رواية رواسي الدهر الفصل السابع عشر 17 - بقلم روح الدليمي

              

➰➰➰➰➰➰➰➰➰➰➰

طلعت وراه بس ما لحكت عليه چان رايح.. اول ما دخلت 

للبيت استلمتني امي صياح و رزايل.. 

جميله:أنتِ بس فهميني شنو تردين بالضبط؟؟؟ 

يجيج مو راضيه يعوفج مو راضيه شنوو يرضيج رواسيي؟ 

باوعتلها بعيوني الدامعه و حجيت بقهر.. 

رواسي:احبه بس ما اريده، كل لمسه منه و كل حجايه 

تذكرني باللي سواه بيه! ما اكدر اطلعهن من بالي 

كعدت على القنفه و اردفت بنفس النبره.. 

رواسي:كل ما تجي عيني بعينه اتذكر شلون عذبني 

احاول انسى و اتناسى ممكن لايام بس اندم على قربي منه 

جميله:جان لا تزوجتي، ليش رجعتيله اذا هيج رواسي؟؟ ليششش خليتي و خليتينه بهيج موقف!! 

لطمت على وجهي بكل قوتي و صرت اصرخ 

بحرگه گلب... ضربت على گلبي بقوه و حجيت بصياح.. 

رواسي:گلبي ولج يمه گلبي يريده مو بيدي 

عذبني دمرني اعرف والله اعرف بس تعاي فهمي گلبي هالشييي 

غمتني بيدها و گالت .. 

جميله:هوَ الجلب يحب خناگه 

انهد حيلي تعبت من كثر اللطم و الصياح.. 

اجت يمي حضنتني و بجيت بحضنها و حجيت بقهر.. 

رواسي:شسوي يمه شلون اتصرف، انصحيني 

دليني على الطريق الصح تايهه اني و ضيعت طريقي 

مسحت على راسي بهدوء و گالت .. 

جميله:رسيم يحبج و من زمان هوايه رواسي 

رواسي:لعد ليش ما وافقتوا عليه من البدايه، ليش خليتوا يخطفني و يعذبني 

جميله:خفنه عليج منه من عرف الحقيقه هوَ حلف ينتقم

و خوفنه چان بمكانه خطفج و عذبج شهور ابوج يدور مكانج چان راسم و مخطط لكل شي لدرجه حتى الشرطه ما كدروا يلكون اثرج بسهوله 

رواسي:حبيت معذبي اخذني اسيره لحبه و محد يكدر 

يحررني..

ابتعدت عن حضنها مسحت دموعي و حجيت.. 

رواسي:اذا تشوفوني ابجي عليه ضربوني بالقندره على راسي اني ردت البعد و الانفصال و لازم اتحمل.. 

جميله:و بنتج؟ 

رواسي:شوكت ميحب يجي يشوفها و يكدر ياخذها تبات يمه البنات يداروها اعرف 

 

جميله:رواسي رسيم مريض ترا لتعوفي و هوَ بحاجتج 

باوعتلها و حجيت بعدم فهم.. 

رواسي:قصدج مريض نفسي اي واضح 

باوعتلي و گالت ب اسف.. 

جميله:لا رواسي رسيم عنده مرض خبيث 

شهكت و لطمت على صدري حجيت بخوف.. 

رواسي:شنوو شلون؟؟ 

جميله:ما رادج تعرفين متشوفين ابوج تغير وياه؟ 

رواسي:ليش ما حجيتوا!!! رسيم راح يموت و يعوفنييي؟؟ 

انضربت على راسي بكلامها، شنو يعني رسيم عنده كانسر شلون و شوكت و ليش ما گال.. 

كمت من مكاني طلعت من البيت و بيدي تلفوني

اتصل عليه ميرد ابد بقيت امشي و دموعي تنزل 

امي تتصل عليه انطيها رفض كل شوي... 

رفعت عيوني اباوع على سيارته طبكت يمي و نزل منها اجه عليه رفعت ايدي ضربته و رجعت حضنته 

بكل قوتي و بجيت.. 

رواسي:اذا تموت اموتك والله 

ضحك و گال.. 

رسيم:هسه هذا خوف لو شنو؟ 

ابتعدت عنه و حجيت بعتب.. 

رواسي:ليش ما حجيتلي ليش ما گلت!

رسيم:متريديني رواسي ليش احجيلج؟ 

رواسي:صح ما اريدك بس لازم اعرف شلون تضم عليه مرضك؟ 

رسيم:ما حجيت حتى لترجعيلي لان مريض، اريدج ترجعين لان تحبيني رواسي اريدج ترجعين لان متكدرين بدوني و نبلش حياتنه من جديد بدون مشاكل 

نزلت راسي و حجيت.. 

رواسي:ما ارجع رسيم لتحاول، بس اريد اكون وياك و اسندك محتاجني أنتَ 

رسيم:و اني ما اريدج يمي، صعدي يلا ارجعج للبيت

بهتت ملامحي من كلامه، ابتعدت عنه و درت روحي

و حجيت.. 

رواسي:روح مناا لا الم العالم عليك اگول يتحارش بيه! 

ضحك و سحبني من ايدي و گال بمكر.. 

رسيم:شنو رأيج ارجع اخطفج و نبلش قصه حبنا من جديد 

رواسي:حتى بالقندره والله 

صعدني بالسياره و هوَ يضحك، صعد.. لزمني من ايدي و گال.. 

رسيم:اذا اموت لتتزوجين غيري رواسي 

رواسي:شيت اب رسيمي 

رسيم:و تالي رواسي؟ 

رواسي:رجعني للبيت رسيم 

رسيم:راح اخطفج 

رواسي:حتى اطيح حظك والله

        

          

                

لزم ايدي قربها على شفايفه طبع بوسه عليها، و على غفله

عضني منها.. عطت بالم و سحبت ايدي منه و حجيت بنتر.. 

رواسي:قندره عليك ليش تعضني صاير جلب! 

انطاني كفخه على راسي و گال.. 

رسيم:لا يا جلبه، تعلمي تحترمين بابا عيب عيب 

رواسي:محترمه اني بس أنتَ فسدت اخلاقي 

رسيم:انيي شسويت؟ 

رواسي:ما سويت شي ابد بس خطفتني و حرگتني و ضربتني ب اختصار طيحت حظي و عذبتني و بعد شنو ذكرني صارن هوايه نسيت! 

رسيم:والله متندم رواسي شسوي حتى اخليج تسامحيني و تنسين؟ 

رواسي:و ها صدك اهم شي خليتني مدمنه و اتعذب كدام عيونك و تستلذ بتعذيبي، أنتَ سايكوووو رسيم 

رسيم:راح اموت و تخلصين مني انتظري كم شهر بس 

رواسي:شيت اب رسيمي لتجيب طاري الموت 

رسيم:راح اشتتج هسه اذا متسكتين 

درت وجهي عنه و صرت اباوع من الجامه، حرك سيارته و اخذني للبيت طلبت منه ينزل بس ما قبل 

راح هوَ و اني دخلت للبيت.. يومي كئيب و كله حزن و قهر.. مقهوره من و على رسيم.. طول اليوم بالي

مشغول و افكر بي و بمرضه.. صار الليل و اني على 

نفس وضعي.. حابسه روحي بالغرفه و ابجي و افكر

شلت تلفوني و كتبت لادم بلغته انو ميجيني الصبح 

بطلت ما اروح.. و خابرت على ماري و اكيد مثل عادتها 

رأساً جاوبتني.. 

ماريا:لككك هلااا سوسي 

رواسي:شلونج حَبيبي 

ماريا:متحمسهه للسفره صار هواي ممسافرين بس بنات

رواسي:اگلج ماري، اني ما اجي وياكم ما اكدر 

عاطت بيه.. 

ماريا:ليش ولج رسيم ما قبل مو؟

نزلت دموعي و حجيت بغصه..

رواسي:ماري رسيم مريض شلون اسافر و اتونس و هوَ ديتعذب بمرضه وحده! 

ماريا:شبي مريض؟ شي خطير يعني 

شهكت و حجيت بقهر.. 

رواسي:عنده كانسرر، ماري رسيم راح يموت و يعوفني 

ماريا:اهدي حَبيبي لتبجين متأكده أنتِ ؟ 

رواسي:امي گالت و من سئلته ما نكر 

ماريا:ما اعرف شحجي والله ربي يشافي و يحفظه الكم 

سديته منها و دخلت بنوبه بجي و نمت اني و دموعي.. 

حسيت الصبح على صوت تلفوني يدك.. جاوبت و اني نايمه.. 

        

          

                

رواسي:منوو

رسيم:بعدج نايمه؟ مو عندج سفره

رواسي:ما اروح بطلت 

رسيم:ليش 

فركت عيوني و عدلت كعدتي و حجيت بجديه.. 

رواسي:كلل عقلك تريدني اروح اتونس و أنتَ محتاجني يمك؟؟ 

رسيم:كومي بدلي يلا و لمي غراضج اني اوصلج لماريا 

رواسي:ما اروح رسيم 

عاط بيه.. 

رسيم:رواسي كومي ١٠ دقايق اني يمج يلا 

سده بوجهي و عافني صافنه هسه شسوي؟ 

كمت فتت للحمام سحبت و بدلت و كعدت انتظره 

شوي و خابرني انطيته رفض شلت جنطتي نزلتها 

لكيت امي و ابويه ديتريكون صبحت عليهم باوعلي ابويه و گال.. 

راشد:ادم گال ما راح تروحين

رواسي:نسيبك يريدني اروح 

راشد:اوكفي انطيج فلوس 

رواسي:لا بابا شكراً عندي 

كام من مكانه و گال.. 

راشد:حتى لو عندج خليهن خاف تحتاجين كلشي يصير 

دخل للغرفه هوَ و اني كعدت سويتلي لفه جبن اكلتها 

و كمت.. رجع دك رسيم جاوبته گال 

رسيم:وينج يلا اني بَره 

رواسي:هسه جايه بس ثواني، متريك أنتَ؟ 

رسيم:لا عندي شغل بعدين اكل 

رواسي:تمام هسه اجي 

سديته من عنده و طلبت من امي تسويله لفه، و اني كمت 

للمطبخ طلعت كوب استعمال واحد و صبيتله جاي 

و اخذت اللفه من امي.. اجه ابويه انطاني الفلوس 

سلمت عليهم و طلعت.. بس شافني نزل اخذ جنطتي 

و باسني من راسي و گال.. 

رسيم:يومي يصير حلو من اصبح بوجهج 

رواسي:رسيم خايفه عليك اني 

فتحلي باب السياره و گال.. 

رسيم:ماكو شي حتى تخافين عادي كلنا على هذا الطريق 

رواسي:اسم الله رسيم كافي شنو هذا الحجي!! 

صعدت السياره و هوَ اندار من جهته، انطيته اللفه و الجاي و گلت.. 

رواسي:اكل لتبقى بدون اكل 

رسيم:تحبيني روسيه؟ 

رواسي:احبك رسيمي الحلو 

رسيم:تحبيني لان حلو؟ 

        

          

                

رواسي:اي لعد شلون اذا أنتَ مو حلو ما اباوع بوجهك اصلاً، يعني هم مو حلو و هم معذبني مترهم !! 

شكلك الحلو الي شافعلك تراا.. امووت على الحلوين 

رسيم:ام الحلوين راح تندفرين 

رواسي:حرك شبيك واكف راح نتأخر 

 حرك السياره و اخذني لبيت ماري، لكيناهم واكفين بَره 

يم السياره يحطون بالاغراض و دِلهَام واكف يساعد

بيهن... نزلت من السياره و حجيت بصوت عالي.. 

رواسي:هاااي گاييزز 

ماريا:هلا حَبيبي 

نرجس:تأخرتي صار ساعه ننتظر 

رواسي:مو ع اساس ما اجي بس رسيم جابني 

نارين:يلا بسرعه خلي نطلع قبل لا اهلي يغيرون رأيهم 

ماريا:يلا ماعدنا شي 

التفتت على رسيم واكف ويه دِلهَام ويحجي وياه.. 

تقربت عليهم سكتوا و ثنينهم داروا وجههم عليه.. 

رواسي:ليش سكتوا؟ 

رسيم:ماكو شي دنسولف عن الشغل 

رفعت حاجبي و حجيت بمكر.. 

رواسي:قصدك عن المافيات و العصابات؟ 

حجه دِلهَام يغير الموضوع.. 

 دِلهَام:شلون صرتي رواسي ان شاء الله احسن؟ 

رواسي:ما اعرف صراحه 

رسيم:تتونسين بالسفره و تتحسن نفسيتج 

باوعتله و عيوني غورگت، برطمت شفايفي و حجيت 

بقلق.. 

رواسي:اخاف اذا اروح يصير بيك شي و اني مو يمك 

سحبني لحضنه حضني باس راسي و گال.. 

رسيم:ابوج من عرف گال أنتَ عار ميصيرلك شي 

لتخافين عليه 

بجيت و صرت اشهك.. وخرني عن حضنه لزم 

وجهي بيده مسح دموعي و گال بهدوء.. 

رسيم:ولجج بابا لتبجين 

رواسي:اذا تموت اموتك والله 

درت وجهي على دِلهَام لما ضحك على حجايتي 

و گال.. 

دِلهَام:شلون رهمتيها رواسي؟ 

رسيم:كلشي ممكن ويه رواسي راشد عادي 

ضربته على كتفه بخفه و حجيت.. 

رواسي:شايف اذا ارجع و الگه صاير بيك شي 

اطيح حظك و بالقندره والله 

        

          

                

رسيم:يلا اذا صارلي شي تشوفيلج واحد حلو و تنسيني 

رواسي:ما اريد حلو غيرك اني 

باسني من راسي و گال.. 

رسيم:يلا روحي تونسي بابا و طمنيني عنج من توصلين 

رواسي:انتبه على نفسك علمودي و علمود بنتك 

هز راسه سلمت و رحت صاح عليه و گال... 

رسيم:لحظه حَبيبي 

راح للسياره جاب ظرف و اجه يمي گال 

رسيم:هاج خليهن يمج 

رواسي:عندي والله و ابويه انطاني 

رسيم:حتى لو يجي يوم و تحتاجيهن بغيابي 

رواسي:وين تروح ليش؟ 

رسيم:احبج روحي تونسي يلا 

راح صعد سيارته بدون مينطيني جواب.. ركبت السياره كدام و البنات وره عاطت بيه ماريا.. 

ماريا:ساعه ساعه 

رواسي:سكتي ترا هسه ابطل 

نرجس:متكدر بدون حبيب الگلب عيني رجعيها

انداريت عليها و گلت بنتر.. 

رواسي:تراا تنكفخين والله 

نارين:بيي كالم گيرلز شبيكم 

ماريا:رواسي تسوقين أنتِ شو احسني دايخه 

رواسي:حولي يلا 

نزلنا من السياره اني صرت بمكانها و هيَ 

كعدت بالصدر.. ربطت تلفونها على السياره و حطت اغاني... فتحت تلفوني اريد اصور عاطت بيه نرجس.. 

نرجس:عوفيييي التلفون دتسوقين 

رواسي:اريد انزل ستوري 

ماريا:جيبي اني اصورج 

عليت الصوت و صرت اسوق و اغني ويه الاغنيه

و هيَ تصور.. نشرته ستوري و سوت منشن الهم 

و كتبت "سفره بناتيه ناريه" 

تونسنا بالطريق بس تعب السياقه و التركيز ضربني 

صداع.. بعد كم ساعه وصلنا لبيت اهل ماريا الي بسليمانيه.. نزلنا الاغراض و دخلنا للبيت 

ماري بقت واكفه بباب البيت و نظراتها تتوزع على كل مكان و نزلت دموعها 

تقدمت عليها حطيت ايدي على كتفها 

و حجيت بهدوء...

رواسي:اذا تحبين نروح لفندق منبقى هنا 

 اندارت عليه حضنتني و صارت تبجي، اجو البنات 

و صرنه نهدي بيها.. هذا بيت اهلها من يوم الي ماتوا 

ما دخلتله و هسه تذكرتهم 

        

          

                

بجت شوي و بعدها مسحت دموعها و گالت 

بحماس.. 

ماريا:يلااا بناااات تعالو 

نارين:ماري أنتِ زينه؟ 

مشت من يمنه و گالت ... 

ماريا:عال العال يلا اريد نستغل كل ثانيه بهاي السفره 

ضاعت من عدنه عشر دقايق لنضيع الباقي

وصت اكل النه و كلنا فرشنا بمكان واحد و كعدنه 

طلعنه فلم و الصدفه حطت نفس الفلم الرعب 

الي شفته ويه رسيم لما چان خاطفني.. 

فتحت تلفوني صورت الفلم و دزيته اله و كتبتله.. 

رواسي:بشنو يذكرك هذا الفلم؟ 

رأساً شافها و كتب.. 

رسيم:اول بوسه 

رواسي:يذكرني بعذابي 

شافها و ما رد، اني هم عفت التلفون و صفنت على 

الفلم بس بالي ويه رسيم.. شنو راح يكون وضعه؟ 

راح يفيد بي العلاج لو لا؟ و كومه تساؤلات اجت ببالي 

ما لكيت الها جواب.. ما اعرف شلون غفيت 

كعدت الصبح على صوت البنات فوك راسي، فركت عيوني و باوعتلهن و حجيت بصوت ناعس... 

رواسي:متخلون واحد ينام شبيكم؟ 

نرجس:رواسي كومي عاد صار الظهر و احنه بعدنه كلشي ممسوين 

عدلت روحي و حجيت.. 

رواسي:شنسوي اليوم؟ 

ماريا:اريد اسوي تاان كوموا يلا 

رواسي:جبتيلي ملابس السباحه؟ 

ماريا:اي يلا كومي فضيني 

كمت دخلت للحمام و غسلت وجهي حتى اصحصح 

و رحت على ماري انطتني المايو بقيت صافنه عليها 

و عطت بيها.. 

رواسي:هاي شنو؟

ماريا:مايو! 

رواسي:اعرف قندره بس يعني ما اكدر البسه والله ابويه و رسيم يعلگوني من رجلي بالسكف 

نارين:منو اكو بس احنه بنات يمعوده كلنه اهلنه ميقبلون 

نرجس:بيناتنه خو ما اكو ولد 

رواسي:امشي وراجن بس اذا ترزلت تنكتلن 

ماريا:تمام يلا بسرعه 

رجعت دخلت لبست المايو و طلعت خجلانه من روحي 

بس بعدين من شفتهن تشجعت لان فعلاً ماكو احد بس احنه هالمستحه على شنو... 

طلعنه بَره شفت المسبح نظيف الظاهر احد 

جاي منظفه.. فتحنه الكراسي و حطينه اغراضنه 

ماري جابت كريماتها و السيرومات علمود التان.. 

دهنت جسمي و تمددت على الكرسي.. كامت ماري 

جابت ريدبول و كلاصات بيهن ثلج... صبيت الي 

و اخذت كلاصي صورت كدام المسبح و جزء رجلي مبين.. من الركبه و جوه.. 

نشرتها و كتبت "relax".. بنفس الثانيه شافها رسيم 

و رد على الستوري... 

رسيم:تطشررر العرض، عرضي راحح 

ضحكت و دزيتله... 

رواسي:لتخاف بعده ملموم

رسيم:الامه العربيه كلها شافت و تكليلي ملوم!! حذفي رواسي 

رواسي:اوكف اصورلك تتأكد بعينك 

رحت صورت الاعدادات مال ستوري و شوفته 

انو خافيه الستوري من الكل بس هوَ و البنات مبقيتهم 

شافها و كتب.. 

رسيم:حذفي حَبيبي لا اطير الحساب كله يلا 

رواسي:رسيم التهي بروحك و عوفني ترا اسويلك هايد أنتَ همم! 

رسيم:يصير خير 

تأفأفت بضجر و حذفت الستوري مالي خلك.. 

رجعت صورت واحد ثاني و بينت بس الگلاص و ايدي و المسبح.. رجع رد عليها و گال.. 

رسيم:ايدج شيليها لتبين 

رواسي:بلووك لوجهك 

 عفت تلفوني و كمت فتت بالمسبح.. 

مرت الاربع ايام بسرعه تونسنا كلش بس 

ونستي شلون تكمل ؟ 

 تمددت بفراشي تعبانه من الطريق، مسكه بحضني 

فتحت تلفوني اكلب اشوف شكو ماكو دخلت لستوري رسيم، ناشر صوره من المطار قبل ٤ ساعات 

و كاتب.. "قد لا نعود"...