رواية ذنوب على قيد الغفران الفصل الثامن عشر 18 - بقلم براء
ذنوب على قيد الغفران
#ذنوب_على_قيد_الغفران
#البارت_الثامن_عشر
غنى : مسحت دموعي وركزت ويه فهد جان ديخابر سد موبايله ورجع مدري المن خابر
فهد : الوو يمه
ايمان : الو هاا يمه الله يساعدك ليش لسه مااجيت انتظرتك على الغده لسه ماتغديت
فهد : بأسف ما اكدر ارجع يمه اجاني امر من المسوؤل ولازم اطلع خفاره
ايمان : امر ؟ زين وين راح تروح وشوكت ترجع
فهد : للبصره فتره وارجع لتخافين يمه
ايمان : زين شعجب اول تالي انت تروح خفارات هيج طويله وشكد راح تبقه
فهد : هاي بعد الشغل يحتم علينه المهم اني ما اريدج تشيلين هم احاول اول مااخلص خفاره ارجع
ايمان : هسه انت وينك
فهد : جاي اسوق طلعت للبصره
ايمان : زين انت لا اخذت ملابس وياك لا اكلت شي شلون بيك يمه
فهد : لتشيلين هم ادبر روحي ... يله يمه اني اترخص لان جاي اسوق وهاا ما اوصيج شتحتاجين الخزنه تعرفين رمزها شتردين سحبي منها المبلغ الي تردي وصرفي وهم كلي لعلي خلي يوصل اروى كل يوم مو يخليها تروح وحدها تره اطيح حظه وخلي يدير باله عليكم لبين ماارجع
ايمان : يبعد كلبي كلبك دومك شايل همنه لتخاف حبيبي اني شحتاج مااتردد اخذ ... يله روح انت جاي تسوق مايصير تخابر وتسوق ديربالك على نفسك
فهد : ماشي يله مع السلامه سديت الموبايل لكيت غنى صافنه بوجهي ... هاا خير
غنى : شنو مترجع لبيت اهلك
فهد : هاا ابشرج راح اقيم هنا لمده غير معلومه
غنى : شلون شلون
فهد : بهدوء مثل ماسمعتي
غنى : وعلى اي اساس تبقه هنا
فهد : على اساس انو نفرض عليه ابقه بالمكان الي اني بي وهاي اوامر من فوك ولسوء حظي اني هنا وانحبست يمج وبعد مااكدر اطلع منا لمن تخلص الشغله الي ابالي
غنى : كمت ... انت صدوك تحجي شلون تبقه هنا مو علساس شويه وتروح وبعدين اني شعليه بشغلك مشكلتك هاي
فهد : هم نزل ويدبج على السطح ... انتي ملاحظه انو هذا بيتي يعني ابقه اروح بكيفي مو انتي تحاسبيني
غنى : يافهد اعرف هذا بيتك بس محلتلك الكعده غير هسه
فهد : شسوي اذا انتي وجهج فكر كلما اشوفج تصيرلي مشكله
غنى : تره انت الي تجيني مو اني اصلا مااعرف ليش احسك دتجذب ولا اكو شغل ولا بطيخ بس انت تريد تبقه هنا
فهد : بعصبيه تره اني ما ميت عليج لو ما مجبور ما ابقه هنا ولا اكابلج بس شغلي يحتم عليه ابقه هنا والا اني مستحيل ابات يمج ليله وحده ... كتلج الف مره وارجع اكلج نظرتي الج نظرة اخو لاخته وعمرها ماراح تتغير وانتي اخر وحده ممكن افكر بيها تفكير يتجاوز الاخوه فبطلي هالتفكير لا انتي ملكه جمال الكره الارضيه ولا اني الحيوان ومااكدر اسيطر على نفسي كدامج
غنى : عافني وراح للغرفه الثانيه ... طب وسد الباب بقوه .... كعدت هسه شجايه اني شبيج غنى فوك ما الرجال فضل عليج وخلاج ببيته تحاجي بهالاسلوب اني من شوكت جنت وقحه طول عمري احترم واقدر الكل حتى الي يأذيني اكتفي بانو ابتعد عنه لعد شبيه ويه فهد الرجال كلشي ما سوالي بالعكس شايل همي ومتحمل مسوؤليتي وبالنسبه لتصرفاته فهاي حياته وهو حر اني شكو بي ... كمت اني لازم اعتذر منه تصرفي كان جدا غلط اصلا عيب احاجي هيج لاهو بكدي ولاغلط بحقي ... دكيت الباب مارد ... فهد راح ادخل فتحت الباب لكيته متمدد بس باقي بالنطرون والفانيله الداخليه السوده ... احم فهد عادي نحجي
فهد : لا رد
غنى : تقدمت وكفت كباله فهد اني اسفه اعرف ضوجتك بكلامي وجنت فضه وياك زياده عن اللزوم اعذرني والله مجان قصدي بس اني من اصير عصبيه اضل اخبص بالحجي
فهد : بهدوء انتي قليله ادب
غنى : فعلا اني اسلوبي كان بي قله احترام واعتذر منك اتمنى تنسى انت مو تكول اني اعتبرج مثل اروى و ورده اعتبرني غلطت واجيت اعتذر منك ...... وهذا بيتك تريد تبقه تريد تروح انت حر حتى اني اطلع اذا انت متريدني ابقه .... صدكني عمري محنسى الي سويته ويايه بس اني بنيه وصعب عليه اتقبل وجود رجال غريب ويايه بنفس البيت
فهد : غنى اني راح ابقه هنا لمده غير معلومه ... يعني راح اكابلج واكعد واني عصبي وما اتحمل تصرفاتج صدكي واعتقدي بالله اذا دستي بطني اغسل الشقه بشعرج والله
غنى : شنو رأيك نعقد هدنه
فهد : ذكرتيني بصلح الحديبيه ... اي احجي
غنى : خلي نتفق انو منتعارك نهائيا بهالفتره منا لحد متروح اني احاول اتحملك وانت هم
فهد : وتقنعيني انو انتي راح تصيرين حمل وديع بهالفتره
غنى : فهد انت متعرفني اني مسالمه جدا وهاي حقيقه بس مرات الظروف الي نمر بيها تجبرنه نصير اعصاب ولو على اقل سبب كان
فهد : واضح انج مسالمه من لسانج الي بطول النعال
غنى : انقهرت من كلامه ... اشكرك هذا من ذوقك عفته واجيت اروح
فهد : تعاي اني موافق على هدنتج هاي ... مديت ايدي
غنى : باوعت لايده ... اعتذر ما اصافح زلم
فهد : جريت ايدها وكمت ... همست يم اذنها لتنسين انتي ما محرمه عليه ضغطت على ايدها وعفتها ... اني جوعان شمسويه غده
غنى : باوعت لأيدي وباوعتله ... ممسويه غده
فهد : يعني انتي ماعندج كل مميزه لا انثى عليها العين ولا ام بيت عليها العين ولا شخصيتج عليها العين انطيني شي واحد يبهرني بيج
غنى : بهدوء اولا اني لان وحدي مو دائما اطبخ لان كولشي الجان اكل وثانيا الانوثه انت فاهمها غلط مو شرط اتموع واتصنع شخصيتي حتى اصير انثى وثالثا شخصيتي عاديه جدا مثلي مثل غيري محد شخصيته مميزه الا ماندر يافهد ورابعا واخيرا لا اني حكدر ابهرك بشي بيه ولا انت لان لا اني اهتملك والعكس صحيح وهسه حروح اسوي غده
فهد : باوعت لظهرها .... لسانها متر ونص متعرفها هادئه مدري صلفه ... باوعت لروحي لازم ابدل ملابسي واسبح احس روحي مختنك فتحت كنتوري همزين عايف لروحي جم تراك هنا للضروره ... اخذت تراك ودخلت للحمام اسبح
غنى : طلعت تمن حسوي تمن احمر ماكو غير هالاكله تتسوه بسرعه وهذا اذا اتأخر يمكن يعتقلني ... وكفت اسوي حسيت الحجاب خنكني بودي انزعه بس ما اكدر صحيح مو حرام هو بس اني نفسيتي متتقبل .... باوعت لفهد دخل للمطبخ لابس ملابس غير الي اجه بيهم ... بهدوء منين جبت هالملابس
فهد : عايف جزء من ملابسي هنا للضروره .... شجاي تسوين
غنى : تمن احمر ... تحبه ؟
فهد : ماكو داعي تطبخين لو كايلتي جان طلبت اكل من بره
غنى : الثلاجه متروسه اكل ماكو داعي تصرف
فهد : ابتسمت وكفت يمها مديت ايدي موخر الشال عنها
غنى : بعصبيه هاي ليش
فهد : لتتقيدين بوجودي اخذي راحتج كتلج اول وتالي مو حرام تبقين هيج كدامي
غنى : بس
فهد : يله خلصي الغده تره جوعان اريد اتغده وانام
غنى : ضليت ساكته شريد احجي كملت التمن وعفته يستوي ... رحت سويت زلاطه ركض ركض وطلعت روبه خليتها بطاسه شفت التمن استوه صبيته وخليت الزلاطه والروبه وطلعت خليت الصينيه كباله .... تفضل اعذرني من التقصير سويت الاكل بسرعه بسرعه بس ان شاءالله من باجر اطبخ
فهد : عينه على شعرها ... بهدوء لا عادي عاشت ايدج
غنى : اذا خلصت صيحلي اني حروح اصلي تأخرت صلاتي من وره ناس
فهد : الناس تريد تتغده روحي تعبدي بالغرفه
غنى : طبيت للغرفه سديتها رحت بسرعه توضيت وصليت وكعدت اقره قران رفعت ايدي يارب ارحمني ووفقني بحياتي ومشيني على الطريق الصحيح دائما وابعد كل شر عني ياالله كملت صلاه كمت لفيت شعري الي كارهته بس مااكدر اكصه ... طلعت من الغرفه لكيت الصاله فارغه وهدوء .... طبيت للمطبخ شفت المواعين مغسوله ومحطوطه على السنكي ابتسمت والله وطلع يعرف يشتغل هالفهد لا وخوش يجلف ... رجعت كلمن لمكانه ورحت انام ورايه كومه دراسه
_________________
سعاد : اكول ايمان فهد وينه
ايمان : اجاا انذار بالشغل وماراح يرجع
سعاد : باوعت لبتول هو كلج
ايمان : اي خابرني الظهر كلي
سعاد : اكول ايمان من جن فهد هالفتره هواي يختفي
ايمان : قابل هو بكيفه عنده شغل واجاا امر هو والضباط الي شلون يكلهم لا
سعاد : وانتي مصدكه
ايمان : وليش ما اصدكه يعني
سعاد : اجيت احجي بس سكتت .... اقصد شعجب اجه الامر فجئه غير يبلغوهم قبل بوقت
ايمان : هاي بعد صارت شغله مستعجله كمت يله من رخصتج
سعاد : كمت صعدت فوك .... يمه احس كلبي واج نار متأكده هالفهد ماعنده واجب ياخوفي تطلع عنده وحده ساعتها كل مخططاتي تخرب من جانت بتول بالمتوسطه واني ازرع افكار براسها ... فهد الج ... فهد راح يتزوجج فهد وفهد وفهد .... لمن خليتها تحبه وتفكر بي بس الي جنت غافله عنه انو اخلي فهد يلتفت لبتول هم بس للاسف هو حتى بوجها ميباوع وشلون بيه ما ادري اني اريد فهد يتزوج بتول بأي طريقه كانت لان محد يكدر يوصلني للاملاك غير بتول ... اذا تزوجت فهد اكيد تصير فلوسه فلوسها وساعتها راح تدر عليه فلوس ... كعدت ااااخ بس لو اعرف سالم ليش خطه هالخطوه قبل لا يموت ادفع عمري كله واعرف سالم ليش سجل كلشي لفهد ... اباوع طب فيصل خير
فيصل : يمه محتاج فلوس
سعاد : ماعندي ولا فلس وخر عن وجهي
فيصل : دشوفي ماكو منا منا
سعاد : شسوي يعني ابوك واجيبلك جاي اكول ماعندي اطرش انت
فيصل : اعصابج يمه هسه شحجينه شبيج كبيتي عليه
سعاد : بصوت عالي ... متت اختنكت طلعت روحي واني اكلكم اشتغلو درسو تعبو على رواحكم بس ماكو فائده طاحت وصله من لساني واني اكلكم شوفو ولد ايمان شوفو حياة ولد ايام شوفو عيشتها لأيمان .... ولكم حسره عليه الفلس اشيله انطي الكم وفهد كل فتره يدز امه للعمره .... هاي من غير سفراتها لبنان وتركيا وايران وسوريا وغيرها وغيرهت ومو بعيده هالسنه يوديها للحج واني كاعده اباوع عليها وايدي على خدي ليش بشنو احسن مني هي
فيصل : يمه شجاج انفتكتي عليه خير شصاير
سعاد : متت تعبت طلعت روحي من وراكم عجزت واني اقارنكم بولد ايمان انت يفصيل شوف فهد تخرج وصار ضابط انت يمنذر شوف علي صار دكتور انت ليش لا ولج ليلى اروى صارت مهندسه وانتي بطلتي ولكم ليش قصرت وياكم اني بقيت ويه سالم ودست على روحي وعلى كرامتي لخاطركم كلت كلشي يهون لعيون جهالي وهاي جهالي شجازوني احجي بشنوووو جايزيتوني انتو
فيصل : يمه شجاج اهدي راح تترخبطين
سعاد : وخر عني الله ياخذك امشييي اطلع بره والله اذا اسمعك جاي تريد فلوس انعل والديك فتهمت
فيصل : فتهمت فتهمت بس لتصيرين عصبيه خلص راح اطلع .... طلعت من غرفتها هاي شبيها امي شنو راح تخرف .. افف فتحت باب غرفتي ودخلت
آلاء : كتلك مااكدر اجي هالفتره اصبر خلي اضبط اموري ونطلع شب... باوعت لفيصل دخل يله حبي بعدين احاجيج اجه رجلي سديته بسرعه
فيصل : ويامن جنتي تحجين
آلاء : صديقتي تريد اروحلها هالفتره بس كتلها ماعندي مجال
فيصل : ليش روحي يمها غيري جو وفكيني منج
آلاء : بكلبها ليش هو لو بأيدي ابقه وياك بس من لا جاره باقيه وياك على حساب جهالي .... عوجت حلكي هسه الي يسمعك يكول لازكه بيك
فيصل : دتعاي مشتاقلج
آلاء : هو انت بس بهاي فالح
__________________
غنى : كاعده اقره قران وطلع فهد اباوعله يمشي وهو مغمض هذا شبي راح يوكع على وجهه
فهد : كعدت باوعتلها انتي متملين من الصلاه
غنى : بهدوء ليش امل اكو واحد يمل من العباده
فهد : اعرف عباده من نوع اخر تحبين اشرحلج
غنى : لا شكرا .... رجعت اكمل قران
فهد : غنى
غنى : صدقت نعم
فهد : سويلي جاي بلا زحمه عليج
غنى : ابتسمت اي هسه ... كمت للمطبخ اني اصلا جنت مسويه جاي صبيتله وطلعت ... تفضل
فهد : اخذته
غنى : اباوعله اخذ الاستكان وكام يباوعله ويباوع على الخاشوكه
فهد : غسلتي الستكان بماي حار قبل لتصبي
غنى : باستغراب اي بس ليش دتسوي هيج
فهد : بهدوء اني عندي عقده بموضوع النظافه ادقق هواي
غنى : كعدت بس هاي يسموها وسوسه
فهد : هاي طبيعتي شسوي
غنى : باوعتله انت هواي تدقق وهالشي موزين عليك يدمرك
فهد : شربت من الجاي صحيح كلامج التدقيق يتعب بس كتلج كل واحد وطبيعته
غنى : شلت القران والسجاده دخلتهن للغرفه ضفرت شعري وطلعت كعدت بالصاله
فهد : اباوع لضفيرتها شثخنها وشطولها ... شعرج من شفته اخر مره جان بطولج شو هسه اكصر
غنى : بهدوء اي اني كصيته
فهد : بعصبيه ليش كصيتي
غنى : بهدوء ليش تصيح هو شعرك لو شعري
فهد : مارديت عليها ... اخذت الريمون اكلب اختنكت مااعرف اكعد بالبيت هسه لو باقي عد فرح ولا هنا
غنى : خلا على اغاني .... دوره اني هستوني قاريه قران والدنيا مغرب
فهد : هسه غير تكعد البلكه مدري البرصه
غنى : اولا اني مو برصه البرصه تصير برتقاليه
فهد : اي لعد انتي من جماعه اعداء الشمس وتلكيج صابغه شعرج
غنى : اسمهم الالبينو واني لا صهباء ولا من الالبينو شعري اسود لا ابيض ولا برتقالي
فهد : فتهمنه انتي مثقفه وتعرفين اصناف البشر ماكو داعي تبذلين كل هالجهد
غنى : انت شنو مشكلتك ويايه
فهد : غثيثه متنبلعين دخيل ربج توغفين على الكلب
غنى : بهدوء الي يسمعك يكول شو شمسويتلك ليش تتعامل ويايه هيج مااعتقد بدر مني تصرف مو حلو حتى يكون هذا اسلوبك ويايه
فهد : اكره المتصنعين
غنى : ما الومك حقك تحجي هيج يمكن كثرت الاشخاص المتصنعين الي مرو بحياتك خلوك تفكر هيج بس صدكني مو كل اصابعك سوه فلتعمم بكلامك .... لنفرض لو نريد نعمم على الشباب وكلنه كلهم نفس شخصيتك جان اني اول الناس بطلت اتزوج
فهد : لوما شايف بعيني النسوان تجي جوه رجلي جان صدكتج
غنى : هاي فئه من النساء اني بعيده كل البعد عنها يمكن هنه حبن شخصيتك المتسلطه او منصبك او فلوسك او رجولتك او شكلك الي ممكن يكون محبب الهم اما اني كل هذني لا شيئ عندي
فهد : لعد شتردين كائن فضائي
غنى : ابتسمت اريد رجال مختلف رجال يحسسني انو هو ابويه رجال استند عليه بكل لحظه تعب تمر عليه رجال يحب ربه رجال صايم مصلي بار بأهله انسان محترم ارفع القبعه احتراماً لشخصيته وتربيته
فهد : مو شرط كل شخص مو ملتزم ميحب ربه
غنى : صحيح كلامك انت هسه عندك هواي صفات حلوه بس للاسف بعض الصفات السيئه الي عندك غطت على الاشياء الحلوه الي بيك
فهد : المشكله اني مقتنع بنفسي اقتناع تام عمري ماحسيت نفسي مسوي شي غلط
غنى : اكبر غلط انك تقتنع بتصرفاتك الغلط ... اتمنى لو اكدر اوصلك افكاري بصوره تكون كافيه حتى تقنعك
فهد : ضميت اديه ... عوفج مني خلينه نحجي عنج
غنى : ماكو شي مميز حتى تعرفه عني ... اسمي تعرفه عمري 21 قسم انكليزي جنت عايشه بمنطقه... عنده اخ واحد اسمه مروان وبيبيتي اسمها زكيه هواياتي القراءه والطبخ وبس
فهد : شلون كدرتي تتحملين مسوؤليه بيت كامل وحدج
غنى : تنهدت من تصحه على الدنيا ومتلكه احد يعاونك ولا يكلك هاك تنجبر تعتمد على نفسك اني وعيت لكيت نفسي كاعده عايشه ببيت صغير دخر اقل من متوسط محد يسأل عني محد يكلي شمحتاجه شتردين كمت اكبر واشوف بيبيتي تتعب من الخياط وتحاول بأي طريقه كانت تمشي امرونه انجبرت اني اتعلم عنها وكمت اخيط واني بنيه صغيره ... دمعت عيونها ... وفوك هذا جان مرض مروان مصدر خوف بحياتي مجنت اكدر ارتاح واترك مسوؤليته من كد ماخايفه عليه ... الظروف يافهد تخلينه ننجبر نسوي كلشي ... تصدك عمري ماحسيت نفسي بنيه
فهد : شلون يعني
غنى : جنت بالاعداديه اشوف البنات وتفكيرهن البعيد عني جدا جان كلامهن عن الطلعات والسفرات الصالونات واهم شي الحب ... جنت اسمع قصصهن واسرح وياهن عمري ماسويت ولاشي من الي ذكرته هسه
فهد : يعني تقنعيني انو انتي بحياتج ما حبيتي
غنى : ابتسمت ولامره
فهد : معقوله فتره مراهقتج ماعشتيها
غنى : فتره مراهقتي كضيتها محدبه على الكتب والمكينه ساعه اقره وساعه اخيط ... كتلك مو كل اصابعك سوه اكو اشخاص عايشين بمأسات لتشوف نفسك مرتاح وراسك بارد عبالك كلها مثلك
فهد : ضحكت ههه منو الي راسه بارد
غنى : انت
فهد : شخص انتي ماشايفه الي بداخله شنو لتكولين عليه مرتاح
غنى : ليش الي مثلك شنو الصعوبه الي ممكن يشوفوها
فهد : هزيت راسي ما احب اتطرق لمواضيع مدفونه من زمان بس خلي شغله ابالج ماكو واحد مرتاح بهالدنيا اصلا ماادري شله داعي هالنقاش هذا كمت
غنى : فهد
فهد : همهم كأجابه
غنى : بعد نص ساعه على الاذان متصلي
فهد : صفنت عليها ... بهدوء لا
غنى : باوعتله .... هزيت راسي يجي اليوم الي حتصلي بي اني متأكده ... ان الله يهدي من يشاء بغير حساب
فهد : ابتسمت داخل للغرفه خابرت امي كتلها وصلت للبصره من زمان وهي خطيه مصدكه وكاعده تتحمدلي بالسلامه متدري اني على بعد نص ساعه من البيت
غنى : اباوع عليه من يمشي شكد ماهو مزعج ويزهك بس والله ثكيل ويتصرف برزانه حتى مشيته هيبه وارجع اكول حرامات هالشخصيه مدمرتها صفاته السيئه .... شلت موبايلي شفت مكالمه فائته من خالتي رجعت خابرتها ... الوو
سحر : الوو حبيبتي غنى وينج دكيت عليج هواي
غنى : منتبهت
سحر : شلونج يمه شخبارج
غنى : الحمدلله زينه انتي شلونج عمو شلونه
سحر : لا الحمدلله الاطباء طمنونه عن صحته ان شاءالله العمليه ترجعه مثل اول واحسن
غنى : فرحتيني الله يكومه بالسلامه
سحر : بعد كلبي كلبج ... احجيلي شلونج انتي محتاجه شي تردين شي كليلي اني ادزلج
غنى : لا الحمدلله مكتفيه
سحر : عندي الج خبر حلو
غنى : شنو
سحر : بس يخلص عمج عمليته اجيبه للعراق واجي راح نستقر هناك
غنى : كمت صدوك تحجين
سحر : اي والله بس يسوي العمليه وتتحسن حالته نرجع للعراق اني كد الوعد ياغنى ما اتنازلت ولا تهربت منج مثل ما انتي مفكره بس ظرف عمج جبرني ابقه يمه وان شاءالله راجعتلج وبعد مااعوفج
غنى : ابتسمت صدوك خاله
سحر : اي حبيبتي
غنى : سديته منها والابتسامه شاكه وجهي بلكي صدوك ترجع خالتي عن قريب ونرجع لبيتنه
_______________
فرح : وين صار فهد مو علساس يجي يمي شو لسه ما اجه ... اخابره ميجاوب ... افف رجعت دكيت عليه مره ثانيه طلعلي انتظار ويامن جاي يحجي ... رجعت خابرته جاوبني ... الوو فهد صار ساعه ادك عليك
فهد : ماشفتي طلعلج انتظار يعني جنت اخابر
فرح : ويامن جنت تحجي
فهد : وانتي شكو ... وبعدين ليش مخابرتني
فرح : وينك مو علساس تجي يمي انتظرتك هواي
فهد : صار عندي شغل ماكدرت اجي
فرح : زين شوكت تجي
فهد : ماعندي مجال اجيج
فرح : ليش
فهد : مو كلنه عدنه نعل ما اكدر اجي لتلحين
فرح : وشوكت يخلص شغلك
فهد : ما ادري يله باي سديته
________________
صباحا
غنى : كعدت الصبح دخلت سبحت وبدلت وطلعت للمطبخ بسرعه حضرت ريوك لفهد وطلعت من الشقه ... تمشيت للشارع العام انتظرت العبريه تجي ... صعدت ورحت للكليه دخلت شفت البنات كاعدات بنفسرالمكان بس هالمره بتول وياهم ... بوستهن صباح الخير
البنات : صباح الورد
غنى : شلونجن
نرجس : اني موزينه
غنى : كعدت ليش
اروى : متعاركه ويه جعفر اكو غيرها يعني
غنى : حرام عليج نرجس شكد تتناكرين ويه استاذ جعفر
نرجس : ولج صاير يحاسب لتلبسين لتتمكيجين لتسوين هيج ولتتصرفين هيج مدري شبي
غنى : غير يخاف عليج ياحبيبتي مو كولشي تاخذي بعصبيه هو لوما حريص عليج ميكلج هيج
بتول : هذا اسمه تحكم مو حرص شنو معناها يحاسبها على كلشي
غنى : هو اخوها يحبها ميكرها ويريدها دائما احسن الناس وما انكلبت الدنيا اذا كلها على شي لا وهي عاقله واكيد تتفهم كلامه
اروى : لك فديت الحكيم والله
غنى : ابتسمت يله امشونه حتبدي المحاضرات مشيت ويه نرجس ... انتي عقلي شويه تره تدرين بالاستاذ اذا طنكر يرسبج مثل العام
نرجس : لتخافين ميرسبني مادام شغلته بأيدي
غنى : اي شغله
نرجس : هيج يله تعالي
____________________
ايمان : كاعده الكط تمن للغده وسمعت صوت هبد شنو السالفه محد كاعد هسه كلهم بالدوام وسعاد والجناين نايمات كمت صعدت فوك لكيت سعاد مدري شتلم من الصاله .... سعاد شنو هذا
سعاد : نظفت غرفتي وطلعت اذب الزبل بس تبدت المكرافه بالصاله
ايمان : وغرفتج بيها رماد ؟
سعاد : وين الرماد
ايمان : وكفت كدامها سعاد انتي شجاي تسوين تره تصرفاتج ابد ماجاي تعجبني مره بالسطح وهسه بالصاله شنو سالفتج
سعاد : شبيج ايمان شنو تحكميني وين اروح وين اجي ما مسحمولج تحققين وياي فتهمتي
ايمان : بدون ما ارد عليها طبيت لغرفتي اخذت عباتي وطلعت رحت للحجيه خوله دكيت الباب طلعتلي علا
علا : صباح الخير خاله
ايمان : صباح النور حبيبتي الحجيه كاعده
علا : اي شتدرين بيها انتي من السته تكعد
ايمان : طبيت لكيت الحجيه كاعده تلكط خضره صباح الخير عمه
ياسمين : صبحج الله بالخير يمه ... باوعت لايمان مبين عدها حجي ... شبيج ام فهد
ايمان : باوعت لعلا
ياسمين : تعاي لغرفتي ... كمنه طبينه لغرفتي سديت الباب كعدي احجيلي شكو
ايمان : عمه سعاد
ياسمين : شبيها المصكوعه انوب شمسويه
ايمان : ذاك اليوم صعدت اجيب طحين من السطح و..... سولفتلها كلشي لحد الي صار قبل شويه
ياسمين : لطمت على صدري عزه العزاج سعيدان .... ولج خاف هاي جاي تسوي سحر
ايمان : بسم الله ... معقوله
ياسمين : كلشي معقول ليش لا زين انتي شنو شفتي بأيدي
ايمان : كلشي ماشفت اول مره حرمل وثاني مره رماد
ياسمين : هاي جاي تسوي اعمال مال مشاكل حتى تكب العيطه بالبيت متريدنه مرتاحين
ايمان : شمدريج انتي
ياسمين : احنه امهات كبل يصيحولنه كلشي نعرف وسعاد ماعدها شي غير المشاكل ... سمعيني زين كل يوم ويه الاذان تشغلين قران وراح انطيج مي زمزم رشي بالبيت حتى يتبارك ومااوصيج اهم شي القران تره حسه بالبيت يطرد شكو عمل والله الحامي ان شاءالله
ايمان : عمه اني خايفه على ولدي وبناتي لتروح تسويلهم شي
ياسمين : مادام بحفظ الرحمان انتو لتخافين من شي النكس ميسوي غير النكس مثله عوفيها عليه اني اعرف شسوي وياها الواضح تقدم العمر ما وشيباتها مالهن احترام بس بسيطه اعيد تربيتها مثل ماسويت قبل شنو عبالها كبرت لا والله بعز صحتي وعشر زلم مو بكدي كومي عمه روحي لبيتج وسويها وكأن شيئاً لمن يكن وهاي الكح..... ام السحوره دبارها عندي
ايمان : طلعت قلقانه من عمتي رجعت للبيت فتشت بغرفه بناتي نفظتها نفظ رغم اتعب بسرعه بس كلشي ولا سوالف الشعوذه الله لا يوفقج يالمتسمين .... طلعت لغرفه علي هم نفس الشي وصلت لغرفه فهد كلبتها كلاب اخاف عليه بشكل مو طبيعي ادري بيها شكد تكره فهد وحاقده عليه ضليت للظهر افتش بالغرف اذن الظهر رحت علكت القرام بصوت عالي بالبيت ورجعت اكمل تفتيش بالغرفه لتروح شو شتحط لولدي والله اموت لو صارلهم شي .... سمعت صوت ورده ورايه
ورده : ماما شجاي تسوين
ايمان : بستها شلونج يمه شلونج بالامتحان
ورده : لا الحمدلله كلش زينه ماكتيلي ليش مدعثره غرفه فهد مو تدرين بي يكره الهوسه
ايمان : هسه اعزلها يله روحي بدلي وصلي علما اشوف الغده ... قفلت غرفه فهد وطلعت لكيت اكو اكل الطباخ طلعت انغام طابخه بعد كلبي شلون بنيه ورده
__________________
غنى : دخلت للعماره صعدت للشقه صادفت ود من طلعت من المصعد
ود : سلام
غنى : وعليكم السلام شلونج
ود : هله حبيبتي انتي شلونج مبين عليج تعبانه اكيد ستوج اجيتي من الكليه
غنى : اي والله هستوني اجيت
ود : يله اخذي راحتج
غنى : رحت للشقه فتحت الباب ودخلت شفت فهد كاعد بالصاله ... ابتسمت بهدوء السلام عليكم
فهد : ذبيت الموبايل وعليكم السلام تأخرتي
غنى : ذبيت الجنطه وكعدت .... بتعب اي اليوم كومه محاضرات عندي
فهد : شفتي اروى
غنى : اي شفتها هي وبتول
فهد : منو وصلها من طلعتو
غنى : اعتقد كالت علي راح يجي عليهن لان باعتقادها انت عندك انذار وسافرت للبصره متدري بيك هنا .... صدوك فهد على طاري شغلك انت ليش اجاك امر تبقه هنا
فهد : المفروض ما احجي كدامج بس اني اشتغل ضابط بالاستخبارات .... ووصلت اخبار للارهابيين انو اني لازم مجموعه وجاي ادربها حتى ادزها للموصل وغير هيج لقيت القبض على وحده من العصابات التابعه لداعش ولهسبب جاي يدورون عليه لان خربت كل مخططاتهم
غنى : فتحت عيوني عزززه متخاف
فهد : ليش اخاف هذا شغلي
غنى : فتحت شالي زين انت شلون بيك اذا طلعت منا
فهد : اكو شك انو اكو واحد من المركز موصللهم الخبر وصارو يعرفوني بس لحد الان ماكو شي مأكد همه هسه جاي يدورون عليه واكيد المسوؤل راح يطلعني من السالفه بطريقته الخاصه واني بكل الاحوال ميهمني اموت وله اعيش الاثنين نفس الشي
غنى : شنو الي صاير وياك بحيث هيج كاره الحياه
فهد : بهدوء غنى كومي صلي الدنيا ظهر وبما انو انتي داعيه اسلاميه ومتدينه ميصير تأخرين صلاتج مو
غنى : كمت شيخلصني بعد من لسانك خلص يحجايه رجعي لمكانج .... دخلت لغرفتي سبحت وبدلت وطلعت خليت الاكل على النار... البارحه بالليل طبخت فاصوليه لان ما الحك وره الدوام اطبخ ... نصيت النار ورحت صليت كملت وكمت صبيت غده جبت الصينيه واجيت يله فهد
فهد : كعدت باوعت للصينيه ... شدراج اكلتي المفضله الفاصوليه
غنى : ابتسمت ماادري بيك تحبها اصلا ردت اسوي مركه شجر بس سويت فاصوليه
فهد : اخذت الخاشوكه مباوعلها همزين ما سويتي مركه شجر جان درتها على راسج
غنى : بالعكس والله طيبه
فهد : كشولت اموت منها تلعب روحي من اشوفها
غنى : لولا الاذواق لبارت السلع اكلي
فهد : لتتتفلسفين خلي نتغده
غنى : تنهدت شكد مستفز يا الهي
فهد : اكلت سمعتج ... بالمناسبه طيبه الفاصوليه
غنى : بهدوء بالعافيه .... كملنه غده كمت شلت المواعين غسلتها وصبيت جاي النه طلعت انطيت كوب فهد اله لان ميكفي استكان وطبعا يشرب الجاي بدون شكر شلون ماادري
فهد : باوعتلها هاا
غنى : هيج مو يمك ... اكول فهد العصر اريد اطلع
فهد : وين ؟
غنى : اجيب كم حاجه محتاجتهن
فهد : ماكو طلعه اني متسوك كلشي للبيت كعدي وسكتي
غنى : فهد احتاج سجلات وكم شغله الي
فهد : لتطلعين خابري وحده من صديقاتج تجيبلج وانتي انطيها فلوس باجر
غنى : فهد تره انت ممسموحلك تكمني اني من حجيت فحتى ابلغك مو اخذ اذنك
فهد : غنى خصم الحجي طلعه ماكو
غنى : بس
فهد : قاطعتها انتهي النقاش
غنى : استغفر الله
______________
علي : سمعت الباب يندك طلعت فتحتها شفت وحده مبوشه ... منو حضرتج
: اهلك موجودين
علي : اي بس منو انتي
: سويلي مجال اريد احجي ويه النسوان الله يخليك
علي : تفضلي دخلي ... دخلت للطرمه طبيت صحت لامي والبنات طلعن
سعاد : منو انتي
ايمان : تفضلي حبيبه شتردين
:منو ام فيصل
سعاد : باوعت للأء ... اني خير
:رفعت البوشيه ... خاله اعرفج بنفسي اني ساره مرت فيصل الثانيه
آلاء : بصدمه شنوووو
*********
يتبع
- يتبع الفصل التالي اضغط على (ذنوب على قيد الغفران) اسم الرواية