رواية جرح الأيهم الفصل الخامس 5 - بقلم أيلان
"الجُــرح الخامس"
"وقفتُ حزيناً لا يشبهني إلا الناي
أرح الرّوح تعبنا تعباً يا مولاي "
________________
في البارتات القادمة :
اتجمد نظري على الدم المتدفق من راسها
ما يفصل بيننا الا مسافة كم اصبع
تسللت ريحة الدم للـ خشمي
امتلئت رئاتي بيها
مما سبب الي غثيان
الجثه كدامي هامده
بياض بشرتها بسبب البرد
عيونها يلي مفتحتهم ، اشتد سواد البؤبؤ بيهم
تدحگلي بشكل مُرعب
رغم هي جثة خاليه من كل روح
لكن قتلها كان عن طريق رصاصة اخترقت دماغها
تركت عيونها مفتوحات على الحياة
بلعت ريگي ، روحي حسيتها تطلع
شكل الجثه يرجف كل ذره بـ جسمي
معقوله رح تكون نهايتي هيج و هنا؟
شنو ذنبها ماتت بهذا العمر و بهاي الطريقه ؟
____________________
ببالي الف حسبه و الف سؤال
شراح اسوي ؟ ، شلون راح اجيب فلوس العملية ؟
شلون احافظ على امانة ابوي ؟ ، شلون انقذ اختي؟
رفعت راسي ، سندته على القنفة ، ادحك للسكف
من ذاك اليوم من يوم عرفنا بمرض ملاك
تضاعف اهتمامي بيها
صرت اشتغل اي شي حتى اجمع الفلوس
و بلغنا المدرسة بوضعها
حتى لا تلعب رياضة و تتاذى
ما ردت الجئ لـ اي شخص
سندت روحي و امي على نفسي
كعدت ادرس للامتحان
كل عقلي وي ملاك يلي مصخنه
على راسها كماده
انفتحت باب البيت
التفتت لـ امي بايدها علاليك المسواك
كمت اخذتهن منها
حطيتهم بالمطبخ
دخلت كعدت على القنفه
دحگتلي همست بـ تعب
متسائلة عن ملاك : ما كعدت؟
هزيت راسي برفض
فيروز : ما شفتيها؟
مُلاذ : شفتها مساع بعدها مصخنه
حطت ايدها على وجهها
سللت اصابعها بين خصلات شعرها
دنكت راسها بجت بـ قهر
فيروز : احتاريت شسوي خاف تنشمر
رفعت راسها مسحت دموعها
مُلاذ : راح اطلع بعد شويه اشتغل
و اجيب فلوس ناخذها للصيدليه
فيروز : شتجيبين يا يمه شتجيبين؟
مُلاذ : انا احلها
هزت راسها بيأس ، مسحت دموعها
رفعت روحها انتجت على القنفه
فيروز : الثقب جاي ياذيها
شلون رح نسوي عمليتها منين رح ندبر الفلوس
مُلاذ : جاي اجمع
فيروز : ما يفيد ما جاي يفيد
نجمع لحد شوكت؟ لا هنه ٥٠ الف
و لا هنه ١٠٠ الف
مُلاذ : ادبرها انا اجيب فلوس عمليتها
و نسويلها العملية و تطلع سالمة
فيروز : خل نحاجي عمج..
قبل لتكمل قاطعتها
مُلاذ : ابددددد شيلي هالموضوع من بالج
فيروز : مُلاذ اختج رح تموت
شنو الابد ؟؟؟ شنو الاشيله من بالي
انا رح اخسررر ملااااك
احتاريت شسويي و شنو اشتغل
ما جاي ينفع ما جاي يفيد لازم احد يساعدناا
مُلاذ : اروح اسوي كلشي و ابيع حتى ملابسي
بس ما نروحلهم الناس يلي طردونااا
ما راح يساعدونااا
الناس يلي ابوي مات
و تركونا باصعب وقتتت
ما رح يساعدوناا
الناس يلي تاخذ من راتب ابوي الها
ما راح تساعدنااا
لو همَ بيهم خير لو همَ هيج عدهم فلوس
جان ما اخذوا نص راتب ابوي
ما جان خلونا جوعانين
انا و انتِ مجبورين نطلع و نشتغل
بالبرد و بالحر بالمرض و بالعافيه
جان حطونا بعيونهم ، جان اعتنوا بامانة اخوهم
و لو ما اعرفهم انا
جان قبلج رحت دكيت بابهم
بس صدكيني اذا طلبنا فلوس من عدهم
اولاً ما رح ينطونا و ثانياً
باجر اسكندر يدك بابج يكلج انا خاطب مُلاذ
و من ترفضين رح يتمنن عليج بمساعدته
مستعده هسه ادفع عمري لـ ملاك
بس ما اخليج تنذلين و تلاكين الرفض بوجهج
حطت ايديها على وجهها
بجت هواي و انا كاعده اسمعها
ما بـ ايدي اي شي ، مربطه
تجيت راسي على القنفة
بعد فترة طويلة همست
مُلاذ : الى متى رح تظلين تبجين؟
فيروز : گلبي جاي يتفطر
مُلاذ : فيروز انا موجودة لتخافين احلها
فيروز : مُلاذ كافي تحملين نفسج مسؤولية
انتِ صغيره افهمي هذا الشي
مُلاذ : انا مو صغيرة
من عمر عشر سنين كبرت
فيروز : اتمنى إلياس هسه موجود ..
اشتد صوت بجيها
على اثره ملاك فتحت عيونها تدحگلنا بتعب
مُلاذ : كلنا نتمنى فيروز ..
ادحك للسكف متجيه راسي على القنفه
تنهدت و همست : كلنا نتمنى
مسحت وجهي ، تربعت
رفعت نظري عن الكاع دحگتلها
مُلاذ : اليوم راح اروح اشوف الجوارين
يلي اطلبهم لان ما دافعين فلوس تدريس ابنائهم
مسحت عيونها تدحگلي
فيروز : و تتوقعين لمن تشتغلين هلكد
و تتعبين تدبرين فلوس العملية ؟
مُلاذ : انتِ كليلي شسوييي؟ شسوي؟
شلون ادبرهم غير بالشغل؟؟
راح ادبرهم مجبوره ادبرهم
فيروز: انتِ ما مجبوره مُلاذ !
انا امكم انا يلي راح اجيبهم
مُلاذ : حياة ملاك ما عليها مناوبات
اذا انتِ امنا فـ انتوا ثنينكم
انتِ و ملاك من مسؤوليتي
لا تكليلي اناا اكبر لا تكليلي انا يلي ولدتج
لا تكليلي انا امج مو انتِ امي
انا يمكن ما اكدر اكون إلياس الج
بس اصير لـ ملاك
اصيرلها ام و اب و اخت و صديقة و كلشي تحتاجه
و نفس الشي تماماً يجريلج
سكتت بلا ما تحجي شي تدحگلي
مر الوقت ، ملاك الصخونه ماخذه من حيلها
دخلت على امي بالغرفة
مُلاذ : يلا يمه بدلي لـ ملاك
فيروز : وين؟
مُلاذ : للصيدليه
فيروز : الفلوس منـ...
مُلاذ : لتخافين ما بكتهن
اخذت الفلوس مال دين مال جوارين
بدلت لملاك
شلتها انا لان ما تكدر تمشي
طلعنا من البيت صعدنا بتكسي
وصلنا للصيدلية
نزلت امي ، شلت ملاك و نزلت
ملاك : ميمي
مُلاذ : ها حبيبتي
اشرت على بلاعيمها
حاطه راسها على كتفي ، مغمضه عيونها
مُلاذ : بلاعيمج ؟
هزت راسها بـ تعب
مُلاذ : هسه تصيرين زينه
اجينا للصيدليه
ملاك : لا يضربوني ابره
مُلاذ : بسرعه يروح وجعها
مسحت امي على شعر ملاك
ملاك : توجعني
فيروز : اضربي ابره حتى نطلع منا
و اشتريلج شغله تعجبج
ملاك : شنو تشتريلي؟
فيروز : اشتريلج اللعبه يلي تريديها
فتحت عيونها شوي دحگتلها : صدك؟
فيروز : والله
ابتسمت ، رجعت غمضت
اجا المضمد
شاف بلاعيمها
طلع الابره ملاك لمن شافتها صارت تبجي
لازمه بيه ما تقبل تضرب الابره
مُلاذ : مشمش يلا حتى نشتريلج
ضربناها الابره و هي تبجي بصوت مبحوح
بقن فلوس قليلات اشترينالها بيهن لعبه
رجعنا للبيت دخلت ملاك و انا شايلتها
نومتها على الجربايه ، اجت امي وراي بدلت الها
ما نمت الليل كله ، بقيت يمها
لحد ما صارت زينه و خفت حرارتها
ظلمة الغرفة و الدفو يلي بيها
الهدوء يلي يحاوطنا بكل جهه
خلاني اغمض عيني بتعب ، رمشة عين
فززني صوت امي
فركت عيوني
فيروز : مُلاذ غاده بالباب نسينا امتحااانج
كمزت بسرعه ادحگلها
فركت عيوني حيل
فيروز : ليش هيج نايمه بالكاع؟؟؟
مُلاذ : مادري جنت يم ملاك كاعده
مادري بروحي غفيت
فيروز : كوميي كومي ما ظل وكت
خل اكعد ملاك و اسوي الريوك
وكفت راسي يدور ، ظلمت عيوني
غمضتهم رجعت فتحت لحد مراحت الدوخة
غسلت رفعت راسي
دحگت لوجهي بالمرايه
مجرد رفعت حواجبي باستغراب
من وجهي يلي ضعفان و متغير هواي
طلعت من الحمام
دخلت للصالة غاده كاعدة
تدحگلي بعصبية
غاده : هجمت الجهاز عليج وينج؟؟
مُلاذ : جنت اشيل سمنت بالحلم
غاده : بعدج واكفه؟؟
استعجلي راح الامتحان خلص
رحت للغرفة لبست
رفعت شعري ذيل حصان
نزلت غرتي القصيرة
اخذت كتبي ، طلعت من البيت
امي ما خلتني اوصل ملاك انا
غاده : مُلاذ استعجلي
مُلاذ : اركضي غاده اركضييي
جريناها ركض متواصل من البيت للمدرسة
كلياتي صارت تستغيث و تطلب النجدة
وكفت يم المدرسة كامشه كليتي
اجر النفس بصعوبه
غمضت عيوني عصرتهم ، الهث
الحارس : طبن طبن راح يبدي الامتحان
گال هيج انا و غاده نسينا وجع كلياتنا
خلال لحظات لكيت روحي بالقاعه
مجنت دارسه زين للامتحان
طلعت و انا متأكده راح اخذ ٥٠
نور صارت بالجامعة من فترة طويله
و تداوم بـ كُلية التربية
مرت الامتحانات
و انا يوم اروح مجاوبه و يوم نص و نص
لمن سولفت لـ غاده عن وضع ملاك
جانت ردة فعلها ممتوقعه
مصدومه ، خايفة ، حتى بجي بجت عليها
غاده : رح اسولف لـ امي هي تخيط و تبيع
و ننطيكم الفلوس .
كل يوم جنت اتعذب
لمن اشوف ملاك كدامي مخنوكه
او تصيح من وجع گلبها و تبجي
مرات ما تكدر تنام بالليل
نسهر انا و امي يمها للصبح
تجي ايام يتصلون علينا من مدرستها
يبلغونا ملاك اغمى عليها ، ملاك اتخربطت
ملاك اختنكت ، الخ ...
ماكدرت اكعد بالبيت و اسكت عن حالها
وصلت حالتها للخطورة
بكل مره نزور الدكتور
يشدد علينا باهمية الاستعجال
و خطورة وضع ملاك
صارت امي تحوك الملابس و تبيعهم
خالة جنات تخيط الملابس و تبيعهم على جيرانها
انا صرت ابيع كلنس الصبح
الظهر اشتريلي صم ورد و اروح للجسر ابيع
بعدين اشتري بالونات
ابيعهم يم روضات الاطفال
لحد العصر ارجع للبيت
و ابدي ادرس جهال المنطقة بالليل
خاله جنات تسوي لبلبي طَيب
نبيعه لـ ام الحانوت
كل هذا ما جان كافي
و لازم نشتغل اكثر
امي صارت تسوي كيك
و هم نبيع لـ ام الحانوت
گمت اروح اخذ راتب ابوي بنفسي
لان عمي ياخذ نص و ينطينا نص
و هذا النص منلحك ندبر روحنا بي
بعد عناء ، تعب ، ارهاق ، دام لفترة طويلة
نركض من جميع الاتجاهات و نجمع و نبيع
كدرنا نجمع قريب المبلغ و الدكتور خفض النا
ضميت الفلوس بالكنتور تحت ملابسي
ما فرحت بكد فرحتي ذاك الوكت
اتفقنا وي الدكتور على العملية
بعد يومين اخذت امي و ملاك
طلعنا نتمشى حتى يغيرون جو
ردت افرحهم و اونسهم اكثر
كعدنا بمحل اشترينا اكل ، اكلنا
خلصنا غسلنا
اتجهن امي و ملاك للباب
انا وراهم ، اخذنا تكسي رجعنا للبيت
دفعنا الكروه ، نزلنا من السيارة
اتجهنا لـ باب البيت بهدوء
دحگت لـ ايد امي يلي رفعتها مستوقفتنا
مُلاذ : شكو؟
التفتت الي نطقت بصوت يرجف : مُلاذ الباب مفتوح
مُلاذ : شنووو!!
سحبتها من ايدها خليتها وراي
امي مرعوبه ، ملاك ختلت بظهرها
رفعت الجهاز النوكيا احاول اضوي بي
يمر بصيص ضوا من الجهاز
لازم اركز كل قوتي يلا اكدر اشوف
فيروز : مُلاذ لا تدخلييين
التفتت لـ امي حطيت اصبعي على حلكي
بمعنى "اسكتي"
استمرت تبجي كاتمه صوتها
راحت هي و ملاك
دكت الباب على الجوارين
اثناء ما هي راحت انا دخلت للبيت
اتخنس و اسمع حركه
شلت عودة الماسحه ، اخذتها وياي
بدا يتضح صوت الحركه
يلي يصدر من غرفتي بكل مره اقترب
باب الغرفة مفتوح ع النص
دخلت بهدوء ، دحگت لواحد ملثم
سديت حلكي بايدي
كتمت صوت نَفسي
فاتح لايت ينبش بالميز مالتي
سريع و مستعجل
وصلت وراه شلت العودة
ضربته حيل على ظهره
صاح بوجع ، شبعته ضرب بالعودة
مُلاذ : حقير ابن الجـ** خرنكعي
تبوكنا شكو هو احنا شعدنا حتى تبوك
احنا نحتاج نبوك مو تبـ....
ما حسيت غير على ضربه اجتني من ورا
طحت بالكاع ، سمعت ركضه صارت
صوت جواريننا
اعتلى من بينهم صوت امي
دحگت لسكف الغرفة
سبيت الحراميه بـ همس ، وجعني ظهري
اتسلطت اضوية الغرفة عليه
دحگت لـ امي وجيراننا
دخلوا يركضون باتجاهي مرعوبين
فيروز : ليييش تدخليييين ليييش؟
حاولت ارفع نفسي عن الكاع
رفعت ظهري متوجعه من الضربات يلي توالت عليه
طلعوا الزلم و الجوارين كلها
تركض ورا الحراميه ، تدور عليهم
امي كدامي مكنبصة و تبجي
فيروز : مُلاذ وين ضربووج؟
حاجيني خو ما سوولج شي
مُلاذ يمه دحگيلي ، شيوجعج؟؟
عصرت عيوني ، همست : مابيه شي
توسعت عيوني بـ فزع
لمن دحگت للكنتور
يلي منفوشه الملابس منه
طردت الفكرة يلي تراودني ، دفعت ايدين امي
اتجهت اركض للكنتور
تناسيت ألم ظهري
كعدت كدام الخانه
دورت بين الملابس طشرتهم بالكاع
الفلوس ماكو !!
دورت بكل الكنتور ما لكيت
مُلاذ : يمه الفلوووس
دحگتلي بدت تتحول نظراتها للخوف تدريجياً
فيروز : وين حطيتيهم؟
مُلاذ : تحت ملابسييي
طلعت من الغرفة خطواتي سريعة لدرجة اتعثر
اتجهت لغرفة امي
فلوس جان اكو بايكيها
سوارات لامي و حلقة ابوي بايكيهم
مطشرين البيت طشار
رجعت لغرفتي حطيت راسي بين ايديه
اتذكر كل قطرة عرك تصببت من كصتي بسبب الحر
اتذكر كل نسمة هوا دكت بعظامي و بردت
اتذكر كل ليلة ما نمت بيها
اتذكر شكد اشتغلت ، تعبت ، حاولت
الاهم من هذا كله اتذكر ملاك
يلي وضعها كل يوم يسوء اكثر و ممكن افقدها
اتذكر لمن تتوجع و تختنك و يجافيها النوم
اعصابي انهارت
بسبب حرامية اختي مراح تتعالج
بسبب حثاله اختي رح تموت
امانة ابوي امانة الياس
ملاكه بالدنيا
رح ترفرف بجناحتها و تتركنا
اذا تاخرنا بعد
اتمرر بـ اذاني كل كلمة نطقها ابوي
لمن اتوفى
إلياس : مُلاذ انتِ من بعدي تفتهمين بابا؟
مُلاذ ، ملاك و فيروزه بامانتج
و انا اعرف انتِ كد الامانه و تصونيها
فيروزة إلياس و ملاكه بامانتج لذة زين .. زين بابا؟
حطيت ايديه على وجهي
الضيق و الشعور السيء احتضنني
ضربت ، كسرت اي شي كدامي
صرخت لحد ما اختفى صوتي
تحت محاولات امي و ملاك و الجيران
يهدأوني و يوكفني بس ما وكفت ماكدرت اهدء
كل ما سمعت صوت ملاك من بينهم
انهارت اعصابي اكثر ، تدمرت اكثر
ما اعرف شكد مر من الوقت
و كل جهه تحاوطني ، يحاولون يثبتوني
تعبت صارت كل جرة نفس صعبة عليه
وصلت الشرطة
لان واحد من الجيران اتصل بيهم
و الصدمة جانت لمن شفت الضابط ضرغام وياهم
انطانا رقمه و خلاه يمنا
شدد عليه اخذ الرقم وياي وين ما اروح
حتى اذا نحتاج مساعدة
بهذيج الليلة ما نمت من التفكير
و كدام عيني ملاك تتلوى من الوجع
على الزاوية الثانية امي تدعي و تبجي
بايدي تشيرت ابوي عصرته بكف ايدي
خنگة توسطت صدري
شعور اليأس طغى على كل مشاعري
الحيل يلي جان عندي انهدم
خيالات احتلت كل عقلي
صرت سادس اعدادي
فقدت الامل بكل شي
اليأس و الحزن كانوا مسيطرين عليه
متيقنه ما رح اكدر اجمع المبلغ هذا مرة ثانية
استمرت ملاك ع العلاجات
يلي يهدأن الألم كم ساعة
و يرجع يصير اسوء
جانت عركاتنا انا و امي
ما تنتهي بسبب ارائنا المختلفة
اتجاهه وظيفتي و مستقبلي
بـ يوم من الايام طلعت من البيت
وجهتي كانت محل الورد
اثناء انا امشي
عقلي الكركبه و اللخبطه يلي بيه ماهدأت
حسيت عقلي ثكيل كلش
و الحمل يلي على ظهري اثكل
انا بالطريق ماكدرت امشي اكثر
كعدت على مسطبه نزلت راسي
فركت عيوني يلي يحرگني باصابعي
استغربت بعد ما اتصادر لمسامعي صوت خشن
رفعت راسي دحگت لصاحب الصوت
رجال جبير بالعمر
ما يقارب الاربعين او الخمسين سنه
-لا تيأسوا من رحمة الله
دحگتله مستغربه : مفهمت ، منو انت؟
التفت دحگلي على ثغرة ابتسامه خفيفة
و نظرة حنونه بـ عيونه
-لا تيأسين من رحمة الله
رح يصب برحمته الواسعه عليج
ارجعي حاولي ممكن هالمرة محاولتج تنجح
فقط الصبر رح تشاهدين الابواب تنفتح
وحدة تلو الاخرى
رفع نفسه وكف
دحگلي ، تعابير الاستغراب ما زالت على وجهي
- انتبهي على احبابج
لكن لا تنسين تنتبهين على نفسج
عكدت حواجبي ، اريد انطق
انطاني ظهره ، مشى مبتعد
رغم ناديت ورا بس ما توقف
لمن رحت للمدرسة سولفت لـ غادة
قابلتني بجواب
غاده : شوفي مره من المرات بزيارة جنا
و اجت مرة جبيرة بالعمر و وياها طفلة
مُلاذ و الله ما نعرفها و لا تعرفنا
امي جانت تبجي كعدت يم امي
حجت المره لـ امي عن حياتنا من الالف للياء
نصحتها شنو لازم تسوي بعدين اختفت ، راحت
اكو رسائل رب العالمين
يرسلهم الج على هيئة بشر
ينصحونج لكن همَ بالاساس رسالة
اخذ الموضوع حيز من تفكيري بعد كلام غاده
و فعلاً رجعت احاول اجمع الفلوس
رغم حالياً صار الوضع اصعب
امي جانت يوجعها راسها بشكل مو طبيعي
و بمرور الايام كان الالم يزيد
اخذتها للطبيب و عرفنا عدها شقيقة
التمت كلها عليه
ما جنت ادري شلون الحك
و شلون راح اكدر ادبر علاجاتهم ...
طلعت من المدرسة
دحگت لـ اسكندر يلي مزروع بالباب كالعادة
درت وجهي مشيت متجهه للبيت
انجرت ايدي التفتت لـ اسكندر
مُلاذ : اسكندر كافييي!!!
اسكندر : مُلاذ بس خل نحجي
مُلاذ : شتريد منييي؟؟
اسكندر : بس نحجي
اصر انو نحجي
جنا بوسط الشارع
توجهت نظراتي على الطالبات
يلي يمرون من يمنا ، يدحگولنا باستغراب
مُلاذ : فضحتني الله يفضحك
اسكندر : بس لا تدعين
من اندعيتي عليه لليوم ما شايف الخير
تعالي وياي
جر ايدي كامشها كل قوته
حتى لو اريد افلتها ما اكدر
صعدني بـ سيارته
صعد هوَ ، شغلها و طلع بينا
مُلاذ : وين ماخذني؟؟؟
اسكندر : بس خل نحجي و نتفاهم
مُلاذ : شتريدد؟
وكف السيارة فرك وجهه
اندارلي : دحگي مُلاذ
مُلاذ : عَجل شتريدد؟
اسكندر : انا غلطان
مُلاذ : من زمان
اسكندر : خل اكمل اكلان خـ**
مُلاذ : اتفضل انطيك جفجير
يساعدك تاكل بكمية اكبر
خزرني
-اركع راسج بالجامة هسه
مُلاذ : احجي عدل وياي لا...
قاطعني قبل لا اكمل
اسكندر : تأدبي
مُلاذ : عَجلل
اسكندر : اسف مُلاذ شوفي انا غلطان
ما انكر ، هاهيه خل نتصالح
مُلاذ : لا بالله؟
اسكندر : مُلاذ لا تصيرين ثوله و راسج يابس
جاي احجي عدل ، اهلي معليج بيهم
الكم مكان فوك راسي ، هاي المرة ال١٧ اجيتج بيها
مُلاذ : زين حاسبهن
اسكندر : احسب كل ثانية اشوفج بيها
مسحت كصتي بايدي : هاهيه خلصت؟
هز راسه برفض
مُلاذ : شتريد بعد ؟
اسكندر : بيبي تريد تشوفج
رايح كل حيل بيها
من يوم الطلعتوا كل يوميه تبجي
مُلاذ : و هسه تريدني اصدكك و اروح وياك ؟
زفر نَفس بغضب
عكد حواجبه طلع جهازه من جيبه
اتصل على رقم ، خلا الجهاز بيناتنا
اجا صوت بيبي : ها الاغم
دحگلي و استغفر
اسكندر : ها بيبي شلونج؟
بيبي : مثل لونك
اسكندر : بيبي هاي مُلاذ يمي
بيبي : صدددك ولك؟
اسكندر : و داعتج مو گلتيلي اريد اشوفها
بيبي : انطينيها انطينيها
مُلاذ : ها بيبي
بيبي : يمه حبيبة بنيتي
وين رحتن ما خليت مكان يعتب عليه
ما دورتجن بي
لا عدجن رقم لا عدجن تفلون
وجر گلبي عليجن
مُلاذ : زينين بيبي لتخافين
بس اسمه تلفون مو تفلون عيني
بيبي : نفس الشي ، تعاليلي يمه تعاليلي
فدوة اروحن الج هذا عمج الطايح حظ
طردته بس خايس يرجع على گلبي يوغف
بللت شفتي و ضحكت
حطيت ايدي على عيوني
اهتز جسمي اضحك
اسكندر يضحك وياي
دحگتله يدحگلي و يضحك
ماخذ راحته ، خزرته ، سكت
بيبي : هاي شني انسد الخط
ولج نووووويره تعاي خابريلي
مُلاذ : بيبي بعده الخط مفتوح
بيبي : جا شني وينكم اسولف وي روحي
مُلاذ : لا موجودة موجودة
بيبي : اسكندر يمه وليدي
جيب هاي البت وياك خل ابوسها
اشتاقيت لخدودها
اسكندر : حجيه انا مشتاقلها كلها
دحگتله خازرته
شلت الجنطه بمعنى "اضربك بيها هسه"
بيبي : انجب ، ساقط ، خرنكعي ، اغم
جيبها و انجب ديرن بالك تچلمها چلمه
اكسر العوجيه على ظهرك
اسكندر : حجيه خلص رصيدي
جايبها و جاي
مُلاذ : هيو هيو شو انت تقرر من كيفك
اسكندر : هيو بـ عينج لا الطخ راسج بالجامه
علمود الحجيه گلتلج
سد الخط و حرك السياره
بالطريق حط كاسيت بمسجل السيارة
انفتحت اغنية
يغني وياها ، يدحگلي
مُلاذ : اسكندر اذا حسيت عينك عليه بعد افكسها
دور وجهك و دحك للطريق
اسكندر : مُلاذ احبج
مُلاذ : استغفرلله و اتوب اليه
اسكندر : ليش ما تحبيني وين الغلط بيه
مُلاذ : اسكندر شوف انت تجبرني
اطلع لساني عن السيطرة
خويه دحك انا وياك ما نرهم
و عيون اختك ما نرهم
انا لا اريد احب و لا انحب
و لا اتزوج و لا شي
اسكندر : زين ليش فهميني ليش؟؟
مُلاذ : اسكندر انت تذكر سوالفك لو ماتذكر؟؟
اصلاً بعدك مستمر بيهن !!
اسكندر : شنو سوالفيي؟؟
مُلاذ : لك شنو ؟ شنو سوالفي؟؟
ماتذكر روحك لمن دفعتني على بوري المي
لان حجيت وي جسار و حسن
و جانوا يتشاقون وياي و يلعبوني !!!
لو لمن حاولت تجويني
لان ابو المحل گلي النستله الي ببلاش
لو من بفاتحة ابوي گلبت الجاي عليه
حتى انجوي و ما اطلع كدامهم !!
بعد تريد اعد ؟؟
انتهت بيك و انت فوكاي
و انا بغرفة اختك اسكندررر!
بغرفة اختك ، بت عمك انا و امانه يمك
اجيت تبوسني ؟؟
بالحرام و بدون ما ارضى بالغصب
مستفرد بيه و تدحگلي و انا نايمة !
كم مره حاولت تمد ايدك عليه ؟؟
كم مره حاولت تلمسني و تبوسني بالحرام؟
اسكندر شنو احب منك انااا؟
شنو يلي تريد اله مقابل ؟
مسح وجهه بأيده
ضرب الستيرن
- ما تنسين ما تنسين
مُلاذ : طبعاً ما انسى!!!
شنو يلي تريد انساه؟
شنو السهل من ذني حتى ينسي؟؟
انا وياك ما نرهم طلعني من عقلك
انساني ما اريدك
ما اشوفك غير ابن عم لا اكثر و لا اقل
اسكندر : جسار و حسن و سلطان
شلون تشوفيهم؟؟
مُلاذ : اشوفهم اخوانييي
لان و لا واحد بيهم سوا سوايتك
سكت بلا ما يحجي شي
مُلاذ : انطيني خل اخابر امي
اسكندر : مين تخابريها غير ماعدكم جهاز؟
دحگتله : اشتريت
اسكندر : منو اشترالج؟؟
مُلاذ : انا اشتريت
دحگلي رجع دحك للطريق
اسكندر : منيلج فلوس ؟
مُلاذ : اشتغل
اسكندر : شنو تشتغلين؟
مُلاذ : اشيل سمنت
دحگلي و خزرني : مُلاذذ!
مُلاذ : هسه انت شعليك انطيني الجهاز خل اخابر
انطانياه اتصلت على امي
گلتلها اتاخر و رايحة لـ بيبي
سديت الاتصال ، رجعت اله الجهاز
اسكندر : رقم منو هذا ؟
مُلاذ : رقم امي
اسكندر : تستخدمين الجهاز انتِ هم؟
مُلاذ : اي
اسكندر : شوكت تستخدمي ؟
مُلاذ : اسكندر؟
اسكندر : شبيج جاي اسولف وياج
مُلاذ : من احد يتصل عليه اخذه
اسكندر : منو يتصل عليج؟
مُلاذ : غاده صديقتي ، نور اختك
اسكندر : عادي اتصل عليج باي وقت ؟
مُلاذ : لا
دحگلي و دار وجهه
اسكندر : من كل داخلي اتمنى اكطعج هسه
اسوي كل الاريده ، بس اشفي غليلي
مُلاذ : مد ايدك عليه اذا ما افصمها الك
و عود خل يفيدك الي بداخلك و غليلك
وصلنا لـ بيت اهله
فتح الباب و دخلت اول مشافتني نور
اجتني تركض سلمت عليه
ابتسمت ادحگلها مشتاقتلها
طلعوا عمي و مرته يسلمون عليه
سلمت عليهم من ورا خشمي عبرتهم و دخلت
فتح اسكندر باب غرفة بيبي
اول ما شاقتني انرسمت ابتسامة على وجهها
فرحتها بينت باللمعه يلي بعيونها ، بوستني
ظلت تسولف وياي
تعاتبني لان طلعت
و لان ما سئلت عليها
بعد فترة جرت راسي نومتني على رجلها
دمعتها على خدها ، بعد ما استذكرت ابوي
مسحت على شعري بهدوء بايدها
و بـ نبرة حنينه تغنيلي بيها
غمضت عيوني للحظات
شعور الامان يلي افتقدته حاوطني
بـ لمسات بيبي ، غفيت كأنوا منايمة من قبل ابد
تراود بـ احلامي
ايد ابوي تمسح على شعري
لمن وصاني الفراشات ، الظلام
اصوات الرصاص .
فزيت مرعوبه
بيبي تسمي على راسي و تهدأني
نور بأيدها كاسة مي
رفعت نظري دحگت لـ عمي و مرة عمي
يلي واكفين بالباب يدحگولي
اسكندر : شبيج كل ما تنامين تدمعين؟؟
مسحت وجهي دحكت للدموع الي مبلله ايدي
قنعت نفسي بفكرة ما ابجي انا
و هاي الدموع دتنزل بسبب الاحلام ...
ترخصت من بيبي
طلعت وصلني اسكندر للبيت
طول الطريق استمر يعبر الي عن حبه
يلي ما اريد اسمع عنه شي
رجعت للبيت ، صار اسكندر كل اسبوع يجينا
و يسئل علينا امي جانت مثكله وجهها عليه
بعدين انقطعت اخبارة و ما اجا
عرفنا هو يلتحق لان صار ضابط
بدء بالليل يتصل عليه
اتحجج بالدراسة و اسد الاتصال منه
بسبب مبالغته بالكلام عني
و انو انا ظالمته و يبلش يغلط بحجة الشقة
من ما يشوف مقابل مني
يصير يعيط و يتعارك
و يعبر عن شكد يتمنى يأذيني ..
طلعت من بيتنا رحت لـ غاده
دكيت بابهم ، اتصادر لمسامعي صوت غادة العايق
غاده : منووو؟
مُلاذ : ابو السمنت
غاده : ههههههههه
فتحت الباب دحكتلي تضحك
غاده : عندج مشاكل وي السمنت
مُلاذ : اي قوية و ما تنحل
غاده : ادخلي
مُلاذ : بدون ما تكولين اصلاً
دخلت سلمت على خالة جنات
كعدنا انا و غاده بغرفتها
مُلاذ : غردي شتريدين
داكه عليه من صباحيات الله تريدين اجيج؟
غاده : وجع عابت لهاللسان شطوله
جان لازم من انتِ و صغيرة
خالة فيروز تكص لسانج
مُلاذ : شوف منو يحجي
غاده : عمي وين لو عندي لسانج
جان من زمان امي شمرتني بالشارع
مُلاذ : انتِ؟
غاده : ايي
مُلاذ : هسه احجي زقزقي شتريدين ادرسج
غاده : اوكفي اروح اجيب حبشكلات
طلعت و عافتني
رجع دخلت ورا فتره ايديها وره ظهرها
ابتسامة على ثغرها توسعت بشكل لطيف
غاده : غمضي عيونج
عكدت حواجبي مستغربة ، ما فاهمه
مُلاذ : شكو؟
غاده : غمضيي مُلاذ
مُلاذ : لا حول و لا قوة الا بالله
غمضت عيوني : يلا غمضت
اختفى صوتها للحظات
و رجع اتصادر لمسامعي
غاده : فتحي
فتحت عيوني دحگتلها
اشرت بعيونها على ايديها
دحگت للعلبة يلي بين ايديها
مُلاذ : شنو هاي؟
غاده : هديه
مُلاذ : هدية شنو ؟ عيد ميلادي اليوم؟
غاده : لا ، لا ، بس ردت اخلي شي مني يمج ذكرى
مُلاذ : المن تخلين ذكرى هو انتِ موجودة ٢٤ ساعه
شالت الكتاب
غاده : مُلاذ و الله كلمة وحدة بعد
انيم الكتاب براسج ، شوفيها و انجبي
بللت شفتي تشكلت ابتسامة خفيفة
على اطراف شفتي ، فتحت العلبة
دحگت لـ اصباغ اظافر ثنين
و سوار وياهم
رفعت عيني ادحك لـ غاده
غاده : حلووات؟
مُلاذ : كلش حلوات
عبست ملامح وجهها : لا تجاملين
مُلاذ : و الله حلوات تدرين بيه ما اجامل
غاده : خل اصبغلج
مُلاذ : ما احب اصبغ
غاده : لعد المن اشتريتهم؟؟
مُلاذ : ذكرى ، و انا ما استخدم الهداية اصلاً
دحگتلي گالت بنبرة
توضح عدم اقتناعها : حلوات ؟
مُلاذ : و داعة امي حلوات
ابتسمت ابتسامة واسعه
كمزت يمي على الجربايه
غاده : يلا درسيني ..
صرت اشتغل بمطعم
رغم بالبداية ما قبلوني بس بعدين قبلوا
يومين اشتغلت
بالصدفة اجن صديقات سُرى
لمن شافوني اشتغل صارن يزعجني
يصيحن "اليتيمة" هالكلمة ما تجرحني ابداً
ما اعرف ليش همَ جانو يفكرون
راح ابجي او انقهر من يگلولي هيج
وصلت حدها لمن وحدة منهم
گالت
-ديلا هو كله ابوج إلياس
ابتسمت ادحگلها شبكت اصابيعي بـ بعض
نطقت بصوت هادء
مُلاذ : تريدين اراويج بت إلياس شتسوي؟
بعدها ما متحضرة
جريت شعرها بأيدي
انتهى بيه اليوم مطرودة
بعد ما ضربت وحده منهن
الثانية طمست راسها بالماعون
شمرت العصير بوجهه الثالثه
بدت امتحاناتي للسادس اعدادي
و جان مركزنا الامتحاني بـ كُلية طب
غادة مركزها الامتحاني مختلف
بغير مكان
بعد ما خلصت الامتحان
الطريق يلي امر منه حتى اروح لـ بيتي
بي بيتها دحگتلها كاعدة تبجي بالباب
عرفت السبب
تقدمت كعدت يمها
مُلاذ : هسه هو امتحان عليمن گلبتي الدنيا ؟
غاده : مُلاذ رح ارسب
مُلاذ : لا تفاولين على روحج
ان شاء الله يساعدونا بالتصحيح
طولي بالج و اهدئي
غاده : شنو اگول لـ امي؟
مُلاذ : كل شي لا تگولين
لو تطلعلج حباية اذا ضميتي سالفة
ضربتني على ايدي
رفعت ايديها تمسح دموعها و ضحكت
اجا وقت اخر امتحان وزاري
دحگت لـ ملاك يلي علكنالها مغذي
مصخنه نار ، عيونها تدمع من الصخونه
جمعت قريب المبلغ مره ثانيه
و كثفت شغلي اكثر من المرة القبلها
صرنا ما نبيع اللبلبي بس بالمدرسة
خالة جنات تبيعه للجوارين هم و تنطينا الفلوس
ساعدتنا هواي شعور الامتنان اتجاهها
دائماً ظل بداخلنا ، مستحيل ننسى موقفها هذا
غاده صارت تشتري سوارات
و تبيع لبنات المدرسة
بقى مبلغ كلش قليل
حاولت ادرس للامتحان
بس درست نصة الباقي ما كدرت ادرسه
لمن شفت امي تبجي من وجع راسها
علاج الشقيقة ماكدرنا نشتري هالشهر
ملاك فجأه بليل اختنكت
و صارت گوه تجر النفس
بكل دقيقة تمر جان وضعها يصير اصعب
خلال مرور ساعات الليل
تجننت ما جنت ادري شنو لازم اسوي
وصل وضع ملاك للخطورة
صار وجهها ازرك
امي كدامها و مكمشة بيها تبجي
جسمي و عقلي اتجمدن
اتصلت باسكندر ، اجا اخذنا للطوارئ
لمن وصلنا حطوا لـ ملاك اوكسجين
عرف اسكندر ملاك مريضة
بمرض ثقب القلب
و عرف بالفلوس يلي انباكت
استمر يحجي عليه لمدة ساعه
شلون ما كلت الهم ؟
ليش ما كلت الهم ؟
ليش مطلبت المساعده منهم ؟
اخير شي ما تحملت و عطت بي
رجعنا للبيت
غفيت يم ملاك من التعب
فزيت الصبح
بعد ما اتمرر بعقلي و انا نايمة
انو عندي امتحان
لمن صحيت انصدمت بالساعه
بعد ما بادي الامتحان بس ما باقي شي
المسافة منا للكُلية يلي امتحن بيها هواي
شلون لبست ما اعرف
بس كل خطوة خطيتها
جنت اركض ركض بيها
استغربت لان غاده
ما اجت الي ، فتحت الجهاز
دحكت للاتصالات يلي منها
و بسبب نومي العميق ما سمعتهم
دخلت للغرفة
دحگت لـ امي يلي شاده راسها و نايمه
و تون من الوجع
فتحت الباب اريد اطلع
سمعت صوت امي يلي گالت
فيروز : اخذي الجهاز وياج مُلاذ
مُلاذ : ليش؟
فيروز : اخذي يمه
اتصل عليج من خالتج جنات ، خاف تتاخرين
مُلاذ : تمام
سمعت صوتها تبجي من وجع راسها
ما كدرت ابقى يمها ، متأخره كلش
طلعت على الشارع بس اريد اشوفلي سياره
ماكو و لا طير بس انا واكفه بالشارع
رفعت ايدي ادحك للساعه
قرب يصير وقت الامتحان
حطيت ايديه على راسي بعجز
گلبي وجعني ياربي ساعدني شلون اروح هسه
احاول احسب المسافه و شكد اطول
انطلقت اركض بكل قوتي بس اريد اوصل
عبالك مخبله اركض وحدي بالشارع
شعري يتطاير وراي
وكفت لازمه كليتي ، احسها راح تنفجر
ريكي يبس ، الهث
نبتت اصابيعي بالجهه يلي بيها كليتي
قاومت الوجع ، رجعت اركض
شفت تكسي مر اشرت اله وكف
صعدت بسرعه : لجامعة الـ^^^^^
عاينلي بالمرايه بنظرة ابد مو راحه
هز راسه : من عيني
سكتت مجاوبته
بدا يمشي بالسياره ، كل شويه اگله يستعجل
عين على الساعه و عين عالطريق
فتحت الجنطه اطلع فلوس
اول مفتحتها ما لكيت و لا ربع بالجنطه تصفر
فكيت عيني بوسع
استذكرت نسيت الفلوس على الميز
صفكت وجهي بايدي حيل
شلون اكله نسيت الفلوس
مُلاذ : خويه طلعت ناسيه الفلوس
و الله ما ادري بيهم و لا الحك ارجع
التفت الي نظراته كلها شر
- زين نعوض غير شي بدال الفلوس
عكدت حواجبي : شنو!
صف على صفحه ، التفت الي بكامل جسمه
انا كاعده بالكشن الورا
قرب ايده خلاها على رجلي
توسعت عيوني بصدمه ادحگله
شطت تخبلت هذا شجاي يسوي !!
رفعت الجنطه ضربته حيل على وجهه
انطبع سحاب الجنطه على وجهه
صاح بصوت عالي : لج سا***
-قذرررر خايس كو***
منحررف دنعل اليوم والديك
متحرشششش ولك خايسسس
شبعته دك بالجنطه
هو يفشر عليه ارجع ارد الفشوره عليه
دحگت للشارع
فتحت الباب ، نزلت اركض
فتح باب السياره نزل يركض وراي
انا اركض انلوت رجلي
المكان الاحنا بي صاير فرع
من هالفرع اطلع للـكُليه
روحي شاغت ، التفتت لكيته وراي
جرني من ايدي حيل
مادري شسوي ، دفعته
ضربته على رجله برجلي
دحگت اكو خشبه مشموره بالكاع
رحتلها بسرعه اخذتها
رفع ايده عليه يريد يضربني و يفشر
ضربته حيل بالعودة بحيث انكسرت براسه
صيحت بصوت عالي
مُلاذ : متحرششش قذررر
انت منوووووو و تمد ايدك عليه
خلال ثانيتين مشفت غير المنطقة التمت علينا
طلعو زلم دحگلي و احد منهم
-خير خويه خو ماكو شي ؟
بلعت ريكي ادحگله
و ادحك للسايق
لا ما رح اكول ماكو شي و اعبرها
مُلاذ : متحرش قذرر
دحگولي الكل مصدومين
الرجال الواكف كدامي يمه طفل
حجا و هو يعاين للسايق يلي بالكاع
خده انشك بـ خشبة العوده
- سلام جيب الخيزرانه
السايق فك عيونه بوسع
يريد يلحك يكوم بعد ما يكدر
كلهم التمو عليه التفت الي الرجال
-كملي طريقج خويه انا اتفاهم وياه
ابتسمت : متقصر
طلع الطفل ، بايده الخيزرانه
انطاها للرجال درت وجهي امشي
مسمعت غير صوت صريخ السايق وراي
اعرج و الهث گلبي يوجعني يدك سريع
رفعت الساعه ٨ دقايق !!! ٨ دقايق ع امتحاني
قسيت على روحي ، كملتها ركض للجامعه
بحيث من كد ما دست على رجلي
حسيت عظمها اتهشم مو بس انكسر
بـ اخير دقايق لكيت روحي بالكُليه
النفس يصعد ما ينزل
كملتها اركض و اعرج لحد ما وصلت للقاعه
بـ اخير دقيقه شمرت جنطتي بالكاع
دخلت القاعه
دحگتلي المراقبه و عكدت حواجبها
-وين جنتي ؟؟
-ست رجلي ملويه
اجيت اركض كوه كدرت اجي
دحگتلي لـ ثواني مشيت خطوه
حتى تشوفني اعرج
اجت فتشتني
- فوتي
دخلت ، احس روحي مكسوره على روحي
اتناسيت كلشي ، كعدت ادحك لـ الاسئله
فركت وجهي بس داريد افتهم شي
و احل حليت كل الاعرفة
عصرت مخي عصر ما اتذكرت
الاسئله نصها من مواضيع مالحكت اقراها
احتركت روحي حرك
بدوا الطلاب يطلعون
بقيت بس انا ، انطوني وقت اضافي
بنص حل السؤال الاخير ، سحبو ورقتي
ظليت ساكته ما انطيت اي ردة فعل
اجت نورس تركض بعد ما طلعت الدكتوره
نورس وحدة من صديقاتي
لكن صداقتنا عاديه مو قريبات من بعض
طلعت من القاعه اعرج
نورس لازمتني تمشيني
كعدنا بالحديقة
نورس : شبيج شصاير ليش تاخرتي ؟
مُلاذ شبيها رجلج؟؟
دحگتلها مسحت وجهي
مُلاذ : ما صاير ، اريد شي الف رجلي بي
نورس : اوكفي هسه اجيبلج
طلعت بسرعة تشوف لفاف
صفنت مسحت وجهي
اتذكر شلون حاول سايق التكسي يعتدي عليه
اعصابي ترجف ، كل ذرة بجسمي ترجف
اجت نورس ورا فتره
انطتني مي ما شربت
طلعت الباندج رادت تلف رجلي ما خليتها
اخذت الباندج
و اخذت منها مكص صغير حاطته بجنطتها
تكص بي حواجبها مدري شتسوي بي
كصيت الباندج
- يااا لج ليش كصيتي؟
لفيت الباندج لفتين على المكان اليوجعني من رجلي
و ضبيتها ، شديته رفعت راسي
دحگت لـ نورس
- حتى اكدر البس حذائي
كمت ، لبست حذائي
- ليش انلوت رجلج؟
-جنت مستعجله و انلوت
-ما مصدكتج
محجيت شي خطيت خطوة وحده
صار صوت الرعد
رجعت برجلي خطوة لـ ورا
نورس : يول حتمطر يمااا
رن تلفون نورس ردت بسرعه
نورس : اجاني بابا تعالي وياناا
يلا خلي نوصلج
هزيت راسي برفض : لا رح يجيني ابن عمي
- اكيدد؟؟
هزيت راسي بمعنى "اي"
تقربت عليه تريد تحضنني
ابتعدت ، حكيت راسي
ابتسمت
نورس : ما تعودت
-مو شي شخصي مجرد ..
قاطعتني : فاهمتج
هزيت راسي بقبول ساكته
طلعت و هي تسويلي "بيباي"
سويتلها نفس الحركه
الدنيا ترعد ، فجأه زخ مطر قوي
صارت السما نيليه على سوده
جو كئيب حاوطها
مطر حار بس يبرد الجسم
الدكاتره ، المراقبين صاروا يركضون
ناحية باب الكُلية
يريدون يلحكون يطلعون قبل لا يتبللون
اتقفلت كل ابواب القاعات
اتبلل كل جسمي ، البروده ىسرت بعظامي
دحگت لـ بنيه ابوها اتجهه الها
تبين ملامحه الخوف عليها من المرض
رفع سترته ، ركضت البنيه ناحيته
دخلت جوا سترته ، اختفوا عن نظري
ابتسمت للـ لحظة لمن اتخيلته ابوي
نزلت راسي ، ماحيه الخيال من كدام عيني
حرمت حتى الخيال على روحي
خاف بي قطرة امل اتجرعها
دك جهازي رفعته ادحگله
حاولت اغطي حتى ما يوصله مي
دحگت رقم خالة جنات ، رديت عليها
جنات : مُلاذ تسمعينيي؟
-اي خاله صاير شييي؟؟
-ملاك گلـ....
بوسط كلامها راح صوتها : الوووو
دحگت للتلفون مطفي
كله مي ، رفعت ايدي كونت سد اله عن المطر
حاولت افتح التلفون
بس اريد اشوف ملاك شبيها
طلعت بسرعه مشيت للحديقة يلي بالجامعه
حتى اروح للباب ، اطلع من الكُليه
امشي ، اضغط بـ دگم التلفون
ايدي على رگبتي
رفعت ايدي من رگبتي
حطيتها على شعري
اتلمست الماشه
لزمت شعري قويت ايدي المتشدده على شعري
اردد بنبرة خوف : يارب مابيها شي يارب
ما بيها شييي يارب ...
ادوس بالدكم و كل تركيز صبيته ع التلفون
فارت روحي ، عطل مديشتغل
ادحگله مستمره اضغط بالارقام و الغلق و الفتح
ما حسيت غير على ردمه قويه
انضربت بجتفي دحكت للجهاز
طاح بالكاع اتفلش
رفعت عيني ادحك للـ ردمني
بسبب الجو المظلم و المطر و الضباب
ما اشوف وجهه عدل اصلاً ما اشوفه
صرخت متنرفزه : شجاااااااك!!!
-ما قص...
حسيت نار گبت بصدري ياربي شهاليوم
ما سمعت اي شي گاله
اذاني صارت تصفر
روحي بادت كوه وكفت على رجليه
سحبت غراض التلفون المتطشره من الكاع
هوا عالي شعري يطير ، يرجع يلزك ع وجهي
من المي
مشيت بسرعه
اتذكر حال امي و ملاك الصبح و تعبهم
افكر ليش ما هذا التعب بيه ولا بيهم
يتردد بـ اذني صوت ابوي من جهه
إلياس : مُلاذ انتِ من بعدي تفتهمين بابا؟
مُلاذ ، ملاك و فيروزه بامانتج
و انا اعرف انتِ كد الامانه و تصونيها
فيروزة إلياس و ملاكه بامانتج لذة زين ..
إلياس : مُلاذ ابد ما رح تبجين و تضعفين اوعديني..
انطيته وعد ما ابجي انطيته وعد ما اضعف
انطيته وعد انفذ وصيته ، بدون ما افتهم اي شي
مُلاذ : وصايتك صعبه يابه هدت ثلثين حيلي
نار تگب بضلوعي
انحصرت الدموع بعيوني
رددت مترجيه نفسي حتى لا ابجي
مُلاذ : ديربالج ديربالج
ديربالججج ديربالج
تعثرت خطواتي كوه واكفه على رجلي
وجع دمر گلبي دحگت اكو صبه ناصيه
المكان فارغ ، الريح تهز الشجر هزز
كعدت على الصبه
رجلي دمرتني من الوجع
شلون هلكد مشيت ماعرف
سندت ظهري على الحايط
الدنيا على فد زخه
شعري مبلل ملابسي مبلله
البرد يدك بضلوعي ، متدمره طين
رجلي توجعني
بالي يم ملاك و امي
من جهه اتذكر وصاية ابوي و شلون ما نفذتها
و لا حافظت على امانته ما جنت كدها
ضربت بايديه على الصبه
اختنكت بغصتي
رفعت راسي ، اتكطع بلعومي
شفايفي ترجف ، ماريد الدمعه تنزل مني
الغصه حسيتها تشلع جزء من بلعومي
اعرف اذا بجيت
اذا عفت نفسي للبجي مارح اسكت
رح انهار ، اتدمر ، ما رح ارجع مثل قبل ابداً
خلال هذيج اللحظات
ادركت يلي امر بي ابداً مو سهل
و انا بعمر الـ 17 سنه بعدني
ادركت شنو من مسؤولية
تحملتها و انا بعمر عشر سنين
ادركت وصاية ابوي
جانت اكبر من طفلة بالخامس ابتدائي
هي غصه هي شهكة حزن بـ جسم يرجف
دموعي جرت على خدي
رافعه راسي للسما ، ايديه على الصبه
لامه رجليه كاتمه صوتي
بس المناشغ ينسمع مني
مسحت دموعي
اتغصغص روحي محروكه
لزمت بالحايط
اصابعي شخطت الحايط حتى اكدر اكوم
كمت اعرج لـ باب الكليه الرئيسي مسدود
اصلاً شلون طلعو
بلا ما يتأكدون اكو طلاب لو لا !
و الحارس شلون يروح ؟
انكطع المطر فجأه
لزمت بمحجر الباب ، طفرتها
طحت بالكاع صرخت من وجع رجلي
تمنيت اضرب راسي بالكاع و اموت
الدنيا عادتني بهاليوم
بكل الايام معاديتني اصلاً
رفعت روحي من الكاع
امشي و اعرج ، اضغط على وجعي
دحگت لـ رداني كلها دم
ايدي انشگت من طفرت
كملت مشي و انا احاول اصلح الجهاز
بس ما ينفع
مشيت وحدي بالشوارع
الناس كلمن ساكن بـ بيته و ما طالعين
عدا الطلاب الي يمتحنون
يعرفون اليوم مطر بس انا حظي ...
مشيت هواي بلا ما احسب دقايق أو وقت
مجرد امشي بالشارع وحدي
رايحه لبيتنا كليتي انشلت من الوجع
كوه و بالالف يا علي
يلا شفت روحي كدام بيتنا
جريت نفس ، تنهدت ، دخلت للبيت
دحگت البيت فارغ
عكدت حواجبي مستغربه
انطرقت باب البيت ، طلعت فتحتها
صار اسكندر بوجهي و بسرعه عاط
اسكندر : وين انتِ ما تكلييييليي!
-لا تصيح !!
دحگلي و دحك لـ ملابسي
اسكندر : هاي شصايررر ليش هيج متطينه؟
فركت وجهي مالي خلك احجي
- ماكو شي مطرت الدنيا عليه
-ما تخابرينيي اخذج شنو ماعدج عقل انتِ!!
-اسكندر للمره الاخيره اكلك لا تصيح
امي وين ملاك ويين؟
اسكندر : مُلاذ صوتج لا يعلى
مُلاذ : ما عندي طاقة اجادلك
امي و ملاك وين؟
اتحمحم و نزل راسه : بالمستشفى
عكدت حواجبي : ليشش شكوو؟؟
-ملاك تعب گلبها شوي
فتحت عيوني مصدومه : شبيهاا ملاك
شبيها تعبت ، اسكندر حاجيني
خابرتني خالة جنات بس التلفون عطل
اسكندر : مابيها شي
بس راكضه شوي و تعبانه
ردت اطلع منعني
مكون حاجز بأيده ، يفصل بيني و بين الشارع
-وين؟
مُلاذ : اخذني لـ ملاك
اسكندر : ادخلي بدلي اول ملابسج ناكعه
مُلاذ : شابدلل و ملاك بالمستشفى؟؟
اسكندر : كلتلج ما بيها شي
ادخلي بدلي ملابسج بسرعه
يلا ما تكدرين ترحين هيج
دحگتله بطرف عيني
دخلت اعرج للبيت نفشت كنتوري نفش
اعصابي ترجف يا ربي كلشي و لا ملاك
دخل اسكندر وراي
اسكندر : شبيهاا رجلج
شصاير بحالج ما تكليلي ؟
-مابيها شي تاخرت عن الامتحان
ركضت و انلوت
اخذت اي شي كدامي عفت اسكندر
و دخلت للحمام فتحت لفاف رجلي
دحگت لـ ايدي تنزف ، سبحت بسرعه
طلعت لبست
لميت شعري ذيل حصان
دست على رجلي
روحي راحت من الوجع
رجعت شديت الباندج
اجاني اسكندر : لزمي بيه
ظليت ساكته مجاوبت و لا لزمت بي
اخذ ايدي بسرعه ، دخلها بايده
مُلاذ : اسكندر انا امشي ماك..
اسكندر : اشش
مُلاذ : ما اريد اسكندر !
مخلاني احجي
اخذ جاكيت من الكنتور
ظل كامش ايدي حيللل
ساندني عليه صعدني بالسياره
صعد هو و انطاني الجاكيت : شسوي بي ؟
اسكندر : البسي فوك ملابسج
مُلاذ : ماريده
اسكندر : مستحيل اخذج للمستشفى هيج
حطي على جلدج لبسج ابد مايعجبني
رفعت حاجبي ادحگله هذا شبي
-عادي ليعجبك شعليه
اسكندر : البسي
-اسكندر اخذني لـ ملاك
-اخذج بس البسي
گلبت عيوني بنفاذ صبر ، لبست الجاكيت
شغل السياره ، طلع بيه للمستشفى
هو يحجي و انا روحي تلوب
خلص الوقت نظرات
و كل شويه ذب كلمه على لبسي
- اسكندر كافي
اسكندر : مو كافي
مُلاذ : كافي اذا ما تسكت نزلني هنا
اسكندر : مُلاذ اكسر راسج و الله احجي عدل
مُلاذ : انت شنو تهددني ؟!
اسكندر : كافي اسكتي
مُلاذ : بطل حجي و اخذني لـ ملاك و اسكت
اسكندر : يلا اش
انداريت عليه خزرته ، وصلنا للمستشفى
نزلت اعرج من السياره
بس اريد اوصل لـ ملاك
بعدني دامشي
انعتيت من ايدي : ع كيفج
مُلاذ : وين ملاك؟
لزم كف ايدي : اسكندر عوفني
اسكندر : كلمه ما اريد باعي الزلم
الزمي ايدي و امشي
مُلاذ : انت دتحجي صدك ؟؟
من كل عقلك الجاي تسوي
انت حاير هسه بهاي السالفه
و انا روحي رايحة على ملاك !
تقرب عليه و همس : اشش امشي
ردت اوخر ايدي كمشها اقوى و مشى
احس على نزيف الجرح من يم عكس ايدي
غلست و ما حجيت
دخلنا لوحده من الردهات ، امي فزت عليه
دحگت لملاك ممدّيها ، معلكيلها مغذي
رحت عليها
مُلاذ : ملاكي شبيج ؟
ملاك : مُلاذ گلبي وجعني
مُلاذ گلبي وجعني كلشش
حطيت ايدي ع خدها
مُلاذ : اشش مشمش لتخافين ما بيج شي
هسه شون صرتي ؟؟
ملاك : خف الوجع
-هواي لو شويه؟
-هواي
-ليش علكولج مغذي ؟
-راسي يوجعني ، كمت ابجي من الوجع
-ليش تركضين؟
غير انتِ جبيرة و تنتبهين على صحتج
سكتت بلا متحجي شي
عبست ملامحها فركت عينها
دحگت للمغذي باقي قليل بي
رحت على امي كعدت يمها
مُلاذ : هانت راح نسويلها العملية
فيروز : شبيها رجلج؟؟
مُلاذ : انلوت
فيروز : ليش؟؟
مُلاذ : طلعت الصبح متأخرة
ركضت و انلوت
فيروز : هسه نطلع و نشوف دكتور
-ماكو داعي
-اسكتي كلشي عندج ماله داعي
عكدت امي حواجبها تدحك لـ ايدي
فيروز : شبيها ايدج تنزف ؟؟
مُلاذ : ها؟
دنكت ادحك لـ ايدي
الدم مخلي طكع حتى بالجاكيت
مُلاذ : تعورت هيج شويه ماكو شي
سحبت ايدي رفعت رداني
شهكت لمن شافت حالة ايدي
-مُلاذ !! هاي ايدج ليش هيج؟؟
-مابيها شي
مخلتني احجي
وصت خالة جنات على ملاك
و جرتني لـ برا ، اسكندر يمشي ورانا
اجا دكتور حاجته امي
متخليني حتى احجي ، راوته ايدي بسرعة
الدكتور : اوووه الجرح عميق !
تعالي وياي
مُلاذ : يمه ماكو داعي
خزرتني : اسكتي ليش ماتحجين
لو ما شايفتها جان رجعنا للبيت
و انتِ ايدج تنزف
و رجلج هسه تطلع مكسورة
اسندي روحج عليه
اخذتني ورا الدكتور
-دكتور تحتاج خياط لو شنو؟؟
-لا بس تعقيم و اضمدها الها
اسكندر : خاله انا ابقى يمها
اذا تريدين ارجعي يم ملاك
دحگتلنا بـ حيرة هزيت راسي الها
بمعنى "روحي" ، دحگت لـ اسكندر
مُلاذ : انت هم روح هسه اجي وراكم انا
گال اسكندر بحده : انا باقي خالة روحي
فيروز : تمام لا تتاخرون
رادت تطلع اندارت علينا
رفعت اصبعها گالت بتحذير
-ديربالكم تتعاركون
هز اسكندر راسه
دحگتلي هزيت راسي
طلعت من يمنا
الدكتور رفع رداني
بدا ينظف الجرح
و يعقمه ، روحي تشوغ و اتاذى
كزيت على سنوني
اسكندر صار كدامي
رافع حاجبه و يخوزر
هزيتله راسي بمعنى "خير"
رفع ايده سوالي حركة "بسيطه"
دحگتله من فوك لـ جوا
و درت وجهي
كمل الدكتور ايدي
و شاف رجلي
الدكتور : روحي على دكتور الكسور
هسه اخذج انا ، بس اول لازم تاخذين اشعه
دلاني بـ دكتور الكسور
بدء يفحص رجلي
متت من الوجع ، سويت اشعه
طلعت رجلي مكسورة جبروها
وصلنا للبيت دخلنا
دحگت لـ امي و ضحكت
فيروز :شنو؟
مُلاذ : هههههههه ، عليلين
وحدة رجلها مكسوره و الثانيه هي و كانونتها
ضحكنا كلنا سويه
و كعدنا نحشش على روحنا ...
نور :-
طلعت بالباب
دحگت لـ اركان يلي كاعد بـ باب بيتهم
ارتبكت ، نزلت عيني بسرعه
لمن رفع عينه دحگلي
طلعت وراي بيبي
شافته
-شلونك يمه اركان شخبارك؟
اركان : هلاا هلا حجيه حياج الله
لزم بعكازاته مستند عليهن
بيبي : لا تتعب روحك يمه
بس ردت اسلم عليك
اركان : لا حجيه يا تعب
صارت المشية بالعكازه مثل شربة المي هههههه
ظهرت على ثغري
ابتسامة خفيفة ، توسعت اكثر
على اثر ضحكته
بيبي : هههههه يمه ابني الحليو
ابو عيون مكحله
اركان : بعد روحي حجيه
بيبي : شلونها امك ؟
اركان : الحمدلله ، تعالوا تفضلوا يمنا
بيبي : لا والله عيني اريدن اروح للسوك
و اخذت نويره وياي
دحگلي مبتسم ، وجهي حسيته صار نار
بسبب نظراته يلي مكدرت اوصفها
اركان : ولج نويره لا تخلصين فلوس الحجيه
ابتسمت وضحكت بهدوء
بلا ما احجي
بيبي : لا وين يمه هاي حسنة البيت
لو ماهيه جان من زمان هجيت
ما تسمع حسها على نياتها
ما فد يوم گالت اريد فلان شي
اركان : خوش بنيه الله يحفظها
حكيت حاجبي خجلانه
ايديه صارن يرجفن
اركان : تريدون اروح وياكم؟
بيبي : لا يمه حبيبي لا تتعب روحك
اركان : خليني اروح اساعدج خاف تتعبين
نور : لا انا وياها
ضحك و گال : زين من سمعنا صوتج ولج نويره
بيبي : ههههههههه
بلل شفته ، ضحك و هو يدحگلي
اركان : حجيه اذا خليتيها شوي بعد
تموع من الحر
بيبي : اي والله و انت الصادك
اروح انا حبيبي يمه
اركان : على راحتج حجيه
اذا احتاجيتيني رقمي يمج
بيبي : ما تقصر حبيبي
ابتسم هز راسه الها
تقدمت بيبي كدامي تمشي
ردت امشي وراها
صار وراي ، حلگه يم اذاني همس
اركان : ترفه كلش انتِ
درت وجهي دحگتله صرنا وجهه بوجهه
دحك بعيوني ، ابتعد بسرعه
ظليت بمكاني مكدرت اتحرك
حسيتني تجمدت ، بنفس الوقت محتره
مشاعرر مخربطة تتضارب بداخلي
فزيت على صوت بيبي
يلي تصيحني وراها
رحنا انا وياها للسوك
و بعقلي تراكمت كل اللحظات يلي شفته بيها
گلبي حسيته يدك حيل
و لـ اول مره افرح بهالطريقة و اخجل...
مُلاذ :-
شلت الجبيرهرمن رجلي
و ايدي صارت بيها ندبة الجرح
بعد ما خلصنا الامتحانات
بقينا منتظرين النتائج
ابتسمت بفرح
لمن شفت معدلي "٩٤"
ردة فعل امي جانت اقوى
صارت تبجي من الفرح
و تحمد الله و تشكره و تحضنني
ملاك تطفر و تصفك
باست امي كصتي
وشمت شعري حيل و تحمد الله
رحنا على غاده
طلع معدلها "٩٦"
مُلاذ : لج ادبسز تقرين من وراي اخلاق سز
غاده : مُلاذ خاف غلطانين بالنتيجة
مُلاذ : انجبي ولج ما غلطانين
غاده : معقوله هاي اناااا ؟؟؟
مُلاذ : انتِ شاطرة بس ما تقرين
استوعبت غاده بعد فترة
اشتغلت هلاهلها مال عايقات
طشو خالة جنات و امي الجكليت علينا
باركنا لـ بعض و الفرحه مسايعتنا
جمعت فلوس العملية كاملات
و سوينا عملية ملاك
جانت اكبر فرحة بحياتي
و رغم هذي الفرحة
جانت مشاعر القلق و الخوف بداخلي
الكل تواجد و الكل عرف بمرض ملاك
بيبي و امي تگابلن يبجن خايفات
و الحمدلله نجحت العملية
بمرور الايام وضع ملاك تحسن
و صار افضل
مرت ايام يتخللها الدفو و الراحه بحياتنا
تعلمت على الخياطة
صرت انا اخيط و ابيع للجوارين
و شوية شوية بديت ابيع الي اخيطه
للمحلات الملابس يلي قريبه علينا
و اخيط بكمية جبيرة و يعجبهم شغلي
امي جانت خايفة يطلع قبولي قانون
لان تفكر القانون خطر و تعرف غايتي شنو
صار يلي تخاف منه
طلع قبولي قانون انا و غاده
امي على الرغم مجانت قابلة بهالشي
لكن فرحت الي
حتى لو الخوف يتخلل ملامحها و داخلها
بدت السنه الجديدة
مجتمع جديد تماماً
من كل المحافظات موجودين
علاقتي فقط تكون وي غاده تكون
ما ردت اختلط وياهم
و اساساً ما احب الاختلاط
غاده : و اخيراً خلصنا من سُرى
و من العركات مالتجن و بعد ما اركض وراج
و خاله فيروز ارتاحت
مُلاذ : ديلا عيني هي شلونها سُرى
شو جنت شابعتها كتل و ما تتوب
غاده : ذيل الجلب اعوج ..
كملت الها : ما ينعدل
غاده : هههههه
قرروا يسوون حفلة تعارف
بيننا و بين المراحل الثانيه
و بين دفعتنا
غاده : تروحين مو؟
مُلاذ : لا
غاده : مُلاذ و النبي تروحين
مُلاذ : شسوي رايحه؟؟
ما احب الحفلات تدرين بيه
غاده : و الله تروحين و تطلعين كدامي هم
مُلاذ : دولي ما اروح
غاده : ارفس ببطنج هسه هنا
ترحين و رجليج فوك راسج
اصرت اروح
و انا ما اريد اروح
امي حاولت تقنعني وياها
رغم اعرف امي ماتريد اروح
و تخاف اختلط بـ ناس مو زينين
بس نفس الوقت تريدني اتونس و اغير جو
وافقت اروح بعد محاولات غاده و اصرارها
و توسلاتها و كفخاتها ...
فرشت غاده كنتوري على جربايتي
كعدت تدورلي ملابس
و تريد البس فستان
خصمتلها الوضع
مُلاذ : غير البنطرون و القميص ما البس
غاده : الغسل بومه
كل يوميه محتفلين احنا على اساس
مُلاذ : دمشي ولي الي خلك
غاده : خاااااااله
مُلاذ : وجع مو صوت بنية
صوت بـ****
دخلت امي للغرفة
و تسمي بالله
-شنو شبيجن؟
غاده : خاله موتتني جزعتني
خبلتني لا تقبل تحط مكياج
لا تقبل تلبس فستان
مُلاذ : انتِ ياهو الگالج احنا رايحين عرس
حتى البس فستان و اروح افرفر بي
جني مخبلة
غاده : لج البنات كلهن اتفقن يلبسن
فساتين ردن طويلة انتِ شبيج مجلوبه؟؟
مُلاذ : خاب دولي
غاده : خاله حاجيها
فيروز : على اساس تقتنع
هو من جانت طفلة
اتوسل بيها بالاعراس تلبس ثوب
ما تقبل تلبس تريديها تلبس هسه
مُلاذ : اموت من هاي السوالف
فكيني غاده و الله اتخبل من الفساتين
غاده : زين ما تلبسين فستان
بس تحطين مكياج و تحفين
مُلاذ : لا اله الا الله ولج عوفيني
مو زين من رح اروح
جتفوني هي وملاك
و حطوني غصب حفولي
وجهي احسه طكك ، شبعت غاده مسبات
عضيت ايدها و هي تحف
هي تصرخ و انا اعيط بيها
امي و ملاك و خالة جنات مسوياتنا سينما
كاعدات يضحكن علينا
رحت اغسل وجهي
صار نار دحگت لوجهي بالمراية
دخلت غاده وراي
غاده : تضَوين تضَووووين
مُلاذ : اضوي مو؟
غاده : اي
شلت مي بايدي و رشيته عليها
صرخت ، رجعت رشت عليه
طلعنا من الحمام ملابسنا عبارة عن مي
امي و خالة جنات دحگن النا يهزن بايدهن
جنات : من نزوجهن يعقلن
فيروز : ان شاء الله
دحگنا انا و غادة لبعض و ضحكنا
صلحت الجهاز قبل فترة
اتصلت على اسكندر لان نور معدها رقم
گلتله يجيب نور باجر للحفلة
و هو ما صدك طلبت شي و قبَل
و انا على الاتصال ويا
سمعت صوت بنيه من يمه
البنيه : ويامن دتحجي ؟
انكطع صوت اسكندر
و فجأه صار صوت عالي
اسمع اصوات بعيدة
البنيه : تنام وياي و تخابر غيررري!
منو هاييي اسكندررر
سمعتها گالت هيج
حسيت صاعقة نزلت على راسي
و اسمع صوت اسكندر يصيح
مُلاذ : الو؟
ما اجاني اي صوت
من الواضح اسكندر ظن هو سد الاتصال
البنيه صارت تبجي و تصيح
و هو يجاوبها
اسكندر : لا تحطين لـ نفسج قيمة
تعرفين كلش زين جاي اتونس وياج
لحظة سكر و اخذتج و ماخذ من قبلج خوش؟
بحلقت عيوني بصدمة
لمن صارت اصوات قذرة
تصدر من سماعة التلفون
احس كل ذرة بجسمي تجمدت
شنو من قرف يلي داسمعه !!!
سديت الاتصال فوراً
رجع بعد ساعات اتصل بس مجاوبت
اعرف اسكندر قذر
بس لهالمرحلة من القذارة ما توقعت !
ثاني يوم رحنا للحفلة
انا و غاده و نور انتظرناها
لمن اجت و دحگت بوجهه اسكندر
صار عندي غثيان ،
غلست و دخلنا لجوا
وكفنا يم وحدة من الطاولات
مشغلين اغاني ، يوزعون اكل
غاده كل ثانيه تندسني
تراويني واحد حلو
شلت الجنطه
مُلاذ : اطبع الجنطة براسج
اذا بعد ندستيني علمود واحد
يا ريتهم صدك حلوين شو جنهم قرودة
عابت الج و لذوقج
خزرتني : و النبي حلوين
مُلاذ : انجبي وين الحلاوة
شو هذا جنه ديج بس العرف الفوك راسه
ماخذ ٦ طوابق
غاده : امداج
مُلاذ : امداج انتِ
سولفت النا نور عن اركان
و كلامه عيونها تلمع بفرح
فرحت لـ فرحتها من زمان هي تحبه
من الواضح هو هم عنده مشاعر اتجاهها
راحت ورا شوي ، تدور عصاير
غاده :-
عيوني تفتر على كل الناس الموجودين
دحگت لـ مُلاذ يلي صافنه
بنفس اللحظة راح نظري
على رجال واكف بالزاوية
راودني شعور غريب
اثناء مشاهدته بوسط جهة تُكاد تكون مُظلمة
بس اگدر اشوفه ، عيونه مثبته عليها
بـ أيده كاسه بين مفترق شفايفة جكاره
اشاهده ، نظر الها بـ كامل تركيزه
على كل حركه تتحركها
مَبعدت عيني ابداً و لا كدرت ازيح نظري
على رغم بُعده و الاضواء الي تتجول فوك راسنا
هوَ بالظلام الي حيختفي من بينه
لو لا توجهه شعاع ضوئي خافت
يسمحلنا بـ رؤية زاويته
و هيَ تحت الاضواء
من بين كُل يلي موجودين
يتوضح الي عدسة عينه
الي تتجول وي ايدها
بعد ما رفعتها عدلت خصلات شعرها المُتناثر
على اكتافها بين اصابعها
رجعت الشعر النازل على وجهها ورا اذنها
انخفضت ايدها تدريجياً من كتفها
بـ حركة خفيفه ، حطتها ع طاولة
درت بـ عيوني اتجاهه ادحگله يزفر نَفس
دلاله ع الراحه ، بعد ما طَل وجهها عليه
رفعت نظري لـ عيونها الي شدد تركيزه وياهن
دحگت على المكان الي متوجهه نظرها نحوه
جان فراغ ماكو شي تنظر اله
عرفتها بحالة شرود
الافكار تتراطم بـ عقلها لدرجة ..
متعرف عيون الصگر
يلي تراقبها من ربع ساعة أو أكثر !
يتبع ...
- يتبع الفصل التالي اضغط على ( رواية جرح الأيهم ) اسم الرواية