رواية جرح الأيهم الفصل الخامس و الستون و الاخير - بقلم أيلان
"الجُــرح المُعافى{النهاية}"
مُلاذ : بس شلون نتزوج؟
أيهم : شنو شلون؟
مُلاذ : أحنا طلاقنا خلعي
لازم أتزوج غيرك حتى أتزوجك
أيهم : لا عادي عقد جديد و مهر غير؟
مُلاذ : لا لازم أتزوج غيرك
أيهم : بكيفچ هي عادي أكو عقد جديد و مهر
مُلاذ : لا هذا القانون ما موجود بعد
أيهم : و شنو تريدين تتزوجين؟
مُلاذ : أي عادي شكو بيها و بعدين أرجع ألك
أيهم : أنچبي مُلاذ لا أجي أشك حلگج
يصير عقد جديد و مهر
مُلاذ : ما يصيررر غير أنا چنت محامية و أعرف
أيهم : استغفرالله عوفي ما أريد لا نتزوج
مُلاذ : عادي نشوف واحد من الگرايب
وراها بسرعه يطلگني
أيهم : أنچبي و أسكتي
مُلاذ : شنو رأيك بـ جسار؟
أيهم : مُلاذ و العباس لساني لازمه گوه
ما أريد لا نتزوج
مُلاذ : مو شبيك جسار مثل أخوي
بسرعه يطلگني
أيهم : خره بـ جساااار مُلاذ لا تغثيني
حاصرتني الضحكه عليه
و هو صدگني و ضاج
مُلاذ : يعني هاهيه ما تريد نتزوج؟
أيهم : اي ما دام السالفه بيها زواج من واحد ثاني ما أريد بس انه متأكد اكو عقد جديد و مهر
خل يصير الصبح و أخابر صاحبي
مُلاذ : بكيفك بعد
شويه و سكت شلون صدگني ما أعرف
مُلاذ : يلا أنا راح أروح
أيهم : أذا يصير زواج
بدون ما تتزوجين شخص ثاني
صدك تتزوجيني مُلاذ ؟
مُلاذ : لا أجذب عليك
أيهم : أنجبي و أحچي
مُلاذ : أي
سكت و أنا حچيت
مُلاذ : يلا روح عني نعست
أيهم : ليش تريدين نرجع نتزوج؟
مو جنتي ما تريديني بـ البداية
هسه شنو يلي أتغير؟
مُلاذ : هسه حياتنا تغيرت
أنا چنت مقهوره و متأذيه بـ وقتها
ما چان عندي شي يربطني بيك
چنت معقده هواي و ما فاهمه شنو أريد
أما هسه أنكشف كل شي و أنتهى كل شي
الچتال نال عقابه و مات و أنت هم تأذيت منه
أيهم : سامحتيني؟
مُلاذ : من زمان و أنت؟
أيهم : أي
أبتسمت نمت على جهتي
غطيت نيل و قربتها عليه
خليت أيدي جوه المخده
أيهم : شبيچ تحوصين
مُلاذ : جاي أعدل نومتي
أيهم : نيل نايمه؟
مُلاذ : أي من زمان
أيهم : باجر أجي اخذها
مُلاذ : اگلك أصبر عليه ما جاي أشوفها
تاخذها من الصبح و ترجعها نص الليل
أيهم : تعالي ويانا
مُلاذ : أي ليش لا شگد حلو
متطلگين و طالعين سويه
بعدين نيل تتعب من الطلعه
أيهم : زين شلون بنتي أريد أشوفها دائماً!
مُلاذ : تتعب أيهم تذب روحها من تنام
ناني تتعب بسرعه مو مثل أمها من تديح
سمعت صوته يضحك
ضحكت ويا ، حچا
أيهم : أمها وين تهجد
مُلاذ : على أساس أنت تهجد
أربعه و عشرين ساعه بس طالع
أيهم : عندي شغل
مُلاذ : أنا هم عندي شغل
أيهم أسمع خل أحچي ألك شغله
أيهم : أحچي
مُلاذ : ذاك اليوم غاده رسلت ألي صورتنا
چنا واگفين أنا وياك كاتبه جواها
الوحش و الجميله متت من الضحك من شفتها
أيهم : عفا عليكم صرت وحش
مُلاذ : لعد أنا جميله؟
أيهم : أنتِ سندرلي
مُلاذ : ههههههه أيهم لا تضحكني
راح تگعد نيل من وراك
أيهم : انه شعليه؟
مُلاذ : شنو هاي شلون تنطق سندرلي
أيهم : سندرلييي
مُلاذ : ههههههههه
أيهم حباب گلي متابعهم لا تستحي ؟
أيهم : هتان چانت تتابعهم مو گلتلج
و تلح عليه تريد أتابع وياها من لا چاره أتابع
مُلاذ : خل تكبر نيل
ألا تخليك تحفظ كل أفلام ديزني
أيهم : راضي بس خل تكبر گدام عيني
مُلاذ : يلا روح عني خل أنام
أيهم : أطردي بعد أطردي
ضحكت و سديت الأتصال
ثاني يوم اجا أيهم أخذ نيل
راحوا هو و نيل ، دخلت ركض لـ امي
مُلاذ : يلا يمه خل نطلع نشتري
فيروز : بس لو افتهم شنو تريدين تسوين
مُلاذ : بعدين بعدين تعرفين
ملاك : مُلاذ و الله احس هالمره طكت فيوزاتج
ضربتها بـ خفه على جتفها
مُلاذ : أنجبي لچ أختج الجبيره
شنو طگت فيوزاتج
ضحكت و بدلنا و طلعنا
رحنا أشترينا ملابس و مناك أجت هتان
و نور و غاده ظلينا نفتر لحد الليل
خابرت على أيهم
مُلاذ : جبت نيل ؟
أيهم : بعدني جاي تلعب هي و أبيل
مُلاذ : يلا تمام لا تتأخرون
نزلت التلفون و سديت الأتصال
غاده : مُلاذ و علي عجبتيني
عفيه عفيه هيج فكري
مُلاذ : راح يرجعون أمشي خل نرجع
صعدت بـ السيارة أسوق
و البنات صعدن و يشغلن أغاني
غاده : باهر اذا شافني يطلگني
مُلاذ : ههههههه أنا أرجعج أله
ضحكت غاده وصلتها لـ البيت
هي و نور و هتان
و رحنا لـ البيت أنا و أمي و ملاك
دخلت بسرعه و دخلت العلاليك
بدلت ملابسي و خلصت
دك عليه أيهم طلعت أخذت نيل منه
نزل أبيل بوسته ، حچا أيهم
أيهم : حاچيت صاحبي يكول عادي عقد جديد
مُلاذ : أعرف جنت أتشاقه وياك
خزرني كملت كلامي
مُلاذ : أتراجعت أنا
أيهم : شنو؟
عگد حواجبه يدحك بـ عيوني
مُلاذ : تراجعت ما أريد نتزوج
ما أريد أرجع لـ أيام المشاكل
أيهم : تحچين صدك أنتِ؟
هزيت راسي بـ قبول
أتنرفز كلش بس ظل ساكت علمود نيل
أخذ أبيل و صعد السيارة
سد باب السيارة حيل گلت يمكن أنكسرت
دحك ألي بـ عصبية شغل سيارته و راح
نيل گامت تبچي عليه
أخذتها و دخلت جوه
مر أسبوع ما أتصل بيه أبد
مجرد يجي و يشوف نيل
لبست ملابسي و بدلت لـ نيل
الكل أتحضروا غاده فحطت من الضحك
غاده : يمه راح اموت مستحيل
مُلاذ : اسكتي هو أنا ما مقتنعه بـ روحي
بس خل أكسر القاعده شسوي
ضحكت غاده و ضحكت وياها
طلعت ركض لبست حذائي
و البنات كلهن واكفات و جسار واكف
و كلهم يضحكون عليه
مُلاذ : اسكتوا لا تضحكون عليه
جسار : طكت فيوزاتج كلش أنتِ
رفعت راسي أدحك اله و اضحك
ملاك : حتى أنا گلتلها
أخذت جنطتي و حجيت
مُلاذ : يلا كملوا ما أطول عليكم
عفتهم و طلعت رحت صعدت بـ السيارة
شغلت السيارة و طلعت ، خابرت أيهم
مُلاذ : وين أنت؟
أيهم : شتريدين؟
مُلاذ : أحچي
أيهم : ما يخصچ
مُلاذ : أحچي أيهم شبيك؟
أيهم : بـ البيت فضيني شتريدين؟
مُلاذ : ألبس قاطك جايتك
أيهم : شنو ؟
مُلاذ : قاط قاط و رتب روحك
أيهم : ليش؟
مُلاذ : أيهم ألبس شبيك بعدين تفتهم
أيهم : شجاي تسوين؟
مُلاذ : بداعتي أذا تحبني ألبس
أذا تحب نيل
أيهم : شنو جاي تمسلتين؟
فهميني شكو!
مُلاذ : هسه راح أوصل ألك ألبس بسرعه
نزلت تلفوني و سديت الأتصال
ظل يتصل عليه ما أجاوبه
شويه و خابرني جسار
جسار : ولج الزلمه رح يتخبل
خابر عليه سبع مرات
مُلاذ : ههههههه عوفه عوفه لا تجاوبه
جسار : دفهمي السالفه
مُلاذ : لا مو هسه
جسار : رح تخبلينا وياچ و الله
ضحكت و نزلت تلفوني سديت الأتصال
رفعت عيني لـ الطريق
لحد ما وصلت لـ بيت أيهم ، خابرته
مُلاذ : ها بدلت؟
أيهم : بدلت بس فهميني شكو!
مُلاذ : أنزل أنتظرك
أيهم : شكووووو؟
مُلاذ : أنتظرك يلا
سديت الأتصال زفرت نفس من حلگي
گلبي ينبض حيل حتى ما أگدر أتوقع ردة فعله
ربتت بـ أصبعي على الستيرن
ظليت أدور بـ وجهي و أدحك
توترت كلش لمن أنفتحت الباب و طلع
دگيت أله هورن دحگت لابس القاط
أبتسمت حتى لو ما يفتهم السالفه شنو
يسوي يلي أحچي ، أجا ناحيتي
أيهم : شكووو؟
مُلاذ : أصعد
أيهم : مُلاذ راح اخبزج و العباس
مُلاذ : أصعد و أفهمك
أيهم : شنو هاي الحمره شجاي تسوين؟!
مُلاذ : هسه دأصعد شبيك
ذب نفس هز راسه بـ حيره حچا و هو يمشي
حتى يصعد من الجهه الثانيه
أيهم : أريد أشوف وين توصلين!
دحگت أله بـ المرايه ، همست
مُلاذ : شلون حلو خرب يومك
ضميت شفتي و هو فتح الباب و صعد
أنداريت دحگت أله
حاصره ضحكتي على نظراته لمن دحك ألي
أيهم : راح تفهميني شكووو؟
و وين تريدين توصلين؟
أبيل ما موجود بـ البيت
شغلت السيارة و حچيت
مُلاذ : أعرف يمنا أبيل
أيهم : شيسوي يمكم؟
چان ويا باهر و أدهم طالع
مُلاذ : و باهر و أدهم هم يمنا
أيهم : شيسوون شكووو؟
مُلاذ : يحضرون عقدنا
أيهم : شنو ؟ عقد شنو؟
مُلاذ : عقد زواجنا
أيهم : يا زواج مُلاذ راح أتخبل
احچي شكو؟
مُلاذ : ماخذتك و رايحين نتزوج
دحك بـ وجهي مصدوم
ضحكت و هو صافن عليه
و أنا أمشي بـ السيارة
أيهم : شنو نتزوج ؟ شبيچ تسودنتي؟
مو قبل أسبوع گلتي تراجعت
أبتسمت انداريت دحگت أله و حچيت
مُلاذ : ما اتراجعت جنت أحضر ألك مفاجئه
أشتريت كل شي و جبنا الشيخ
و الكل يعرفون عداك لأن أنا ما ردت تعرف
أيهم : دقيقة ما جاي أفتهم أي شي؟
مُلاذ : ماخذتك حتى نتزوج
كلشي جاهز و منتظرينا
رفعت أكتافي و حچيت
مُلاذ : ما أعرف ردت أفاجئك
رغم مفاجئات الزواج تكون من الرجال
بس قررت أكسر القاعده هذي المره
و أفرحك و أفرح أنا هم
ظل يدحك ألي ساكت ما مستوعب
أدحك أله و أرجع أدحك لـ الطريق
مُلاذ : حتى الحلقات اشتريناهن
بس باقي تتزوجني
أهتز جسمه يضحك بـ صدمه و يدحك ألي
رفع أيده يحركها بـ معنى "أتخبلتي؟"
أيهم : مستحيل لو انه جاي أحلم و مكشف
لو أنتِ جاي تتشاقين وياي
مُلاذ : و الله شبيك هياته الشيخ منتظرنا
أنا أريد نتزوج
أختفت أبتسامته و صفن بـ وجهي
لحد ما بدء يستوعب خلا أيده على كصته
و ساندها على باب السياره گام يضحك
سطرته سطر بـ سوالفي
يندار يدحك ألي و يرجع يضحك
و أنا أضحك ويا
مُلاذ : مو تفشلني تقبل بيه خوش
أيهم : مُلاذ و الله عقلي بعد ما يستوعب
ترا ماكو وحده تروح تخطب رجال
مدري تسوي أله مفاجئه شنو سالفتج؟
مُلاذ : شبيك أول زوجين بـ الدنيا
البنيه تطلب الزواج من الرجال
خل نكسر القاعده
أيهم : لو گايلتلي ألبس بدلة و تلبسين قاط
مُلاذ : هههههه ، شغل أغنيه
أيهم : شأشغل لسا ما مستوعب
مُلاذ : ديلا مو راح نتزوج
و أنت بعدك ما مستوعب أستوعب كافي
قابل شسويت متگلي
أيهم : مُلاذ أخاف وكلوج شي بـ تركيا
مُلاذ : لا و الله ما وكلوني بس أنا تخبلت
ضحك كل ما يضحك أضحك ويا
أيهم : نيل وين؟
مُلاذ : كلهم بـ البيت ينتظرونا
و الشيخ رح يوصل
أبتسم و ظل ساكت
أنطيت أله التلفون و حچيت
مُلاذ : يلا أختار
أخذ التلفون مبتسم
ثنيناتنا ما مقتنعين بـ رواحنا
و حاصرتنا الضحكه ، شغل أغنية
"أنتِ بـ عيني أحلى بنية"
أنداريت دحگت أله و أبتسمت
ظل طول الطريق داير وجه الي و صافن عليه
خابرت على جسار گلتله أجينا
طلع فتح ألنا الباب ، نزلنا أنا و أيهم
أتقدم جسار عليه و حجا
جسار : العريس
ضحك أيهم و جسار حضنه
أيهم : مخابيل و الله مو صاحيين
شلون وافقتوا على هيچ سالفه و ما گلتولي
جسار : هي مُلاذ تالي حتى أحنا خبلتنا
ضحك أيهم و دخلوا
جسار : أدخلي المخبله
ضحكت و دخلت رحت لـ أمي
نزعت شالي و عبايتي الأسلاميه
لابسه تحتها فستان
أيهم أشترى ألي من چنا بـ تركيا
ناثره شعري على ظهري
و البنات خلن ألي مكياج
نيل لبستها فستان نيلي
و سويت شعرها ويفي
أخذها أبيل و راح لـ أيهم
سلوى و تاره و الكل موجودين
شويه و گالو الشيخ أجا و صاحوني
رحت گعدت يم باب الأستقبال
و الشيخ يقرا أدعيه أتذكرت أول مره أتزوجنا
رفعت راسي دحگت لـ أمي و أبتسمت
كمل الشيخ و گاللنا نكرر موافقتنا
وافقت و أنا گلبي الا شوي يطلع من صدري
گد ما فرحانه و أيهم واضح من صوته
نفس شعور أول مره بـ الضبط و أقوى
عبالك بـ عمري ما شايفه أيهم و لا عشت ويا
المهر باهر اصلاً يعرف بي
فـ متفق وي الشيخ ، بارك النا الشيخ
هتان تفتر هي و غاده و يهلهلن
و يطشن جكليت شويه و راح الشيخ
رحت لبست عبايتي و شالي
أجو الولد و أيهم ميتين من الضحك
غاده و هتان يهلهلون و يطشون جكليت عليهم
أم جسار : كضيت عمري بـ الزواجات أفتر
بس أول مره أشوف هيچ زواج غريب
مُلاذ : ههههه ليش مستغربين؟
سلطان : و ليش حتى ما نستغرب
ضحكت و درت وجهي لـ أيهم
أيهم : ما جاي أگدر أحس روحي عريس
باهر : حتى أنا أحس روحي اخت العروس
متت من الضحك عليهم و أيهم كفخ باهر
يگله مو هيچ ، شويه و أتطشروا
أنا و أيهم و نيل و أبيل گعدنا بـ الأستقبال
ما يگدر يسكت كل ما يتذكر يضحك
مُلاذ : شعجب ما أستهترت ؟
أيهم : بختج بـ الجهال
ضحكت و گمت نزعت شالي
و العبايه ، رفع عيونه دحك ألي
أيهم : يشبه الفستان الي أشتريته ألچ
أبتسمت و گعدت حطيت رجل على رجل
مُلاذ : هو نفسه لبسته
دار وجهه من عندي و طلع جكارته يدخن
و أنا حاصرتني الضحكه عليه
دار وجه دحگلي و حچا
أيهم : كبرتي و بعدچ فوصه
مُلاذ : أنت أفوص شعليه
أختنگت من الشال ما دامك مو غريب بعد
أيهم : أصبري الي انه أعلمج
أبتسمت و ظليت ألف شعري على أصبعي
شويه و أندك باب الأستقبال
مُلاذ : منو؟
غاده : أنا
گمت فتحت الباب دحگت ألي غاده
كرصتني حچت بـ همس
غاده : ولج مخليه الجهال يمكم
و هستوكم عقدتوا
مُلاذ : لعد شتريدين ؟
غاده : جيبيهم لا أشبعچ كتل و الله
صاحت على الجهال و دخلت أخذتهم
عود أدهم يريد يلعب وياهم
خزرتها و حركت ألها أيدي بـ معنى أنا أعلمج
سديت الباب و أنداريت دحگت لـ أيهم
مُلاذ : أبقى حباب العشيره كلها هنا
گام أتقدم عليه و أنا رجعت لـ ورا
ردت أركض و لزمني ضحكت و دحگت أله
مُلاذ : ظل حباب
أيهم : عليمن جنتي تجذبين؟
مُلاذ : مو أنا مو أنا
أيهم : متأكده؟
هزيت راسي بـ قبول و أنا أضحك
خلا أيده على خدي يدحك ألي
ظل يدحك بـ وجهي و أنا أحوص بـ أيده
أيهم : مشتاق ألچ هواي
رفعت أيدي خليتها على خده
دنيت وجهي بست حنچه
مُلاذ : أنا هم بس مو هسه
لزم خصري أقوى
أيهم : أثبتي
ضحكت و عاندت ظليت أتحرك حتى يعوفني
بـ النهاية ثبتني و باسني ، أبتعد يجر نفس
و أنا بين أيديه حچيت
مُلاذ : رح نعقد محكمه مو؟
أيهم : طبعاً و أسوي ألچ عرس ثاني
هزيت راسي بـ رفض و حچيت
مُلاذ : ما أريد عرس أريد نعقد محكمه بس
أيهم : شلون تتزوجين بلا عرس؟
مُلاذ : ما أريد و الله أريد بـ كل هدوء نعقد
أيهم : بس انه أريد نسوي عرس
أريد مثل أول مره
مُلاذ : و الله أيهم ما أريد عرس
أنا اصلاً دايخه و تعالي أعزمي
و أنشغلي بـ الناس و أطلعي دوري فساتين
ما أريد مجرد أريد نعقد
أيهم : تمام مثل ما تريدين بس هم تنزفين
مُلاذ : تمام يزفوني من المحكمه لـ البيت
هز راسه بـ قبول دنك راسه ألي
باس خدي و أبتعد
أيهم : روحي لأن ما ألزم نفسي
هزيت راسي بـ قبول
لبست الشال و العبايه و طلعت
و هو هم طلع غاده خبلتني
أخير شي لزمتها كتلتها يلا سكتت
أيهم أساساً عنده بيت مشتري
رحت شفته كلش حلو و اثاثه حلو
گلت لـ أمي تكعد ويانا رفضت
گالت بس فترة حمل ملاك تظل وياها
و من تولد ملاك تجي تگعد وياي ، وافقت
ورا أسبوع رحنا لـ المحكمه و عقدنا
طلعنا من المحكمه و أنا و أيهم أيد بـ أيد
طول طريقنا و دخلنا بـ فروع ثانية
مُلاذ : وين رايحين ؟
أيهم : من نوصل تعرفين
سكتت و غفيت لمن وصلنا گعدني أيهم
فتحت عيوني بـ نعاس ، دحگت
عدلت گعدتي و حچيت
مُلاذ : وين أحنا؟
أيهم : انزلي
مُلاذ : اهلي ، نيل أبيل وينهم؟
أيهم : أخذوهم و راحوا قبلنا ، أنزلي
نزلت من السيارة ما مفتهمه و أدحك لـ أيهم
لحد ما درت وجهي و أستقر نظري على المگبره دحگت لـ أيهم عاگده حواجبي قفل السيارة
أتقدم عليه أخذ أيدي و شبك أصابيعه بـ أصابعي
مُلاذ : وين رايحين؟
أيهم : تعالي
مشى بيه و گلبي ينبض حيل
أدري وين راح نروح من يوم الأجيت لـ بغداد
أتمنيت لو بس أگدر أجي لـ هنا بس ما لحگت
أتمرضت و تخربط وضعي و ما أتحمل الطريق
وگفنا گدام گبر بابا و عيوني مغورگه
دار وجه أيهم دحك الي نزلت دموعي أدحك أله
أتقدمت عليه حضنته ساكته مسح على ظهري
أبتعدت عن أيهم و أتقدمت على گبر بابا
گنبصت خليت أيدي على الگبر
شهگت و بچيت نزلت راسي دموعي تچوي خدي
روحي تحترك كل ما أتذكر موته و كلامه
كل ما أتذكر حنيته ألي فقدتها و صوته و وجهه
عطره و هيبته جماله كل شي فقدته
گعد أيهم يمي يمسح على ظهري
حضن راسي لـ صدره ، حچيت و أنا أبچي
مُلاذ : أشتاقيت أله كلش أيهم أريده وياي
باس راسي ، حچا صوته محتقن
أيهم : أبوچ...
بلع ريگه و كمل
أيهم : أول أنسان عاملني كـ بشر بـ كل حياتي
أكثر أنسان ساعدني بينما المدرسين الباقين
جانو يتعاركون وياي و يريدون يفصلوني
لأن ما أداوم أو لأن مو زين و ما أجاوب
مُلاذ : و بابا؟
أيهم : أبوچ قبل لا يعرف بيه أبيع مخدرات
بسبب الچتال چان كل مره يحاچيني
و يلگاني ما محضر أول حچايه "ليش بابا؟"
ما يقلل مني گدام الطلاب و لا يستهزء بيه
باقي المدرسين أول حچايه يحچوها
"أنت كل شي ما تصير بالمستقبل"
دحگت أله ساكته
و هو كمل كلامه
أيهم : لو ما أبوچ ما أصير دكتور و لا أنجح
بس علموده هو صرت دكتور لأن وعدته
كل مره چنت أريد أمتحن أتذكر وعدي أله
رغم ظروفي و رغم النار المشتعله بـ گلبي
أبوچ جان الأمل و الشخص الوحيد يلي بـ بالي
وعدت أستاذ ألياس راح أطلع طب و طلعت
أبتسمت و دموعي على خدي
أدحك لـ الگبر و أحس بـ الفخر أتجاه بابا
ركزت سمعي وي أيهم لمن كمل كلامه
أيهم : رغم كل شي و أتمنى لو ما صاير دكتور
أتمنى لو ما عارفني أبوچ و شايفني
چان هسه هو يمچ ، ، لـ هالسبب أعتذر منچ
ألاف و ملايين المرات لأن چنت سبب بـ فقدانه
رفعت راسي من صدره
دحگت أله و هزيت راسي بـ رفض
عاگده حواجبي ، حچيت
مُلاذ : أبد ما چنت سبب لمن تحچي ألي
أنا أحس بـ الفخر أتجاه بابا
بـ زمن كثروا القذريين هو چان النظيف الوحيد
بـ زمن الكل جبان و يخاف بابا الشجاع الوحيد
لا تلوم نفسك أبد ، ما تگدر تغير قدر رب العالمين
أيهم : مره گلتيلي حياتنا مبنية على قضية دم
مُلاذ : وقتها هيچ چنت أفكر بس لا
حياتنا مبنية على شجاعة بابا ، لو عايفك
چان أنت لـ اليوم تتهدد بـ أخوانك
أيهم : بس أنتِ چنتي راح تكونين مرتاحه
مُلاذ : حتى لو أنا چنت مرتاحه
أنت ما رح تكون مرتاح
ما چان عرفتك و لا حبيتك و لا ولدت نيل
ما چان حبني شخص مثلك
لـ درجة يضحي بـ روحه علمودي
درت وجهي دحگت لـ الگبر و كملت
مِلاذ : بابا لو عايش و أنا ما أعرفك
چان رح يتمنى يتزوجني واحد مثلك
يحبني و يخاف عليه و علمودي كل شي يسوي
ما چان حسيت بـ الفخر يلي أحسه هسه أتجاه بابا
لا تلوم نفسك أبداً أيهم
مسح على خدي ساكت
گعدت أحچي لـ بابا عن كل شي
و فترة حملي و أيهم يمي و يسمعني
حتى هو يحچي عبالك بابا صدك گدامنا
بـ النهاية گمنا و قرينا الفاتحه
أيهم رش مي ورد على گبره
رحنا لـ گبر أيمن هم و يم گبره گبر أم أيهم
و أيهم خطيه ما أتحمل گبل گام يدمع
واگفه يمه و أمسح على كتفه قرينا ألهم الفاتحه
و رشينا المي ورد ، بلع ريگه داير وجهه
من الگبر و يحچي
أيهم : كلهم مسطرين گدام عيني
خسرتهم واحد واحد
دحگت أله ساكت و هو يدمع
و داير وجهه من الگبور و متخصر
حچا صوته محتقن
أيهم : يا ريت لو أدهم هم عنده گبر و أروح أله
عبس شفته و يبلع غصته
بـ الأخير رجعت نزلت دموعه
مسحتهم بـ أيدي و حچيت
مُلاذ : لا تنسى هو شهيد و مكانه بـ الجنه
خلا أيديه على عيونه مسح وجهه ساكت
دار وجهه دحك لـ گبر أيمن و امه أخير مره
أترحم على روحهم دنك باس گبرهم ،
لزمت أيده و طلعنا
مُلاذ : أهلي وين راحوا؟
أيهم : لمن نمتي أجو و أمچ و جسار و سلطان
وملاك راحوا لـ گبر أبوچ بعدين أخذوا الجهال
و راحوا لـ الامام علي (عليه السلام)
ورا ما راحوا گعدتج
مُلاذ : لعد ليش ما گعدتني أنزل وي أمي
أيهم : ردت بس انه وياچ
و الجهال ما ردت أدخلهم لـ المگبره
هزيت راسي بـ قبول ساكته
وصلنا لـ الامام علي (عليه السلام)
خابر أيهم عليهم گاللوله رح يجونا
طلع أيهم عبايه لبستها و اصلاً وجهي طبيعي
ما بي مكياج هواي و لا مبين
بس الحُمره و مسحتها
دخلت لـ التفتيش فتشوني بعدين طلعت
لگيتهم ينتظرونا قريب على التفتيش
و أيهم ينتظرني وياهم
رحنا أنا و أمي شايله نيل
أول ما دخلت أحس روحي أنتعشت
صارلي شگد ما جايه لـ هنا
زرت الأمام علي (عليه السلام)
مجرد وصلت لـ هناك بچيت
رفعت أيدي الترجف مسحت دموعي
طلبت و دعيت رب العالمين
تمشي حياتي مستقره بعد هاليوم
أعيش بـ راحه و يصير كل الي بي خير ألنا
و رب العالمين يحفظ الي نيل
دعيت لـ أيهم ، كل الي بـ خاطري طلعته
لحد ما أرتاحيت و گمت أخذت نيل من أمي
گعدتها بـ حضني و حچيت
مُلاذ : أنتوا زرتوا؟
فيروز : أي يمه الحمدلله
كملنا و طلعنا ، ظلينا نفتر أنا و أيهم
أيد بـ أيد
أيهم : ناكل هسه نروح لـ مطعم؟
هزيت راسي بـ رفض
مُلاذ : من نرجع لـ البيت أحسن
بس خاف هم جاعوا
أيهم : لا أكلوا لمن أحنا بـ المگبره
انه خابرت لـ مازن گلتله ياكلون ما ينتظرونا
و الفلوس على حسابي
مُلاذ : تمام ، أنت هم زاير من قبل؟
رفعت راسي دحگت أله
أيهم : طبعاً فترة الي أنخطفتي سكنت كربلاء
و النجف كل يوميه أدعي ألگاچ
بس ردت ألگاچ بـ خير و سلامه
و رحت لـ العباس و الحسين عليهم السلام
و لـ الكاظم ما خليت أمام ما زرته
أبتسمت و حچيت
مُلاذ : هاي أنت من گد ما دعيت رجعت
سكت و ظل لازم أيدي
مُلاذ : أنسى ما أريد نتذكر هيچ أشياء
بـ هذا اليوم
هز راسه بـ قبول رفع أيدي باسها
مُلاذ : دحگي دحگي ناني
بابي شلون رومانسي
ضحك و أبيل يضحك ويا
وجهت كلامي لـ أبيل
مُلاذ : زرت حبيبي ؟
هز راسه بـ قبول و حچا
أبيل : أي جسار و سلطان أخذوني
أبتسمت أدحك أله ، مسحت على شعره
بعدها رجعنا ، أبيل و نيل ناموا بـ السيارة
لمن وصلنا لـ بغداد رادو أهلي ياخذوهم رفضنا
مُلاذ : خليهم ما يأثرون علينا
فيروز : لا خل ناخذهم
مُلاذ : لا أمي ما أگدر بدون ناني
و هم أبيل خطيه يظل يروح و يرجع
بـ النهاية وافقوا ، أشترينا أكل بـ الطريق
سلطان و جسار و مازن قرروا يزفونا
لحد ما وصلنا لـ البيت أنا و أيهم
نزلنا من السيارة ، باركوا ألنا
و كملوا طريقهم صاح أيهم ورا سيارة مازن
أيهم : مااازن أوگف
وگف السيارة و هو راح أله
نزل مازن الجامه وگف أيهم يحاچي
خازره و يحچي ويا و مازن ساكت
دار وجهه أيده ع الستيرن و مدنك راسه
بـ النهايه راح و أيهم أجا ناحيتي
مُلاذ : شبي مازن؟
خزرني
مُلاذ : هو أسم
مسح وجه و حچا بـ عصبية
أيهم : حاچي صاحبتچ خل تحاچي
لان مازن بـ النهايه على سوالفه راح أدفنه
مُلاذ : تاره؟
هز راسه بـ قبول و هو يفتح تلفونه
حچيت بـ استغراب عاگدة حواجبي
مُلاذ : ليش شكو؟
أيهم : ما جاي يگعد بـ مكانه
لو يشرب لو يتعارك ذاك اليوم أبن الكلب
لگيته رايح لـ مكان مال تفحيط سيارات
و يفحطون هو و سيارتين لحد ما مدعوم
وسعت عيوني عليه مصدومة
مُلاذ : لأن تاره ما موافقة عليه هيچ يسوي؟
هز راسه بـ قبول رفع تلفونه يخابر
أيهم : ديربالك على مازن
اي شي يسوي خابرني
سكت لحظات و غلق الأتصال
حچيت و أنا أمشي ناحية السيارة
مُلاذ : ذكرني بـ واحد
فتحت باب السيارة
أيهم : ما جنت أسوي هيچ!
مُلاذ : صحيح أنت سويت الأكثر
دحك ألي ساكت
دنگت شلت نيل ، فزت
مُلاذ : أشش أسم الله
دنك أيهم باس شعرها
و هي ظلت تغمض و تفتح
فتح الباب الثانيه شال أبيل
سلمني المفتاح حتى أقفل السيارة
سديت البيبان و أنا شايله نيل
قفلت السيارة و لحگته ، فتح باب البيت
دخلنا أنا ويا البيت أخذ أبيل لـ غرفته نومه
و أنا وديت نيل لـ غرفتنا نزعت شالي
و هي بقت گاعده على الجرباية تنتظرني
بدلت ألها ظليت أحاول أنومها
فتحت شعري رفعت عيني أله
لمن دخل الغرفة دحك ألي
مُلاذ : أذا تريد أسبح على ما أنومها
هز راسه بـ قبول و راح يسبح
گوه غفت گمت أدور عليه لگيته بـ المكتب مالته
گاعد على واحد من الكرسيين
يلي يصيرن گدام المكتب
الأضويه مطفيه بس ضوه الحديقة مفتوح
يمر من بردة الشباك مضوي ضوه خفيف
حچيت و أنا أدحك أله
مُلاذ : خل أسبح أنا هم
دخن ، زفر الدخان و هو يدحك ألي
هز راسه بـ قبول ساكت
رحت فتحت جنطتي أطلع ملابسي
طلعت الملابس يلي أشتريتهم
عضيت على شفتي بـ توتر
دخلت سبحت خلصت و لبستهم
نشفت شعري خليت حُمره خفيفه
رشيت عطر أنداريت و طلعت
أمشي بـ هدوء ، بست شعر نيل
رحت لـ المكتب دخلت
دحگت أله يفر بـ تلفونه و صافن
رفع عينه ألي لمن دخلت لـ المكتب
عيونه تجولت من راسي لـ رجليه
أتحمحمت و حچيت
مُلاذ : ملابسنا غسلتهم
خل أشرهم و أجي
دخن و نزل الجگاره
هز راسه و حچا بـ هدوء يدحك ألي
أيهم : شريهم
عفته و طلعت شريت الملابس
أخذت الأكل و دخلت لـ الغرفة
وگفت گدام الطاوله الصغيره
يلي گدامه خليت عليها الأكل
و رتبته و هو گاعد و يدحك ألي
شديت شعري گعدت على الكرسي
يلي مقابيله ، خليت رجل على رجل
و گعدت اكل أنا ويا وترني گد ما دحك ألي
نكثت أيديه لمن خلصنا ، گمت لميت الأكل
ذبيت العلاگه يلي لميت بيها جبت وصله
و گفت أمسح الطاوله يلي گدامه
و هو گام غسل و رجع گعد بـ نفس مكانه
رحت غسلت أنا هم و رجعت لـ المكتب
وگفت گدامه ، رفع عيونه ألي و حچا
أيهم : الشارع بي تراب أكنسي بـ دربج
أبتسمت و حچيت
مُلاذ : مُمكن ليش لا؟
سحبني من أيدي وگعت بـ حضنه
دحگت أله ، و هو مگعدني على رجليه
سحب رجليه لمهم بـ حضنه و على الكرسي
أيهم : هسه مو مُمكن
فتح شعري بـ أيده
على ثغري أبتسامة خفيفة
و أنا أدحك بـ عيونه حچيت
مُلاذ : ليش مو مُمكن؟
أيهم : لأن صبري نفذ
خلا كف أيده على خدي
سحبني و باسني و بسرعه
حاوطت بـ أيديه ثنينهم رگبته
ظل لحظات هيچ ، گطع بوستنا يجر نفسه
نزل راسه صارت شفايفي على گصته
مغمضه عيوني و هو مدنك راسه ، همس
أيهم : رغم كل الصار
بس مرتاح لأن ماكو شي بيناتنا مضموم
دنگت راسي أله رجع باسني
شالني بـ أثنين أيديه و مشى بيه لـ القنفه
يلي بـ المكتب ، گعد عليها و أنا بـ حضنه
خلا أيديه على ظهري و أنا أيديه على وجه ...
مغمضه عيوني أحس بـ داخلي فراغ چبير
ما أعرف فراغ شنو هذا بس أحس روحي
من الداخل نظيفه أول مره هيچ أرتاح
بـ كل حياتي ، أيدي على صدره ، همست
مُلاذ : أيهم نايم؟
أيهم : جؤ
رفعت راسي دحگت أله
فتح عيونه يدحك ألي
خليت أيدي على لحيته أمسح عليها
رفعت نفسي و بسته أبتعدت أدحك أله
أيهم : أحبچ حيل ، ما مصدك أجتمعنا
مُلاذ : أنا هم
دنگت راسي خليته على صدره
حچيت و أنا أدحك بـ الفراغ
مُلاذ : مو گلت أنت مرتاح
لأن بعد ماكو شي مضموم بيناتنا
أيهم : أي
مُلاذ : أنا هم مرتاحه عكس أول مره أتزوجنا
كل شي چان ما مفهوم و أنا ما مرتاحه دائماً
هسه أحس صرنا شفافيين گدام بعض
أندار نام على جهته و حضن خصري
أيهم : ما أريد أي شي يأثر علينا بعد
تعبنا هواي مُلاذ هواي كلش تعبنا
ما أريد جذب يدخل بيناتنا
و لا أريد نضم شي على بعض بعد
مُلاذ : أعرف و أنا ما راح أسمح لـ شي
يأثر علينا بعد اليوم
أبتسم و حضنني لـ صدره ساكت
و هو يشم شعري ، غفينا و گعدنا الصبح
دخلت سبحت و من طلعت گعدت نيل
و مشطت ألها و گعدت أبيل هم مشطت أله
مُلاذ : تعالوا نحضر الريوك يلا
لزمت أيده و أيد نيل
رحنا لـ المطبخ نحضر الريوك
نيل تفتر و تدور على عسل
تنطق الكلمة بشكل ما مفهوم
بس أنا أفهمها رحت گعدت أيهم
مُلاذ : أيهم دحك أگعد
گعدت بـ الگاع يم القنفه
ندسته لحد ما فتح عيونه
أبتسمت و حچيت
مُلاذ : گوم جيب عسل
دنى وجهي أله بـ أيده باس گصتي
حچا بـ نعاس
أيهم : عوفي العسل تعالي يمي
مُلاذ : لا گعدت الجهال
خطيه نيل تفتر تدور على عسل
أيهم : يرخص الها العسل و أبو
هسه أجيب ألها
گام گعد على حيله يمسح بـ عيونه
وخر أيده دحك ألي ، أبتسم و حچا
أيهم : أول ما گعدتيني گعدت
بس ردت أسمع صوتج أكثر
أبتسمت ساكته دنك ألي و باسني
أبتعد يدحك ألي گام لبس تشيرته
أيهم : شو صايره عاقله؟
مُلاذ : بعدين أطلع خبالي عليك
أجا ناحيتي شالني و باسني
مُلاذ : كافي ضجت
أيهم : عادي ضوجي
مُلاذ : نننن
ضحك و حضن وجهي لـ رگبته
مُلاذ : راح يجفت علينا أبيل يتيه مشرادنا
ضحك و نزلني
عدلت شعره بـ أيدي و حچيت
مُلاذ : يلا تعال
لزمت أيده و هو يمشي وراي
طلعنا ، ركض عليه أبيل شال أبيل باسه
ضحك أبيل و حچا
أبيل : بابا نيل تريد تدعمني
أيهم : ههههه ليش؟
أبيل : تسويلي عن عن
مُلاذ : نيل أدعمي بابي
راحت ركض صعدت سيارتها
و تلحك أيهم و أيهم ميت من الضحك
أيهم : ولج بابا
دعمت رجليه و هو شايل أبيل
شبخ السيارة و مشى ضحك و گال
أيهم : روحي أدعمي أمچ
نزلت من السيارة عدلتها و دارتها ألي
حاطه اللهايه بـ حلگها و عاگده حواجبها
صعدت و أجت ألي تريد تدعمني
و أنا أركض و هي وراي ، ختلت ورا أيهم
أيهم : لا يلا خطيه عوفيها
ضحكت و نزلت أجت حضنت رجل أيهم
شالها بـ أيده الثانيه باسها
أيهم : خل نروح نشتري عسل
مُلاذ : اطلعوا بس انتوا
أيهم : و أنتِ؟
مُلاذ : أريد أرتب البيت
أيهم : تمام
نزل أبيل و نيل
و راح يسبح طلع بدل ملابسه
شال نيل و لزم أيد أبيل وگف بـ الباب
أيهم : لَـذه تعالي أقفلي الباب
رحت ورا مبتسمه أحب يصيح ألي لَـذه
حچا و هو يطلع
أيهم : لا تحضرين الريوك أنتظرينا
مُلاذ : تمام
لميت البيت على ما رجعوا
و سوينا الريوك سويه و گعدنا نتريك
مُلاذ : يلا أيهم تعال
أيهم : أجيت
بعد ثواني أجا وگف وراي
لم شعري عدل و دنك باس شعري
راح لـ نيل هم باس شعرها أبتسمت
دنك باس شعر أبيل و گعد يمه و گعدنا نتريك
مرت بـ هدوء حياتنا خلال هذي الأيام
بس أيهم يلي چان زاعجه مازن
لأن كلش مقهور و يسوي أشياء تأذي
أتصلت على تاره طلبت نلتقي أنا وياها
ما چانت تعرف راح نجيب مازن هم
ألتقينا بـ مطعم و أيهم جاب مازن
لحد ما أجت تاره وگفت گدام الطاوله
صفنت علينا لمن شافت مازن
تاره : ست مُلاذ ؟
رفعت راسي دحگت ألها
گمت أسلم عليها و مازن گام وگف من شافها
حچت بـ صوت ناصي مصدومة تدحك بـ وجهي
تاره : مازن شيسوي هنا؟
مُلاذ : أحنا جبنا
أمتلت عيونها دموع و حچيت
تاره : ليش هيچ سويتي؟
مُلاذ : تاره خل نفهم الله يخليچ
عافتني و رادت تطلع
طلعت ركض وراها أوگفها
مُلاذ : بس أوگفي
تاره : ست ليش سويتي هيچ؟؟
ما تعرفين علاقتي شنو بي و لا تعرفين شي
مُلاذ : بس تعالي خل نحچي لا تبچين
تاره : ما أگدر ما أگدر أبقى
ظلت تبچي و أنا أهديها
أخذتها و وگفنا يم المطعم على جهه
مسحت دموعها و أيديها ترجف و تبچي
مُلاذ : بس فهميني تاره
رفعت راسها بـ أيدي ، حچيت
مُلاذ : تاره مازن صديق أيهم من الطفوله
الولد جاي ينهار و الله خطيه
بس فهميني السبب ما أريد أتدخل بـ علاقتكم
بس هو خوش ولد ليش هيچ تسوون؟
تاره : أنا ما أريده
مُلاذ : ليش ما تريدينه؟
سكتت و ظلت تبچي
مُلاذ : بس فهميني
تاره : يشرب و عصبي كلش
أبوي ما يقبل بي لأن ما عنده أهل
ما أگدر أدخل ويا بـ علاقه
هو اتعلق بيه ما أريد يتعلق أكثر
أبن عمي خطبني و وافقت مجبوره
بعد كم يوم زواجنا
مُلاذ : أنتِ تحبينه؟
تاره : أنا أحبه بس شنو يفيد؟؟
شنو يفيد أذا الدنيا كلها بـ وجهنا
مُلاذ : أنا و أيهم نروح ويا نخطبج من أبوچ
أو حتى لو أمچ نحاچيها
تاره : أعرف أيهم و أجا ويا بس أبوي رفض
ما تعرفينه كلش متشدد و كاره مازن كلش
مُلاذ : أحنا وياكم زين
تاره و الله الولد أتدمر
تاره : و أنا ؟؟ و أنا ما أتدمرت؟
أكثر وحده تريد توگف ويا هي أنا
بس هو كل مره يرفضه أبوي لو يروح يشرب
لو يسوي أشياء غلط كلش تأذي
يحسسني بـ الذنب أحس روحي أنا الي مأذيته
مُلاذ : زين أدخلي و حاولي تتفاهمين ويا
أنتِ چبيره و تگدرين تتزوجينه بلا موافقة أهلچ
تاره : ما أگدر
مُلاذ : ليش؟
نزلت دموعها ساكته
مبين أكو شي أكبر بس هي ما تريد تحچي
مُلاذ : تاره شنو الصاير وياچ؟
رفعت عيونها تدحك ألي ساكته
نزلت عيونها مني و نزلت دموعها
غطت وجهها و بچت ،
هزت راسها بـ رفض وحچت
تاره : ما أگدر أحچي
نزلت أيديها بـ أيديه من وجهها
حچيت و واضحه عليه تعابير الأستغراب
مُلاذ : منو مسوي ألچ شي تاره؟
غطت حلگها و بچت
تريد تكتم صوتها ما تگدر
مصيبتي أفتهم كل شي بسرعه
و أحساسي يطلع صح
عگدت حواجبي و حچيت متردده
مُلاذ : أبـ... أبن عمج؟!
رفعت راسها دحگت ألي زاد بچيها
وسعت عيوني مصدومة
خليت أيدي على گصتي
الأيد الثانيه على خصري ، حچيت
مُلاذ : الله ياخذه
غطيت وجهي مصدومه ما أعرف شنو أسوي
وخرت أيديه من وجهي لمن سمعت صوت أيهم
دحگت مازن طلع من المطعم معصب
و أيهم يحاچي وگف لمن شاف تاره ، أتقدم عليها ضميتها وراي حچا بـ عصبية
مازن : على شنو تحاولون
و هي الي ما عاجبها الوضع فوكاها
هي رايده أبن عمها الگـ***
نزلت أيديها من وجهها
حچت بـ عصبيه
تاره : أي ما أريدك و لا راح أريدك
مازن : طبچ ستين مرض
دفعه أيهم يسكت بي
و خطيه تاره ظلت ساكته بس دموعها تنزل
مازن : و هذا خطيبچ
خل يعرف وين تروحين و وين تجين
مو مبارك لبسج الحلقة و گعد
يفرح گلب أبوچ الگـ**** بـ الفلوس
هو مفرفح و أعصابه محترگه
و تاره ما تگدر تسكت
تاره : لا تحچي على بابااا
دفع أيهم و أتقدم عليها
دنك ألها يحچي
مازن : أكبر گـ**** أبوچ
ما يرضى بـ اليصون بنته
و الله لأن ما عنده أهل
الف الحمدلله و الشكر ما عندي
لو عندي واحد مثل أبوچ چان دفنته
تاره : لااا تحچي على أبووي
وگف أيهم يريد يدفع مازن
أيهم : مازن كافي راح أطيح حظك
دفع أيد أيهم و حچا
مازن : شوكت تفتهمين
أبوچ التدافعين أله بايعج مو يزوجج
أنطاني مهر يكسر الظهر و يدري بيه ما عندي
يوم واحد يوووم أنطاني ركضت بـ أيديه و رجليه
حتى ألم مهرج ما بقى واحد ما أنذليت أله
و من أجيت طلعت ست الحسن ما تريدني
تريد أبن عمها الگـ*** لأن يدفع مهر أكثر
نزلت دموعها تدحك أله ساكته
مُلاذ : كافي أيهم روحوا أنتوا
دحك ألها مازن و حچا
مازن : لو بعد روحي بيچ ما أريدچ
لو أعرف تخلص بنات الدنيا كلها
و تبقين بس أنتِ ما أخذج
عافها و راح و أيهم لحگه گلتلها ندخل
همزين محد يم المطعم و الدنيا صبح
چان انفضحنا ، دخلنا گعدنا جبت ألها مي
شربت و أيدها ترجف
مُلاذ : نفس اليوم يلي جاب بي المهر؟
هزت راسها بـ رفض و حچت
تاره : قبل بـ يوم
مُلاذ : تاره أحچي لـ مازن و الله يتفهمج
هزت راسها بـ رفض
تاره : ما أحچي أله لو يذبحوني
مُلاذ : زين أنا أحچي
تاره : أبد أبد الله يخليچ لا تحچين لـ أي أحد
نزلت دموعها گامت تبچي
و تحلفني ما أحچي
مُلاذ : تمام ما أحچي لا تخافين
بس ليش ما تريدين تحچين ؟ لازم هذا يتعاقب!
تاره : محد يصدگني و أذا حچيت لـ مازن
يكتله خلاص والله ما يبقي عايش
يعرف أذا تزوجنا يعرف
ما أريد يفكر بـ هالشي حتى
مُلاذ : ما يسوي شي أيهم يسيطر عليه
تاره : مُلاذ يمكن أيهم يسكت
يمكن غيره يسكت بس مازن لا
بس لأن أبن خالتي وصلني
و دفعني بـ الباب و هو شافنا كسر خشمه
شيسوي بـ أبن عمي لو يشنقه ما يرتاح
مُلاذ : زين شلون تاره؟
تتزوجين الشخص القذر يلي أذاچ
و تدحگين بـ وجهه كل يوم
و مجبوره تجيبين من عنده أطفال!
هزت راسها بـ رفض و حچت
تاره : ما أجيب أطفال
مُلاذ : شلون ما تجيبين؟
تاره : سويت عمليه بدون ما يدرون
مُلاذ : شنو ؟؟ شنو عملية شنو؟
تاره : حتى ما أجيب أطفال
وسعت عيوني عليها مصدومة
مُلاذ : تاااره!
تاره : أعرف غلط و تلوميني يمكن
بس هذا الشخص
مستحيل أخلي طفل ضحيه أله
عندي أستعداد أحرم روحي من الأطفال
و حرمتها بس في سبيل ما أجيب منه طفل
ظليت صافنه أدحك ألها
شويه و خليتها تگوم تغسل
خابرت على أيهم گال مازن يمه
نزلت تلفوني و سديت الأتصال
ظليت صافنه لحد ما شويه و راحت تاره
ما قبلت تاكل و ما طلبنا
خابرت أيهم يجي ياخذني
أجا صعدت بـ السيارة
أحس روحي مسحونه من عرفت لـ هاللحظه
نزلت دموعي تذكرت أسكندر شچان يسوي بيه
أنتبه ألي أيهم و وكف السيارة
نزلت أشم هوه أختنگت كلش
أيهم : مُلاذ شكو؟
شهگت و بچيت
رفعت أيدي أمسح دموعي و أحچي
مُلاذ : ليش دائماً يكرهونا بـ نفسنا
ليش لازم هم اليغلطون و أحنا الي نتحمل
أيهم : شكو مُلاذ منو وياچ؟
أتقدم عليه لازم وجهي بين أيديه
و عيونه واضح بيها خوفه
أيهم : شكو حاچيني منو ضوجج؟
منو أذاچ؟
سكتت أدحك أله ، حضنته
حضنني هو هم بس بقى يسأل
مُلاذ : أنقهرت على مازن و تاره
أهلها أذو مازن و أذوها
خلا أيده على خدي و باس گصتي
أيهم : لا تبچين
حضنني لـ صدره ساكت
شويه و صعدنا بـ السيارة
رجعنا لـ البيت ، ثاني يوم أيهم بـ الشغل
بس أنا و الأطفال بـ البيت
حضرت السفره ، گعدنا نريد نتغدى
غسل أبيل أيديه حتى يجي ياكل
خلا الماعين على السفره وياي گعدت و حچيت
مُلاذ : يلا حبيبي تعال أكل
قبل لا يروح يگعد بـ كرسيه
وگف ولم شعري شده أبتسمت
دنك باس شعري و راح لـ نيل سوه نفس الشي
أتوسعت أبتسامتي أتعلم من أيهم
كل ما نريد نگعد ناكل هيچ يسوي
و أبيل أتعود على هذا المنظر گام يسوي مثله
لـ الليل أيهم أجا ، حضنته و حچيت
مُلاذ : نيل من الصبح لسا تدور عليك
أيهم : حبيبة أبوها
مُلاذ : و أمها؟
أيهم : حبيبة رجلها
ضحكت و بست خده و هو أستغل الفرصه
أبتعد بسرعه لمن صحت لـ نيل و أبيل
أيهم : شكد فوصه!
ضحكت و هم أجو طياره عليه
باسهم و شال نيل أخذ أبيل
گعدوا گدام التلفزيون
صبيت عشا و گعدنا ناكل أحنا و أيهم
لمن خلصنا لميت الماعين
أيهم راد يغسلهم ما قبلت
مُلاذ : روح أرتاح أنت مبين تعبان
أيهم : أي و الله كلش تعبان
حاوط خصري ، حاوطت رگبته
و حچيت
مُلاذ : بـ رأيي تروح ترتاح
لأن الجهال راح يداهمونا و نتخزى
أيهم : امم أريد مرتي زين
دنك باس خدي
مُلاذ : ما طايره مرتك لتخاف
هياتها بـ المطبخ كل ما عجبك تشوفها تعال
أيهم : أريد أشوفها بـ الغرفه
ضحكت و دفعته
أنداريت أدفع بـ ظهره أطلعه من المطبخ
مُلاذ : روح مستهتر
أيهم : أنا أعلمچ فوصه
عافني و طلع و هو يضحك
كملت غسل الماعين و رحت لگيت أبيل گاعد
مُلاذ : شجاي تسوي حبيبي؟
أبيل : هسه راح أروح أفرش أسناني
و بس أقرالي قصة وحدة و أنام
مُلاذ : حلوه هذي القصص يلي تجيبهم
ينطوهم ألكم بـ المدرسه؟
هز راسه بـ قبول و حچا
أبيل : ننطي خمسميه و نشتريها
مُلاذ : كلش حلوات من تكبر نيل و تداوم وياك
هي هم تشتري هذي القصص و تتشاركون
هز راسه بـ حماس
بعدين راح أفرش أسنانه
مُلاذ : أذا كملت قصتك و ما نمت تعال يمنا
هز راسه بـ قبول ، دنگت بست شعره
رحت لـ الغرفة لگيت أيهم متمدد
يدحك بـ التلفون
مُلاذ : شدتسوي أم سوادي ؟
أيهم : تنتظرج حتى تكفشج من شعرج
ضحكتت و تمددت نمت على صدره
مُلاذ : أيهم نيل وين؟
رفعت راسي أدحك لـ جربايتها
أيهم : متمدده بـ جربايتها
تشرب حليب
مُلاذ : أهاا عبالي
ضحك و گال
أيهم : شعبالچ؟
مُلاذ : عبالي خليناها بـ الصاله
أيهم : وين ننساها هي بس عربدتها كافيه
و صوتها العالي و هي تدردم
مُلاذ : لك أيهم غير شلعت گلبي
ما تقبل تسبح و لا تمشط تدري وين ختلت؟
أيهم : ههههه وين؟
مُلاذ : بـ مالتك المكتب جوه الميز
و أنا ساعه أدور عليها خبلتني
أيهم : هاي انه من شفتچ أول مره
شردتي من أمچ ما تقبلين تسبحين
مُلاذ : ههههه أي هواي چنت أشرد
أكعد بـ الشارع و هي تلحگني
أيهم : و تحچين على نيل
زين من تگعد جوه ميز المكتب
و لا تگعد بـ الشارع
ضحكت و سندت عكس أيدي على المخده
رفعت راسي دحگت لـ أيهم و حچيت بـ حماس
مُلاذ : أيهم لو تدري شصار اليوم
أيهم : شصار؟
مُلاذ : أنت مو دائماً تلم شعري و شعر نيل
و تدنك تبوس شعرنا ؟
أيهم : أي
مُلاذ : أبيل يشوفك و متعلم منك
اليوم سوا نفس الشي لمن راح گعد ياكل
البارحه هم لگيته لم شعر نيل عبالي عادي
تالي طلعت نفس الحركه اللي تسويها أنت
أبتسم و حچا
أيهم : أبيل سبع السباع
مُلاذ : بس أيهم حباب
لا تخلي يشيل مسؤولية نيل من هسه
و توصي عليها ترا خطية صغير
أيهم : مُلاذ الولد مو نفس البنيه
نيل أگدر أعاملها بـ شكل رقيق لأن بنيه
هو ولد لازم يتعلم لازم من يكبر
يكون عنده شخصيته يعرف نفسه
و يعرف حدودة و الناس المسؤول عنهم
مُلاذ : بس مو هسه هو هم طفل
أيهم : طفل أعرف ، بس أذا ما أعلمه هسه
شوكت أعلمه بعد ، أذا الولد لنت وياه
و أنتظرته يكبر يبقى طول عمره ما عليه أعتماد
هسه شوفي من شايف تصرفاتي وياكم
گام يتصرف نفس الشي
مُلاذ : صح
أيهم : من أگله ديربالك على أختك
يفهمني شنو أقصد
نيل من تكبر هم راح أعلمها تدير بالها عليه
بس مو مثله هو مو مثل تصرفاته هو وياها
هي راح تكون حنينه عليه و هو حنون عليها
يخاف عليها و يحميها و تكون علاقته حلوه بيها
مُلاذ : دشوف رجلي فدوه شلون يعرف يربي
تعال خل أبوسك
ضحك و بسته ، أنطرقت باب الغرفة
أبتعدت عن أيهم و حچيت
مُلاذ : أدخل حبيبي
دخل أبيل و گال
أبيل : ضجت وحدي
مُلاذ : تعال يروحي
فتحت أيديه أله أجاني حضنني
راد ينام و هو شابگني و أيهم ما يخلي
أيهم : ولك مرتي
أبيل : مااااا أريد الحلوه
أيهم : ولك
أبيل : روح نام يم نيل
متت من الضحك
و ثنينهم حاضنيني ما يقبلون يهدوني
و كملت السبحه لمن نيل شافتنا
گامت تبچي تريد تجي يمنا جابها أيهم و أجا
أيهم : وخر عن مرتي ولك
أبيل : ماااا روح يم نيل
أيهم : أنت و نيل روحوا و عوفولي مرتي
مُلاذ : هسه دعوف الطفل
نوب حتى نيل گامت تريد تحضنني
و تدفع بيهم تحضني و أيهم يشيلها يوخرها
متت من الضحك و يوخر بـ أبيل ترجع نيل
يوخر بـ نيل يرجع أبيل
أيهم : أشتعل أبوكم
ضحكت و حچيت
مُلاذ : تعالوا نسوي معادله
نمت بـ النص
أبيل نايم من جهه حاضنني
مُلاذ : أيهم نوم نيل على صدري
شال نيل نومها على صدري
ضحكت و حچيت
مُلاذ : و أنت تعال منا
أيهم : حبيت هالمعادله
ضحكت و هو نام من الجهه الثانيه
ميته من الضحك و مطحوله
بس راس أيهم بگد نيل بـ كبرها
و نوب أبيل يدفع أيده و هو يدفع أيد أبيل
رفع أصبعه و حچا
أيهم : أذا ما ألگالك مره و أزوجك
أبيل : ههههه أنام يم الحلوه
طلع لسانه لـ أيهم يعيب عليه
أيهم : تربايه سز
ضحكت و حچيت
مُلاذ : ما أزوج أبني
أيهم : بكيفج هيَ خل الگاله مره و سهله
ضحكت و نيل ترفع راسها تدحك النا
و تضحك و ترجع تنزل راسها
رفعت راسها تدنت على وجهي
حركت أرنبة خشمها على خدي
و أنا سويت ألها نفس الشي
أيهم : نفس الحركه يلي تحبيها
و چنت أسويها ألچ !
هزيت راسي بـ قبول مبتسمه
لحد ما غفو و أنا أنطحلت
شال أيهم نيل خلاها بـ جربايتها
و أبيل نومنا يمنا ، بعدين لمن نمنا
بعد كم يوم دزت الي سلوى
گالتلي أسد رح يخطبها بـ هالايام
و أنا أول يلي حضروا خطوبتها
بعدين سوو عرسهم ما حضرت كل العرس
لأن نيل مريضة و تعبانه بـ يومها
بس باركت ألهم
أنطيت لـ سلوى هديتي و رجعت
مرت الأيام و أنا كل يوم
يزيد شعور الأمتنان بـ داخلي
أحس حياتي أخيراً أستقرت
خابرني أمي و ملاك و أصرن أروح ألهن
لأن مشتاقات ألي و يريدن يشوفني
و أنا ما ألي خلك تعبانه أيهم ما قبل أخذ نيل
رحت وحدي گعدت وياهم و أكلنا و خلصنا
ملاك خايفه من الولاده ، گعدنا نحاجيها
لـ المغرب ، أيهم خابرني يسأل شوكت أرجع
مُلاذ : هسه جايه بـ الطريق
أيهم : أنتبهي و من أخابرچ جاوبي
مُلاذ : تمام
نزلت تلفوني و سديت الأتصال
نزلت لـ محل أشتريت لـ الجهال حلويات
أيهم كل شويه يتصل خبلني
و عصب لأن تأخرت و الدنيا ليل و أنا طالعه
رجعت لـ البيت ، فتحت الباب بـ المفتاح و دخلت
دحگت لـ البيت أظلم ، عگدت حواجبي بـ أستغراب
مُلاذ : أيهم
مشيت لـ الصاله يجي منها ضوه خفيف
دخلت الصاله ، وگفت و دحگت بـ أستغراب
شموع و كيك و زينه ، رفعت عيني لـ أيهم
الي أتقدم ناحيتي حچيت بـ أستغراب
مُلاذ : شكو؟
أيهم : ماكو شي بس ردت نحتفل
مُلاذ : بـ شنو؟
أيهم : بـ عيد ميلادج
عگدت حواجبي مستغربه فتحت تلفوني
دحگت التاريخ مو تاريخ عيد ميلادي
مُلاذ : بس أنا اليوم مو عيد ميلادي؟
حاوط بـ أيديه خصري
هز راسه بـ قبول و حچا
أيهم : دورت هواي على سبب أحتفل بيچ علموده
و ما لگيت سبب غير اليوم الي أنولدتي بي
أفضل تاريخ عندي لأن أنتِ أجيتي لـ هالدنيا
ضحكت و حچيت
مُلاذ : زين أنت ليش تريد تحتفل ؟
أيهم : أرجعلج مفاجأتج
أبتسمت أدحك أله
مُلاذ : شدعوه هلگد أنت رومانسي
ترا هالسوالف شايفتها بس بالافلام
يلي تتابعهم ملاك
دنك باس حنچي و حچا
أيهم : أريد أقدم ألچ أفضل شي من كل شي
و لحظات ما تنسيها
بست خده و حچيت بـ أستغراب
مُلاذ : الجهال وين؟
أيهم : بح
مُلاذ : ههههه شنو بح؟
أيهم : زوجت أبيل و نيل هجت
ضحكت من كل گلبي
مُلاذ : لك أيهم شبيك وي الطفل
أيهم : ألا أزوجه
مُلاذ : هههههه ، صدك الجهال وينهم؟
أيهم : يم هتان
مُلاذ : شيسوون يم هتان؟
أيهم : يشيبون راس جسار و يجون
اهتز جسمي أضحك
مُلاذ : أستغليت الفرصه يعني
گلت لَـذه ما موجودة و أگعد أسوي حفلات
خاف رتبت البيت و ردت تعزم نسوان و ما لحگت
و گبل گلتلي علمودج
رفع راسه و ضحك
أيهم : حرامات وصلن لـ نص الطريق و رجعن
كرصت زنده و هو يضحك
أيهم : هو انه أتفقت وي أهلچ حتى تروحين
مُلاذ : يا ولكم أنتوا شنو؟
أيهم : عصابات لطيفه
مُلاذ : أويلي شوف رئيس العصابه شلون حلو
أيهم : مرته تشك شك
مُلاذ : كافي لحينا جعت خل ناكل
أيهم : بس انه ما أريد اكل كيك
مُلاذ : لعد ؟
دحك ألي بـ نظرات ضربت جتفه و دفعته
حجيت خازرته و حاصره ضحكتي
مُلاذ : تأدب
ضحك و أنا ضحكت
من كل عقله وگف يغني ألي
لو يشغل أغاني نفخت الشمعه
و قطعنا الكيكه سوه
مُلاذ : أيهم هاي لو مُلاذ القديمه
چان دخلت راسك بـ الكيكه
أيهم : مُلاذ الفوصه مو القديمه
ضحكت و گعدنا ناكل
مُلاذ : و الله هالسوالف غريبه عليه
الرومانسيه بـ وادي و أنا بـ وادي
أيهم : أشبعچ رومانسية أطلعها من خشمچ
مُلاذ : شعندك غيري يا حبيبي
أيهم : انه أدري أحبل أجيب
مُلاذ : ههههههه
خلصت أكل و لمينا الصاله
گعد على القنفه و أنا گعدت على رجليه
لم رجليه حاضن وجهي لـ رگبته و يبوس خدي
حرك أرنبة خشمه على خدي
خليت أيديه على خده ، دحگت أله
رفعت نفسي گعدت عدل و أنا بـ حضنه
رفع أيده لـ شعري يبعده عن وجهي ، حچيت
مُلاذ : أيهم
أيهم : روحه
مُلاذ : أنا مو جَـرح ؟
هز راسه بـ قبول
أيهم : بس جَـرح كلش حلو
أبتسمت و حچيت
و أنا مخليه أيدي على صدره
مُلاذ : شنو رأيك نعافي هالجرح
ما دام صرنا سويه و حياتنا أستقرت
أيهم : بس أنتِ تعافين هالجَرح
فتحت قميصه و دنكت
بست حرفي يلي بـ صدره
خليت راسي على متنه ضحكت و حچيت
مُلاذ : أتعافى ؟
هز راسه بـ قبول و ضحك
مُلاذ : يلا سميني غير أسم لعد
بس بي جَـرح
دنك سند گصته على گصتي و حچا
أيهم : لَـذة الأيهم أنتِ جَـرحي المتعافي
أبتسمت أبتسامة واسعه ، قرب وجه ألي
طبع على شفايفي بوسه عميقه
تعبر عن لهفتنا لـ بعض
يلي راح تبقى نفسها منا لـ بعد سنين ...
أستمرت حياتنا بـ هذا الشكل اللطيف
يلي بـ حياتي ما چنت متوقعته
ما چنت متخيلة يجي يوم و أحب شخص
لـ درجة أهيم بي و أحبه بـ كل جروحي
أساساً ما چنت متوقعه شخص مثل أيهم يحبني
كل شي بدء بـ وجع و تعب و قهر و مسؤولية
أنتهى بـ فخر و حُب و حنية و مسانده و مواساة
أتمنيت لو حبنا هذا أنا و أيهم عشنا
بدون الخسارات يلي قدمناها
بدون الأرواح يلي هشمت گلبنا و كسرتنا
أو يمكن لو ما كل هالخسارات
ما چان حبينا بعض لـ هاي الدرجة
أنظلمنا ثنينا بـ وسط حياة مصممة تجمعنا
بـ أي شكل من الأشكال و بـ كل الطرق
و أجتمعنا بعد ألف معاناة
الأنسانه يلي چانت دائماً عصبية متسلطه
ما يهمها أحد ، متسرعه ، مجروحه ، مصدومة
تغيرت اليوم هواي نضجت و كبرت و أتعلمت
مو كل الحياة لازم تكون سوده و ظلمة
يمكن أكو بصيص من النور لو دورناه نلگاه
و هذا النور هو أيهم و أطفالي و أهلي بـ حياتي
المحاماة تركتها لـ الأبد رغم أشتاق لـ أيامها
أشتاق أدخل المحكمه و أطلع منها بـ كل فخر
و بـ أيدي قرار ربح القضية لـ صالح موكلي
لكن ما گدرت أكمل بعد ما خلفت بـ حلفاني
و ما ألوم أيهم أبداً
لكن هالشي يخص مبادئي و قوانيني
بـ الاضافه ألى أنهُ تعبت هواي و أريد أرتاح
ما أريد شي غير هذا الهدوء الآمن و الحب
تاره تزوجت أبن عمها
مازن ما أتحمل و ما گدر يبقى هنا و سافر
سلوى و أسد عن قريب رح يصير عدهم طفل
و الباقين مكملين حياتهم
من وين ما أتوقفوا مثل ما سوينا أنا و الأيهم
أتمنى من كل شخص تعب بيكم و عانى
يتأكد يجي يوم رب العالمين
يفرحه فرحه ما توسع السماء و الأرض
ما جنت أؤمن بـ المعجزات و شفاء الروح
لحد ما أنخلقت معجزتي گدامي على هيئة بشر .
تگدرون ترسلون لـ أيلان
أي رسائل أو كلام يخطر بـ بالكم توجهونه ألي
و هي راح ترسله ألي و تشارككم ردي
لـ هنا أحب أودعكم و أنا أتمنى ألكم كل الخير
و السعاده و الحُب و التوفيق بـ حياتكم ♡︎ .
- مُلاذ ألياس .
*************************
"الجُٰـرح الـمُـعافى {النهاية}"
*************************
- يتبع الفصل التالي اضغط على ( رواية جرح الأيهم ) اسم الرواية