رواية جرح الأيهم الفصل الحادي و الخمسون 51 - بقلم أيلان
" الجُــرح الواحد و خمسون"
اركان : مو عليه هالسوالف
راكان هسه ما يندلج وين بـ سابع نومه
نور : لا خطيه اسمعه گام يبجي
اركان : هههههه لوتيه انتِ؟
اتقرب يبوس رگبتي و انا اتدغدغ
اضحك و اعيط : لا اركااان حباب اتدغدغ
لحظات و ابتعد عني يضحك
اركان : منيه جانت تگلي و اذا ما خطبتني؟
اهتز جسمي اضحك
و اهز راسي بـ رفض
نور : مو انا مو انا
اركان : لا شو چنها انتِ
نور : لا لا غلطان مو انا
ضحك و كام يدغدغني و انا ارافس
كممت حلگي لا اضحك بـ صوت عالي
گوه خلصت روحي منه و شردت
دخل يسبح و انا رحت ادور راكان
مديت راسي بـ غرفة ام اركان لگيتها نايمه
سديت الباب و طلعت ، مديت راسي بـ غرفة لالي لگيتها منيمه راكان يمها و هي هم غافية
اتقدمت لگيت راكان كاعد
و يلعب بـ الدب مال لالي و يمد بـ روحه
يريد يگوم ما يعرف شلون
ضحكت و مديت روحي اخذه ، فزت لالي
نور : اسم الله
غمضت عيونها حيل و فتحتهم
اخذت راكان شلته و هو كيف
نور : فززتج اسفه بس اجيت اخذ راكان
ابتسمت و گالت
لالي : صباح الخير چنتنا
نور : ههههه صباح النور
لالي : هذا الفصعون شنو موتني
نور : يا تعبج؟
لالي : لج يا تعبني موتني بجماله
الليل كله موتني من الضحك بحركاته
نور: ههههه اي حتى انا يضحكني
لالي : انتظريني اتزوج و اجيب بنيه
نزوجها هي ويا
نور : هاهيه اتفقنا من هسه انحجز
ضحكت لالي و گالت
لالي : شلونه اخوي ؟
حجتها و غمزت و سوت بـ ايديها بوسه
وسعت عيوني و ضربت جتفها بـ خفه ،
ضحكت بـ صوت
نور : هاي انتِ نفس كصة غاده
لالي : هههههه وينه لسا نايم ؟
نور : لا كعدته
لالي : امشو نتريك بطني تقرقر
نور : امشينا
گامت من الفراش ، رحنا انا وياها للـ المطبخ
وكفنا نسوي ريوك وراها راحت تكعد امها
دخل اركان المطبخ وكف يمي باس راكان
اركان : شتسوين ؟
نور : ريوك
اركان : نكعد اهلي
نور : هسه راحت لالي تكعد امك
صفن شويه و انا دايره وجهي منه مستحيه
دنك باس خدي ، ابتسمت ساكته
اركان : عوفي المستحى ما يفيدج
هزيت واسي بـ رفض : ما مستحيه
اركان : كلش ابد ما ما مستحيه
ضحكت بـ هدوء ، شويه و گال
اركان : اگلج
نور : ها
اتخصر و وكف يفكر
هزيت راسي بـ معنى "شكو؟"
اركان : ليان و عزيز
نور : شبيهم ؟
صفن و حك راسه
كتمت ضحكتي عرفته بـ شنو فكر
رفع تلفونه و خابر شويه و گال
اركان : كوم جيب اختي يالخايس
نور : ياااا هذا عزيز ؟؟
سد حلگي بـ ايده و اسمع عزيز يگله
عزيز : ماكو ترجيع بس تبديل
اركان : انجب سكط ناقص ترجع و غصباً عليك
عزيز : لا حبيبي ماكو بس تبديل
ردلي نور اردلك ليان
اركان : چلب هسه اجي اخذها من يمك
وينها انطينياها
عزيز : ماكو نايمه حبيبتي
كز اركان على اسنانه
و انا اهتز جسمي اضحك سوه روحه يصيحني
اركان : نونه حبيبتي رويحتي تعالي اكلي
عزيز : انت ما عندك مستحه تخابرني
و تتغزل بيها كدامي صوجنا انطيناها الك
اركان : دولي سايب تجي و تجيب ليان
لو اجي و اخذها انا
عزيز : خاب دروح لك هي بكيفك
اركان : ابن الزفره جيبها خل نتريك
عزيز : ابن الحيوان وين اجيبها غير نايمه
اركان : و قزرقط كعدها
ملخت خدودي ذوله عود صدك هيج صايرين
واحد يرفع و الثاني يكبس و يغلطون واحد
ع الثاني و عزيز يگله جيب نور
و هذا يگله جيب ليان شويه و گال عزيز جايين
دخلت عمتي تهلهل لـ المطبخ
و اركان ايده على حلگي وخر ايده بسرعه
ابتسمت مستحيه و هي تباركلنا و تصفك
ظل وجهي ينطي الوان و اركان يحك بـ حاجبه
بعد شويه خابرنا لـ عمتي و بيت خاله فيروز
و كل القريبين اجو و تريكنا سويه
و الضحك و السوالف
على طول ما احنا كاعدين حسيت روحي ترفرف
مُلاذ :-
رجعنا من يم نور
و رحت لـ المكتب نشرت اريد مساعده
واتواصلن وياي بنات ، گلتلهم على موعد المقابله
بعدين اجن و اغلبهن رفضتهن
وحده تگلي ما اكدر اجي بـ فلان يوم
لو لازم ارجع فلان ساعه لـ البيت
هنَ جانن خمس بنات
بس وحده زينه كلش وافقت تشتغل يمي
و اتفقنا على الفلوس ، بدت بالشغل
دخلت البيت نزعت حذائي و الشال
اتقدمت امشي على اطراف اصابيعي
كعب رجلي يوجعني كعدت على القنفه
شويه و اجا أيهم و أبيل هم اجا ويا
و انا كعدت اخلص شغلي
شويه و سوينا اكل و اكلت
بعدين دخلت شمرت روحي ع الفراش
و بلا اي مجادلات غفيت ميته تعب
فتحت عيوني بـ نعاس لمن حسيت نفسي بردانه
دحگت لـ باب البلكونه مفتوح ،
عكدت حواجبي مستغربه ، كمت من الفراش
فتحت الباب و طلعت لـ البلكونه ، دحگت لـ أيهم
كاعد على الگاع بلا قميص ، همست
مُلاذ : أيهم ؟
رفع عينه دحگلي
كنبصت يمه ادحك بـ وجه
أيهم : هو هم يبرد ؟
مُلاذ : منو ؟
سكت و انا ادحك بـ وجه مستغربه
خليت ايدي على كتفه صاير ثلج
رفع جكارته يدخن
مُلاذ : أيهم شبيك شكو ؟
كام من مكانه بسرعه و دخل الغرفة
عكدت حواجبي مستغربه ، دخلت ورا
راح ع الكنتور يلبس
مُلاذ : وين رايح ؟
أيهم : نايم وحده يخاف
مُلاذ : منو شكو شبيك أيهم ؟؟
أيهم : أيمن صارله هواي وحده
يخاف هو من الظلمة ذيج
خليت ايدي على كصتي ساكت
و هو يلبس بـ استعجال
كل مره اكعد بـ الليل الگا ما موجود
و يظل لـ ثاني يوم اعرفه يروح لـ أيمن
ينام يم گبره ، اتقدمت قفلت الباب
اجا ناحيتي يريد يطلع ، وكفت كدامه
هزيت راسي بـ رفض ،
عگد حواجبه نظراته الي قهرتني ،
يدحك بـ وجهي مصدوم
و عيونه ينقري بيها الوجع و شعره مخربط
نازل على وجه ، لابس بجامه و تشيرت
أيهم : وخري عن الباب ؟
مُلاذ : لا أيهم
أيهم : شنو لا ؟ أيمن ...
راد يحجي كممت حلگه ادحك بـ وجه
و هو صافن بـ وجهي
مُلاذ : رح تظل كل عمرك هيج ؟
وخر ايدي من حلگه بسرعه
أيهم : لازم اروح يم أيمن
يخاف من الظلمة ذيج
مُلاذ : أيهم أيمن مات
أيهم : يخاف
مُلاذ : ما يخاف
يدحك بـ عيوني و عيونه تلمع الدموع بيها
نطق خانگته العبره : جَـرح !
مُلاذ : تعال اكعد خل احاجيك
هز راسه بـ رفض و بَعد وجهه مني
وخرني من كدامه بـ هدوء ،
عبرني فتح الباب و طلع ، زفرت نَفس
ما اريد يكمل عمره هيج گلبه محترك
ما اريد اخلي يكمل ليله بـ مگبره و ينام بيها
شلون اعوده و ارجعه مثل قبل ما اعرف
رجع يهتم الي و يخاف عليه بس روحه مو مثل قبل مو مثل شقاه و سوالفه ، روحه ما مرتاحه ابد
خليت ايدي على كصتي محتاره
وين يروح و هالفترة بدء ينتشر فايروس
بدوا يسوون حضر تجوال و انا بطلت اطلع
و حاولت اعود أيهم يبقى بـ البيت
بـ يوم هم راد يروح بـ الليل و انا فزيت و عرفت
مُلاذ : أيهم ما تطلع و الله
أيهم : اريددد اروح لـ أيمن ارجع الصبح
مُلاذ : ما تروح لـ أيمن ما يخلوك تعبر اصلاً
خزرني و راد يفتح الباب و يطلع
لزمت بي بـ اثنين ايديه و قفلت الباب
درت وجهي اله قبل لا يسوي اي شي بسته
لازمه بـ وجهه بـ اثنين ايديه
و هو يحرك روحه بـ عصبيه ، يريد يفتح الباب
لزم خصري يبعدني عنه ما ابتعدت
لعبت نفسي لزكت بي ، دفعته و حجيت متنرفزه
مُلاذ : كافي گلتلك ما تطلع
مخبل انت تروح تنام بـ المگابررر ؟؟
أيهم : اي مخبل ما عليج
اتقدم عليه يريد يفتح الباب دفعته
أيهم : جَـرح راح تتاذين مني
و خري لا اذيج بالغلط و انه هذا اخر شي اريده
مُلاذ : ما تأذيني روح اكعد
دحك بـ وجهي متنرفز
و انا اتقدمت اسحب بـ ايده اريد يكعد
شلع گلبي ، ما يقبل يكعد رجعت ابوسه
بلكت يعقل و يكعد ،
بس لو اموت بـ الأخير انجرحت شفتي من ورا
ظلت تصب دم ، خزرته و هو سب روحه
كل ما يأذيني لو يتنرفز من شي يسب روحه
سحب كلنس يخلي على شفتي ،
دفعت ايده و طلعت من الغرفة
رحت لـ غرفة أبيل ، تمددت يمه معصبه
و الله مو صوجه صوجي انا اريد اكعده بـ البيت يروح يتعارك وي السيطرات لان ما يعبرونه
و باهر يعرف و يروح يطلعه من المراكز
اندار أبيل و هو نايم خلا راسه على متني
بست شعره ، درت وجهي ادحك لـ أيهم
لمن فتح باب الغرفه و دخل خزرته و درت وجهي
حضنت أبيل ، امسح على ظهره ، انسد الباب
فز جسمي لمن ايده صارت على خدي ،
عبالي طلع ، بلعت ريگي ساكته و نَفسي مو منتظم
اتمدد وراي ، مسح بـ اصبعه على مكان جرح شفتي و رجع يمشي اصبعه على طول شفتي
رفعت ايدي خليتها على ايده و نترت ايده
من شفتي ، حضن بطني بيها هم نترتها
هو يخلي ايده عليه و انا انترها
و أبيل نايم ، گمنا نتكافخ انداريت اله ادفع بي
قرب وجه يريد يبوسني سديت حلگه بـ ايديه
اتنرفز يوخر ايدي و ارجعها دفعته و گمت
رحت كعدت بـ الصاله لحگني
مُلاذ : عووووفني يلا روح
أيهم : رح اطيحه لـ حظج اثبتي
خل اشوف شفتج اتعورت
اتقدم لزم ايديه و ثبت رجليه مخلي ركبته فوكهم
خلا ايده على مكان جرح شفتي ،
وخرت وجهي من ايده ، دحك بـ وجهي
أيهم : جَـرررررح
مُلاذ : نعال على جرح فوكها مسميني جرح
العالم تسمي حبيباتهم زنو نونه حنونه
انا مسميني جرح وخرررر عني
خزرني يدحك بـ وجهي و انا دفعت ايديه عني
اتجتفت و كعدت ضايجة منه ، عافني و كام
دخلت لـ الغرفة لگيته يدخن ،
اخذت غطى و طلعت فتحت التلفزيون و تمددت
كعدت ادحك بـ التلفزيون طلع فلم رعب و انا اشوفه
من كد ما شايفه رعب بـ حياتي من تصير لقطه تخوف اكوم اضحك على اشكالهم هزيت ايدي
مُلاذ : لعد لو تشوفون حياتي شتكولون
و كالعاده لازم اتمنى الشخصية تشرد و تنقذ روحها بس فجأه يصير عدها شلل رباعي
و تظل بـ مكانها و تخليني الطم
درت عيني لمن دخل أيهم الصاله
دحگتله بـ طرف عيني اجا كعد يمي تدنيت عنه ،
اخذ الغطى و تغطى وياي و دنى روحه عني
يسوي روحه يتابع فلم الچذاب
طلعت لقطه تخوف و انا صافنه ادحك بلا ردة فعل
شو و انا صافنه اجتني كفخه على عيوني
وخرت ايده عن عيوني ادحگله خازرته
مُلاذ : نوب تكفخ عيوني؟
أيهم : غبيه و الله شوفي اللقطه شلون تخوف
مُلاذ : يا تخوف دشوف شلون تافهين
هاي عود تخوف ؟ مخلينها بيضه كلش
و تلوي بـ روحها منا و منا و بـ ايدها سچين جذبيه و مسوين روحهم ذوله خايفين
يكدرون يرفسوها و يشردون
أيهم : انتِ الرعب يخاف منج
مو تخافين من الرعب
مُلاذ : دحك هاي لو مخلين بـ مكان هاي الشخصية علياء هي و عطوبها جان خفت بس مع الاسف
رجعت صارت لقطة تخوف
تدنى أيهم عليه و حضنني
أيهم : لا تخافين حبيبتي لا تخافين
مُلاذ : أيهم دروبك مو عليه ما خايفه
أيهم : انجبي خايفه
مُلاذ : و العباس ما خايفه
أيهم : هي بكيفج انه احسج خايفه
دفعته : دروبك مووو عليه
قيدني و شالني من خصري كعدني بـ حضنه
باس خدي بوسات متتاليه و انا ضجت
مالي خلك بعد اشرد منه
أيهم : انتِ تصرفاتج مال ولد سكاره
و هسه شعرج ولادي كملت السبحه
رجع يبوس خدي و انا احجي
مُلاذ : انا مو ولد انا بنيه خوش ؟ انت الولد
ابتسم ساكت عني
مُلاذ : كافي وخر
أيهم : جرح لا تسوين هيج
مُلاذ : لا انت بـ كلشي تريد تعاند
مو صوجي صوجك انت ،
تكضي عمرك نايم بـ المگابر ؟
أيهم : گلبي ينلچم عليه كل ما اغفى احلم بي
و بس من اروح و انام يمه ما احلم احسه مرتاح
رفعت نفسي من حضنه
كعدت على ركبي ، دحك بـ وجهي
اخذت ايديه بين ايديه و حجيت
مُلاذ : أيهم اعرف و الله اعرف مو سهله
و ابد مو سهله ، انت تروح كل يوم
تنام يم گبر اخوك و انا صارلي 16 سنه
ما اعرف حتى وين گبر ابوي ،
مُلاذ : اعرف ميت بس لحد هاي اللحظه
يصير عندي امل يطلع كل هذا حلم و افز منه
و يطلع بابا عايش و موجود وياي
و ما رح اتقبل ، ما رح اتقبل موته
مُلاذ : هسه تگلي شنو ما تتقبلين ؟
كل هاي السنين ما تقبلتي ؟
ما اتقبلت أيهم و لا رح اتقبل
لحد ما اشوف گبره وكتها رح اخلي نفسي
امام الامر الواقع و غصباً عليه رح اتقبل
مُلاذ : انت تنام كل يوم يم گبر اخوك
لان ملچوم گلب عليه زين أيهم ما فكرت
اذا ظليت تسوي هيج رح تزيد احلامك بي ؟
رح تظل تفكر أيمن يعاتبك
لان انت نايم بـ فراشك و هو نايم جوا التراب
أيهم : جَـرح لا تگولين هيج
مُلاذ : بلى هيج أيهم
لو أيمن موجود و ميت احد عزيز عليك غيره
ما جان رح يقبل بـ تصرفك هذا و رح يضوج منك محد يتمنى اخو ينام بـ المگبره ، جسده بالگبر
بس روحه يم رب العالمين و ما رح تفيد نومتك شي
خلا كفوف ايديه على محاجر عيونه
وخرت ايديه و كملت كلامي
مُلاذ : اقنع روحك تبقى بالبيت و ما تروح لـ المگبره
تروح بين فتره و فتره حتى تزوره مو تنام هناك
وكت التحلم بي يعاتبك گلي و رح اكون يمك
و أنسيك هاي الفكره انا مو بس مرتك بـ الاسم
دحك بـ وجهي ساكت
و انا اتدنيت اله خليت راسي على صدره
حضنني يعصرني بـ حضنه و يبوس شعري
من يتعب احس روحي انا التعبانه
و من يبجي انا من يمي يحترك گلبي
احس روحي انا الجاي ابچي مو هوه
دموعه احسها تحرك گلبي
بس ماريد امنعه من البچي لان يتأذى اكثر
أيهم : و لا شخص شافني
بالحالات الشفتيني بيها جَـرح
مُلاذ : لَـذه
أيهم : شنو؟
مُلاذ : لَـذه انا مو جَـرح
لذة الأيهم ما اريد اكون جرح
ابتسم ساكت خلا ايده على خدي
يمرر ابهامه عليه بـ هدوء ، قربني عليه
لحد ما صار وجهي بـ وجه
رجع كعدني بـ حضنه عيونه تتجول على ملامحي
مُلاذ : لا تدحك هيج
نظراتك حلوه بس تخرعني
ما جاوبني نزل عينه لـ شفتي
ايده بعدها على خدي ، حولها على رگبتي من ورا
و جذب راسي ناحيته ، نزل ايده على ظهري
أيهم : انتِ لذتي و جرحي
مُلاذ : بس ما يصير ثنينهم سوا
أيهم : يصيرن ، تداويني و توجعين گلبي
مُلاذ : ما مسويتلك شي انا
أيهم : اعرف
مُلاذ : اذا تعرف ليش تتهمني اتهامات باطله؟
أيهم : من اسميج جرح شنو يجي بـ بالج؟
مُلاذ : انو انا مأذيتك
أيهم : مو هيج
مُلاذ : لعد؟
أيهم : مثلاً جرحتي روحج بـ يوم
مو شخص جرحج انتِ بـ نفسج جرحتي روحج
و ممكن تكونين جرحتي شخص ثاني
لمن تعاينين لـ هذا الجرح اذا بـ جسمج
تفكرينه جرحج و اذا بـ جسم شخص ثاني
هم رح تفكري جرحج لان انتِ يلي اتسببتي بي
مُلاذ : بس هالشي شدخله بيه ؟
دحك بـ وجهي و اتنهد
أيهم : تعالي نامي
مُلاذ : لا أيهم لا تغلس عليه
انت قصدك انا ما جارحتك بس انت جارحني
و لذالك كل ما تشوفني تفكر بـ جرحك الي
لـ ذالك هيج تسميني بـ شنو اذيتني ؟
أيهم : ما اذيتج
مُلاذ : أيهم بطل تكذب
أيهم : ما مكذب
مُلاذ : لعد شتقصد بـ كلامك
انت تسميني جرح و انت الجارحني هالجرح
أيهم : لَـذه قصدي من خطفوج
وقتها جنت اراقبج و من خطفوج
غفلت عنج و لو ما غافل ما جان صارلج شي
مُلاذ : أيهم انت ضام شي عني؟
هز راسه بـ رفض دحگت بـ عيونه
مُلاذ : متأكد؟
دحگلي ساكت ، لحظات و هز راسه بـ قبول
سحب راسي لـ صدره ، سند حنجه على راسي
هتان :-
كعدت من النوم على اثر اتصالات متتاليه
عاينت لـ تلفوني و اخذته ، عاينت لـ رقم سيف
فتحت الاتصال خليت التلفون على اذاني
هتان : الو
سيف : وينج صارلي ساعه اخابر عليج
هتان : لا تصيح شكو؟
سيف : تعالي انتظرج كدام الباب
هتان : ما رح اجي
سيف : تجين و رجليج فوك راسج
هتان : ما اجي شتريد من عندي !
جاي اگلك ما اريد التقي بيك بعد
انه جنت بعيده عن كل هاي السوالف
و غلطت لمن التقينا ، تريد تعال اخطبني
سيف : اي تمام تعالي
اريد احاجيج بـ خصوص الخطوبه
بهت وجهي اطلع روحي من مصيبه
ادخل روحي بـ مصيبه اكبر
هتان : تجذب عليه حتى اجي
سيف : ما اجذب عليج
اليوم اريد اجيب اهلي بالليل و اجيج
هتان : سيف عوفني ما اريدك
سيف : هي بكيفج ما تريديني لعبه بايدج انا !
هتان : مو لعبه بس من ذاك اليوم حاجيتك و گلتلك انه اريد انهي كل شي انت كل يوم جاي تتمادى وياي و لا جاي تعوف الشرب
اكثر من مره انفصلت عنك بس انت لحيت
و رجعتني و انه هالمره ما اريد ارجع الله يوفقك
و تلگا الاحسن من عندي
صاح بـ الاتصال ظليت مصدومه
سيف : هتاااان اذا ما نزلتي و اجيتي اجي
و اخطبج من اخوانج و من ترفضين اگللهم
جانت تلتقي بيه و اراويهم صورة صورة
يبس جسمي مصدومه
هتان : ما تسويها
سيف : اسويها لذالك هسه تعالي بسرعه
هتان : ما اجي شتريد مني شتررريد
سيف : تعالي لـ السيارة منتظرج
سد الاتصال نزلت عيني
لمن اجن الصور وحده ورا الثانيه و الفيديوات
نزلت دموعي مصدومه احس عقلي جمد
دزلي رساله "تجين لو ادزهم؟"
بلعت ريكي و شفايفي و ايديه يرجفن
گمت من الفراش الزم بـ الحايط عقلي انسطر
دخت كعدت كم لحظه حسيت نفسي رح اوكع
ناشغت و بجيت و هو يخابر ، مسحت وجهي
و شفايفي بعدها ترجف گمت ، دخلت الحمام
اغسل و ابجي غطيت وجهي بـ اثنين ايديه
ايديه كل شي بيه ترجف الغصة موتتني
ابجي و الوم بـ روحي استاهل حيل وياي
ليش تصدكين من البداية ليش تثقين ؟
دخلتي روحج بـ مصايب ما الها اول
و لا الها تالي ،
طلعت من الحمام اخذت تلفوني
يلي يجي اله الاتصالات بـ استمرار ، رديت عليه
هتان : اذا اجي رح تحذفهن ؟
سيف : اي تعالي و احذفهن كدامج
نزلت التلفون و سديت الاتصال
و بـ كل غباء صدگته ، لبست فوك ملابسي
و نزلت بـ هدوء اتخنس ،
مديت راسي عاينت لـ المطبخ محد موجود
طلعت اركض من باب المطبخ
رحت لـ باب الشارع فتحتها و طلعت
عاينت ادور بـ عيوني على سيارته لحد ما شفتها
رحت ناحيتها ، وصلت لـ يمها و صعدت
هستوني اريد اسد الباب
و حسيت بـ منديل يغطي خشمي و حلگي
وسعت عيوني مصدومة اچلب بـ ايده و ابجي ،
لحد ما انغلقت عيوني بـ انعدام مقاومة...
نور :-
تلفون لالي يمي و انا واكفه اسوي عشا
درت عيني لمن رن تلفونها و اجا صوت اشعار
دحگت كاتبه على الرقم "ازعاج"
رفعت عيني لمن دخلت المطبخ ضحكت و كلت
نور : هاي منو مغضبج و كاتبه عليه ازعاج؟
گولبت عيونها و گالت ضايجة
لالي : هم هذا
نور : منو؟
اتقدمت اخذت التلفون و وكفت يمي
فتحت التلفون وسعت عيوني مصدومه
لمن شفتها صورة ضرغام
نور : ضرغام؟؟
لالي : اي صخام مو ضرغام هذا
نور : يا منين جاب رقمج ليش يحاجيج؟؟
لالي : ذاك اليوم يخابر على اركان
و اركان يسبح جاوبت بدال اركان گلتله يسبح
يگلي يلا خيتي اخذي راحتج
و انا اموت من هالكلمة من احد يحجيها ،
لالي : گلتله منين اجيت اخيتك
يگلي يعني اقصد اعتبرج مثل اختي
گلتله ليش تشوفني ذابه روحي عليك و كاعد تلمح يگلي انتِ عليمن طالعه لسانج شطوله تعاركت ويا
نور : يا هههههههه زين منين جاب رقمج؟
لالي : مو اركان طلع من الحمام
نور : اي
لالي : و انا بقت عركتي على النص
اخذت رقمه سجلته يمي و سديت التلفون بـ وجه
و حذفت المكالمة من تلفون اركان
تعاركت وياه من تلفوني و هو يحجي حظرته
و هسه يگلي مو عيب عليج تحظريني و هم حظرته
متت من الضحك و هي تحجي بـ عصبيه
نور : عود اذكرج من تتزوجون
لالي : نوررر شنو نتزوج اتزوج هالمصيبه
كل ما احجي يگلي لسانج
اطول من لسان الي نحقق وياهن
ششايفني و يگلي هيج!
ضحكت وكفت اسولف وياها
و هي ضايجه منه تسولفلي عن عركتها ويا
ورا شويه سكتنا ، رجعت حجت معصبه
لالي : يگلي تشبهيمن ؟ شعليك اشبه منو؟
اشبه اختي الجبيره شعليك انت
سكتت لمن ذكرت اختها ظلت هادئه
درت وجهي ، دمعتها مغرغره بـ عينها
مسحت عينها بسرعه
نور : الله يرحمها
لالي : امين
نور : لالي
لالي : ها
نور : باعي اذا ما تضوجين
رح اسألج عن شي
لالي : اسألي
نور : مره حجيتيلي عن اختج گلتي ما ماتت هيج
دحگتلي ساكته ، بلعت ريگها
اتقدمت وكفت يمي
نور : عوفي الموضوع
لالي : لا أسالي
دحگتلها و كملت متردده
نور : شلون ماتت و ليش ؟
لالي : لارا انتحرت
نور : بس هي اندعمت و ماتت!!
لالي : لا جنت ما متأكده
بس هسه تأكدت شمرت روحها كدام السيارة
نور : ليش انتحرت؟
لالي : قبل لا تموت بـ يوم اجت يمنا جانت تبجي
صفنت عليها و ما اعرف شبيها ، بجت هواي
بعد ما ماتت لگيت رساله و اوراق بين غراضها
قريت كل شي بيهن جانت تعبر و تتمنى الموت بيهم
و بـ اخر ورقة قريتها اكتشفت ...
بلعت ريگها ساكته و مسحت دموعها النزلت
نور : شنو ؟؟ احجي
لالي : ابوي مغتصب لارا 3 مرات
هي شهكه هي شحطه
وسعت عيوني مصدومه ، عقلي و اطرافي جمدن
رفعت عيني على اثر صوت اركان يلي بـ الباب
اركان : شنووووو ؟؟؟
التفتت لالي مرعوبه و دموعها تنزل
و اركان متصنم بـ مكانه موسع عيونه علينا
هتان :-
فتحت عيوني ، راسي ثگيل
جفني ثگيل ، ألم فضيع بـ كل جسمي
رفعت ايدي بـ صعوبه لزمت راسي
خليت ايدي على بطني ، اتحسستها
عگدت حواجبي مستغربه و انه مغمضه
ليش جاي ألمس جلدي ، ليش هذا الوجع
راسي عيوني ؟ وين جنت و شصار ؟
فتحت عيوني بـ صعوبه
نظري يدور بـ المكان ، جفني ثگيل
أحس روحي منتهيه ، استقرت عيني على شخص
غمضت و فتحت شفته سيف ، اتذكرت كل شي
نزلت دمعتي من عيني
نزلت نظري على جسمي و لا قطعة ملابس عليه
صيحت مصدومه و أبجي اريد اگوم
ما اكدر اتقدم ناحيتي بـ ايده غطى شمره عليه
اهتز جسمي ابچي و ارجف مو بـ انصاف
بـ ايده سلاح ابتسم و ضحك بـ صوت عالي
كنبص كعد كدامي ، دغ راسي بـ السلاح
سيف : كلمة وحده اذا حجيتي
صورج تصير يم اخوانج الشريفين
بجيت كل جسمي يرجف
شديت اصابيعي ع الغطى و هو عافني و طلع
انهاريت ابجي احس روحي تتكطع
كل جسمي يوجعني و عيوني جمر ينزل منهن
ما اعرف شكد ظليت على هذا الحال
بـ ذيج دموعي و انهياري ، اتدمرت
دمرت روحي بـ ايدي ، اتدمرت حياتي
هدأت و ظليت صافنه ، احس عقلي واكف بي الدم كل جسمي يرجف و الوجع مو طبيعي
بس وجع گلبي و لا شي كدام وجع جسدي
جريت ملابسي المشمره ع الگاع بصعوبه
دموعي تجوي خدي ، طلعت امشي ع الشارع
عقلي متخدر و امشي مادري ماحس بـ شي
غير نار تسري على خدي ، نزلت عيني لـ الكاع
درت وجهي ادحك لـ بقع الدم و بـ مكاني وكفت
درت بـ عيوني اريد اسيطر و اوكف
صار صوت صفير بـ اذاني و وكعت ...
غاده :-
هتان ما موجوده بـ البيت
و امها ما تدري بيها ، دورت عليها ما موجوده
بس تلفونها بـ البيت ، اتذكرت هذا التلتقي بي
خفت تكون طالعه ويا و اگللهم و اجفصها
ظليت ساكته و كاعده منتظرتها
اجت عمتي دحگتلي
- هتان وين؟
غاده : نايمه
- خل اصعد اكعدها
كمزت من مكاني وكفت ع الدرج
غاده : لا عمه عوفيها تعبانه خطيه
- شبيها ؟
غاده : نفسيتها تعبانه مساع صعدت يمها
ضايجة و ما الها خلك و تبجي
سكتت و نزلت عينها
- بس ما اكلت
غاده : هسه اودي الها اكل
و لو اعرفها ما تاكل
- جاي تتعبين ويانا انتِ
غاده : لا يا قابل شسوي عمه حبيبتي
امشينا نشرب انا وياج چاي
شوي و اصعد الها اكل
رحنا انا وياها لـ المطبخ نشرب چاي
و لازمه گلبي خاف يعرفون بيها غير ترجع
هي دوم تقفل الباب على روحها و تبجي
و من احد يحاجيها ما تجاوب ، بس انا انقلقت
لـ المغرب و هي ماكو ، قلقت كلش
و عمتي نامت تاخذ منوم حتى ترتاح و تنام
تظل نايمه لـ ثاني يوم , اجا باهر
غاده : باهر شبيك بطل تنام بـ ملابسك
باهر : تعبان مالي خلك
غاده : اعرف يا حبيبي
بس لا تنام بـ ملابسك يلا گوم بدل
نفخ بـ ضجر و كعد ع الجربايه
انا واكفه كدامه رفع عينه دحگلي
ابتسم و سحب ايدي بـ هدوء
باهر : مشتاقلج انه
غاده : انا هم بس گوم بدل
باهر : شنو رأيج تبدلين الي
ضحكت
غاده : يصير ليش لا
ابتعدت عنه و دخلت سبحت
طلعت مشطت شعري بسرعه
رحت ركض لـ غرفة هتان ، دخلت لگيتها فارغه ، صدك جذب لسا ما جايه ، كعدت اكرض بـ شفتي
يا ربي بس لا طلعت ويا و سوا الها شي ،
وينها هالبنيه !
جريت تلفوني ما عندي غير مُلاذ
خابرت عليها
مُلاذ : شمضيعه و دگيتي
غاده : مُلاذ اسمعي
مُلاذ : شبيج شصاير ؟؟
سولفت الها كل شي و هي اتخبلت علي
شنو ما تگولين من البداية و ليش ما تنصحيها
و ليش ما تگولين لـ اهلها و جذبتي عليهم
غاده : البنيه مختفيه الله يخليج عوفي الرزايل
تعاليلي خل نروح نشوفها وين
مُلاذ : تمام انتظريني
غاده : تمام
نزلت تلفوني و سديت الاتصال
و كعدت محتاره
مُلاذ :-
صفنت شلون اگل لـ أيهم اريد اطلع
ما اريد يعرف سبب طلعتي ، دزيت لـ ملاك
- ملاك موجوده ؟
ظلت رسالتي معلكه دقايق و جاوبتني
ملاك : اي
-تعالي اصعدي گليلي اريد اشتري
ملاك : شنو؟
-لازم اطلع و أيهم ما يخليني بس اذا الموضوع يخصج يخليني فـ تعالي اتوسلي نروح
نشتري اي شي و سوي روحج تحتاجينه كلش
ملاك : تمام بس امي ؟
مُلاذ : دبريها
ملاك : اوك
نزلت التلفون و سديته
مسحت على كصتي بـ حيره
غاده قلقتني كلش ، رفعت عيني لـ أيهم
يلي دخل الصاله ، اتقدم كعد يمي
حضنني بـ اثنين ايديه لـ صدره و باس خدي
أيهم : شبيج ضايجه
مُلاذ : ما ضايجه
أيهم : چا؟
مُلاذ : هيج جاي افكر بـ قضية موكلتي
أيهم : محاميتي
ابتسمت ساكته شوي و اندك الباب
سويت روحي ما اعرف منو
فتحت الباب لـ ملاك ، جايه مبدله
ملاك : مُلاذ عفيه تعالي خل نشتري و نجي
أيهم كاعد بالصاله ميشوفنا
و انا اشر الها بـ معنى عفيه
عليت صوتي اسمع أيهم
مُلاذ : وين نطلع بـ هالوقت
هي هم لوتيه سوت مثلي
ملاك : عفيه الله يخليج مستعجله
مُلاذ : أيهم ما يخليني اطلع هيج وكت
حجيتها و طلع أيهم من الصاله
بسرعه درت وجهي و سويت روحي احاجي ملاك حركت الها حواجبي بـ معنى "لحي"
ظلت تلح عليه و تحاجي أيهم گوه قبل
جريت السويج و طلعت اركض و غاده تخابرني
رحت الها رمشت عليها و سديته
شويه و طلعت من البيت و باهر وياها
بلعت العافيه حسيتهم يعرفون شرايحين نسوي
اجا ناحية السيارة سلم عليه ، صعدت غاده
دنك من الشباك يحاجيني
باهر : مُلاذ مو تتأخرون دنيا ليل
مُلاذ : اعرف اعرف حتى أيهم گال
باهر : خل اخذكم انه
مُلاذ : لا احنا نريد نطلع كـ بنات سويه
صارلنا هواي ما طالعين و اساساً لا تخاف
نرجع من وكت ما نتأخر عليكم
باهر : هو انتوا وين رايحين
حجينا انا و غاده بـ نفس اللحظه
مُلاذ : لـ المكتبه
غاده : لـ محل
انداريت عليها دحگتلها
حكيت حاجبي و گلت
مُلاذ : يعني هو للمكتبه و للمحل
باهر : تمام ديربالجن على روحجن
اندارت غاده لـ باهر
غاده : باهر ترا هتان قافله الباب و متجاوب
لا تلح عليها خليها
باهر : هسه لو اعرف ليش تقفل الباب
و ليش ما تجاوب غير نعرف شبيها
غاده : باهر شبيك مو تدري نفسية هتان شلونها
بعدين ناخذها لـ طبيب بلكي يساعدها هسه عوفها
باهر : هو رايح اغفى شوي بس هي اكلت؟
غاده : اي صعدت الها اكل
هز راسه بـ قبول و قبل لا يحجي شي طلعت
انداريت لـ غاده احجي بـ عصبيه
مُلاذ : انتِ غبيه ما تگليلهم
غاده : شمدريني مُلاذ شمدريييني
و الله اذا عرفوا بيها تطلع ويا يطيحون حظها
عضيت اصبعي متنرفزه
غاده : و الله حاجيتها و نصحتها
بعدين گلت هو انا جنت التقي بـ اخوها
قبل لا نتزوج ليش اجي اصير حكيمه بـ راسها
مُلاذ : و انتِ هسه وكتج تبطلين الحكمه
ملاك : شكو؟
غاده : مُلاذ البنيه نفسيتها متدمره
اجي انا اخبلها زايد ما هي متخبله
مُلاذ : لـ هذا السبب اگلج جان لازم تحاجيها
نفسيتها متدمره و تسوي كل شي
بس حتى تحس بـ فرحه و لو شويه
اذا هذا المجلوب الحبته يجيب الها هديه
بس الفرحه التحس بيها رح تخليها تستمر
ملاك : شكو ؟ شصاير ؟
مُلاذ : اساساً هي حياتها متدمره
زاد دمارها هسه و اذا طلع مسويلها شي
حتى هسه اريد ادور عليها ما اعرف
ما اعرف وين ادور لا وياها تلفون لا صخام
لا ادري هي بـ مستشفى بـ بيت بـ مركز
غاده : صدك احنا طلعنا
بس شلون نعرف مكانها
مُلاذ : مو انا احجي و اكل تبن استعجلتيني
بالله ما لگيناها و رجعنا بدونها شلون
ملاك : هسه احجولي شكو مو راح اطك
اندارت غاده تسولفلها و انا صافنه
وين الگاها هسه وين اروح ادور
ادخل بـ فروع ما بيها سيطرة حضر تجوال
محد يكدر يتحرك حركه ، اذا يلزموني ينعلون خيري
و انا صافنه دك تلفون غاده
مُلاذ : منو؟
غاده : رقم غريب
جاوبت ع الاتصال و فتحت حاكيه بسرعه
غاده : الو منو؟
- السلام عليكم وياي ست غاده؟
غاده : اي اتفضلي حبيبتي
- انا ممرضه و اجت لـ يمنا بنيه
ما كدرنا نعرف منو هي ما تجاوب
بس سألتها عن رقم واحد من اهلها
گلتلي على رقمج
اندارت غاده تدحك بـ وجوهنا حجيت انا
مُلاذ : جايين جايين
بس وين مكانكم بيا مستشفى ؟
گالتلنا ردت اسألها على وضع هتان
بس هي سدت الاتصال ، ندست غاده
مُلاذ : ارجعي خابريها ارجعي
رجعت خابرت عليها و هي جاوبت
مُلاذ : عادي اعرف وضع البنيه شنو؟
- لو تجون افضل
مُلاذ : تمام جايين يا ريت ما تعوفيها لـ وحدها
- لا اساساً كعدت يمها ما رحت لـ مكان
مُلاذ : تسلمين ما تقصرين
- واجبي
سدت غاده الاتصال دحگت بـ وجهها
مُلاذ : شصاير بيها حتى بالـمستشفى
عضت غاده شفتها بـ حيره
وصلنا لـ المستشفى و نزلنا بسرعه
قفلت السياره و دخلنا خابرنا ع الممرضه
گلنالها احنا بـ باب المستشفى گالت جايه الكم
ادحك المستشفى الناس بيها متدمره
و الكل لابس شي يحميهم من الفايروس
مُلاذ : اطلعن انا هسه اجيب هتان و اجي
غاده : شنو نطلع؟
مُلاذ : اطلعن اصعدن بـ السيارة
غاده : ما نطلع شنو السالفه نعوفج وحدج
مُلاذ : غاده فايروس و الدنيا محترگه
لا يصيرلجن شي انتِ و ملاك اخذيها و اطلعن
رادت تحجي قاطعتها
مُلاذ : غاده اذا اتمرضتي لا سامح الله
يتمرض الكل وياج و عندج طفل
اخذي ملاك و اطلعي ، اصعدن بالسيارة
غاده : و انتِ ؟؟
مُلاذ : راح اخذها بسرعه و اجي
انطيتها السويج صفنت بـ وجهي
اخذت ملاك و طلعت من يمي
تلفون غاده بقى بـ ايدي
خابرتني الـممرضه تدور علينا
شفتها رفعت ايدي اشرت الها اجت ناحيتي
سلمت عليه و اخذتني لـ مكان هتان
دخلت الردهات ادور بـ عيوني عليها
وسعت عيوني مصدومه و جمدت بـ مكاني
لمن شفتها وجهها اصفر و شفايفها بيض
ايديها مشخطه عيونها جواهم اسود
كل ملابسها تراب و حتى بـ شعرها اكو تراب
نزلت عيني لـ ركبتها و ايديها
رفعت عيني لـ المرضه لمن حجت
- شنو تصيرين منها؟
مُلاذ : اختها
هزت راسها بـ قبول
مُلاذ : شنو الصار فحصتوها شفتوها؟؟
- فحصناها
مُلاذ : اي ؟؟
- هي متزوجه ؟
هزيت راسي بـ رفض عاكده حواجبي
- جسمها عليه كدمات
و من وصلت النا جانت تنزف
بلعت ريگي مصدومه و رجعت عيني عليها
اريد احجي گوه انطق الكلمة
مُلاذ : هي اجت لـ هنا لو ...
- لا واكعه بـ الشارع و مجموعة ناس شايفيها
متصلين بالاسعاف و جابوها النا
مُلاذ : ما حجت شي ؟
- لمن صحت صارت تصيح و تبجي
ضربناها ابر مهدئه حتى تهدء
و بـ الاخير سألتها عن رقم
گالت عن رقمكم و اسم غاده و نامت
هزيت راسي بـ قبول اتقدمت خطواتي ثگيله
وكفت يمها ، شصاير بيها ؟ شلون نساعدها ؟
خليت ايدي فوك ايدها و اكرض بـ شفتي
مسحت على شعرها ادحك لـ وجهها
حاجيت الممرضه اريدها تكعدها
گالت ما نايمه بسبب المهدء لان المهدء
بس يهدي الاعصاب ، اتقدمت لـ يمها اصحيها
مُلاذ : هتان ، هتان
بلعت ريكي و مسحت وجهي
و رجعت اكعدها لحد ما فتحت عيونها ذبلانات
دحگت بـ وجهنا ، همست
مُلاذ : انا يمج لا تخافين
ظلت صافنه بـ وجهي
مُلاذ : يلا گومي نروح لـ بيتكم
ساكته ما تنطي ردة فعل على اي شي
رفعتها من مكانها و سندتها عليه
سألت الممرضه اذا اكو الها علاجات
گلتلي اصيح الدكتور و اجيج صاحته و اجت
انطاني علاجات و دهن علمود الجروح
تلفوني تجي اله اتصالات ماكدر اشوفه
حجت هتان بـ همس فزيت ادحگلها
هتان : اخواني اذا عرفوا ما يحبوني
لا يعرفون باهر و أيهم ما يحبوني بعد
نزلت دموعها و تردد "ما يحبوني بعد"
حضنتها لـ صدري و دموعي متحجره بـ عيني
مُلاذ : ما يعرفون مارح يعرفون
انا رح اساعدج انا وياج لا تخافين
بجت على صدري و جسمها يهتز
شلتها و اخذتها لـ السياره ، ما تكدر توكف
هي اصلاً كصيره و خفيفة ، وصلت يم السياره
نزلن غاده و ملاك مصدومات
صَعدت هتان بـ الورا يم ملاك
كنبصت بـ الگاع كدامها
و هي تبجي و تناشغ ، لزمت ايديها
مُلاذ : دحگيلي انا وياج ما رح نحجي لـ احد
بس الله يخليج گليلي منو السوا هيج اطيحلج حظه
بس دموعها تنزل و شفتها ترجف
سكتت عنها و گمت سديت الباب
رحت اشتريت العلاجات و رجعت الها
صعدت اسوق و غاده تمسح بـ دموعها
دحگتلها بـ المراية ملاك حاضنتها و هي تدمع
وجهها تعابيرة جامده و بس تدمع ، الكل يبجي
نزلت دمعتي على خدي ما سيطرت
كرضت شفتي ساكته و مسحت دمعتي
جريت بطل المي شربت منه ،
سلمته بـ ايد غاده و حجيت
مُلاذ : سدي
اخذت القبق سدته و انا رجعت اسوق
احاول اركز كل شويه ارفع عيني
ادحگلها الگاها هادئه و تدمع
أيهم يخابر عليه رفعت تلفوني دزيتله رساله
مُلاذ : بالمحل اشتري لـ ملاك هسه رح اجي
دزيتها و سديت التلفون رجعته بـ الجنطه
وصلنا لـ البيت ، رادت غاده تدك الباب وكفتها
مُلاذ : لا ديربالج
غاده : لعد شلون ندخل ؟؟
دحگت لـ الباب زفرت نفس و چلبت بي
اتشلبيت عليه ، طفرت ، الحمدالله انا طويله
و الا جان هسه انا متكسره على كثر ما اطفر
فتحت الباب دخلت غاده و هتان و ملاك
فتحنا باب المطبخ ، غاده دخلت كدامنا تشوف
خاف اكو احد موجود ، اشرت النا ماكو
دخلنا بـ هدوء اخذت غاده مفتاح من فوك الثلاجه
دحگت لـ هتان بعدها على نفس الحال ، شلتها
- لا توكعن
مُلاذ : لا ما نوكع بس ابقن هادئات
صعدت بيها لـ فوك و غاده اتقدمت تفتح قفل الباب دخلنا هتان ، خليتها ع الفراش دحگتلها ساكته
لا اكدر اضغط عليها و لا اكدر احجي
رفعت تلفوني لمن اجاني اتصال من امي
جاوبت عليها ، گلتلها جايه و سديته
رجعت عيني على هتان يلي صافنه بـ السگف
دحگت لـ غاده اتقدمت لـ يمها و حجيت
مُلاذ : لازم اروح جاي يدكون عليه
رح اجي انتبهي لـ هتان و ظلي يمها
غاده : طبعاً
مُلاذ : عندج العلاگه مال ادويه ؟
غاده : اي
مُلاذ : جيبي بيها مغذي خل اشده الها
غاده : وين تعرفين ؟
مُلاذ : داخله دورة مال هاي السوالف
و اعرف منها
ملاك : اي مره شكلت كانولا لـ روحها
اخذت الادويه و رحت اسوي الكانولا لـ هتان
ادحگلها ما تنطي ردة فعل
حتى من وخزت ايدها ابرة الكانولا ، صافنه و تدمع شديت الها المغذي و گلت لـ غاده تنتبه عليها
طلعت من يمهم و انا احس روحي محروگه
هسه شلون ارجع لـ البيت و ادحك بـ وجه أيهم
وصلت لـ البيت
فتحت الباب مال بيت اهلي بـ المفتاح
كامت امي تحجي علينا
فيروز : ليش تتاخرن
الف مره گلتلجن استعجلن ، شكد دكيت عليج
ليش ما تجاوبين؟؟ وين الغراض ؟
دحگت ايدينا فارغه ، عضيت على شفتي
مُلاذ : المحلات معزله
عكدت امي حواجبها
مُلاذ : يمه فايروس محد يفتح المحلات
و هاي بتج ما ذكرت غير هسه
رجعت امي تحجي علينا لان اتاخرنا
عفتهم و طلعت من البيت ، دحگت لـ الدرج
رجعت عيني على باب الشقق ،
طلعت كعدت ع الدرجتين يلي برا كدام باب الشقق
غمضت عيوني ، خليت راسي على ركبي
يا ربي اذا عرف أيهم يتدمر و الله يتدمر
لحظتها حسيت همومي ابداً ما رح تنتهي
كل ما اطلع من شي ادخل بـ شي ثاني
حتى لو ما كان يخصني
بس يخص شكو شخص قريب عليه
فتحت الباب و صعدت لـ الشقه
دخلت ، دحگت أبيل غافي ع القنفه
شلته وديته لـ غرفته و غطيته
طلعت من غرفة أبيل رحت بدلت ملابسي
و عقمت نفسي ، طلعت من الغرفة
دحگت لـ أيهم لمن طلع من الحمام
لاف المنشفه على خصره ، اجا ناحيتي
أيهم : ليش تأخرتي؟
مُلاذ : المحلات معزله و ظليت ادور
احجي و اونر بـ عيوني منه
أيهم : بعد ما تطلعين هيج طلعه
سكتت ادحك بـ وجه هزيت راسي بـ قبول
جبرت نفسي ادحك بـ وجهه ماريد اقلقه
خليت ايدي على خده امسح عليه
رفعت عيني لـ شعره المبلل ، وخرته عن كصته
بست خده ، رجعت ادحك بـ عيونه
مُلاذ : البس يلا
أيهم : جَـرح
ردت اروح لزم ايدي و سحبني ناحيته
خليت ايديه على اكتافه ، مسح على شعري
رجع ايده على خدي
أيهم : شصاير ؟
مُلاذ : ما صاير
أيهم : بس نظراتج ما تگول هيج
اتوزعت نظراتي بين عيونه
مُلاذ : شبيهم نظراتي؟
أيهم : ضايجه
مُلاذ : لا ما ضايجه
أيهم : انه اعرفج جَـرح
مُلاذ : تعبانه ما ضايجه
أيهم : يخسى التعب خل ابدل و اجيج
هزيت راسي بـ قبول
راح لـ الغرفه ، مشيت كعدت عن القنفه
ضميت ايد بـ أيد خليتهم على حلگي
مقدمه ظهري و كاعده ، خليت راسي بين ايديه شصارلها؟ شنو عاشت؟ شنو شافت ؟
منو السوا بيها هيج؟ ، اتنهدت و رفعت عيني
لمن أيهم كعد يمي ، دنيت روحي
خليت راسي على صدره هادئه و الصاله ظلمه
بس التلفزيون مشتغل و ضواه متسلط علينا
نزلت عيني لـ ايده يلي حضنت ايدي
غمضت عيوني هادئه و الضجيج بـ عقلي
و الهَم اتخلى مثل جبل على صدري ...
"أصابتني همومٌ وابتُليتُ
و من سُمّ المصائبِ قد سُقيتُ
و زاد تمسّكي بالصّبر
أني على حمْل المصاعب قد رَبيتُ
خلقت من الحديدِ أشدَّ قلباً
و قد بَليَ الحديدُ و ما بَليتُ
يا دنيا فَشُدّي لي و أرخي
سأقطعُ حبلَ وصلك طالـما حَييتُ"
مر اسبوع من بعد هاليوم و كل يوم الصبح
اروح اتطمن على هتان و هي على نفس وضعها
بس غاده تگول اصعد انزل الگاها تبجي
لا تقبل تحجي الصار و لا تقبل تشكي
لمن اروحلها انا الگاها تبجي هم
گوه نريد نضم السالفه عن اهلها
الحيرة اكلت عقلي اريد اعرف منو هيج سوا بيها
شنو جانت تفكر من ظلت ويا و ارتبطت بي
شلون ما شكت بي من ما قبل تبقى صوره يمها
طلع أبيل بعد ما بدلت اله ، كعدنا نتريك
ودينا لـ بيت اهل أيهم ، نزل أيهم يشوفهم
أيهم صعد يشوف هتان،
وجهها احمر و عيونها مطككه
عكد حواجبه اتقدم مصدوم ناحيتها
أيهم : هتان؟
شدت الغطى عليها و زاد بجيها اكثر
يا ربي رح تكشف نفسها اله يا ربي دخيلك
عيونها مغوركه و دموعها تنزل عشره عشره
انا و غاده وحده تدحك بـ وجه الثانيه
و أيهم يدحگلها بـ شك ،
فاتت غاده من يمي و طلعت من الغرفه
و انا واكفه يم أيهم و ادحك لـ هتان المنهاره
اتقدم أيهم ناحيتها ، خله ايده على خدها
وخرت وجها بسرعه ، تبجي و ترجف
أيهم : هتان ؟ هتان شكو ؟؟
رحت ورا بـ هدوء اريدها تسكت رح يعرف
كعد ع الفراش يمها و هي مكرفصه روحها بالزويه
بعده يريد يحاجيها
سمعنا صرخة غاده و صار صوت قوي ،
دحگت مصدومه طلعنا نركض من الغرفه
حتى هتان سكتت لطمت على وجهي
لمن شفت غاده بـ الگاع
اجت ام أيهم تركض و طلع باهر يركض
كعدت يم غاده بـ الگاع
مُلاذ : غاااده غااااده
غاده : رجلي اخ رجليييي
ظليت ادحك مصدومه ، غمزتلي
عگدت حواجبي و هي تون من رجلها
باهر ركض اخذ سويجه و شالها
راح يركض بيها لـ المستشفى
صعدها بالسيارة اشرت لـ أيهم
مُلاذ : اركض الحگهم
طلع وراهم أيهم بسرعه و ام أيهم
اجت لابسه عبايتها گلتلها راحوا
خرب عقلج غاده تريد تسكت هتان
شمرت روحها من الدرج ،
حتى صوت صيحتها قبل صوت الوكعه
رفعت عيني لـ الدرج دحگت لـ هتان الواكفه
صعدت ركض الها لزمت ايدها نترت ايدها
و وگفت مرتبكه ، وخرت ايدي عنها
و حجيت بـ هدوء
مُلاذ : عادي تدخلين الغرفه حتى احاجيج؟
مشت كدامي و هي تبجي
كعدت بـ الغرفه ، دخلت وراها
مُلاذ : بس فهميني منو السوا هيج
بس گليلي اسمه !
بجت بـ صوت و انا ادحگلها
هتان : س ... سيف
حجتها و انهارت تبجي
مُلاذ : انطيني رقمه
هزت راسها بـ رفض و هي تبجي گالت
هتان : كل شي اله ما موجود
يدزلي من رقم يگلي اذا تحجين
ادز صورج لـ اخوانج دزلي رقم أيهم و باهر
حجتها و زاد بچيها اكثر
هتان : عنده صور الي
رجفت تبجي ما تكدر تكمل
مُلاذ : شنو من صور ؟
غطت وجها و ايديها ترجف و تبجي
مُلاذ : موجودات عندج ؟
ما جاوبتني سحبت تلفونها
دورت بـ المحادثات لگيت محادثه داز الها صور
دخلت ع المحادثه لكيت صورها بدون اي شي
و هي عيونها مغمضه واضح يوم الخطفها ،
صوره ثانيه راسها على صدره بس صدرة مبين
و وجهها ، عيني احسها بعد ما تنسد
من صدمتي ، شمرت التلفون و لزمت ايديها احجي
مُلاذ : هتان هتاان اسمعينييي
هتان : انه شسوووويت انه
حجتها تبجي روحها رح تطلع كد ما بجت
و وجهه احمر و صوتها بادي يختفي
هتان : شلون غلطت هيج غلططط
تحجي و تلوم بـ روحها و انا اريد احاجيها
ما تخليني تقاطعني بـ استمرار ، گمت وكفت
اهدي بيها و اريد تسكت رح تسمع امها صوتها
و هي تخبلت تلوم بـ روحها و تبجي بـ صوت
مُلاذ : هتان اسمعيني..
هتان : شلوووون سويت هيج انه
شلون سويت هيج بيهم و بيه
مُلاذ : هتا....
هتان : اريد اموت اريددد اموت
يا ربي اخذني و خلصـ....
تريد تحجي و رفعت ايدي ضربتها راشدي
رجعت تصيح و تبجي ضربتها مره ثانيه
صحت بـ وجهها
مُلاذ : اذا غلطتي غلططط تكدرين تصلحينه
ما تكعدين و تبجين و تلومين روووحج
جان خليتي هذا عقلج بـ راسج من البدااايه
و فكرتي قبل لا تسوين شي يضرررج
هدأت ساكته تدحك بـ وجهي و دموعها تنزل
كعدت كدامها على ركبي بالگاع
نزلت وجهها بـ ايدي الي
مُلاذ : اسمعيني و ركزي وياي هتان
رح تسوين الاحجي؟؟
دحگت بـ وجهي و دموعها مستمره تنزل
مُلاذ : حاجيني رح تسوين الاگوله؟؟
هزت راسها بـ قبول متردده ، مسحت دموعها
مُلاذ : بـ اول لحظة
يطلب بيها سيف يشوفج رح توافقين
رادت تبجي و تعترض سكتتها
مُلاذ : اشش اسمعينيي توافقين
و بـ نفس اللحظه التوافقين بيها تخابريني
تگليله مكان اللقاء يكون كدام بيتكم
اول ما يتصل بيج هتان اول ما يتصل
تتصلين بيه فهمتي ؟؟ سمعتيني ؟
ظلت صافنه بـ وجهي
ضربت خدها راشديات خفيفة
مُلاذ : سمعتييييني؟؟ حتى تخلصين منه
و تخلصين اي بنيه ثانية ممكن توكع بـ غلطج
هزت راسها بـ قبول
مُلاذ : اذا خابرج سيف
يريد يلتقي بيج شتسوين؟
هتان : اوافق
حجتها صوتها يرجف
و نزلت دمعتها ع الگاع
مُلاذ : لمن توافقين شتسوين ؟
هتان : اخابرج
مُلاذ : عفيه هتان الله يخليج ساعديني
ساعديني و ساعدي روحج
رفعت عينها لـ وجهي ساكته
و تعابيرها جامده
مُلاذ : انا هسه رح اروح للـ الشغل
من يتصل بيج اتصلي عليه تمام ؟؟
هزت راسها بـ قبول
خليتها تتمدد ، شفتها غمضت عيونها
گلت رح تنام عفتها و طلعت من الغرفه
رحت بوست أبيل و حاجيت عمتي ام أيهم
و طلعت من البيت بسرعه رحت اكمل شغلي
دخلت المكتب و اجت الي مساعدتي
لـ الظهر و خابرت على غاده
غاده : مُلاذ
مُلاذ : ها ولج شنو وضعج شلونج؟
غاده : زينه بس انكسرت رجلي
مُلاذ : كلش زينه اصلاً
غاده : يمعوده جنت خايفه
لا ينكسر شي بـ وجهي
يصير شكلي يخزي زين اذا بس رجلي
هزيت ايدي و ضحكت
مُلاذ : شمرتي روحج من الدرج مو؟
غاده : غير اريد اسكت هتان ما تسكت
مُلاذ : لج تسكتين هتان
و تجلطين باهر شبيج انتِ؟
غاده : يمعوده هو اذا يعرف الصاير ينجلط
مُلاذ : ترا أيهم شك ، كوني يمهم اذا اجا
و انا احجي الاتصال صار يطوط
نزلت التلفون ، دحگت رقم هتان تتصل
مُلاذ : هتان الجاي تخابرني
بعدين اخابرج غاده
جاوبت على هتان بسرعه
هتان : رح يجي
مُلاذ : جايه
سحبت جنطتي و طلعت اركض من المكتب
صعدت بـ سيارتي ، بالطريق خابرني أيهم
أيهم : مُلاذ
بلعت ريگي من گال "مُلاذ" ما يگول "مُلاذ"
الا اذا الوضع جدي و صاير شي
مُلاذ : ها؟
أيهم : هتان شبيها ؟؟
مُلاذ : شنو شبيها؟
أيهم : مُلاذ انه مو غبي
صيحة غاده قبل لا توكع من الدرج
و ثنينجن من جانت تبجي واكفات يمي
و تأشرن الها بـ عيونجن تسكتنها
اخير مره اسأل ، هتااان شبيهااا!
مُلاذ : ما بيها شي أيهم شبيك!
أيهم : خوش رايحلها ما اعرف منج اعرف منها
وسعت عيوني مصدومه ،
سد المكالمه بـ وجهي ، خابرت لـ هتان
اريد تجاوبني ما تجاوب ، اتصلت عليها الف مره
اخابر على غاده يطلعلي مغلق ، دست بانزين
اريد بس اوصل قبل أيهم
گمت ادخل بـ طرق مختصره
دحگت سيارة أيهم اجت من الفرع الثاني
صارت سيارتنا وجه بـ وجه ، دخلت فرع بيتهم
رحنا بـ نفس الطريق ، صفينا سياراتنا و نزلنا
هستوني اريد احجي ، دحگت لـ هتان
يلي نزلت من السياره الگدامنا و راحت لـ البيت
درت عيني لـ أيهم يدحك لـ السياره
و فاتح عينه على كبرها ، درت وجهي ادحك ويا
اتجمدت بـ مكاني و عيني مفتوحه على وسعها
لمن الشخص يلي بـ السياره دار وجه
ناحية الفرع يلي احنا واكفين بي ، دحگلنا
بلعت ريگي يلي نشف ، همست مصدومه
مُلاذ : اسكندر !!!!!
بعدني اگول اسمه و شخط سيارته و طلع
ركض أيهم صعد سيارته و شغلها
شخط السياره وراه ، لافها بسرعه بالفرع
السياره الا شويه تنگلب بي
لحظه هي لحظه و اختفت سيارته من كدامي
و اسمع بس صوت شخطتها و مشيها السريع
اريد اتقدم خطوه ما اكدر
رجليه اتجمدن ع الگاع ، عيني تفتر بـ حيرة
مصدومه احس عقلي جامد ،
اسكندر الهيج سوا بـ هتااان
اسكندر الي استغل هتاااان !
ركضت ناحية البيت لمن اتذكرت أيهم
يلي شافها تنزل من سيارته و تدخل البيت
دگيت الباب بـ كل قوتي ، فتحته ام أيهم مرعوبه
دخلت اركض لـ البيت ، ثبتت رجلي بـ باب المطبخ
دحگت لـ هتان الواكفه هادئه و تعابيرها بارده
و دموعها تنزل بـ استمرار على خدها
غاده لازمه بـ العكازات واكفه مصدومه
نظرها على ايد هتان نزلت عيني لـ ايدها
دحگت لازمه سجينه يقطر منها الدم ...
****************
- يتبع الفصل التالي اضغط على ( رواية جرح الأيهم ) اسم الرواية