رواية جرح الأيهم الفصل السابع 7 - بقلم أيلان
"الجُــرح السابع"
"بلكي نموت ، خلصنا العمر لچمات
محد يفهم شبينا
الوجع لاحگنا من كل صوب
حافظ كل اسامينا "
مُلاذ :-
كل ذرة بجسمي ترجف
ثبتت عيوني على والدتي
يلي بالكاع ، الدم يجري
خارت قوتي
طحت كاعدة بالكاع خارج الحمام
كل ثانية يجري بيها الدم
وي كل قطرة مي تخترق مسامعي
اتذكر وفاة و الدي لحظة ، لحظة
ربي لا تختبرني هذا الاختبار مرتين
هذا الامتحان يفوق قوة عبدتك
لو غابت شمسي مرة الثانية
راح يسحبني الظلام باحضانه
فززني صوت صرخة ملاك
رجعت لـ وعيي
دحگت لـ ملاك يلي جنطتها على الارض
تصرخ بخوف ، تبجي
تحت اثر توسلاتها اسوي شي
كمت ، ركضت ناحية امي
يا اصعب المواقف و يا امرها
ملاك يلي حجمها ميساعد نرفع امي
و انا يلي ما اكدر ارفعها وحدي
صرخت بصوت عالي صرخة
خرجت من اعماقي من جوف گلبي
صرخة تراكمت بگلبي كل هاي السنين
لحظات التعب و الارهاق و المقاومة
رفعت امي من جسمها من فوك
ملاك رفعت رجليها
طلعناها من الحمام
لبسناها ملابسها
كمشت بيها من ظهرها من الجهتين
رفعتها عن الكاع ، شلتها بين ايديه
باقصى قدرة عندي
مُلاذ : ملاك افتحي السياررره
و افتحي الباب الورا اركضييي
خرجت ملاك من البيت تركض
اتجاهه الباب و تبجي ، تنفذ يلي گلته
طلعت امي من البيت
اخذتها للسيارة حطيتها بالكشن الورا
ملاك صعدت يمها
طلعت بالسيارة
ملاك تبجي بالورا و تتوسل بامي تصحى
اذاني صارت بيها وشه قوية
اخذت امي للمستشفى
الطريق سويته ٥ دقايق
نزلت ملاك تركض صاحت على الدكاترة
شلت امي بين ايدية دخلت لـ جوا
حطيت امي على السدية
اخذوها و بدوا يفحصونها الدكاترة
رجلية ميتات ، ملاك لازمه بملابسي ، تبجي
دخلوا امي للعمليات
انا اروح و ارجع ما ظل بحالي حال
ادحك لـ ملاك بندت من البجي
و انا دمعة مجاي تكدر تنزل من عيني
مصدومة ، ارجف من الخوف
اتمنى اضرب راسي بكل الحيطان الي كدامي
اريد اخلص من هذا العذاب
بس لا راح اعيش و امي رح تعيش
كلنا رح نعيش ماكو استسلام
مارح نستسلم
اتصلت عليه غادة
ماكدرت اسولف شي
مجرد كلت احنا بالمستشفى
و امي بالعمليات ، سديت الاتصال
ركدت هناك بوحدة من الزوايا
كدام عيني ملاك يلي تتلوى
و عيونها حمر دم
اما انا؟ انا الدموع متحجرة بـ عيني
تمنيت ابجي ، اصرخ ، اعبر عن حزني
بس كنت عبارة عن صخر ذات مظهر
يخلو من اي تعابير ، يخلو من كل شعور
لكن بداخلي بـ مكان من الاماكن انهيار ، دمار
اجت بيبي و عمتي
و عمي ، غادة و امها
الكل التم الكل يبجي و يدعي
انا واكفة بمكاني منتجيه على الحايط
ادحك بوجوههم واحد واحد
اسمع صوت بجيهم يلي يتعالى
كعدت بالكاع كرفصت
اجت بيبي و غادة يمي يصبرون بيه
و يرجعون يحضنون ملاك يلي منهارة
الحرب يلي داعيشها بداخلي
المقاومة و الضعف
الذكريات و محاولة اكون بالحاضر
التعب و الحيل
الحياة وي امي و الحياة بدونها !
خيال يراود عقلي و يقشعر بدني
بلعت ريكي ساكته
سندت راسي على الحايط
توسلت رب العالمين تطلع سالمة
رغم جنيت من الانتظار
بس ما بايدي شي
فزيت على ايد طفل
انمدت الي ، دحگتلها باستغراب
فتحها بيها ورقة و ملفوف بالورقة قلم
رفعت راسي دحگت للطفل
مو نفس الطفل يلي اجاني لمن جنت بالمطعم
جان طفل ثاني ، ظل واكف يمي
رفعت الورقة ادحگلها
مكتوب "ما يلوگلج الضعف تعودت عليج قوية"
توسعت عيوني ، صرت اتلفت ماكو احد
درت للولد : منو يلي جاي يدزكم ؟؟
رفع الولد اكتافة بـ عدم معرفه
مُلاذ : احجي
اشر على حلكه
و سوا حركة بايدة بمعنى "ما اكدر احجي"
رجع اشر على اذانه
و هم سوا حركة بأيدة "انا بس اسمع"
مُلاذ : انت اخرس ؟
هز راسة بمعنى "اي"
دحگتله بـ يأس و تعب
نزلت عيني دحكت للورقة
درت الورقة و كتبت لـ ورا
"منو انت ؟"
كتبت لـ جوا " ما جنت قوية ابد حتى اضعف"
انطيتها للطفل راح يركض
ردت اروح ورا استوقفني صوت اسكندر
اسكندر : مُلاذ
مُلاذ : ها؟
اسكندر : منو هذا الجاهل ؟
شيريد صارله ساعه يروح و يجي؟
مُلاذ : ما اعرفة
اسكندر : شنو ذني يلي يجيبهن؟
زفرت نَفس
انا بيا حال و الدفان يغمزلي
مُلاذ : ديرسم رسومات و يراوينياها
عادي طفل
دحگلي بـ شك وعدم اقتناع
ما اهتميت درت وجهي و رحت يم ملاك
كعدت يمها ، ميلت راسها على كتفي تبجي
ملاك : شوكت يطلعون؟
حجيت بخنكه : ما اعرف
ظليت مكاني ، ملاك نامت على كتفي
غادة يمي ، تمسح على ايدي و تهدء بيه
ما اعرف ليش يهدأوني!
رغم انا جنت بـ اعلى مراحل الهدوء
صوت مني ما اطلع
غمضت عيوني ، فتحتهم برُعب
لمن سمعت صوت الرصاص
كمت من مكاني متجمدة
احس بالبرودة تسري باطرافي
اتلفتت بمكاني ، سمعت صرخة صوت مألوف
- مُلاااااذ
فتحت عيوني بوسع
تكررت الصرخه بأسمي
فرزنت الصوت
نزلت دموعي
ابتسامة علت اطراف شفتي
همست بـ لهفة : بابا
تكررت الصرخه : مُلاذ
نزلت دموعي بـ فرح
ركضت ناحية الصوت
المستشفى ظلمة
تتراكع الشبابيك بسبب هوا عالي
كل ما ركضت اتجاهه الصوت
كل ما يصير اقرب دحگت لـ غرفة
يلي صدر منها الصوت بكل وضوح
فتحت الباب ، دخلت
-بابااا
اتجمدت اطرافي بصدمة
اتقدمت بخطواتي ادحك لـ ظهره
-بابـ..
غصيت ، نطقت بـ لهفه
- بابا
وگفت بمكاني
بعد ما شفت ابوي
محتضن امي لصدرة و هي على سدية
يبجي بحرگه ، امي مغمضة مثل الميته
إلياس : مُلاذ ما اهتميتي بامانتي
بجيت بحرگه على بجيه و منظر امي
مُلاذ : بابا و الله اهتميت
بابا و الله اختباري جان بيهم
انا اهتميت انا صنت امانتك
بابا انا ما بجيت انفذ وصيتك
تقربت رفعت ايدي اريد المسه ، التفتت الي
على شفايفة الابتسامة يلي انحفظت بعقلي
ابتسمت على ابتسامته : بابا انت موجود
إلياس : مُلاذ ، مُلاذي
دفو احتل گلبي ، تقربت منه بهدوء
اريد اوصل ايدي اله المسه
اريد احسه حقيقي
فتح عيونه و صرخ بفزع : الچتال
انسحبت لورا بحزام حاوط رگبتي
اختنكت رفعت ايدي اكمش بالحزام
احاول اقاوم و ابعد الحزام عن ركبتي
رفعت عيني دحگت لـ اسكندر
واكف بالزاوية يضحك باصوات عالية ، يدحگلي
مستمرة اختنك بالحزام
اناجي ابوي
متصنم بمكانه ، يلهث بتعب
لابس قميص ازرق
تلطخ القميص بالدم ناحية گلبة
طاح يجثو على ركبته كدامي
اخترقت صدرة رصاصة فوك بقع الدم
رفع ايدي احاول اوصلها اله
اصرخ و ابجي : باباااا ، لا تيتمني مرتييين
انقطعت انفاسي
و انا اصرخ و اتوسل : بابا لا تعوفني
و الله تعبت بابا ما جاي انام لان انتظرك بابا
بجيت اتغصغص
طاحت ورقة يمي بالكاع
وصلت ايدي للورقة رفعتها بايدين راخية
دحگت للمكتوب "جَرحي"
دحگت لـ ابوي يلي كدامي
إلياس : انتِ وي الحق مُلاذ
انهزيت حيل ، فزيت مفتحه عيوني بوسع
الكل ملتم عليه و يدحگولي باستغراب
دحگتلهم ما مفتهمه ، گلبي يدك سريع
النفس يصعد ما ينزل
سمت بيبي على راسي
و تهدي بيه ، تمسح على راسي
بيبي : اسم الله ، اسم الله
مُلاذ : شـ.. ، شكو؟
بيبي : كابوس يمه لا تخافين
التفتت على ملاك يلي كالت بفرح
ملاك : طلعوا امي من العملية
شكد كعدناج بس ما كعدتي
دك گلبي حيل : وينها؟؟
ملاك : منوميها بغرفة
مُلاذ : شلون وضعها؟
اسكندر : زينه لا تخافين ، وضعها مستقر
بلعت ريگي
انفاسي ما منتظمة
كل الي صار جان كابوس؟
ابوي ما عايش ؟
ابتسمت باستهزاء ، اضحك على روحي
مات بين ايديج شوكت تستوعبين ؟
دحگت للطفل واكف كدامي و يدحگلي
بأيدة ورقة ، كمت من يمهم
بيبي : رح نروح نكعد يم غرفة امج
دلتني على الغرفة
هزيت راسي : تمام جايه وراكم
اجيب مي و اجي
اسكندر : خل اجي وياج
مُلاذ : ما اريد
اسكندر : ليش؟
بيبي : اسكندر عوف البت بحالها
و تعال وياي
جرته بيبي و اخذته
درت وجهي دحكت للولد
انطاني الورقة
"مو مهم منو انه
لا تخافين امج رح تصحى و العملية تنجح"
كاتب لـ جوا
"انتِ قويه بس انه اشوف تعبج "
عكدت حواجبي دحكت للطفل
مُلاذ : من شوكت اجيت؟
فتح ايديه ثنينهم بوسع
مُلاذ : هواي ؟
هز راسة بمعنى "اي"
مُلاذ : قبل لا يطلعون امي من العملية؟
هز راسه بمعنى "اي"
اخذت القلم و كتبت "منو انت؟"
اخذها الطفل و راح
لحكته عكدت حواجبي
و انا اتذكر اتجاهه الغرفة يلي داروح بي
نفس الاتجاهه يلي بالكابوس
شفت الولد دخل لوحدة من الغرف
عصرت مخي
تذكرت نفس الغرفة الي دخلتها بالكابوس
على رغم مشايفتها من قبل ابد !!
بعد كم دقيقة طلع الطفل
راح يمشي بالاتجاهه المعاكس
مشيت بسرعة
حطيت ايدي على مقبض الباب
اخذت نفس عميق ، لويت المقبض
فتحت الباب ، اتجمدت بمكاني ادحك ...
نور:-
من بعد ما طلعت بيبي تركض و تلبس بعبايتها
و بعد ما سمعنا خبر خالة فيروز
واكعه على راسها
كعدت على السجادة ادعي
و ابجي من كل گلبي
دخلت امي عليه
كعدت على الجرباية تدحگلي
و انا ساجدة و الدموع على خدي
امي : لو انا ميته ما تبجين هيج
رفعت راسي ادحگلها
مسحت دموعي : اسم الله عليج لا تگولين هيج
امي : مادري شعاجبكم بيها
كل واحد يحب فيروز و ميت عليها
نور : قابل خالة فيروز شمسويتلنا؟
همست وي روحها بكلام
فركت ايديها و دحگتلي
-انجبي و كومي ساعديني كافي نواعي
-ماما فدوة ادعي الها
عاطت بيه : انجببببي وكومي مو تعلميني
طلعت و هي تصيح عليه
-مبارك ما عدنا حياة احنا غير فيروز و اهلها
نزعت ازرار الصلاة
و رفعت السجادة صفطتها ، حطيتها بالكنتور
لحكت امي يلي شبعتني مسبات
-ماما ترا خاله فيروز حبابه
دتكطع بالخيار من گلت هيج
رفعت راسها خزرتني
رفعت السجينه بوجهي
-اكص لسانج اذا حجيتي بعد
سكتت محجيت شي
الدموع محصورة بعيوني
امي : بيبيتج ميته على فيروز و جهالها
و اسكندر كاتل روحه على مُلاذ
و انتِ مبندة على الخاتون
و ابوج ، ابوج شحجي اصلاً ميت عليها
عكدت حواجبي باستغراب من كلامها
نور : شنو؟
دحگتلي امي كأنما وعت على نفسها
امي : شـ.. شنو شبيج؟؟
نور : بابا على منو ميت؟
امي : شبيج انتِ شدتحجين؟؟؟
اكسر راسج اذا نطقتي كلمة بعد
سكتت ادحگلها امي شدتحجي؟
صيحت عليه و لعبت بيه لعب بلا اي سبب
و انا ابجي و اشتغل و هي تغلط
اندكت باب البيت
امي : اطلعي شوووفي البااااب
مباررررك انعل اليوم الاسود الجبتج بيي
غلطة حياتي هاي
متعودة على هالكلام
الي يجرح كل مكان بگلبي
و يغرز سجاجين بروحي
رحت لبست شال
وكفت ورا الباب : منو؟
-انا
فتحت الباب
دحگت لـ اركان ، ما ادري بي هو
وخرت بسرعة من الباب
نور : تفضل
اركان : سمعت اصوات صياح من بيتكم
و شفت الحجية طلعت تركض الصبح
خو مصاير شي ؟
نور : مرة عمو إلياس
ماخذيها للمستشفى و مدخليها عمليات
و اكعه على راسها و خالة جنات
هاي جيران مُلاذ و بنت خالة جنات غادة
درن و خابرن بيبي و بيبي طلعت تركض
و انا جنت اصلي و ادعيلها
كتيتهن كلهن بدون ما اخذ نفس
احجي بسرعة و اناشغ
اختفى صوته ثواني
مديت راسي دحگتله لكيته يضحك بهدوء
دحگلي رجعت وخرت
اركان : شبيج تبجين ؟
نور : مابيه شـ..
اركان : شلون ما كتيتي ذنيج كلهن
كتي السالفة البجتج
نور : ما باجيه
سكت ثواني و رجع گال
اركان : عيونج الترفة لا تبجيها
ما يستاهلن يبجن على شي
بلعت ريكي واكفه ورا الباب
حجا بـ نبرة خلتني اتيهه دربي
فوك ما هو تايهه
نور : تـ .. تمام
سمعت باب انسد
دحگت من الباب : اركان؟
لكيته مموجود
سديت باب البيت
حطيت ايدي على وجهي و بجيت بحرگه
بعد ما اتذكرت حديث اهلي قبل كم اسبوع ..
جانو كاعدين بالصالة
عزيز يحجي لـ بابا عن اركان
بابا : الله يساعدها التاخذة
عزيز : ليش بويه خوش رجال
بابا : ابني تظل هي تودي و تجيب بي
على هاي رجله المكطوعه
عزيز : و شعليها رجله المكطوعه؟
حادث و قدر و صار
بابا : ابني انا اليوم لو يجي واحد مثل اركان
يتقدم لـ نورة على كص ركبتي ما اطيها
تصيرله خدامة لو مره
لكن سمعت هيج ماتت كل فرحة بداخلي
دموعي نزلت بغزارة اكثر
فززني صوت امي
امي : وينننننج منو جااااان بالباب
رحت دخلت جوا
گلتلها جهال دكو الباب و شردوا ..
مُلاذ :-
دحگت للغرفة فارغة
فوك السدية يلي بالغرفة ورقة
تقدمت اخذتها
"كلتلج لا تدورين عليه شهالعناد
المهم ابوس كوابيسك و عيونك يَ عنودي
الحمدلله على سلامة امك "
دحگت لباقة ورد على السدية
كمشت الورقة كطعتها بعصبية
مخليت جزء بيها صاحي
شلت القطع شمرتها بالزباله
اخذت باقة الورد ، دحگتلها ردت اذبها
بداخلي شي منعني ، عفتها بمكانها و طلعت
رحت لغرفة امي بعد ما دورت عليهم
دحگت كاعدين بالباب بعدها لسا ما كاعدة
اجاني اسكندر : وين المي؟
مُلاذ : ها ؟
اسكندر : المييي وينه؟
مُلاذ : ما لكيت و رجعت
عبرته و مشيت
لحد الليل صحت امي
بعد ما فحصوها الاطباء جانت الصدمة
لمن عرفنا فاقدة الذاكرة بشكل مؤقت
كل دقيقة تدحگلنا باستغراب
و ملاك كاعدة يم راسها تكللها انا بنتج
و هي ما تعرفنا حتى متكدر تميز وجوهنا
مرت الايام و احنا نحاول نذكرها
بقت كم يوم بالمستشفى
انطتني بيبي فلوس
و بوجهي رحت جبت علاجات الها
عمي يحوم حواليها
و اجا اعتذر مني على كلامة
بس غلست و ما جاوبته مجرد هزيت راسي
ما اعرف انا حقودة او طبع بيه
ما امشي اي كلمة لـ اي شخص
طلعنا امي للبيت بعد كم يوم
لمن گال الطبيب وضعها تحسن
مجرد تحتاج مداراة و اهتمام بجرحها و تنظيف
بـ ليلة من الليالي
كاعدين انا و ملاك يمها
و هي بدت تتذكر تدريجياً
همست امي
فيروز : إلياس
فززت گلبي باسمه
بس بقيت ساكته دحگتلها
طاحت دمعة من عينها
دحگتلي : إلياس ابوج مو؟
هزيت راسي بمعنى "اي"
بدت تسولفلي شلون مات
حتى تتاكد اذا الي تتذكرة صحيح
انا اهز راسي
كل كلمة و هي تحجي ينغز گلبي
توصف شكله و شنو الي صار
و لمن جنت ابجي و هو بحضني
و تتذكر هو شلون شخص شجاع و مُحب
و بيبي تسمع و تنعي و تبجي
قاطع امي و بجي بيبي
دخول عمه منارس بايدها صينية
منارس : سويتلكم حلاوة
كعدت و حطتها كدامنا
تذكرت نفسها الحلاوة يلي اكلها ابوي
شجاي يسوون بيه بلا ما يدرون؟
بلعت ريكي ادحك للحلاوة
مُلاذ : بالعافية
عفتهم و كمت
طلعت كعدت على الصبة يلي بالطرمة
لفحتني نسمت هوا باردة
شعري يطير ، جو حلو ، هادء
اندكت باب البيت ، مسحت كصتي بايدي
كمت وكفت وراها
مُلاذ : منو؟
اسكندر : انا
فتحت سرقي الباب
و فتحت الباب دخل للبيت
دحگلي
اسكندر : يوم التصيرين مرتي
و هيج تفتحيلي الباب
الناس بالناس و الكرعه تهلس بالراس
هزيت ايدي ، درت وجهي اريد اروح
جر ايدي بسرعة ، سد باب البيت برجلة
قيدني عن الحركه
مُلاذ : شدتسووووي وخررر
اسكندر : اشش
دحگت لعيونه حمر دم
و بي ريحة قذرة
مُلاذ : ششارببب انت وخررر عني
و الله راح اصرخ و المهم عليك
اسكندر : صرخي
مُلاذ : بيبيييييي
سد حلكي بأيدة
سحبني لـ ورا البيت ساد حلكي
اضربه ، احاول اصرخ بس ماكو
عضيت ايده عصر عيونه
بس ما وخرها عن حلكي
مسح شفايفي ب اصبعه
ضربت ايده حيل
جرني كل قوته من ركبتي
كانو خانكني بس مرخي ايده
-فكني بيا حق تلمسنيي !
ظلي يدحگلي
عيونه تجولت على كل وجهي
-بصفتي صاحبج
قهقهت ب استهزاء : انت صاحبييي؟!
اسكندر : و صاحب شفايفج
- اضربك على حلكك هسه وخر عني
شدد ايدة عليه
حجا من بين اسنانه
اسكندر : و امرد حلك الي يمسهن غيري
و حلكج ويا
مُلاذ : صدك والله؟
هز راسه ، رفعت حواجبي
قربت وجهي عليه بهدوء ، كَيف هم قرب وجهه
فجأه رفعت رجلي وضربته بين رجليه
عاط متاذي ، ابتعد عني ، تفلت عليه
طلعت بسرعة من ورا البيت و دخلت جوا
مرت الاشهر اسكندر متحلف بيه
وين ما اشوفه و يريد ياذيني
اسوي بي عاهه لو اضربه لو ادفرة
و مرة من المرات دفعته على الجامه
و انكسرت الجامه برگبته ، خيطوا رگبته
طبعاً صارت مشكله و ما سكتت الهم
و رجع اسكندر التحق و خلصت منه
امي اتذكرتنا و اتذكرت ابوي
و اتذكرت كلشي الحمدلله
جنت مرحلة ثانية كُلية
و نجحت منها
بيبي جانت تحاول تساعدني بالفلوس
بس ما جنت اقبل ، ردت اعتمد على نفسي
ملاك صارت بالسادس ابتدائي
وفرت الها كلشي
خليتها تدرس للوزاري كلش زين
و نجحت من السادس ابتدائي بمعدل حلو
بيوم دخلت لـ بيتنا
دحگت للباب طن نعوله و احذيه
مُلاذ : شني ام كلثوم جايه
مسويه حفله بـ بيتنا
دخلت حطيت سويجي بجيب البنطرون
دحكت للنسوان كاعدات يم امي يسولفن وياها
اول ما طبيت كامت عليه ام عباس تركض
شلعت وصلة من خدي تبوسني منا و منا
-اوووي يمه فدوه شحلااااتج
تنكعين بالگلب
هزيت راسي مبتسمه
ما مفتهمه شي
درت وجهي للمراية اليمي
اباوع لخدي مطبع بالحمرة
رمشت ساكته ، استغفرت بهمس
تقدمت يم امي شاورتها
مُلاذ : شكو
ابتسمت امي تدحكلي
و رجعت تدحكلهم
فيروز : هه ، دتسئلني شتجيبلكم عصير
دحگتلها : ليش تجـ...
قبل لا اكمل سدت حلكي و جرت راسي الها
فيروز : ولج النسوان جايات يخطبنج
لا تشاوريني كدامهم عيب
فتحت عيوني بوسع و وخرت ايديها
صحت بصوت عالي بصدمة : هلووووو
النسوان يدحگلي باستغراب
امي تدحكلي و تسكت بيه ، مبتسمه
و تكرص بـ رجلي
فيروز : مُلاذ تعاي ماما
راحت للمطبخ دحگتلهم خازرتهم
رحت وراها
مُلاذ : بيت ام عباس شيسوون هنا ؟؟
شنو بس لا ناويه تزوجيني لـ عباااس
فيروز : اسكتي ولج فضحتينا
هسه انا گلتلج راح ازوجج؟؟
كلتلج جايين يخطبوج
وبعدنا دانحجي و ارفضهم و انتِ دخلتي
مُلاذ : لا ذولة علج ما يروحون هيج
فيروز : شنو مُلاذ شراح تسووين؟؟
طلعت من المطبخ وعفتها
كعدت يمهم : اي شلونكم شخباركم
ابتسمن يدحگلي : زينين يمه زينين
مُلاذ : يمه وين الجكاير
طلعت امي من المطبخ تملخ بوجهها
النسوان كلهم كامو يحجون
-هه يا جكاير يمه خاف قصدج بكاير
مُلاذ : لا حجيه جكايرر جكاير
-انتِ تدخنين يمه؟
فيروز : لا لا هههه ما تدخن
بس اكو هاي جكاير الحامض حلو
الي يشتروها الجهال تسئل عليهن
ضحكن النسوان : ههههه والله سوالفج طفولية دادة
خزرت امي و هي رجعت خزرتني
اباوع للحجيه تباوع لايدية و تدور
مُلاذ : ها حجيه مضيعه شي ؟
-هه لا يمه ما مضيعه
باوعت لـ ام عباس
مُلاذ : صدك حجيه عرسي بعد سنتين
عازمتج تعاي لعرسي
فتحن عيونهن مصدومات
دحكت لـ امي بالمطبخ مصدومة اكثر منهن
ام عباس : من .. منو يتزوجج يمه
ابتسمت : زوجي
ام عباس : ادري زوجج يمه بس ياهو زوجج؟
مُلاذ : هو زوجي
ام عباس : ادري يمه زوجج
بس شسمه منو شكد عمره؟
مُلاذ : ها خاله شنو راح تسويله جنسية
ام عباس : هه لا يمه بس انا عود اجيت اخطبج
يا الله توكلنا عليك ، نحتاج اسكندر
بهاي المهمه ابتسمت و گلت
مُلاذ : مع الاسف ابن عمي ناهي عليه
ام عباس : هو الرح تتزوجي؟
مُلاذ : اي مع الاسف
ام عباس : ليش مع الاسف ؟
مُلاذ : اقصد مع الاسف استعجل نصيبي
جان انتظرتكم و الله بس هاي بعد ..
طلعن النسوان من يمنا مأيسات
سدت امي الباب تدحگلي بـ عصبية
خزرتني ، اتجتفت ابتسمت ادحكلها
صار الليل
دحگت لـ تلفوني لمن اجاله اتصال
رقم نور ، فتحت الاتصال
مُلاذ : ها نويره
اتجمدت اطرافي لمن اجاني صوتها يرجف
تناشغ و تبجي : مُلاذ الحگيلي
يتبع ...
- يتبع الفصل التالي اضغط على ( رواية جرح الأيهم ) اسم الرواية