رواية جرح الأيهم الفصل الثالث و الخمسون 53 - بقلم أيلان
"الجُــرح الثالث و خمسون"
مُلاذ : حياتنا مو الحياة يلي نريدها انا وياك
انت رح تظل طول عمرك تعاقبني على اشياء تافه
ما رح تگدر تدحك بـ عيوني و تلومني
مُلاذ : بس راح تتعارك وياي و تصير عصبي
من كل شي لو انكسر غرض رح تعصب
انا اعرف هالتصرفات و هالعصبية أيهم
انا عشت قبلك هذا الشعور
مُلاذ : كل ما يقترب شخص مني جنت أكرهه
لان أنا ما اريد احب بعد شخص و يحبني
و أتاذى اذا راح من أيدي
أنتَ هسه جاي تسوي نفس الشي
تريد تبعدني عنك و أول ما أبتعد تقترب أنتَ !
أيهم : تگليلي لا تصير عصبي
و تگليلي لا تصيرررر عصبيييي
حجاها و دفر الكرسي
اتجتفت ادحك اله
مُلاذ : شفت عن شنو احجي أنا؟
دار وجه الي دحگلي
أتقدم عليه بسرعه لازم وجهي بـ أثنين ايديه
ضغط على وجهي حيل ، كز على اسنانه
أيهم : لا تحجين هالكلام
لا تختبرين صبري و گلبي بيج!
مُلاذ : أيهم أفهم أفهم عاااد !
أنا تعبت و أعرف كلش زين
رح يجي يوم و رح اخسرك
رح يجي يوم و ما راح الگاك وياي
و ساعتها أنا رح أكون السبب بـ خسارتك
أيهم : مُلاذ خسارتج تكسر ظهري
ما أگدر أعوفچ ما أكدر أبتعد عنچ لَحظة
مُلاذ : و لا أنا بس حتى تظل النا ذكرى حلوه
بَس حتى من نتذكر بعض ما نكون مشمئزين
اذا استمرينا هيج ما رح نكمل حياتنا عدل
أبيل رح يكبر بـ نص المشاكل
و هذا اخير شي اريده ، اخير شي اتمنى
نزلت ايديه من وجهي و دحگتله
يدحك بـ عيوني ، نظراته تذبحني
مُلاذ : لا تدحگلي هيج أيهم
أيهم : تعوفيني بـ كل سهوله؟
مُلاذ : انا گضيت عمري أتخلى عن كل شي أحبه لان كل شي أحبه أفقده بعدين !
أيهم : ما حبيتيني أنتِ اساساً
دحگت بـ وجه ساكته و هى يحجي بـ هدوء
نبرة صوته و طريقة كلامه و نظراته الي
خلت روحي تسعر بيها النار من القهر
مُلاذ : ما حبيت أحد بـ گدك و لا رح أحب
أنا علمودك أنت بس تغيرت
الكدامك مو مُلاذ القديمه بَس وياك هيچ أنا
عفت كل طباعي اللئيمه و برودي علمودك
أنا من شفتك و عرفتك لـمن حبيت نفسي
اتقدمت ادحك بـ وجه و احجي
مُلاذ : تذكر من گلتلي بـ عقدنا
"هسه أنتميت لـ موطن و ملجئ
بعد سنين من الغربه "أنا الچنت غريبه مو أنت
بين أهلي و چنت أحس روحي غريبه
ما بـ يوم حسيت انا انتمي لـ احد الا لمن عرفتك
أيهم : و هسه ليش تعوفيني ؟
مُلاذ : أعوفك حتى ما تتأذى أكثر
أيهم : اذا اذيتي وياج راضي بيها!
خليت ايدي على وجهي ساكته
أيهم : شلون فكرتي تعوفيني اصلاً؟
بـ كل هذا الوجع و تعرفين ما بچيت يم أحد غيرچ تعرفين محد شايف وجع گلبي غيرچ
شلون فكرتي تعوفيني و انه غادي رماد هسه؟
مُلاذ : أيهم افهمني
أيهم : ما اريد افهم شي
طلاك تريدين ؟ أطلك بس بـ شرط
مُلاذ : شنو؟
أيهم : تروحين منا تاخذين اهلج و تروحين
مُلاذ : وين اروح ؟؟
أيهم : أمن الج حياة بـ الخارج
و أعرف بـ كل أخبارج و تكونين بـ أمان
ساعتها رح أطلگچ
مُلاذ : ما أگدر اسوي هيج أيهم
تعرف هالشي كلش زين ؟ حياة أهلي هاي
ما أگدر أجرهم من دولة لـ دولة
و لـ أماكن ما يعرفوها
أيهم : عوفي اهلج هنا و روحي!
انه أمن عليهم و أكون موجود يمهم بـ كل دقيقة
بس انتِ روحي منا !
مُلاذ : ليش هيچ راضي أبتعد أنا؟
أيهم : ما أريدج تتأذين
مُلاذ : منين تحميني ؟ من الچتال ؟
ما رح أشرد منه ، رح أنتظر اليوم الاسجنه بي
و شكد ما أتمنى اموته بين ايديه
بَس كلام بابا عن العداله هو الموگفني
لان اعرف كلش زين جان يگدر يقتل الچتال هو
مُلاذ : بس ما راد يلوث روحه
و أنا ما رح الوث روحي بـ دم قذر مثل الچتال
و اخلي يموت بـ كل سهوله
لـمن أشوفه ينذل بـ السجون و يموت
و هو مسجون بين اربع حيطان لـمن أروح منا
و ما رح أروح لـ وحدي رح تكون أنت وياي
أيهم : اذن أنسي سالفة الطلاك
مُلاذ : كل شي عندك لازم يكون أكو اله مقابل؟
أيهم : مقابل طلاگنا أمانج ؟ اذا هذا المقابل
فـ اي مقابل كل شي عندي اله مقابل
دحگت بـ وجه ساكته
درت وجهي منه و حجيت
مُلاذ : أنا نازله يم أهلي
عفته و طلعت نزلت يم أهلي
فتحت الباب ، سديتها
أتقدمت گعدت بـ الصاله على القنفه
أتصادر لـ مسامعي صوت امي من المطبخ
فيروز : مُلاذ ؟؟
مُلاذ : ها
طلعت من المطبخ تدحگلي
فيروز : خفت عبالي مو أنتِ
مُلاذ : منو يجيكم و يطب بيتكم
احطهم و انعل ابهاتهم
حجيتها و جتفت أيدي ضايجه
فيروز : شكو؟
مُلاذ : ماكو ، يمه أنا رح اطلع
فيروز : وين ؟؟
مُلاذ : مادري أفتر بـ المنطقة و اجي
فيروز : لا ماكو طلعه
مُلاذ : يمه الله يخليج ضايجه لا تزيديها عليه
فيروز : أگعدي مكانچ وين تطلعين بـ هالوقت
مُلاذ : فيروز
فيروز : شنو فيروز؟؟ أگعدي الدنيا ليل
مُلاذ : تعالي اقفلي الباب وراي
رحت اخذت عبايه أسلاميه من ملاك لبستها
و لبست شال ، دحگت لـ امي تدحگلي بـ أسف
مُلاذ : ما اتأخر لا تخافين
بس اجر نفس اختنكت
فيروز : لا تتأخرين
هزيت راسي بـ قبول ساكته
طلعت من البيت ، صعدت السياره
ردت اشغلها و وگفت لـمن دحگت لـ أيهم
طلع من البيت ، فتح باب السياره و صعد
شخطها من مكانها و طلع بيها
أتذكرت أبيل نايم وحده فوك گلت ما يتأخر عليه
دحگت ورا ساكته ، اخذت جنطتي
دحگت لـ الورقه ، أنرسمت أبتسامة على ثغري
"و أحسد كاسات تقبل ثغرها
اذا وضعتها موضع اللثم في الفمِ"
أتذكرت قبل سنين لـمن لگيتها تحت جنطتي
جنت ما اعرف أيهم و عصبت من هالتصرف
بس احتفظت بيها و ما ذبيتها
شغلت السيارة ساكته
و طلعت افتر بـ المنطقة عقلي مو وياي
نار مشموره وسط روحي ، شوكت ارتاح؟
شوكت ينتهي تعب عقلي هذا ؟
رح اظل طول عمري هيج من مشكله لـ مشكله؟
وگفت السياره ما أگدر أكمل سياقه
عيوني جمرن من الوجع الي بـ روحي
احسهن يحترگن بس لا دموعي تنزل و لا أبچي
غمضت عيني أريد أتذكر لحظة وحده وي بابا
شكله بدء يختفي من عقلي صوته و كل شي
بقت ذكرياتي ناقصة وجه و صوته الحنين
مُلاذ : لو مموتني لحظتها وياك
و لا عايفني أعيش بـ هالنار
مسحت وجهي ، بلعت ريگي
صفنت و أتخيل لو هوَ موجود هسه
شنو چان راح يسوي لو شاف أيهم مضوجني؟
شكد رح يعلمني ع الصح ، جان رح يعصب
اذا جذبت هلكد على امي لو ضميت
لحظة لحظة وحده ما نسيته بـ كل حياتي
بابا بـ عقلي بـ كل لحظة ، بـ كل لحظة حرفياً
كأنُ هوَ يمي و وياي وين ما أروح و شما أسوي
درت و رجعت لـ ألبيت ،
صعدت لـ يم أبيل لگيته نايم و البيت أظلم
كعدت يمه ادحگله مبتسمه
أعرفه يظل نايم هواي ، نزلت احاجي أمي
گلتلها أجيت أنا ، ردت أرجع يم أبيل
گلتلي تعالي الا تكعدين تسولفيلي
كعدت ع القنفه و لميت رجليه لـ صدري
أجت أمي كعدت يمي
فيروز : شبيچ؟
مُلاذ : ما بيه
فيروز : مُلاذ ؟ عليمن تجذبين انتِ؟
مُلاذ : اي صحيح أنا جذابه
ديربالكم لا تصدكون بـ أي شي اگوله
فيروز : أحچي ماما شبيج انتِ و أيهم ؟
مُلاذ : أريد أتطلك
دكت امي على صدرها مصدومه
فيروز : ليييش؟سوالج شي
مُلاذ : ديتأذى هو و عائلته بسببي
و هو ما يقبل يعوفني
فيروز : أنتِ تريدي لو لا؟
مُلاذ : أريده بس شنو الفايده؟؟
لأن أنا اريده اشوف روحه محترگه كدام عيني
و من وراي بس أسكت لان أريده؟ اذا هيچ
فـ أنا ما أريده و لا أريد شي منه
فيروز : شصايرله من وراج؟
مُلاذ : يمه من البداية كل شي غلط
كل شي بـ المعنى الحرفي
من اول ما عرفته انخطف بسببي
رمو عليه بسببي كتلو اخو بسببي
و اخير شي صار دمره
امي تعرف بـ الصار وي هتان
و سالفة اسكندر ، ام أيهم مسولفة الها
باجيه و مسولفه لـ امي
فيروز : بَس هيج ما سويتي حل !
مُلاذ : اذا اظل ويا و الله حياته تتدمر
هو عنده طفل شنو ذنبه يعيش كل هذا ؟
فيروز : ما اله ذنب بس ما يصير تعوفي
بـ هيج فترة و تخلينه لـ وحدة و هو يحتاج
احد يوكف ويا !
مُلاذ : اعرررف بس يمه أيهم ما يريد أوگف ويا
ما يريدني ما يريد اقترب منه و اهدي
انا اعرف أيهم ضربتين ع الراس توجع
و العاشه مو سهل و كل ما أقترب منه
يبعدني يفكر أچذب عليه و اضمضم لـ اهله
و أنا كل الأسوي علموده كل الأسوي لـ خاطره بعدين رح ينفر مني بسبب مشاكلنا
فيروز : كل عائلة يصير بينهم مشاكل !
أنا لا تشوفيني جنت ليل و نهار أضحك
بـ وجه ابوچ ، أجت النا ايام نتعارك انا ويا
ما أطيق ادحك لـ وجه من العصبية و القهر
فيروز : هو يجي يراضيني و يحاجيني
بس و لا مره فكرنا بـ الطلاك ،
مره وحده گلتله و گلتها بالچذب
حتى يبطل يطلع و يروح يأذي نفسه
و اعرفه ما يطلگني ، كل عائله و كل حياة
لازم اكو بيها مشاكل !
مُلاذ : يمه أيهم ما طايقني و لا أريده يتأذى
تفتهميني شنو أحجي؟؟
فيروز : الولد متأذي على اهله حتى لو ما يحجي
هو مبين عليه لا تزيديها عليه يحبچ
و مواقفه تشهدله ، ساعدي بـ هاي الفترة !
مُلاذ : مجذبته أنا ؟؟؟ گايله ما يحبني ؟؟
جاي اگلج عصبي عصبي ما يريدني يلومني
أنا احجي و أمي تحجي
أخير شي عاطت بيه و گامت نامت
أجت ملاك كعدت يمي ، نسيت أبيل
مُلاذ : نوب تحجي عليه
ملاك : أمي ما تريدچ تخربين بيتچ
أنتِ من صرتي وي أيهم صرتي أحسن بـ هواي
نفسيتج و وضعج و كل شي أتحسن بيچ
ما تريدج ترجعين مثل قبل منغلقة على نفسج
مُلاذ : أشكرچ ملاك و الله ما قصرتي
طلعتيني منغلقه على نفسي و بعد عندي اكتئاب؟
ضحكت و هزت راسها بـ قبول
دحگتلها بـ طرف عيني ساكته
مُلاذ : كومي نامي يلا
ملاك : ما اريد جاي اتابع فلم
مُلاذ : خلصي و نامي
ملاك : تمام
درت وجهي و نمت
غمضت عيوني غفيت هستوني
و ملاك كعدتني ، فزيت گوه فاتحه عيوني
ظلمه و ملاك تحجي بـ خوف
ملاك : مُلاذ مُلاذ
مُلاذ : شكو؟؟
ملاك : الباب يندك
مُلاذ : شوفي منو ؟
ملاك : ماااا اخاف
مُلاذ : سدي حلگج لا تصيحين
بعدني أحجي و سمعت صوت الباب يندك
گمت اريد اروح البس شال ، أريد أكمل مشي
و سمعته صوت أيهم
- مُلاذ لَـذه لَـذه وينج عني
لَـذه محد يحبني غيرچ ، لذتي
عفت الشال و ركضت لـ الباب فتحتها
دحگتله ساند روحه عليها و عيونه حمر
مُلاذ : أيهم !!!
ابتسم بـ هدوء يدحگلي
أيهم : لَـذه
مُلاذ : شبيييك شكو؟؟؟
صرت گدامه ، أيديه على بطنه ، خاف يوگع
باس خدي بـ شوغه و ملاك واگفه
أشرت الها تدخل ، شميت ريحة شرب بـ أيهم
مُلاذ : ليييش شربت ؟؟ ليش هيج سويت؟؟؟
ادحك لـ وجه اصلاً ما يسمعني شنو أحچي
خلا ايده على خدي و ساند روحه ع الباب
أيهم : أريدچ
ملاك : مُلاذ رح يوكع
مُلاذ : صوتج فضحتيناا امي رح تكعد
ملاك : و الله رح يوكع
يمه خطيه الولد شصاير بي
دحگتلها و حجيت بـ همس معصبه
مُلاذ : أمشي ادخلي جوا أمشي
ملاك : ما أروح خاف يوكع
مُلاذ : عمي أمشي روحي عني ولچ
أنداريت لـ أيهم يبوس بيه و هاي واگفه
خبلوني ، سديت حلگه بـ ايدي و أطرد بـ ملاك
مُلاذ : أيهم تعال نصعد أيهم
جريت زنده و هاي تضحك بـ السكته
دورت بـ عيوني بـ شنو أشمرها
رفعت العوده و هي شردت تضحك
مُلاذ : أيهم
لازم بيه بـ اثنين أيديه
و گوه واكف و يبوس وجهي و رگبتي
لزمت بـ الباب ، خليت العوده بـ مكانها
مُلاذ : أيهم خل احاجيك
بلعت ريگي ساكته
أيهم : لَـذه ليش توجعين گلبي لَـذه
مُلاذ : ما اوجع گلبك تعال
اريد امشي و حجا بـ صوت عالي
أيهم : ناذر نذررر لو طاح حلگي بـ حلگها
مااا اهدها لو صوبين ثارت تفگها
اتخزيت كمت ادك على خدودي
خاف امي تسمع سديت حلگه
و هو يعيد و يكرر ، صعدته گوه
دخلته لـ البيت و هو يروح منا و يجي منا
لزمت بي ، كل شي ما اشوف ظلمه
أيهم : شفتك تمر حلان يكتل حلاها
بوستك لازم ماي نشرب وراها
ما أشوفه ظلمة گلت هسه أريد أسد حلگه
و أفگس عينه بـ الغلط ، ظليت أتلمس بـ وجه
لزم أيدي ، سحب راسي يبوسني وخرت منه
أتلمس و أركز يلا أتحرك ، أخذته گعدته ع القنفه
اريد أگوم و انهبتت ايدي
بعدني أريد أفلتها سحبني يبوسني بـ شوغه
تلمست وجه حسيت على دموعه مبلله وجه
لازمني بـ أثنين أيديه ،
اريد أملص روحي من ايده ما أگدر
مُلاذ : أيهم
اريد احجي خلا وجه بـ صدري
و نَفسه حار ، كل ما اريد احجي يبوسني
يبجي و يهمس : لا تعوفيني لا تحرميني منج
مُلاذ : اريدك و احبك اكثر من كل شي
و داعة بابا ، أيهم الله يخليك افهمني
لا تسوي هيج بيه لا تحرك گلبي ، ليش تشرب!
اصلاً مو وياي ما يسمع صوتي
روحي تروح من هيج يبوسني و يبجي
ما يقبل يعوفني و مچلب بيه بـ كل قوته
اريد احاجي ما يخليني احجي
و اصلاً شارب ما يفتهم شي مني
نزل بيه ع القنفه ، و هو يبوسني ...
-أيهم أيهم لا
رفعت أيدي خليتها على كتفه
لزمها مانعني أحركها
فتحت عيوني نعسانه ، لگيته غافي
غمضت عيني ساكته ، من يگعد رح يندم
و شكد حاولت أمنعه و أبعده عني ما گدرتله
ما مستوعب حتى اليسوي
گمت من يمه دخلت سبحت و طلعت من الحمام
صفنت ادحك بـ وجه ، شسوي هسه أنا؟
اذا هو ندمان مره أنا ندمت الف مره
أتقدمت عليه نمت يمه ، ضميت نفسي بـ حضنه
لحد هسه أحس لمساته على جلدي
و جلدي يكزبر كل ما اتذكر
تحرك و هو نايم ، يحجي
أيهم : مُلاذ
مُلاذ : يمك
أيهم : مُلاذ
سكتت خليت ايدي على خده
و تدنيت اكثر ، حضنته ، خلا وجه بـ صدري
أنا شلون أعوفه هيج و هو ما يرتاح غير يمي
حياته مگلوبه گلاب ، شلون أعوفه لـ وحده؟
ظليت ساكته ادحگله و أنتظره يگعد
گمت من يمه ، فز ، دحك بـ وجهي
شويه شويه اتكونت عگده بين حواجبه
دحك لـ رگبتي و وجهي و رجع دحگلي
أيهم : شصار؟
مُلاذ : ليش اجيت سكران الباررحه؟؟
شوداك يم الشرب ؟ انت شبيك!
أيهم : سويتلج شي ؟
هزيت راسي بـ قبول احتدت تعابير وجه
گام يلبس بنطرونه و يحجي
أيهم : ليش ماااا توخرييين من يمي
تشوووفيني الله مطيح حظي
ليش تبقين يمي ؟ ليش ما تبتعدددين عني
مُلاذ : شلييي دخل أنا؟؟
أنت سكران و أنا ادفع بيك ما اگدرلك
شنو أگدر أسووووي؟
أيهم : التگدرين تسوووي تعوفيني و ترحين
مُلاذ : وين أعوفك و أروح و أنت أجيتني
نص الليل دربك ما تندله منين ،
عايف أبيل نايم و طالع تشرب !
حل هذا بـ رأيك ؟
أقترب عليه عيونه تتحرك بـ أستمرار
على وجهي و على جسمي و يحجي
أيهم : أذيتج ؟؟
هزيت راسي بـ رفض
كعد يدحك بـ وجهي
مُلاذ : كوم اسبح خل اسوي ريوك و اكعد أبيل
أيهم : مرة الثانيه اذا انغسلت و صرت ****
و شربت هَم ، تروحين تكعدين بـ الغرفة
و تقفلين الباب و لو أموت بـ الباب حتى تفتحيها
لا تفتحيها لحد ما أروح ، أفتهمتي؟
مُلاذ : يعني اريد أفتهم شغله
وين جان عقلك البارحه من شربت ،
بَس أريد أفتهم هسه فكرت ما جان لازم تشرب
صفن و گال
أيهم : وين تلفوني؟
مُلاذ : جاوبني
أيهم : أنطيني تلفوني
أخذت تلفونه خليته بـ أيده
خابر ، ظل تلفونه يرن شويه و اجا صوت
- ها
أيهم : و سما أبن الكلب البارحه وين أخذتني؟
ضحك الرجال يلي على الاتصال
أيهم : انتظرني جايك اذا ما احرك ابوك
-هي مره بـ العمر ع الاقل خرطت الاول و التالي
و أنا بعدين شربت و هسه نسيت أنت شحجيت حرامات
فشر عليه أيهم و سد الاتصال متنرفز
مُلاذ : منو هذا؟
أيهم : مازن الكلب
حجاها و شمر تلفونه ع القنفه
گام ، دخل يسبح و أنا عزلت البيت
و لميته ، رحت سويت ريوك و أيهم طلع من الحمام
مُلاذ : تعال أكل يلا
ردت أروح لـ غرفة أبيل أنسحبت أيدي
أنداريت دحگتله ، أنضربت بـ صدره
باسني بـ هدوء ، خلا ايده على خدي
أيهم : اريدج و احتاجج يمي كلش
و لحظة الافقد اتمنى بعدج و قربج
محد يهديني غيرج و محد يتأذى غيرج
جاي اكره نفسي و تصرفاتي لان أذيج
بـ كلام أو أفعال ، بس جاي تضمين عني
مُلاذ : أضم عنك حتى ما تتأذى
من تعرف بـ اليصير
أيهم : اتأذى اكثر لمن أعرف من غيركم
مُلاذ : تمام ما رح أضم عليك بعد
ما دام هالشي يزعجك
هز راسه بـ قبول
رجع لزم وجهي بـ ايديه و باسني
ابتعد يجر نفس
مُلاذ : خل اكعد أبيل
أيهم : كعدي
مُلاذ : نشف شعرك رح تتمرض
أيهم : نكعد أبيل انه وياج؟
مُلاذ : تمام
لزم خصري و يمشي وراي
رحنا نكعد أبيل و أبيل ما يكعد
و أيهم خبلني يبوس بيه أريد اكعد أبيل
اول ما احجي يبوسني
مُلاذ : أيهم كااافي
أيهم : تعالي عوفي نايم
مُلاذ : وين اجي اريد اروح عوفني
تأخرت عن الشغل حتى انت تأخرت
أيهم : لَـذه
دحگتله گالها بـ جديه ضايج
گمت ويا ساكته ، رحنا لـ المطبخ
رفعني أيهم من خصري كعدني ع الميز
وكف كدامي
مُلاذ : برد الاكل ترا
أيهم : عوفي الاكل و عاينيلي
مُلاذ : شتريد؟
أيهم : حاجي جسار
مُلاذ : شحاجي؟
أيهم : يفسخ الخطوبه
لا يطلعني من طوري خل يعوفها !
مُلاذ : يعوف منو؟
أيهم : يعوفها
مُلاذ : منيه يعوفها؟
هو يقصد هتان بس ما يريد يگول اسمها
و لا يريد يگول اختي حتى من يحجي
تعابير وجه محتده ، خزرني ، أريده يگول اختي
أيهم : تعرفين يعوفمن!
مُلاذ : لا ما أعرف
أيهم : مُلاذ !
مُلاذ : ما أعرف منو يعوفمن؟
أيهم : لا تعصبيني
مُلاذ : شنو أعصبك يعوف منو؟
كلشي ما جاي أفهم؟
أيهم : يعوف هتاان
مُلاذ : يا هتان
أيهم : چم هتااان اكو مُلاذ ؟!
مُلاذ : جسار عنده صديقة هم أسمها هتان
غير أعرف يا هتان ؟
أيهم : النوب عنده صديقة!
مُلاذ : زميلة عمل
أيهم : مو زميلة العمل الثانيه
مُلاذ : منيه الثانيه ؟
أيهم : رح أشيلچ و ارگعچ بـ الگاع
مُلاذ : منيه الثانيه مجاي افهم
تقصد هتان اختك لو هتان زميلته؟
أيهم : أختي
حچاها بـ نتر ، ابتسمت و هزيت راسي
مُلاذ : شبيها؟
أيهم : خل يعوفها
مُلاذ : ليش يعوفها جسار خوش جسار
ما يأذيها و يخليها تعيش مرتاحه
أيهم : مُلاذ لا تخليني اسب جسار
خل يعوفها صغيره بعدها شتتزوج منه!
مُلاذ : لا ليش؟ مو انت هم متزوج
و هي هم حقها تتزوج
أيهم : صغيره جاي اگلج
مُلاذ : خلصت جامعه
أيهم : مُلاذ لا تغثيني مُلاذ
مُلاذ : أيهم هتان جبيره أيهم
أيهم عوفهم بـ حالهم أيهم
أيهم اسمع مني و افتهم مني أيهم
أيهم شبيك عصبي أيهم
أيهم ....
ردت احجي سد حلگي
أيهم : رح اسب حتى أبو أيهم
لا تظلين تعيدين
ضحكت ادحگله
و هو اتنرفز مني يدحگلي ضايج
مُلاذ : حبها رادها قبلت بي رح يتزوجون و بس
أيهم : أنچبي
مُلاذ : شنو أنچبي ؟
أيهم : شنو حبها شبيج انتِ!
مُلاذ : أنت شبيك غير حبها
أيهم : مُلاذ
ابتسمت و گلت
مُلاذ : تعال
اجا ناحيتي دحگتله
مُلاذ : لا تلوم هتان ترا رح تتزوج
و الصار صحيح صعب بس اسكندر اذاها و كذب عليها بـ وقت اخوها بي ميت و انتوا متدمرين
و ابوها ما موجود ترا جانت تحتاج شخص يمها انت جنت حاير بيه و بـ مرضي اخوك حاير بـ غاده و ابنه ، امك گوه عاينه نفسها
مُلاذ : أنا ما أبرر لـ هتان تصرفها غلط
و غلط كلش جبير بس محد معصوم
أسكندر يجبرها و يضغط عليها من جهه
و من جهه تخاف تعرفون
أيهم : مُلاذ لا تحرگييين اعصابي
اذا احنا كلمن حاير بـ حياته تروح...
سكت متنرفز
مُلاذ : أسكندر اجاها بـ شخصية سيف
لاگاها بالحب و الحنان و الهدايا
و كل شي تتمنى اي بنيه
و وعدها بـ خطوبه و بـ زواج
عايفته و منفصله عنه ، مچلب بيها و ظال يبجي
ضغط أيهم حيل على كصته متنرفز
كوه يسكت روحه ، يحترك من العصبية
من يتذكر أسكندر و الي سوا و هتان
مُلاذ : أسمعني خل أحاچيك
سحبت أيده وگف گدامي
گوه مسيطر على اعصابه من وجه واضح
مُلاذ : رح أحچي الك شي و تظل هادء
بَس قبلها اسألك و تجاوبني
أيهم : أحچي
مُلاذ : أسكندر شسويت اله؟
أيهم : ***** الـ *****
مُلاذ : أحچي بلا فشار
سكت متنرفز رجع يحچي
أيهم : ضربته و راواني الصور
لـمن رجعت لگيته شارد
دحگت بـ وجه أريد أحچي اله
عن السوا أسكندر بـ هتان و لمن خدرها
ردت أحجي اله هَم عن هتان الجرحت روحها
بَس أتذكرت كلامها و هي تتوسل بيه
دحگت بـ وجه و أتذكر قبل كم دقيقة
لـمن گلتله ما أضم شي عليك بعد
أيهم : شنو ردتي تحجين؟
مُلاذ : هيچ ما ردت أحچي شي
بَس ردت أحمسك للسالفه حتى تجاوبني
دحك بـ وجهي ضايج
عافني يريد يطلع من المطبخ
نزلت من الميز ركضت ورا ، سحبت ايده
دار وجهه دحكلي ، حاوطت بـ ايديه خصري
دحگلي مستغرب مني ، حاوطت رگبته بـ ايديه
مُلاذ : أنتَ شلون بيك تظل هيج تتزعل؟
اذا صار عدنا طفل تظل تتزعل مني كدامه؟
دحك بـ وجهي مستغرب و مصدوم
لـمن حجيت عن الطفل
أيهم : طفل؟
مُلاذ : اي طفل ليش ما يعجبك دكتور أيهم ؟
أيهم : يعجبني ، بس ما جنتي تريدين؟
مُلاذ : بعدني ما أريد هسه
بَس بـ المستقبل اذا حياتنا استقرت
ماكو مانع اذا صارت عدنا نسخه صغيره
من أيهم و مُلاذ الغثيثين
ابتسم يدحگلي
أيهم : شلون اذا طلعت بنيه و تشبهج؟
يشيب گلبي لذتين بـ حياتي هواي
مُلاذ : تشبهني و لا تشبهك و هيج عصبيه
أيهم : اصلاً انتِ كلش هادئه
خو صوتج ما ينسمع
ابتسمت حاصره ضحكتي
مُلاذ : مو؟
أيهم : اي
مُلاذ : اذا صارت عندي بنيه اريدها مثلي
مره حوك مو صوتها ما يطلع اليزعجها
تطبع الخمسه على وجه
أيهم : لا لذه نعلمها التفاهم
مُلاذ : لا نخليها مثلنا تنعل ابهاتهم
أيهم : تتمرد
مُلاذ : أنا اريدها متمرده اصلاً تدري
أريد بنتي يكون اسمها بي معنى و تمرد
أيهم : شمرنا احتمال الولد من افكارنا
مُلاذ : لا اذا ولد اريده يصير زلمه
مو گدرته ع النسوان
و هم اريد يكون اسمه بي معنى
أيهم : زين نسميها آسي؟
مُلاذ : أسي شنو ؟
أيهم : يعني تمرد بالتركي
مُلاذ : ما حبيته
أيهم : شنو بـ بالج؟
مُلاذ : اقترح عليه
أيهم : تعبتيني لَـذه
ما تقبلين بالاسماء الاحجيها
مُلاذ : اريده نادر و حلو و بي معنى
تعال خل ندور
أيهم : و الشغل؟
مُلاذ : خيولي
انداريت و سحبت ايده
حاوطت بيها بطني ، وگف وراي
مُلاذ : هادء أنتَ؟
أيهم : لا ، ليش؟
مُلاذ : مو اعرف سوالفك
تتصرف كدامي بـ هدوء و أنتَ معصب
و جاي الزك بيك حتى تهدء
لان حسب تصريحاتك بس أنا أهدئك
أيهم : بس انتِ تهدأيني
بس أبقى بـ داخلي محترك
مُلاذ : على موضوع هتان مو؟
أيهم : مُلاذ الصار مو سهل
مُلاذ : اعرف حبيبي تعال خل نشوف اسماء
لازم بـ خصري و نمشي سويه
كعدنا ع الكرسي ، أخذت تلفوني أدور أسماء
مُلاذ : نسميها اسم كردي اسمائهم حلوه
أيهم : حسب الاسم
مُلاذ : تعال نشوف
حجيتها و فتحت تلفوني
أيهم أشرلي اكعد بـ حضنه ،
گمت كعدت ساكته و ندور اسماء
مُلاذ : نسميها تكوشين
أيهم : شنو تكوشين ؟
مُلاذ : يعني المكافحه و المناضله بَس ما حبيته
أيهم : انه هم
مُلاذ : عنود؟
أيهم : اسم مال كبار
مال وحده عيونها خضر و انا وياج سودانين
مُلاذ : عادي تطلع على امي
بس صح اسم مال كبار عبالك مُدرسه
أيهم : يلدز؟
مُلاذ : شني يلدز؟
أيهم : تركي معناه نجمه
مُلاذ : اگلك انا عراقية شروگيه اصليه بحته خوش؟ روح اتزوجلك وحده تركيه و سمي بتكم هيچ
ضحك أيهم أبتسمت على ضحكته
مُلاذ : احبك من تضحك
أيهم : و من ما اضحك؟
مُلاذ : تلعب نفسي منك
اهتز جسمه يضحك
مُلاذ : لعد شبيك حارمني من ضحكتك
دحك سنونه شلون حلوات ما تراوينياهن
ضامهن عليمن ؟
أيهم : اذا جاي اضحك فـ بسببج
لان كل الاعيشه يوجع گلبي لـ درجة
تشوفيني اضحك و احجي
بس انه ما باقي غير بس ألم و أذيه بـ داخلي
مُلاذ : أنسى خل نرجع لـ أسم الجاهله
أيهم : اليسمعج يگول هسه عدنا الجاهله
مُلاذ : لا يصير عدنا بعدين
أيهم : اگلج
عرفته من نظراته القلقت
مُلاذ : اخذت حبايه
أيهم : حباية شنو؟
مُلاذ : نفس الشربتهم الي
أيهم : تمام
كرضت شفتي ساكته
دحگت تاره دازتلي تعتذر لان تأخرت
گلتلها المكتب مسدود اليوم
رجعت ادور اسماء و أيهم صافن ، دحگتله
مُلاذ : شبيك؟
ظل صافن ندسته
مُلاذ : شبيك؟
دحك بـ وجهي
أيهم : ما اريد أخسرچ
مُلاذ : ما فگرنا غير حجيك هذا
اريد اشوف شلون تخسرني بالله ، طايره أنا؟
أيهم : تعالي
حجاها و حضنني
حضنته ساكته ليش هلكد خايف يخسرني
كل ما نحجي بـ شي عن المستقبل يخاف هيج
مُلاذ : أنا يمك ما أعوفك
أيهم : خسارتچ رح تكون أخر قطره تملي الكاس
مُلاذ : شبيك أيهم شنو تخسرني
ما تخسرني لا تخاف كاعده على گلبك
دحك بـ وجهي ساكت
نظراته ما عرفت اوصفها ،
بلعت ريگي ادحك بـ عيونه
كأنُ هاي اخير مره يشوفني بيها
أيهم : ما احبچ انه ، شي أكثر من هيج
ما اعرف مهووس هايم عاشك الج
ما جاي أحس بـ حب الحب كلمة قليله عليَّ لَـذه
مُلاذ .: قلقتني
أيهم : تعالي نرجع نعاين للاسماء
مُلاذ : لگيت اسم
أيهم : شنو؟
مُلاذ : ناي
ابتسم بـ هدوء يدحك بـ وجهي
أيهم : حلو
مُلاذ : اذا ادلعها شنو ادلعها؟
أيهم : نوني ، ناني
مُلاذ : حبيته
أيهم : انه هم
مُلاذ : و الولد ؟ شنسمي ؟
أيهم : عشتار
مُلاذ : عشتار شني شبيك انت
بعد الثاني نسمي نمرود؟ و الثالث آشور
مو انا اولد حضارات مو جهال
أيهم : لسانچ شطوله لسااانچ
مُلاذ : ما عليك بـ لساني
يظلم بخت ابني يسمي عشتار
أيهم : أدريس؟
مُلاذ : اي حلو
أيهم : زين من عجبج لو ما عاجبج
جان طبعت الخمسه بـ وجهج و گمت
مُلاذ : سويها و شوف منو يبقالك بـ البيت
أيهم : تنكسر ايدي لو انمدت عليچ بـ يوم
مُلاذ : برد الاكل من وراك
لا تريكت و لا خليتني اتريك و لا رحت للشغل
و لا خليتني اكعد أبيل وخر ام سوادي وخر
أيهم : سوادي حبيب گلبها
مُلاذ : الله أيهم اشتاقيت لـ بدايتنا أنا وياك
صح جنا نتعارك بس جنت أحب أزعجك
أيهم : جنت معلول گلب
ابتسمت ساكته
رحت لـ الغرفه اكعد أبيل لگيته ماكو
رحت لـ الصاله لگيته گايم نايم بـ الصاله
انقهرت عليه غطيته و خليته نايم
مر هاليوم و من بعدها جسار
راد يتزوج هتان بسرعه ، خلا أيهم يتخبل
بس باسط حاجا أيهم و گله هتان
متفقة وي جسار و ثنينهم موافقين
اروح لـ هتان تگلي جسار من وحده قرر
و مقهوره و تبجي ، ظليت يمها أحاچيها
بعدين فعلاً بدوا تحضيرات الزواج
أيهم يكمل كل وقته بـ الشغل
من يجي بـ الليل يظل منومني بـ حضنه
يشرب جكاير من يجي لحد ما يروح
و مرات يعمر النرگيله و يكعد بـ البلكونه
أبيل يبجي دوم لـمن أبو ماكو
و يخلي أيهم يصير عصبي لأن عنده شغل
و عمليات و الدنيا محترگه يمه و أبيل يبجي
يجي بـ الليل ياخذه يطلعه و يونسه
يرجعه و يروح لـ شغله ، كل يوم أنا ويا على هالحاله
قرب عقد هتان و جسار
هتان اصلاً جسد بلا روح
كله غاده و امها يلي يجهزن و يركضن
و هي حابسه روحها بـ الغرفة
شنو يجيبن و يخلن كدامها ما تهتم
سكتنا عنها كل ما أحاچيها
أقرا نظرات الندم بـ عيونها
و هي بـ نفسها حچت الي عن ندمها
هتان : ندمانه كد شعر راسي
ندمانه لـ درجة لأن خربت حياتي هيج
ما رح أكدر بـ يوم أنسى السويته بـ نفسي
و لا أنسى يلي سويته بـ أهلي و بـ أخواني
قبل جنت ما أريد أتزوج جسار ، بَس هسه
هسه ما يهمني أتزوجه أو لا ، أموت أو أعيش
رفعت نظرها لـ فوك و عيونها تجري دموع
بلعت غصتها و حجت بـ خنگه
هتان : أيهم و باهر يمكن يسامحوني بـ يوم
بس رب العالمين ؟ رح يسامحني ع الغلط
يلي ارتكبته و الحرام يلي سويته
تحجي و شفايفها ترجف و دموعها تنزل
دارت وجهه و ضمت روحها بـ غطاها
سكتت عنها ، ما اكدر الومها
هي تعرف نفسها غلطت ،
ما اكدر اغير نظرتها عن هالشي
عقدوا بـ المحكمه و بقى عقد يم الشيخ
هتان ما رادت لا عرس و لا هوسه
بس أيهم شرط على جسار
ما تطلع من بيتهم غير بـ زفة
اجا يوم العقد و جسار و هتان
الي يشوفهم يگول حاطين السجاچين
على رگابهم و جايبيهم
جابو الشيخ ، هتان ما خلت قطرة مكياج
بَس حمره ، لبست الفستان الابيض
يلي جابته امها و غاده
كعدناها يم الباب و الشيخ و جسار
كلهم ورا الباب ، قرا الشيخ سور و أدعيه
بَعدها گال لـ هتان تكرر ورا قبولها بـ جسار
و هاي بچت كممت حَلگها گوه سكتناها
الشيخ منتظر گلناله توترت
و لأن رح تعوف أهلها بچت ، لزگنا السالفة
قبلت بـ جسار و جسار قبل بيها
لبسناها شالها و طلعنا من البيت
الكل وكف يبارك الها و يدعي الهم بـ السعاده
هي ساكته و تهز بـ راسها
و جسار وجه ما يگصه السيف
اصلاً زواجهم مدري شلون صار
كلهم عابسين و ضايجين و مقهورين
باهر محاجيها قبل يومين و مسامحها
هتان واگفه يم السياره
گلت لـ جسار ما يروحون و ينتظرون
بس أيهم ما حاجاها ، رحت لـ أيهم الواگف
بـ الحديقة وحده ، دحگتله ايده بـ جيبه و يدخن
مُلاذ : أيهم
دحك بـ وجهي عيونه مدمعه
رجع يدخن أشتعلت جمرة الجگاره
مُلاذ : ما رح تودع أختك و توصي جسار عليها ؟
أيهم : روحي مُلاذ
مُلاذ : مااا رح أروح لـ مكان
رح تروح و تودعها و تحاجيها
أختك هاي أرتكبت غلط و أنتهى خلص
ندمانه هي و ندمانه كد شعر راسها
أيهم : طلعت و مشت و راحت و اجت
ويا **** لـ أشهر هسه ندمت؟
مُلاذ : أنتَ ما تغلط ؟ أنتَ هم شربت
أنتَ هم أرتكبت حرام أنتَ هم جنت تحبني
و تجي تصعدني وياك شنو فرقك عنها؟
عاط بيه محترك دمه
أيهم : ما نومتج على صدرررري بـ الحرام
و لا لمستج لمسه بـ الحرام
جنت محرم حتى شوفة عيونج على روووحي ،
الي سوته هي يكسر الظهر
أيهم : هي مو بس أرتكبت غلط بـ حقنا
حتى بـ حق نفسها
شلون تريديني أروح و أسامحهااا !!
مُلاذ : أسكندر خدررررها ، ردات تنفصل عنه
هددها اذا ما تشوفه يدزلك كل صورها ويااا
لـمن راحت اله و صعدت ويا خدرها
أغتصبها أيهم ، طلعنا ندورها أنا و غاااده
بـ نص الليل نريد نلگا الها أثر ، تدري وين لگيناها؟ تدري شلون لگيناها؟
يدحك بـ وجهي مصدوم
و عيونه تريد تطلع من مكانها
كملت كلامي ، أدحك بـ وجهه
مُلاذ : لگيناها بـ مستشفى
مغمي عليها بـ الشارع منهاره و منطيها مهدء ، اتصلت بينا الممرضه هتان منطيتها رقمنا
رحت لگيتها متدمره و قبل لا تفكر بـ نفسها
و الصار بيها اول شي نطقته و گالته
"اخواني بعد ما يحبوني"
عفس الجكاره بـ ايده و هيَ مشتعله و
نزلت دموعه ، كملت كلامي أدحك بـ نص عينه
أريد أخلي ينجبر يروح يحاجيها و يصالحها
مُلاذ : بس لأن تسمع صوتك كل يوم
و شايفتك كم مره يمها بـ الليل تدري شسوت؟
من كد ما حست بـ الذنب و الندم أنتحرت
دخلت غرفتها لگيتها مشككه ايديها و يمها موس
و ما أنتهت لحد هنا لـمن صحت أول كلمة حچتها
"اخواني لا يعرفون عبالهم بسببهم سويت هيج"
أيهم : كل هذا تعرفين بي و ضميـ ...
مُلاذ : ضميت ضميت لأن اتوسلت بيه
ما خافت على روحها
گد خوفها عليكم تحسون بس بـ الذنب ،
ندمت و شي راح و أنتهى و الصار صار بيها
كملت كلامي احجي بـ عصبية
مُلاذ : كلنا نغلط حتى أنتَ غلطت
رب العالمين بـ كبره يسامح أكبر مذنب اذا تاب
انت منو حتى ما تسامح؟ محد اتأذى غيرها
محد طلع متضرر غيرها على شنو ما تسامحها؟
دحك بـ وجهي ساكت
دار وجه بسرعه ، يفرك بـ وجه
اتقدمت وگفت ورا لزمت زنده
مُلاذ : حاچيها
عافني و راح يمشي ، رحت ورا
دحگتله نظراته مردت گلبي ، دحگلها عيونه ذبلانه
و هي واگفه مبين عليها الحزن و الضوجه
رفعت عينها دحگتله يدحگلها ، نزلت عينها بسرعه
اتقدم ناحيتهم ، رحت ورا ، بلعت ريگي ساكته
جسار واكف يم هتان ، وكف أيهم كدامها
و هي ترجف ، رفع أيده يريد يحضنها
دنت راسها عبالها راح يضربها فد أنقهرت
شكد چنت احب أخوتهم ، شصار بيهم
أهتز جسمه يبچي سحب راسها لـ صدره
حضنته بـ كل قوتها تشهك و تبچي
دحگت لـ ذوله يبچون وياهم
أبتسمت ساكته المهم تصالحوا
خل يبچون على راحتهم ، حكيت گصتي
لحظات و أبتعد عنها باس گصتها
رجعت مشيت وگفت يمهم
مُلاذ : دكافي غرت بـ عمرك ما شابگني هيج
ضحكوا ثنينهم أبتسمت
أندار أيهم لـ جسار يوصي على هتان
جسار : ادري مو تعلمني
أيهم : ادري بيك ما بيك خير
روحك گوه عاينها شلون تعين مره وياك
جسار : مثلك شوف مُلاذ شلون ضعفانه
توكلها بـ الدين ؟ تريد انطيك فلوس تجيب الكم لحم؟
أيهم : فلوس حرام ما نريدها
جسار : شلون فلوسك
أيهم : امشي ولي منا
و اذا بيك خير تضوجها
جسار : دمشي لك
سلطان : يلااا ولكم متحمس اشغل أغاني
ضحكوا و أيهم و باهر و أم أيهم حضنوا هتان
وكفت باركت الهم ، صعدوا بـ السياره و راحوا
صعدنا احنا هم گعدت أبيل بـ الورا
لحگناهم و زفيناهم ، رفع أيهم تلفونه ،
كتب بي بعدين خابر
أيهم : مازن شوف الي عنوان الأسم الدزيته
نزل التلفون و سد الأتصال
طول الطريق عيونه تدمع و يمسحهم
لزمت أيده ساكته ، راد يسحب أيده لزمتها اقوى
مُلاذ : أيهم ما تگدر تعاملني بـ هاي الطريقة
ما تگدر تخليني احبك و اتعلق بيك و بعدين أنتَ تكرهني و تنفر مني
أيهم : ما أنفر منج انه و لا أكرهج
بس كل مره جاي تسوين نفس الشي ،
تضمين عليه
مُلاذ : أيهم هتان أتوسلت بيه ماتت من البچي
اجي و احجي الك بيا حق و بـ صفتي شنو ؟
أيهم : مثل ما أنتِ ما تقبلين أضم عليچ
مُلاذ : اعرف مارح أضم عليك
هذا أخير شي جنت ضامته عليك
و حچيت الك ماكو داعي تزعل مني كل ثانيه
تعبت كلش من هالوضع وياك ما تريدني
ما تريد تحاجيني نزلني خل اروح بـ تكسي
احسن من ما نتعارك
أيهم : ما ترحين لـ مكان
مُلاذ : لعد لا تعاملني هيج!
انت تشوفني اسكت بس انا گلبي يحترك
من افعالك و تصرفاتك وياي و برودك
دحگلي ساكت وخرت ايدي من يم ايده
ما حاجاني ، انداريت اخذت أبيل
كعدته بـ حضني أبوس بي
أيهم : كافي
مُلاذ : شنو؟
أيهم : جيبي أبيل
دحگتله ساكته اخذ أبيل كعده على رجله
درت وجهي عنه لـ الشباك ، وصلنا البيت
نزلت سبحت و طلعت أنشف شعري
دخل أيهم الغرفه يدحگلي بـ طرف عينه
درت عيني منه و رجعت دحگت لـ وجهي بالـمراية
اتقرب وگف وراي ، خلا ساعته على الـميز
جنت نازعه الحلقة و مخليتها على الـميز
لأن دخلت سبحت و ما ألبسها لَمن أسبح
دحگتله بـ الـمراية يدحگلها
دارني اله ، رفعت عيني دحگتله
لزم الحلقة و أخذ أيدي لبسنياها
أيهم : الحلقة اذا نزعتيها أكسر أيدج
مهما تعاركنا انه وياج ما تفكرين تنزعيها !
رفعت عيني ادحگله اقترب أكثر الي
مُلاذ : أيهم ...
قاطعني قبل لا أكمل
أيهم : أششش
خلا ايدي ثنينهم لـ ورا
يحرك أرنبة خشمه على وجهي ، بلعت ريگي
أتنقلت شفايفه بين شفايفي و رگبتي
و هو لازم فكي بـ رخاوه ، بس قبلاته
تحمل القسوه بـ كل مَره
بَعدته عني بـ صعوبه بعد محاولات
نَفسي ما منتظم ، گلبي يدك حيل
مُلاذ : بعدين تفقد و ما أكدر أمنعك
دحك بـ وجهي عيونه ذبلانه
ينقري بـ نظراته شكد يحتاجني و يريدني يمه
بس ما بقيت عفته و طلعت ،
بـ ألليل أجاني حضن بطني و غفى ...
هتان :-
أتقدم جسار فتح الباب أحس روحي رايحه
خايفه و مرتبكه ، عيني كل شويه تروح على جسار
بَس فرحانه لأن أخواني صالحوني
دخلت البيت متردده ،
أتقدمت لگيت ورد منثور بـ الگاع
رفعت عيني لـ جسار يلي دخل يوخره بـ رجله
جسار : أدخلي
دخلت البيت ، سديت الباب
رفعت عيني دحگتله ، أتقدمنا دخلنا الغرفة
رفعت نظري اله أول ما دخلنا
نزع الستره و القميص درت عيوني منه
لبس ملابس بيت و طلع من الغرفة
جريت نَفس مرتاحه ، دقايق أستغرق مني
گمت أتقدمت وگفت كدام الـمراية
أحاول أفتح السحاب ، ما أكدر أيدي ما تلوح
رفعت عيني لمن أنفتحت الباب ، نزلت أيدي
غمضت عيني منتظرته يطلع
مادري ماريد أعاين لـ وجه ،
حسيت أيده على ظهري فزيت مبتعده
دحگت بـ وجه ، انملت عيوني
هزيت راسي بـ رفض ما أريد يلمسني
هتان : لا الله يخليك
جسار : تعالي
هتان : ما أريد
جسار : تعالي گدامي
هزيت راسي بـ رفض
أتقدم عليه ، اتراجعت بـ خطواتي
انضربت بـ الكنتور الوراي ادحك بـ وجه
هتان : ما أريد جسار ما أريد
حجيتها و بچيت
دحك بـ وجهي ساكت ، رجع عينه على شفتي
رفع عينه يعاين بـ عيوني الممليه دموع
جسار : اسكتي لا تبچين
اريد أحجي ، دارني بسرعه
خلاني كدام المراية دحگتله
فتح سحاب الفستان ، بلعت ريگي ساكته
كل ذرة بـ جسمي ترجف ، خلا أيده على ظهري
عضيت على شفتي و نزلت دموعي
فتحت عيوني لمن سمعت الباب أنسد
دحگتله طلع من الغرفة ،
رحت بسرعه لـ الحمام سبحت و طلعت
جسار : أكلي
هتان : ما أشتهي بـ العافية
جسار : أكلي جاي اگلج
هتان : ما أشتهي
دحك بـ وجهي و حجا بـ عصبية
جسار : اذا گلت أكلي رح تاكلين
فهمتي لو لا ؟ ما عندج مجال لـ العناد
درت وجهي ساكته أريد أروح لـ الغرفة
سحب أيدي و كعدني على القنفه
خلا الأكل كدامي
جسار : أكلي
ما أتحملت نزلت دموعي
يصيح و ينتر بيه ، هاي بعدنا بـ البداية و هيج
هتان : شتريد مني؟
جسار : أريد تعوفين العناد يمي
هتان : ما جاي أعاند ما أشتهي
جسار : تشتهين
سكتت ادحك بـ وجه و عيوني مدمعه
لزم فكي بـ ايده و مسح دموعي
رجفت شفتي ، عاين الها عاگد حواجبه
نزل ايده يمها ، مسح عليها بـ اصبعه
جسار : اشش لا تبچين أسكتي
هتان : ليش هيج تعاملني ؟
لزم شفتي و رجع يمسح عليها
هو واگف و انه كاعده
جسار : اكلي و لا تبچين
سكتت ادحك بـ وجه ما أگدر اكل اظل اتقيء
ما أگدر اضم بچيتي و هو خازرني
بچيت ما أتحملت ، لزم فكي رفع وجهي بـ أيده
خلا أيد الثانية على تجوة القنفه
جسار : رمانه لا تعاندين ما أنصحچ
هتان : انه مو رخيصه ليش اتزوجتني؟
جسار : بـ كيفي طخ بـ بالي
أكو مشكله ؟
اهتز جسمي أبجي و هو وجهه گدام وجهي
عصر شفتي بـ اصابعه ، قدم وجه و باسني بسرعه ظليت موسعه عيوني مصدومه
لزم أيديه بـ أيد وحده ، سرت دموعي على خدي
يمنعني أحركهم و هو يبوسني
أبتعد ووكف على صفحه
رفعت عيني ادحگله و دموعي مستمره تنزل
مسحت شفايفي بـ أيدي و كاتمة صوتي
أخاف أبجي ، رفعت عيني اله لمن حجا
جسار : أرحع الگاج ماكله كل الأكل
عدا هيج ما تحسبين حساب لـ الأسوي
هتان : بست رخيصه
جسار : گلتيها بـ نفسج رخيصة
كل اليجي يگدر يبوسها مو؟
دحگت بـ وجه موسعه عيوني
طلع من يمي و انه أنهاريت
ما چنت متوقعته بـ كلمة هيج يكدر يحرك گلبي
اتندمت لأن قبلت بي ، شلت الاكل ذبيته بالزباله
شيريد يسوي خل يسوي ، دخلت الغرفة
ميته من القهر و روحي مفرفحه من كلماته
رجع بـ الليل شاف الأكل بـ الزباله
اجاني يعاين لـ وجهي خازرني
جسار : أنا مو أيهم و لا باهر
اكرهه ما اكرهه العناد خوش؟
هتان : أريد أرجع يم أيهم
ضحك يدحگلي
هتان : انت مثل سيف كلكم هيج عائلياً؟
متربين نفس التربية القذرة ؟
شلون گدرت أحبك و أنتَ على هاي الهيئه
جسار : الزمي لسانچ
لا تذكرين اسم ذاك الـ ****
هتان : منو سيف؟
جسار : تحبين اطيح حظج لو شنو؟
هتان : نفس الأسلوب بـ الضبط
تدري شغله أنتَ أسوء من سيف
حجيتها و هو أتخبل يشيل روحه و يرگعها
جسار : لا تذكرين اسممممه
هتان : رخيصة و اذا ذكرت اسمه
دحگلي متنرفز و طلع من الغرفه
اول ما طلع ما گدرت اسيطر على روحي
اتمددت و نزلن دموعي ، مكرفصه
و كل جسمي يرجف و أبجي
مُلاذ :-
نزلت من السيارة ، دخلت الـمكتب
أستقبلتني مساعدتي و هي ترَحب بيه
تاره : ست اجا شخص گال هو أبن عمج
و أنا دخلته ينتظرج بـ الـمكتب
مُلاذ : جسار ؟
تاره : ما أعرفه
مُلاذ : تمام حياتي
مشيت ناحية الـمكتب
مُلاذ : هلا بـ عريسنا جسار
دخلت الـمكتب و أنا مبتسمه
گام وگف دار وجه الي ، نزع مناظره
على ثغره أبتسامه واسعه ظاهره أسنانه
أنمت أبتسامتي من وجهي
دحگلي مبتسم
مُلاذ : أسكندر ؟!!!
أسكندر : مع الأسف بس جسار أبن عمج؟
مُلاذ : أنتَ شتسوي هناا؟
أسكندر : أجيت ازورج
رفعت أيدي أشر ع الباب حچيت بـ عصبيه
مُلاذ : أطلع برا!
أسكندر : أسمعي
صيحت بـ صوت عالي
مُلاذ : أطلع برااااا
رفعت تحفية يمي شمرته بيها
وخر بسرعه و ضحك ، أتنرفزت
دخلت تاره مصدومة
اسكندر : أحب حالاتج العصبية هاي
مُلاذ : أطلع برا جاي اگلك حيوووان قذررر
أسكندر : عرفت شغله رح تفيدج
جريته من ملابسه اضرب بي و أطرده و أغلط عليه رفعت عيني فازه لـمن طلع صوت من التلفزيون
دحگتله أبتسم و حجا
أسكندر : لگيت عندج تلفزيون
و أستغليت الفرصة قررت أقدم العرض
على التلفزيون أفضل من التلفون
أنفاسي ترتفع و تنخفض بـ عصبية
دحگت لـ الشاشه هو و هتان كاعدين بـ السيارة
فتح الفيديو و اندار عليها يحاجيها
- عيدي الگلتي مساع ما سمعتچ عدل
هتان : ليش تصور؟
- ذكرى
هتان : تمام
سند راسه ع الكشن مثلها
داير جسمه وجه الها و هتان تدحگله
اسكندر : اي سولفي عيدي
مساع ما أنتبهت لـ كلامج
چنت أفكر بـ غير شي
هتان : شنو أعيد؟
أسكندر : سالفة أبوج و أيهم أخوج
خنگه گلتي ما اعرف ما انتبهت
هتان : هااا
اكلت من اللفه يلي بـ أيدها و حچت
هتان : هو أيهم جان ميت هالرجال يلي يحبه
و نفسيته أبد مو زينه فـ جان واگف
و انه نزلت من الدرج ، دخل بابا من برا
فـ أيهم گله ارجع منين ما أجيت
و بابا يگله بيتي و اجيت اله
أسكندر : أي؟
هتان : بابا گال لـ أيهم لا تخاف
بعد ما قربت منها أيهم گال لـ بابا
انحرك اذا اتدنيت عليها
ما فهمت عليمن يحجون و لحد هسه ما فاهمه
أكلت من اللفه و أسكندر مبتسم بـ الفيديو
يدحگلها كأنُ ربح فد شي
أسكندر : أي كملي
هتان : فـ بابا گال لـ أيهم
شنو ردة فعلها اذا عرفت أنتَ أبن الچتال
و أيهم خنگه بسرعه عائلتنا غريبه مادري ....
وسعت عيوني مصدومة
صفرت أذاني من بعد كلمة "الچتال"
هتان تحجي و تحجي بـ الفيديو
بس ما أسمع شي منها ، غمضت عيوني حيل
أجس تاره سندتني
گعدت ع الكرسي رجليه ما كادره اوگف عليهم
لزمت بـ گصتي و يتكرر بـ أذاني
"شنو ردة فعلها اذا عرفت انت أبن الچتال"
رفعت عيني لـ اسكندر يحجي
غمضت عيوني حيل احاول اركز ويا
حاولت أسيطر على نفسي و حچيت
مُلاذ : أطلع برا
أسكندر : أعرف ما رح تصدگين
و راح تفكرين هنا مسوي شي لـ هتان الفاهيه
دحگتله أريد أحجي و هو قاطعني
أسكندر : دورت أبوها و أنضميت ويا
و هذا الي شفته
رفعت عيني بـ صعوبة لـ الشاشه دحگتلها ،
أبو أيهم بـ أيده سچين و كدامه شخص
و بـ الگاع واحد ينزف ، وسعت عيوني مصدومه دارت الصور ، نَظري يدور وياهم
أبو أيهم طالع من مكان مثل السجن
دار الصور ، طلع فيديو شغله
شخص ملثم مثل الچنت أشوفهم لـمن انخطفت
بلعت ريگي كل جسمي يرجف
اتقدم الـملثم ناحية أبو أيهم الگاعد
على كرسي و يفر بي
- سيدي
نطق أبو أيهم بـ حده فزت مسامعي
- أنطق
- رسلنا السيارة ترمي عليهم
-ماتو؟
- لا بس السيارة أتضررت
-هذا المطلوب خوش شغل
- طبعاً احنا أولاد الچتال
ضحك أبو أيهم بـ صوت عالي
بـ طريقة مشمئزه و ضحكته ترن بـ ارجاء الـمكان
- و النعم
اختنگت اريد اجر النفس ما اكدر
اندار الفيديو و طلع الثاني ،
أبو أيهم واگف بـ عصبيه
- ردت بت ألياس يلي تموووت مو أيمن !!!
- سيدي و الله چانت التريله رايحه عليها
بَس أيمن شارد منا و سامع الحراس يحچون
شارد منهم و دافعها يركض و مندعم
صيح بيهم بـ عصبية
- أغبياااااااء
رفعت عيني لـ أسكندر لمن حجا
أسكندر : يگولون بـ كل شر أكو خير
يمكن من چذبت على هتان الغبيه و أستغليتها
چان شر الكم بَس عرفنا منو چتال أبوج
أنحل اللغز بـ كلمة زايده من هتان
ضحك بـ شماته
ما احس بـ شي و لا اسمع شي
عيوني نار أستقرت بيهم، روحي أنمردت
ما جاي أستوعب أي شي
غير صوت أسكندر يلي يحچي
أسكندر : أبو الأيهم هو الچتال
يلي تدورين عليه من سنين بـ السما
لگيتي بـ الگاع و گدام عينچ ، أبو زوجچ.
رفعت عيني ادحگله مصدومه
جامد الدم بـ عقلي ، كل ذرة بـ جسمي ترجف
عيوني نار مستقره بيها ، صدري مخنوك
منتهيه اخر ذرة أگدر أتنفسها ...
****************
- يتبع الفصل التالي اضغط على ( رواية جرح الأيهم ) اسم الرواية