رواية ذنوب على قيد الغفران الفصل السادس عشر 16 - بقلم براء
السادس عشر
#ذنوب_على_قيد_الغفران
#البارت_السادس_عشر
ايمان : طلعت من المطبخ وصعدت فوك اريد اجيب طحين حتى اخبز صار هواي ماخابزه صعدت للسطح همه خالين الطحين بالسطح فتحت باب السطح وانصدمت ... هاي شجاي تسوي ... شهالبخور والطكطكه هاي وجاي تحجين
سعاد : هاا صعدت اسوي حرمل
ايمان : هاي اول مره اشوفج تسوين حرمل شعجب !
سعاد : اي غير علينه عين يا ايمان تدرين ما شاءالله ولدنه عليهم العين وخاصه ولدج واحد دكتور والثاني يشتغل بالدوله وعنده املاك كلت اسوي حرمل يختي المشاكل ماجاي تخلص يجوز علينه عين حتى يطردها الحرمل تدرين ولدج اعز من ولدي
ايمان : كتيلي اعز من ولدج اي صحيح دتعالي نزلي فهد ميقبل واحد يصعد للسطح مالنه خلك لسانه
سعاد : اي خلي اطفي الحرمل واجي
ايمان : دجيبي اني اطفي وانزل
سعاد : لا لا مااريد اتعبج جيبي افره جوه بالبيت واطفي
ايمان : هاي شبيها من شوكت تآمن بهالسوالف عمري كله ماشفتها شعلت شمعه ... اخذت الطحين ونزلت اعجن
اروى : هاا يمه شجاي تسوين
ايمان : اريد اعجن واخبز يمه
اروى : جماله فوك التعب انوب تخبزين دعوفي يا يمه عايزه تعب انتي
ايمان : تدرين بيه ما اكدر اكعد خلي التهي بشغله وتدرين اليوم مسويه كباب عروك والكباب مو طيب اله وياا خبز حار وتعرفين فهد ماهو واذا اوصي اخوتج كل واحد يطلعي عذر شكل كلت اكوم اني اخبز احسن
اروى : براحتج يمه
__________________
فرح : اكلك فهد شنو رأيك اصبغ شعري
فهد : لارد
فرح : اباوع لفهد صافن واصلا مو يمي .... لزمت ايده فهد حبيبي انت وياي
فهد : هاا شتردين
فرح : صار ساعه احجي وياك وانت ولا يمك
فهد : لا وياج
فرح : اذا وياي شحجيت اني هسه
فهد : كلتي تردين نروح للغرفه واني مالي مزاج خليها لغير وقت
فرح : لا ماكلت هيج كتلك اريد اصبغ شعري شفت انت مو يمي احجي شنو الي شاغل بالك يله
فهد : بعصبيه وبعديييييين فرح تره راسي يوجعنييي وراح ينفجررر لتلحين انجبيييي وسكتييي عني
فرح : هاي فوك ما اسألك
فهد : محد طلب منج تسأليني خليج ساكته لا راسي شكبره صايره عايزه شويه ويطك وروحي واصله لخشمي اجيت هنا حتى ارتاح لتنكدين عليه لخاطر الله
فرح : خلص شبيك فهد ... براحتك شتريد تسوي سوي اني كايمه اسويلك جاي
فهد : شتردين تسوين سوي بس سكتي شويه
فرح : صار
فهد : خلي الجاي مر
فرح : ماشي حبيبي
فهد : رجعت نفسي على القنفه لزمت راسي الي راح ينفجر من الصداع عندي اللم فضيع .... اااخ احس روحي تسرعت ليش عقدت عليها جان خليتها ابيتي لحد ماترجع خالتها جان حاولت اسحب مفاتيح البيت من خالتها بالهدوء بالاجبار جان فكرت بألف طريقه ليش خاطرت هالمخاطره ورحت عقدت عليها صحيح هو مجرد عقد بس اني بحياتي مافكرت اسوي اي طقس من طقوس الزواج ويه اي وحده اله متأكد منها ... ادري البنيه هم انجبرت توافق خوفاً من عمامها وخوالها لو عدها بيت يلفيها ماجان وافقت بس اني شجاني عرضت عليها هالعرض اصلا مااعرف شلون اجت هالفكره على راسي
فرح : طلعت لكيته على صفنته من اجاني لسه شارد احس وضعه مو طبيعي ... تفضل الجاي
فهد : اخذته شكرا
فرح : فهد صاير وياك شي
فهد : فرح كومي من وجهي لا ابدي الستكان على وجهج تره اعصابي تلفانه
فرح : يعني بعد كم يوم اذا مرتك كلتلك شبيك تصب الجاي عليها
فهد : هو كد ماتلحين راح ابقه اعزب طول حياتي وحتى لو الله قاسملي مره هسه ماتت من كد ما تلحون
فرح : شجاك انهديت خلص سكتنه
فهد : غمضت عيوني بألم بس ارجع اخذ بندول راسي موتني اول مره يصير عندي هيج الم ... كله من وره سهاد الكح.... وعائلتها
فرح : ضل فهد لليل وطلع ... يربي شبي هالرجال حتى بوجهي ماباوع اليوم شصاير وياا
فهد : طلعت من فرح ورجعت للبيت اريد ارتاح وصلت للبيت صفيت ونزلت ... فتحت الباب صارت زينه بت فيصل كدامي
زينه : شلونك عمو
فهد : دنكت بستها هله حبيبه عمو شلونج
زينه : اني زينه انت شلونك
فهد : تعبان انطيني بوسه حتى اصير زين ... الله شهالبوسه الحلوه هاي ... هاج هاي فلوس خلي احمد باجر يشتريلج الدنيا هسه ليل يله عفيه بالسابعيه روحي نامي
زينه : صار عمو
فهد : دخلت جوه سلمت وصعدت لغرفتي
______________
غنى : كاعده اقره قران وسمعت صوت موبايلي شلته شفتها خاله سحر جاوبتها ... الوو
سحر : الوو هاا حبيبتي غنى شلونج
غنى : الحمدلله
سحر : عذريني حبيبتي ماكدرت ارجع بس والله ظروفي جبرتني حتى سألي فهد اني شرحتله كلشي اليوم
غنى : لتبررين خاله عادي خليج براحتج مو اول مره انضرب بوري من احد
سحر : غنى لتحسسيني بالذنب اني من غير شي اكل بروحي على مودج ... صدكيني مرض عمج خلاني مااشوف دربي رحت سويت الفيزه وكلشي ركض ركض حتى اخذه يتعالج
غنى : اني مطلبت منج تشرحيلي سبب عدم رجوعج مو هو الي قهرني اني الي قاهرني انتي استغبيتيني وضحكتي على عقلي بحجايتين بكيفج قررتي انو تسافرين وبكيفج قررتي انو اني اعوف واروح اعيش عد سهاد وبكيفج سلمتي
مفاتيح البيت لسهاد ووووو كلشي صار بكيفج واني مثل الغبيه شتكولين اكول صار لان جنت ضامنه انج راح ترجعين ويرجع كلشي لوضعه الطبيعي بس لا انتي ضحكتي على عقلي ورحتي سافرتي وعفتيني فليش جايه دتتبريين موقفج كافي جذب
سحر : ولج يمه كل الي سويته حتى احافظ عليج والمفتاح انطيته لسهاد حتى لا تعاندين وترجعين لذاك البيت وحدج انتي لوما تهميني مااسوي الي سويته جان كتلج راح اسافر وانتي ابقي يطبج طوب بس اني مااسويها ماكو ام تسوي ببتها هيج
غنى : بهدوء انتي تدرين اني هسه كاعده عد فهد
سحر : اي همزين اني كتله خليها عندك ينطي العافيه ماتوقعته يقبل
غنى : وعادي عندج ابقه ببيت رجال غريب
غنى : شكو بيها احسن ما تصفين بالشارع
غنى : طبعا مو اني صفيت بالشارع من وره اختج الله لا يوفقها .... راحت كلت لخوالي وعمامي وهسه اخاف حتى ارجع للبيت مالتنه ليروحون شو شيسوولي واني بنيه وحدي وماعندي احد ... وهسه غصباً ماعليه بقيت عد رجال غريب حتى صله قرابه ماكو بينه وبيني شفتي شصار بيه وبسببكم
سحر : قابل كاعد وياج هو انتي كاعده بشقه وحدج اعتبري نفسج ماجره منه الشقه واني ادزله فلوس الايجار
غنى : ابتسمت توقعتج متتقبلين هالشي ومن خوفج عليه تحاولين بشتى الطرق تفهمين خوالي الي صار حتى ارجع لبيتي بس اني اكلج انتي حلالج الوضع
سحر : غنى اني ادري بيج صايره عصبيه ومقهوره بس لتنسين اني خالتج وبمقام امج فلزمي لسانج كتلج بس يطيب عمج اني ارجع قابل هو بكيفي رجلي مريض يعني اعوفه يموت على حسابج عمج للحمام ميكدر يكوم اذا ما اساعده وانتي بنيه جبيره وتكدرين تعتمدين على نفسج كليلي ياهو الاولى ابقه وياا انتي لو الرجال الجبير
غنى : لتخافين عليه عسى ما يطبني قزرقط انتي متهتمين لان اني لاشيئ بالنسبه الكم ... سديت الموبايل وكعدت ابجي على حظي الطايح حظه ......... رفعت ايدي للسما ياربي بجاه حبيبك محمد واذا انت صدوك عادل اريد تاخذ حقي من خالتي سهاد وكل شخص اذاني ياربي راويني قدرتك بيهم .... بسببهم صفيت تايهه مااعرف وين اولي ... بس خلي ترجع خالتي حتى لو ليوم واحد وانوب اامن على نفسي بهذاك البيت وطز بيهم بعد شيردون يسوون خلي يسوون .... كمت طبيت للمطبخ شربت مي اباوع الاكل الي جابه فهد على حطته كولشي ما اكلت منه اصلا نسيته على الميز شلته خليته بالثلاجه لينعدم .... طلعت شلت القران ودخلت لغرفتي الجديده كعدت كدام ميز التواليت اباوع لوجهي مخرمش من يم ركبتي الحقير من جنت اقاومه يغرس اظافره بوجهي وركبتي حتى اثبت يمه كلما اتذكر موقف البارحه اضل ارجف تلمست ركبتي ودموعي تنزل ... هاي تاليتها اني الي محد طاخ اظفري تتعلم اصابع نكسه على جسمي ... غطيت وجهي ودموعي غركت وجهي عفيه دموع شوكت تخلصين يمكن لو اجمع كل دمعه نزلت من عيني بمكان جان صار عندي بحر دموع ....
الانسان شكد ما كان قوي المواقف الي يتعرضلها تقلل من قوته اكثر واكثر لمن يصفه بي الدهر يكون انسان ضعيف هش الى ابعد درجه اني شكد ماجنت قويه وصلبه الي صار ويايه من موت مروان لاخر موقف صار البارحه لو واحد ينفخ بوجهي انهار ... كمت من مكاني اذا اضل كاعده وساكته انجن خلي اكوم اشتغل مااريد افكر رحت بسرعه طلعت المنظفات من الحمام اجيت جريت الزوالي الي بالبيت اريد انظف رغم ما احس جسمي متكسر بس مااريد اكعد اريد اسوي اي شي يلهيني .... جريت القنفات وكعدت اكنس البيت وراها كمت للمطبخ كابلت الكاونتر كمت اجلف بي بكل حركه عبالك عندي عركه حتى المواعين النظيفه طلعتهن وغسلتهن وره ما كملت تنظيف بديت اعزل البيت عزلت الصاله والمطبخ .... ضليت لحد ما صارت بالوحده ب 12 بالليل رحت سبحت وتوضيت ووكفت أصلي صلاه الليل لحد ما كملت طبيت نمت
____________________
فهد : كاعدين نتريك واندكت الباب ... كام منذر فتحها دخلت مروه بت عمي
مروه : صباح الخير
الكل : صباح النور
ايمان :حبيبتي مروه شو مبدله خير صاير شي لو محتاجه شي
مروه : اي والله خاله علساس من اليوم ابدي اداوم ويه بت خالتي بالمختبر حتى اتمرن على شغلي اكثر تدرين هالسنه اني اتخرج ويرادلي هواي دارسه وداحاول اسهلها عليه فاقترحت عليه بت خالتي اداوم وياها بالمختبر واشوف المهم علساس حارث لو بابا يوصلوني بس طلعو وعافوني وهسه حرت منو ياخذني فأجيت لهنا بله زحمه اذا يكدرون الولد يوصلوني اكون ممنونه
ايمان : صدك جذب يمه يوصلوج وهمه الممنونين ... يمه فهد وصل بت عمك بطريقك
فهد : صار بس خلي اكمل ريوك واخذها
مروه : ابتسمت بكلبها اروح فدوه
ايمان : تعالي حبيبتي مروه تريكي لتستحين
مروه : لا خاله متريكه
منذر : صايره هادئه مروه ماعرفتج
مروه : ليش جنت مخبله قبل
منذر : لا والله بس الي اتذكره كفشتج شكبرها ونعالج بأيدج وتركضين وره علي الفاهي
علي : ههه سبحان مغير الاحوال شلون جانت وشلون صارت الوصخه ام كفشه صارت محلله هسه
مروه : باستهزاء تصدكون كلش ضحكتوني
منذر : احنه مو نضحكج احنه نضحك عليج
علي : هههه خطي
ه قصفها
فهد : كمت غسلت اديه واجيت يله مع السلامه محتاجين شي
ايمان : سلامتك حبيبي
فهد : يله مروه
مروه : طلعت ويه فهد يربي كون ابوس حارث وبابا اليوم على هالنسوه الحلوه هاي صعدت بالصدر يمه سيارته ريحتها تجنن ... اباوعله اجه صعد بكل رزانه داس بانزين وحرك بكل هدوء يربي شكد احبه ... احم شلونك فهد
فهد : الحمدلله انتي شلونج
مروه : والله تعبنه الدوام شوكت نتخرج ونرتاح
فهد : تتخرجين وتصير سوالف
مروه : ان شاء الله ... طبعا اني اعتذر زحمتك وياي اليوم وانجبرت تتاخر على شغلك بسببي
فهد : شنو السالفه قابل شمسوي اني انتي بطريقي
مروه : ابتسمت ... اكول فهد انت ليش دائما ساكت
فهد : ضحكت ليش مو جاي احجي وياج هسه
مروه : لا اقصد اغلب الوقت ساكت وحتى من تحجي كلامك قليل
فهد : هاي طبيعتي شسوي بعد
مروه : لك فديتك انت وطبيعتك
فهد : شكلتي ؟
مروه : هيج مو يمك
فهد : وصلتها للمختبر تفضلي
مروه : شكرا فهد تعبتك
فهد : ولو تدللين .... واذا ماكدر حارث يجيج خابريني او خابري واحد من الولد يجون عليج لتطلعين وحدج الظهر
مروه : اوك يله باي
فهد : باي .... طلعت لشغلي اول ماوصلت للمركز سمعت صوت عمر
عمر : فهد اكو واحد اجه سأل عليك
فهد : منو
عمر : مااعرفه بس شكله وتصرفاته غريبه حتى رفض يكول اسمه ويريد يحجي وياك
فهد : باستغراب شيريد مني يله هسه اشوفه ... دخلت لمكتبي شفت واحد عمره بالخمسين تقريبا كاعد حمحمت
: شلونك سيد فهد
فهد : اهلا بيك عفوا منك ولا صغرا بيك بس منو حضرتك
: سيدي اني فاعل خير اجيت ابلغك عن موضوع
فهد : تفضل
: بالاول انطيني الامان
فهد : الك الامان وما اخلي واحد يدنالك بس احجي
: سيدي اني اشتغل حارس بأعداديه مال ولد لاحظت بالفتره الاخير طلاب المراحل الاخيره بالحله يتجمعون بمكان معزول ومدري شيحجون وكلمن يدور وجهه ويروح شكيت بأمرهم لان السنه كلها اشوف هيج شي المهم كمت اراقبهم بين فتره وفتره لحد ما لزمت واحد فقير بيهم وجبرته يحجيلي طلع اكو واحد يضحك عليهم ويخليهم ياخذون ممنوعات وهالشي مو بس بهالمدرسه هاي مجموعات متوسعه تقريبا على كل المدارس ويكلك حتى للجامعات وصلت
فهد : زين متعرف معلومه عن اي واحد بيهم تتذكر شكل واحد اي شي
: سيدي جان يجي واحد على دراجه يبيع موطه وازبري من هالسوالف وكتلك يتجمعون عليه اغلب الطلاب بس هذيج الشله مال الشباب جانو يطولون وياا لمن طلع يبيعلهم ممنوعات وهمه ياخذون منه تدري شباب وطايشين ميعرفون مصلحتهم
فهد : هذا الي يجي على الدراجه شايف شكله انت
: لا سيدي دائما يجي ملثم
فهد : والله اجيت والله جابك هالمجموعه صار اشهر ندور عليها ... شوف اني راح ابلغ المسوؤلين والمختصين بهالمجال وساعتها نتحره عن الموضوع ونحاول نلزمهم باقرب وقت بس نحتاج مساعدتك
: اعتذر سيدي اني لان رجال اخاف الله واعتبر الولد امانه بركبتي اجيت بلغتكم حتى ابري ذمتي كدام ربي واني اجيتك الك بالذات لان ابني شرطي عندك جاي يتدرب ومن سولفتله كلي اجيك لان هو ميكدر يعوف المعسكر وهم لان انت امان وكد الثقه
فهد : هذي شهاده اعتز بيها وان شاء الله السالفه محلوله بس يحتاجلها وقت وبأذن الله هذوله حكمهم مأبد وعلى ايدي
: ان شاء الله ربي يحفظك
فهد : ويحفظ الجميع ... طلع الرجال واني خابرت على زملائي بسرعه بلغتهم وغانم اصدر امر بمراقبه المدارس بشكل سري وبالاخص وقت الحله حتى نكدر نلزمهم باقرب وقت ..... رجعت اكمل القضايا الي عندي وطبعا كد ماجنت عصبي اليوم اجه واحد من المساجين يموت جوه ايدي اليوم كله فكري يم غنى وحاير شسوي وياها وشلون بوضعها .... دزيتلها رساله بانو راح اجي .... كمت دوامي وطلعت للسوك تسوكت للشقه كلشي لحوم خضروات فواكهه حتى منظفات جبتلها ورحت على محل نسائي اخذتلها جم شغله تخص البنات صارت عيني على فوطات صحيه جريتهن بسرعه مااريد واحد يشوفوني كلشي يصير خاف تجيها وتتورط .... شلت الغراض خليتهن بسيارتي وطلعت للشقه ماكو نص ساعه ووصلت اخذت قسم من الغراض ونزلت صعدت للشقه فتحت الباب لكيتها لابسه جادر وكاعده تقره قران ... السلام عليكم
غنى : باستغراب وعليكم السلام
فهد : عوفي القران شويه وتعالي دخلي ذني للمطبخ علما اجيب الباقي نزلت جبت باقي العلاليك وصعدت طبيت للشقه وسديت الباب دخلت خلين الغراض على الكاونتر ... تنهدت بتعب
غنى : شنو هذا ؟
فهد : شتشوفين يعني
غنى : بس ماله داعي تتسوك كل هالمسواك وتصرف كل هالصرف انت ممجبور
فهد : بهدوء لا مجبور نسيتي انتي مسوؤليتي
غنى : حتى اذا اني مااقبل هيج تسوي يعني فوك ما مكعدني ببيتك ببلاش انوب تصرف عليه
فهد : الاخو شنو دوره تجاة اخته مو يخليها مامعتازه شي ويصيرلها سند كتلك اني اخوج وانتي مثلج مثل ورده واروى وليلى وهسه صرتي مسوؤليتي ولا يمكن اهملج
غنى : دمعت عيوني بس فهد انت دتحرجني هيج
فهد : ماكو شي اسمه احرجج تكدرين تعتبرين هذا كله دين من تتخرجين وتتعينين رجعيلي
كل فلس صرفته عليج واذا تحبين اسويلج عقد هم ماعندي مانع
غنى : باوعتله صدكني لو شما اسويلك ما اجازيك
فهد : ابتسمت اول مره تحجين باحترام
غنى : هاا
فهد : متعلم عليج سليطه لسان فاجئتني لطافتج تصدكين
غنى : ما عرفت شنو اجاوبه ضليت ساكته ... احم شكرا مره ثانيه على المسواك
فهد : لا عادي تدللين .... يله اني اروح محتاجه شي بعد
غنى : اريد اطلع لنرجس
فهد : خليج هالاسبوع بالبيت كتلج الاوضاع مخربطه هسه وخوالج حادين سنونهم عليج خلي تهدئ الاوضاع ووين ما تردين ترحين روحي
غنى : ماشي
فهد : يله تعالي سدي الباب وراي وقفليها هاج هاي نسخه من المفاتيح
غنى : اخذت المفاتيح منه وطخت اصبعي بايده بسرعه قشعر جسمي
فهد : يله مع السلامه
غنى : احم الله وياك ... اجيت اسد الباب هو رجع
فهد : بعد اسبوع دوام الجامعات
غنى : اي وشنو يعني
فهد : اي شلون ترحين للكليه والشقه بعيده
غنى : اصعد عبريه
فهد : لا ماكو عبريه اولا تتاخرين وثانيا الوضع مو امان شوفي راح اخليلج خط او انتي شوفي بالكليه بنات على طريقج عدهن خط سجلي وياهن ولتشيلين هم للفلوس اني ادفعهن
غنى : لا شكرا فهد ماكو داعي اني اروح عبريه وبالنسبه لكلامك فعادي اطلع من وقت واني متعلمه على العبريه واكدر ادير بالي على نفسي
فهد : بس
غنى : رجاءاً فهد لتضغط عليه
فهد : خلص براحتج ... يله تعالي سدي الباب واني كل يومين اخابرج اشوف شنو محتاجه
غنى : ماشي .... سديت الباب ودخلت عزلت المسواك الي مله الثلاجه ورحت سويت جاي وكعدت اشربه ما اشتهي اكل
فهد : طلعت منها واني بالي يمها وضعها ماعجبني وجها اصفر وشاحب انتبهت اكو ندبات على وجها مبينه مالت ضرب .... هالبنيه غريبه عجيبه مرات احسها قويه ومتمرده ومرات احسها ضعيفه بحيث حجايه وحده تنهيها .... حركت سيارتي رايح لفرح مااريد ارجع للبيت ... اول ماوصلت اخذتها للغرفه
__________________
نرجس : كاعدين نتغده وحجت امي
ام جعفر : اكلج يمه شخبار غنى صار هواي ما شايفتها البذاته حتى سؤال ما سألت عني من شالت لليوم
نرجس : باوعت بوجوهم اباوع لجعفر تنهد بضوجه ... لا يمه غنى عدها شويه ظروف هالفتره وملتهيه بالشغل
جعفر : هي هسه عد بيت خالتها مو
نرجس : اي
ام جعفر : الله يساعد كلبها على هالخاله العوجه
جعفر : ليش شمسويه خالتها
ام جعفر : يمه هي من وكفت وره شهر طالبه الورث وامها حتى السنه مادايره عليها غسلت ايدي منها
جعفر : ناس متستحي
نرجس : كلها بجفه ومن طلعو غنى من البيت بجفه ثانيه خطيه تشردت من وراهم
ام جعفر : ربج ميعوف عبده حاير لابد يجي يوم وبعد التعب والشكه تجي الراحه والسعاده
جعفر : خطيه غنى متستاهل ... خوش بنيه وحبابه
نرجس : غنى حبابه الى درجه بس حظها اعوج كلما يشوفها يتفل عليها وهي هم تبلعها وتسكت
ام جعفر : انتي شنو من بنيه لابارك الله بيج على هاللسان الزفر
جعفر : كمت الحمدلله تعالي نرجس اريدج
نرجس : كمت ورا ... هاا شكو
جعفر : اوكفي عدل لا انطيج راشدي على وجهج اصحيج
نرجس : افف هاي وكفت عدل ... احجي
جعفر : اريدج تحاجين غنى
نرجس : بشنو
جعفر : اريدج تحاولين تقنعيها بموضوع
نرجس : باستغراب شنو من موضوع
جعفر : اريد اتقدمها بس هي رافضه واريدج تقنعيها بيه يعني احجيلها عني حاولي تفهمين منها شلون هي تشوفني .... يعني شكد ما تكدرين حاولي تقنعيها تبينيلها مشاعري تجاها
نرجس : يعني انت خطبتها ورفضت
جعفر : تقريبا اي وكلتلي شايله فكرة الزواج من بالها
نرجس : واني ليش اخر من يعلم
جعفر : هسه ديله الي يسمعج يكول اذا دريتي راح تشرميها .... هسه شكلتي تساعديني
نرجس : شنو المقابل
جعفر : انجحج بالشهر الاول من الكورس
نرجس : احلف
جعفر : والله
نرجس : ماشي اني راح اساعدك بس لأجل عيونك بس لان احب غنى واريدها تعيش ويانه بنفس البيت
جعفر : مو بس انتي ترديها بهالبيت حتى اني
________
ايمان : هاا ليلى امي شتردين
ليلى : اريد احجي وياج خاله
ايمان : اي يمه تعاي كعدي
ليلى : خاله اريد ارجع لبيتي
ايمان : اي يمه زينه العقل هاي المره مالها غير بيتها ورجلها وجهالها
ليلى : صحيح كلامج اني فكرت بالموضوع واريد ارجع صارلي شهر بعيده عن بيتي وجهالي والحجي بيناتنه حتى لوسام اشتاقيت وكلما اريد اخابره اتردد
ايمان : شوفي يمه روحي خابري واعتذري منه واعتذري من عمتج ام رجلج لان سوايتج وياها مو سواية وحده عاقله وبت ناس
ليلى : اعرف بس اني تسرعت بتصرفاتي ومستعده كلشي اسوي حتى يرجعني وسام
ايمان : عفيه عليج وهسه شتردين بعد
ليلى : اخاف اخابر وسام ويردني فاجيتج حتى تحاجين فهد يقنعه تدرين وسام يحب فهد ويسمع كلامه
ايمان : من عيوني من يفرغ اني احاجي واخلي يخابر رجلج
ليلى : تسلم عيونج خاله شكرا
ايمان : العفو يمه .... طلعت ليلى هزيت راسي هالجيل ابد ميعرف يتصرف دومه تصرفاته مستعجله ومو موزونه ... ولو اني ليش احجي عليها يجوز بناتي يصيرن اتعس منها من يعرسن
____________
اروى : صار هواي مامخابره البنات خلي اخابرهن مكالمه جماعيه اتصلت عليهم فتحت نرجس وبعد غنى ماكو شويه وفتحت .... عدلت كعدتي هلووو
نرجس : هلوو ولجن لتباوعن على الكفشه
اروى : ههه شلونجن
نرجس : الحمدلله
اروى : وانتي غنى
غنى : بهدوء زينه
اروى : خير شبيج غنى
غنى : شويه مالي خلك
نرجس : اكيد خالتج العوجه مضوجتج مو
غنى : لا بس اني شويه تعبانه ... بنات تعذرني مااكدر احجي غير وقت اخابرجن
اروى : براحتج حبيبتي
غنى : سديته مالي واهس اسوي شي ... تعبانه احس جبل نايم على صدري شعور صعب مو بس صعب مميت ... من جهه ضايجه على الي صار ومن جهه ثانيه احس بفهد تلبس بيه وصار مجبور يدير باله عليه .... باوعت للتقويم بعد اسبوع دوامي شلون بيه ويه روحتي ورجعتي انوب اوووف بيه اصرخ صوت يمكن اهز العماره كلها بي .... حسيت نفسي جوعانه كمت دخلت للمطبخ اسوي شي حتى اكله فتحت الثلاجه طلعت طماطه دركتها وكليتها خليت الطاوه وكعدت خليت ليمون عليها ومديت ايدي حتى اكل بس صعدت اللكمه لحلكي مرت ذكرى على بالي
قبل سنه
مروان : نونه نونه
غنى : بابتسامه هاا حبيبي
مروان : جوعان
غنى : يخسى الجوع شتريد اسويك اني حاضره
مروان : اريد تكليلي طماطه وتخليها تكيس بالطاوه وتعصريلي عليها ليمون بحيث تصير حامضه الله
غنى : اباوعله كام يمك هههههه هاي هيج تحب هالاكله
مروان : اموت عليها
غنى : ابتسمت صار من عيوني هسه اسويلك واني الممنونه
عوده
غنى : نزلت اللكمه ونزلت دموعي وياها ... سوده عليه حبيبي جنت تحب هالاكله تعال شوف سويتها مثل ماتحبها انت دفعت الصينيه عني وغطيت بوجهي باجيه بصوت ... كلشي حلو بحياتي صار ذكرى كل لحظه سعيده عشتها فقدتها كلها بظرف مده قصيره فقدت لحظات ويه ناس العمر كله متتكرر .... مسحت دموعي متنهده شلون وتالي ويايه الى متى ابقه هيج ويني اني وين قوتي .... شلت الصينيه خليتها بالمطبخ وطلعت تمددت ... شفت رساله من فهد جاوبته
فهد : نايمه
غنى : اي
فهد : والنايم يراسل
غنى : ليش راسلتني
فهد : باجر يجي البواب ابو محمود يبدل الج الغاز واللول (الحنفيات) لان شفتهن اليوم ميشتغلن عدل وقناني الغاز انطيهن اله يعبيهن ومن تطلعيله لتاخذين وتنطين وياا ابد
غنى : صار
فهد : يله اخذي راحتج
غنى : كتبتله فهد انت متندم لان ساعدتني
فهد : ابدا ما متندم بس اتمنى متخليني اتندم لان ساعدتج
غنى : ان شاءالله متتندم
فهد : اتمنى هالشي يله اني اروح مع السلامه
غنى : مع السلامه
فهد : سديته مباوع لفرح شبيج
فرح : ويامن تتراسل
فهد : ميخصج
فرح : اول مره اشوفك تراسل احد اكثر شي اشوفك تخابر مو تراسل
فهد : باوعتلها عجبني اراسل وين المشكله
فرح : براحتك
________________
غنى : صار اسبوع على وجودي بهالشقه وقبل يومين خابرت فهد بلغته اريد اطلع اجيب جم شغله من السوك لان عندي دوام والحمدلله مشت الامور تمام واليوم اول يوم الي بالسنه الجديده .... بدلت وطلعت من الشقه تقابلت ويه وحده عمرها متوسط شعرها اشقر قصير ورشيقه مامبينه جبيره ومبين عليها غنيه من لبسها صعدنه ثنينه بالمصعد
:مرحبا
غنى : بهدوء مراحب
:انتي المؤجره الجديده
غنى : اي
:عايشه وحدج هنا
غنى : اي
:شعجب اهلج خلوك وحدج هنا
غنى : حرت شنو اجاوبها .... مو اني مو من بغداد واجيت هنا ادرس فأهلي ميقبلون ابقه بالاقسام الداخليه فأجرولي شقه هنا
: هاا مو اكول ماكو بنيه تبقه وحدها بشقه ... مديت ايدي اعرفج على نفسي اني ود اشتغل مهندسه وزوجي دكتور ساكنين بهالعماره من سبع سنوات وانتي
غنى : غنى قسم انكليزي مرحله رابعه
ود : حبيبتي تشرفت بمعرفتج
غنى : الي الشرف طلعنه من المصعد هي راحت بسيارتها واني تمشيت لمكان العبريه اشرت وصعدت وصلو لطريق الجامعه صحت نازل دفعت الفلوس ونزلت اتمشى وصلت للبوايه دخلت بوجهي متوجهه لقسمي لكيت نرجس ... اول ماشفتها حضنتها
نرجس : ههه هاي هيج مشتاقتلي
غنى : هواي كولش هواي
اروى : لعد واني شو محد سلم عليه
غنى : حضنتها حبيبتي اروى شتاقيتلج
اروى : حتى اني
غنى : كعدنه نسولف لحد ما بدت المحاضرات ودخلنه وطبعا هالسنه هم يجينه استاذ جعفر ياخذنه محاضرتين بالاسبوع
مرتضى : استاذ عادي ادخل
جعفر : ليش متأخر من شوكت بدت المحاضره
مرتضى : اسف استاذ ما انتبهت
جعفر : دتفضل وبعد لتتاخر
غنى : اجه مرتضى كعد ورايه
مرتضى : صباح الحب
غنى : باوعتله صفح ودرت وجهي شلون عين صلفه
مرتضى : جوسه نرجس
نرجس : هاا
مرتضى : وجعاا ههه
جعفر : مرتضى اي حركه منك بعد اطردك خلونه نحجي بهدوء رجاءا وانتي انسه نرجس صوتج ما اسمعه
مرتضى : حاضر استاذ
غنى : كملنه محاضرات وتوالت علينه المحاضرات طبعا هالسنه مبين هواي حيضغطون علينه لان سنه التخرج ولازمها دراسه وتعب لان المعدل مطلوب وبشده هالسنه لان التعيين يعتمد عليه . .. افف كملنه وطلعنه شفت فهد واكف بره
فهد : تقربت وكفت كدامها شلونج
غنى : الحمدلله
فهد : محتاجه شي لتخجلين مني تكدرين تعتبريني صديقتج حتى مو صديقج
غنى : ابتسمت لا شكرا فهد كولشي ممحتاجه
فهد : انتبهت عليها عدها غمازات ثنين بخدودها بحيث من ابتسمت دخلن خدودها لجوه ... احم هذا واجبي ... عفيه ماشفتي اروى
غنى : اعتقد راحت للمغاسل ... درت وجهي شفتها اجت هاي اجت يله اني اروح
فهد : تعالي اني اوصلج
غنى : لا ماكو داعي باي .... عفته ومشيت انتظرت العبريه وصعدت وهم نزلوني بنفس المكان وتمشيت للبيت صعدت للشقه فتحتها ودخلت ذبيت ملابسي ودخلت بوجهي للحمام سبحت وطلعت لفيت شعري حتى بدون تنشيف ونمت همزين صليت بالمصلى وارتاحيت تمددت يمه متت من التعب اجه على بالي كلام فهد .... ياترى ليش غير اسلوبه ويايه بعد ما كان يعاملني باسلوب حاد نوعا ما هسه بديت استلطفه .... اجت على بالي ملامحه فهد عيونه كبار وسود وشعره هم كثيف ويلمع من النظافه جسمه مرتب لا ضعيف ولا سمين طويل وطوله حلو ... مشيته رزنه وكلها ثقه كلامه قليل جدا مرات احسه شكد ماهو جدي شكد ما هو يستهزئ ويتلاطف ببعض الاحيان ... يمكن اغرب شخص قابلته هو فهد
__________
ياسمين : تعال ولك محسن
محسن : هاا حجيه
ياسمين : تعال دكلي على عمتك نسرين هذا الموبايل مابي دكم وين ما احط اصبعي مدري عليمن ادخل
محسن : والله صوجنه خلينالج موبايل لا وحفيدج الشفيه مشتريلج اخر اصدار وانتي متعرفيله واحنه مبتلين
ياسمين : غصباً ماعليك ورجلك فوك راسك ابو الوصخ عود هو يعرف اكثر مني
محسن : حجيه عيب مو عرسنه وخلفنه وهم تهينين بينه مو حتى عيب من مرتي
ياسمين : ضاحظك وطاحظ مرتك الفاهيه الوصخه مثلك زين
محسن : يابويه كصيتي والدينه رحم الله والديج هذا حجي مره حاجه بيت الله
ياسمين : دكل تبن وخابرلي على عمتك
محسن : صار تفضلي
ياسمين : الوو هاا شلونج يمه شوكت تجيني كلبي نار عليج ... هالسايب ليش ميجيبج يمي شنو صايره عنده كرامه
نسرين : ههه لا يمه بس ماعندي مجال اطلع ان شاء الله من افرغ اجيج
ياسمين : خوش ... وشصار بشغلت ابنج
نسرين : عود من اجي احجيلج متنحجه على الموبايل
ياسمين : ماشي تعالي باجر وفهميني
__________
- يتبع الفصل التالي اضغط على (ذنوب على قيد الغفران) اسم الرواية