رواية جرح الأيهم الفصل السابع و الخمسون 57 - بقلم أيلان
" الجُــرح السابع و خمسون "
جسار : مُلاذ
دحگتلي و حچت بـ صوت مبحوح
مُلاذ : زينه أنا ما بيه شي
دارت وجهها تمشي بـ صعوبه
دحگت لـ گبر عمي قريت اله الفاتحه
و طلعت وراها بسرعه أمشي
گوه تمشي رجلها ثگيله عبالك
وگفت و أنا مشيت ألها بعدني أريد أوصلها
وگعت بـ الگاع وسعت عيوني مصدوم
ركضت عليها أدور بـ وجهها فاقده ماكو
جسار : مُلاذ !! مُلاذ
ضربت خدها بلكي تصحى ما صحت
شلتها و ركضت بيها للـ السيارة
صعدتها و صعدت أسوق تيهت الدنيا
شلت تلفوني ادور مستشفيات قريبة ماكو
كلهن بعيدات دست للسيارة أسوق
أنداريت لـ مُلاذ وجهها أحمر و عيونها جواهم أسود رجعت درت وجهي لـ الطريق دورت يمي بطل مي
ما لگيت ، ضربت الباب الي يمي منغث و متنرفز
بس أريد أوصل لـ مكان قريب
مستشفى صيدلية أي شي نص الطريق
طاير بين السما و الگاع و مُلاذ فتحت عيونها
دحگتلي و رجعت غمضت
جسار : مُلاذ مُلاذ دحگيلي
مُلاذ ضي عيني دحگيلي
ضربت على خدها بـ خفه
تفتح عيونها و ترجع تغمض
أنداريت لگيت عيونها تدمع و دم صايرات
جسار : مُلاذ مُلاذ كافي بچي تسمعيني؟
أذا تسمعيني ألزمي أيدي
أنداريت الها مديت أيدي يم أيدها
خليتها بين أيدها و حچيت
جسار : تسمعيني اذا تسمعين
أضغطي على أيدي
ضغطت حيل على أيدي
جسار : ما تگدرين تجاوبين تعبانه ؟؟
ضغطت على أيدي مره ثانيه
جسار : يا روح جسار أصبريلي
هسه هسه نشوف شبيج هسه نوصل
لا تهدين أيدي شيوجعج؟ تگدرين تحچين؟
أنداريت ألها من حچت گوه
مُلاذ : گلـ .... بي
جسار : شنو شبي گلبج
أصبري وصلنا ما بقى شي
أشيل بـ السياره و أرگعها بـ الگاع
أريد بس أوصل عين على الطريق و عين على مُلاذ
جسار : مُلاذ بعدج صاحيه؟؟
ما ضغطت على أيدي ، أنداريت لگيتها مغمضه
وگفت السيارة ، درت وجهي ألها
خليت أيدي على مكان النبض تنفست بـ راحه
لمن حسيت بـ نبضها
أنداريت بـ حيره و رجعت أسوق
لحد ما وصلت لـ أقرب مستشفى
نزلت اركض شلت مُلاذ و دخلتها لـ جوا
صحت على ممرضه تشوف الي دكتوره
أجت دكتوره نومنا مُلاذ على سديه
بعدتني الدكتوره بـ أيدها و أتقدمت يم مُلاذ
- شنو سبب وضعها هذا
عدها أمراض من قبل ؟؟
جسار : لا بس هي تگول گلبها يوجعها
فتحت عيونها تفحصهم
أندارت ألي و حچت
- البنيه فص عينها دم صاير شمسوين ألها !
جسار : ما مسوين
بَس هي عاشت أشياء مو زينه
ما بچت بسببهن و اليوم بچت هواي
ما أدري دكتورة شوفيها لـ يرحم والديچ
أخذت سماعات لبستهم
و خلتهم على گلب مُلاذ تسمع نبضها
نزعتهم بسرعه و خلت شي مثل الكزاز
گدام فتحات خشم مُلاذ ، دحگتلها و وخرتها
أندارت و صاحت لـ الممرضه
-أوكسجييين بسرعه
راحوا يتراكضون و أنا ما مفتهم
جسار : شكو شبيهااا؟
-أنت شتصير منها؟
جسار : أخوها
-وينكم عنها نبضها ضعيف
و الأوكسجين منخفض گوه تتنفس
جسار : شنو گوه تتنفس؟
-تابع حركة تنفسها
دحگت لـ مُلاذ
فعلاً نفسها يصعد و ينزل بـ صعوبه
جابو ألها أوكسجين خلولها
جسار : دكتوره شلون وضعها ؟؟
- خلينا ألها أوكسجين تصحى و نشوف
بنين مغذي بسرعه
حچت الها اسم مغذي و أنا صافن
راحت بسرعه الممرضه ورا كم دقيقة
أجت جايبه مغذي علگو لـ مُلاذ
گعدت يمها حيلي مهدود ، صافن عليها
ظليت گاعد و منتظر تصحى
رفعت راسي لمن حسيت على أحد يمي
دحگت لـ الدكتوره أتقدمت لـ گدامي وحچت
- ما رح يفيد أنتظارك هيچ هي تحتاج راحه
جسار : عادي أنتظرها عسى ما ألف سنه
- غريب
جسار : شنو؟
- تعلقك بـ أختك
جسار : بالأصل هي بت عمي
بس أنا ما عندي أخوات و لا هي عدها أخوان
نگول أحتا أخوه و أنا فعلاً أحسها أختي
لو شما يصير
- ههههه حلو هذا العقد الأخوي
جسار : مرات نحتاج أخت تسندنا و حنينه علينا
مهما كثروا عدد الأخوان تبقى الأخت مكانها مختلف و يمكن لو عندي أخت ما رح أحبها
گد حبي لـ مُلاذ
- لا رح تحبها أكثر بس هسه هيج تگول هيچ
لأن شفت الحنيه من بت عمك و مواقفها
مثل مواقف الأخت
جسار : الله أعلم
سكتت الدكتوره ، أنا هم سكتت
طلعت شفت السياره أخذتها صفيتها و قفلتها
رجعت دخلت ، أنتظرت مُلاذ تصحى
لحد ما صحت يلا جريت نفس بـ راحه
گمت بسرعه وگفت يمها
جسار : مُلاذ ؟
دحگتلي مخليلها أوكسجين
و رجعت عيونها ع السگف
أنداريت لـ الدكتورة أريد أحچي و سبقتني
-خل أشوفها
أتقدمت تفحصها و تسولف وياها
بس مُلاذ ما تجاوب صافنه بـ السگف
أندارت الدكتوره ألي ، أتقدمت ناحيتي و گالت
-وضعها زين بس ما تتجاوب وي أحد
جسار : زين دكتوره شلون شسوي؟؟
-أنت گلتلي مرت بـ اشياء سيئه؟
جسار : أي
-لو تعرضوها على طبيب نفسي أحسن
جسار : ما تقبل
-أنت حاول تكون وياها و أفتهم منها
جسار : ما تحچي هي
-لعد لازم تلگون الكم حل
لأن البنيه من البچي حتى شرايين عينها طالعه
أبوها و أمها خل يساعدوها حاچيهم أنت
جسار : تمام شكراً دكتوره
-من يخلص المغذي صيحني حتى نغيره
جسار : وين الگاج ؟
-هنا موجوده بالمستشفى
جسار : شنو أسمچ ؟
حتى أحاچي الممرضين يصيحونج
-فجر
جسار : أسمچ؟
فجر : أي
جسار : تمام شكراً ألچ
أبتسمت : واجبي
دارت وجهها و راحت رجعت نظري على مُلاذ
بعدها صافنه بالسگف ، أتقدمت گعدت يمها أدحگلها دموعها منهمره على جوانب وجهها
و هي صافنه و فص عينها واضح بي الشرايين
ظليت صافن على صفنتها أنتظرها تحاچيني
مرت فتره صحت لـ فجر تغير المغذي أجت غيرته
وگفت يم مُلاذ تحاچيها بَس مُلاذ ما تجاوب عليها
بس ترمش و تدحك لـ السگف و دموعها تنزل
وخرت ألها الأوكسجين ، دارت وجهها تريد تروح
جسار : فجر ... دكتورة فجر
التفتت دحگتلي أجت ناحيتي ، حچيت
جسار : رح تظل هيچ؟ دحگي حالها
-لا لتخاف بعدين هي تكوم تحجي و تتصرف
هواي ناس اجو يمنا هيچ
جسار : تمام أشكرج
درت وجهي أريد أروح أگعد
أنداريت ألها لمن سألتني
فجر : شنو أسمك؟
جسار ، جسار
فجر : أنت بغدادي أصلك؟
جسار : لا أنباري ، ليش؟
فجر : تگول دحگت
جسار : متعلمها من أهل أبوي
فجر : تمام فهمتك
هزيت راسي بـ قبول و رحت گعدت
راحت فجر و أنا ظليت گاعد
مرت فترة طويله و انه گاعد و صافن
مُلاذ رجعت غفت ، يبدلون ألها مغذيات
غفيت تعبان ، فتحت عيوني لمن حسيت بـ حركه
دحگت لـ مُلاذ گاعده على حيلها
تريد تنزل من السديه ، ركضت عليها من مكاني
جسار : ها مُلاذ ؟؟ شكو شبيچ؟
دحگت بـ وجهي ، همست
مُلاذ : أستفرغت
جسار : شنو ؟ ليش شبيچ؟
سكتت ما تجاوبني و تدحك لـ الجهه الثانيه
گلتلها تگعد و رحت حاچيت ممرض
جسار : وين الدكتوره فجر؟؟
-الدكتورات ما يبقن بس دكاتره أكو
جسار : زين أي دكتور صيحلي
البنيه أستفرغت و ما مفتهم شبيها
صاح لـ واحد واگف قريب علينا
أتقدم و مشى وياي ناحية مُلاذ
دخلت لگيتها كاعده بـ مكانها
وگف الدكتور يفحصها أجا يحاچيني
و يگلي على علاجات الها أتشكرت منه و راح
رجعت عيني على مُلاذ الگاعده و صافنه
جسار : مُلاذ ؟
دحگتلي و رجعت تمددت
جسار : ارتاحي ضي عيوني أنتِ أرتاحي
بس يصير الصبح أروح اجيبلچ أكل و أجي
مُلاذ : ما أشتهي
جسار : ميخالف حتى لو
گعدت يمها و أجا عامل يمسح الگاع
حل الصبح و هي بقت تغفى و تفز و أنا يمها
رفعت عيني لمن أجت فجر تتطمن عن حالها
فجر : شلون صرتي؟
مُلاذ : زينه
حچتها بـ نبرة تعب توضح كذبتها
أبتسمت فجر و ضربت أبره بـ المغذي
مُلاذ : جسار
جسار : ضي عيونه گولي
مُلاذ : أريد أطلع منا
جسار : تمام نطلع بس صيري زينه أول
هزت راسها بـ رفض
گامت لازمها بـ راسها ، حچت
مُلاذ : ما أريد
فجر : بـ رأيي هم من الأفضل تطلعها
لأن المكان مليء بالوباء و الفايروس
ممكن تتاذى بسببهم أساساً أول ما تطلعون منا
لازم ترمون الملابس يلي عليكم و تعقمون نفسكم
و تروحون تسوون مسحه تتطمنون على صحتكم
دحگت لـ مُلاذ و دحگتلها
هزيت راسي بـ قبول و بعد ما خلص المغذي
شلنا من أيد مُلاذ و گمنا سندت مُلاذ عليه
طلعنا أنا وياها ، وصلنا للـ الباب
سمعت فجر تنده ألي ، وگفت و أنداريت ألها
فجر : هذا رقمي اذا ردتوا مساعده
أخذت الورقة الي بـ أيدها دحگتلها
هزيت راسي بـ قبول و خليتها بـ جيبي
جسار : مشكورة
عبرتها و مشيت صعدت مُلاذ بـ السيارة
و صعدت أنا و ظلينا بـ الطريق
ما ندري وين نروح ، أنداريت لـ مُلاذ لمن حچت
مُلاذ : وديني لـ الشقة و روح لـ أهلي
جسار : شنو لا ماكو هيچ حچي
تروحين وياي لـ بيت أهلچ
مُلاذ : أريد أبقى وحدي
جسار : مو هسه من تصيرين زينه
مُلاذ : جسار
جسار : شلون بويه شلون أعوفچ هيچ؟؟
بـ طخه أذا يطخوج توگعين ، أخليج وحدچ؟
مُلاذ : مابيه شي
جسار : ماكو هيـ...
مُلاذ : جسار
جسار : زين تاكلين أول
مُلاذ : ما أريد أكل
جسار : تريدين تموتين نفسج أنتِ؟؟
سكتت و أنا هم سكتت عنها
مُلاذ :-
صافنه ع الطريق
أحس گلبي ملچوم ما أعرف من شنو بـ الضبط
بَس الخنگه الأحس بيها تموت الواحد بـ مكانه
حسيت وجع الدنيا كله بـ روحي
أخذت تلفوني من الجنطه أخابر لـ ملاك
أريد أتطمن عليهم مهما كان يبقون أهلي
ما جاوبت ، رجعت أتصلت على أمي ما تجاوب
نزلت تلفوني ساكته و دمعتي نزلت من الوجع
خليت تلفوني بـ الجنطه و مسحت دمعتي
ضميت شفتي ، بلعت ريگي و حچيت
مُلاذ : وديني لـ الشقه جسار
و لا تحچي لـ أحد عن يلي صار
جسار : مُلاذ ...
مُلاذ : ما ألي طاقة أبد
وجع الدنيا هسه كله بـ گلبي
و أسوي أي شي و بـ أي شخص
حتى يخمد هالوجع ، أفهمني
ما أريد تكون أنت أو أهلي الضحيه بـ هالشي
سكت جسار و هز راسه بـ قبول
ذبني بـ باب الشقق راد ينزل ما خليته
گلي رح يروح و يرجعلي جايب أكل
ما حچيت شي ، أنداريت و دخلت
دحگت لـ الكاميرا يلي تسجل درت وجهي
لزمت بـ الحايط و سندت روحي عليه
حاولت أفتح باب شقة أهلي بـ صعوبه
أيدي ترجف ، گعدت بـ باب الشقة
ما گادره أوگف ، الكاميرات مفتوحه يمه
ما أريد أطلع بـ الكاميرا بس صايرة گدامي
رفعت أيدي و أنا گاعده فتحت الباب
لزمت بـ مقبض الباب و جبرت روحي أوگف
دخلت أسحل نفسي سحل لـ الشقة
وصلت لـ الغرفة شمرت روحي ع الدوشك
نزعت شالي أتغصغص خانگه روحي
ما ردت أوصل لـ هاي المرحله
سحبت التشيرت يلي بي عطر بابا
خليته بـ خشمي و نزلت دموعي ،
أنهاريت أبجي و أشهك و أنا أتذكر گبره
تلوعت بـ مكاني من الوجع الأحس بي
ما أدري شلون بعد رح أخفف هالأذيه
بچيت بـ صوت و دموعي تسيل على خدي
نار تچوي بشرتي حسيتها
مُلاذ : باباا
غمضت عيوني حيل ، أهتز جسمي أبجي
حضنت التشيرت لـ صدري نمت على صفحتي
حاضنه التشيرت لـ صدري بـ كل حيلي
دموعي تنزل بـ هدوء ، شفتي ترجف
غفيت و دمعتي على خدي
فتحت عيوني لمن حسيت أيد على شعري
بـ لحظتها فزيت مبتعده غمضت حيل
أحاول أوضح نظري يلي مشوش
دحگت الدنيا ظلمة كل شي ما أشوف
أخذت جهازي بسرعه ، فتحت ضواه
دحگت لـ أيهم يلي گاعد گدامي
أيهم : أشش انه لا تخافين
دحگت بـ وجه ساكته و اگرض بـ شفتي
صفن بـ وجهي يدحگلي عيونه تتنقل بين عيوني
أيهم : شبيها عيونچ ؟؟
مُلاذ : ما يخصك
أيهم : شبيچ مُلاذ عيونج و صوتج ليش هيچ؟؟
مُلاذ : ما يخصك
زفر نَفس و غمض عيونه
كرض شفته ، هز راسه بـ قبول
أيهم : تمام ، گومي نامي فوك
گام وكف و لزم زندي بـ معنى "گومي"
نترت أيدي حچيت بـ عصبيه
مُلاذ : عوفني!!
كز على أسنانه
حچا بـ فحيح غضب
أيهم : هنااا ماكو لا جربايه و لا شي تنامين علييه أصعدي فوك و نامي الجو هذا مال بيت يمرضج
مُلاذ : ما يخصك عوفني!
أيهم : يخصني أمشي كدامي
لزم زندي يريدني أگوم
و أنا أسحب بـ أيدي منه
مُلاذ : عوفني جاي أگللللك
گعد گبالي جر وجهي من فكي
لازم وجهي بـ أيده دحگلي و حچا بـ عصبية
أيهم : تريدين تعاقبييين أحد عاقبيني انه
مو تعاقبين نفسچ خوش؟؟؟ گومي گدامي يلا
نترت أيدي من عنده
و بقيت گاعده بـ مكاني ادحگله
مُلاذ : على أساس انت تهتم أذا أعاقب روحي
دحك بـ وجهي بـ قلة حيله ، گام وگف
أيهم : كذبت عليج بـ كل شي ألا بـ حبي الچ
مُلاذ : اليحب ما يسوي هيچ بـ محبوبه
أيهم : يسوي كل شي يسوي
عندي أستعداد أصير كذاب و مجرم و مدمن
و دكتور يخون شغله و كل شي سيء بـ هالكون
بس حتى أنتِ ما يمسچ الضرر
مُلاذ : معتبر هذا حب ؟ مجرم واو
واو تحبني لـ درجة تصير مجرم علمودي
هيج أگول؟ أنا من شفتك لحد هاللحظة
ما ردت منك غير شي واحد وهو الحقيقيه
ما ردتك تصير مجرم و لا ردت شي ثاني
أيهم : مو أنتِ ردتي الوضع چان يتطلب
واحد من عدنا يتخلى عن كل شي عنده
و يروح بـ الطريق الغلط و هو مغمض عيونه
في سبيل كل الي حوله ما يصيرلهم شي
و أنتِ چنت بـ راس القائمة
أيهم : حبيتچ مُلاذ حبيتچ لـ درجة
بـ عمرچ ما رح تتوقعيها
لحد هاللحظة الي انه بيها گدامج بعدني أحبچ
و بعدني مستعد أجازف بـ كل شي علمودچ
و علمود أهلي و أهلچ و الكل
ظليت أدحك اله ساكته
أتقدم عليه يريد يشيلني طلعت سجنيتي
من جوا الدوشك بسرعه و خليتها على رگبتي
مُلاذ : ما تخاف على روحك أذا ذبحتك
بس تخاف عليه مو ؟ لا تتدنى عليه
و الله أسويها و تدري بيه
وگف يدحك بـ وجهي فرك وجهه حيل متنرفز
أندار أيديه على وجهه حچى متنرفز
أيهم : ليش هيج جاي تسوين بيه!
وخر أيده من وجهه و دفر الباب
يصيح عليه
أيهم : ليييييش ؟؟ ليش تستغلين نقطة ضعفي بيچ ليش حتى أنتِ صررررتي ضدي و صيري ضدي
ما رح ألومج بس كااافي مُلاذ كااافي
أبوچ چان يريد يحميني ليش أنتِ تعاقبيني؟
صيحت بـ صوت مبحوح
مُلاذ : هسه أبوووي صار المذنب ؟؟
أيهم : أبووووج جان رايدني ما أتاذى
ليش هسه أنتِ تأذيني ليش هسه تلچمين گلبي
مُلاذ : لأن ضميييت عني لأن چذبت عليـ...
صيح بـ صوت عالي أنفجر بـ وجهي
أيهم : ضميييت غير حتى ما تموووتين
ضميييت لأن عاااجبني انه؟؟
بـ كل حبي ألج هذااا تتوقعين چان عاجبني
شوفتج و أنتِ محتاره و تدورررين ألچ ثغرره؟
و لو أعرفچ مو متسرعه ما چنت رح أفكر حتى
و چنت رح أحچيلج و لا وجع گلبي هسه عليچ
أيهم : أعرف بـ اللحظة ألاحچي بيها
تطلعين الچتال من جوا الگاع و ما يخليچ عايشه
و رب السماوات و الأرض ما يخليچ عايشه
أذا وحدج تلگينه و بـ لحظة من اللحظات
انه مو يمچ بيها يموتج و يموت كل أهلي
ما عندي دليل عليه و لا عندي شي
أيهم : جماعته منتشرين بـ كل مكااان
واگف يمج هو و جاب واحد يرمي عليچ
حتى يسوي روحه يحميچ و حتى تثقين بي
شتتوقعين من هذا أنتِ؟؟
مُلاذ : چنت تگدرررر تبلغ الشرررطه
أيهم : شأبلغ من الشرطه نصهم يشتغلووون ويا
شعبالچ أنتِ؟؟ انه صارلي من كعدتي هنا
لحد هاي اللحظه گاعد بـ بابچ
ما رحت لحظة وحده عبالچ يعوفوووچ هيچ
مُلاذ : كل شي بسببك
لو حاچي ما چان صار كل هذا
ضرب وجهه بـ أثنين أيدي
رجع يصيح عليه و يفشر على روحه
يدعي على روحه يموت
نزلت دموعي مسحتهم بسرعه
أجا ناحيتي كعد گدامي على ركبه
سحب السچينه الي يمي خلاها بـ أيدي
أيهم : موتيني و أخلصي و خلصيني مُلاذ
شباقي بـ عمرري انه؟؟ أبني بعيد عني
و أشرده و هو بعده طفل أشرده من عصابات
حتى لا يصير أله شي بسببي
أيهم : أخواني ماتو ثنينهم بسبب أبوي
و باهر رح يتخبل بسبب ألي عرفه
ظل عايش لـ هاللحظة لأن ضميت عنه أبو منو
هتان حياتها متدمره زوجتها جسار مثل الغبي
أمي أصلاً راح عقلها من راسها
و أنتِ؟ أنتِ جاي تموتيني و تنهيني على أيدج
شمرت السجينه و دفعته
گعد مقابيلي ساند ظهره ع الحايط
مسح العرك المتصبب من گصته
صفنت أتذكر كلامه و گلبي يوجعني
ما جاي أگدر حتى أنكر أنُ هو متأذي
أتذكر كل لحظة أنا ويا بيها
أول مره شفته ، أخر توقعاتي الصار
دحگت اله و بـ بالي سؤال واحد
ليش أنا حبيته؟ و أرجع أتذكر أهتمامه
و أول ما أتاذى ألگاه گدامي و لمن خطفوا
چان يعرف ممكن يأذونه بس قبل ينخطف
نزلت دموعي ما گادره أسكت نفسي
كتمت صوتي بس ما گدرت ، بچيت أناشغ
سمعت صوت أيهم يلي يوضح صدمته
أيهم : مُلاذ ؟؟ مُلاذ
گام من مكانه و أجاني بسرعه
رفع وجهي بـ أيده يدحك لـ دموعي
وخرت وجهي من أيده
مُلاذ : عوفني
أيهم : لا تبچين مُلاذ لا تبچين أبوس عيونچ
لا تحرگين گلبي لا تبچين بسببي
حضن راسي لـ صدره
رجلَيه بين رجليهه و هو گاعد على ركبه
حاضنني بـ كل قوته لـ صدره
مُلاذ : عوفني أيهم
أيهم : اشش لا تبچين مُلاذ لا توجعين گلبي
لزم وجهي بـ أثنين أيديه
و أنا أشهك و أبچي باس گصتي
مُلاذ : ليش هيج أيهم ليش ؟؟
رجع حضنني راسي على كتفه ،
يمسد على شعري
حچيت و أنا أبچي بـ صوت
مُلاذ : ليش خليتني أحبك
حضنني أكثر لـ صدره
أيهم : ما چنت رايد تحبيني
ما چنت أريد حتى أتقرب منچ و ألمسج
ردت نتزوج و أحرمج على روحي
بس حتى لا تفكرين بـ يوم أستغليتچ
كل الچنت أريده تبقين گدام عيني بلا ما تتأذين
بس ما صار هيچ ، جنت بالبداية أگلج أقرب منچ حتى ما تعوفيني چنت أعرف رح ترفضين
أحتقن صوته و هو يحچي
و أنا عرگانه و دموعي تصب على خدي
رفعني أكثر من خصري حاضنني
خليت أيديه على أكتافه أريد أدفعه
بس ما عندي أي قوه حتى أبعده عني
مُلاذ : عوفني أيهم
أيهم : روح أيهم أنتِ
شالني بين أيديه و أنا عيوني گامت تتلزك
كل جسمي يرجف لان ما ماكله
و ما عندي طاقة حتى أحچي بعد
بس دموعي تنزل ، غمضت عيوني حيل
من حسيت أتسلط ضوه عليه مغمضه عيوني
حچيت گوه
مُلاذ : أيهم
أيهم : تچوين مُلاذ مصخنه
جسمچ يرجف شمسووويه بـ روحچ
نزلني ع الفراش
و أنا ما ألي طاقة أسوي أي شي
خلا أيده على طرف تشيرتي
خليت أيدي فوك أيده بـ صعوبه
أيهم : اشش مصخنه وخري أيدج
نزعني تشيرتي و غطاني
أيهم : أيدج شبيها؟؟ ليش هيچ مزرفه؟
ما جاوبته ما عندي أي طاقة
غمضت عيوني خلا أيده على وجهي
أيهم : مُلاذ شبييج عاينيلي لا تخبليني
فتحت عيوني أدحگله و هو يمسح بـ وجهي
أيهم : مُلاذ داخله لـ مستشفى؟؟
ما جاوبت ما أكدر أتحرك
أحس كل جسمي جاي يحترك
شالني بين أيديه أخذني للحمام
مُلاذ : عوفني
أيهم : رايحة لـ المستشفى مو؟؟
ألف مره گلتلج لا تدخلين المستشفى
المستشفى بيها فايرووس شوكت تسمعين كلامي
لا جاي تركدين بالبيت و لا جاي تگعدين
بـ كل مكان منتشر الفايروس شوكت تفهمين؟؟
كعدني على التخته
و أتقدم عليه يريد يسبحني
مُلاذ : عوفني لا تلزمني
أيهم : لاززم تتعقميين !
مُلاذ : وخر عني أطلع
أيهم : ميخالف أطلع بس لازم تتعقمين
و تسبحين بعدها أعوفج بـ حالچ
مُلاذ : ماريد أنا أسبح أطلع
أيهم : افتحي عيونچ أول يلا تسبحين
فتح الدوش عليه ثلجت
لازمه أيد بـ أيد ، غمضت عيوني حيل
مُلاذ : أطلع
خليت ايديه الترجف على وجهي
و أگله يطلع من يمي لزمت بـ الدوش ووگفت
نزل الغراض يمي و گعدني على التخته
و طلع ، گوه أشيل أيدي و أسبح
لحد مخلصت گمت لازمه بالحايط
لبست البرنص ، فتحت الباب
دحگتله واگف گدامي أريد أمشي
بَس راسي يفتر ، لزمني بسرعه
حضنني لـ صدرة و يمشيني
أيهم : تعالي
مُلاذ : وخرر عني لا تلزمني لا تلزمني!
أيهم : ميخالف من تصيرين زينه
أخذني لـ الغرفه دفعته
طلعت من الغرفه لازمه بـ الحايط و أمشي
أريد ارجع لـ شقة أهلي أنا و البرنص
عيطت لـمن أنشاليت من خصري
گمت أدفر بـ رجليه و هو شايلني
أيهم : گلتلج ما تطلعين شهالعناد
حتى و أنتِ مريضه؟
مُلاذ : عوووفني
ظل ساكت و مشى بيه للـ الغرفه مره ثانيه
و هو شايلني و أنا أدفر بـ رجليه
ضجت كلش ما أريده يلزمني و راسي يوجعني
و حالي بـ الضيم بچيت أول ما سمع صوتي أبچي يم باب الغرفة وگف
أيهم : لا تبچين من تبچين
تهدين الدنيا على راسي
نزل لـ الگاع گعد حاضنني بـ أثنين أيديه
ظهري على صدرة و دموعي تنزل ، همَس
أيهم : مُلاذ
يمسح بـ دموعي يلي بللت خدي
و أنا أحس وجهي و جسمي محترگات
أحس نار مشعوله بـ كل شي بيه
رفع أيدي باس الكف ، مسح دموعي
بقيت هادئه و هو يمسح بـ وجهي
دنك باس رگبتي بـ شوغه ، غمضت عيوني
مُلاذ : لا تبوسني
أيهم : تدوخين؟
مُلاذ : أقرف
حچيتها و بعدين لمن حسيت بـ ثگلها
أيدي المشتده عليه رخت
بچيت بسبب مشاعري
شعليج بي من كلمة رح يتأذى ؟
بس هالكلمة ثگيله عليه و هو ماله ذنب
من شوكت البچي هيچ صار سهل عندي؟
أيهم : گومي نامي
مُلاذ : كافي
أيهم : شنو الكافي؟
مُلاذ : لا تسوي نفسك تهتم بيه
لا تسوي أشياء تخليني ألوم روحي
لأن أحچي وياك بـ طريقة تستاهلها
أيهم : بـ عمري ما تصنعت أهتمامي بيچ
انه خوفي عليج بعمري ما رح أتصنعه
لأن لو بعد ألف سنه رح أظل أشوفج
الطفله يلي حبيتها كل ذيچ السنين
أيهم : بعدني أحبچ رغم أذية الكون كلها بـ هالحب بَس أحبچ و لو أعرف نهايتي الموت
بسبب حبي ألچ رح أظل أحبچ و ما رح أعوفچ
رفعني من الگاع
اخذني لـ الفراش بدل ملابسي
و نومني ، غطاني و أنطاني دوا
ما قبلت أشرب ، گعد وراي لزم أيديه تك أيد
و أنا أتحرك متنرفزه
أيهم : أشش أش
ينتر بـ أذني و دخل الحبايه غصب بـ حلگي
ما قبلت أبلعها اخذ المي و فتح حلگي
دار المي بي ، غصيت أگح و بلعت الحبايه
و هو وراي يدك على ظهري
رجع سحب راسي على صدره و شربني مي
و أنا روحي أحترگت يحركني بكيفه
عبالك لعبه بـ أيده أنا
مُلاذ : عوفنيييي
أيهم : ميخالف أعوفج بس أكلي أول
مُلاذ : ما أريد كلشي ما أريد منننك
أيهم : مريضه و تتعاركين ماكو هيچ
دارني أله و مجتف أيدي ثنينهم
نومني على صدره
أيهم : من تگعدين أكلي
مُلاذ : أيهم كااافي كافي
راسي مسطور عوووفني
گمت بـ عصبية من يمه
أول ما وگفت دخت ظل گدام عيوني أسود
غمضت عيوني حيل أحاول أوكف
حسيت بـ أيده على خصري يثبتني
خليت أيدي فوك أيده أريد ادفعها أو أنزلها
لزم أيدي دارني أله فتحت عيوني دحگت بـ وجه
أيهم : بَس اليوم بَس اليوم نامي هنا!
وخرت أيده مني و رجعت نمت ع الفراش
سد الضوه و كعد يم راسي و أنا صافنه
مُلاذ : أريد عطر بابا
أيهم : شنو؟
مُلاذ : عطر بابا عندك أريده
أيهم : ما موجود هنا
مُلاذ : اي صحيح
أيهم : و الله ما موجود هنا
محل العطور انطانيا الحجي
و هو علمني شلون يسوي هذا العطر
و انا گمت أسوي و أتعلم منه
بَس بعد ما قبل يسوي يعتبره خاص بـ أبوچ
بس ألي يسوي العطر چان أو انه أسوي
مُلاذ : موجود عطره بـ قميصك
أيهم : لعد ما عدج أختيار غير تشميني
مُلاذ : يا كرهي لـ برودك
لو أموت و أنا محتاجه عطر بابا
و العطر بيك بس أنت ما رح أشتمك
أيهم : شمي ملابسي
مُلاذ : ما أريد
گمت لزمني و نومني
أيهم : كافي اركدي صيري زينه و حوصي
مُلاذ : ما أريد أبقى يمك!
أيهم : مو يمچ انه رح اروح
مُلاذ : بعد أحسن
أيهم : تخيلي أروح و أموت تبقين متحسره ع العطر بَس موجود بـ قمصاني لا تخافين يعني مو بس بيه
مُلاذ : لا ، لا تخاف ما أتحسر
سكت أنداريت دحگت اله مبتسم
عبالي ضاج و سكت بس ما يفيد ويا
رحعت درت وجهي عنه
أيهم : ها ليش عاينتيلي؟
مُلاذ : عبالي ضجت بس ما يفيد وياك
أيهم : ما أضوج منج لَـذه
فدوتج انه شتحچين أحچي
لابد يجي يوم و تفهميني بي
مُلاذ : ما رح يجي هاليوم تعرف؟
أيهم : اعرف ما رح تفهميني هسه
لأن كل الي بـ بالج انه لان ضميت عنج
انتِ تعذبتي و صحيح هي هيچ
بس لو ما ضام عنج چان خسرتج
و عندي أخسرج و أنتِ عايشه
أفضل من خسارتج للـ أبد
أيهم : قابل أسمع كل حچايه منچ
بَس المهم تكونين عايشه و گدام عيني
مُلاذ : ما رح أبقى گدام عينك لمن تطلگني
أتنهد و سكت ، غمضت عيوني أحاول أنام
أول ما غمضت سمعت صوت الجرس أندك
گام أيهم يشوف منو و أنا ظليت متمدده
سمعت أيهم و صوت جسار يتعاركون
گمت گوه و لبست شال من الكنتور و طلعت
جسار : مُلاذ شتسوين هناا؟؟
هذا الخايس أخذج غصب من جوا مو؟
أيهم : جسار أدفرك دفره أفرك بيها ع الدرج
اتلازمو هو و جسار و أنا صافنه عليهم
رحت أخذت الأكل من أيد جسار
و همَ يتعاركون كعدت بالصاله اكل
و صافنه عليهم واحد يضرب الثاني
گمت أخذت جنطتي طلعت سلاحي
رحت لـ الصاله گعدت وراي الشباك
فتحته و رميت بـ الشارع
وگفو ثنينهم مخروعين من الصوت
مُلاذ : الرصاصه الجايه مو بـ الشارع
جسار : خبلتها غضب الله عليك
رفع أيهم ايده يريد يضربه بوكس
و نزل أيده متنرفز ، أجا يمي
أيهم : عوفي اكل هذا انه هسه أجيبلج
مُلاذ : حل عن سماي گوه جاي اكل
ما أريد أظل لازمه بيك وين ما أولي
أجا جسار سحل أيهم من ياخته
و أيهم ضربه و واحد يفشر ع الثاني
رجعت طلعت أيدي من الشباك و رميت
صفن جسار بـ وجهي
جسار : شبيج أنتِ؟
مُلاذ : تريدون تتعاركون أطلعوا برا أتعاركوا
دايخة و راسي يوجعني
دحگت من الشباك العالم كلها واگفه بـ بيبانها مخترعه من صوت الرمي
جسار : شتسوين يم هذا؟؟
مُلاذ : هو أجا شالني و أخذني ما خلاني جوا
أيهم : أنتِ ليش تبررين لـ هذا؟؟
مُلاذ : أبن عمي و چان وياي بالمستشفى
أيهم : **** مريضه و تعرف بيها و ما تحچي
جسار : ماكو غيرك **** غير من وراك
و من ورا أبوك الـ **** تمرضت
عفتهم و گمت غسلت
رجعت لگيتهم و احد يغلط ع الثاني و يتعاركون
مُلاذ : كافي
جسار : تعالي وياي خل اخذج
أيهم : أكسر رجليك و حق الله أطلع برا
جسار : بكيفك هي أبقيها يمك
أدوس راسك خوش؟ ماخذها و طالع
بيك خير أحجيلك كلمة أذا ما أحطك
و أخلي دمايتك بـ طولك ما أتسمى جسار
مُلاذ : لا يمك و لا يمه أبقى
أخذت تلفوني و نزلت جوا
گعدت ع الفراش دايخة و راسي مسطور
و الأكل أحسه واگف بـ بلعومي
دحگت لـ رساله من ضرغام
-حققوا وي علياء بس ماكو اي دليل عليها
سديت التلفون أعرف هيج رح يصير
أتمددت و ظليت صافنه بـ الگاع
معقوله أمي لـ هاي الدرجة ما تهتم ألي؟
لـ درجة حتى ما خابرتني و لا سألت عليه
لا هي و لا ملاك لـ هالدرجة كرهني؟
زين أنا شنو ذنبي ؟ ما سويتلهن شي
و لا فكرت بـ شي غير أنُ يكونن بـ خير
رفعت تلفوني و دحگت لـ رسالة جايتني من هتان
تسأل بيها عن حالي ، ضحكت بـ استهزاء
بت عدوي سألت عليه و أمي ما سألت
راسلت هتان و أتطمنت على وضعهم
گلتلها أنا زينه ، دزتلي صورة أبيل
كاعد يضحك وي غاده و أدهم ، أبتسمت
رفعت عيني لمن أنفتحت الباب و دخل أيهم
كعد بـ باب الغرفة سديت التلفون ساكته
دحگتله طلع جكايره يدخن أكثر من وحده
مُلاذ : گلتلي ما جنت تريد تتقرب ألي
ألتفت دحگلي
أيهم : عبالي نايمه
مُلاذ : ليش حاولت تتقرب ألي من جنا بـ تركيا
و من أول ما أتزوجتني ليش جنت تريد تلمسني؟
أيهم : بـ البداية ردت ، رح تكرهيني أكثر أعرف
بس وعدتج ما أجذب عليچ بعد
ردت طفل يربطني بيچ حتى ما تعوفيني
عگدت حواجبي ادحگله مصدومه
و هو كمل كلامه
أيهم : لمن رحنا لـ تركيا
جنت رايد أروح و من أرجع يكون زواجنا متمم
حتى لا يعتبر بس كلام و على الورق
بس كرهت روحي لأن فكرت هيج
رح تگولين ردت تستغلني لا ما ردت أستغلج
ردت أضمن وجودج وياي ردت تبقين يمي
حتى لو مو علمودي المهم تكونين گدام عيني
مُلاذ : حتى هاي اللحظه الچنت أحسها
ذكرة نظيفه و حلوه بـ ذاكرتي لطختها بـ سوادك
و سوء تفكيرك
دار وجهه ساكت و أنا أنقرفت من أفكر
چان يريد يخلي طفل ضحيه بس حتى أبقى يمه!
مُلاذ : ردت تخلي طفل ضحيه
بس حتى ترضي نفسك
أيهم : ما چان رح يصير ضحيه
لأن أبو چان رح يموت و يسوي كل شي
حتى لا يصير هو ضحيه
مُلاذ : تضحكني هواي أنت
أذا أنا وياك ما أذينا چان أبوك رح يأذي
أيهم : ما أذى أبيل يعرف أحرك الدنيا
اذا واحد أعزه أتاذى و لو شويه
مُلاذ : لا أبيل لأن من لينا
بس لو طفل مني چان رح يحرك روحه
مثل ما حرگتوا روحي يمكن چان كتلني
و خلاه بلا أم
سكت أيهم و أنا أدحگله ساكته
رفع راسه يدخن ، نزل الجكاره و حچا
أيهم : تدرين ؟ بـ كل مره أحچي الج شي
أحس نفسي مثل طفل مُذنب گدام أهله
و ما يعرف شلون يتبرء من ذنبه شگد ما يبرر
و شما يسوي ما رح يفهمونه و لا رح يبرئوا
مُلاذ : لأن أنت فعلاً مذنب غلطت بـ حقي هواي
و أستغليتني هواي ما أريد أعيد نفس الكلام
لأن فعلاً أنت جنت تسوي هيچ
أيهم : تمام
سكت و أنا سكتت غمضت عيوني أحاول أنام
بس وين عيوني تحرگني و كل جسمي يوجعني
غير عن وجع گلبي و ساعه أختنك و ساعه لا
هتان :-
فتحت تلفوني أسأل على أيهم و مُلاذ
عاينت لمن أجاني أشعار من جسار
-وين أنتِ؟
- شمدريك فتحت تلفوني؟
- جاوبي لا تظلين تراوغين
- ما أعرف ليش؟
- هتان لا تخليني أطلع حرگة أمة محمد بيچ
أحچي وينچ ، أخوچ الـ **** وين وداكم
-لا تفشر على أيهم !
- أنعل أبو أيهم لابو الخلفة
فضيها و أحچي وينچ؟
- ما أحچي
- ما تحچين مو؟
-أي
- خوش سهله
عاينت لـ الرساله ساكته
-شتريد تسوي؟
ما جاوبني ظليت أكرض بـ أظافري
أنداريت لـ أمي الي تحاجي باهر
-شوكت يجي گلك؟
باهر : عنده شغل
-و أدهم يجي ويا؟
باهر : ما أدري أدهم هم عنده شغل
- أنت شفت أخوك شلون شكله؟
ها من عرفته شحجيتو شگلك؟
أعاين لـ باهر أحتقن صوته
و عيونه حاوطها الأحمرار
باهر : ما حاچاني شي ما يعرفني عدل
- ها؟ ليش؟ لا تضوج حبيبي ماماتي
بعدين لمن يعرفكم عدل رح يحبكم أنت و أختك
باهر : أن شاء الله حبيبتي أن شاء الله
هسه أنتِ تعالي نامي و أرتاحي
أخذها لـ الغرفة تنام و انه ظليت صافنه
رفعت أيدي مسحت دموعي
أنداريت لـ باهر لمن شال أدهم من الگاع
أجا خلاه بـ حضني حتى أنومه
صفنت بـ وجه أدهم و ظليت أهز بي
لحد ما بدا ينعس و يغفى سلمته لـ باهر
أجت غاده فرشت السفره
غاده : وين عمتي؟
باهر : عوفيها نامت
غاده : يا خطيه يلا هتان گومي أكلي
هتان : ما أشتهي
غاده : هتان ما يصير هيچ صدك تحچين؟
هتان : ما أشتهي و الله
باهر : گومي أكلي
هتان : ما أر...
بعدني أريد أكمل كلامي
و عاط بيه باهر حتى أگوم أكل
دحگتله و عيوني مغوركه صاير عصبي
و أذا واحد ما سوا الشي الي يريده هو
يصيح عليه حتى وي غاده هيچ صاير
عاين بـ وجهي وجه صار أحمر عافنا و طلع
غاده : لا تبجين هتان لا تبجين حبيبتي
أعذري أخوج ترا هو هم تعبان ليش تعاندونه
أجت يمي حضنت راسي لـ صدرها ساكته
و أنا دموعي تنزل و أبجي بدون صوت
رفعت تلفوني شفت جسار شايف الرساله
و ما مجاوب ، اندك الباب گامت غاده تشوف
شوي و دخل مازن بـ أيده مسواك
مازن : باهر وين؟
غاده : طلع
مازن : وين طلع؟
غاده : و الله ما أدري ما گلي
مازن : تمام
رفع تلفونه يخابر و طلع بسرعه من يمنا
عاينت لـ غاده راحت تلم الماعين
رحت لميتهم وياها و گعدنا منتظرين باهر
و ما أجا ، شوي و دخل مازن كعد بـ الصاله
مازن : بس يجي باهر أروح
غاده : لا خويه على راحتك
مازن : ما أريدكم تتقيدون
هتان : لا عادي
أبتسم و هز راسه بـ قبول
راحت غاده صبت اله چاي
مازن : لا يا بويه ليش تعبتي روحچ
غاده : لا شسويت قابل
مازن : استراحي لا تظلين واگفه
كعدت غاده يمي
مازن : لا تخافون ماكو شي
خابرت لـ باهر و جاوبني
غاده : صدك ؟
مازن : و الله لا تخافون ما بي شي
غاده : زين خل أحاجي و أجي
گامت من يمنا تحاچي باهر
و أنا ظليت گاعده ، عاين ألي مازن
مازن : شلونچ هتان؟
هتان : زينه
مازن : خو ما ضايجه
أبتسمت و هزيت راسي بـ رفض
مازن : شلونها الكليه وياج؟
هتان : متخرجه
مازن : لا بشرفج
هتان : و الله
مازن : شو ما مبين عليچ
رفعت أكتافي بـ عدم معرفه
هتان : اي شكلي مبين أصغر
أبتسم هز راسه بـ قبول
ظلينا گاعدين و غاده أجت يمنا گعدت
ساعه و نص و أندگت الباب حيل
فزيت مرعوبه و غاده گبل ضمتني بـ ظهرها
گام مازن طلع سلاحه من خصره بسرعه
و مشى لـ الباب و هو يأشرلنا نفوت
گمت فتنا الغرفة أنا و غاده
و أنا أنرعبت أبچي خايفة خاف يصير شي
سمعت صوت جسار وسعت عيوني مصدومة
جسار : هتاااان
هتان : جسار؟
طلعت أركض بسرعه ، أعاين لـ جسار و مازن
مازن يدفع بـ جسار و جسار كاز على سنونه
هتان : جسار؟
أجا ناحيتي سحب أيدي بسرعه
جسار : أمشي
غاده : جسااار جسار شجاي تسوي يمعود
صدك تحجي أوكف
وكف بـ طريقنا مازن و غاده توكف بـ جسار
أيدي أحسها أنكسرت من قوة لزمته ألها
غاده : وين تاخذها صدك تحچي؟
جَـر أيدي و رفعها بـ وجه غاده
جسار : ما رايحه وي غريب وي زوجها
غاده : مو وكتها جسار أبد مو وكتها!
جسار : لا وكتها ، أمشي
سحبني يريد نمشي ، وگف گدامه مازن
مازن : شنو أنت جاي تاخذ فصلية الخلفوك
ما تاخذها منا لحد ما يجون أخوانها !
عاين بـ وجهه جسار و ضربه كله حيل
وسعت عيوني مصدومه لزم مازن بـ خشمه
يلي طك دم ، موسعه عيوني بـ صدمه
سحب أيدي جسار بسرعه و طلعنا
هتان : عووووفني عوفني ما أريد أروح وياك
أجا مازن يركض
خشمه طاك دم وكف بـ وجه جسار
خلا السلاح بـ وجهه
مازن : عوفها لا أطلع روحك
جسار : رجال أنت سويها
هتان : مازن
أندارلي جسار خزرني
و انه نشف دمي من الخوف العشته
مازن : روحي هتان أدخلي
جسار : أذا تفكر بعد تنطق أسمها
أحطك و أدوس بـ بطنك
و أريد أشوف منو يخلصك
نترت أيدي بس ما عافها
هتان : كافي !
مازن : هتان...
دفره جسار ، ظليت صافنه مصدومه
جسار مو مثل ما جنت أعرفه!
نزل عليه يريد يكتله و انه مچلبه بـ أيده
هتان : عووووفه أروح وياك بس عوفه
جسار : أتحركي
سحبني بسرعه لـ السياره صعدني
و انه عيوني مدمعه و أبچي بدون صوت
صعد جسار و شغل السيارة
جسار : عليمن تبچين ع العزيز الـ****
هتان : شگد أكرهك و شگد كرهتك
جسار : ماكو مشكله يمي
يعني عادي تكرهيني ما تكرهيني
أنتِ و الماكو سوه
هتان : شكو أجيت أخذتني شتريددد مني ؟؟
جسار : بكيفي مرتي و عجبني اخذج
هتان : أضحك بـ هذا الكلام على روحك
جسار : مو أخوج الـ **** أنا
حتى أضحك على روحي
هتان : لاااا تغلط
جسار : سدي حلگج وين تلفونج
هتان : شتسوي بـ تلفوني؟
جسار : أنطقي
هتان : بالبيت بقى !
جسار : بعد أحسن
هتان : رجعني يم أهلي ما أريد أجي وياك
جسار : سدي حلگج
هتان : مو حيوااااان يمك انه حتى أسد حلگي
جسار : تمشين بـ كيفي وكت اليعجبني تحچين
تحچين و وكت الما يعجبني تسدين حلگج خوش؟
هتان : بعد أدفنني و انه عايشه
ليش متعب نفسك و تنطي أوامر؟
عاينلي و رجع عاين لـ الطريق
هتان : نزلني!
جسار : سدي حلگج
أنداريت فتحت الباب بسرعه
شمرت روحي من السياره
غمضت عيوني متأذيه خليت جفوف ايديه كدامي
بچيت بـ كل صوتي دموعي تتسابق على خدي أنداريت عاينت لـ جسار الأجاني يركض
گمت بسرعه و ركضت أريد أكمل ركضتي و لزمني
هتان : ما أريددد أبقى يمك عوفني
جسار : مخبله أنتِ؟؟؟ مخبلللله؟؟
هتان : أي مخبله تخبببلت
تعاملني كأنُ انه عبده يمك
كأنُ انه جبرتك تتزوجني
هتان : أذا بعدك تحب نور أو أي وحده ثانيه
ما يهمني ، أكو محكمه رووووح و طلگني
و راح أوافق على هالطلاق بلا ما أحچي حرف
لأن رح يصير نجاة ألي منك و من أستبدادك
عبرته أريد أمشي
سحب أيدي غمضت عيوني متأذيه من قوة لزمته
نزلت دموعي ساكته ، درت وجهي عاينت اله
عيوني مدمعه ،
جسار : أمشي أصعدي
هتان : ما رح أصعد انه لا خدامه عندك
و لا عبددده انه ما مگطوعه من شجره
حتى أنت تجي و تعاملني بـ هالطريقة
جسار : أمشي أصعدي جاي أگول
هتان : ما رح أصعد!
عاين ألي متنرفز
سحب أيدي يمشيني گدامه
وصلنا لـ السياره وگفت و أنداريت اله
هتان : لمن ردت تتزوجني گلت
لو سوالچ شي أسكندر ما أخلي عايش
أسكندر جنت تگدر ما تخلي عايش فعلاً
لو مأذيني ، بس أنت من أول لحظة تزوجنا بيها
لحد هاللحظه عاملتني بـ أسوء الطرق
كأنُ انه بوست رجليك و أيديك حتى تتزوجني
جسار : أصعدي
صعدت محروك گلبي منه
صعد و غلق تلفونه وداني لـ المستشفى
سوولي أشعه أيدي مرضوضه
رجلي متعوره ضمدوهم الدكاتره
و رجعنا صعدنا بـ السيارة
وصلنا لـ البيت نزلني يمشيني گدامه
دخلت البيت و بـ وجهي رحت لـ الغرفه گعدت
أجا فتح الباب و دخل نزع تشيرته
عاينت أله ساكته ، أتقدم عليه
جسار : مازن هذا شيصير منكم؟
هتان : صديق أيهم
جسار : هو أخوج ما يجيب بس الـ **** مثله
هتان : على شنو هذا حقدك ؟
عاين ألي بـ طرف عينه
و طلع من الغرفه ، گعدت راكده بـ مكاني
گمت أفتر بـ الغرفة و أفكر شحال باهر و أيهم
اذا عرفوا جسار أخذني أكيد رح تصير مشكله
مُلاذ :-
ظليت أيام أنا ما طالعه و نايمه بـ الفراش
و أيهم يروح و يرجع عليه القهرني أمي
عاينت لـ المغذي منتظرته يخلص
رجعت عيني على أيهم يلي يفتح بالأبره
حتى يضربها بـ المغذي
مُلاذ : ما حاچوك العصابه؟
أيهم : لا
مُلاذ : شلون متأكد رح يحاجونك؟
أيهم : لأن همَ هذا نظامهم
مُلاذ : يمكن يعرفون أنت ما ينثق بيك
أيهم : يتعرفون عليه أول رح يريدون
مُلاذ : زين منين يجيبون رقمك؟
أيهم : يكتلون اعدائهم خلال لحظة
و يعرفون كل اماكنهم و طبات و طلعات أهلهم
تريدين ما يعرفون مكاني و رقمي و عنواني
نزل گعد يم فراشي يتلمس گصتي
أيهم : أنتِ بس لا بيج كورونا
مُلاذ : أحسن بلكي أموت
ضربني على حلگي بـ خفه
أيهم : أنچبي
خزرته
مُلاذ : لا تتمادى!
دك تلفوني سحبته عاينت رقم تاره
جاوبت عليها
تاره : شلونچ ست مُلاذ
مُلاذ : زينه كلش و أنتِ؟
تاره : الحمدلله ست يس ردت أسأل عليچ
لان صارلنا هواي مفاتحين المكتب
مُلاذ : ما رح ينفتح بعد ، باجر رح أدز راتبج لـ بيتج بـ أيد ولد دزيلي عنوانج و المكتب رح أودي ناس يشيلون الغراض منه
تاره : ليش ست صاير شي؟؟
مُلاذ : تركت المحاماة
تاره : ليش ست؟؟
مُلاذ : هذا ألافضل
تاره : ست و الله ما أريد لا راتب و لا شي
بَس ليش رغم أشتغلت فترة قصيره وياچ
بَس هواي ناس أجوچ و ما شفتج فد يوم
خسرتي قضيه چانت دوم لـ صالحج
مُلاذ : ما تفيد مرات أذا خنتي شغلچ
ما راح تشتغلين بعد بـ ضمير مرتاح
تاره : الله يساعدج ست و يوفقج
أنا دوم موجوده أذا تريدين تحاچيني
مُلاذ : تسلمين عزيزتي
تاره : الله يسلمج ست يلا أخذي راحتج
نزلت التلفون و سديت الأتصال
عاينت لـ أيهم يلي صافن بـ وجهي مصدوم
مُلاذ : خير؟
أيهم : شنو تركتي المحاماة؟
مُلاذ : شلون برأيك الناس يتركون شغلهم
أنا هم تركته مثل ما تركوا الناس!
أيهم : تركتي المحاماة ليش؟؟؟
مُلاذ : خنت شغلي الحلفان الحلفته
أنُ ما أخون شغلي بـ يوم أنا كسرت بهالحلفان
برأيك رح أستحق أكون محامية ؟
بعد ما خفيت ألف دليل عنك و عن أهلك
شلون رح أدخل لـ الجلسات أصلاً
و أسوي روحي أوگف وي الحق؟
أيهم : بَس عندچ سبب!
مُلاذ : اذا أنت محامي
بـ يوم رح تشوف أبوك أخوك صديقك أمك
كائن من يكون بـ السجن أذا الي من أهلك مذنب لازم تختار توكف وي الحق لو وي الباطل
أذا أنت محامي الأسباب لازم تنهزم گدامك
مو أنت تنهزم گدام الأسباب .
سكت و أنا درت وجهي نمت ع الجهه الثانيه
أيهم : هاي من الخابرتج؟
مُلاذ : مساعدتي
أيهم : شتريد؟
مُلاذ : شعليك؟
أيهم : أحچي
مُلاذ : لا حول ... تريد تعرف ليش ما افتح المكتب
و عرفت و باجر رح ادزلها راتبها هااااهيه؟؟؟
أيهم : خوش ندز راتبها بـ أيد مازن
مُلاذ : لا بالله و ليش مازن؟
أيهم : باجر يجيني عندي شغل ويا
ندلي بـ مكانها و يروح ينطيها راتبها
مُلاذ : خاف تسلبوها الأجرام ينشي بـ دمكم
أيهم : لا ما نسلبها
هو أحنا رايحين حتى هي تسلبنا و تاخذ فلوس
سكتت عنه مالي خلك
أتذكرت شغلي و شگد چنت أحبه
نزلت دمعتي مسحتها بسرعه
أيهم : اسف لَـذه خسرتچ حتى شغلج
سكتت ما جاوبته
حضن بطني متمدد وراي
مُلاذ : شجاي تسوي وخر عني
خليت أيدي فوك أيده أريد أدفعه
لزم أيدي الثانيه بسرعه ، دنك وجهه بـ رگبتي
مُلاذ : عوفني أيهم ما أگدر اتلاوى وياك
و الله الكانولا رح تنعوج من وراك
لزم أيدي البيها كانولا
عبرها فوك بطنه مخلي راسه ع المخده
و لازم راسي مخلي رگبتي بـ خشمه
مُلاذ : شنو تشم بس أريد أفتهم
شو مريضه و ريحتي تشرد الچلب
عوفني أيهم
أيهم : أنتِ گلتيها تشرد الچلب
انه مو چلب حتى أشرد
مُلاذ : مالي خلكك حل عن سماي
أيهم : اشش لَـذه
نزل راسي بـ أيده على صدره
و أنا أدفع بـ أيده و هو ما يعوفني
ركدت لمن أشتميت عطر بابا بـ ملابسه
مسح على شعري و أنا نزلت دموعي
عبست شفتي الترجف لزمت بـ قميصه أبچي
مُلاذ : ليش هيچ تسوي عوفني
أيهم : ما مسوي شي لَـذه
كافي تكابرين
مُلاذ : على شنو أكابر
ما أكابر على شي أنا وخر عني
أيهم : أذا تريدين تبچين و تحزنين
و ما لگيتي مكان يلمچ گلبي ،
حضني و انه رح نظل دائماً منتظرينج
ردت أگوم رجع نزلني بسرعه فوگاه
و حاضن راسي لـ صدره
حچا و هو يمسح على ظهري و يجر الكلمة
أيهم : كافـي تكابـرين
بچيت مقهوره و عطر بابا بـ خشمي
ما أريد أبچي بس بعد ما عندي قوه أكتم
الأمراض كلها طلعت بيه
صرت ما أكدر أگوم من الفراش
الحبوب ترست وجهي و عيوني شگد ما أنام
يبقى جواهم سواد و شعري صار يوكع
غير عن ألم گلبي و كل شويه أختنك
الدنيا أفترت يمي لزمت بـ رگبة أيهم
و أنا أبچي ، مسح على شعري
مُلاذ : محد سأل عليه حتى أمي
ما فكرت بيه و لا خابرتني
و لا حتى سألت جسار عليه
يگلي تسأل عليچ بس أعرفه يچذب ما تسأل
و ملاك ما تجاوب عليه و حاضرتني
أنا شنو ذنبي كل تعبي چان علمودهم
أيهم : ليش سوو هيچ؟
مُلاذ : لأن بعدنا متزوجين
أكللهم لحد ما ألگا العصابه
يگلولي عوفي هاي الحجج
أيهم : يعني بسببي ما يحاچوج؟
مُلاذ : بسببك أو مو بسببك
همَ ليش من أول مره أخالف بيها طلبهم
أتخلوا عني بدون ما يفكرن حتى
و أمي كل دقيقه تگلي ما عندي بنيه
أيهم : معليچ بيهم بعدين يلينون وياچ
مُلاذ : وخر عني أنت چان محد ألي غيرك
حتى أنت أذيتني ما بقالي أحد
دفعته و گعدت ع الفراش سانده ظهري
أيهم : شما تسوين ما راح أعوفج
روحي بيچ انه مُلاذ بعدني يمچ
و راح أبقى يمچ ، انه مو مذنب
انه الظروف جبرتني أضم عنچ
ألف مره حاولت أكتل الچتال و أخلصج منه
بس بـ كل مره طلع منها مثل الشعره من العجين
دحگت بـ وجهه و دموعي غاسله وجهي
أتقدم لـ يمي لزم أيدي
أيهم : أنطيني فرصة مُلاذ فرصه وحده
منا لـ شهر أذا ما گدرتي تعيشين وياي
أعوفج و نتطلك بس أنطيني فرصه
أنتِ وعدتيني أتذكري وعدج
گلتيلي شما أعرف ما أعوفك
مُلاذ : مستحيل ،
وقتها ما چنت أعرف بـ اللي ضامه عني
أيهم : و عرفتي و أخذتي بـ ثارچ
و نفرتي مني و رحتي و أجيتي
و دارت بيچ الدنيا و هاي أنتِ يمي
ثنينا ناقصين مُلاذ ثنينا تعذبنا
و ما ألنا غير بعض
هزيت راسي بـ رفض ما قابله
مُلاذ : أذا أنطيك فرصه أعرف نفسي
راح أكرهه عيشتي و أكرهك بـ عيشتك
أيهم : راضي أكرهه عيشتي وياچ
مُلاذ ما أستاهل و الله ما أستاهل
أبوچ جان يريد يحميني ليش أنتِ تأذيني
ناشغت أبجي و هو مسح دموعي
أتدنى لـ يمي أكثر عاينت أله
گعد يمي و يمرر بـ أيده على ظهري
مُلاذ : بابا چان يحبك؟
أيهم : كلش محد يحمي أنسان ما يحبه أساساً
مُلاذ : شنو حچا ألك عني ؟
أيهم : يحچي بـ طريقة
ضحك و قلد كلام بابا
أيهم : لَـذه لَـذه الوكحه
ما تهجد تخلي أمها تشيط
ضحكت على طريقة كلامه
و أنا أتذكر بابا هيج يحچي
مُلاذ : بعد شحچالك عني ؟
أيهم : گلي أنا ما بچيت بس من لَـذه ولدت
مُلاذ : أي يگولون بابا باچي بس من أنولدت
أيهم : يغار عليچ ما يخليني أگول لَـذه
ألا تگول مُلاذ و انه لساني ما أگدر ألزمه
كلمة لَـذه ع الطرف صايره كل ما أحچيها
يخزرني خزرة تنشف دمي
ضحكت : تستاهل
حسيت روحي مخبله
ما أريده و راسي على صدره
و أضحك ويا على ذكريات بابا
أيهم : چا انه شعلي هو علمني
مُلاذ : أنا لذته بس هوَ
أيهم : لذتي همين
مُلاذ : لا أنا لَـذة ألياس بس
أيهم : فوصه وحق لا أله الا الله
رفعت راسي عاينت أله منمحيه أبتسامتي
عاين ألي بـ نفس النظرات ، مسح على شعري
مُلاذ : مستحيل أگدر أكمل وياك
وخرت من حضنه و گمت
بعدني أريد أمشي أفترت الدنيا بيه
لزمني بسرعه و كعدنا بـ الگاع
ما أكدر أوكف رجليه موتتني
خطوه يمشنها و خطوه لا
أيهم : وين تريدين تروحين؟
مُلاذ : بعيد عنك
أيهم : تمام ماكو داعي تروحين أنتِ مثل كل مره
هالمره خل أروح انه
سحبني لـ الفراش أتمدد
خلا المي و أكل يم راسي و طلع من الغرفة
ظليت أدحك وراه ، طلع من البيت
سمعت صوت طبگة الباب غمضت عيني
درت وجهي ، محد وگف وياي غير أيهم
صحيح ما أله ذنب بس شي بـ داخلي
يرفض أشد الرفض بقائي وياه
ثاني يوم أجاني بدون ما يخليني احچي
لبسني عبايه و شال و أخذني لـ المستشفى
و أنا ما ألي خلك حتى أجادل
روحي رايحه من التعب
وصلنا و سوولي مسحه أستعجلهم أيهم
خلاهم يطلعون النتيجه بسرعه
طلع مابيه شي يعني مابيه فايروس
بس أنا هيچ تعبانه ،
رجعنا لـ الشقة و أنا صافنه
شلون ما صار بيه كورونا
أفتريت العالم كله بـ فترة المرض
نزلني أيهم ، دخلني الشقة
أريد أفلت أيدي من عنده ما يعوفها
أيهم : كافي مُلاذ كااافي مو طفلة أنتِ
گلتلج أوصلج لـ الشقة و أولي !
مُلاذ : ماريدد الشقة مالتك ما أريددها
أيهم : ما تگعدين جوا وحددددج
مُلاذ : لا تصيييح علييه
أيهم : لا تخليني أصيح أتحركي أدخلي
مُلاذ : ما أدخل
شالني و دخلني لـ الشقة
دفعت متنه بـ أيدي ، كعدني ع القنفه
مُلاذ : ما أريد أجي لـ هنااا ما أريد
أيهم : ليش يگرص هنا ؟
مُلاذ : أي يگرص أريد أنزل بـ شقة أهلي
أيهم : سدي حلكج و گعدي
مُلاذ : فوك شينة گواة عينه ، انت الما قابل
أيهم : طبعاً ما أقبل
مُلاذ : حل عن سماي أيهم
أيهم : منين متعلمتها هاي ؟
مُلاذ : معليك منين متعلمتها عوفني بـ حالي
أيهم : خوش عفتج
گام من يمي ، گمت بسرعه ألزم بالحيطان
طلعت لـ الباب مال شقه أريد أطلع
لگيته واگف كدامي يقفل الباب
أندار و أشرلي بـ معنى "لـ جوا"
خزرته و رجعت دخلت گعدت ع القنفه
و هو يحچي مر من گدام الصالة
أيهم : هسه أجيچ
مُلاذ : ما أريدك لا تجي
أيهم : ما سألتج أذا تريدين أجي حبيبتي
فد غثني حچيت بـ عصبية
مُلاذ : تدري چان المفرووض أسجنك وي أبوك
أيهم : المفروض ، هي فرصه وحده
و راحت من أيدج ، الفرصة الجايه أستغليها
مُلاذ : بدون ما تطلب
درت وجهي و جريت الكوشه نمت عليها
حضنت نفسي و گنبصت ، ظليت صافنه
لحد ما غفيت ، حلمت بـ بابا
گاعد على القنفه يلي بـ المكتب
و تاره واگفه تريد تنطي چاي
دحگتله مستغربه ، مصدومة
كل جسمي يرجف ، دحگلها بابا و گال
ألياس : شكراً بابا
بلعت ريگي همست مصدومة
مُلاذ : بابا؟
دحگلي و أبتسم ، بچيت بچي ما مصدگه
فجأه لگيت روحي نايمه على رجله و أدحگله
و هو يحچي وي أمي بس ما أفهم أي شي
أنداريت أدحك أمي گاعده بعيد و تبچي
رجعت عيني على بابا لمن حچا
-أيهم طفل تعبان لا تتعبونه أكثر
مُلاذ : بس ضم عني
- تعبان هالطفل
مُلاذ : بابا أنا ويا أتزوجنا
-لا تعوفي تعبان هالطفل ساعدي بابا لَـذه
مُلاذ : بـابـ...
بعدني أريد أحچي
و هم صار صوته يوشوش بأذاني
يحچي وي أمي و أمي تبچي
لزمت أيده ما أحس بيها ، دحگت گام و طلع
طلعت أركض بالمكتب أدور عليه
أصيح بـ أسمه ما لگيته
بس تاره و أيهم و أمي گاعدين
حسيت شي يلمس وجهي شهگت و فزيت
لازمه گلبي أحس رح يطلع من صدري
دحگت لـ أيهم الگاعد گدامي
أيهم : انه لا تخافين
خليت أيدي على خدي و دحگتله
أيهم : ردت أشوف حرارتج
لَـذه شنو حلمانه ؟ شبيچ ؟
خليت أيدي على صدري محتره
و أسوي مساج لـ مكان گلبي اليوجعني
نزلت دموعي و گمت أتغصغص لمن عرفت حلم
أيهم : مُلاذ مُلاذ شكوووو؟
گام گعد يمي يحضنني لـ صدرة
أيهم : انه يمچ شبيچ مُلاذ ؟؟
وخرت عنه و نمت حاضنه نفسي
و دموعي تنزل أبچي بدون صوت
أنا الچنت ما أخليهم يبچون
هسه كل لحظة أتذكر بيها بابا أبچي
وجهي أحسه صار يلسع من الحرارة
و دموعي تنزل بدون ما أطلع صوت
راح أيهم و رجع جايب ألي مي
دحگتله عيوني مغورگه
مُلاذ : لو أنا سويت الي أنت سويته بدالك
شنو چنت رح تسوي ؟
أيهم : شسويت؟
مُلاذ : أبوي يكتل أبوك و أنت متعلق بي و تحبه أكثر من كل شي و تتزوجني و تحبني
تعرف بعدين ضميت عنك كل شي و كذبت عليك
حك راسه و صفن
دحگلي و حچا
أيهم : انه أحبچ أكثر من كل شي
و أعرفچ أنتِ مظلومة و عندچ أسبابچ
ما جنت رح أذيچ على شي مو ذنبچ
بالعكس راح أوگف وياچ و أحاول أتفهم العشتي حتى لو ضميتي ما چان هذا الشي بـ أيدچ
خصوصاً لو عندچ أحباب و انه من ضمنهم
و تريدين تحمينهم من كل أذيه و ضرر
مُلاذ : ليش اأنا ما أگدر هيچ أسوي
ليش كل ما أشوفك أتذكر الوجع العشته
أعرف أنت هم تأذيت و چنت مجبور
بس ما جاي أگدر أفرض على نفسي أسامحك
أيهم : لا تسامحيني المهم تبقين يمي
لا تحبيني و أحچي الي تريدينه عليه و وياي
يوم كوني يمي و أسنديني و يوم طشريني
أو حتى أذا تطشريني دوم لَـذه
المهم تبقين گدام عيني و ما يمسچ ضرر
أتقدم لـ يمي گعدني على حيلي
لزم وجهي بـ أثنين أيديه يمسح على خدي
عيوني گامن يوجعني گد ما دمعت
أيهم : أعشگج انه لَـذه
كل شي ما أريد غيرچ
دنك عليه خلا وجهه بـ رگبتي
محاوط بطني بـ أثنين أيديه
مُلاذ : مو كل شي حب
ما تگدر تقدم الحب فوك كل شي
أيهم : انه ما أحبچ انه أحسچ أنتِ بـ مسؤوليتي
من صغرچ لحد هاللحظة أنتِ بـ مسؤوليتي
أنتِ ما تحبيني لَـذه و بـ عمرج ما رح تحبيني
مثل ما انه أحبچ و أريدچ
مُلاذ : حبيتك و ردتك
أنت تعرف أنا أسكندر سنين سوا أشكال و ألوان بس حتى أوافق عليه و چان أكو ألف شخص
أگدر أحبهم غيرك بس ما أدري ليش أنت
ما أدري ليش الحظ لعب لعبته وياي من جديد
أيهم : حظ ، وعدتيني ما تعوفيني مهما عرفتي
بـ يوم عرسنا و عدتيني و كل مره أگلج بيها
انه ما أريد أخسرچ گلتيلي ما أعوفك يمك
ليش هسه تعوفيني و تخليني بدونچ
تزيدين ظلامي و تعيشيني بـ أسوء شكل بدونچ
أبتعد يدحگلي
مسح وجهي و دموعي و أنا ما جاوبته
أيهم : سويتلچ أكل تعالي
مُلاذ : ما أشتهي
أيهم : ما أقبل أعتراضات
مُلاذ : عوفني أيهم ما أريد
أيهم : من أموت تتحسرين على أكلي انه أعلمج
خزرته ردلي الخزره
أجا لـ يمي سندني عليه و مشاني لـ المطبخ
أيهم : عفيه بـ لذتي الحبابه
گعدني بـ المطبخ و گابلني يريد يوكلني
گعد يوكلني و أنا مالي خلك أجادله ،
أكلت ، خلصت سندني و غسل الي
أجا ثاني يوم جسار
ما أفتهمت شصار أول ما أجا گال لـ أيهم
جسار : مُلاذ راح أخذها وياي
و أنت حرف ما تحجي
تعاركوا هو و أيهم
جسار : تحلم تشوف أختك بعد سهله أيهم
عگد حواجبه مستغرب
يدحك بـ وجهه جسار
أيهم : بيك خير أوصلها
جسار : هههههه وصلتها من زمان
مبين محد گال ألك
أيهم : شتحجي أنت؟
جسار : هتان يمي
أتخبل أيهم و هجم على جسار
گمت أريد أوكفه ما أگدرله ، دفعني وگعت ،
عطت لمن أيدي أنضربت حيل بـ الگاع وبيها كانولا
فز أيهم يدحگلي ، ركض عليه شالني من الگاع
گعدني على القنفه و دحك لـ الكانولا الأنعوجت
أيهم : ليش توگفيييين وراي لييييش؟؟؟؟
وخر الكانولا روحي شاطت من الوجع
خلا الكلنس على مكان الدم
و خلا فوگاه لاصق الكانولا
مُلاذ : كاااافي لا تتعاركون
جسار : أمشي مُلاذ
رجع ضربه أيهم و اتجاررو لـ برا الشقة
يتعاركون أيدي كلش گامت توجعني
صارت مطاحن بيناتهم ، گمت وراهم أريد أطلع
أيهم قافل الباب عليه ، أسمع صياحهم من برا
صوتهم بدء يتلاشى ،
رحت لـ الشباك
دحگت أيهم مخلي جسار بـ الگاع و يضربه
رحت على تلفوني بسرعه خابرت لـ سلطان و باهر
گالولي رح يجون ، سديت الأتصال
رجعت أدحك الهم عاف أيهم جسار بـ الحديقة
و طلع بسرعه من البيت ...
هتان :-
گاعده و صافنه أتذكر كلام جسار وياي
و تغيره المفاجئ و تعانله مثل قبل وياي
رغم أكو حديه بـ تصرفاته و برود و أستبداد يكتل
لمن أخذني جسار أجا باهر أتعاركوا هو و جسار
و انه من خوفي گلت لـ باهر أريد أبقى يم جسار
حتى لا يتعاركون أكثر و تكبر المشكله
أتوسلت بيهم ما يگولون لـ أيهم لأن ما يعوفني هنا
أنداريت لمن سمعت صوت دگات عاليه بالباب
گمت بسرعه رحت وگفت ورا الباب
هتان : منو؟
أيهم : انه هتااان أفتحي الباب
فتحت الباب عاينت لـ أيهم دخل بسرعه
أيهم : هتان !
عاينلي ، دموعي بـ طرف عيني
صارلي هواي ما شايفته و لا محاچيته
أيهم : جسار مسويلج شي ها هتان ؟
وگف يدور بـ أيديه و وجهي
هزيت راسي بـ رفض و حضنته
هتان : ما سوالي
دنك باس شعري حاضنني
أيهم : روحي جيبي غراضج و تعالي
أبتعدت و هزيت راسي بـ رفض
هتان : رح أظل هنا
أيهم : شنو تظلين هناا لا تخبليني هتان أمشي جيبي غراضج گلت ، باهر و مازن يدرون موو؟
هتان : انه أتوسلت بيهم ما يگولون
ما أريد تصير مشاكل ، أنت منين عرفت؟
أيهم : الدنيا أحرگها علمودج مو بَس أسوي مشاكل الخايس جسار هو الي گلي أمشي خل نروح
بعدين أجيب غراضچ
راد يسحبني و نطلع
وگفت بـ أستغراب و حچيت : جسار وين؟
عگدت حواجبي بـ أستغراب على أثر نظراته
عاين بـ وجهي ساكت
هتان : أيهم ؟
أيهم : أمشي هتان
سحبني و طلعنا من البيت
بعدنا هستونا طالعين نزل جسار من سيارته
وسعت عيوني مصدومة على وجهه
هتان : جسارر!
ردت أروحله وگفني أيهم لازم أيدي
أنداريت لـ أيهم عاينت أله رجعت عاينت لـ جسار
مسح شفته المجروحه و أتقدم علينا
بـ لحظة ضرب أيهم صوتي راح من البجي
لزم بـ ياخته جسار ، يصيح بـ وجهه
جسار : لك بيااااا عين بعدك تحچي
بياااا عين أبوووك كتل عمي و أبوووي
و أنت حااابس مُلاذ ، أدعي لـ أختك و مُلاذ
لأن لساا ما كتلتك و نهيت موضوعك
أيهم : هتاااان ما ألها علاقه
أذا أذيتها أذبحك جساار و حق الحق أذبحك
هتان : جسار عوووفه جسار
لزمت بـ زنده أبجي روحي راحت
و جسار مخلي أيهم على بنيد السيارة و خانگه
گلبي أتكطع و انه أحاول أفكهم واحد من الثاني
و همَ يتعاركون كل ضربه واحد يضربها للثاني
گلت واحد منهم راح يموت ،
أنداريت لمن سمعت صوت سلطان
و باهر يركضون عليهم يفاككوهم
گوه وخروهم عن بعض أنداريت لـ جسار
خده أنشك و باهر لزمني حتى أروح وياهم
ظليت صافنه بـ وجههم ما أدري شسوي
جسار : هتان ديربالج
باهر : لك أنت منو تهدد أحترمتك هواي
سلطان : باهر صدك جذب
أجيبك عون تطلعلي فرعون شنو مزعطه أنتوا !
جسار : حقك ما تدري
سلطان : شما أدري خيركم !
عاين أله جسار ساكت
گام وگف و نكث أيديه جَـر أيدي
جسار : أدخلي
هم رجعوا يتعاركون لأن جسار سحب أيدي حيل كدامهم و حچا و هو يتأمر
هتان : كاااافي عااااد
أيهم : أصعدي هتان
جسار : بكيفك هي مرتي شرعاً و قانوناً !
هتان : انه أريد أبقى أيهم
أيهم : لا تفورين أعصابي أتحركي هتان
هزيت راسي بـ رفض و مسحت وجهي
رحت لـ يمه حضنته
هتان : ما عليه شي لا تخاف
صارلي كم يوم يمه ما أذاني
و لا يجي يمي أصلاً
أيهم : هتان لا تغثيني مگرن انه لو ما أخاف عليچ شنو من أخو أذا أخليچ يمه ألمن مسميني رجال ألبسلي شال و أگعد وي النسوان أحسن ألي!
هتان : لا أيهم و الله اذا صارلي شي أخابرك
انه ما أريد أروح
صفن بـ وجهي أيهم يعاينلي
أيهم : لا تسوين هيچ هتان !
هتان : ما عليه شي و الله
أيهم : أصعدي
هتان : حباب أسمعني انه أريد أبقى
أيهم : گايلج شي هذا مسويلچ شي؟
هزيت راسي بـ رفض
هتان : انه أريد أبقى حباب أيهم
ما أريد تصير مشاكل
أيهم : ما يصيرلچ شي و انه يمچ!
هتان : أعرف
أتقدم باهر يعاين ألي
رجع عاين لـ أيهم و حچا
باهر : تعال أيهم أحاجيك
عاين اله أيهم مستغرب
و راحوا هو و باهر يحچون
أنداريت لـ جسار و سلطان الواگفين
ظليت واكفه بـ مكاني ، شويه و أجاني أيهم
أيهم : أي شي يصيررلج تخابريني
و أنت أذبحك أذا سمعت بيك مأذيها
جسار : لو بعد 100 سنه أجي و اخذ مُلاذ
لا عبالك أعوفها و ظنيتها بلا سند
أيهم : أوصل و أريد أشوف يا ***
يطلعك صاحي
جسار : تعرف روحك *****
سلطان : و حريشي يطككم ثنينكم كون
البت واگفه و انتوا كل واحد لسانه يمطر نعل
كز على أسنانه جسار و حچا : سلطان
سلطان : سدو حلككم مرة الزلمة وين تريد تاخذها بَس أنا متفاهم وياك أيهم أنا ما أخلي جسار يسويلها شي و لا هاي السوالف تطلع من جسار
ما يخلي أختك طوبة أنتقام حلوا مشاكلكم بينكم أهلكم و أخوانكم مالهم علاقه
أيهم : حاچي اخوك المريض
جسار : ماكو غيرك مريض أبن ****
سلطان : لا أله الا الله
يابه باهر أخذ أخوك خل تحل الطلابه
و أنتِ خويه تريدين تبقين هنا ؟
هزيت راسي بـ قبول
سلطان : بعد عليمن البت تريد تبقى
كافي فضوها ترا سطرتوني فوك سطرتي
وخر أيده أيهم من أيد باهر
أجا يمي يبوسني و يحاچيني
و انه ساكته بس أهز بـ راسي
أيهم : رح أعوفچ هنا حتى لا يصيرلچ شي
لا تظنين عفتج لـ هذا ، بَس حتى تكونين بـ أمان
لأن أذا تأذيتي انه أموت ما أريد يصيرلج شي
هتان : مثل شنو؟
أيهم : ماكو شي حبيبتي أنتبهي لـ نفسج
تلفونچ وين أخابرچ عليه ؟
هتان : بقى هناك
أيهم : تمام مازن اليوم يجيبه الچ
هتان : تمام
باس گصتي و راح گوه يمشي
أعرفه ما يريد يعوفني هنا
بَس باهر ما أعرف شحاچاه
أجا باهر يحاچيني هم ، راحوا وگفوا يم السياره
ردت أبچي لمن شفت أيهم دمع و مسح وجه بسرعه
دخلت جوا ، سمعت صوت سيارتهم تروح
شويه و دخل جسار غسل وجهه
هتان : ليش گلت اله انه يمك؟
جسار : و شنو خايف منه حتى ما أگله؟
هتان : لا بس تعرف رح تصير مشكلة
جسار : رحت اخذ مُلاذ
من خابرتها گلتلي الباب مقفول
هتان : و ليش تاخذها مرته هي ؟
جسار : شنو ليش تاخذها؟
أخوچ صارله فوك الـ3 سنين يچذب علينا
تريدين أبقيها يمه ليش ؟ لاگيها بـ الشارع؟
هتان : بس ما من حقك تتدخل بينهم
جسار : الي حق مُلاذ أختي مو بت عمي
بَس أنا أعرف هي شگد تأذت
ما تستاهل تبقى يم شخص مثل أخوچ
و بسبب أخوچ أهلها ما يحاچوها
أنتِ ليش بقيتي ؟ جنتي تگدرين ترحين!
هتان : أعرف ما تأذيني و ما أريد أصير هم زايد
على أيهم حتى لو چان عصبي هسه بس يعرفك
ما تسوي ألي شي يضرني
سكت و دار وجهه مني
هتان : سلطان يعرف بالصاير؟
جسار : اي ليش؟
هتان : ليش گلتله انت ما تدري بـ شي ؟
جسار : ما يعرف أبوچ كتل أبوي
حچاها و دار عيونه عاگد حواجبه
ما يرمش حتى لا تنزل دمعته
هتان : ما چنت أعرف أبوي هلگد أذاكم
ما چنت أعرف أصلاً هو هيچ چان دوم بعيد عنا
و أيهم ما يخلينا نختلط بي و نحاچي بعدنا عنه
جسار : جنتي تسمعين كل حچايه يحچوها
بس ما جنتي تعرفين؟
هتان : ما أفتهم هسه تگلي جبيره شنو ما تفهمين
لأن فعلاً ما جنت أفهم حچيهم كله ألغاز
و تصرفاتهم أعرف أكو مشاكل بينهم
هتان : كل ظني لأن أبوي يضرب أمي أيهم يكرهه ما چنت أعرف أكو شي أكبر من هيج
و من صغري تعودت على غموض أيمن و ما سألت
لو چنت بـ عائلة مهدوده مثل عائلتي رح تفتهم .
عاين ألي ساكت
گام طلع و عافني
مُلاذ :-
گعدت منتظره أيهم
خابرت على سلطان گلي "مابيهم شي أنفضت"
شويه و أنفتح الباب
ظليت گاعده مكاني دايخة و ما أگدر أگوم
دحگت لـ أيهم لمن دخل لـ الصاله
شمر المفتاح ع الميز ، ظلت عيوني تراقبة
مُلاذ : شصار؟ شسويت لـ جسار؟
گعد على القنفه
خلا أيديه على محاجر عيونه
بـ نظراتي ينشرح الأستغراب
نزل أيديه من عيونه و صفن بالسگف
مُلاذ : أحچي؟
أيهم : شنو أحچي أختي ما جاي أحميها
شنو أحچي بعد؟
مُلاذ : شنو ما جاي تحميها؟
أيهم : خفت يلگون مكان مازن خليتها يم جسار
مُلاذ : على أساس هسه هم ما يعرفون أماكننا
لو يراقبونا
أيهم : ما يعرفون مازن مخلي صاحبه يراقب البيت أذا يراقبونا رح يلحگونا بس محد جاي يلحگنا
مُلاذ : حياة تخبل ننحسد عليها
أيهم : كلش راح نموت من الونسه
مُلاذ : بـ فضل أبوك طبعاً
عايشه بـ مسلسل أنا لو فلم بوليسي
هذا يراقبني و ذاك يرمي عليه و هذا يخطفني
الي بالعصابات نفسهم ما يصير بيهم اليصير بيه
أيهم : گلتلج أسفرج خارج العراق
مُلاذ : مو هي بكيفك تسفرني خارج العراق
مو أنا الأشرد بيهم خير خل يجون يكتلوني
يكسبون أجر يدخلون من أوسع باب بـ الجنه
أيهم : حلو و انه أدخل النار لأن أكتلهم
مُلاذ : بكل الأحوال أنت تدخل النار
أيهم : أشكرج طمنتيني
دحگتله بـ طرف عيني و سكتت
بقيت أيام لحد ما أتحسن وضعي
و أيهم يروح و يرجع بالأدوية
ما أريد يهتم بيه بـ هذي الطريقة
أتعارك و كل شي أسوي بس حتى يعوفني
كل مره يصير الأخاف منه و أنهزم گدام حبه ألي
أحترك گلبي من أهلي و كم مره أروح ألهم
أدخل أحاچيهن لا ملاك و لا أمي يدحگن بـ وجهي
أرجع و أنا أحمل وياي كل معاني الخيبه
بعد 3 أيام هم رحت ألهم و أخذت أيهم
بَس حتى يفهمهم أنا ويا علمود العصابه
فتحت ألنا الباب خاله جنات و دحگتلنا مصدومة
دخلت و دخل أيهم وياي
گلت لـ خالة جنات تصيح أمي
و فعلاً راحت صاحتها و أجت
أول ما دخلت همست
جنات : ما گلتلها أنتوا هنا
گلتلها جسار أجا حتى تجي
سكتت و گلبي مقبوض
دخلت أمي الصاله تحچي وي خالة جنات
لحظات حتى أنتبهت ألنا
بانت نظرات الدهشه بـ عيونها
گمت وگفت أيدي صارت حمره
گد ما گرصت بيها من التوتر
بلعت ريگي گلبي يرجف ، رجعت عيونها تدحگلي
فيروز : أنتوا بيا عين جاااااييين لـ هناااا
مُلاذ : يمه بس أسمعي
فيروز : ولج غضب الله عليچ و على سوالفچ
وصلتتتت بيچ تجيبين هذا أبن المجرم گدامي
ولج لييييش ليش ؟ هاي تاليييتي
أيهم : خااله بس أسمـ....
فيروز : بعدددك تحجي بعدك بكل صلافة تحجي
أنااا بدالك أطم رووووحي من الخجل
و لو ألي أبو مجرم عنده مستحى ؟؟
أتقدمت تصيح على أيهم بـ كل صوتها
و أيهم ساكت و هي تريد توصل اله و تطرده
وگفت بيناتهم ، لازمه بيها و أحچي
مُلاذ : يمه بَس أسمعي ، يمه أسمعيني
يمـه حاچيني ، يمـ....
صوت صياحها سابع جار سمعه
عطت بـ عصبيه لمن ما سكتت
أبتعدت عني مصدومة ، صيحت
مُلاذ : يمـــه كاااافي عاااااد!!
أسمعــي جاي نگلج عااااجبني أنا هالوضع؟؟ عااااجبني ؟ مسحتيني بـ موقف واحد
لأن ما سويت الي تريدددي
لأن عندددي سبب مااا خليتي ألي فرررصه ثانيه
بَس أنتِ الحزنانه على بابا بَس أنتِ المتأذيه؟؟؟
فيروز : ولج أنتِ شنووو من بشررر؟
أنتِ من شووووكت صرتي هيچ
جايبه ألي أبن المجررررم هذا و جااايه
أبوووو الكتل أبوووج يا ما عندج أحسااس
صيحت أبچي و دموعي تنزل
مُلاذ : أبن المجرررم التحچين عنه
صارله فوك الأسبوع هووو حايررر بيه
و أنتِ هناا حاقدة عليه
شوفي أيديه شلون تزرفتتت
رفعت رداناتي أروايها و أبجي
مُلاذ : حااايره تلووومين بيه
أناااا بنتج ترااا مو أنتِ بنتي
أنتِ ألي لااازم تهونين عليه مووو أنا
أنت يلي المفروض تهتمين بيه مو أيهـم!
أبچي و أحچي بـ گلب محروك
مُلاذ : تحچين عليه و تگولين أبن المجرم
و أنتِ صارلج فوك الأسبوع
تلفووون ما شلتي و خابرتنيني أخابرج ترفضي
على شنووو جاي تعاقبني على يااا ذنب
بس لأن بعدني متزوجة أيهم ؟ حتى يساعدني بعدني ويا و رغم يعرررف هالشي بعده يريدني
و يحبني و ما يفكر حتى يتخلى عني
أتوقعت رح تتفهمني لمن أحچي
بس يلي صدمني لمن رفعت أيدها و ضربتني
صيح أيهم مصدوم و بسرعه صار سد ألي
أيهم : هوووووب شنو السااالفه؟؟؟
رفعت عيني دحگتله دفعني وگفني ورا
و أمي تصيح عليه
فيروز : بعددددج تدافعين أله
يا عاااق لا بنتي و لا أعرفج و لا تعرفيني
حسيت روحي تنسحب مني من كلامها
خدي أحسه يلسع من قوة ضربتها
أيهم : أذا أكو واحد تلووومينه انه تلوميني
مو بنتچ انه عدووچ مو هيه
بَس حرامات و الله حرامات
التعب التعبته علمودكم مُلاذ
أيهم : ما چنت أظنچ هيچ عمي ألياس
چنتي ما تطيحين من لسانه و يمدح بي
و بـ حنيتچ !بس أعرفي شي واحد
مُلاذ باقية وياي علمود نلگا العصابه فعلاً !
ظلت أمي تصيح و خالة جنات تسكت بيها
و لازمتها أندار أيهم الي و أنا دموعي تنزل
شفتي ترجف ، أتغصغص
ما چنت متوقعه هيچ تسوي بيه
حتى هي صارت ضدي حتى هي كرهتني
ضمني أيهم لـ صدره و طلع يمشي بيه بسرعه
صعدني بـ السيارة و أنا گلبي أشتعل نار
صعد يمي أندار دحگلي يمسح بـ دموعي
أيهم : أشش كافي لا تبچين معليچ بيهم
لزم وجهي بـ أثنين أيديه يمسح على خدي
أيهم : انه باجر أجيهم و أحاچيهم معليچ بيهم
مُلاذ : لووو اموت بعد لو اموت ما أحاجيها
تضربني عبالك أنا طفله لا تسأل عني
و لا تفتهمني حتى لو چنت أقذر خلق الله
أمي هي المفروض تحن عليييه مو توگف ضدي
أيهم : أشش لا تبچين كافي يا روحي
لا توجعين گلبي عليچ
حضنني لـ صدره يمسح بـ وجهي و على خدي
شهكت أبچي كل ما أتذكر نظراتها و ضربتها
و حچيها ألي و هي تگلي "مو بنتي أنتِ"
وصلني أيهم لـ الشقة ، نزل وياي يغسل وجهي
عيوني ورمت ، وداني لـ الفراش
ما قبلت أنام على الفراش ما أتقبل أنام بـ الغرفة كله أنام بـ الصاله و أيهم يطلع من البيت
مرت الأيام و أنا بـ البيت و ما أطلع
بس بـ كل لحظة لازم أتعارك وي أيهم
كرهت تعقيدي ما أگدر هذا طبعي من سنين
أذا شي يقهرني أو ما أتقبله لازم أتعارك
العصر سمعته يحچي بـ المطبخ
و القاهروي كلام بابا بـ الحلم
أيهم : تمام أجيك ما تأذيهم
و لا تتقرب لـ أي شخص منهم !
عگدت حواجبي مستغربه
أيهم : تمام انه أجيك و أتعاون وياك
نهى كلامه و سد الأتصال
دخلت المطبخ حچيت بـ أستغراب
مُلاذ : ويامن تحچي؟
أندار دحگلي مصدوم
أيهم : من شوكت أنتِ هنا؟
مُلاذ : منو يلي ما تريده يتأذى؟
أيهم : مرضى جاي أحذر صاحبي
ما يدخل يمهم لأن يلوثهم
مُلاذ : و تتعاون وي صاحبك حتى ما يتلوثون؟
أيهم : لا هاي ع الخفاره
مُلاذ : جاي تجذب عليه مو ؟
هز راسه بـ رفض و هو يتقدم عليه
خلا أيده على خدي
مُلاذ : أيهم ضام عني شي ؟
هز راسه بـ رفض
مُلاذ :و عدتني ما تچذب و رغم ما أثق بـ كلامك
بس مخلية عندي نقطة أمل اذا يصير شي تگلي!
أيهم : أذا الموضوع بي أمانج و موتي أجذب
دفعت أيده من خدي
مُلاذ : عوف هالكلاوات و أحچي
دتجذب عليه مو ؟
أيهم : ما مجذب تريدين أخابرلج صاحبي؟
مُلاذ : أي مثل مازن شلون خابرته
ضحك و حضنني دفعته بَس ما أندفع
مُلاذ : وخر
أيهم : ههه شبيچ يمكن هاي أخر مره أحضنج
جمدت مكاني ، أنقبض گلبي
لمن أتذكرت بابا وقت گال لـ أمي
"يمكن هاي أخر مره اذوق بيها حلاوتچ"
دفعته عني خازرته و طلعت من المطبخ
لـ الليل أنا متمدده ع القنفه و ضايجه من أيهم
غمضت عيوني لمن سمعت صوت خطواته
ركزت مسامعي وي صوت خطواته يلي تقترب
حسيت خلا أيده على خدي يمسح عليه
گعد يمي يمسح على شعري ، دنك باسه
كتمت نفسي حتى لا يحس بيه گاعده
دنك خلا شفته على شفتي بـ هدوء
بدون ما يبوسني ، باس شعري مره ثانيه
بَعد الخصلات عن وجهي ، همس بـ صوت مسموع
أيهم : اسف جَـرح أذيتچ هواي
بس كله چان لـ صالحچ حتى لا تتأذين
من بعد هذا اليوم أمچ رح تصالحچ
و الگلوب راح تتئالف و تهدء الدنيا و ما بيها
يمكن يهدء گلبج و عقلچ يلي حبيتهم
رح تنرسم أبتسامه من أسابيع أتمنى أشوفها
على شفايفچ الأحبهم و ضحكه أتمنى أسمعها
مسح على شعري و باس شفتي
حسيت گام من القنفه و صوت خطواته يبتعد
فتحت عيني ع النص ، لابس قمصلته الجلد
يلي كل ما يسوي مصيبه يلبسها و چفوفه
أندار يدحگلي ، غمضت عيوني بسرعه
شويه و سمعت صوت الباب أنطبك
فتحت عيني ع النص لگيته ما موجود
ظليت صافنه بـ الگاع
هتان :-
أجاني أيهم همزين جسار ما موجود
شافني و حاچاني ظل گاعد و يسولف وياي
أيهم : أذا ضوجج حاچي باهر
هتان : و أنت؟
أيهم : خاف انه ما موجود حاچي باهر
هتان : تمام بس اصلاً جسار ما يأذيني
أيهم : بـ عمرج لا تگولين عن شخص ما يأذيني
الكل يأذون ما تگدرين تعرفين جوهر الناس شنو
و شوكت يأذوج و شنو أسبابهم
الكل يطلع گدامج بـ مظهر الملاك
بس أكو ينجبرون على أذية أحبابهم
هتان : ما دام أنت موجود محد يأذيني
أبتسم و حضن راسي ، باس گصتي
أيهم : يلا انه خل أروح
هتان : وين هستوك أجيت
أيهم : لا حبيبتي خل أروح
ديربالج على نفسچ
هتان : تمام
طلعت ويا لـ الباب عاينت لـ سيارة
هتان : هاي سيارتمن مو سيارتك؟
عاين ألها و هز راسه بـ قبول
أيهم : سيارتي عطلانه
هتان : ها يا حرامات
أيهم : يلا أدخلي حبيبتي
هزيت راسي بـ قبول
ودعته و دخلت لـ البيت
غاده :-
واگفه أغسل الماعين ، يمي أدهم و أبيل يلعبون
رغم أبيل كل شوية يبچي على أبو و على مُلاذ
بَس نلهي وي أدهم و ينساهم و يرجع يذكرهم
مسحت أيديه بـ المنشفة
أنداريت طلعت برا المطبخ ، أم أيهم وضعها أحسن
أيهم منطي علاجات لـ باهر و باهر ينطيها منهن
و صاير وضعها أحسن
أنداريت لمن أندك الباب
لبست شالي و رحت فتحت الباب
دحگت لـ أيهم رغم عرفت أبو أيهم الچتال
بَس كلش أنقهرت من عرفت يلي عاشه أيهم
باهر سولف ألي يلي صار ويا
سلمت عليه دخل لـ البيت
و أنا رحت گعدت باهر ، طلع يم أيهم
أبتسمت لمن شفت أبيل مجلب بـ رگبة أبو شابگه
أيهم : ولك أختنكت هاي شني
صاير چبير أنت و أيديك كبار ؟
أبيل : هههه أي انه رجال
أيهم : لا لا بعدك صغيرون
أبيل : ماااا رجال
أيهم : يلا رجال هاهيه
حضنه حيل و كعدوا ع القنفه
و حاضن أمه من جهه ظل يسولف وياهم
مسح على شعر أبيل و دنك باس شعره
شاف أدهم بـ الگاع شاله يبوسه مبتسم
رجع لـ أبيل يدغدغه و يضحكون
أبتسمنا كلنا على منظرهم
بقى ساعه و نص تقريباً
صبيت اله عشا بس ما قبل ياكل
ظل گاعد و يسمع لـ أبيل
أيهم : شوكت تنام ولك؟
هز راسه بـ رفض ما قابل ينام
رغم عيونه مبين بيهن النعاس
أخذه أيهم لـ الغرفة ينومه
و الله قهرني هالطفل شگد يحب أبو
فرحان فرحة مو طبيعيه
بـ عمري ما شفت طفل هيچ يفرح على وجود أبو
گعدنا أنا و باهر نحچي
شويه و أندك الباب گام باهر يشوف منو
أساساً بَس مازن يجينا يتطمن
كم دقيقة و دخل باهر راح لـ الغرفة البيها أيهم
فتح الباب و دحگلهم بـ أستغراب ، أسمع صوتهم
باهر : شبيك ؟
أيهم : ماكو شي
باهر : متأكد؟
أيهم : اي ليش؟
باهر : ليش تبچي؟
أيهم : ما باچي ، مشتاق لـ أبيل
باهر : حقك ، گوم مازن يريدك
أيهم : أجا هذا السگط أبن السگط
أبتسم باهر ساكت
و أيهم لحظات و طلع من الغرفة
يمسح بـ وجهه ، طلع ويا باهر
ظليت أنا گاعده يم عمتي
مُلاذ :-
أخذت ملابسي و دخلت سبحت
أحس روحي ما ينظفها غير المي
صافنه و أفكر شنو الغلط اذا سامحت أيهم
كل أنسان يستاهل فرصه ثانية
أرجع أتذكر كلام بابا بـ الحلم
معقوله هاي رساله الي؟
بَس جاي اكرهه نفسي كل ما أحسه يمي
عصبيتي و نرفزتي ما أگدر أسيطر عليها
كل لحظة أتذكر الچتال ما گادرة أنسى
بـ أحلامي و بـ كل مكان يطلع ألي
مسحت وجهي ، أتنهدت بـ تعب
بعد ما أتساقطت عليه قطرات المي الدافي
حضنت نفسي هادئه ، صافنه و أفكر
أتذكرت أيهم اليوم و حچيه و كلامه ألي بالأخير
ظليت صافنه أتذكرت لمن گال
"من بعد هذا اليوم أمچ رح تصالحچ
و الگلوب راح تتئالف و تهدء الدنيا و ما بيها
يمكن يهدء گلبج و عقلچ يلي حبيتهم
رح تنرسم أبتسامه من أسابيع أتمنى أشوفها
على شفايفچ الأحبهم و ضحكه أتمنى أسمعها"
عگدت حواجبي ، مستغربة من كلامة
رجعت أتذكرت أتصاله و حضنه ألي
راودني شعور غريب سيء
مُلاذ : عرف شي !
هلعت ، سديت المي و لبست البرنص
طلعت بسرعه أركض ع التلفون حتى أخابره
أدور تلفوني و جسمي يرجف
مُلاذ : لا ياربي ياربي دخيلك
لا يكون مسوي يلي ببالي
لگيت تلفوني أخذته بسرعه
فتحته دحگت 5 مكالمات من ضرغام
أتصلت عليه بسرعه ثواني و جاوب
مُلاذ : ضرغام ؟؟
ضرغام : مُلااااذ أيهم
شجاي يسوووي دخيل ربه شجاي يسوووي ؟
مُلاذ : شنووو شكو؟؟
ضرغام : يمچ حاچينيي؟
شنو جاي تسووون تحچون صدك !!
مُلاذ : شكوو ضرغام فهمني أيهم مو يمي
ضرغام : ما تدرين؟؟
مُلاذ : شنو شنو ما أدري أحچي ضرغام
أيهم راح يسوي شي مو أحچييي!
ضرغام : أيهم عارف مكان العصابه
متواصل وياهم و يعرف ما رح يخلونه عايش
و رغم هذا الشي رايح ألهم وحده ...
وسعت عيوني مصدومة ، صعد الدم بـ راسي
صفرت أذاني كل جسمي جمد ،
رجليه أحسها أنغرست بـ الگاع
بَعد يلي سمعته من ضرغام ...
• • •
كُتِبَ في حَق عُشق الأيهم :-
"سأدخُل في جميع الحَروب
التي تحاول التقاطكِ من بين يَدي
و أن كانوا جيشاً و أنا لـِ وحدي
لَن يؤسفني خروجي من هُناك جثةً هامدةً
في سبيل ألا يتم الوصول أليكِ
سوف أُعلن هَزيمتي أمام عينيكِ
قَبل أن أُعلن هَزيمتي أمام الأعداء
و أنتصاري على الموت بـ أنه لم يستطع أبتلاعي
قَبل أن أرى عينيكِ الكَحيلتينِ يَستقر بهُم الأمان
سأجدك من بين الجيوش
و أحتضنك الى صدري العاري
مستعداً الى رصاصةً تُثقبَ ظَهري
قبلَ أن تُثقب صَدركِ
سوف أبتعد و سـ تَبكين
سـ أموت بـ النَظرِ ألى حبات اللؤلؤ
الـمُتساقطه من حيث أماكن مَدمعك
قبل أن أموت بـ الرصاصة ."
****************
- يتبع الفصل التالي اضغط على ( رواية جرح الأيهم ) اسم الرواية