رواية ذنوب على قيد الغفران الفصل العاشر 10 - بقلم براء
ذنوب على قيد الغفران
البـــــــــارت العاشــــــــر
مرحبا حبايبي العسل شلونكم ❤❤
#ذنوب على قيد الغفران
#للكاتبه براء
غنى : رحت صبيتله جاي وطلعت لكيته كاعد على القنفه تقربت انطي اله ماحسيت غير رجل نمدتلي خربطت توازني و ما اشوف غير الكوب اندار على فهد ... عزززه
سعاد : يااااا هاي شسويتيييي ولج
غنى : اباوع الكل التم على فهد ... خطيه اباوعله كام بسرعه نزع التشيرت ومبين عليه متأذي
غنى : اباوع الكل التم على فهد ... خطيه اباوعله كام بسرعه نزع التشيرت ومبين عليه متأذي
فهد : نزعت التشيرت ... بألم شجاج متشوفين حركتيني
غنى : اني اسفه والله ماادري
سعاد : عمه العماج ان شاءالله متشوفين حركتي الرجال
بتول : عميه انتي متشوفين شوفي جسمه شلون صار
ليلى : عسى بأيدج الكسر شوهتي الرجال
سعاد : هاي اول يوم وهيج لعد بعد كم يوم شلون بيج يمكن تحركينه كلنه
غنى : بهدوء خاله والله منتبهت
سعاد : خلخاله تخلخل عظامج عايزني اصير خاله لهالشكول
ايمان : شبيج ويه البنيه قابل متعمده هي
سعاد : شو دستكي انتي ولا كأن ابنج احترك هسه
فهد : بعصبيه شبييييج انتي انهديتي على البنيه قابل هي متقصده والجاي اندار عليه مو عليج عاد لتخبصينه
آلاء : شجاج شهالثواله هاي .... غير تنتبهين
غنى : بدموع والله منتبهت شبيكم
بتول : حوله غير
غنى : بدموع من رخصتكم ... طلعت بسرعه لبيتنه
اروى : لزمت ايدها ... اوكفي غنى وين رايحه
غنى : اعتذريلي من فهد والله مجنت متقصده
اروى : دوكفي بس سمعيني خلي يولن ماعليج بيهن
غنى : عفتها وطلعت بدون مااجاوبها دفعت باب بيتنه ودخلت شفت خالتي بوجهي
سحر : كمت شبيج يمه
غنى : كعدت ... سولفتلها الي صار
سحر : والله توقعت حيصير هيج شفتي مو كتلج هالشغله مو هينه مو مثل ماانتي متوقعه .... راح تضلين تسمعين حجايه على ابسط شي
غنى : مسحت دموعي شسوي خاله غير حتى اامن عيشه براسها خير النه
سحر : انعل ابو العيشه سمعي ولج روحه لهناك بعد ماكو كعدي وانجبي هنا
غنى : بس
سحر : ولا كلمه ... كرامتج فوك كلشي انعل ابو الشغل لابو العيشه كعدي وسكتي خلي نموت من الجوع ولا كرامتنه تروح هي بقت بس الكرامه تردين الناس تمسحها بالكاع
غنى : وبعدين
سحر : ماكو بعدين اني راح اخبز واودي للي يريد وانتي خيطي واني وياج بس ثنين نكدر ندبر وضعنه ... على الاقل نشتغل بكرامته ولا تضلين ماكله اهانه كل ساعه وانتي تدرين بيه مااسكت
غنى : بس اني متفقه ويه ام فهد
سحر : ينلغي الاتفاق انتي مااخذتي فلوس منها حتى تشيلين هم شنو اذا اشتغلتي عدهم يعني مانين عليج
غنى : فشله من ام فهد
سحر : ماكو شي اسمه فشله ... شوفي غنى هذني مبينات شرانيات وماعدهم خوف من الله عقليها انتي اذا نسوانهم هيج زلمهم شلون اصلا اني صوجي شلون قبلت ومشيت وراج بس يله هاي اشاره من ربج حتى تنسحبين اكيد جان اكو شي موزين راد يصير لهسبب طلعت وحده بوحده
غنى : ضليت ساكته كلامها صحيح
______________________
ايمان : بله مو عيب هسه شتكول علينه البنيه همج شجاجن عليها جاي واتبده شصار ليش تفشلني كدامها وتالي وياجن
سعاد : شوف هاي البطرانه اني لومنج احاول اطفشها بكل طريقه
اروى : ليش بشنو مأذيتج البنيه وتعامليها بهالطريقه
سعاد : اني اصلا من البدايه ماجنت قابله على سالفتجن رحتن جبت وحده منعرف لا اصلها ولا فصلها وخليتنها طباخه عدنه شلون تأمنن وتستنظفن ماادري
ايمان : تره اني ماجبتها حتى اخطبها هي اجت تشتغل
ليلى : ياخاله انتي جاي تشوفين بالخليج الخدامات شيسون ذاك اليوم وحده حاطه مسهل للجهال مدري منوم حتى ميضوجها ... متخافين انتي تروح شو شتحطلنه لو تروح تسممنه
اروى : ليش شعدها وياجن وتسممجن تعرفجن عدها عداوه وياجن حتى تسوي هيج
ايمان : والله حتى استحي اروح احاجي البنيه فشلتنه الله يفشلجن همجيات وذره احترام ماعدجن ... تعاي اروى عفتهن وطبيت لغرفتي
سعاد : سمعتنها شكالت اني همجيه وماعندي احترام
ليلى : دختولي تريد تصير خيره براسنه عود شوفوني اني اساعد الفقره
سعاد : دخلي تساعد روحها هالبت الفكر هاي
انغام : والله حرام عليجن وتره بتول اني شفتج ذبيتيلها رجل ليش هيج خطيه البنيه شمسويتلج
بتول : ياا اني
انغام : اي انتي يا خبيثه
سعاد : انتي هيي امشي ولي يم رجلج وجهج مااريد اشوفه يللله
انغام : هاي بدال ما تحاسبيها تغلسين وتاخذين الوضع طبيعي
ليلى : امشي ولي لغرفتج وبلا حجي زايد
_______________________
علي : هسه خليتلك مضاد حروق عوفه حتى يجف
فهد : تره مالها داعي هالمبالغه جويه بسيطه يومين وتطيب
علي : ميخالف لازم تتعالج ... يله اني طالع تريد شي
فهد : لا براحتك ... طلع على واني تمددت صدري يحركني بس يله البنيه متدري
ايمان : هاا يمه شلون صرت
فهد : تره حرك بسيط لتكبرون السالفه تحسسيني جنت اطلك
ايمان : وتالي ويه لسانك الزفر ... كعدت المهم اني العصر راح اروح لغنى اعتذر منها على الي صار وارجعها
فهد : نصيحه عوفيها لترجعيها تره تنذل هنا خاصه ذني تجمعن عليها يعني حي على الصلاة اذا مو اليوم باجر يهججنها واني من البدايه جنت رافض هالفكره لان بيها ذله للبنيه خاصه انو هي صديقه اروى
ايمان : شفت العوز شيسوي بالواحد ... ناس تتحسر على الربع دينار وناس تصرف ذيج المبالغ بطلعه وحده
فهد : باوعتلها شنو قصدج
ايمان : انت فهمت قصدي خاف عبالك اني غبيه وماافتهم لو مااعرف وين تروح ووين تجي ادري كلش زين واعرف كلشي بس اغلس لان مااريد اضوجك ... بس ماحان الوقت انو تتجه لنفسك وربك وتعوف هالمكسرات
فهد : اذا تعرفين وين اروح اذاً انتي هم تعرفين مااحب واحد يدخل بحياتي الخاصه
ايمان : تنهدت اكدر اعرف انت ليش هيج شالع كلبي
فهد : يمه اريد انام
ايمان : الى متى تضل تتهرب
فهد : مااتهرب بس عوفوني بحالي
ايمان : هزيت راسي الله يهديك ويعقلك
_____________________
غنى : كاعده بالحديقه وصافنه بالفراغ ... افكر بهالدنيا وتالي وياها كل ساعه مطلعتلي سالفه ... خسرتني اعز ماعندي وكلت ميخالف اعيش على ذكراهم وريحتهم ... انوب سحبت مني البيت الي عشت وتربيت بي وكطفتني بغير مكان كلت ميخالف اهم شي سكف احتمي بي .... سحبت مصدر عيشتي وخلتني حايره اتلطم بالحيطان انجبرت انزل كرامتي بعد ماجنت رغم فقري مرفوع راسي لان عايشه بكدي وتعبي وتالي اشتغلت خدامه ومن اول يوم شبعت طن غلط واهاين وعلى شي اني مجنت متعمده بي بس لا لهنا وكافي اني الى متى اضل اخسر لازم الكه حل بدون مااعرض اخر ذره كرامه مني للحضيض .... باوعت لموبايلي اااه لو اهلنه محتضنينه مجان هذا حالنه ..... رفعت راسي للسماء اعرف ياربي انت الك غايه بكل الي ديصير ومتاكده اكو نهايه لكلشي بس اموت واعرف شنو نهايه الي داعيشه .... سمعت الباب يندك شفت خالتي طلعت فتحته ودخلت اروى وامها كمت سلمت عليهن واجن كعدن بالحديقه
ايمان : عذريني خيتي على الي صار اليوم ومسحيها بوجهي
سحر : لا ام فهد عادي ماصار شي بس غنى بطلت على موضوع الشغل
ايمان : ليش يمه اني مو اتفقت وياج على كلشي
غنى : حسيت نفسي تسرعت خاله انتو بيتكم كله زلم وناس طابه وناس طالعه واني مااريد اسمع حجايه فتعذريني مااكدر اشتغل اعتذر على هالتصرف الغير مسوؤل هذا بس اني تسرعت
اروى : شبيج غنى يعني على موقف بسيط كنسلتي كلشي
سحر : لا بنتي حتى اذا هي قبلت اني مااقبل هي بنيه تروح تجيها حجايه منا منا على ابو شعدها طابه طالعه عليهم وانتو الله يحفظكم عائله جبيره وولدكم هواي يستحسن تضل هي ملتهيه بدراستها واني اساعدها بشغل منزلي طلعه من البيت مالها تكعد وتسكت بالبيت
ايمان : والله مستحيه منكم شلون موقف نحطيت بي بسبب هالمكاميع
سحر : لتشيلين هم حبيبه انتي مالج علاقه ومامسوؤله عادي اعتبري كأن شيئاً لم يكن
غنى : سدينه الموضوع وضلت اروى وامها يمنه فتره وراحن واني وخاله دخلنه كعدنه على التلفزيون ... خليت راسي بحضنها ... شتكولين خاله الي سويتي صح
سحر : اكيد صح اني جنت غلطانه من البدايه لان وافقتج ومافكرت بنتائج هالشغل
غنى : شحيصير هسه
سحر : ميصير شي انتي تخيطين واني اخبز ونعيش وخلصت السالفه
غنى : تنهدت ... ومن يومها بديت اعتمد على الخياطه وخالتي كامت تخبز والجوارين كامو ياخذون منها ... وطبعا عائله اروى كلها كمت اعرفها لان كلهن كامن يجن يخيطن عندي لان اكو موديلات ببالهن مموجوده بالسوك فيجن اني اخيطهن الهن .... نزعت النظاره وطكيت ركبتي اااخ يمه ظهري موتني كد ماحدبت ... اباوع الفستان صار جاهز مابقه غير تجي تقيسه ... رجعت جسمي على الكرسي نزعت النظاره و غمضت عيوني تنهدت
سحر : صعدت فوك لكيتها كاعده بالصاله ... هاا يمه بعدج كاعده
غنى : هزيت راسي .... جنت اكمل الفستان
سحر : رحمي روحج يايمه مو هيج
غنى : لا خاله كلما كملت اسرع كلما احسن
سحر : مسحت على شعرها الله يرزقج وينطيج على كد نيتج
غنى : امين .... كمت لغرفتي خليت راسي على المخده ومباشرتا نمت
____________________
فهد : كاعدين اني والولد سوه اليوم متجمعين وطبعا لازم غصباً ماعليك تحضر متجي يطلعوك تتعاله عليهم
حارث : اي شكو ماكو حضرتك مختفي هالفتره
فهد : مشغول
حارث : احسك بيك شي احجي
فهد : لا ماكو شي
مرتضى : اكول فهد شكد صار عمرك هسه
فهد : طلعت باكيت الجكاير .... تلاثين
مرتضى : لعد شعجب لسه ماتزوجت
فهد : ويكلك ليش تكرهه هالتجمعات شكد يزهكوني بأسئلتهم السخيفه ... شوكت تعرس .. ماناوي تزوج .. شنو سبب رفضك للزواج حوار الكعده كلها عباره عن فهد شوكت نشوفك عريس .... جاوبته بعد وكت
سامر (اخو محسن) : يابعد وكت عجزت فهد الي بكدك هسه جهالهم بالمدارس تلحلح شويه
محسن : صدك ليش متعرس وتخلص
فهد : اخذت نفس من الجكاره هسه اني شاكي لأحد اني مرتاح بحياتي بدون زواج ولو ردت اتزوج جان تزوجت بدون مااخذ اذن من احد
مرتضى : معقوله فهد انت ولا مره حبيت ماعجبت مره ولفتت نظرك وحده لهدرجه ذوقك صعب
فهد : ماكو واحد ميحب بهالدنيا والي يكلك لا هذا جذاب
حارث : منو هي ؟
فهد : بهدوء احتفظ بالاجابه لنفسي
مرتضى : شباب شنو رأيكم بالزواج عن حب
حارث : اني ضد الحب افضل الزواج التقليدي
محسن : اني هم اشوفه مو ناجح خاصه بوقتنه الحالي قله قليله الي تلكاهم صادقين
سامر : اني احب وحده وان شاءالله بس اكون نفسي اتقدملها
مرتضى : وانت فهد شو ساكت
فهد : اي زواج بهالدنيا سواء كان عن حب او تقليدي يكون ناجح اذا توفرت بي بعض الشروط اولها لازم يكون مبني على مشاعر صادقه جدا وثانيها لازم يكون بعيد كل البعد عن المصالح والماديات وثالثها لازم ثنينهم يحبون عيوب بعض ويتقبلوها بكل رحابة صدر ورابعها لازم يكونون متفاهمين بيناتهم على كلشي قبل الزواج واذا مشو على هذا الاساس زواجهم راح يكون اكثر من ناجح
سامر : سمعت مرتضى مشاعر متبادله
مرتضى : انجب انت
حارث : خير شبي مرتضى
مرتضى : اني احب وحده بالجامعه ويايه وناوي اتقدملها
محسن : وهي قابله
مرتضى : غير عندي علاقه وياها شلون متقبل
حارث : حلوه لو لا
مرتضى : شبيكم هاي الي اجت قبل فتره تخيط للحجيه
محسن : هاا هاي جوارين بيت عمي الي عُلا خبصتني تريد تخيط عدها
فهد : بهدوء يعني غنى عدها علاقه بيك
مرتضى : اي ومن زمان وطبه وطلعه بيناتنه
حارث : وانت شلون تأمن بوحده تطلع وياك
مرتضى : هاا
فهد : كمت طلعت بره ماشاءالله هالبنيه مبينه دوله وعلم ذاك الولد وهسه مرتضى صدك لا كالو ماتحت السواهي دواهي ... هالاحتشام واللبس والاخلاق طلع جوى بلاوي وجماله اروى تكول عليها خوش بنيه ولو اني شعليه يطبها ستين مرض اني شكو ذبيت جكارتي وطلعت راجع لبيتنه
_______________________
ظهراً
غنى : واكفه ويه خالتي اخبز وكالعاده سمعت الباب يندك اكيد شو منو اجه خليت شالي على راسي وطلعت فتحت الباب شفت ورده ابتسمت هلوو
ورده : هلو غنى شلونج
غنى : بوستها هلو بيج حبيبتي تعالي دخلي
ورده : شلونج خاله
سحر : هله يمه انتي شلونج
ورده : عفيه كتلنه الجوع اجيت اخذ الخبز سمعي معدتي كامت تملخ شعرها
سحر : هههه والله عندج سوالف دطبي علما اخلص
غنى :شبيج تنوحين هسه ثواني يكمل وانطي الج تعالي كعدي اخذتها وكعدت جوه كلش احبها دائما تجي تاخذ خبز او تجي تسير يمي ويه اروى كلش توَنس ... كمت جبتلها مي اي شلونج
ورده : موزينه
غنى : ليش ؟
ورده : اكلج ومتكلين لأروى
غنى : لا ما اكول احجي
ورده : والجذاب
غنى : ابتسمت الله يذبه بالنار
ورده : مو بس يذبه بالنار يخلي وجهه مثل وجهه سعاد
غنى : دحجي
ورده : اليوم استلمت ورقه الامتحان وطلعت راسبه
غنى : ياا ليش .. زين انتو هسه مو معطلين شلون تداومين
ورده : مو اني ثالث وفهد خالني بمدرسه اهليه والمدارس الاهليه تداوم عدهم المراحل المنتهيه قبل الحكومي
غنى : هاا بس تصرفج غلط لازم تكلين لاهلج لو مهما يكن ميصير تضمين عليهم
ورده : مو اذا دره فهد راح يسحب الايباد مني ويكطع النت عني وين اروح اني والله اذا مادخلت وزاري فهد يكطعني
غنى : غير يريد مصلحتج ياحبيبتي
ورده : هسه شلون بيه والله اخاف اكلهم ويكللوله
غنى : زين ماحاجيتي المدرسه تعيده الج
ورده : هو الاحد راح تعيده للراسبين
غنى : انتي بأي ماده راسبه
ورده : انكليزي
غنى : خوش انتي تعاليلي باجر واني ادرسج
ورده : بس انتي عندج شغل وشمعرفج بالانكليزي
غنى : اولا باجر جمعه يعني استراحتي كلشي مااسوي وثانيا اني طالبه بقسم الانكليزي اكيد اعرف
ورده : زين شكل لامي حتى اجيج
غنى : كليلها اني موزينه بالانكليزي وغنى كلتلي تعالي ادرسج
سحر : ورده حبيبتي تعالي اخذي خبزاتكم
ورده : كمت ماشي ... يله باي
غنى : باي ... طلعت واني رجعت اكمل ويه خاله
_________________________
فرح : شبيك حبيبي
فهد : شبيه
فرح : ليش كالب وجهك صاير شي
فهد : تعبان
فرح : اذا تحب تحجي اني موجوده
فهد : لا ماكو شي تعبان من الدوام
فرح : فهد
فهد : نعم
فرح : بعد اشهر ينتهي العقد
فهد : اي وشنو يعني
فرح : يعني من ينتهي العقد تعوفني
فهد : بهدوء مو هيج المفروض
فرح : لا مو هيج اني مااريد اعوفك
فهد : عود منا لمن تنتهي مده العقد افكر اجدده لو لا
فرح : تلمست صدره ... تدري مرات احسد البنيه الي راح تحبها
فهد : ليش
فرح : يعني مو سهله وحده تتربع بكلبك
فهد : لهدرجه مبين حجاره اني
فرح : لا بس يعني اكيد الي راح تحبها لازم تكون كامله حتى تعجبك وترضيك مثلي
فهد : تره انتي راضيتني من ناحيه النومه بس لتروحين زايد ماكو مره كامله
فرح : صدك فهد انت هم حبيت
فهد : مااحب احجي عن هالموضوع
فرح : خلص براحتك
فهد : باوعتلها عفيه هيج اريدج دائما امشي عدل حتى اكافئج ... كمت لبست ملابسي
فرح : راح تروح
فهد : اي
فرح : بعد وكت خليك
فهد : من الظهر اني يمج وهسه الدنيا ليل متشبعين
فرح : لو بأيدي اخليك طول العمر يمي
فهد : سويت روحي ما اسمعها طلعت وانطيتها مصرف هاج
فرح : عندي
فهد : ميخالف ... طلعت للبيت اباوع الساعه صار بالعشره بالليل ... دخلت للبيت لكيتهم كاعدين يتعشون ... السلام عليكم
الكل : وعليكم السلام
فهد : كعدت ذبيت مسدسي وغراضي
ايمان : تعال يمه تعشه
فهد : متعشي
بتول : وين جنت فهد انتظرناك هواي
فهد : جان عندي شغل
فيصل : من وضعك مبين خوش شغل شغلك
منذر : شنو قصدك
فيصل : خلي فهد يفهمك
فهد : ماكو شي منذر مو يمك السالفه
ورده : يمه باجر اريد اروح يم غنى
ايمان : شعندج
ورده : اريد تدرسني
اروى : شتدرسج ؟
ورده : طلعت موزينه بامتحان الانكليزي وسولفتلها فكلتلي تعالي اني ادرسج
سعاد : وهالبت الفكر شمعرفها
اروى : تره غنى جاي تدرس انكليزي يعني تخصصها هذا
ورده : اي هسه شكلتو
فهد : ماكو روحه
ورده : لييييييش
فهد : صوتج لا اركع النفاضه براسج حيوانه
ايمان : شجاك وياها يمه ... شكو بيها اذا درستها اذا تعرف
سعاد : وتخليها تفضل عليج وتدرس بنتج خو حطيلها مدرس اشو فلوس اخوها هواي
علي : هذا الحجي ماله داعي
فهد : كلت ماكو روحه ورده محتاجه مدرس يجي للبيت يدرسج لذيج البنيه متروحين
ليلى : شنو شايف عليها شوفه
ايمان : استغفر الله شهالحجي هذا اتقي الله ميجوز
ليلى : هسه قابل كلت شفتها ويه واحد شبيج
فهد : خزرتها لترحين زايد بالحجي اكو جهال كاعدين احترمي نفسج وبالنسبه لورده روحه لهالبنيه ماكو ما اامن وخلص
آلاء : لعد من جبتوها طباخه شلون امنتو بيها
فهد : كلامي ماجان موجهه الج فلتحشرين روحج بمواضيع متخصج
فيصل : اللهم طولج ياروح
ورده : كمت وكفت كدام فهد .... لزمت ايده فدوه فهد خلي اروح يمها باجر تدرسني والله بس هالمره يوم الاحد امتحاني مال الاعاده يعني ماعندي مجال بس هاليومين والماده كلشي مافاهمه منها
فهد : باوعتلها ورده النقاش انتهه روحه ماكو لتضلين تلحين
ايمان : ليش ماقبلت
فهد : انتي تعرفين شي واني اعرف شي ثاني
ورده :هاي دائما كلما اطلب منكم شي كلتو لا ... ويكلك ليش متقرين اذا انتو كلشي عدكم فرضيه وهسه راح اتفشل ويه غنى لان كتلها اجي وانت متقبل
فهد : والله محد كلج صرحي من كيفج
ورده : فهد فدوه بداعتي عندك اذا تحبني خلي اروح والله بعد معندي مجال
فهد : باوعتلها عوزها شويه وتبجي واذا اخذتي درجه موزينه
ورده : شتريد تسوي سوي عاقبني
فهد : خوش باجر العصر ترحين يمها تدرسج وتروح وياج اروى
ورده : حضنته ... ييييس فدوه همززززين
فهد : ضحكت ياجذابه قبل شويه مسويه روحج راح تبجين
ورده : غير حتى تمشي التمثيليه عدل
فهد : رفعتها حاجبي يعني هذا كله تمثيل على حساب الروحه
ورده : قابل اجذب عليك
فهد : عفيه هالبنيه عليمن طالعه لسان
ورده : اشرتله على سعاد وضحكت
فهد : دمغتها امشيي وليي لغرفتج ادبسزز اباوعلها راحت تركض وتضحك
ايمان : ابتسمت اروحلك فدوه شكد حنين على اخوتك
______________________
غنى : لج نرجس مااجي
نرجس : مو بكيفج كوثر عزمتج واكدت عليه تجين
غنى : مااجي والله استحي
نرجس : يعني تقنعيني بحياتج ما حاضره عرس
غنى : لا حاضره بس مو اعراس ناس غربه اغلبهم كرايبنه وغير هيج كوثر حي الله زميلتي شعندي رايحه لعرسها
نرجس : لج غبره شلون متعرفيها جم مره اجتي كعدت ويانه وبعدين هي حتى لاروى عزمتها شبيج عاد لتصيرين سخيفه خلي نروح نتونس نرفهه عن نفسنه شويه ملينه من كعدت البيت
غنى : عود افكر
نرجس : انجبي وروحي يله ماكو تفكرين يوم الاثنين تجين وغصباً ماعليج يله باي
غنى : باي ... سديته وكمت فتحت كنتوري اباوع ملابس مناسبات معندي اخر مره حضرت عرس من جنت اول مرحله جان عرس حمزه ابن خالو كامل وبعد ما حضرت عرس اني بطبيعتي مو اجتماعيه مثل نرجس استحي واضوج من التجمعات ... كلبت بالملابس هسه لو فكرت اروح وياهن شنو اريد البس اغلب كنتوري ملابس محجبات جبب تنانير وقمصان مال طلعه وتراكات بيت ماعندي اشياء مال مناسبات اني حتى مكياج ماعندي لان مااخلي ابد اضوج منه احس وجهي ثكيل فما اخلي سديت الكنتور وطلعت للصاله اباوع الفساتين الي على الجودليه شغله تضحك اخيط للناس ملابس مناسبات واني نفسي معندي ملابس ... رجعت كعدت اكملهن
____________________
جعفر : ويامن جنتي تحجين
نرجس : ويه غنى
جعفر : شلونها
نرجس : زينه
جعفر : لكت شغل لو بعدها تدور
نرجس : لا والله بعدها لسه تدور
جعفر : بعدها زعلانه مني
نرجس : والله ماادري هي حتى طاريك متجيبه
جعفر : نرجس عليج الله غنى عدها شي ويه الرجال الي وصلها امانه تحجين الصدك
نرجس : والحمزه ماعدها شي وياه شتريد بعد ... اصلا هي متحبه ولا يمه
جعفر : اكيد
نرجس : اكيدين
جعفر : لعد ليش رافضه تزوج
نرجس : هي مو رافضه بس لسه ما لكت الانسان المناسب وحده مثل غنى متاخذ قراراتها بسرعه ولازم الي تزوجه تكون متأكده منه مليون بالميه
جعفر : يعني اني مو كد الثقه
نرجس : ليش انت طلبتها للزواج وهي رفضت
جعفر : هاا لا لا يمعوده وين رحتي مجرد سؤال
نرجس : شفته كام وعافني ... اذا مطلعت خاطبها وهي رافضتك اطلع كلشي ماافتهم
____________________
اروى : يله ورده
ورده : اجيت اجيت
ايمان : تعاي اروى هاج
اروى : شنو هذا
ايمان : سويت كيكه اخذي وياج فشله تطبين ايدج فارغه
اروى : ضحكت والله عدج سوالف يمه دجيبي ... ولجج صخاااام وينج اذا رجع فهد وملكانه يطيح حظنه
ورده : نزلت يله امشي .... طلعنه من بيتنه دكينه الباب فتحتها غنى
غنى : ابتسمت يا اهلا وسهلا بوستهن ... فتحت باب الاستقبال تفضلن
اروى : هاج هاي امي دزته الج
غنى : ليش هالزحمه
ورده : زحمتيش يمعوده غير انتي راح تدرسيني
غنى : خليته على الطبله وانتو تسوون وحده بوحده يعني
اروى : ماعليج بيها هاي تحجي وحدها ... صدك خالتج وين
غنى : راحت تتسوك
اروى : شلونه وضعكم
غنى : الحمدلله والشكر نعمه ... كعدت يله حبيبتي ورده طلعليلي كتابج وراويني لأي يونت واصلين حتى ابدي اشرحلج
ورده : الاول والثاني
غنى : خوش انتن ذبن حجاباتجن واستريحن واني هسه اجي انطيني الكتاب خلي اقره القواعد واشوف شلون المفروض اشرحه الج
ورده : الله اروى شفتي شعرها شطوله
اروى : اي ماشاءالله بطولها مايشفتها قبل فالته
ورده : الله عليج مو يشبه شعر روبانزل
اروى : لا مو لهدرجه روبانزل شعرها اطول منها
ورده : لعد احنه ليش شعرنه ميصير مثلها شو اني حتى نفط احط على شعري وميصير هيج
اروى : كافي انجبي اجت
غنى : جبت دفتر وقلم تعالي يمي ورده ... شوفي حبدي اشرحلج من البدايه واكتبلج القاعده بالعربي وانوب اطبقها بالانكليزي وانطيج امثله خارجيه بسيطه حتى تفهمين الموضوع وكل يونت نخلصه اسويلج بي امتحان حتى تضبطين الماده خوش
ورده : خوش
غنى : بديت اشرحلها واحاول اوصللها الفكره بابسط طريقه كانت وهي ماشاءالله ذكيه بس تعلق على كلشي وتصنف هم كلبت الامتحان تحشيش ... هاج يله سويتلج اسئله جاوبي عليهن
ورده : ماشي
اروى : اكلج غنى
غنى : هاا
اروى : ليش متدرسين
غنى : شلون يعني ؟
اروى : قصدي انو ليش متاخذين محاضرات انكليزي للطلاب الي يردون يعني اني شفتج شلون تشرحين لورده شرحج يخبل وسلسل حتى اني فهمت الموضوع وياها رغم مااعرف شنوه .... فكري بالشغله هم تفيدج بالدراسه لان تتمرسين على اللغه اكثر وهم تكسبين فلوس
غنى : خوش فكره ... تدرين ماخطرت على بالي بس تعالي منين اجيب طلاب
اروى : سمعي اخويه منذر ياخذ خصوصي رياضيات كل المراحل اذا تحبين احاجي يشوف طلابه محتاجين مدرس انكليزي حتى يدليهم عليج
غنى : اخاف زحمه
اروى : صدك تحجين زحمتيش قابل شراح يسويلج هو
غنى : حضنتها فدوه حبيبتي الله يوفقج على هالفكره الحلوه هاي لو ماانتي مجان اجت على بالي اصلا
اروى : انجبي غير خوات احنه
ورده : كملت غنى
غنى : شو اشوف ... عفيه كله صحيح بس هاي النقطه خطأ رجعت عدتها الها ... وبديت اشرحلها الموضوع الثاني وهي ويايه كله اي وتحل ... عفيه بيج كملي
اروى : ولج فضيها صارت بالسبعه
غنى : عوفيها شنو السالفه
اروى : ولج مو فهد يخزينه ... غير هيج فشله مو حتى خالتج رجعت من السوك واحنه لسه لاطشين هنا من وره ست ورده ام الكسل
ورده : انجبي الفاهيه بيج خير
غنى : هسه الي يسمعج يكول كاعدات بالشارع وبعدين واذا بقيتن هنا تره كلش متونسه وياجن ... باوعت لورده حبيبتي ورده انتي بنيه مؤدبه عيب تغلطين على اختج الجبيره وهسه كومن خلي نصلي اذن الاذان
اروى : اي يله
غنى : يله ورده حبيبتي عوفي الدراسه وكومي صلي
اروى : ورده متصلي
غنى : ليش
ورده : ما احب الصلاة
اروى : شفتي بله
غنى : روحي انتي توضي وصلي تلكين الجوادر يم البوفيه ... واني هسه الحكج ... كعدت يم ورده تعاي وردايه حبيبتي اريد اسولف وياج
ورده : كعدت يمها هاا
غنى : تدرين البنيه شكد عمرها وتتكلف بالصلاة
ورده : دارستها بس مااتذكر
غنى : البنيه تتكلف من عمر تسع سنوات وانتي هسه عمرج 14 سنه ... تدرين انتي صارلج خمس سنوات مزعله الله عليج
ورده : ليش
غنى : لان صارله خمس سنوات منتظرج توكفين وتلقين بي وتصليله بس انتي متصلين
ورده : يعني شلون التقي بي
غنى : شوفي رب العالمين دائما قريب علينه ويشوف كل اعمالنه بس بوقت الصلاه حتوكفين تعلنين ايمانج بي وتطلبين القرب منه شايفه من يشوفج جايه متلهفه على الصلاة شكد يفتخر بيج كدام الملائكه يكلهم شوفو عبادي شلون يحبوني ويحبون يصلون الي
ورده : بس الصلاه طويله وامل منها
غنى : زين اسألج سؤال شكد تاخذين وقت كاعده على التلفزيون او الايباد
ورده : ساعات
غنى : بهدوء زين انتي من تكعدين ساعات على الآيباد والتلفزيون متملين بس الصلاه قصيره جدا وتملين منها زين خلي ناخذها بالعقل بالبيت انتي هسه من متسوين واجباتج شيسوون اهلج
ورده : يعاقبوني
غنى : لعد شوفي انتي تاركه اهم شي بالحياه ورب العالمين ماعاقبج لسه منتظر شوكت تلجئين اله وتوكفين تصلين وتعتذرين منه على تقصيرج لعد شوفي شكد ربنه كريم ويستاهل الحب
ورده : صحيح
غنى : شوفي حبيبتي احلى شي الصلاه متاخذ وقت منج غير عشر دقايق واذا تصليها ببطئ تاخذ ربع ساعه برأيج يستوجب تزعلين الله منج على مود عشر دقايق صلاه بس
ورده : دنكت راسي ... يعني هسه الله زعلان مني
غنى : اي بس اذا اعتذرتي منه وكمتي صليتي هسه حيقبل اعتذارج بس بشرط كون تداومين على صلاتج وانتي فرحانه مو وانتي مجبوره
ورده : لا والله انوب دائما اصلي
غنى : مديت ايدي وعد
ورده : لزمت ايدها وعد
غنى : لعد يله تعالي خلي نصلي كمنه لكينه اروى كاعده ويه خالتي
اروى : هاا ولج راح تصلين
ورده : اي
غنى : رحنه توضينه وكفنه صلينه ... كملنه وره فتره ... نزعت الجادر هاا ورده حنصلي دائما انوب
ورده : اي
غنى : بستها عفيه بيج هيج اريدج سباعيه انتي
اروى : لبست حجابي يله ورده اذا كملتي خلي نروح
سحر : خاله وكت عشه هسه تعشن وروحن
اروى : لا خاله والله فهد يخبصنه هسه
ورده : خو فهد دومه خابصنه على لا شيئ
اروى : تأدبي ... يله تعالي ... باي خاله بيباي نونه
غنى : ابتسمت باي
اروى : دكينه الجرس طلع علي دخلنه جوه لكينه فهد كاعد ويه حظنه اليوم راجع من وكت ... سلام
فهد : وعليكم لو بايتات هناك ليش رجعتن
اروى : مو ورده عدها هواي دراسه فطولنه
فهد : خمس ساعات على امتحان
اروى : اي غير ماده مكثفه عدهم
فهد : طلعه بعد ماكو هذا الي ينطيجن وجهه يله لغرفجن
ورده : بس اني فتهمت عليها واريدها تدرسني دائما
ايمان : شنو ابتلت بيج البنيه عيب يمه اذا صاحبك حلو لتاكله كله
ورده : اي عود اخليها تدرسني وانتو انطوها فلوس
فهد : بعد ست ورده تأمرين بشي ثاني بما انو احنه كاعدين لخدمتج
ورده : فهد عفيه شبيك ويايه انت مو تريدني اجيب درجات عاليه واطلع معدل واني هسه اوعدك اجيب معدل اذا غنى درستني
فهد : شنو سر هالغنى وكاتله روحج عليها الله يستر من سوالفها
ايمان : يمه ليش تحجي على البنيه هيج شمسويتلك اشو مؤدبه وفقيره
فهد : تنهدت والله انتي الفقيره يايمه
_______________________
صباحاً
غنى : كعدت اليوم عفت كلشي واستلمت البيت تنظيف ملانه ومااعرف وين اروح كلت على الاقل انظف واضيع وقت صعدت كنست الفوك ومسحته وعزلت غرفتي ورجعت نزلت نظفت البيت كله وطلعت سقيت الحديقه بعد ماخليتها تجنن زرعتها ورد وخضره خليت بيها اشكال
سحر : انتي متملين من التنظيف
غنى : مليت من الكعده وين اروح
سحر : دروحي طلعي الملابس من الغساله وصعدي نشريهن بالسطح
غنى : شلت شعري خاله صدوك اريد اكص شعري
سحر : ليش ولج
غنى : خاله مجزعني هاي شوفي مرات اجي بسرعه اكعد مااشوف روحي غير كعدت عليه ويضل يأذيني غير هيج داخذ وقت بالسبح لان يرادله فتره ياله اكمله غسل فاريد اكصه
سحر : ماكو شعرج متكصي كعدي وسكتي مو كل يوم طالعتلي بسالفه البنات كاتلات نفسهن يردن يطولن الشعر وهاي تريد تكصه
غنى : زين بس كصري شوفي واصل لرجليه حتى من امشي مرات ادوس عليه خلي فوك رجليه
سحر : ماكو كص متكصي وتقصير ماكو يله روحي طلعي الملابس وصعدي شريهن بسرعه
غنى : صار
___________________
ايمان : صعدت فوك فهد يمه فهد
فهد : هاا يمه
ايمان : هذا تلفزيون الصاله مدري شبي صار ساعه اكلب بي يطلعلي لاتوجد اشاره
فهد : خاف الخلل بالصحن
ايمان : ماادري عفيه روح شوفه
فهد : كمت هسه اشوفه رحت فتحت باب السطح ودخلت اباوع الصحن صاير بالسطح العالي ... صعدت فوك اسوي الصحن ... دكيت على امي يمه راح احرك الصحن اذا طلعت اشاره كليلي
ايمان : خوش
فهد : حركته هاا اجت
ايمان : لا
فهد : ذبيت الموبايل بالكاع وكعدت اشتغل بي رفعت راسي شفت شي صدمني .... بنيه واكفه كبالي تشر ملابس شعرها اسود ليل وبطولها ... معقوله اكو هيج شعر بالحقيقه ضليت صافن عليها ... اباوعلها دارت وجها فتحت عيوني هاي غنى ... معقوله هذا شعرها
غنى : رفعت الدشداشه شفت فهد كبالي ... فتحت عيوني هايييي شنوووو
- يتبع الفصل التالي اضغط على (ذنوب على قيد الغفران) اسم الرواية