رواية رواسي الدهر الفصل السادس عشر 16 - بقلم روح الدليمي

 

➰➰➰➰➰➰➰➰➰➰➰

صعدني غصب عني بالسياره و صعد هوَ و قفلها.. 

عطت بي.. 

رواسي:لكككك شترييييد مني فهمنييييي 

حجه بصياح.. 

رسيم:انطيتج مجال هوايه، گلت اليوم باجر رسيم اصبر هيَ تحس على روحها و تتعدل بس مطييييي نايم براسججج 

رواسي:رجعنييي للبيت وين ماخذني؟؟ 

ضربني على رجلي بقوه و رجع عاط.. 

رسيم:اليوممم احركججج أنتِ و هذا لبسججج 

مسحت دموعي قبل تنزل و عطت بي.. 

رواسي:اشمررر روحي من السياره والله 

مديت ايدي على القفل مال باب اريد افتحه 

و هوَ يرجع يقفله من يمه، حطيت ايدي على الستيرن و حركته بعشوائيه... رأساً وكف السياره و اندار عليه 

رفع ايده يريد يضربني.. عطت بي بتهديد.. 

رواسي:مددد ايدككك و شوف شسوي 

رسيم:لججج خبلتيني والله خبلتيني 

حجيت بنفس النبره.. 

رواسي:شتريد مني صارلك شهور حتى متسأل شكو رجعت 

غمض عيونه بقوه و صار يتنفس بهدوء يضبط 

انفاسه.. مد ايده على ايدي يريد يلزمها سحبتها و حجيت.. 

رواسي:ممنووع تطخني اموت روحي والله ولا اخليك تلمسني 

رسيم:رواسي كافي دخيل ربج كافي 

ضربته بقوه على صدره و عطت بي.. 

رواسي:رجعني للبيت رسيم 

رسيم:تجين ويايه مو بكيفج

خليته يلتهي بالسياقه و فتحت قفل الباب بدون ميحس 

و فتحت الباب مال سياره اريد اشمر روحي منها، قرب روحه عليه بحركه سريعه و سحب الباب 

ردنه نسوي حادث الا شوي.. طبك الباب بقوه و فر السياره متجه لبيت اهلي.. صار يصيح عليه.. 

رسيم:صااحيه أنتِ شلون هيج تسوين؟؟؟ 

رواسي:ما اريدك افهم، خليك ملتهي بنسوانك

و عوفني بحالي 

رسيم:رواسي سكتي ما اريد اسمعع صوتجج اش كافي

دك تلفونه جاوب و گال بنتر .. 

رسيم:لتصيييح أنتَ الثاني جايبها للبيت كلشي مابيها، ما سويتلها شييي هسه جايين مسافه الطريق، هسه نجي و تشوفها بعينك ميحتاج كافي عاد جاي اسوق 

                                      

 

                

سد التلفون و صار يدردم على ابويه و عليه.. بقيت ساكته 

بس دمي يغلي فشلني كدام العالم و سحبني مثل الطفله كدامهم... وصلنا للبيت فتحت الباب و نزلت قبله طبگت باب السياره بكل قوتي و هم ما برد گلبي رجعت فتحته 

و طبكته اقوى و دفرته برجلي 

ضربت رجليناتي ثنينهن بالگاع معصبه، و دكيت باب البيت.. فتحه ابويه دخلت بدون ما احجي شي و كعدت 

بالصاله الي يحجي ويايه انفجر بي.. ثواني و دخل رسيم 

و ابويه كعدوا و ابويه يستفسر منه ليش اخذني من بينهم 

بهاي الطريقه.. 

رسيم:بنتك ادبسز اذا متربيها أنتَ اني اعيد تربيتها من اول و جديد 

باوعتله و عطت بي.. 

رواسي:تربيتي احسن من تربيتك ابو المافيات ابو النسوااان 

عاط بيه ابويه و گال.. 

راشد:امشي لغرفتج بسرعه كدامي يلا 

رواسي:خلي يروح مناا ما اريده ما اتحمل اشوف وجه ليش متفهمون! 

كام رسيم من مكانه و گال.. 

رسيم:تسمحلي اضربها ابرد گلبي 

عطت بي.. 

رواسي:جرب تمد ايدك عليه و شوف شسوي بيك 

خاف الطلقتين القبل ما متت بسببهن الثالثه تصير بنص گلبك و الله 

كام عليه ابويه و ضربني بكل قوته على وجهي.. 

صفنت عليه اريد استوعب الراشدي الاجاني.. دموعي نزلت بقهر عفتهم و ركضت فوك لغرفتي باوعت على الجربايه مسك ماكو عرفتها نايمه يم امي 

نزعت ملابسي شمرتهم بالگاع و لبست ملابس النوم 

تمددت بفراشي و بقيت ابجي مقهوره، مقهوره من رسيم و تصرفاته و من ابويه و ضربته الي... من كد البجي نمت بدون ما احس.. 

كعدت ثاني يوم الصبح اريد ارفع ايدي ما اكدر 

وجع بكل جسمي يصل صل عليه.. عيوني ثكيله حطيت ايدي على راسي راح ينفجر.. بالگوه نهضت روحي من مكاني و كعدت باوعت حواليه انصدمت برسيم نايم يمي بالغرفه!! 

رجعت اباوع حواليه هاي غرفتي يعني ما خطفني مره ثانيه... باوعت على الكومدي تلفوني موجود و بصفه كاسه بيها مي و وصله صغيره.. شلت الكاسه و درتها فوك راسه.. كعد مفزووع و عاط.. 

رسيم:شكو 

اشرت على باب الغرفه و حجيت بصوت خافت

بالكوه يطلع صوتي.. 

رواسي:امشي اطلع مناا ما اريد اشوف وجهك يلا

مد ايده على گصتي يتفحص حرارتي، نترت ايده مني 

و عطت بصوت خافت..

رواسي:كتلك لتطخني روح لنسوانك ارجع للحيه و الثانيه الحمره هدى بس عوفني اني 

        

          

                

بقه صافن عليه و اني مستمره اطرد بي و روحي مفرفحه، كل جسمي يرجف و يأذينيي سحبني من ايدي 

و اخذني بحضنه مسح على شعري بهدوء و گال بنبره

قهر.. 

رسيم:هيج كارهتني روسيه؟ لهل درجه متتحملين تشوفيني 

حطيت ايدي على صدره ادفع بي حتى يعوفني 

بس هوَ يزيد بحضنته و يشدني عليه اكثر.. رفعت راسي باوعتله و حجيت بكسره... 

رواسي:أنتَ وصلتني لهاي المرحله أنتَ رسيم، هسه عوفني رجاءً و بعد لتجي ما اريد اشوفك ابد 

بعدني عن حضنه و نتر بيه.. 

رسيم:لج شسويلج بعد حتى ترضين، بعد ما عندي صبر رواسي اذا تطخ بعقلي اطلكج و اعوفج والله 

ابتسمت بوجهه و حجيت ب استفزاز.. 

رواسي:تسوي فضل اذا تطلكني، جديات ترا اذا تطلگني تسعدني هوايه رسيم و غيرك ميت على كلمه مني 

كمت من الفراش فتحت الكنتور اطلعلي ملابس 

و حجيت.. 

رواسي:صدكني اذا تطلگني اول ما تخلص عدة الطلاق اتزوج و اخليك تحلم ارجعلك بيوم بعد.. 

اخذت ملابسي و دخلت للحمام سبحت اريد 

جسمي يفك عليه بس ماكو كل عظمه بيه تأذيني 

سبحت بسرعه و بدلت ملابسي و طلعت، دخلت للغرفه لكيته بعده گاعد و فوكاها يدخن بغرفتي 

رواسي:امشي اطلع بَره فوكاها تدخن بغرفتي منو سمحلك؟ 

رفع عيونه يباوعلي بغضب كام من مكانه و اجه 

تجاهي يمشي بخطوات ثابته، يمشي خطوه خطوه.. 

صار كدامي سحب نفس قوي من الجكاره و نفخه بوجهي 

حاوط خصري بيده و رفع التيشيرت من جهه 

باوعتله بخوف و حجيت.. 

رواسي:رسيم لتسوويها حباب 

قرب وجهه مني و گال.. 

رسيم:اش ما اريد صوت 

باسني من شفتي بقوه و بنفس الوگت طفه الجكاره بخصري و حرگني بيها، عطت بالم مكتوم بسبب بوسته 

بقيت ابعد روحي عنه اريده يعوفني.. روحي فرفحت 

من الوجع.. انگطع نفسي صرت اضرب بي على وجهه حتى يبتعد عني 

و اخيراً ابتعد يتنفس بسرعه و يخزر بيه بغضب.. 

وگفت كدام المرايه و رفعت التيشيرت اشوف الحرك 

صاير احمر و يحرگني الوجع يضرب بگلبي 

باوعتله و گلت ببرود

رواسي:امشي نتريك حتى توصلني للشغل 

رسيم:مو اسف ابد تستاهليها حتى تبطلين كلامج السخيف

حجيت بعدم اهتمام.. 

رواسي:عادي مو اول مره 

فتحت باب الغرفه و نزلت جوه، شفت مسك 

بالحجله مالتها واكفه و صافنه على التلفزيون.. 

رحت عليها بستها و ابتعدت لما رسيم اجه يريد يشيلها 

عفتهم سوه و دخلت للمطبخ شفت امي دتجهز الريوك 

رحت عليها بستها و حجيت متسائله.. 

        

          

                

رواسي:لعد بابا وينه؟ 

جميله:راح للشغل 

رواسي:روحي يم نسيبج اني اكمل

جميله:تراضيتوا؟ 

اخذت الخيار و السجينه من ايدها و حجيت.. 

رواسي:لا يحلممم اراضي 

هزت راسها و طلعت من المطبخ، بقيت افكر شلون استدرجه و اخليي يجي يمي... حطيت القوري مال جاي على النار و خليت سجينه جواه اريدها تتجمر.. 

لزمت استكان بيدي و عصرته بكل قوتي و كسرته 

عطت ب اسم رسيم رأساً دخل عليه و بنظراته القلق و التوتر واضح.. 

اجه يمي شاف ايدي تذب دم حار بيها يمسح بالدم 

و يوخر بالگزاز الناعم.. 

رسيم:غير تنتبهين شلون انكسر بيدج! 

رواسي:چان بيدي و الحرك يأذيني ف ضغطت عليه و طگ بيدي 

رسيم:اويلييي منج روسيه 

خليته يلتهي بيدي و شلت السجينه من النار 

لزگتهااا بزنده عض على شفته بقوه و گال بصياح.. 

رسيم:بنت الكلب اني اعلمج 

دفعته بكل قوتي رجع ليوره و عطت بي.. 

رواسي:محد كلب غيرك و محد نذل غيرك و محد قندره غيرك امشي ولي منا لا احط السجينه بنص گلبك 

حط ايده على الحرك و يعصر بزنده عصر، باوعتله 

و حجيت بخبث.. 

رواسي:جيب ايدك احطلك مرهم ليلتهب 

رفع عيونه عليه خزرني و گال.. 

رسيم:يعني كلشي سويته تردي الي؟ 

رواسي:اخذ حگي منك مربع رسيمي 

عفته حاير بروحه و صعدت فوك اخذت اغراضي 

و نزلت اخذت سويج سيارته و طلعت رحت للمستشفى 

بوجهي رحت لغرفه دِلهَام فتحت الباب بقوه انصدمت لما شفت يمه رجال و هوَ واكف ديفحص بي.. 

حجيت بتوتر.. 

رواسي:اسفه دكتور بس.. 

قاطعني و گال.. 

دِلهَام:تعاي ساعديني

رحت يمه و سويت المطلوب سحبتله دم و اخذت العينات 

للمختبر، دخلت للحمام و رفعت ملابسي اشوف الحرك 

مابي شي بس يحرگني.. طاح حظك رسيم 

غسلت و طلعت من الحمام شافتني وحده من الممرضات 

انطتني خبر دِلهَام يريدني.. رحت عليه بس شافني اشرلي اكعد و گال... 

دِلهَام:شبيج رواسي؟؟ صاير شي وياج

كعدت كدامه و حجيت بتوتر.. 

رواسي:مابيه شي بس مريضه 

        

          

                

دِلهَام:رواسي أنتِ بالمستشفى جيكي وضعج صار فتره 

أنتِ مو على بعضج.. 

نزلت راسي و دموعي نزلت مقهوره كلش.. رسيم تعبني و قهرني هوايه.. اجه كعد كدامي رفع راسي بيده و گال بقلق.. 

دِلهَام:رواسي تبجين؟ شبيج منو وياج؟؟ 

بعدت روحي و مسحت دموعي و حجيت 

بصوت مهزوز..

رواسي:ماكو شي، بس اريد اخذ اجازه كم يوم كلش محتاجه ارتاح 

دِلهَام:ماري كلتلي يروحون سفره روحي وياهم

غيري جو 

اخذ ايدي بيده سحبتها من عنده و حجيت.. 

رواسي:حراام عليك تلزمني دِلهَام اني متزوجه لو نسيت

دِلهَام:اني دكتور و أنتِ مريضتي من افحصج ما الزمج؟ 

رواسي:هذا شي و هذاك شي

كمت من مكاني و اردفت.. 

رواسي:اترخص اني اروح اكمل شغلي 

دِلهَام:رجعي للبيت ارتاحي وراج سفره 

رواسي:شكراً دِلهَام على كلشي دتسوي ويايه 

دِلهَام:ماكو داعي تشكريني ما سويت شي 

طلعت من عنده و رديت على التلفون حاطته هزاز 

و خبلني كل شوي يهتز بجيبي.. 

رواسي:هااا شتريد!! 

رسيم:صايره حراميه مال سيارات حظرتج! 

رواسي:هيَ سياره مو احسن من ما اروح بتكسي و احد يخطفني 

رسيم:رجعيها حَبيبي يلا عندي طننن شغل و متواعد لازم اروح 

حجيت بتهديد.. 

رواسي:جايتك اصبرلي 

سديته من عنده و اخذت اغراضي و طلعت 

رجعت للبيت، اول ما فتحت الباب صار بوجهي 

دفعني بَره و اشر على السياره و گال.. 

رسيم:كدامي صعدي يلا 

رواسي:جبتلك سيارتك بعد شتريد اصيرلك شوفير؟؟

رسيم:رواسي

رواسي:الله ياخذها يارب 

رسيم:يومي قبل يومج 

رفعت ايدي و حجيت بصوت عالي.. 

رواسي:امين يارب امين 

دفعته و دخلت للبيت سئلتني امي.. 

جميله:شو راجعه من وكت؟ 

رواسي:اخذت اجازه و رجعت مابيه حيل و باجر وراي سفره 

        

          

                

اجاني صوته من ورايه گال.. 

رسيم:منو يكول تروحين ؟؟ 

نترت بي..

رواسي:محد طلب رأيك، بعدين شعندك هناا ماعندك بيت؟؟ 

رسيم:عمي الغالي طلب مني ابقى يمكم، و اني تعرفيني اموت عليه ما اكدر ارفضله طلب 

باوعت لامي و عطت.. 

رواسي:انتووو تردون تخبلوني؟؟؟ اذا هذا يبقى هنا اخذ بنتي و اروح... اني اريد اتطلكك منه و انتو تجيبوا يميي 

جميله:رواسي اذا ترفعين صوتج عليه مره ثانيه راسج اكسره فهمتي لو لا؟؟ 

اخذت مسك من يمها و صعدت فوك عفتها 

تسولف هيَ و رسيم.. طبگت باب الغرفه بقوه 

باوعت لمسك و حجيت بهدوء.. 

رواسي:مسوكتي ماما ننام لوشي؟ 

صارت تفرك بعيونها بقوه و تضرب بيه، وگت نومتها 

هذا مستحيل تفوته.. بدلتلها و نومتها على الجربايه.. 

طلعت جنطه حطيت بيها ملابس و اغراض و كل شي ممكن احتاجه بالسفره.. دك تلفوني طلعته من الجنطه 

شفت ادم يتصل بيه، فتحت الخط رأساً گال متسائل.. 

ادم:روسيه شلونج، خوما سوالج شي و اذاج؟ 

رواسي:بخير حَبيبي ليظل بالك، ميكدر يسوولي اي شي 

ادم:خابرتي ماري؟ ترا بالها يمج

رواسي:لا بعد هسه اخابرها، أنتَ خوما تأذيت؟ 

ادم:لا مابيه شي بس اريد اردها اله 

عطت بحماس.. 

رواسي:الله جوي و اجوائي، بغلاتي عندك اريدك تتذكر كلشي سواه بيه و تكسره تكسر تطحنه طحن 

ضحك بخفه و گال.. 

ادم:غاليه و الطلب رخيص

رواسي:فديتك ابن عمي، يلا خلي اخابر ماري و احسب حسابك باجر تجيني الصبح تاخذني لبيتها 

ادم:تمام تدلل روسيه

سديته من عنده و خابرت ماري حجيت وياها و طمنتها عليه و اتفقنه علمود السفره و شوكت لازم اكون يمها 

اندكت باب الغرفه كمت فتحته و رجعت بمكاني.. ما شفت منو الي دخل بس ماكو غيرهم لو امي لو رسيم.. 

بقيت اسوي بالاغراض و كمت من مكاني اخذت 

البوكس مال مكياج الي جابه ادم، تذكرت ما صورته 

بعدني.. رتبته و خليته بزاويه تصوير حلوه و اخذتله صور انداريت اريد اكعد على الجربايه شفته رسيم گاعد 

و مركز نظراته بيه.. 

تجاهلته و تمددت بالفراش... اجه تمدد ورايه و حضني 

و حط راسه برگبتي و گال.. 

        

          

                

رسيم:لشوكت تبقين بعيده يعني؟ 

رواسي:خاف الي نيه ارجعلك بس بعد حرگتك الي بالجگاره ما ارجع ما اريدك 

رسيم:أنتِ هم ما قصرتي شوفي ايدي شلون صارت 

درت روحي عليه صرنه وجه بوجه و حجيت بجديه.. 

رواسي:تستاهل رسيم تستاهل فكر بيه اني و شنو سويت بيه لك أنتَ خبلتني خاف متعرف! صرت مخبله مثلك 

رسيم:خبلتيني بحبج روسيه 

رواسي:و أنتَ دمرتني بحبك 

اخذت ايده بيدي بستها و حجيت بتوسل.. 

رواسي:ابوس ايدك رسيم طلكني اذا تحبني طلكني و خليني ارتاح ليش هالعذاب

رسيم:راحتي يمج، راحتي بيج روسيتي 

گلبت روحي على ظهري غمضت عيوني و حجيت 

بكسره.. 

رواسي:اخذ الي تريده مني و روح رسيم

رسيم:شايفتنييي هيج رواسي؟؟ 

رواسي:أنتَ خليتني اشوفك هيج 

كام من الجربايه و گال.. 

رسيم:هاي السوالف كلها متهمني والله، الي يهمني أنتِ و بس اريدج أنتِ 

كعدت و صرت اباوعله بنظرات حزن و حجيت.. 

رواسي:روح رسيم اذا تحبني صدك عوفني براحتي 

خليني اعرف افكر و اتخذ قرار صحيح كلشي ما اعرف عنكك اني 

رسيم:اريد احجيلج كلشي يخصني اريدج تتعرفين عليه اكثر 

رواسي:احجي اسمعك فهمني اريد اعرف أنتَ منو بالضبط.. 

كعد كدامي لزم اديناتي تنهد و گال.. 

رسيم:اني مو مافيا بس كل شغلي وياهم لازم اصير مثلهمم 

رواسي:ابويه شوكت عرف شغلك شنو؟ 

رسيم:بعد ما تزوجنه بكم يوم، قبل چان يعرف عندي مكتب عقارات اول مره خطبتج من عنده بس بعدين عرف اني ويه المافيا و العصاباتت

رواسي:كمل يلا

رسيم:والله يا رواسي من اول مره شفتج لما دخلتي لمحل ابوج أنتِ استوطنتي عقلي و گلبي عرفتج بنته و صرت اروحله هوايه و تقربت من عنده اكثر و حتى ايام اساعده بشغله بس لما خطبتج منه رفض 

رواسي:ليش رفضك ؟؟ 

رسيم:تعرفين السبب لان هوَ الي كتل امي 

رواسي:ليش خطفتني رسيم؟ ليش ما اجيتني و اعترفتلي بحبك و بكل شي چان ممكن نكون مرتاحين هسه 

رسيم:لما عرفت سبب رفضه هددته بيج و كتله اذا متسلم روحك اخذها منك 

رواسي:ليش ما سجنته أنتَ؟؟ 

رسيم:ماعندي اي دليل عليه خالي الوحيد الي يعرف بالسالفه چان مريض بي سرطان و بعد فتره توفه 

رواسي:اذا أنتَ حبيتني مثل ما تكول شلون كدرت تأذيني؟؟ شلون غيرتك سمحتلك تخلي الحيوانات الي جانو 

يأذوني بهاي الطريقه؟ 

رسيم:متندم والله رواسي متندم 

كمت من كدامه و عطت بي.. 

رواسي:أنتَ تعرف شلون جانو يتحارشون بيه و يتلمسون بجسمي و اني مربوطه لا حول و لا قوه!!! تعرف لو لاا ؟؟ 

بقه يباوعلي مصدوم ميعرف شنو يحجي صرت اروح و اجي بالغرفه محترك دمي، اردفت.. 

رواسي:ليش ما انسجنت أنتَ 

رسيم:ما اشتكيتي عليه!! و من عرفوني اني منو رأساً طلعوني

كعدت يمه و باوعتله و ركزت بعيونه، يباوعلي بهيام نظراته كلها حب اخذ وجهي بين ايده و صار يوزع حبه على شكل بوسات متفرقه...  حضنته بكل قوتي و بادلته بحب.. 

نسيت كلشي نسيت عذابي و كسرتي و كلشي للحظه وحده 

حسيت على روحي ابتعدت عنه بسرعه مسحت شفايفي 

بقوه و كل جسمي يرجف.. حجيت بجديه.. 

رواسي:روح منا رسيم روح 

رسيم:تحبيني أنتِ هم ليش نبقى بعاد و نتعذب ثنينه؟ 

رواسي:عذابي بدونك افضل من عذابي وياك، كوم رسيم روح منا و بعد ما اريد اشوفك ارجع تعال بغيابي شوف بنتك بس اني اطلع من حياتي رجاءً 

كام من مكانه نظرلي نظره طويله مليانه

احاسيس و مشاعر.. و گال.. 

رسيم:تدللين روسيتي، راح اطلع من حياتج بشكل يخليج تندمين على كل لحظه بقيتي بعيده عني بيها 

باوعتله بخوف و حجيت متسائله.. 

رواسي:شنو قصدك؟ 

باسني من راسي و گال.. 

رسيم:من يجي وكته راح تعرفين قصدي شنو، بس بوكتها ميفيدج الندم 

اخذ اغراضه و طلع من الغرفه و عافني بحيرتي.. 

يتبع...