رواية جرح الأيهم الفصل الخمسون 50 - بقلم أيلان
"الجُــرح الخمسون"
نزلت الهث ميته من التعب
و لگينا ادهم ابن غاده يبچي
و خاله جنات تسكت بي
لان ادهم يبجي راكان يبجي ويا ع الواهس
دخلت بـ وجهي سبحت و طلعت بدلت ملابسي
ريد اكوم بعد مالي خلك
رجليه موتتني من الوجع
طلعت دحگت لـ سلطان واكف يم امه يحاجيها
رحعت عيني على امي تحجي بـ التلفون
فيروز : يلا منتظريكم
اتقدمت كعدت ع القنفه
اسمع ام سلطان تحاجي سلطان
- انت شبيك بينه چنها دُره تخبل انت ما قابل
سلطان : يمه يعني وكتها عليج العباس؟
- خل يجي جسار و احاجي كافي راح اموت
و لا انت و لا هو شفت جهالكم
-اسم الله يمعوده صلِ على محمد
بس گولي يا الله معلگه مره بـ رگبتي لا اعرفها
و لا تعرفني شبيج يمه لا تهججيني
- بت خالتك وين ما تعرفها
و الله اذا خطبها واحد غيرك اسود عيشتك
لو انت لو جسار تخطبوها شناقصها تخبل
سلطان : خابري لـ جسار گليله هيج
حتى يلوف و يرجع لـ الهند يروح يتزوج هنديه
و ما يتزوج دُرر تريدي يتسودن؟
- شبيها شو تخبل اسم على مسمى
سلطان : يمه وينها وين الدُرر
ذاك اليوم كاعدين يم اخوها طبت عليه تصيح
تگله ها الخايس اشتريتلي نستله
من شافتنا انخلست ، بعد يا درر ؟
- ليش انت من يدخل جسار البيت
تگله تفضل اخي شنو تحتاج
لو كل واحد بيكم لسانه شطوله هو يغلط
و انت تغلط
سلطان : هسه يمه فكيني مو متت من هالموضوع
زواج ما اتزوج كاعد على گلبج عزابي ديلا
عافها و طلع انداريت لـ هتان كاعده يمي
سمعت ام سلطان يمي
- هسه جسار يوافق عليها
عفتها و گمت ضجت من سمعتها تريد تخطب وحده لـ سلطان ، دخلت المطبخ كعدت يم امي
لحد ما رن تلفون امي ركضت عليه اخذته
و جاوبت ، اجت النا تركض فرحانه و تگول
- اجو
گمنا كلنا نركض لـ الباب
وگفنا بـ باب الشارع ندحك لـ سيارتهم
و سلطان وكف بـ الباب يصيح فرحان
-هلا بيك هلاا و بجيتك هلا
صفت سيارتهم و نزلوا
دحگت لـ مُلاذ و گبل بجينا انا و امي
يمه شكد مشتاقين الها و هي وجهها مو مثل قبل ضعفان وجهها اكثر بس بعدها حلوة
راح سلطان حضن جسار و جسار يضحك
نزل هو و مناظره و شعره الدوم مزين و لحيته الكثيفه و أيهم اتقدم شال أبيل ، اجت مُلاذ ناحيتنا فرفحت روحي شكد مشتاقتلها حضنتها ابجي
و هي تهدي بيه و تسكتني ، تمسح على ظهري
رفعت ايدها لـ امي وحضنتنا ثنينا سويه
مُلاذ : اتلگننني بالدموع الله اكبر رجعوني لـ الهند اروح اشتري ساري و اركص وياهم احسن الي
دارت وجهها و هي تحجي تريد تطلع
ضحكنا بـ صوت و جريناها و احنا نضحك
دخلت ويانا و سلموا الكل عليهم
اتقدم أيهم يحضن بـ اهله و يبوسهم يسلم عليهم
لحد ما دخلنا جوا و همَ كعدوا و انا و امي
كعدنا كدام مُلاذ ايدينا على خدنا و صافنين عليها
و هي تشرب مي نزلت البطل سدته دحگتلنا
مُلاذ : شبيجن و الله اجيت اغص
فيروز : مشتاقتلج يروح امج
مُلاذ : حبيبتي فيروز انا الاشوق
كامت امي يمها تبوس بـ شعرها
و أيهم كل شويه يلتفت يحاجيها و هي تبتسم اله
مُلاذ : رح اموت اريد اسبح
أيهم : اي و الله انه هم
جسار : انا ما اسبح اليوم لو اموت
اريد اروح انام
غاده : وين وين صلوا على محمد
و خاله فيروز الكاربتنا من الصبح لحد هسه
نور : و الله مخد يخطي منا لهنا بلا اكل
اريد اشوف الماعين ممسوحه
جسار : اذا احجي حجايه بعد
ياكلني و يشربني
مُلاذ : يلا كوم انسدحلك شويه
و انا اروح اسبح و اجيكم اكل و بدون سبح مستحيل
عزيز : غير تكعد راحه السمچه
مُلاذ : هاي انت هنا ما شفتك
عزيز : طبعاً غير زوجج يمج وين تشوفيني
مُلاذ : يغطيك خطيه هههههه
عزيز : ههههه الغسل اشتاقيتلج
نور : احم
دحگناله و دحگنا لـ أيهم
هو يحجي بفطاريه منطلق و أيهم خازره
مُلاذ : انا هم اشتاقيت لـ سوالفك التخزي
خل اصعد اسبح و اجي اتخزى بدالك
عزيز : ديلا خوش
ندست مُلاذ أيهم و هو كاعد
رفع عيونه دحگلها و شال أبيل و راحوا
گمنا نحضر السفره ، دخلت الغرفة اخذ تلفوني
لگيت هتان كاعده بـ الغرفة و بـ ايدها التلفون
ملاك : يا شتسوين هنا؟
هتان : انتوا اكلوا انه ما اشتهي
ملاك : هتان ؟ شبيج؟
اتقدمت كعدت يمها هزت راسها بـ رفض
هتان : مابيه شي
ملاك : شصاير باجيه ؟
هتان : لا
عكدت حواجبي مستغربه و هي عيونها حمر
اتقدمت اريد امسح خدها وخرت مني و كامت
هتان : ما بيه شي
وكفت تمسح بوجهها و طلعت من الغرفة
دحگت وراها صافنه مدري شبيها
كل ما اشوفها الگاها هيج عيونها حمر
من موت أيمن ما رجعت مثل قبل ابد
اخذت تلفوني و طلعت من الغرفة
رحت اكمل وياهم تحضيرات السفرة
دخل سلطان لـ المطبخ اخذ من الطرشي
ضربته امي على ايده
فيروز : بطلوا سالفة تاكلون قبل الاكل تشبعون
سلطان : خاله فيروز و الله طالعه عينج عليه
شجاج وياي ها؟ لو تحبين جسار و ما تحبيني
فيروز : ههههه بطل هاي سوالفك
و تعال شيل الماعين ويانا
سلطان : انا على التدريب الاكلته يمج هالفتره كلها لو اتحول بنيه اصير چنه معدله من وراج
فيروز : ههههه لا مو شرط عود ساعد مرتك
سلطان : اي زوجينياها يلا و اساعدها
فيروز : انت بس أشر و بـ عيني
اندار يدور عليه بـ عيونه
و من شافني رفع اصبعه ناحيتي
و امي ما منتبهه ترتب بـ الاكل
سلطان : هاي اريدها
شردت بسرعه وكفت يم البراد و امي اندارت
اندار سلطان يدحگلي رافع حاجبه
حصرت ضحكتي ، اخذت الماعين و طلعت
خليتهم ع السفره
غاده : ملاك تعالي اكعدي يم أدهم
خل اروح انا اجيب الماعين وياهم
ملاك : خو انا اجيبهن
غاده : لا انا و باعي جاكيتج مفتوح سدي
ملاك : ما ينسد ما بي دكم
غاده : هسه اجيبلج دنبوس و اسده الج
ملاك : تمام
كعدت يم أدهم لان يدحك بـ تلفونها
و تخاف يتحرك و يطيح من القنفه
شلته خليته بـ حضني و هو يدحك بـ التلفون
شكله يخبل بـ حلگه اللهايه و شعره مرتب
و هو ابيض يشبه ابو و عيونه كبار
دحگت لـ سلطان لمن اتقدم كعد يمي
سند ظهره على تجوة القنفه و حجا
سلطان : خوش تفلتين
ملاك : لو باقيه امي تبيتني بالشارع اليوم
سلطان : لا يمي تباتين
ملاك : حتى تبات انت بالشارع مو انا
مُلاذ تبيتك بالشارع
سلطان : دنتظري شويه ما بقى شي
ملاك : لـ شنو ؟
سلطان : اخطبج
ملاك : مُلاذ ما رح تقبل
سلطان : بكيفها ؟ لعد المن الله مخليلج لسان
ردت احجي و ابتسمت
لمن أدهم وخر اللهايه و باس خدي
انداريت بست خده انا هم و هو مبتسم
ملاك : ولك اكزكز على شكلك
سلطان : انجبي و جيبي
ملاك : شنو ؟
يريد ياخذ أدهم مني ما قبلت
و أدهم يضحك عباله نلعب ويا
انا ضامته و سلطان يريد ياخذه من ايدي
سلطان : جيبي ولج
ملاك : لا لا أدهم مالتي
ضحك أدهم و انا على ضحكته اضحك
رفعت راسي من اجت غاده مبتسمه على ضحكة أدهم انطتني الدنبوس ، سديت الجاكيت
رفعت عيني لـ أدهم يريد ينطيني اللهايه
سلطان : شوف هذا شلون سربوت من الصغر
ملاك : هههههه لا أدهم خوش ولد
اتدنى سلطان باس خده و أدهم كشول ملامحه
ضحكت من كل گلبي لان شوارب سلطان تدغ خده
سمعت امي تصيحني ، خليت أدهم بـ ايد سلطان و گمت سمعته يگول
سلطان : مو عيب تبوسها ولك
ضحكت و رحت يم امي
ظلت تصخرني و هتان وياي تروح و ترجع
بـ ايدها تلفونها و اجت اله اشعارات هواي
و صوت الاشعارات ينسمع بعدين رن تلفونها
التفتو الكل مستغربين
و هي سدت الصوت و طلعت من يمنا
دخلوا مُلاذ و أيهم و أبيل و وراهم دخلت نور
كملنا السفره اتلفت أيهم يدور بـ الوجوه
أيهم : هتان وينها؟
باهر : هسه جانت هنا
ملاك : هسه اصيحها
غاده : امشينا انا وياج
كمنا انا و غاده نصيحها
دورنا عليها بالبيت ما لگيناها
دكيت باب الحمام سمعتها تحجي
هتان : ها
ملاك : يلا صبينا غده
هتان : هسه اجي
اتقدمت غاده دكت الباب
غاده : افتحي الباب احاجيج
هتان : هسه اجي
غاده : لا ادري بيج باجيه و ما ترديهم يشوفونج
افتحي الباب خلي احاجيج
فتحت الباب و طلعت بوجهنا عيونها حمر
غاده : باع عيونها ،
اسمعيني تسوين روحج جنتي بـ المطبخ
و تگليلهم كصكصت بصل
و رحت اغسل عيوني كامن يحرگني ، زين ؟
هزت راسها بـ قبول و طلعنا
الكل رفعوا راسهم يدحگولها مستغربين
دحگلها أيهم و گال
أيهم : هتان تعالي يمي
ابتسمت و اتقدمت من بين الكاعدين
كعدت يم أيهم و انا كعدت يم مُلاذ
باس أيهم شعرها و يحاجيها بـ همس
هزت راسها بـ رفض گالت
هتان : لا ما ابجي بس جنت اسوي البصل
وي غاده و عيوني كامن يحرگني رحت اغسل
أيهم : اكيد ؟
هتان : امم
أيهم : ليش هيج ضعفانه انتِ و امي ؟
باهر : ها شقصدك انه سمنان
أيهم : اي ولك شنو ما توكلهن
باهر : اي بس يكعدن ع السفره
نطردهن انه و غاده
ضحكنا و غاده تحجي
غاده : خو انا كمشتلك هتان من انت ماكو
صبح و ليل اكتلها
أيهم : چنه ظالمه
غاده : لا وين فقيره
أيهم : هسه هتان بيها مجال
بس نخاف كاتله باهر همين شو حسه ما يطلع
باهر : لا ما مرجيه منك ابو أبيل
انه الاكتلها مو هي تكتلني
غاده : متاكد ؟
باهر : لا حبيبتي مو عليج اقصد هتان
-هههههههه
سلطان : اي شلونها الهند ؟
ما شفتولي كاترينا كيف
مُلاذ : شفتها گلتلها سلطان يموت عليج
سلطان : يا بعد گلبي و شگالت
مُلاذ : گالت غدي ما لگيتو غيره يموت عليه
سلطان : هو هذا اليحب يضم بگلبه
سوده عليه حبتني بس تستحي
مُلاذ : هههههه توب من سوالف العجايز
سلطان : ما جبتولي هديه منا منا
جسار : خمستالاف هواي عليك
مُلاذ : انا جبتلك
سلطان : شجبتيلي
مُلاذ : مكينه تزين بيها لحيتك
سلطان : و حق هذا الله ما تستحون
ضحكوا كل ما يحجون
و يتداهرون هيج يضحكونا
جسار : لا يلا لا تبجون كلكم جبنالكم هدايا
سلطان : شكد احبك اخوي الحنين ابو گلب الطيب بس اكلك تعال شاورني هديه غاليه لو رخيصه
يعني اذا ابيعها بالسوك شكد تجيب
ضحك جسار و هو ياكل دفع سلطان
جسار : امشي ولي زفت تبيعها بالسوك
سلطان : ههههه اگللهم هاي من الهند
الله وكيلك يبوكوها و يخلوني هيج
جسار : فوك بوكتها يكتلوك و انا اكتلك وراهم
ظلوا الكل يسولفون لحد مخلصنا اكل
و لمينا الماعين و لزكنا بـ مُلاذ تسولفلنا عن الهند
شوي و اتجمعنا كلنا بالصالة و انطونا هدايانا
ظلينا نسولف بعدين كل واحد اخذ اله صفحه و نام بقينا بس احنا البنات كاعدين
رحنا كعدنا بـ غرفتي و نزعنا الشالات
بقت بس مُلاذ لابسه شالها
غاده : دنزعي الشال
مُلاذ : لا عوفي
غاده : لج انزعي هو منو هنا ؟
نور : اي صحيح بس احنا
مُلاذ :-
نزلت عيني لـ الگاع ساكته
وخرت الشال من شعري كلهم صاحوا مصدومين
منزله راسي رفعت عيني لـ ملاك المصدومه
مسحت على شعري من ورا ساكته
غاده : لج هاااي ليش هيج كاصه شعرج؟؟؟
رفعت نظري دحگتلها و رجعت عيني بـ الگاع
اتذكر يلي صار لمن جنا بـ الهند ...
بسبب العلاج الكمياوي بدء شعري يوكع
دحگت بـ المراية لـ أيهم يلي بـ ايده مكينه
و دموعه تنزل على خده
مُلاذ : لا تبجي عادي
اذا اتعالج يطلع من جديد
غص و حجا : كومي مُلاذ كومي من كدام المراية
ما راح اكدر اسوي شي
و انه اشوفج شلون تعاينين لـ روحج و لـ شعرج
هزيت راسي بـ قبول ساكته
رفعت الكرسي ، درته عن المرايه و كعدت
مُلاذ : يلا زين شعري
حجيت و انا احس گلبي يتكسر
بس لازم ابين اله انا ما مقهوره
راح يستصعب يزين شعري
اشتغل صوت المكينه و أيهم يبجي بـ صوت
ما يكدر يكتم صوته ، سرت المكينه على راسي
غمضت عيني و انا اتذكر ايام الخطف
نفس الصوت و نفس الشعور
بس كان شعوري اسوء من هيج بـ هواي
فتحت عيني على اثر خصلات شعري
يلي تناثرت على الگاع ،
اتذكرت بابا يلي حان يبوس ظفايري
و يبوس شعري دوم يحبه اكثر من كل شي
حسيت نفسي لحظتها افقد كل شي
بابا جان يحبه و مخلي بـ روحه و مستعزه بي
كل شي احبه لان بابا حَبه يروح من ايدي
صفيت كـ مُلاذ الابنه يلي ابوها جان يعشقها
اما كل شي جنت املكه فـ فقدته
رجفت شفتي لزمت ايد بـ ايد ساكته
عضيت على شفتي مقهوره
أيهم گلبه اتكطع يبجي بـ صوت منهار
ما يكدر يسيطر على روحه ، يموت على شعري
و هسه جاي يزين شعري بـ ايده
شمر المكينه بـ الگاع ، دار الكرسي بسرعه اله
حضنني و هو كاعد على ركَبه بـ الگاع
مسحت على راسه ساكته
أيهم : رح اموت مُلاذ راح اموت
مُلاذ : اش اسم الله عليك
وخر وجه من صدري
مسحت دموعه يلي على خده
بست كصته ، حجيت بـ هدوء
مُلاذ : كل شي يتعوض لا تخاف
غطى وجه بـ ايده و نزل راسه على رجليه
جسمه يهتز و يبجي محترك گلبه
أيهم : ولج لا تسوين بيه هيج
لا تسوين بيه هيج لا تموتيني
مُلاذ : زينت شعري كله لو بعد اكو؟
خلا ايده على راسي و دموعه على خده
أيهم : اكو
مُلاذ : تمام انا ازينه انت عوفه
أيهم : لا لا انه اسوي
مُلاذ : أيهم انا اسوي ترا ما يهمني شعري
قحط شعر دخيولي انا ازينه
أيهم : لا لا انه اسوي
حجا و نزلت دموعه غطى وجهه
و مسح وجه بـ ايده ،
مراح اكدر انسى وكفته وياي
لو شخص غيره جان ممكن بس يعرف بيه سرطان
يعوفني و يتكتر على صفحه و ما يهتم الي
بس هو بـ كل لحظة جان وياي
الليل ما ينامه اكعد ميته من الوجع
بس هو يخفف وجعي و يساعدني
سد المكينه درت وجهي دحگت لـ نفسي بـ المراية
ابتسمت و كسرتي واضحة بـ ابتسامتي
خليت ايدي على مكان شعري و امسح عليه
عباره عن صلعه و لا شعرايه بـ راسي
دحگت لـ أيهم الواكف وراي دمعته بـ عينه
التفتت اله رفعت عيوني
دحگت لـ وجه و حجيت
احاول اخلي ما ينقهر
مُلاذ : صرت مو حلوه مو؟
شعري جان ساتر عليه و ضعفت هم
ضحك و نزلت دمعته مسحتها
و هو حجا
أيهم : اطيح حظج لو گلتي هيج مره ثانيه
احلى بنيه انتِ و رح تبقين احلى بنيه
بدون شعر و بـ شعر ضعيفه او سمينه
سمره او بيضه او بـ اي شكل
رح تبقين احلى بنيه بـ عيني و بـ عيون الكل
يكفي انو تكونين مُلاذي
ابتسمت ، رفعت رجليه حاضنته
حاوط ظهري و ضم راسه بـ ركبتي ...
محيت هالذكر من كدام عيني
لمن گالت غاده
غاده : لج حاجيني ليش كاصه شعرج؟؟
مُلاذ : هيج تغيير
غاده : امداج و الله انقهرت جنت احب شعرج
مُلاذ : عادي يطول
غاده : شوكت كصيتي
من جنت اخابرج كاميرا شعرج جان نفس طوله؟
مُلاذ : قبل لا نجي كصيته
نور : بس لو اعرف أيهم شلون قبل ؟
مُلاذ : بدون ما يدري كصيته
نور : من شافه شگال؟
مُلاذ : عجبه عادي
غاده : هو صح انقهرت لان كاصته
بس كلش لايگلج ولج انتِ شنو شو كلشي يلوكلج
ابتسمت
مُلاذ : وجهي يرهم عليه كل شي
غاده : وحدج كصيتي لو بـ صالون؟
مُلاذ : وحدي
غاده : و الله خوش كاصته حبيته
نور : اي كلش حلوه كصته
مُلاذ : و لا يهمكم جيبولي المكص
ابتر شعركم هسه
ضحكن ثنينهن و گالن لا ما نريد
رفعت عيني لـ ملاك التمسح بـ عيونها
ما يدرون بيه زينت شعري
لان دوم البس باروكه لمن اخابرهم
حتى امي و ملاك استغربن شعري ما واكع
بس ما سألني انا اعرفهم من نظراتهم
شعري ولادي و شكلي صاير جنه ولد
و غرتي قصيرة ، بس بدء يطول
لمن اتعالجت من السرطان جان اكو مترجم ويانا
و مره بـ نفس الفندق ويانا
من شافتني لابسه شال استغربت
و اجت تحاجيني المترجم يترجم الي كلامها
و انا اجاوبها مره اجت لـ السويت مالتنا
و انا ضيفتها أيهم جان طالع هو و جسار
و هاي المره تجي يمي افتح تطبيق المترجم
بـ جهازي و هي تحجي بـ المايكرفون مال جهاز
و يترجم كلامها مدري شموازينا حاطين المترجم
و يترجم الها كلامي و يترجم الي كلامها
حجيت الها عن الصار وياي و السرطان و علاجي
كعدت تسولفلي على اشكال الزيوت مال شعر
كل يوميه تجيبلي زيت شكل تگلي عدنا زيوت زينه
و هي مره جبيره كلش حبيتها حبابه ،
لمن ردنا نرجع و هي عرفت ، انقهرت خطيه
بسبب زيوتها شعري كام صدك يطول
اخذت زيوت منها و انا راجعه لـ العراق
نور : اگلكم انا نعست خل ارجع انام
حتى راكان من اجينا لـ هسه بس يغفي
غاده : اي و الله احنا هم خل نكوم نرجع لـ البيت لان تعبت كلش و أدهم كل شويه يبجي
اصلاً هنا الكل ناموا
مُلاذ : ظلوا شويه
غاده : لا خل نرجع هو اصلاً البيت قريب
هتان امج نايمه تكعديها لو شنو؟
هتان : روحوا انتوا انه رح اظل شوي يم أيهم
لحد ما تكعد امي بعدين يجيبنا وراكم
غاده : تمام
صدك كامو هي و باهر و ابنها و راحوا
نور اخذت عزيز و ابنها و راحوا
بقت عمه منارس نايمين هي و امي و ام أيهم
و خاله ام جسار هم نايمه و جسار غافي
كلهم غافيين بس انا و هتان و ملاك
كمت طلعت من يمهن شفت أيهم متمدد بـ الكاع
و جسار و سلطان ثنينهم غافيين ع القنفات
ابتسمت و رحت يم أيهم أبيل غافي على ايده
و هو كاعد و صافن
مُلاذ : لك أيهم حصرتني الضحكه و الله
أيهم : شنو ليش
اتقدمت كعدت يمه
مُلاذ : امي حاطتلهم منوم لو شمسويه
شوف شلون كلهم نايمين و فاتحين حلوكهم
احنا الراجعين من السفر و تعبانين ما نمنا مثلهم
ابتسم يدور وجه يدحكلهم
ضحك بـ هدوء و دار وجه الي ، نحجي بـ همس
أيهم : ولج امج موكلتهم تبن
مخليه سلطان يطلع من السبعه يجيب سمچ
و كاربتهم بـ الشغل سلطان سولفلي
تگلي كاعدات هي و امك كل شويه و صاحن سلطاان بس اريد اكعد ع القنفه يصيحني
مُلاذ : حتى امك ذابه ميانه ههههههه
أيهم : امي بدون كل شي تصخر ياهوه الكدامها
نوب امج وياها لا ربحنا
اهتز جسمي اضحك
مُلاذ : اريد اصعد انام بس اكول عيب منهم
مرتبين النا و مدري شنو و اصعد انام
أيهم : خيولون نامي حبيبتي شحده اليحچي
مُلاذ : لا عيب احس
أيهم : ولج جايين من السفر
و عافونا و نامو يا عيب ههههه
مُلاذ : شمدريني
أيهم : تعالي تنامين بـ حضني ؟
مُلاذ : لا أيهم اكعد عني هسه اغفى
و اذا كعدو جسار و سلطان
يسوونا مضحكه لـ امة محمد
أيهم : دخيولون ذوله البرابيك يرحولج فدوة
مُلاذ : برابيك ههههه وين اكو زلم برابيك؟
أيهم : اكو ، جسار و سلطان
مُلاذ : كون يسمعوك هسه يخلوك تطلكني
أيهم : على جثتي اطلكج
و من ورا ذولة البرابيك ؟ لا مستحيل
ابتسمت ساكته دحگت لـ أبيل خطيه شلون نايم تعبان بس ما كدرنا نعوفه هنا يظل يبجي على ابو
و اساساً سفرتنا طولت جان خبلهم لو باقي هنا
شويه و غفى حتى أيهم
موتوني كلهم نايمين بطوا گلبي
رحت نمت يم ملاك لگيتها غافيه نمت يمها
هتان :-
دحكت لـ مُلاذ و ملاك غافيات
كمت بـ هدوء و طلعت من الغرفة
دحكت لـ أيهم نايم بـ الگاع
ابتسمت ادحگله شكد مشتاقتله
نزلت عيني لـ التلفون لمن اجاني اشعار
رفعت عيني اريد امشي
و ثبتت خطواتي لمن صارت عيني على جسار
يلي نايم ع القنفه ، بلعت ريكي ساكته
هزيت راسي بـ رفض "ما احبه انه ما افكر بي"
قنعت نفسي بـ هالشي ع الرغم
كل ما اشوفه لو اسمع اسمه يفز گلبي
قيدت روحي بـ سيف بس حتى انسى وجوده
حتى خاف افكر بي ، اذكر روحي بـ سيف
درت وجهي و مشيت بـ هدوء
فتحت الباب اريد اطلع طلع صوتها
وكفت اضرب رجليه بـ الگاع انفضحت
فتحتها بسرعه و طلعت و سديتها
فتحت باب الشارع طلعت دحكت لـ سيارة سيف
بـ الفرع الكدام البيت ، مشيت ناحيتها
فتحت الباب وصعدت ، التفتت دحگلته
سيف : ليش ما تجاوبين على اتصالاتي؟
هتان : تعرف السبب كلش زين !
سيف : زعلانه مني ؟
ترا بس بستج ما سويت شي
هتان : دائماً تسوي نفس الشي !
تحضنني لو تدنى عليه و انه الف مره گلتلك
ما احب هيج و تجبرني نلتقي و انه ما اريد نلتقي
سيف : غير اشتاقلج؟
هتان : حتى لو ما اريد نلتقي
انه أيهم معلمني هالشي غلط
ضحك بـ استهزاء
سيف : أيهم مو جان يحب هم
هتان : مو على الحب
بس معلمني ما التقي بـ ولد و انت جاي تجبرني
سيف : احنا شنو اتفقنا؟
نهايتنا زواج فـ عادي نلتقي
هتان : ما اتوقع نهايتنا زواج
لان انت اصلاً ما تفكر بهالموضوع
سيف : لا ليش تحجين هيج !
غير منتظر اجمع فلوس مهرج
هتان : اجيت و حاجيت اخواني ؟
سألتهم اذا يوافقون حتى تعرف مهري شكد
و على اساسه تجمع فلوس مو؟
سيف : اي طبعاً بس مو هسه
تدرين بيه وبـ شغلي
سكتت عنه دايره وجهي
كل شوي يلتفت لـ الباب و يحجي بـ استعجال
سيف : يلا ارضي خل اروح
هتان : روح
ردت انزل جر ايدي و باس خدي
هتان : لا تسوي هالشي لا تسووي
اريد ادفعه ما يعوفني
سيف : باجر التحق ترضينها التحق و اموت
و انتِ زعلانه عليه ؟
هتان : سيف احجي و الحجي
يدخل من هاي الاذن يطلع من الثانيه !
گلتلك ما اريد تتقرب مني ما احب هالشي
سيف : لا عادي نهايتنا زواج
سكتت و هو رجع باس خدي
فتحت الباب و نزلت من السياره
امسح بـ وجهي : تمام رضيت روح
عافني و راح امسح بـ خدي و دموعي تنزل
بـ شنو دخلت نفسي ما اريده و لا اريد يخطبني
بس اعرف بي ما رح يخطب ، كلش اضوج
من تصرفاته احسه بس يريد يلمسني
نزلت دموعي من حيرتي و انا امسح بـ خدي
رفعت عيني اريد اخطي و اروح لـ البيت
جمدت رجلي لمن لگيت جسار بـ بداية الفرع
و يدحك بـ وجهي ، تعابيره و نظراته تقلق
صفنت بي و احس جسمي برد اتجمد
اتوسل بـ روحي ما اريد ارجع لـ الصفر
سويت نفسي ما مهتمه و امشي بـ ثكل
بـ داخلي ادعي ما شافنا انه و سيف
وصلت يمه اريد اعبره و اكمل مشي
سمعته و هو يگول متنرفز
جسار : منو هذا ؟
درت وجهي و انه واكفه عَكسه
دحگتله ، دار وجه دحگلي ،
بلعت غصتي و حجيت
هتان : منو؟
كز على اسنانه
جسار : الجان بالسيارة!
هتان : صديقتي
جسار : و صديقتج شعرها مرفوع و كصير؟
و تبوسج؟
هتان : شقصدك انت؟
جسار : هتااان
هتان : لا تصيح بالشارع!
جسار : منو هذا ؟؟
هتان : شعليك شلك علاقه؟
جسار : انتِ صاعدتلج ويا واحد
و اخوج جوا نايم و هو مأمن بـ اخته
ما تسوي شي !
بلعت ريكي ساكته و عيوني ممليه دموع
هتان : ما يخصك هالشي
ردت امشي و هو استوقفني لمن گال
جسار : شكد نزلتي من عيني و رخصتي
نزلت دموعي ساكته عافني و راح دخل
دخلت ورا ، كعدت امي بسرعه كلتلها اريد نرجع
گوه حاصره بجيتي ، حرك روحي من گلي هيج
حتى ما اكدر ادحك بـ وجه و امي كامت
راحت كعدت أيهم و حاجته كام وصلنا
قَبل لا ننزل انطانا فلوس
و گال بعد شويه يجينا يتطمن علينا
باس كصتي و نزلنا ، كلام جسار يتردد بـ اذاني فعلاً كسرت ثقة اخواني شكد كرهت روحي ،
اول ما دخلت البيت ركضت لـ غرفتي
و كعدت ابجي ما اتحملت اسكت اكثر
سيف يدزلي غلقت تلفوني
و ضميت روحي بـ الغطى ابجي مقهوره
مُلاذ :-
كعدوا الكل ودعناهم وصعدنا لـ الشقة
بدلت لـ أبيل و كعد يرسم ابد ما ننطي تلفون
خاف يتعود عليه و بعد ما يعوفه لو يتابع تلفزيون
لو يرسم و يلعب ، بس ما ننطي تلفون
رحت لـ الغرفة اتمددت ، ظهري يوجعني
كم دقيقة و انفتح الباب ، الغرفة ظلمه
دخل أيهم ، كعد ع الفراش ، فتحت التيبل لامب
دحگتله كاعد ، منطيني ظهره و بـ ايده جكارته
دخن و زفر الدخان سند كصته على ايده
كمت على ركبي اتحرك و انا على الفراش
حضنت ظهره ، رفع راسه ،
خلا ايده فوك ايدي المحاوطه بطنه
أيهم : عبالي نايمه
مُلاذ : لا جنت متمدده
أيهم : تعالي
اندار الي حاوط خصري و بـ ايده الثانيه الجكاره
طفاها و رجع ايده الثانية لـ خصري
نزلنا ع الفراش ، اتمدد ، خدي فوك ارنبة خشمه
و هو يحركها على خدي
من يوم عرف بيه احب هالحركه ظل دوم يسويها
مُلاذ : تعبان ؟
أيهم : يمج انسى التعب
مُلاذ : لا يمي يجيك التعب
انا اكثر وحده تعبتك
أيهم : اش لا تحجين هالكلام
لا تخليني الجئ لـ غير طرق بالعقاب
مُلاذ : هههه دولي أيهم لا تضحكني
ابتسم ساكت
مُلاذ : تدري امي لسا ما شافت شعري
أيهم : عادي حلو راويه الها
مُلاذ : من انزل اراويها ، ملاك كامت تبجي
أيهم : كلتلج لا تلبسين باروكه
من تخابريهن حتى يعرفن و ما ينصدمن
بس انتِ ما تسمعين الكلام
مُلاذ : تدري جنت خايفه ما اتشافى
أيهم : الحمدلله اتشافيتي و صرتي احسن
مُلاذ : و الله أيهم ترا نسبة شفائي جانت قليلة
أيهم : انتِ قوية و كدرتي تساعدين روحج
خليتي نفسيتج متزنه رغم انه جنت ابجي يمج
من خوفي عليج ،
أيهم : بس انتِ حافظتي على معنوياتج ،
و ايمانج بـ انو تتشافين
اغلب مرضى السرطان يموتون بسبب خوفهم
و بسسب النفسيه تتفاقم حالتهم
مرض جسدي يصير و نفسي بـ التالي يموتون
مُلاذ : تدري بـ شغله أيهم
أيهم : شنو؟
مُلاذ : رغم جنت مو واثقة تماماً بـ أنُ اتشافى
جنت اظهر هالشي كدامك
بس جان عندي أيمان تام أنُ رب العالمين
كل اليجي منه خير لذالك ما خفت
مُلاذ : تأذيت صح
بس ما خفت من أنُ اموت بسبب المرض
لان اول و تالي كلنا نموت فـ جنت راضية
بكل اليصير بيه راضيه اموت بـ الطريقة
المقدرها الي رب العالمين
أيهم : مره قريت كلام جان مكتوب
"الله لا يعطي اصعب المعارك الا لـ أقوى جنوده"
و هاي العباره تنطبق عليج جَرح كلش تنطبق
مُلاذ : و انت هم تنطبق عليك
شوف شكد تأذيت بس صبرت وياي و ساعدتني
أيهم : جَرح احبچ هواي
مُلاذ : اهو مو اكثر مني
ضحك
أيهم : انه اكثر
مُلاذ : دروح بكيفك
سكت عني اتعود يصيحلي "جَرح"
و انا اتعودت على هذي التسمية
غفينا شويه و كعدنا
كمت غسلت وجهي احاول اصحصح
رحت كدام المرايه اوخر بـ كذلتي عن عيني
انداريت لمن أيهم صاحني
أيهم : جَـرح رايح اتسوك تعالي اقفلي الباب
مُلاذ : تمام اجيت
رحت ورا و هو طلع ، قفلت الباب
رجعت لـ يم أبيل بوسته و كعدنا نتابع تلفزيون
شويه و نزلنا انا و أبيل يم امي
انصدمت من شافت شعري و انقهرت
كعدت سولفتلها كل الصار و عن فترة علاجي
و هي تكلي انا جنت ناذره اطبخ و اوزع لـ العالم اذا صرتي زينه و تريد تسوي النذر
بقيت يمها لـ الليل سوت عشا
و كعدنا ننتظر أيهم يجي
فيروز : باجر ترجعين لـ شغلج؟
مُلاذ : اي الموكلين هواي و العالم منتظرتني
فيروز : جان ارتاحيتي اسبوع و رجعتي
مُلاذ : لا ماكدر بعد كلش تاخرت عليهم
و أيهم هم جان ماخذ اجازه باجر يرجع
و انا احجي اندكت الباب
راحت ملاك تفتحها ، سمعت أيهم يحاجيها
أيهم : جَـرح يمكم؟
ملاك : جَـرح ؟
أيهم : مُلاذ اقصد
كمت طلعت من المطبخ
مُلاذ : اي يول هنا انا قابل اشرد
أيهم : ولج ليش ما تگليلي خبلتيني
عبالي صار عليج شي
مُلاذ : هههه لا ما بيه شي
تعال امي مسويه عشا و منتظرتك
أيهم : امج جانت بـ واحد صارت بـ 3
مُلاذ : شقصدك
فيروز : ابد ابد ما قصده شي
ابتسمت و التفتت دحگتلها و هي تضحك
كعدنا ناكل
هتان :-
فتحت تلفوني دحگت لـ رسائل من سيف
- اخوج رجعو هو و مرته من الهند؟
-وينج؟
-ليش ما تجاوبين
-باجر انتظرج يم الكُليه
-وينج ليش ما تجاوبيني
-جاوبي بنت الكلب
و داز وراها هواي رسائل
جاوبت على الرساله يلي سابني بيها
هتان : بطل تسب بطللل
-ليش ما تجاوبين؟
-جنت نايمه
-و هاي الي ينام هلكد ينام؟
-اي
-اخوج و مرته رجعوا لو لا؟
-شعليك بيهم
-جاي اسئلج
-اي رجعوا
-اها
- اي
- باجر اريد اشوفج
-ما اداوم
- تداومين
- ما اداوم معليك انت
-تداومين و رجليج فوك راسج
- انت مو جنت رح تلتحق؟
-اي التحق بس اريد اشوفج ،
تداومين و بلا كلام زايد
سديت التلفون ما رديت عليه
دخلت غاده لـ الغرفة
غاده : يلا صبينا تعالي اكلي
هتان : ما جاي اسوي اي شي وياج اسفه
غاده : خاب شو دنجبي و اطلعي كدامي
ضحكت و گمت
غاده : و خاف عبالج ما منتبه بعدين اگابلج
و اعرف منو سعيد الحظ
هتان : لا سعيد و لا تعيس ما عندي شي
غاده : اي صح أبيل الكدامج مو غاده
ابتسمت ساكته و طلعت من الغرفه
ورا العشا اجتني غاده كعدت يمي
غاده : اي ست هتان سولفي
هتان : شسولف؟
غاده : شكد عمره من وين شلون عرفتي؟
شنو اسمه ؟
هتان : منا من بغداد ، دزلي رساله
مكتوب "سلام" و انا رديت كتبتله منو
ظل يسولف وياي و اتعرفنا اسمه سيف
غاده : حلو؟ شو راويني صورته
ابتسمت : شكله عادي
غاده : شو خل اشوفه
هتان : ما عندي صور اله
غاده : شنو تغارين ولج دراويني
مره متزوجة انا اريد اشوف ذوقج
هتان : و الله العظيم معندي اي صوره اله
كل تصويرنا بجهازه و ما ينشر صوره
غاده : شنو كل تصويرنا ملتقية بي ؟؟
سكتت كارضه شفتي
غاده : عزه لج احجي
هتان : يجيني ياخذني من الكُليه
او ينتظرني هنا
غاده : بس غلط تلتقين بي
هتان : اعرف بس هو يلح عليه
غاده : ليش ما يجي يخطبج؟
هتان : يگول بعد اجمع لـ مهرج
غاده : هو شيشتغل؟
هتان : ضابط
غاده : ضابط و يجمع لـ مهرج؟
هتان : شمدريني انه هم استغربت
غاده : خاف يضحك عليج؟
هتان : يسوي فضل لو يطلع ما يحبني و يعوفني
غاده : لحظة لعد اذا مو مهتمه هيج
ليش مرتبطه بي ؟
هتان : مادري غاده مادري حرفياً
غاده : شنو ما تدرين لعد هسه انتِ تگولين صورج يمه و هو ما يجي يخطب و ما مهتمه اذا عافج
هتان : ما يسوي شي قابل يبتزني ؟
غاده : لج هتان شهالعقل العندج؟
هتان : و الله قابل يبتزني و يطلب فلوس
شو هو ضابط و عندة فلوس خير من الله
غاده : چا الا بتزاز بس بالفلوس ؟؟
هتان : لعد ؟
غاده : گلج دزيلي صورج و انتِ بـ فلان شكل
بس ترفضين يجي لـ اخوانج يراويهم
يا ؟ هتان صدك تحجين انتِ؟
هتان : ما يسويها انه اعرفه
غاده : هي بكيفج ما يسويها
كل شي يسوون ترا !
سكتت محتاره
غاده : انتِ تحبي ؟
رفعت راسي دحگتلها ساكته
غاده : هتان؟
رفعت عيني لـ فوك ماريد دموعي تنزل
انه بـ نفسي ما اعرف اذا احبه صدك
لو بس حتى انسى جسار بي
اعرف غلط بس هو دائماً يدزلي
حتى لمن ردت انفصل عنه و اعوفه
اتوسل بيه حتى ابقى ويا
ظل كل يوميه يجي لـ الكُلية
و يصعدني غصب ويا
يكعد ساعات يحجي الي عن حبه الي
و مرات يبجي لان اعوفه ،
بقيت ويا و گمت انطي كل شي يريد
اجت فترة فعلاً صرت اهتم اله
لان اشوفه يحبني ، احاول احبه
و كل مره اگله "احبك"
احس روحي ما احجيها صدك
و رغم هذا استمريت مرات اشوفه ما يهتم الي
بس انه انطي كل الاهتمام
و ليش اسوي بـ روحي هيج ما اعرف
هتان : انه رح انام نعست
غاده : تمام على راحتج بس انتبهي من هذا
هزيت راسي بـ قبول و هي طلعت
رفعت تلفوني دحگتله اكرض بـ شفتي
و ايديه ترجف ، شرجعك ؟ شجابك عليه؟
من لحظة الدخلوا بيها لـ البيت و شفته
انه ابتعدت عن المكان الي هو موجود بي
لمن كعدت و اكلت وياهم
بس اريد ازيح عيني و اوخرها منه
و هو يضحك و يسولف و لا هامه
لحد ما صارت عينه بـ عيني
و هو مبتسم انمحت ابتسامته
و انه درت عيني و كملت اكلي
گمت متغاضيه و انه اشوف روحي شلون تحترك
فتحت تلفوني دخلت ع الصور
طلعت بـ وجهي صورته ،
خليت وجهي بـ الغطى و اهتز جسمي ابچي
شكد اكره حيرتي عليه و ويا
رفعت راسي لمن اجاني اشعار منه
وسعت عيني مصدومه و دخلت ع المحادثه
دحگت لـ رساله دازلياها ع الواتساب
مدري منين جاب رقمي !
جسار : ما رح احجي شي لـ أيهم و لا تظنين علمودج بس علمود ما احرك گلب اخوج بس اگلج شغله وحده هالدرب ما رح يفيدج و يمكن اكبر غلط اسوي من ما احجي اله لان انتِ رح تستمرين
جسار : بس حياتج ترجع الج
اذا تريدين تأذين نفسج ابقي بهالطريق
و خلي يتقرب منج بـ الحرام بس اذا تريدين تمشين بـ الطريق الصحيح فـ تعوفينه
رفعت عيني لـ حسابه لگيته حاضرني
اخذت رقمه و اتصلت بي ع الخط جاوبني
جسار : شتريدين ؟
هتان : حجيت الي تريده و حظرتني؟
جسار : اي
هتان : اعرف غلط بدون ما تعلمني
اما على سالفة ما تحجي لـ أيهم
و ع الرغم أنُ هالشي لـ خاطره بس شكراً
جسار : هتان هتان اسمعيني
سؤال واحد اسألج و جاوبيني عليه لا تچذبين
هتان : اسأل
مسحت دمعتي يلي نزلت
جسار : تسوين هيج بسببي ؟
ليش سويتي هيج ؟ حتى تنسيني لو شـ...
قاطعته قبل لا يكمل و نبرة صوتي ترجف
بس اريد اخفيها و اسيطر على روحي
هتان : مو بسببك انه احب سيف
و اريده و رح يخطبني عن قريب
سكتت ابلع غصتي ،
سمعت صوت الاتصال يطوط ، سده بـ وجهي
نزلت التلفون ادحك لـ المكالمه يلي انغلقت
بعدني اريد اسد التلفون خابرني سيف
جاوبته و هو يحجي و يسب بـ مدري منو
هتان : سيف شبيك ؟
سيف : الا اندمها
هتان : منيه ؟
سكت اسمع صوت اغاني من يمه
هتان : سيف انت وين ؟
سيف : تريدين عرك؟
زفرت نفس معصبه
و سديت الاتصال بـ وجهه
الف مره گلتله عوف الشرب و ما يعوفه
و كل ما يشرب يخابرني ساعات يحجي
يسب و الف مره يعيد كلمة "اندمها"
من يصحى و اسأله منو يگلي
"سكران جنت ماذكر"
غطيت وجهي و حاولت انام
لحد ما نمت صدك بس خل ينتهي هاليوم ...
مُلاذ :-
كعدت الصبح رحت لـ شغلي
و أيهم هم راح لـ شغله و أبيل خلينا يم امي
رجعت ميته تعب و أيهم گال اليوم يظل بـ شغله
صعدت أبيل و دخلت سبحت و طلعت ذبيت روحي
و نمت ميته ميته الشغل متراكم عليه
مرن يومين و أيهم بـ شغله
اجن البنات الي و كعدنا سولفنا
نور : حددنا عرسنا انا و اركان
و عزيز و ليان بـ نفس اليوم
مُلاذ : عزيز ما يشتغل غير بالتبديل
ازوجك اختي تزوجني اختك شنالسالفه
نور : ههههه لو تشوفيهم
هذا يگله راح اخذ اختك
و هذا يرجع يگله انا هم اخذ اختك
و ظالين هيج
غاده : يمه شكد رح يتعايرون
ملاك : اكيد هاي خلصانين منها
كعدنا نسولف و نخطط لـ عرس نور و اركان
و عزيز و ليان و نور شلعت گلبي متريد زفة
خلتني الطم
مُلاذ : لج هو العرس مره وحده بالحياة
غاده : باع منو يحجي ، تذكرين روحج حبيبتي؟
اجيتيني تگليلي اريد البس بنطرون بالعرس
خزيتنا ولجن
غاده : چا شبيه انا بـ عرسي
خليت امي الا شويه تطلع لـ المحكمه و تتبرى مني اشتريت فستان عرس ما أجرته حتى
و خابرت باهر بـ نص الليل و هو نايم
گلتله " اسمع ولك تسويلي زفة
و تترسلي الشارع عالم لا اخزيك و اعزيك"
غاده : خليت باهر يتراجع گلي ظلي يم امج
بعدين مشيت ويا ع الناعم و طلعتله وجهي الحقيقي ليلة العرس
مُلاذ : باهر يشعر بالندم
غاده : وين وين عيني وين يلگا مثلي
جاي اسفط الكنتور و اسولف وياهن
و هنه كاعدات ملتمات بالغرفة
كممت حلگي و ضحكت من شفت الساري
غاده : شكو؟
طلعت الساري من الكنتور و انا اضحك
غاده : شنو هاي ؟
مُلاذ : هههههه هاي جنت ضايجة
أيهم ضوجني كل ما انام يكعدني
سويت روحي زعلانه منه و هو عود يراضيني
گلي باجر اجيب الج هديه و انا صدكت
اجاني ثاني يوم جايبلي ساري و يكلي اركصي بي و اتعلمت الركص الهندي
غاده : يا ههههههه لج انتِ شنو
گبل تربطين فيشه
مُلاذ : و الله مليت هناك و صرت زينه
وضعي اتحسن و انا اضوج اكعد
كمت اتعلمت ركص هندي
نور : شنو صرتي زينه ليش انتِ شبيج؟
غاده : نفس السؤال
حكيت كصتي من اتذكرت جفصتي
مُلاذ : يعني اقصد نفسيتي تحسنت
و انا و أيهم و جسار هواي نطلع
بعدين ملينا من الطلعه ظلينا نكعد بـ البيت منطلع
غاده : يا انا منج اذا ما اشبر الشوارع كلها
ما اكعد و لا اركد
مُلاذ : انتِ طركاعه سوده لو ماخذيج
ترحين تركصين وي الهنود بالشارع
ضحكت و ظلينا نسولف
بعدين راحن و لـ الليل اجا أيهم
جاي اسولف ويا و حجالي عن ممرضه
گلي تدخل غرفته بلا ما تدك الباب
و هي مو من مساعداته بس اسيل و عبير يساعدنه و هاي متعينه جديد و تساعده
خلاني اعطب و انا صافنه بـ وجهه
مُلاذ : حلوه ؟
أيهم : اي عيونها خضر
خزرته متنرفزه مادري شسوي بعد
ضربته راشدي بس مو قوي لان نرفزني
خزرني ، كمت من يمه اريد اشرد
جر ايديه لـ ورا
راسي صار على متنه لزم فكي بتك ايد
و الايد الثانية مقيد ايديه ثنينهم لـ ورا
الأيهم : انتِ شنو نضربيني ،
اطيح حظج هسه؟
سويت روحي ما خايفة و حجيت
مُلاذ : ما تخوفني غيرك هيج هددوا و ما سوو
الأيهم : لا بالله ، مثل ما گلتي
الي ما سوو غيري مو انا
جر ايديه لـ ورا اكثر و سحبني
و انا احاول افلت روحي من عنده
مُلاذ : وخرر محد كلك تنزفزنييي
شنو عيونها خضر أيهم نوب يگلي حلووه !
الأيهم : انجبي چا ذيج المره
منيه تمدح جيرانهم الاشگر ؟؟
اخذ تيب من المجر بسرعه
و لزمني شد ايدية
مُلاذ : هاي كل قوتك
الأيهم : هههههههههه ، ما شفتي شي ...
دحگت لـ ايهم و صحت بي
مُلاذ : لك انت خبببببل ؟؟؟
الأيهم : هههههههه هاي مو كل قوتي
لزكني بالحايط حرفياً بالمعنى الحرفي
شالني خلاني على الحايط
مرر التيب عليه و لزكني بـ الحايط
و التيب على طولي طبقات وحدة فوك الثانية
بحيث بس اتحرك اوكع على وجهي
و أيهم متمدد بـ الگاع ايديه جوا راسه
يدحگلي و يضحك و انا اصيح
مُلاذ : مخببببببل
رفع ظهره عن الكاع سند روحه على عكسه
و بعده رجلية ممدودة ع الكاع
الأيهم : امداني جنت اخلي صورج يمي
و اكضج و اخطفج و هيج الزكج بالحايط كدامي
جان هسه لا متزوج و لا بطيخه
مُلاذ : ولك ايهم طركاعة الله
التافهه المخبل الچذاب افتح ذني عنييي
الأيهم : تعذريني انا الأيهم موش ياهو الجان
تدرين بيه گول و فعل
مُلاذ : و الله هسه اظل احوص لحد ما يفتحن
و اطيح على الكاع و اتعور و ابليك
الأيهم : غير صمغتج صمغ بالحايط
ما ادري بسوالفج مال جلاب
قلصت عيوني و خزرتة
اذاناتي كامت تطلع النار
مُلاذ : اريد اروح للحمام
شربت هواي مي
الأيهم : **** على روحج
يمه خبلني
اخير شي كمت اعيط
مُلاذ : أيهم المخبل الطكه و نص
الأيهم : اعتذري فوصتي اعتذري مني
اخ ما اتحمل اشوفج هيج اكو خيالات ببالي احلى
مُلاذ : لو تطلع نخلة براسك ما اعتذر
الأيهم : لعد ظلي هيج بـ الحايط
كل شويه اجي ابوسج و اروح ههههههه
مُلاذ : هلو هلو نوب مخطط
الأيهم : جا شعبالج استغلال الفرص لعبتي
مُلاذ : أيهم و النبي اذا ما فكيتني
اول ما تنزلني منا اتطلك منك
و بـ نفسي اقدم طلب الطلاق
اذا يسألوني ليش اكللهم يلزكني بـ الحايط
الأيهم : الفوصه ام براطم من يگلج القاضي
بوية ليش لزكج هالمسكين بـ الحايط
عود گليله لان ضربته و عبالي يسكت الي
مُلاذ : فد اكرهك
دزلي بوسة بـ الهوا و گال : فد احبچ
مُلاذ : أيهم افتح ايدي تعبت شبيك
أيهم : گليلي اسفه أيهمي
مُلاذ : أيهم شبيك
ترا بعدني تعبانه من المرض
احجي و اسوي روحي دايخه
ظل يدحگلي ساكت سويت نفسي رح اتقيء
و احجي و استعجل أيهم بالبداية ما صدكني
بعدين اجاني يركض كص التيب
اول ما كص التيب و لزم بيه ينزلني عضيت متنه
أيهم : اخخخخ ولج اخ خرب اهلج
هديت متنه و طلعت اركض من الغرفة
و التيب ملزوك عليه و اركض
أبيل شافني مات من الضحك
دخلنا لـ غرفته و گلتله يقفل الباب
أيهم : الفوصه البربوك ام براطم انه اعلمج
كعدت ورا الباب ضحكت و اوخر بـ التيب مني
كعدت أبيل بـ حضني بست شعره
شويه و نومت أبيل و طلعت من الغرفه
دورت ما لگيته بـ الصاله ، فتحت باب الغرفه
و مديت بس عيوني ادوره ما موجود
فزيت من لزم خصري و سد حلگي بـ ايده
أيهم : ادخلي خل انعل خيرج
دخلني الغرفه و انا اضحك بـ الكتمه
درت نفسي من بين ايديه الشاده على خصري
دحگت بـ وجهه
مُلاذ : شهالنحاسه تلزكني بالحايط عادي
بس اعض متنك مو عادي ؟
أيهم : عياله تعيلين و تشردين
مُلاذ : يلا كافي نتصالح
دحك لـ شفايفي رفع حواجبه و گال
أيهم : جؤ لازم اكو عقاب
مُلاذ : أيهم عوف هالنظرات المستهتره
الك فرصه وحده تصالحني بيها تصالح لو لا
دنك يبوسني و يمسح على شعري
اتمددنا و انا نايمه على صدره حجيت
مُلاذ : اريد شعري يطول بسرعه
اريد ترجع تظفره الي
أيهم : لو بعد عشر سنين يلا يطول
بعد عشر سنين هم اظفره الج و بدون ما امل
ابتسمت و دحگتله
مُلاذ : عود ليش شعرك مو طويل و اضفرلك؟
أيهم : يا بابا استري علينا و اكعدي
انه ادري بـ سوالفج شعري ما ينمو عوفي بـ حاله
مُلاذ : لا دحك استخدم نفس الزيوت مالاتي
هسه ينمو بسرعه بس دحك من ينمو بسرعه
نصوره و من يطول كلش نظفره و نصوره
أيهم : اي بابا و بعد ؟ تظفرين شعرج وياي؟
مُلاذ : اي و نشوف منو اطول ظفيره
و ظفيرتي طبعاً هي الاطول
أيهم : ولج اكعدي ولج ولج اكبري
تعبتيني كافي سوالفج مال فوصات تعبتني
ابتسمت و رفعت نفسي
كمت من يمه احير شنو اسوي لمن امل
رحت كدام المراية ادحك لـ شعري مضوجني
جريت الكرسي و كعدت
مشتريه لاستيكات صغار
ظليت اشد شعري بيهن
و انترس شعري لاستيكات
صارت كل خصله مشدوده بلاستيكه و شعري مرفوع بيهن جني ذوله ياللي بـ الكارتون
لمن يتكهربون متت من الضحك انداريت لـ أيهم
يريد يحاجيني و شاف شكلي ظل مصدوم
و انا متت من الضحك على نظراته
اريد اسكت ما اكدر
أيهم : ولج هاي شمسويه
مُلاذ : ههههههه دحك
عرفت سر شعر الكارتون من يتكهربون هههههه
صفن عليه و انا ادحك لـ وجهي بـ المراية
و اموت من الضحك شكلي يضحكني
أيهم : حتى السالفه الاريد احجيها نسيتها
ولج هسه ذني شيفتحهن من شعرج
شلت اللاستيكات و رحت اله
أيهم : لا جَـرح لااا اعرف هالنظرات انه
وخري خل اروح انام يم أبيل
كممت حلگه بـ ايدي و كعدت فوك بطنه
مُلاذ : مساع منو لزكني بالحايط؟
أيهم : مو انه ابيل
مُلاذ : أيهم و داعة امي لو فكرت تتحرك
و ما تخليني اسوي شعرك ما انام يمك بعد
أيهم : ولج ...
رفعت اصبعي خليته على حلكي
خزرته و نترت
مُلاذ : اش و لا حس
حجيتها و حاصرتني الضحكه
و أيهم انطاني نظرات الـمُبتلى
شديت شعره مثل شعري و ميته من الضحك
و هو مره يضحك على ضحكتي مره يغندب
أيهم : كافي جَـرح
مُلاذ : هههههه تعال حباب تعال خل نصور
أيهم : لاااا كافي خلص عقابج هاهيه
لزكت بي نمت بـ حضنه
و كعدت اصور و انا ميته من الضحك على شكله
عاكد حواجبه و مغندب و شعره مشدود و كل وحده بـ صفحه كل ما ادحگله اضحك
انفتحت الباب دخل أبيل يمسح بـ عينه
دار وجهه يدورنا بـ عيونه لحد ما شافنا
كام يبجي و يصيح و طلع يركض
و انا انهاريت ما اكدر نمت على رجل أيهم اضحك
خطيه اجا خايف يريد ينام يمنا و اخترع من عدنا
أيهم صفن عليه يضحك
دفعني من رجله و كام يوخر باللاستيكات
من شعره و يصيح لـ أبيل و أبيل يبجي
بـ علو صوته ، اريد اسكت روحي
هسه شبيه هيج صرت تافه بس ما اكدر
و اللاستيكات مطشره بالكاع
طلعت ورا أيهم لكيته حاضن ابيل يسكت بي
شعره طاير و نص بي لاستيكات و نص مابي
كوه كتمت روحي و رحت لـ الحمام
دخلت اضحك و اوخر باللاستيكات
عقدوا نور و اركان و عزيز و ليان
و قرب موعد عرسهم طلعنا اشترينا غراض
حجزنا قاعه يصير بيها العرس جانت جبيرة ،
صار العرس و كل شي مثالي
نور وفستانها و شكلها مرتب و انيق
و اركان الي اجا لابس كله اسود
و عزيز و ليان يخبلون هم
اول ما دخلوا الكل هلهل و طشو جكليت عليهم
بعدين اتقدموا كعدوا ع الكوشات
و بدت فقرات العرس
من ركص و من اكل و التحيات
بعدين طلعوا الزلم و كامن البنات يركصن
نور عيونها تدمع اروح و ارجع ارزلها
و شايله راكان بـ ايدي اگله غم امك
نور : ولج لا تعلمي هيييج
مُلاذ : ما يفتهم دشوفي من هسه زلمه
ما يغم امه عفيه وليدي عفيه دحكي نور
لو دمعتي بعد ما اگول عرسج احطج و املخج
نور : هههه لا و الله فرحانه
مُلاذ : هاي العالم قبل لا يخترعوون الفرح
جانو يبجون من يفرحون
هسه اكو شي اسمه ضحكه ابتسامه
هلهوله ركصه صفكه واحد من يفرح يسويهن
مو يكعد يبچي لا تفورين دمي
كامت نور و اتقدمت لـ النص تركص
جريت ليان و شمرتها يم نور يركصن ثنينهن
سلمت راكان بـ ايد عمتي و جريتها بـ هلهوله
رحت سحبت المايك و حجيت
مُلاذ : و احلى هلهوله لـ العرسان نور و اركان
النسوان ما عولن واحد يگللهن هلهلن
جرنها بـ هلهوله طرشن اذاني
رفعت المايك و رجعت حجيت
مُلاذ : هلهوله ثانيه لـ العرسان عزيز و ليان
رجعن يهلهلن
وكفت احجي بـ المايك مكيفه بي
مُلاذ : جان صاحبها و خذاها كللللوش
اغنيلكم ؟ بس مو تعيبن على صوتي
ضحكن النسوان و يهزن راسهن "اي"
شوف ذني مصدكات اغني الهن
هزيت ايدي و شغلت صوت أيهم و هو يغني
رفعت المايك و حجيت
مُلاذ : نور و ليان اغنيه من أيهم خاصة الجن
هاي هديه مني
ابتسمن و يدزلي بوسات بـ الهوا
دزيت لـ أيهم يدخلون اركان و عزيز
و اشرت لـ النسوان يلبسن عبيهن
و هنه فعلاً لبسن و انا لبست
وكفت يم الديجي و اول ما دخلوا
شغلت اغنية "دروب السفر" مغنيها أيهم
التفتت اركان مستغرب من الصوت
لحد ما وكعت عينه عليه ابتسمت
اشرت اله على نور ، ابتسم ابتسامه واسعه
اتقدم ناحيتها بـ خطوات ثگيله
و عيون متوهجه بيها الفرحه
النسوان يصفكن وي الاغنيه
و يغنن وياها هسه دسكتن خل يطلع صوت رجلي
نور :-
كل جسمي يرجف
احس روحي رح اموت من الفرح
بـ نفس الوقت خايفه يصير شي يخرب سعادتنا
لزم اركان ايدي غمضت عيوني
بـ داخلي تتسلل لهفة و فرحه لـ هاللحظات
شكد اتخيلتها و شكد حلمت بيها
غمضت عيوني متمنيه هالشعور اللطيف
يلي اتوسط گلبي و استقر بي يدوم لـ الابد
اليوم انا كدام حبيبي يلي من صغري احبه
ايده تحاوط خصري و عيونه تدحگلي
يتخلل ذاكرتي أول لحظة شفته بيها
قبل سنين :-
اتقدمت ناحية اسكندر و هو واكف وي اركان
من بعد ما صاحني
اسكندر : امشي جيبي النا دولكة مي
هزيت راسي بـ قبول و دخلت البيت
رفعت عيني لـ امي يلي دخلت المطبخ
و انا هستوني دخلت من برا ، صاحت بيه
- وين طالعه انتِ صديق اخوج هنا
صغيرررره اظل اعلم بيج؟؟؟
نور : ماما ...
اتقدمت عليه لوت اذاني حيل
و انا بچيت من شدة وجع اذاني
- بعد ديربالج تطلعين هييييج
نور : ماما و الله اسكندر راد مي و الله
هدت اذاني و گالت بـ نتر
- عبالي طلعتي من وحدج
امشي اخذي لـ اخوج مي
يلاا شنو هاي الفهاوه
عافتني و طلعت من المطبخ و عيوني مدمعه ،
اخذت دولكه و رحت ترست مي
و عيوني ماليتها الدموع ، امسحهم و ينزلن
طلعت صحت لـ اسكندر ما جاوبني
مديت راسي من الباب و انا صغيره
گوه شايله الدولكه ، اخاف اوكعها
طلعت بـ هدوء ، نزلت الدرجتين الكدام الباب
و عيني ع المي اخاف يوكع مني
سمعت صوته يمي و هو يحجي بـ خوف
اركان : ديربالج بابا لا توكعيها ثگيله عليچ
رفعت عيني ادحگله و هو اجاني
شال الدولكه من ايديه
الي لفتني كلمة "بابا" و نبرته لمن گالها
دحك بـ وجهي و انا عيوني مدمعه
مسحت دموعي و هو أردف مستغرب
اركان : ليش تبچين؟
مسحت عيني و حجيت
نور : ماما لوت اذاني
رفع حواجبه مستغرب
خلا ايده متردد على اذاني يمسح عليها
اركان : صارت حَمره
دار بـ ايده مي و مسح عليها بـ المي
اركان : غسليها بـ مي بارد
ظل مخليها على اذني و انا ادحكله
سحب ايده بـ تردد يدحك بـ عيوني
وكتها حسيته مثل غيمه مطرت على گلبي
يلي مشتعله بي نار و هالمطر طفى النار
ابتسمت ادحك بـ وجه و هو يدحك لـ ابتسامتي
درت وجهي خطيت كم خطوه
اريد ادخل جوا ، استوقفني لمن گال وراي
- انتِ شنو اسمج؟
التفتت دحگلته ، حجيت متردده
نور : انا نور
ابتسم و گال
اركان : شكراً ع الـمي نونه
ابتسمت ابتسامه واسعه يمليها الفرح
اول مره شخص يشكرني
على الرغم دوم يصخروني بـ بيتنا
بس و لا مره شخص اتشكرني
لان اجيب اله شي
حتى بيبي و عمتي او اي شخص ثاني
من لحظتها و انا حبيت اركان ...
الان :-
فتحت عيوني على أثر صوت اركان
يهمس بـ اذني بـ كل هدوء و حُب
يردد كلمات الاغنية
اركان : كبر حبنا و اشتهر
بـ عيونك حبيبي نبتدي دروب السفر
رفعت راسي دحگتله مبتسمه
لحنت وي الأغنيه أكمل
نور : على الجرف گعدنا ليالي
مر النهر و النخل عالي
تغيرنا و كبرنا يا غالي ظل النهر والنخل عالي
مثل نجمة و القمر ، كبر حبنا وازدهر
خلا ايده على خدي غمضت عيوني
مرتاحه بـ هالشعور ،
دگات گلبي احسها مسموعه
أردف بـ هدوء و نظراته يلي ينقري بيها الحُب تتوزع بين عيوني
اركان : بـ عيونچ يا حبيبتي
نبتدي دروب السفر ...
****************
- يتبع الفصل التالي اضغط على ( رواية جرح الأيهم ) اسم الرواية