رواية رواسي الدهر الفصل الخامس عشر 15 - بقلم روح الدليمي
➰➰➰➰➰➰➰➰➰➰➰
مرت فتره مو قليله و اني ببيت اهلي.. اول ما رجعت كلهم تعاركوا ويايه بسبب كلامي السخيف الي حجيته لرسيم حتى ادم رزلني.. بس لما حجيتلهم كلشي بدون تحشيش ابويه رفض انو ارجع لرسيم اذا ميصلح كلشي
و يتحسن و على گولته يرجع رسيم الي عرفه بالبدايه..
و اهم شي يختار اني لو هيا تبقى وياه..
بهاي الفتره خلصت مدة التطبيق و نجحت ب امتياز
و بقيت اداوم بنفس المستشفى..
دك تلفوني باوعت ماريا دتتصل، جاوبتها بملل..
رواسي:هلا ماري
ماريا:هلا گلبي شلونج، صار فتره ماكو ظل بالي عليج
رواسي:ماكو نفسيتي مزفته يومي بين الدوام و البيت
ماريا:شنو رأيج نطلع سفره للشمال؟
رواسي:فكره حلوه بس الدوام شلون؟
ماريا:ميرادلها شي اخذي اجازه كم يوم و خلي نسافر، راح نروح اني وصديقاتي تعالي أنتِ هم
رواسي:و مسوكه وين اعوفها؟
ماريا:مو تعوفيها يم امج من تداومين
رواسي:اي
ماريا:لعد عوفيها هنَّ ٤ ايام و نرجع باليوم الرابع الصبح
رواسي:ما اعرف اشوف وضعي و اردلج خبر
ماريا:لتطولين عليه ترا عكب باجر راح نروح
رواسي:تمام باجر انطيج خبر
سديته منها و كعدت افكر بكلامها، نفسيتي كلش محتاجه سفره اغير جو صار هواي ممسافره.. ماري كلش حبابه قوت علاقتي بيها هوايه بهاي الفتره و صارت كلش مقربه مني شخصيتها فرفوشه و تحب الونسه
و دائماً تطلعني من المود الكئيب..
نومت مسك و عفتها على الجربايه و نزلت جوه لكيت امي دتسولف بالتلفون كعدت يمها انتظرها تكمل، خلال كلامه عرفتها دتحجي ويه رشا... وره عشر دقايق يلا سدته باوعتلها و گلت..
رواسي:بس اريد افهم شوكت لحگتي تاخذين رقمها بنص الهوسه؟؟؟
ضحكت و گالت ..
جميله:اخذته من تلفونج
رواسي:صايره تلعبين بتلفوني انوب حلو حلو
جميله:مسكه وينها
رواسي:نامت
تقربت عليها حضنتها و بستها گالت ..
جميله:گولي شنو تريدين بلا لواگه
رواسي:ياااا اني صرت لوكيه؟؟
جميله:گولي حَبيبتي شبيج
رواسي:تعرفين ماريا أنتِ
جميله:هاي الي اجتج هذاك اليوم الكرديه مو؟
رواسي:ايي عزمتني على سفره للشمال ٤ ايام
جميله:و دوامج؟
ابتعدت عن حضنها عدلت كعدتي وحجيت..
رواسي:اخذ اجازه هنَّ بس ٤ ايام و كلش محتاجه سفره
عادي اروح؟
رفعت اكتافها و گالت ..
جميله:اني معليه شوفي زوجج و ابوج
رواسي:رسيم شعليه بيه مو يمكم اني!
جميله:حتى لو بنتي يبقى زوجج و ابو بنتج
رواسي:ما اريد احجي وياه، طول الفتره الفاتت ما كلف نفسه حتى يخابر ويسأل على بنته
جميله:منو كلج ميسأل؟ اصلاً يوميه يجي هنا يشوفها و يروح
حجيت بصدمه..
رواسي:شوو اني ما اعرف؟؟
جميله:هوَ ميريد تعرفين لذلك يجي بوقت أنتِ بالدوام حتى لا يشوفج و لا تشوفي
برطمت مقهوره و على شوي ابجي..
رواسي:يعني صدك بعد ميريدني؟ نفذ كلامه ماما رسيم بعد ميريد ارجعله!
جميله:اذا أنتِ مطيحه حظه للرجال بسوالفج و كل كلمه و الثانيه تهددي تعوفي و هسه لما عافج صار غالي؟؟
دمعت عيوني و حجيت بقهر..
رواسي:ردته يتغير والله اني احبه لرسيم ابتعدت عنه حتى يجبر روحه و يتغير للاحسن
كمت من مكاني مقهوره، رجعت صعدت بغرفتي
طفيت الاضويه و فتت بفراشي غطيت راسي و بجيت..
عافني و بعد ميريدني، تخلى عني بسهوله..
وخرت الغطه عني بعد ما دك تلفوني شلته من الكومدي
باوعت ادم ديتصل جاوبته و گلت بفرح..
رواسي:ادممم شوكت رجعتت؟؟؟
ادم:البارحه بليل
رواسي:الحمدلله على سلامتك عيني
ادم:هسه يجيج رسيم يعميها الج
رواسي:ميجي ميريدني اصلاً
ادم:بعده ما حجه وياج؟
رواسي:لا و ما اتوقع يحجي
ادم:خلي يغار عليج و شوفي اذا ما اجاج ركض
ابتسمت بخبث و حجيت..
رواسي:شوو تعااال اليوم اطيح حظه من الغيره
ادم:هاا اني كبش الفداء قصدج
ضحكت و گلت..
رواسي:لا حشاك بس تعال ضايجه طلعني شوي مو بنت عمك اني
ادم:العصر اريد اجيكم اجيبلج هديتج ما نسيتج
حجيت بحماس..
رواسي:شجبتلييييي؟
ادم:من اجي تعرفين يلا اروح اتغده اني و انام من اكعد اجيكم
رواسي:لتنسى الهديه ترا ما افوتك للبيت
ادم:صايرين يابه
سديته من ادم و صرت افكر شلون اخلي رسيم يغار عليه؟ ماكو غير دِلهَام و ادم.. بس دِلهَام عيب لا ميصير
ادم انسب شي شما اسوي ميحجي.. كمت من مكاني دخلت للحمام سبحت و طلعت للغرفه بدلت ملابسي
و رضعت مسك حتى تبقى نايمه و نزلت جوه
لكيت ابويه توه راجع من شغله
سلمت عليه و كمت ساعدت امي صبينه الغده و
كعدنا نتغده و امي و ابويه ينتاقشون بخصوص شغل ابويه
ناوي يوسع شغله و يفتح اكثر من فرع
بقيت استمع الهم بصمت بدون ما اشارك باوعلي ابويه و گال..
راشد:روسيه شبيج ؟
رواسي:مابيه حَبيبي دا اسمعكم
جميله:صديقتها عازمتها على سفره تريد تروح
گال متسائل
راشد:وين و منو صديقتج؟
رواسي:ماريا اخت الدكتور دِلهَام، عزمتني على سفره للشمال ويه صديقاتها
راشد:شكو بيها روحي غيري جو
ابتسمت و حجيت بفرح..
رواسي:صدككك عادي؟؟
راشد:اني ماعندي مانع بس شوفي رسيم خاف ميقبل
طبگت حواجبي معاجبني و گلت..
رواسي:شعليههه هوَ؟ مو ميريدني بعد شكو الا اخذ الاذن منه!
راشد:عيب رواسي و حرام تروحين لاي مكان بدون علم زوجج
رواسي:شو كلكم صرتوا تحبون رسيم بعد ما جنتو تكرهوا؟
جميله:يبقى زوجج و نحبه على حبج
رواسي:ما احبه اني اكرهوا وياي
راشد:مو كل شي لازم يمشي على مزاجج رواسي اكبري عاد ترا مو طفله أنتِ !
تركت الاكل و كمت من مكاني و حجيت..
رواسي:الحمدلله شبعت اني اروح لغرفتي
عاط بيه ابويه و گال..
راشد:روااسييي ساعدييي امج يلااا
رواسي:خلصوا و اجي الم كلشي اني بس اشوف مسك خاف توكع من الجربايه
عفتهم و صعدت فوك كلهم صاروا ويه رسيم ضدي.. ساحرهم ابو السحوره هوَ و مرته الحيه
شفت مسك بعدها نايمه اخذت تلفوني و اتصلت على عذراء من يوم الاجيت محاجيه ويه واحد بيهم..
بقه يدك شويه و جاوبتني بعتب..
عذراء:زين والله تذكرتينه و خابرتي
رواسي:عذارييي شلونج حَبيبي
عذراء:شكد بذاته امج احسن منج كل كم يوم تخابر تسأل
رواسي:مبتعده عن الكل طاكني اكتئاب بسببه ياخذوني لمستشفى المجانين و داعتج
عذراء:شلونج احجيلي مرتاحه؟
رواسي:اكلها طاكني اكتئاب تكلي مرتاحه
عذراء:مو أنتِ ردتي يعوفج و هاي عافج بعد شكو؟
رواسي:شلونه وينه هوَ ؟
عذراء:زين الحمدلله ملتهي بشغله و قليل نشوفه
رواسي:و الحيه مالته مرتاحه بغيابي صار الها و بس
ضحكت و گالت ..
عذراء:شكد قديمه أنتِ لج طلگها ثاني يوم و رجعها لاهلها
حجيت بقهر..
رواسي:يعنييي طلگهاا و ما رجعني!!
عذراء:ما اعرف شحجي والله بس أنتِ الي عفتي رواسي
و رسيم مستحيل يتنازل و يرخص روحه لشخص مرايده
رواسي:ايييي ابو المافيا شاطر بس يخطف و يجبر على الزواج بس ميعرف شلون يرجع مرته قنااادر عليك رسيم النذل
ضحكت و گالت ..
عذراء:متابعته على الانستا أنتِ؟
رواسي:لا ليش هم عنده انستا المافيا
عذراء:هسه ادزلج حسابه تابعي و شوفي شلون عايش حياته و ممهتم.. أنتِ الخسرتي محد غيرج
حجيت ب استعجال..
رواسي:دزيلي بسرعه خلي اشوف شيصخم بدوني
عذراء:رواسي عوفج من رسيم امج كلتلج اني و رشا ثنينه حوامل؟؟
صرخت بفرح و حجيت..
رواسي:يااااييي گولي والله
عذراء:اي صار شهرين تقريباً
رواسي:يا روحي الف مبروك ربي يتمملكم على خير و يفرحكم
عذراء:امين يارب
سديته منها و دزتلي حساب رسيم رأساً دخلت على حسابه
شكد مرتب و المنشورات كلهن على حسب الالوان
حسابه عام دخلت لستورياته اخر ستوري قبل ساعه
وحده ماخذتله صوره و مسويتله منشن و كاتبه
"With the boss"
و هوَ موجهها يمه و كاتب "دكتورتنا الجميله"
رواسي:قندره عليج و على البووس مالتج
شوي و اجاني طلب متابعه من حسابه وافقت عليه
و خابرت ادم بقه يدك و ما جاوبني..
كتبتله..
رواسي:هسه تجي بسرعه اليوم احرك عشيرته
ما شافها يعني نايم بقيت اروح و اجي بمكاني رجعت
دخلت للواتس على رقم رسيم و كتبتله..
رواسي:ممكن نحجي؟
شافها رأساً و طلع من المحادثه.. بقيت انتظر يجاوبني
بس ماكو رد.. شمرت تلفوني بالگاع متعصبه اجه صوت رساله رأساً شلته من الگاع باوعت كاتبلي
رسيم:خير؟ بشنو نحجي!
رواسي:اني راح اسافر و ابويه ميقبل اروح الا انطيك خبر
رسيم:ميخصني شتسوين سوي
اخذت سكرين للمحادثه و دزيتها لابويه
و رجعت كتبتله..
رواسي:بالضبط ميخصك
شافها و مارد رجعت كتبتله..
رواسي:شكد اكرهك نذل
كتبلي..
رسيم:تموتين على الانذال
دزيتله ايموجي مال واحد نفسه تلعب و طلعت من المحادثه.. نزلت جوه لكيت امي واكفه تريد تغسل المواعين وكفت يمها و گلت..
رواسي:روحي كعدي اني اسويهن
جميله:يلا اني راح اخدر جاي
ابتعدت عن السنك وكفت بمكانها و غسلت المواعين و هيَ خدرت جاي و راحت كعدت.. خلصت المواعين و صبيت جاي النه و اخذته كعدت و گلت..
رواسي:بابا شفت كلام رسيم؟
راشد:اي
رواسي:يعني عادي اروح؟؟
راشد:روحي بنتي تونسي
كمت عليه بسته و رجعت كتبت لماري..
رواسي:حَبيبي راح اجي وياكم بس باجر ارتب مال الاجازه
شوي و كتبتلي..
ماريا:حماااس راح تكون سفره بناتيه ناريه
رواسي:نروح بالطياره مو؟
ماريا:لا بسيارتي ونسه اكثر
رواسي:حلو متفقين
ماريا:جيبي لبس سباحه وياج بيتنه هناك بي مسبح
رواسي:ماعندي عود اشتري مناك
ماريا:لتشترين عندي واحد جديد اجيبه ويايه الج
رواسي:تمام
طلعت من المحادثه و شفت رسيم ديكتب
بقيت فاتحه الواتس حتى يطلع عنده متصل، شوي و صلتني رسالته..
رسيم:منو يروح وياج؟
بقيت داخله على محادثة ماريا ما جاوبته رأساً.. رجع كتبلي..
رسيم:متصله و متردين شعندج ويه منو تحجين؟
ادم دزلي رساله دخلت لمحادثته و عفت رسيم..
ادم:جنت نايم روسيه صاير شي؟
رواسي:تعال هسه ضايجه
ادم:يلا هسه بس ابدل و اجي
رواسي:عادي تاخذني للمول؟
ادم:تجهزي لبين ما اجي تدلل روسيتي
رواسي:فدوه الك روسيه و عشيرتها و ابو المافيا
دزلي ايموجي يضحك و وياهن قلب، سويت سكرين
و دزيت لرسيم كتبت..
رواسي:دااحجي مو فاضيه
رأساً شافها، بقه شوي و بعدين كتب..
رسيم:حلو حلو كلش حلو
رواسي:وين اكو مثل ادم يخبل فدوه لروحه
رسيم:اني بَره طلعيلي
رواسي:نوو دادي ميقبل
رسيم:اني راح ادخل لعد
رواسي:ميخصني
عفته يدز و خرجت من الواتس كله.. طلعت ملابس
لبست تنوره سوده لحد جوه الركبه و فوكاها تيشيرت لون اسود صارت عبالك فستان، حطيت حزام على خصري
وگفت كدام المرايه حطيت شوي مكياج و فتحت شعري
شسورته و سويته بي كسرات و عفته مفتوح..
رشيت عطر قوي و حطيت اكسسوارات
شلت مسك من مكانها لان كعدت
بدلتلها و نزلتها ويايه سحبت الحجله مالتها من جوه
الدرج حطيتها بيها و سحبتها للصاله..
اول ما دخلت شفت رسيم گاعد كدامي.. غلست عليه
باوعلي ابويه و گال..
راشد:وين رايحه؟
رواسي:ادم راح يجي ياخذني للمول اريد اخذ كم شغله علمود السفره
راشد:لتتأخرين هوايه
رواسي:اي ما اطول بس كم شغله اخذهن و ارجع
كعدت كدام رسيم حطيت رجل على رجل، و لزمت تلفوني بيدي.. صرت اخذ صور لايدي و و حاولت شكد
ما اكدر ابين رسيم بالصور.. سديت تلفوني و رفعت عيوني شفته يباوعلي و يخزر..
اندكت الباب كام ابويه فتحه و دخل هوَ و ادم.. سلم و كعد
يم ابويه باوعتله و گلت..
رواسي:وين هديتي؟؟
ادم:خبصتيني بيها والله، تفضلي احلى هديه
مدلي كيس جبير بي بوكس اخذته من عنده
و رجعت كعدت مكاني افتح بي رسيم گال..
رسيم:و احنه ما النه هدايا؟
ادم:الك اعذرني ما جبت شي بس لعمي و عمتي جبت
انطه ابويه هديته و لامي كذلك.. كل واحد فتح هديته
ابويه جايبله ساعه و لامي عطرها المفضل..
فتحت البوكس و انصدمت بي..
بوكس مليان مكياج من كل الماركات هدى بيوتي و ان واي اكس و بنفت و غيرها... عطت بفرح و گلت..
رواسي:اوووييي ادممم شكراً شكراً
شمرتله بوسه بالهوى و طلعت وحده من الحمر
فتحت كامره تلفوني و حطيت منها فوك حمرتي
تخبل.. رجعتها بالبوكس و سديته و گلت..
رواسي:لازم جلسه تصوير حلوه تلوك لهل هديه
ادم:تدللين روسيه شعدنا غيرج
رسيم:فلوسك مچلچله على گلبك حاير وين تصرفهن
ادم:فلوسي لو فلوسك؟ اصرفهن وين ما اريد
رواسي:بعد روحي والله، احسن من غيرك كسرولي كل مكياجي و ما ذكروني بحمره سحريه بالف
راشد:مو ع اساس تروحين للمول؟
رواسي:هوَ جنت اريد اشتري مكياج جديد بس بعد ميحتاج هذول يكفوني سنتين ليكدام
ادم:لا مو كلتي تروحين لبيت صديقتج ؟ امشي اوصلج بطريقي
جاوبه رسيم بنتر..
رسيم:مستغنين عن خدماتك اني اوصلها
رواسي:لا ادم يوصلني امشي يلا
كمنه ثنينه نريد نطلع استوقفني رسيم و گال..
رسيم:رواسي اريد نحجي!
انداريت عليه و حجيت بعدم اهتمام..
رواسي:ماكو شي نحجي بي، يلا سلام
طلعت قبل ادم من البيت صعدنا بالسياره باوعلي و گال..
ادم:شلونها؟
رواسي:منو؟
ادم:ماري شلونها؟
رواسي:اووو ادوووم متطور
ضحك و گال..
ادم:من شفتها لحد هسه ما كدرت اطلعها من بالي
رواسي:ذكرني شوكت شفتها اول مره؟
ادم:اجيت عليج للمستشفى جنت ادور لرقمج بالتلفون و انضربت بيها، بيومها شبعتني غلط و مسبه لان الجاي انگلب على ملابسها
رواسي:حب من اول ضربه
ادم:والله رواسي من شفتها ما اعرف شصار بيه، و انوب صوركم سوه كل متنشرين تخليني اصفن بجمالها و عيونها الزرك اضيع ببحر عيونها..
رواسي:شنو رأيك اعرفكم على بعض
ادم:لا عيب
رواسي:العيب بالجيب حَبيبي اذا حابها خليني هسه اخابرها اعزمها و تجي و تتعرفون على بعض
حرك السياره و بقه ساكت باوعتله و اردفت..
رواسي:ادم اذا تبقى هيج ينطبق عليك المثل "لاحظت برجيلها و لا خذت السيد ما اعرف شسمه" و أنتَ لا اخذتني و لا اخذت ماري و تبقى عانس
ضحك و گال..
ادم:طاحح حظج رواسي، خابريها شوفيها
ابتسمت و طلعت تلفوني اتصلت عليها رأساً جاوبتني
رواسي:اريد افهم شغله شنو أنتِ ايدج على الدگمه رأساً تردين؟
ضحكت بصوت عالي و كالت..
ماريا:ولج دا اكتب ويه البنات و أنتِ دكيتي
رواسي:عازمتج بكافيه تجين؟
ماريا:طياره جايتج وين احصل عزيمه كله اني اعزم
ما افوتها
رواسي:يلا لعد تعالي بالكافيه الي نكعد بيها دائماً
ماريا:يلا تمام
سديته منها و گلت لادم اسم الكافيه.. و كتبت لماري
رواسي:رتبي روحج مو تجيني بالتريننگ مالتج
ماريا:ليش احد راح يجي؟
رواسي:جايبتلج واحد صاك ويايه
ماريا:والله اطيح حظج اذا صدك
رواسي:تعالي و شوفي بعيونج
وصلنا للكافيه نزلنا و كعدنا سوه ننتظر ماري..
اباوع لادم متوتر كلش و كل شوي يمسح العرك من گصته.. ضحكت على حالته و گلت..
رواسي:والله حلو شكلك متوتر
ادم:انجبي رواسي شلون طاوعتج؟
رواسي:الحب الحب
دار وجهه عني و حط ايده على شفته مثل الي يفكر.. عجبتني حركته شلت تلفوني و اخذتله صوره حلوه
نشرتها انستا و كتبت "my boss" سويت منشن لادم و خفيته حتى ميبين لاحد و نشرتها
باوعت لادم شال تلفونه لما اجاه اشعار، شوي و باوعلي
و نتر بيه بصوت خافت..
ادم:تردين رسيم يذبحج و متعرفين شلون؟
رواسي:ما اموت وحدي نموت سويه
ادم:قندره عليج رواسي، بعدني ما لحكت اتعرف على البنيه و سجلتي اسمي ب اعداد الموتى چان صبرتي
شوي
رواسي:لعد بس هوَ بنات يسووله منشن و يكتبون بوووس؟ طاح حظ هيج بووس اي والله نعول و قنادر عليه و على امثاله
سكتنا لما دخلت ماري لوحتلها بيدي و اجت يمنه
سلمت و كعدت يمي همست بصوت ناصي..
ماري:منو هذا ولجج؟
رواسي:اعرفج حَبيبي هذا ابن عمي الصديق الصدوق
ادم، ادوم هاي ماريا صديقتي و اخت دِلهَام
بعدت شعرها عن وجهها و ابتسمت خجلانه..
و گالت بهدوء..
ماريا:يا هلا
طلبنه حلو و كل واحد طلبله شي يشربه.. بقينه نسولف سوه و ماري رأساً اندمجت ويه ادم و يتناقشون بمواضيع بيناتهم بعدهم توهم حاطين الطلب و صار بوجهي رسيم... سحبني من ايدي بكل قوته كومني و اندار على ادم ضربه بوكس وكعه بالگاع صرنه فرجه للعالم كلها..
اخذني يسحب بيه و اني اصيح بي يعوفني..
عاط بيه..
رسيم:اليوووم موتج على ايدي رواسي...
- يتبع الفصل التالي اضغط على (رواية رواسي الدهر) اسم الرواية