رواية جرح الأيهم الفصل الثامن 8 - بقلم أيلان
"الجُــرح الثامن"
"شكد ايام مرت وانتَ ما موجود
باب البيت افتحه والكبر مسدود
يادفان كله يرد ردود
عميانه على زينين عيني"
نور :-
دخلت للصالة
من بعد ما غسلت الماعين
اخذت جهازي الي اشترتليا بيبي
كعدت يم عزيز يعلمني استخدمة
و انا ادحك ويا عزيز
بيبي دحگت لـ ابوي و گالت
بيبي : حمَيد كوم اخذني لـ هذا المحل
يبيع دشاديش اريدن اشتريلي وحدة
احمد : يمه شيطلعني بهذا الليل؟
بيبي : دهر طرك اليسمعك يكول موديتك للهند
هو هاذ ويا براس الشارع ماكدر امشي
جدامي توجعني
امي : اي صدك انا هم شفتهم
خل نروحلهم نشتري بسرعة و نرجع
منارس : اي يلا كلنا نروح
نور : لا عمه انا ماكدر اطلع
اريد انظف غرفتي و اكعد ادرس
منارس : چا شلون عمه تبقين وحدج؟
نور : هو قريب غير ؟
روحوا و ارجعوا ما عليه شي
و عزوز يمي اصلاً
دحگوا بيبي و عمتي لـ بعض
و هزوا راسهم بقبول
لبسوا عباياتهم
و طلعوا ويا ابوي بالسيارة للمحل
بقيت بس انا و عزيز
كعدت انظف غرفتي و امسحها
فززني من صفنتي صوت عزيز
عزيز : نويره
عفت المكناسة من ايدي
و فتحت باب الغرفة
نور : ها عزوز
دحگتله التلفون على اذانه
و يضحك التفتت دحگلي
عزيز : انا رايح اجيب منا لبلبي
نور : تمام
مشى متجهه لباب المطبخ
و اسمعه يحجي بالتلفون
عزيز : لا لا ههه غير ما يكدرون بدوني
انا النادر مال بيت و عيونج
اي بعد شهر اشتريلي احدث موديل سيارة
ههه اي ابويه يگلي فدوة الك الفلوس ..
ضحكت و رجعت للغرفة
و عزوز طلع ، بقيت وحدي
اندكت باب البيت
حطيت شال على راسي
و لبست جبة فوك ملابسي
طلعت وكفت ورا الباب
نور : منو؟
اركان : انا
فتحت الباب مديت راسي دحگتله
اركان : امي رادت خبز
رحت ع الفرن و طلع معزل
نور : تمام دقيقة اجيبلك خبز
انداريت دخلت لجوا بسرعة
اخذت كرص خبز و طلعت انطيتهيا
اركان : هههه لسا ما متعشين
تتسجل بميزان حسناتج
ابتسمت : لا ما سويت شي
التفتت على صوت عالي فززني
اسكندر : نورررر
دحگتله شلون خازرني
بسرعة ارتبكت و تراجعت لورا
اتقدم ناحيتنا بخطوات سريعة
بدا يصيح علينا بالشارع
و يتسائل شنسوي واكفين
بلا ما يفهم اي شي ضرب اركان
رجع ضربني
دحگت للجيران يلي طلعوا من بيوتهم
مستغربين على اثر صوت الصياح
لزم اركان اسكندر
و صرخ عليه
اركان : نور ادخلييي جوه
هزيت راسي برفض
رجع عاط بيه : ادخليييي بسرعة شارب هذذذا
دحگت لـ اسكندر يلي عيونه ناطة
درت وجهي و ركضت دخلت جوا
سديت باب الغرفة على نفسي و قفلته
اخذت تلفوني بسرعة ابجي و ارجف
و اسمع اصوات الصياح من الشارع
فجاه صارت ضربة باب بيتنا قوية
اتصلت على اهلي كلهم بس محد يجاوب
رجعت اتصل على عزوز يطلع مشغول
اجاني صوت صياح اسكندر بأسمي بعصبية
ابجي و اناشغ ، ايدي ترجف طيحت التلفون
و بسرعة اخذته مرة ثانية
اتصلت على اهلي اكثر من مرة محد يجاوب
و اسكندر يدك الباب حيل و يتوعدلي
رحت على رقم مُلاذ اتصلت عليها
احسب عدد الرنات
بالرنه الثالثة جاوبت
مُلاذ : ها نويرة
نور : مُلاذ الحگيلي ..
مُلاذ :-
كمت من مكاني
عدلت كعدتي بـ توتر من صوتها
مُلاذ : نورر!!
شهكت تبجي بحرگه
و اسمع اصوات عالية تصدر من يمها
مُلاذ : نوررر شصايررر؟؟
نور : مُلاذ اسكندررر
مُلاذ : شبي صخام
لج نور احجي فتيتي لـ گلبي
نور : شافني انا و اركان
و يريدد يضربني مُلاذ الحكيلي محد بالبيت
اهلي ماجاي يردووون
اسكندر شارب فدوة الحگيلي
اتصادر لـ مسامعي صوت ضربه قوية
و توالى الضربة ، صرخة نور
فز گلبي ، كمت من مكاني
اتجهت خارج البيت اركض
تحت تساؤلات امي
و محاولاتي اوصل لصوت نور
و اخليها وياي ع الخط
ركبت السيارة ، شغلتها
طلعت لـ بيت عمي ابو نور
بيتهم بعيد عنا
و انا بس اسمع صوت عياط
كلشي ما افهم من الصوت
كل مره يصير ابعد و ينعدم وضوحه
لحد ما انغلق الاتصال تماماً
خفت ، بقيت اتصل بس ماكو جواب
و انا بالطريق استوقفتني سيطرة
ظل ياخذ و ينطي ليش طالعة هالوقت
و اريد مستمسكات السيارة
و انا طلعت و عايفتهم بالبيت
السيارة مسجلة بـ اسم بيبي
حاولت اتفاهم ويا
بس ما سمعني راح ، صاح الضابط
مُلاذ : عندي شغلة عاجلة
اضطريت اطلع بسرعة
و الاوراق نسيتهم بالبيت
و السيارة مسجلة بـ اسم بيبيتي بس هي الي
- شنو الي يأكد الي السيارة مو مسروقه؟
مُلاذ : و انا بحالة اسرق سيارة؟
خزرني
رفع ايدة يأشرعلى اتجاهه معين
- اطبكي على صفحة و انزلي
غمضت عيوني بنفاذ صبر
اتذكرت ضرغام ، فتحت الجهاز
رحت ادور على رقمة بسرعة
لكيت الرقم و هذا واكف يصيح
-اطبكيي گلت!
مُلاذ : انطينيي دقيقة وحدة
رن التلفون
انفتح الخط بعد ثواني
مُلاذ : الو
ضرغام : اهلاً منو؟
مُلاذ : وياي الضابط ضرغام؟
ضرغام : نعم ، منو يلي ديتصل؟
مُلاذ : مُلاذ انا
سكت ثواني ، اسمع حركه يمه
كال بـ استغراب
ضرغام : مُلاذ ؟
مُلاذ : اي
ضرغام : خو ما صاير شي ؟
مُلاذ : سيدي عندي وضع عاجل
اضطريت اطلع من البيت
و نسيت اوراقي مال سيارة بالبيت
و هسه مستوقفيني السيطره و مديخلوني اعبر
ضرغام : تمام اهدئي ، انطيني ياهوه اليمج
مُلاذ : تمام
مديت الجهاز للضابط
الضباط بعده ما اخذ الجهاز
اجا ولد يركض شفته بالمراية
مبين عمرة ١٣ او ١٤
حاجا الضابط يلي كدامي ، انطاه ورقة
الشرطة يلي بجانب الضابط
بسرعة رفعوا اسلحتهم ناحية الولد
تراجع بخطواته ، نظراته تدل على الخوف
دحك الضابط للورقة
و امر الشرطة ينزلون اسلحتهم
ضرغام يحجي بالجهاز و الجهاز بايدي
دحك الضابط لـ جهة من الجهات
كأنو يدور على شي ،
و هو يدحك ثبت عيونه على مكان
هز راسه بموافقة
مديت راسي ادحك ويا
ماكدر اشوف شي
رفع ايده ، حطها على صدرة
حرك راسه بامتنان
مع رسمة ابتسامة على اطراف شفته
التفت دحگلي
اخذ الجهاز من ايدي
الضابط : اهلاً سيدي
انا الضابط محمد عبد المحسن
الضابط : انحلت سيدي ، وصلتني ورقة
من شخص صاحب فضل عليه
هاهيه سيدي انحلت
ثواني و مد الي التلفون
حرك الي بايدة بمعنى روحي
مكدرت ادحك منو يلي دز الورقة
حتى من دحكت بالمراية ما شفته
تاخرت على نور كلش
حركت السيارة
رحت الها باقصى سرعة
دحگت لـ اتصالات امي المتتالية
ما اكدر اجاوب ، گوه مسيطرة اسوق
كل ذرة بجسمي ترجف من خوفي على نور
اول ما وصلت
وكفت السيارة و نزلت اركض
دحكت للجيران المتجمعين كدام الباب
صوت الصريخ العالي يلي يطلع من البيت
فتت من بينهم ، ادك الباب حيل و كل قوتي
دحگت لـ اركان الي يضرب الباب بعكازته
و يحاول يكسرها و امه مكمشة بي
مُلاذ : اركااان
دحگلي بسرعة و نطق بخوف
اركان : لج راح يموتهااا
ما مسوية شي هي يالكائنات ما مسوية
مُلاذ : اركان رح اطفر ، ساعدني
كمشت بمحجر الباب
اركان صعد رجلي على كتفة
و الباقين التموا يساعدوني اطفر
دحگت للكاع بعيدة عني
لان الباب شوي عالي
ما عندي شك اذا كمزت اتكسر
بس لازم اطفر ، طفرت طحت بالكاع
انضربت بايدي صرخت بوجع
اركان : مُلاذ شصارر؟
كمشت بالباب
رفعت روحي فتحت الباب
دخل اركان بسرعة
ايدي موتتني من الوجع
تجاهلت الألم ، اتجهت اركض ناحية الباب
فتحت باب المطبخ
مُلاذ : نووور
اجاني صوتها من غرفتها
دخلنا نركض انا و اركان
الجيران اتجمعوا بالطرمة
دحگت لـ نور يلي تصارع جوا ايد اسكندر
شابعها ضرب وجهها عبارة عن دم
جر اركان اسكندر من نور ، ضربه على وجهه
بايد كامش بالعكازه ، بالايد الثانية يضرب اسكندر
جريت نور ناحيتي بسرعة ، سندتها عليه
رفعناها انا و النسوان
طلعت اركض بيها للحمام اغسل وجهها
ماكو منتهيه ، ذرة نفس ما باقية بيها
طلعتها من الحمام اجر بيها جر
و هي فاقده الوعي
دحگت للغرفة
اسكندر و اركان يتضاربون
اسكندر هجم على اركان
صار يضربة بكل قوته
الزلم ملتمة عليهم و يحاولون يفكونهم
كل عقلي وي نور
نزلت حطيت راسي على گلبها ينبض
بس هي فاقدة الوعي ، اتنفست براحة
رفعت راسي
طلع اسكندر من الغرفة مثل الثور
اجا ناحيتها يركض يريد ياذيها بعد
دحگت لـ رجل اركان الممدوه
مبينه من الباب
و يصرخ بصوت عالي على الزلم
اركان : لا تخلونه يوصلهاا
النسوان يصرخن
الزلم يردون يلزمونه
من حرگة دمي نزعت حذائي
وضربته بيها و صرخت
مُلاذ : حيوووووان تريددد تموتهاا؟؟
شتريد من عدها افتهم منها على الاااقل
اهلك الما عرفوا يربونك ويييين؟؟
فتح عيونه بوسع ، خزرني
اتقدم عليه بسرعة
رفعني من نور ، صار فوكاي خنكني
عيونه نطت مثل المخبل صار
بي ريحة قذرة مال شرب
اختنكت من ايدة و قبضتها على رگبتي
النسوان يتوسلن بي يفكني
فجأه سمعنا صوت عالي
دحكت لـ اهل اسكندر واكفين بالباب
و بيبي و عمة منارس وياهم
ركض ابو اسكندر و عزيز
يوخرون اسكندرمن فوكاي
بيبي فجأه اغمى عليها و هي بالباب من المنظر
و ام اسكندر صارت تدك على صدرها
كحيت شحطانه رفعوا اسكندر عني
سحبوا لـ برا
كمت من مكاني بسرعة
اضرب نور راجديات خفيفة
بس احاول اصحيها
دخل عزيز مره ثانية
متخبل و ما مفتهم الصاير
عزيز : شصايرررر هنا شكوو؟؟؟
كمت مكاني
احاول اشيل نور ماكدر
بَعدني عزيز عنها و شالها
اخذها لغرفته حطها على الجرباية
طلع الكل برا الغرفة
بقينا بس انا وياه و عمة منارس و بيبي
جبت مي امسح على وجهه نور و بيبي
عزيز : شصاير ولج كليلي شصااااير
مو رح اتخبل حاجينيي
مُلاذ : ما ادريي ما ادري
اتصلت عليه نور تبجي
تكول اسكندر يريد ياذيها
لان شايفها واكفه بالباب تحاجي اركان
و عباله بيناتهم شيي
دحگلي بسرعة مستغرب
و موسع عيونه گبل كملت قبل لا يحجي
مُلاذ : عزيز بالله العظيم
اذا حكمت بلا ما نفهم السالفة منها و من اركان
هسه اروح اشتكي عليكم
و خل يفيدكم ظنكم باختكم
منارس : يمه سودة عليه سودة بوجهي
شلون طلعنا و عفناها وحدها
مُلاذ : وييين جنتو انتوا وييين؟
شلون تعوفونها وحدها ويا هذا الحيوووان
لو ما لاحكه انا جان موتهاااا جان قتلها
و انا حجي اتذكرت اركان
فزيت بسرعة التفتت لـ عزيز
مُلاذ : عزيززز اركان عزيز ، اسكندر ضربه
طلع بسرعة من يمنا ، راح يشوفه
كعدت بيبي و عمتي تفرك بايدها
وتهديها انطتها مي و حبايه
الجوارين رايحين قسم منهم
دخلت ام نور تسأل شصاير
مجاوبت اي شي
رحت ورا عزيز سندنا اركان
رفعنا عن الكاع ، حاجبه ينزف
لزمه واحد من الزلم ، اخذوا يغسلون اله
اسكندر مطلعينه ما عرفت بعد وين راح
رجعت يم نور ، انفتح الباب بهمجية و بسرعة
شفت احمد (ابو نور) واكف
يدحك لـ نور بعصبية
اتقدم خطوة كمنا
انا و بيبي و عمة منارس وكفنا كدامة
مُلاذ : نور ما توصل الها
ابنك شارب و جاي و ما مفتهم اي شي
ما تكدر تحكم قبل لا تسمعهم
ما تكدر تحكم عليهم من كلام واحد سكيرر
التفتت لـ بيبي
مُلاذ : بيبي احجي شيي
بيبي هددت عمي
اذا تقرب لـ نور و حاول ياذيها قبل لا تكعد
رح تتبرى من عنده و تطردة من البيت
لذالك اندار و طلع من الغرفة
بلا ميفتح حلكة بكلمة
اتذكرت امي ، طلعت للسيارة
اخذت تلفوني و رجعت
اتصلت عليها ، سولفتلها الصاير
جانت رايدة تجي بس ما خليتها
گلتلها تظل يم ملاك
و انا بعد شوي راح ارجع للبيت
فتحت عيونها نور
تدحگلنا باستغراب ، فوراً صرخت بألم
بعد ما لمست وجهها بطرف اصبعها
جان عبارة عن كدمات
تمنيت اروح اشتكي على اسكندر
لكن ما يصيرلة شي ويطلع منها
مثل الشعرة من العجين
دخل ابو نور للغرفة
بعد ما صاحته امها
بجت و حجت بصعوبة
نور : بابا و الله ما سويت شي
اركان طلب من عدنا خبز
انا طلعت انطي اجا اسكندر و شافنا
ضرب اركان و دخلني للبيت يريد يضربني
بس اركان لزمة بابا و الله ما سويت شي انا و لا هوه
-عزيززز وين عزيز ليش ما طلع ؟؟
نور : بابا راح
بلعت ريكها ما تكدر تكمل
دخل عزيز و كمل
عزيز : انا طلعت اشتري من هذا الرجال
دحگلها ابوها ساكت
عزيز يدحك لـ نور
نظراته تبين شكد هو يلوم روحك
تقرب ، باس راسها
اما ام نور جانت كل نظرات الشك بعيونها
و تتوضح نظراتها عن بُعد الف متر
جابوا اركان ، سندنا نور
لبسناها عبايتها و شالها و طلعناها للصاله
راد ابو نور يتاكد من كلام اركان كدام نور
و اهل اركان موجودين
دحگت لـ اركان و نور
شلون يدحگون لـ بعض
بنظرات مكسورة ..
نزلت نور عينها بسرعة ، دمعت
اركان ميل راسه يدحگلها
انگلب وجهه صار احمر دم
عكد حواجبه و نزل راسه فرك كصته حيل
رجع رفع راسه ، بلع ريكه دحك لـ نور
اركان : الله بالخير عليكم
جاوبوا : الله بالخير و العافية
اركان : كل الي صار سوء تفاهم
انا اجيت اطلب منكم خبز و بتكم طلعت انطتني
اسكندر اجا شافنا و اخذها يضربها و ضربني
ظلوا ساكتين متفشلين من عنده
كمش بعكازته و كام وكف
اركان : و انا لو ما الحجية
و حق لا اله الا الله تلكون ابنكم بالسجون
بس انا لخاطر الحجية راح اسكت
اركان : خل نكول ما تعرفوني انا
بس تعرفون بنتكم شنو
ما فد يوم شفنا عليها عيبه
اركان : لـ اجل شنو كل هذا الضرب ؟
لـ اجل شنو كل هاي الهمجية ؟ و بلا ما يفتهم شي
قدروا بنتكم ترا بس اليفقد يعرف قيمة الشي
انا فقدت اختي و كلكم تدرون
و هسه انا عايش بذكراها ملچوم گلب عليها
اتحسر على كل ثانية ما كضيتها وياها
دحگت لعزيز دمعن عيونه
و صار يمسح بيهن بسرعة
و كلهم نظرات الكسرة بعيونهم
اركان عيونه غوركت و نور تدمع
حط ايده على صدرة
اركان : اعذروني سببتلكم مشكلة بهذا الليل
بس الاعرفة ما جان غلطي
غلط ابنكم هذا ، في امان الله
دحك لـ نور و هي منزله عيونها
اشرلي بمعنى انتبهي عليها
هزيت راسي ، طلعوا
و اهل نور طلعوا ورا اركان يتعذرون منه
دخلوا كلهم لجوا
سندت نور عليه و دخلتها لغرفتها
كعدت على الجرباية تبجي بحرگه
كمشت ايدها امسح عليها و امسح على شعرها
مُلاذ : نور دحگي راح الم ملابسج و اخذج وياي
نور : وين ؟
مُلاذ : لـ بيتنا ابقي هناك كم يوم
نور : ما اريد مُلاذ ما يقبلون
مُلاذ : لا هسه احاجي بيبي
غصباً عليهم يقبلون ، زين عيني ؟
نزلت راسها تبجي بسكته
رفعت راسها من فكها و دحگتلها
مُلاذ : لا تضعفين نور انا موجودة
راح الم ملابسج و شوكت ما تريدين ترجعين ارجعي
نور : ضربوا و هو ماله ذنب
بست كصتها
همست يم اذنها اهديها : محد اله ذنب بيكم
ذنب اسكندر هذا ، كافي لا تبجين هسه اجيج
رحت على بيبي بسرعة و هي كاعده يمهم
رغم دمعتها بعينها و تتحسب على اسكندر
لَكن لعبت بيهم لعب و استلمتهم بالرزايل
فوخت گلبي بيهم ، وكفت يمها دنكت و شاورتها
گلتلها اريد اخذ نور وياي
دحگتلي و هزت راسها
بيبي : انا هم جايه وياها
مُلاذ : تمام
دخلت لـ غرفة نور
اسمع اصوات الصياح من الصالة
و اعتراضهم على روحة نور وياي
بس بيبي سكتتهم بالشتايم و الغلط
بيبي : بيكم خير ما تخلون الخرنكعي ذاك يضربها
اكسر رجليه الي يجي ورانا
شكم يوم و نرجع ، حسكم ما اسمعه
لمينا غراضها
و ملابس بيبي و عمة منارس
اخذتهن و طلعت وصلت للباب
وكفت مرة عمي تتحسب عليه و تغلط
ضربها عمي لان بالشارع و تصيح
عبرتهم ، طلعت ماخذة اهلي وياي
حطيت غراضهم بالسيارة و صعدوا
اتصلت على امي كلتلها جايين
حتى تحظر فراشهم و سديته
التفتت لـ بيبي
مُلاذ : شتتعشون؟ اجيبلكم عشا؟
بيبي : لا متعشين يمه
مُلاذ : اكيد؟
بيبي : ادبسز شني اجذب عليج؟
ابتسمت تك خد
دحگت للمراية الي بجهة السايق
نور دموعها تصب ساندة راسها على الكشن
رجعت ادحك للطريق ، ساكته
وصلنا للبيت ، نزلت نور ساندتها عليه
اول مدخلنا امي بدت ترحب بيهم
مشمش بوست بيبي و عمتي
لمن شافوا نور و حالتها شهكوا مصدومين
و نظرات القهر عليها بعيونهم
لان يحبون نور كلش و ما توقعوا يشوفوها هيج
طلبت نور ملابس و خاولي ، انطيتها
دخلت تسبح
امي و بيبي و عمتي كعدن بالغرفة
دخلت كعدت يمهن
فيروز : سودة عليه شصاير بيها المكروده
بيبي : الله يغضب عليك اسكندر
شلون تسوي هيج بـ اخيتك
حطت شيلتها على عيونها تبجي
عمة منارس تدمع و ترجف
ملاك : و الله نور حبابة
ليش يسوون بيها هيج
مُلاذ : ساقطين و سفلة و طايحين حظ
الله حط يمهم نور حتى تهديهم
بس هم مجلوبين
دحگتلي امي و خزرتني : مُلاذ
مُلاذ : قابل جذب؟؟
فيروز : لسانج لا تحجين هيج كدام اختج
مُلاذ : عاد اختي اول مرة تسمعني
كمت من يمهم
رحت للحمام دكيت الباب على نور
مُلاذ : نور تحتاجين شي؟
اجاني صوتها مشحرج : لا
هزيت راسي و ابتعدت
رحت لغرفتي دخلت
لكيت امي فارشتها و معطرتها
طلعت من الغرفة
و رجعت يمهم
اجت امي جايبة جاي وقدمته الهم
انفتح باب الحمام
نور : مُلاذ
رحتلها بسرعة
لكيتها مكمشة بالحايط و واكفة
مُلاذ : خو ماكو شي ؟
نور دحگيلي اخذج للمستشفى؟
نور : لا ، لا بس دايخة كلش
فدوة اريد اروح للغرفة
سندتها عليه اخذتها لغرفتي
كعدت على الجرباية
انطيتها مشط ، دخلت ملاك يمنا
بوستها و سلمت عليها
بس نور جانت جداً تعبانة
لذالك اكتفت بالابتسامة
دحگت لـ نور بايدها المشط و صافنة
وكفت يمها ، حركت بعيوني لملاك حتى تطلع
دارت وجهها و طلعت ، حمحمت
مُلاذ : امشطلج شعرج؟
انطتني المشط بلا ما تحجي شي
وكفت امشط شعرها ، وجهها للشباك ، ساكتة
مشطت شعرها ، فجأه صارت تغص بـ بجيها
ظليت ساكته منطقت حرف
فقط قدمتلها كاسة مي ، بس ما شربتها
ابتعدت بهدوء ، تركت الكاسة على الطاولة
رجعت امشط شعرها ، ظفرته
ما ردت ازعجها ابداً
تركتها تفرغ يلي بكلبها بالطريقة يلي تريدها
بين كل دقيقة و دقيقة
امسح على ظهرها
و امنحها شعور وجودي وياها
طلعت من الغرفة
رحت لـ امي ، فزوا من شافوني
ظنوا بيها شي
حكيت كصتي ما اعرف اطلب هيج طلب
مُلاذ : يمه .. احضني نور
عكدت حواجبها باستفهام
حاولت اشرح و انا اتشبت
مُلاذ : انا ماكدر احضنها
ما اعرف ، يمكن اذا احد حضنها
تتواسى ما اعرف بس احضنيها
تحتاج احد يحضنها
عفتهم صافنين
طلعت من الغرفة
رجعت يم نور ، لميت رجلية لصدري ساكتة
دخلت امي الغرفة ، فزت نور دحگتلها
رادت تمسح دموعها ، استوقفتها امي
تقربت امي لـ نور بهدوء ، جرتها لحضنها
بجت نور بصوت عالي تناشغ و تتغصغص
و انا كاعدة بالزاوية ادحگلهم
دحگتلي امي مدتلي ايدها بمعنى "تعالي"
هزيت راسي برفض
بقيت كاعدة بمكاني
درت وجهي للجهه الثانية
حتى لا ادحگلهم
بقت امي تهدي بـ نور
و نور تشكي الها و امي تمسح على ظهرها
بعد شوي دخلت بيبي
بوست راسها و تواسيها
تذكرت ايدي لمن فجأه رجعت توجعني
اشرت لـ امي بعيوني،
طلعت بهدوء من يمهم
طلعت امي وراي
فيروز : شكو ؟
مُلاذ : طفرت من الباب وكعت على ايدي
رايحها اشوفها و اجي
فزت امي فوراً
و تحولت تعابيرها للفزع و الخوف
فيروز : خاف انكسرت
لج يمه مُلاذ شلون تغاظيتي عنها
مُلاذ : نسيتها هسه رجعت توجعني
انا رايحة اشوفها خاف مكسورة لان كوه احركها
كلتلج حتى تعرفين وين رايحة
فيروز : انتظريني ، خل البس عبايتي و شالي
و اجي وياج
مُلاذ : جؤ ، جؤ ما تجين ظلي يمهم
انا رايحة و ارجع بسرعة لا يظل بالج
فيروز: شنو هي رايحة و راجعة
انا جاية وياج شلون ترحين وحدج؟؟
مُلاذ : ماكو داعي و عيب تعوفيهم وحدهم
هسه امر على غادة اخذها وياي
فيروز : وين تطلعين البنية بهالليل
مُلاذ : اذا اجيتي وياي ما اروح و الله
گلت هسه رح اخذ غادة و اروح
فيروز : ما ترتاحين الا تعاندين
مُلاذ : يلا فوفو اكعدي خل اروح
فيروز : افتحي مكالمة على ما توصلين
مُلاذ : طار الرصيد على هالحسبة
فيروز : انا اشتريلج
مُلاذ : بيعي سمنت و اشتريلي
خزرتني ، ابتسمت
طلعت من البيت و هي وراي توصيني
صعدت ، اتصلت على غادة
رحت اخذتها من بيتها
غاده : حيو حيو هم جنتي تذكريني
مُلاذ : انجبي ، ايدي مرضوضة مدري شكو
ورايحة اشوفها و اخذتج وياي
غاده : ليش خيرج؟
شسويتي هالمرة كسرتيمن و كسرج؟
سولفتلها السالفة
و هي تتحسب على اسكندر
رحت و طلعت ايدي مرضوضة
جبسوها ، رجعت للبيت
مرت ٣ ايام و بكل يوم
عزيز يجي يتطمن على نور
بيبي ما قبلت نور ترجع بهاي الفترة
و بقوا يمنا و هذا الشي جان مفرحنا
يلتمون بالليل و يكعدون يسولفون و يضحكون
حتى لو ما اشاركهم بس افرح من اشوفهم هيج
اطلعهم بالسيارة و افرهم
و الصبح اودي ملاك لمدرستها
و نور لـ كُليتها و نروح لـ كُليتي انا و غادة
و هواي اشياء نسويها سوا
فتحت الجبيرة من ايدي
و بعد شهر من يلي صار
طلعنا انا و نور و ملاك وحدنا
اخذتهم لمدينة العاب حتى ملاك تلعب و تتونس
و احنا كاعدين
دحگت ملاك لـ واحد يبيع شعر بنات
ملاك : خل نشتري
مُلاذ : امشينا
اخذت جنطتي
كمنا انا وياها رحنا لـ ابو شعر بنات
دحگتله ملثم مبينه بس عيونه
التفتت لـ نور
مُلاذ : نور تريدين شعر بنات؟
نور : اي
رجعت التفتت لـ رجال
مُلاذ : نريد ثنين شعر بنات
ملاك : و انتِ؟
مُلاذ : ما احبه
اخذنا الشعر بنات
مديتله الفلوس هز راسه برفض ميقبل ياخذهن
مُلاذ : اخذهن
هز راسة برفض
مُلاذ : يمعود دخذهن
هم ما قبَل عفتهم على المسطبة
و اخذت ملاك رجعنا يم نور
انطيتها الشعر بنات مالتها
نور : اكلي وياي
مُلاذ : ما احبة
سكتت و محجت شي
نور : تفوت غادة هاي الكعدة
مُلاذ : هالفترة امها تعبانة متكدر تطلع
نور : خطية
مُلاذ : الله يكومها بالسلامة
هزت نور راسها ساكته
رجعت كالت بعد ثواني
نور : مُلاذ لازم ارجع لـ بيتنا
مُلاذ : اي هسه من نرجع للبيت
اطلعج بالجلاليق
نور : ههههههه
هزيت ايدي
مُلاذ : و الله يا الله ليش شبينا نكرص ؟
تريدين ترجعين لبيتج
نور : لا و الله مو هيج لتفهميني غلط
بس صارلي شهر يمكم قابل اظل يمكم للابد
مُلاذ : نور لو تظلين للابد افضل
ما عدنا اي مشكلة
انا گلبي مرتاح لان اخوج ال*** مو يمج
نور : عزززه عززه مُلاذ لتفشرين
مُلاذ : ديلا يا عيني هسه شحجيت
هي كـ***
نور : و الله خالة فيروز حقها
من تخوزر بيج بس ميفيد وياج
مُلاذ : يغثوني يا عيني يغثوني
لازم و احد ينطي الحرية لـ لسانه
بعد مدة كمنا و طلعنا راجعين للبيت
نزلت من السيارة
لمن شفت اسكندر واكف كدام بابنا
رجعت للسيارة حذرت نور تنزل
قفلت السيارة عليهم هي و ملاك
رحت انا لـ اسكندر
مُلاذ : عسى ما شر ؟
التفت دحگلي
اتقدم عليه : وين جنتي بهالوقت؟
مُلاذ : ما يخصك
جر ايدي عتها
التفتت لـ نور يلي تدك بجامة السيارة
و تتوسل بيه افتح السيارة
رجعت دحگت لـ اسكندر
اسكندر : احجي وين جنتي !
مُلاذ : ما يخصك
دفعته عني : شتسوي هنا؟
اسكندر : انا اعلمج
مُلاذ : اشكرك اخر واحد اريد اتعلم منه هو انت
اسكندر : مُلاذ !!
مُلاذ : خوش نطقت اسمي صحيح
هسه احجي شتسوي هنا ؟
انفتحت باب البيت
طلعت بيبي
بيبي : سعيد وكعيد هم يتعاركون
يلا تمالخو من الروس
مُلاذ : بيبي هذا شيسوي هنا؟
بيبي : انا خابرته يمه
مُلاذ : ليييش؟
بيبي : جسار جاي من الخارج
مُلاذ : صدك؟؟
اسكندر : و انتِ شكو كيفتي؟
مُلاذ : و انت شعليك ؟
اسكندر : مُلاذ و حق هو الله اكص لسانج
مُلاذ : وحق هو الله ..
قبل لا اكمل قاطعتنا بيبي
بيبي : كاااافي عابت لجهركم الزفرة
هاي عود انا واكفة طايحين الحظ ادبسزية
مُلاذ : جان كلتيلي انا اوديج
بيبي : لا يمة هاهيه خل نرد لبيتنا
انا هم اشتاقيت ل مچاني
و كاعدة هنا علمود نويرة ترتاح فترة
اسكندر : ليش شمسويلها هناك؟
بيبي : انت انجب
ابتسمت شلون ظل ساكت
و بيبي ترزل بي
بيبي : يلا يمه
انا هم اريدن اشوفن جويسر و سلطان
مُلاذ : خل اوصلكم انا
بيبي : لا يمه دنيا ليل
مُلاذ : لا بيبي شسالفة
هم اشوف سلطان وجسار و اسلم عليهم
اسكندر : انجبي و رجليج اكسرهم اذا رحتي
مُلاذ : و انت شعليك انت شكو؟
اسكندر : من التحق و ارجع ما تجيني ؟؟
مُلاذ : و شسوي جايتك؟
هو انا ما جايتك و هم ما خلصانه
بيبي : كافي لا اشعل شيب الخلفوكم
يمه مُلاذ يلا خلنروح وياج
اسكندر : حجية و انا؟
بيبي : انت امشي ولي اعتذر من اختك
و راضيها
اسكندر : حجية ما جنت بوعيي
بيبي : طبعاً خايس تعبي نـ** بحلكك
وين يصير عدك عقل تشرب السم الهاري هذا
مُلاذ : حيل وياك
جر شعري ، ضربت ايده
و بيبي هم ضربته بجنطتها
و عاطت بي ، هدني بسرعة
فتحت باب السيارة
و هو راح اعتذر من نور
نور فطيرة كبل قبلت
اخذتهم و رحنا لـ بيت بيبي
وكفت بالباب انداريت للحجية
مُلاذ : حجية انا منتظرتهم هنا
صيحيهم بلا امر عليج
بيبي : انزلي وياي
مُلاذ : لا حجية فدوة اروحلج
مالي خلك مشاكل
بيبي : انجبي و انزلي
مُلاذ : حجية كليلي اذا ما تصيحيهم
خل اروح
بيبي : ادبسز شني تهدديني؟
مُلاذ : لا عيني ما اهددج
شكد عيب بس الماعده سمنت يهددج حجية
بيبي : ههههه ادبسز
خل اروحن اصيحهم وين اكدرلج
ابتسمت : ما تقصرين حجية
نزلت بيبي و راحت تصيحهم
نزلت من السيارة وكفت يمها انتظرهم
طبكت سيارة اسكندر اجا علية
اسكندر : كلمة زايدة وياهم ما تحجين
اكسر اصابيعج عشرتهن و الله
مُلاذ : لا بالله دمشي روح منا
لا الم المنطقة عليك هسه
خزرني لزم ايدي راد يلويها
و طلع جسار و هو يرحب بيه
بسرعة ابتعد اسكندر و دفعته
خزرني اندار دحك لجسار
عبره و راح وكف بعيد
جسار : هاي شنوو ست مُلاذ
ما توقعناج هيج كبرانه
مُلاذ : حيو حيو ، دارولي مي و كبرت
جسار : ههههههه
اتقدمت اضحك
سلمت عليه
مُلاذ : وين سلطان ؟
جسار : طالع ما عول يوصل لبغداد
يريد يفرفر
مُلاذ : تراب الوطن بعد
جسار : ابوس تراب الوطن
احط الوطن بگلبي هسه لمن ارتاحيت
مُلاذ : هاي شنو طلعت مقولة
"حنيت لتراب الوطن" حقيقة
جسار : اي و الله كلش حقيقة
ابتسمت
جسار : شكو ماكو ؟
مُلاذ : ماكو شي
دحگت لاسكندر الواكف يم سيارته
و يطرق عليها باصابعة و يخوزر
التفت جسار دحگله وياي
جسار : هذا بعده معلك عليج؟
مُلاذ : مع الاسف
جسار : خطية
مُلاذ : انا الخطية و الله مو هو
جسار : لا بوية لا يحبج من هو و هاكده
مُلاذ : حبه برص
ضحك جسار
و هو يمسح بـ لحيته
مُلاذ : امك شلونها؟
جسار : الحمدلله تعرفين وضعها ورا ابوي
مُلاذ : الله يرحمة
جسار : امين
مُلاذ : تدري لو ابوك موجود
جان هسه عرفنا قاتل ابوي
بس قضاء و قدر
سكت ثواني مسح وجهه
اندار صار كدامي
تحمحم و گال بهدوء
جسار : مُلاذ اريد احاجيج بهالسالفة
مُلاذ : شكو؟
جسار : تذكرين سبب وفاة ابوي ؟
كالوا مات من القهر و گلبه ما تحمل
مُلاذ : اي اتذكر
جسار : مُلاذ اسمعي الي رح اكوله كلش زين
لان كل كلمة راح اكولها هسه مهمه
ركزت عليه بعيوني و مسامعي
تقدمت عليه خطوة ، بلع ريگه و حجا
جسار : قبل سنين عرفت الطب الشرعي
مغيرين اسباب وفاة ابوي
و انا بطريقتي عرفت هذا الشي
فتحت عيوني بـ وسع
مصدومة و مذهوله
كمل جسار كلامة
بـ تاكيد على كل كلمة ينطقها
جسار : ابوي اتوفى و هو متسمم بـ سم قوي
هذا السم محطوط بـ اكله
و مأثر على گلبه لدرجة
تظنين هو مات موت طبيعي
مُلاذ : شنووو!
قاطعني و كمل
و صدمني اكثر
جسار : مُلاذ ، مُلاذ ، اسمعيني ركزي وياي
يلي حاط السم شخص من اهلنا و بيناتنا
و الي تسبب بمقتل ابوج
هو نفسه الي قتل ابوي و لنفس الغاية
تفززت كل ذرة بجسمي
جاحظه عيوني و الدموع تحجرت بـيهم
ادحك لـ جسار يلي يترقب جوابي ،
همست بصدمة : الچـتال !
- يتبع الفصل التالي اضغط على ( رواية جرح الأيهم ) اسم الرواية