رواية رواسي الدهر الفصل العشرون 20 - بقلم روح الدليمي

 

➰➰➰➰➰➰➰➰➰➰➰

حسيت على صوته يكعد بيه.. و يهزني من اكتافي.. 

فتحت عيوني بكسل باوعتله و حجيت بكسره.. 

رواسي:تعبت بابا اريد اموت 

راشد:اسم الله عليج بنتي، شوو تعاي تعاي 

رفعني من الگاع كومني و اردف.. 

راشد:احنه وياج و كل شي تريدي نسوي الج بس لتعذبين روحج هيج

رواسي:ما اريده خلي يطلكني 

راشد:احجي وياه اليوم و اخلي يطلكج مدام أنتِ متردي بعد محد يجبرج على شي 

رواسي:اريد انام ممكن تعوفني؟ 

راشد:نامي بفراشج و ارتاحي و ميصير غير الي أنتِ رايدته 

رواسي:هسه احجي وياه و خلي اليوم يطلكني 

راشد:ميخالف ارتاحي أنتِ و لتفكرين بشي 

تمددت بفراشي سحب الغطه من جوايه و غطاني و طلع من الغرفه.. بقيت نايمه يومين من التعب الي صار بيه 

مرت فتره بقيت مستمره على جلسات العلاج النفسي 

و مشيت على الخطه الي سوتلي ياها الدكتوره 

طول هالفتره ابويه يحاول ويه رسيم حتى يطلكني 

و هوَ ميقبل بقيت هيج معلگه.. بس صار ميهمني ابد 

تخلصت من كل مشاعري تجاهه و صرت اشوفه شخص عادي.. لا احبه و لا اكرهه 

بلشنه نحظر لعرس ماري و ادم، علاقتهم تخبل 

مليانه حب.. ادم هيمان و طاير بيها.. هوَ يستاهلها و هيَ تستاهله ثنينهم يستحقون يعيشون بسعاده و حب.. 

دك تلفوني باوعت ادم ديتصل رديت عليه و حجيت 

بزعل.. 

رواسي:زين والله تذكرتني و عرفت عندك بنت عم 

ادم:ما ناسيج والله بس مشغول و ترتيبات العرس و كل شي ما الحك احك راسي وداعتج 

رواسي:لا لا اصلاً ماري اخذتك مني صرت حتى متجي علينه كلش قليل 

ادم:ياا بويه ليش هيَ المسكينه حاجي وياها عدل 

رواسي:صدكتك خوش 

ادم:ديلا لتزعلين كومي بدلي حتى تروحين ويانه 

 

                

رواسي:وين؟ 

ادم:نختار قاط للعرس 

رواسي:روحوا انتو اني شكو 

ادم:اثق بذوقج اريد أنتِ تختاريلي 

رواسي:لااا دير بالك تحجي هل حجي كدام ماري 

هسه عبالها متحب ذوقها 

ادم:دكومي بلا حجي زايد جهزي روحج لبين ما اجي 

رواسي:لا ما اجي اني روحوا انتو

بعدت التلفون عن اذني شفت دِلهَام ديتصل عليه 

رجعته على اذني و حجيت.. 

رواسي:اجاني اتصال راح اسده 

ادم:راح اجيج تحظري 

رواسي:لا والله ما اجي غير مره عود دزلي صور و اساعدك بالاختيار 

ادم:تمام براحتج 

سديته من عنده و رجعت اتصلت على دِلهَام رأساً جاوبني 

دِلهَام:هلا روسيه شلونج 

رواسي:الحمدلله و أنتَ؟ 

دِلهَام:الحمدلله، عندج شي اليوم؟ 

رواسي:فارغه ماكو افرغ مني ليش؟ 

دِلهَام:عازمج على السينما اكو فلم نازل جديد 

رواسي:صار هواي مرايحه سينما 

دِلهَام:اعرف تروحين لو لا؟ 

رواسي:ماعندي شي عادي نروح اي ساعه؟ 

دِلهَام:اخلص شغلي و اخابرج 

رواسي:تمام انتظرك 

سديته من عنده و نزلت جوه دخلت للصاله لكيت 

رسيم گاعد ويه ابويه و بحضنه مسك يلعب بيها.. رفع عيونه يباوع عليه گال.. 

رسيم:هلا روسيه عاش من شافج 

رديت عليه ببرود و كعدت.. 

رواسي:هلا 

راشد:صح النوم اليوم طولتي 

رواسي:بقيت سهرانه للصبح 

راشد:شعندج 

رواسي:احجي ويه ماري و ادم و اساعدهم بالاختيار 

علمود التوزيعات و سوالف العرس 

درت راسي على مسك و گلت.. 

رواسي:مسوكه ماما تعالي يمي 

نزلت من حضن رسيم و اجت يمي گال.. 

رسيم:شلونج روسيه؟ 

        

          

                

رواسي:كلش زينه مرتاحه الحمدلله 

كام ابويه من مكانه و گال.. 

راشد:اشوف امج و اجي 

طلع من الصاله بقينه بس اني و رسيم، نزلت مسك من حضني و راحت تركض وره ابويه.. كام من مكانه 

و اجه كعد قريب مني مد ايده على ايدي لزمها بهدوء 

و گال.. 

رسيم:ما ناويه ترجعين؟ 

رواسي:لا مرتاحه بحياتي بدونك 

رسيم:بس اني مو مرتاح، تعبان بدونج والله 

رواسي:ميهمني ابد 

سحب ايدي قربها على شفايفه طبع بوسه عليها و گال..

رسيم:ضايع اني منتهي اريدج روسيه انطيني فرصه 

سحبت ايدي من عنده و حجيت ببرود.. 

رواسي:أنتَ بالنسبه الي شخص عادي حالك حال اي شخص اشوفه بالشارع.. من جنت يمك ما استغليت الفرصه و غيرت روحك علمودي بقيت مستمر تكسرني 

و تعذبني بكل الطرق 

رسيم:كلشي چان مخربط وداعتج اني بنفسي ما جنت اعرف سبب تصرفاتي، بس تغيرت اني والله تغيرت 

رواسي:رسيم اذا اني بعدني على ذمتك هذا ميعني انو راح ارجعلك اذا عندك خيط امل اكطعه احسن 

كمت من مكاني و اردفت.. 

رواسي:باجر اريد اروح اشوف البنات من ولدن لحد هسه ما رحت الهن ف اتمنى متكون موجود بالبيت

رسيم:اخر فرصه رواسي فكري بمسك شنو ذنبها تكبر بعيده عني ؟ 

رواسي:مالها ذنب بس هذا غلطك و لازم تتحمل نتيجته 

عفته و رجعت فوك لغرفتي كل عقله يدور فرص 

ما صدكت اكدر اتخطى و انساه و اطلعه من بالي و گلبي 

يريد يرجع يدمرني و لازم اسمحله بهذا الشي حتى يرتاح حضرته.. 

باوعت للساعه حتصير ب ٦ اني يومي كله خلص بالنوم 

بعد اذا تسهرين رواسي بالقندره على راسج.. 

فتحت كنتوري حايره شنو البس انخبصت خبص 

عبالك متواعده ويه حَبيبي.. 

قاطعني صوت تلفوني يدك باوعت دِلهَام ديتصل 

رديت عليه گال.. 

دِلهَام:هسه دخلت للبيت اسبح و ابدل و اجيج 

رواسي:على راحتك مو مستعجلين 

دِلهَام:تمام أنتِ جهزي روحج يادوب تخلصين علما اوصل 

رواسي:شقصدك دِلهَام؟ 

دِلهَام:ما قصدي شي شبيج عيوني بس غير انتو البنات كلكم تاخذولكم ساعتين بس تتجهزون 

        

          

                

رواسي:اي غير لازم نرتب روحنه قابل مثلكم تلبسون اي شي و تطلعون 

دِلهَام:رتبي روحج براحتج ولو حتى لو جنتي ب اتعس حالاتج تبقين بعيوني حلوه 

بوخت كلش توترت اول مره يحجي ويايه بهاي الطريقه

بعدت التلفون عن اذني و حجيت بصوت عالي.. 

رواسي:اي ماما هسه جايه 

فتحت سبيكر و اردفت بتوتر.. 

رواسي:امي دتصيحني من توصل خابرني اطلعلك 

دِلهَام:تمام 

سديته من عنده و كعدت على الجربايه، صرت اضرب على وجهي و احجي ويه روحي.. 

رواسي:صخااام الصخمج رواسي ولج هذا بسلا يحبج طاح حظج، قندره عليكم يالزلم ما الكم امان.. حتى الي اشوفه اخ الي يكوم يحبني امداج رواسي امداج 

بقيت متردده اروح لو لا، خاف اذا ارفض هسه يزعل 

و اذا اروح اخاف يتهور و يكلي احبج حتى والله انزع القندره و اضربه 

فتحت تلفوني و كتبت بالكروب 

رواسي:بنات بسرعه كولولي اروح لو لا؟ 

ماري مثل عادتها رأساً ردت.. 

ماريا:وين دايحه 

نارين:وين؟ 

نرجس:اخذيني وياج دخيلج راح انفجر 

دزيتلهم ايموجي هذا المعصب و كتبت.. 

رواسي: بسرعه بسرعه كولوا اروح لو لا 

كلهن كتبن "اي روحي" رديت عليهن.. 

رواسي:قنااادر و نعول چان كلتن لاا 

ماريا:حَبيبي تردين تنكفخين؟ بس كوليلي ما اقصر وياج 

رواسي:دروحي روحي خلي ابدل 

شمرت تلفوني على الجربايه و رجعت فتحت الكنتور

و طلعتلي بنطلون و تيشيرت و رهمت وياهن اكسسوارات و جنطه و وكفت كدام المرايا سويت شعري 

شسورته و سويته ويفي بسيط 

حطيت مكياج خفيف و ختمتها بعطر هادئ..

اخذت اغراضي و نزلت جوه صارت بوجهي امي 

رفعت حاجبها مستغربه و گالت.. 

جميله:وين رايحه؟ 

رواسي:ويه البنات رايحين للسينما نسيت انطيكم خبر سوري

جميله:تمام بس لتتأخرين 

رواسي:لا شعندي اتأخر بس يخلص الفلم نرجع 

دخلت للصاله ابويه هم استغرب شلون مجهزه روحي 

بدون ما انطيهم خبر.. 

        

          

                

راشد:هاا وين حَبيبتي؟ 

رواسي:البنات خابروني نروح للسينما 

راشد:اي شكو بيها تونسي 

رواسي:تحتاجون شي؟ 

راشد:سلامتج بابا عندج فلوس؟ 

رواسي:اي حَبيبي عندي 

راشد:اخذي من الغرفه خاف تحتاجين 

رواسي:لا والله عندي هوايه ميحتاج 

عفتهم و طلعت بعد ما خابرني دِلهَام، لكيته ينتظرني بَره 

صعدت وياه و طلبت منه يحرك بسرعه.. ابتعدنا عن البيت باوعلي و گال.. 

دِلهَام:شبيج؟ 

رواسي:مابيه شي بس كذبت على اهلي 

دِلهَام:بشنو؟ 

رواسي:گلتلهم رايحه ويه البنات مو وياك خفت يفهمون غلط 

دِلهَام:ليش يفهمون غلط شنو اول مره نطلع سوه؟ 

رواسي:لا بس ما اعرف 

طلعت تلفوني من الجنطه و كتبت بالكروب..  

رواسي:گلت لاهلي طالعه وياكم و لتسئلوني ليش بعدين احجيلكم 

رأساً سديته و رجعته بالجنطه.. صار هدوء بالسياره 

لا اني احجي و لا هوَ، قاطع هدوئنا و حط اغنيه 

و صار يدندن وياها بصوت ناصي 

ركزت بكلمات الاغنيه كلها حب و رومانسيه، هذا ديلمح 

لشي لو اني بكيفي افسر؟

شردت بتفكيري احلل بكيفي، احلى شي يطلع هوَ ما قصده شي بس اني الي واكعه.. صخام الصخمج رواسي صخام الصخمج أنتِ متزوجه ميصير 

فزيت من صفنتي لما حط ايده على كتفي و گال.. 

دِلهَام:وين صفنتي شنو نبقى بالسياره؟ 

باوعت على المكان احنه بالباركنك مال مول 

فتحت الباب و نزلت هوَ هم نزل ورايه.. دخلنا للمول و رحنا للسينما بقيت واكفه و اباوع على الافلام ماكو شي 

جذبني 

رواسي:شو ماكو فلم حلو 

دِلهَام:شمدريج مو حلوات شايفتهن قبل؟ 

رواسي:لا 

دِلهَام:لعد خلص هسه اني اختار بس وين تحبين تكعدين؟ 

رواسي:بالكراسي الاخيره بس مو كلش اخر شي 

دِلهَام:تمام 

        

          

                

تقدم وكف يم الولد يحجي وياه اختار فلم و اخذ ببسي و بوب كورن و اجه يمشي ب اتجاهي، وكف يمي و گال.. 

دِلهَام:يلا راح يبلش الفلم بعد شوي 

رواسي:شنو تصنيفه الفلم؟ 

دِلهَام:رومانسي، يلا امشي 

انطاني ظهره و مشه مشيت وراه و عقلي يحلل 

بكيفه.. شلون اذا طلع يحبني؟ شسوي اني يبوو عليج يبوو..

دخلنا للصاله و كعدنا شوي و بلش الفلم، طلعت تلفوني 

و انتظرت يبين اسم الفلم اخذت صوره و دخلت للانستا خفيت اهلي من الستوري و نشرتها كتبت "✨ D"

و سويتله منشن.. 

سديت تلفوني سويته صامت و حطيته بحضني و ركزت على الفلم.. بنص الفلم تذكرت رسيم ضايفني بعده و نسيت اسويله هايد اويلي عليج رواسي اليوم يطيح حظج 

شلت تلفوني نصيت السطوع مالته و باوعت للاشعارات 

٢٠ مكالمه من رسيم و رسائل كومه من عنده و من البنات.. تصخمت و تعزيت، قرب روحه عليه و گال بصوت ناصي.. 

دِلهَام:شبيج صار شي؟ 

رواسي:لا هيج ماكو شي خلي نكمل الفلم 

رجعت اباوع بس ممركزه ابد كل تفكيري عن رسيم 

شنو راح يسوي اعرفه مخبل ميسكت و يگلب الدنيا 

اريد بس يخلص حتى نطلع منا.. علما خلص الفلم 

خلصت روحي وياه، رأساً كمت من مكاني و گلت.. 

رواسي:اني راح اطلع قبلك اروح اغسل ايدي 

دِلهَام:يلا نطلع سوه 

طلعنه و اني بوجهي ركض للحمام غسلت ايدي، و فتحت تلفوني دخلت للواتس لكيت ابويه هم دازلي رسائل 

ردت ادك عليه بس هوَ سبقني و خابرني رأساً 

جاوبته.. 

رواسي:داك عليه حَبيبي تلفوني صامت چان 

راشد:وينج؟ 

رواسي:هسه طلعنه من السينما ليش؟ 

نتر بيه.. 

راشد:ليش كذبتي علينه رواسي؟

رواسي:مو قصدي بابا بس ماردت تفهمون غلط 

او متخلوني اروح 

راشد:تعاي بسرعه للبيت و نتفاهم 

رواسي:تمام 

طلعت من الحمام لكيته واكف يحجي بالتلفون، وكفت يمه انتظرته يخلص.. چان يحجي منفعل بس يحاول يسيطر على نبرة صوته حتى متعلى.. 

دِلهَام:من شوكت أنتِ تحاسبيني؟ حتى لو عندي شي 

مالج اي حق تحسابيني فهمتي لو لا! بس ارجع للبيت نحجي باي 

        

          

                

سد التلفون باوعلي و گال.. 

دِلهَام:ناكل شي ؟ 

رواسي:لا ابويه خابرني گال لتتأخرين مسك تبجي عليه 

دِلهَام:زين ناخذ سفري ناكل بالسياره 

رواسي:لا والله اصلاً مو جوعانه غير مره 

هز راسه و مشه كدامي سرعت مشيتي حتى الحك بي 

طلعنا للبارك صعدنا السياره رأساً حرك و طلع مستعجل 

طول الطريق احنه ساكتين محد بينه نطق حرف.. 

بعد مده وصلنا لبيتنه وكف كدام الباب باوعت عليه 

و حجيت.. 

رواسي:كلش شكراً على الطلعه الحلوه غيرت جو و تونست هوايه 

دِلهَام:تدلل روسيه بالخدمه 

رواسي:متنزل ؟ 

دِلهَام:لا مستعجل لازم اروح 

رواسي:تمام براحتك، شكراً مره ثانيه 

فتحت الباب و نزلت هوَ رأساً راح.. باوعت على الشارع 

شفت سياره رسيم طابكه شوي بعيد عن البيت.. النذل سابقني و جاي لهنا.. طلعت مفتاح البيت فتحت الباب و دخلت، اجاني صوته يحجي بصوت عالي.. 

رسيم:اجت ست الحسن و الدلال و اخيراً عرفت عدها بيت و قررت ترجعله 

عاط بي ابويه.. 

راشد:ما عليك بيها اني ابوها مو أنتَ! 

دخلت عليهم للصاله و حجيت بهدوء.. 

رواسي:سلام 

عاط بيه.. 

رسيم:و الج عين تحجين؟ 

كعدت يمهم و حجيت ببرود.. 

رواسي:أنتَ مثل العلاج لازم اشوفك مرتين باليوم؟ 

راشد:ويه منو جنتي طالعه؟ 

رواسي:ويه دِلهَام 

حجه بنرفزه.. 

رسيم:شكد صلفه و تكوليها عادي! 

راشد:معليك بيها أنتَ انتو منفصلين ابد مالك حق تدخل بيها اني ابوها و احاسبها 

رد عليه ب استهزاء.. 

رسيم:ما شاء الله على ذكائك، أنتَ مستحيل تكون شايل هيج ذكاء و بعدك بالعراق مكانك بالصين مو هنا 

راشد:مو محترمك ليش تخليني اطيح حظك هسه 

رسيم:مرتي هاي مرتي و لازم تعرف تتصرف و تحسب حساب لكل تصرفاتها، وين عايشين احنه تطلع ويه صاحبها و هيَ متزوجه بعدها ! 

كمت من مكاني و حجيت بصياح و عصبيه.. 

رواسي:اوزن كلامك رسيم و اعرف شنو شدتحجي عني ! اني مو مثلك ما احسب حساب لاي بشر 

        

          

                

رسيم:لا والله صدك ؟ لعد الي تطلع ويه واحد غريب عنها 

و تصور وتنشر وياه و هيَ متزوجه هاي تخاف من ربها و تحسب حساب لاحد ! 

رواسي:اني ما اريدك و ما معتبرتك زوج الي ابد، طلگني و خليني اعيش حياتي ما ابقى مربوطه بيك 

رسيم:اطلگج حتى تتزوجي مو ؟ 

رواسي:اتزوج اتطلك اترمل هذا كله ميخصك، أنتَ انتهيت من حياتي من يوم الي عفتني بي و سافرت ويه حبيبتك بحجه تتعالج 

راشد:كافي بس صياح رواسي كعدي مكانج، و أنتَ لو تحجي بهدوء و احترام لو توكل و ممنوع اشوفك هنا بعد 

كعدت بمكاني و حجيت بنتر.. 

رواسي:خلي يطلكني كارهه روحي لان بعدني على ذمته 

راشد:و هذا الي راح يصير يطلكج و غصب عنه هم 

رسيم:بكيفكم تقررون ما اطلك اني ما اريد اخسرها 

رواسي:ما ربحتني حتى تخسرني رسيم 

رسيم:گتلج تغيرت اني غيرت روحي علمودج ما اريد 

اخسرج والله 

رواسي:ما تغيرت رسيم بعدك نفس ما أنتَ بعدك نفس تصرفاتك و تهجمك و عصبيتك ما تغيرت و لا راح تتغير بيوم 

رسيم:أنتِ مرتي اغار عليج و من حقي اجي احاسبج اذا غلطتي، طلعتج و كلامج وياه هذا اكبر غلط تعرفين لو لا؟ 

رواسي:من تزوجتني على مرتك و ما اهتميت لمشاعرها هذا مو غلط؟ و من كسرتني و ما اهتميت لمشاعري 

و رحت سافرت ويه وحده ثانيه هذا مو غلط؟ بس من اني اطلع ويه شخص حاسبته اخ الي اصير اني غلط ! 

باوع لابويه و گال بهدوء.. 

رسيم:من رخصتك اريد احجي وياها وحدنه 

رواسي:اي شي تريد تحجي احجي بوجود ابويه اني وياك منبقى بمكان واحد وحدنه 

تقرب عليه و حجه بصوت ناصي.. 

راشد:أنتِ غلطانه كعدي و احجي وياه بهدوء لتكبريها، تفاهموا و حلو كلشي بيناتكم 

رواسي:على شنو نتفاهم بابا؟ بعد كل الي سواه بيه تريدني اكعد و اتفاهم وياه! 

باوع لرسيم و گال.. 

راشد:احجوا كلشي لتبقون شي بداخلكم واحدكم يحجي غلط الثاني حتى تعرفون نفسكم وين غلطانين و بعدها 

تقررون شتسوون لو تكملون سوه لو تتطلكون و كل واحد يروح بطريقه 

رسيم:اني قراري واضح و ميتغير ما اطلكها لو شما يصير 

رواسي:و اني ما اريدك ما اطيقك افهم 

        

          

                

كام ابويه و گال بعصبيه.. 

راشد:كوموا كدامي يلا 

رواسي:وين؟ 

راشد:ما اريد اسمع منكم حرف زايد ثنينكم كدامي 

كمت اني و ابويه عاط برسيم.. 

راشد:كوم گلت! 

رسيم:جهال احنه؟ 

راشد:لو تكوم و تجي ويايه لو اطلع و ممنوع اشوفك هنا 

كام رسيم من مكانه اجه يمي، ابويه طلع من الصاله 

و صعد فوك و احنه نمشي وراه.. فتح باب غرفتي 

 و گال ب امر.. 

راشد:فوتوا يلا 

رسيم:عمي الغالي حبيتك والله 

راشد:طايح حظ سرسري فوت كدامي، و أنتِ هم 

دخل رسيم للغرفه و هوَ يضحك شكد فاسق، باوعت لابويه و حجيت.. 

رواسي:ما اريد اتواجد وياه بمكان واحد 

اجه عليه سحبني من ايدي و دخلني للغرفه دفعني 

ردت اوكع بس رسيم لزمني.. ابتعدت عنه باوعت 

لابويه سحب مفتاح الباب طبكه بقوه و قفله علينه

و گال من وره الباب.. 

راشد:تبقون هنا متطلعون لحد ما تتفقون على قرار واحد 

غير هيج ماكو 

كعدت على الجربايه اريد استوعب الي صار، ابويه يعرف بيه ما اريده ليش هيج يسوي و يجبرني اكعد وياه بمكان واحد! رفعت عيوني باوعت لرسيم واكف يباوعلي 

و مبتسم كبر اي والله شكد غثيث.. 

رواسي:خير مضيع شي بوجهي؟ 

اختفت ابتسامته و كال بجديه.. 

رسيم:ليش هيج تسوين و تجبريني اتصرف وياج تصرفات متعجب؟ و بعدين تكوليلي متتغير أنتَ ! 

رواسي:گتلك من قبل و ارجع اكولها، ما بقت غير الخيانه اسويها حتى تكرهني و تطلكني و راح اخونك 

تقرب عليه كعد كدامي بالگاع و گال بنبرة حاده.. 

رسيم:رواسي ما اريد ااذيج ابد، وعدتج راح اتغير و تغيرت لتخليني اخلف بوعدي الج و اتصرف تصرفات 

تأذيج و تقهرج 

رواسي:متهمني لا أنتَ و لا تصرفاتك

رسيم:بس أنتِ تهميني، روحي بيج روسيه 

غمض عيونه و حط راسه على رجلي و اردف بتعب.. 

رسيم:تعبت بدونج رواسي، حياتي بدونج عدم مالها اي معنى  

رواسي:و اني مرتاحه بدونك و رجعت حياتي تلونت ببعدي عنك 

سحب نفس مليان حسرات و گال.. 

رسيم:شلون اخليج تحبيني مره ثانيه؟ 

        

          

                

رواسي:ما اريد ارجع اتعذب بحبك تعبت هوايه لحتى تخلصت من مشاعري تجاهك 

رسيم:عيونج بعدها تلمع من تشوفني

عدل كعدته حط ايده على گلبي و اردف.. 

رسيم:دكات گلبج تزيد بوجودج يمي، گلبج بعده يريدني 

بس أنتِ قنعتي عقلج انو متحبيني و متريديني 

كمت من مكاني و حجيت بثقه.. 

رواسي:اذا گلبي يريدك ادوس عليه بالقندره و اتعداه هوَ و حبك، اني كرهتك انطيتك فرص هواي بس أنتَ ضيعتهن و ضيعتني وياهن 

رسيم:ما رايد منج غير اخر فرصه اذا شفتي روحج متكدرين تكملين ويايه بعدها، نتطلك خلص و كل واحد بطريقه 

رواسي:أنتَ متستحق انطيك فرصه بعد  

كام من مكانه و اجه وكف يمي حاوط خصري بيده 

و سحبني عليه اكثر، و گال بحب.. 

رسيم:احبج هوايه اكثر من ما تتصورين و راح اخليج تحبيني من جديد 

بعدت راسي عنه لما تقرب و راد يبوسني، مديت ايدي 

على ايده اسحب بيها عن خصري و حجيت بنرفزه.. 

رواسي:عوفني رسيم وخر 

بعدته عني و رحت على الباب صرت ادك بي بكل قوتي و اصيح بصوت عالي على ابويه.. 

رواسي:بابا افتح الباب بسرعه 

صرت ادفر بي برجلي و اصيح و دموعي صارت 

تنزل.. 

رواسي:افتح الباب ما اريده ما اريد ابقى وياه افتح 

سحبني من ايدي بعدني عن الباب و گال بعصبيه.. 

رسيم:خبله أنتِ ؟ راح تكسرين رجلج بالضرب 

نترت ايدي منه و صحت بوجهه.. 

رواسي:طلكني رسيم ما اريدك ما احبك طلكني 

رسيم:ما اطلكج الف مره گلت 

دفعته من كدامي و رحت على الكومدي الي يم راسي 

شلت الكلاص الموجود و شمرته على الحايط تكسر 

اخطت قطعه كزاز جبيره و حطيته على رگبتي و ضغط عليها و عطت بي.. 

رواسي:اذا متطلكني اذبح روحي 

بقه فاتح عيونه صدوم و يباوع عليه، رفع ايده تجاهي 

و گال بهدوء.. 

رسيم:لتسوين هيج حَبيبتي اهدي 

حجيت بنفس نبرة العصبيه.. 

رواسي:طلكني گلت 

رسيم:روسيه گلبي عوفي الي بيدج و تعاي كعدي هنا 

انفتح باب الغرفه و دخلوا امي و ابويه بقوا واكفين مكانهم 

يياوعون عليه مصدومين و خايفين، عاطت امي بخوف.. 

جميله:رواسي عوفيها لتسوين هيج امي 

رواسي:اذا ميطلكني اموت روحي 

راشد:بس اهدي مو هيج يا حَبيبتي 

حسيت رگبتي صارت تحركني و تأذيني، بس بقيت ازيد بالضغط و اجرح برگبتي شوي شوي.. شافوني راح اسويها صدك تخبلوا راد ابويه يتقرب مني رفعت ايدي الثانيه بوجهه و حجيت بتهديد.. 

رواسي:الي يخطي خطوه وحده بس انهي حياتي بنفس اللحظه 

كعد رسيم على الجربايه ضغط راسه بقوه وخر ايده عن راسه و ضرب على رجله بقوه و گال بهدوء.. 

رسيم:خلص اطلكج بس لتأذين روحج 

رواسي:طلكني هسه 

راشد:راح يطلكج بس هسه عوفي الي بيدج و تعاي كعدي هنا 

هزيت راسي ب "لا" و حجيت.. 

رواسي:يطلكني اول 

حجت امي بقهر و توسل.. 

جميله:طلكها رسيم لتخليها تأذي روحها، الله يخليك طلكها 

ما اريد اخسر بنتي 

سحب نفس قوي و زفره بهدوء.. 

رسيم:الي تردي يجرالج روسيتي بس لتأذين روحج 

كام من مكانه باوعلي و اردف بغصه.. 

رسيم:أنتِ طالق... 

يتبع...