي طلبت منها اغنيه، شغلت الاغاني و صارن يرگصن وياها.. استمرت حفله الحنه ساعتين و بعدها اخذنا ماري نعدل شعرها و المكياج حتى تبلس بدله العرس 

كلشي هوسه و خبصه ما اعرف منين طلعولنا بفكرة الحنه و العرس سوه.. التهينا بماري و حرنه بالمكياج 

من كد الركص عركت هوايه و مكياجها يحتاج تعديل مضبوط مو مال احنه نخبص بكيفنه 

        

          

                

اخذت تلفوني و طلعت من الغرفه خابرت ادم.. 

ادم:هاا روسيه

رواسي:احس تورطنا 

ادم:بشنو تورطتوا؟

رواسي:لازم ميكب ارتست علمود مكياج ماري 

ادم:منين اجيبلكم هسه 

رواسي:دبر روحك محد كاللكم سوو العرس و الحنه بنفس اليوم ماعدكم عقل 

ادم:هسه اشوف و اخابرج 

رواسي:لتتأخر بسرعه عدنا ساعه بس علما نجهزها 

سديته من ادم و دخلت على ماري و البنات لكيت وحده من بنات خالاتها واكفه و تسويلها بالمكياج 

رواسي:هاا تدبريها؟ 

_عيب عليج اصلاً اني عندي مركز بالخارج 

ماريا:اي نقذتني 

رواسي:خلي اخابر ادم لعد انطي خبر، و ابدل اني هم 

اخذت مكياجي ويايه و طلعت دكيت على ادم بلغته 

و رحت للحمام ارتب مكياجي هناك الغرفه هوسه كلش 

رتبت روحي و طلعت دك تلفوني تأفأفت بضجر 

من شفت نفس الرقم مال المجهول ديتصل عليه، رديت عليه و كملت طريقي للغرفه.. 

رواسي:خير؟ 

_شدعوه لبسج هلكد طويل! 

صارت عيوني تتوزع على كل مكان حواليه بس مجان 

اكو احد غيري اني، سرعت مشيتي و دخلت للغرفه 

حجيت بنتر.. 

رواسي:منو أنتَ؟ و بعدين شعليك بلبسي! 

_اغار عليج ما اتحمل اشوف غيري ينظرلج 

رواسي:ترا لعبت نفسي منك! لو تجي و تواجهني و تخليني اعرف أنتَ منو لو بعد ممنوع تتصل عليه 

_شبيج مستعجله عُمري اصبري شوي، ان الله مع الصابرين 

رواسي:قنادر عليك و على عُمرك 

سديته بوجهه باوعت للبنات مستغربات، شلت فستاني 

حتى البسه، ماري گالت .. 

ماريا:ويه منو جنتي تحجين؟ 

رواسي:واحد قندره من الصبح دزلي هديه و ديراقبني 

بس ما عرفته منو! 

نارين:ماعرفتي صوته؟

رواسي:عود مسوي روحه ذكي من يحجي ويايه احس 

عبالك روبوت يحجي ما اعرف شلون يتغير صوته

        

          

                

نرجس:هسه كلشي بالذكاء الاصطناعي و برامج تغيير الصوت 

رواسي:خيولي قندره عكر مزاجي 

دخلت للحمام الي بالغرفه بدلت فستاني لبست الثاني 

الاسود، و ماريا كملت ترتيب مكياجها و كامت تبدل تلبس البدله مال عرس ساعدناها اني و البنات اندكت الباب و دخلت المصوره گالت .. 

_العروسه جهزت؟ 

نرجس:اي جاهزه 

عاطت ماري بفزع.. 

ماريا:ولكم المسكه مالتي وين! 

رواسي:ويه ادم شبيج هسه من يجي يجيبها وياه 

_يلا امشي ويايه حتى اصوركم و بعدها تدخلون للقاعه 

ماريا:تعالو ويايه بنات 

نرجس:لا اني و نارين نروح نكعد ورانه ردح بعد 

رواسي:اني اجي وياج يلا 

ساعدتها تطلع و رحنه لغرفه مخصصه للتصوير 

بلشت تصور بيها المصوره و اخذت وياها اني هم 

بعدين وكفت و خلت ظهرها على الباب.. خابرت ادم بلغته انو يجي، كلها كم دقيقه و اندكت الباب و دخل ادم 

شايل بيده المسكه مالتها 

عفتهم و طلعت انتظر بَره حتى ياخذون راحتهم بالتصوير و الحركات.. بقيت واكفه يم الباب و اگلب بالتلفون 

اوجهه الستوريات مال نارين و نرجس 

كدامي مرايا جبيره وكفت و اخذت كم صوره الي 

نزلت عيوني على التلفون اختار وحده منهن انشرها 

حسيت بشخص واكف ورايه 

رفعت عيوني باوعتله من المرايا انداريت عليه 

صرنه وجه بوجه، باوعلي من فوك ليجوه و گال.. 

رسيم:حليانه روسيه 

رواسي:اي لان ماكو علاقات سامه بحياتي 

رسيم:جيد 

بقه صافن عليه و ينظرلي بنظرات حب، نترت بي.. 

رواسي:خير رايد شي؟ 

رسيم:اريد اعرفج على خطيبتي 

رفعت حاجبي معاجبني و گلت.. 

رواسي:شنو المناسبه ليش اتعرف عليها؟ 

رسيم:تتعرفين عليها لان بنتج راح تربى يمها 

رواسي:عفواً؟ 

رسيم:يعني اقصد من تجي يمي هيَ تهتم بيها 

رواسي:هاا اوكي عود اتعرف عليها مو هسه 

رسيم:فستانج حلو 

رواسي:اعرف 

رسيم:عيونج حلوه 

رواسي:مو شي جديد 

رسيم:تحبيني؟ 

رواسي:لا 

رسيم:اني هم ما احبج 

رواسي:راح تبقى لازك روحك بيه؟ روح لخطيبتك عوفني بحالي 

درت عيوني باوعت دِلهَام واكف يحجي ويه المصوره الثانيه، ابتعدت عن رسيم و صحتله.. 

رواسي:حَبيبي تعال نصور سوه ... 

يتبع..