رواية رواسي الدهر الفصل التاسع عشر 19 - بقلم روح الدليمي

 

➰➰➰➰➰➰➰➰➰➰➰

كام من مكانه باوعلي و گال.. 

رسيم:أنتِ كل حياتي ما اطلكج بس صدكيني راح اسوي كلشي يطلع بيدي في سبيل اخليج تسامحيني و نبلش من جديد 

رواسي:ما اريدك لتجبرنييي ابقى وياك 

رسيم:اعرف تحبيني بس زعلانه مني راح اسوي كلشي حتى ترجعيلي من جديد 

رواسي:ما ارجع لو اموت ما ارجع بعد

رسيم:نشوف منو يربح، حبنه لو عنادج 

عطت بي بحركه.. 

رواسي:ماكووو حب بيناتنه حتى يربح، أنتَ متحبني ابد متحبني و لا راح تحبني عوفني بحالي و اطلع منا ما اريد اشوفك بعد 

رسيم:بس خليني احجيلج سبب غيابي شنو 

رواسي:ما اريد اعرف امشي روح منا 

رسيم:بس اسمعيني بطلي عناااد 

كمت من مكاني لزمته من ايده و صرت اجر بي 

اريده يطلع بس ميقبل يتحرك من مكانه.. سحبني عليه و حضني بكل قوته و گال.. 

رسيم:اني سافرت حتى اتعالج من المرض 

رواسي:ميهمني عوفني 

رسيم:يهمج و كلش يهمج روسيه، ما حجيتلج لان جانت نسبه شفائي قليله و چان اكو احتمال انو اموت اثناء فتره العلاج 

رواسي:أنتَ جذاب لو صدك رايح علمود تتعالج چان حتى شعر مابقه براسك 

رسيم:رواسي والله وداعتج و داعت حبي الج ممكذب عليج صار ٣ شهور من خلصت علاج بس بقيت بفتره راحه و المفروض لحد هسه اني هناك بس رجعت علمودج 

حطيت ايدي على صدره اريد ادفعه عني بس حاضني 

بقوه ما اكدر حتى اتحرك.. 

رواسي:رسيم عوفني خنكتني ترا 

ابتعد عني و صار يباوع بعيوني، نظراته وترتني 

نزلت عيوني اباوع للكاع ما اريد اباوع بعيونه اعرف بروحي اضعف و ارضى رأساً.. كعدت على الجربايه وكلت. 

رواسي:اذا خلصت حجي ف روح يلا 

رسيم:بعد عندي كومه حجي اريد احجيلج عن كل شي عشته طول هاي السبع شهور 

     

                

رواسي:رسيم روح منا اذا تحبني مثل متكول ف روح ما اريد اشوفك كارهتك اني مو طايقه اشوف وجهك 

رسيم:اخليج تحبيني مره ثانيه 

رواسي:ما اريدك ما اريدك كوه خوما كوه! 

رسيم:لا ابد مو كوه و لا غصب بس راح اثبتلج حبي الج 

و اخليج تحبين رسيم مره ثانيه 

رواسي:شتسوي سوي ميهمني بس روح منا تعبتنييي أنتَ 

رسيم:رايح هسه بس راجع ما اعوفج ابد و اعوضج عن كل الشهور الفاتت 

تقرب عليه باسني من راسي و همسلي.. 

رسيم:احبج روسيه و روح امي و ابويه احبج 

ابتعد عني و طلع من الغرفه بقيت اباوع على الباب 

و دموعي صارت تنزل.. اااخ يا گلبي شوكت توكف 

و تريحني من هاي الدنيا.. 

انفتح باب الغرفه و دخلت امي رادت تحجي رفعت 

ايدي امنعها من الكلام و حجيت.. 

رواسي:ما اريد اسمع اي شي بعد بخصوص رسيم 

جميله:لشوكت تبقين هيج حابسه روحج؟ اذا بنتج من رجعتي لحد هسه ما شفتيها حرام عليج 

رواسي:خلوني ارتاح 

جميله:كومي متبقين بالغرفه بعد يلا كدامي 

رواسي:عوفوني بحالي 

سحبتني من ايدي كومتني و عاطت بيه.. 

جميله:كومي گلت كدامي بسرعه 

رواسي:ما اريد اطلع و لا اريد اشوف احد و لا احجي ويه احد خلوني وحدي 

رفعت ايدها و ضربتني راشدي و عاطت.. 

جميله:كافي راح تتخبلين امشي اطلعي و احجي و سوي كلشي حتى تتغير نفسيتج اذا تبقين هيج أنتِ راح تتعذبين اكثر 

رواسي:مالي نفس لكل شي 

جميله:حتى لخطوبه ابن عمج و صديقتج ما رحتي 

كافي ترا كلنا ملينا 

رواسي:مليتوا مني؟ 

جميله:مو منج يا حَبيبتي بس هاي حالتج نريد بس نطلعج منها احنه نتعذب اكثر منج من نشوفج بهاي الحاله والله 

سحبتني لحضنها باستني من راسي و گالت .. 

جميله:منحب نشوفج تتعذبين نعرف الي صارلج مو سهل 

بس مو صح تسوين بروحج هيج 

رواسي:شسوي امي شسوي اني الي انخطفت مرتين و اني التعذبت مو انتو 

جميله:و احنه نريد نساعدج تطلعين من حالتج هاي 

امشي وياي طلعي كعدي ويه بنتج هم تريدج و محتاجتج يمها يعني لا أنتِ و لا ابوها وياها فكري بيها 

        

          

                

بعدت عن حضنها مسحت دموعي و گلت.. 

رواسي:اسبح و ابدل و اجي 

جميله:عفيه حَبيبتي انتظرج راح اخدر جاي و سويت كيكه نكعد اني وياج مثل قبل و نسولف 

رواسي:تلفوني رجعه رسيم لو بقه يمهم؟ 

جميله:موجود بس مابي شحن هسه اجيبه الج و خابري صديقتج باركيلها

رواسي:تمام 

راحت هيَ و اني طلعت ملابس الي، رجعت امي و بيدها تلفوني اخذته حطيته على الشحن و دخلت اسبح.. 

بقيت نص ساعه اني بس واكفه جوه المي و دموعي تنزل .. مقهوره كلش بداخلي جرح كبير و صعب يتعالج 

روحي مكسوره و صعب تتجبر.. 

من جهه رسيم و حبي اله عذاب بحد ذاته، و من جهه 

الخطف و التعنيف.. نفسيتي متأذيه اكثر من جسمي.. 

شنو راح تكون النهايه؟ 

راح اكدر انسى رسيم و اعيش حياتي ويه بنتي و اهلي؟ 

رسيم راح يعوفني بحالي لو هم يرجع يأذيني؟ 

كومه اسئله ببالي بس ماكو الها جواب ابد..

كملت سبح و طلعت بدلت ملابسي بالغرفه مشطت شعري 

و عفته مفتوح حتى ينشف، كعدت على الجربايه فتحت تلفوني و بقيت انتظر يربط على النت.. 

شوي و صارت الرسائل و الاشعارات تمطر بالتلفون.. 

كومه رسائل من البنات و دِلهَام و ابويه و امي 

ولد عمي كلهم حتى عمي و مرته.. 

فتحت الرسائل بس وخرت الاشعارات و دخلت للكروب 

مالتنه اني و ماريا و نرجس و نارين.. 

كتبتلهم رساله.. 

رواسي:شلونكم بنات مشتاقه الكم هوايه و اعتذر منكم لان خوفتكم عليه، و بالاخص ماري قريت رسائلج و اعرف حاسه بالذنب لان طلعت من يمكم و انخطفت بس 

شي راد يصير بعد و كلش اعتذر ما كدرت احظر خطوبتكم بس وعد بعرسكم ابقى اركص من بدايه الحفله 

لحد ما تسدون باب الغرفه عليكم ههههههه... احبكم هوايه والله و هاي السالفه بينتلي حبكم و خوفكم عليه 

نفسيتي تعبانه شوي بس اني كدها و قويه و راح اتخطاها هيَ و كلشي سيء صار بحياتي و اولهم رسيم.. 

دزيتها الهم عفت التلفون يشحن و نزلت جوه.. لكيت امي محظره صينيه بيها كيك و قوري الجاي و استكانات ثنين 

دورت بعيوني على مسك ما لكيتها كعدت بالكاع يم امي 

و گلت.. 

رواسي:مسكه وين؟ 

جميله:اخذها رسيم وياه گال بليل يرجعها 

رواسي:اوكي 

صبتلي جاي و مدتلي الاستكان و گالت .. 

جميله:روسيه شنو رأيج تراجعين يم معالج نفسي ؟ 

        

          

                

اخذت الاستكان منها و جاوبتها.. 

رواسي:بكيفكم 

جميله:دِلهَام نصحنا بدكتوره زينه و گال شوكت متردون بس خابروني ادبرلكم موعد 

رواسي:عادي براحتكم شوكت متردون اروح 

جميله:اخلي ابوج يحجي وياه اليوم و يحجزلج اقرب موعد بلكي تساعدج تتخلصين من كلشي صارلج و تنسي 

رواسي:راح اكدره انساه؟ 

جميله:منو؟ 

رواسي:رسيم راح اكدر انساه برأيج؟ 

تنهدت و باوعتلي بحيره و گالت .. 

جميله:هذا الشي محد يعرفه غيرج أنتِ اذا جنتي تحبي من كل گلبج ف مستحيل بيوم تنسي او تحبين غيره، اما اذا چان حبج اله حب عادي ف تنسي و تنسين عشيرته هم 

رواسي:اني شلون حبيته؟ و ليش حبيته هوَ؟ 

جميله:قدر و مكتوب ربج كاتبلج انو تحبين هذا الشخص 

صدكيني رواسي بكد ما حاقده على رسيم بسبب عملته وياج اني متأكده من حبه الج 

رواسي:لو يحبني مجان عذبني 

جميله:غلطان و غلطه جبير و حقج متكدرين تسامحي عليه بس بنتي هوَ ميت عليج من قبل لا يعرف ابوج هوَ الي كاتل امه.. بكل مره چان رسيم يحجي ويه ابوج بيها و يخطبج من عنده چان يجيني يبجي و يلوم بروحه لان ديمنع زواجكم 

رواسي:لو بابا معترف على روحه و حاجي الحقيقه للشرطه چان ممكن هسه يكون هوَ بيناتنه بس متعاقب على عملته و ماخذ جزاته اذا مثل ما يكول هوَ بالغلط دفعها و وكعت يعني مو متعمد 

جميله:صارت بعد و الله يغفرله ذنبه بس أنتِ فكري عدل 

و احنه وياج بكل قرار تاخذي 

رواسي:ما اعرف الله كريم..

كمت من مكاني و اردفت.. 

رواسي:راح اصعد اخابر ماري اذا رسيم رجع مسك خليها تجيني فوك 

جميله:لتحبسين روحج بالغرفه 

رواسي:لا ما احبس روحي بس اريد اخابر 

عفتها و صعدت فوك لكيت تلفوني يدك.. شلته بيدي شفت اسمه رأساً انطيته رفض بكل عين گويه يتصل النذل الحقير.. دكيت على ماري رأساً جاوبتني مثل العاده 

رواسي:اني گلت ماري بطلت هاي السالفه بس طلعتي بعدج 

عاطت بيه.. 

ماريا:يا ادبسز يا حيوانه يا مطيه و الج عين تتصلين بعد؟ 

رواسي:اني هم احبج والله 

ماريا:تعرفين شكد خفنهه عليج لو متعرفين؟ يا طايحة الحظ 

        

          

                

رواسي:قابل اني گلتلهم تعالو اخطفوني؟ ريلاكس بيبي شبيج 

ماريا:هسه تبدلين و تجهزين روحج راح اجيج اخذج للدكتوره 

رواسي:خليني اتنفس اول 

ماريا:موتي احسن لتتنفسين بلكي تعقلين 

ضحكت و رديت عليها.. 

رواسي:اذا اموت شلون اعقل؟ 

ماريا:يلا بلا كلام زايد تجهزي جايتج اني 

رواسي:تمام 

قبل لا اسده منها اجاني اتصال من رسيم توترت 

و بالغلط رديت عليه بدل ما ارفضه.. عفت الخط مفتوح 

و اخذت التلفون ويايه نزلت بسرعه و حجيت ويه امي.. 

رواسي:ماما اني اخذت قراري 

جميله:بخصوص شنو؟ 

رواسي:ما اريد رسيم طلكوني منه اريد اسافر و اعيش حياتي ويه بنتي بعيد كل البعد عنه 

جميله:متأكده؟ اذا هالمره تتطلكون ماكو رجعه بعد 

رواسي:اي ما اريده اصلاً اكتشفت اني اكرهه  و ما احبه ابد 

جميله:يجي ابوج و احجي وياه و هوَ يتفاهم ويه رسيم

رواسي:تمام اني راح اطلع ماري راح تجي تاخذني 

جميله:طلعي امي تونسي بس انتبهي على نفسج و بقي تلفونج مفتوح 

رواسي:ان شاء الله

رفعت التلفون شفته بعده على الخط، سديته و رجعت صعدت بدلت ملابسي و وكفت كدام المرايه اباوع على روحي شكلي تعبان كلش ذبلانه هوايه.. فتحت علبه المكياج مالتي و حطيت شي خفيف بس اعدل وجهي 

و اخفي التعب من عنده.. رفعت شعري كله و رشيت عطر 

باوعت لروحي ابتسمت راضيه عن النتيجه.. دك تلفوني  ماري رديت عليها.. 

رواسي:هاا حب اجيتي؟ 

ماريا:اي طلعي يلا 

رواسي:يلا ثواني بس 

سديته منها و رهمت جنطه ويه ملابسي حطيت بيها 

اغراضي و تلفوني و نزلت.. سلمت على امي و طلعت 

لكيتها تنتظرني بالسياره بس شافتني طلعت نزلت و اجت عليه.. كفختني على راسي و بعدين حضنتني بقوه و گالت .. 

ماريا:يااا حقيره مشتاقتلج هوايه 

رواسي:اني هم بس وخرييي خنكتيني 

ابتعدت عني و رجعت كفختني على راسي و گالت .. 

ماريا:هناااا ماكوو عقل والله راسج فارغ 

        

          

                

ضحكت و گلت.. 

رواسي:لااا عيب عليج راسي مو فارغ مليان قنادر 

صعدنا بالسياره و حركت.. على لحظه صارت كدامنه 

سياره عاليه سوده كسرت علينه.. داست بريك قوي 

راسي راد ينضرب الا شوي.. باوعتلها بخوف و گلت..

رواسي:رجعييي بككك بسرعه خاف يخطفونه ثنينه سوه 

ماريا:ولججج باعي منو 

درت راسي باوعت فاتح جام السياره و يباوع علينه.. 

فتح الباب مال سيارته و نزل يمشي بكل هدوء 

اجه من جهتي فتح الباب و گال.. 

رسيم:من رخصتج ماري اريد احجي وياها 

ماريا:عادي اخذها اصلاً ما اريدها اني 

ضربتها على رجلها بقوه و عطت بيها.. 

رواسي:قندرههه عليج رأساً بعتيني شكد جبانه أنتِ 

ماريا:نزلي احجي وياه حَبيبتي ما اريد انخطف وراي عرس بعد شهر 

ضحك و رد عليها.. 

رسيم:منو يخطفج بس كوليلي اهد عليهم ما اخلي بيهم عرج صاحي 

رواسي:هذا اختصاصك أنتَ ابو المافيا 

وجه نظراته عليه و كال.. 

رسيم:يلا تعالي 

رواسي:ما اريد احجي وياك متفتهم أنتَ؟ 

رسيم:يلا باباتي لتعاندين 

نترت بي.. 

رواسي:مو ابويه أنتَ، اكره هاي الكلمه لتكولها! 

رسيم:تمام يلا تعالي بس احجي وياج 

ماريا:دروحي شكد تعاندين 

رواسي:ماكو اي كلام يجمعنه بعد كل حجيك ويه ابويه 

راح اتطلك منك ما ابقى على ذمتك 

رسيم:بس هسه احجي وياج 

سحبني من ايدي و نزلني من السياره ما انتظرني حتى 

ارد، سد الباب و گال.. 

رسيم:امشي صعدي وياي يلا 

رواسي:أنتَ تريد اطيح حظك؟ 

رسيم:اوويليي شكد مشتاك للسانج الطويل 

رواسي:خوش 

رسيم:تعاي روسيتي بس اريد احجي وياج والله و بعدها روحي 

رواسي:ماكو شي نحجي بي الي عندي حجيته الباقي عليك لازم تفهمه

رسيم:طلاك ماكو انسييي مستحيل اطلگج 

رواسي:مو بكيفك اتطلك منك و غصب عنك هم 

        

          

                

رسيم:تحبيني أنتِ متكدرين تبتعدين عني 

رواسي:لاااا غلطااان ما احبك ابد اكرهك اني اكرهكك

حضن وجهي بيده ركز نظراته بعيوني و گال.. 

رسيم:باوعي بعيوني و گولي اكرهك حتى اصدكج 

خليت عيني بعينه و بكل ثبات حجيت... 

رواسي:اكرهك رسيم اكرهك للابد المؤبد ذكرى سيئه بحياتي أنتَ 

ابتعد عني و ملامح وجهه بهتت من كلامي.. صعد سيارته بدون ميحجي شي و راح.. رجعت صعدت ويه ماري و حجيت ب استعجال.. 

رواسي:بسرعهه امشيي راح انفجر ترااا 

حركت السياره و گالت.. 

 ماريا:شنو حجيتوا؟ 

رواسي:ميقبل يطلكني النذل ابو النساوين ابو المافيات

ماريا:يعني أنتِ تردين الطلاك؟ 

رواسي:اي ما اريده دمرنييي تعبنيي، متهمه مشاعري ابد 

عباله اذا يبقى هيج راح ابقى وياه ميعرف بهاي سوالفه خلاني اكرهه.. و بكل وقاحه جايني بعد شهور يكلي احبج و تحبيني 

ماريا:من حجيتيلي قصتج تمنيت اذبحج والله، لان أنتِ مو صاحيه عقلج مو بمكانه من حبيتي 

رواسي:اريد اطلعه من بالي و گلبي اسوي كلشي في سبيل اخلص منه 

ماريا:بس تعرفين حتى لو انفصلتوا راح تبقون تتشاوفون بسبب بنتكم؟ 

رواسي:احاول قدر الامكان ما اتواجد يجي يشوفها بغيابي 

او ابقى بغرفتي لحد ما يروح و اذا يريد ياخذها يمهم و يرجعها ما احرمه منها

ماريا:الي الله كاتبه الكم يصير 

بقينه ساكتين و اني اباوع على الطريق ما حسيت شوكت وصلنا.. طبكت سيارتها و گالت .. 

ماريا:يلا نزلي 

فتحت الباب و نزلت بدون ما احجي شي، و هيَ قفلت السياره و اجت ورايه.. دخلنا للعياده انطتهم اسمي 

طلبوا من عدنه ننتظر شوي.. كعدنا سوه ننتظر 

لحد ما صار دوري دخلت اني و هيَ بقت تنتظرني بَره .. 

كعدت ويه الدكتوره و صارت تسئلني اسئله عامه.. 

مثل اسمي و عُمري و اذا متزوجه او لا و شنو الشغلا الي احبها و اكرهها اخر شي گالت ..

_شنو مشكلتج احجيلي بكل صراحه 

رواسي:مجان عندي اي مشكله حياتي جانت حلوه و هادئه عايشه ويه عائلتي يحبوني و يخافون عليه 

كلشي چان حلو و حياتي ورديه.. لحد ما اجه اليوم 

الي غير كل حياتي.. 

_كملي 

رواسي:بيومها جنت رايحه للجامعه مثل كل مره 

بقيت انتظر السايق يجيني و اجه بعد انتظار صعدت السياره بس شفته مو نفس الشخص 

_ليش ما تأكدتي قبل لتصعدين؟ 

رواسي:جنت متأخره و اريد بس الحك لتفوتني المحاظره.. بس من سئلته عن السايق گال مريض و دزه عليه بداله تحجج بالسياره بيها مشكله و وكف بعيد عن بيتنه بمسافه و بلحظه وحده اندار عليه و خدرني 

بقيت احجيلها كلشي صار ويايه و دموعي تنزل بدون 

ما احس.. شلون عذبني و شلون خلاني اصير مدمنه 

و جبرني اتزوجه و شلون اكتشفت ابويه سبب موت امه 

و شلون عافني و سافر و انخطفت بسببه للمره الثانيه

رواسي:برغم كل هذا اني حبيته بس هوَ بقه مستمر بتعذيبي 

اريد اتخلص منه و من كل ذكرياته و كل شي يخصه 

_هذا مو حب بنتي، أنتِ جبرتي روحج تحبي لان شفتي ماكو طريقه للخلاص غيرها حبيتي و تعلقتي بي لان هوَ الوحيد الي چان كدامج و بسبب الخطف أنتِ ما عرفتي 

مشاعرج شنو 

بقينه نحجي اكثر من ساعه و انطتني خطه امشي عليها 

و بالاسبوع مرتين اجيها.. تشكرت منها و طلعت 

هلكانه اريد انفجر.. 

ماريا:هااا شصار وياج؟ 

رواسي:وديني للبيت بعد ما اتحمل 

ماريا:راح يصير ضغط عليج اعرف بس تحملي حتى تتخلصين من كل شي 

رواسي:لتحجين وياي فدوه بس وديني للبيت راسي راح ينفجر.. 

طلعنا من العياده و صعدنا السياره طول الطريق لا اني حجيت و لا هيَ.. بس دموعي تنزل على الصامت.. 

وصلتني للبيت و راحت هيَ طلعت المفتاح من الجنطه 

و فتحت الباب دخلت للبيت و بدون اي كلام صعدت لغرفتي و قفلت الباب.. 

شمرت جنطتي بالكاع و صرت اباوع على الغرفه.. كل زوايه تذكرني بي.. هنا نام و هنا تعارك ويايه 

هنا حركني بالجكاره هنا كلي احبج 

بكل زاويه النه ذكرى سوه.. تهسترت اعصابي صرت ما اعرف شنو اسوي.. هجمت الغرفه هجم كسرت كلشي بيها.. اشمر بالاغراض و اصيح بصوت عالي.. 

رواسي:اكرهك رسيم اطلع من حيااتي دمرتني اطلع! 

امي و ابويه صعدوا على صوتي و صوت التكسير.. صاروا يدكون بالباب يردوني بس افتحه.. وكفت كدام المرايه و صرت اباوع على روحي و عطت بحركه.. 

رواسي:شووفيي روحج شوفيها، هوَ عذبج 

و دمر حياتج انسي طلعي من بالج و گلبج ارجعي عيشي حياتج بدونه ميستاهلج هوَ ابد ميستاهلج 

شلت واحد من العطور من الگاع و شمرته على المرايه 

تطشرت كلها.. كعدت بالگاع مهدود حيلي.. تمددت فوك 

الكزاز الي معبي الگاع و غمضت عيوني.. ما اعرف غفيت لو اغمى عليه.. 

يتبع..