رواية جرح الأيهم الفصل الثامن و الخمسون 58 - بقلم أيلان
"الجُــرح الثامن و خمسون"
ضرغام : مُلاذ تذبين نفسج بالتهلكه
أنتِ صدك تحچين !
مُلاذ : ضرغام و الله اذا ما گلتلي العنوان
أخابر أسد و اذا ما حچالي أسد
عندي الف طريقة اسأل بيها و يدلوني
و تلگوني كدامكم فـ أحچي
ضرغام : خطررر مُلاذ خطررررر
مُلاذ : انعل ابو الخطررررر مكانهم ويييين
شنووو يفيد الخطرر أذا أيهم صار بي شي
و الله ضرغام اي شي يصير بـ أيهم أحسبه منك
لأن أنت ما دليتني!
ضرغام : شتسوووين ترحين تحمينه شتسوين؟؟
جاي اگلچ طالع گبلنا و راح يوصل وين تلحگين؟
مُلاذ : بس گلي مو رح أموت بس گلي
سكت لحظات محتار و حچا العنوان
سديت الاتصال و ركضت لبست عبايتي و شالي طلعت أتغصغص ، رجلية أحسهن ميتات
بس أريد أوصل لـ السيارة أركض و ما أوصل
صعدت أريد أشغلها طلعت ناسيه السويچ
غطيت وجهي ، بچيت أرجف گلبي يحترك
رجعت نزلت أركض صعدت لـ الشقة
أدور على السويچ و هو گدام عيني
بس ما اشوفة من الخوف و القلق
رحت صعدت و شغلت السيارة
رايحة للـ المكان أتصل على ضرغام مشغول
أتصل على أيهم ما يجاوبني
دموعي غرگت عيوني و أدوس للسيارة
أريد أوصل أنشال و أنركع بالگاع من السرعه
نزلت دموعي صوتي يرجف أشهك
عشر دقايق أنا أخابر على ضرغام
يطلع الي لو مشغول لو ما يجاوب
و أيهم مغلق تلفونه ، خابرت على أسد
ظل يرن يرن و ماكو جواب
صرت بـ طريق فارغ ما بي و لا بشر
رجعت أتصلت على أسد أنتظرت يجاوبني
أسد : الو ؟
مُلاذ : أسددد أسد وين أيهم
شصاااار شكو أسد أحچي
أسد : أسمعيني مُلا...
مُلاذ : أحچييييي أيهم ويييين؟؟
أسد : يابه هسه أنتِ جاي تخليني أحچي
وصلت قبل الدوريات لا تخافين أيهم مابي شي
چانو رايدين ياخذونه و أنا وصلت
و هسه جاي نشيلهم للمركز أيهم موجود
بس مضروب ضاربينه
زفرت نَفسي من حلگي بـ راحه
مُلاذ : بعده ؟ بعده هناك؟
أسد : اي
مُلاذ : لا تروحون لـ مكان جايه
سديت الأتصال وگفت السيارة
نزلت أريد أشم هوا حسيت روحي رح تطلع
كممت حلگي و دموعي تنزل
گعدت سانده ظهري على السيارة ، أناشغ
خفت خوف بـ عمري
ما أتوقعت هيچ رح أخاف على أيهم
نزلت أيديه خليتهم على ركبي
عبست شفتي يلي ترجف ، مسحت وجهي
لزمت بـ باب السيارة أريد أوگف
رجليه ميتات گوه يتحركن ، گمت و صعدت
أريد أسوق أيديه ترجف و لازمني غثيان
ضغطت على نفسي و حاولت أسيطر
سقت و أنا أفكر لو صاير اله شي
شچان صار بيه ، وصلت لـ المكان
بـ الألف يا علي ، وگفت السيارة
المكان بي دوريات بس ما أدري أيهم وينه
خابرت على أسد أجاني
مُلاذ : وين أيهم ؟
أسد : بويه أنتِ شتسوين هنا ؟
مُلاذ : أسد جاوبني بدون أسئله
أسد : هناك ودينا بعيد عن الدوريات
گلنا لا يروحون يلزمونه وياهم و يبتلي
هزيت راسي بـ قبول
گلت لـ أسد ياخذني أله ، أخذني
ظلينا نمشي و أنا رجلي ثگليه
موتتني گوه أدوس عليها أحسها خدرانه
وصلت دحگتله واگف ساند روحه ع السيارة
و ضرغام گدامه يصيح عليه و يتعارك ويا
و هو ساكت بلا ما يجاوب حرف
ضرغام : هسه أفتهمنننا روحك مو غاليه
عندك ولد مو؟ أنت عندك ولد و متزوج
شلون تخطي هيچ خطوة!
تخابرني تبشرني انه رايح قبلكم
أشكرك ارتاحيت من عرفت رايح قبلنا
بابا يكتلونك يكتلونك شنو من عقل عندك؟
ما يجاوب لأن يعرف روحه غلط
دار عيونه ساكت شافني و أنا واگفه
بهتت نظراته و ملامحه ، أتقدمت ناحيته
دحگلي ضرغام
ضرغام : نوب هاي الأجت
مو صاحيين أنتوا و الله !
أسد : سيدي تگدر تجي وياي
درت وجهي لـ أسد يأشر لـ ضرغام
عافونا و راحوا
مُلاذ : على شنو جنت ناوي؟
أيهم : منو جابچ شتسوين هنا؟
بچيت و حچيت بـ حرگة
مُلاذ : هذا يلي هامك أنت؟؟
شوف أيديه لساااا ترجف
رفعت أيديه أراويهم اله
أتقدمت عليه لزمت بـ قميصه
نظراته بارده و يدحك بـ عيني
كأنُ يقبل بـ ذنبه و يقبل بـ غلطه ، مستسلم
أيهم : الموت أسهل عليه من بُعدج
مُلاذ : شتحجججي أنت شتحجي ؟؟
لو صايرلك شي لو ما ملحك أسد
تعرف شچان صااررر بيك ؟
أيهم : غلطت المفروض أتصل بيهم لمن أوصل
رفعت أيدي ضربته حرك دمي
ضربت صدره أصيح گلبي محترك
لزم أيديه يثبتني بقيت لازمه بـ قميصه
و مشدده أصابيعي عليه
أيهم : رح نتطلك عليمن تبچين ؟ شنو رح يفرق؟بالحالتين ما موجود بـ حياتج!
بالحالتين أنتِ مو گدام عيني و يمي
و بالحالتين تكرهيني
عفت قميصه درت وجهي منه أمسح عيوني
أنداريت اله ما گادره أكتم غصتي
بچيت و حچيت بـ ضعف و أنا أدحك اله
مُلاذ : ما أكرهك أيهم ، الله ياخذني أحبك
يا ريت لو أكرهك ، ردت أموت من خوفي عليك
من طلعت لحد ما وصلت لـ هنا راد گلبي يوگف
و أنت جاي متعمد حتى تموت روحك
ليش هيچ ، ليش هيچ تسوي بيه ؟؟؟
ظل ساكت بلا ما ينطق كلمة
غطيت وجهي أمسح بـ دموعي و ينزلن
حسيت عليه لمن حضنني لـ صدره
رفعت راسي أريد أوخر منه
رجع راسي على صدره بـ أيده و هو يهمس
أيهم : اشش لا تبچين
خليت راسي على متنه
جسمي يهتز أناشغ ما أريد أبچي
أيهم : ما أريد أخسرچ
أذا أخسرچ و أظل عايش رح أموت الف موته
أموت موته وحدة أفضل بـ هواي
مُلاذ : نهيتني بـ السويته
جنت رايد تعوفني و أنا ما ألي أحد غيرك
چنت رايد تعوفني و أنا حتى أهلي تبروا مني
أيهم : ما تريديني لَـذه و لا أهلچ يريدوني
لو ميت چان حاچوج و رجعوا زينين وياچ
دفعته عني و عيطت
مُلاذ : ما أريددد أحد زين وياي
ما أريد لااا تضحيه منك و لا أي شي
بس مره وحده بـ حياتك مره وحده فكر بيه
فكر أنا شنو ممكن يصيرلي بسبب قراراتك
مُلاذ : أكبر أناني أنت ،
عادي أعيش بـ ضمير ما مرتاح اذا متت
عادي أتلوى على الكتل أبوي ،
عادي أريدك تبتعد بس تبقى قريب
عادي يصيررر بيه كل شي
المهم تكون أنت منفذ يلي بـ بالك و المهم أنت
دحگلي ساكت
و أنا أندس بـ صدرة و أحچي بـ حرگة
مُلاذ : لو ميييت لو صايرلك شي ؟
أبيل أذا يووووم واحد ما شافك يشبع بچي
أمك البعدها تريد أدهم وياها و مو زينه
أخوك الي يحتاچ أحد يسنده مو يسوي فاتحته
بس طبعاً أنت وين تفكر؟
مُلاذ : المهم مُلاذ المهم ما أخسر مُلاذ
المهم مُلاذ تصيرلي صنم و تبقى گدام عيني
المهم مُلاذ تبقى يمي حتى لو هي ما تريد
بس أجبرها عادي مُلاذ تتحمل !
أيهم : أسكتي و روحي منا
مُلاذ : ما رااااح أروووح
تريد ترجع تدورلك على أحد يكتلك ؟
شنو تريد تسوي شنو جان بـ ببالك؟؟
هز راسه بـ قبول
يحچي بـ برود ممزوج بـ الغضب
أيهم : اي جنت رايح حتى يكتلوني
ردت يلزموهم و يكتلوني عصفورين بـ حجر واحد
أنتِ ترتاحين و انه أرتاح و ينحل كل شي
مُلاذ : وااو خطة كلش حلوه
تموت و يلزموهم و العالم تتخبل وراك
المهم أنت متت هاهيه الدنيا أستقرت
أقترب عليه و هو يحچي بـ غصب
و يهز راسه بـ قبول يأكد كلامي
أيهم : بالضبط الدنيا جانت رح تستقر بـ موتي
و أنتِ جنتي رح ترتاحين !
خلاني أتهستر بـ كلامه
عبالك أنا كل أمنياتي يموت ، صيحت
مُلاذ : ما چنت رح أرتاااح
ما چنت رح أعيش مرتاااحه
كل أفعاااالك أذيه ألي زينها و شينها كلهااا
أيهم : لا تصيحين صوتچ!
مُلاذ : أصيح لأن أنت ما تفهم
ما يدخل الكلام بـ عقلك ! لو ها ؟؟
تروح تكتل روحك أذا صيحت؟
أيهم : لا تصيحين جاي أگلج !
مُلاذ : لا تصيحين لا تعوفيني
لا تحچين نامي أكعدي ما تروحين لـ هناك
ما تجين ، روحي تعالي ! أنا أمشي بكيفك ؟؟
أنا لعبه عندك حتى أنفذ حچيك
أيهم : أتعودي كل ذيج السنين ما أتعودتي ؟
مُلاذ : ما رح أتعود و لا أريد أتعود
و لا رح أسوي أي شي تگوله
مثل ما أنت جاي تخلف بـ كلااامك
أنا هم هيج راح اسوي و راح أسوي الأسوء!
أيهم : سوي الأسوء و شوفي
مُلاذ : شنو الأشوفه بعد
بسببك شنو ما شفت ! حبك أكبر أذيه
أتمنيت ما تحبني أتمنيتك تكرهني
أيهم : يا ريت بس انه گـ****
شفتچ أذيه ألي بس هم حبيتچ
مُلاذ : و هم رجعت ضميت عليه
و أنا مثل الغبية رجعت صدگت
أنت رح تجيني و تگلي عن العصابه
الغلط غلطي أنا المفروض ما أبقى دقيقة
أيهم : ما رح ترحين لـ مكان و رح تبقين
بدون ما تحچين كلمة وحده
مُلاذ : شتريد تسوي تحبسني ؟
مو غريبه عليك هاي السوالف
عادي حبستني من قبل
أيهم : اي عادي أحبسچ عندچ مشكلة ؟
انه أناني مثل ما تگولين أنانيتي رح تبقيچ يمي
مُلاذ : بـ أحلامك
أيهم : نشوف
درت وجهي من عنده
خليت أيدي على گصتي الدنيا تفتر بيه
لزمت بـ السيارة ، عيوني صار گدامهم أسود
غمضتهن حيل ، أحاول أسيطر على نفسي
فتحت عيوني لمن أيهم لزم أيدي واگف وراي
أيهم : شبيچ؟
نترت أيدي منه
مُلاذ : عوفني ما بيه شي
أيهم : أتحركي
دحگتله بـ نفاذ صبر خازرته
أيهم : أتحركي جاي اگلچ
مُلاذ : ما أتحررك يلا ما أتحرك
أريد أتصنم هنا شعليك ؟!
أيهم : مُلاذ لا تحرگين أعصابي
و تخليني اخذچ سحل أمشي
مُلاذ : هي بس هاي ما سويتها
يلا أسحلني أنت رجال أسحلني
خزرني و سحب أيدي يمشيني
خلعها لـ أيدي ، صعدني بـ السيارة
و أنا أتعارك ويا ، عبالي هاي سيارة ضرغام
طلعت سيارته ما شايفتها من قبل
مُلاذ : ماااا أصعد وخر
دفعني لـ ورا و دخل نفسه بالسيارة ماد روحه
لزم فكي يهز وجهي و يحچي بـ عصبية
أيهم : حلگج سدي صوتچ ما أريد أسمعه
خل نوصل للـ البيت و أعلمچ شلون تجين لـ هنا
مُلاذ : عبالك أخاف منك ؟
أيهم : خافي لأن بديت أفقد أخر ذرة من أعصابي وياچ
مُلاذ : أفقدها أريد أشوف شتسوي ؟
أيهم : ما تتوقعين و لا يجي على بالچ شنو أسوي
و لا رح تحبين تعرفين
مُلاذ : ما أخاف منك
سمعنا صوت أسد ، نتر وجهي من أيده
و طلع راسه من داخل السيارة
سد الباب بسرعه وقفلها عليه
ضربت رجلية بـ الگاع متنرفزه
أنداريت دحگتله يحاچي أسد ، شويه و صعد
ردت أفتح الباب لزمني و قفلها
مُلاذ : ما أريد أرجع وياك
أيهم : سدي حلگج
مُلاذ : أسد حلگي شنو؟؟
حيوان عندك أنا؟
أنا أتعارك ويا و هو يسكت بيه
رجعنا من المكان الجابني منه أسد
و رحنا لـ المكان يلي بي دوريات
مُلاذ : نزلنيييي ايهـ....
أريد أحچي و الرمي صار كله بـ السيارة
صرخت و أيهم ينزل بـ راسي
الدنيا أحترگت خلال لحظات شنو و شكو
ما نعرف فجأه صرت ما أسمع غير الرمي
أيهم : مُلااااااذ
مُلاذ : شكووو منو جاي يرمي !!!
أيهم : روحي من الورا أنزلي
بسرررعه مُلاذ
عبرني للكشنات الورا
منزل راسي بـ أيده
أيهم : صيري ع الگاع لااا ترفعين راسچ
مُلاذ : أيهم
أيهم : أفتحي الباب
أفتحيها حتى تطلعين بسرعه
هو يحچي و ضرغام يصيح علينا
حتى نطلع من السيارة
فتحت الباب مال جهه الثانيه يلي ورا
نزلت و كنبصت و أيهم سوا مثلي و نزل
دحك لـ أسد و صاح عليه
أيهم : أخذها أسد
مُلاذ : ما أروح لـ مكان ما أروووح
صوت الرمي عالي و أسد ما يسمعنا
و السيارة يلي صعدنا بيها أتزرفرت
أذا نبقى يمها شويه تنفجر من الرصاص
أيهم : روحي وي أسد
روووحي منا جاي أگلج
مُلاذ : ما أروح لو تجي وياي لو ما أروووح
خزرني و ضرغام يسحل بينا
يريد نوخر من يم السيارة ، ركضنا لـ سيارتي الشرطه صايرين ألنا سد
تيهت السويچ منين من الخوف
مُلاذ : السويچ ماهوه
أيهم : جيبي جنطتج
مُلاذ : ما جايبه جنطه
أيهم : عفتي المفتاح بالسياره؟
مُلاذ : ما أدري
أسد : ولكم باباااا أنتم مخابيل
شجاي تحجون مو متتو هاهيه و بعدكم تحجون
مُلاذ : المفتاح ماهوه
طلع السويچ من جيبه
أسد : مخليتلي السويچ بالسياره و رايحه
چان هسه السيارة تزهو بالنصر
أخذ أيهم السويچ و فتح السيارة
حتى سيارتي أتزرفت ، صعدنا بسرعه
و هو عبر على مكان السايق
دار السيارة و طلعنا من الجهه الثانية
أيهم : بيچ شي حاجيني بيييچ شي ؟؟
مُلاذ : لا ، أنت؟
هز راسه بـ رفض ، أبتعدنا عن مكان الرمي
الغثيان صار أقوى حسيت روحي رح تطلع
مُلاذ : وگف السيارة
أيهم : شنو؟
مُلاذ : وگف السيارة
روحي تلوب أحچي و أحس وجهي يحترك
وگفها نزلت بسرعه ، رحت بعيد أستفرغت
أسمع صوته يمي يركض عليه
أيهم : مُلاذ شبيج اليوم شبيييج؟
لزمني يدحك بـ وجهي
أخذني گعدني بـ السيارة ، گعدت صفح
و رجليه خارج السيارة ، گنبص گدامي
أيهم : ها؟
لزم أيديه يمسح عليهم و أنا صافنه عليه
حتى ما أگدر أسئله أذا صارله شي من الرمي صوتي رايح ، ظليت أدور بـ عيوني على جسمه
سحبت أيديه من أيده أنداريت گعدت بالسيارة
رافعه راسي ساندته على الكشن
دموعي تنزل على جوانب وجهي
عقلي أحس أنشل مصدعه بـ شكل مو طبيعي
ظل هو يسوق و أنا ساكته و صافنه بـ الطريق
لحد ما وصلنا لـ الشقة بعدنا بـ بداية الفرع
دحگنا كومة ناس ملتمين على الشقة يدحگولها
مُلاذ : شكو ؟
ضرب أيده بـ الستيرن متنرفز
خلا أيده على وجهه مسح وجهه
نزل أيده و دحك لـ الشقة و أنا ما مفتهمه
رجع الگير ، أندار لـ ورا يدحك
و يرجع بـ السيارة ، طلعنا من الفرع
مُلاذ : أحچي شكوو؟
ليش ما خليتني أنزل !
أيهم : وييين تنزلييين ؟
ما تشوفين راميين على الشقة !
مُلاذ : كلش حلو جانو ناويين يكتلوني أنا هم
لو ظاله بـ الشقة و كاتليني هواي أحسن
بلكت أنت ترتاح أو حتى ما ترتاح
لأن أنت أصلاً جنت رايح حتى تموت
و أنا هم أموت هاهيه جانو رح يحلوها
أيهم : سدي لـ حلگج مُلاذ لا تخبليني
أنداريت بـ كل جسمي أصيح
مُلاذ : أنت لا تخبلني شترريد تسوي
تريد تموووتني أنت عقلي و الله بعد ما يتحمل
يجي يوم تلگاني مجلوطه من الجاي تسوي أنت
أنـت وصلتني لـ حالة خليتني أشوف نجوم الظهر
أنداريت أسد بـ أصابيعي و أعد اله
مُلاذ : يوم رايح تريد تموت
يوم عايفني بمكان غريب و رايح
يوم تروح تدفع أبوك الـ **** من السطح
لو تروح تگطع أصابع العالم لو تدوس عليهن
لو تضم عني سوالف ما تنضم
بعدنا أول يوم عرسنا و بـ ذاك اليوم الأگشر
لگيت الشرطه بـ بابنا و أخذوك و ظليت اتراكض
بس حتى تطلع و أخلصك مناك
مُلاذ : شنو البقى و ما سويته بيه أنت ؟؟؟
أذا أعد منا للصبح ما أخلص !
أيهم : هذا انه عجبچ أو ما عجبچ .
مُلاذ : ما يعجبني و لااا رح يعجبني
تعبت أكون وي شخص لا مبالي
و ما يفكر بالنتائج أنت أبنك ما مهتم اله
ما تفكر شيصير بي أذا صارلك شي أنت!
أيهم : بالضبط ما أفكر بـ أحد انه
المهم عندي نفسي ، أحمدي ربچ
ما عندچ طفل مني هم ما چان أهتميت اله
مُلاذ : لو أعرف يصير عندي طفل منك
بـ لحظتها أجهضه و ما أخلي يعيش وياك
و لا أخلي يشوف أفعالك أصلاً
أيهم : ما يشوف أفعالي لا تخافين
لأن بـ كل مره رح أروح لـ الموت بـ رجلية
ما أخلي عنده أب مجرم
مُلاذ : زين تسوي
دحگلي ساكت و أنا ما أكدر أسكت
سوايته هاي حرگت گلبي
مُلاذ : و ها أذا متت لا تخاف
أنا أگل لـ أبيل أبوه مات حتى بالمستقبل
ما تفكر أبوك مجرم حبيبي عادي كل ابائنا
لمن يغلطون غلط يروحون و يموتون رواحهم
أندار يدحك بـ وجهي ، دار وجهه لـ الطريق
دمارات وجهه نطت ، كرض شفته ساكت
مسحت وجهي تعبانه
سندت نفسي على الكشن أدحك لـ الطريق
ظليت ساكته لـ فترة طويله بـ النهاية
أستسلمت و حچيت
مُلاذ : وين رح نروح؟
أيهم : لـ بيتي
مُلاذ : يا بيت؟
أيهم : ما تعرفينه
مُلاذ : كم بيت عندك انت!
أيهم : خير من الله
عگدت حواجبي ساكته
أتذكرت التشيرت مال بابا
و غراضي الي بالصندوك
مُلاذ : أيهم أيهم تشيرت نسيته
أيهم : يا تشيرت؟
مُلاذ : يلي بي عطر بابا
اريده اريده خل نرجع
أيهم : انه أجيبه الچ
هزيت راسي بـ رفض
مُلاذ : ما أگدر ما أگدر بدون ذاك التشيرت
أيهم : انه أجيبه الچ مستحيل أرجعج وياي
غطيت وجهي ما أريد أعوف ذاك التشيرت
أعز شي عندي بقالي من بابا
وصلنا لـ بيت و نزلنا ، أتقدم أيهم يدور
مُلاذ : شجاي تسوي ؟
أيهم : العب وي الحيطان
مُلاذ : غثيث
حچيتها مكشوله ملامحي
دحگلي بـ طرف عينه و رجع يدور فوك الحايط
أخيراً لگا المفتاح و فتح الباب
دخل البيت و أنا دخلت وراه ، فتح الباب الجوا
أتقدمت لـ داخل البيت ، عگدت حواجبي مستغربه
البيت نظيف و بي غراض ، بس مبين قديم
دحگت لـ أيهم
مُلاذ : بيت منو هذا؟
أيهم : بيت الحجي ، أيمن جنت مكعده هنا
لمن يجي حتى هاشم الـ**** ما يعرف بي هنا
مُلاذ : ليش البيت نظيف؟
أيهم : كل أسبوع أجيب مرة تنظفة
مُلاذ : واضح وين جنت تروح عني أيام
هسه تطلع نفسها التنظف البيت مرتك
خزرني و أتقدم عليه
أيهم : بلا هالكلام التافهه
بـ عمري ما فكرت أخونچ!
مُلاذ : صحيح
درت وجهي أريد أروح أكعد
لزم أيدي بسرعه مانعني أكمل
أنداريت دحگت أله بـ برود
مُلاذ : ما يهمني
أيهم : يهمچ ما يهمچ أتهميني بـ كل شي
الا بـ الخيانه بـ عمري ما فكرت أخونچ!
مُلاذ : الخيانه مو شرط تكون بـ الأشخاص
أيهم : رح تگليلي چذبت عليه
و انه لعبت نفسي من هالكلمة
مُلاذ : خوش ما دام لعبت نفسك عوفني
لان راح أظل أذكرك ما دام أنا وياك
سكت يدحك بـ عيوني
مُلاذ : لگينا العصابه و وصلنا لـ نهاية الطريق
خلص أنتهى كلشي و كل من يروح بـ حال سبيله
أيهم : هاهيه نتطلك مثل ما تريدين
مُلاذ : اي تمام نروح باجر و نطلب الطلاك
هز راسه بـ قبول عيونه حمر
عاف أيدي و طلع أول ما طلع عبست شفتي
رفعت أيدي أضرب شفتي أسكت روحي
مُلاذ : لا تبچين راح يصير التريدينه أسكتي
گعدت على القنفه ، أتخيل شلون رح يكون طلاگنا
و أمسح بـ وجهي أتنرفزت أحس روحي مخبله
نزعت شالي شعري رطب و صاير هوسه
أتمددت على القنفه ، ظهري يوجعني
أتنهدت و غطيت وجهي
خليت أيدي تحت راسي و ظليت صافنه
نعست و غفيت من الهدوء صاير عندي أدمان
على النوم أربعه و عشرين ساعه بس أريد أنام
و قبل چنت أتخبل من النوم لأن أتكاسل بسببه
هسه كل شي ما عندي لا شغل و لا أهل
و لا شي حتى أطلع و أتعب علموده
بعدني هستوني غفيت و حلمت كاتلين أيهم
و الكوابيس صارت تتضارب
كل واحد يشوغ روحي أكثر من الثاني
شهكت و فتحت عيوني دحگت لـ أيهم
مسح على شعري يهديني حتى أنام
لزمت أيده أريد أوخرها عني و أگوم
أيهم : نامي
مُلاذ : أريد أگوم
أيهم : نامي بس خل تستقر نومتچ و أعوفچ
أعتبريني مو انه موجود أي أحد غيري
حچاها و شالني بين أيديه
گام يمشي حچيت بـ نعاس
مُلاذ : وين موديني؟
أيهم : لـ الغرفة
مُلاذ : لا ما أريد
أيهم : نامي
أريد أحچي ما يخليني يسكت بيه
نزلني على الفراش و گعد يم راسي
أيده على شعري و ينزل أطراف أصابعه على خدي
أيهم : نامي
مُلاذ : لا تلمسني
أيهم : ميخالف
رفع أيده من خدي
خلاها على شعري
گمت گعدت على حيلي ما گادرة أنام
أريد التشيرت بس من أحضنه أگدر أنام
أيهم : شبيچ؟
مُلاذ : التشيرت
أيهم : تريدي علمود العطر؟
هزيت راسي بـ قبول
گام أيهم من يمي ، نزع تشيرته و أنطانيا
دحگتله عاگده حواجبي
مُلاذ : ما أريد
درت وجهي عنه و تمددت ، حسيت بي گعد وراي
شال أيدي خلا التشيرت بينهن
خلاه بـ نص خشمي عود شمي عطره
سكنت روحي على العطر ، ما حچيت بعد
ظل گاعد وراي ما گدرت أنام بعد
أتذكر الكوابيس ، أغمض عيوني حيل
أريد أنساهم ما أريد أفكر بيهم
أيهم : اذا تطلگنا شنو رح تسوين بـ حياتچ؟
سكتت ما أعرف شنو أجاوب
رفعت أكتافي بـ عدم معرفة
درت بـ عيوني و حچيت بـ هدوء
مُلاذ : أنت شنو رح تسوي ؟
أيهم : مالي حياة بدونچ
مُلاذ : تتعود
أيهم : ما أتعود لا تحچين من كيفچ
مُلاذ : وين الغلط أذا تعودت بدوني؟
مو چنت قبل عايش وي لينا و بدوني !
أيهم : ليش ما عندچ شي أسمه رحمه
و لا مسامحه كل الجاي أشوفه گدامي
أنسانه تريد تنهيني من حياتها بـ أسوء الطرق
مُلاذ : ما عندي رحمة أبد
و لا رح يصير عندي لأن محد رحم بـ حالي
حتى أنا أرحم بـ حال أحد
أيهم : غلطه وحده نهيتيني بسببها
مُلاذ : غلطه كلفتني عمري كله
طفولتي و شبابي و لحد عمري هذا
أيهم : ليش انه چنت متونس على ذيچ الوضعيه؟
مُلاذ : غلطتك مو أنُ أبوي ساعدك
غلطتك لمن أنت چنت تعرف حق المعرفه
أبوك الچتال مهما كانت أسبابك
چان لازم تخلي نفسك بـ مكاني و تفكر بيه
زين تمام لا تفكر بيه
مُلاذ : بس ليش دخلت حياتي أصلاً
ليش چنت تدحك بـ نص عيني
و تسوي نفسك ما تعرف شي
مُلاذ : لمن چنت أسولفلك عن بابا
و أگلك ليش تضوج تگلي ماكو شي
لو تعوفني و تطلع و ما حچيت
مُلاذ : على الأقل گلي أنت تعرفه
لا تگلي أنت أبن الچتال ، بس گلي تعرفه
گلي چان أنسان ما أله مثيل
ليش خليتني بـ لحظة أنصدم بـ أشياء
ما جانت على بالي و لا حاولت أفكر بيها
أيهم : هذا الچان لازم يصير و صار
مُلاذ : و الصار صار ألي
گمت من الفراش
أريد أطلع من الغرفة وگف گدامي
صار سد بيني و بين الباب
أيهم : فرصة وحدة
مُلاذ : چنت ناويه أنطيك فرصة
گلت كل شخص يستاهل فرصة ثانية
بس سوايتك اليوم أكدت ألي
الشخص لازم يكون أله فرصة وحدة
بعدها ينتهي ، لأن ما يتغير بالفرصة الثانية
عيونه صارن حمر
حچا مقلص نفسه حتى لا يدمع
و هو يشتت نظراته عني
أيهم : چنت مستعد تدرين؟
كمل كلامة عيونه واضح بيها لمعة دموعه
أيهم : چنت مستعد أغير كل شي لو گايلتلي
"أيهم گدامك فرصه وحده أستغلها"
چنت رح أستغلها و رح أكشف ألج نفسي
بدون أي سر و بدون چذبه وحده
چنت رح أخلي أهلچ يحاجونچ
و اخذچ و نروح منا ما ألطخچ بـ قطرة سواد
عبست شفتي الترجف مهزومة گدام البچي
كمل كلامه تحت نفس نبرة الضياع بـ الخيال
يلي راسمه بـ عقلة
أيهم : يمكن چنتي راح تتقبليني
و چنت راح أحاول بـ كل الطرق
أخليچ تشوفيني مثل قبل ما أنقص عليچ شي
كل التريدي تلگي گدام عينچ و قبل لا تطلبين
أبيل چان رح يكبر وي أحسن مره
ضحك بـ خفوت و نزلت دمعته
أيهم : يمكن چان رح يصير عنده أخت
يحافظ عليها و يحبها
تطلع تشبهچ و مثل عصبيتچ و عنادچ
راضي المهم تكون تشبهچ و المهم تربطنا بـ بعض
رغم روحي محترگة
بس أتمنيت أعيش الي يحچي
حتى و أن كان خيال أكون ويا و أكون مرتاحه
بدون ما أدفع الثمن بي أو بـ أي شخص ثاني
فكرة عجبتني حتى لو ما راح أعيشها
حچيت و أنا دموعي تنزل
مُلاذ : نيل
أيهم : مو چانت ناي
حچاها و أتقدم عليه ، خلا أيده على خدي
غمضت عيوني بلعت غصتي ،
لزمت أيدي الترجف بـ أيدي الثانيه
رفعت عيني دحگتله ، نبرتي توضح الرجفه
يلي بـ صوتي و أنا مقاومة نفسي حتى ما أبچي لأن كرهت حالتي الجديده هاي ما أريد أبچي
أبتسمت عيوني مدمعه ، حچيت
مُلاذ : نيل أحلى
أيهم : كل شي يجي منچ حلو
نيل رح تكبر و هي بـ عائله حنينه
ما تعيش العشناه رح تلگا كل شي كدامها
بلا ما تتعب حتى تاخذ الي تريده
عدها أخو يسندها و يكسر ظهر الي يأذيها
دحگتله و نزلت عيوني
لمن ما گدرت أقاوم الدموع يلي بيهم
صارن عيوني يحرگني
مُلاذ : لو تصير چنت رح أعلمها تعتمد على نفسها
ما تتعود على دلالك أنت رح تكون حنين عليها
و تركض ألها أول ما توگع و تساعدها
بس أنا رح أعلمها توگف من جديد
و لمن تتعلم أنا ما رح أخليها توكع مره ثانيه
وخر شعري عن وجهي يمسح بـ دموعي
أيهم : جمله وحدة جمله وحدة منچ
ممكن بسببها نعيش كل هذا و الأحلى
كل ما أريد أسكت روحي
أرجع أبچي بدون صوت و ادحگله
حچيت دموعي تنزل عشره عشره مثل الجمر
صوتي بعدها الرجفه بي و الغصة
مُلاذ : تتوقع ما أريد أعيش كل هذا؟
تتوقع ما تعبت و أنا أخلي نفسي دائماً
بـ داخل قالب ما يناسبني ، ضغطي على نفسي
لازم أنا كل يوم أذكر نفسي ما أضعف يمك
و لازم أتغذى من عصبيتي حتى أبعدك عني
و أبعد كل أذيه ممكن أتاذها بسبب أي شخص
مُلاذ : مثل ما سويت دائماً
فضلت مظهر الأنسانه العصبيه الي ما تهتم
بس حتى أصد الأذى عني حتى ما أبچي
الگدامك چانت تلوم كل أحد تشوفه يبچي
تتخبل من أسم البچي و تعرفه ما يفيد بـ شي
مسح دموعي بـ أيده يدحگلي ساكت
كملت كلامي بـ تعب
مُلاذ : وصلتني لـ مرحله
عيوني ما تجف من دموعها
أنا الي عمري كله أگول مستحيل أبچي
هسه صرت كل الأگدر أسوي البچي
رغم أعرف ما يفيد بـ شي و أمنع نفسي
بس ما جاي أگدر
مُلاذ : الدموع الشراره الوحيده
يلي جاي تطلع من صلب گلبي و تچوي خدي
مستحيل أرجع مثل قبل و أعرف نفسي
راح أظل أبچي لعل و عسى
تبرد شرارة هالدموع بـ يوم و يبرد گلبي المحترك
خلا أيديه ثنينهم على وجهي
يمسح دموعي و يرجعن ينزلن
أيهم : ما أگدر أعوفچ
هزيت راسي بـ رفض
وجهي بين أيديه ، وجهه قريب عليه ، همست
مُلاذ : أيهم
أيهم : مشتاگلج هواي لَـذه
مسحت دموعي
مُلاذ : عوفني لا تتدنى عليه أكثر
بعدني أحچي تقرب عليه باسني
رفعني من خصري و أنا أبچي بدون صوت
بس ما عندي طاقة حتى أبعده عني
كل مره أضعف يمه و هذا أكثر شي أكرهه
فزيت عرگانه ، أيدي صايره جواي و أنا نايمة
و توجعني ، غمضت عيوني حيل
متمنيه الصار ما يكون واقع
درت وجهي دحگت لـ أيهم نايم وراي
غطيت وجهي بـ أثنين أيديه
أحس روحي جاي أحترك من العصبية
دفعت أيده الحاضنني بيها عني ، فز
مُلاذ : گلتلك تعوووفني گلتلك لا تتدنى عليه
الله ياخذك و ياخذني
و ياخذ الساعه العرفتك و شفتك بيها
گمت من الجرباية متنرفزه
أريد أگطع نفسي لأن بقيت يمه لحظتها
دحگتله گام گعد و أنا أعصاب صايره
مُلاذ : أنت شنو من بشرر ما تگلي
أيهم : لا تصيحين نصي صوتچ
مُلاذ : گلتلك تعوفني
رح ننهي كل هذي المهزله لأن تعبت
و نهايتي راح أكتل روحي و أخلص !
أيهم : على شنو أنتِ هيچ عصبية؟
مُلاذ : ما أريد تلمسني ياخي ما أريددد
گام وگف گدامي يلبس بنطرونه و يحچي
أيهم : چنتي تگدرين تسوين كل شي
حتى أبتعد عنچ بس أنتِ يعجبج تذبين اللوم عليه
المهم تطلعين أنتِ المظلومة و انه الي أستغليتج
درت وجهي من عنده
خليت أيديه على محاجر عيوني
نزلت دموعي أنداريت اله ، حچيت بـ حرگه
صوتي مشحرج و مبحوح
مُلاذ : ما رح أمنعك لأن كل ما لمستني
قوتي تتبخر يمك و أنت ما رح تعوفني
دحك لـ عيوني هادء
بعد ما چان معصب من كلامي
أيهم : لا تبچين مُلاذ
أتقدمت ناحيته و حچيت
مُلاذ : أنتهى أيهم ما رح أجبر روحي أكثر
بلع ريگه نزلت دموعه ، مسح وجهه بسرعه
خلا أيديه على عيونه و نزلهم
أيهم : تگليلي أنتهى بس شلون أنهيج من گلبي؟
أعرف الصار ما لازم يصير بس بـ الغلـ...
قاطعته قبل لا يكمل
أحتقن صوتي أحچي
مُلاذ : ثنينا نعرف مو بـ الغلط
عبست شفتي و حچيت
مُلاذ : ثنينا نعرف أحنا محتاجين بعض
ثنينا نعرف هذا الغلط رح يتكرر ألف مره
بس كل ما أتكرر هذا الغلط أنا رح أكره روحي
كل ما أتقربت منك رح أتمنى أموت
و لا أنت لامسني
دموعي نزلت و خانگه بجيتي
صوتي محتقن حركت أيديه بـ و حچيت بـ جزع
مُلاذ : الله ياخذني أحبك و لـ درجة أفقد نفسي
ما أگدر أتقاوى يمك أكثر
كل أمنياتي صارت تكون أنت مو أبن الچتال
أو أكون ما أعرفك و لا داخل لـ حياتي
رفعت راسي و حچيت بـ حرگة
أعبر عن كرهي لـ نفسي
مُلاذ : و أريد أكطع نفسي لمن أتمنى هيچ
أريد أحرك روحي لمن ما أنكر حبي ألك
ما جاي أگدر أيهم ما جاي أگدر
جاي أموت من حرگة گلبي أنا
مُلاذ : أبقى يمك و أضغط على روحي
بس رح أبقى بس جسد رح أكرهك
و أكره نفسي ، أفهمني كافي تعبت
أنت ما الك ذنب و أنا مالي ذنب
منو المذنب منو الي لازم يتحمل عقاب يلي صار
أيهم : الچتال كل الي صار ذنبه
كل الصار بسبب حقدة و أذيته
هزيت راسي بـ رفض
مُلاذ : الچتال دمر حياتي و حياتك
أنت زدت هذا الدمار لمن أتقربت مني
چان المفروض اليوم أنا ما أعرفك
و كل واحد عايش بـ حياته بلا ما يمس الثاني
گعدت بـ الگاع ، سندت ظهري على الجرباية
مسحت دموعي و حچيت
مُلاذ : صحيح أنت مالك ذنب و أنجبرت
بس أنا ما جاي أگدر أجبر روحي
أيهم : مو گلتي تحبيني؟
مُلاذ : ممكن يكون الحب عندك أكبر من كل شي
بس أنا أتعودت أترك كل شي أحبه
ما عندي غيرك و رح أعوفك
أنت متخيل مرحلة الأذيه الواصلتها أنا؟
كنبص گدامي خلا أيده على خدي
مُلاذ : رح أكرهه روحي و أكرهك
رح أشوفك تجبرني على اشياء ما أريدها
عيشتي وياك حتى لو أنا رايدتها رح أكرهها
و أكرهك بيها ، أبيل رح يكرهني
لأن دائماً رح أكون مصدر عدم أستقرار
بسبب عصبيتي و حقدي على نفسي و على الدنيا
مُلاذ : كل يوم رح تصبح على الصياح
و المشاكل ، رح تشوف نظرات و تصرفات
بـ عمرك ما تتوقعها مني و لأن أعرف نفسي
كلش زين جاي أحچي ألك !
مُلاذ : حبنا و زواجنا مبني على قضية دم
و هذا الدم دم أبوي الما عندي أعز منه
مهما يصير أنت تبقى ضميت عني القاتل
و أنا اليتيمه الأنتظرت أبوها كل يوم
نزل أيده من خدي يدحگلي
مُلاذ : الطلاك أفضل شي
ما رح نعيش مرتاحين سويه
دحك بـ وجهي ساكت، قرب وجهه ألي باس عيوني
أبتسم تك خد يدحگلي و عيونه حمر ، حچا
أيهم : دائماً تمنيت أبوس عيونچ
بس ما چنت أكدر أبوسهن لأن يگولون نتفارك
أما هسه بـ كل الأحوال انه راح أفارگج
سكتت أدحك بـ عيونه
گام طلع من يمي ظليت وحدي لـ الليل
أجاني گلي باجر نرجع لـ البيت
بس الجام متكسر و صلحوه
ما حچيت شي غير أنُ هزيت راسي بـ الموافقة
ثاني يوم بقيت كاعده ما نمت
و هو جاب الي التشيرت حتى أنام
بس ما نمت بقيت گاعده ، دخل الغرفة
داير وجهه مني و حچا
أيهم : گومي يلا نرجع
مُلاذ : اذا رجعوا رموا؟
أيهم : كلهم بالسجن بعد أنتهوا
هزيت راسي بـ قبول و گمت
طلعنا و رجعنا لـ البيت
ما ردت أبقى يمه أخذت ملابس
و نزلت سبحت بـ شقة أهلي
ظليت أنا جوه و هو فوك
يدك الباب أفتحه ألگا أكل گدام الباب
و هو ما موجود ، أتعودت أخذ الأكل
و يبقى بـ المطبخ ما أجوع بس أعطش
وجهي صار اليشوفه يخترع من منظري
كصتي عباره عن حبوب و شعري صاير خفيف
ضعفت أكثر و من القهر عيوني دومها حمر
صرت مدمنة نوم نفسيتي أتدمرت
أيهم أسمع صوت خطواته بـ الليل
يدخل البيت بـ المفتاح يلي عنده
يظل گاعد يمي عباله نايمه و أغفى صدك
أگعد ألگاه ما موجود
فزيت لمن سمعت تلفوني يرن
أخذته دحگت تاره تتصل عليه
جاوبتها حاچتني و أنا ميته من النعاس
ما أدري شحچت حتى بالأخير سدته
درت وجهي و رجعت نمت
فزيت على صوت أتصال مره ثانية
أخذت التلفون لگيته من وحدة من موكلاتي
گعدت گوه فاتحه عيوني
شلت الخط يلي يتصلون عليه الموكلين
غلقت تلفوني و هم رجعت نمت
گعدت بـ الليل مسحت عيوني
گمت غسلت و سبحت ، طلعت لميت الشقة
رحت أخذت الجبن يلي بـ العلاگة
سويتلي لفة جبن و گعدت اكل
حتى طباخ ماكو أسوي بي چاي
البيت فارغ بس أنا و دوشگي و لحافي و مخدتي
أستقرت عيني على علبه صايره يم فراشي
أتقربت أخذتها أدحك ألها بـ أستغراب
عفت اللفه على جهه ، علبة عطر فتحتها
خليتها يم خشمي مستغربه شميت العطر
صفنت نفسه عطر بابا ، دحگتله
بلعت غصتي ساكته و أشم بالعطر
واضح أيهم سواه و جابه ألي
گلبي أحترك من شفت أسم أبوي عليه
أبتسمت و رشيته على ملابسي و على مخدتي
على لحافي ، فراشي ، دوشگي
أخذت لفة الجبن و بـ أيدي العطر
صفنت و ضحكت ردت أرش العطر بيها
مُلاذ : لا تتحمسين مُلاذ هستوچ حصلتي العطر
و رح تنامين اليوم بالطوارئ دخيلچ
ضحكت و ضميت العطر
مكيفه بي ، شگد دورت عليه
أتغطى تكفخني ريحة العطر
أخلي راسي ع المخده أشمها بالفراش
ظليت چني مخبله أضحك مكيفه
أحس بابا يمي نايم من گد ما العطر قوي
سمعت الباب أنفتح سويت روحي نايمه
أسمع صوت خطوات أيهم يدخل الغرفة
حصرتني الضحكه لمن شحط ظل يگح
درت نفسي عود نايمه و أنزعجت من الصوت
فتحت نص عين و هو طلع من الغرفة يركض
أهتز جسمي أضحك و رجعت غمضت ...
هتان :-
گاعدة أعاين بـ التلفون وحدي بـ الغرفة
جسار يسبح ، گمت عدلت الفراش عافه مخربط
سحبت تلفونه أريد أخلي ع الميز
أنفتحت الشاشه عاينت واصلة اله رسائل
عاينت لـ الأسم "فجر"
عگدت حواجبي بـ أستغراب كعدت ع الفراش
هديت الغطى من أيدي صافنه بـ التلفون
مرت دقايق انه مصدومة رفعت عيني أله
لمن دخل الغرفة
أتقدم يعاين ألي بـ أستغراب
ما منتبه على تلفونه يلي بـ أيدي
راح گدام المراية ينشف راسه بـ المنشفه
حچيت بـ هدوء و نبرة تساؤل
هتان : منو فجر ؟
عگد حواجبه و أندار ألي
عاين لـ تلفونه بـ أيدي ، أتقدم يريد ياخذ التلفون
خليته وراي ما قابله أنطي أله و هو گدامي
هتان : منووو فجررر؟
جسار : تدورين بـ تلفوني؟
هتان : ما دورت ، فجر منو؟!
جسار : لچ بابا جيبي التلفون
ما قبلت أنطي ، دفعني ع الفراش
أجا فوگاي و انه ماده أيدي لـ فوك
ما أنطي التلفون قبل لا يحچي
جسار : هتان لا تخبليني جيبي التلفون!
هتان : هاي اللي علمودها تعاملني هيچ؟؟
گلتلك من البدااايه ما نتزوج
لأن رح تريد وحده ثانيه
بس أنت مثل كل مره تسوي الي يعجبك
ما دام هاي الي تحبهاا ليش أخذتني ؟؟؟
شنـ...
أريد أحچي سد حلگي بـ أيده و هو فوگاي
أخذ أيدي خلاها ع الفراش سحب التلفون منها
جسار : مره ثانية لا تدورين بـ تلفوني!
دفعت أيده من حلگي
هتان : أختنگت وخر!
عاين ألي ، أبتسم تك خد
جسار : و أذا ما وخرت شتسوين ؟
هتان : جسار وخر أختنگت !
گام من عندي ، گعد ع الفراش
گعدت انه هم
هتان : حبيبتك هاي مو ؟
بسببها تعاملني هيچ ، گلتلك انه
گلتلك بعدين رح تحب
جسار : أسكتي
هتان : ما أسكت رجعني يم أهلي ما أريد أبقى
جسار : واصله وياي لـ خشمي
أسكتي و أتچفي شري
هتان : لا تاخذني أنت مازن لو باهر يجوني
گمت من يمه أريد اخذ تلفوني أخابر مازن
أخذه قبلي ، بعدني أريد أحچي
ضرب التلفون بـ الگاع و أنكسر
وسعت عيوني عليه أعاين اله و أعاين لـ التلفون
جسار : أكسرچ أيديج هتااان أذا خابرتي
و أذا يجي و حق الله و روح أبوي أكسر رجليه
أنعل أبو مازن لابو حتى أهله لاااا تغثيني
دفعت أيده عني و صيحت
هتان : منووو أنت و گاااعد تهددني
فوك ما تحب و أنت متزوج بعدك تحچي؟؟
ليش ظاله يمك على شنووو؟؟
حابسه دموعي و أحچي
جسار : ياا حب ؟ أنتِ تعرفين هاي منو؟؟
هتان : منووو يعنييي منو؟؟؟
خمسين ألف أشعار دازتلك أختك بالرضاعه مثلاً؟؟
جسار : لا تصييييحين
هتان : أنت لا تصيييح و عوفني أروح
حتى لو ما تحبني بس ما أستحيت
لمن خليتني بـ رگبتك و رحت تحب
جسار : ما مجبور أبرر ألچ أي شي
عافني و طلع من الغرفة ، لحگته
وگفته و انه أحچي
هتان : مو بكيفك هي رح تحچي !
عاط بـ وجهي
جسار : دكتوررره هاي تحاچيني علمود مُلاذ
هتان : مُلاذ شعليها؟
جسار : أتخربطت و رحنا لـ المستشفى
و فجر موجودة و هناك أنطتني رقمها
حتى أذا تتخربط مُلاذ أحاچيها
حاچيتها لأن ردت اخذ أكل لـ مُلاذ و ما أعرف شنو الي ممكن يأثر عليها من الأكل لأن مريضة !
هتان : خوش عذر
عفته و رجعت لـ الغرفة ، أخذت تلفوني من الگاع
لحگني و كسر التلفون مره ثانية
بچيت كل أعصابي ترجف ، أنداريت عاينت أله
هتان : شتررريد من عندي
لا تحبني و لا مجبور بيه و تحب وحدة ثانية
عليييمن بعد باقية يمك ؟؟
وگف گدامي يهسهس من بين أسنانه
رافع أصبعه و يحچي بـ تحذير
جسار : أيالچ و بالچ تخابرين مازن
هتان : شعليك أنت أخابرمن أخابر!
ما رح أبقى يمك و لا أريد أبقى
جسار : مو بكيفچ هي
أسترجي أطلعي منا و شوفي شسوي بيچ
حچيت بنتر و انه أعاين بـ نص عينه
هتان : ماااا أريدك مو گوه هي
و لا أنت تريدني ! عليمن أبقى وياك؟
عاين ألي بـ برود و حچا
جسار : طبعاً ما رح أريدچ
لا تنسين أنتِ بت منو
و منو الراح من أيدي بسبب أبوچ
حچاها بـ حقد و هو كاز على أسنانه
عاينت اله ساكته و دموعي تتسابق على خدي
ثواني ظل يعاين بـ وجهي بـ نفس النظرات
دار وجهه دفر تلفوني يلي بـ الگاع بـ رجله
و طلع من الغرفة
نزلت لـ الگاع ألم بـ تلفوني المتكسر
ما باقي بي شي صاحي
مسحت دموعي ما اتحملت و رجعت بچيت
گمت گعدت ع الچرباية لميت رجلية لـ صدريه
خليت أيديه فوگاهم و عيوني نار صارت
ما مقتنعه بـ اللي حچا
بس هو ما يچذب ما يحب الچذب أصلاً
ليش هلگد تدز أله أشعارات أذا ما عدها شي ويا!
أختنگت گلبي ظل يوجعني
كل ما أتذكر كلامة و هو يگلي
لا تنسين أنتِ بت منو
انه أصلاً ما چنت أدري بـ أبوي
و لا چنت حتى أفكر أنُ يكون هيچ أنسان
چان مستحيل عندي هذي الفكرة
محد يعرف شگد ظليت مصدومة لمن عرفت
و ما صدگت لحد ما شفت بـ عيني
حياتي أحسها أنگلبت گلاب
بس ما بـ أيدي أي شي أسوي چان لازم أتقبل
عشت بـ حياة وهمية طول عمري
و أتمنى لو ما عرفت وجعي چبير لحد هذاك اليوم
و بعد العرفته الدنيا أنهارت عليه
لو عايفة أبوي چان رح ينسجن أيهم
و مستعده أفضل أيهم على كل شخص أعرفه
لأن محد تعب وياي بـگده
كل الصار بي بسببي لو ما انه ما چان رح يتأذى
و لا چانت مُلاذ رح تعرف شي ، دمرت حياته انه
لو أدري چان كتلت روحي و ما سويت السويته
لـ الليل انه دموعي ما توگف
أريد أخابر أمي بس تلفوني مكسور
چنت كل يوم أخابرها و أخابر غاده
گمت سويت كوب چاي كُجرات
متعلمته من أمي و أتذكر شلون چانت تسوي
على طول چنت ألح عليها تسوي ألي
و من لا چاره على گولتها "ما أخلص من لسانچ"
تگوم و تسوي ألي حتى أسكت عنها
گعدت بـ الحديقة أشرب الچاي صافنه
عيوني أحسهم يريدون يطلعون من مكانهم
كل ما أبچي هيچ يصير بيه أموت من وجع عيوني
رفعت راسي لـ السما ساكته
شورطني وي جسار ندمت لأن قبلت بي
بعدني أحبه و ما أنكر بس ما نناسب بعض أبد
گمت عفت الكوب على الميز ،
رحت لـ الحمام غسلت عيوني و وجهي بـ مي بارد
طلعت من الحمام ، نشفت وجهي
صفنت بـ المراية على وجهي صاير أحمر
عيوني لونهن أحمر دم من گد ما باجيه
لأن بيضه يبين بـ وجهي بسرعه
طلعت من الغرفة ، رحت لـ الحديقة
وگفت بـ مكاني لمن شفته يدخن بـ الحديقة
لابس بس كيمونه لونها أسود
نزلت عيني على عضلاته و عرض اكتافه
رفعت نظري لـ ايده يلي بيها جكاره
لمن خلاها بين شفايفة ، جَر نفس ، نزلها
و هو يزفر الدخان من خشمه ، نزل راسه
يوخر التتن الي وكع ع الگاع بـ رجليه
اندار عاين ألي ، شتت نظراتي عنه
اتقدمت ناحيته اخذت الكوب من على الميز
صرت قريبه كلش منه لان هو واگف يم الميز
من اجيت ناحيته ما ابتعد أو أنطاني مجال
ظل واگف بـ مكانه ، توترت گلبي يدك حيل
سحبت الكوب بسرعه و لفيت نفسي
اريد ادخل جوا وصلت لـ يم الباب
انلزمت ايدي حيل ، نترتها ما عافها
لزم عضد ايدي ، سحبني أكثر
درت نفسي و وجهي أله عاينت أله ، بلعت ريگي
وجهي أشتعلت بي نار من قُربنا و نظراته
عيوني متحجره بيها الدموع
أقترب اكثر و انه أرجف
طخت أرنبة خشمه كصتي ،
حچا و هو منزل عيونه ألي
جسار : ليش باچيه ؟
هتان : ما باچيه
جسار : اشش رمانه بلا جذب !
اكره الچذب و تعرفين كلش زين
هتان : حرام ابچي هم ؟
تريد أنت أربعه و عشرين ساعه
تتصرف بـ أسوء شكل وياي
و انه أظل حايط كل شي ما أحس و لا أبچي
دحگلي بـ نظرات باردة
و انه نار تشتعل بـ داخلي
جسار : حرام ، كل شي محرم عليج بـ وجودي
كزيت على أسناني ، حچيت بـ عصبية
هتان : اذا هيج ليش ساعدتني ؟؟؟
ليش أخذتني لـ المستشفى ! چان خليتني اموت
الموت ارحم من سمك الي اتجرعه كل يوم !
جسار : لا تحچين حچي ماصخ !
هتان : أنت شتريد من عندي ؟
شنو عندك أنفصام أنت؟ الصبح تتعارك وياي
و هسه ما تقبل تعوفني ! على شنو تعاقبني؟
ما ألي علاقه بـ اللي سواه أبوي لو على سيف ...
لزم وجهي عصر فكي ،
عاگد حواجبة بـ عصبية
جسار : لا تذكرين اسمه
اريد ادفعه ايده ما يوخر مني
و شايط لان گلت أسم سيف؟
هتان : ايددددك جسار !
ترك وجهي و رجع لزم أيدي
الچاي وگع بـ الگاع ، بلعت غصتي
أعاين بـ عيونه أريد أراوي انه ما أهتم أله
و لا أخاف منه ، بس دموعي فضحتني
الغصه ذابحتني ذبح ،
ابلع بـ غصتي و دموعي تنزل
جسار : تبجين عليه ؟ تبجين على الگـ*** اسكندر ؟ لو الگـ*** الثاني أبوچ!
هتان : ما يخصك على منو ابچي
أذا تريد تعرف بيمن تهتم فـ روح أهتم بـ فجر
باجر أحاچي مازن لو باهر يجوني
عاط بـ صوت عالي متنرفز
جسار : هتاااااان
أنخلست من نبرته و نظراته
لمن حچاها بـ عصبيه و خازرني
ما اتحملت ، بچيت عيوني تتنقل بين عيونه
هتان : شتريددد عوفني عوفني
لا أنت الراحمني و لا مخلي رحمة الله تنزل عليه
كافي تريدني احس بـ الذنب حسيييت
و روحي طلعت لو باقية يم أيهم و متحملة الندم
افضل بـ الف مره من كعدتي وياك هسه
و روحي الحارگها عبالك أسيرة عندك انه!
طلگني خل اخلص و أنت تخلص
جسار : ما رح يصير هيج شي
شيلي سالفة الطلاك من بالچ
لو تنطبق السما على الگاع ما أطلگج
هتان : شتريد مني ؟ شتريد ؟
حرامات كل ذرة شعور و حب حسيتها الك
كل شي صار بيه بسببك كل شي
جسار : تلوميني ؟
رجف صوتي و انا احجي و دموعي تنزل
هتان : ما ألومك ، الغلط غلطي
بس أنت عرفت و چنت تگدر تمنعني بـ ألف طريقه
خابرتني و رغم تعرفني أجذب و ما أتزوج سيف
ما حاولت و لا حچيت و حظرتني
هتان : انه غلطت و عرفت هالشي كلش متأخر
بس چنت تايهه و تدري بـ هذا الشي أنت
عوفك من هاي أتزوجنا و دمرتني بـ الزايد
عبالك أنسى من گلتلي رخيصة الكل يگدر يبوسج!
مستحيل أسامحك على حچايتك ذيچ
حتى لو روحي بيك مو بس أحبك ما أسامحك
عاكد حواجبه يعاين الي
عيونه اتجمعن بيها الدموع
گلبي محترك منه و من تصرفاته
دار بـ راسه ، نزلت دمعته دنك الي وحجا
جسار : ما ردت شي غير حمايتچ
هتان : حمايتي ما اشوف اهلي و حابسني؟
حمايتي تنتر بيه و تصيح على اقل شي
حمايتي تهدد أخوي بيه مقابل مُلاذ ؟
عگد حواجبه كملت كلامي
هتان : أعرف كل شي جسار
مو محبةً بيه أنت مگعدني هنا
و لا أريد حبك و لا أريد شي منك
من زمان غسلت ايدي انه بس أريد تعوفني
احجي بـ صوت عالي و ابجي
معصبه و روحي تريد تطلع و شفايفي ترجف
طبكني عليه بحيث ذرة مسافه ما تفصل بيننا
اخذ الكوب الي بـ ايدي شمره بـ الحديقة أنكسر
درت وجهي عاينت لـ الكوب ، جسمي يرجف
بـ نفس اللحظة الدرت بيها وجهي
دار وجهي اله بـ ايده و باسني
انه أبچي هو يبوسني بدون ما أبادله
بـ كل صوتي بچيت ، دخل اصابعه بين شعري
يجذب راسي اله ، ابتعد عاينت أله
رجع مره ثانية يبوسني
أتقدم عليه و انه لازمه بـ أكتافه
هو يتقدم و انه أرجع بـ خطواتي
لحد ما انسفطت على الحايط
نزل راسه لـ ركبتي ، ابچي بـ صوت مكتوم
أهمس بـ أسمه ، ما اريد يتمادى وياي
بعدين يأذيني اكثر و أتذكر الصار بيه ويا سيف
هتان : جسار جسار الله يخليك
لا تسوي بيه هيچ لا تلزمني جسار
رفع راسه عاين ألي لزم وجهي
رجع باسني و هو يميل بـ راسه
بَعد وجهه من وجهي
جسار : كل شي سويته لـ خاطرچ
حتى لا تتاذين بس فات القطار و عدا
حچاها ، طبك شفته على شفتي مره ثانيه
رفعني من خصري مشى بيه لـ داخل البيت
و سد الباب بـ رجله ....
مُلاذ :-
صارت الجلسه الأولى من طلاگنا
و تأجلت في حال نتصالح و بقت جلسه ثانيه
و بيها رح نگدر نتطلك لأن طلاك متفق عليه
صعدت لـ الشقة أريد اخذ ملابسي
أيهم شايل الجنط حتى لا أنزل الملابس
دخلت الشقة عديت من يم الصاله و رجعت
عاينت أله لازم بـ راسه و كل جسمه يرجف
وسعت عيوني مصدومة ، ركضت عليه
مُلاذ : أيهم ، أيهم شكوووو؟
گعدت يمه على ركبي ألزم بـ وجهه
متچي راسه على القنفه و خشمه ينزف
مُلاذ : شكووو أيهم ؟
رفع راسه بـ صعوبه دحگلي
ركضت لـ الغرفة أخذت كلنس و رجعت أله
خليتهم على خشمه ، ألزم بـ أيده أريد تثبت
رجعت گمت أريد أسحبه ما أگدر
رفعت راسه بـ أيدي
مُلاذ : أيهم حاچينييي حبااااب شبيييك؟؟
خلا أيده الترجف على خدي يريد يطمنني
بس ما يگدر نزلها و خلاها على القنفه
نومته على القنفه و رجليه رفعتهم على التجوه
جبت ثلج خليته على خشمه و ظليت گاعده يمه
نزلت دموعي و أحچي بلا ما أبچي
أضرب خده بـ خفه
مُلاذ : أيهم تسمعني؟
همس صوته رايح ، گوه يحچي
أيهم : لا تخافين
نزلت راسي على كتفه
زفرت نفس بـ راحه لمن حچا
رفعت راسي أعاين أله
مُلاذ : هسه أنزل أجيب تلفوني و أخابر الأسعاف
ردت أهد أيده و أروح لزم أيدي أقوى
أيهم : ما بيه شي أرتفع ضغطي
مُلاذ : گوه جاي تحچي يا أرتفاع ضغط؟!
نزل أيده على خصري
خليت أيدي على گصته العرگانه مسحتها
مُلاذ : ليش هيچ صار ؟؟ شبيك؟
هز راسه بـ رفض ما گادر يحچي
درت وجهي عاينت لـ صوره واگعه بـ الگاع
أخذتها من الگاع درتها ، دحگت
أنا و أبيل و الچتال ، الچتال واگف گدامنا
و أنا و أبيل يم السيارة
تذكرت لمن شفنا بـ المحل و صار عليه فلاش وقتها
مُلاذ : هاي شوكت؟
فتح عيونه دحگلها أخذها من أيدي شگگها
سحب راسي لـ صدره حاضنني
مُلاذ : أيهم
أيهم : أشش أسكتي
مُلاذ : بس فهمني شوكت هاي الصورة؟
أيهم : ما ألها وقت
مُلاذ : الچتال جاي يهددك بيه ؟
أيهم : محد يگدر يسوي ألچ شي و أنتِ يمي
يحچي و أيديه ترجف
رفعت راسي دحگت أله مغمض عيونه و عرگان
مُلاذ : صارلك شگد من أخير مره نمت؟
أيهم : مادري
مُلاذ : ماكل؟
ظل ساكت ما جاوبني
دار نفسه حاضني ،
سحبت نفسي من أيده فتح عيونه بـ تعب
أيهم : روحي
مُلاذ : ما أروح
رفع عينه ألي گوه يحركها و غمض
شلت راسه خليته على رجلي و بقيت گاعده يمه
مُلاذ : نام
أيهم : ما أريد
مُلاذ : ليش؟
أيهم : من أگعد ما ألگاج
مُلاذ : ما أروح منا لمن تگعد
لزم أيدي يحرك بـ أصبعه الأبهام عليها
دنگت دحگتله مغمض عيونه
مُلاذ : خل أجيب ألك غطى
أيهم : ما أريد
مُلاذ : مو بكيفك
عفته و گمت رحت بسرعه لـ الغرفة
أخذت أله غطى و رجعت غطيته
ما گدرت أخلي ينام على رجلي
تظل توجعني و تنمل
مُلاذ : نام على المخده
هز راسه بـ رفض
أيهم : ما أريد أريد رجلچ
مُلاذ : رجلي تنمل و تظل توجعني
سكت ما حچا وخر المخدة و نام على القنفه
بلا مخده ، أنقهرت عليه شلت راسه من القنفه
أيهم : شتسوين؟
مُلاذ : خلي راسك على صدري رجلي تنمل
ما حچا رفع نفسه ساكت
خلا راسه على صدري
مسحت العرك اليتصبب من گصته
مُلاذ : شبيك ليش هيچ عرگان؟
ما جاوبني عفته ينام خليت أيدي على شعره
لحد ما حسيت ثگل نفسه ، گوه لمن نام
حچيت بيني و بين روحي
مُلاذ : أريد أعوفك و أنساك
بس شلون أنساك و أنت هيچ؟
دنگت راسي بست شعره
گرصت رجلي ما أتوب من سوالفي
هسه يطلع گاعد و يحس عليه
نعست كلش ، ظليت أنتظر شوكت يگعد
حتى الملابس راحت عن بالي
لـ الليل هو نايم و أنا أغفى و أفز
غفيت و حسيت عليه لمن أتحرك
گعدت دحگت أله يمسح بـ وجهه و صافن
أندار ألي و حچا
أيهم : ليش نايمه و رگبتج مكسوره؟
مُلاذ : ما چنت نايمه هستوني غفيت
شلون صرت؟
أيهم : زين
حچاها و نظراته تحچي غير شي
بلعت ريگي و گمت رجليه توجعني من الگعده
راد يگوم ما خليته
مُلاذ : وين رايد تروح؟
أيهم : أريد أشرب حباية و أطلع
ظلي هنا ما رح أجي لـ هنا عندي شغل
مُلاذ : أنا أجيب ألك الحبايه
سألته عن أسمها حچا
هو يحچي و أنا صافنه بـ وجهه
سكت يدحگلي درت وجهي و رحت لـ المطبخ
وگفت أخلي أله مي ،
صافنه و أفكر بـ جلسه وحدة رح ينتهي كل شي
و ما رح أبقى بـ الشقة الجوه و لا يمه
رح أفتقد كل شي يسوي و كل لحظه عيشنياها
ما حسيت غير على صوت شي أنكسر ،
نزلت عيني دحگت لـ الگلاص
أيهم : مُلاذذذذ شكو؟؟
مُلاذ : لا تـ.. لا تجي ماكو شي
لا تجي هسه جايه
لميت الكزاز بسرعه
نزلت دموعي غسلت أيديه و أيهم يصيحني
خليت أيديه على عيوني و دموعي مستمره تنزل
كرضت شفتي أسكت روحي و أمسح بـ وجهي
أخذت كلاص مي بسرعه و حبايه
دحگلي مصدوم
أيهم : مُلاذ ؟
خليت المي و الحبايه على الطاولة
أيهم : مُلاذ شكو؟
عفته و رحت أخذت ملابس هواي وياي
حتى ما أظل أصعد و أنزل
كل شويه دموعي تنزل و أمسحهن
ردت أطلع لگيته واگف بـ باب الشقة
مُلاذ : خل أنزل
أتقدم عليه حضنني ساكت
چلبت بـ رگبته دموعي تنزل
حچا بـ تعب
أيهم : ليش ليش تريدين تعوفيني و أنتِ تحبيني؟
و انه ما گادر أفكر تمر عليه لحظه وحده بدونچ
شهگت أبچي و أحچي و هو حاضنني
مُلاذ : أعرف نفسي أيهم رح أحقد على روحي
و عليك و ما نعيش مرتاحين بسبب تصرفاتي
شگد ما أحاول أتحكم بـ نفسي
بـ يوم أفقد السيطره أنا جاي أكرهه روحي
بس لأن أحبك شلون أذا بقيت متزوجتك و وياك؟
أيهم : لو مو نتطلك انه راح أظل موجود
هزيت راسي بـ رفض
وخرت راسي من رگبته
مُلاذ : أنا أريد أتعلم على عيشه بدونك
لأن شما أسوي ما يفيد گاعده جوه صح
بس أعرف أنت موجود و يمي
جاي أتعب أيهم من تفكيري و تصرفاتي
كلمن يروح بـ طريقة أفضل تعبنا كلش ثنينا
و وجودنا سويه ما بي راحه ألنا
ساكت يدحگلي مسحت وجهي و حچيت
مُلاذ : الچتال جاي يهددك بيه؟
هز راسه بـ رفض
أيهم : من مازن الصور
مُلاذ : ليش؟ شنو يسون يمه؟
أيهم : كاتل المصور الي يصورج
لأن لاگفه وي العصابه
مُلاذ : مازن شلون داخل يم العصابات؟
ما يعرفونه صديقك أو ما يعرفونه ضدكم؟
أيهم : ما داخل هو بس عنده صديق ثاني
و بسبب هذا الصديق لگيت مكان العصابه
صديقه مو ويانا مو من طرفنا
هو عاجبته سالفة العصابات و الكتل
أيهم : بس مازن مصادقة بـ غير اسم
و بـ غير حياة ما يعرفه كـ مازن
لذالك يحصل كل شي منه و يگلي
هزيت راسي بـ قبول
أتقدمت أريد أطلع ، حچا
أيهم : شوكت الجلسه؟
مُلاذ : أشوف و أحاچيك
سكت و أنا طلعت نزلت لميت الشقه
سبحت و بس طلعت گبل نمت ...
هتان :-
فتحت عيوني بـ نعاس
ظليت صافنه أتذكرت الصار
درت وجهي لگيت جسار گاعد و منطيني ظهره
خليت أيدي على گصتي ،
غطيت وجهي بـ أثنين أيديه
دار وجهه ألي جسار عاين ألي
گام يريد يطلع ، وگف يم باب الغرفة
حچا بـ حده
جسار : أنسي الصار و أمسحي من بالچ
ظليت صافنه عليه الدموع غرغرت بـ عيني
مو مره ثانيه مو من جديد !
شعور الأستغلال هذا ما أريد أعيشه
أول ما طلع نزلت دموعي
و انه صافنه بـ السگف گمت بـ هدوء
وخرت الغطى عني أتذكر الصار
و أغمض عيوني لعبانه نفسي
دخلت لـ الحمام أحس عقلي بعد ما يشتغل
أتذكر كلامه و نظراته و تصرفاته هسه
و نفس شعور الأستغلال يلي أستغلنيا سيف
حسيت بي و أقوى
بحيث الوجع الي بـ گلبي لحظتها
مستحيل يضاهي وجع ثاني مستحيل
دخلت الحمام فتحت المي و گعدت على التخته
بـ نفس اللحظة النزل بيها المي عليه
شهگت أبچي و كل جسمي يرجف و أناشغ
حضنت نفسي و انه أبچي بـ كل صوتي
روحي تعبانه و منهلكه شنو فكرت من أتزوجته
تندمت ندم تمنيت لو ميته ساعتها و لا قابله
شسويت أله حتى هيچ يجازيني !
مُلاذ :-
واگفه بـ المحطة الأخيره
يلي رح تفرقني عن أول و أكثر أنسان حبيته
ترك بـ داخلي أثر ظل محفور بـ روحي
چنت أله جَـرح و مرهم و هو چان ألي كل شي
شگد حاولت أكرهه و شگد حاولت أخفي حبي أله بس ما گدرت كل تصرف أله هزمني گدام نفسي
أعرف بعدين شنو الراح يصير بينا و الكارثه
يلي رح تخلينا متممنين لو ما شايفين بعض أصلاً
قررت أنهيها بـ أخر مشاعر بقت أله بـ گلبي
رفعت عيني المليانه دموع أله
و هو گوه واگف يدمع و صافن ، باهر واگف يمه
كاتمه صوتي و دموعي و نَفسي
أخر لحظات هاي تجمعني بي
هذي الجلسه الثانيه
نزلت دموعي مسحتهن بسرعه
بعد ما أكد القاضي على طلاگنا
أيديه ترجف و كل ذره بيه ترجف
أتطلگنا شرعاً و قانوناً
كل واحد بينا منهار بـ طريقته
بلعت غصتي ساكته و فوراً لمن أنتهت الجلسه
طلعت بسرعه گوه أجر النفس
ما أريد أدحك أله أكثر نار حارگتني حرك
بس ما گدرت أول ما سمعت أصواتهم
ألتفتت دحگت أله يدور بـ عيونه الحمر عليه
لحد ما شافني و أستقر نظره عليه
حچا بـ صوت مسموع بـ نبره ترجف
أيهم : جَـرح
درت وجهي و غطيته بـ أثنين أيديه أرجف
و دموعي تنزل و أمسح بيهم شفتي ترجف
طلعت من المحكمه ، صعدت بـ السيارة
بچيت بچي روحي نار نار صارت
و أنا أتذكر لمن أجا الشيخ و أتطلگنا شرعياً
قبل عدة ساعات :-
يدحك بـ عيوني بـ نظرات ترجي
گوه مسيطره على نفسي و ساكته
ظل يلوب گدام عيني ، أجا ناحيتي
لزم وجهي بـ أثنين أيديه صفن عليه
مُلاذ : أيهم لا تسوي هيچ
خل ننهي كل شي بسرعه
نزلت راسي مسحت دمعتي بسرعه
أيهم : مُلاذ تظلين گدام عيني ها؟
تظلين يمي مو تظلين جوه؟
عبست شفتي و بچيت
مسح دموعي يبوس بـ عيوني
أيهم : ما أگدر لَـذه ما أگدر أموت
من صغرچ گدام عيني أموت أذا ما ألگاج
خليت أيديه فوك أيده الي على خدي
غمضت عيوني و كارضه شفتي
همست صوتي يرجف
مُلاذ : أسكت أيهم الله يخليك تعبت
دنى نفسه باسني بسرعه
و هو يرفع راسي بـ أيده
أبتعد و حچا
أيهم : لَـذه تظلين يمي ها؟
تظلين جوه معليه بيچ بس تظلين يمي
سكتت و هو لازم بيه
يريدني أكول أي و أنا أعرف روحي ما رح أبقى
أندگت الباب صفن بـ وجهي گمت فتحت الباب دخلوا الشيخ و جسار حاول أيهم يتمالك نفسه
و بـ صعوبه سلم عليهم ورا شوي أجا باهر
بعد ما دخل الشيخ و صار وقت أيهم يطلگني
باهر موجود هو و جسار ، دحگت لـ أيهم
صفن بـ وجهي درت وجهي من عنده
أيهم : لَـذه
سكتت بلا ما أجاوبه أدحك أله
أستعجله الشيخ و هو بـ طلاع الروح
لمن نطق بـ الطلاك 3 مرات
تنزل دموعي و أمسحهم
و هو حچاها خلا أيديه على محاجر عيونه
دار وجهه و راح گعد جسمه يهتز و يبچي
ألان :-
درت وجهي لمن صعد جسار وياي
مسحت وجهي أحاول أسكت نفسي
خليت أيدي على حلگي أناشغ
بلعت غصتي ، أخذت بطل المي من أيد جسار
شربت و دموعي مستمره تنزل
جسار : أذا تحبي ليش قبلتي تتطلگون؟
مُلاذ : أدمره جساار أدمره و أدمر روحي
محد يعرفني گد نفسي أنا أعرف نفسي
مع الأسف أنا أحقد و أحقد حتى على روحي
سديت بطل المي ، ضميت شفتي
دموعي مثل جمر يحرك خدي
جسار : خربيها عيشتك الچتال
عساك بـ مرض ما تطلع من عنده صاحي كون
مُلاذ : بـ جاه كلمن عنده جاه
أمييين كون يتعذب لمن يموت
جسار : لو مخليتهم يحكمونه أعدام
مُلاذ : و الله على جثتي يموت و يخلص ؟
هو أنا طلبت من القاضي يحاكم بـ المؤبد
و يضوك لوعة السجن و التعذيب شلونه
أخلي يموت بسرعه ليش ؟
سكت جسار و ظل يهدأني
لحد ما هدأت ، بقيت صافنه بـ الطريق
جسار : هسه ترحين لـ أهلچ لو شنو؟
هزيت راسي بـ رفض
مُلاذ : ما أروح ألهم بعد خليهم مو أتبروا مني
بـ أول لحظة ما نفذت الي يريدونه أتخلوا عني!
جسار : لا مُلاذ ما يصير هيچ
أمچ من حرگة گلبها و أختچ صغيره ما تفهم
حاولي وياهم
مُلاذ : حاولت ألف مره رحت مثل الچلبه طردوني
و شبعت أهاين ، ضربتني جساار طفله أنا؟
گدام خاله جنات و أيهم ضربتني
گلتلي أنتِ عاق أنتِ مو بنتي
و لا أعرفج و لا تعرفيني
راويتها أيديه مزرفة بالأبر ما أهتمت
أتصل عليها ما تجاوبني شسويت ألها أنا؟؟
جسار : ما يصير مُلاذ أمچ
دحگي حاچيها هاي المره بس
أذا عرفت تطلگتي تحاچيج
مُلاذ : أمشي حسب رأيهم ؟؟
حياتي أتدمرت أنا محد بيهم وگف وياي
بچيت و أنا أحچي عيوني مغورگه
مُلاذ : سهله تعرف أبو الشخص
الي جنت رايد تعيش ويا كل عمرك
يطلع چتال أبوك التدور عليه صارلك سنين ؟؟
و فوك كل هذا أهلك يتخلون عنك بـ أول غلط
ما بقى ألي أحد أنا جسار
صفكت أيد بـ أيد و نكثتهم
بـ معنى " ما بقى ألي أحد"
مُلاذ : بس أيهم چان وياي
بس أيهم من دون الكل ما عافني
و لو ما رايده الطلاك أنا ما چان رح يعوفني
قبل كم يوم لأن شاف صوره بيها الچتال وياي
كل جسمه يرجف و خشمه طك دم
أمي تدري بيه الگدامي ناس مو هينه و عصابات
و ما قبلت بيه و لا قبلت تحاچيني و لا تسأل
جسار : أعرف الأذى التحسين بيه چبير
بس هالمره و لـ خاطري مُلاذ مالي خاطر يمچ؟
ما قبلت و هو يحاول يقنعني
بقى يحاچيني طول الطريق بـ النهاية وافقت
رغم كل الي صار بيه لا أگدر أنكرهم
و لا أگدر أنكر أشتياقي ألهم
عيوني ما جفت من دموعها كرهت نفسي كره
لأن صرت هيچ ضعيفه و أبچي بسرعه
بس الجاي أعيشه يحرك روحي
و سنين ما باچيه بحيث هسه أنهاريت
على أقل شي أبچي و دموعي بـ طرف عيني
وصلنا گدام بيت خاله جنات نزل جسار
و أشر ألي أنزل ، نزلت ، خطواتي ثگيله
أبتسم جسار و گال
جسار : أوگفي يم الباب سوي ألهم مفاجئه
مسحت دموعي و أبتسمت
رغم الوجع الشفته منهم بس عندي أمل
يرجعون وياي مثل قبل ، وگفت يم الباب
دك الباب جسار واگف گدامها
أشرلي جسار عود طلعي تلفونچ و صوري
يريد يونسني و أنا روحي طالعه
ما ناسيه أيهم و حالته و كل شويه أدمع
و أمسح بـ وجهي و أسكت روحي
سحب تلفوني جسار دخل على الكاميرا
و رجع دك الباب مره ثانية
سمعنا صوت أمي و هي تگول "جايه"
فز گلبي لمن سمعت صوتها
أسمع صوت خطواتها و گلبي يرجف
فتحت الباب سلم عليها جسار و هي سلمت عليه
راد جسار يدخل الموضوع بسرعه و گال
جسار : خاله ، مُلاذ ...
بـ اللحظة الي نطق بيها جسار أسمي
سكتته أمي بسرعه و حچت بـ عصبيه
فيروز : جسار لا تعيد هالموضوع
البنيه الي تنسى أبوها علمود رجلها
هاي لا بتي و لا أعرفها
غورگت عيوني واكفه يم الباب و كاتمه روحي
طلعت من التصوير بسرعه دزيت لـ جسار
ما يگللهم أنا أجيت و لا يگللهم أتطلگت
أسمع صوتها تحچي عليه ما أتحملت أبقى
مشيت لـ السيارة ، أتصلت على جسار
حتى يشوف الرسائل الدزيتهم طلع يمي شافهم
روحي شاغت من حچيها عليه و نكرانها ألي
بـ مجرد سمعت أسمي من جسار
من شوكت أمي صارت هيچ ؟! من شوكت ؟
وگفت يم السيارة گلبي يريد يطلع من مكانه
دموعي عشره عشره ، سدت الباب
أجا جسار ألي يمشي بسرعه
جسار : مُلاذ
مُلاذ : الله يخليك كااافي كاافي
مو روحي أحترگت حرك چم دوب بس گلي
سمعت حچيها بـ نفسك حقدت عليه و نهتني
ما تريدني و لا تريد تسمع أسمي
هذا بختي أنا هذا حظي الكل ينكروني
بـ أصغر غلط مقسوم ألي أعيش هيچ!
جسار : تمام أهدي بس أهدي
تعالي أصعدي
سندني و صعدني السياره و صعد
ظليت طول الطريق دموعي تصب
على يا وجع ما أعرف
لحد ما جفت دموعي على وجهي
مُلاذ : گلتلهم أجيت أنا؟
جسار : لا ردت أحچي و دزيتي ألي
مُلاذ : لا تگللهم أبد و لا تنطيهم أي خبر عني
سكت عني و أنا درت وجهي لـ الطريق
أتذكر بـ كلامها و أدمع ظليت صافنه و أفكر
عقلي حسيته رح يطك أتذكر كل شي عشته
كل شي صار بيه گضيت حياتي ركض بـ ركض
تعب بـ تعب بس ما چان هالتعب لـ نفسي
چان ألهم ألف شي سويت و ألف شغله أشتغلت
البنات الأكبر مني ما أتحملن الي أتحملته
طلعت كل طاقتي و حاولت أطلع الفلوس
من جوا الگاع بس حتى ما نعتاز لـ أحد
كسرت كل القواعد يلي تمنعني من أنُ أكون نفسي يا بنيه تبني ألها محل ؟ أنا بنيت و أن كان صغير بس بنيت و أجرت محل ورود و أشتغلت ألف شغله
و المحلات لسا موجوده رغم ما أروحلهم
بس أعرف كل تفصيله عنهم
چان كل شي فوك طاقتي
بس ما بطلت أحاول و كل فلس يصير عندي
أخلي على شغله تربحني و بـ عمري ما خسرت
كل شغله خططت ألها بعد تفكير طويل
وصلت لـ القرار الأخير بعد تفكير طويل
أنداريت لـ جسار و حچيت اله
أنصدم من الي حچيته بس هاهيه حسمت قراري
ما وافق على كلامي و لا أنا قبلت رفضه
جسار : بابا أنتِ من كل عقلچ؟؟
مُلاذ : أي
جسار : لا مُلاذ !
مُلاذ : تگدر تساعدني لو لا؟
جسار :أگدر بس الي تحچي ما معقول!
مُلاذ : معقول جسار لا تحاول هاهيه قررت
ظل يحاول وياي
بس رفضت مُصره على الفكرة يلي بـ بالي
لحد ما هو هم أتقبل و سكت
ما خلاني جسار أبقى بـ الشقة
و أخذني لـ بيته لگيته مودي هتان لـ أهلها
مُلاذ : ليش وديتها؟
سكت و شمر السويچ على القنفه
مُلاذ : أذيتها بـ تصرفاتك مو؟
جسار : هذا أنا مُلاذ أنا أريدها تكرهني
مُلاذ : عليمن تزوجتها أذا تريدها تكرهك؟
جسار : بكيفي تزوجتها هيچ
مُلاذ : دفضها و گول حبيتها
جسار : ماكو هيچ شي
مُلاذ : ظل هيچ
جسار : أتزوجتها حتى ألزمها
مُلاذ : شنو؟
جسار : حتى ما تروح تشكك أيديها
لو تشرد لو مدري شتسوي بـ روحها
هتان متعلمه على الدلال
و بـ أول موقف تركض تأذي نفسها
مُلاذ : و أنت تسوي ألها جلسات لـ تقوية الروح
بـ اكسترا اكتئاب و أذيه نفسيه ؟
جسار : لا بس أريدها تكرهني
و أريدها تنلزم و ما تأذي روحها
مُلاذ : جسار أذا نيتك أذية هتان
فـ عوفها رحمه لـ والديك خلي البنيه بـ ضيمها
العاشته مو هين و لا سهل المفروض تخفف عنها
جسار : شخفف عنها
و هي لازمتني ناعله جد جدي بـ دفترها
مُلاذ : شنو؟
جسار : هاي عدها دفتر تكتب بي
لگيته بـ يوم العرس مفتوح و مكتوب بي
تحبني و تصرفاتي تقهرها و ما تگدر تكرهني
سهلت عليها الموضوع و جاي أكرهها بيه
مُلاذ : هذا أسمه تبن زين؟
جسار : ولج!
مُلاذ : عوفني جسار بشرفك عوفني
خليني بـ ضيمي
راد يسوي اكل ما قبلت اكل
گلي أنام بـ غرفته هو و هتان ما قبلت
رحت نمت بـ الخطار راد يعترض ما خليته
ثاني يوم طلعنا أنا ويا و كملنا كل الشغل
ظليت هيج لـ مدة 3 أيام خلصت شغلاتي بسرعه
و بـ اليوم الرابع رحت أخذت فلوس المحلات
و تقاسمتهن وي الموظفين و سديتهم
نهيت كل شغلي و أجا اليوم المنتظر
أخذت سيارتي و طلعت بدت تشرق الشمس
ظليت واگفه بـ الباب و أنتظر
لحد ما شفت سيارة سلطان وگفت
أبتسمت من بين دموعي و الغصة خانگتني
لمن طلعت ملاك من البيت تمشي لـ السيارة
و بـ أيدها كتابها و مثل عادتها تمشي بـ هدوء
و على كيف تشلع الگلب يلا توصل
طلعت أمي بـ الباب وراها تحاچيها
نزلت راسي و أهتز جسمي أبچي
دحگت صعدت شغل سيارته سلطان و طلع
و أمي دخلت و سدت الباب
مُلاذ : ديربالج على نفسج ملاكي
أختنكت و أمسح بـ دموعي
دزيت لـ هتان گلتلها أريد أشوف أبيل
دلتني على مكانهم و رحت بس وگفت بعيد
خابرت عليها طلعت ألي هي و أبيل
أول ما شافني ركض عليه
حضنته بسرعه ردت أكسر ضلوعه
گد ما مشتاقتله بوسته و هو فرحان
يصيح بـ علو صوته "الهلوه"
مُلاذ : دحك شنو جبت ألك
طلعت أله علاگة الحلويات ضحك بـ فرح
و حضنني و هو يضحك
مُلاذ : أحبك أنا
أبيل : انه هم
ضحكت و بست خدوده
مُلاذ : دحك محد رح يعرف أنا أجيت زين؟
ما أفتهم بس فهمته تبقى جيتي لـ هنا سر
أبتسم و ضحك ضحكته الشريره ضحكت
گلتله عندي شغل و بعدين أرجع أله
گمت حاچيت هتان گلتلها تخلي غاده تطلع
حتى أشوفها
هتان : خو تعالي سلمي عليها ؟
مُلاذ : لا ما الحك عندي شغل بس أريد أشوفها
أذا أروحلها هسه تاخذنا السوالف
هزت راسها بـ قبول
بوست أبيل حيل وگفت أحاجيها
مسحت على شعرها مبتسمه
مُلاذ : معليج باللي يسوي جسار
و لا تضوجين أخوانج موجودين
يسودنون جسار أذا ضوجج
و لو هو ما يضوجج بس عنده طفرات
هتان : أي ابد ما يضوجني
أبتسمت ساكته تدنيت عليها بست شعرها
أبتسمت تدحگلي
مُلاذ : أرجعي مثل ما جنتي هتان
لا تبجين و لا تنقهرين على أشياء ما تستاهل
هتان : صاير شي ؟
هزيت راسي بـ رفض
مُلاذ : بس جاي أوصيچ على نفسچ
ما أريد أذكرچ بس ..
اسفه لأن دخل أسكندر حياتچ بسببي
سكتت لحظات ما سوت شي غير حضنتني
و دعتها أخذت أبيل و دخلوا ورا شويه دزت ألي
هتان : گلت لـ غاده مدري منو بـ الباب
فـ راح تطلع تشوف
مُلاذ : تمام
وگفت قريب على الباب
و طلعت غاده تدور بـ عيونها خازره العالم
ثواني و طبت سمعتها من صاحت
غاده : ولج هتااان ...
ضحكت خليت أيدي على عيوني و گلت
مُلاذ : العايقة و لا تتوب
و طبعاً ما نسيت نور
رحت سلمت عليها و حاچيتها
تعرف بـ كل شي صار أول ما شافتني بچت
مُلاذ : شگد ام دميعه دخيل الله !
نور : هههههه أنچبي مشتاقتلج و الله
مُلاذ : دولي تانكي مال دموع عندچ
أمشي منا صيحي ألي أبني
نور :شنو؟
ضحكت و گلت
مُلاذ : راكان
نور : ياااا ههههه أوگفي هسه أجيبه
راحت جابته و أجتني شبعته بوس
و هي تضحك عليه أبتسمت و حچيت
مُلاذ : سلميلي على عمتي
ما أندل بيتهم عدل
نور : ليش؟
مُلاذ : هيچ سلميلي عليها حرام تسلمين؟
نور : أنجبي يلا ميخالف درينا لسانچ شطوله
ما تجين تدخلين صارلج ساعه واگفه بالباب
مُلاذ : لا عندي شغل
نور : شوكت ما عندج شغل بس أريد أفتهم
مُلاذ : صايبتني لعنة الشغل
أبتسمت و ضحكت ودعتها مشيت
صعدت سيارتي صفنت
أخذت تلفوني بـ تردد و أتصلت
بهتت ملامح وجهي لمن جاوبت ، سألت بـ تردد
مُلاذ : موجود ؟
-موجود .
نزلت التلفون و سديت الأتصال
رحت لـ المكان المنشود ، دخلت أدور بـ عيوني
وگع نظري عليها ركضت ألها و سألت
مُلاذ : وينه ؟
-مو هنا بالحديقة
طلعت لـ الحديقة أدور بـ عيوني
لحد ما أستقر نظري عليه دحگتله
واگف و يدخن مثل عادته و أيده الي بـ جيبه
أبتسمت بـ قهر و أنهمرت دموعي على خدي
رجفت شفتي اتغصغص ، حچيت
مُلاذ : جرحك العفته مفتوح
راح يظل يلچم گلبك هواي دكتور
درت وجهي و طلعت بسرعه من المستشفى
مسحت وجهي قبل لا تنزل دموعي مره ثانية
كتمت نفسي بدون ما أطلع أي صوت ...
دحگت لـ كبره و أبتسمت
مسحت على أسمه ،
نزلت أيدي من الگبر و حچيت
مُلاذ : سوبر أيمن
أبتسمت بـ وجع ،
نزلت دموعي بـ هدوء
مُلاذ : ما رح أنسى أبد السويته
چنت ضحية لـ شخص ما يوصل لـ أظفرك
الله شاهد كل ليلة أدعي ألك بـ الرحمه أيمن
ما مر يوم و نسيتك و لا رح أنساك
لأن أنت ما تنسي ميت بس عايش بـ ذاكرتنا
أنت حبيب گلب صافي شلون ننساك؟
مسحت وجهي و كملت
مُلاذ : كل مره أتجمعنا بيها و حچينا
و ضحكنا و طلعنا و أكلنا بيها بدونك
چانت حيل ناقصه و مستحيل تكتمل
تمنيت اليوم أنت موجود و تگلي
"دهر طرج ولج مليذه "
حچيتها و ضحكت ،
مسحت خشمي و كملت
مُلاذ : خسارتك چبيره و ما تتعوض
الله لا يسامح أبوك و لا ينطي العافيه
كل يوم رح أدعي حوبتك تطلع بي
و ما يعيش مرتاح لمن سجنته و روح بابا
ما أخذت بس حق أبوي أخذت حقك هم
و ما ردته يموت ردته يتعذب و يشوف نجوم الظهر لعل و عسى أنت ترتاح روحك وين ما چانت
مسحت وجهي و گمت رشيت مي ورد على گبره
قريت أله الفاتحة و مشيت
رحت لـ گبر بابا هم ، شكيت أله عن كل شي
و شگد قاومت حتى ما أبچي لـ المرة الألف
بس بچيت و ما أتحملت أسكت
مُلاذ : بابا و الله حاولت بكل الطرق
هاي سنين جبتها أنا من 2004 لحد هاللحظه
حاولت أرضي الكل و أخلي الكل يرتاحون
بس و روحك تعبت تعبت ما بقى ألي طاقه
مُلاذك أنتهت أنطفت
مُلاذ : ما نفذت وصيتك أعرف
ما حافظت على ملاكك و فيروزتك
بس بابا و الله هدوني هد أمي ما تريدني
ما علمتني و لا حاچتني گبل أتبرت مني
أتمنى أنت موجود ما چان صارلي شي
چنت رح أظل مُلاذك و أنت أماني و روحي
أعرف رح تفتهمني لأن بس أنت تعرفني شنو
دنگت على الگبر بسته و حضنته
مسحت عليه و دموعي نزلت فوگاه
مُلاذ : رح ترجع ألك لَـذه بابا
رح أجي ألك مهما يصير
أنت روح لَـذه أنا ولا شي بدونك
أبتسمت و مسحت على گبره
دنگت بسته مره ثانية
گوه شلعت روحي و طلعت مناك
و ما أنتهى بيه اليوم و لا أرتاحيت
غير لمن وزعت ثواب على روح بابا و روح أيمن
دخلت بيت جسار لگيته ما موجود
و اصلاً قبل شويه أتصل عليه گال يتأخر
نمت و كعدت على صوت المنبه
بدلت و طلعت من الغرفة لگيت جسار نايم
عفته و طلعت من البيت
رحت لـ المكتب ، فتحت الگراج و دخلت
أتقدمت ناحية السيارة يلي مستحيل
رح أگدر بـ يوم أبيعها ،
خليت أيدي عليها ، أتوسعت أبتسامتي
أتذكرت لمن هدتنياها بيبي ، أتوسعت أبتسامتي
قبل يومين خليت أسد ياخذها للـ التصليح
صلحوها و بعدين أخذها لـ الغسل
و لمن كملت ، رجعها لـ الگراج
أتقدمت أخذت السويچ من فوك التاير
فتحتها و صعدت ، شغلتها و طلعت بيها
صارلي فترة طويله ما سايقه بيها أشتاقيت ألها
خابرت على أسد
مُلاذ : أخذت السيارة من گدام المكتب؟
-لا هسه وصلت و راح اخذها
مُلاذ : تمام ، شكراً
-هلا بيچ
نزلت تلفوني و سديت الأتصال
أشتريت جنطة و رحت لـ الشقه
دخلت لـ شقة أهلي لميت كل شي ألي
أخذت "عطر ألياس" أبتسمت أدحگله
خليته بـ الجنطه
أخذت الجنطه و صعدت لـ شقتنا أنا و أيهم
رحت لـ غرفتنا لميت ملابسي
وگفت لمن شفت ملابسه عبست شفتي ساكته
رفعت عيوني لـ فوك ما قابله تنزل دموعي
سحبت قميصه و خليته بـ الجنطه
خلصت لم الغراض ،
سديت الجنطه ، نزلتها بالگاع ، سحبتها
وگفت أدحك لـ الغرفه ضامه غصتي
شگد ألنا ذكريات هنا شگد أتمنيت نبقى
بس لا أعتراض على حكم رب العالمين
أمشي و گوه أريد أطلع روحي من الشقه
عيني ظلت تتراوح على كل كتر بيها
نزلت الجنط بـ صعوبه بسبب الدرج
وگفت ألهث بـ تعب ، درت وجهي دحگت
أسد جايب السيارة يلي أشتراها ألي أيهم
و جنت أطلع بيها ، مخليها گدام الباب
أخذت جنطتي طلعت دفتري الصغير و قلمي
شگيت ورقة و كتبت بيها
" رغم صرت ألك دوا و أنت صرتلي جرح
بس بـ عمري ما راح أنسى السويته علمودي
شكراً على كلشي ، دكتور"
طبگت الورقة و خليتها على ماسحات الجام
أخذت الجنط صعدتهم بـ سيارتي القديمة
سديت باب جنطة السيارة
وگفت لازمه خاصرتي بـ تعب
رفعت عيوني لـ الشقه دحگتلها مره أخيره
درت وجهي و صعدت بـ السيارة
رفعت تلفوني خابرت على جسار
ثواني و جاوب حچا بـ صوت نعسان
جسار : ها
مُلاذ : ألك نيه تجي لو لا؟
جسار : شنو ؟
مُلاذ : رح أروح ما بقى شي
جسار : شنووو السالفه أوگفي يمعوده
وين أنتِ صدك جذب !
مُلاذ : يلا رح أنتظرك
جسار : جايچ
سديت الأتصال و رحت لـ المكان المنشود
دخلت و گعدت أنتظر لحد ما أجا جسار
جسار : شنو سالفتج أنتِ تحچين صدك؟
لي ما گعدتيني من وقت!
مُلاذ : خلصت شغلي و گلت أكعدك
جسار : مال أرگعج بالگاع
مُلاذ : ههههه شحدك ؟
جسار : مُلاذ لا تتخبلين أبقي
هزيت راسي بـ رفض
على ثغري أبتسامه خفيفه
مُلاذ : أنتهى جسار تعبت هواي
جسار : بس مو حل !
مُلاذ : حل و حل كلش زين هم
أسمع شنو أريد أحاچيك
جسار : سولفي
مُلاذ : السيارة هاي مال بيبي شفتها؟
جسار : أي مو جانت عطلانه و مخليتها بالگراج؟ وين سيارتچ ذيچ ليش ما جايه بيها؟
مُلاذ : دحك هاي السيارة أمانه يمك
حتى لو تطلع بيها أو ترجعها لـ الگراج أي شي
بس لا تخرب لو يصير بيها شي
ردت أطلع بيها كـ أخير مره
جسار : زين يمي لا تخلين بالچ
جاي توصيني على جاهل عبالك مو سيارة
مُلاذ : أي بنتي هاي السيارة
و دحك فك ياخه من هتان ديربالك تضوجها
لا تگعد تگلي أريدها تكرهني و مدري شنو
بالنهاية كلنا نموت و محد يبقى يحب لو يكره أحد
جسار : مهتمه لـ علاقتي وي هتان
أكثر من ما أنا مهتم
مُلاذ : لا جوجو أنا مهتمه لـ هتان
يعني ما مهتمه ألك و لا لـ علاقتك
جسار : شو صايره أدبسز
مُلاذ : عيب جوجو عيب
جسار : أنچبي شگدني شكبرني
شنو جوجو تصيحين ألي؟
مُلاذ : يلوگلك ، دحك
جسار : دحگت بويه دحگت غردي
أريد أحچي
و صاروا يعلنون عن أقتراب موعد سفرتي
درت وجهي دحگت لـ الناس
رجعت عيني على جسار أخذت جنطتي
خليت بـ أيده فلوس عگد حواجبه ، مستغرب
جسار : شنو ذني ؟
مُلاذ : فلوس المحلات و كل شي چنت أشتغله
جسار : مُـ...
مُلاذ : أسمع أنطيهم لـ أهلي تمام؟
گللهم هذني منك ، لا تعترض أنا كل شغلي علمودهم چان و هسه عندي فلوس ما أحتاچ
راد يحچي و سكت
أخذت جنطي يمي و حچيت
مُلاذ : ديربالك على نفسك و عليهم
و لا تظل تتعارك وي أيهم هو تعبان أصلاً
سكت عيونه أنملت دموع
و أنا ما أتحملت و دمعت ، أحتقن صوتي
حچيت بـ صوت يرجف
مُلاذ : جسار أنا أعرف أهلي
ما رح يگدرون يدبرون نفسهم وحدهم
ملاك صغيره و أمي ما تگدر تشتغل
خاله جنات گوه عاينه نفسها
مسحت عيوني و كملت
مُلاذ : أذا ملاك تحب سلطان
و يريدون بعض خلي يخطبها و يتزوجون
على الأقل يگدر يساعدهم لا تعتبره أستغـ...
نزلت دموعه مسح وجهه بسرعه و قاطعني
جسار : لا تمسلتين ملاك أختنا و نحطها بـ عيوننا هي و أمچ و أذا واحد يريد الثاني نزوجهم ما بيها شكال
هزيت راسي بـ قبول
دموعي تغرك عيوني و أمسحهم
جسار : ليش ما خليتيني أجي وياچ!
شلون رح تگدرين وحدچ
مُلاذ : لا هنا عندك حياتك
أنا رح أگدر على كل شي أعرف نفسي
أساساً أنت حليت الي مكان السكن و البنيه
جسار : بكل وقت تريديها رح تكون موجوده
مُلاذ : شكراً جسار
جسار : مُلاذ گلبي محروك
لا تخليني أدوس بـ بطنج
ضحكت و مسحت وجهي
مُلاذ : جوجو العنيف
رجعوا علنوا مره ثانيه عن وقت رحلتي
ودعت جسار أنقهر كلش ،
يدمع و يمسح بـ عيونه
وجهه صار أحمر و هو كاتم روحه
جسار : ديربالج على نفسج يا ضي عيوني
أبتسمت لـ المره الأخيره أدحگله
رفعت أيدي لوحت أله أودعه ، سوا نفس الشي
درت وجهي و سحبت جنطتي
مشيت بـ خطوات ثگيله متجهه نحو المجهول
نحو حياة جديدة كل الوجوه بيها غريبه
و خالية من كل روح
مُعلنه أستسلامي بـ هذي المعركة
هزيمتي و أنتصار الحزن المخيم على روحي
أمشي و أنا تاركه كل شي وراي
بدون ما أفكر حتى أنُ ألتفت و أرجع
تركت دياري مُغتربه من اللحظه
يلي هجرت بيها گلبه و تركته
لَقبني بـ "جَرح الأيهم"
شاءت الأقدار و نُلت من لَقبي النصيب
لحدما تيقنت هذا مو محرد لقب أنا فعلاً جَـرح ...
"ذمتي برگبتك لـ الأبد الله يساعد نَحرك
هاي انه رايح مِنسحب
و صدگني ما نرجع سوه
لو يبقى يوم بـ عُمرَك"
عن محمود درويش حينما قال :
"لا شيء يُوجعني بعد هَذا الَرحيل"
- يتبع الفصل التالي اضغط على ( رواية جرح الأيهم ) اسم الرواية