رواية جرح الأيهم الفصل الرابع 4 - بقلم أيلان
"الجُــرح الرابع"
رحت وراهن
مُلاذ الدم يلي براسها انقطع
وبدا ينزل بشكل قليل
اتصلوا على الاسعاف
رادو يتصلون على اهلها
بس همَ ماعدهم اي جهاز
غادة : ستت هم كاعدين يمنا خابريي امي
رديتلها رقم امي
اتصلت عليها
اجت خالة فيروز
و وياها امي بمدة جداً قصيرة
بعد ما اتصلت بيهم المديرة
خالة فيروز عيونها مورمات من البجي
دخلت تركض بوجهها على مُلاذ
بجيت ازود لمن شفتها شلون طاحت يمها
تبجي و تنحب و تبوس بايديها
تتوسل بيها تفتح عيونها
امي يمها تحاول تصبرها على ما يجون الاسعاف
اول ما اجو شالتها خالة فيروز
مثل الطفلة بين ايديها
ركضت بيها على سيارة الاسعاف
نزلوا المسعفين ، نزلوا سدية
حطوا عليها مُلاذ
خالة فيروز صعدت وياهم هي و امي و راحوا
صاحت بينا المديرة و طببتنا
طبينا انا و نور مبندين من البجي
كعدت بالصف عاصرة راسي بين ايدية
و نور يمي
نور : شلون صار هيجج شلون؟؟
غادة : ما اعرف ما معقوله
طاحت على الحجاره من وحدها
رفعت راسي
بعد ما نور گالت
-خاف متعاركات هي و سُرى و دافعتها؟؟
دحگتلها ، بسرعة كمت من مكاني
طلعت من شعبتي رحت على شعبة سُرى
دفعت الباب و طبيت
صحت بصوت عالي : سُرررى
التفتت الي فازه
رحت عليها بـ خطوات سريعة
جريت شعرها بايدي
سُرى : اخخخ شعرييي عوفينيي
غادة : انتِ الدفعتيييي مُلاذ على الحجاره ؟؟؟
سُرى : عوفيييي شعريييي
جريت شعرها اقوى
غادة : شوفي سُرى
انا عندي استعداد ابطل علمود مُلاذ
شديت على شعرها ، كزيت على سنوني
غادة : اذا عرفت الج ايد بحال مُلاذ اليوم
انيم الحجارة الطاحت عليها مُلاذ براسج
بعدها اشتكي و شتريدين تسوين سويييي
نترت شعرها من ايدي ، دفعتها و طلعت
فيروز :-
وصلنا مُلاذ للمستشفى
لمن شافها الطبيب گال راسها مشكوك
خيطوا راسها و هي مغمي عليها
ماكدرت اوكف على رجليه
و انا اشوفها كدام عيني بهالحال
نوموها بـ سدية ، گالولنا ننتظرها تصحى
الدكتور : الحمدلله مرت سلامات
لو الشك اعمق و الضربة صايره اعمق
جان راح يصير عدها نزيف داخلي
و نضطر ناخذها عمليات
بس هي تحتاج فقط خياط
حجيت بصوت مشحرج و عيون مدمعه
فيروز : زين دكتور ليش مداتصحى؟؟
الدكتور : مغمي عليها بنتي
لا تخافين اهدئي و اكعدي
كل جسمج يرجف قيسي ضغطج
هزيت راسي
اتحمدلنا بالسلامة و راح
كعدت يم السدية ادحك لـ راس مُلاذ
لافي بشاش لفات هواي
اجت ممرضة قاستلي ضغطي
طلع مرتفع درجتين
سحبت جنات (ام غادة) كرسي
جنات : اكعدي دادة رجليج يرجفن
كعدت ادحگ لـ مُلاذ
و انتظرها تصحى
راحت جنات تجيب عصير
كمت كعدت على السدية يم مُلاذ
اجت جنات ورا فترة وياها عصير شربت شويه
ما استقبل اي مشروب او اكله
كامت تمسح على ظهري
انهارت كل قوتي لمن شفت الدم
گلت هاهيه راحت مني
جنات : كافي تبجين حبيبة ياااع
چا البت تكعد تلكا عيونج مورمة صدُك جذب
فيروز : خفت عليها
و الله اموت وراها لو صارلها شي
جنات : يوووو شمالج تفاولين ع البت و على روحج
رفعت ايدي مسحت دموعي : لو إلياس ..
بلعت غصتي ، كملت
فيروز : لو إلياس موجود
جان حرك المدرسة عليهم شلون تتاذى مُلاذه
جنات : حقة ، باعي البت ما شاء الله عليها
فيروز سمي عليها و لبسيها خرزة زركه
و انتِ هم البسي عيون الناس ما ترحم
ابتسمت : تشبهه هي تربايته اصلاً
تسوي كلشي بكيفها وكحه ما تنردع
و لا تخاف من هي و طفلة
رغم هالشي ياذيني و يخوفني عليها بس ..
احبه انو هي ابداً ما تتصرف بكيف الناس
و رغم صغرها بس واعيه ، تفكر
رفعت راسي دحگتلها : و ما تسكت عن الحق
ابتسمت و عيوني مملية دموع
فيروز : بـ مرة من المرات
عمرها بالاشهر
توسعت ابتسامتي و دمعت عيوني
فيروز : حطيتها دقيقتين بالكاع
حتى اشوف الغدا
رحت ركض ركض
رجعت لكيتها ماهي بمكانها
دورت عليها البيت كله
و إلياس اجا يدورها وياي
اخير شي لكيناها بغرفتنا
غافية على بطنها
زاحفة للغرفة ، نايمة بين الكنتور و الميز
جنات : ههههههههه ، فدوة الله يحفظها
و يبعد عنها كل شر
فيروز : امين ..
مُلاذ :-
فتحت عيوني بـ تعب
راسي احسه يريد ينفطر من الوجع
دحگت لـ امي كاعده على السديه
و خالة جنات يمها
همست بصعوبه : يمه
ما تسمعني
غمضت عيوني رجعت فتحت
لكيتها تبجي ، خالة جنات تمسح عيونها
رفعت راسي ، حطيت ايدي عليه بـ وجع
فزت امي فوراً ، التفتت الي خايفة
فيروز : يمه اوكفي اوكفي لا تتحركين
مُلاذ دحگيلي يوجعج شي؟؟
حطيت ايدي على راسي
متوجعه : راسيي
فيروز : تمام هسه راح نروح للبيت
ترتاحين و تنامين و تشربين علاجج و تاكلين
تدنت عليه باست راسي
مُلاذ : شصار؟ ليش انا هنا؟
غمضت عيوني متوجعة
رجعت ادحك لـ امي
فيروز : بالمدرسة تعورتي
حطيت ايدي على راسي
صفنت ، تذكرت اخر شي
شمرني البنات على حجارة
جنات : الحمدلله ع سلامة بنتي
جاوبتها امي بدالي : الله يسلمج ام غاده
فيروز : شلون وكعتي ما تتذكرين؟
جنات : فيروز عوفيها مو هسه تسئلينها
دحگت للمديرة يلي واكفة بالباب
اجت اتجاهنا تحمدت الي بالسلامة
امي جاوبتها هم ، وكفت تحجي وي امي
انشغلت بوجع راسي ، ماكدرت حتى اركز
مرت دقايق ترخصت المديرة من امي ، راحت
اجا الدكتور شافني ، فحصني
انطا وصفة علاجات لـ امي
لزمت ايد امي ، كمت وياها
طلعوني صعدنا تكسي ، رحنا للبيت ..
نور :-
مگدرت اسكت نفسي ابداً
طلعت من المدرسة ، الدموع بـ عيني
فتحت باب السيارة ، صعدت
درت وجهي للجامه اتلافى نظرات اسكندر
اسكندر : نور
تحمحمت : ها
اسكندر : وين مُلاذ ؟ صارلي من ١١ واكف هنا
طلعتوا كلكم هي ما طلعت !
ماكدرت اسكت روحي
لمن تذكرت شلون راسها جان ينزف
غصيت بدموعي ، بجيت
احب مُلاذ كلش
اتمنى اصير بالقوة يلي هي بيها
رغم انا اكبر منها بس هي دائماً احسها اكبر مني
كل الناس ما سمعوا مني بس مُلاذ سمعتني
خافت عليه و اهتمت الي
صرت احسها اختي و قطعة من روحي
اسكندر : شكوو؟ شبيج ؟
دحگي رح الطمج على وجهج احجي
ما ردت اگول اله مُلاذ انضربت
اعرف اسكندر راح يدور عليها و يلكاها
و انا ما اريد اخلي اسكندر
يحصل مُلاذ مرة ثانية ابداً
تندمت هواي لان طلعت بـ ذاك اليوم من الغرفة
حلفت بعد ما اسوي اي شي
ينفع اسكندر و ياذي مُلاذ
نور : طلعت قبلي بـ هواي
متحاجيني زعلانه مني
اسكندر : اكسر راسها انا اعلمها خل الكاها
بلعت ريكي جسمي يرجف
بالي يمها بس ساكته كاتمه نفسي كتم
شخط السيارة ، مشى بينا
غاده :-
طلعت من المدرسة
رحت على مدرسة ملاك اخذتها
رغم سئلتني هواي وين مُلاذ بس مكدرت اجاوبها
اخذتها للبيت دخلنا
اخذت ملاك غسلت
بعدين طلعتلها بجامه ، بدلت ملابسها
لساني مسكت دقيقة بس ادعي افتر و ادعي
شوي و انفتحت الباب
كمزت من مكاني
اركض مثل الخبلة
شفت مُلاذ وياهم واكفه
حسيت راحة سكنت گلبي
جنات : حضري الفراش لـ مُلاذ
و تعالي وياي نصب غدا خالتج فيروز تعبانه
ردت احضن مُلاذ
بس هي ما تحب ، ابداً ما متحاضين انا وياها
ما افهم ليش ما تحب احد يحضنها
رحت للغرفة عدلت فراشي
جابتها خالة فيروز ، تمددت مُلاذ
فيروز : هسه اجيج مُلاذ
رفعت ايدها مُلاذ بحركة "👍🏻"
صاحتني امي : هسه اجي
كعدت يم مُلاذ بالكاع
وجهها تعبان دمعت عيوني
امسح عيوني فركتهم فرك و اناشغ
مُلاذ : ام الوصخ تبجي عليه
ضحكت و انا افرك عيوني
ابجي و اضحك : لا عيع ما ابجي عليج
مُلاذ : شنو اكو يمي ؟
غاده : شنو؟
مُلاذ : شنو اكو ع الميز ماكدر ارفع راسي
غاده : اكو مزهرية صغيرة و كتاب
مُلاذ : انيمهن براسج اذا عويتي يمي
صارلي ساعة الا ثلث
انا اسمع اصوات البكاء و النحيب
بحيث راسي صار هاكدة
فحطت من الضحك : هههههههههه
غاده : عابتلج فوك ما نبجي عليج
مُلاذ : شكد تبجون و تلطمون رحمه لوالديكم
صدك جذب نوب امي تبجي
و امج ع الواهس وياها
انا الدمعه استحسف انزلها
ضامتها للاوقات الصعبة
و انتوا تانكي دموع شايلين وياكم
غاده : هسه انتِ عود مفشوخه ؟
كلشي مابيج جنج عوعو على گولة ملاك
مُلاذ : دمشي ، قابل اظل اصيح اخ و اوي
غاده : اكلج عوفي الشقه
شلون انضربتي بالحجارة؟
مُلاذ : لطخت راسي بيها و انضربت
غاده : مُلاذ
مُلاذ : جنت طافرة من الدرس
و ما حسيت غير على برابيك ثنين
يسحولن بيه يريدن ياخذني لمكان
صيحت اريد ادفعهن و اوخرهن
دك الجرس ، دفعني طحت على الحجارة
غاده : عززززززه
مُلاذ : العزاني
غاده : منو منو تعرفيهم؟؟
مُلاذ : جؤ ، بس اكبر من عدنا
غادة : زين دحگي يعني انا بالبداية عبالي سُرى
بس هسه طلعت مو هيه الدافعتج
لعد ذني منو ؟
ابتسمت مُلاذ بطرف شفتها
مُلاذ : اعدائي هواي
غاده : سودة عباتي
مُلاذ : لا حمره
غاده : هههههه ، انجبي ، رح تگلين لخالة ؟
مُلاذ : لا ، عثرت بالطابوكه و وكعت
غاده : طاحظج
مُلاذ : و حظج
غاده : ليش تجذبين عليها؟
مُلاذ : ما مجذبه ، بس رح انطيها سالفة ثانيه
يعني اعتبري استبدال احداث
غمزتلي
غاده : عقلج يفر الواحد فر
مُلاذ : هاي هم اكو واحد هيج گلي
غاده : منو ؟
مُلاذ : غلسي
غاده : دحگي شلون اذا رجعن حاولن ياذنج
مُلاذ : لا ، ما ياذني
غاده : شلون متأكده ؟؟
مُلاذ : عار ما يصيرلي شي
غاده : امداج منو يكول على روحه عار
مُلاذ : انا
غوركت عيوني
غاده : خفت عليج و الله احبج مُلاذ
مُلاذ : عيع امشي ولي لتگلبيها عواطف
دارت وجهها للجهه الثانيه
انطتني ظهرها
غاده : امداج مو داعبر عن حبي
مُلاذ : شكراً غاده انا هم احب مشاعرج
غاده : مُلاذ
مُلاذ : ها
غاده : انتِ تحبين الناس؟
مُلاذ : لا
غاده : و الله؟
مُلاذ : انجبي ، احبهم
غاده : لعد ليش ما تعبرين الهم؟
سكتت ثواني و گالت
مُلاذ : احسن
غاده : تمام ، لا تنامين اكلي اول
هزت راسها ، دايره وجهها
طلعت من يمها
مُلاذ :-
اخذتلي امي اجازة
ظليت بالبيت ، طبعاً كله نتعارك انا و امي
هي تريد تجيب ادوية ، انا ما اخليها
كامشه ايدها ، مثبته رجليه بالكاع
و اجر بيها
فيروز : مُلاذ عوفينيي ولج
خل اطلع اجيب الدوه
مُلاذ : و الله ما تجيبين
فيروز : غير الدكتوررر كتبهن
مُلاذ : قفاصين يجذبون عليج
حاطين ستين الف دوه
هو اذا اشرب مسكن الآم ابو خمسميه اصحى
فيروز : ولج مُلاذ فووووصه هديني
خل اروح اجيب
مُلاذ : خاله وين المفتاح؟
جنات : بالباب
وخرت امي رحت ع الباب قفلتها
فيروز : يمه رح اتسودن
ولج هسه انتِ شعليج
وخري خل اجيب
خالة جنات واكفه تضحك علينا
مُلاذ : ما تجيبين الفلوس ذني يفيدنا
كلشي مابيه شوفيني شلون اكمز
صرت اكمز مثل الكنغر بـ مكاني
عوجت ايديه و هنه يضحكن عليه
استسلمت امي و طببتها جوا
فيروز : الناس ينفشخون ينامون بالفراش
بعد ما يكومون انتِ تكمزين مربيتلي كنغر
مُلاذ : شني حاسدتني على التكميز
فيروز : ولج ادبسز منو حاسدتج؟؟
مُلاذ : المديره
فيروز : هههههه
مر حوالي ٤ ايام
ضجت من الشاش كلش
اريد اسبح اغسل شعري
اجيت افتح الشاش
مسمعت غير عيطة امي بيه
فيروز : انتِ رح تخبليني شبيجج تحوصين
ضربت ايدي و رجعت شدت الشاش
فيروز : مُلاذ كافي وكاحه
مُلاذ : اليسمعج يكول عمري ٦ سنين
فيروز : اختج اعقل منج و الله العظيم
مُلاذ : هاي بعد
فيروز : مُلاذ اكيد عثرتي بالحجاره و وكعتي عليها؟
مُلاذ : اي
فيروز : مُلاذ فدوة اروحلج بعد لا تتعاركين
لمن جان ابوج الله يرحمه موجود
ما جنتي تتعاركين هلكد ...
قاطعتها قبل لا تكمل
مُلاذ : بمرة من المرات لمن تعاركت
و اجيت للبيت گال ابوي اذا تعاركتي بعد
ازاعلج زعال كلش قوي و بعد ما احاجيج
تنهدت ، مسحت كصتي بأيدي
مُلاذ : هسه ما عندي اب يزعل مني
دحگت لـ امي بجت
فركت وجهي بأيدي
مُلاذ : دكافي تبجين رحمه لوالديج
و الله العظيم هواي تصرفين دموع
فيروز : ههههههه هاي منين متعلمتها؟
ابتسمت على ضحكتها و سكتت
بعد كم يوم
رحنا لمضمد ، شلنا الشاش
سبحت ، رحت للدوام ثاني يوم
دخلت للمدرسة انا و غادة
لكيت نور كاعدة بالصف منتظرتني
و هم تبجي
مُلاذ : لا اله الا الله
شافتني ركضت عليه
نور : مُلاذ شلونج ؟ راسج يوجعج ؟؟
الحمدلله ع سلامه
مُلاذ : زينه عيني مابيه شي الله يسلمج
نور : الف الحمدلله
مُلاذ : نور عليج الله كافي تبجين
ما فد يوم لكيتج ما تبجين
دمعتج بعينج و تفترين
نور : اخاف عليج
غاده : معليج بيها هاي مجلوبه
تضوج من البجي
مُلاذ : هسه عليمن تصرفون دموع
هاي كدامكم عايشة راسي انشك شك صغير
هسه صرت زينه هاهيه اكطعوا الدموع
غاده : لج انتِ شايفه راسج شلون يكت دم؟
مُلاذ : جا شيطلع مي ؟ غير يطلع دم
غاده : عابتلج
مُلاذ : غاده سولفي خطتنا لـ نور
غاده : خوش
عفتهم و طلعت
رحت ادور بصفوف الاكبر من عدنا
لحد ما لكيت البنات الاثنين
يلي دفعني بذاك اليوم
رجعت لصفي
غاده : لكيتيهن ؟
مُلاذ : برأيج؟
غادة : طبعاً اي
كعدت على الرحله
غاده : زين هسه نبدي ؟
انطتني جبس اكلت
رفعت حواجبي ادحگ للساحه و گلت : لا
غادة : لعد؟
مُلاذ : بعد شويه
نور : زين و اذا شردن ؟
مُلاذ : مستحيل
دخلن البنات للصف يتحمدن الي بالسلامة
بدا الدرس و انتهى و انا راسي مخضوض خض
اشرت لـ غادة
هزت راسها بمعنى "تمام"
صعدت للصفوف الفوك فارغه
كعدت على الرحله تربعت
انفتحت باب الصف
دخلن البنات الاثنين وراهن نور و غاده
مُلاذ : حي الله من اجانا
التفتن الي بسرعة مخروعات
رادن يطلعن دفعنهن نور و غاده
بداخل الصف
صحنا بنية صديقتنا كمشت الباب من برا
واكفه تراقب خاف احد يجي
كمت من الرحله نكثت ايديه و ملابسي
رادن يضربنا ، غادة اضخم مني و منهن
طاحتلهن بالكاع ، دك راجديات
نور لازمه وحده و انا لازمة الثانيه
مُلاذ : بعد ايدي ايدج
ابتسمت ادحگلهم شلون محصورات
مُلاذ : ليش اجيتن تسحبن بيه ذاك اليوم؟؟
صاحت وحده منهن : عوفينااا
مُلاذ : احجن و اعوفجن
كالت وحدة منهم : سُرى هي الكالت
ناخذج الها
كمت من فوكاهن
تراجعت بخطواتي
مُلاذ : عوفنهن ، ليش صاحتني؟
كامن ينكثن ملابسهن و شعرهن
كعدن على حيلهن
-ما نعرف
صيحت بوجههن : و انتتتتن غبياات عرباانه
ما صدكتن واحد يكللجن و فوكاها دفعتني ع الطابوكه
رزلتهن رزاله غسل و لبس
ما خليتهن يرحن هيج
ظفرت شعرهن وحدة بالثانية
بحيث راسهن انلزك سويه
ركضت غادة تضحك
جابت قلم سبورة
حطتلهن حمره باللون الاحمر و هنه يصيحن
رسمت على وجههن و تضحك عليهن
عفناهن و طلعنا
غادة : سُرى شنسويلها نذبها من السطح؟
انا حلفت انيم الحجاره براسها عود
مُلاذ : ههههههه ، لا
غادة : لعد ؟
مُلاذ : خل نفرفر ذني بالساحه شويه
يضحكون عليهن بعدين يغسلن وجههن
و اروح للمعاونه عليهن
حتى يعرفون سُرى شلون مجلوبة
طلعنا للساحه
دحگت للبنات الاثنين
طلعن يريدن يروحن للحمامات
الكل يضحك عليهن ، مصدوم منهن بالساحه
رحت للحمامات وراهن
هنه يغسلن و يسبن بيه و بـ سُرى و يغلطن
ما يدرن بيه وراهن
طلعت من يمهن بكل هدوء
رحت للمعاونه انطيتها اسمائهن
بعد ما سئلت عليهن بصفهن ، گالولي اسمهن
"هدى" و "هند"
طلعت من يم المعاونه ، رجعت للصف
بعد ما اكدتلي هي و المديرة رح يفصلوهن
ما ردت اكللهم سُرى السوت هيج
ردت هنه البنات يكولن
و انا بعدين اخذ حقي منها بنفسي
دخلت للصف ، كعدت
خلص الدوام دك الجرس للبيوت
دحگت لـ سرى بالساحة وحدها
الطالبات و المدرسات بدن يطلعن
راحت نور للبيت
بقينا انا و غاده و سُرى بالمدرسة
مُلاذ : غاده
غاده : ها ؟
مُلاذ : شوفي منو بالساحة
دحگت لـ سُرى
غاده : اي شنسوي ؟
مُلاذ : المدرسة بدت تفرغ
غاده : مُلاذ و علي انتِ داهيه
تضمين السالفة ضم عبالي حتعوفيها
مُلاذ : ههههه چا اخليها هيج
رحت لـ سُرى
مُلاذ : سُرى دك الجرس
دحگتلي متسغربة
سُرى : اعرف
حكيت كصتي ، ابتسمت
مُلاذ : اكلج خل نتصالح
سُرى : نتصالح؟
مُلاذ : اي
سُرى : و ليش حتى اصالحج؟
مُلاذ : ما شبعتي من العرك؟
ظلت صافنه شوي و گالت : تمام نتصالح
مُلاذ : يلا نطلع سويه ؟
سُرى : تمام ، اجيب جنطتي
نظراتها خبيثه حيل و مستحيل اصالحها
راحت لصفها رحنا وراها
اتجهت سُرى لـ رحلتها يلي يم الشباك
وكفت وراها : سراوي
التفتت الي تدحگلي كفختها راشدي
مُلاذ : عبالج ما رح اعرف
انتِ الكلتي للبنات يجن ياخذني الج!!
كامت تعيط ، سحبت شعري بأيدها
ضربتها راشدي ثاني
مُلاذ : غاده حزام الصدريه
انطتني غاده الحزام مال صدريه
غاده ثبتت سُرى
و انا شديت ايدين سُرى بمحجر الشباك
هي مستمره على فد عيطه
بهالوقت ما يبقون غير العامله و الحارس
يتاكدون من الصفوف اذا فارغة
و احنا عدنا هواي صفوف
لان المدرسة متوسطة و اعدادية سوا
يعني يتاخرون لمن يلكوها
ضحكت ادحگلها : عود خل تفيدج خططج
شخبطت غاده على وجهه سُرى
و احنا نضحك عليها
اخذنا جنطنا و طلعنا
رحنا للبيت
من بعد ذاك اليوم
رغم سُرى كالت للمدرسات
انا و غادة السوينا بيها هيج بس ما صدكنها
البنات يلي دفعني على الحجارة
كالوا سُرى هي الكلتلنا جيبن مُلاذ
المراقبة يلي حطتها المعاونه
اتفقت وياي على كلامي عن سُرى
گالت سُرى يلي جاي تفتعل المشاكل وياي
و طبعاً سُرى لمن شافت هيج
استمرت بالعرك وياي
اجرنا البيت القريب على بيت غادة
جان ايجاره معقول ، صاحبة البيت مره جبيره
لمن شافتنا بس نسوان و ويانا بنية صغيرة
خفضت النا من الإيجار
بدت امتحانات الثالث متوسط الوزارية
احياناً غادة تجي يمي
او انا اروح يمها ندرس
غاده مستواها اضعف من مستواي
لذالك جنت اشرحلها افهم روحي و افهمها
امتحننا انا جبت معدل ٩٥
غاده جابت ٩٣
صرنا اعدادية
جنت بالعطل و بالدوام اشتغل
ابيع ورد ، ابيع كلنس
امي صارت تبيع الغراض يلي ما نحتاجهم
مثل الجدورة و تحوك ملابس و تبيع
و ملابسنا القديمه هم تبيعهم
نجيب كم فلس
خالة جنات تعرف تخيط
علمتني على الخياطة بس ما خيطت
بديت ادرس طلاب المنطقة
المواد يلي ما يفهموها و ينطوني فلوس عليها
ما جنت الحك ارتاح
بيوم كاعدين انا و امي
هي تريد اروح مجموعة طبيه
و انا اريد اروح قانون
اشتد النقاش بيناتنا
و هي صارت تحلف ما تخليني اروح قانون
فيروز : القانون شيلي من بالج
مُلاذ : الصيدلة و المجموعة الطبيه شيليها من بالج
فيروز : مُلاذ
مُلاذ : ابطل بس ما ادخل مجموعة طبيه
لو قانون لو ما اداوم
فيروز : عبالج ما اعرف ليش تريدين تروحين قانون؟؟
مُلاذ : بالضبط راح اروح قانون علمود ابوي
و لو بعد عشر سنين راح افتح قضيته يلي انسدت
بدون وجع گلب و هسه الي قتله مرتاح بحياته
فيروز : مُلاذ
مُلاذ : شنو مُلاذ ؟؟ شنو مُلاذ ؟
ابوي اخذوا منييي و تركوا قضيته و سدوها
و لا احد حاول يلكا دليل على القاتل
فيروز : و انتِ رح تلگين ؟؟
كمت من مكاني
دكيت اصبعي ع الميز بعصبية
مُلاذ : الچتال رح الكا و لو بس اشوف عيونه
يلي ما نسيتهن ابد ، راح اعرفة هم
رح يجي يوم و تشوفين
عفتها و رحت للغرفة
طول هالفتره هي جانت معصبة مني
و انا معصبة منها
اسكندر لحكني لمن طلعت من المدرسة
اندل ييتنا و استمر يضايقني
جمعت فلوس و طلعت للسوك
اشتريت جهاز نوكيا ، اشتريت شريحة
رحت على مدرسة ملاك
انطيت رقمي لـ مديرة ملاك
حتى خاف يصير شي يتصلون عليه
خليت الجهاز يم امي رغم ما تستخدمه
بس اذا تريد تتصل على خالة جنات
او اذا انا بالمدرسة
بيوم من الايام اثناء الدرس المُمل
استاذنت من المدرسة
مُلاذ : ست اكدر اروح للحمامات و اجي؟
-روحي لا تتاخرين
رحت للحمامات اريد اغسل ايديه
الدنيا بدت تصير حارة و ايديه يعركن
اريد ادخل للحمامات
خطيت كم خطوة و قبل لا ادخل
اتجمدت بمكاني
انصدمت و شهكت بـ نفس اللحظة
رجعت لورا طلعت بسرعة اتعثر
سندت ظهري على الحايط مصدومة
ايدي على حلگي
رجعت دحگت للمنظر يلي كدامي
و همست بصدمة : سُرى اسحـ*** !!!!
ظليت واكفه بمكاني ثواني
مسحت كصتي بـ أيدي درت وجهي
مشيت بسرعة
رجعت للصف
كعدت بالرحلة التفتت الي غادة
غاده : شبيج؟
-ما .. مابيه
غاده : اكيد؟
-ايي
كل شوي اتذكر منظرهم
يجيني غثيان قوي
دك الجرس طلعنا للساحه
دحگت لـ سُرى و صديقتها
نفسها البنيه يلي جانت وياها
انقرفت حيل فوك ما انا منقرفه من سُرى
اجت اتجاهنا
غاده : اهو هم اجت البريعصيه
نور : ههههههههه
وكفت كدامي
سُرى : اليتيمه اوي خطيه ابوها ميت
مُلاذ : سُرى
سُرى : امممم
مُلاذ : من شنو تعانين؟
شوفي اذا تريدين اجمعلج فلوس علاج و تعالجي
ما شبعتي من هذا الموضوع
شفتيني كتلتج تريدين اكتلج بعد شبيج أُمي ؟
سُرى : على الاقل عندي اب
دحگت لـ نور و غاده
ابتسمت ، تقربت عليها
ايديه شابكتهم خلف ظهري
نزلت الها راسي ، ابتسامه جانبيه ظهرت على شفتي
مُلاذ : على الاقل جان عندي اب يحب امي
و يحبني ، يحب اختي ، يخاف علينا شجاع
ما يفرط بينا
تقدمت اكثر ، رفعت راسي
مُلاذ : على الاقل ما عندي اب و ام متطلكين
و متجوعه للحب و التربيه و الاهتمام
تدنيت يمها و شاورتها
اكدت على كل حرف انطقة
مُلاذ : على الاقل انا مو اسحـ***
ابتعدت عنها ادحك
عيونها يلي توسعت مفجوعه و مصدومه
متجمده بمكانها بلا ما تنطق حرف
ابتعدت ، درت وجهي للبنات
مُلاذ : امشن
دارن وجههن وياي
اتجهنا للصف
غاده : شگلتيلها؟؟
مُلاذ : و لا شي
نور : علينا؟
مُلاذ : انجبن و امشن يلا لصفوفجن
دك الجرس
رحنا انا و غادة لـ صفنا
و نور لـ صفها
الدرس كان شاغر
النا و لـ كم شعبه
دخلت سُرى متجهه نحوي بخطوات سريعة
مرسوم وجهها بـ تعابير القلق و عدم الارتياح
ضربت على رحلتي و صاحت : شقصدج انتِ؟؟
استمريت بالجلوس بمكاني مرخية جسمي
رفعت رجليه حطيتهم على الرحله
حطيت رجل على رجل
مديت ايدي لـ غادة حطت بيها حَب
استفزيتها , هي منتظرة جوابي
و انا اتصرف باريحيه و اضحك
مُلاذ : اعشق روحي الزملي لزمة على واحد
سُرى : جاااااااوبي
كرزت الحَب : شفهمتي انتِ هذا قصدي
بلعت ريكها رفعت راسها تدحگلي
رفعت ايدها ، ضربتني راشدي
قبل لا تلتفت و تروح
كمت جريتها من شعرها
ضربتها بالكاع كعدت فوكاها
غاده كامشه ايديها
مُلاذ : اذا ما اوكلج كشور الحب ، ما اتسمى مُلاذ
اجن بنات الصف علينا يريدن يفرقنا
رفعت راسي دحگتلهن گلت بعصبيه
مُلاذ : الي تتدخل لو تصيح المديره
تاكل كشور الحب هي هم
وكفن مكانهن راحت وحدة سدت الباب
ابتسمت ادحك لـ سُرى يلي تصرخ
ساده حلكها بـ ايدي
ضربتها راشديين شلت كشور الحب
حطيتهن كلهن بحلگها
كحت شحطانه ، تدفع بيه
وخرت عنها مبتسمه كعدت برحلتي
كامت هي تركض حتى تذب الكشور
يلي شحطت بيها ، صارت تكح هواي
ركضت متجهه للباب
دفعت البنيه يلي واكفة يم الباب ، طلعت
غاده : راح تودع
مُلاذ : جؤ ، عار ما يصيرلها شي
ابتسمت غاده
انتجت بظهرها على الرحله الورانا
غاده : مارح تحجين شگلتيلها؟
مُلاذ : ماكو شي احجي
غاده : اكيد ؟
مُلاذ : لا
غاده : عابتلج لا تحجين .. اعتقد الدرس كله شاغر
مُلاذ : ما اعرف
انتهى الدوام
طلعنا انا و غاده
مُلاذ : انتِ روحي مري على امي
كليلها مُلاذ راحت تجيب حلويات للمشمش
لا تخاف عليه
غاده : اي خل اروح وياج
مُلاذ : لا روحي گلي لـ امي هيج
غاده : ليش؟
مُلاذ : غاده !!
غاده : خوووش
درت وجهي ، امشي وحدي و ادحگ لرجلية
يلي ادخلهن وحدة بالثانيه ، امشي بشكل اعوج
وصلت للمحل يلي دوم ابدل ملابسي بي
طلعت من المحل ، اشتريت بالونات
افتريت يم اماكن العاب الاطفال و الروضات
اشتروا من عندي كم شخص بعد الحاح اطفالهم
بالنهاية اجا رجال جبير اشتراهن كلهن لـ احفادة
او ممكن ما اشتراهن لـ احفاده
ممكن اشتراهن كلهن ، حتى يجبر بخاطري
اخذت الفلوس
رحت جبت حلويات لـ مشمش
الباقي انطيته لـ امي و انا تحت رفضها
فيروز : مُلاذ تعبتيني كافي
مُلاذ : يمه نعيد هاي القوانه كل يوميه ؟؟
فيروز : ما اريد منج فلوس ما اريد منج اي شي
يمه بس ادرسي بس انجحي
مُلاذ : جاي انجح و ادرس
و اشتغل و اجيب فلوس
هاهيه حلت فضت
فيروز : ما اريددد تشتغلين
اخاف عليج ليش ما تفتهمين ؟؟
مُلاذ : لا تخافين كلشي ما بيه
ماكو داعي تخافين
فيروز : مُلاذ !
مُلاذ : يمه اعقليها يرحم و الديج
المولده و المي و ملاك جاي تتمرض و تتعب
و الايجار و الدين شتريدين ؟
جاي ادرس مو تريدين ادرس
هاي جاي ادرس طلابه؟؟
فيروز : اسكندر يفتر وراج
بيوم يسوي مشكلة وياج و ياذيج مُلاذ !!!
مُلاذ : و هسه انتِ صدك
حاطه هذا الماعنده كرامه
فد سبب مهم حتى ما اطلع و اشتغل
ترا اسكندر اكمشه و ارمي من الجسر اذا تدنالي
فيروز : مُلاذ تعبتتت من عنادددج
بعد ما عندي طاقة تعبت من الحجي
خلص انتهى بعد ما تطلعين تشتغلين
كمت للغرفة بلا ما احجي و لا اجاوب
اشتغل يعني اشتغل
دخلت سديت الباب
كعدت بالكاع سندت ظهري ع الحايط
دحگت للضوة الخفيف يلي يمر من الشباك
درت وجهي ، نزلت راسي
سندت كصتي على ركبي
كمت طلعت من الغرفة
رحت على مشمش لكيت امي تقريها
تجيت روحي على الباب
مُلاذ : اليوم رح يجي ابن ام ضياء ادرسه
دحگتلي امي بنظرات "لا والله ما تتوبين"
هزيت راسي بمعنى شكو
نزلت راسها هزت ايدها
فيروز : شحاجيج؟
رجعت تقري ملاك
مُلاذ : مشمش اكلتي حلوياتج؟
ابتسمت و دحگتلي
ملاك : الكيكه اللونها ابيض طيبه
مُلاذ : بعد اكو شي ثاني من الجبته طيب؟
ملاك : حليب الككو
مُلاذ : تمام
وكفت بالباب حكيت راسي
مُلاذ : يمه رايحه اجيب الولد و اجي
-يا ولد؟
-ابني ، با ولد غير هسه الحجيت الج عنه
-مو رح يجي هو؟
-هسه خل اجيبه و اجي
- خل امه تجيبه
-ما تكدر ، اريد انام انا و خاف يتاخر
-مُلاذ..
قبل لتكمل قاطعتها : يلا رحت مع السلامه
اسمع امي تدردم عليه من الغرفه
فتحت الباب و طلعت ..
فيروز :-
طلعت مُلاذ
دحگت لـ ملاك لمن كالت : ماما
فيروز : ها حبيبتي
ملاك : انا ليش ما اشبهه مُلاذ ؟
ابتسمت بخفة مسحت على شعرها : تشبهيني انتِ
ملاك : و مُلاذ ؟
فيروز : تشبهه بابا
ملاك : بابا حلو؟
فيروز : كلشش
ملاك : ليش راح؟
رفعت راسي ايدي على گلبي
بلعت ريگي بصعوبة
فيروز : راح لمكان احسن
ملاك : نروح احنا هم؟
فيروز : كلنا بالنهاية رح نروح يمه
انا و انتِ و مُلاذ و جدتج الكل
ملاك : وين هو؟
ابتسمت بعيون مدمعة : بالجنه ان شاء الله
مسحت على شعرها
ابتسمت على ابتسامتي
مسحت عيوني ، رجعت اقريها
اندكت باب البيت
كمت طلعت ، وكفت ورا الباب
فيروز : منو؟
مُلاذ : انا
فيروز : ليش ناسيه المفتاح
فتحت الباب ادحگلها باستغراب
فيروز : شنو هاي؟؟
دخلت للطرمه : اسمنت و طابوك
فيروز : مُلاذذذ
مُلاذ : شتشوفين فوفو ؟
بأيدها كارتون الكيكه
يلي كالت عليها مشمش طيبة
و فوكاها كارتون حليب الككو
دحگتلها مقلصه عيوني
نطقت بتساؤل
فيروز : الجاهل وين؟
مُلاذ : يا جاهل؟
رفعت حاجبي ، تجتفت
فيروز : ابن ام ضياء الرحتي تجيبينه
لان تريدين تنامين من وكت اليخاف يجي وحده
و لا امه تكدر تجيبه
حكت راسها
مُلاذ : هاااا
قلدتها : هااااا
دحگتلها على ثغري شبه ابتسامه
بنظرات حنونه ، متجتفه
تقربت بهدوء عليها
مسحت على شعرها
فيروز : مُلاذ اعرف تريدين تساعديني
و ما تريدين اتعب ، بس انتِ هم بعدج صغيرة
مثل ملاك تماماً لا تحملين نفسج مسؤولية
حكت كصتها
مسحتها بـ كف ايدها
مُلاذ : لا كبرت ، جاي اكبر
دارت وجهها دخلت الكراتين
دخلت وراها ساكته
دخلت للغرفه انطت لـ ملاك
الحليب و الكيك دحگتلها ملاك فرحانه
ملاك : هاي الي؟
مُلاذ : لا لـ فوفو ، طبعاً الج ولج
اتسعت ابتسامة ملاك
و على اثرها اتسعت ابتسامة مُلاذ
مُلاذ : بس باعي ما تاكليهم كلهم مره وحده
بين يوم و يوم بليل اكلي ورا ما تخلصين عشا زين؟
هزت راسها مبتسمه
مُلاذ تتصرف وي ملاك
بالضبط مثل ما ابوها جان يتصرف وياها
لمن جان يعجبها شي يروح يشتري كمية اكبر
و اذا احد ضوجها ما يسمح اله
اذا رادت شي حتى و ان كان ما عنده
يدبر و يجيب الها
ترك إلياس اثر كبير بحياة مُلاذ
ما جنت مدركه لـ هذا الاثر
حتى بدء يتضح هالشي شوي شوي
مُلاذ :-
اندك باب البيت
كمت فتحته دخل ابن ام ضياء
-شلونج عيوني
مُلاذ : هلا بيج
-شوكت اخذ حمودي ؟
دحگت لحمودي الي هاي رابع مره يجيني
اكثر طفل يتعبني ادخل المعلومة بالدفرات لـ عقلة
مُلاذ : شفيق شوكت تاخذك؟
ظل ساكت يدحگلي
رفعت راسي دحگت للمره : بعد ساعتين تعاليلي
هزت راسها تشكرتني ، راحت
مُلاذ : ادخل البيت بيتك شفيق
دخل دخلت ورا
كعدت ادرسه رياضيات ، عقله ماكو فاصل
مُلاذ : افتهمت؟
-ها؟
رجعت عدت الشرح مرتين
مُلاذ : و هسه وصلت شلون تحل ؟
-ها؟
رمشت بعيوني
استغفرت انطيته ورقة و قلم : حل
كمش القلم ، صفن على الورقة
اجيت اسطره بس بدء يحل
ما دحگت شجاي يكتب منتظرته و كاعده
خلص انطاني القلم و الورقة
دحكت للحل رمشت بعدم استيعاب
وين الحل ؟ الحل حاط كل الناتج صفارة
يا قسمه شايفها لازك الناتج مالتها بصفر
مُلاذ : انا صارلي ساعه المن اشرح؟؟
رجعت عدت الشرح
هم ما فاهمني اخير شي ما تحملت و عطت
مُلاذ : راح اسطرك ركززز وياي
المن جاي اشرح انا للحايط؟؟
فرك عينه يدحگلي
رجعت هم عدت الشرح
انطيته الورقة و القلم حل
البدايه صحيح و الباقي غلط
رحت على تمارين ثانيه احل و اشرح
فلتت اعصابي كل شوي اعيط
عدت الشرح اكثر من ٤ مرات
و كل ما احاجي يگلي "ها؟"
دحگلي بملامح معبوسه
گال فجأه : انتِ ليش عصبيه ؟
عكدت حواجبي
جاوبت بهدوء : انا مو عصبيه
-لا انتِ عصبية دائماً تفترين وحدج
و تتعاركين وي اصدقائي و تصيحين الي شفيق
عصبية من اهلج و تصيحون انتِ و خاله
رفع عيونه دحگلي : انتِ ليش ما تحبينا؟
رمشت لثواني ساكته
مسحت كصتي بأيدي
حاله دائماً اسويها
لمن ما اريد افكر و لا احتار
و لا اتوتر ، او اذا اريد اتلافى الموضوع
مُلاذ : ركز وياي مركز على عصبيتي
و على فرتي وحدي بس ما تركز على الرياضيات
مسحت وجهي : لا اله الا الله
صرت اشبهه ست جميله
رجع كمل : دائماً بالليل تكعدين
يم شجرة النبك مال بيت ابو فاطمة
خزرته و گلت : ركز
رجعت ادرسة
متلافية الموضوع
و لا اريد افكر ، ممكن كلام هالطفل صحيح
ممكن انا ما احبهم او ممكن احبهم بس ما ادري
كملت اجت امه اخذته
رحت لغرفتي تمددت
فتحت الميز طلعت التشيرت
حضنته لصدري و غفيت ..
بعد عدة ايام :
طلعت للساحه اتمشى بهدوء
كالعاده انا هاربه من الدرس
كعدت على الصبه
احرك رجلي بالكاع و اوخر بالتراب
رفعت راسي بعد ما اتصادر لمسامعي اسمي
دحگت للبنيه طلعت وراي صاحتني : مُلاذ
-ها
-بالطابق الثاني غاده منتظرتج
-ليش ما اجت هيه؟
شوكت شردت من الدرس ؟
-ما اعرف كالت صيحي مُلاذ
دحگتلها مستغربه ، هزيت راسي
كمت من على الصبة نكثت ملابسي و ايديه
دخلت للمدرسة الممرات فارغه
هدوء يعم المدرسه و يحيط بيها من كل الجهات
الطابق الثاني بي هواي صفوف و واسع
لكن محد يدرس بي ، مكفين بالطابق الجوا
الادارة بعيده كل البعد عن الطابق الثاني
لان مسوين جهة خاصه للادارة
و بين جهة الصفوف و الادارة فاصل و باب
صعدت للطابق الثاني
وكفت بالوسط ندهت باسمها
مُلاذ : غاده ؟
دورت عليها بعيوني
اصيح اسمها ماكو اي رد
صرت ادور بالصفوف ماكو
خلال لحظة ، اندفعت لداخل واحد من الصفوف
عطت بسرعة ممفتهمه شكو
التفتت لكيتها سُرى
مُلاذ : مريضة شتريدين؟
سُرى : اليتيمة هم تحجي
مُلاذ : شكد زعطوطه اذا عبالج اليُتم عيب
دفعتها ، اجيت اطلع
بالطابق الثاني بالوسط اكو فتحه كلش جبيره
تطل على حديقة بين الصفوف يلي جوا
سحبتني سرُى من ايدي
ضربت ايدها حيل ، دفرت رجلها برجلي
صرخت سُرى بوجع ، رجعت عليه
صرت انا على سياج مال فتحة يلي تطل ع الحديقة
هي كدامي عاصرة فكي بايدها
مُلاذ : وخرييي
سُرى : شنووو قصدج!؟
رفعت ايدي ضربتها
رجعت ضربتني تدافعنا
انضرب ظهري بالسياج
لحد ما اتقوس ظهري
صرت اشوف الساحه بالمگلوبي
للحظة اتجمد الدم براسي
لمن سوت شي قذر خلاني افور
بـ لحظتها تصرفت بـ ردة فعل سريعة
قبضت ايدي ضربتها بقبضة ايدي ببطنها
ابتعدت عني
الهث ، احس نفسي رح ينكطع
ميته من الحر
دحگتلها احس نار تطلع من عيوني
صرخت بيها بصوت عالي : سُررررررى
رحت عليها ، ضربتها راشدي
حسيت على روحي رح اتقيء
صار عندي غثيان قوي
ركضت على زاوية ذبيت كلشي براسي
العرك يتصبب من كصتي
فركت كصتي حيل بأيديه
عصرت راسي بين ايدية
نزلت للحمامات غثيان قوي صار عندي
كل ذرة بجسمي ترجف
كرهت روحي و الحياة الـ انا بيها
قذارة الناس يلي حولي
يلطخوني بالحرام و اللعبان نفس غصب
دخلت للحمامات
حسيت روحي طلعت و انا اتقيء
راح كل حيل بيه كل ما اتذكر
فتحت المي غسلت وجهي
اغسل ، اتذكر اسكندر لمن باسني
و يجي ببالي شكل سُرى
الغثيان يرجع اقوى ، ارجع اتقيء
دك الجرس ، انا روحي رايحه
مشيت كعدت بالكاع و ظهري على الحايط
جريت رِدان القميص باصابيعي
فركت شفتي حيل بـ رِدان القميص
رفعت راسي
نطقت بتعب : الله ياخذكم ان شاء الله
الله ياخذكم على هذا اللعبان نفس
دحگت لـ غاده لمن شافتني
اجت تركض ناحيتي
غاده : ولج شبيج؟؟
مُلاذ : انطيني مي
غاده : اوكفي خل اجيبلج
كامت جابتلي مي و اجت انطتنيا
اخذته شربت شوي
بس اريد يروح الطعم المر من حلگي
مسحت وجهي غاده
غاده : شصايرر؟؟
مُلاذ : سُرى اسحـ***
غاده : شنووووو!!!!
دنكت ضغطت بايديه
على محاجر عيوني تنفست بعمق
غاده : شلون عرفتي؟؟
مسحت وجهي ، رفعت راسي
حجيت الها كل شي
حطت ايدها على حلكها بصدمة
ظلت غاده
متجمده مكانها صافنه بوجهي
شلت بطل المي من حضني و كمت
اول مدخلت المدرسة دك الجرس
اتجاهلت الدرس رحت على صف البنية الصاحتني
اول مدخلت جريتها من قميصها
مُلاذ : انتِ حيوانه؟؟؟؟
گلتيلي غاددده صاحتج و جذبتي عليييه
-شنو شكوو مجاي افهم
و الله غاده صاحتججج؟؟
- شالج الله
-و الله اجت سُرى گلتلي
مُلاذ بالساحه كليلها غاده تريدج
-و انتِ تدرين بيه انااا صديقة سُرى ؟؟؟؟
-هي گالت گالت انا و مُلاذ ما نتحاجه
و غاده گلتلي اصيحها روحي صيحيها انتِ بدالي
و انا طلعت و صحتج
اجا صوت المُدرسه : شكوو؟؟
التفتت الها ، هديت قميص البنيه
-انتِ من هاي الشعبه ؟
هزيت راسي برفض
-شتسوين هنا؟
-اجيت اخذ كتابي من صديقتي
-و اخذتي و انتِ كامشه بقميصها و تتعاركين وياها؟
رفعت عيني دحگتلها
مُلاذ : ما متعاركه جنت اعدل قميصها
رفعت حاجبها دحگتلي
و دحگت للبنيه
-تمام ، روحي
عفتها ، طلعت رحت لـ صفي
دخلت لكيت ست انسام
انسام : وين جنتي ؟؟
-بالحمامات
انسام : كل هذا الوقت بالحمام؟
-اي
انسام : روحي جيبي ورقة من المديرة
عود هيج يلا افوتج يلا ماما يلا روحي لا تاخرينا
بكل هدوء ، بلا ما احجي شي طلعت
لا رحت جبت ورقة و لا سويت شي
هسه لو يحركوني ما اهتم
كعدت بالساحه
خلص الدرس ، رحت للصف
طلعت انسام دحگتلي بعصبية
انسام : ادبسز ما عندج اي احترام للمدرس
ما ادري شلون المديرة مخليتج هنا
مُلاذ : گلتيلي جيبي ورقة و انا ماجبت
انتِ طردتيني و انا ما عارضت
ظلت ساكته ، الدخان يطلع من اذاناتها
راحت ، دخلت انا للصف
مر هاليوم و تلاه ايام عديدة
و بيوم من الايام ما رحت للمدرسة
طلعت للصاله
لكيت التلفون يدك
سمعت اصوات المي من الحمام
عرفت امي تسبح
اخذت التلفون و جاوبت
-السلام عليكم
-اهلاً
-وياي ام ملاك
-اي تفضلي
-ملاك لعبت رياضة و فجأه اغمى عليها
فتحت عيوني مصدومة
تعديت مرحلة الصدمة
لمن امي طلعت من الحمام تسئلني شكو
-تمام جايه جايه
گلت لـ امي يلي كالته المديرة
لبسنا بسرعة ، طلعنا رحنا الها
لمن وصلنا جانت كاعده بس جسمها يرجف
اخذناها ، طول الوقت جانت تكول
"گلبي يوجعني" "مختنكه"
حولما طريقنا من البيت للـ مستشفى
اخذناها للمستشفى ، بعد هواي فحوصات و تحاليل
وكفنا نحجي وي الدكتور
فيروز : شوكت تطلع نتيجة التحاليل و الفحوصات؟
الدكتور : على الاغلب اذا تريدين بسرعه فـ باجر
مُلاذ : زين يعني شوكت نكدر نجي؟
الدكتور : اذا تريدون انطوني رقمكم
فوراً اول ما تطلع النتيجة اتصل عليكم
هزيت راسي ، رديتله الرقم كتبه
ابتسم دحك لـ ملاك كرص خدها
الدكتور : الحمدلله ع سلامه يحلوه
ابتسمت ملاك و ضحكت
طلعنا من المستشفى رجعنا للبيت
ملاك ملامحها جانت جداً تعبانه
ماكدرت ابعد عنها و انام بمكاني
بقيت كل الليل يمها رغم امي وياها بنفس الغرفة
بس گلت اذا تحتاج شي انا يمها
نامو امي و ملاك و انا وحدي
ظليت كاعده بالي يم ملاك
ثاني يوم الصبح هم جنت غايبة
لان بهاي الايام الاخيرة ما عدنا دروس
امي راحت يم خالة جنات
اجا اتصال من رقم غريب فتحت التلفون
-السلام عليكم
-منو؟
-انا الدكتور اذا تتذكريني او يمكن الرقم غلط
-تذكرتك تذكرتك طلعت التحاليل ؟؟
-نعم طلعت
-اي شنو النتيجه؟
-ما اكدر احجي شي على التلفون
اذا تكدرون هسه تجون افضل
عكدت حواجبي : يعني الافهمه من كلامك..
قاطعني : تعالوا و رح تفتهمون
-تمام
سديت الاتصال
رحت على امي لـ بيت غاده
اخذتها و سولفتلها يلي گاله الدكتور
بانت على وجهها ملامح القلق و انعدام الراحه
ركبنا تكسي ، اتجهنا للمستشفى
طول الطريق هي تدعي يكون كلشي تمام
فيروز : ما گال شي بعد ؟
مُلاذ : لا ، بس اهدي
وصلنا للمستشفى دفعنا الكروة
نزلنا بسرعة اتجهنا لداخل المستشفى
سئلت عن الدكتور ، اثناء انا اسئل
شفت الدكتور جاي باتجاهنا
اشرت لـ امي رحنا باتجاهه الدكتور
بعد ما سلموا على بعض
كعدنا بغرفة جمال (الدكتور)
اتقدم كعد كدامنا اعصابنا نار صارت
مُلاذ : اي دكتور شنو نتائج التحليل؟
شبك اصابيعه بـ بعض
دحگلنا انا و امي
قدم ظهره للامام يدحگلنا
جمال : نتائج التحليل ظهرت النا
ملاك .. عندها ثقب بـ قلبها
دحگتله مفاهمه ، كمل : الاطفال اثناء ولادتهم قلبهم
يحتوي قلبهم على فتحه صغيرة جدا
اغلبهم تنغلق هذي الفتحه عدهم بمرور الوقت
او ممكن تظل هذي الفتحه و كلما كبر الطفل
يكبر الثقب و من الممكن يسبب فشل بالقلب
مركزه عليه ، استمع كل كلمة يكولها
لحد ما فززني صوت بجي امي
التفتت الها ، الدكتور قدم الها كلنس
جمال : رجاءاً اهدئي
مُلاذ : دكتور كمل وضع اختي شنو؟؟
جمال : اختج عدها ثقب بالقلب
هذا الثقب جاي يكبر وياها
راح ياذيها اكثر كلما تكبر
انتوا من المفروض تسوون عمليه الها
من هي طفله
لكن حسب يلي فهمته
انتوا ما جنتو تدرون بهذا الشي
و من اللازم نسويلها العملية او ..
اتجمد الدم بجسمي
رجليه اتثبتن بالكاع بعد ما جانن يرجفن و يهتزن
تصادرت لمسامعي اصوات الطنين القويه
ثگل راسي ، اختفت كل الاصوات من حولي
نزلت راسي دخلت ايدية بين شعري
ساكته و هادئه رفعت نظري لـ امي
يلي تبجي بـ لوعة...
- يتبع الفصل التالي اضغط على ( رواية جرح الأيهم ) اسم الرواية