رواية رواسي الدهر الفصل العاشر 10 - بقلم روح الدليمي

➰➰➰➰➰➰➰➰➰➰➰

مرت ايام والايام صارت شهور... كله روتين 

اروح للمستشفى و ارجع اتغدى و انام بعدين ابقى اطبق كلشي اتعلمه براس البنات  و هيج مشت ايامي.. علاقتي برسيم زينه نوعاً ما لو لا عصبيته بس ابد مجان يضربني او يأذيني ب اي شي .. و جفصاتي الي مالها نهايه.. تغير نوعاً ما و صار قليل كلش يحجي ويايه و ماعرفت شنو سبب تغيره المفاجئ 

كعدت على صوت صياح مالي البيت كله، تأفأت بضجر 

و گلت.. 

رواسي:اليوم عطلتي حتى بالعطله ماكو نوم و راحه؟

كمت من مكاني غسلت و نزلت جوه شفت غسان 

و رسيم ديتعاركون و اصواتهم عاليه، البنات واكفات يهدون بيهم بس محد يسمع منهم.. 

غسان:أنتَ **** شلوووون هيج تسوييي؟ 

رد عليه بصياح.. 

رسيم:حياتي مالكم علاقه بيها اخر مره اگول 

تقدمت يم البنات و حجيت متسائله.. 

رواسي:شبيهم شكو؟ 

رفعت اكتافها و گالت 

رشا:ما اعرف من نزل رسيم همَّ بس يتعاركون 

تقدمت على رسيم لزمته من ايده و حجيت بقلق

رواسي:رسيم اهدئ هسه هم يرتفع السكر عندك و يصير بيك شي! 

نتر ايده مني و گال بعصبيه.. 

رسيم:لتدخلييين! 

عاط بي غسان و گال بعصبيه و انفعال..

غسان:احجي وياها ب احترام لا اطيح حظك و حق علي

فوك عملتككك الغبيه تصيح عليها؟؟ 

وجهت نظراتي لغسان و حجيت متسائله

رواسي:يا عمله؟ شكو شصاير؟ 

بحركه سريعه من رسيم دفعني و وگعت بالگاع

عدل على ظهري، بنفس اللحظه صار ينزل مني مي الراس و صار عندي الم كلش قوي... 

عطت بصوت عالي رجيت البيت رج، دموعي صارت 

تنزل متألمه.. 

البنات اجو يمي يحاولون يسندوني اكوم، بس ما اكدر 

تيبست بمكاني من قوه الوجع... بس اصرخ بصوت عالي 

بعدني بالسابع مو وكت اجيب هسه ابد 

كالت عذراء بخوف 

عذراء:ولججج رواسييي عزاا بعيني، طك عدها مي الراس! 

رفعت عيوني باوعتله واكف متصنم بمكانه، و فاتح عيونه مصدوم من عملته.. ضربه غسان بوكس بنص وجهه و عاط بي

                                      

 

                

غسان:شيييييل مرتككككك بسرعههههه 

تقدم عليه شالني من مكاني و اني الوب بين ايده 

قربت روحي على كتفه و عضيته منه بكل قوتي، ويه كل لويه تجيني ازيد بالعضه اكثر 

حطني بالسياره بدون ميحجي شي و اني بقيت اغلط 

عليه و اصيح بصوت عالي 

رواسي:شسوييييتللككككك يا نذلللل، قندره عليييك رسيييمم الله ياخذكككك ويخلصني منككك 

عطت ب الم لما زاد عليه الوجع لزمت ايده نبتت 

اظافري بيده و حجيت بصياح 

رواسي:الله ياخذذككككك الله ياخذكككك، بسرعهههه راح امووووت 

زاد سرعته بدون ميحجي باوعتله متوتر كلش 

و العرك يصب من جبينه.. وصلنا لعياده دكتورتي 

اجه عليه شالني ما اكدر ادوس على رجلي تگطعت تگطع من الوجع.. فوتني بسرعه لان حالتي متسمح انتظر 

نومني على سرير الفحص و الدكتوره فحصتني گالت 

ب استعجال 

_هسه فوراً للمستشفى عدها ولاده و مي الطفله كله نازل 

متتحمل تبقى اكثر 

حجيت بقهر و الم 

رواسي:بنتيييي بيها شي؟؟؟ 

_ان شاء الله ماكو شي، لازم بسرعه نولدج اسبقيني للمستشفى جايه وراكم اني 

ساعدني رسيم عدلت ملابسي، و رجع شالني 

اخذني للسياره و اتجهنا للمستشفى.. 

فوراً جهزوني و دخلوني لغرفه الولاده 

صحت بصوت على الدكتوره 

رواسي:ما اريد طبيعي سويلي عمليه 

_عندج توسع و الطلگات متقاربه تكدرين تولدين طبيعي 

عصرت رجلي بقوه و عطت

رواسي:مااا ارييييد ما اريييد، ولكممممم اريييييد امي جيبووووهاااا 

حاولت وياي تريد تقنعني و زاد عندي الالم 

اكثر، وكفت كدامي بين رجلي و گالت ب استعجال 

_خلال خمس دقايق تولدين يلا الطفله راح تموت اذا تبقين هيج 

صرت اسوي مثل ما تكول و احاول اضبط نفسي 

و كل متجيني الطلوگه ادفع.. بقيت خمس دقايق 

و بعدها سحبت الطفله مني و اني تخربطت.. 

استرجعت وعيي بعد فتره، فتحت عيوني 

باوعت حواليه بغرفه خاصه.. البنات كاعدات و رسيم وياهن، حجيت بصوت خافت.. 

رواسي:وين بنتي؟ 

كامن البنات من مكانهن و اجن يمي 

بوسوني و تحمدولي على السلامه.. باوعتلهم حجيت 

و الدموع متجمعه بعيوني..  

رواسي:بنتي وين ماتت مو؟! 

رشا:لا اسم الله بس تحتاج تبقى بالخدج لفتره، رئتها مو مكتمله بعد

        

          

                

غمضت عيوني و نزلت دموعي حجيت بقهر

رواسي:اخذوني عليها اريد اشوفها

عذراء:ارتاحي هسه و بعدين تشوفيها 

باوعت على رسيم و اشرت عليه و حجيت 

بجديه.. 

رواسي:خلي يطلع ما اريد اشوفه 

كام من مكانه طلع من الغرفه بدون حتى 

ميحجي ويايه! شبي شنو غيره و ليش هيج تصرف ويايه و اذاني.. بقيت يوم و الثاني طلعوني اجه عليه غسان 

اخذنا اني و رشا لان بقت يمي هيَ 

صعدنا بالسياره و گلت 

رواسي:وديني لبيت اهلي 

غسان:خابري رسيم بلغي و بعيوني و اوديج 

حجيت بجديه بصوت هادئ 

رواسي:رجاءً غسان وديني لاهلي، اذا متريد تاخذني انزل اخذ تكسي و اروح اني 

غسان:اني اخذج تدللين، بس لازم ننطي خبر لرسيم 

شال تلفونه و اتصل عليه بقه ساكت شوي و كال.. 

غسان:اي هسه راح نطلع، راح اخذها لاهلها.. عوفها ترتاح هالفتره و بعدين تتفاهمون، انجب و لتغلط اطيح حظك والله، درووح شاطر بس تصيح.. و روح ابويه و امي اذا اجي للبيت راسك اكسره... يلا ولي 

سده بوجهه و باوعلي من المرايه، دموعي تنزل 

مقهوره و خايفه على بنتي ليصير بيها شي 

غسان:لتبجين رواسي ماكو شي يستاهل تبجين علموده 

حطيت ايدي على حلگي امنع شهكني تطلع 

و حجيت بغصه.. 

رواسي:بروح اهلك غسان احجيلي رسيم شمسوي؟ 

رفع عينه على المرايه و رجع يباوع للطريق 

و گال .. 

غسان:ما طلك هيا، ماخذلها بيت قريب على اهلها و مكعدها بي 

بقيت ساكته ما حجيت شي، نار و گبت داخلي 

بس مستحيل ابين لاي شخص.. اجاني صوت اشعار 

على تلفوني طلعته من الجنطه باوعت رقم غريب 

دخلت للمحادثه دازين صوره انتظرتها تحمل 

و انصدمت بيها!!! 

صوره رسيم نايم و هيا بحضنه و مكتوب جواها 

"حبيت اشكرج على هاي الهديه الحلوه" 

الطريق كله بقيت ساكته و بس دموعي تنزل 

وصلنا لبيت اهلي بعدها ما واكفه السياره فتحت الباب و نزلت بدون حتى ما اشكرهم.. دخلت و دكيت باب البيت 

بقيت انتظر شوي و انتفح الباب صار بوجهي رسيم!  

تراجعت خطوتين وره درت وجهي عنه و 

حجيت بنتر.. 

رواسي:وخرر عن طريقي اريد ادخل 

رسيم:كدامي بسرعه بدون اي كلام زايد 

دفعته اريد ادخل لزم ايدي لواها و خلاها وره

ظهري و عاط بيه.. 

رسيم:تردين تنكتلييين روسيه؟  

        

          

                

عطت بصوت عالي.. 

رواسي:بااابااااا تعاااال 

طلع ابويه مفزوع شاف رسيم شلون 

لازمني عاط بي 

راشد:عوووفهااا *** 

نتر بي

رسيم:لتدخل بين الرجال و مرته خليك بعيد عني ٢٠ متر احسن الك 

تقرب ابويه اكثر لزمني من ايدي الثانيه 

و سحبني من يم رسيم بقوه و خلاني وره ظهره 

و عاط برسيم.. 

راشد:امشييي منااا لا والله اشتكي عليك و اگول تعدى علينه 

اندار عليه و اردف.. 

راشد:فوتي بابا امج جوه تنتظرج 

نتر بيه رسيم و نظراته كلها غضب 

رسيم:اذا تخطين خطوه وحده بس تنسين بنتج 

عطت بي و حجيت بقهر.. 

رواسي:اذا حرمانك الي من بنتي يخليك تعوفني بحالي، اخذها رسيم ما اريدها اخذها و خلي مرتك الثانيه هيَ تربيها 

گال متسائل

رسيم:ياا مرههه ثانيهههه! 

فتحت تلفوني و شوفته صورته هوَ و هيا 

و حجيت بعصبيه.. 

رواسي:هااااييي شنووو رسييممم؟؟ كتلييي طلكتهاااا و عركتك و يه غسااان البارحه لان كشفك بعدك متزوجهااا! و تكلي يا قندرهههه! 

عفته يحجي و يصيح

رسيم:ماااا نايييم يمهااا والله 

 دخلت للبيت دورت لامي لكيتها بغرفتها بس شافتني كامت من مكانها 

ممصدكه بوجودي يمهم.. حضنتها بكل قوتي و صرت اشهك بالبجي كعدتني على الجربايه حطيت راسي على رجلها و بقيت ابجي بدون انقطاع لحد ما غفيت و دموعي على خدي ... 

كعدت الصبح شفت روحي بعدني فراش امي 

و ابويه.. كمت متكاسله و متألمه بعدني بسبب الولاده 

بس لازم اكوم عندي دوام اريد اخلص هوَ بس هالكم شهر بقالي و اخلص اخر سنه عندي سنه التطبيق 

كمت دخلت للحمام و غلست وجهي و رجعت للغرفه فتحت كنتور امي ادورلي شي البسه، اخر شي طلعت تنوره و رهمت وياها قميص لبستهن طلعن حلوات 

مشطت شعري و تركته مفتوح، نزلت جوه لكيتهم كاعدين 

بالصاله امي بس شافتني كامت عليه لزمتني من ايدي 

كعدتني و گالت متسائله 

جميله:وين بنتي 

رواسي:عندي دوام 

جميله:كعدي يا عيوني مصارلج يومين من والده يا دوام 

باوعت لابويه و حجيت ب اسف 

رواسي:اسفه، اسفه على كلشي حجيته و سويته وياكم 

راشد: كلشي سويتي ما الومج عليه ابد، لا اني و لا امج نكدر نلومج

باستني امي و گالت 

جميله:لومنا الوحيد عليج، هوَ انج تزوجتي رسيم و ورطتي روحج وياه 

        

          

                

نزلت دمعتي مسحتها بسرعه كمت من مكاني 

و گلت.. 

رواسي:بابا ممكن توصلني للمستشفى؟ 

راشد:لتضغطين على روحج اجليها هاي السنه 

هزيت راسي مموافقه على كلامه و حجيت 

رواسي:لا ابد اريد اكمل و اخلص كلها كم شهر

كام من مكانه و گال 

راشد:يلا امشي بس اذا تعبتي رأساً خابريني اجيج 

هزيتله راسي و اخذت جنطتي و طلعنا من البيت 

وصلني للمستشفى و وصاني على روحي و راح بعدها 

رحت لغرفه الدكتور و اعتذرت منه على غيابي البارحه و بلغته بولادتي گال

_جان بقيتي كم يوم لتعبين روحج

رواسي:لا دكتور مرتاحه اني 

_بنتج وينها هسه؟ 

رواسي:بالخدج بس اخلص دوام اروح اشوفها 

هز راسه و گال 

_من تحسين روحج تعبانه ارتاحي خوش بنتي؟ 

رواسي:ان شاء الله، اني اروح على شغلي 

طلعت من عنده و رجعت لشغلي.. كل ما احس روحي تعبانه او يصير عندي الم اكعد اريح روحي و الكل تعاونوا ويايه و ما ضغطوا عليه ابد.. خلص اليوم 

و انتهى دوامي خابرت ابويه يجيني گال 

راشد:اني بَره حَبيبتي طلعيلي 

طلعت شفته گاعد بسيارته صعدت السياره 

و حجيت 

رواسي:اخذني لبنتي اريد اشوفها 

اخذني للمستشفى الي ولدت بيها، نزلنا سوه وصعدنا 

للطابق مال خدج.. حجيت ويه الممرضه و كلتلها على بنتي اخذتني الها گالت 

_تكدرين تشوفيها منا ميصير تدخلين يمها 

هزيتلها راسي و تقدمت على الجامه حطيت ايدي 

عليها و بجيت، ابويه حط ايده على كتفي و گال 

راشد:ان شاء الله تصير احسن و تطلع لتبجين، أنتِ هم بقيتي شهر بالخدج 

رفعت عيوني عليه و حجيت بقهر

رواسي:بنتي راح تعيش مو؟ 

ابتسم بوجهي و جاوبني 

راشد:ب اذن الله، بنتج قويه مثلج ان شاء الله تطلع 

و تمليها بحبج و حنانج أنتِ و ابوها 

رجعت اباوع عليها شلون نايمه بس بالحفاظه 

و جهاز الاكسجين بخشمها و اجهزه و كانونه بيدها 

حجيت بكسره.. 

رواسي:بابا خلي رسيم يطلكني 

راشد:و برأيج هوَ يسمع مني؟ 

        

          

                

رواسي:ما اريده تغير و صار زين و على غفله گلب و تغيرت كل تصرفاته.. گال طلكتها و طلع يضحك عليه 

يكذب عليه كسرنييي هوَ.. كسر فوك كسر صعب يتجبر و يتشافى بابا 

اخذني بحضنه و گال بحنيه

راشد:اطيح حظ حظه اذا ميطلكج الي تردي يجرالج روسيتي

بقيت واكفه اباوع عليها و دموعي تجري، صغيرونه كلش بعدها نموها مو كامل.. اذا يصير شي ببنتي اموت وراها والله... بقيت فوك النص ساعه اني على نفس وكفتي و دموعي ما وكفت و لا لحظه، ابجي على بنتي و على روحي و الحاله الي وصلت روحي الها.. 

دعيت من كل گلبي الله يحفظها الي من كل مكروه.. 

رجعنا للبيت حالتي منهاره كلش.. اول ما دخلت بوجهي 

لغرفتي دك تلفوني طلعته من الجنطه رسيم ديتصل عليه 

رفضته و سويتله حظر من كل مكان و شمرت تلفوني 

تمددت بالفراش و نمت من كد التعب الي بيه و البجي و النوح..

كعدت بليل طلعت من غرفتي اريد استوعب اني وين 

نزلت جوه لكيت رسيم گاعد و ابويه يسولف وياه منفعل 

و هوَ مثبت ايده على رجله و ضاغط بيها على راسه

راشد:البنيه متريدكككك گوه يعني! 

رسيم:اذا مترجع ويايه اولاً اشتكي عليك ثانياً اخذها لبيت الطاعه و بكيفكم بعد 

دخلت يمهم رحت ب اتجاه ابويه بسته وگلت.. 

رواسي:راح اسويلك جاي و اجيك

راشد:تسلميلي روسيه 

عاط رسيم بغضب.. 

رسيم:لتكووول قندره 

راشد:لحد هسه محترمك لانك ببيتي اسكت لا العب القندره على راسك 

هز راسه متوعد و گال 

رسيم:يصير خير بسيطه 

 تعديت من يم رسيم بدون ما انظرله رحت للمطبخ على امي واكفه يم الباب تتسمع عليهم.. بستها و گلت 

رواسي:حراام امي حراام 

جميله:ابوج ما خلاني ابقه گاعده يريد يسولفون وحدهم 

صار ساعه تكسرت رجلي 

ضحكت و كلتلها 

رواسي:سمعتي شيكول؟ يريد ياخذني لبيت الطاعه 

جميله:هذا مخبل يسويها صحيح 

حطيت مي بالقوري و جاوبتها.. 

رواسي:اي والله مخبل و راح يخبلني وياه 

رجعت تتسمع عليهم و اني حطيت الجاي على النار 

و كعدت.. سمعت صوت ابويه يصيح ب اسمي 

طلعت رحت يمه و گلت 

رواسي:عيوني 

راشد:يريد يحجي وياج كعدوا احجوا سوه 

        

          

                

حجيت بجديه.. 

رواسي:ما احجي بعد ويه واحد نذل 

عاط بيه فززني.. 

رسيم:اكوممم اكسر راسج والله شوكتت تتأدبين أنتِ؟ 

غلست عليه مجاوبته و حجيت 

رواسي:ياريت يطلع من البيت مجرد ما اسمع صوته يصير عندي لعبان نفس 

عفته يصيح و رجعت للمطبخ شفت الجاي ديفور 

نصيت جواه و حظرت استكانات ثنين، صبيته و اخذته 

رسيم عدل كعدته و جهز روحه حتى ياخذ الجاي 

قدمت لابويه و اخذت الثاني بيدي و كعدت يمهم اشرب بي، ابويه عافنه و كام بدون ميحجي شي 

رفعت عيوني عليه رافع حاجبه و يخزر بيه... فوك شينه گوات عينه، بعدت نظراتي عنه و گلت 

رواسي:ياريت تجيبلي ملابسي و اغراضي 

جاوبني بجديه و نتر.. 

رسيم:تحلمين حلم ابقيج هنا 

رديت عليه بنفس النبره.. 

رواسي:و أنتَ تحلم حلم ارجعلك بعد سوايتك ويايه 

كلشي تحملت منك و حبيتك برغم كلشي سويته بيه! اخذتني ضره على وحده ثانيه و هم سكتت كتلي راح اطلكها و صدكتك، تالي شسويت رسيم؟ 

جاوبني ببرود..

رسيم:شسويت؟ 

عطت بي.. 

رواسي:كسرتتنييييي، كسرت روحي و گلبي.. ليش كذبت عليه و كتلي طلكتها و طلعت ماخذلها بيت مكعدها بي و ممطلكها؟؟؟ 

ضحك بسخريه و گال 

رسيم:ليش أنتِ كزاز حتى تنكسرين؟ 

الاستكان بيدي شمرته عليه و الجاي صار بكل 

مكان، كام عليه يريد يضربني رفعت ايدي على راسي

احمي روحي منه.. تراجع و نزل ايده و گال بهدوء 

رسيم:روسيه باباتي ماكدرت اعوفها والله طفله بعدها 

نترت بي.. 

رواسي:جااان ما تزوجتني رسيمم! 

رسيم:اذا اطلكها كدامج ترجعين؟ 

عطت بي و حجيت بجديه..

رواسي:حلمممم تعرف شنو يعني حلممم! تحلم ارجع وياك بعد و شتريد تسوي سوي ميهمني 

سحبني عليه بكل قوه و انضربت بصدره، ردت ابتعد 

شدني اكثر و گال بهدوء..

رسيم:متكدرين بدوني 

ضحكت و حجيت ب استهزاء..

رواسي:ليشش أنتَ اكسجين واني ما اعرف؟ لو اكل او شرب حتى ما اكدر بدونك؟؟ لككك أنتَ كلك متهمني بكد ما تهمني نفسي و اني رخصتها الك هوايه و لهنا و حدككك ما اسمحلك و لا اسمح لنفسي ارخصها اكثر

كرصني من خصري بقوه و گال 

رسيم:اني اعرف شلون اكسر راسج، يصير خير رواسي 

        

          

                

ضربته على ايده بقوه و نترت بي.. 

رواسي:امشي ولييي لا والله استلمك دككك بالقندره على صماخك 

عصر شفتي بيده و حجه بتهديد.. 

رسيم:نشوف القندره على صماخ منو تتدكدك 

قرب روحه عليه و طبع بوسه على شفايفي و ابتعد

عني، طلع من البيت بدون ميحجي شي ثاني..

دخلت للمطبخ اخذت وصله و اسفنجه بيها صابون

و رجعت للصاله امسح بالجاي.. دخلوا امي و ابويه 

كعدوا و ابويه گال.. 

راشد:روسيه حَبيبتي تعاي كعدي نحجي 

حجيت و اني اجلف بالزوليه بكل قوتي 

رواسي:احجي بابا اسمعك 

جميله:عوفيها بنتي ما عليها شي اني بعدين اسويها 

رفعت ايدي على راسي و بعدت شعري بزندي 

عن وجهي.. و گلت.

رواسي:لا اني اسويها احجو انتو اسمعكم 

راشد:رسيم راكب راسه ميقبل يطلكج 

رواسي:اي عادي اتطلك منه غيابي نفس المره الفاتت 

جميله:هذيج المره چان بالسجن و عندج سببج هالمره منو يقبل يطلكج و هوَ كلشي ممسويلج؟ و تزوجتي برضاتج محد جبرج عليه! 

عفت الوصله من ايدي باوعتلهم و حجيت...

رواسي:يعني شنو؟ 

فرك وجهه و گال.. 

راشد:يعني و لا سيد او شيخ راح يقبل يطلگج منه 

كمت من مكاني اخذت الوصله و السفنجه و گلت 

رواسي:اي خلص ما اتطلك منه بس ما ارجعله ابقى هيج

عفتهم و دخلت للمطبخ بدون ما احجي او اسمع شي منهم.. غسلت ايدي و رجعت كعدت امي گالت 

جميله:شتريدون اسويلكم اكل؟ 

راشد:ماكو داعي تسوين بالنسبه الي مو جوعان 

جميله:لا علمود رواسي لازم تتغذى زين توها جايبه 

باوعتلها و حجيت.. 

رواسي:اني هم مو جوعانه و ما اشتهي اصلاً، راح اروح انام 

صعدت لغرفتي لكيت تلفوني ديدك.. اخذته بيدي 

و رديت عذراء جانت دتتصل.. 

رواسي:هلا عذوره حَبيبي شلونج 

عذراء:روااسييي شمسويه أنتِ؟؟؟ 

حجيت ب استغراب.. 

رواسي:شمسويه؟؟ 

عذراء:ولجج رجع رسيم متخبل مابقه شي بالبيت صاحي، كسر كلشي كلشي 

رواسي:هوَ مخبل مو شي جديد يعني! 

        

          

                

عذراء:يحلف و يتوعد و يريد يشتكي على ابوج 

رواسي:شيسوي خلي يسوي بس رجعه اله ما ارجع بعد 

عذراء:گال باجر راح يطلع هيا من المستشفى! يريد يجيبها هنا و هيَ بعدها 

رواسي:شبيها بالمستشفى ليش؟ 

عاطت بيه.. 

عذراء:ولججج بنتج بنتجججج 

رواسي:بنتي بعدني حتى ما سميتها شوكت صار اسمها هيا؟ 

عذراء:اووف منج رواسي، اگلج يريد يجيبها و هيَ بعدها مصايره زينه و أنتِ كل همج الاسم!  

حجيت متنرفزه.. 

رواسي:اني اعرف اتصرف وياه روحي خلي اخابره 

عذراء:لتخابري هسه معصب كلش 

رواسي:اني اعرف شلون اخلي يهدئ روحي 

سديته من عدها اعصابي براس خشمي، شلت الحظر عنه و خابرته رأساً جاوبني بصوت هادئ.. 

رسيم:باباتي 

رواسي:رسيم تعال اخذني 

رسيم:ترجعين؟ 

رواسي:تعال بسرعه انتظرك اني 

سديته من عنده بدون ما اسمع جوابه.. طلعت من غرفتي 

رحت لغرفه امي فتحت الكنتور طلعتلي فستان طويل من عدها لبسته اخذت اغراضي من غرفتي و نزلت جوه .. 

ابويه بس شافني گال متسائل.. 

راشد:وين رايحه رواسي؟ 

رواسي:رسيم راح يجي ياخذني 

جميله:ترجعيييين! 

رواسي:بس نحجي، اذا يبقى هيج يسوي شغلات تدمرنا كلنا 

بقوا ساكتين ما حجوا شي.. عفتهم و طلعت للحديقه

كعدت على المرجوحه انتظر رسيم... صاير عندي برود بمشاعري مو طبيعي ما جنت هيج اني ابد

دك عليه رسيم.. رفضته و طلعت صعدت السياره

و گلت.. 

رواسي:اخذني للبيت الي خطفتني بي 

دار وجهه عليه يباوعلي مستغرب من طلبي و گال.. 

رسيم:متأكده؟ 

رواسي:اي يلا، بس قبلها اخذني للصيدليه 

رسيم:صار 

حرك سيارته و اخذني للصيدليه اول ما وكفت السياره

نزلت بدون كلام دخلت للصيدليه و گلت.. 

رواسي:اريد علاج *** 

بقه يستفسر شنو السبب و لازم وصفه طبيب 

الف كذبه كذبت لحد ما اقتنع و انطاني الي طلبته.. 

رجعت طلبت منه مسكن و شاش طبي انطاني دفعت الحساب و طلعت 

صعدت بالسياره و گلت.. 

رواسي:يلا خلي نروح 

مد ايده على ايدي قربها عليه و طبع بوسه عليها 

و گال بحب.. 

رسيم:احبج رواسي والله العظيم احبج 

درت روحي عليه و حجيت بنفس نبرته.. 

رواسي:و اني احبك حَبيبي، ما اتحمل ابقى بعيده عنك 

سحبني من كتفي قربني عليه و طبع بوسه 

على راسي، و گال.. 

رسيم:اسف لان دفعتج بس جنت معصب كلش 

رواسي:حاول تسيطر على عصبيتك رسيمي 

زاد سرعته و گال.. 

رسيم:دلع جديد، بس يبقى احسن من القنادر

ضحكت و ابتعدت عنه حتى يسوق براحته.. 

بعد مده وصلنا للبيت، نزلنا من السياره كتله 

رواسي:افتح الباب بس اريد اخذ ورد من الحديقه 

رسيم:لتتأخرين انتظرج 

راح هوَ و اني طلعت العلاج من الجنطه 

درت منه على الشاش و ابتسمت بخبث.. 

دخلت للبيت لكيت رسيم واكف يسوي بالتلفزيون 

قربت روحي عليه و حضنته ب ايد وحده من وره 

و گلت بهدوء.. 

رواسي:عندي مفاجئه الك غمض عيونك 

غمض عيونه و الابتسامه على وجهه، لثانيه وحده 

انبني ضميري بسبب تفكيري.. بس تشجعت 

صعدت على القنفه و صرت وراه 

مديت الشاش و حطيته على خشمه و ضغطت عليه 

بكل قوتي و همست ب اذنه بنبرة قوه.. 

رواسي:انقلبت الادوار استاذ رسيم صار دوري اردلك الي سويته بيه...