رواية جرح الأيهم الفصل الثاني و الخمسون 52 - بقلم أيلان
"الجُــرح الثاني و خمسون"
انداريت لـ غاده
لطمت على وجهي احجي بـ حرگه
مُلاذ : ولج اسكندرررر هذا اسكندر
عكدت حواجبها مصدومه
غاده : شنو؟؟
مُلاذ : سيف اسكندر
خليت راسي بين ايديه رجعت دحگت لـ هتان
عقلها فاصل مو وياي ، صافنه و تدمع
مُلاذ : وين طعنتي؟؟
هزيتها اريد تحاجيني ، اشرت على ايدها
زفرت نَفس بـ ايده و لا بالاعضاء يموت و تبتلي
فزيت على صوت صيحة عالي
أيهم : هتاااااااااان
فزت هتان مرعوبه
و انا اسحل بيها اريدها تصعد
مُلاذ : شافج ويا شافج اصعددددي
صعديها غاده
دحگت لـ غاده رجلها مكسوره
اجت امها تركض و تسحب بيها وياي
ما تقبل تهز راسها بـ رفض
هي لحظه و انا اشوف هتان انشالت من كدامي
درت عيني دحگت لـ أيهم خلاها بـ الگاع
و هو فوكاها، يضرب بيها و يصيح
أيهم : ولج ليييييييش هيج سوووويتي بيه
ولج ببيش قصرررررت ويااااج
يحجي بـ حرگه و هي فحطت من البجي ،
تبجي بـ صوت ، غاده تريد تلزمهم ما تكدرلهم
گمت بسرعه اوخر بـ أيهم عنها
هو يصيح و يعاتبها و هي ماتت من البجي
حتى ما تمنعه يضربها
دفعني ما وخرت ضربني على وجهي فقد
يضرب شكو شخص كدامه ، اريد اوخره
دفعني انضرب ظهري بـ محجر الدرج
صيحت متوجعه و وكعت ميته من الوجع
غاده تريد توصل ما تلحك العكازات
گوه تمشي بيهم ركضت عليه أم أيهم
رفعت ايدي وكفتها
مُلاذ : هتان
رجعت تركض عليهم راحت لـ هتان
دحگت الجهال خايفين و صوت ادهم يبجي
و أبيل واكف بـ الزاويه يدحگلنا خايف
دارت وجهها غاده اله و راحتله
ام أيهم لازمه بـ أيهم ، رجعت اريد الزمهم
ما اكدر ظهري موتني انضربت ضربه قويه
دخل باهر من برا يركض ، وسع عيونه على أيهم
باهر : شصاااااير؟
مُلاذ : باهر روح روح الزمه
احجي و مختنكه من ورا الضربه
راح باهر يركض على أيهم لزمه
دفعه أيهم يصيح على هتان
أيهم : ولج كليييييي ثقه بييييج
اگول هتاااااان ما تسوي شي
هتان ما تخون ثقتي بيهاااا هتان معلمها انه
يحجي و يصيح جنزها بـ ايده و باهر يتعارك ويا يريد يشيل أيهم منها و هو حتى باهر ضربه
رجع عينه لـ هتان ، نزلت دموعه و هو فوكاها
بجى و حجا بـ نبرة تبين خيبته و كسرته
أيهم : هتان الگاها طالعتلي وي واحد
و تنزل من سيارته كدام عيني
و منو هذا الواحد اسكندر و فوك كل هذا
الگا صور اختي نايمه بـ حضنه و تطلع ويا
وكف باهر مصدوم يدحك بـ وجه
غاده بـ الزاويه تبجي
و حاضنه راس أبيل لـ رجلها
أيهم : ولج گلييييلي
هسه شنو اليطفييي نار گلبي منج
ولج بـ عمرررري ما فكرت بـ يوم امد ايدي عليج
ولج جنت مخليج بـ عيوني تسوين بيه هيج ليش
بيش قصررررت وياج من شنو حررررمتج ؟
ام أيهم تبجي
و هتان تبجي بـ كل صوتها
أيهم : ليش سويتي هيج ؟
گوه كدرت اتحرك ، رحت ناحيتهم اريد الزمه
دفع ايدي و هو يدحگلها يرجف و يبجي
دموعه غسلت وجه
أيهم : انطيني سبب واحد ، سبب واحد
قصرت وياج ؟ شفتي مني مو زين ؟
ليش سويتي بيه هييييج
أيهم : ما يمر اليوم اذا ما اجي و اشوفج
ما جنت اكل اذا انتِ جوعانه
ما جنت ارتاح اذا لگيتج تبجين
ما تغمضلي عين اذا ردتي شي و ما جبته الج
ولج ليش كسرتي ظهري هالكسرررره ليييييش؟
مُلاذ : أيهم
بجى جسمه يهتز و يدحك بـ وجهها
أيهم : هتان يا بعد اخوج خليني الوم روحي
و لا الومج گليلي انت سويت فلان شي
انت غلطت وياي ، ها هتان؟
يلا لا تخافين گليلي بـ شنو قصرت وياج ها؟
لزم وجهها بـ اثنين ايديه يهزها و يحجي
أيهم : حاجييييني لاااا تسكتين حاجيني
هتان بس صوت الشهگه و دموعها تنزل
وجهها ورم سحب باهر أيهم من فوكاها
كعد بـ الگاع يشهك و يبجي بـ حرگه
هتان وجهها كله دم و مورم
اشرت لـ غاده و عمتي ياخذنها
باهر مصدوم و يدحك بـ وجوهنا
رادن يكومنها و أيهم اتحرك يريد يروحلها
لزم بي باهر صار حاجز بينهم ،
فلتت ايدها من ايد امها
زحفت النا عيونها گوه فاتحتها
و حلگها يصب دم رادت تلزم أيهم
گام بسرعه لزمت بـ رجله تتوسل بي و تبجي
هتان : غلطت أيهم و الله غلطت متندمه أيهم
تحجيها صوتها يرجف و تبجي
نتر رجله من ايدها
أيهم : لا اختي و لا اعرفج و لا تعرفيني
حجاها و طلع و هتان انهارت
اخذنها غاده و امها غسلن الها
و انا لحگت أيهم لگيته كاعد بـ الباب
لام رجليه لـ صدره و يبجي بـ حرگه
اتقدمت كعدت كدامه لزمت وجهه بـ ثنين ايديه
مُلاذ : أيهم أيهم شسويت لـ اسكندر دحگلي
دحك بـ وجهي و احتدت تعابير وجه
گام بسرعه من كدامي
لحگته ظهري مموتني من الوجع
صعد بـ السيارة صعدت ويا ،
فتح الباب و صاح بيه
أيهم : نزليييي
مُلاذ : ما انزل
اتخبل عليه نزلني من السياره و راح بسرعه
طلع باهر من البيت صعد بـ سيارته و لحك أيهم
اختنكت كلش گوه گمت اجر النفس بسبب الضربه
دخلت لـ البيت ، لحگت غاده و هتان
دحگتلهم مخليها بـ الغرفه مال ام أيهم
و كلهم يبجون ، دخلت كعدت بـ الگاع ،
تجيت ظهري ع الكنتور
لميت رجليه لـ صدري ، مديت ايديه فوكاهم
صفنت ادحگلهم ، لمن استقر نَفسي ، گمت
مُلاذ : اريد احاجي هتان
دحگوا بـ وجهي
هزت راسها ام أيهم و غاده بـ قبول
عافني و طلعن ، اتقدمت كعدت يم هتان
مُلاذ : رح تجاوبيني على كل شي؟ تكدرين؟
هزت راسها بـ قبول
بلعت ريگي و حجيت
مُلاذ : سيف
فز جسمها و بجت
مُلاذ : منين عرفتي؟
هتان : على النت
مُلاذ : هو دزلج ؟
هزت راسها بـ قبول
مُلاذ : شلون بدت علاقتكم
شلون قنعج تلتقون؟
هتان : عرف كُليتي و جنت مخليه صورتي
بـ يوم طلعت لگيته كدام القسم
مُلاذ : جان مراويج شكله؟
هتان : اي
مُلاذ : شلون جان تعامله وياج؟
هتان : يشرب ، يغلط ، يصيح ، يفشر
خليت ايدي على كصتي و زفرت نَفس
مُلاذ : ليش ما انفصلتي عنه اذا جان هيج؟
هتان : انفصلت بس بجى و اتوسل نبقى
رجعت ويا و بعدين ... رجعت انفصلت
مُلاذ : بجى؟
هتان : اي
نزلت دموعها و حجت
هتان : محد حبني لـ درجة يبجي عليه
ظنيت يحبني بس ما يتحكم بـ نفسه
مُلاذ : گلتي لـ احد عنه؟
هتان : لا
مُلاذ : ليش ؟
هتان : ما قبل
مُلاذ : اخير شي لمن لگيناج بـ المستشفى ...
بلعت ريگي ساكته ، ارتفع صدري و انخفض
عرگت ، شلون رح اسألها هيج سؤال
مُلاذ : شسوالج؟
بجت و تشهك جسمها يهتز
گالت و هي تشهك و جسمها يهتز
هتان : اغتصبني
ضربت وجهي بـ اثنين ايديه
تمنيت ما تجاوبني هذا الجواب
عصرت كصتي بـ اثنين ايديه و زاد بجيها
سحبتها لـ يمي خليت راسها على صدري
و هي تبجي بـ حرگه ، ظلت هيج
دخلن غاده و امها كعدن كدامنا
لحد ما هدأت دحگتلها بدت تغفى لمن غفت تماماً گمت من يمها اخذت جنطتي و طلعت من الغرفة لگيت باهر كاعد و عيونه مورمه
مُلاذ : وين أيهم ؟
باهر : وديته لـ بيتكم
مُلاذ : وديته؟
باهر : علك ضغطه و طك خشمه دم
هزيت راسي بـ قبول اخذت أبيل و طلعت
اتقدمت ، صعدت أبيل لـ ورا و صعدت انا
رحت لـ البيت ، دخل أبيل و راح لـ غرفته هادء
دخلت الصاله لگيت أيهم كاعد ع القنفه
و مغمض عيونه ، خليت جنطتي ع الميز
اتقدمت لـ يمه لگيت كصته تصب عرك
مسحت كصته بـ ايدي ،
فز فتح عينه و لزم ايدي
ضغطها بـ ايده حيل بلعت ريكي ساكته
لحد ما ركز بـ وجهي نتر ايدي ، عفته
رحت لـ المطبخ اخذت كلاص مي و حبايه
رجعت اله اتقدمت انطيتهيا ، دحك بـ وجهي
أيهم : جنتِ تعرفين !
سكتت ادحك بـ وجه كام وكف كدامي ،
عيونه نار استقرت بيهن من العصبيه
أيهم : جنتِ تعرفين كل شي
و من البدايه و سكتتي !
مُلاذ : أيهم
رفع ايده ضرب الكلاص يلي بـ ايدي
دحگتله طاح بـ الكاع و صار طشار
صاح بـ وجهي
أيهم : شنو أيهم ؟؟؟
تعرفييييين من البدايه و ما حجيتي الي
ما اجيتي و گلتيلي ، عاينتي بـ نص عيني
و انتِ تعرفين كل الجاي تسوي و ما حجيتي
مُلاذ : ما جنت اعرف
أيهم : تعرفين
مُلاذ : ما اعرف
أيهم : تعرفين و كلش زين تعرفين
رفعت راسي و صيحت
مُلاذ : مااااا اعرررف و لو اعرف ما رح اگلك هم
لان انت و احنا نعرفك كلش زين شراح تسوي
و مثل سوااااايتك اليوم بـ الضبط و أكثر
درت وجهي اريد اروح و هو صيح
أيهم : صحيح جان لازم احط رجل على رجل
و انا اشوف ابن عممممج الـ****
منوم اختي على صدره و مصعدها بـ سيارته
درت وجهي دحگتله
مُلاذ : محد گلك تسكت !
جنت تكدر تفتهم منها
أيهم : بعدج بـ كل صلافة عين تدافعين
بعدج ما قابله ، فوك ماااا ضميتي عليه
بعدج تحجين !
مُلاذ : ضميت عنك ضميت
تريدني انكر و اگلك لا ؟؟ ما لمتك و لا رح الومك
بس ما جان اكو داعي حتى تضربها و تأذيها !
أيهم : اصفك الها ؟ اگللها زين سويتي
خوش رحتي ***** عفيه عليج ظلي هيج
هذا الجان لازم اگوله مو ؟
دحگت بـ وجه ساكته درت وجهي اريد اروح
لزم ايدي و هو يصيح
أيهم : وين ؟؟ وين رايحه ،
رح تحجين كل شي من البداااايه
مُلاذ : اسكندر شسويتله؟
رجع يصيح "لا تنطقين اسمه"
كسر الغراض و يدفر شكو شي كدامه
يشيل بـ روحه و يركعها بـ الگاع من العصبيه
رجع يصيح "انه بـ شنو قصرت وياها؟"
و هو يحجي طخ الجامه مال شباك بـ قوه
بلا قصد منه ، لان واكف يمها اتكسرت بـ ايده
اندار دحگلي ماكدر يسكت و بجى
أيهم : بيييش قصرت وياها حتى تسوي بيه هيج
نزلت دموعه ، يحجي بـ حرگة گلب
أيهم : من الصبح صافن لحد هسه
اريد اعرف شلون كدرت تسوي بيه هيج
ولج و الله جنت اعتبرها بنتي
و الله اخاف عليها من الهوه لو خنكها
و الله ما اتحمل دموعها اذا بچت
أيهم : گلبي ينلچم عليها
هي الوحيده النقيه بـ حياتي كل شي سويت علمودها كل شي سويت ليش
حتى هي كسرت ظهري و حرگت روحي
أيهم : اضربها و اتمنى اكسر ايدي
لان جاي تنمد عليها
و اتذكر الصور الروانياهن هذاك الـ ****
اتقدمت عليه حضنت رگبته ساكته
خلا راسه على كتفي و يبجي ، متت من القهر
بعد ما متخطي لا موت اخو و لا مرضي
و اجت سالفه اسوء منهن ثنينهن دمرته دمار
ينتفض بين ايديه و هو حاضنني
رفعت وجه بـ ايدي مسحت دموعه و ايده تنزف
اخذت كلنس موجود على الطاوله خليته فوك ايده
لزمت بـ وجه بـ اثنين ايديه و حچيت
مُلاذ : أيهم هتان ما تفهم و الله ما تفهم
غلطانه هيَ و حيل غلطانه
بس و الله اسكندر خادعها
ما تعرف بي اسكندر اصلاً مجذب عليها
و گايللها اجي و اخطبج و جابرها تطلع ويا
مُلاذ : هتان ما تعرف اسكندر كذب عليها
گايللها اسمي سيف منطيها معلومات
غير عن معلوماته تماماً مخليها تصدكه
بـ فترة هي جانت تحتاج شخص واحد تتمسك بي و اسكندر استغل الفرصه !
سحبته يكعد ع القنفه و احجي
مُلاذ : هتان غلطت بس كل الصار بسبب اسكندر
و الصور يلي مراويهن الك ...
بلعت ريگي ساكته و هو نتر ايده مني و گام
مُلاذ : هتان ما تسويها أيهم
ضحك بـ استهزاء
سحب سويجه من القنفه و طلع من البيت
خليت راسي بين ايديه و صفنت
هالمره هاي هم الوم روحي؟ طبعاً
لان لو ما انا موجوده بـ حياتهم
اسكندر ما جان رح يتعرض الهم
طلعت كعدت بـ البلكونه مكان ظهري لسا يوجعني
و صدري مختنك غادي نار مشعوله بـ داخلي
نور :-
دحگت بـ وجه اركان و لالي ترجف
اتقدم اركان ناحيتنا عيونه يتجادحن
اركان : شگلتي؟
لالي رجفت تبجي و عيونها مغوركه
اركان : عيدي الگلتي
هزت راسها بـ رفض تبجي
و انا رجليه ماتن اريد اوصلها و اوكف كدامها
لان اركان يتقدم عليها لحد ما صار كدامها
نظراته و نبرة صوته خوفتني يأذي لالي
بلا قصد منه
اركان : لااااالي
فزت تبجي و انا جريتها وراي
اتقدم عليه اركان عيونه مفتوحات على كبرهم
اركان : وخري من كدامي نور
جر لالي من وراي يدحك بـ وجهها و يحجي
اركان : جاوبييييني لارا شبيها ؟
عيدي الگلتي عيدي الحجيتي كله !
لالي : ابو .... ابوي
تحجي و تبجي
هزها اركان بـ ايديه و صاح بيها حتى تحجي
لالي : ابوي مغتصب لارا
تحجيها و ترجف و اركان موسع عيونه
اركان : شتـ... شتحجين انتِ؟
غطت وجهها تبجي و اركان صاح بيها
اركان : منو گاااال من شوكت تعرفين!
لالي : لارا ... جانت عدها اوراق هواي كاتبتهم
لگيتهم و قريتهم و بـ أخير ورقة كاتبه عن الصارلها بـ اخر يوم قبل لـ ... لا تموت
اتصنم اركان بـ مكانه يدحك بـ وجه لالي
گاللها تجيبهم گوه يحجي اتدنيت عليه
دحك بـ وجهي و انا عيوني تصب دموع
اجت لالي دموعها على خدها ،
خلت الاوراق بـ ايد اركان ، اخذهن ايده ترجف
يفتح الورقة و يقراها و يدمع كلهم لارا كاتبتهم
سند ظهره ع الحايط ما يكدر يوكف و دموعه تنزل
كعد بـ الگاع يقرا بـ الاوراق و دموعه تنزل بلا صوت
نزلت عيني لـ لالي الكعدت يمه و بجت
اجت ام اركان تدحگلهم مستغربه
- شكو !
ساكتين ثنينهم و يبجون
اخذت ايدها و طلعت من المطبخ
گلتلها لاگين اوراق لارا كاتبتهن
و يبجون عليهن ما گلتلها على المسوي زوجها
بجت مقهوره و تلوب لمن ذكرت بنتها راحت يمهم
اتقدمت دخلت المطبخ اركان بـ ايده ورقة و صافن
عفس الورقة بـ جف ايده و گام بسرعه
دحگت بـ وجهه ، عبرني و طلع بسرعه
طلعت لالي تركض و تبجي تريد توكفه
و انا اركض ورا بس هو طلع بسرعه
نور : ابوووج بـ السجن ما يسوي شي
ان شاء الله ما يسوي شي !
لالي : اذا اعرف اركان ولو شووويه
يروح و يكتل واحد و يدخل السجن
بس حتى يروح للسجن يلي بي ابوي و ينتقم منه انا اعرف اركان و يسويها و اذا ما يكتل احد
يروح زيارة ابوي بـ السجن و يكتله بـ اي طريقة
هزيت راسي بـ رفض مستحيل
مستحيل يكون اركان بـ هاي العصبيه و الحقد
مستحيل توصل بي لـ درجة يحاول يقتل ابو
بس چان يحب لارا اكثر من كل شي !
يسوي كل شي علمود لارا ، دحگت بـ وجهها
كممت حلگي و بجيت شسوي هسه انا ؟؟
شلون اوكفه و شلون اهدي ،
راحت لالي تركض دخلت لـ البيت ، لحگتها
دخلت المطبخ دحگت ام اركان بـ ايدها اوراق لارا
دحگت لـ لالي دخلت غرفتها ركضت وراها بسرعه
نور : شراح نسوي؟؟
لالي : ما اعرف ما اعرف
وكفت تفتر بـ غرفتها تروح و ترجع
لالي : اركان يموته ما يخلي عايش يموته
رفعت عينها دحگتلي
راحت لـ تلفونها اخذته بسرعه
وكفت تدور ما اعرف شنو بـ تلفونها
شويه و خلته على اذنها تخابر
نور : عليمن تخابرين ؟؟
لالي : ضرغام
كرضت شفتها تروح و ترجع
لحد ما گالت
لالي : الو
سكتت لحظات و گالت
لالي : عوف هالموضوع ساعدني
اشرت الها تفتح حاكيه ، فتحت
ضرغام : شكو شصاير ؟؟
لالي : اركان راح يأذي ابوي
ضرغام : بس صلِ على محمد
منين يأذي ابوج و ابوج بالسجن
سجن هو لو لعب چعاب ؟
لالي : ضرغاام
ضرغام : أمري
لالي : اركان عرف بـ سالفة المفروض ما يعرفها
ابوي اذى اختي الجبيره بيها ، اركان يحبها
اكثر من كلشي و عرف بسبب هالسالفه اختي ماتت ، ما رح يخلي ابوي عايش ،
ما كدرنا نطلع ورا ساعدني
ضرغام : شوكت طلع ؟
بجت ما تكدر تحجي
ضرغام : لالي ... لالي اهدي و حاجيني
بلعت ريگها تهدي بـ روحها و حجت
لالي : هستوه طلع
ضرغام : تمام راح اشوفه قريب من بيتكم انا
لا تخافين ما يصير شي ما اخلي يسوي شي
لا تبجين ما يكدر يوصل لـ ابوج
لالي : حباب شوفه و امنعه
ضرغام : تأمرين
نزلت التلفون و سدت الاتصال
دحگت بـ وجهي ، اتقدمت عليها حضنتها
طلعنا شفنا امها مقهوره و تبجي و تقرا بالاوراق
اخذتهن منها و اخذنا امها غسلنا الها
كعدنا بـ الصاله ننتظر ،
و احنا كاعدين اجت مكالمة لـ لالي
انسدت بسرعه رفعت راسها دحگتلي
لالي : اركان
ركضت بسرعة لبست شالها
طلعنا بسرعه لـ الباب فتحناها
صفت سيارة ضرغام ، سديت الباب بـ هدوء
لالي : ليش؟؟
نور : شمدرينا احنا همَ جايين ؟
خل يدكون الباب
لالي : صح
سمعت صوت صياح اركان
و ضرغام يصيح عليه ، اندكت الباب
فتحتها بسرعه دفع ضرغام اركان
لـ داخل البيت مكلبش ايديه ، وسعت عيوني
رجعت عيني على اركان لمن صيح
اركان : ضرغام وحق الله احترمك
لا تخليني اتعامل وياك غير شكل
ضرغام : و حق الله التحلف بي اخطي منا
اذا ما ابيتك بالسجن ما اتسمى ضرغام
رفع حاجبه اركان و اتقدم بسرعه
رفع رجله يريد يدفر ضرغام ، لزم رجله ضرغام
و وكعه بـ الگاع فشر عليه اركان و انا و لالي
و ام اركان مصطكات صيحت ام اركان
تركض على اركان
ضرغام : خاله عوفي
اركان : ابن الـ **** زلمة انت افتح ايديه
ضرغام : لسانك زفر و ما واعي على نفسك
من تفتهم شتحجي احطك و اكتلك كتلة معدله
و هو يحجي ، اركان مدله رجل و دفر رجله
وكع ضرغام على وجه ، كام بسرعه
اشرلي افتح الباب ، فتحت بدون صوت
اتخبلوا ، يحطني و يكتلني بدال ضرغام
ما يشوف شي كدامه طلع بسرعه من البيت
ضرغام كام يركض ورا دحگتلهم من الباب
اركان ايديه مكلبشه و يركض
و ضرغام لازم السلاح و يصيح
ضرغام : و العباس ارميك و اكسر رجلك
التفتت اركان و هو يركض صيح
اركان : انت زلمة ارمي
رفع ايده ضرغام و رمى بـ الشارع
دنك اركان بسرعه و سب ضرغام
لطمت ام اركان على خدها مصدومه
نور : دخيلك يا ربي يمه راح يتكاتلون
سودة بـ وجهي لو ما سائلتج عزه العزاني
لالي : يمه لو ما مخابرته هذا عنده سلاااح
ابتعدوا كلش و احنا مادين راسنا من الباب
و المنطقة اتجمهرت كدام البيبان
ردت ادخل ، شفت ضرغام جاي من بعيد
لازم بـ ياخة اركان و يمشي اركان كدامه
اركان مبين من حركة حلگه
و عگدة حواجبه يفشر على ضرغام
وصلوا لـ يمنا دحگولنا ثنينهم و گالو بـ نفس النبرة
- امشن طبن
دحك اركان لـ ضرغام بـ طرف عينه
اركان : شعليك انت دور وجهك منهن لا افكس عيونك و انتن طبن جوه انا خل اطيح حظ هالخايس و اعرف شسوي و بعدين اجيكم
ضرغام : اريد اشوف تطيح حظمن
اذا ما انيمك بالسجن شهر ما اتسمى ضرغام
اركان : يسمونك صخام مو ضرغام
ضرغام : حرام بيك يسموك اركان
لو مسميك على اسم چلب مال حراسه
هواي احسن من هذا اسمك
اركان : ماكو غيرك چلب
دفعه ضرغام صعده بـ السياره
سد الباب عليه و قفلها
ضرغام : خل اودي هذا للسجن
معليكم بعدين يطلع من تخف جلابيته
ساد الشباك على اركان
و اركان يضرب الشباك كلات يريد يحجي
و هذا خانكه مكلبش ايديه و ساد السياره عليه
حجا بـ صوت عالي حتى يسمعه ضرغام
اركان : خاااايس اكص لسانك
لا تحاجيهم طايح الحظ تعال اصعد
تعال خل اراويك شلون تحاجيهم
اندار اله ضرغام خلا اصبعه على حلگه
ضرغام : اش لك
اركان : و اشاشه التأش نابك اصعد انا اعلمك
نوب جنت اوصيك عليهم طايح الحظ افكس عينك
راح ضرغام صعد بـ السياره
تكافخوا و انا حاصرتني الضحكه
اندار اركان خزرنا سدينا الباب و دخلنا بسرعه
مُلاذ :-
ظهري رحت عليه لـ دكتورة و انطتني علاج
من بعد هاليوم السيء مر يومين
أيهم ما اجا لـ البيت و لا شفته
باهر ما يحاجي غاده عرف بيها جانت تدري
هتان وضعها ميؤس منه حتى ما تحجي
و السبب بـ كل هذا اسكندر الحيوان
اجاني جسار لـ المكتب ، اتقدم كعد كدامي
مُلاذ : شتريد اجيبلك كهوه ؟ عصير ؟ چاي؟
جسار : و لا شي
مُلاذ : خوش هسه اجيب الك و لا شي
دحگلي ساكت عكدت حواجبي
مُلاذ : شبي هذا يخوزر احجي عزيزي احجي
جسار : مُلاذ ماكو غيرج احد احاجي
مُلاذ : شكو؟
جسار : هتان
مُلاذ : شبيها؟
فرك وجهه ، قدم ظهره و شبك اصابيعه
دحك بـ وجهي و حجا
جسار : هتان جاي تروح لـ طريق مو طريقها
رفعت حواجبي مستغربه
مُلاذ : شمدريك؟
جسار : لـمن رجعنا من الهند
فزيت على صوت فتحة الباب
حتى سلطان فز وياي بس رجع غفى ،
الكل نايمين منو يطلع؟ گمت طلعت
لگيت الباب مسدود فتحته و طلعت
فرك وجهه و كمل بـ عصبية
جسار : لكيتها تمشي و صعدت ويا واحد
و اتقرب يبوسها مُلاذ هذا الشخص راح يأذيها
انا متأكد الما يخاف عليها من الحرام
ما رح يخاف عليها من الاذيه ، رح يأذيها حذ...
قاطعته قبل لا يكمل
مُلاذ : آذاها
عكد حواجبه يدحك بـ وجهي
جسار : شنو؟
مُلاذ : آذاها هالشخص
ضرب على رجله بـ عصبيه
رفع ايده خلاها ورا راسه كام وكف
جسار : گلتلهاااا حذرتهاااا ، شسوالها؟؟؟
دحگيلي مُلاذ شسوالها ؟
مُلاذ : انت ما شفت شكله؟
هز راسه بـ رفض
جسار : لا جنت واكف ورا السياره و بعيد
بس شفت من دنى وجه و باس خدها
حجيت بـ عصبيه
مُلاذ : ليش سكتت
ليش ما گلتلي من البدااايه!
جسار : شنو انتِ ما تعرفين؟
مُلاذ : محد يعرف جسار محدد
لو جاي و محاجيني جان كل هذا ما صار
جسار : شصااار شسوالها حاجيني مُلاذ !
مُلاذ : اكعد
جسار : ما اريد اكعد احجي
مُلاذ : اكعد جسار
اذا احجيلك هسه تنجلط و توكع
اتقدم جر الكرسي و كعد
جسار : احجي
مُلاذ : الي التقت بي
جسار : شبي؟
مُلاذ : اسكندر
وسع عيونه يدحك بـ وجهي
جسار : شنو؟ عيدي يمكن سمعت غلط
مُلاذ : صحيح السمعته
جسار : اسكندر؟ يا اسكندر؟
مُلاذ : يا اسكندر الطركاعه السوده ابن عمنا
جسار : اوكفيلي لا اتخبل
يعني الـ**** الشفته ذاك اليوم وياها اسكندر؟
مُلاذ : اي
سحب ياخة تشيرته من يم رگبته
رفع راسه و حجا يلوب
جسار : دخيلك يا ابو الحسنين لا اتخبل
نزل راسه دحگلي
جسار : مُلاذ حاجيني عدل
تفتهمين شجاي احجي هتان جاي اگلج
مو اسكندر معليج بـ اسكندر موضوعنا هتان
مُلاذ : جسار لا تخبلني
الالتقت بي هتان هو اسكندر
جسار : ولج لا تخبلييييني
عافت البشر كلها راحت حبت اسكندر
مُلاذ : اوكف مو هيج
حطيت ايدي على كصتي بـ حيره
هسه هذا شلون افهمه بالله
مُلاذ : دحك اسكندر مجذب عليها و دازلها
و گايللها اسمي سيف و مخليها تتعرف عليه
بعدين رايح لـ كُليتها و ظال يجبرها يلتقون
جسار : ولج شنوووو مجذب عليها
ما تعرف اسكندر هي ؟؟؟؟
مُلاذ : مااا تعرفه منين تعرفه ؟؟
لزم راسه بـ اثنين ايديه
جسار : شلون عرفتي منين عرفتي
مُلاذ : اسكندر اذى هتان
جسار : شسوالها؟
سكتت ادحگله
جسار : احجي شسوالها؟؟؟
ما جاوبت صاح بيه
جسار : احجي شسوووالها؟؟؟
مُلاذ : ما اكدر احجي جسار
جسار : شنو ما تكدرين تحجين ؟؟؟
مُلاذ : لا تضغط عليه الله يخليك
روحي جاي تحترك كل ما اتذكر
و اصلاً ما ناسيه
جسار : ولج بابا بس فهميني
بس حاجيني شسوا الها
لا تخبليني لا تشلعين گلبي
مُلاذ : عده صورها مهددها و مخليها تطلع ويا
جسار : اي ؟
مُلاذ : اي هو هذا الـ اي ؟
جسار : مُلاذ لا تخبليني احجي الصدك
مُلاذ : شحجي الصدك هذا الصدك؟؟
جسار : مسويلها شي اسوء مو؟
اسكندر **** و انا اعرفه
دحگتله ساكته
رفعت تلفوني و خابرت على غاده
غاده : الو
مُلاذ : ها غاده
غاده : هلو مُلاذ
مُلاذ : شلون صرتي؟
غاده : زينه اريد افتح هاي من رجلي موتتني
مُلاذ : عوفيها شكم يوم لا تلحين وياها
غاده : هو عايفتها
مُلاذ : هتان شلونها؟
غاده : صعدت فوك و ما كدرت اصعد اشوفها
مُلاذ : تمام هسه اجي انا اشوفها
غاده : تمام
نزلت تلفوني و سديت الاتصال
اخذت جنطتي من على الطاولة
حجيت وي مساعدتي
مُلاذ : تاره انا رح اطلع و ما ارجع اقفلي المكتب
تاره : تمام
مُلاذ : تريدين اجيبلج شي وياي ؟
تاره : لا ست شكراً ما تقصرين
مُلاذ : اذا ردتي شي خابريني
تاره : تمام
جسار : وين رايحه؟
مُلاذ : لـ هتان
كام وكف و اخذ سويجه
مُلاذ : انت وين؟
حجا يقلد عليه
جسار : لـ هتان
مُلاذ : شتسوي يم هتااان
جسار : اروح اشعل ابوها
بعدني اريد احجي و عافني و طلع
دحگت ورا و طلعت اركض ، فتحت سيارتي
فتح الباب و صعد رحت صعدت بـ الصدر
ظل يسألني و اجاوبه گلتله عن ضرب أيهم الها
اتخبل يغلط على أيهم شلون يضربها ، قاطعته
مُلاذ : تنتظرني بـ السيارة و ما تنزل
و لا تحجي و لا تفتح حلكك
جسار : عافت كل البشررر راحت على اسكندر
لج بابا هاي البنيه شنو اكو بـ راسها؟؟
عقلها شلون يشتغل ؟؟ خاف من ولدتها امها
جروها من راسها حيل و انقسم عقلها؟
مُلاذ : اگلك البنيه اخوها ميت و نفسيتها متدمره
اذا واحد ينطيها ورده يضحك عليها تفرح
و نوب حضرة جنابك زدتها
جسار : شسووويت انا؟؟ شسويت ؟؟
مُلاذ : تحبك و رفضتها و كل ما تحاجيني
تگلي هتان لو حاضرتك لو متعارك انت وياها
جسار : ما تحبني
مُلاذ : جسار قسماً بـ الله غثيتني
منو الجايه و گايله الك تحبك شبيك انت!!!
جسار : هي تگول ما احبك جان اعجاب
مُلاذ : و انت صدگت گبل صدگت
جسار : طبعاً اصدك اذا اخابرها
تگلي سيف الـ ***** رح يخطبني و نتزوج
الزك بيها شسوي حاجيني ؟؟
مُلاذ : اگلك الصار صار البنيه هسه ندمانه
و أيهم مستحيل رح يحاجيها بعد
جسار : ما مقصر وياها هو هي غلطت ويا
بس مهما غلطت تبقى اخته و لازم يحتويها
أيهم هم ما يعرف يتصرف
مُلاذ : صارله يومين ما ادري وينه
حتى اذا اخابره ما يجاوبني
جسار : ليش دقيقة ليش ما يجاوبج؟
مُلاذ : عرف انا جنت اعرف و تعاركنا
جسار : مو تگولين مااا اعرف؟
مُلاذ : بعدين عرفت
جسار : غلطانه لو ما غلطانه
جان طيحت حظه شنو ما يحاجيج ! و يتزعل
مُلاذ : جسااار انت مو هم ضميت و غلطت
اسكت عني مو حتى انت النوب
دحگلي ساكت لمن وصلنا لـ البيت ،
أشرت لـ جسار ما ينزل
دكيت باب البيت ، طلعتلي غاده گوه تمشي
مُلاذ : چا وين ام أيهم؟
غاده : باهر اخذها وراح كعدت ميته من وجع راسها و تبجي و تخابر لـ أيهم ما يجاوب
هزيت راسي ساكته
مُلاذ : خل اشوف هتان و اجيج
هزت راسها بـ قبول صعدت اشوف هتان
دگيت باب الغرفة ، ما جاوبتني
فتحت الباب مديت راسي لگيتها نايمه
اتقدمت لـ يمها ، مغطيه وجهها بـ الغطى
ظنيتها كاعده ، كعدت ع الجرباية يمها
دحگت مخليه دفتر يمها ، اخذته
فتحت اول صفحه ابتسمت كاتبه
"كل اليصير وياي بـ هذا الدفتر"
درت الورقة دحگت بادية تكتب من 2014
الدفتر چبير و كاتبه بي هواي اشياء
رجعت عيني عليها و ابتسمت
مُلاذ : حلو انُ تكتبين كل شي يصير بـ حياتج
ما جاوبتني ، ابتسمت و گلت
مُلاذ : اذا تريدين سولفيلي هم تگدرين
يعني مو بس تكتبين ، تكدرين تسولفين الي هم
ما جاوبتني سكتت عنها
وخرت الغطى عن وجهها حسيتها رح تختنك
دحگت لگيتها نايمه ، وجهها احمر
گصتها عرگانه ، مسحت العرك من كصتها
اتلمستها وجهها بي حراره اتلمست رگبتها
رجعت اتلمس ايديها اتأكد مصخنه
لو لان مغطيه وجهها احترت
حسيت شي صار بـ ايدي ،
وخرتها من تحت الغطى دحگت لـ ايدي كلها دم
وسعت عيوني مصدومه ، اريد انطق ما اكدر
ايديه صارت ترجف وخرت الغطى مصدومه
دحگت لـ ايدين هتان تجري دم رفعت عيني
لـ الموس يلي يمها اختنكت صوتي راح
اريد اصيح اريد انطق ما اكدر صوتي اختنك
گوه گدرت انطق
مُلاذ : هتـ.... هتااااان
صحت بـ صوت عالي كل جسمي يرجف
على صوتي غاده كامت تصيح
غاده : شكوووو؟
غاده :-
اريد احس بـ نفس امشي ما اكدر بعد
رجلي شلعت گلبي و اسمع صوت صياح مُلاذ
من فوك ما اكدر اصعد بس اصعد اتكسر زايد
غاده : ولج مُلاذ جاااااوبيني شكوووو؟
طلعتلي تركض و تصيح
مُلاذ : غاااااده هتان هتااان
غاده : ولج شبيهاااا حاجيني
رجليه بعد ما اكدر اوكف عليهن احجي
مُلاذ : هتان مجرررحه ايديها بـ المووس
حجتها و تقيئت و انا اتخبلت
اريد ادوس على رجلي و اصعد
ما اكدر و اصيح بـ علو صوتي اتخبلت
و مُلاذ فقدت ما ادري وين راحت
اسمع بس صوتها شحطانه و تكح
بجيت متخبله ، شمرت العكازات كعدت بـ الگاع
فتحت الجبيره من رجلي و ابجي
اصيح لـ مُلاذ ما تجاوبني ، روحي احترگت
گوه نزعت الجبيره انشلع گلبي رفعت راسي
لمن مُلاذ صاحت عليه
مُلاذ : صيحي لـ جسـ...
تريد تكمل و ما تكدر بعد رجعت تتقيء
جريت شالي من القنفه
رحت اعرج وكعت على وجهي
رجلي موتتني من الوجع ، بچيت
مسحت وجهي بـ شداشتي ،
لزمت بـ الحايط و گمت ، اريد بس اوصل الباب
گوه وصلت يمها و فتحتها ، صحت على جسار
واكف كدام السياره
غاده : جساااار الحك جسااااار
دحگلي مصدوم ، فز و اجاني يركض
جسار : شكو شبيج شكووو؟
غاده : هتان مجرحه ايديها بـ الموس
و مُلاذ فوووك تتقيء ، الله يخلـ ...
بعدني احجي و راح يركض لـ داخل البيت
كعدت ورا الباب رجلي تصل عليه
و دموعي تنزل على خدي
غاده : ياربي دخيل اسمك
و الله تعبت و الله تعبت ، ساعدنا يا ربي
ادعي و ابجي ، رجلي منتهيه من الوجع
طولوا جوا و ما اكدر اتحرك بس اتحرك اوكع
شويه و دحگتلهم طلع جسار يركض شايل هتان
و مُلاذ وجهها و شالها مبلل و تركض وراهم
بجيت و حجيت
غاده : هتان
دحگتلي مُلاذ بـ الگاع ، صاحت لـ جسار
مُلاذ : خل ادخل غاده و اجي بسرعه
ركض جسار خلا هتان بـ السياره
و اجوني هو و مُلاذ و انا ابجي بـ كل صوتي
غاده : عووفوني روحولها لحكو عليهااا
دخلوني كعدوني ع القنفه و طلعوا يركضون
غطيت وجهي بـ اثنين ايديه جسمي يهتز و ابجي
اسمع صوت أدهم يبجي ماكدر اگوم و اروح اله
غطيت وجهي ميته من القهر و ابجي ،
مسحت دموعي اناشغ شلت عكازاتي و رحت اله
گوه امشي احس رجلي ميته و كل بالي وياهم
كعدت يمه اسكت بي و ابجي ، لحد ما سكت
مُلاذ :-
راس هتان بـ حضني و روحي ممروده
صافنه عليها ، حضنتها لـ صدري
جسار وكفوه السيطره ما يخلو يعبر
- ليش طالع
جسار : يمعووود هسه وكتك
ما تشوف البنيه بالورا راح تموت
يحجي اعصابه محترگه ادحگله عيونه مدمعه
وجهه احمر ، اشر اله الشرطي يعبر
و هو بسرعه عبر وصلنا لـ يم المستشفى ،
نزل يركض شالها من حضني
ركض بيها لـ داخل المستشفى
اريد انزل من السيارة رجلي ما اكدر احركها
روحي شايطه تعبانه تعبانه اذا احرك ايدي اتعب شلون طلعت برا السيارة و شلون دخلت المستشفى ما ادري ، رجلي گوه ادوس عليها
درت عيني ادور على جسار ما لگيته
اتقدمت لـ يم الحايط كعدت بـ الگاع
رجليه ما اكدر اوكف عليها ، كل جسمي يرجف
اعاتب روحي بـ داخلي اتمنى اصيح
و اضرب شكو شي كدامي
اتمنى اروح و اطلع روحه لـ اسكندر
اجتاحتني نوبه من الغضب
بس كاعده بـ مكاني ما كمت و لا تحركت
رفعت عيني لمن شفت مره جبيره كعدت يمي
دحگتلي ، دارت مي بـ ايدها و غسلت وجهي
- اهدي يمه اهدي شجاچ هيج ترجفين
لزمت بـ ايديه بين ايديها توكف رجفتهم
نزلت راسي ادحك ايديه بين ايديها و ما يثبتن
- دخيلچ يمه شجاچ منو عدج هنا انتِ؟؟
ما جاوبتها بقيت ساكته
و هي لازمه بـ اثنين ايديه و تمسح على وجهي
- اجيبلج شي ؟؟ شتريدين ؟
دارت وجهها صاحت لـ واحد
- ولك مرتضى تعال
درت عيني اجا واحد اتجاهنا
- ها يمه گولي
- اوكف ولك
دنكت الي تحاجيني
- شتريدين؟
مُلاذ : اريد ابچي
احجي و احس روحي مخنوكه
دحگت بـ وجهي رافعه حواجبها
نزلت ايديه من ايديها و رجعتهم على ركبي
كاعده بـ الكاع و هي على الكرسي يلي يمي
دنتني عليها اخذت راسي خلته على رجلها
- روح مرتضى هالبت مظلومة بخت مثلي
هز راسه بـ اسف الولد و راح
و انا جسمي بعده يرجف ، ما اكدر اثبت روحي
- ابچي حبيبة ابچي البچي يريح الگلب
لا تستحين مستشفى هاي مكان الوجع و الدموع
و انا راسي على رجلها ،
هزيت راسي بـ رفض
مُلاذ : ما اكدر ابچي
- ليش ؟
رفعت اكتافي بـ عدم معرفه
مسحت على راسي و حجيت
مُلاذ : دموعي ما تنزل و لا غصتي تطلع
- سوده بـ وجهي يا يمه ولج يمه اجبري روحج
مُلاذ : ما يفيد من عمري عشر سنين ما باجية
احجي و جسمي لساته يرجف
عقلي احسه مو وياي عقلي ما يستوعب
احس عقلي ثگيل كلش كأنُ صخره بـ راسي
- يا يمه سوده بـ وجهي
اثاري البخت ظالمج أكثر مني يا معزوزة العين
صوتها و حجيها مثل صوت بيبي
لمساتها و حنانها بـ الكلام مثل بيبي
اتذكرت لمن اجيت لـ المستشفى
و شفت بيبي شلون ميته كدام عيني
- هالمرض يلي انتشر و الدنيا العوجه
رفعت راسي من رجلها
مُلاذ : انتِ منو الج هنا؟
- ابني مات
عگدت حواجبي ادحك بـ وجهها
مُلاذ : شنو ؟
- لا تسنغربين لأني ما أبجي و أصيح
هذا خامس واحد سلمته للتراب
مُلاذ : ليش؟
- يصير عسكري
يروح ينصر الوطن و يردلي جنازه
مُلاذ : كلهم؟
-كلهم
هزيت راسي بـ قبول ساكته
گمت من يمها و حجيت
مُلاذ : شكراً تعبتج
- لا يمه شسويت قابل
مُلاذ : عادي تنطيني عنوان بيتج؟
انتِ عايشه لـ وحدج؟
- صفيت وحدي يمه بس شتسوين بـ عنواني ؟
مُلاذ : اجي و اسلم عليج
- كل الهلا بيج
انطتني عنوان بيتها ، هزيت راسي بـ قبول
اتشكرتها ، درت وجهي ادور جنطتي
دحگت ما موجوده ، ظليت افتر بـ مكاني ادور
- شتدورين ؟
مُلاذ : جنطتي
- ما جان اكو وياج جنطه
مُلاذ : ابد؟
- ابد
هزيت راسي بـ قبول ، طلعت من المستشفى
رحت لـ السياره دحگت جنطتي بيها
اخذتها و قفلت السياره ، رجعت دخلت المستشفى
رفعت تلفوني دحگت جسار مخابر عليه هواي
رجعت خابرت عليه ما يجاوب
ظليت صافنه ما اندلهم وين ،
اتقدمت كعدت ع الكرسي ، رفعت عيني
لمن اجاني اتصال دحگت رقم جسار ، جاوبت
جسار : ويييينج انتِ صارلي ساعه ادور عليج
و اخابر ما تجاوبيني !
مُلاذ : ضيعتكم
جسار : وينج خل اجي اخذج
مُلاذ : هتان؟
جسار : بس گليلي وينج خل اخذج
گلتله مكاني سد الاتصال
ظليت كاعده ، رفعت عيني دحگتله اجاني
گمت وكفت ، اتقدم عليه يدحك بـ وجهي مستغرب
- شبيج ترجفين هيج ؟؟
هزيت راسي بـ رفض
مُلاذ : ما بيه وين هتان ؟ عايشـ ... ه مو؟
احجي بـ قلق خاف يگلي لا
جسار : عايشه
زفرت نَفس مرتاحه و كعدت
جسمي كله ركد بـ هاللحظة كل خوفي تموت
مسحت وجهي احمد الله هي عايشه
جسار : گومي عفتها وحدها
مشينا بسرعه الها
لگيتها كاعده و تدور بـ عيونها ذبلانات
رحت عليها ، ادحكلها ، ايديها ملفوفه
معلگين الها مغذي
جسار من شافها حجا بسرعه
جسار : متأذيه ؟
دحگت بـ وجه ساكته رجعت عينها الي
مُلاذ : ليش سويتي هيج؟
نزلت دموعها و بجت
دنكت عليها امسح دموعها
لزمت وجهها بين ايدي و حجيت
مُلاذ : اشش لا تبجين اهدي
حجت صوتها گوه ينسمع
هتان : أيهم ما رح يسامحني ابد
لا هو و لا باهر اموت ارحم الي
من نظراتهم و كرههم
مُلاذ : اشش أيهم ابد ما يكرهج
أيهم يحبج اكثر من روحه لو ما يحبج
جان ما انقهر و لا اتاذى من عرف باللي صار
هتان : البارحه فزيت بالليل
لگيته يمي و يمسح على شعري
مُلاذ : شفتي يحبج !
شلون گدرتي تسوين هيج بـ روحج
أيهم و باهر لو شايفيج جان اتخبلوا
هتان : ما يعرفون؟
مُلاذ : ما يدرون اجيت انا قبلهم
نزلت عينها مني تبجي
جسار : غبيه انتِ شنو من عقل عدددج
دحگت لـ جسار اسكت بي و هو اتخبل
جسار : لج باباااا هذا المن مخليته بـ راسج
شوووكت تشغلين عقلج انتِ ؟؟ شوكت تفكرين
مُلاذ : جسار اسكتت
جسار : عوفيني مُلااااذ
دفعني بـ خفة من كدامه يحاجيها
جسار : لج منووو يستاهل
تسوين بـ روووحج هيج؟
هتان : اذا اظل عايشه
رح اظل ندمانه طول عمري
جسار : و انتِ حتى ما تحسين بـ الندم
تكتلين روحج حتى اخوج يحس بـ الندم مو؟
لان ضربج و شايف صورج على هاي
كل مشكلتكم !!
مُلاذ : اسكت جسار ما تعرف شي
جسار : شنو الما اعرفه ؟؟ مو علمود الصور
اهتز جسم هتان تبجي
و تهز راسها ما تريد تتذكر الصار
مُلاذ : اسكت جسااار
جسار : ما رح اسكت احجي احجي شسوالها
جريت ايده وخرته من يمها
حجيت بـ عصبيه
مُلاذ : شترريد انت
هي ما تعول تنسى تذكرها انت!
جسار : احجي مُلاذ شسوالها
مُلاذ : و اذا عرفت شنو السوا الها
شراح يفيددد شراح يفيد؟
جسار : احجي لو اروح اسألها
دحگت بـ وجه و حجيت اله
كل شي مختصر و سريع
و يوم الي لگيناها بـ المستشفى
ظل يدحك بـ وجهي مصدوم و ساكت
مُلاذ : هسه عرفت اسكت
عفته و رجعت يم هتان ، دحگتلي دموعها تنزل
تتوسل ما اسولف لـ أيهم و باهر يلي صار
مُلاذ : هتان لازم يعرفون !
هتان : لا لا و الله اموت روحي اذا گلتيلهم
كلام جسار صحيح راح يحسون همَ بالندم
ما اريدهم يلومون نفسهم ما اريد
كل الصار بسببي
مُلاذ : تمام لا تخافين ما رح احجي
سكتت و هزت راسها بـ قبول
طلعنا من المستشفى ما قبلت تظل
ساندتها عليه و امشي ، لگيت غاده دازتلي
جايه ام أيهم و شايفه حالة غادة
گايلتلها وكعت و رجلي توجعني
و باهر جاي ماخذ غاده لـ المستشفى ،
دلتني على مكان المفتاح ، دحگتلي هتان بالسيارة
هتان : أيهم حجا شي ؟
مُلاذ : لا
دموعها ابد متوكف طول ما احنا بالسيارة
مُلاذ : كافي تبجين لا تقهرين روحج
هتان : كل ما اسمع صوتهم و اشوفهم راح اموت من الندم لو الله ماخذني و لا مسويه السويته
مُلاذ : اشش لا تدعين هيج
هتان : هذا الواقع ما تذكرينه
شلون گال كسرتي ظهري ؟ رغم جان يضربني
بس ركزت بـ كل كلمة يحجيها و كلهن بـ بالي
مُلاذ : جان مقهور معليج بي
هزت راسها بـ رفض ، شفتها ترجف
هتان : استاهل كل السوا و اكثر
مُلاذ : هتان ، تعرفين اسكندر
هو نفسه سيف مو ؟
هزت راسها بـ قبول مسحت دموعها التنزل
مُلاذ : نحجي لـ أيهم ؟
رفعت راسها فازه
هتان : شنو؟
مُلاذ : نحجي السوا بيج اسكندر
و لمن خدرج خلينا نحجي اله !!
بجت تهز راسها بـ رفض
هتان : لاا لاااا يدخل السجن لااا
مُلاذ : ما يدخل السجن هتان...
قاطعتني تهز راسها بـ رفض ما قابله
هتان : لاا لا اموت اموت اذا أيهم عرف
ما يخلي عايش اذا عرف مكانه ما يخلي عايش
مُلاذ : تمام اهدي
تبجي بـ صوت حضنتها بسرعه اهديها
ادحك لـ جسار بـ المرايه عيونه حمر
وصلنا لـ البيت نزلنا من السياره
بدلت فراش هتان و عدلت غرفتها ، عطرتها
نومت هتان بـ مكانها ، علگتلها المغذي
دخل جسار ، بعدني اريد احاجي
و هو دحك لـ هتان و حجا بسرعه
جسار : اسمعي راح اخطبج و تقبلين
- شنوووو؟؟؟
ندحگله انا و هتان مصدومين
جسار : اخطبج و توافقين
هتان : لا لا ما تخطبني
جسار : سدي حلگج محد اخذ رأيج
من يجي اخوج يحاجيج تگليله موافقة و تسكتين
هتان : ما رح اوافق !
جسار : توافقيييين
هزت راسها بـ رفض و دمعت
هتان : ما اوافق
ظلوا هي تگله ما اوافق
و هذا اتخبل يگللها توافقين و انا واكفه بـ نصهم
جسار : توافقييين
مُلاذ : لاااا تصيييح
صيحت و دفعته رفع اصبعه جسار
حجا بـ عصبيه يدحگلها
جسار : اذا صارلج شي من ورا الـ*** اسكندر
وقتها تأكدي مو أيهم يلي ما رح يخلي يعيش
انا الما رح اخلي يعيش
يحجي كاز على اسنانه
و هي تدحگله و تبجي
جسار : توافقين سمعتي لو لاا؟
هتان : ما اريد ما اريد
جسار : ليش ما تريديييين؟
هتان : ليش اظل برگبتك ما مجبور انت
تحجي و تبجي و تخلي جسار يتخبل
راسي صدع من وراهم هي تون و هو يصيح
مُلاذ : و الله العظيم اليبجي بيكم بعد لو يصيح
اشمره من هالشباااك و اخلص بلكت الله يسجنوني بجاه كلمن عنده جاه يا ربي هيج
و يسجنوني كون ويا نسوان ما يعرفن المشاكل دخيل اسمك اللهي ابوس ايدي وجه وكفى
اذا صارت
دحگت لـ جسار خازرني
مُلاذ : لا تدحگلي هي حاصله حتى تخزرررني
رجع عينه على هتان
هتان : ما اريد اتزوجك ما اريد
شنو الما تفهمه!
جسار : انتِ بت امج و ابوج لا تقبلين
عافنا و طلع و هاي فرفحت من البچي
كعدت يمها دحگتلها
مُلاذ : ارتاحي معليج بـ جسار
خليتها تتمدد مسحت دموعها
جبت الها مي ، ما قبلت تشرب
خليت المي على الميز و حجيت
مُلاذ : اذا توافقين على جسار افضل
هتان : لا مستحيل لااا
مُلاذ : ليش ؟
هتان : ما يحبني ليش اظل برگبته
بعدين اذا راد يتزوج راح اظل انه معلگه بـ رگبته
مُلاذ : لو يسمعج يشك هدومه من العصبيه
و هي تحجي سمعت صوت أيهم من جوا
أيهم : يمه وينج؟
بس سمعت صوته انهارت
نزلت بسرعه من يمها ،
دحگت جسار واكف و أيهم واكف يمه
دحك بـ وجهي مستغرب
-شتسوين هنا؟
مُلاذ : خابرتني غاده رجلها متاذيه
و رايحين لـ المستشفى ، هتان باقية وحدها
و اجيت ابقى يمها
دحك بـ وجهي ساكت
رفع عينه لـ الدرج رجع عينه الي دحگلي
ادحك لـ نظراته عيونه تدورها بلكي موجوده
انا اعرف أيهم ما يكره هتان بس متخبل من السوته كل ظنه هتان جانت موافقة على السوا اسكندر
أيهم : روحي انتِ انا ابقى
مُلاذ : لا هتان تعبانه و باقية يمها بـ الغرفة
سكت عني و طلع من البيت مقهور
جسار دزلي رساله گلي رح يروح
لحد هسه ما عرفت أيهم شسوا بـ اسكندر
صعدت لـ فوك اخذت منظفات نظفت الفوك كله
و حتى الغرف نظفتهن ، خلصت رحت غسلت
دخلت كعدت يم هتان لگيتها غافيه
شويه و اجو غاده مسوين رجلها مره
كعدوها على القنفه و باهر شايل أدهم
وجوههم كلهم تعبانه و ضعفانه
و انا بقيت افتر ويا ام أيهم ،
دخلنا المطبخ سوينا عشا ، لگيتها تثرم بصل
اتقدمت عليها و حجيت
مُلاذ : عوفي انا اسوي
- خلي انا جاي اسوي
تقطع البصل و عيونها تصب دموع
مُلاذ : عيونج كامت تدمع منه
خليني انا اسويه
دحگت بـ وجهي
- دموعي مو من البصل من وجع گلبي
حجتها و بجت فد انقهرت
تقطع بالبصل و تبجي ، كاتمه صوتها
وخرت السجين من ايدها دنيت الغراض عنها
وكفت كدامها و حضنتها ، بجت بـ كل صوتها
انا ماجنت اتقبل احضن احد
و هسه كل اليبجي كل اليحتاج اواسي احضنه
حسيت وقتها فارقت ضلوعي ايدين بابا
و احتضننت ناس ثانيين بس حتى اواسيهم
ولا واحد منهم حضنني حتى يواسيني
لمن احضنهم ما احس بـ نفس الشعور
يلي جنت احس بي لمن بابا يحضنني
لان هالناس كلها ما توصل لـ ربع من ألياس
و لا احد يوصل لـ حنيته
و لا احد يعرف يواسي مثله
و يسند الناس حتى انا .
اخذت ام أيهم و طلعنا لـ الحديقة
بجت بـ حرگه و انا يمها ، همست
مُلاذ : اذا تريدين احجي
- شحجي يا هَم الاحجي وليدي الما ادري بي وين لو موت أيمن الصاير هَمه مثل جبل على گلبي
لو أيهم يلي كل ما اشوفه الگا حمل الدنيا
على چتافه
أم أيهم : لو باهر الاسمع
حسه الليل كله يبجي و هسه هتان
هم راحت من ايدي شنو من أم انه
لا حافظتلي على واحد بيهم و لا حميته
بيناتهم مشاكل و واحد متدمر اكثر من الثاني
تحجي و تعاتب روحها
ما حجيت اي شي ظليت ساكته
لحد ما سكتت هي و طلعت كل الي بـ داخلها
رفعت عيني لـ أيهم و باهر الواكفين بـ الباب
سمعوا كلامها ، اتقدموا عليها حضنوا ظهرها
و ثنينهم روحهم محروگه ، فزت تبجي
لزمت بـ ايديهم ، عفتهم وحدهم
دخلت المطبخ كملت العشا
و همَ كاعدين وياها بـ الحديقة ، أيهم يدخن
و باهر صافن و امهم ساكته ما تحجي
صعدت اكل لـ هتان جبرتها تاكل
تگلي اخواني ما رح يعاينون بـ وجهي بعد
سكتتها لحد ما رجعت نامت ، نزلت صبيت العشا
لكيت غاده هم غافيه ، كعدتها و صحت الهم
كلنا نفسنا مسدوده و ناكل جفيان شر
أيهم عينه ع الدرج ما اكل حتى
بس كاعد يم امه ، شويه و شلنا الصينيه
محد يشتهي ياكل ، ركضت ام أيهم كدامي
صرفنت رداناتها و غسلت الماعين
سندنا غاده انا و باهر و نومناها بـ مكانها
و باهر اخذ أدهم و راح لـ الغرفه
رادت ام أيهم تصعد اكل لـ هتان
گلتلها انا صعدت الها و هتان نايمه
- خوش لعد الصبح خل اصعد الها
هزيت راسي بـ قبول
دحگت لـ مكان أيهم فارغ
دحگت لـ ام أيهم و حجيت
مُلاذ : روحي ارتاحي انتِ
رح نروح انا و أيهم لـ بيتنا
و عند أيهم المفتاح هو يقفل بابكم
ام أيهم : تمام عيني ، تصبحين على خير
مُلاذ : اجمعين
راحت هي تنام و انا صعدت فوك ركض
رحت لـ غرفة هتان ، لگيت الباب مردود
مديت راسي دحگت لـ أيهم كاعد يمها
و صافن عليها بدون ما يسوي اي شي
ظليت واكفه بالباب ادحگله لحد ما اتنهد
گام وكف ، خلا ايده يم شعر هتان
بس ما خلاها على راسها ، دنك يغطيها عدل
ركضت و نزلت جوا عدلت شالي
سويت روحي منتظرته ، نزل دحگلي بـ برود
اخذ سويجه من الميز و طلع ، لحگته
صعدت ويا ، شغل السيارة و مشينا
و انا بـ السياره صفنت لو ما انا
ما جان صار كل هذا بـ أيهم دحگتله ساكته
لحد موصلنا لـ البيت اخذنا أبيل من يم اهلي
صعدنا دخلنا البيت ، رحت انام اجا أبيل يمي
حضنني و غفى و انا ظليت كاعده ،
دخل أيهم الغرفة دحك لـ أبيل ابتسم
اتقدم شال أبيل من حضني
مُلاذ : عوفه يمي
دحك بـ وجهي ، تغيرت تعابير وجه
شال أبيل نومه على صدره ، دحگتله ما يدحگلي
عفته و گمت من الفراش ، رحت اشرب مي
طلعت من المطبخ و هو دخل
اخذ الكلاص مالتي ، دار بي مي و شرب
رحت لـ الغرفة لگيت أبيل نايم بـ النص
ابتسمت و سحبته لـ حضني ابوس بي
أيهم ما دخل الغرفه بعد ، غفيت و هو ما اجا
كعدت الصبح بدلت و اخذت أبيل لـ روضه
لـ العصر خابرتني غاده تگلي
أيهم يصيح و جسار جاي يريد يخطب هتان
بعدني هستوني نازله من السياره رجعت صعدت
رحت الهم عفيه رجلين يدوسن بـ هالبانزين
و يركضن اربعه و عشرين ساعه
همزين مكتبي قريب على بيتهم
لان مكتبي قريب من البيت اطلع
ماكو لا سيطرات و لا شي ،
هو بقى بس فايروس ما صار بيه بقت عليه
دكيت الباب فتحته ام أيهم و دخلت اركض
دحگت جسار واكف بـ نص الصاله
و أيهم يريد يكتله و باهر لازم أيهم الدنيا محترگه
جسار : فضهاااا اذا ما تقبل انت
خليني اروح و اخطبها من ابوها
أيهم : اخطبها من ابوها اخطبهاا
و شوف اذا ما اكسر رجليك الراحت لـ ابوها
و اكسر سنون ابوها بـ حلگه اذا يقبل
جسار : دمشي لك احترمتك
و اجيت خطبتها منك انت مو مال احترام جنك
أيهم اتخبل يريد يكتل جسار
و اتلازموا و جسار يگل لـ باهر هده
جسار : ما گلنااالك هيج من اجيت تخطب مُلاذ
لو احنا ما نعجب ؟
أيهم : لك سد حلكك لك هو انت وين شايفها
و جاي تريد تخطبها لا تخليني اسحلك هنا
دحگت لـ هتان الواكفه ع الدرج لمن گالت
هتان : انه قابله
فز أيهم و اندار يدحگلها
جسار ابتسم بـ كل هدوء و الصاله كلها هدأت
جسار : و هي قابله شكو بعد؟
دحك بـ وجههم أيهم دفع باهر منه متنرفز
و طلع من البيت دارت وجهها هتان و صعدت
دحگت لـ باهر و النبي بس هو فقير صوته
ما ينسمع رب العالمين راد ينعم على ام أيهم
انطاها باهر ، اشر لـ جسار
باهر : اكعد
جسار : بس انت ادمي
باهر : اكعد خل احاجيك
عفتهم و صعدت ورا هتان
لگيتها تبجي اجيت احرك روحي الا شويه
هسه كافي بچي الصار صار شلون
واحد يظل كل عمره يبجي ! بيش تفيد الدموع؟
حاجيتها لحد ما سكتت و هدأت
و صعدت امها يمها ، نزلت انا
لگيت باهر كاعدين هو و غاده و غاده تحاجي
و جسار رايح ودعتهم و طلعت ، خابرت أيهم
ما يجاوبني ، كملت شغلي و رجعت لـ البيت
دحگت لـ أيهم كاعد بـ الصاله و صافن
درت وجهي اريد اروح لـ الغرفه
نطق مستوقفني
أيهم : جنتِ تعرفين رح يجي و يخطبها
انداريت دحگتله اعرفها انا اعرفها
نهايتنا انا ويا عركه حجايه منه و حجايه مني
تگب بيناتنا و تصير العركه
مُلاذ : اي اعرف اكو مشكله؟ اجا و خطبها
گام وكف ، دحگلي
أيهم : و من گلتلج جسااار يحب هتان نكررررتي
مُلاذ : أيهم لااا تصيح عندي صوت
و اكدر اصيح مثلك ، أبيل نايم
أيهم : نكرتي لو لا !
مُلاذ : نكرت و ما جان اكو بينهم شي
أيهم : جااان اكو بعدج لحد هسه تجذبين
لحد هسه تجذبين عليه
مُلاذ : انت ما جذبت؟؟؟ انت ما تجذب
انت ما تضم عني و تگلب السالفه گلاب
و تجي تحجيها الي بدون ما تگول و لا كلمة صح
أيهم : شلون وصلتي السالفه الي ما اعرف
مُلاذ : لان تلومني و انت تسوي نفس الشي
أيهم : الومج لان ما جذبت عليج و لا يوم
الا بـ شي جان لـ صالحج كل الضميتي عني انتِ
و كل الجذبتي بي جان مختلف تماماً عن سببي
مُلاذ : تعترف انت تچذب عليه!
ليش انا ليش اچذب عليك
غير حتى ما تتأذى من تعرف!
اجي و اگلك أيهم جسار رح يخطب هتان
حتى تگلب الدنيا مو ؟ حتى تلم الدنيا بـ صياحك
أيهم : ما يخصج اگلب الدنيا احرگها
شسوي اسوي كل العليج تجين و تحجين
شمرت شالي من ايدي و حجيت متنرفزه
مُلاذ : تدري بـ شغله؟؟
مو لينا الجانت تسوي مشاكل انت التسويهن
درت وجهي اريد اروح
أيهم : انه **** و ابو مشاكل
لان ما اريد تجذبين عليه
لان اريد اعرف بـ كلشي يخص اهلي
صرت ابو مشاااكل و صار الحق وي لينا
انداريت عليه تنرفزت كلش
روحي صارت بـ خشمي
مُلاذ : انت شفت روحك من اجيت انا لحد هسه؟؟
كل عصبيتك جاااي تطلعها بيه على كل حركه اسويها ، جذبت بـ موضوع هتان
و جذبت لمن عرفت بـ جسار يريدها
ضميت عنك و ما حجيت الك
مُلاذ : بعد على شنو تريد تلومني ؟؟؟
و ها لا تنسى اسكندر دخل حياة هتان بسببي
و هتان اليوووم وضعها و اذية اسكندر الها كلها
من وراي حتى ينتقم مني لان اتزوجتك
مُلاذ : بدال ما تتعارك وياي على اسباب تافهه
و ليش جذبتي و ليش ضميتي و ليش سويتي هيج
اتعارك وياي علمود السبب الرئيسي
ثنينا نعرف اسكندر ما جان رح يعرفكم
و لا تعرفونه لو ما انا داخله بـ حياتكم
أيهم : اي اسكندررر لو ما انتِ ما جان دخل
بـ حياتنا لووو مشتكيه عليه وكت الاذاج بي
ما جان دخل بـ حياتنا لو ما رايحه اله
ما جان دخل بـ حياتنا
و لا جان هتان صارت ثوله انخدعت بي
دحگتله مصدومه و هو انفجر يحجي بـ عصبيه حجيت بـ هدوء ادحگله
مُلاذ : انا الگطمت اصابعه و ما سلمته للشرطه؟
أيهم : من البدايه انتِ الرحتي اله بـ رجليج
من البدايه لان گلج چتال طرتي و حطيتي يمه
مُلاذ : ما جننننت اعرف هوووو ما جنت ادري!
أيهم : رحتي لو لا ؟ هو او غيره رحتي لو لا؟؟؟
مُلاذ : صحيح كلامك كله من وراي !
كرضت شفتي متنرفزه
جريت شالي من الگاع ، رحت لـ الغرفه
دحگت أبيل كاعد بـ باب غرفته و مرتبك
درت و جهي و دخلت
شمرت كل شي بـ ايدي على الفراش
بدلت ملابسي ، اخذت تلفوني و طلعت من الغرفه
دحگت لـ أيهم مكعد أبيل بـ حضنه و ساكت
جريت جنطتي من الميز طلعت المفتاح
عبرت الصاله و رحت لـ الباب ،
أبيل : الهلووووه
وكفت و انداريت لمن أبيل صاحني
ركض الي حضن رجليه ، مسحت على شعره
أبيل : وين رايهه؟ (وين رايحه)
نزلت لـ طوله دحگتله
مُلاذ : امي تعبانه نازله اشوفها
تدنيت عليه بست شعره و رجعت بست خده
اتصرف طبيعي و انا بـ داخلي نار مشعوله
مسحت على خده مبتسمه ، رفعت نفسي
گمت وكفت ، دحگت لـ أيهم الواكف كدامي
درت وجهي فتحت الباب و طلعت بسرعه نزلت
فتحت باب بيت اهلي و دخلت ، نزعت حذائي
احجي بـ عصبية و اتعارك وي روحي
مُلاذ : كله صوجج من البدااايه شكو تتزوجين
گلتلج لا تتزوجين گلتلج انجبي و اكعدي بـ بيتج
ما بيج بس الاذيه بـ كل مكان بيج أذيه !
دخلت لـ الصاله فتحت الضوه
فزت ملاك تريد تصرخ ،
ركضت عليها سديت حلگها و هي موسعه عيونها
مُلاذ : اسكتي لا تصيحين
وخرت ايدي من حلگها ، كعدت يمها
خلت ايدها على گلبها ، صدرها يصعد و ينزل
- هبطتيني طلعي صوت؟!
مُلاذ : اسكتي ملاك
جيبيلي غطى و مخده خل انخمد هنا
ملاك : شكو شبيج؟
مُلاذ : لا تسألون شي انا اجذب عليكم
ما احجي صدك لا تسألون شي
سكتت عني و گامت جابت الي غطى و مخده
خليت مخدتي ع القنفه و جريت الغطى تغطيت بي
ملاك : گومي نامي بـ مكاني
مُلاذ : ما اريد ملاك لا تلحين وياي
ملاك : شبيج ؟
مُلاذ : ما بيه شعدج لسا كاعده كومي نامي
ملاك : كاعد اتابع فلم تتابعين وياي؟
مُلاذ : ما اريد روحي نامي تابعي
شتريدين تسوين سوي
ملاك : متعاركه انتِ و أيهم
سمعت صوت صياحكم
مُلاذ : تبن احسن
ملاك : شنو؟
مُلاذ : اسكتي ملاك و الله لساني زفر
هسه اغلط حتى على أيهم متنرفزه
حبابه سكتي عني
ملاك : تمام
سكتت ملاك عني ، شويه و راحت نامت
انا بقيت كاعده ما اكدر كلام ايهم يرن بـ عقلي
اتگلبت اريد انام ما اكدر ، كلامه صحيح
من عرفني لحد هاي اللحظة ما ظل شي ما صار بي بسببي اذا جان اسكندر او اذية الچتال اله
اتذكرت اول لقاء بيناتنا
انرسمت ابتسامه على اطراف شفتي
لمن اجا و اخذني من غرفتي و يركض بيه
شكد جنت خايفة وكتها يخطفوني
بس ما ردت ابين اله خوفي ظليت اتعارك
بلعت ريگي ساكته و انمحت ابتسامتي
انا ويا صرنا عباره عن مشاكل
ما جنت متوقعه بـ حياتي رح اتزوج شخص هيج
اصلاً ما جنت متوقعه راح اتزوج
جنت مخليه الولد تلعب نفسهم مني بـ لساني
و بـ تصرفاتي جنت مرتاحه اكثر
و الي ببالي اسوي بعدني اسوي الي بـ بالي
بس مو مثل قبل اذا رادو يحضنوني ابتعد عنهم
هسه صرت اتعاطف وي الناس و قلت عصبيتي
جنت عصبية من كل شي حتى من روحي
اتخبط و ما اعرف شسوي بس حتى يرتاح گلبي
اطلع قهري بـ اي شخص كدامي حتى امي
و هذا اكثر شي ندمت عليه بعدين
افعال مراهقتي
اتمرد و اتجاوز على كل شي و على كل شخص
ما اسمع كلام احد و لا اهتم شنو يگولون
و مع الاسف بعدني هيج بس احسن من قبل
غفيت الصبح نمت ساعه و كعدت
ثاني يوم گال جسار رح يخطب هتان
جاب امه و سلطان و باسط اخو الچبير
و اجا و أيهم استقبلهم و لا عبالك البارحه
جنهم زعاطيط يتعاركون واحد متخبل من الثاني
خطب جسار هتان من أيهم ادحك لـ أيهم
عيونه و صوته احتقن لمن وافق
صعدت لـ يم هتان لگيتها تبجي
ما قابله ما تريد تتزوج جسار
تگلي " هو يحب نور ما يريدني
ليش اتعلك بـ رگبته ما مجبور بيه "
بس كل ما تشوف أيهم و تسمع صوته
تموت من القهر و باهر ما يدحك بـ وجهها
كل الي ببالهم هتان جانت راضية بـ اللي صار
بعدين راحوا جسار و اهله و انا رجعت لـ البيت
طول ما انا كاعده يم هتان ادحگلها
اتأكد اكثر كل الصار بيها بسببي
و هي مالها ذنب اتاذت ، كلام أيهم صحيح
اسكندر عرفها و عرف أيهم من وراي
اغتصبها حت ينتقم مني و يراويني قذارته
من بعد تفكير طويل قررت اسوي هالشي
طلعت من الغرفة ، البيت اظلم ،
بس النشرات مشتغله و لونهم اصفر
مسويات ضوه خافت بـ البيت
دخلت المطبخ ، حتى المطبخ اظلم
و مشتغل بي ضوه خافت
اجواء أيهم لمن يريد هدوء ، دحگتله
اتقدمت جريت الكرسي يلي يم أيهم و كعدت
و هو يدخن ، شبكت ايد بـ ايد خليتهم فوك الميز
بلع ريگه ، طفى الجگاره و دحگلي
دار بكل جسمه الي ، سحب الكرسي مالتي ناحيته
عيونه تتنقل بين عيوني ، خلا ايده على راسي
من ورا يقرب وجهي اله بـ ايده و هو يقترب
همس صوته مبحوح
أيهم : لَـذه ليش هيج تسوين بيه لَـذه ؟
يحجيها صوته مبحوح و بـ همس
و يجر الكلمة ، اقترب اكثر
لحد ما صارت شفته على شفتي
تتنقل بينهم بـ كل هدوء
لزم خصري خليت ايدي فوك ايديه
وخرتهم من خصري ابتعدت بـ صعوبه عنه
دحگلي نظراته ذبلانه ، راد يرجع يبوسني
قبل لا يبوسني خليت ايدي على كتفه
خده لامس خدي ، غمضت عيوني بـ هدوء
انا هسه شلون رح احجي ، همست
مُلاذ : خل نتطلك....
****************
- يتبع الفصل التالي اضغط على ( رواية جرح الأيهم ) اسم الرواية