رواية رواسي الدهر الفصل الرابع عشر 14 - بقلم روح الدليمي

 

بُعدُكَ يتعبُني جدًا

يجعلُ مِني شخصًا غاضبًا 

يَبوحُ بكلماتٌ لَم يودُ بَوحها 

مِنذُ مُدة طويلةً 

كادت أَن تمُت بداخلهِ

لَولا انهُ فقدَ نفسهِ بغضبهِ ..

بُعدُكَ جَعلَ بيّ ندمًا 

يسري بيّ بكُلِ لحظاتي ..

بُعدكُ كادَ يبكيني شَوقًا كُل ليلة 

حتى يطرُ فجرُ مَدينتي 

فتحيطُ بعيني هالة مِن السوادِ

تدلُ عَلى بُكائي ..

بُعدُكَ يُميتني ندمًا المًا شوقًا إليكَ ..

لا تعُد اترُكني اندمُ اتلمُ اتشاقُ 

لِاتشافى مِنكَ في النهاية ...

- رَوُأَن .

➰➰➰➰➰➰➰➰➰➰➰

دفرت الباب بقوه فز رسيم من مكانه صار يباوعلي 

رحت يمهم اخذت مسك و حجيت بعصبيه.. 

رواسي:گتلك من قبل و ارجع اكولها اذا تريد هيا ف تطلكنييييي ما ابقى وياك ابد 

لزمني من ايدي و گال بهدوء 

رسيم:ولجج صبري 

نترت ايدي منه و عطت.. 

رواسي:اشبععع منهاااا تحلممم تشوفني بعد فهمت لو لا!!! 

رفعت راسها من حضن رسيم و گالت بصوت خافت.. 

هيا:اذا خلصتي طلعي و سدي الباب وراج لتزعجينه اكثر

رفعت ايدي و ضربت رسيم على صدره، و عفتهم 

طلعت من الغرفه محتركه و متشعوطه تشعوط.. 

انتظرته يجي ورايه بس ما اجه، يعني عاجبه الوضع و عاجبه يبقى وياها!! 

من هاليوم تغيرت معامله رسيم الي... صار يهتم بهيا 

و يطلعها وياه و اني عايفني بناري و غيرتي.. شكد احاول ما ابين غيرتي بس فاضحتني، بكل مره اريد اروح لاهلي يمنعني و يهددني ياخذ مسك مني

كعدت انتظرهم يرجعون اريد احجي ويه رسيم و افهم حالي شنو؟ اذا ميريدني شكو مبقيني على ذمته!! 

انفتح باب البيت و دخلوا سوه كمت من مكاني و كفت كدام رسيم و حجيت بجديه.. 

رواسي:رسيييممم لازم نحجي! 

رفع عيونه باوعلي و تعداني و مشه ضربت رجلي بالگاع بقوه و عطت بي.. 

رواسي:موو احجيييي وياككك متسمععع اطرششش!!! 

دارت وجهها عليه و ابتسمت بخبث، و گالت .. 

هيا:ميريدج افهمي! شكو باقيه هنا لحد هسه؟ ولي لبيت اهلج

قرب روحه عليها ما اعرف شنو حجه، راحت هيَ لغرفتها و هوَ اندار عليه و گال.. 

     

رسيم:لتعلين صوتج عليه اخر مره احذج رواسي! 

صعدت على الدرج و تعمدت اوكع روحي كدامه، سويت روحي متخربطه.. نزل عليه يركض لان تدحرجت للكاع 

حط راسي بحضنه و صار يطبطب على وجهي يريدني اصحى ، تأذيت كلش بس استمريت بالتمثيل 

رسيم:روسيه باباتي فتحي عيونج، تسمعيني ؟؟ 

بقيت مغمضه عيوني و امثل عليه.. رفعني من الگاع

خفت على عمليته لتنفتح مصارله هوايه بس غلست و گلت يستاهل بقيت مغمضه عيوني و احاول ما ارمش او اضحك و انفضح.. صعدني فوك لغرفتنا حطني على الجربايه و راح صاح على عذراء حتى تقيسلي ضغطي.. فتحت عيوني باوعت لعذراء و غمزتلها فهمتني و قاست ضغطي، دخل رسيم بيده كلاص لبن اندارت عليه عذراء 

و گالت .. 

عذراء:عيني هاي ضغطها كلش نازل مصفر فد مره 

رسيم:اخذها مستشفى؟ 

عذراء:لا جيب اللبن خلي تشربه.. 

رجعت فتحت عيوني ببطئ و حجيت بصوت خافت.. 

رواسي:ما اريد شي بس خلي يطلكني 

عذراء:گولي يا الله شبيج يا عيوني ماكو شي يسوه 

رواسي:خلي يرجع لمرته ما اريد اشوف وجهه 

رسيم:لتحجين شي تندمين عليه بعدين 

رواسي:اطلع بَره وجهك ما اريد اشوفه و هسه اخابر ابويه يجي ياخذني و نشوف يا قندره الي ترجعلك بعد 

ردت اخذ تلفوني بس سبقني و سحبه من 

الكومدي و گال.. 

رسيم:لا تحجين ويه ابوج و لا تروحين يمهم، مكانج هنا و مالج طلعه منا 

رواسي:غصب يعني؟ 

عذراء:لا مو هيج قصده، مو رسيم؟ 

رسيم:لا هذا قصدي تبقين هنا غصب عنج هم 

رواسي:امشي منا البنيه نايمه ما اريد اكعدها ولا چان لميت عليك حتى الجوارين و طيحت حظك 

رسيم:لتهددين روسيه مو اني الاتهدد 

رواسي:جيب تلفوني 

رسيم:ماكو تلفون بعد 

عافني و طلع من الغرفه بقيت اباوع على الباب 

و داخلي يغلي و اغلط عليه بداخلي.. كعدت يمي عذراء 

و گالت بهدوء.. 

عذراء:رواسي تصرفات رسيم مو بيده ترا 

رواسي:لا بيده من خلاها تبقى بيناتنه و هوَ عرفها شنو كلشي صار بيده.. كذب عليه و گال يطلكها و بقيت هنا 

تالي شسوه هوَ؟؟ 

        

          

                

عذراء:ميخالف حَبيبتي تصير هالسوالف بين كل ثنين 

رواسي:لا متصير بين ثنين علاقتهم طبيعيه، بس كله صوجي اني.. اني ادبسز و حبيته و هوَ چان يعذبني 

ما خله شي ما سواه بيه و اني بكل غباء حبيته 

طلكني منه ابويه و بس رجع رجعتله و ما سمعت من اهلي تزوجته غصب عنهم استاهل كلشي يصير بيه 

عذراء:لتحجين هيج رسيم والله يحبج و خلال الايام راح يثبتلج 

رواسي:صار سنه و شوي اعرفه و هوَ نفس اطباعه ما تغير ابد و مستحيل يتغير... مستحيل ابقى يمه بعد مستحيل 

عذراء:ما اعرف شحجي والله حقج بس الي اعرفه و واثقه منه رسيم ميحب غيرج يموت عليج 

و هيا بقيتها هنا اكيد اله غايه منها، رسيم داهيه مصيبه 

مستحيل يسوي شي اذا ما اله فائده منه 

رواسي:غايته بقربه منها؟ لو بتجاهله الي؟ لججج يطلعها هيَ يفرها و يونسها و اني عايفني لا يجي يمي و لا يسولف ويايه حتى 

حطت ايدها على ايدي طبطبت عليها و گالت .. 

عذراء:الايام تكشفلج كلشي بس أنتِ اصبري و لتستسلمين بسهوله.. هاي اني و اختي كدامج صار ٤ سنين متزوجين 

و ثنينه ما صار عدنه اطفال بس صابرين و عدنه ثقه برب العالمين راح يعوضنا خير 

كامت من مكانها و اردفت.. 

عذراء:كلشي يصير وياج لا شي بالنسبه انو تكونين محرومه من الضنه، اصبري و ربج يعوضج عن كلشي فات خلي ايمانج برب العالمين اكثر من كلشي 

عافتني و طلعت من الغرفه.. بقيت اتگلب بفراشي 

افكر شنو اسوي و شتصرف.. انفذ خطتي و اترك رسيم 

لو اسوي مثل ما گالت عذراء و اصبر؟ 

من التفكير غفيت بدون ما احس على روحي.. كعدت الصبح على صوت مسك تبجي كمت من مكاني متكاسله 

شلتها بحضني، حضنتها بقوه و بجيت.. 

اريد امي و ابويه اريد حياتي القديمه.. اريد ارجع اعيش مرتاحه و ميهمني شي غير دراستي و تفوقي.. 

بدلت لمسك سويتلها ممه و نزلتها جوه ويايه.. 

اليوم عندي ريست ماكو دوام، حطيت مسك على القنفه و حاوطتها بالكوشات حتى متوكع.. دخلت للمطبخ 

ساعدت البنات بدون ما احجي شي جهزنا الريوك 

و كعدنا نتريك كلنا ب استثناء رسيم و هيا.. 

محمد:رواسي لعد رسيم وين شنو بعده نايم؟ 

غسان:لا طلع هوَ و هيا من الصبح 

رواسي:يريد يعوضها عن ايام قبل سوده عليه 

عفت الاكل و كمت من مكاني نفسي انسدت عن الاكل.. 

بقيت احوس اريد اخابر ابويه يجي ياخذني بس تلفوني بعده عند رسيم، باوعت لغسان و گلت.. 

        

          

                

رواسي:غسان ممكن تلفونك بس اخابر 

شال التلفون و انطاني ياه بدون ميسئلني، اخذته و رحت للمطبخ دخلت رقم ابويه و اتصلت عليه.. 

راشد:هلا غسان شلونك

رواسي:بابا هاي اني 

راشد:هاا حَبيبتي شلونج باباتي 

رواسي:مشتاقتلكم صار هوايه مشايفتكم 

راشد:اي خلي رسيم يجيبج لو اجي اخذج اني 

رواسي:ميقبل 

راشد:ليش ميقبل؟؟ شو يمضرط بكيفه 

رواسي:حاير بمرته و سعادتها مكضيها فرات هوَ وياها، فوكاها اخذ تلفوني لان ردت اخابرك تجيني 

راشد:عاجبه اطيح حظه استاذ رسيم 

رواسي:تعالو انتو والله ميته عليكم 

راشد:اليوم المغرب نجيكم اني و امج 

رواسي:انتظركم 

سديته من عنده التفتت اريد اطلع صار بوجهي رسيم 

تعديته اريد اطلع لزمني من ايدي و گال 

رسيم:شبيج حَبيبتي 

رواسي:مو حبيبتك اني وخر عني خلي اروح 

سد باب المطبخ و سحبني لحضنه تقرب عليه 

يريد يبوسني ملت راسي على جهه امنعه و حجيت.. 

رواسي:روح لهيا بوسها خاف بوسات الليل ممكفيتها

ضحك و گال.. 

رسيم:تحملي حَبيبتي هيَ هم مرتي 

فلتت روحي من حضنه و حجيت بقرف.. 

رواسي:جدر و لكه غطاه ثنينكم نفس الطينه، أنتَ رجل مافيا و هيَ ام السحوره الحيه 

فتحت باب المطبخ و طلعت رجعت تلفون غسان، و اخذت مسك و صعدت فوك.. طلعت جنطه فتحتها بالگاع.. و صرت اطلع بملابسي و اشمر بالجنطه 

دخل رسيم للغرفه بقه واكف مصدوم بمكانه لما شاف الملابس بالجنطه و مستمره اطلع بباقي الملابس 

سحبني من ايدي و عاط.. 

رسيم:ويييين موليه؟؟؟ 

رواسي:ارجع لاهلي گتلك ما ابقى وياك بعد رسيم 

رسيم:راح تجيج قندره على راسج هسه 

رواسي:تجيك مني على راسك و راس مرتك ثنينكم 

نترت ايدي منه و نزلت على الجنطه سديتها و نزعت تيشيرتي اريد ابدل.. لبست قميص و بنطلون 

و وكفت كدام المرايه احط مكياج..

        

          

                

باوعت للساعه بعده حتى الظهر ما مأذن وين موليه رواسي، كملت مكياجي و اخذت حمره لون احمر 

و صرت ارسم شفايفي بيها.. كملت و التفتت على الباب 

واكف يباوعلي و مكتف ايده.. مشه بخطوات ثابته 

تقرب مني 

حك لحيته و جرني من خصري، حطيت ايدي 

على صدره امنعه يتقرب درت وجهي عنه و حجيت.. 

رواسي:تاخذني أنتَ لو اروح اني؟ 

رسيم:ما اسمحلج تطلعين من البيت زعلانه روسيتي 

رواسي:لتكوووول قندره و عوفني 

رسيم:متملين من القنادر أنتِ حتى اني نعديت منج 

رواسي:ميرهملكم شي غير القنادر، وخررر خليني اروح 

سحبني بقوه و لزگني لزك بي، صارت عيونه على 

شفايفي.. حجيت بتحذير.. 

رواسي:اذا متعوفني اضربك والله 

رسيم:تسمحيلي افهمج كلشي؟ لو هم تركبين راسج و عنادج يسيطر عليج! 

رواسي:وخررر عني رسيم 

مد ايده على شعري يبعد خصلاته عن وجهي، و گال بهدوء.. 

رسيم:ليش ترجفين بين ايدي روسيتي 

دفعت ايده عن وجهي و حجيت بثبات.. 

رواسي:غلطان ما ارجف اني، ارجف الكل مني و ما ارجف من احد... 

صارت ايده تمشي على ظهري بخفه، تشنجت 

من لمساته حاولت افلت روحي منه بس چان يزيد بلزمته الي.. قرب روحه اكثر و طبع بوسه عميقه على شفايفي 

ما ابتعد عني غير لما انگطعت انفاسنا.. نزل راسه على رگبتي و گال بخدر.. 

رسيم:هايم بيج و بتفاصيلج روسيه، مشتاقلج و ميت من الشوق.. 

خدرت بين ايده و انفاسي تسارعت من التوتر.. 

گلبي احسه دمام يدك مو نبضات طبيعيه.. هزيت راسي بقوه اريد اصحصح دفعته عني رأساً ابتعد رفع عيونه 

عليه، صايره حمر دممم.. خفت من منظره 

و خفت عليه اكثر.. تقربت يمه لزمت وجهه بيدي 

و حجيت بخوف.. 

رواسي:رسيممم شبيككك باوعلي 

غمض عيونه بقوه و ابتعد عني گال.. 

رسيم:مابيه شي 

رواسي:لا بيككك شوف عيونك شلون حمر تعال اقيسلك السكر و الضغط 

رسيم:ماكو شي وداعتج 

تعداني و راح كعد على الجربايه.. حط ايده على راسه 

و يضغط بقوه، رحت كعدت يمه اخذت ايده بيدي و حجيت.. 

رواسي:رسيم ليش تغيرت عليه؟ وين حبك الي! 

رسيم:حبج محفور حفر بگلبي روسيه مستحيل يروح 

        

          

                

رواسي:لعد شلون اجه من گلبك تعاملني هيج طول الفتره الفاتت؟ فهمني من حقي اعرف.. اذا متريدني خليني ارجع لاهلي و لحياتي القديمه ليش ابقى يمك و أنتَ تريدها و متريدني 

رسيم:محمد حجالي كلشي، قربي منها غايتي بس اكشفها 

و قربت باقي شوي بس و اشحطها شحط لبيت اهلها 

رواسي:ليش ما حجيتلي اذا صدك؟ 

سحبني لحضنه و گال بهدوء.. 

رسيم:لان اذا حجيت راح تستفزيها و تخليها تعرف انو اني كاشفها.. لعبت عليه بس گلبت اللعبه ضدها 

و چان لازم ابتعد عنج حتى تعرف العمل الي مسويته نجح و بعدني عنج 

رواسي:تقربتلها مو؟ 

رسيم:ابد مستحيل ما اتقرب من غيرج اميرة گلبي أنتِ 

ابتعدت عن حضنه و حجيت.. 

رواسي:بس هم ما ابقى هنا و ارجع لاهلي ما اريدك اني بعد 

رسيم:براحتج ما اضغط عليج امشي اخذج 

رواسي:هاا؟ 

رسيم:شبيج مو تردين تروحين لاهلج، امشي اخذج اني يلا 

كمت من مكاني و حجيت.. 

رواسي:يجون المغرب و اروح وياهم 

رسيم:الي يعجبج باباتي

كام يريد يطلع استوقفته و حجيت.. 

رواسي:غسل وجهك قبل لتطلع شفايفك كلها حُمره 

دخل للحمام و اني خففت الحُمره مالتي، و نزلت جوه 

كعدت ويه البنات يجهزن بالغده و اني گاعده اسولف وياهن.. 

رشا:رواسي شبيج مو على بعضج؟ 

رواسي:راح ارجع لاهلي اليوم 

ثنينهن اندارن عليه يباوعن مستغربات عذراء گالت .. 

عذراء:صدك تحجين رسيم يعرف؟ 

رواسي:اي اليوم المغرب يجون و اروح وياهم ما ابقى هنا بعد طول ما هيا موجوده هنا 

رشا:و رسيم قبل عادي؟ 

رواسي:اي اصلاً راد ياخذني هسه بس كتله من يجون اروح وياهم

عذراء:ما اعرف شحجي حقج والله 

رواسي:انطوني شي اسوي بدل ما گاعده هيج

رشا:كومي سوي التمن أنتِ يلا 

رواسي:گمزه و نطه گبل اسوي تمن، ترا اني معليه اذا يخرب

ضحكت و گالت .. 

رشا:ميخرب اني وياج يلا تعالي 

كمت وياها و صارت تعلمني شلون اسوي التمن، سويته و اخر شي نصيت جواه و عفته يتهدر.. 

كملنا تحضير كلشي و نقلنا للصاله و اخر شي صبينه الاكل و اخذنا... كعدنا كلنا ناكل و نزل رسيم من فوك 

هوَ و هيا غلست عليهم و اكلت بدون ما احجي شي.. 

        

          

                

مر الوقت ببطئ اريد بس يصير المغرب حتى يجون اهلي.. ما اتحمل ابقى هنا اكثر من هيج.. كملت اكلي قبل الكل و كمت من مكاني.. فتت للمطبخ خدرت جاي 

و جهزت الاستكانات و الشكر.. 

دك تلفوني يمهم بالصاله، رحت حتى اخذه شفته بيد 

رسيم كام من مكانه و اجه تجاهي مدلي التلفون و گال.. 

رسيم:منو هاي 

رواسي:اخت الدكتور دِلهَام 

رديت عليها و ابتعدت من يمه.. 

رواسي:هلا ماري حَبيبي 

ماريا:هااي عُمري الحمدلله و أنتِ 

رواسي:ماشي الحال 

ماريا:باعي باجر عيد ميلاد دِلهَام و مسويله مفاجئه أنتِ هم تعالي يفرح بشوفتج 

رواسي:العمر كله يارب، احاول اجي 

ماريا:الله عليج تعالي نتونس والله 

رواسي:تمام گلبي باجر اردلج خبر 

سديته منها و انداريت شفت رسيم واكف و مكتف ايده 

يخزر بيه.. اشرتله بيدي بمعنى "شكو" گال.. 

رسيم:وين رايحه؟ 

رواسي:ميخصك أنتَ 

رسيم:رواسي احجي حَبيبتي يلا 

رواسي:معزومه على عيد ميلاد دِلهَام 

رسيم:ممنوع تروحين 

رواسي:ما طلبت الاذن منك حتى اروح، روح للحيه مالتك امنعها مو اني 

دفعته عن طريقي و طلعت، لكيتهم مخلصين اكل 

حميت الجاي و صبيته اخذته الهم بقه رسيم فريت الصينيه و درت روحي بدون ما انطي.. حطيت الصينيه بالمطبخ و رجعت كعدت 

رسيم:هياوي چاي حَبيبتي 

هيا:من عيوني 

كامت من مكانها و رجعت بيدها استكان جاي انطته لرسيم 

و كعدت يمه لزگت روحهه بي لزگ.. لزمت تلفوني و دخلت للصور كعدت ادور على صوره الي حلوه انشرها 

صار هواي مناشره شي.. دورت هوايه مالكيت صوره تعجبني باوعت لرشا و عذراء و گلت

رواسي:بنات تعالو نصعد لغرفتي 

غسان:مو كاعدين سوه شعدكم 

ضحكت و كتله.. 

رواسي:مؤامرات سياسيه 

محمد:رواسي اريد احجي وياج شوي 

        

          

                

رواسي:صاير شي؟ 

محمد:لا بس تعالي ورايه 

كمت وراه مستغربه و رسيم عيونه علينه، وكفنه بالممر 

باوعتله و حجيت متسائله.. 

رواسي:قلقتني محمد شكو؟ 

محمد:اذا تروحين لبيت اهلج بعد ميرجعج لهنا 

رواسي:احسن ما اريد ارجع اني 

محمد:لتهجمين بيتج بيدج، رسيم يحبج بس من يشوفج تخليتي عنه راح يسحب نفسه و يعوفج 

رواسي:ما متخليه عن احد اني كل الاريده حياه حلوه و سعيده، المفروض يفكر بهل شي قبل ليتزوجني و يجيبني لهنا كزوجه ثانيه 

محمد:تحملي كلها كم يوم و يطلگها لتروحين 

رواسي:من يطلگها اني بنفسي ارجع ما انتظره يرجعني 

بس اذا ما طلگها اني اخلعه و اعيش حياتي الي انحرمت منها بسببه 

عفته واكف و صعدت فوك لغرفتي، شوي و اجن ورايه 

رشا و عذراء.. شافن الجنطه بالگاع و الكنتور فارغ من ملابسي.. 

عذراء:يعني صدك حترحين؟ 

رواسي:اي، علاقتنه اني و رسيم علاقه سامه لابعد حد

محد متأذي بهاي العلاقه غيري اني.. كل احلامي و طموحاتي تلاشن بمجرد ما خطفني و دمر حياتي لما جبرني اتزوجه 

رشا:بس أنتِ تحبي! 

رواسي:حتى لو احبه اذا ميتغير رسيم ما ابقى وياه

اني رجعت لان چان محتاجني بس هوَ فضل هيا عليه خليه الها بالعافيه عليها 

رشا:والله ما اعرف شحجي 

رواسي:لتحجين شي حبي 

وكفت كدام المرايه عدلت مكياجي و فتحت التصوير 

اخذت كم صوره و فتحت اغاني و صرت اركص و اصور بروحي.. البنات صافنات عليه مستغربات 

وكفت التصوير و باوعتلهن و حجيت.. 

رواسي:شبيكم 

عذراء:عادي تصورين روحج و أنتِ تركصين؟ 

رواسي:عادي حَبيبي شكو قابل 

رشا:لينخمطن ديري بالج ولج 

رواسي:ماكو احد بس الاعرفهم 

شلت تلفوني و دخلت للانستا نشرت ستوري واحد من الفيديوهات و كعدت على الجربايه مددت ظهري و گلت.. 

رواسي:تتوقعون راح ارتاح بحياتي؟ 

عذراء:الله موجود و اكيد راح يعوضج عن كلشي 

        

          

                

رشا:كلشي يصير بحياتنه هوَ اختبار من رب العالمين النه 

يجينه العوض الالهي و يفرحنا 

رواسي:احس راح اشتاقلكم بنات 

رشا:تحسييين؟؟ 

عذراء:بعدها متعرف مشاعرها شنو 

ضحكت و حجيت.. 

رواسي:مو احس والله تعودت عليكم كلش، و ما اعرف اذا راح نرجع ننجمع اني و رسيم سوه و نرجع نلتم سوه 

عدلنا كعدتنا لما اندكت باب الغرفه و اجانه صوته.. 

رسيم:روسيه اكدر ادخل؟ 

رواسي:اي تعال 

دخل للغرفه و البنات كامو طلعو عافونه وحدنه.. 

كعد يمي على الجربايه اخذ ايدي بيده و گال.. 

رسيم:شنو معنى كلامج رواسي؟ تردين تعوفيني بشكل نهائي؟؟ 

سحبت ايدي منه و حجيت.. 

رواسي:احسن الي و الك والله ثنيناتنه منكدر نكمل سوه 

عاط بيه بصوت عالي.. 

رسيم:شنوو منكدررر شتحجييين أنتِ؟  

رواسي:رسيم أنتَ حياتك غير عني، و علاقتنه كلها غلط ب غلط ما اكدر اكمل وياك و اظلم روحي 

رسيم:و اني تظلميني عادي؟ 

رواسي:ما اظلمك بالعكس الي راح اسوي احسن الي و النه كلنه 

رسيم:وافقت تروحين على كد كم يوم بس، اذا ببالج غير فكره تشيليها من بالج رواسي 

رواسي:لتجبرني ابقى وياك لتخليني اكرهك رسيم 

رسيم:شتردين اسويلج و ترضين؟ 

رواسي:طلكني هذا الاريده منك بس 

شد قبضة ايده و عروك ايده برزن بشكل مخيف 

و عاط بصوت عالي.. 

رسيم:اخليج تتمنين الموت و متحصلي روسيه، مو اني تلعبين عليه 

قربت عليه لزمت ايده و حجيت بهدوء.. 

رواسي:ما العب عليك، جربنا و ما نجحنا ليش نجبر نفسنه نبقى و احنه نعرف نهايتنه شنو! 

حاوطت رگبته بيدي و طبعت بوسه على شفته و اردفت.. 

رواسي:احبك اني والله احبك بس ما اكدر اكمل وياك افهمني رسيم 

حط عيونه بعيوني و گال بهدوء.. 

رسيم:گتلج اتغير و دااحاول لتكسريني بيج رواسي و تخليني احقد عليج 

رواسي:من تتغير تغير تام و تعوف شغلك الي دتشتغله 

و تطلك هيا عود ارجعلك 

        

          

                

ابتعدت عنه بس جرني من ايدي و حطها وره ظهري

و گال بتهديد.. 

رسيم:اذا تطلعين من باب البيت ورقتج توصلج لبيت اهلج قبلج 

رواسي:أنتَ حتى بالمحكمه ممتزوجني عادي طلگني قبل لا اطلع عود 

رسيم:رواسي لتختبرين صبري 

رواسي:رسيم عوفني بحالي 

عاف ايدي ابتعد عني باوعتله و حجيت.. 

رواسي:اذا تطلكني تسعد هوايه غيرك ينتظروني بالسره 

درت وجهي عنه و شلت تلفوني بيدي، تجاهلت نظرات 

الغضب الي طالعه من عنده.. راح على الميز و بلحظه وحده طشر كل المكياج مالتي بالكاع و صار عباره عن فتافيت، شمرت تلفوني على الجربايه و عطت بي.. 

رواسي:هايييي شسويييييت!!  

ما جاوبني و استمر يكسر بالاغراض هجم الغرفه هجم.. 

شلت واحد من العطور و شمرته عليه اجه براسه 

اندار عليه و گال بصياح و عيونه تخزر بيه.. 

رسيم:تريديييينيييي اموتجججج؟؟ 

رواسي:تستاهل كسرت مكياجي كله 

رسيم:كل همج مكياجج؟؟ أنتِ شنوو فهميني 

رواسي:اني بنيه 

اخذت تلفوني عفته بالغرفه يصيح و نزلت اركض، رحت للمطبخ 

اخذت سجينه و طلعت للكراج وكفت كدام سيارته 

شخطتها كلها من الطول للطول 

و على البنيد مال سياره كتبت "رواسي تاج راسي" 

اخذتلها صوره و رجعت التلفون بجيبي 

افتريت على التايرات شكيتهن بالسجينه و شمرتها بالگاع 

اجه عليه يدورلي و الكل طلعوا وراه يشوفون شكو.. 

باوعتله و اجت عيني على العوده مال ماسحه مركونه على الحايط اخذتها و بكل قوتي كسرت الجامه الاماميه مال سياره 

شمرت العوده عليه و تعديتهم دخلت جوه.. ثواني بس و صوته هرج البيت... 

رسيم:اليوممم اكسرهااا على ظهرج تعالييي هناااا 

غسان:رسيمم اهدئ شبيكم مخابيل ثنينكم؟؟ 

رسيم:لحد يتدخل خليكم بعيدين لا احطكم وياها والله 

وكفت كدامه و تخصرت باوعتله و حجيت.. 

رواسي:هياتني كدامك اذا أنتَ ابن امك و ابوك اضربني يلا 

محمد:رواااسييي سكتييي اذا ضربج محد يخلصج من ايده 

رواسي:يريد يضربني خلي يضرب ما خايفه منه، مثل ما كسر مكياجي كله كسرتله سيارته 

        

          

                

رسيم:كدامييي للغرفه 

رواسي:ماااا 

تقرب عليه و سحبني من زندي و عاط.. 

رسيم:امشييي فوككك اني اعلمج بنت الكلب 

رفعت ايدي و ضربته على وجهه و عطت بي.. 

رواسي:اذا تغلط على ابويه اضربك بالقندره فهمتتت لو لا 

رفع ايده يريد يضربني بس تراجع نترت ايدي منه 

و گلت.. 

رواسي:مكياجي الكسرته كله اغلى من سيارتك خاف متعرف 

تقدمت عليه هيا و رفعت ايدها ضربتني، لزمت ايدها نبتت اظافري بيها و عطت بيها.. 

رواسي:جربي تمدين ايدج عليه اكسرها الج و احطها ب

ردت احجي بس استحيت منهم دفعتها وكعت بالكاع على ايدها عاطت بوجع.. 

هيا:رسييممم ايدي، اااخ ولكمم راح امووت 

تجمعوا عليها و اولهم رسيم، عفتهم و رحت اخذت مسك من الصاله و صعدت بيها فوك.. قفلت باب الغرفه و خابرت على امي.. اول ما جاوبتني حجيت بغصه..

رواسي:ماما تعالو اخذوني هسه 

جميله:بسم الله شبيج بنتي 

رواسي:مابيه شي بس تعالو هسه اخذوني منااا ما ابقى بعد 

جميله:هسه بس يجي ابوج نجي 

رواسي:خابري عمي يجيبج و تعالو گتلج ما ابقى هنا بعد 

لو ما اخاف منه يخطفني انوب چان اجيتكم بتكسي 

جميله:هسه اشوف احد يجيبني 

رواسي:لتتأخرين فدوه 

سديته منها و حطيت مسك على الجربايه بدلتلها 

ملابسها، حظرت حليبها و ممياتها بجنطتها و نومتها بمكانها.. و بقيت اباوع على حال الغرفه.. 

كسر كلشي يخصني ابن الحلو 

فتحت الكنتور و طلعت ملابسه الرسميه اخذت المكص من المجر و كعدت اكصكص بيهن بشكل مستحيل يترگع 

بس هم ما برد گلبي شمرت الملابس بالگاع و كعدت على الجربايه و بقيت ابجي مرت نص ساعه 

و سمعت صوت عمي و امي جوه واضح من اصواتهم ديتعاركون.. 

دقايق و انفتح باب الغرفه و دخلت امي و وياها رشا 

بقو يباوعون عليه مصدومين من حالتي و حال الغرفه 

اجت امي يمي حضنتني و گالت بخوف.. 

جميله:شبيجج حَبيبتي رسيم سوالج شي 

حضنتها بكل قوتي و صرت اشهك بالبجي.. 

رواسي:ما اريد ابقى هنا اخذوني وياكم 

        

          

                

جميله:ناخذج امي ناخذج بس فهميني شصار 

رشا:ما صار شي كسر مكياجها و كبت بيناتهم 

بعدتني عن حضنها تباوعلي مستغربه تفاهة الموضوع 

و گالت .. 

جميله:صدكك تحجين؟؟ علمود مكياج! 

رواسي:لاااا كلشي صار سبب يخليني اعوفه 

جميله:يا امي احجي شنو صار 

رواسي:ميقبل يطلك هيا و مبقيني هنا اشوفه شلون يطلعها و يونسها و اني عايفني 

رشا:ولجج مو كالج شنو السبب كل عقلج أنتِ 

رواسي:حتى لو هوَ كذب عليه و خدعني هوَ اصلاً ميحبني 

جميله:خلي يجي و نفهم منه و منج حرام اذا فهمت شي 

مسحت دموعي و حجيت.. 

رواسي:ليش وينه 

رشا:اخذ هيا للمستشفى ايدها يمكن انكسرت 

رواسي:حييييل و زياده هم تستاهل هل حيه 

جميله:رواسي شمسويه أنتِ؟ 

رواسي:بعدني كلشي ما سويت بس راح اسوي خلي يشوف بعيونه شنو اسوي 

جميله:رواسي الكويه لتصيرين غبيه 

رشا:خاله حَبيبتي عوفيها تغسل و تنزل، تعالي ننزل جوه 

اضيفكم شي 

جميله:أنتِ منو امج؟ احس اعرفها

رشا:هاله ناصر، تعرفيها؟

جميله:معرفه قديمه، تشبهيها كلش

باوعت لامي و حجيت متسائله.. 

رواسي:بعد عيني شنو ضامين عليه؟؟ 

جميله:ما ضامين شي امي بس امها جانت زميلتي قبل بالجامعه و من تزوجت بعد ما عرفت اخبارها 

رواسي:شنو هالعائله واحد يعرف الثاني بس اني اطرش بالزفه 

جميله:التهي بمكياجج بنتي معليج 

نزلوا امي و رشا جوه و بقيت اني، كل ما اشوف مكياجي 

شلون متطشر بالكاع ارجع ابجي... رحت كعدت بالكاع يم المكياج و صرت الم بيهن و ادردم على رسيم.. 

رواسي:النذل الحقير ميعرف مكياجي اغلى منه 

درت وجهي بعد ما سمعت خطوات صارت قريبه مني 

شفته يمشي ب اتجاهي و ينظرلي بغضب، صار كدامي و اشرلي بيده انو اكوم و گال.. 

رسيم:شنو حاجيه لاهلج؟ 

رواسي:گلتلهم على كلشي و شلون كسرت مكياجي 

        

          

                

ابتسم بخفه و رأساً غير ملامح وجهه للعصبيه و گال.. 

رسيم:مكياجج اغلى مني مو؟ 

كمت من مكاني نكتت ايدي من المكياج و قربت عليه

حضنته و طبطبت على ظهره اوخر الباقي من المكياج 

بملابسه.. بعدت عنه و گلت.. 

رواسي:اغلى من سيارتك مو منك 

رسيم:اخر مره اكولها اذا تروحين مترجعين بعد 

رواسي:و هذا المطلوب حَبيبي ما اريد ارجع اخليك تحلم تشوفني رسيمي الحلو 

طبعت بوسه على خده و دخلت للحمام، غسلت وجهي

و اخذت مسك و نزلت جوه.. لكيت ابويه هم جاي و ادم 

و اخوانه.. العائله كلها مجتمعه ما شاء الله والله لو يعرفون السبب علمود المكياج الا يضربوني بالقندره 

سلمت عليهم و كعدت و مسكه بحضني، اخذتها امي مني 

و ابويه گال.. 

راشد:احجولي و فهموني شبيكم؟ كل يومين كابه بيناتكم 

رسيم:اسأل بنتك المؤدبه المحترمه شسوت 

رفع عيونه يباوعلي و گال متسائل.. 

راشد:شمسويه رواسي؟ 

رواسي:ما سويت شي اني اسأل الكل راح يكولون ما سويت شي هوَ الي ديسوي 

باوعلي غسان و گال.. 

غسان:رواسي صدك ما سويتي شي؟ متأكده؟؟ 

راشد:احجولي و فضوني واحد يسأل باللاخ! 

غسان:كسرت جام السياره مال رسيم و شگت التايرات بالسجينه و شخطتها من الطول للطول، و اجت ضربت رسيم و وگعت هيا و كسرت ايدها بس ابد ما مسويه شي هيَ 

رواسي:غير تعرفون شنو السبب و سويت هيج؟ 

محمد:و الله كلنا نحبج احنه بس ما شايفين سبب مقنع يجبرج تسوين كل هذا ! 

رواسي:هسه انتو وياي لو ضدي؟؟ 

محمد:احنه لا وياج و لا ضدج بس الي سويتي غلططط 

عاط بيه ابويه.. 

راشد:طفلهههه أنتِ ؟؟؟ ماعندج عقل؟؟؟ 

نزلت دموعي و حجيت.. 

رواسي:يغلط عليك يكلي بنت الكلب 

راشد:بنت سطعش كلب هم 

رواسي:بدل ما تصير ويايه تصير ضدي؟؟؟ 

راشد:حتى لو اكرهه رسيم بس ما ارضه يطلع منج هيج تصرف! 

رسيم:هاي تكرهني و تدافع عني لو تحبني تكوم تكتلها 

        

          

                

راشد:انجب أنتَ حسابك بعدين

اندار عليه و گال بنتر.. 

راشد:فضيني احجي ليش هيج سويتي ؟ هاي المسكينه ليش كسرتي ايدها؟؟ 

ضحكت من بين دموعي و حجيت.. 

رواسي:متأكد هالحيه مسكينه؟؟؟ 

رسيم:تعديتيها بطياح الحظ 

راشد:محد طلب رأيك 

رواسي:تاخذوني لو تبقوني هناااا 

راشد:غير افهم ليش تريدين ناخذج! 

رواسي:تزوجني و جابني هنا و انصدمت بي متزوج، حلفلي يطلكها و بعدها على ذمته و كذب عليه و اذاني 

و فوك كل هذا اجه كسرلي مكياجييي الي جبته الي من دبي!!  

رسيم:هممم گالت قناااادر والله اجيبلج غيرهن بس كافيييي 

رواسي:ما اريد ابقى وياه ارجع وياكم حتى يطلكني 

و اتزوج غيره اخذلي واحد جنتل مان 

رفعت عيوني اباوع عليهم كلهم مصدومين من حجايتي 

عمي خزرني و عاط بيه.. 

سالم:روااااسييي شنو هذا الحجي؟؟؟ 

ضحكت الطف الجو و گلت... 

رواسي:اي شبيك عمو اريد جنتل مان، تزوجني واحد من ولدك؟؟ 

رشا:عزاا بعينج مووو هيججج ولججج! 

قربت روحي عليها و همست.. 

رواسي:جفصتتت جفصتتت ارگعيهااا بسرعه 

رشا:لو بقندرتج ارگعها هم متترگع وداعتج 

عدلت كعدتي و ابتسمت و حجيت عود ارگع سالفتي.. 

رواسي:لا جذب اشاقه اكلت خ** مره وحده ميحتاج اكله مرتين 

كام ابويه من مكانه و عاط بيه و على لحظه يضربني.. 

راشد:كووممميييي كدااميييي اذا تبقين گاعده راح تصير موتج حلال 

رسيم:لا خليها خلي تكمل جلدها يحكها تريد كتله غسل و لبس 

رواسي:ليش عندك لوندري؟ 

رسيم:عوفننييي اكوم اكسر راسها!! 

رواسي:ترا محد لازمك حَبيبي 

حط ايده على وجهه و صارت اكتافه تهتز، وجهت نظراتي عليهم كلهم معصبين عليه حتى ادم 

بس الحلو بيهم من ثنين يحجون ميقاطعوهم.. 

رواسي:وينها الحيه تجي تطبطب على جتفك و تكلك لتبجي حَبيبي اني يمك ختولي رواسي 

وخر ايده عن وجهه هذا يضحك و اني عبالي يبجي 

متأثر لان اريد اعوفه.. بالگوه سكت و حاول يحجي بجديه بس الضحكه واكفه ببلعومه و واضحه.. 

رسيم:ولجج أنتِ شنوو بس فهميني ؟ 

رواسي:مو گتلك اني بنيه شبيك كل شوي اعيد؟ 

رسيم:اخذوها منااا ما اريدها بطلتتت ما اريدهاااا 

رواسي:بعدك عند كلمتك؟ 

رسيم:خليتي بيها كلمه روحي رواسي ما اريد اضربج 

رواسي:كتلي تطلكني بس اروح لبيت اهلي 

رسيم:حتى تتزوجين قندره مان؟ 

رواسي:لا غيرت رأيي اريد شوگر دادي 

كام من مكانه يريد يضربني بس صار بوجهه 

محمد و گال.. 

محمد:عوفها رسيم! 

رسيم:متسمعهااا شنو تمضرط؟؟؟ 

كمت من مكاني و وگفت كدام رسيم و حجيت 

رواسي:اضربني يلااا حتى بوجهي اروح اشتكي عليك 

سحبني ابويه من ايدي و كرصني بقوه من خصري

عطت ب الم و نزلت دموعي دفع محمد و اجه يمي گال بقلق.. 

رسيم:شبيج رواسي؟ 

راشد:مابيها شي، يلاا فضيني جيبي غراضج و كومي 

رسيم:شسويتلهااا؟ ليش تبجين باباتي 

رواسي:كسرت مكياجي 

رسيم:كل عقلججج تبجين علمود مكياج؟؟ والله هسه اجيبلج الاحسن بس لتبجين فدوه اروحلج 

راشد:بدمعه وحده خلتك تفشش 

رواسي:بابا خلي نروح 

رسيم:متروحين رواسي اذا روحتج علمود المكياج اجيبلج معمل كامل تدللين 

رواسي:ما اريدك اني أنتَ تحب هيا متحبني شكو باقيه هنا 

رسيم:انعل ابوها هسه اطلكها و كدام الكل والله 

رواسي:حتى لو هم ما اريدك 

باوعت لابويه و گلت... 

رواسي:هسه اجيب اغراضي و اجيكم 

كمت من مكاني صعدت فوك اجه ورايه رسيم 

يحاول يقنعني انو ما اروح بس ما اريد ابقى.. 

رسيم:روسيه بغلاتي عندج لتروحين شلون تعوفيني؟ 

رواسي:مو غالي عندي أنتَ عوفني اروح و ارتاح منك و اريحك مني 

سحبت جنطتي اريد اطلع وكف كدامي يمنعني.. 

رسيم:رواسي فكرييي عدل اذا تروحين ما ارجعج بعد 

رواسي:احسن اني ما اريد ارجع، من البدايه علاقتنه غلط 

و ما احب استمر بهيج علاقه اني 

رسيم:اخر كلام روسيه؟ 

هزيتله راسي و سحبت الجنطه حتى اطلع، اخذها مني و نزلها جوه.. كامو الكل طلعت من البيت بدون ما اسلم على احد و صعدت سياره ابويه.. فتحت الباب امي انطتني مسك و صعدت هيَ بالصدر 

و حركناا متجهين لبيتنه...