رواية جبرونا عالزواج الفصل السادس 6 - بقلم ايسو ابراهيم
جه رضوان جري لقي أخوه واقع عالأرض، ورايح يزعق لتالين اتخض منها وكان هيقع لكن مسك الباب بسرعة
وقال بغضب: أنتِ طلعتي بشكلك دا ليه؟
جريت على جوا جابت برفان، وخده رضوان منها ورش على إيده وعلى مناخير أخوه اللي بدأ يفوق
بص رضوان على تالين قال بعصبية: ادخلي ياختي اغسلي اللي على وشك دا هتقطعيلنا الخلف
بصتله بضيق وراحت تغسل وشها
ورضوان سند أخوه لجوا، وبعدها طلعت تالين باحراج وقالت: السلام عليكم، وبصت لأخو جوزها وقالت: آسفة بجد عالموقف دا
منير بابتسامة: ماحصلش حاجة بس أنا اللي قلبي رهيف مقدرتش أستحمل الصدمة
تالين بابتسامة: يا بخت من نصيبك هتلاقي معاك حب وعندك قلب، مش زي ناس قلبها حجر وعديمة الإحساس والمشاعر وجحود وحاجة آخر قرف
رضوان بغضب: لا يا شيخة حوشي ياختي المشاعر اللي بتنقط منك والرومانسية اللي بغرق فيها
تالين ببرود: هو أنا وجهتلك كلام، ولا عشان دي صفاتك فرديت عليا؟
بصلها رضوان بعصبية، وبص لأخوه اللي بيتفرج عليهم وقال: طب ادخلي اعملي حاجة نشربها
دخلت تجيبلهم عصير
ورضوان قعد جنب أخوه وقال بحسرة: مش عارف عملت إيه في حياتي عشان تخليني أتجوزها؟
منير بعصبية: ما أنت اللي باين من معاملتك جافة معها
طلعت تالين وقالت: اتفضلوا
جه اتصال لرضوان دخل يرد عليه
قعدت تالين وقالت بسخرية: أهو تلاقيه داخل يكلم حبيبة القلب مكسوف يكلمها قدامنا
منير بعدم فهم: قصدك إيه؟
بقلم إسراء إبراهيم
تالين بحزن: طلع بيخوني مع واحدة
منير بصدمة: بجد؟
تالين: أيوا، وبعدين طالما بيحب واحدة تانية ليه أجبرته يتجوزني؟
منير: ما هو ماعرفنيش ليه إنه بيحب واحدة بدل ما هو قاعد في وشي طول اليوم بشكله الخشب دا
تالين بصعبنة: وعشان تخلص من شكله دا تقوم تدبسني فيه يعني ترضاها على نفسك؟
منير: ما أنا مرضيتهاش على نفسي فدبستك فيه أصل أخوك قالي إنك قفل بردوا فقولت إيه ندبسكم في بعض واتصرفوا مع بعض
تالين بحسرة: حسبي الله ونعم الوكيل بجد أنا مصدومة
أنا محدش بيهتم بيا حتى الفريزر اللي جوا دا بيديني برود الأربعة وعشرين ساعة لكن مع حبيبة القلب بيديها الدفى
رضوان من وراها: مش تعرفي إن دي غيبة ونميمة ودي بدخل النار يا أستاذة، ويحظك الأوفر لو الشخص دا عرف إنك اتكلمتي عليه بالوحش يبقى مش هتدخلي الجنة إلا لما أسامحك
تالين بصدمة: نعم؟
رضوان: لازم أسامحك عشان تدخلي الجنة
تالين بخوف: طب أعمل إيه عشان تسامحني أصل مش عايزة أقابلك تاني في الآخرة كفاية في الدنيا
رضوان بسخرية: قال يعني أنا اللي هموت وأقابلك في آخرتي تاني، عالعموم عشان أسامحك يبقى تعملي*****
تالين بصدمة: نعم؟
ياترى قالها إيه؟
رضوان بسخرية: قال يعني أنا اللي هموت وأقابلك في آخرتي تاني، عالعموم عشان أسامحك يبقى تعملي بوست تمدحي فيا عالفيس وتقولي إنك بتحبيني ومش قادرة على بعدي ولا تعيشي من غيري
تالين بصدمة: نعم؟ دا كدا كذب وهاخد ذنوب مش ذنب واحد وكدا كدا هكون في النار، وبعدين أنا أحبك أنت دا لو آخر يوم في عمري مستحيل أقولها
وبعدين مش قادرة أعيش من غيرك ليه؟ كنت الأكسجين ولا المايه ولا النت كلامك غير منطقي
وشوف غيرها، وبعدين على فكرة أنت وحش في حقي وظالمني فأنا مكدبتش ولا قولت حاجة غلط في حقك فاتفلق بقى
بصلها رضوان بصدمة وبص لأخوه وقال: أهو دا الجواز الحلو اللي كنت بتقولي عليه؟ هو دا الدلع والفرفشة اللي قولتلي هلاقيها فيها هو دا الحنية
والرومانسية اللي هتغرقني فيها وتخليني أدوب فيها دوب هو دا اللي هنخبط بعض بالمخدات والريش يملى المكان هو دا النحنحة والحياة وردي وبتاع هو دا
تالين بنرفزة: ما خلاص يا أخ رضوان ماسكنا هو دا هو دا في إيه؟ يا عم هو ضحك عليك عشان يمشيك من الشقة مش أكتر أصل زهق منك
منير بضيق: يا شيخة الواحد غلط يوم ما قالك اللي فيها مابيتبلش في بوقك فولة أبدا
بقلم إسراء إبراهيم
تالين بضيق: يعني بلاش أفوقه من أحلام اليقظة دي؟ دا أخوك محسسنا إننا واخدين بعض على حب عشان اتوقع دا كله دا إيه العيلة دي
منير: شششش خلاص زهقت منكم دا أنا فكرت هاجي ألاقي الدنيا حلوة لكن لقيت نكد ومشاكل وقرف، يلا مع السلامة قاعدين يتخانقوا وحتى مافكروش يعزموا عليا بالغدا
وسابهم ومشي وهما واقفين باصيين لبعض ومتنحين
رضوان: هو قال علينا كدا؟
تالين: للأسف كرامتي اتهانت
رضوان: وأنا انداس عليها بجزمته
تالين: احنا لازم نوريه إننا كويسين مع بعض ونكيده
رضوان: أيوا ونخليه يشوف إننا مرتاحين مع بعض ونغيظه
تالين: صح، المهم مش هتجهز الغدا عشان جوعانة أخوك خلى الفطار يتهضم بسرعة
بصلها رضوان بقرف وقال: أنتِ مش مكسوفة من نفسك يابت؟
تالين ببرود: لأ أنت مش حد غريب يابا دا أنت جوزي يعني فهتكسف أطلب منك كدا ليه؟ هو بطلب حاجة عيب استغفر الله يعني دا الغدا يا عسل
رضوان بزهق: اخفي من وشي أحسنلك ولا قومي كلي عيش وجبنة
دخلت تالين الحمام، وبعدها بكام دقيقة صرخت
جري رضوان وقال: في إيه الحمام بخير ولا إيه؟
•تابع الفصل التالي "رواية جبرونا عالزواج" اضغط على اسم الرواية