رواية ذنوب على قيد الغفران الفصل الحادي عشر 11 - بقلم براء
البارت الحادي عشر
البـــــــــارت الحادي عشر
مرحبا حبايبي العسل شلونكم ❤❤
مساء الخير على الجميع وطبعا اعتذر على عدم الالتزام بموعد التنزيل بس صار عندي ظرف طارئ منعني من الكاتبه حاولت اضغط على نفسي بس في سبيل ما اتأخر بالتنزيل بس مكدرت انجبرت اترك الكتابه فتره
مذليتكم مثل مديكولون الاغلبيه ولا غلست عليكم والي متابعني من زمان يعرف اني شكد احب الالتزام بكولشي واكرهه الكسل والتأخير بس هاي بعد صار ظرف جبرني انو ما انزل
وطبعا شكرا لكل الي سألو عليه قريت رسائلكم وتعليقاتكم تسلمون حبايبي وشفت حمله التعليقات الي سويتوها اليوم وكولش انقهرت لان مجان عندي مجال افتح حتى الواتباد واشوف رسائلكم بالايام الفاتت واعتذر اذا مرديت على احد بس الخاص مليان رسائل حرت ادر على منو لان كولش هواي مراسليني وملحكت ارد على الكل فتعذروني ... احبكم
#ذنوب على قيد الغفران
#للكاتبه براء
غنى : رفعت الدشداشه شفت فهد كبالي ... فتحت عيوني هايييي شنوووو ... خليت الدشداشه على راسي ... انت شدتسوي هناا موعيب عليك صاعد بالسطوح تباوع على اعراض العالم
فهد : نزلت من السطح صرت كدامها لان سطحهم ناصي .... اشرت على روحي هاي وياي
غنى : لعد ويامن
فهد : بعصبيه وانتي منو واني اباوعلج كيت وينسليت واني ماادري ... لترحين زايد تره جنت اسوي الصحن وماادري بيج كبالي
غنى : غير تبلغونه تكولون حنصعد للسطح شهالميانه هاي مو عيب عليكم
فهد : شنو انوب ناخذ اذن من حضرت جنابج الموقر ياله نتحرك وبعدين العيب عليج انتي المفروض تخلين شي على راسج وتصعدين مو تطلعين سفردح والناس داير مدايرج
غنى : بس
فهد : لا بس ولابطيخ اعرفي شلون تحجين انتي ماكاعده يم ناس مسقطين حتى تكولين واكفين نباوع عليج وهسه ياريت لو حلوه جان كلنه ميخالف ... عفتها ورحت
غنى : مسحت على وجهي شلون فشله هسه اله تحجين جان نزلتي بوجهج جوه شكد عيب شلون حاجيته بهالاسلوب مهما يكن اكبر مني والله صحيح كلامه اني شلون اصعد هيج افف .... اسفه الهي واسمك ماجنت ادري اكو زلم بالسطح
_________
ايمان : شفت فهد نزل من فوك وكف يشوف التلفزيون اسمعه يدردم
فهد : والله يالله نباوعلها على اساس هي ملكه جمال اشو ذره انوثه ماعدها وجها وجه الميت من الشحوب استغفر الله
ايمان : شبيك يمه
فهد : عدلت الوايرات هيج يمه
ايمان : جاا شبيك تدردم
فهد : مو يمج السالفه هيج احجي ويه روحي هاي سويت التلفزيون ... تردين شي بعد
ايمان : لا يمه عاشت ايدك
فهد : ايدج العايشه يله من رخصتج صعدت لغرفتي ذبيت ملابسي وطبيت اسبح لان تربت من السطح ... واكف جوه الدوش واجه شكلها على بالي يعني شكد ماهي مو حلوه شكد ماشعرها خيالي ...حلو لونه وكثافته تحس بحيويته تلقائيا من تشوفه ... يله هم زين طلع عدها شي حلوه طلعت من الحمام بدلت ملابسي وطلعت ويه جماعتي
_________
غنى : كاعده الف كبه ودكت عليه نرجس ... الوو
نرجس : من لكه احبابه نسه اصحابه ومن اكلج انتي متغيره عليه تكولين لا
غنى : خير يا ستار شصاير
نرجس : صار يومين ما مخابرتني ليش ولج لو نرجس صارت كخه وصارت بدالها اروى
غنى : لا والله انتي محد تاخذ مكانج لا اروى ولا غيرها اكو وحده تفضل بنيه هستوها تعرفت عليها على صديقة عمرها
نرجس : اي انتي لان طايحظج ومابيج خير
غنى : اشكرج
نرجس : ادللي حبيبتي هذا اقل واجب تستحقي
غنى : ضحكت احجي شعندج
نرجس : ردت اسألج شقررتي على حساب العرس
غنى : مو كلنه مااروح ليش تلحين
نرجس : يله عاد نونه لتصيرين سخيفه خلي نروح نتونس صارلنه فتره ممتشاوفين
غنى : منو لازمج ليش متجين
نرجس : خو انتي تعالي شنو يمه شنو على راسج ريشه
غنى : لا والله بس منو يجيبني تدرين بيتنه بعيد وانتي تكدرين تخلين استاذ جعفر يجيبج
نرجس : صدك على طاري جعفر انتي لسه ماخذه موقف منه
غنى : لا
نرجس : يعني عادي اذا شفتي تحجين وياه
غنى : اي عادي هو اعتذر بعد عليمن اصير سخيفه وياا واضل ماخذه موقف
نرجس : يمه فديت ام كلب الطيب
غنى : ابتسمت هسه كليلي شوكت تجيني
نرجس : بعرس كوثر اجيج من الصبح اتحضر عندج حتى حتى نروح سوه
غنى : انتي طرشه مو كتلج مااروح
نرجس : اي هو ادري لازم نروح سوه
غنى : تستغبين حضرتج
نرجس : اي نعم
غنى : تنهدت نرجس اني حزينه شلون احضر عرس واتونس واني ميتيلي ثنين شنو ميتتلي دجاجه حتى ما ادير بال
نرجس : محد كلج ركصي وهلهلي وذبي لحم روحي بس باركي للبنيه وغيري جو كافي صارلج اشهر دافنه روحج لا طبه ولا طلعه ليش مو حتى الله ميرضه
غنى : مابقت حجه ما طلعتها .... نرجس انتي ليش تحرجيني مو حتى ملابس مناسبات معندي حتى اروح هاي عود اذا فكرت احضر
نرجس : عود لبسي مني اني عندي كومه ملابس اختاري الي يعجبج
غنى : لا طبعا مستحيل البس منج
نرجس : شنو تستنكفين مني ولج
غنى : اكيد لا
نرجس : لعد انجبي ودولابي تحت امرج شتردين تلبسين اخذي وابن امه الي يكلج ليش ... يله اني اروح اشوفج بيوم العرس باي
غنى : تنهدت باي سديته ورجعت اكمل الكبه
سحر : هاا نونه كملتي
غنى : لا بعدني
سحر : شبيج صار ساعه تتصايحين انتي ونرجس
غنى : طالبه ويانه عزمتنه على عرسها ونرجس تريدني اروح وياها
سحر : اي شكو بيها روحي غيري جو صارلج فتره ماطالعه
غنى : خاله انتي شلون ترديني اطلع واطب واغير جو واني اخويه وبيبيتي حتى السنه مدايره عليهم شنو كلبي حجاره اني
سحر : اسألج سؤال الى متى تبقين هيج
غنى : تنهدت خاله تصدكين اذا اكلج لحد الان من يجي على بالي انو همه ماتو كلبي ينكمش واحس روحي مختنكه الي صار مو سهل تخيلي مرات من اكعد وحدي افكر انو فعلا الي صار صدوك مروان وبيبي حضنتهم الكبور وصارت النجف مسكنهم
سحر : حبيبت كلبي الله انطه للبشر نعمة النسيان ومع مرور الايام راح تزوجين ويصيرلج بيت وعائله تنسيج الدنيا كلها
غنى : دنكت راسي ودموعي نزلت ماكو شي اسمه احنه ننسى احنه نتناسه يا خاله نحاول نهرب لا اكثر خاصه الي يتعب ويربي ويحب مثل حب الام مستحيل ينسى وانتي تدرين مروان وبيبي شنو جانو بالنسبه الي مروان اخويه وابني وبيبي حبيبتي وصديقتي ووعيت على الدنيا وكبرت وهي ماتركتني
سحر :كافي يمه .... حاولت اسد الموضوع ما اريد ااذيها اكثر ... اكلج عوفي هالموضوع وكليلي شتردين اسويلج واني حاضره
غنى : مسحت دموعي ... اي شي
سحر : اي شي
غنى : كمت غسلت ايدي واجيت بسرعه جايبه المكص ... تفضلي
سحر : شنو هذا
غنى : مكص !
سحر : عليج الله عبالي سجينه ... ادري مكص شسوي بي
غنى : درت وجهي كصي
سحر : مو كلنه شعرج متكصي
غنى : لتكصين منه هواي بس شويه
سحر : والله حرام تكصي
غنى : خاله حبابه لتعاندين
سحر : دجيبي ... مشطت شعرها حتى يتعدل ... المن تردين اكصه
غنى : شوفي خلي طوله مناسب بحيث ميضوجني
سحر : كعدت بالكاع وكصيته على كد سبع اصابع حتى ميضوجها بعد ... هاا هيج زين
غنى : رحت باوعت بالمرايه عدنه مرايه طواليه تصير على طول الجسم باوعت لروحي ايي هسه احسن على الاقل بعد ميضوجني بستها شكرا خاله
سحر : عفوا يابنيتي الحلوه
غنى : ابتسمت بهدوء
سحر : روحي كملي الكبه
غنى : كملت الكبه وكمت توضيت وصليت وكعدت اقره قران هالفتره داسوي ختمات واهديها لروح بيبي واهلي
__________________
انغام : شبيج اروى مخبوصه
اروى : اليوم راح يجن البنات يمنه
آلاء : يابنات ذني
اروى : علا ، مروه ، شهد ، ملك ، عبير ونسوان عمامي وعمتي
آلاء : شعدهن جايات
اروى : شنو شعدهن جايات غير يسيرن يمنه وبعدين انتي مالج علاقه عود اذا وجودهم يضايقج بكل بساطه تكدرين تسدين باب غرفتج وتكعدين
آلاء : شبيج هسه شكتلج اني
اروى : طلعت الحلويات من الفرن ماكلتي شي شويه وخري صعدت لغرفتي خليت الحلويات والحبشكلات بيها بعد ماسويت جو بناتي النه شفت امي هاا يمه عليمن تدورين
ايمان : ورده خانسه اليوم ماشفتها
اروى : اكيد بغرفتها لو تقره لو على الأيباد ماكو غيرها
ايمان : طبيت لغرفة ورده اباوعلها لابسه جادر وكاعده تصلي ... باستغراب اول تالي ورده تصلي راح لساني واني احاول اقنعها انتظرتها تكمل صلاه
ورده : هاا ماما رايده شي
ايمان : لا بس متفاجئه من شوكت تصلين
ورده : وكفت كدامها شوفي ماما اني فكرت بيني وبين نفسي انو ليش مااصلي وشنو الي يمعني اشو تكليف ومتكلفه والصلاه مو طويله اكدر بدقايق اصليها فعليمن ازعل الله مني واخلي يضوج فكمت اصلي حتى اول شي اخلي الله يفتخر بيه وثاني شي حتى اتوفق بحياتي وبدراستي
ايمان : ابتسمت منين سامعه هالحجي مااصدك انتي تفكرين هيج
ورده : من رحت ادرس يم غنى هي سولفت ويايه وحجتلي على دينه والصلاه وهواي اشياء خلتني اقتنع انو لازم اصلي محبتاً بالله مو تاديه واجب وبس
ايمان : ماشاءالله هاي غنى تفكر هيج ... الله يحفظها شلون تفكير حلو عفيه بنيتي دائما سمعي كلامها خوش بنيه هاي
ورده : اي ماما ادري
__________________
عمر : هاا ابو الفود الواضح المزاج عالي اليوم
فهد : كلش
ايمن : احجي منو الي حسن مزاجك اليوم
فهد : رفعت الكاس لشفايفي ... امك
عمر : لا فهد لتجيب طاري الامهات
فهد : بهدوء انت انجب ولتصير لوكي
ايمن : ههه اريد فديوم فهد يكعد بمكان بدون ما يذبله حجايه سم على احد بس ميكدر
عمر : شوفو شباب
فهد : باوعت يمكن واحد تحارش بوحده من الراقصات وصارت هوسه
ايمن : تتوقعون عليمن هالعركه
فهد : اكيد لو متحارشله بوحده وما انطتنه مجال لو تعارك ويه واحد
عمر : باوعت لفهد ضلت عينه عليهم ... فهد يمعود وين رحت
ايمن : بعد شغله وصارت كدام فهد اكيد راح يكعد يحقق ويدقق بالسالفه لحد مايفتهما كلها
فهد : تره صرعتو راسي صوتكم .... اباوعهم كامو وين
ايمن : خلي نشوف شكو
فهد : كعدو وسكتو احنه ماعلينه شي ميخصنه
عمر : دشوف صارت بالقنادر
فهد : يطبهم مرض احنه شكو كعدو
ايمن : يعني حلال عليك حرام علينه
فهد : شفتوني كمت
عمر : لك انت اشعه اي سالفه مشبوهه كدامك تسويلها سونار عقلي
فهد : انجب
ايمن : يابرودة اعصابك يا اخي
فهد : باوعتله صفح ورجعت اكمل كاسي
ايمن : ديربالك لتثكل بالشرب
فهد : مسيطر على نفسي لتخاف
عمر : صدك شو انت ولا مره سكرت
فهد : تريدني اسكر حتى اصير مضحكه لليسوه والي ميسوه
ايمن : خرب يومك الله يساعد الي تاخذك
فهد : كافي اسكت راح اركعك بالكاس
_________________________
سحر : طبيت لغرفه غنى لكيتها تقره قران كالعاده وقتها كله لو تشتغل لو تقره قران لو تقره بهالكتب عفتها براحتها نزلت كعدت بالصاله ... شويه وسمعت صوت موبايل بالمطبخ ... كمت شفته موبايل غنى يدك شفتها اروى ... جاوبتها الوو
اروى : الوو السلام عليكم شلونج خاله
سحر : هله حبيبتي انتي شلونج
اروى : الحمدلله عفيه خاله غنى كاعده
سحر : اي هسه ثواني ... صعدت فوك فتحت الباب ... نونه اروى تريدج
غنى : صدقت وكمت اخذته منها الوو
اروى : هاا نونه شلونج
غنى : الحمدلله خير صاير شي
اروى : لا ماكو شي لتخافين بس اني والبنات متجمعات وحبن يسألن على الفساتين كملن
غنى : كملت بس فستان مروه وملك
اروى : بنات تكول كملت فستان مروه وملك
مروه : صدك كليلها خلي تجيبهن وتجي حتى نشوفهن
اروى : نونه عفيه جيبي الفساتين وتعالي نشوفهن
غنى : مااكدر اجي تردن تعالن انتن شوفنهن
عبير : صحت لا غنى حبابه تعالي انتي والله مابينه حيلل نكوم ستونه متعشين
غنى : مااكدر اجي بيتكم كله زلم زحمه والدنيا ليل
اروى : ولج والله ماكو زلم كلهم طالعين بس احنه بالبيت يله فدوه منتظريج
غنى : بس .. اففف سدته نزعت الجادر رحت لبست صايه فوك تراكي واخذت شالي لبسته فتحت الكنتور طلعت الفساتين بعد مكملتهن كويتهن وعلكتهن ... صفطتهن ونزلت شافتني خالتي
سحر : وين ؟
غنى : خابرتني اروى تسأل على الفساتين كتلها خلصتهن وتريد اوديهن الها
سحر : غنى الدنيا ليل هسه وهمه عدهم زلم شبيج تخبلتي
غنى : والله حتى اني مقبلت بس هنه اصرن و لتخافين اصلا ماكو احد هنه كللي يله اني ما اتأخر بس انطيهن الهن وارجع
سحر : ماشي
غنى : فتحت الباب وطلعت دكيت الجرس طلعتلي ورده
ورده : هلوو غنى
غنى : هلو حبيبتي عفيه فتحي الباب شويه خلي ادخل الملابس
ورده : دتعالي دخلي للصاله خلي اصيحلج اروى
غنى : تمام دخلت للصاله لكيت نسوان غريبات كاعدات ويه ام فهد ومرت ابو وجناينهم ... السلام عليكم
الكل : وعليكم السلام
غنى : شلونج خاله
ايمان : هله بعد خالتج انتي شلونج وينج هالفتره ماشفناج من زمان
غنى : ابتسمت والله عندي شغل
ايمان : حبيبتي
اروى : هاا نونه بوستها شلونج
غنى : الحمدلله ... تفضلي
اروى : دتعاي راويهن انتي خاف اكو ملاحظه فدشي يردن يكللج عليه
غنى : خزرتها ... عود اذا عدهن شي خلي يجني باجر هسه لازم اروح
اروى : دتعاي شبيج مناكلج والله
غنى : اروى خالتي منتظرتني عوفيني
اروى : متتاخرين يله تعاي
غنى : صعدنه فوك اول مره اشوف بيتهم من فوك فتحت غرفتها ودخلنه
البنات : هلوو غنى
غنى : هلو بيجن
مروه : حلوه الصايه الي لابستها هاي خياط لو جاهزه
غنى : لا جاهزه
مروه : منين اشتريتها
غنى : والله مااتذكر من زمان عندي
مروه : دكولي شبيج قابل راح اروح اشتري مثلها
غنى : والله ما اتذكر .... عفيه كومن قيسنهن بسرعه اريد اروح
عبير : دكعدي خلي نشوفج شبيج مستعجله
غنى : كعدت على جربايه اروى وكامن البنات يقيسن وره شويه طلعن
مروه : بنات شوفن شلون حلو يخبل .... تلمسه عاشت ايدج كله على بعضه يجنن التصميم القماش التفصيل كلشي كلشي
غنى : ابتسمت تلبسي بالعافيه
ملك : شنو هاي غنى من الكتف يختلف عن الصوره
غنى : القماش الي جبتي مكفه فسويتلج فيكه بالكتف حتى ميبين اني ضفت قماش من عندي
علا : بس تدرن صار احلى من الصوره يعني هالاضافه كلش مرتبه
ملك : يعني حلو
شهد : يخبل
غنى : عندجن اضافه على شي تحبن اسوي تعديل على شي
مروه : لا كلشي ميحتاج عاشت ايدج
ملك : عاشت ايدج
غنى : ابتسمت خلص لعد همزين عجبنجن
مروه : اوكفي خلي اجيبلج الفلوس من امي واجي
ملك : واني هم اخذيني وياج
غنى : باوعت للساعه غير يفضنها اريد اروح
اروى : نونه عكب باجر تجين لعرس كوثر مو
غنى : انتي ترحين
اروى : اي اكيد وانتي
غنى : ان شاءالله اذا فرغت
مروه : هاج تفضلي
ملك : تعبناج
غنى : ولو تدللون ... يله من رخصتكم طلعت من الغرفه نزلت جوه سلمت على النسوان وطلعت جان اشوف .....
ضحى : اكلج ام فهد منو هاي
سعاد : خدامه منو يعني
ايمان : شوكت صارت خدامه البنيه علساس تشتغل طباخه هنا بطلب مني بس بعدين بطلت لان خالتها متقبل
حياة (زوجة مهدي) : اي احسن يمعوده شلون تأمنون تاكلون من ايد غريبه
ايمان : لا ليش البنيه تنكرط كرط من النظافه وتره هي الي بطلت مو احنه الي بطلناها
ضحى : ام فهد هي شكد عمرها
ايمان : اعتقد كالت اروى مرحله ثالثه يمكن عشرين واحد وعشرين هيج شي
ضحى : هاا الله يحفظها
بتول : هاا خاله شكلج نويتي عليها
ضحى : هاا لا لا شنو نويت
حياة : اكلج يعني هي تدرس وتشتغل
انغام : اي خاله وفد حبابه الى درجه
حياة : والله عفيه عليها من كدرت تشتغل وتدرس سوه مو مثل بناتنه المخربطات كلاص ماي ميجيبن لرواحهن
الكل : اي والله
_________________
غنى : اجيت اطلع وشفت فهد كبالي
فهد : هاي شعدها هنا بهالوقت صدك سايبه ... اجيت اريد ادخل صارت كبالي اجي منا تجي منا ... وكفت تفضلي طلعي ... ابتعدت عنها ودخلت جوه
غنى : لحظه فهد
فهد : درت وجهي عليها نعم
غنى : احم اني اعتذر على سوء التفاهم الي صار اليوم مجان قصدي شي بس نصدمت من شفتك كبالي وصارت هيج ردة فعلي عليك بدون قصد
فهد : ضميت اديه ... والمطلوب هسه
غنى : باوعتله ممطلوب شي بس حبيت اوضحلك الي صار يله من رخصتك
فهد : اوكفي
غنى : ؟؟
فهد : انتي ليش تسوين هيج
غنى : شسويت ؟
فهد : باوعتلها ليش تتصنعين
غنى : بتفاجئ اني اتصنع
فهد : اي انتي
غنى : لا متوهم عمري متصنعت وليش اتصنع
فهد : ممكن حتى تلفتين الانتباه
غنى : بهدوء لا انت متوهم اني عمري مفكرت انو الفت انتباه اي احد ليش منو الناس واني افكر اصطنع شخصيه مو الي حتى بس ارضيهم
فهد : يمكن حتى يصعد سوكج
غنى : باستغراب عفوا مفهمت قصدك ؟
فهد : غلسي ولو اني ادري بيج فهمتي بس تتصنعين الغباء
غنى : اكو مثل كلش احبه يكول ... كلاً يرى الناس بعين طبعه .. فشنو تشوف نفسك انت حتشوف الناس
فهد : رفعت حاجبي شنو قصدج
غنى : قصدي مثلا انت هسه الشي الظاهري الي دتطلعه للناس يختلف تماماً عن الي بداخلك ... انت صانع شخصيه غريبه عجيبه وصعبه بس حتى تبين انك شخص معقد وصعب وملفت للانتباه بس بالمقابل انت هش وضعيف جدا من الداخل ... فأذا نريد نقيس كلامك علينه برأيك من المتصنع هنا اني لو انت
فهد : وانتي شدراج هاي شخصيتي الحقيقه شنو مجربتني واني ماادري
غنى : تكدر تكول اني كد ما قاريه كتب عن علم النفس والفلسفه خله عندي قدره على تفسير شخصيه كدامي واعرف هو شنو من خلال تصرفاته ..... فيا استاذ فهد بحرب التدقيق والتفسير لتجي تنافسني لانك حتخسر بكل الاحوال واشكرك على اسلوبك واخلاقك العاليه
فهد : باوعتلها بحده
غنى : تضراته تخوف احسه يفكر بشي غامض او موزين ... احم عن اذنك عفته وطلعت
فهد : كل عقلها هاي جايه تريد تتحداني بالتدقيق لا وواثقه من نفسها ولو اني شتوقع من وحده تلعب على الحبلين غير الدهاء والذكاء بس مع هذا هي هسه تحدتني وماعاش ولا كان الي يتحداني ... دخلت جوه سلمت وصعدت لغرفتي اكرهه التجمعات وخاصه تجمعات النسوان الي متخلص حجه فلان كال علان مات فلتان وهكذا
_________________
سحر : وين صارت هالبنيه كلتلي شويه واجي وهاي صارلها نص ساعه سمعت صوت الباب اكيد اجت اباوعلها طبت ... وينج يمعوده تأخرتي
غنى : انتظرت البنات يقيسن ويشوفن الفساتين فت عليهم لو لا فتحت جنطتي تفضلي خاله
سحر : شنو هذني
غنى : فلوس الخياط
سحر : ادري شسوي بيهن
غنى : خليهن عندج
سحر : يمه هذا تعبج خلي عندج اني ما محتاجه نعمه كريم الحمدلله وضعنه صار تمام من كمنه نشتغل
غنى : خليت الفلوس بأيدها .... ميخالف خليهن عندج انتي الي تسوكين وتعرفين شناقص البيت فخليهن عندج
سحر : براحتج
غنى : صعدت لغرفتي ذبيت ملابسي لبست شي خفيف ونمت بفراشي .... اول ما خليت راسي على المخده اجه على بالي كلام فهد ... مدري ليش احس هالفهد تركيبه غريبه عجيبه ساعات اشوفه حباب ساعات اشوفه موزين ساعات هادئ وساعات عصبي مرات يكون محترم جدا ومرات يكون فظ لابعد درجه شكد ما اكول كدرت افسر هو شنو وافصل شخصيته يطلع تفسيري غلط ما اعرف احدد شنو هو ولأي فصيله من البشر ينتمي زين او موزين ؟.... اول مره بحياتي اركز ويه رجال لهدرجه عمري مفكرت انو افسر تصرفات الي كدامي بس فهد حسيته قاعده شاذه لهسبب اريد ادرسها ... لزمت موبايلي اجاني اشعار من اروى فتحته شفتها ناشره كعدتها هي وبنات عمها ... شكد تمنيت يكون عندي بنات عم ونتجمع هيج جمعات اني وياهن بس يله الله مقاسملي ... دخلت على حسابها شفت حساب فهد بوجهي صارت اصابعي على حسابه شفته خال صورته بملابس الجيش ... اباوع الحسابه مناشر صوره الشخصيه بس هالصوره قريت الخواطر الي ناشرها احس كلامه بي شفرات ... ابتسمت مبين عليه يحب الشعر ... والله انت تركيبه غريبه يافهد غلقت موبايلي ونمت حاضنه مخده مروان والي حيخلص عطرها كد مشميت بيها
___________________
ياسمين : اكلكم شو فهد ماكو صارله اسبوع ماجاي
ايمان : عمه عنده شغل
ياسمين : واذا عنده شغل ميكدر يفرغ نفسه شويه يجي يشوف بيبيته
ايمان : انتي تدرين بي الاسبوع كله بالدوام وبوكت استراحته يطلع للمعمل لو يروح للبساتين يشوف الشغل يعني يادوب يلحك ينام
ياسمين : ميخالف بس اني هم الي حق عليه غير يجي يشوفني يسأل عليه كافي بس شغل شغل مو دمرها لنفسه
ايمان : اي والله بس انتي لتشيلين همه هو يعرف شلون يتصرف
ياسمين : شلون ما اشيل همه ولج فهد تعب هواي بحياته اريده يستقر اريده يزوج ويكون عائله الى متى يبقى هيج انتي يالام ماحاولتي تقنعي
ايمان : طاحت وصله من لساني واني احاول اقنعه ... يمه شفتلك بنيه مرتبه خلي اخطبها .. لا .. يمه بنات خوالك كبرن وصارن شحلاتهن خلي اخطبلك وحده منهن .. لا ما اريد .. حتى بتول حاولت اقنعه بيها وماقبل شسويله يعني
ياسمين : جبري ولا يبقه هيج
ايمان : وتتوقعين فهد ينجبر على شي هو ميريده هي العسكريه ماكدرت اجبره يبطل عليها ترديني اجبره على الزواج
ياسمين : ما كعدتي وياا ما عرفتي شنو سبب رفضه للزواج
ايمان : كعدت ومثل كل مره كلامه نفسه ما لكيت الي تناسبني
ياسمين : هاي البنات شكدهن معقوله ولا وحده تناسبه
ايمان : والله الافندي عنده شروط دقيقه لازم تكون متوفره بالبنيه ياله يتقبل يتزوجها
ياسمين : اي شكو بيها انتي دوريله على وحده تناسب هالشروط
ايمان : مو لكيت والله لكيت بس هو ميقبل
ياسمين : حاولي تقنعي تره الشيب ترس راسه ومحد تقبل بي بعد بنات هالوكت يردن شاب مو شايب
ايمان : تنهدت الله كريم
___________________
غنى : اليوم خطوبة كوثر وطبعا خالتي جبرتني احضر واني مااريد درت وجهي على نرجس حتلبسين هيج
نرجس : اي شكو بيها
غنى : مو اوفر هواي مخلع
نرجس : حفله نسوان شترديني البس وبعدين ما كتيلي شراح تلبسين اليوم جبتلج خمس فساتين اختاري الي يعجبج
غنى : باوعت كل عقلج ترديني البس هذني
نرجس : ليش شبيهن
غنى : اولا هذني الوان وثانيا شنو هالمديلات لج شنو فساتين لو قمصان نوم
نرجس : اولا انجبي يخبلن وثانيا حبيبتي تره الحزن بالكلب مو بالالوان يعني قابل حتضلين لابسه اسود طول عمرج
غنى : اي طبعا
نرجس : يعني هسه ماراح تلبسين منهن
غنى : هزيت راسي نافيه
نرجس : واذا ماراح تلبسين منهن شحتلبسين هسه
غنى : اعرف شنو البس ... طلعت بنطرون كابوي عندي وياا توب قصير لونه اسود وعندي ستره سوده جديده مشتريتها من زمان بس ملابستها
نرجس : شراح تلبسين ولج
غنى : هسه تشوفين ... دخلت للحمام بدلت وطلعت
نرجس : اباوعلها طلعت حلوه هي طولها وسط وجسمها يجنن مرتب وحلو ..... حلو يخبل بس ليش مو فستان
غنى : فتحت شعري موشرط اله فستان وهاللبس اريحلي
نرجس : دكعدي خلي اسوي شعرج شنو رأيج ابرمه
غنى : لا عوفي على طوله
نرجس : زين خلي اسشوره
غنى : ماكو حاجه هو ناعم
نرجس : لا حتى يبين احلى وبي حيويه اكثر
غنى : بكيفج بعد كعدت وكامت تسوي شعري ضلت فتره طويله لمن كامت تغلط ... هههه شبيج
نرجس : شنو هاي نشلع كلبي كل خصله شطولها هاي اذا اريد ابرمه مااخلص منا لباجر
غنى : تستاهلين انتي تطوعتي مو اني
نرجس : ساعة السوده الي تطوعت هاج انتي كملي
غنى : انطيني كملته وكمت لبست حذاء من نرجس جانت كعب عالي وموديلها حلو ... اخذت صايتي وحجابي لبستهن وطلعت كعدت بالصاله علما تكمل هي
نرجس : هاا شنو كملتي
غنى : اي لعد شعندي
نرجس : شو ما حاطه شي
غنى : مااريد اخلي مكياج ولتلحين متقبلين وتكولين لا اكوم انزع وابطل والله
نرجس : لا لا يله امشي رمش عليه جعفر هو راح ياخذنه
غنى : يله خاله اني حروح تعالي سدي الباب ... طلعنه شفنه جعفر واكف بره تقرب منه
جعفر : هاا شلونج غنى
غنى : الحمدلله
جعفر : خو ما بعدج زعلانه مني وماخذه على خاطرج
غنى : بهدوء لا استاذ اعتبر مصار شي انت اعتذرت والموضوع انتهى
جعفر : شكد تعجبييني احم اقصد شكد يعجبني تفكيرج
غنى : اجيت اجاوبه وسمعت صوت اروى درت وجهي شفتها هي وفهد طلعو
اروى : راح ترحين
غنى : هزيت راسي
اروى : اي همزين حتى تنونس سوه هناك بس تعالي ليش ما كتيلي جان رحنه سوه عليمن مزحمه نرجس
نرجس : لا عيني ماكو زحمه بس اني صديقتها المقربه وتعرفين يعني متكدر تخطي خطوه بدوني
فهد : يله اروى تاخرنه
اروى : يله باي اشوفجن هناك
غنى : صعدنه بسياره الاستاذ جعفر
جعفر : شكد غثيث هالرجال ولا ارتاحيتله
نرجس : والله انت الغثيث
جعفر : شنو ولج
نرجس : اكول صح لسانك جعفوري
جعفر : حركت السياره .... عبالي
________________________
فهد : وصلت اروى وطلعت للملهى بعد ما اكدت عليها من يخلص العرس تخابرني حتى اجيها .... وصلت للملهى صفيت سيارتي ونزلت
مهيمن : يا هله وينك تأخرت
فهد : كعدت صار عندي شي اخرني ... اي شلونكم
ايمن : اليوم السهره نار
فهد : باوعت على الستيج ابتسمت مبين
عمر : اني ناوي ااجر وحده اليوم ضايج وجدي كامز
فهد : صحت للنادل طلبت فودكا باوعت لعمر ... اي شكو بيها بس اختار زين واتأكد من صحتها مو كبل تاخذها
عمر : اي هو هيج
ايمن : اي سيدي شبيك
فهد : اخذت الكاس مابيه باوعت للستيج خوش وجبه اليوم
عمر : ههه هاا ناوي تجرب شي جديد
فهد : يجوز اريد شي جديد مليت من القديم وهو شكلي هالايام راح اغير
مهيمن : واذا عرست شلون من تمل من مرتك شنو تغيرها
فهد : انتو تدرون اني ما اتزوج اله اشوف نفسي مكتفي بوحده اكتفاء تام
عمر : عجبتي هاي
ايمن : اووف لك صاروخ هاي
فهد : باوعت كالعاده الجسم خرافي والخلقه زفت
مهيمن : اشرتلها تجي
فهد : اجيت كعدت وضلت تسولف وتضحك ويه الولد
.... انت يا حلو ليش ساكت
فهد : ابتسمت رافع الكاس لشفايفي
.... خليت ايدي على فخذه شلونك
فهد : مثل لونج
.... ههه لعد مزاجك اسمر اليوم
عمر : معليج منه خليج ويانه شكد عمرج
.... 26 ليش
عمر : شكد الليله
.... ههعهه لا تره تكلفك هواي ... باوعت لهذا الصاك بس لهذا بلاش شتكول يا حلو على فكره تره جسمك يجنن وقاطك عجبني
فهد : خليت فلوس بصدر بدلتها .... لا شكرا مااحب المستعمل واشكرج على المجامله
.... ابتسمت وهمستله جرب متخسر شي
فهد : بهدوء مو كلنه شكرا انتي لزكه ... اباوعلها احتقن وجها وكعدت تتفق ويه عمر حتى تطلع وياا درت وجهي اشوف الركص واشرب بكل هدوء مثل عادتي
__________________
غنى : دخلنه للقاعه شفنه اروى رحنه وياها سلمنه على البنيه ونطيناها واجب اني اجيت اادي واجب لا اكثر كملنه سلام وكعدنه بنهايه القاعه ماكو احد حتى ناخذ راحتنه
اروى : غنى طالعه تخبلين كلش عجبني ستايلج اليوم
غنى : ابتسمت تسلمين حبيبتي هذا من ذوقج
نرجس : انطي صبر هسه يجن الخطابه عليج
غنى : انتي روحج بهالسوالف كعدي وسكتي
اروى : ههه لا عاد احلى شغله بنرجس صراحتها واهتمامها بموضوع الزواج والشباب فضيع
نرجس : تصحيح الاهتمام بموضوع الشباب الحلوين فقط
غنى : شفتي بله عفيه بنيه شكد تدور حلوين
نرجس : علساس انتي متدورين حلوين
غنى : طبعا لا اني ميهمني الشكل تهمني الشخصيه والاخلاق وبس
اروى : صدك غنى اني ولامره شفتج جبتي طاري ولد او حجيتي بهيج مواضيع سولفيلي معقوله ماجذب نظرج ولا رجال
غنى : تصدكين اذا اكلج لا
اروى : معقوله ولامره شفتي رجال وعجبج شكله او شخصيته او اي شي بي
نرجس : عوفج منها ولج هاي تريد واحد اعذر
غنى : خزرتها نرجس تأدبي
نرجس : قابل جذب هاي الحقيقه
اروى : صدك غنى انتي هيج تفكرين
غنى : بخجل مو هيج افكر بس الرجال الي اريد ارتبط بي كون بريئ ومعنده تجارب سابقه قبلي بحيث اني افطن عليه وهو يفطن عليه
اروى : انتي صدك تحجين وين اكو رجال بريئ وكلشي ماشايف لا وتردي اعذر هم شلج بيها هاي السالفه
نرجس : خبله هاي عبالها احنه كاعدين بالزمن القديم حبيبتي انتي كاعده بهالبقعه الارضيه الي هي العراق وبالعراق ماكو رجال اعذر
غنى : بهدوء ليش لا ولد الحلال والي يخافون الله ومبتعدين عن المحرمات هواي وبعدين اني مغلفت نفسي وحافظت عليها حتى من تالي اخذ واحد شايف وعايف
اروى : انتي ليش ماخذه الموضوع من هالمنظور اكو هواي شباب من تزوجو تابو وعافو المكسرات والتزمو
غنى : اني ميفيدني هيج هذا اكبر غلط حضرت جنابه يحير شيلعب ويسوي ومن تالي من يكعد يكول اريد وحده شريفه وكلشي ما شايفه هذا تمسلت وطبعا كلامي مااقصد بي بس الشباب حتى البنات خو مو هي مصادقه نص العراق وتالي تريد واحد ملتزم وكلشي ميعرف
نرجس : شوف هاي شتحجي وين اكو رجال يريد وحده مسويه مثله انتي خبله حبيبتي
غنى : والله حضرت جنابه محد كله العب على الحبلين وحير شسوي
اروى :حبيبتي تره بوقتنه ماكو رجال ماشايف وممجرب شي هذا مستحيل خوما تضلين انتي العمر كله منتظره شي ماموجود
غنى : عادي اضل منتظره الشخص الي يناسبي لحد ما الكى ياله ارتبط ... سرحت بتفكيري ... اني منتظره الشخص الي يفتح عيونه على الحياة وياي وافتح عيوني على الحياة وياا اني منتظره الشخص الي يركض وياي على الصلاه الشخص الي الجئ اله بكل مشكله تصيرلي ولو كانت بسيطه منتظره الشخص الي بعد حبه لربه اجي اني اريد شخص يشبهني تماما مهووس بالعباده والالتزام مااريد واحد اهم شي عنده غريزته وشهواته
اروى : تره احنه بشر وكل البشر عدهم غريزه هاي قاعدة الحياة
غنى : انتي كلتيها احنه بشر مو حيوانات حتى منكدر نسيطر على غرائزنه تره لو الزلم يحاولون ينسون غريزتهم وشهواتهم مجان صارت اكو قضايا اغتصاب بالمجتمع ولا جان صار شي اسمه تعدد الزوجات جان كل شخص اكتفه بالي عنده وكعد وسكت
اروى : انتي كلش عنصريه ويه الزلم تحسسيني النسوان فقيرات تدرين كون يسمعج فهد يتخبل من الاشخاص الانحيازيين
غنى : ذكرتيني بمقوله لفيلسوف معروف تكول ... (( من اين يأتينا الفرح ؟ والفكر في بلادنا ارخص من الحذاء وغايه الدنيا لدينا الجنس والنساء )) فهمتي اني ليش ادقق بهالموضوع لان اكثر الزلم يكونون شهوانين واني مااريد ارتبط اله بشخص يكسر هالقاعده
نرجس : دنجبي كامت تتفلسف عود شوفوني اني اقره كتب ومتثقفه دكعدي وسكتي تريد واحد طاهر مثل الي طالع من بطن امه
غنى : نرجس اني داحجي جديات
نرجس : جديات لو بيبيات
غنى : صحت بيها نررررجس
اروى : ههههه لتضوجيها نرجس شوفيها ضاجت منج
نرجس : كرصت خدها يمه اروح فدوه للكيمر الي بوز وضاج
غنى : ابتسمت دافعه ايدها وخري سخيفه
نرجس : هههه يله عاد نونايتي لتطنكرين تصيرين جنج صخله مطلكه
غنى : ضحكت دبسزز دومها سوالفج مكسره ... ضلينه كاعدين نسولف بيومها صدوك تونست ويه البنات لان صار هواي ممتجمعين خلصت الحفله وكمنه بدلنه وطلعنه
اروى : نونه فهد تره راح يجي عليه وانتي تعاي ويانه لان نرجس طريق بيتها بعيد ماكو داعي تزحميها
غنى : اخاف زحمه
اروى : لج شنو زحمه دبطلي هالسوالف يله تعاي
غنى : بس خلي ابلغ نرجس واجي ... رحت شفت نرجس واكفه يم جعفر نرجس اني حروح
نرجس : مو علساس ترجعين ويانه
غنى : لا مو اخو اروى حيجي عليها واني ارجع وياهم مدامي بطريقهم
جعفر : وشعندج رايحه وياهم احنه نوصلج صعدي
غنى : لا ماكو داعي استاذ حروح ويه اروى انتو روحو لان طريقكم بعيد عليه
جعفر : اكص ايدي اذا ما طلعت عدها شي ويه هذا الغثيث ... سكتت مااكدر اجبرها ... خلص براحتج
غنى : ابتسمت يله باي بيباي نرجوسه
نرجس : بااي
غنى : رحت وكفت يم اروى نتنظر فهد
اروى : يبووو
غنى : شبيج
اروى : توقف رصيدي هسه واريد اخابر فهد
غنى : هاج موبايلي خابري منه
اروى : اي والله ياريت كتبت رقمه وخابرته
فهد : الوو منو
اروى : الوو فهد اني اروى خابرتك من موبايل غنى لان معندي رصيد كلي وين وصلت
فهد : واكف بصف القاعه تعالي يله
غنى : مشينه شويه وصلنه فتحنه السياره وصعدنه ... السلام عليكم
فهد : وعليكم السلام ....باوعت لاروى شلون جانت الحفله تونستي
اروى : كلش تونست اكلك فهد بس لحظه اوكف نسيت اسلم على نرجس هسه اجي نزلت
غنى : باوعتله من مرايه السياره شفته يباوعلي بنظرات غريبه هذا شبي وياي
فهد : شعجب مارحتي وياهم
غنى : اذا تحب عادي انزل فتحت الباب
فهد : بهدوء سدي الباب لتخليني اتعامل وياج بغير اسلوب .... صعدي العالم تباوعلج هسه عبالهم صاير شي لتصرفين مثل الجهال
غنى : زفرت وسديت الباب
فهد : مالها داعي هالعصبيه اني حجيت لصالحج يعني حتى تلتقين ويه حبيبج وتشبعين شوف منه
غنى : حبيبي شنو سيد فهد رجاءا الزم لسانك تره عيب تحجي وياي بهالاسلوب مجايه من الشارع اني ولا انت شايف عليه شي ويه الاستاذ حتى تكول حبيبج
فهد : هااا يعني هو مو حبيبج
غنى : اكيد لا .... تنهدت استغفر الله اني شجاني وسمعت كلام اروى
اروى : صعدت هاا خو ما تأخرت
فهد : لا يله اطلع
اروى : اي ماعدنه شي
غنى : طلعنه من العرس الحقيقه تنكال سواقته حلوه يسوق برزانه مو مشنتر مثل بعض الشباب يخبصونه بالسرعه والهوسه اباوع دخلنه بسيطره سمعت واحد يحاجي فهد
فهد : سمعت واحد يحاجيني درت وجهي على مصدر الصوت شفت رجال بالسياره الي بصفي ... تفضل
.... نصي العالي ( لايت السياره )
فهد : بهدوء هذا الناصي مالته
.... لا نصي تره مردت عيونه
فهد : مو كلنه هذا الناصي مالته بابا ليش تلح
.... شنو انت ماعندك احترام للسيطره
غنى : اباوع لفهد صاح بالرجال صوت كمزنه كلنه ... مسامعته قبل يصيح يمه صوته يخوف اباوع للرجال خنس بعد ماحجه شي حتى طلع بسرعه دخلنه وره السياره الي كدامنه اباوع للشرطي اول مشاف فهد طكله تحيه
..... شلونك سيدي
فهد : الحمدلله انت شلونك
..... والله الحمدلله ... تفضل سيدي تفضل
فهد : حركت السياره رحم الله والديك
..... بخدمتك سيدي
اروى : شجاك فهد ويه الرجال صوفر وجهه من وراك
فهد : دنعل ابو لابو وجهه جاي يعلمني الاحترام ابو الوصخ
اروى : ميخالف يجوز الرجال ضايقه اللايت العالي
فهد : يطبه طوب شسويله هالابن الكح..... جاي يصير نظامي براسي
غنى : فتحت عيوني عززه هاي شنو هالالفاظ .... عابت هذا شكد لسانه باذر ومعنده احترام
اروى : خليت ايدي على حلكي ادري بفهد اذا صار عصبي ميسيطر على نفسه ويضل يفشر بدون مينتبه
غنى : وره فتره وصلنه للبيت نزلت من السياره سلمت على اروى واجيت ادخل سمعت صوت فهد درت وجهي ... نعم
فهد : اذا سامعه هالمقوله لدوستويفسكي تكول (( لا يمكن للإنسان أن يتعلم فلسفة جديدة و طريقاً جديداً في هذه الحياة دون أن يدفع الثمن )) فشنو رأيج تتعلمين فلسفه جديده مقابل شي معين او ممكن انطيها الج بدون مقابل
غنى : ابتسمت متقربه وكفت كباله ... اكو حكيم يكول ..... الحياة لا تعطي دروساً مجانيه لأحد كل شيئ له ثمن وان لم تكن الحياة صعبه ومستغله لما خرجنا من بطون امهاتنا نبكي ... فتخيل اذا الحياه الي احنه بيها متنطينه شي بدون مقابل تتوقع البشر يفيدك بشي بدون مقابل
فهد : باوعتلها شي اكيد لا ماكو ينطي شي بدون مقابل وخاصه انتي
غنى : اكدر اعرف شنو معنى كلامك دائما تحجي شفرات صعب عليه اترجمها
فهد : احسن
غنى : باوعتله اني مسويتلك شي
فهد : اشرت عليها بأصبعي من فوك لجوه ليش الي مثلج شيكدرون يسوون
غنى : همست لتنسى انو نص البشر تعلمو مفاهيم الحياة من الحيوانات فلتستهين بأحد يا سيد فهد .... تصبح على خير
فهد : باوعت على ظهرها وانتي بخير يا فيلسوفه
______________________
علي : كاعد تكلب بلابتوبي ودخل منذر هاا شبيك مطنكر
منذر : كعدت ضايج
علي : خير شبيك صاير شي
منذر : اخوك راح يموتني
علي : اي واحد بيهم
منذر : فيصل منو يعني
علي : خير شمسوي
منذر : الحجي بيناتنه فيصل ديذب فلوسه على النسوان وتالي يجي ياخذ فلوس مني واني مااكدر اكله لا
علي : يطبه طوب محد كله روح اصرف فلوسك على النسوان والمكسرات وانت اذا طلب منك بعد لتنطي
منذر : استحي اكله لا وافشله
علي : دخلي يولي كله ماعندي حتى يبطل يهدر فلوسه وتعبه على سوالف مكسره انت حاجي كله تصرفك هذا غلط اني مااكدر اكله تدري بي ينغز منه
منذر : حاجيته والله يكلي لعد بس فهد يلعب بكيفه
علي : تره فهد مامتزوج ولاعنده مره وجهال حتى نحاسبه الرجال اعزب وحر بحياته وبعدين فهد ميذب فلوسه على هالسوالف انت قيس لو فهد يذب فلوسه على النسوان ماجان هو عنده خير من الله هاي من غير الورث
منذر : ما ادري والله بس اني راح امشي على حجايتك اذا كلي اكله ماعندي بلكي يبطل هالسوله
علي : اي هو كله هيج وشوف شيكلك
منذر : باوعت لغرفته اكلك انت ماناوي تزوج
علي : ان شاءالله بس خلي ارتب وضعي واكدر اكون نفسي من كلشي وساعتها ازوج
منذر : اكو وحده ابالك
علي : لا والله بس اشوف اذا عجبتني وحده وحسيتها مناسبه ما اتردد اخطبها
منذر : بقه بس فهيدان لسه مامعرس
علي : يمعود فهد سالفته سالفه ميقبل يتزوج خو ما اضل منتظره ... عمي اريد استقر جزعت
منذر : اي والله حقك الزواج استقرار بس كون تختار صح لان ابسط غلطه تنهي حياتك وتصير اتعس منك ماكو
علي : ان شاء الله لتخاف عليه اذا ما اتاكد من نفسي ما امشي بهيج خطوه
منذر : عفيه بيك ... كمت يله اني اروح تصبح على خير
علي : اجمعين وسد الباب وراك عفيه
_____________________
صباحا
غنى : كعدت الصبح سويت ريوك وكعدنه نتريك اني وخاله اباوعلها وضعها ما عاجبني تصفن هواي وشكلها متوتره مااعرف ليش ... خاله بيج شي
سحر : هاا نونه شكلتي
غنى : اكو شي خاله بيج شي
سحر : لا حبيبتي مابيه شي
غنى : مصدكتها ادري اكو شي بس متقبل تحجي لان كل شويه تصفن كملنه ريوك وكامت بدون حجي اخذت موبايلها ودخلت لغرفتها وسدت الباب ... لملمت الصينيه واجيت طلعت الخيوط من البوفيه سمعت صوتها تحجي بعصبيه
سحر : والله مااكدر انتو ليش تلحون ... حرام عليج ولج مو كتلج اني مااكدر اجي .... انتي تحملي المسوؤليه مو بس عليه ... والبنيه شنو ذنبها ....استغفر الله احاول احاول ... عود الله كريم ... ياربي يعني وتالي مو واسمك راح اموت
غنى : بشنو دتحجي خالتي ومنو هاي ...الله يستر اني ممطمئنه
__________________
فهد : نايم وسمعت صوت صياح وهوسه كعدت هاي يا ابن كلب يصيح من الصبح يا الله يعني حتى بأستراحتي مشلوع كلبي طلعت من غرفتي نزلت جوه لكيت امي والبنات يتراجف ... باستغراب خير شبيجن
ورده : اكو زلم واكفين بره ويصيحون كسرو الباب علينه
ايمان : عفيه يمه الحك اخوتك راح يتكاتلون ويه الزلم
سعاد : فهد احجي وياهم بهدوئ مو تروح تتعارك ادري بيك عصبي
فهد : لحظه خلي اشوف شصاير .... مشيت اريد اطاع سمعت صيااح بصوت عالي
..... وين اخوكم الك..... يا كواو....
..... وينك ياحقيررر والله ننعل والديكم اليوم حراميييه نصابين ولد الحررررام
فهد : رجعت ركض طفرت فوك بسرعه جبت سلاحي وطلعت اباوع مجموعه زلم معكلين وبأيدهم سلاح ملتمين على بيتنه اباوع كل الجوارين طلعو ....هاي عليمن هالحجي ولد القنادر
علي : اهدئ فهد وافتهم السالفه
منذر : لزمته فهد بروح ابوك نزل سلاحك لتورطنه وياهم تره ماعايزين هسه يضربوك
فهد : شو دوخر انعل والديه الي يدنالي ... باوعتلهم فهمونه شعدكم متهجمين على البيت جنكم همج هي هاي اخلاقكم
.... عفنه الاخلاق الكم يا شرفاء
فهد : بحده لتضل تشمر بالحجي احجي لتخليني الجئ لغير اسلوب وياكم انتو متعرفون اني منو وشكدر اسوي مكالمه بسيطه هسه اسحلكم وامسح بيكم كاع المنطقه ومحد يوكف بوجهي ... احجو عليمن مسويلنه هووسه
حارث : فهد شجاك اهدئ
فهد : يا اهدئ اذا اكعد الكه ناس متهجمه علينه شنو هي سايبه .... رفعت سلاحي تحجووون لو شلووون
.... اخوكم السافل داخل بمشروع مال معارض سيارات ومتعارك ويه ابنه وضاربه ضربة موت وشارد بالفلوس مالت المشروع وهسه ابنه بالمستشفى لو يعيش لو يموت انت احجي يله ترضه الي سوا اخوك بابني
فهد : مسحت على وجهي اي واحد من اخوتي
.... فيصل
فهد : نزلت سلاحي ... باوعت لاخواني ... لاياا ناقص يافيصل
- يتبع الفصل التالي اضغط على (ذنوب على قيد الغفران) اسم الرواية