رواية رواسي الدهر الفصل الحادي و العشرون 21 - بقلم روح الدليمي

 

➰➰➰➰➰➰➰➰➰➰➰

رسيم:أنتِ طالق

من غير وعي هلهلت بصوت عالي و بجيت، باوع بعيوني نظرات ما عرفت تفسيرهن شنو و طلع من الغرفه بدون ميحجي شي..

شمرت الكزاز من ايدي و گعدت بالگاع، تقربوا مني امي و ابويه كل واحد كعد يمي من جهه و اني صرت بنصهم

امي رفعت راسي ليفوك و صارت تباوع على رگبتي 

و تشوف الجرح، بعدت ايدها عني و حجيت بتعب.. 

رواسي:عوفيني امي مابيه شي 

جميله:ليش هيج تسوين بروحج؟ ليش تأذين نفسج بهاي الطريقه؟ 

رواسي:لو ممسويه هيج مجان طلگني 

مسح على راسي بهدوء و گال.. 

راشد:و هسه من طلگج ارتاحيتي؟ 

رواسي:عدم وجوده بحياتي راحه جبيره الي 

كمت من بيناتهم نمت بفراشي و اردفت بصوت خافت.. 

رواسي:طلعوا عوفوني وحدي و من تكعد مسك خليها تجيني 

بقوا واكفين يباوعون عليه بنظرات حيره و تساؤل، تجاهلتهم و فريت روحي و غمضت عيوني و نمت.. 

حسيت الصبح على صوت مسك تكعد بيه.. 

مسك:ماما دومي دومي (كومي كومي) 

فتحت عيوني باوعتلها ابتسمتلها و حجيت بصوت ناعس.. 

رواسي:روح الماما أنتِ تعاي يمي 

مسك:لا الوح (اروح) ويه بابا بدليلي 

عدلت روحي و كعدت فركت عيوني اريد اصحصح

باوعتلها و گلت.. 

رواسي:وينه بابا؟ 

مسك:يم ددو (جدو) 

رواسي:تمام انتظريني هنا هسه اجي اوكي ؟ 

مسك:اوتي (اوكي) 

كعدتها على الجربايه و كمت فتحت الكنتور طلعتلي ملابس و فتت سبحت عسريع و نزلت جوه لكيت رسيم گاعد هوَ و امي و ابويه و يحجون.. 

رواسي:صباح الخير 

جميله:صباح النور حَبيبتي 

راشد:نمتي زين؟ 

رواسي:اول مره انام مرتاحه هيج من يوم الي انخطفت 

 

باوعت لرسيم و اردفت متسائله.. 

رواسي:وين تريد تاخذ مسك؟ 

رسيم:للبيت يردون يشوفوها 

رواسي:البارحه جانت يمكم يوميه؟ 

راشد:ب اي وقت يكدرون يشوفوها مثل ما هيَ بنتج بتهم هم 

نترت برسيم بصوت عالي.. 

رواسي:اعرف شنو تريد أنتَ، تريد تاخذها و تبقيها يمك و تحرمني منها 

كام من مكانه و گال بحديه .. 

رسيم:اني لو اريد احرمج منها مثل متكولين چان سويتها قبل مو هسه، خليها يمج و اني اخليهم يجون هنا و يشوفوها احسن بس شوفي بنتج و فرحتها لما عرفت حتروح ويايه أنتِ الي جاي تحرميها من ابوها 

راشد:جميله كومي بدلي لمسك و جهزيها تروح ويه ابوها 

باوعت لابويه و عيوني دمعت.. 

رواسي:ليش من احجي شي تسوون عكسه؟ 

جميله:لان أنتِ غلط تبقى بنته و اله حق يشوفها و ياخذها وياه شوكت ميريد، أنتِ ردتي الطلاك و طلكج ما مجبور يبقى بعيد عن بنته و لا بنته الها ذنب تبقى بعيده عن ابوها 

كامت من مكانها و صعدت فوك باوعت لابويه 

بغضب و عفتهم و رحت للمطبخ.. جوعانه من البارحه 

بدون اكل بس على البوب كورن بالسينما 

سويت بيض و جبن امي مخدره جاي اصلاً بس حميته، همَّ يكعدون من وكت كلش ف يتريكون قبلي 

كملت و كمت غسلت ماعوني و الكوب، صعدت فوك 

متجاهله امي و ابويه دخلت غرفتي شفت مسك ماكو 

عرفت انطوها لرسيم ياخذها وياه.. كعدت على الجربايه 

و فتحت تلفوني انصدمت بكميه الرسائل و المكالمات 

و اكثر شي من ماري 

دكيت عليها اول ما جاوبتني عاطت بيه.. 

ماريا:وينج أنتِ؟ ليش متردين عليه ادبسز 

رواسي:تلفوني صامت ما سمعته 

ماريا:رواسي بعد اسبوع عرسي ما اريد تصير مشاكل 

حجيت بعدم فهم.. 

رواسي:يا مشاكل! شقصدج؟ 

ماريا:ما اريد رسيم يسويلج مشكله، من شوكت تطلعين ويه دِلهَام وحدكم؟ 

رواسي:اول مره نطلع وحدنه كله وياكم 

ماريا:و برأيج صح طلعتج وياه و أنتِ متزوجه؟

رواسي:ترا ما بيها شي رحنه سينما و رجعنه شبيكم سويتوها سالفه! 

عاطت بيه بعصبيه.. 

ماريا:لتبقين غبيه غلط و كلش غلط هم 

حجيت بنفاذ صبر.. 

رواسي:اذا ماكو شي بعد اني راح اسده 

ماريا:اجيج والله اگلب الدنيا فوك راسج! 

        

          

                

رواسي:ماري رسيم طلگني 

بقت ساكته ما حجت شي اردفت.. 

رواسي:وينج هيوو 

ماريا:وياج بس انصدمت شلون طلگج؟ 

رواسي:سويت فلم هندي و خليته يطلگني 

ماريا:لا أنتِ لازم اكون يمج و اسمع السالفه لايف 

حتى اذا مسويه شي طايح حظه تنكفخين مني، اصبريلي 

ابدل و اجيج 

ضحكت و رديت.. 

رواسي:اي يلا تعالي حتى نطلع سوه اريد اشتري فستان للحنه و العرس بعدني كلشي ما اخذت 

ماريا:يلا ساعه و اني يمج 

رواسي:تمام 

سديته منها و كمت نزلت جوه جبت عده التنظيف 

و رجعت للغرفه نظفتها كلها من الكزاز و غيرت الشراشف و عطرتها و اخر شي بدلت ملابسي حتى من تجي ماري نطلع بدون تأخير.. 

وكفت كدام المرايه احط مكياج و دك تلفوني باوعت 

رشا دتتصل عليه، رديت عليها و فتحت سبيكر 

رواسي:هلا حبي شلونج 

رشا:الحمدلله عُمري و أنتِ 

رواسي:بخير 

رشا:رسيم گال حتجين اليوم 

رواسي:ما اعرف والله اشوف بلكي المغرب اجي 

رشا:مو متعرفين تجين و غصب عنج مشتاقيلج هوايه 

من يوم الرحتي ما اجيتي يمنه 

شلت الحمره بيدي حطيت منها و حجيت

 رواسي:رسيم طلكني كاللكم؟

رشا:اي گال و كلش انقهرنا چان عدنه امل انو ترجعون سوه 

رواسي:هوَ واحد مريض نفسي رسيم سايكو والله، تعبني هوايه ما اكدر ارجع و اكون وياه 

رشا:الله يكتبلكم الي بي خير و يسعدكم ثنينكم 

رواسي:امين، صدك عذاري شلونها صار فتره ماكو 

رشا:مريضه كلش و بس نايمه حتى علاوي يمي اني اهتم بي ويه ابني 

رواسي:شبيها ليش؟ 

رشا:صار عدها جرثومه بالمعده و هاده حيلها فد مره

رواسي:يااا خطيه ماعدها غير العافيه يارب 

رشا:الله يعافيج گلبي 

باوعت لتلفوني ماري دتتصل عليه 

رواسي:حَبيبي اني لازم اروح هسه سلمي على الكل و ان شاء الله احاول اجي اليوم 

        

          

                

رشا:الله يسلمج حبي ننتظرج 

سديته منها و رجعت دكيت على ماري 

رواسي:هاا اجيتي؟ 

ماريا:اي اني بَره تطلعين لو ادخل؟ 

رواسي:لا تعاي بعد وكت على السوك 

ماريا:تمام فتحيلي الباب 

سديته و نزلت فتحت الباب بقيت انتظرها تنزل من سيارتها، نزلت تحجي بالتلفون و معصبه وصلت يمي 

و عاطت على الي دتحجي وياه.. 

ماريا:انجب و لتحجي كلمه زايده والله اذا اعرف أنتَ 

حاجي بهذا الموضوع اطيح حظك، ما احترمك اذا تبقى بهاي سوالفك يلا ولي ببيت العالم اني 

سدته و تقربت عليه حضنتني و گالت .. 

ماريا:سوري صارت بوجهج بس نرفزني الحقير 

رواسي:عادي يمعوده بس منو هذا ادم؟ 

ماريا:لا اخويه المطي 

ضحكت عليها و دخلنا جوه سلمت على امي و كعدت 

يمها تسولف هيَ وياها عفتهم و رحت للمطبخ 

طلعت ببسي صبيت و حطيت كيك الي و الها 

رتبتهم بالصينيه اخذتها و رجعت يمهم وكفت بباب الصاله و گلت.. 

رواسي:امشي نصعد بغرفتي احسن 

ماريا:لا خلي نكعد هنا ويه خاله 

رواسي:خليج گاعده اني صاعده فوك 

درت روحي اريد اروح استوقفتني امي و گالت .. 

جميله:زعلانه مني ؟ 

رواسي:لا تعودت 

كامت من مكانها اجت يمي باستني من راسي و گالت .. 

جميله:منريد نزعلج احنه كل الي يهمنا سعادتج 

بس رسيم من حقه ياخذ بنته وياه و يشوفها هوَ و اهله شوكت ميريدون 

رواسي:مو بس هذا الموضوع امي كومه سوالف كومه 

اخذت الصينيه مني و سحبتني بيدها الثانيه 

دخلتني للصاله كعدت على القنفه، حطت الصينيه على الطبله و خلت كلاص ببسي و صحن كيك كدام ماري و الثاني خلته كدامي.. كعدت يمي و گالت 

جميله:ماري صديقتج مو غريبه راح احجي كدامها 

و هيَ تحكم 

ماريا:شبيكم شصاير؟ 

جميله:لان رسيم راد ياخذ مسك وياه هيَ ما قبلت و احنه خليناه ياخذها ابوها و من حقه غلطانين بتصرفنه ؟ 

هزت راسها ب "لا" و گالت .. 

ماريا:لا مو غلط لان هيَ بنته و شوكت ميريد يشوفها وياخذها 

        

          

                

رواسي:زين و الفتره الفاتت كلها بكل مره رسيم يأذيني و يهيني و يستصغرني همَّ يصيرون وياه ضدي، ابويه ضربني كدامه و قلل من قيمتي و امي ترزلني كدامه 

يصيرون وياه ضدي 

جميله:لان أنتِ غلط رواسي تصرفاتج ابد مو مال وحده عاقله، احنه من البدايه نعرف رسيم بس تغيرت نظرتنه اله و صرنه نكرهه من يوم الي خطفج بي و عذبج 

رواسي:تكرهوا و تدافعون عنه 

جميله:هوَ تغير رواسي كلش تغير كلنا نشوف تغيره 

الا أنتِ، لان جافصه ببطنه و من يعصب عليج تجين تصيحين ميتغير 

ماريا:حتى لو خاله بس غلط تتصرفون وياها هيج كدامه! 

حتى لو هيَ غلطانه تبقون وياها مو ضدها بعدين تحجون وياها بيناتكم و تطيحون حظها 

جميله:ماكو واحد يتحمل سوالف رواسي مثل رسيم 

تحمل هوايه غلط و عدم احترام، صارلها سنه يمنه و هوَ ما تركها ابد يوميه يوميه يجي لو يخابر و يسأل عليها 

رواسي:شيلي من السنه ٧ شهور عايفني بقهري و خوفي عليه و هوَ متونس ويه الحمره لتبقين تدافعين اله خلص

الكل صار يعرف انتو تموتون على رسيم و الي يهمكم رسيم و بس 

باوعتلي و گالت ب امر.. 

جميله:خابريلي رسيم اريد احجي وياه 

رواسي:اني شعليه روحي خابري من تلفونج 

جميله:تلفوني على الشحن خابري من عندج بسرعه 

ماريا:خابري هسه شيصير يعني 

رواسي:ما اريد احجي وياه 

ماريا:اي بس خابري و انطي لامج هيَ تحجي لتحجين أنتِ 

شلت تلفوني دكيت على رسيم و انطيت التلفون لامي 

كامت من مكانها و گالت .. 

جميله:هاي اني مو رواسي، اي اكو 

طلعت من الصاله تحجي بعيد باوعتلي ماري و گالت .. 

ماريا:أنتِ بعدج تحبي؟ 

باوعتلها شايله صحن الكيك بيدها و تاكل منتظرتني 

ارد عليها، سحبت الصحن من ايدها و گلت.. 

رواسي:كافي تاكلين البدله تصغر عليج و متكدرين تلبسيها 

ماريا:طيبه والله و انتو سوالفكم تسوي واهس للاكل 

عبالك گاعده بسينما 

رواسي:لو انطيهم قصتي يعرضوها يدفروني و يكولون 

دطيري أنتِ و قصتج 

ماريا:لتلوفين الموضوع جاوبي على سؤالي، بعدج تحبين رسيم؟ 

        

          

                

رفعت اكتافي بمعنى ما اعرف و گلت.. 

رواسي:لا ما اتوقع لان مرتاحه بدونه 

ماريا:اذا احد اجه خطبج توافقين؟ 

رواسي:لا ما اريد اتزوج بعد 

باوعت على الباب و اردفت بفضول.. 

رواسي:امي شعدها ويه رسيم تحجي صار ساعه! 

ماريا:كومي شوفيها 

رواسي:لا هسه عبالهم اريد اعرف اخباره 

ماريا:احجيلي الفلم السويتي لبين ما تجي امج 

سحبت نفس قوي مليان حسرات و حجيتلها كلشي 

صار بالتفصيل، و هيَ تسمعني مركزه اخر شي كامت 

عليه و ضربتي بكل قوتها على ظهري، عطت بيها بصوت عالي.. 

رواسي:وجع شبيج حيوانه ! 

ماريا:گتلج اسمعها منج لايف حتى تنكفخين 

رواسي:مو هيج كسرتيلي ظهري قندره على راسج 

دخلت امي للصاله انطتني التلفون و گالت .. 

جميله:راح احجيلج 

رديت متسائله.. 

رواسي:شتحجين؟ 

جميله:الفتره الي رسيم سافر بيها راح حتى يتعالج ما عافج لحاله 

رواسي:ميهمني المهم عافني بدون اي خبر 

جميله:چان كل يوم يتواصل ويايه و ويه ابوج و يعرف اخبارج، رسيم ما تخلى عنج رواسي 

ماريا:يعني جنتو تعرفون اخباره و وين هوَ؟ 

جميله:اي بس هوَ مجان يريدها تعرف اي شي 

ماريا:ليش ميريد تعرف ترا حقها تعرف مكان زوجها وين و شنو وضعه! 

جميله:بكل مره يسمع صوتها و شلون تبجي عليه يتخبل 

و يتخربط عليهم بس چان يكول "خلوها تتعود على عدم وجودي حتى اذا صار بيه شي متتأذى بغيابي" 

الدموع تجمعت بعيوني مسحتهن بسرعه قبل مينزلن 

و يفضحني باوعت لامي و حجيت بحديه.. 

رواسي:ما اريد اعرف اي شي يخصه، رسيم صفحه و انطوت و حركت الدفتر كله حتى متنفتح بعد 

جميله:لازم تعرفين رسيم من ابتعد عنج ابتعد علمودج و بس 

رواسي:اوكي عرفت هسه شنو المطلوب؟ 

جميله:ما مطلوب منج شي بس دا احجيلج حتى تعرفين 

روحج أنتِ الغلطانه مو بس رسيم 

        

          

                

رواسي:تمام 

كمت من مكاني باوعت لماري و اردفت.. 

رواسي:كومي نصعد فوك اعدل مكياجي حتى نطلع 

كامت ويايه و صعدنه فوك رتبت مكياجي و هيَ هم 

عدلت على مكياجها اخذت جنطتي و اغراضي و طلعنه 

رحنا للسوك افترينه كومه لحد ما تكسرت رجلينه 

بالكوه لكيت فساتين ثنين واحد قصير لون سمائي و بي 

فتحات مقسمه من الظهر للحنه اخذته و الثاني مخصر طويل و بي فتحه من الركبه و جوه لونه اسود 

ماري هم اخذت اغراض ناقصتها، و اشتريت هدايا لعذراء و رشا و اطفالهم.. خلصنا من السوك طلبت من ماري تاخذني لبيت رسيم 

ماريا:شعندج رايحه؟ 

رواسي:رايحه للبنات و هم ارجع مسك ويايه 

ماريا:تكدرين تواجهين رسيم و انتو البارحه متطلكين! 

حجيت بعدم اهتمام.. 

رواسي:اي عادي ميعنيلي شي مجرد ابو بنتي 

ماريا:براحتج 

دزيت رساله لرشا بلغتها بجيتي 

اخذتني لبيتهم نزلت و نزلت اغراضي ويايه و كلتلها.. 

رواسي:تعالي أنتِ هم 

ماريا:لا عيب و ادم خابرني من جنه بالسوك گال يريد يجي 

رواسي:تمام حَبيبي انتبهي على نفسج و ركزي بطريقج 

ماريا:ان شاء الله اذا احتاجيتي شي خابريني اجيج 

شمرتلها بوسه و رديت.. 

رواسي:متقصرين عُمري 

سديت الباب و بيدي هوايه شغلات باوعت عليهن 

و حسيت عيب ادخل و اني شايله هلكد اغراض ويايه و فساتيني.. ردت روحي حتى ارجع انضربت بشخص.. 

رفعت راسي باوعتله ضحك و گال.. 

رسيم:محمله السوك كله و جايه 

ركزت نظراتي بعيونه و حجيت.. 

رواسي:اي دااجهز لخطوبتي بس تخلص عدة الطلاك 

راح نعقد 

مد ايده على الفساتين مالتي اخذهن مني و هوَ يضحك..

رسيم:حلو كلش حلو، منو سعيد الحظ؟ 

رواسي:متعرفه واحد جنتل مان مو من الانذال 

رسيم:يلا عود نتعرف عليه مو مشكله 

رجع اخذ الاكياس من ايدي و دخل للبيت قبلي، مشيت وراه و دخلت لكيتهم كلهم كاعدين بالصاله سلمت عليهم و كعدت.. 

غسان:شلونج خويه ان شاء الله مرتاحه؟ 

رواسي:الف الحمدلله مرتاحه 

        

          

                

رسيم:مرتاحه لدرجه تجهز لخطوبتها و هيَ بعدها بالعده 

انظارهم توجهت عليه ارتبكت كلش ابتسمت و حجيت بتوتر.. 

رواسي:لا يا خطوبتي گتلك دنجهز لعرس ادم و ماري 

أنتَ سمعتني غلط 

رشا:قبل كم يوم ادم جابلنه كارت الدعوه و عزمنا 

رواسي:بدون عزيمه تجون گلبي 

بقينه كاعدين نسولف اني و البنات و نشرب جاي و غسان گاعد هوَ و رسيم ما اعرف بشنو يسولفون و مسك كاعده بحضن رسيم و تلعب بلحيته و شعره.. كمت شلت الهدايا و انطيتها للبنات فرحوا بيهن كلش 

رشا:ليش زحمتي روحج جيتج تكفي والله 

عذراء:اي والله ماكو داعي بس جيتج و شوفتج كافيه 

رديت عليهم ب ابتسامه.. 

رواسي:ماكو شي يغلى عليكم تدللون 

دك تلفوني ترخصت و كمت احجي بَره الصاله.. 

رواسي:هلاا دِلهَام 

دِلهَام:شلونج؟ 

رواسي:الحمدلله و أنتَ؟ 

دِلهَام:ما اعرف 

رواسي:خير شبيك؟ 

دِلهَام:مشاعر مخربطه مقهور لان ماري راح تتزوج 

رواسي:اي أنتَ هم تزوج شنو يعني 

دِلهَام:متريدني 

رواسي:منو هاي الي متريدك؟ بس دليني عليها اطيح حظها 

ضحك و گال.. 

دِلهَام:وحده متعرفيها 

بلحظه غباء مني حجيت.. 

رواسي:يلا اذا هيَ متريدك تعال اني اتزوجك 

بقه ساكت ما حجه شي، و اني انتبهت شنو حجيت 

عضيت شفتي بقوه قندره عليج رواسي شلون تحجين هيج! 

رواسي:لتصدك ترا اتشاقه بس مو صحيح 

دِلهَام:اعرف 

رواسي:اي لتفكر بغير شي ترا اذبحك والله، اني جفوصه شوي 

دِلهَام:جفصي براحتج اعرفج شنو عادي 

رواسي:اي عفيه اني حروح هسه لان مو بالبيت 

بعدين اخابرك 

دِلهَام:اخذي راحتج 

سده من عندي انداريت اريد ارجع للصاله، شفت رسيم واكف ورايه منتجي على الحايط و ايده على شواربه.. 

رفعت حاجبي معاجبني و حجيت متسائله.. 

رواسي:شنو واكف تتسمع؟ 

رسيم:لا هسه اجيت 

عفته و دخلت كعدت يمهم باوعت لمسك گاعده بحضن غسان و يلعب و يدغدغ بيها ابتسمت على منظرهم شكد حلو، هوايه يحبون مسك و يداروها و يهتمون بيها كأنو بتهم مو بنت اخوهم.. 

باوعت للساعه و حجيت.. 

رواسي:مسوكه ماما يلا حتى نروح 

عذراء:وين بعد وكت ما شبعنه منج 

رواسي:لا صارت ب ٩ هسه اترزل من استاذ راشد 

رشا:ابقي بعد الله عليج 

رواسي:غير مره ان شاء الله، يلا ماما تعالي 

هزت راسها متقبل تجي باوعلها غسان و گال.. 

غسان:تبقين هنا؟ 

مسك:اي يم بابا 

غسان:خليها تبات هنا اليوم 

رواسي:ماعدها ملابس و لا اغراضها وياها 

رشا:خلي غسان يوصلج و أنتِ حظريهن و دزيهن وياه 

خليها تبقى شوفيها فرحانه 

رواسي:تمام 

اجه رسيم كعد و شال مسك بحضنه يبوس بيها ما اعرف شنو يحجي وياها بس تكول "اي اريد" باوعت للبنات و گلت.. 

رواسي:بس فدوه اذا تريد حلويات او ببسي لتنطوها ابد 

ما اريدها تتعود عليهن 

عذراء:ليظل بالج حَبيبتي مننطيها 

باوعت لغسان و گلت.. 

رواسي:غسان توصلني اذا مو زحمه 

رسيم:اني اوصلج كومي 

رواسي:لا شكراً 

غسان:ابدل و اجي 

كام من مكانه صعد فوك شوي و رجع مبدل، كمت سلمت على البنات و رحت على مسك اخذتها بحضني بستها 

و كلتلها.. 

رواسي:لتضوجيهم و اسمعي الكلام 

هزت راسها ب "اي" و باستني اخذها رسيم مني 

مشيت اريد اطلع استوقفني لما گال.. 

رسيم:حظروا نفسكم الاسبوع الجاي تروحون تخطبولي..