رواية رواسي الدهر الفصل الثامن عشر 18 - بقلم روح الدليمي

 

➰➰➰➰➰➰➰➰➰➰➰

فتحت تلفوني اكلب اشوف شكو ماكو دخلت لستوري رسيم، ناشر صوره من المطار قبل ٤ ساعات 

و كاتب.. "قد لا نعود".. فتحت عيوني على وسعها مصدومه، انفتح الستوري الثاني هدى مسويتله منشن 

هيَ وياه بالطياره و كاتبه "بدايه جديده" و كاتبه اسم الدوله الي مسافرين الها.. 

تهسترت اعصابي صرت افور من العصبيه.. يعني كلامه و وداعه و حجيه كله طلع صحيح مو حتى يجبرني ارجع!!! باوعت لمسك نايمه كلشي ما اكدر اسوي خاف تكعد.. بقيت الوب بمكاني 

عافني و سافر ويه هدى الحمره الحيههه الثانيه..

اني اعلمك رسيم اذا ما اخليك تشتعل شعل ميكون اسمي رواسي.. كمت من مكاني طلعت من الغرفه 

صارت بوجهي امي دتمسح على الدرج.. 

جميله:شو ما نمتي؟ 

رواسي:وين بابا؟ 

جميله:تغده و نام ليش 

رواسي:من يكعد صيحيني، جيبي اني اسوي عنج روحي ارتاحي أنتِ هم.. 

اخذت منها الوصله و صرت امسح بالگاع، طلعت حرگتي كلها بالمسح.. مسحت البيت كله من فوك ليجوه 

اشتغل و دموعي تنزل عشره عشره... 

كعد ابويه و دخل للمطبخ بقه صافن عليه مستغرب

منزله كلشي بالكاونترات و الثلاجه و كلشي طلعته من مكانه و كعدت ارتب من جديد.. 

راشد:منو مضوجج بنتي؟ 

المواعين بيدي شلتن و شمرتهن بالگاع تكسرن 

كلهن.. تراجع ليوره بسبب الكزاز و گال.. 

راشد:شبيجج رواسي شصاير وياج!! 

كعدت بالگاع و حضنت ركبتي و صرت ابجي 

و اشهك بالبجي، حجيت بغصه واضحه.. 

رواسي:عافنيييي رسييممم عافنننيييي بعد ميريدني 

راشد:ماكو هيج حجي كومي منا كومي حَبيبتي 

سحبني من الگاع و اخذني بحضنه، مسح على راسي 

بكل هدوء و اردف بحنيه.. 

راشد:رسيم يحبج ميعوفج 

حجيت و الشهكه شگت بلعومي شگ.. 

رواسي:سافر بابا سافر بدون ميكلي و لا يودعني 

سافر و اخذ وياه هدى و اني عافني ميريدني بعد

 

بعدني عن حضنه يباوعلي مستغرب و گال.. 

راشد:وين سافر شوكت؟؟ 

رواسي:هوَ و الحيهه الحمره رايحين لل*** اليوم

راشد:مستحييل! شلون يسوي هيج و هوَ يعرف الوضع شنووو؟؟؟ 

حجيت ب استغراب.. 

رواسي:يا وضع شكو ليش

راشد:خلي افتهم السالفه اصبرييي 

عافني و طلع من المطبخ باوعت للكاع لازم ارجع الم

 و انظف الكزاز، استسلمت و كعدت الملم و اعزل من جديد.. 

مرت فتره و ماكو اي خبر عن رسيم ادزله ميرد عليه 

و لا يفتح رسائلي ابد.. اسأل اخوانه ميعرفون عنه اي شي 

كلنا عايشين بقلق على رسيم و وين اختفى 

راسلت هدى اكثر من مره جانت تشوف رسائلي بدون مترد عليهن، و هالشي چان يذبحني ذبح 

هيَ وياه و تعرف شلونه و اني مرته كلشي ما اعرف عنه! 

الشغل تركته و صرت ما اداوم بطلب من ابويه ماعرفت شنو السبب.. كل وكتي بالبيت ويه اهلي و بنتي 

نفسيتي تدمرت تعبت و تمرضت كلش 

امي حايره بيه و ببنتي، رشا و عذراء كل فتره يجون 

اغير جو وياهن شوي و بس يروحن ارجع لحالتي.. 

دِلهَام الوحيد الي چان يخفف عليه وحشتي و يغير نفسيتي 

بكلامه، صار قريب مني كلش بحيث ماكو يوم 

يمر اذا ميتصل عليه و يبقى يسمعني ساعات بدون ملل 

مشاعري تجاهه صداقه و اخوه بس ماكو غير شي.. 

شهور مرت و احنه نفس الوضع كلشي ما اعرف عن 

رسيم... اجه عيد ميلاد مسك و جهزتلها حفله بسيطه بيناتنه، البنات كلهن اجن و بيت عمي و عزمت دِلهَام هم اجه هوَ و ماري 

صارت حفله حلوه و تونسنا بيها، بس راحوا الكل عزلنا البيت اني و امي و اخذت مسك نومتها و نمت من التعب.. 

كعدت ثاني يوم مخنوكه كلش و گلبي يأذيني

طلعت من غرفتي و نزلت جوه شفت ابويه گاعده

يتفرج بالتلفزيون، رحت كعدت يمه و حجيت.. 

رواسي:بابا 

راشد:نعم حَبيبتي 

رواسي:اريد اطلع ويه البنات صار هواي متخلوني اطلع لمكان وحدي 

راشد:خلي هنَّ يجن يمج رواسي متطلعين 

رواسي:اريييد افهم ليش متخلوني اطلع صار فتره محبوسه بالبيت مو حاله هاي!! 

راشد:اخاف عليج روسيه، ما اريد ترجعين تتأذين 

رواسي:صاير شي؟؟ 

        

          

                

باوع بعيوني و بقه ساكت، اردفت بعصبيه.. 

رواسي:احجييي باااابااا فهمني 

راشد:ماكو شي

رواسي:لعد خليني اطلععع ليش حابسني بالبيت حتى شغلي خليتني اتركه! 

نزلت امي من فوك و اجت يمنه باوعتلها و حجيت.. 

رواسي:ماما الله يخليج احجي وياه اريد اطلع ميقبل 

جميله:خليها تطلع راشد ما عليها شي 

نتر بينه.. 

راشد:گلت لاااا لتلحون! 

بجيت و حجيت بخنكه مكتومه.. 

رواسي:الله يخليك بابا اروح لماري بيتهم قريب، طكتتت روحي تراا حسوا بيه

راشد:خلي هيَ تجي يمج مثل كل مره مو الا أنتِ تروحين 

جميله:وديها أنتَ و امن عليها و ارجع 

باوعت لابويه و حجيت بتوسل.. 

رواسي:الله يخليك بابا والله راح انفجر 

راشد:اني اخذج و من تكملين تخابريني اجيج و ممنوع تطلعون الاي مكان فهمتييي!! 

رواسي:تمام 

راشد:روحي بدلي انتظرج 

رحت بسرعه خابرت ماري بلغتها انو راح اجيها و بدلت ملابسي و جهزت اغراض مسك و بدلتلها و نزلت جوه.. كام ابويه من مكانه امي گالت .. 

جميله:خلي مسكه يمي تونسني روحي أنتِ 

رواسي:مو البنات يردون يشوفوها 

جميله:البارحه شافوها خليها يمي و روحي تونسي أنتِ غير جو 

نزلت جنطه مسك و باوعتلها و حجيت.. 

رواسي:ماما عادي اروح اني و تبقين يم بيبي تلعبون سوه؟ 

هزت راسها و گالت .. 

مسك:اي 

بستها من راسها و امنت امي عليها و طلعنه.. 

وصلني لبيت ماري و الطريق كله هوَ يوصي بيه انو ما اطلع لمكان.. ما فهمت الحرص الزايد هذا على شنو! 

نزلت من السياره و دكيت الجرس.. بقيت انتظر شوي 

و فتحلي دِلهَام الباب.. 

دِلهَام:يا هلاا و مية هلا برواسي تفضلي..

دخلت للبيت و كلت.. 

رواسي:هلا بيك شلونك؟ 

دِلهَام:عايش و الحمدلله أنتِ شلونج بعدج مقهوره 

رواسي:الله كتبلي ابقى مقهوره من يوم الي خطفني بي 

دِلهَام:بعده ما يرد عليج 

هزيتله راسي ب "لا" و حجيت.. 

رواسي:ماري وينها؟ 

        

          

                

دِلهَام:راحت للماركت هسه تجي تعاي نكعد نبقى واكفين شنو 

رحنه كعدنا بالصاله باوعلي و گال.. 

دِلهَام:رواسي اريد احجي شي بس لتفهميني غلط 

رواسي:شنو صاير شي؟ 

دِلهَام:ليش متطلكين و تعيشين حياتج، يعني اذا هوَ عافج و سافر حتى بدون ميكول و لا يرد عليج و لا تعرفين اخباره شكو باقيه على ذمته لحد هسه صارله ٧ شهور مختفي و محد يعرف عنه شي

رواسي:سويتها مره ما اسويها مره ثانيه، خايفه عليه دِلهَام تعرف هوَ بي كانسر ليل نهار افكر بي حتى بعز فرحتي ببنتي مكسوره عليه 

خانتني دمعتي و نزلت اردفت.. 

رواسي:ما اعرف بي عايش لو ميت التفكير ذبحني ذبح 

و اخوانه كل ما اسئلهم يكولون منعرف شي بس ما مقتنعه 

دِلهَام:لتبجين عيونج على شخص عافج 

رواسي:مو بيدي دِلهَام مو بيدي، اول مره احب بحياتي 

و حبيت منو؟ حبيت الشخص الخطفني و عذبني

و لحد هاي اللحظه هوَ مستمر بتعذيبي 

دِلهَام:مثل ما عافج و راح و كطع اخباره عنج، أنتِ هم عوفي عيشي حياتج و انسي خلي يولي لتفكرين بي رواسي شايفه روحج شلون ذبلانه؟ 

رواسي:ما رايده شي والله غير بس اعرف انو هوَ بخير.. 

بس اريد اعرف اذا چان عايش او لا كلشي ما اريد 

دِلهَام:طز بي طز بي اذا هوَ مو سائل عنج أنتِ سوي نفسه و لتهتمين اله، عايش ميت ليهمج خلص هوَ اختار 

هذا الشي 

رواسي:و بنته شنو ذنبها؟ بدل ما تكبر بين امها و ابوها 

بنتي دتكبر بدون ابوها لو ما ابقى اشوفها صوره و اكوللها هذا بابا يمكن اذا تشوفه متعرفه 

دِلهَام:براحتج رواسي ابقي فكري بي و تعذبين روحج علموده و هوَ اصلاً ميريدج 

كام من يمي و عافني وحدي، بقيت ابجي قهر و خوف 

على رسيم.. سمعت صوت ماري تصيح ب اسمي 

مسحت دموعي و گلت.. 

رواسي:هياتني بالصاله حَبيبي 

اجت يمي حضنتني و گالت .. 

ماريا:ليش باجيه منو وياج؟؟ 

رواسي:ماري راح امووت من الخوف والله 

خايفه على رسيم اريد بس اسمع عنه اي شي يطمني  

و اعرف انو هوَ بخير حتى لو بعيد عني 

حجت بعصبيه...

ماريا:همم رسيم! متملين أنتِ فهميني

رواسي:خلييي روحج بمكاني شتسوين؟ تخيلي ادم يتركج أنتِ و بنتج و يسافر بدون ميكلج و يكطع كل تواصله وياكم و يعوفج بحيرتج و خوفج 

و أنتِ تعرفين هوَ مريض!

        

          

                

ماريا:بكل سهوله اعوفه مثل ما عافني اتطلك منه اخلعههه ما ابقى على ذمته و هوَ فضل وحده ثانيه عليه و اخذها و سافر وياها للخارج 

رواسي:ما اكدر اسوي هيج اني ما اكدر

ماريا:خلييج هيج أنتِ تتأذين مو غيرج، صيري قويه 

لتبقيين بهل طيحان حظ هذا دوسي على گلبج بالقندره و انسي 

كامت من مكانها و اردفت ب امر.. 

ماريا:مسحي دموعج لا اطيح حظج هسه! البنات راح يجون بعد شوي جايه تتونسين لو تبقين بس تبجين 

عافتني و اخذت الاغراض للمطبخ، مسحت دموعي 

و رجعت دخلت للانستا اشوف بلكي منزل شي 

بس هم ماكو.. شمرت تلفوني بعيد عني و كمت للمطبخ اشوف ماري... 

رواسي:شدتسوين؟ 

ماريا:اذا متنسين رسيم ممنوع تحجين ويايه رواسي 

رواسي:براحتج 

طلعت من المطبخ اخذت اغراضي و طلعت من بيتهم 

تمشيت لحد الشارع اريد اخذ تكسي ما خابرت ابويه 

ما اريد ابقى اكثر.. بقيت واكفه انتظر تمر تكسي.. 

على غفله انضربت على راسي من وره و وكعت مغمي عليه بالگاع.. 

حسيت على هوا بارد يضرب بجسمي.. فتحت عيوني 

باوعت حواليه اني وين؟ شجابني لهنا؟.. 

حاولت اكوم من مكاني باوعت على روحي رابطين رجلي بالجربايه.. الخوف احتلني الرجفه سرت بكامل جسمي.. عطت بصوت عالي.. 

رواسي:تعالوووو طلعوووننيييي منااااا 

انفتح باب الغرفه و دخل باوعلي و گال.. 

حيدر:صح النوم يا حلوه 

رواسي:ويننن رسيييممم ليش خطفنييييي؟؟؟؟ 

حيدر:مو رسيم روسيه 

تقرب عليه كعد كدامي ثاني ركبته مد ايده على شعري

ضربت على وجهه بقوه و عطت بي.. 

رواسي:اذاااا تطخنيييي اكسررر راسككك حيوواااان 

ضحك بخبث و گال.. 

حيدر:رسيم وين؟ 

رواسي:ما اعرف 

عاط بيه.. 

حيدر:تعرفين رواسي احجي رسيم وينه؟

رواسي:غبي أنتَ؟ متفهم؟ مو دا اگلك ما اعرف 

حيدر:تمام أنتِ جبتيها لنفسج 

كام من مكانه و فر وجهي براشدي و صار يجيني واحد وره اللاخ.. كسرني تكسر بس ما بجيت و لا عطت 

ما نطقت بحرف واحد ابد.. مستحيل اخليهم يشوفوني اتعذب مستحييل.. ابتعد عني و عاط .. 

        

          

                

حيدر:احجي رسيم وين!

رواسي:رسيم عافنييي كلشي ما اعرف عنه، خاطفين الشخص الغلط انتو المفروض هدى تنخطف هيَ تعرف بي وين 

حيدر:لتكذبين و احجي، هدى مسافره عدها شغل بالخارج راحت تكمله  

رواسي:خوش ضاحكه عليكم سافرت هيَ و رسيم و كل شي ما اعرف عنهم صار كم شهر اي خبر ما اعرف عنه 

ضرب راسي بالجربايه و طلع من الغرفه.. نزلت دموعي 

الم و قهر.. لشوكت ابقى اتعذب؟ كل عذابيي من رسيم 

كلشي يصير ويايه هوَ سببه.. يارب طلع حبه من گلبي 

و لتخليني اتعذب اكثر.. 

بقيت ابجي بدون انقطاع لحد ما تعبت و غفيت بدون 

ما احس على روحي.. حسيت على ايد تلعب بشعري 

فتحت عيوني لكيته گاعد يمي و ايده بشعري 

فزيت و نهضت روحي من مكاني و عطت بي.. 

رواسي:ياا نذل وخر عني 

حيدر:حلوه و أنتِ نايمه حظك حلو استاذ رسيم 

رواسي:قندره عليك و على رسيم الله ياخذكم 

حيدر:مراح تحجين وينه؟ 

رواسي:قندره عندك مو دماااغ، گتلك ما اعرف اي شي عنه ياااا غبي متفهم 

مد ايده على وجهي و صار يتلمس بشفايفي، درت راسي 

ابعد ايده عني و حجيت بصياح.. 

رواسي:وخررر عني لتطخني حيواان 

حيدر:خلي نتونس بيناتنه محد راح يعرف 

تفلت بنص وجهه و عطت بي.. 

رواسي:أنتَ عاجبككك يطيح حظككك يا **** 

جرني من شعري بقوه و ضربني على وجهي، قرب روحه عليه اكثر و همس ب اذني بتهديد.. 

حيدر:اذا رسيم ميرجع صدكيني اموتج بيدي 

رواسي:موتني و خلصني هسه لان رسيم مراح يرجع

هوَ عافنه و عاف كلشي و سافر ويه هدى 

حيدر:اذا طلعتي تكذبين علينه، اخليج هنا تتعذبين 

و كل يوم اني و كل الموجودين نغتصبج لحد ما تموتين جوانه عود خلي رسيم يفيدج 

عافني و كام من يمي 

رواسي:نذل **** 

ضحك مستهزء و طلع من الغرفه.. 

بقيت ٤ ايام محبوسه لا اكل و لا شرب.. بس ضرب 

و تعنيف هدو حيلي هد ايدي صرت ما اكدر ارفعها 

كل بالي و تفكيري ببنتي شلون حالتها بدوني؟ 

و رسيم معقوله ما وصله خبر انو اني مخطوفه؟ 

معقوله عرف و عافني يمهم اتعذب و هوَ يعرفهم شنو! 

        

          

                

باليوم الخامس كعدت على صوت صياح و طلق بدون توقف.. نزلت دمعتي و دعيت ربي اتوسل بي.. 

رواسي:يارب خلصنيي منهم تعبت ياربي ما الي غيرك 

يارب يعرفون مكاني و يطلعوني مناا..

بقت الاصوات و الطلق مستمر بدون توقف.. سمعت صوت قفل الباب ينفتح رفعت عيوني و باوعت على الباب انفتح و دخل عليه.. 

صورته صارت تروح من كدامي شوي شوي 

و السواد صار بكل مكان سمعت صوته يحجي ويايه 

بس لا كادره احجي و لا كادره افتح عيوني.. 

رسيم:روسيتي بابا تسمعيني؟؟ اجيتج اني 

حسيت عليه شالني و گال.. 

رسيم:والله اندمهم على كل شي سوو بيج والله، انتهى كلشي لتخافين 

استسلمت سحبت نفس قوي و بعدها ما حسيت 

على شي... ما اعرف شكد بقيت غايبه عن الوعي 

فتحت عيوني باوعت حواليه اني بالمستشفى.. 

كل جسمي يأذيني و راسي ثكيل مابيه ارفعه.. 

صارت عيني على الباب لما انفتح و دخل رسيم

ممصدكه وجوده كدامي عبالي جنت احلم! 

اجه كعد يمي و ينظرلي بخوف.. 

رسيم:شلون صرتي روسيه؟ 

درت وجهي عنه و بقيت ساكته اردف.. 

رسيم:متردين تحجين ويايه حقج بس طمنيني عنج شنو سوولج؟ 

بالكوه رفعت ايدي اشرت على الباب و حجيت 

بصوت هادئ تعبان.. 

رواسي:اطلع بَره ما اريد اشوفك ابد 

رسيم:بس تعرفين السبب متأكد تعذريني 

رواسي:ميهمني اطلع بَره و خابر اهلي يجون 

غمضت عيوني ما اريد اشوفه و اضعف و انسى كلشي 

مريت بي بسببه.. بقه يحجي ويايه و يحاول بس التزمت الصمت و ما نطقت حرف بعد.. 

رسيم:حَبيبتي بس احجي ويايه جاوبيني، شنوو سوولج؟ اذوج بشي؟؟ 

اخذ ايدي بيده و اردف.. 

رسيم:احبج والله ابتعدت عنج علمودج أنتِ، ردت تتعودين على غيابي اذا متت.. رواسي جاوبيني الله عليج 

بقيت مسيطره على روحي و على دموعي و ما بجيت.. 

مل مني و كام من مكانه طلع من الغرفه.. فتحت عيوني 

و دموعي عرفت طريقها و صارت تنزل بدون توقف 

بقيت ابجي لوقت طويل جايني بعد شهور غياب يكلي احبج، يااا حب هذا ياااا حب!  عافني شهور بدون حتى ميسئل عليه و بالتالي انخطفت لان يدوروله 

و هوَ مرتاح ويه هدى بالخارج.. 

اندكت باب الغرفه مسحت دموعي و غمضت عيوني

انفتح الباب و اجاني صوته فتحت عيوني باوعتله 

و عيوني مغوركه دموعي متقبل توكف.. 

اجه يمي يتفحص بيه و گال .. 

        

          

                

دِلهَام:رواسي؟؟؟ هاي شصاير بيج شمسوين بيج فهميني !!  

رواسي:خابر ابويه خلي يجي فدوه تعبانه كلش 

دِلهَام:احجي رواسي شنو مسوين بيج بعد؟ 

رواسي:ماكو شي بس خابر ابويه يجيني اريد اطلع منا 

دِلهَام:تعرفين الي خطفج منو؟ 

رواسي:الي يشتغل وياهم رسيم 

دِلهَام:هوَ خطفج و سوه بيج هيج؟؟؟ 

رواسي:لا خطفوني حتى يجبروا يرجع لهنا و عبالهم اعرف مكانه وين 

دِلهَام:و رجع؟ 

رواسي:هوَ جابني لهنا ما شفته؟ 

دِلهَام:لا 

طلع تلفونه من جيبه و اتصل على ابويه، سمعنه صوت دكة التلفون بباب الغرفه.. انفتح الباب و دخل ابويه مفزوع اجه عليه صار يتفحص بيه و نظراته كلها خوف و قلق راد يحجي قاطعته.. 

رواسي:قبل لتسئل كلشي مابيه ما سوولي شي بس طلعني منا الله يخليك اريد اروح لبنتي 

راشد:كتلجج لتطلعين و وصيتج تخابريني اني ارجعج ليش هيج رواسي ليش تعاندين؟! 

رواسي:عوفوني بحالي لحد يحجي ويايه اريد بس ارجع للبيت يم بنتي اخذني عليها گلبي مشتعل نااار اريدها 

دِلهَام:بس نتأكد من وضعج و نطلعج صارلج ايام بدون لا اكل و لا شرب 

رواسي:ما اريد ابقى اكثر هسه يجي رسيم ما اريد اشوفه طلعوني منا لتبقوني 

راشد:رسيم متخبل عليج رواسي صار ايام حتى نوم مينام 

يريد بس يعرف مكانج، مو بس هوَ كلناااا صار فتره تجينه تهديدات اذا ميرجع رسيم يذبحوج أنتِ و بنتج 

رواسي:ياريت يذبحوني و اخلص من هاي الدنيا كلها 

اروح يم ربي هوَ ارحم بيه منكم كلكم 

راشد:اسم الله عليج شنو هذا الحجي متعرفين شنو حالتنه جانت بغيابج، امج نامت طريحه بالفراش من خوفها عليج 

اني و رسيم ليل نهار ندور عليج... ما قبل ندخل الشرطه بالموضوع لان خطر عليج 

رواسي:ميهمني اي شي و لحد يجيب اسمه كدامي بعد ابد 

دِلهَام:محد يجيب اسمه كدامج بعد بشرط تبقين هنا اليوم 

بس شوي يصير بيج حيل 

عطت بيهم.. 

رواسي:طلعوني منا ما اريد ابقى 

راشد:تمام بس اهدي و على كيفج ويه روحج

        

          

                

طلع دِلهَام و راح وراه ابويه بقيت وحدي و رجعت 

لنوبه البكاء.. اعصابي تهسترت صرت الوب بمكاني 

شوي و دخل دِلهَام لما شاف حالتي صاح على الممرضه 

طلب منها ابره مهدئ و اجه عليه ثبتني من ايدي 

و گال بهدوء يحاول يهديني... 

دِلهَام:رواسي باعي بعيوني 

ركزت نظراتي بعيونه و دموعي مستمره تنزل اردف.. 

دِلهَام:اهدي كلشي راح يكون بخير اني يمج ما اعوفج 

رواسي:اريد اموت تعبانه كلش 

دِلهَام:اسم الله عليج، أنتِ قويه و راح تتخطين كلشي 

صعبه عليج عشتي نفس الشعور مرتين اذيتج نفسيه اكثر من ما تكون جسديه و اني مستحيل اعوفج وحدج اساعدج تتخطين و تتخلصين من كل شي بس خليج هادئه 

دخلت الممرضه اخذ منها الابره و گال.. 

دِلهَام:روحي يلا ساعدي ابوها يكمل اوراق الخروج 

_تمام 

طلعت و هوَ ضرب ابره المهدئ بالمغذي، كعد يمي 

على طرف السرير و گال.. 

دِلهَام:شنو تردين اسويلج؟ 

رواسي:رجعني للبيت 

دِلهَام:هسه بس يخلص المغذي اني اخذج وعد غمضي عيونج و ارتاحي 

رجعت راسي على المخده و غمضت عيوني بس دموعي 

ما وكفت ابد.. مرت فتره حسيت على صوت ابويه يكعد بيه.. 

راشد:روسيه بابا يلا كومي نرجع للبيت 

فتحت عيوني بكسل احس جفني ثكيل ما اكدر افتح عيوني 

عدل.. ساعدني كمت من مكاني سندني و طلعنه من المستشفى.. ما اعرف شلون وصلنا للبيت بالي مو وياي 

نزلت من السياره و دخلت للبيت استقبلتني امي بالبجي و اخذتني بحضنها بقت تبجي و هيَ حاضنتني 

و تلوم بروحها لان قنعت ابويه يخليني اطلع.. 

ابتعدت عن حضنها بدون ما احجي شي و صعدت لغرفتي.. قفلت الباب عليه و فتت بفراشي بدون ما ابدل ملابسي حتى و التجأت للنوم.. 

ايام مرت و اني نفس حالتي حبست روحي بالغرفه 

حتى بنتي ما شفتها.. يجون يدكون الباب عليه لحد ما يملون و يعوفوني و يروحون.. 

بيوم نايمه مثل عادتي بدون لا اكل و لا شرب مكضيتها بس بجي و نوم.. اندكت باب الغرفه عطت بصوت عالي.. 

رواسي:عوفوني بحالي 

اجاني صوته من وره الباب.. 

رسيم:فتحي الباب روسيه والله گلبي مشتعل نار عليج 

رواسي:روح منااا ما اريد اشوفك روح 

رسيم:فتحي الباب حَبيبي خليني اشوفج اريد احجي وياج 

رواسي:طلكني و روح ما اريدك 

رسيم:بس افتحي الباب و كل شي تردي يجرالج 

بالگوه كمت من مكاني فتحت قفل الباب و رجعت بمكاني.. دخل للغرفه صار يباوع على حال الغرفه 

مظلمتها فد مره راح على البرده فتحها و فتح شباك الغرفه و شغل الاضويه و اجه يمي سحب الغطه عني و گال.. 

رسيم:كومي وياي 

رواسي:عوفني بحالي كل عذابي و دماري أنتَ سببه روحح مناا اذبح روحي والله 

رسيم:اسمعي مني و بعدين احكمي روسيه، فراگج ابد مو هين تعذبت بدونج هوايه و بكل لحظه جنت اتمنى وجودج يمي 

حطيت ايدي على اذني و صرت اغلط عليه بصوت 

عالي حتى ما اسمع كلامه.. قرب عليه اكثر و لزم ايدي نزلها بقيت مستمره اغلط عليه و هوَ بس يريدني اسكت 

رواسي:حقير نذل الله ياخذك رسيم الله ياخذك دمرتني أنتَ دمرتني 

سحبني عليه و طبع بوسه قويه على شفايفي سكتني بيها

ابتعدت عنه و ضربته على وجهه راشدي و عطت بي.. 

رواسي:منو سملحك تبوسني ادبسز 

رسيم:مشتاقلج روسيه 

رواسي:تشتاقلك نار جهنم يارب شتريييد مني روح منا

رسيم:مرتي الحلوه ميت عليج اني 

رواسي:قندره خوش مو مرتك اني مو مرتك 

رسيم:اي هسه زين صار ساعه اگول وينها القندره ما طلعت عبالي تأدبتي 

رواسي:روح منااا لا اكطعع عليك القندره من صدك 

رسيم:هيج تحبيني معقوله؟ 

رواسي:طلكنيي رسيم 

رسيم:اي هسه لو فد شوي؟ 

رواسي:لتستهزء گتلك طلكني ما اريدك ما احبكك اكرهك اني اكرهك 

رسيم:متأكده؟ 

رواسي:ايي طلكني يلا 

رسيم:تمام براحتج مثل ما تردين

كام من مكانه باوعلي و گال.. 

رسيم:أنتِ ....