رواية جرح الأيهم الفصل التاسع و الاربعون 49 - بقلم أيلان
"الجُــرح التاسع و أربعون"
مُلاذ : أيهم حتى انا ما صدكت بالبداية
كمم حلگي بـ ايده يسكتني
نزلت دمعته ، يهز راسه بـ رفض و يهمس
أيهم : اشش
وخرت ايده من حلگي
مُلاذ : أيهم اسمعني الله يخليك اسمعني
لا تصعبها عليه فوك ما هي صعبه
أيهم : لا تسوين بيه هيج مُلاذ لا توجعين گلبي
لا توجعين گلبي فوك وجعه لا تفجعي بيج
مُلاذ : عدت التحليل ما صدكت و الله ما صدكت
أيهم عدت التحليل بس التحليل صحيح
أيهم الله يخليك اسمعني و افهمني
مُلاذ : انا صارلي فوك الشهر هيج
انا صارلي فوك الشهر مريضة
تعبت كلش تعبت لا انت و لا اهلي تدرون
جسمي و كل شي بيه جاي ينهار كل لحظة
رجع يكمم حلكي و دموعه تنزل
ما يقبل يصدگني و يهز راسه بـ رفض
سندت كصتي على كصته ، لزمت ايديه اثبتهم
أيهم : ما بيج شي انتِ
مُلاذ : بيه هواي بيه أيهم
لذتك تعبانه كلش و جسمها منهار
استوعب الي حجيته الله يخليك و ساعدني
مالي غيرك امي و ملاك رح ينهارن
محد غيرك رح يكدر يسندني و يساعدني
بجى مقهور و يحضنني كل قوته
أيهم : مُلاذ لا تجذبين عليه لا توجعين گلبي
مُلاذ : انا اخر وحده تريد توجع گلبك النظيف
بس أيهم بعد ما اكدر اضم اكثر
شدد لزمته عليه يبجي منهار
و انا ما اعرف شسوي بس اريده يستوعب
و هو يكرر "انتِ مو مريضة ما بيج شي انتِ"
أيهم : التحليل غلط ما بيج شي انتِ
يحجيها و يبجي يريد يصدك و ما يريد
مُلاذ : و الله صحيح عدتهن
أيهم : لا لا لا
مُلاذ : كوم نروح لـ المستشفى و نعيدهم؟
وخرت عنه ادحك بـ وجهه
غمض عيونه و يبجي جسمه يهتز
هز راسه بـ رفض ما قابل ، حَيرني
اعرفه يخاف نروح نحلل
و يشوف النتيجة كدام عينه ، بالأخير وافق
أيهم : انه اعرف التحاليل غلط
كام بسرعه يمسح بـ عيونه
گلي ابدل ، ما طلع من الغرفة ظل يمي
صافن عليه و دموعه متحجره بـ عينه
بدلت ملابسي بسرعه ،
دكيت الباب على امي
بس طلعتلي انقبض گلبي شلون رح اگللها
گلتلها تصعد يم أبيل و طلعنا انا و أيهم
طول الطريق ظل ساكت
غصته تصعد و تنزل بـ بلعومه
عيونه محصورة بيها الدموع و يدحك للـ الطريق
خليت ايدي فوك ايده المخليها بـ نصنا
رفع ايدي و باسها خلاها على خده
نزلت دموعه فوكاها ، مسحتهن بـ ايدي ساكته
وصلنا لـ المستشفى و نزلنا
سويت التحليل و أيهم يستعجلهم
طلعت النتيجة نفسها ، أيهم اتخبل
ما قابل بـ كلامهم
كوه هدأته و طلعته من المستشفى
صعدته بـ السيارة و صعدت كلتله نروح منا
ساق السيارة لـ مكان قريب ، دخلنا بـ فرع
لافها و وكف على صفحة بـ بداية الفرع
ما يكدر يكمل و دموعه مغوركه عينه
انهار يبجي و يحضن بيه و يجذبهم
ما قابل على كلامهم و يهمس "انتِ ما تعوفيني"
عصرني عصر بـ حضنه ، يبوس بـ وجهي
مُلاذ : أيهم حبيبي أيهم دحك
رفعت راسه بـ ايديه ادحك بـ وجه
و هو منهار يبجي مثل الطفل ما يقبل يسمع الي
مُلاذ : دحك انا لسا ما اعرف حالتي شنو
انت مو گلت السرطان يتعالج يمكن اتعالج
أيهم : انه لييييش هيج يصير بيه ليش
ليش دائماً محروك گلبي عليكم
ليش الافديهم بـ روحي يتأذون
و يتأذووون كدام عيني
و ما اكدر اسويلهم شي ، ليش اتعاقب بيكم
ليش مو انه اليصير بيه هيييج
حجاها و ضرب بـ ايديه حيل على وجهه
أيهم : ليش دومي ملچوم گلب عليكم
لزمت ايديه اهدئه ،
خليتهم بين ايديه ابوسهم
مُلاذ : اسم الله عليك لا تحجي هيج
رفع راسه تجاه ع الكشن يبجي مخنوك
ظليت هادئه و لازمه ثنين ايديه
مرت العشر دقايق و هو على نفس البچيه
خانك روحه بحيث صوته ما يطلع
بس دموعه تنزل و جسمه يهتز
كل شويه يدنك يبوس ايديه
اتدمر دمار كدام عيني
مُلاذ : انت مو تگول السرطان يتعالج؟
أيهم : تتأذين مُلاذ تتأذين روحج تطلع لـ سابع سما و ترجعلج بالعلاج ليش هيج يصير بيه مُلاذ ليش الله يعاقبني بيج و بـ اهلي ؟
مُلاذ : حرام أيهم لا تگول هيج قدر هذا
باع دحك انا اتحمل الاذيه عادي
يمكن اذا اتعالجت ينجح العلاج اصير زينه ها ؟
أيهم : شلون اشوفج تتأذين كدام عيني بعد
و اتحمل مُلاذ لا تعوفيني لا تعوفيني جَرح
مُلاذ : ما اعوفك بس حتى ما اعوفك
انت هم لازم تساعدني و تسندني بهالفترة
أيهم : انه مستعد اسندج العمر كله
بس لا يصيرلج شي بس لا تعوفيني
اموت بلاچ مالي وجود اموت
حجاها و حضنني لـ صدرة
حسيت ضلوعي تكسرن نوب اختنكت
كل شويه اختنك گوه اجر النفس
بعدين يرجع يعتدل تنفسي و ظاله هيج
رفعت راسي دحگتله امسح دموعه
و هو متجي راسه ع الكشن يدحك بـ وجهي
و دموعه تنزل على خدة ، شكد بجى عليه
ما جذب من سماني "جَرح" ،
اكثر شي جرَحه بـ هالدنيا و أذاه انا
انا هم تجيت راسي ع الكشن و كعدت نفس وضعيته ادحگله و يدحگلي ، لازمه ايده
انتظره شوكت يستوعب و يتقبل بعدين لمن احجي
ضميت شفتي ساكته
نزل عينه دحك لـ شفتي لمن ضميتها
رجع دحك بـ وجهي ، اتقدم عليه من مكانه
خلا ايده على خدي يمرر بـ ابهامه عليها
قرب وجه اكثر ، مَيل راسه يبوسني بـ هدوء
خليت ايدي على خده امسح بـ دموعه و ابادله
ابتعدت ادحك بـ وجه ، همس بـ صوت مبحوح
أيهم : جَرح
هزيت راسي بـ معنى "ها"
أيهم : شلون اعالجج شلون انقذج
دكتور و انقذ الكل
بس ما جاي اكدر انقذ الي احبهم
مُلاذ : لا رح تنقذني انا لمن عرفت بـ روحي مريضة ما شلت هَم لان اعرف يمي دكتور كلش زين
اخذت ايده طبگت اصابيعه بـ أيدي أعدد
مُلاذ : رح يكدر يعالجني و يساعدني و يشافيني
ضميت راسه لـ صدري و امسح خده
لحد ما هدء و حسيته استوعب
گلتله نروح نحاجي اهلي سويه
و رغم هالشي بقت الغصة محصوره بـ بلعومه
و كل شويه تنزل دموعه و يمسحهم بـ ايد ترجف
وصلنا لـ البيت نزلنا دخلت دحگت لـ شقة اهلي
درت وجهي لـ أيهم يدحگلي و عيونه جَمر
اتقربت منه مسحت وجه بثنين ايديه
مُلاذ : هسه صرت احسن؟
بلع ويگه يدحك بـ وجهي هز راسه بـ قبول
اعرف بعده ما متقبل استوعب بس ما متقبل
و وضعه مو زين بس هز راسه حتى ما يحَيرني
رجعت درت وجهي دحگت لـ شقة اهلي
نزلت نظري لمن أيهم لزم ايدي و رفعها باسها
بلع ريگه يكتم غصته ، رفع عيونه يدحك لـ فوك
حتى لا تنزل دموعه و يرجع يبجي عليه
ظل لازم ايدي اتقدمت فتحت باب بيت اهلي بالمفتاح العندي ، خابرت امي گلتلها تنزل
اتقدمت كعدت ع القنفه ، صحت لـ ملاك تجي
يمي أيهم كاعد و صافن ، اجت بلا شال
بس أيهم ما شافها ، رجعت دخلت الغرفة تركض
لبست شالها و اجت و امي دخلت البيت
يدحگون بـ وجوهنا مستغربين
أيهم يقوي لزمته لـ ايدي ،
دحگتله هز راسه بـ معنى "انا وياج"
ابتسمت بـ هدوء ساكته ممُتنه لـ وجودة
دحگت لـ اهلي و حجيت : اكعدوا احاجيكم
فيروز : شكو؟
مُلاذ : اكعدوا
اتقدمت امي و ملاك كعدن ع القنفه الكدامي
اتجول نظري بيناتهم و حجيت
مُلاذ : قبل اكثر من شهر ...
بلعت ريگي حكيت حاجبي و كملت
مُلاذ : جنت نازلة من السيارة اشتري من المحل
بس وقتها ... اغمى عليه لمن كعدت لگيت نفسي
بالمستشفى و يمي دكتور گلي لازم نسوي تحاليل
دحكت بـ وجه امي
انرسمت ابتسامة خفيفة على ثغرها
عرفتها بـ شنو فكرت ، غمضت عيوني حيل و كملت
مُلاذ : حللت وطلعت نتيجه التحليل ...
قاطعتني امي بـ ابتسامه ظاهره اسنانها
و عيون ماليتها الفرحه و هي تگول بـ تخمين
فيروز : حامل ؟
مُلاذ : بيه سرطان
حجيتها و انا تعابير وجهي بارده
و أيهم زاد ضغطه على ايدي ، دحگت لـ امي
ابتسامتها المرسومه على ثغرها انمحت تدريجياً
عيونها يلي جانت بيهم فرحه انطفت
همست مصدومة : شـ .. شنو؟
درت عيني لـ ملاك المتصنمه بـ مكانها
تدحك بـ وجهي بلا اي ردة فعل
الصالة صارت تعم بـ الهدوء
بس صوت نَفسنا اليرجف ينسمع
مُلاذ : التحليل سويته 3 مرات
و بـ كل مره يظهر بيه سرطان
قبل لا تنطون ردة فعل تدمرني و تدمركم
اسمعوني ، اكو علاج و ان شاء الله ينجح
مُلاذ : بس اريدكم تستوعبون و تتقبلون
هالشي معرضين اله كل الناس
و انا مو الوحيده يلي اتمرضت
و اكو احتمال چبير اتعالج
حجيت و حجيت بس اعرف ما يفيد الحجي
و صار يلي توقعته صدمات و صياح و بجي
و هوسه صارت و انا دايخة گوه اركز بيهم
ساعات مرت على هالحال و اهلي رافضين كلامي
عبالك انا جبت المرض و خليته بـ روحي
سكتت ادحگلهم گمت حضنتهم لـ صدري
ما اعرف ليش انا الاواسيهم على مرضي
المفروض همَ يواسوني بس لان انا ما ابجي
همَ يظنون انا ما مهتمه و عادي عندي
هو مَرض شلون ما اهتم اله ؟
مر هاليوم بـ اسوء ما يكون
و اهلي گوه يستوعبون مني اتدمروا
و أيهم صافن ، انتظرتهم يهدئون ما هدئوا
خليت أيهم يجيب الابر المهدئه
لان اتهستروا ما يقبلون يفهموني بس يبجون
ثبتت ملاك و أيهم ضربها ابرة بـ زندها
و امي هم رغم صيحن و ما قبلن
بس انهارن احتاريت شنو اسوي وياهن
انتظرتهن لحد ما نامن اخذناهن لـ مكانهن
أيهم طلع من الغرفة ، اتقدمت وخرت شال ملاك
بست شعرها و غطيتها ، رحت لـ امي دحگتلها
دنكت بست راسها ، مسحت على شعرها
گمت وكفت ، سديت الضوه و طلعت من الغرفة
صعدنا انا و أيهم لـ الشقة
دخلت تعبانه ذبيت شالي ، دحگت لـ أيهم
اتقدم حاضنني ساكت و انا بادلته الحضن
دحك لـ وجهي ، يمرر بـ ابهامة على خدي
لزمت ايده و اخذته لـ الغرفة ، كعدت على الجرباية
رفعت راسي دحگتله واكف كدامي و صافن عليه
مُلاذ : اكعد
اتقدم كعد بـ جهته سند ظهره على تاج الجرباية
دنيت روحي لـ يمه ، خليت راسي على صدرة
حاوطتني ايده مخليها على زندي
خلا خشمه بـ شعري ، يبوس شعري
ضغطت ايده على زندي ، اهتز جسمه يبجي
مُلاذ : أيهم حباب كافي تبجي
و الله ندمتوني لان حجيت الكم
اهتز جسمه يبجي اكثر
حتى ما اكدر الومه بعده وجعه على اخو
و اجيت انا زدتها عليه و گلتله عن مرضي
انتظرته يهدء و يسكت لحد ما فعلاً هدء
بقيت نايمه على صدره و هو يلعب بـ شعري
نزل ايده من شعري
اطراف اصابعه تتحرك على رگبتي
اتحركت متدغدغه من هالحركه
رفعت ايدي خليتها على رگبته من الجهه الثانيه
و ضميت وجهي بيها ، بستها بـ خفه و حجيت
مُلاذ : دحك ولك كافي بچي بطيت أفادي
گلتلك اصير زينه أن شاء الله جَزعتني
رفعت راسي اله دحگتله أبتسم
ضحكت و گلت : يول موتتوني و انا عايشه
مسح على شعري يدحك بـ وجهي مبتسم
و بعده اثر دموعه على خده
أيهم : اسم الله عليج لَـذه
گمت كعدت على حيلي تربعت
مُلاذ : اسمع أيهم نخلي شروط بهالفترة
أيهم : امم بس تعاي
حجا و سحب ايدي بـ هدوء بـ معنى
" نامي بـ حضني و سولفي" سحبت ايدي و گلت
مُلاذ : لا ادري بسوالفك من احضنك
ما اشوف وجهك و انا اسولف و انت تدمع
فـ ماكو ما تدمع تدحك بـ وجهي يا ويلك لو بجيت سمعت يول ؟ و الله اخليك تنام بـ الصاله
ابتسم و هز راسه بـ قبول
مُلاذ : اي عفيه اسمع ايهومي خل نسولف
أيهم : سولفي
مُلاذ : هسه انا الحلوه الحبابه اتمرضت
اشش بلا بجي خل اكمل هسه احنا مو تصير بينا فلاونزه من چنا صغار هاي هم فلاونزه
بس مال كبار مال عالم عدها هاي الفلاونزه
مثل شربة المي
أيهم : مال ابطال خارقين مثل لَـذه
مُلاذ : ايييي عفيه بديت تفتهمني
لَـذه البطله شراح تسوي راح تتعالج
و أيهم البطل شراح يسوي راح يساعدها
بس قبلها نخلي شروط خوش؟
أيهم : خوش
يحجي و يسايرني و الدموع محصوره بـ عينه
مُلاذ : اول شرط ممنوع منعاً باتاً البچي
و الدموع ، من اسئلك شنو يعني بجي
تگلي منو هذا ما اعرفة ، خوش ؟
أيهم : خوش
مُلاذ : شنو يعني بچي ؟
أيهم : منو هذا ما اعرفه
مُلاذ : وردة ايهومه وردة ، اي خل نكمل
أيهم : كملي
مُلاذ : ممنوع نحجي لـ اي احد
نسافر عود رايحين نتونس
اروح اتعالج بـ مكان زين
و نرجع انا وياك مثل الوردة
هز راسه ساكت
مُلاذ : امي و ملاك نسولف وياهن
و نقنعهن راح اصير زينه و انت چذبلك كم چذبه
بما انو انت دكتور مو تعرف تچذب عليه بس انا
چذب على العالم هم
أيهم : زين
مُلاذ : اذا ما اقتنعن ناخذهم ويانا خوش؟
أيهم : خوش
مُلاذ : بعد اوكف خل افكر
صفنت افكر بـ شروط
مُلاذ : ها و هناك مو تگلب عليه و تكعد تبجي
و الله اعوفك و اهج خوش لو لا
أيهم : خوش
مُلاذ : و لا تسايرني عبالك زعطوطه كدامك
أيهم : ميخالف
مُلاذ : شوووف و الله جاي تسايرني
مو انا اعرفك و اعرف سوالفك
أيهم : چا شگلج ؟
مُلاذ : چذاب و الله اكبر چذاب
الشروط يطبن من هاي الاذان يطلعن من الثانية
أيهم : ميخالف اطبقهن
مُلاذ : احلف گول و داعة لَـذه الحلوة
أيهم : و داعة لَـذه الحلوة
مُلاذ : شوف چذاااب گبل تنفذ كلامي
أيهم : خرررب ولج شتريدين؟
مُلاذ : اي هيج اريد أيهم الغثيث الما ينبلع
أيهم : اشكرج اخلاقج هاي
مُلاذ : تخبل مو؟
أيهم : كلش احلى منها ماكو
ابتسمت و اتقدمت حضنته
مُلاذ : عفيه ايهومه عفيه
حضن خصري ساكت و نَفسه يخرخش
عود احاول انسي و اضحكه بس لو اموت
ادري بي رح يظل تعبان من هالسالفة
مُلاذ : أيهم اسمع
وخرت من حضنه دحگتله
أيهم : ها
مُلاذ : وين نروح انا وياك؟
أيهم : اشوف دولة بيها خوش دكاترة و هناك نروح
مُلاذ : اسمع اذا بيها حلوين اطلكك هناك
و اتزوج واحد حلو انت صرت قديم و كبرت
أيهم : اطيح حظج
مُلاذ : دولي بكيفك
بعدين اذا اشتاقيتلك ارجع اتزوجك
أيهم : انجبي حبيبتي گمتي تجفصين
مُلاذ : أيهم اسمع عيونك افكسها
أيهم : يا صلاة محمد شحاچي انه؟
مُلاذ : خاف الك نيه تدحك لـ وحدة هناك
و الله افكس عيونك ديربالك
أيهم : ماليه عيوني انتِ يا بعد عيوني
كل الوجوه الاشوفها وجهج
مُلاذ : الله عجبتني الرجل الصالح
ابتسم يدحگلي و عيونه تلمع
و انا اتحرك بـ استمرار مدري شبيه
قرب وجهه مني ، ارنبة خشمه صارت على خدي
ظل يحركها على خدي و انا بين رجليه
ايديه ثنينهم مطوقة خصري ، ابتسمت و گلت
مُلاذ : احب هاي الحركه
أيهم : يا حركه ؟
درت وجهه بـ ايديه
و حركت ارنبة خشمي على خدة
على ثغري ابتسامة ظاهره اسناني
مُلاذ : هاي
ابتسم و دحك بـ وجهي
أيهم : نوب اسويلجياها دوم
مُلاذ : سويها
رجعت خليت خدي على خشمه
و رفعت روحي اكثر
صرت انا اعلى منه و هو يسوي هالحركة
مُلاذ : شكد جنت اكره احد يلمسني
أيهم : لَـذة الايهم انتِ
ابتسمت و هو كمل يهمس بـ اذاني
أيهم : محرمة ع الكل و حلالي وحدي
مُلاذ : هي بكيفك
أيهم : اممم
نزل ارنبة خشمه يتحسس رگبتي بيها
مُلاذ : لا ما احبها هنا تخليني اقشعر
رفع راسه عض خدي بـ خفه
مُلاذ : لااا تعض يبين بـ وجهي ولك
أيهم : اشش تعالي
نزلني بـ هدوء من خصري و كعدني بين رجليه
ظهري على صدره خليت راسي على كتفه
كف ايده تحت فكي يحرك اصابعه عليه
مُلاذ : أيهم
أيهم : امم
مُلاذ : خل نسولف
أيهم : سولفي
بس اريد اشتت تفكيرة
گمت اطلع سوالف من جوا الگاع رغم نعسانه
مُلاذ : عود بالبداية من گلتلك تراقبني
ليش جذبت و گلت لا ؟
أيهم : ذكيه و عرفتي اعرفج من زمان
بس ما جنت اكدر اگلج اي رح ترتبكين
و تفكريني أذيج ردت اكسبج الي و اسولفلج
حتى تفهمين تصرفاتي و ليش راقبتج
مُلاذ : و الله ذكي
زين ليش جنت تخليني اصير عصبية ؟
أيهم : احب عصبيتج تصيرين طفلة
ما تعرفين شتسولفين تظلين تدردمين
مُلاذ : و الله ما تستحي انا ادردم ؟
أيهم : امم
مُلاذ : زين بعد شنو اسألك
هااا اتذكرت هاي دوم ظلت بـ بالي
أيهم : شنو هيه ؟
مُلاذ : مره من اجيت تفتح خياط بطني تتذكر؟
أيهم : امم ؟
مُلاذ : ليش عود جنت لابس كمامه ؟
أيهم : لا ختولي هاي السالفة
مُلاذ : لا حباب احجي لا تصير نحس
أيهم : تضوجين اذا عرفتي
مُلاذ : ليش ؟ ما اضوج ما اضوج
جاي نسولف عادي و سألتك و جاوبتني يلا جاوب
أيهم : لا حبيبتي اسألي غير شي
مُلاذ : و الله اذا ما جاوبت ازعللللل
أيهم : لَـذه رح اطبع الخمسه على وجهج
انجبي و اسكتي غيري السؤال
مُلاذ : و الله زعلت ها اها زعلت
أيهم : خرب ....
سكت متنرفز ردت اكو
سحبني من خصري كعدني ، نتر بيه
أيهم : ايي يلااا اجاوب
انا هم حجيت بـ نفس نبرته
مُلاذ : اي يلا جاوب لا تنتر عليه
أيهم : لينا جانت تجي و انه نايم تبوسني
و وكتها اجت باستني من ردت ادفعها
اتعور حلگي و جانت واضحه و لبست كمامه
مُلاذ : غدي گبور اي و الله
و انت شبيك ما عدك لسان لو لسانك بس يمي؟
أيهم : انچبي لَـذه شسويلها انام فوك الكنتور؟
نمت بـ غير غرفة و ما فاد باقي اقفل الباب
على روحي و من يگلولي ليش
اكللهم لان لينا تتحرش بيه
اهتز جسمي اضحك
مُلاذ : اتخيييل تجي امك الك
تگلك ماما أيهم ليش قافل الباب
تگللها ماما هاي لينا عينها زايغه تتحرش بيه
ههههههههههه
ضحك جسمه يهتز
أيهم : و الله عدج سوالف
مُلاذ : و الله أيهم انا منك اقفل الباب على روحي
نسوان هالوكت هواي يتحرشن و انت شاب حليو
ههههههه
أيهم : انچبي لَـذه لا تضحكيني
مُلاذ : مو هي الضحكه بـ فلوس
يمعود اضحك اضحك ما دامها ببلاش
لا تروح الضحكه هم تصير بـ فلوس و ما نلحك
احجي و ميته من الضحك مدري شبيه
و هو على ضحكتي يضحك و صافن عليه
أيهم : زين انه اسألج؟
مُلاذ : لا نعست خل انام
اريد اشرد ادري بـ اسألته شلونها
ضحك و سحب ايدي
أيهم : تعاي بربوك حجت التريده و راحت
مُلاذ : انت البربوك
أيهم : ادبسز
مُلاذ : مستهتر و الله
أيهم : خل اسأل انچبي
مُلاذ : اهو اسأل يلا
أيهم : اوگفيلي خل اسمطج بـ اسئله
اشعل جدج شعل بيهن
مُلاذ : ولك لا تغلط على جدي
أيهم : و الله لو يعرف بـ فواصتج هاي
مُلاذ : حبيبي بابا متوارث سوالف جدي
و انا توارثت سوالف بابا يعني عدنا وراثة بالفواصه
أيهم : مو اگول مستحيل
تكون سوالفج الفوصيه من الفطرة
لازم تكتسبيها من أحد
مُلاذ : نعست اسأل يلا رح انام و اعوفك
أيهم : هم حبيتي الج واحد قبلي ؟
مُلاذ : لا وين بس من جنت صغيرة
أيهم : اهووووو يا كـ*** حبيتي؟
مُلاذ : ههههههه جان جيراننا و اشگراني
انا جان يعجبني شكله جنت اشوفه بالمحل
مره رحت يمه و هو يخاف مني لان مره كتلته
أيهم : هههههاي حيل ، ليش؟
مُلاذ : لگيته يحاجي بت ام فراس
و رحت كتلته و اهله اتعاركوا ويا بابا
أيهم : انجبي ولي نامي
دحگتله ضاج اهتز جسمي اضحك
مُلاذ : دروح ابو النسوان هي مره وحده
و جنت صغيرة كلش عمري سبع سنين
بعدين شالو من يمنا و اصلاً من شالو جنت جبيره و هو كام ينطيني نظرات و انا ارزل بي
أيهم : تريد تكحلها عمتها شسمه هالكـ****
ابو النظرات الاشگر الخايس ؟
مُلاذ : احسان
أيهم : احسان شنو ؟
مُلاذ : وين اتذكر اسم ابو
أيهم : بيا منطقة چان ؟
مُلاذ : و انت ليش تسأل
أيهم : هيج
مُلاذ : بس لا تريد تروح تعارك الولد
ترا جنا صغااار زعاطيط
أيهم : انجبي
مُلاذ : أيهم و الله احترمك و ما اريد اغلط عليك
أيهم : شحدج تغلطين
مُلاذ : لا بالله
أيهم : ما تغلطين تخافين مني
مُلاذ : متأكد ؟
أيهم : اي
مُلاذ : و الله اغلط
أيهم : يلا بيج خير اغلطي
مُلاذ : انجـ...
بعدني اريد اكمل و هو گبل باسني
ضربت چتفه مختنكه الخبيث
يوگعني بـ نفس الفخ يتحداني
و يدري بيه ما اخاف
بس حتى من اغلط عود يعاقبني و يخليني ابطل
وخر وجه يجر نفس و انا عطت ادفع بي
مُلاذ : دووووخر اختنكت
أيهم : شو اغلطي بعد
مُلاذ : ما اغلط لو تموت
ضحك بـ استهزاء ، تجى ظهره و هو يگول
أيهم : جبانه تخافين مني
مُلاذ : اي يلا اخاف منك
ما اسوي الي تريده لو تموت
أيهم : جبانه
وخرت من حضنه جريت المخده جوا راسي
انطيته ظهري خليت ايدي تحت المخده
و انا احجي
مُلاذ : امشي عني ابو النسوان
لينا علمتك ع الاستهتار تبوسك و انت نايم
و انت تبوسني بـ كل الحالات مستهتر
أيهم : مستهتر و لا فوصه
ارجع لـ لينا احسن الي
ع الاقل جانت مدللتني و تبوسني بدون ما اطلب
انداريت دحگتله خازرته ضربت رجله
مُلاذ : ارجعلها يلا
أيهم : اي ارجعلها ليش لا
مُلاذ : يلا روحلها ما اريدك ولي
عدل كعدته و حجا متحلف
أيهم : منو يولي ؟
مُلاذ : انا
ابتسم و رجع كعد بـ مكانه
أيهم : عبالي
مُلاذ : روح يم لينا يلا
حضن بطني و هو يحجي
أيهم : ماريد لينا اريدج انه
نام وراي ابتسمت و گلت : لا روحلها
أيهم : اشش لَـذه
غمضت عيوني ساكته
لمن خلا وجه بـ شعري و حاضن بطني
خليت ايدي فوك ايده يلي محاوط بيها بطني
صوت نَفسه يرجف احس بي يبلع غصته
مو اعرفه انا ما رح ينسى و لا رح يبطل يفكر
شمهما اسوي و شمهما اضحكه
انداريت اله خليت ايدي على خده احتضن جسمي دحگتله مغمض عيوني و دمعته تغرغر بـ طرف عينه لحد ما نزلت و وكعت على المخده
نزلت وجهي كدام وجهه و انا متمدده يمه
مررت ابهامي على خده ، فتح عيونه يدحگلي
حجيت بـ هدوء ادحك بـ عيونه
مُلاذ : محد حَبني كدك
بلع غصته حجا صوته يرجف
أيهم : و لا رح يكدر احد يحبج كد حبي
قربت وجهي اكثر اله ، اختلطت انفاسنا
مُلاذ : لا تبجي احنا مو اتفقنا؟
أيهم : لَـذه انه اعشگج ما جاي اتحمل اذيتج
رح اموت من النار المستقرة بـ گلبي
خل اموت لَـذه بس لا يصيرلج شي
مُلاذ : أيهم حباب بس اهدء
بعد ما عرفنا شي عن مرضي
أيهم : اذيتج و انتِ مريضة قهرتج و كسرتج
حبستج و جرحتج فوك تعبج زدتج تعب
انه شسوي بلاچ لَـذه انه اموت بلاچ
مُلاذ : عادي ما جنت تدري
أيهم : من شوكت تعرفين ؟ ليش ما حجيتي؟
سولفت اله من اللحظة العرفت بيها لحد هاللحظه بس اتخطيت لمن جنت اتعب و اتقيء و اكح دم
ما ردت اخوفه اكثر هو هم ما فوتها سألني
اذا صارت عندي اي اعراض
و صارلي شي مو زين بس كلتله لا و نكرت
ما اريد اخوفه اكثر
أيهم : كل يوم جاي تشوغ روحي على واحد بيكم
طول عمري رح يظل گلبي ينلچم عليكم
مُلاذ : قدر رب العالمين
أيهم : عقاب رب العالمين الي
مُلاذ : لا تفكر هيج
هو انت شسويت حتى رب العالـمين يعاقبك ؟
أيهم : ظلمت و انه مظلوم
مُلاذ : شنو ؟ ظلمت منو؟
هز راسه بـ رفض يهمس : انسي لَـذه
مُلاذ : منو ظلمت ؟
صفن يدحك بـ وجهي
نزل عينه من وجهي و رجع رفعها دحگلي
عگدت حواجبي ادحگله مستغربه
أيهم : ناس ظلمتهم
مُلاذ : شسويتلهم؟
أيهم : ضميت عنهم الحقيقة
مُلاذ : حقيقة شنو ؟
أيهم : ابوهم مات و انه اعرف بسبب منو مات
بس ما حجيت الهم
مُلاذ : لحظه شلووون يعني؟؟
صفن بـ وجهي ساكت
هزيت راسي بـ معنى "شنو؟"
أيهم : دكتور ويانا سوا عملية ابوهم
و غلط بـ العملية و ابوهم مات بس ما كدرت احجي
و همَ فكروا ابوهم مات هيج مو بـ خطأ طبي
مُلاذ : و ليش ما گلتلهم ليش ضميت عنهم!
أيهم : جنت اول مره ادخل وياهم
و شددوا علينا محد يحجي
سكتت و هزيت راسي بـ قبول
رجعت گلت بـ شك
مُلاذ : بـ شنو ظلموك؟
أيهم : شنو ؟
مُلاذ : مو گلت مظلوم و ظلمت؟
أيهم : صارت عندي عداوة وياهم
و ظلموني بـ شغلي
مُلاذ : ليش ما كلت لـ اهل المريض بعدين؟
أيهم : يلوموني لان ما گلتلهم من البداية
رفعت حواجبي و سكتت
مُلاذ : بس مو ذنبك
أيهم : لمت روحي لان ضميت
مُلاذ : ما عندك حل ثاني و جنت جديد عليهم
سكت و هز راسه
و انا ما اتحملت اظل كاعده اكثر و غفيت
ثاني يوم نزلت يم اهلي حاجيناهم
بعدين رحنا لـ الدكتور
شخصوني بـ سرطان الرئه
من بعد عدة فحوصات و انتظار ...
غاده :-
عفنا بيتنا انا و باهر و اجينا كعدنا يم اهله
جان أيهم مقرر يرجعون هو و مُلاذ
و يكعدون بـ بيت اهله
بس باهر اگله انا ارجع و اكعد يم اهلي
لان ما راهمه يعوفون اهل مُلاذ وحدهم
بـ شقتهم و يجون يكعدون يم اهل أيهم
حاولت اغير جو لـ هتان رغم دائماً هي مقهوره
بس انا و باهر سوينا كل شي حتى تصير احسن
لحد ما فعلاً بدت نفسيتها تتحسن
بس ما تنسى موت اخوها اكيد
و كل ليلة اصعد الگاها تبجي عليه
شكد هالشي صعب عليهم همَ و أُمهم
ابد ما نسوا أيمن رغم مرت فترة طويلة
ملامحهم دائماً ينقري بيها الحزن
يلي قاهر باهر أكثر أبو يلي ما اجا حتى
و لا شافهم و لا سأل عليهم
و ما حضر فاتحة أيمن بس اول يوم
بعدين مختفي ، قهر باهر كلش
باهر : طول عمره ما يهتملنا
بس مو حتى بـ هذا الموقف !
حاولت اواسي و انسي و بـ مرور الايام
صار ما يهتم لـ هالسالفة و اهم شي عندة اهله
يكعد يحجي وياهم ساعات من يرجع من شغله
حتى أيهم يجي يكعد و يسولفون
و يحاولون يساندون هتان و امهم
و واحد يسند الثاني
بس واضح نظرات الكسره الي بـ عيونهم
امي رجعت لـ بيتها ما قبلت تظل يمي
و ام أيهم وضعها تعبان و أيهم دوم يجي
يشد الها مغذيات و يتعارك وياها لان ما تاكل
لحد ما صارت تاكل لگمتين بس احسن من ماكو
باهر بس يرجع من شغله ياخذ هتان و يطلعها
يظل يفر بيها ، حاولنا نخليها تلتهي وي أدهم
تسكته لمن يبجي او تسويله حليب او تنومه
اي شي المهم تتلهى لحد ما تنام
حتى ما تظل تبجي طول الليل
و تصبح عيونها مورمه
اجونا أيهم و مُلاذ و اهلها
سوينا غده و تغدينا سويه و ام مُلاذ مدري شبيها
لا هي و لا ملاك زينات وجههن تعبان
و هنه تعبانات سألت مُلاذ گالت هنَ هيج من زمان
صعدنا كعدنا بـ غرفة هتان
صفنت عليهن كل وحده وجهها مضيم
ناقص يجيبون ملايه يحطونها بـ نصنا و تكمل
خابرت لـ نور گلتلها تجي لان ما اگدرلهن وحدي
و نوب القهر صفنت على رقم صافيناز
و اتذكرت من مُلاذ اجت و گلتلنا صافيناز
رجعت لـ سوريا يابه شكد انقهرت
سديت تلفوني و صفنت وياهن
لحد ما انفتحت الباب و دخلت نور
نور : بعد جيبن ملايه و الطمن
غاده : انا هم گلت
رفعت راسها مُلاذ تدحگلها گامت سلمت عليها
و انا ملاك و هتان هم سلمنا عليها ، كعدت يمنا
غاده : خل نلعب فد لعبه
مُلاذ : يا لعبه غاده زعاطيط احنا
خزرتها و اشرت بـ عيوني على هتان
دحگت لـ هتان رفعت حواجبها ،
هزت راسها بـ قبول
مُلاذ : اي يلا نلعب
هتان : انه مالي خلك
مُلاذ : لا حبيبتي رح تلعبين ويانا
و انتِ مثل الحبابه
ابتسمت هتان ساكته مالها خلك تجادل
مُلاذ : شنلعب ؟
صفنت افكر عندي ولد رح يصير بـ طولي
و انا العب العاب و العب الناس وياي
غاده : نسأل عن شعور و انتوا تگولون منو الشخص الي عشتوا هالشعور ويا
او منو الشخص الي تفكرون بي
اول ما اسألكم عن شعور معين
مُلاذ : كل شي ما فهمت
غاده : يعني ...
قاطعتني نور
نور : انا فهمت مثلاً تگلج شعور الفرحه
ف انتِ مثلاً تگولين الفرحه امج يعني من تشوفيها تفرحين او شعور الاهتمام مثلاً من تسألج عن الاهتمام يجي ببالج الشخص التهتمين اله
أو يهتم الج
غاده : اي بالضبط
مُلاذ : يلا خوش ابدن
غاده : بيمن نبدي ؟
مُلاذ : انا أخير شي
غاده : اوكي نبدي بـ هتانيزو؟
ابتسمت هتان ساكته
و احنا بدينا بيها حتى نغير جوها
و نخليها تسولف و تتفاعل ويانا
غاده : اممم ، شعور الاهتمام؟
هتان : اخواني
غاده : النقاء يعني تحسين واحد نقي
هتان : أبيل و أدهم
غاده : الهَم ؟ تحسين واحد مهموم
هتان : امي
غاده : التعب ؟
هتان : أيهم
غاده : الغموض
هتان : أيمن
سكتت و عيونها بدت تغرغر
غيرت سؤالي بسرعه
غاده : الفرح؟
هتان : باهر
ابتسمت و كملت
غاده : الحب ؟
دحگت بـ وجهي ساكته
حجت مُلاذ مقاطعتنا
مُلاذ : يلا دور ملاك
خزرت مُلاذ ردتلي الخزره
اندارينا لـ ملاك و ظلينا نسألها
غاده : الخوف؟
ملاك : انا
غاده : الاهتمام ؟
ملاك : مُلاذ و امي
غاده : القوة ؟
ملاك : مُلاذ
غاده : الاشتياق؟
ملاك : بابا رغم ما شايفته
عبست شفتي و كملت
غاده : الحب ؟
مُلاذ : هيو بعدها صغيره شبيج تركضين ورا الحب
غاده : يا عمي ابصم بالعشره ملاك رح تعنس
من وراج يا اختي عوفي البنيه خليها تتنفس
مُلاذ : انچبي بعدها صغيره
غاده : الله يساعدج ملاك خل نكمل بـ نور
نور : لا تسألني اسئله سخيفه
غاده : و الله ما تستحن
مُلاذ : ديلا اسألي لا تمسلتين
غاده : و الله انتِ التمسلتين حيوانه
جرتني مُلاذ من شعري
عطت و جريت كذلتها و البنات گامن يضحكن
كيفنا انا وياها من ضحكن البنات و هتان هم
مُلاذ : يلا ولي كافي ابدي اسألي لا ارفسج
غاده : اعلمج انا بعدين
مُلاذ : ديلا يلا تعلمني ام الاحم
غاده : ادبسز و الله
ضحكت ، جانت رح تگول ام الزلم
الادبسز هالكلمة لاطشه بـ حلگها
و شوكت ما تحاجيني تگلي هيج
غاده : يلا نور ام دمعه
نور : احجي عاد
غاده : الحب ؟
مُلاذ : كلنا نعرف خل اجاوب بدالها اركان
غاده : حبيبتي انتِ عندج عداوة وي شعور الحب؟
لو تغارين عليهن لو شنو؟
كل ما اسأل وحده عن الحب تجاوبين انتِ
مُلاذ : و انتِ شبيج بـ كل شي تلطشين الحب
ترا ما يوكل خبز حبيبباتي لا تغريجن هاي
غاده : عمي شنو من نقمة انتِ؟
عوفيهن يحبن سديتي قسمتهن
لو ها ها بس ابو نقمة الله يحبج
مُلاذ : شني؟
ضحكت و هي بعدين يلا فهمت و ضحكت
انداريت لـ نور
غاده : الاشتياق
نور : هم اركان
غاده : التعب؟
نور : انا او مُلاذ
مُلاذ : انتوا شبيكم مخليني الشعور السيء
تراني و الله بشر مثلي مثلكم
غاده : انچبي انتِ القوية مالتنا
شنسوي نقتدي بيج ما عدنا غيرج
شو انا گلت هيج و ملاك طكتها بجيه
ظلينا وحده صافنه بـ وجه الثانيه
غاده : يا ولج ملاك شگلت؟؟
يا هاي صدك تحجي البنية
مُلاذ : كملن هسه نجي
عگدت حواجبي ادحگلهن
اخذت مُلاذ ملاك و طلعت من الغرفة
انداريت لـ نور مستغربه
غاده : شبيهم هذول ؟
نور : مادري و الله
هتان : ملاك ضايجة انتبهت الها
غاده : حتى انا انتبهت بس ما يحجون شبيهم
نور : خاف علمود درجات
لو شي تدرن بـ ملاك تنقهر من اقل شي
رفعت اكتافي بـ عدم معرفه
و رجعت اسألها شويه و اجن ملاك و مُلاذ
كعدن يمنا گلتلي مُلاذ نكمل ، وصل دورها
غاده : ايييي اجا دورج
مُلاذ : اهو احجي خلصيني
غاده : الحُــب ؟
حجيتها و انا اجرها و الكل ضحك
و گالن البنات كلهن بـ صوت واحد
قبل لا هي تجاوب : أيهم
دحگتلهن تضحك
مُلاذ : غلط
غاده : هتان طلعت تضحك على اخوج
لعد منو اذا غلط ؟
مُلاذ : بابا
غاده : فهمت ، الاهتمام؟
مُلاذ : أيهم
غاده : الامان ؟
مُلاذ : بابا ، أيهم
غاده : المسؤوليه ؟
مُلاذ : ملاك
ملاك : شلون ؟
مُلاذ : انا احس نفسي مسؤوله عنج
ابتسمت ملاك و مُلاذ مسحت على ظهرها
و باست شعرها ، كملت
غاده : الصداقة؟
مُلاذ : انتن
غاده : التعب ؟
مُلاذ : امي و أيهم
غاده : الفرح
مُلاذ : أيهم
غاده : شنهاي كله أيهم ؟؟؟
مُلاذ : أيهم محسسني بـ هواي مشاعر
انتِ گلتيلي الحب اول شي و انا ما گلت أيهم
لان أيهم منطيني شعور احلى من الحب و أثمن منه
غاده : خرب شرفج طلعتي تفتهمين
مُلاذ : انچبي ادبسز
غاده : هههههه زين الثقة ؟
لان حضرة جنابج بيه ما تثقين خل نشوف بيمن
مُلاذ : بـ أيهم
غاده : أيهم بسبب كثرة اختيارات مُلاذ اله
فاز ويانا بـ كلاص ستيل يصير بي المي بارد
و طيب
مُلاذ : شكد تافه و ين باهر
خل اگله الله يساعده عليج
ضحكنا و نزلنا جوه و همَ كاعدين
گالو أيهم و مُلاذ رح يسافرون لـ الخارج فترة
و خالة فيروز و ملاك رح يبقن هنا
هسه فهمت ليش ضايجين و مقهورين
دمعت عيون خالة فيروز و مسحتهم
گالوا باجر يروحون و رادوا يگولون النا
مُلاذ : بس مو بـ شكل دائم يعني فترة و نرجع
باهر : زين ليش خيركم؟
مُلاذ : تعبنا كلش بـ هالفترة و نريد نسافر
بلكي تتحسن نفسيتنا و نصير افضل
باهر : زين تسوون اذا يفيدكم هالشي
خوش تسوون
أيهم : ما نطول اصلاً نرجع بسرعه
مُلاذ : اي
باهر : لا يابه اخذوا راحتكم
انه هنا يم اهلي و بيت خاله فيروز يمي
لا تخلون بالكم عليهم
مُلاذ : ردت اخذهم وياي بس يخرب استقرارهم
هناك رح نكعد بـ فندق و ما ادري شكد و نرجع
و ملاك عدها دوام رح يظلون محيرين
باهر : لا يابه شالسالفة يمي لا تخلين بالج
مُلاذ : ما تقصر ، انا اصلاً وصيت سلطان عليهم
هز باهر راسه بـ قبول شويه و گاموا طلعوا
ملاك راحت تغسل لان جانت تبجي
و مُلاذ راحت وراها رحت وراهم اشوفهم
سمعت ملاك تحاجي مُلاذ
ملاك : لو مخليتنا نجي وياج أيهم
شلون رح يگدر وحده؟
مُلاذ : لا ملاك يخرب نظامكم و انتِ عندج دراسه
انا و أيهم ندبر روحنا و يمكن جسار هم يجي
ملاك : بس تنتبهين على روحج و تخابرينا
هزت راسها مُلاذ بـ قبول و ملاك حضنتها تبجي
بعدين طلعوا كلهم و راحوا و احنا ودعناهم و دخلنا
ملاك :-
صارت الدنيا صبح و انا و امي ما نايمين
و مُلاذ بقت يمنا الليل كله تهدي بينا
حل الصبح و هي خابرت أيهم گلتله ينزل
تريكنا سويه و بعدين صعدوا يبدلون
و نزلوا همَ و أبيل
اجو جسار و باهر و امه و سلطان
جسار و سلطان يعرفون بـ مرض مُلاذ
بس الباقيين محد يعرف حتى ما يخافون
و هم أيهم گال اذا عرفوا ينطون ردة فعل
و رح نحتار نواسي بيهم و نقنع بيهم
وكفنا نودعهم و اني توصي مُلاذ
تدير بالها على نفسها و تبچي
صعدوا بـ السيارة يودعونا
انا و امي فحطنا من البجي ،
سلطان يمنا يهدي بينا ، راحوا باهر و امه
دخلنا البيت دموعنا على خدنا
لـ الظهر راح سلطان
يجيب غده من برا لان تعبانين
و امي مو بـ حال تسوي غده ابد
دك الباب ، لبست شالي و گمت فتحتها
دخل سلطان يدحك بـ وجهي و عيوني مورمات
سلطان : گولن يا الله ترا مو حاله هاي
امج تبجي و انتِ تبجين
حتى اختج اتاذت زايد ما هي متأذيه !
ملاك : سهله اختي يصير بيها سرطان؟
سلطان : مو سهله بس گاللولج اكو علاج
و ممكن تتعالج و هسه رح تدخل بـ فترة علاج
ادعي الها بدال ما تبجين وراها !
سكتت كلام سلطان صح
بس ابقى مقهوره عليها و ابجي
امي ما قبلت تاكل بس سلطان خبلنا
خابر لـ مُلاذ گاللها ما نقبل ناكل
خابرتنا مُلاذ لعبت بينا لعب
و تلوم نفسها لان گالت النا
سكتنا و من لا چاره اكلنا ،
معدتي احسها ما تتقبل شي
شويه و امي دخلت نامت
رحت دحگت لـ سلطان ايده جوا خده و غافي
ردت اكعده بس ماكدرت ، اخذت غطا و غطيته
كعدت ع القنفه الكدامه و دمعتي تفتر بـ عيني
ما اكدر اسكت روحي و لا اكدر انسى
كلش انقهر من اتذكرها لمن سولفت النا
و احنا و لا شخص انتبه لـ حالتها و تدهورها
گمت سبحت و بدلت و مشطت
كعدت ادرس لـ المغرب
امي و سلطان بعدهم نايمين
رفعت عيني لمن اجتني رساله على تلفوني
من سلطان دازلي
-نايمه ؟
-لا
- ليش عفتيني نايم ما كعدتيني؟
-مبين تعبان ما كعدتك
-لا تضوجين مني لان حاجيتج الصبح هالشكل
بس لازم تتعلمين تصيرين قويه
و ما تبجين على كل شي
- حالتها جانت تتدهور كدامنا و محد انتبه الها
-تعالي للصاله احاجيج قبل لا اروح
غلقت تلفوني گمت لبست شالي ، طلعت لـ الصاله اتقدمت كعدت ع القنفه الكدام سلطان
امسح بـ دموعي و ينزلن
سلطان : ليش هيج ملوكه ترا مو زين و الله
ملاك : مو بـ أيدي
سلطان : ملاك تعرفين اختج اكثر مني
و أيهم گاللكم تتعالج عليمن كل هالبجي بعد
تشتمون كفى ايدكم و تعرفون بيها مريضه لو شنو؟
ملاك : مو بـ أيدي و الله
سلطان : لا ملوكه بـ أيدج كومي غسلي وجهج
و اسندي امج مثل ما مُلاذ جانت ساندتكم
انتِ مو صغيره و تفتهميني
مسحت وجهي بـ اثنين ايدية
و هزيت راسي بـ قبول
ملاك : تمام
سلطان : من تريدين شي خابريني زين ملاكي؟
ملاك : تمام
سلطان : اقفلي الباب وراي
اروح اجيب الكم عشا و اجي
ملاك : تمام
طلع من البيت و انا سديت الباب
شوي و كعدت امي و خابرت على مُلاذ
ماكو ما يتصل بيها عرفناها بالطيارة
كعدت امي تصلي و تدعي الها
و ترجف و تبجي مقهوره و انا شكد ما اقوي نفسي من اشوفها هيج بعد ابد ماكدر اسكت روحي ...
نور :-
كاعده اناغي راكان و اهزه على رجليه
رفعت عيني لمن انفتحت الباب و دخل عزيز
دحگتله عگدت حواجبي بـ استغراب
تعابيره وجه مگلوبه گلاب ، شلت راكان بـ حضني
و گمت وراه اشوفه ، دخلت لـ غرفته دحگتله
نور : عزيز شصاير؟
اندار يصيح متخبل
عزيز : ليييش مااااا يقبل بيه ليش
مو انطينااااج اله !
حجاها و دفر الميز الي يمه
اخترع راكان و گام يبجي و انا ما مفتهمه
نور : فهمني شكو و بطل هالتصرفات
مو اختك الصغيره كدامك
غمض عيونه حيل و دفر باب الكنتور
شعره مهوس و هو وجه احمر
عفته و طلعت من الغرفه ، نومت راكان
گوه لمن نام شلع گلبي ، رحت لـ عزيز
لگيته واكف كدام الشباك و يدخن
نور : كم مره گلتلك تبطل تدخن ؟!
عزيز : عوفيني نور عليج الحسين عوفيني
نور : فهمني شصاير شكو؟؟
عزيز : اركان الـ**** ابن الستين ****
ما يقبل اخطب ليان
نور : شنو اوكف لحظه فهمني من البداية!
عزيز : روحي حاچي اله گليله يا ابن الستين **** عزيز مو قبَل بـ خطوبتنا ليش ما تقبل بـ خطوبته
من ليان
نور : رح اضربك بـ گفى ايدي على حلكك
لا تصير مثل اسكندر اكعد كدامي و فهمني شكو
و انا اسوي اللازم ، احجي بسرعه
عزيز : يابه انا احب اخته و اخته تحبني
نور : دهر دهرك شوكت لحگت تحبها
عزيز : نور لا تخبليني هو شوكت لحك يحبج
ترا انا مخلي ايديه جوا الجَمر و ساكت
اگول تعبتي هواي بحياتج و تستاهلين انسان زين
و من خطبج ما گلت شي لان انتِ اكبر مني
بس مو معناها انا ما عندي غيره عليج
و ما اضوج من افكر اكو رجال غيري يحبج
لو يريدج تكونين ويا
نور : و الله كبران و طالعلك لسان
احجي شبي اركان وياك ؟
عزيز : رحت گلتله يابه انا اريد اخطب ليان
و اشتغل و ما اخليها بـ عازة شي و اخليها
بـ عيوني هو الخايس يگلي لا ما انطيها بعدها صغيره دخيلك يالحسين راح اركع روحي بـ الگاع
نور : شگلتله من گلك هيج؟
عزيز : فشرت عليه شگلتله حاجيته و حاولت
ما قبل فشرت عليه و اجيت حرك دمي
نور : ولك عزيزززز صدك تحجي انت!!
شنو تفشر عليه هاي سوايه !
عزيز : و لو يموت ما يشوفج بعد
اعلمه انا هالخايس
نور : اتادب عزيز
عزيز : نور فكي ياااخه عني
و هذا الجلب الا اطيح حظه انا اعلمه
نور : الله اكبر عليكم الله اكبرررر
گمت طلعت من يمه
رحت لگيت تلفوني محترك حرك بـ الرسائل
من اركان و يغلط على عزيز
طلعت لـ الحديقة و خابرته
نور : انتوا من كل عقلكم تسوون هيج !!
اركان : نجوم السما اقرب اله
من سالفة يخطب ليان
نور : انت شو ما تعرف تحجي !
حياتهم لو حياتك حتى انت تقرر بدالهم ؟
لا راوغ وياك و لا لعب بـ ذيله اجا و خطبها منك
عليمن بعد هالتصرفات و رافضه و مدري شنو؟
اركان : وين لگاها و حبها ؟؟
شهالاكلان *** هذا
نور : اركان تغار و تخاف على اختك ميخالف
بس انت شنو شفتهم ؟ لعد اذا نقيسها على هيج
باجر عگبه اي واحد يجي يخطب اختك
معناتها هو حبها و صارت بينهم علاقه يلا اجا خطبها
اركان : انتِ صايرة ما تعرفين تحجين
نور : انت صاير مدري شبيك على طول عصبي
و تتعارك و تصيح و ما يعجبك العجب
و فوكاها تلوم بـ عزيز حتى ما فكرت تسأل اختك
شنو فرقك عن اسكندر و عن ابوي ؟
جاي تعيد بيهم نفس الصار بينا
خاف عبالك هاي رجوله ترا مو يم الرجوله حتى
اركان : لسااانج لا تتجاوزين حدج نور
نور : شنو الي لساني ما متجاوزه حدي
هاي الحقيقة انت جاي تسوي نفس تصرفات اسكندر بالضبط و انت تعرف هالشعور شلونه
اجوا الك بالحلال بس انت تريد تدخلهم بالحرام گوه
نور : بعدين انا مو اخت عزيز
عبالك هو ما اله كلمه؟ لان اصغر مني
ترا اول شي سويته انا رحت و سألته اذا قابل
لان ما يهمني زواج و لا حياتي
كد ما يهمني عزيز و هسه اذا رفض زواجنا
ما راح اعارضه و لا رح اگول لا
اركان : ها هيج صار الحجي !
نور : شلون ما تريد مصلحة اختك
انا هم اريد مصلحة اخوي
اركان : خل يرفض و انتِ لا توافقين
عبالج هاي الصعبه يمي ؟
نور : طبعاً مو صعبه يمك هو انت حبيتني اصلاً ؟
كل الصار و خطوبتنا
لان انت شفت بـ ايدي طفل و عرفت الصار بيه
انقهرت عليه و اجيت خطبتني
اركان : نور لسانج الزمي
لان زله وحده اذا زليتيها بعد بهالحجي
رح اطيح حظج
نور : عليمن تهددني ؟ مجذبه قابل ؟
اركان : انعل ابو اليتزوج لابو حتى اليخطبج
نور : اي يلا خوش عود باجر تعال و انطيك الحلقة
و نفسخ ما دام بعدنا بالبداية
احجي و دمعتي بـ عيني
و الغصة واضحه بـ كلامي و اركان اتخبل
ظل يصيح و نتعارك بـ الاتصال لحد ما گمت ابجي كلامه كلش قهرني عبالك انا لعبه بـ كل سهوله
يگلي عادي لا تقبلين ،
بـ الاخير سكتنا ثنينا و انا بقى صوتي ابجي ، صارت صوت ضربه و انسد الاتصال
اعرف سوالف اركان كسر التلفون
كل ما نتعارك هيج يسوي و يكسر التلفون
گمت من المرجوحه و دخلت غسلت
رحت لـ يم راكان خليت ايديه تحت خدي
و انا اتأمله و هو نايم و فاتح حلگه
رحت اتمددت بـ فراشي اگلب بـ التلفون
عفت التلفون و گمت اتوضيت و صليت ، خلصت
رجعت اخذت التلفون اگلب بـ محادثتنا انا ويا
و مقهوره دموعي تنزل و امسحها
رفعت عيني لمن اجت الي رساله من رقم لالي
-افتحي الباب
-شنو؟
-افتحي الباب
سديت تلفوني و گمت لبست شالي
و طلعت لـ برا فتحت الباب ، مديت راسي
دحگتله اركان ، دفع الباب و دخل وسدها
نور : ما تتحمل للصبح تنتظر نفسخ
نزلت راسي اريد انزع الحلقة
ما تطلع من اصبعي ، ناشغت ابجي
و هو لزم ايدي
نترها من فوك ايدي الي بيها الحلقة
اركان : نزعيها حتى اكسر اصبعج الشلتي منها
و ايدج الي نزعتي بيها الحلقة
حجاها و سحبني لـ حضنه
مسح على شعري من فوك الشال
و انا ما اتحملت بجيت مهضومه من كلامه كلش
اركان : اشش كافي بجي
نور : و لا اهمك انا
اركان : تهميني و اكثر من كل شي
بس كلامج يزرف گلبي
تخليني احچي مو خوش حچي وياچ
و بعدين تبچين تعيلين و تبچين
نور : ما حجيت شي غلط انت...
كمم حلگي بـ ايده و هو حاضنني
اركان : اسكتي لا تحرگين گلبي بـ كلامج
مسحت دموعي و حضنت رگبته
دقايق و ابتعدت ادحگله ،
مسح دموعي بـ كفى ايده
نور : وافق على عزيز
اركان : خل يولي السگط يفشر عليه
الزمه انعل والديه اشبعه نعل اذا شفته
نور : اركان خطيه ، يعني انت تجي بـ نص الليل تحضن اخته حلال و هو يجي يخطب اختك حرام
اركان : بابا بعدهم صغار تفتهمين عليه؟
يعني انا ازوج ليان هو يعرف ليان شنو؟
لا يغرج عمرها ذاك اليوم اظفرها مكسور
لگيتها كاعده بـ الزويه تبجي
مو مال مسؤوليه و بيت بعدها صغيرة
نور : تتعلم و هو هم يتعلم
شنو شفت عزيز قابل متزوج من قبل ؟
اركان : بابا عزيز شاف ضيم و ظلايم
شايل مسؤوليتج و مسؤولية عمته جان
بس ليان حساسه اذا يبزها تجيني تبجي
نور : اگلك و انت شنو شايفني
اطلع عماله من الصبح ؟
انا هم اليبزني ابچي
و ما جنت اشتغل بس من تعينت
و ما شايلة مسؤولية احد
لا تدور حجج اركان وافق على خطوبة عزيز
اركان : اوافق عليه بس اذا اجتني بـ يوم ليان مقهوره من ورا اطيح حظه و حظ ابو خوش؟
نور : اي هسه وافق عليه
اركان : امشي صيحي طايح الحظ
نور : لا تحاجي هيج اركان ترا چبير
عيب تحاجي هيج!
اركان : اي يلا صيحي
نور : تمام
مشيت اريد اصيحه وكفني اركان
اركان : نور
نور : ها
اركان : شو تعالي ؟
نور : شنو؟
اركان : تعالي هاي شنو بـ شالج؟
نور : شنو
اتدنيت لـ يمه مستغربه
و هو جذب خصري بسرعه و باس خدي
ضحكت و خليت ايدي على چتفه
نور : اركان ترا بعدنا مخطوبين
اركان : اسكتي رح نتزوج طك گلبي
و بعد لا تبجين انعل خيرج اذا بجيتي
ابتسمت و دفعته بـ خفه مستحيه
نور : خل اصيح عزيز
دخلت صحت لـ عزيز
عصب شنو تخابرينه و شنو يجي لـ هنا
طلعته دفع لـ اركان و مديت راسي ادحگلهم
خشن صوته عزيز و راح يمشي لـ اركان
بـ طريقه تضحك
عزيز : شتسوي هنا ؟ مالك مره يمنا
جره اركان من اذانه
اركان : مساع عليمن فشرت
عزيز : عليك
اركان : طايح الحظ شلون تريد انطيك اختي
و انت بـ هاي تصرفاتك الخايسه ؟
عزيز : تريدني ابوس كصتك يعني
اركان : باوع ولك تخطبها و تتزوجون
بس ماكو اذا بجيتها اهل اهلك اشعلهم
عزيز : و انت بجي نور و تشوف
اركان : امشي ولي منا يلا
داره و ضربه جلاق اندارله عزيز
شمره بلطوبه الصغيرة الي بـ ايده
دائماً بـ ايده و ما يعوفها ابد كلش يحبها
لزمها اركان
اركان : بعد لو تموت ما انطيها الك
عافه و طلع ركض ورا عزيز طلع ورا ياخذ الطوبه
ضحكت و دخلت جوا بالله ذوله كبار
جنهم زعاطيط يتعاركون و يتضاربون
بس لان صايره بيناتهم ميانه هيج يسوون
و ادري بيهم واحد ما يزعل من الثاني ...
مُلاذ :-
على طول ما انا بـ الطيارة عندي غثيان و دايخة
من وصلنا و نزلنا من الطيره رحنا لـ الفندق
اخذنا سويت كامل النا و سويت لـ جسار
اول ما دخلت گبل نمت
فزيت و انا مغمضه عيوني ، مختنكه كلش
رفعت راسي صداع ينهش دماغي
دحگت بـ وجه أيهم الغافي يمي و أبيل بـ نصنا
بعدني كاعده و صار عندي غثيان
قوي ركضت لـ الحمام
و أيهم على صوت ركضتي فز
دخلت اتقيء دم حسيت روحي رح تطلع
و أيهم يمي متخبل ، روحي راحت
دايخه و لازمه بـ ايد أيهم
نزلت لـ الگاع مخنوكه و أيهم وراي
بعدني هستوني اريد اكعد و رجعلي الغثيان
ضربت ايد أيهم بـ ايدي اتشبت بيها اريد اوكف
رفعني بسرعه و رجعت اتقيأت
دارني أيهم اله يغسل بـ وجهي
و انا ما اكدر اتحمل اكثر ،
گبل اغمى عليه و صوت أيهم يصيح و جسار
صحيت لگيت روحي بـ المستشفى
و مشكليلي بطالة دم ، نزلت عيني لـ أيهم
الي مخلي ايديه بين راسه و صافن بـ الگاع
حسيت بلاعيمي مشحرجه ماكدر احجي حتى
رفعت ايدي بـ صعوبه ندسته رفع عينه الي دحگلي
عيونه حمر و مورمات ،
بسرعه صار يسألني عن وضعي
اشرت اله ما اكدر احجي و هو فهمني
گلي رح نبدي العلاج و ما بقى شي
و حاجا الدكاتره و اتفق وياهم ،
هزيت راسي بـ قبول همست بـ صعوبه
مُلاذ : جسـ...ـار
أيهم : لا تتعبين روحج راح يشتري لـ أبيل
هسه نامي و ارتاحي نسبة دمج قليله كلش
و جاي نخليلج بطالة دم حتى تصيرين احسن
رفع ايديه يبوسهم و عيونه تدمع
مسحت دمعته بـ صعوبه بـ اصابعي
جسمي كلش تعبان گوه اتحرك
و ايديه كلها مزرفه و كدمات زرك
أيهم : امج خابرت گلتلها نايمه
من تگدرين تحجين گليلي حتى ندزلها رساله
هزيت راسي بـ قبول
حركت ايدي اله بـ معنى "نام يمي"
أيهم : ما اكدر اخاف اعورج
هزيت راسي بـ رفض
كام حول مكان تعلاكة المغذي الي بي دم
و تمدد يمي ، نام وراي ، اخذت ايده
حاوطت بيها بطني و غفيت لمن حضنني
هتان :-
اتقدمت من الشارع
امشي ناحيته ، مبتسمه
هتان : حبيبي
ابتسم بـ وسع و اتقدم حضنني
-اشتاقيتلج
هتان : اكثر .. بس لا تحضنني لا يشوفنا احد
- محد يشوفنا لا تخافين لو ما تريديني؟
هتان : سيف لا تضوجني
- ما اضوج هالعيون الحلوة
تعالي اصعدي حبيبتي
فتح الي باب السيارة
اتقدمت صعدت ، دحگت اله مبتسمه
هتان : وين رح نروح؟
-لـ بيتي ؟
هتان : لا لـ مطعم
سيف : تخافين مني انتِ؟
هزيت راسي بـ رفض
هتان : لا بس ما ارتاح اساساً
لان زعلت وافقت ع الطلعه اليوم
ما جنت رايده اطلع
سيف : اي صيري حبابه و لا تضوجيني منج
شغل السياره و خلا ايده ع الگير
خليت ايدي فوك ايده و رفعت عيني اله
هتان : من زمان اريد اسألك
ليش دائماً تلبس چفوف ؟
صار حلمي اشوف ايدك بدون چف
ابتسم و گال
- شوفيها بس لا تخافين من تشوفيها
هتان : ليش شبيها؟
اخذتها بـ فضول بين أيديه
نزعتها الچف وسعت عيوني مصدومة
عاينت لـ اصابعه ثنين مكطومات
هتان : اصابيعك؟؟؟
رفعت عيني ادحگله و ارجع عيني لـ أيده
ضحك بـ هدوء ، سحبها مني
لبس الچف الجلد الأسود
بـ عيونه نظرات و على ثغرة ابتسامه استغربتها ...
****************
- يتبع الفصل التالي اضغط على ( رواية جرح الأيهم ) اسم الرواية